Thutiams2- 24

THUTIAM (S2)- 24

Ziaktu: Toni Râlte

(A tawpa Note ka dah khu chhiar vek ang aw) 

"Eng nge ni ta chel chul? " Nguri chuan a rawn ti a. Nauteii chuan mitmeng buai zetin a phone chu a nu a pe. Nguri pawh chuan a lo chhiar nghal a. A ner sak. 

"Tkhan a ti tlat sia.. Engtin nge ka tih dawn? " Nauteii chuan a ti hap a. 

"I duhthlanna i hman thiam loh chuan nghawng a nei thui deuh dawn a nih hi. Engpawhnise, rilru tihhah nan hmang lo la; Muanzuala pawh a la naupang a, a atchilh a la tina ve bawk anih hi. Hun a kal ang a, a zia chho ve mai ang" Nguri chuan a ti a. 

Nauteii chuan zah hmel lek lek hian, "Nu, ka zak lo tiraw? Ka lerh ee.. Bialpa pahnih ka nei tawh vel" a ti a. A inthiam chiah lo a nih hmel. Lawmsanga a rawn lut ve chiah, an buaina chu a hre ve lem lo naa, chutia an nufa inmelh tawn reng a hmuh takah chuan a chhan a zawt ta a. Nguri pawh chuan a hrilh ve mai. Lawmsanga chuan thinrim hmel pawh pu hran lovin a fanu hnenah, "Duh ai chuan ngaihzawng i ngaihtuah hma lu deuh a ni. I la á si a, an bum lo che hi i vannei zawk. I nu hi i nu ni lo phei se chuan, i tal buai tawh ngawt ang. I lehkha zirnain a tawrh dawn chuan, kei ka lawm dawn hlek lo a nia" a ti ta a. A pa hian he lam kawng hawi hian a zilhhau ngai zen zen lo. A sawi tawh erawh a pawimawh thawkhat tih an unau hian an hrethiam ve vek. 

"Nia, nih chuan Sir pawh hi ka then dawn mi?" a lo ti leh hú a. Nguri a chek hlak. 

"Zaninah inngaihtuah la, Sangpuia nen pawh sawi dun rawh u.. Naktukah thutlukna i siam dawn nia.. I pa thusawi kha hrereng la" a ti a. 

"Lehkha zirnaah chuan min tibuai lo. Ka thiam phah daih zawk" a ti hram. Lawmsanga pawh a nui ve tawp. Nauteii pawh chu muthmunah a inngaihtuah ve nasa a. Sangpuia chu a thinlungah a lian zawk a, tin, then hlen tak tak chu a ngaihtuah pha lo. Muanzuala hian a tibuai zuiin buaina nasa zawk a thlen ang tih a hlau ve tho bawk si. A nu ni lo tu emaw a thian tha tak sawipui theihte awm nise a zia ve mahna. Amahin harsatna buai ru zet chu a hmachhawn a ngai ve miau si a. Zing dar 6:30-a a harh, a tho chhuak chu a thu vâng vang a. A bu ta nghat. Nizan lama Sangpuia nen an inbiakna te a ngaihtuah let bawk. Ni e, Sangpuia khan, "Kei chuan i duhthlanna ka zahsak ang che. Thlan loh ka lo ni ta a nih pawhin huat zuina che ka nei lo vang. Ka naute kha i la ni reng dawn tho, mahse, ka tibuai zui lo vang che. " a ti a nih kha.. Muanzuala erawh chuan, "Min kawp mai rawh" tih thu a la chham ngat ngat. Mahse, thil tam tak ama phak tawka a ngaihtuaha a zir ve chinah Sangpuia chu pasal atan pawh tlak zawk leh puitling zawk a ni tih a hria a. Mangan deuh hi chuan ngaihtuahna pawh a lo fim deuh aniang e. A pa dinhmun a hria, eng tikah emaw a natna hian a hneh hun a la awm ang a, a la thi dawn. Chutih hunah chuan nghenchhan tur innghahna tlak a la mamawh dawn a, A rilruah Sangpuia bak mipa dang reng reng an lang thei lo. A nakin hun zel ngaihtuahin leh a hlimna ber tur nia a hriat kawng zawh tur chuan thutlukna a siam fel ta a. Sangpuia ta a ni leh dawn a ni. Muanzuala lakah pawh inthlahrunna chin a nei lo thei bik lo va; a lakah a sual mawlh si lo. Msi runluih nan a la hmang leh thei zel bawk nen.. Mahse, an bultan dan te a ngaihtuah a, a lem riaua hriatna a nei ve a. A daih rei a ring hek lo. Muanzuala chu hmeltha a tiin a rualpui a lo nihnaah a bula awm pawh a nuam.. Mahse, a hmalam hun atan a rintlak a ring si lo a ni. Chuvang chuan a tina dawn tho tho a, engti kawng zawng pawn a tuar tho dawn. Engkimah a block fai ta vek tawp mai. Chutianga a tih chuan a rawn ngaihven thei lo ang a, an inbiak ngai loh miau chuan hmeichhe dang tha tak tak a tawngin a hlim leh thei mai dawn a ni. 

