Thutiams2- 25

THUTIAM(S2)- 25

Ziaktu: Toni Râlte

A pa thih sarhu lai mah nise, hna chu hna a ni miau mai si a. Jenny pasal Ajay man tur chuan a naute nen an inpeih ta thlap mai. Sunday khan an chang sual a, zing dar 1 thleng an va chan pawn a rawn lang thei si lo va, Jenny zawkin, "Naktukah a rawn haw zawk dawn a niawm e.. " a rawn tih hnuah an kir leh ta kha a nia. Tun ţum erawh beiseina sang tak an nei a ni. Damdawi supplier lian ber mai hren a nih phawt chuan, a tenawi leh chekhnawk ho chu an huphurhawm tawh lem loh. An channa hmun hi Ajay leh a agent zinga langsar ber Aizawl tlak lam venga langsar si lo va sumdawnna kalpui thin, An veng chhungah erawh pa challang leh mite fak rawn nisi Pu Lianmawia farm-ah a ni. Jenny information pek an bawhzui kha a nia. Jenny khan, "A zin a rawn haw hian, inah a rawn tlang ngai lo. Farmah an inpe fel a, kut ruakin in chu a rawn thleng thin" a ti a ni. A dik ang, kut ruak han tih khan an dawr bungrua a tel tho tih erawh hre ta ila. A zin chhan ber leh a sumdawnna lailum luahtu erawh tuma hmuh phak lohah a sem ral phawt thin tihna a nih chu. An inring phên phâwn tawh viau mai. Zing dar 12:30 a ri chiah. An rawn thleng hnai tawhin a rinawm. Pu Lianmawia Farm house chu a eng kulh a, mi pahnih thum chu an awm tih hriat takin an tawng bul bul reng mai. Motor tlan thawm a rawn ri ta vang vang a, an chhak kawngpuiah a ding tih a hriat. An biru sap sap a. Zan thil thu a ni bawk a, chuti mai chuan an rawn hmuh a rinawm loh. Kar loah mi pahnih hi an rawn inzui phei ta a. An hnung lawkah mi pahnihin bawm lian thawkhat ve tak an rawn zawn phei ta bawk. Muanpuia a helhawlh kher mai. Farm house-ah chuan an lut ta a. An ri deuh hliai a. Muanpuia chuan a sana a bih zauh zauh. Thawm a reh deuh ta thap mai. Amah Muanpuia chu a va kun phei ta dãn dân a. A pistol a hum bawk. Kawngka bulah chuan a beng dawh chungin a ding ta ran a. An thusawi erawh a hre hleithei lo. A vanneih asiamin a dinna piah lawka tukverh chu a rawn inhawng thut a, a bawk phek nghal thlawp. Mahse, chu tukverh hawn a nih takah chuan an tawng chu a hriat theih ta deuh a. Ajay chuan mizo tawng pai hlek lo hian, "Thla thum chhung chu ka tawm ang. Khu lamah enthlak ka ni mek tawh a. Sem darh lam kha chu in kutah ka dah e" a ti nghut nghut a. 

Pu Lianmawia chuan, "Thla thum chhung atan chuan a beitham deuh naa, tihtheih a awm chuang hleinem.. Lunglei lam chu kan thlim rih a ngai dawn a nih hi" a ti bul bul a. 

Bawm chu an hawng ta nge, a ri deuh kâwk a. Muanpuia chuan a naute a signal zauh. An rawn kal hnai vat a. Amah Muanpuia chuan kawngka chu a theihtawpa na in a chhuih ta a, chhuih pawh a lo ngai lem lo a lo nia. An lo kalh lo! Him tawkin an inhria a nih hmel. Pistol lekkawh pahin, "Tumah che tawh suh u.. Dan phal loh thil in tawlh ruk vangin man in ni e" a ti hriam hraih a. An hamhaih atalângin tuman chet lak ngaihna an hre lo a nih hmel e. An hawi â hau hlawm mai. A naute chuan an va handcuff ta mawlh mawlh a. Bawm zawntu pakhat zawk erawh a fim ta thut nge, a tlan chhuak thut. Mahse, pawnah constable pahnih an awm tih a hre lo a ni mahna le.. . An lo dangchat nghal mai si a. An rawn hruai lut. 

"Hei.. Engvangin maw min man? " Pu Lianmawia chuan zam loh hmel angreng tak hian a ti a. 

"Hei kan hmu alawm.. Thil dang a la ngai em ni! " Muanpuia chuan tih pahin bawm chu a kawk vah a. A chiang ve bawk êm a, tumah chuan eng an sawi zui ngam ta lo a nih hmel. Ajay erawh thinur tih hriat zetin a meng tal tap tap mai. An man theih dan tur hi a ngaihtuah pawn a hrechhuak zo lo, phatsantu an awm niin a ngai hmiah. A mi rin te vek an ni bawk si. 

An hruai dawn lai chuan, Pu Lianmawia bawk chuan, "In rin aiin min hreng rei dawn si lo va.. A pawi hle mai" a ti leh kher a. Muanpuia ngaihdan ni ta lo chuan, "Mediaah i lar khawp ang. In vengah hero, hetah zero.. Eng ukil pawh ruai rawh. In case hi a nep thei lo hrim hrim" a ti ta hmiah a. Ngawi rengin an inphur chhuak ta a. 

