Thinlung -9

THINLUNG.. (9)

Ziaktu: Toni Râlte

Khami ni 13th, June-ah khan station-a kan awm laiin ka nuin min lo call a. A rawn thlabar hle. 

"Mama, Aruati te accident kha i hria em? Tunah biak theih lohin a awm mek a niawm e" a rawn tih chuan, ka lungphu a thlawk chhuak lo chauh a ni. 

"Maw?! Engtin? " ka ti tuar ringawt. A lo hrechiang bik lo nen, kan awl tho bawk a. Hmanhmawh zetin Aruati an dahna hmun lam ka pan nghal a. Ka va thlen chuan a chhung leh kuate an lo awm thap tawh. A nu mit chu a sen râm a, Pu Thana pawh a ngui nghuai mai. An han sawi takah chuan an class bang kha Teteii nen inphurin in lam an pan a. Bolero nen an insu a lo ni. Bolero kha a lo tlan chak deuh a niawm e. Teteii chu vanneihthlak takin a ban a ulh deuh tih loh chu hliam na em em a nei lo hlauh!A chhan pawh Teteii hian scooty a khalh zawk vang a ni pakhat. Aruati erawh , Bolero nen an insut rual khan a chhak kawng kawrah tla lutin kopang lungremah a lu a va sawh niawm tak a ni. Force a na tawh si a, A lu bakah a ban veilam pawh a vung nasa mai a. A tliak ni ngeiin a lang. Rilru a mang zo, Teteii zawkin scooty a lo khalh chu aw.. Tih mai te pawh a awl rum rum nia. 

Ni 2 hnuah a rawn harh ve hram a. A harh laiin ka awm lo thung. A nuin min lo hrilh. Ka lawm ve em em ringawt. Tlai ban rualin ka va kan ta nghal a. A nu leh Tei te nen an lo awm a. Aruati chu a lo harh ve mek bawk. A ei thei em tih pawh hre lo va ka leisak thei te chu lockerah ka dah a. Ka zuk melh bawk. Min lo en ve lem lo va. A nu leh Tei hmel chu a dik vak lo va hriatna ka nei. Eng emaw mawlhtu nei niawm takin an lang tlat! Ka feel thei. 

"Aruat" ka ti sup a. A rawn hawi chuang lo. A bulah thuin drip an khaina lai vel a kut chu ka chulsak hliau hliau a. 

"Dam vat rawh aw" ka ti leh. Min rawn en ta chauh a. Kha ta a mitmeng kha a ni vawiin thlenga tawrh harsa ka la tih chu.. A â ruai a, min hre ngai reng reng lo hmel a pu a ni. 

A phun sep a. A aw ri erawh ka hre pha lo. A nu chuan min kheuh zeuh a, "Tei lo awmpui lawk rawh aw. Imma hi ka'n be lawk ang e" a ti sap a. A chhuak chu ka zui ve nghal. Ka ipik rukna chhanna chu ka hmu dawn tih ka hrethiam nghal a. Mahse, beiseina ka la nei ru tho. 

"Enteh, Imma, pawi ka ti lutuk. Rawn sawi vek kha ka duh a, mahse nangmah ngeiin rawn hmu ve la ka duh vangin ka sawi ta lo anih kha. Mateii sawn kei takngial pawh min hre lo. Tumah a hre lo" tiin a ţap titih a. A rilru a na takzet tih a lang reng mai. Kei tak pawh min deng dawt a, ka tla rawih rawih thei. 

"Doctor ten eng nge an sawi? " ka ti vat a. 

"Test engmah an la nei rih lo. A la tha lo lutuk an tia.. Naktukah hian test chu an nei ang. A lu a sawhna khan a thluak a tibuai aniang chu an tia.. Eng result tak nge kan hmachhawn dawn ka hre lo" a ti leh ta a. Ka bing mum mum mai. Ka thaw te a hah. 

