Thutiams2- Last

THUTIAM(S2) - Last Chapter

Ziaktu: Toni Râlte

Sangpuia chu a vir sek mai. Va hmuah tak a náp hial. Mahse, a motor a pan mek laiin an rawn thleng ta a. A rang a rangin a va tlan phei nghal. Lawmsanga chuan Nauteii zawi hniang tawh chu a rawn pawm chhuak a. Zah pawh a dawn zo tawh lo,, " ka lo pawm ang e" a ti a, a laksak nghal. A hmangaih a enchim loh, men pawh meng tha peih lo, zawi ngiai mai a hmuh meuh chuan, tlangvala pumpa mah nise a hnuk a ulh hial mai. Hmanhmawh takin casualty-ah an luhpui a, Nguri pawh mittui hru chawt chawt chungin a rawn lut ve nghal. Nurse te chu an che sawk sawk mai. Damdawia an jection zawh hnu lawkah Nauteii thaw chu a rawn hah ţan ta tlat mai a! Mangang zetin nurse an ko chul a. Doctor lah a lo thleng mai thei si lo, Lawmsanga mangang thinur tawh bawk si chuan, "Hrep tak che u hian, in va che muang ve. Ka fanu duatlai nikhaw hre lovin a leh reng saw" a ti tuar. Nguri'n, "Lawmsang.. " tiin a lo khap vat. Nauteii, hmeichhe hlim thei leh hrisel, harhvang tak, tawng chu sawi loh chet pawh che peih lo va a let bal chu a chhungte tan thil ennawm tak zawng a ni mawlh lo a ni. Mapuia phei chu a chhuak daih. A nau thaw hah, a âwm sêp dawrh dawrh a hmuh chuan a sahal tlat nia! Doctor a rawn thleng ta hram a. Nauteii chu oxygen te an hiptir ta bawk a, Rul chukna hmuamhma an zai vena lai kha Doctor chuan a han en a. 

"In la chhuak kim lo a nih dawn hi. A hlauhawm pha tawh lo turah ngai ang. Ka'n zai nghal ang e" a ti sawk sawk a. Nauteii erawh a thaw a nawm deuh tak vangin a muhil dawn titih a, a chau ngawih ngawih mai si. Duat taka a lu-a chul heuh heuhtu hmel chu a han hmu phe ruai a. Sangpuia a ni tih a han hriatna ringawt pawh chuan a tithlamuang ve hle a niang. A hmel pawh a hlim ta deuh sawt hian a lang. Doctor chu a che hmanhmawh bawk a, kar loah tûr awm zawng zawng chu a siak chhuak thei ta a. A chawn dul vel erawh nakin lamah a la reh mai tur thu a sawi a. Damdawia an chiuna khan a chuap leh lung tùrin a fan tur a veng bawk a. Nauteii chu a tha vat mai ang chu. Hnathawka chhuak an ni bawk nen, an thawmhnaw te pawh thawmhnaw pangngai a ni lo va, Nauteii chu Doctor chuan, "Admit kher pawh a ngai lo vang. Naktukah vawi khat chiu leh a ngai dawn a. Admit in duh zawk pawn a pawi lo va" a tih avangin, Nguri chuan,, "Admit lo mai rawh. Nurse kan hnaih tho a, kan lo ti ve thei mai ang " a lo ti a. 

Lawmsanga chuan, "Mahse, Ngur, a thaw te hah leh ta se," a lo ti vat. Doctor chuan, "A thaw hah kha chu damdawia kan chiu vanng a nih kha.. Lehpekah chuan a hah tawh lo vang" a lo ti vat a. Admit loh chu an titlu ta a ni. 

"I fel hle mai. I lo ngaihtuah a. In lamah pawh i rawn kan ang chu" An hawn dawn chuan Lawmsanga'n Sangpuia bulah a ti mawlh mawlh a. A fanu bialpa chuan a lung a thlu ve hle a niang. 

"Tehreng mai.. Ka rawn leng dawn nia.. Chanchin min rawn hrilh ve u la aw.. " Sangpuia pawh chuan a lo ti ve a. An inthen ta phawt. 

In chhung a lut chu a reh ruih mai. A hawi kual ruk ruk a. Kawngka an kalh bawk si lo, thawm an nei bawk si lo a ti rilru nuah nuah a. "Terin" a han ti a. A reh vung vung. 

"Candy" a han ti leh a. A fanu aw hriat tur a awm chuang lo. Roomah a lut a, tumah an awm lo. Mak a ti angreng hle. Tun angah te chuan an lo awm thap zel sia. Terini number hmetchhuakin a call ta a. A ring ral thak. Chek hluk chungin a phone chu khumah a thehthla a. Mahse, khumah chuan hmuh a nei ta. Pregnancy test kit a lo awm ran mai! A la vat. Khai! A lo positive kalh mai. A nui hawk a. A hlim tih a mitmengah a lang chiang kher mai. A nuih mek laiin room kawngka chu a rawn inhawng a. A sam huh hniang chungin Terini a rawn lut zan zan mai. A nui sen sen bawk. Muanpuia mitah chuan a va hmeltha em aw.. A lo pawm chawt. A beng bulah, "Ka va hmangaih tak che êm.. Ka lawm e aw.. " a ti sup a. Terini pawn a lo kuah ve hnâp a, dak vaha a pasal melh sawr sawr chungin, "Ka hmangaih che" a ti ve sap a. Tumah an awm lo bawk a. An infawp vawng vawng mai. Hmm.. Muanpuia pawn a duhthusam ang tak chhungkua a din ve chho dawn ta niin a lang. 

Nauteii pawh a mu tha thei hlauh a. An buai zui lo, a lawmawm khawp mai. A u erawh chuan a vil deuh reng tho. Nguri pawh a u Remsanga te nen inbiain, chanchinte an han inhrilh a. Remsanga fanu Seni khan thla leh maiah pasal a nei ve dawn a, an chhungkuaa va kal leh ngei pawh an tum hle. Rinfela te pafa en erawh an la khawsa ve naw naw a, nupui lam chu a ngaihven vak rih loh a nih hmel. A fapa te pahnih kha rin aiin An puitling reuh a, Malsawma phei chu an eirawngbawltu ber leh in chhungkhura che ber a ni a. Nguri chuan a lainat viau nain, An pafa chu an la damkhawchhuak ngeiin a ring thung. 

Pi Lawmi khawhar lungleng chuan an chhungkaw kim lai thlalak enin a mittui a hru zauh zauh mai. Nupa azawnga inngeih leh khawi kipah pawh inzui ral ral thin, fa enkawlna kawnga khawtlang pawhin an fak dun em em kha an ni a. Pi Lawmi tan chuan a dar lehlam chauh ni lo, a dar pahnih sahthlak ang maia na a ni. A tu leh fate hmaah erawh lungleng angin a lang duh ngai lo, an rilru tihhrehawm a duh bik lo a ni. Mahse, a famo Nguri hian a chîk em em tih a hre lo a nih hmel. Tin, a tupa duat Mapuia tak pawh hian a pi rilru tur chu a hrethiam ve ruak a, a ngaihtuah ru em em thin. Lawmsanga tet laia an thlalak a en lai tak chuan, "Nu, hei thingpui… ehe! Thlalak i en law.. Ka lo en ve" tiin Nguri chu a bulah a rawn thu nghal a. A mit nuai chawt chawt chungin, "Aa.. I pa ka ngai thut mawle.. " a lo ti sap a. 