"Eng nge i thutlukna chu ni ta? " A nuin a lo tih chuan, "Sir ka thlang ta mai" a lo ti sap. Nguri pawh a bu nghat ringawt. An sawi zui leh tawh lo. 

Pu Mawia hriselna tlahniam chho tan chuan Nguri leh a nu mang a ti-ang ţan hle. Mi dang bulah erawh an la zep ve a, Lawmsanga bulah ngat phei chuan amah Pu Mawia ngei pawh a insum nasa thin. Mapuia exam hmachhawn lai a ni bawk a, ani chuan lehkhazir lam a atchilh rih bawk a, a ngaihven lutuk lo. Nguri leh Pi Lawmi chuan a rukin an tuar tlawk tlawk a ni mai. Lawmsanga mutthilh hlanin an pathumin Pu Mawia awm zel dan tur an rel ho a. Cancer Hospital lama va indah phei mai te pawh an rel. In lama an inenkawl chuan, Lawmsanga leh naupang ten hriat hun an la nei dawn si. Mahse, Pu Mawia chuan, "Natna a ni a. Ka thihpui tur tho tho a ni bawk nen, in lama hetia ka chhungkua hmu thei chunga thih ka duh a ni. Saw ta kan indah chuan an ngaih a tha lo zawk ang" a ti ta a. Dik an ti viau lawi a. 

"Ni e, ka pa, Lawmsanga pawn hria se eng nge pawi? Chutin a hniam phah lo vang. A ţan phah sauh zawk mai thei asin. Kan bulah kan enkawl theiha i awm hi kei pawn ka duh ber zawk a ni" a lo ti ve a. Pi Lawmi erawh a lungchhe deuh nge eng thu mah a sawi thei lo. 

Cancer hi zawng mizo te thihpui tam ber pawl natna a ni reng a,a pawi ngawt mai. Pu Mawia pawh a tir lamah khan han thain hrisel tak ang khan lang ve mah se, a chhunglamah a rawih tial tial tih chu a hmel landan pawn a rawn tilang chho mai. A unaute bakah Kohhran lama a thawhpui te pawn an rawn kan ta zauh zauh a. Intipachang thin hle lo se zawng Lawmsanga natna in a uai rih vang pawh hian vui a ngai tawh maithei a ni. 

"Vawiin hi ningani chu a nia" Terini chuan chaw khawrh chungin a ti zauh a. Muanpuia. a lo thaw hawk. "I lo la hria ni maw? Ni e, mahse, sunday emaw mondayah emaw a lo haw chauh dawn a, kan la inthlah dul thei e" a lo ti a. 

"Eng lam berah nge in veh le? " a ti ta tawp. A rilru a kap ngang si a le.. 

"Smugling chungchang a ni e. Sawti taka an hausak chhan saw he vaipa eichawp dawr ringawt hi chuan a phuhru zo lo alawm..a dawr saw a lian pangngai viau a, mahse, an in leh lo bakah a nupui leh fate sum hman dan atanga chhut chuan, dan phal loh hmanga sumdawnna hi a ruka a kalpui kan ring a ni. Kan ring satliah tawh lo, kut man chauh kan mamawh tawh zawk" a ti ta vek a. Terini awm pawh a nuam sâwt ta hle. 

Tebera school kal tur a siam laiin, "U, nizanah khan ka khum bulah i lo kal em? " a ti khauh a. Zan dar 8 velah Candy a mutpui a, dar 9 velah a mu ve chauh kha a nia. Tebera erawh dar 9 rik hma deuhin a mu a, "Kal lo e.. Ti nge? " a ti a. 

"Nangmah emaw ka tia. A ding reng a. A hmel ka hmu thei si lo va" a ti ta. 

Terini chuan ngaihtha vak lo hian, "I mumang aniang. Maimizialin i awm anih daen chu, vitamins kan chah dawn nia, i pa Muanpuia" a ti ta dauh a. Tebera pawn a sawizui tawh lo. He in Muanpuia tana a pain a pek hi, Pu Mawia khan ram awl a la nih laia a lei, a hnua hetia in sa ta hi a nia. Chhim lama awm niin, an thenawmte nen hian pen 50 velin an inhlat awm e. In mal ding, assam type a ni a. A lian lutuk lo. In bul maiah Terini hian tomato, antam leh bean tih vel a ching ve a. An la tê thung. Pangpar tlem azawng an khawi ve bawk. Terini chuan Tebera kal hnu chuan a ngaihtuah zui mai mai a. Saii leh Muanpuia inthen laia Candy nen chauha in an nghah lai te khan engmah thawm riva leh han ngaihthat lohna tur a hre ngai lo. A huai ve hrim bawk a. Khalam kha a ngaihtuah phak meuh lo a ni ber zawk e. Tebera rawn awm hnua hetiang lam a hre ta zauh zauh chuan a awm a tinuam lo ve lek lek. A hlau erawh a ni si lo. Tebera zawk hian eng emaw tlakchham a nei a nih a ring zawk mah. 