"Engpawhnise, Pathian zarah engkim a tha leh mai ang" tih bak ka sawi thei lo. Ka hrawkah hnawhtu a awm. Ka hawn hmain a hmel ka va hmu leh hram. A lo chhing diar diar a. A harh tih erawh ka hria. Ka thlir ngawih ngawih mai. Ka chhungte pawn pawi an tiin an lainat ve khawp mai. A la naupangin hmabak tam tak a la nei si a. A tuk nileng chuan ka awm a nuam lo. An test result chu eng nge ni ta ang tih ngawt ka rilruah a awm. Hna pawh ka thawk mumal thei lo. Vanneihthlak takin case rit leh ngap deuh kan khawih loh lai tak a ni hlauh zawk a. Chuti ni lo phei se chuan ka chau der ngei ang le. Ban hmain a nu chu ka call ta tawp a. A la thei der lo mai. Chanchin tha lo lam an dawng em mawni dawn le tih ka ngaihtuah a. Min lo hrilh ve vat ka ring si.. Min hrilh ngam lo a ni zawk ang em? Rilru insual nuai nuai chungin Hospital chu ka va thleng leh ta a. Zuala hmel ka hmu nghal. A hmel landan a dik lo tawp mai. Min rawn hmuh ve rual chuan min rawn pan a, ka darah kuahin, Damdawiin chung zawlah min kai chho zel a. A awmdan atang chuan chanchin lawmlawm ka hre dawn lo tih ka ring thiam nghal. Mahse, mihring ka ni a, beiseina tereuhte la chambang erawh a awm. He laia ka dinhmun hrehawmzia chu a tawng ve lo te laka sawifiah thiam chi a ni lo. Ka hmangaih nen kan hringnun kalkawng hriltu a ni miau si a. 

Inhmachhawnin kan ding ran a. 

"Thianpa, a pawi khawp mai. Kan naui chuan a hriatna a hloh a ni. Psychosis i hre tawh ngai em? " a ti sup a. Sawi harsa a tihzia a hmelah a lang reng mai si. 

"A hloh vek a maw?! " beisei neiru chung siin ka ti nghek. A lu a bu nghut a. A tawlhhnung hrat bawk. 

"Engmah a hre lo. Keini pawh min hre lo. Mahse, Doctor sawi dan khan a mi ngainat leh a thisen zawmpuite erawh zawi zawia a hriatchhuah tur thu a sawi a. " a ti ta a. Ka dinna chu a vir muai muai ni maiin ka hria. Sawi tur reng reng ka hre ta lo. Aruati'n a hriatna a hloh a maw? Kei pawh a tan mikhual ka ni tawh dawn tihna a nih chu! Ka duh lo, he thil hi ka duh hlawl lo. Kawng dang awm se ka ti.. Vai ruaiin ka haw a. Ka roomah ka tawm char char mai. Ka chhungten min hrethiam khawp mai. Ka tan an tawngtai reng tih pawh la hria. 

"Hlimna in min hmuakin, hmabak suangtuahna nen kan kal dun ve mek asin. Eng ang vanduaina leh anchhia nge ni teh hrep le? "

Aruati damdawiin awm chhung chu mumalin ka khawsa lo tihtheih a ni. Tlai tin ka kan ziah a. Beidawngin ka haw ziah bawk. A tan mi thar ka ni tlai tin a, ka nihna engkim hrilha a hmangaih em em kha ka ni tih hrilh ka duh. Mahse, Doctor ten nawr vak vak an phal si lo. A tan natna belhchhahtu nih ka duh loh vangin ngawi renga thlir tlawk tlawk bak tihtheih ka nei si lo. Thla chanve dawn an awm hnuah an inla chhuak ta a. A chhungte ho chu a hre chhuak tan ta a. Beiseina sang tak ka nei ve leh ta. Ka hmangaih em vangin hetiang taka hmangaihtu chu a hriatchhuah ka beisei èm a ni. An in lamah zanah ka leng ta zeuh zeuh a. Mahse, buaina ka nei ta deuh. College-lama amah lo duh ve em emtu Zothana a lo lang ve thin. Thian anga inkawm ho thin an ni naa, Teteii'n Zothana'n a duhzia min lo hrilh ru tawh tlat! Zothana nen chuan a rukin kan inel a ni deuh ber mai. Hma kan sawn em em lo thung. 

Hna thilah Baktawng lamah zin a ngai thut a. Ni 4 lai kan han cham. Teteii nen kan inbe thin a. Chanchin min rawn hrilh ve zel a, chanchin thar em em erawh a awm lo. Kan hawn dawn zana min rawn biak erawh chuan sawi hreh deuh nei ang hian a awm a. Sawi a duh bawk si niin ka hria. Ka zawt ta rawih a. 