A nu lainat hmel takin, "I ngai lo zawk ngawt hian ka hre thin.. Mahse, a rukin i tawrh tho chu ka ring a. Awiii.. Kan Lawmsanga tetlai chhiatzia hi.. " tiin Lawmsanga tetlai thlalak kawh pah chuan a nui hawk hawk a. Pi Lawmi pawh chuan, "A suakbak thei sia, Lawmsanga tluka nau tihmawh kha an vâng ngawt ang. A u te pawm an nawm nen, mi kha a tirethei teh asin" a lo ti ve suam suam a. 

"U Teteii hi a tleirawl lai ka hmu chak, a chhe lo ngawtin ka ring a ni" Nguri chuan a ti a. Pi Lawmi chuan, "Kan Nauteii tleirawl lai nen hian an inang a ni tawp.. Mahse, Teteii chu Nauteii aiin tlemin a chum deuh a. Ani pawh kha a â thin phawng phawng sia, lawm kha a hlawh thei teh mai a sin" nuamti zet hian a lo ti sar sar a. 

Thingpui chu an in pah a. Nguri chuan thlalak chu a keu pah zel bawk a. 

"Nu, Ka pa hi a hmeltha ka ti ngawt mai. In hunlai phei chuan a luck ngawtin ka ring. U muanpuia hian a chhun ta ber bawk a" a ti leh a. A nu rilru chawhthawha a khawharna lakbosak chu a tum ran mai a. Tin, Hetiang hun hlui han sawi hi Pitar leh putarte nuam tih ber a ni tih a hre bawk. Pi Lawmi pawh chuan an nunhlui mitthla chungin an pa nen an intawn dan te chu a sawi sep sep a. A hun laiah a cheng tih a hriat hle. Nguri chuan ngaihnawm a ti bawk a, a sawitu phur bawk. Chumi zan chu Pi Lawmi pawh rilru hlim takin a muhil ve thei. A vanneihzia te a chhut neuh neuh a, a thian thenkhat an famo ten an ngeih loh vanga rilru hrehawm leh rethei reng renga dam pawh thlahlel thei lo khawpa awm te an awm laiin, A nulat lai pawha sawi kai hat, sex video nei khawpa nula tenghneng anga ngaih a famo Nguri chu tunah chuan a mo a ni lo ang tih a hlau ta kher mai. Hmeichhia chu an tlakna leilung leh a enkawltute azir tih hi a dik zia tilangtu pawh a ni ngei ang le. Anmahni fel chu thuhran, Nguri hian Lawmsanga a hmangaih êm a, Lawmsanga chhungte pawh a hmangaih lo thei lo zawk a ni ber. 

"Naute, eng nge.. I duh! " Mapuia chuan a nau tal neuh neuh bulah a va ti vat. Zing dar 3 a pel tawh a. A nau vil pahin games a khel pek a. An laklawh ta zel a nih hmel. A û melh hû pahin, "Ka tui a hal" a ti sap a. Tui a pe vat. A in khawlh khawlh a. 

. "A nu te an mu tawh mi! " a ti a. 

"Mu daih tawh e. Nang pawh mutthilh leh tum rawh. A tlai tawh alawm" a lo ti a. 

"Ka zun a chhuak alawm" tih pahin a tho a, a ding thut chu a lu a hai lutuk, a petek nawk, Mapuia chuan a lo kuah hman hlauh. An inkuah phei a. 

"U, kawngka kha khar suh aw. Ka hlau" tih pahin a kekawrte a phelh sawk sawk a. A zung ta sur sur a. Mapuia chuan lehlam a hawi vat, "I va dawih e aw" a ti sup. A zun zawhah an inkuah phei leh a. 

"I van mengrei em em " a mut tawh hnu chuan a ti a. 

"Ka inkhel leh a.. Ka mu ve tep" a lo ti a. 

"Ka mutthilh hma chu muhil rih suh" a lo ti leh dat. 

"Hlauh tur a awm lo. Dawih viau suh" a ti hluk. 

"Ka mumangah kan huanah khan nangmah nen kan lo kal a. Tuikhuah atang khan apa hi a lo chhuak a. A hmai a thi vek a, ih, a hnungzang te hi vuak hrep ang hian a lo awm a. Va pan ka tum a, nangmah hian min lo kuah bet tlat a. Ka lo tap vak vak a. Chuan a pa chu tuiah pawh a let leh a. A pil bo daih a.. U, Apa hi thi ta se.. Engtin nge kan awm ang" ţah aw ţiau hian a ti ta sep sep a. Mapuia thinlung a dek hle. 

"A thi lo vang" a'n ti ngawt a. 

"Thi ta se, Api te nen chauh kan awm dawn sia. " ngaihtuah nei tih hriat zet hian a ti a. 

"Mutthilh tum rawh.. Bawihte" a u chuan a lo ti vat. 

Ani leh ni lo anga tawngkam fel fai tak hian, "Û, apa a thih hunah chuan Anu nen min enkawl a ngai dawn a nia aw" a ti sap a. Mapuia hnuk a ulh lek lek.. A nau mitah tak zuk enin, "Ka ti ngei ang. " a ti nghet charh. A nau pawh a thlamuang ta nge, a chhing ta vang vang a. Mapuia pawh a mu ve tak naa, a nau thusawi te ngaihtuah zui lehin a mawhphurhna sanzia a hrechiang zual khawp mai. Chutihrualin a pa chungah chuan thilmak thleng se a duh ngawih ngawih thung. Mahni pa te meuh tluk hi zawng a lo har aniang e. Lawmsanga paw'n a pa Pu Mawia kha kawng engkimah a tluk lohzia a hre chho ve zel chu a nia! Nu leh pa te hi chu kan lei pathian zawng an lo ni chiang e. 

Mapuia te result pawh a chhuak ve ta a. 1st-ah a pass ve e. Sasa leh Rki te pawh an pass. Mapuia chu Sama'n a rawn hrilh, an lawm dun viau mai. Nguri te pawh an lawm takzet. A pu la dam se an ti, Result chhuah tlaiah Muanpuia te leh Teteii te chhung nen chaw an ei khawm a. An hlim tlang dar dar hle. Terini naupai thu an han hre zui lehzel bawk nen. Pu Mawia boral hnua an hlimnain a tawnsan ber hun a ni hial awm e. Nauteii pawh a tho harh peihin, nâ em em a nei tawh lo va, a ke erawh a la rap na ngam lo deuh. Sangpuia khan vawikhat chu a rawn kan ve a, Nauteii a lai leh tlat a, Sangpuia a insum ta rih. A naute chu hrehawm deuha siam a duh bik si lo va.