A tukah chuan Muanpuia sawi a thleng dik ta chiah. Mi rin loh pui pui, smuggler an ni tih an han pholang chu.. Titi a tam ta hle. An ni chauh lo pawh hi a ruka inzarpharh an la kat nuk maithei a ni. 

"Ka lawm e. Tunah chuan ka zalen dawn ta e.. Dinner leisak ka ba che. Kan ei dun leh ang chu tiraw" Jenny msg chu a chhiar nui suk. Hmeichhe mak tak zawng a ni. A pasal a fate pa ngei man man theihna ruahmanna a siampui a, inthen a lo duh awm hle mai. Zalen a duh chhan chu chhan tha tak pawh a nih ve ngei a rinawm. Muanpuia tan a hnawk zui ang tih erawh a hlauhawm riau, pawisak a nei vak tawh bawk si lo va. Mahse, Jenny that vena chu Mamawii te Saii te angin a mizia a hniam ve lem lo va, changkang leh mawihnai takin a hmachhawn thin. A nupui a sawichhe ve bawng bawng lo va, thiam takin a vehthlem mai zawk. Tin, a nawr lui ve ţawng ţawng ngai lo bawk. Muanpuia pawn biak chhiat chu harsa a ti. Amah vanga hlawhtlinna nopui dawm thei a ni ve miau si a. 

Mapuia single, a pu sùn bawk chu inah a awm tlem narawh e. Huan lamah a kal zut mai a. A chang phei chuan a riak hial thin. A nu chuan a rukin a lo chîk reng tih erawh a hre hauh lo. Nguri pawn amah Mapuia'n hrilh tul nia a hriat hunah a hrilh mai ang tih ngaihdan a nei ve tho a, a zawt buai duh lem lo. A ngawichawiin a tawng tlem zual a. Lusun khawhar lai a lo ni bawk a, a tu amah chuan an lo chik reng bik lo nen, a danglamna hmuthiam Nguri bak chuan an enliam ve mai niin a lang. Lawmsanga pawh insanmar tum viau mah se; a pa awm ta lo chuan a luah ve ngut ngut reng a. Hetianga a inngaihtuah nasat lai hi chuan a natna hi a rawn zualkai ta thin bawk nen. An upa ber Rempuia te chhungkua mikhual mi hrang ang maia a en tum te a awm a. A farnu Teteii ngei pawh Saii tia koh ngar ngar chang a nei thin. An hrethiam em zawk a, tumah rilru na angin an lang duh ngai lo. Nguri erawh a hming a theihnghilh pawn a nupui a ni tihah a chiang a, a duh duh danin a ko mai zel. Buaithlak ru deuh bawk chu inleng an nei kal ve reng si a, an chhungkhat bakah veng dang atanga a pa ngaipawimawha rawn râl ta vang vangte a hre ngai tlat lo chu a ni. Khang mi te khan Lawmsanga natna an lo hre bik si lo. Thenkhat lungawi chiah lo te pawh an awm nuk awm e. Nauteii leh Sangpuia te erawh hun thawl ngah lo mah se, chimbuaitu nei loin an la inzui kal ve reng a. Sawi hmaih loh tur chu Msi te khan an inphur haw kha an lo sawi darh ngei mai a. School pumpui chuan an pahnih chu an enbel nghal tawp mai. Mahse, chung zawng zawng pawh chu Nauteii chuan a hmachhawn ve tawp tawp tawh mai. Inthup hlen theih a ni dawn lo tih a hre ve ta bawk nen. Sangpuia lahin pawi a ti mang der si lo. Class-a lecture pek erawh a nuam lo ve fô, an class ami ten Nauteii nen an enkawpin an melh ralh ralh tawh si a. 

Sasai erawh block a nih vek takah chuan, Mapuia a thinur takzet tih leh an tawp hlen rinna chu a nei ta a. Davida nen an inhmuh khan, David khan a bem ta chiah a. Mahse, "Bialpa ka nei a. Tun hnaiah kan awmdan a fuh chiah lo va.. " tiin a hnar ve kha a nia. Davida chu a ngaina, amah pawn a inhria. Mahse, a tak rama Mapuia'n thutawp siama a rawn block fai vek tak leh insawifiahna hun pawh a pek tak loah kha chuan, Davida chu Mapuia thlak nan a lo duhtawk lohzia a hrethiam chiah. Mapuia a reh lai khan a khua a har a, va biak buai chung kha a hreh ve bawk si. Khatih lai taka rawn lang Davida, engkima ngaihsaka a mood danglam dan rawn hre chat chat thintu, a exam chungchangah pawh thahnem lo ngaihpui ve em emtu kha a hlu ta riau kha a nia. Hei zawng mihring zia a ni. Tupawn chak loh lai leh sihhnip lai hun kan nei vek, Sasa pawn chu hun chu a tawng a, a pride hmachhuanin Mapuia mamawh huam anga lan a hreh vangin Mapuia laka a lungawi lohna leh thin tâwtna te chu Davida lakah a hrithla ta a ni mai. Hei tak hian inlaichinaa inngaihsak leh inhriatthiam tawnna hlutzia chu a pholang chiang kher awm e. 