"Ih maw.. Chaw ei khamah ka han leng a, a roomah kan inkawm a. "Zothana hi a pa reuh ka ti.. Ka sawi thiam lo, min hîp reuh tawp.. " a tia.. Chhan ngaihna pawh ka hre lo," a rawn ti ta a. Ka nui lui hawk. 

"A hrechhuak i tihna em ni? " ka ti a. 

"Hrechhuak chuang pawn ka hre lo. 'Ka tan a pawimawh thin a nih ka ring. Min rawn kan zing bawk sia.. " a tia. I hming ka sawi tep a. Ka sawi leh ta lo" a rawn ti a. Ka nghilh dup mai. A tan ka pawimawh ta lo tih chiang taka hriatnain min den natzia chu sawi maia fiah chi a ni lo ve. Kan zin hawn zanah ka va leng a. Zothana a rawn kal lo hlauh. 

"U Imma, bialnu i nei em? " a ti a. 

"Nei nang" ka ti vat. 

"A tha, enteh, Teteii nen hian ni r'u, in inhmeh dawn tawp.. " a tih chuan ka zawi hnawk. A titi tui phian mai si. Kan tawng hre phaka awm Tei pawn min khawngaih hmel kher mai. 

A tawi zawngin Aruati taksa lam dam hnu lawkah Zothana nen chuan an inzui chho ta kha a nia. Kei nen pawh inbiak zeuh zeuh kan nei. A tan chu ú ang kha ka ni ta mai si a. Ka beidawng ti ila, ka beidawng hlen tak tak thei chuang lo. Zothana nen an inzui leh an hlim dun hmuh reng kha ka tan hremna chi khat ang a nih avangin ka pa min lainat chuan Lunglei lama min sawn turin hma a lo la ta a. A hlawhtling ta bawk. Engtikah emaw ka hmangaihzia hriaa min hriatchhiah theih ringin hmeichhe dang reng reng ka nunah ka lalut thei ta lo chu a nia! He ti taka hmangaihtu ka ni hi kei pawn mak ka ti! Ni e, ka tan chuan Ruatdiki hi a famkim tlat si a. 

Zothana nen an innei dawn ta hial mai! Ka beiseina eng ve chang chang pawh chu a dai ta a. A mit hlen dawn ta. 

Vani leh Opa te pawh an rawn lam ta a. Kan chenho chhung reilote kha a ngaihawm ta rum rum mai. Ka mal leh ta hle chu a nia. Mahse, mak deuhin khami zana ka vah chhuah zan atang khan keimahah phurrit tak, ka dahsawn theih loh kha a tla ta ka ti mai. A awmzia takah ka beidawnsan tak vang ni berin ka hria. Ka tana vul leh tawh ngai lo tur Ruatdiki chu ka thlah hlen thei ta a, a laka ka beiseina beitham la chambang zawng zawngte chu ka phumbo ta vek a. Thil chu a nihna angin ka pawm thei ta a ni. Nâ erawh a la awm lo thei lo va, hei erawh mipa takin ka hmachhawn ang a, ka tuar tlang ang. 

Bena nen a thil chah kan han lam lawk a. Counter opposite-ah hotel lun leh lar ve tak a awm a, chu lam ka va hawi chu ka phu deuh zawk. Bena ka ko nghal a. A rawn bo hú, "Enteh, Mami leh Rina saw thian satliah an va ang lo em" ka ti a. A hawi phei ve a. Hotel atangin an lo chhuak mek a, an inkai dun rial bawk. Mami chu Rahsivenga pawisa tibotu kha a ni, Rina lah an makpa nau an tih, keini pawn kan kawm tawh kha a ni bawk. 

"I ngaihtuahna leh ka ngaihtuahna a inang em? " Bena chuan a ti a. 

"Maithei" tih chauhin ka chhang. An pawisa kawl, an ta pawh ni lo thahnem fê a bo laia a pa leh a fate kalsana he lai hotel ţenghneng taka an makpa nau nen an kal hian ngaihdan pakhat bak min neihtir hleithei lo tlat. Ka case khawih lai chu a ni lo naa, ka hmu fuh chu ka lawm viau. Bena nen hi chuan kan inpui tawn zel bawk a. 