Mapuia zir leh zel dan turte an han sawi ho a. Phai lama han indah pawh a that viau rualin, Pu Mawia awm tawh lo, Lawmsanga lah heti hi a ni si a. Mizoramah an hmuh phakah kal mai se tiin thu an titlu ta a. Amah pawn a lo hreh lem lo bawk nen. Chaw eikhama chhungkaw tawngtaina an neih chuan, Pi Lawmi'n a tupa duat chu ding chung meuhin a fuih mawlh mawlh a. 

"I tet lai hun thenkhatah nu chawi loh, pi leh nî ten an enkawl seilen i ni a. I pa lah mipa tih takah naupang han duata han tih vel a thiam lem lo va. Mahse, nu a zawnga nu fel leh hmangaih em emtu che i nei ta a. Nguri hi i nu ni ta lo se, tun dinhmun pawh hi i thleng kher ang em ka hre lo. A enkawl danah che kei leh i ni phei chu a chang chuan kan lo nain kan duat luatah che Nguri te pawh kan han ngei lek lek thin a. Mahse, hei tunah chuan a hmangaih ang che hian kan lo hmangaih zo ve miah lo che tih ka hrethiam tawh. Zep thu a cheng lo va, i pa natna kan hre vek a. I pu ber a awm tawh lo bawk. Nang hi kan innghahna i ni tawh a, i nau chu nakin maiah pasal chhia tha te a hmuh chuan la chhuak mai tur a ni a. I nau enkawla venghim tur pawh nangmah tho i ni. I kal zelna turah theihtawp chhuah la; Pelhe ve hman pawh i ni ve lo a nia. I games khel lutuk te hi kei chuan ka hmuh mawhna a rei tawh, I nu ber a la ngawih vangin ka sawi duh lo mai pawh a. Hengte hi i thlah hret hret a ngai ang. I ar bet thinte pawh chintawk i hriat a ngai. Zirnaah theihtawp chhuah la, sum leh paiah chuan Pathian zarah kan buai lo turah ngai ila.. I chhungkua hi i kutah a innghat tih hriaiin Pathian rinchhanin fapa leh nuţa fel tak ni zel ang che. Nupui neih pawh kei chuan i fa hmel hmuh chak viau mah ila, hmanhmawh lo law law ka duh a. I nu bawk hian i nupui tur pawh a thlang thiam turah ka ngai a. Nangma duhna ringawt kal thuipui reng reng suh ang che. Kei chuan i nupui neih hun pawh ka dam thlenpui hman kher lo maithei che, mahse, han ngaihtuah la, i pu nen kan tar tawh hnu pawha i nuin min enkawl dante hi chhutin, nakina i nu leh pate tar hunah pawh i chhuan ruk vawng vawng theih tur khawpa nupui fel leh rintlak, rilru tha zawng ngei ang che.. Nang hi chu mi naran ang i ni ve lo, ka tan phei chuan ka arsi tetaktè, Vanropuia kha i ni reng a nia.. I pi thusawi hi i zawm ngei ang tih pawh ka ring" a ti ta dap dap. Tu mai pawh chuan thinlung takin an ngaithla tih a hriat hle. Pi Lawmi, Pu Mawia nupui kha a ni miau a. A finna leh theihna te chu a kum upatna chuan a la chhilhbo awzawng bik lo e. 

Mapuia pawh a hma atanga a ngaihtuahna luahtu a ni bawk a. A pi thusawi te chu zawma hriatreng pawh a tum ve khawp mai. Lawmsanga erawh a hnuk a ulh lek lek. Ni e, Mapuia tet lai hun leh Ruthi te thlengin a ngaihtuah kir a, hmana mipa naupang, nu chawi loh, Mother's day-a "Nu, ka hmangaih che', tih tur duh em em thin, a pi leh a ni ten a ruka an tahpui thin kha tunah chuan MA hial zir thei turin a lo tlangval ve ta chu a nia. A fapa hi a hmangaih em em, mahse, a tetlai khan a khawih tam lo va, Ruthi a huatna khan a fapa hmel a hmuhin hlet a rawn chhuah thin bawk nen.. Mipa fa a lo ni bawk a, duat no a hlau ve bawk. A nihna dik tak a hriat hnuah pawh chhuanlama hmanga sual rawng han bawl mai te kha a ching ve lo va, sawiselna tur awm lem loin tun hun hi a thleng thei ta chu a nia! A nu zia kha a kai an hlauh tehlul nen, thisena inzawmna chu chak teh mah se, a nuhrawn Nguri theihtawp chhuahna chu Mapuia nunah a rawn par chhuak ta zawk a nih hi.. Mapuia a ngaihtuah apiangin a nupui Nguri thatzia a hrechhuak tel thin chuan a tihlim veng veng thin nia. Lawmsanga, Taxi driver, Mi thenkhat ten an hmuhsita an hnualsuat thin khan nupui ropui tak a nei a, mi pangngai leh zahawm takah a nupui chuan a hlang kai a ti lo thei lo. Nguri pasal a ni hi a khawvel dam chhunga a tawn vanneihna ropui tak zawng a ni ngei e. 

"U, U Sasai'n min lo be leh a" Nauteii chuan rooma an awm laiin a ti zauh a. 

"Engtin" ngaihven lutuk anga lan hreh si hian a lo ti a. 

. "A pass thu te a rawn sawi a. I u kha ka lawmpui tih min lo hrilhsak rawh aw a ti bawk a.. Ti nge a lo biak mai loh che. I block ami? " a ti ta a. 

"Ka u chu ka hrilh a. 'Ka lawm e' a ti ti rawh" a lo ti daih. 

"Hmm.. I chhe vel e.. In inthen dan hi in la inngai tho sia. Tiangte chu a hrehawm loh mi? " Muanzuala nen an inthen dan ngaihtuah chungin a ti leh a. 

"Ka ngai lo" a ti bul hmuk. Nauteii chuan a benga pawh zauh pahin,"I ngaih lohzia ka lo hrilh tel ang" chimawm zetin a ti a. 

"A ngai kher lo" a u in a tih ri erawh a hre hman tawh lo. A kal daih. 

A phone phawrhin a thian thenkhatte lawmpuina thuthawn te chu a chhiar thla nuap nuap a. Tu emaw hming a zawng tel ve ringawt chu mawl a inti. Ni e, a block tlat a. Engtin chuan nge a lawmpuizia a rawn hrilh theih tehlul ang ni. A pass ve tih a hriat khan a lo hlim ve ringawt lehnghal. Tunah chuan hmabak ko tak a nei tawh a, zirna lamah pawh a insanmar chhoh a ngai tawh ang. A pu thusawi a hriat reng chu,, "A rual pawl tawk hi a lawmawm reng reng loh. Rual khum hi tupawn kan tihtheih leh kan ban phak vek a ni a. Mi zawng zawng aia tha kan inhlankai theihna hian hlawhtlinna pawh min hruaithleng awlsam bik" tih kha.. 