A block tlat avangin va biak tumin awmzia a nei tawh lo tih a hria. A pu thih thu te pawh kha a lo hre ve a. Mahse, va lan ve kha a zak! Mapuia'n eng he huah a lo ngaih loh chuan zahna bak a hmachhawn dawn lo tih a hria. 

"I mood hi a inthlak nasa ee.. I bialpa nen chuan in inbe tha lo chhunzawm zel mi? " Davida'n a rawn ti a. 

"Min rawn then tawh alawm" a ti ve mai. 

"Chu! Chance ka nei tihna" a rawn ti vat. He pa hian a duh ve hle a nih hmel. 

"Mahse, Dave, ni pawh ni ila keima lamah hian chiang lo a la awm si a. Ka tina mai mai zawk ang che tih ka hlau. Chuvang chuan tuna ka harsatna hi ka lo tuar zo ve phawt ang a. Ka move on thei a nih chuan, kan la ngaihtuah zawk dawn nia.. Bialnu tha deuh nei rawh. I phu.. " a va ti a. Thawk a la halh bawk. David lakah pawh a inthlahrunawm a ti ve tho mai. Chutihrualin thian anga inkawma nawi dun leh inngaihsak tawn kha an ni ve mai a. Han inngaihzawn tak tak dawn chuan, a sawi tawh ang khan Mapuia vanga a natna leh rilru hahna te avangin Davida rilru lehzel a hliam tel ang tih a hlau. Mapuia'n a then ta sa sa, ngaihdam dil a tum bik lo. Tun tum chu dik inti pumhlum lo mah se; a thiam loh fai vek a ni lo tihah a chiang ve tlat a. Move on a tum ve hmiah. A ngaih ngawih ngawih lai pawha a rilru hrethiam lo va, rehsana thil danga a buaina vanga thlauhthlatu chuan a hmangaih tawk loah a ngai ve tlat! Hun pawh an inpe rei thawkhat ve bawk a. Amah ngaihsaka kawm hlimtu a hmuh vanga engkim titawptu chu kalsan ve mai a tum ve ta a ni. Nat erawh a na khawp mai. 

Terini chu a harh zawk. A chhan pawh Tebera phun bul bul thawm a hriat vang a ni. An pa a duty daih a, amahin an khum zaupuiah a mu bal mai. A inbeng kang a, Tebera thusawi chu hriatchian tumin a beng a dawh a. A riat nawk nawk ni maiin a hria. A va tho ta nge nge.. Dimtein Tebera te room kawngka chu a hawng dek dek a. Tebera chu khum lu lamah a thu niaih a. Khum mawng lam melhin a tawng bal bal a. Mak a ti kher mai. Candy erawh a thaw sâk sâk a. A mutui nasa. Khum mawngah tumah an awm si lo. Thawm siamin a va lut ta a. Tebera a rawn hawi vat. Tunah dar 1 a ri tep tawh si. Engtin nge chutiang chuan a awm theih? Naupang tê si.. 

"Tu nge i biak? " a ti ta sap a. 

"Ka thiannu a nia.. Aahh!,khaw nge a awm daih le.. A zak aniang. I lo kal sia" Tebera chuan a ti ta mai a. Terini a nghing dawt. Hlauhna mak takin a tuam niin a hria. Tebera hmel chu a pangngai vek bawk si. 

"Tumah an awm loh hi.. I suangtuahna a niang" a ti a. A nau bulah a thu ve nghal. 

"A awm alawm.. A fel lutuk. Kan zirlai te min zawt thin. Zan tin a lo leng ziah zel.. Eitur pawh min pe thin" a ti ta zel a. Terini'n mak a ti kher mai. A rilruah ramhuai a rawn lut nghal vei nen.. Muanpuia awm bawk si lo chuan a awm a tinuam lo takzet a ni. 

"An awm lo alawm.. Muhil tawh rawh le.. Naktukah thawh i hai ang" tiin a nau chu a muttir a. Puan a sintir hnuah Candy a melh leh zauh a. A chhuak zui ta nghal. Sitting roomah a thu vang vang a. A nau hi a ngaihtuahawm ta riau mai. Engtia chet lak chi nge a hre bawk si lo. A muhil thei lawk lo lehnghal. Muanpuia hrilh vat a ngai a ni. 

"Bawiha, vawiin chu awm teh. Huan lam pawh thawh tur em em a awmin ka ring lo. Kan ngai ve che lawm" Nguri chuan Mapuia en chungin a ti a. 

Mapuia insiam lai pawh chu a tawp chawt. "Inah tihtur a awm lo em alawm" a ti mai a. 