"A tha e.. Chet kan la ang a a ni mai lawm" Bena chuan a ti a. Ka thlawp viau. 

Keia case khawih lai erawh hmasawnna tur em em a la awm tampui lo ti ila, kha kutkawr kha forensic lamah thisen far kha endiktir turin ka thawn tawh a. Result ka hre thuai turah ka ngai. Bella erawh jail-ah hun a la hmang a. Hrehawm a ti ngawtin ka ring. An veng chhunga pa vengva deuh te ka biak kual hnuah Isabella leh Pi Zosangi chu an inngeih lem lo va, dem tur zawk erawh an hriat loh thu an sawi. Pu Mawia ber a mu reng mai si a. Ani tal hi harh se kawng pawh a kaw deuh tur a nia. Bella ukil Ruata hi ka hmelhriat tha tak a ni ve a, tlangval upa lam, fai veng vawng, fing zet mai a ni. Bella tan a dinsak dawn chuan kawngro a sut kuaksak ngeiin ka ring. Police e ti loin Bella chu a fihlim ka ring ru tlat a, he thihna phenah thuruk eng emaw kan la hai chhuak turah ka ngai deuh tlat. 

Mami te pawh an inhruai leh ta a niawm e. A tha reng mai. Mama'n a nun a sim chuan fate tihfahrah ringawt kha a tha si lo va, mami bulah erawh, "A vawihnihna a thlen chuan kir tawh suh ang che" tiin ka chah thung. A sawi ang khan an nufa eikhawp te chu a thawkchhuak mah mah. Bakah nupa inbakkaih reng kara fate seilentir a tha chuang lo. Hnaahr rilru ka pe tan ta bawk a, Ruatdiki pawn min tibuai em em rih lo. Mahse, Bella lak chhuah a nih hmain a pa Pu Mawia chuan khawvel a chhuahsan ta tlat mai! Hei hi chuan min ţhawng khawp mai. Hmanni maiah thihna rapthlak tak a thleng a, hun tam a liam hmain Pu Mawia, chhungkaw pa ber a boral leh ta si! Bella pawh a pa ruang vuina hmang turin vengtute nen a rawn chhuak a. A pa thihna chu a tuar a ni tih a lang reng. A ţap miah lo thung. Eng emaw ngaihtuah hmel a pu a, thinrimna nasa tak nei ang mai hian a mitmeng a alh hlap hlap reng bawk. He chhhungkua hi chhui chian a tul maithei a ni. 

A tawi zawngin Bella pa a boral hnu lawkah thilmak dang a thleng leh ta a. An sumdawnna awmchhun ni ta, Bella enkawl lai kha Pi Zosangi chuan a hralh a. Sum thahnem tham tak a hui a ni. Chu aia la mak lehzual chu Pu Mawia farnu leh a nau Bella patea ten an in leh lo an rawn chuh chu a ni. In leh lo hi Pi Zosangi kuta awmtir a nihna chen a awm a. Pu Mawia pawn a dah reng bawk a. Sumdawnna erawh Isabella kutah a dah thung. Mahse, Pu Mawia thih hma pawha sawisep kai hat reng Pi Zosangi chu Pu Mawia chhungte lamin an ring zo lo nge an rawn chuh ve rap mai si a. Pasal nei lo va a len theih dawn chuan in leh lo chu a luah tur a ni sa reng chungin amah Pi zosangi hian ngaihzanwg a nei tih hria an awm fur si. A ngaihzawng nen chet an la ang a, In leh lo tirala an kal bo daih an hlau ve te pawh a niang e, Isabella hriat lohin an buai ta mup mup mai. Bella Nî phei chuan, "Ka u thih dan pawh kha ka ringhlel.. " a ti hial a. Mahse, chu erawh engmah report a lut lo va, chhui vak a rem lo thung. An sawi hmangin Pu Mawia thaw kha a zawi tial tial a, a kal zui ta mai niin an sawi a. Coma-a awm reng sa a ni a, a thih leh damin kawngro a su viau lo anga a lan theih laiin kawngro chu a lo su hle a lo nih hi. Ka buaina tur a ni lo naa, Muani thihna kal zelin a kentel tlat avangin ka ngaihven ru lo thei lo a ni. 