Nauteii pawh school a kal chho ve leh tan a. An chhaih ta vak lo va, a lawm viau mai. Msi pawn bialpa dang a nei tawh a, a luangliam leh viau tawh. Nauteii tan a lawmawm angreng. A rawn tihbuai loh phah a. Muanzuala chanchin erawh a hre tawh ngai lo. A hlim ve em ang chu maw.. A nuin damdawi a chah avangin Sangpuia nen an va lam kawi a. 

An pack chhungin dawr kawtah chuan an lo nghak a. Mateii leh a thiannu rawn kal phei hnalh hnalh te chuan rawn hmuin zâmna pakhatmah nei lo hian, "Ehe! sangpuia te chu, kha in lo inzui leh tawh law.. I duh loh thu i sawi nasat nen" A ti ta mai a. Sangpuia zawk a hawihai ngei mai. Nauteii erawh chuan Mateii chu a lo melh ve kar mai. 

"Eng nge i sawi awmzia? " Sangpuia chuan a ti nghut a. 

"Aw.. Kha i school naupang, atchilhtu che kha.. I ninzia thu te kha i sawi chiam sia, in inzui leh tho sia, khumlaizawlah a che zei viau a niang a" ti hlawng hlawngin a thiannu mit dur huam nen chuan deusawh zetin an nui awr awr a. Nauteii ngaihdan a ni ta bik lo. A va kal hnai hrat a, Mateii hmai bul chetah chuan, "Dawt hlawm i nih hi.. I thusawi kha ring tura min ngai anih chuan i mawl hle a ni mai. I game khelh dan a thing em mai" a ti ta zèk mai a! Mateii a hrilhhai kher mai. Sangpuia erawh kil khatah a lo nui suk. 

"Naupang, i va chaltlai ve. I u rual anih hi" Mateii thiannu chuan a lo ti ve a. 

"Ka u atan pawh ka duh lo. A hur hmel huam huam si" a lo tihsan. Sangpuia nui huk an hre zui nghal, Mateii a thinrim zet mai. Mi kawngkal an awm ve tho bawk si. Nauteii rum zeta melhin, "I la hre khawp ang. Nang ai chuan ka tihtheih a tam mai thei ania" a ti a. A nui lui sâwng bawk. 

Nauteii a lo kiai sak,, "Ti rawh. He val seniora hian kei aia hmangaih a nei leuh.. I duhtawkin zar rawh. " a lo ti hmiah. Sangpuia mita Nauteii hmelthat zualzia chu aw.. Tihtheih nei hek lo, Mateii te chu an kal tau ta sawk sawk a. Dawr atanga lo thlirtu te nuih pawh a za hle. Nauteii chu an lo ţan ru ve hle a nih hmel. An hawn kawngah, "Val seniora han intih kher.. Min va hmu tar awm ve" Sangpuia chuan a ti a. 

"Ka tan te chuan i upa tawh em alawm.. " a lo ti hmak. 

"Heyy.. Kha nu vanga buaina neih ka duh tawh lo a nia aw.. " hlauthawng zetin a ti a. 

"Block vek ang che. Ka hne a nia. Kan inneih hunah pawh sawm a ngai lo" a lo ti hlak hlak. Sangpuia a nui hawk hawk, "Inneih i sawi ta.. Ka va hlim tak" tiin a tlan chak sawt a. 

"Hmm.. Nulat ka kham hunah ka tih kha" a lo ti a. Mahse, Sangpuia hlimna a dal phah lo. A sava note hi a nghak chhuak ngei dawn e. 

"Lawmsang, phuihnam kha a no deuh deuh lo thliak nghal mai teh aw" Nguri'n a tih lang lang lai chuan, Lawmsanga erawh ngawi rengin an vawk in ban chu a do tha mawlh mawlh a. Nguri chuan a zu thlir leh thin, a auh ri hre awm pawn a lang si lo. Ring angreng takin, "Lawmsang," A zuk ti leh a. A chechang chuang lo. 

"A va luhlul tak.. Hmela chu" tiin a phun hlak hlak a. Mahse, thil a ngaibtuah chhuak thut. A ding khawng ta reng a. Ni e, Nauteii rulin a chuk sarhu lai vel atang khan Lawmsanga chuan, "Eng maw.. Maw maw" tih sawi a hrat thar ta riau a. A bula a awma a biak mawlh mawlh pawn a lo hre lo leh hû zel. A natna kaihhnawih a beng ri hriatna a chak loh telh telh tur thu kha a hrechhuak nghal. 

"Ani hi a ri hriatna a tlahniam hle a ni mai lo maw" a ti rilru a. An thunun phak rual loh natna chuan nitin a pasal chu a ei chhe zel mai si a. A han insanmar ve viau pawn natna chuan hnathawh a thulh chuang si lo. Nguri thin a tawt leh tan.. Lawmsanga a rawn lut a, phuihnam pawh a rawn keng lo. 

"Ka ko vak vak che a.. Phuihnam khu chhum ka duh a" Nguri chuan a lo ti a. 

"Ka hre lo reng reng.. Koh ka hre thei lo, ka beng ek hi a awm aniang, kher teh" a lo ti a. 

Mahse, a nupuiin a melh dan avang chuan a ding ve chawt. Hrilhhai lek lek hmelpu hian, "Ka.. Ih.. Tawng ring tawh mai rawh" a ti chuai raih a. 

"Beng dar a awm alawm.. " a lo ti vat. 

"Beng dar tel loin i aw hi hre reng thei ila" a lo ti zawi leh sup a. 

"Phuihnam chu zuk la rawh.. " a lo tihsan daih. Khalam hawia inkawm chu hun a ti rih lo, bakah insawi lungpuam hi a duh vak tawh lo. Thinlungah a cham nghet thin si. School pawh a kal ve tan tawh a. A pasal a ngaihtuah thei viau naa, ngaihtuahawm lutuk chuan a lo awm ngai bik lo. Mistiri hna a khawih thiam vak lo nain, awmhmunah tha hman tam ngai lo chi a lo thawk ve thin a. Chu chuan nasa takin a natna leh a khawharna pawh a chhawk ve a ni. Pi Lawmi zawk hi chhunah chuan a khawngaihthlak, chuvang chuan Nguri'n Lawmsanga a rawn thlap hnuah a nu chu an veng chhunga Tar ho enkawlna, inawmkhawm vena hmunah a school kal rualin a phur ve ta ziah a. A upat puite nen nileng hun an va hmang ve a, Pi Lawmi pawh a hlimin nuam a ti chho ta phian. In lamah Lawmsanga nen an inkawm bawrh bawrh dawn si lo va.. A tha daih zawk. Mahse, Lawmsanga chuan a natna vangin buai thut emaw han tluk thut te a neih takin tih thuah Lawmsanga nî fanu pasal neia kir leh Rempuii chu an in nghaktu ber a ni a, a lo vil ve deuh thin. A remchang ve leh zel mai. Mapuia te lah an result a chhuah rual deuhthaw khan admission an la a, class an kal chawpchilh ve leh mai bawk si. Huan lam pawh a kal khât ta raih mai. 