"Nu, a û hi U Sasai nen an inthen aniang. Nizanah U Sasai'n min lo bia a.. 'i u a dam em? " a lo tia.. " Nauteii chu a rawn ri leh phawng. Nguri rinsa vek a ni. A fapa chaw ei tlem zia te, a tawng tlem zual te, amaha awm nuam a tih zawk zia te a hmu vek. Mahse, amah Mapuia'n engmah a hrilh si lo va, sawipui a duh lo a nih a ring a. Pu Mawia thih atangin thla 2 zet a liam tawh chu a nia. Inleng pawh an nei ta ngai lo. Mapuia te result a la chhuak lo deuh a, a chhuak ve tep tawhin a rinawm. Eng emaw fel loh vangin an rawn tichhuak hleithei lo a niawm e. Khang thla 2 chhung khan Mapuia chu in lam aiin huanah hun a hmang tam zawk tihtheih a ni. Ina a awm ve pawn games a khel thin. A nu ngainat loh ber Pubg a la khel zui! Time pass-na a mamawh ngawih ngawih tih a lang reng mai. 

"A dik em? I nau sawi chu" a ti satliah a. Lawmsanga leh Pi Lawmi erawh kawmthlangah vawk an teh daih a. Mapuia chuan a nu pawh en chuang lovin, "Dik e" a ti sup. 

"Sawi duh te i nei lo em ni? " a nu chuan ngaihtuah hmel deuhin a ti a. A nu rawn melh zauhin, "Duh lo. Ka tuar thei" tih leh a rooma luh a rual nghal. Nauteii chuan a enzui vang vang a. A nu erawh chu tukverhah dakin eng emaw tak zawng a ngaihtuah chiang a ni. 

Khumah a thu hnawk a. A phone chu a hmet eng nghal. A vawi tam takna atan galery-ah lut lehin 'Mine' tih folderah lutin Sasa nena an thlalak dun zawng zawngte chu a mal malin a en chhuak leh ta vek a. A thaw leh hawk thin. Sasa nen Reiek an kal dun tuma an thlalak, Hlim tih hriat zeta Sasa nui lai chu a zoom leh a. A khi leh suk. A rei telh telh a, a harsa tulh tulh mai si a. A sarhu lai kha chuan a pu thihna nen, buaina thenkhat a nei a. Sasa lakah a thinrim rih bawk a, awlsam takin a block kha a ni reng a. A tuar thei viau a nih kha.. Mahse, thla khat a liam atang khan awmngaihna hre mang lo khawpin sasa a ngaihna chuan a rawn vilh thin a nih kha. Tihngaihna a hre lo va, a unblock duh chuang hek lo. An kawmthlanga a kawm ve thin Rinzuala'n pubg a thawn ve a. Sasa khan a khel thin tih a hria. A vawikhat nan Pubg chu a khel ve a. Mipa ta na na na chuan a thiam ve thuai a. A hun awl hnawhkhah nan a hmang zui ta kha a nia. Mahse, zan tin a mut dawn leh a thawh hlima a mitthlaa lang hmasa ber leh a thinlung rawn luah hmasa bertu chu Biakhmingsangi a ni. Engtin nge a awm tak zel ang tih a ngaihtuah ve thin. Rki lah a reh ve hmak bawk si. Vawi khat phei chu a tuar thei ngang lo va, A nau phone en ruk sakin, Sasa status a va en ruksak nghe nghe a ni. 

"Single is bae" tih a lo hman a hmuh chuan a thaw huai ve ringawt. A la single ve nge a cousin anga a sawipa nen khan an inthen hlim hlawl zawk? A ngaihtuah thui duh ngai lo. Mahse, a rawn ţhing leh tho tho zel. "Ka thiam loh pawh ni loah engvangin nge ka nem leh bik ang le.. Ani pawn a theih chuan.. " tia a han insanmar viau chang pawh hian, exam hmaa a rehsan chungchang Sasa'n chhuanlama a rawn hmang kha a hrechhuak leh thin. Sasa khan space i mamawh chuan ka lo reh rih ang.. A tih avang khan a lo ngaihtha ve tawp kha a nia. Mahse, a bialnu kha mipa thenkhat ten an lo rehsan ve hauh si lo va.. 

"Ninawm.. " ti hlukin a tho hluai a. A nau a rawn lut ve chiah. 

"U.. I rilru a na tiraw? " a ti sap a. Lainat hmel zeta a nauin a melh chu a duh hlawl lo. A kut a hum ruh a, "Na mai mai lo.. I u Sasai chuan a lo biak leh che pawn ka that thu leh ka hlimzia thu i lo hrilh zel tawh dawn nia" a ti nghut a. A chhuak zui nghal. 

"A hlim tawp si lo" a nauin a tih sap erawh a hre hman lo. 