Muanpuia chuan dawhkana a phone ri ral ral chu lain, "Hello" a ti nghal a. 

"Hei hi ka number pakhat zawk aw.. Keimah Jenny.. I office em ni? " a rawn ti sar sar a. 

"Aw hei ka thu mek" a ti ve mai

"Zanin chu chaw ei chhuak ang hmiang. Ka treat ang che. Mizorama kan rawn awm hnuin han inkawmfalna kan nei miah lo va, ka pasal chungchang pawh hmaichhana sawi duh ka ngah lutuk",a rawn tih chuan, "Kan nu ka lo dil dawn nia" a ti vat. Jenny a rawn nui hak hak a. 

"Umm.. Thaibawih tan ve " a ti zauh. 

"A ngai ve lawm.. Di hlui hmuh dawnte phei chuan dil loh chi a ni lo" a lo ti ve sak. Nui bawk bawk chungin an dah ta a. Msg in Terini hnenah, "Jenny khan chaw eiah min sawm a. An pa chungchang hriat ka duh nen, ka ei mai dawn asin" a va ti. 

"I thu thu lawm" a rawn ti a. A lungawi vak lo tih a hrethiam. Mahse, Sawi tawh ang khan Jenny nen hian a takah an la inbe miah lo tak tak a, phone kaltlang hian an sawi mai zel a. Chu pawh Jenny hian thup chin a la nei tho thin. A tak ngeia hmachhawna engkim sawitir vek theih a inring a ni. He case changtu a lo ni bawk nen, Jenny a hman tangkai theih chuan awlsam takin an hneh thei mai dawn a. Terini chu engtine maw tihlungawi leh theih mai a inbeisei bawk. 

Mapuia exam pawh a la titha ve zel e. A zir nasa bawk a. An chhungkaw boruakin delh ve deuh mah se; a zirna kawngah erawh intihbuaitir loh hram a tum bawk a. A hlen thei dawn a nih hmel. Sasa te nen an neih rual ni chuan a zo hmasa zawk a, Canteenah a lo nghak ran mai. A hnu lawkah Rki nen an rawn lut a, Mahse, Rki chuan, "Ka kalsan dawn che u, Ka nuteii dawrah pen kawi ka ngai si" tiin a chhuak zui leh nghal daih. 

Eitur an lam a. An inhmu khat ta deuh bawk a, an innuih leh ngawt zel. 

. "I chhang tha maw? " Mapuia'n a tih chuan a lo bu nghat a. A phone a rik vangin a bag a zen nghal. Davida call a ni. 

"Aw" a tih rualin, "I titha em? Ka lo tawngtaipui che a nia aw" a rawn ti a. 

"Umm a pangngai.. A va lawmlawm ve" a ti a. 

"Chuan, engtik nge i neih leh khah? "

"Karlehah daih" a tih chuan, "Chuti chu kan dine out thei. Friday tlaiah aw" a rawn ti a. 

"Ka hre lo le.. Kan sawi tha dawn nia" a ti a. Mapuia mitmei a ven ve deuh vangin, "Hei thil ka ei dawn a. Nakinah kan inbe dawn nia.. Nih phawt" tiin a dah zui nghal. 

"Tu nge a? " Mapuia'n a rawn ti ta chiah. 

"Ka thianpa a nih kha.. A fel ve a, chanchin min lo zawt anih kha" a ti liam puat a. 

"Thianpa i nei thei ngawt mai" a ti hul hak. 

"Hmm.. A ho eee.. I thik mi? " a tih chuan, "Mipa leh hmeichhia hi rei tak thian an ni thei tak tak lo. I thian pawh nise, i exam a lo ngaihtuah leh a lo ngaihven chiam kha a tul lo" a ti ta hmak a. A ze ngaitê a rawn chhuak leh dawn e, "Aww.. I reh char char a, min ngaihsak ngai lo va. Min ngaihsaktu chu ka be tha ve ni mai lawm" a lo ti a. 

Mapuia a ner sawk. "Hmeichhiain mipa a biak that tawh chinah chuan awm a awm tawh thin. Ka reh chhan i hria alawm" a ti ve a. 

"Ninawm.. Inhmuh ve chhunah thinrimna tur zawng lo teh" a ti hlak. An ngawi dun ta rih. An ei zawhah an chhuak nghal a. Mapuia bike-ah an inphur. An hawn mek laiin Sasa chuan call a dawng leh a. David bawk. 

"Tun lawk khan bike-a in inphur ka hmu.. I ni chiang lutuk, i bialpa mi? " a rawn ti ta a. Mapuia chuan a tawng a hre pha lo thung. 

"Ni mai mai lo" a ti! A inthiam zán lo nge.. "Khaw nge i awm a? " a ti leh a. 