Bena pawn Mami te chu a lo chhui ve reng a. Lucy a tangkai khawp mai. An veng chhung a ni bawk a. Rina chettlat dan te chu a lo enthla ve a, Bena hnenah chanchin a thlen zel bawk. Mami kha a pasal zu ngawlvei a ni a, an inthen ta kha a nia. An ina a let leh lai hian an unau zinga naupang ber an mipa neihchhun leh a nupui bakah a pa an khawsa a. A pate a va fin hnu lawkah an monu nen an inngeih ta mang lo va, An nau chuan a nupui chu an nu te khaw lamah a pempui ta daih niawm a ni. Tisawn an pafa hoin an khawsa ta a. Mami hian kuhva te zuarin panhnah thlengin a khawih tel a, khawthlang lamah te pawh a zin ve nasa thin a niawm e. Pu Ruata lah a chak lo chho ve bawk nen. A fanu chuan an chhungkua a khaiding deuh tawp mai a ni. A lerh lem lo niin an sawi bawk. Inleng em em pawh a nei ngai mang lo va, a pasal hlui lah kha zu seh vangin a boral ta daih a. A fate pathum chawm ngai bawk, a pa ni bawk, ama tawkah a hah ve thin viau ngei ang. 

"Imma, Bella chu ka la chhuak thei dawn e" Ruata'n a tih chuan, ka lo thaw hawk. 

"An chhungkaw buaina te hi a hre ve em? " ka tih chuan, "Hre ve e.. Chhuah a chak chhan pawh hei hi a nia" a ti a. 

"Hmm.. A lainatawm reuh khawp mai," ka ti ve mai a. Forensic lam report ka dawnah khan kha kutkawra thisen kha Muani thisen ngei a ni tih an rawn nemnghet a. Chuti anih chuan Isabella thah a nih theih lohna tur kawng a inhawng ta tihtheih a ni. Chemteah khan Bella kuthnu a lang miau a, Kutkawr a bun lo tih a chiang. Kutkawr buntu kha tu nge tih hriat chuan a fiah ruak thei tawhin ka ring. 

Pu Ruata'n Bena a rawn biak lai chuan kei pawh a bulah ka ding ve reng a. Bena ner sak danah thil duhawm lem lo a thleng niin ka ngai. An inbiak zawhah, "Ka rin dan chiah. Rina leh Mami chu an tlan dun ta ngei e" a ti nghut a. 

"An va â e aw.. Manchhuah theihna tur an rawn insiamsak a ni ringawt alawm" ka lo ti a. 

"Khawi lamah nge an tlan dun erawh hriat a ni lo. " a ti a. 

"Harsa lo turah ngai ang", ka lo ti hmiah. 

Ni e, kha kawngba sahna pawisa kha hlawhfa chan tur sem a nih hnuah hlep tlemte bak a nei dawn lo tih hretu Mami chuan a vaia chan dan ngaihtuahin, amah puibawm thei tur a bialpa Rina chu a hneh a. Ama pawisa kawl ngei kha a chabi kawl hmang ngeiin a rukchhuahtir ta a ni. Tichuan, Sum chu Rina'n kawlin remchang an melh ran a. A pa leh a fate tlansana hmun dang daiha nun thar din tumin hma an la ta a ni. Sum ît vang ni bawk mah se, Rina lo tel ve hian pawisak a neihtir thei ta lo a ni ber e. 

Lunglei thlang lawk Hauruangah an motor hman a chhiat vangin Bena leh a hoten an zuk nang ching thei ta a. A chunga ka sawi ang khi Mami inpuanna a ni. Fing ziktluak lo ta ngang chu ama thangkamah a awk ta chaih mai. A fate avang pawn khatiang ngaihtuahna sual kha nei ngam lo tur a nia sin le.. Mihring nawmsakna thlahlel tak hi chu aw.. 