"Kan college hi a va reh tak em" Sasa chuan a ti hlawl! Hrethiam zetin Rki chuan, "Kan chhuah ve meuh chuan ani chuan MA a lo pass ve leh chiah ang a.. " a lo ti khauh. 

"Rk, Aizawl hi a lo zau tiraw? Khawpui pakhatah kan awm a. Kan inhmuh loh rei tawhzia hi" a ti leh halh.. 

"Nia, in awmna leh an awmna a lo inhlat ve bawk sia" a lo ti a. 

"Min unblock hi a tum lo tak tak a niang. Number dang atanga va biak lah tlawmah ka la ve bawk si.. Ka inhrem nge a inhrem zawk pawh ka hre lo" a ti leh a. 

. "Bialnu a nei tawh maithei asin.. Tihian i beisei ve vak a" Rki chuan a lo ti hmiah. 

Tukverhah dak vang vangin, mi chevel chu a thlir kual a. "Keimah vang pawhin a nei leh tawh lawk lo vang. Kei hi min theihnghilh emaw min bansan hlen tum mah se, a nei nghal mai lo vang.. " a ti nghet charh a. A mitmenga tumruhna lo lang chhuak chu Rki chuan melh vawng vawngin, "I lerh lai ang kha ni zawk se, tunah pawh i hlim leh tawh awm sia" a lo ti a. 

Sasa a nui hul hak.. "A tir khan ka bansan hlen theih mai ka lo ring a nia. Mahse, a lo danglam em mai.. Rk, Mapuia ang mipa pawh ka duh lo. Amah chiah ka duh.. " a ti tham chhal a. 

"Davida i lo be ve zauh kha a pawi lungrun em a ni. Dawt i hrilh ve lehzel bawk sia,.. Keiman ka va biak i phal bawk si lo" Rki bawk chuan a ti a. 

"Umm.. A pawi.. Mahse, ti nge ka thlakhlelh em em lai khan min be tura hun tlemte pawh a insiam theih bik loh? Hun thawl kha ka pe ve tho asin. Nang pawh ni la, a online reng pawn i msg seen lo leh reply miah lo ten mu tawp zel se.. Space a mamawh a nih hi i la tihsak zel thei ang em? Ka tâwt em a. Davida rawn lang khan min tithawveng ve hawk zawk a, a chungah pawh ka lawm zawk. Mahse, dawt ka sawi erawh ka dik lo tih chu ka chiang.. Khami zan khan hmaichhanah sawi dun ila chuan kan inthen lo vang. " a ti sep sep a. 

Rki pawn a hriatthiampui ve leh thliam tho. Hmeichhia hi zawng kan inhrethiam thei a nia. Mizia azawnga mize inang lo ber Sasa leh Mapua te inlaichinna kawng hi a la bumboh deuh naa, an harsatna ang tawk hi thalai tam zawk hi kan ni fur awm e. Bialnu te pms hrethiam duh miah lo va dimdawih an ngaih lai bera hrawka na tak taka tawngkhum ching mipa an tam ang bawkin bialpa te space mamawh laia ninawm khawpa zar cheng ching hmeichhia kan tam bawk. Mahse, he thuah hi chuan a tu ve ve pawn insiamthata inthunun erawh kan thiam a ngai ve tho. Ka pms tih vanga bialpa te laka inhrikthlak duhthawh em em nih hian thil pawi zawk a thlen thei a, thinrimna thunun theih loh vanga pms laia thutlukna siam pawp chingte hi a hnua inchhir an ni ziah. Chutiang bawkin hun thawl ka mamawh rih tih vanga reh leh lutuk, 'min va hne awm ve' tih mai theih tura khawsaka mi dang bia anga lang tho si.., ngaihthat tawh vanga inthlahdah ringawt te hi inngaihzawnna mai ni lo inneihnaah pawh hian thil pawi zawk a thlen phah thin. Inchhem alh tawna inhrethiam tawn tur kan nih laiin, kan chak lohna kan chhuang zawk fo a, thinur laiin kan ţawng pung pung a. Kan kawppuite thinlung natna ngaihtuah chang lek loin kan chak lohna chu kan hmachhuan ta thin a. Hetiang tur a ni lo. Inbe tawnin, tha zaia sawi dun keuh keuh tur zawk a ni ngai a; Phone kal tlanga thu pawhchah hian a hnuah nâ a rawn siam ngei ngei kan tih hian dâwt kan sawi tampui lo vang. Hringnunah hian zir ngai a awm reng a, zir chhuaka pass an la awm reng reng lo bawk. 

"Thianpa, Peki chu be tha ve la.. A sawi zing sia.. Ka tan pawh a nuam lo" Sama'n a ti sur sur a. Mapuia a lo khi suk ringawt. Peki chu an class ami tho niin, Khawzawl khua an ni. Thawkkhat lai phei kha chuan, an khuaah pawh chapchar kut miss a lo ni tawh a ni. Chutiang khawpa pian nalh leh hmel tha chu a ni. Mapuia a chen tep danah nula lian thelhthawlh tak, inphut tak si a nihzia a lang chiang hle awm e. Class an tan phat atangin Mapuia chuan a mit a la nghal a. A mize dam ruih, tawng tam lo tak te chuan a hîp em em. A hmel a lo tha ve zel bawk nen. Mipa dangte chuan hmeichhe chhe lo an melhin an hisap a, an nuihpui dur dur thin. Mapuia erawh a ni ve lo, hmeichhia a biak hmasak awm pawh a la hre lo va, a melh pawh a melh ngai lo ni maiin a hria. Sama hi zawng a za harha harh ta ngang kha a ni ve a. Hmeichhia te pawn an nel nghal hle. Peki te nen pawh an inhre pawp thuai a. Peki hi lerh ni si lo, thu zep hni hne nei ngai miah lo a ni thung a. Sama nen an han inkawm ve deuh hnuah chuan Mapuia a star thu a sawi hmiah mai reng a. Mahse, chutianga a sawi avang chuan han zuam theih erawh a ni hauh lo thung. A nau nen in an luah ve a, a awmna vengah pawh chhiat thatah a mawi tawka tel ve zel thin, sawisep kai ngai lo khawpa nun uluk a ni ve a. Sama pawn a thianpa bialnu atan a duhpuiin a mit a tlung viau mai. Mapuia bula a sawi vawikhatnaah chuan a lo nui ringawt. Sasa vangin a la inpeih lo deuhah a ngai a. Mahse, Sasa a sawi ngai chuang lo. Chuvang chuan a zei vak lo angah ngaiin hmehbel chhoh a tum ta a ni. 

"Ni ru aw.. Ka sawi dawn a nia.. A fel bakah a chhe lo si" a ti leh a. 

"A lian em mai" a lo ti daih! Sama rin loh lam daih a ni. A tifiam emaw a ti nghe nghe. 