Nauteii erawh an hlimnain a tawnsan vanglai tak a ni thung a. Mateii leh mi dang pawh tumah rawn inrawlh an awm lo va, Sangpuia pawh a ringin tihtauhna pawh a tlem ta viau. Mahse, kum inthlau lutuk chuan hote anga ngaihah harsatna chhete a neihtir ve fo. Nauteii'n BTS a atchilh laiin Sangpuia'n eng he hu-ah a ngai teuh si lo, Sangpuia'n Country a ngaihthlak duh em em laiin, Nauteii erawh chuan R n B lam a sukpui zuk zuk thin bawk si. Korean movie mittui tla pura a en thin laiin, a bialpa chuan Sap pa thingkit mai mai te enin zan a lo tum tawi ve bawk a. Sangpuia hian chimawm a chhuah thin a, Nauteii atchilh em em korean singer ho te chu, "An va nula ve mawle.. Nang ai pawn an no zawk a nih hi" tihsak a ching thin a. Nauteii thinur theihzia leh Sangpuia hnungzang a rim thinzia chu aw.. Mahse, hlimawm ta ber chu a tawpah an nui dun leh thin hi a ni. Class xii a rawn nih takah chuan amah pawh inringtawk chho vein rual a pawl chho ve zel a. Khawvel thilah a harh chho ve a ni ber. A zahzumna te pawh a zia ve zel a, a ţawng phawng phawng thin erawh a la sim hleithei lo. Tik tok lam te lah a uar ve mai siah! Thil a zir thiam zung zung roh a, a lam deuh reng mai. Sangpuia chuan hmuhnawm ti ru viau mah se, a lo entu mipa te rilru tur a lo ngaihtuah a, an lo starin an lo bem vak ang tih a hlau thin. Chuvang chuan, Tiktok tak chu bansan turin a ngen ta tawp a. Thuawih thei tih takah a lo bansan ve mial a! Mahse, ngiat a nei thung. Mobile Lengend khelh dun a rawt tlat! Sangpuia a va mangang e aw. Tlangval nupui nei rual zet tawh ML khela han rik pawp pawp chu inhmeh a ti hlawl si lo. Mahse, a bialnu naupangtêin a nawrna chu a hnial fithla thei bik teuh lo. A install ve ta rup a. An han inzirtir lai boruak chu lemchan dawhsanah phochhuah nise, A funny rualin a va romantic thin si em.. Sangpuia pawn nuam a ti chho ta viau a. Mahse, mut hnuah darkar khat bak an khel ngai lo. Nguri'n Nauteii tan hunbi a siamsak miau a. A nu chu a palzam ngam meuh lo a ni e. 

"I fapa hi tun lai chu a hlim lo hle a ni" Lawmsanga taksa huh hrukhul pah chuan a ti a. 

"Ngati nge" a lo ti nghut. 

"A bialnu nen an inthen pek alawm" a ti mai a. 

"Min va tluk lo ve mawle" a lo ti sup. 

"I zak em? I thikthu chhiat lutuk vanga kan buai zin zia te kha.. Hnahthial rawn kal rup rup i tum lai te kha ngaihtuah ve rawh" a lo ti hlak. Lawmsanga a keh hui ringawt. 

"Chaw a ei tlem si, games a khel nasa bawk si. BA pawh pass se, tuna a nunphung atang hi chuan beiseina a neihsan vak theih lo vang" Nguri bawk chuan a ti leh a. 

"Engtin nge kan tih chuan ang? Titipui la.. " an pa chuan a ti a. 

"A inhawng lo alawm. Nawr vak ka hreh si a. Hun a tihah chuan min hrilh mai chu ka ring a. Engvanga inthen reng reng nge maw an nih dawn le.. Sasa kha ka ngaina riau asin mawle.. " a ti sar sar a. 

"Chuti taka tuar te chu amah tê hian a tidik lo zawk mawni dawn ni.. Engpawhnise, a tha leh mai turah ngai ang. Chuan,.. I hna hi kal tawh la ka duh a ni. Aikal tirh ringawt hi veng chhung mite pawh an zahawm a ni" an nu melh chungin a ti dam thlup a. 

"I tha em ni? " a lo ti khauh. 

"Ka that em hi.. Na pawh ka nei mang mang tawh lo. Ka nat pawn damdawi a awm a. Ka inbuaipui thei alawm. Ka nu a awm bawk a. Ngaih zawng i ngaihawm viau naa" chimawm angreng fâ hian a ti a. 

"Hmm.. Min ngai tak tak lo a nih kha.. " tiin an nu chu a ner kual a. Mahse, "Nia, i sawi dik tho mai. Min hrethiam viau mah se, a nuam chiah lo ve reng.. Karleh atangin ka kal tawh dawn a ni" a ti ta a. 

Lawmsanga chu a insawi ang tak tak khan a zia ve riau a. Eng emaw changa a taksa leh lu rawn na leh zauh tih loh chu a taksaah phei chuan sawisel tur a nei vak rih lo. A hriatna lam erawh a tum êm em naa, hriat chhuah zawh loh erawh a ngah tawh ngang mai. Hriatchhuah tumin a bei chiam peih tawh lo bawk. A chhungkua a la hriat chuan tawk rih maiah a ngai. Nguri theihnghilh a hlau ber a, a la hre ve zel rih chu a nia.. 

"Eng nge i nghah ber pawh hriat loh i nghak hi duhtawk tawh rawh" Rki chuan a ti sap a. Sasa te in chungah khaw chuanin an ding dun mek a ni. Thlifim chuan an sam chu a chhem leng lâwp lâwp a, Mapuia te veng lo lang ve de de chu thlirin, "Ka nghak tih pawh a hre lo " a ti hul hak a. 