An hawn kawngtluanin an inbia a ni mai e. Mapuia ngaihdan a pel ta viau. Sasa te in kawtah a ding a, Sasa a chhuk a. 

"Nih aw.. Chaw ei tui" Sasa chuan a ti sap. 

"Ka reh chhung lek pawha mipa dang laka hlimna hmu hmeichhia hian keimah vangin thih a lo tum tawh tih rin a harsa hle mai.. Chaw ei tui le.. " a ti nghut a. A inher a, a tlan haw vang vang. Sasa erawh a ding khawng reng ringawt. Mahse, Mapuia khan a sawi dik tlat si a. A inthiam lo tho nain, a chhuanlam, "Mapuia'n a rehsan char char kha.. " kha thil avang khan inthiamchawp a tum. Mapuia a thlahlel lo sawt leh Davida mitmei a veng ta tlat chu ani pawn mak a ti. Mapuia kha khati khawp khan a hmangaihin a lakah pawh a thikthu a chhia kha a nia. Mihring rilru hi a lo va danglam chak ngai ve aw.. 

Muanzuala a block vangin thawm a rawn nei thei ta lo va. Number a save loh atanga call lo kal tawh phawt chu Muanzuala a nih takin tiin a reject tawp zel. Hrehawm a ti. A namnul hleithei lo a ni ber mai. School kal pawh nuam a ti lo, Msi te ho a lakah nghal tawh vak lo mah se, a nun chu a nguai ve phah tlat. Sangpuia nen an inthlah chho leh tan tawh a. Sangpuia pawn Nauteii awmdan chu a hrethiam viau. A nawr duh lo. Nghah peih a ngai a nih hi a ti mai. Mahse, Nauteii tana thil lawmawm tak a thleng ta thuai a. Tlai khat an school bang, Sir Sangpuia nghaka An school piaha a din laiin, Msi te thian ho an rawn phei dal dal a. 

Nauteii zawnah an ding chat. Msi chuan, "I bialpa Muanzuala pawn bialnu dang a neih leh tawh kha. A duh tak tak che emaw i ti ve a, i chawh ngawt mai" a ti ta zêk a. Nauteii erawh a thu hriat chuan amah kapa mawlh rengtu kha a vit thep suai suai niin a hria. 

"Kan inthen daih tawh" a lo ti ve mai a. 

"Hahha.. Pha kual lo mai rawh. Mi bialpa chuhpuitu chu an tluang ngai lo.. An rawn luahlan ve lap mai che lawm.. " Msi chuan elsen tih hriat zet hian a ti ve leh a. Nauteii a nui var var, "Ka ngaihtuahna hi hria la aw.. Tikhan i tawng awm si lo va. Aw.. Tikhan min luahlan ang khan hria la, lo lungawi ve tawp mai rawh. Ka buai peih lo" a ti ta tawp. Msi nuih pawh a za zui lem lo. 

An la din mek laiin Sangpuia a rawn thleng ta si. Nauteii tan chuan inzep leh inthup a har ta riau. Sangpuia lah chuan a hma atang tawhin inthup buai vak tul a tih loh thu a sawi tawh nen. Msi te ho chu a pawisa vakin a rinawm si loh.

"Hmanhmawh la, traffic a jam nge" a rawn ti zui! 

Nauteii pawh ngawi rengin Sangpuia carah a lut ta thauh a. Makti zeta lo thlirtu Msi te ho chu an tlan pel ta vawk vawk mai. 

"Ehee! Eng nge awmzia? An ni kha" Rindiki chuan a ti nghal vat. 

"Awii an inngaizawng chiang lutuk. Nauteii heta a lo din ziah chhan ka hre ta.., " Buangi chuan a ti ve bawk a. Msi erawh a tum bâr mai. "An ni awm lo em mai a. Sir te nen an hawnna a inang a niang" a ti zawi sap. An ni a nih chuan a awm a nuam lo hle dawn a nih hmel. Nge maw a lo thik ve ringawt ni. Muanzuala atang khan Nauteii laka a rilru putdan a dik lo zo tawh a ni ber e. 

"Min sawi zui dawn a nih kha.. Msi te khan" Nauteii pawh chuan a ti ve a. 

"An duhtawkin sawi ang hmiang. Principal pawn hria se eng nge pawi? Thianghlim taka kan inngaihzawn phawt a hnu"a lo ti mai si. Nauteii pawh chuan engmah mah chu pawi a ti tawh bik lo a niang

"Thu dang daih.. Muanzuala'n bialnu a nei tawh. Ka lawmzia hi.. Ka hlim veng veng" a ti hliai a. Sangpuia tan pawh a lawmawm fú, Muanzuala avang khan Nauteii kha a ngui pha ve tlat a tin ni. 

"A that nasat chu.. Kan hlim thei tawh tihna" a lo ti ve vat a. 