"Over lo mai teh" a ti a. 

"Tak tak alawm.. Hmeichhe lian deuh ka ngaina lo. Min hîp lo. " a lo ti ta a. A titak angreng si. 

"Hmeichhe hleitlingte chu an tha daih zawk, fate nu atan pawh. An changkang.. " Sama chuan a ti hram. 

A inrin hmain, "Sasa te ang tiat lek hian min hîp" a lo ti nghut. Sasa hming a sawi vang chuan a inthiam lo leh deuh nge, Sama chu a melh zauh a. Ngun zetin a lo melh kur.. "Thianpa, nang hi i la move on miah lo tih ka hria. Sasa bak hi i rilruah an la lang thei lo. Ti nge i renew leh mai loh? Ani lah a single char char tho si" a ti ta nge nge a. 

"A ho mai mai" a lo ti liam puat a. Mahse, ngaihsak loh hmel tak anga lan a tumna lamah a rilruah a lan fiahzia a lang chiang thung si. 

"Ka lo sawi ang. Tha leh rawh u.. Mi te pawh an inthen hnuah an tha leh fo alawm" Sama chuan a ti a. 

"A ngai lo.. Ka move on dawn alawm.. Min ring lo mi? Min rin loh aiah Peki chu ka'n chhai dawn mi? " tih pahin a nui a. 

Sama erawh a thutak telh telh. 

"Aih, Tu emaw theihnghilh nan tu emaw hman loh tur. A tawpah mi pahnih i tina mai mai zawk ang" a lo ti nghut a. Mapuia chuan, "Chuvang chuan alawm tun thlenga tumah ka ngaihven loh" a lo ti vat. 

"A nih chuan, Sasa kan renew dawn em? " a lo ti a. 

"Keimahah hetia awm rih hi ka duh" a lo ti nghet charh a. Sama pawh a beidawng hle. 

Ruah a rawn sur thut. Nguri chuan verandaa thawmhnaw an ban ho chu a va seng lut vat vat a. Dar 12 a ri tep tawh. Ruah lah chu a tam phian lehnghal. Rooma a va luh chuan Lawmsanga chu a lo thu a. A lo melh reng mai. "I lo harh law" a ti satliah a. A va zung a, a mu leh tur chu mak tih hmel zeta lo melh chungin, "Khaw nge Nguri" a ti vawt ta raih a. Nguri a phu chiang kher mai. Lawmsanga mitmeng buai zet leh mumal lo tak chu a melh kar a. Thawk la hawkin, "Keimah ka ni" a ti sap a. 

"Dawt sawi suh. Kawngka i kalh hnan pek anih kha.. " tiin thawh a tum ta mai a. A lo chelh vat, "Khaw nge i kal dawn" mangang zetin a ti a. 

"Ka nupui ka hruai dawn. Pawn khawvawt ruahsur hnuaiah i hnutchhiat ngawt alawm.. Mai mai che hian" a ti zêk a. 

A zui ve zel tawp. Kawngkapui chu a va hawng a, a hawi kual ruai ruai. "Nguri, Ngurbawih" tiin a au ruai ruai a. Nguri chuan a hnunga ding chungin lungchhe zetin a lo thlir ngawih ngawih ringawt. A pa authawm avang chuan Nauteii te unau pawh an rawn tho ve hlawl mai. Ruah lah chu a tam nasa mai a. Veranda pawh a rawn theh thawt thawt mai. Chutiang pawh chu pawisa lo vin Lawmsanga chuan Nguri chu a la zawng ta zel a. Mapuia te unauin, a hnunga Nguri ding reng chung sia a pain, "Nguri.. Nguri" a ti an hmuh meuh chuan, Mittui tihtlak loh pawh tum eng ang mah se, an thei ngang lo a ni. Nauteii phei chuan a hmai a hup a, a kut zungtang kar atangin a pa chu mittui tla chungin a va melh a, a khur ngawt ngawt mai. Mapuia erawh a mittui tling pum chu khap sak sakin, "Pa.. Lut ang. Kha. Ruah a sur nasa si.. A nan huh vek ang che" tiin a pa chu a va kai a. 

"I nu ka zawng alawm le.. He nu hian kawngka a kalh hnan a.. Khaw nge maw a kal daih ni. Vawt a ti dawn si" a lo ti hluk hluk a. Nauteii a puak rawih mai. A tap ta hlawp hlawp a. Nguri erawh a heh a pet fan fan a, a bianga a mittui luang chu lehlam hawiin a hru mawlh mawlh. Pi Lawmi pawh a rawn tho ve chhat chhat a, Nauteii'n a lo pawm chawt, "Pi, Apa saw ka duh lo.. " a ti tham ţiak a. Pi Lawmi pawn a fapa meng â hû leh Nguri a auh kual dan atang chuan thil awmzia a hrethiam nghal. Lainat zetin a thlir ve tlawk tlawk ringawt. 

"Ka nu chu keiman ka zawng dawn nia. Nang chu lut phawt rawh. I dam lo palh ang,"Mapuia chuan a pa chu a kai leh a. Lawmsanga chuan Nguri hmai bul chetah, "In hmuh loh chuan nang hian mawh i phur ang.. I hria em? Kal bo rawh" a ti hriam hraih a. Nguri a maimichhing tawp. Mapuia'n a nu hmela tawrhna leh nâ a tihzia a hmuh chuan, a pa chu a natna vang tih hre mah se a haw lek lek mai. In chhungah a kai lut a, an roomah luhpuiin.. Khumah a muttir a. 

"I nu chu aww.. Ka ngai asin le" a ti nuah nuah a. Inhumruh chungin, "Ka zawng hmu vat ang.. Muhil rawh aw.. Pa" a ti zawi sup. Lawmsanga pawh a mu ve mai. Nguri te chu sitting roomah an lo thu a. Pi Lawmi dara a lu nghatin a lo ţap khur ngawt ngawt mai. Pi Lawmi lah awrawl chhuah hleithei si loin a mittui a luang ve zawih zawih a. Nauteii erawh a pi bulah tho chhuat bihin ngawi rengin a lo thu thung. 

"Nu, insum rawh. A tha leh vek mai ang" Mapuia chuan a ti a. 

Insùt hlawp hlawp chungin, "Min ngaidam teh u.. Zanin zawng ka puakkeh a ni e.. Mapui, i nu hi ka tlawm ta a ni e.. " Nguri chuan a ti a. Chutah meuh chuan mipa pawhin thinlung an nei ve si a, Mapuia chuan a hmai a hup ve tlawk tlawk mai. Zan lungngaihthlak tak a va ni tehlul em.. 

"Pi, apa saw ka hua.. Ti nge anu ber kher a hriat loh? Mi dang theihnghilh tur an tam tehreng nen" Nauteii chuan chhuat bih ran chungin a lo ti sap a. 