"Hre lo reng e. Ani chu a hlim tawh viau a niang.. A reh tlawk tlawk a nia" a lo ti nghat. A thiannu tan hian englai pawhin a ding thin a, Rki hi thiantha chu a tling ve khawp mai. 

"Engtikah emaw chuan heng thil zawng zawng hi siamthat a la nih ka beisei a ni" Sasa chuan a ti leh hawk a. Rki a lo ner nâng. 

"Ani chuan a kalsan tawh che tih hi i pawm a ngai. La ngai ve chein la hre ve reng che chu nise a rawn be tawh em em ang che. Mipa a nia lawm" a ti mawlh mawlh a. 

Sasa a nui saih,, "Mipa a nia. A pa leh mah mah a, a buaithlak zo vek a nih hi.. Engmah tawnnhriat a la nei lo va, min la ngai ve thin mah se, engtinmah chet a la thiam chuang lo vang" a ti a. 

"Chu reng.. Ngati nge i la nghah tlat si" a lo ti khauh. 

A mit khap sak sakin.. A thiannu chu a melh a. "Min unblock hun mawle.. Min unblock hunah keiman bul ka tan leh mai dawn a ni" a ti ta a. Sasa luhluhzia hretu a ni bawk a, Rki pawn hnial vak a tum tawh lo. 

Mahse, "Block kumkhua ta che sela" a ti hram. Sasa a nui hawk.. 

"A thei lo.. " a ti fiah kâk.. A beiseina chuan a mitmeng a kap eng sawr sawr mai. Ni e, Davida pawn bialnu a nei daih tawh. Sasa tihpui a la ni zui! Thinlung hi sihnip chang chu awm thin mah se, a tak tak hi chu kalsan hlen hi a lo harsa a ni. A khawhar lunglen laia a rilru putdan, Mapuia runluih ve sak emaw a chakna te kha tunah chuan an bo vek tawh. Nia, Mapuia'n a rehsan lai khan a thinrin leh a lungleng tihngaihna hre thin lo khan status te an up khum ve thin tak naa, en tura a duh berin a en ngai si lo. Amaha a insawh tauh ngunzia te kha aw.. Kha feelings avanga a pelhena khan vawiin thlengin mal takin a la dintir chu a ni sia le.. Mahse, Kan Sasa-i hmeichhe danglam a ni a, a beidawng duh tlat lo. A beidawn teuh ve ber ţum pawhin, "Ka pawm a.. Min kalsan tih hi. Mahse, ka beiseina a bo thei miah lo hian beiseitur a la awm tih min hriattir tlat a ni" a la ti fan tho. Hnem duh leh nawrkal duhtu tan pawh deal thiam chu a harsa ve ngawt ang le. 

Terini'n Tebera damdawi ngeihzia leh a lawm thu Muanpuia a hrilh mawlh mawlh lai chuan, Muanpuia phone a rawn ri a. Terini chuan a zuk hmu hman. Jenny bawk a ni. Muanpuia chuan lain, "Aw " a ti a. 

"Ajay chu bail phalsak a ni anih chu" a rawn ti a. 

"A va mak dawn ve" a ti nghut. 

"Mahse, engkim ka tifel vek tawh. Chuvang ania ka lo call che. Ka in thar lawm nan naktukah zanriah buatsaih ka tum a. I lo kal ngei a ngai aw" a rawn ti ham ham a. Terini a melh zauh, ani lah chuan chiang zetin a lo en si. 

"Ka thei lo ang. Kan nu nen eichhuah kan tum a.. Sorry aw.. " tih leh dah a rual nghal. Terini insangmar pawh a inthlahdul ve nghal. Jenny hian a rawn be ngun mah mah a ni. Eng emaw chhuanlam tur a hre ropui si. 

"Chuan, Tebera chu.. " muanpuia'n a tih chuan, "Hei kar hnih lai chu thinthiin a muhil ve tawh chu a nia.. Ka lawm tawp" a ti a. 

"A tha mai ang. Ka rin danin In khua atanga heta a rawn awm thut, a thiante hmuh tur awm bawk si lo a khawhar ve lutuk khan a ngaibtuahna a kawm thin anih ka ring ber" a ti a. Terini rindan pawh a ni. Tebera an entir tuma Doctor pawh khan he lam hi a zawh chík viau tak kha. A ngaihtuahna a kawm nasa lutuk kha tak tak emaw tiin a tawngte pawh a tawng chhuak ta hialah a ngai. Ni hram se a duh hle bawk. 

A ngaihtuah mek laiin Candy leh Tebera nui hawk hawk avang chuan an room lam chu a va melh zauh a. An hlim thawm ngaihthlak chu a hrehawm hranpa loh hle.. Muanpuia'n thingpui háng in a chak thu a sawi vangin lum turin choka lam a pan a, mahse, A luhai thut chu a pai nawk nawk mai. Muanpuia'n a lo chelh vat. "I tha em? " a ti var a. A ngaihtuah hmel hle. 