"Chiang e.. Ka thawveng leh ta"a ti ham ham mai. Muanzuala bialnu nei chu a thik lem lo tih a hriat ngawih ngawih. Sangpuia tan pawh hlimawm ve tak tur a ni. 

"Ka pa chu a tlahniam chak riau mai. Damdawiina inenkawl hi a duh lo mi? " Lawmsanga'n Nguri bulah a ti nuah nuah a. 

"Duh tlat lo. Kal tur chiangsa ka nia. Nurse-in min vil thei tho a. Ka in lum ngei atanga kal ka duh a ti tlat sia" Nguri pawh chuan a ti a. Lawmsanga erawh chuan a rin loh deuhin, "Ka pa hi chu ka pa a ni na vang vangin ka ngaisang ngawt mai. A pa ka ti thlawt.. Kei pawh in lama inenkawl ka duh zawk aw.., " a ti a. 

"Nangte chu i dam reng dawn alawm. Ka pa hian zankhat mitchhin a tawk anih chuan, nang bak rinchhan tur kan nei dawn hleinem" a lo ti khauh a. 

"Ka hria alawm.. Heng mawhphurhna hian min uai rih chang a awm thin reng a ni. Mahse, ka pa avang tal pawh hian ka natna hi chu a theih chen chen hneh ka tum a ni. A sarhu lai kha chuan ka zâm a, ka rilru a buaiin a mangang êm a. Ka chhe ta vek a nih kha.. Tunah chuan min ngaihtuah suh. Ka tha em em ang" a lo ti dam thlup a. Nguri tan ngaihthlak a va nuam tehlul èm. 

Jenny chu a nulat lai hmel kha a la paih mang lo va. Tlemin a thau ve ta deuh tih mai loh chu. Fa pahnih chiah an nei bawk a, a kum ngaihtuah chuan la thalai tak a ni. Amah inchei fai peih mi, inuluk tak a ni bawk a. Tin, an neihin a tlin lehzel bawk nen.. Muanpuia pawn a hmuh tum ai daihin a hmu tha. An inkawp rei lem lo naa, zep thu a cheng lo, an inkawp chhung khan sex an hmang nasa viau. An inpawh phah reng bawk a. Jenny thiannu te dawrah zanriah chu an kil dun a. Jenny a titi leh siam siam mai. 

"Ka ui thlawt che. Thingtlang nula, awmpui mai mai nupuia i nei hi" tihte chu a sawi a. 

"A felzia i la hre lo mai mai anih kha" a tihsak ve mai. 

"Kei nen hian kan inmil ber asin le tiraw? Min lo nghah ve mai tur che a nia" awmze nei deuha melh chung hian a ti a. 

Muanpuia chuan thudang sawina remchangah hmangin,, "Inthlawi ţêp tawh alawm.. In pa chu engtikah maw a lo hawn i rin deuh? " a ti ta a. 

"A sawi chiang lo va, ka rindan chuan Sundayah a nih ka ring. Min rawn hrilh leh tho chu ka ring" salad thial chung chuan a ti a. 

"Bungrua chu a lak ngei i ring maw? " a lo ti leh sup a. 

"Um.. Thla 2 dawn a zin tawh lo va. Supply tur a neih ka ring tawh lo. " a lo ti a. 

"Jenny, min pui ta sa sa a, a tawp thlenga min puih ka beisei a nia. Last minute-ah rilru i thlak vaih chuan kan mualpho bakah kan hna thlengin a tuar thei tih i hriat ka ring" a ti dap dap a. 

"Umm ka hria lawm.. Kan inpuitawn tihna a ni mai. Tunah hian in leh lo hi ka hmingin a awm tawh a. Kei chuan khawiah pawh dahin phumbo mah ula pawi tihna ka nei tawh lo" a lo ti hmiah. Muanpuia chuan Jenny rilru puthmang a hriat chuan rapthlak a ti ru ve hle. Mahse, Jenny kha a ni miau a. A nulat lai pawha lu zo tak, thawhchhuah nei lo chu ngaihzawn pawh tum lo bur ang chi kha a ni ve a. A hlawhtling dawn ta te pawh a niang e. A pasal then a duhna chhan em em erawh Muanpuia chuan a hre lo. A zawt duh hran lo bawk. Chhan tha tak a awm a ring. A pasal sumdawnna bultan dan leh Mizorama a thawhpui thenkhat te thlengin an sawi dun thei a. Muanpuia a lawm kher mai. Ajaya hian tlereuh lam bansanin damdawi lam a khawih chho leh mek a, hei tak hi Muanpuia te beng a rawn thlenna chhan pawh a ni. A hausa rei tawh a, mizo thisen hmanga a sumdawnna chu hmeh mih vat a ngai tawh a ni. An zanriah kil dun chu a inchhir lo viau. Jenny a thlah haw leh thlap a, in lam panin a inkhalh haw leh ta nghal a. In a thlen chuan Terini chuan amahin Tv a lo en a. 