"Bawihte, a duh vang a ni reng reng lo ang.. Haw suh aw.. I pa chu" Api chuan a lo ti vat. Chutihlai tak chuan Nguri te room kawngka chu a rawn inhawng riai riai a. An hawi phei thap. Lawmsanga chu chauh hmel zet leh ţi em em hian a rawn pen phei a. A mitah chuan mittui a tling khat vek bawk. A nupui Nguri chu a melh ran a, Nguri pawn a lo melh ve ran mai. Nguri ke bulah chuan a thingthi ta hnawk a. Nguri malchunga a hmai phumin, mipa azawnga mipa ber mai Lawmsanga chu awrawl chhuah meuhin a ţap ta hawm hawm a. Tumah chu insum thei an awm ta lo.. Khur der der chungin a pasal lu chu a chul a, a mittui te chuan a pasal luah a zuk far.. 

"Ngur.. Thih ai pawn a hrehawm zawk ang. Ti nge hetianga ka awm.. Ka duh lo.. Min pui rawh" Lawmsanga chuan a ti ţuau a. Nguri'n a chhang thei lo. Chhang tur khawpin a chak zo ngang lo a ni e. Pi Lawmi'n tawngtaina a nei a. Mahse, khum lam pan theuh mah se, tumah an muhil zui tawh lo a ni tih tichiang turin zingah thawh an hai vek. 

Chutiang hun thim chuan rawn bawhbuai zeuh zeuh chang a nei fo a. Nguri chhelna leh tumruhna pawh a ni telin a kiam ve zel bawk. Lawmsanga pawn theihtawp chhuah mah se; natna chu a tibo thei ngawt si lo. Nguri ai mahin a inthlahrunna leh hrehawm a tihna chuan a vaw chau zawk awm e. Pathian dem hial chang pawh a nei thin. Awmzia a awm chuang si lo. Nguri chuan doctor dangte pawn rawn kualin phai lamah engtin emaw inenkawl dan te a awm mahna tih te a dap kual thin. Mahse, an chhang beidawng zel si. A tawpah phei chuan, a beidawng leh a beisei zawk tih pawh hriat lohin, "Aw le.. Mihring kan beidawn hnuah chunglam a che thin. Lalpa, nang bak neih ka nei ta lo ve. I kutah engkim ka nghat e. Hmeithai ka ni dawn anih pawhin ka pasal hi na lutuk tuar lo vin la ang che. Kei chu ka tha mai ang, ka fate hi i kutah ka dah bawk a. Mahse, Lalpa, beidawnsan tawp chu ka ngam si lo, Lawmsanga hi i tidam thei tih erwh ka hria. I duh chuan i tidam thei.. Ka beisei thei ang em chu chu.. " tiin Pathian a au ta tawp mai a. Pathian kuta engkim a nghah ngam tak chinah chuan a na te leh tawrhna te chu bo vek lo mah se, thlamuanna mak takin a uap ta a. A hahdam chho ta. Ni e, mihring hi chuan chak ve tawk thei ve tawka kan inngaih lai a awm ve a. Nguri pawh a mihring chhelna te hmachhuanin huaisen taka hmachhawn a tum a, a thlen pawh a thleng thui thawkhat e. Mahse, Pathianin amah belhna hun hawn nan khawdur a pe ta a, a angchhungah a pawm ta a ni. Lawmsanga thlarau nun ngaihtuah chhoin Bialtu Pastor leh Kohhran upa te leng tur ten a sawm thin a. Lawmsanga pawh a inhawng chhoin Pathian thuah a tuihal chho ve ta zel a.. Thla khat pawh a ral hmain a la neih ngai loh thlamuanna pawh a chang ve leh ta. Pathianin lalna a chan tak atang chuan engkim mai chu a nuamin, an chhungkaw boruak pawh chu a zangkhai sawt ta viau mai. Kan Pathian hi zawng mihring sawifiah thiam phak baka hmangaihtu a ni ngawt mai. 

An department an picnic dawn a, Mapuia pawh a phur ve viau. A insiam surh surh a. A pa a tha rih a, a pi hriselna a tha bawk. Enghelh a nei rih lem lo. An tam lem lo bawk a, tin, an inhre pawh vek a, nuam an ti tlang hle. A tui cheng zo, Pool piaha thutthlenga a thut lai chuan, Peki a rawn thu ve chat. A nui sâng bawk. Cold drinks a ken pakhat chu pek pahin, "Kha.. In ve rawh" a ti sap. 

"Ka va lawm ve" a lo ti ve mai a. 

An in dun a. 

"Tui hleuh hi ka thiam ve chak tawp.. Mahse, ka khup thleng ka dai pawh hian ka mangang thei.. Tuithiam chi ka ni ve lo a niang" Peki chuan a ti sar sar a. 

"Hleuh thiam tur chuan tlak phawt te hi a ngai ve thin asin.. Mahse, hlauh tlat chuan thiam tum kher ngai pawh ka ti lo.. " Mapuia chuan a lo ti ve a. 

"Rin aiin i bula awm chu a nawm phian hi" nui chungin Peki'n a ti a. 

"I la awm rei lo mai mai anih hi, hrehawm i ti vat mai ang" tiin a chhang a. 

An titi tui ta phian. Mapuia pawn hmeichhe fel tak a ni tih a hre thei mai. A hnu deuhah, "Mapui, hawh.. Tah khuan zu kal ve ang. Thla te kan la ve ang a" tiin huan thlanglam deuh chu a kawk a. Mapuia pawh a tho ve vut. A lo nuam reuh khawp mai a. A dai bawk si, Peki cameramanah a tang a ni ringawt. Mahse hrehawm a ti hran lo. Thla an duhtawka an lak zawhah hnahthel chungah an thu dun leh a. 

Peki chuan, "Dik tak chuan ka star che a.. I hria tiraw? " a ti ta a. 

"Umm hria e" a ti nghut. 

"Mahse, i duhzawng ka ni ta lo va"

"Chulam pawh ni lo," 

, "A nih eng nge? " Peki chuan a ti a. 

"Ka hre lo.. Aa.. Ih, ka la inpeih lo a niang" a ti ta tawp a. 

"Puih theihna che ka nei em? " a lo ti var. Mapuia rilru a dek ta deuh a, "I fel ka tia, hmeltha pawh ka ti che. Mahse, ka tina mai mai zawk ang che tih ka hlau.. Chuvang chuan thiantha tak ni zawk ang. " a ti ta a. Peki chuan na ti deuh mah se, a pawm thiam. Mi rilru tluang tak a ni bawk a. A nui seih a, "Umm ka hrethiam lutuk. Mahse, inpeih hun te i la nei a nih chuan ka awm ve tih theihnghilh lo la aw" a ti sap a. Mapuia pawn a melh ve vawng vawng mai. 