"Umm ka tha reng. Ka lu a hai thut a nih kha" a ti mai a. Thingpui chu a va lum zui nghal a. Fridge chu hawngin tui vawt a in khawlh khawlh a, tui a zuk dah leh chu fridge-a arsa siam mai tura an chan lawk an dah rim chu a hip fuh tehreng emaw ni.. A uak nghal tuarh. A luak thei mai dawna a hriat vangin bathroom a pan nghal. A va uak tuar tuar a. Muanpuia a rawn lang leh zat. 

Mittui tla phungin a rawn chhuak a. A banah a lo chelh vat. "Terin" a ti sup a. An pa chu a han melh a, "Umm" a ti a. 

"I rai a ni lo maw? " a ti ta sup a. Terini a lo meng phawk viau. Mahse, raino ho hi an luak a chhuak thin tihte, an lu a hai thin tihte a hre ve tlat. A la p8 miah lo tih a hrechhuak nghal bawk. 

"Ehe! A niang" a ti chul a. Muanpuia hmel chu hlimnain a khat nghal nia. Engti dan emawni an nupa chuan an han inpawm chuk chuk ringawt a! 

"Naktukah i test ngei tur a ni.. " Muanpuia chuan thuneih hmel zetin a ti nghut. "Yes boss" a lo ti ve zat a. An va hlim dun reuh tak. 

"I u va kai tho rawh. A va mu rei ve" Nguri chuan Nauteii bulah a ti a. 

Nauteii pawh a kal ve mai. A u lo inlukhup tlat chu a va sawi nawk nawk a. "U, tho rawh. A tlai tawh a nia" a va ti a. Mapuia a rawn che talh talh. A rawn inhaihawng a. 

"Umm.. Ka lo tho ang" a ti phak chhap a. 

 Nauteii a kal ve leh mai. Mahse, A hnu lawkah rawn lut lehin Mapuia thawmhnaw bawm chu a va hai rak rak a. "A pi hi a mit a tha tawh si lo va, ka tawnzau hi i ta maw a lo ti leh mawni " a ti niah niah bawk. A nau chu a lo thlir reng ringawt. Nauteii chu rawn lehhawiin, "Tho ta che. Nge i la mut reng si a" a ti hlar a. 

"Chutin a thawh ngawt theih loh.. Nghah a ngai" a lo ti nghut a. 

"Eng chu maw" hrethiam lo zetin a ti hâ a. 

"I hrethiam lo vang. Va chhuak rawh. Tawnzau chu ka lo zawng ang.. " a lo ti a. Ner khum chungin a chhuak ve leh mai. Mapuia pawh a khi ve suk mai. 

Vawiin chu khua a tha bawk a. An chhungkuain Pi Lawmi tel loin huanah an feh dawn a ni. Nauteii a phur leh hle. Tui chen a chak tawh viau a niang. Mapuia'n motor a khalh a, a bulah a nau, a hnungah Nguri te nupa an thu a. An hlim tawk ve viau mai. Temple an thlen lai takin Nauteii chuan, "Ehe! Saw u Sasai" a rawn ti nghek a. Mapuia a brake tuarh! Mahse, inthunun vatin Nauteii kawhna lam chu hawi duh lo luiin hmalam panin a tlan leh nghal. Hawi erawh a va chak si em. Nguri chuan a fapa chet dan chu a chîk ngang mai. Lawmsanga erawh a hawi vual vual ringawt. 

"U, i hmu ve em? U sasai te kha" Nauteii'n a la ti zui. 

"Hmu ve nang" a lo ti mai a. 

"Hmu ve ta che. I mawl sia a" a lo ti zêk. 

Lawmsanga a lo nui huk.. Mapuia pawh chu a khi suk a, "I â thung alawm" a ti ve mai. Sasa chungchang an sawi zawm leh tawh lo. Huan an thleng a, Nguri'n thlai lak theih ang te a la khawm a. Lawmsanga'n kuhva rah tlem an ken chu a ching bawk. Mapuia leh Nauteii erawh chuan sangha an man thing. Nauteii tui cheng chak tawh bawk si chu a khawngaih deuh nge, "Va cheng rawh. Tla miah suh ang che" a ti a. A u bianga chuk zauhin, "Lalmifelpa" a ti hap a. Tuikhuah pakhat zawk a pan nghal. A nau hlim leh phur zet melh zui vawng vawng chungin, "Ani pawh kha nangmah ang tho khan a phur thei asin" a hriat tawk lekin a ti sup a. 

"Ngaih viau chuan hrilh mai hi a finthlak"a nu aw a hriat rual chuan a inher zawk. A phu chiang ve bawk a ni. A nu chuan a lo nuih var var a. 

A bula thuthmun rem vein, "A lakah i rilru a la danglam eih si lo va, engvanga luhlul tlat nge a nih ang aw" zawt ni chiah si lo hian a ti leh a. 

"A tan engmah ka ni hleinem" a lo ti bung nghut. 

"Ka ring ve hauh lo" a lo ti. 

"Nu, a tam lutuk.. Ka sawi duh lo va.. Awmzia a awm tawh lo" a lo ti hul hak. 

"Awmze neihtir tum a ngai a ni mai lawm," Chhim keitê Nguri chuan a lo ti hmiah. 