A pasal chu a lo ngaihsak mang lo. A rin ruk sa a nih vangin Muanpuia pawh vui lem loin a inbual nghal daih a. Terini thlem dan tur a ngaihtuah nuah nuah. A inthlak fel hnuah a bulah a va thu ve a. "I titau em? " a ti sup. 

"Tau lo" a ti naa, a hmelhmaiah a lang nasa si. 

"Terin, i thinrim tih ka hria alawm.. Mahse, kan hna thilah hi chuan min hriatthiam a ngai a ni" a ti dam thlup a. 

"Ani ber kher" a lo ti hlar a. Muanpuia nuih a za. 

"A pasal man kan duh si a, ani saw kan lam tang atana siam a tul takzet a ni. A tel lo chuan kan beihna hi a chhe vek thei tlat. Nang pawn khawiahmah kan hmalakna hi lo sawi ri lo la ka duh aw" a ti a. Terini pawh tlem chuan a zia deuh e. 

"Ka pa a tha vak lo va. Naktuk tlaiah chhungkaw chaw eikhawm a rawt a niawm e. Nang pawh rawn haw hma tum la" a lo ti a. 

"Ka pa hi aw.. Ka va kan fo thei si lo va, a inthlahrunawm thin teh e.. Nang i fel hlauh a, vawiinah i va lang leh em? " a ti a. 

"Umm.. Zep loha sawi chuan, a daih rei ka ring lo. A pum na a chhuah phei chuan kei chu ka khawngaih lutuk a, ka en ngam lo tawp. A chhel em zawk a. " Terini chuan a lo ti a. Muanpuia a rum nghut. 

"Lehlamah chuan kum lamah an upa ve tawh a, na tawrhtir reng ai chuan Pathian hnenah chawl tawh se tihna rilru te pawh ka pu ve fo mai. Ka nu erawh a khua a har dawn a ni. " a ti a. A nu leh pate inzui nasat zia leh inkawmngeihzia hretu a ni miau a. 

A hma tawh lem lo bawk a. Mu turin an inpuahchah tan a. 

Pu Rempuia te pawh an chhungkuain an rawn thleng ve ta rup mai. Fapa upa ber a ni bawk a, pa chan a chang thiam viau. A pa hmel a hmuh chuan ani pawh chuan rei a daih a beisei bik lo. A pa ai mahin a nu a lainat zawk mah. A pa tel lo chuan a khua a harin a lung a leng dawn êm mai. Nguri a fakawm leh hle, a nu a lo upa ve tawh bawk a, in pui mo nih chu tlin tak a ni. A pa amaha a inthiar theih tawh loh vangin an inrin loh laia han chetsual zauh te a ching a, an mut puan leh awngphah bakah a pa thawmhnaw te pawh ten miah loin a su fai zung zung zel a, A pa chu a vil chawt a ni ber e. Lehlamah Lawmsanga insanmar lai a lo ni hlauh a, a pasal leh a pa vil kawp an ngai lo chu vanneihna a tling awm e. Inleng nei se a lo dawngsawng zung zung a, Terini a va lan loh niah phei chuan a hah ve thin ngawt mai. Thingpui lum leh engilo tih vek a fawmkem si a. Mahse, hlim hmel pu chungin tupawh a hmachhawn thei reng mai a, Lawmsanga ni te leh patea te ho pawn an fakin an mo a ni lo ang tih an hlau viau. Mapuia te pawh exam an zo hnai a. A pu chuan a rilru a kuai peng nasa viau naa, a nuin a fuih nasa bawk a. Theihtawp erawh a chhuah ve hram hram. Nauteii a buaithlak leh fo thin. A pu chu thi mai turah a ngai a, a bula mut a ngen tlat changte a awm. Ani na tuar lai a ni bawk nen,.. A school bangte hi ţap pur chunga lo hawnte a nei a, "Kan in kawtah mi an lo ding sia, apu a thi maw ka tia" tih mai te a hrat. Lehkha pawh a zir ngai meuh lo tihtheih a ni. A pu lahin a lo ngai ve bawk nen, School kal thulh thaka an inawm nilen ni te pawh a awm. Pu Rempuia te rawn zin chu an nu Pi puii a mawng a zang bawk a, Nguri pawh eng emaw chenah a chhawk ve thei a. A tihzia hle. Teteii te chhung pawh an rawn leng deuh reng mai. 