"Ka tan chuan i tha mah mah. Kei aia tha i phû.. " a ti rilru hial mai. Chhungrila pawta chelh rengtu hmeichhe te taktê kha a thinlungah a lian ber tlat si a. Kha hmeichhia, a bula awm ninawm ngai loh, insanmar a ngaih ve lohna, hahdam taka a hmachhawn theih thin, hotete pawh nuihpuia amah thlenga tinui thei thin hmeichhia kha.. Na taka a thinlung hliam theitu ni si, hlimna tak tak pea a der tel miah lo va nuihna siamsak thintu Sasa kha a hmangaih takzet tih hi Peki nen an inkawm khan a hrefiah zual chiah. 

In a thlena a inbual zo khuma a thut laiin a phone a ri a. Rki a ni mial mai! Hlauthawng zetin a la ta a. 

"Helo, Rk" a ti a. A reh vang vang. Ngaihtha vak loin, "Rk, i hre thei em? Hello" a ti leh a. 

Rki ni loin Sasai aw a hre ta zawk a. 

"Mapui, khawngaihin dah suh aw. Vawiinah i bialnu nen in thlalak te ka lo hmu ve a. A hmeltha ka ti lutuk. In inhmeh bawk si, ih.. Englo, i hlim tawh tih ka hria a. Hlim ve lo mah ila, ka lawmpui che. Kei pawhin beidawnsan che ka lo tum ve tawh dawn nia..min block sia, vawikhat tal i aw ka hre chak a. Ka rawn be tawp mai che a ni.. Engkimah khan ka lawm e.. Nih phawt le" a rawn ti a.. Mapuia tawng ve hmain a dah nghal daih. Mapuia hrilhhai zia chu aw… a phone a hmet nghal zat zat. A thiante ho status a en kual a, Sangzuala status-ah a bur nghal chat. Peki nen pool sira an thudun lai kha statusah lo hmangin, "Best couple" tih captionah a lo hmang a nih chu! Sangzuala number hi Sasa chuan a nei tlat si a. Sangzuala, Sama leh amah bakah hmeichhe pahnih hi college khat atanga tuna la kal ho an ni. 

A insehruh a. Sangzuala chu a hnek chak ngei mai. Engti dana khatianga hmang nge maw a nih dawn ni. Sasa hi a la beisei reng em ni zawk? Inkawm ngai pawh an ni tawp si lo. Sasa number chu hmetchhuakin, thawk la hawkin a unblock ta a.. Black list atangin a paih bawk. Tunah chuan tihtur pakhat chiah a nei tih a inhrechiang khawp mai. Sasa number chu a call ta a. 

"Mapui" a rawn tih rualin, "Inhmuh ka duh" a ti ta nghut a. 

Rki roomah an thu dun ran a. 

Mipa zawk na na nâ chu a rawn tawng chhuak ta hlawl. 

"I thei lo va, ka thei hek lo. Natna insiam tawh loin bul kan tan leh ang. I pawm em? " a ti ta a. 

"Pawm" a lo ti thlap. 

"Mahse, Vawi thum kan inthennaah chuan ka kal bo hlen tawh ang" Sasa mita melk kar chungin a ti a. 

"Vawi thumna chu kei chuan ka thlentir tawh lo vang" a lo ti ve chat. Thu tam an sawi lo, an taksa leh rilru inhiptawnna a nasa tawh êm a, an sawi chhuah loh an thinlunga inthup te chu an taksa hmangin an lantir a ni ber mai. Hei hi inlaichinna kalkawng chu a ni. 

Terini raino pawh Muanpuia'n a duat thiam ngang mai. Tebera'n harsatna a tawk ta lo bawk a. Candy lah a felin nun a tihlim em em. An chhungkaw boruak chu nuam tak a ni. Jenny kha chu Muanpuia hian chiang kekawkin a lo chhang beidawng tawh a, a rawn lawr ngam ta eih lo. Mi dang, Saii leh Mamawii te ho pawh thei reh takin an reh vawng vawng mai. Mi sawi atangin Saii chu phaiah hnathawkin a chhuk a ni awm e. Eng tak zuk ang maw?! Muanpuia'n mipa a awt bawk a, fapa hrin a duh khawp mai. Pathian thu thu erawh a ni thung. 

Nauteii pawh a zirlaiah a titha pawl a ni chho zat zat a. Nupuia neih tuma nghaktu Sangpuia nen an inzawmna a nghet telh telh bawk. An inhau ngai lo lutuk chu a boring a tia, tihtauhna a zawng thin. Mahse, a lungawi leh hma thei lutuk chu amah pawh a indem lek lek zel. Lawmsanga'n, "Ka la dam lai ngei mai hian pasal hi i nei mai dawn mawni" a tih ţum chuan, "Sir bulah te khan i sawi reu reu ang e. Ka nula rih chak" a lo ti hlar a. An nui vak vak mai. 

Ni e, Sangpuia pawn a hrethiam a, nghak zel turin a dawhthei tawk bawk. "Kum 35 ka nih hunah nupui chu ka nei mai ang. " a nu bulah a ti tawh nghe nghe. A nu pawn a bialnu naupanzia a hre vek a, a nui ve tawp mai. 

Kum pawh a lo tawp leh dawn ta reng mai a. Nguri rin phak bak aiin Lawmsanga a la tha. Pathian vang tih loh rual a ni lo ve. Pi Lawmi pawh a la chak tha ve zel a, Hunpuiah erawj an pa a ngai hle. Thlanah kalin an va chei mawi a, Nauteii'n, "Pi, apu chuan van atangin min lo thlir reng awm sia.. Mawi a ti ve ngawt ang" a tih chuan, a lo nui var var a. "Engtikah tak inhmu leh ang i maw" a ti rilru neuh neuh. 

Kum hlui thlah tlaiah chuan, Lawmsanga te nupa leh Pi Lawmi chu sitting roomah an thu thap a. Nghah an nei niawm tak a ni. Kawngka chu a rawn inhawng a, Sangpuia leh Nauteii te inkai dun rialin an rawn lut a. "Nu, Sir hian arsa a ei ngai lo asin.. Ka lo sawi theihnghilh daih a" a ti nghal sawt sawt. 

A nu chu a lo nui a, "Arsa lo pawh ka siam tho alawm… " a lo ti a. An tawng mek laiin Mapuia leh Sasa an rawn lut ve mek bawk. 

Zanriah tui tak chu kilin hlim takin an ei tlang ta a. 

Zan lai inkhawm an dar a ri vang vng a. Nguri leh Lawmsanga te chu inkai rialin Biak in panin an inzui dat dat a. Biak in kawt zawl an thlen chuan an ding dat. 

"Ka faten an hmangaih hmas ve vete an neih ngei theih nan pawh dil a tha ang. " Lawmsanga chuan a ti sup. 

"Chuan.. " Nguri'n a lo ti a. Awmze nei zetin an pa a melh bawk. 

Nui hawk chungin, "Ngurnunsangi leh Lawmsanga te hi nupa an niha rei tak an dam dun theih nan kan dil bawk ang" a ti ta a. 

Nguri chuan, zawi sapin, "Pathian chuan min tihhlawhtlinsak ngei ang" a lo ti sap a. 

(A tawp ta e, Comment ka lo beisei e a.. Ka hmangaih vek che u 😘😍