A nghakuaia sangha tang mek va melh chungin, "Ka hmangaih a. Ani hi ka hmangaih reng tawh ang. Mahse, ka tan a tling tawh lo. Phatsan hmang a ni a, min bum a ni" a ti hriam hraih. 

"Chuan, tunah chuan bialpa nghet a nei tawh tihna a ni maw? " Nguri'n a lo ti a. 

"Nei chuang lo. A single"

"Tichuan, nang pawh i single mek a" awmze nei zeta a nuin a tih chuan, "Nuuu, awmzia a awm lo ka tih chu.. Min duh tawh lo vang. A tan engmah ka ni lo. Tin, min tina bawk. Ngaihdam pawh min dil hleinem" mapuia awki a sang hrat. 

Nem leh fiah zet hian, "Ka fapa hlimna hi kei chuan ka duh ber a ni. Ani nena in in khawvelah khan i hlim thin. Tunah chuan tihluihna nena i nui hmel chauh ka hmu thin. Chu chu hmuhnawm ka ti lo a ni" a ti ta a. Mapuia pawh a ngawi hmak. 

"Nuuu, rullll" Nauteii rak ruai ruai vangin an ngaihtuahna kawm lai chu an tawp chawt. A rang arangin Nauteii lam an pan nghal. Tuikhuah piah lawka thingbuk hmunah Nauteii chu kekawrbul leh tawnzau nen a lo thu a, Rul chu a chu hman a ni ngei ang, a kheimit chu a lo hup a. A mangan hmel kher mai. Mapuia chuan Rul pawh chu a va hmu nghak mai a. Lung a hmu mai si lo va, a kut lawngin rul chu a va man ta mai a, Nguri'n, "Fimkhur rawh" a lo ti tuar. Mahse, A lu lamah a man hlauh a, a hmet ta ngat ngat mai. A lian lem lo bawk a, kar loah a thi ve ta mai. Nauteii chu a nu chuan a buaipui mek a, a chukna hmuamhma pawh a lo awm kuau mai. Mapuia'n a nau chu thlamah a pawm phei a, Lawmsanga pawh an thawm a lo hre ve nge, a rawn lang ve hlawl. Thlamah chuan an muttir a, hmanhmawh takin a chukna hmuamhma chu an zai khalh nghal zung zung, Nguri'n a chawnah a lo tawnkhalh bawk. A fanu chu a thlamuan pah reng bawk. 

. "Pa, ka thi dawn tiraw? Rul chuk chu an thi thin sia.. Thih ka la duh lo" a ti mawlh mawlh mai. 

"Bawihte, i thi dawn reng reng lo, chuktu che kha a tùr a chak vak lo va, hei i uin a tûr a la chhuak mek e" a pa chuan a lo ti vat. Mahse, hmeichhe naupang ngang a ni a. A thlaphang viau. Tùr khan a lo fan hman ve deuh nge mawni, a chawn te chu a duk ţan a. Nguri a mangang ta hle. Mangang anga lan a hreh si.. A fanu a tithlabar zual dawn a. Lawmsanga erawh pa nih zawng a tlin takzet a ni. An nu bulah han pangchangin han nawi viau thin mah se, Nguri a mangan ve tawh chinah chuan a patling thiam hle. Dam dapin a che a, a tawngkam pawh thlaphanna reng a lang lo. Mapuia chuan, "Haw mai ang u" a rawn ti hlawl a. 

Lawmsanga chuan, "Ni e, motor va start rawh. Ka naute, damdawia jection i ngai sia, haw mai ang u aw.. An jection che ang a, i dam nghal hmak dawn.. Hlau miah suh, i bulah kan awm reng a nia.. Khawi ka pawm ang che aw.. Umm.. " ti dam thlup chungin a fanu chu a pawm kang a, Nguri beng bulah, "Khatin awm mah ta che, bungraw hawn tur lo lakhawm rawh.. " a ti sup. Nguri pawh a che nghal vat vat mai. 

Nauteii chu motor hnungah an nupain an kar cheh a, Mapuia a tlan muang lo ngang mai. Nauteii erawh a chau riau mai a, a che chang peih meuh lo, Lawmsanga'n a be chhen zawk a, chuti ni lo se a muhil daih ang. Mahse, "Bawihte, muhil suh aw.. A chhan chu i mutthilh chuan damdawiin a thawh tur ang a thawk thei dawn lo va.. " a tih tlat vangin Nauteii pawh a meng lui hram hram. Nguri erawh a pachan theih thin nen, a fanu lakah meuh chuan eng a ni hleithei lo a ni e. Tukverhah dakin a mittui a hru zauh zauh mai. A thla a phang takzet a ni. A tawngtai ru mawlh mawlh bawk. 

Mapuia pawn Sangpuia a call ve nghal a. Damdawiina a lo nghah tur thu a rawn sawi nghal zat. A khat tawka Lawmsanga'n a fanu a be leh zauh tih mai loh chu thawm dang siam lo vin Damdawiin chu an pan ta zel a.. 

(Tui an sem a. Dar 3 atangin ka ziak tan chauh. In chawh 🙄😢 ka kut natzia hi e 😢