A pu damdawi an chah lam turin a nau nen an inzui chhuak a. Sasa nen an inbe tha lutuk lo. Sasa nungchang danglam ta riau chu a hria, a chhan a hre lo. Lehlamah a reh rei ve deuh a, a titau rih a nih te a ring a. Khamini mi dang a biak char char zanah kha chuan tha tetein an inbe leh mai a. Amah Sasa khan ngaihdam a rawn dil vang a ni. Mahse, a ngaite bawkin an inkhik khak leh zeuh zeuh a. Exam zawha chinfel atan a dah deuh tawp tawh a ni. Bike a park fel chiah tihin Nauteii chuan, "U, saw u Sasa-i " a ti zauh a. A va hawi phei chuan an piah lawka bike chu pan mekin Sasa leh mipa pakhat, a la hmuh ngai loh hi inkai rialin an lo kal dun a. An tawng a vangin an rawn hmu ve lo a ni maithei. A hmuh lai rengin mipa chuan Sasa biangah chuan a piai zauh a, Sasa chu a nui har har mai. Mapuia thinlung chu a ţek chhawk a ni ber e. Nauteii a awm ve si a, inthunun hram hramin, "A cousin a nih saw.. Min hmuh hmain kal ang" tih leh kal a rual a. Damdawi an lam zawh chuan an tlan haw nal nal. A rilru a pik mup mup mai. Zawhna tam tak a nei bawk. Sasa khan, "Ka cousin a lo zin a, chaw ei chhuah a duh ve sia, ka ei chhuahpui dawn" a rawn ti a. 

Kha pa kha a cousin chu a ni takmeuh em tih chu nakinah a hriat mai ang chu maw. Dar 9 bawr velah Sasa chu a call ta a. A ring ral thak. Vawi li zet a call a ring quit takah chuan a tum buai peih ta lo. Lehkha pawh a zir ta lo law law, a rilruah lut hlawl hek lo le.. A pu pawh nachhawknain a chhawk rih a, buaipui a ngai lem lo. A mu ta ringawt. Dar 11 velah Sasa hnen atangin call chu a dawng ta a. 

"I mu tawh law" a rawn ti ban chhalh. 

"Mut loh a hun tawh em ni? " a ti let ve khauh a. 

"Hun ve tawh reng mai. I misscall ka hmu a. Chhungte kan tlawh kual a, ka lo hre lo a.. Sorry aw" a rawn ti a. Mapuia chuan a awih therte lo. 

"Nih chu.. I cousin chu tu nge ni reng reng? Inhmelhriatte pawh a chakawm alawm" insum tak chungin a ti a. 

"Lunglei a mi a nia. Naktukah a haw leh nghal dawn" a rawn tih phei chuan a kut a hum ruh tawh hle. 

"Hmeichhia nge mipa tih i la sawi miah lo" a ti leh hram a. 

"Hmeichhia" a ti zawi sap. Mapuia chuan a be lui thei tawh ngang lo, tawngkam chhe pui pui a hmang ang tih a hlau nen. A dah ta ringawt. A rawn call back leh chuang bik lo. Mahse, whatsapp lamah, "Muttui aw.. " a rawn ti a. 

"Sasa, engkim ka hre tawh e. Tihian kan tawp ni rawh se.. Hlim ang che u. Tlaiah khan ka hmu che u alawm.. I cousin hmeichhia nen chuan.. Heheh.. In ngainat hmel khawp mai. Rawn insawifiah tum lo la, engmah rawn sawi a tul lo e. A tawp vek tawh aw.. Mang tha le" khur der der chungin a type. A inla pa em a, a thaw rawn sak te chu intihahdam luiin a han thaw hawk hawk a. A maimichhing vang vang. Engmah rilru fimin a ngaihtuah thei lo. 

A zing tho phone a khawih chu Sasa msg a lo tam khawp ma. Amah demna vek! 

"A chhan pawh hriat lohin min rehsan a. Ka thiante ka lo kawm ve chu eng nge a pawina? Ka khua a har ve tho alawm. Min hmangaih tak tak ni la min rehsan lo vang. He thilah hi chuan thiam inchantir bik suh" tih te.. "Ani kha ka thianpa a nih kha.. Kan inhmu fuh a, ka thlah a nih kha" tihte a ni nuaih mai. A clear puat. 

"Ka block rih mai ang che aw. " a va ti te te a. A double tick hnuah a block ta hmiah mai. Tunah chuan a chhungkua bakah a hmalam hun kal zel dan tur bak ngaihtuah a tum tawh rih lo. A thawveng huai zawkin a lang. Mahse, a sarhu lai a nia, a thinrimnain a la hneh em a, a la na lo mai mai zawk pawh a ni mahna le. Sasa hi zawng a duhin a hmangaih ve êm a. Tuar lo tawp tur zawng a ni lo ve. 

Chawhnu dar 2 bawr velah Pu Mawia chu a chau zual ta thut mai. An ri deuh hak nghe nghe. A hmai cher kuam tawh leh dang bei te, a mit khur thuk raih te chu an nu chuan a thlir ngawih ngawih ringawt. A rawn meng diar diar a. Nauteii School kal loh ni a ni hlauh a, a pu hian, "Vawiin chu kal lo mai ta che. Ka ngai em mai che" a ti deuh tlat a. Nguri ngaihtha lo chuan, "Ni e, kal lo mai rawh. In teacher te ka be dawn nia" a lo ti thliam a. A awm phah ta kha a nia. Mapuia erawh exam in a chhuak thung. A lo la haw lo. 

An kil ţhap a. Pu Rempuia leh Muanpuia leh Lawmsanga te erawh inberawnin Lawmsanga te roomah an thu a. Muanpuia pawn a pa dinhmun hriain chawlh a la tawp kha a nia. Pu Rempuia chuan, "Na tawrh tir reng zawng kei ka lainat em mai.. Jection chu kan titlang mai dawn em mawni le" a ti a. 

Muanpuia chuan, "Ka ngaihdan a ni.. Hmuh a hrehawm em mai. Heti tak hian a tlahniam chak ang tih ka lo ngaihtuah phak lo" ngui zetin a ti a. 

Lawmsanga erawh a ngawi ran mai. A rilru a insual nasa takzet. A pa chu a thlahlel a, a la thawk ve ţêk têk chhung chuan a thla a muang a ni. A u te ngaihdan chu a tawmpui hleithei meuh lo. Chutihrualin a pa chu a khawngaih em em bawk si. Nguri a rawn lut ve a. An lo en thap. Pu Rempuia chuan an duhdan chu a lo hrilh ve a. Nguri erawh chuan Lawmsanga hmel buai nak chu a melh daih thung. Lawmsanga chuan ngaihtuah hmel taka melhtu an nu chu enin, "Ka hrethiam lo. Ka pa hi ka la mamawh ngawih ngawih si a.. Kaltir mai tur chuan ka la inpeih lo a ni" a ti tham ţuak a. A u te pawn naupangber a nihna hrethiamin an dem lo.. 

Nguri chuan an pa hnungzanga chul pahin, "Ka hrethiam che. Mahni pa te meuh nunna titawp tura thutlukna siam harsat turzia chu.. Mahse, Lawmsang, ka pa tawrh saw a na em a ni. A harsa tih ka hria. A natna tawrh saw tihtawp chu a ngai a ni.. " a ti dap dap a. A lungchhiat hmel kher mai. 

"Hm.. Ni e, ka hma ka sial em a ni. Ka pa tel lo hi chuan ka chak tawk loin ka nep em mai a. Mahse, nu a zawnga nu tha ber mai ka la nei alawm.. In thutlukna piang ka pawm e" a ti ta a. An hmel atang chuan tuman an thutlukna chu phur takin an siam lo tih a hriat ngawih ngawih mai. 

Pu Mawia chu rawn meng dere in, a mit vun chu a phu der der a. A hmui chu a tiche. A tawng chhuak hleithei tawh lo. Ni li ni nga vel chhunga a tlakhniam chak dan hi mak tak a ni. A lo chhelna leh tawrh rukna te khan an rawn ţhing let zawt zawt emaw tih mai tur a ni. 

Pi Lawmi chuan, "Eng nge i duh? Mama pa.. Ka awm reng e" a lo ti dam diai a. A kut zur tawh lam chuan an pa biang vel chu a chul kual a. Mapuia a rawn lut ve chiah.. A pu bulah va kal hnaiin a chal chu a va dek ve a. "Pu,.. " a ti sup a. Chutih lai tak chuan nurse-chuan syringe rawn keng lutin nachhawkna chak ber chi hmang chuan Pu Mawia chu a jection ta a. A thawk chak bawk aniang, Pu Mawia pawh a thaw nghal suai suai mai. Fiah zet hian a rawn meng leh a. A tu leh fa, amah kil laih te chu a melh kual a. Eng thu mah a sawi thei tawh lo naa, a rilruin mal a sawm a ni ngei a. Thlamuang tih hriat tak leh hahdam hmel takin a chhing a, a muhil ta siai siai mai. Chu a muhil chu a muhil hlen ta a ni. Ţap riin in chhung chu a khat a. Pi Lawmi leh Nguri te erawh a dam lai khan an lo tuar lawk nasa tawh a, an tap lutuk lo. Lawmsanga chuan a pa in a nunna a thlah ta tih a hriat meuh chuan.. Roomah lutin bangkilah ri si loin a va ţap zawih zawih mai. Ka pa tih ruala Eih lo ti thei neih ringawt pawh a hlutzia a hrechiang thar ngei mai. 

Chutiang chuan Pu mawia, Tu leh fate enkawl thiam leh mi zahawm tak, Pathian ţih mi chu ropui taka vui liam a ni ta a. A thi ropui zet mai. Mihring tamzia chu an hrilhfak hial nghe nghe. An chhungkua an lo hung ve bawk nen.. Pa angchhungah hlim takin a awm tawh ngei ang chu.. 

Note: Tihtawp ka tum thin. A la theih tlat loh.. Eng chen thleng nge in duh dan lo sawi teh u. Mapuia hian bialnu dang tawng se in duh em? Nauteii te inneih thleng chu a rei dawn a. Lawmsanga hi kan thihtir hnuah tawp mai se kan ti nge? Comment ka lo ngaichang ang e. Kan awmna groupah theuh khan comment leh ang aw. Blog lama comment pawh ka chhiar zel e.