Bena nen Lucy kan rim a, a hmaa a sawi tawh Lawngtlai nula kha a lo la cham reng a lo nia. Ka hmuh rual chuan Rosy ka hre chhuak nghal nia! A lo rei ve ta hle mai. Puii tiin an ko mai a. Lian thelhthawlh, tawng duh leh kawm nuam tak a ni. Sawi tur hre vak lo nafam chu Rosy a hriat leh hriat loh ka zawt ta mai mai a. Min melh vang vang mai "ka hmuh hnu i ang ka ti reng a. A thih khan i rawn kal ve tiraw? " a ti ta a. 

"Kal ve e.. Ka u best friend a ni sia.. Ka lainat khawp mai. " ka ti a. 

A ngawih det hnuah, "A thiannu ber alawm ka nih. Rosy chanchin sawi hi a bang thei lo a nih hi. A thih dan ka ngaihtuah apiang hian ka thin a tawt thin. Rosy kha amah intihlum a ni lo, thah a ni. Nia, amah umzuitu te khan thi lo thei loin an hual bet a ni" a ti nghet charh a. Lucy te pawn an rawn beng khawn hle. 

"Ka rindan alawm kei pawh. Nula huaisen leh tlang tak kha a ni ve a. Khatiang video vang ringawta a tlawm ta mai kha mak ka la ti reng" ka ti ve a. 

"A pawi tih bak hi sawi tur ka hre lo. A thih hma zan khan kan inbe char char a. A rawn tap nasa lutuk. "Puii, min hualbet vek. Hawina lam apiangah min nuihsawh hmel ka hmu a. Ka tan damkhawchhuah ngaihna a awm lo. " a rawn tia.. Tih vak ngaihna ka hre bawk si lo.. A hrehawm ania aw" a ti sep sep a. 

Kan nguai lutuk dawna ka hriat vangin, "Rosy Nau Muana khan nupui a nei tawh em? " ka ti ta daih a. 

"Nei tawh e. Awii i sawi takah chuan ka nuih a za. Aizawl ami a nei kha a nia. An inneih khan Aizawl lam pawh an rawn lang ve nual mai. Thla an lak laiin Aizawl nula pakhat, Muana ex ni ngei tur hian, "Muana, ani hi kei aiin i thlang maw? Eng nge a nih tehchiam a" a va ti pek a. Muana hrilhhai hmel kha ka mitthla apiangin ka la nui thin. Mahse, chu nu chu a thianten an rawn kai hrang ta vat a. A hmel that nen a che mawi lo ve khawp mai.. Ngawi rawh a hming pawh an sawi.. Ih.. Lateii an tiin ka hria.. Shillongah Muana nen an lo inkawp ve nasa a niawm e" a tih chuan tlemin ka nghing deuh. Lateii… ni e, ka hriatchhuah lohna a va rei ta em. Ani pawn min rawn be lem lo va, Ate nen lah kan sawi ngai si lo. Muana te inneihna thlenga va tihbuai a tum chu a ni sia. Hmeichhe pakhat chu a tling ve chiang e.. Kei pawh kha min bum rei ve khawp mai. 

Kan hawn kawngah, "Puii kha kawp ve la.. Thianpa, i insiamrem a ngai tan tawh. I naupang vak tawh lo a nia" Bena'n a tih chuan.. "Thian chi a nih kha.. Khatiang" ka ti hluk. 

"A nih Isabella hi? " awmze nei zeta min melh chungin a ti a. 

"Mawl viau suh. Case nei mek a nih hi" ka lo ti nghut. 

"I melh dan hi ka hai lo nasa" Nui chunga a tih chuan, "Hmeichhe danglam tak chu ania lawm" ka ti ta a. Ka mitthlaah a hmel a lo lang nghal. Mahse, hmeichhia hi ka mamawh tehchiam tlat lo. Duh ni ila inhawng fe fe chu ka hmu lo bik lo. Ruatdiki nen ka khaikhin zel a, an buk a rit zawk thei ngai si lo va.. Ka pamţul leh nge nge thin. 

Mahse, tunah chuan ngaihtuahna sen ve tan a tha khawp ang. Ka thinlung erawh chuan inpeih tikni a nei ngai dawn lo a nih hmel. Pi Zosangi enthlak hna ka thawk rih deuh bawk a, Ngaihzawng lam chuan min la uairit rih lo mah se a pawi chuang lo ve. Keima zeldinna ka kalpui lui deuh a, tun tum chu. Bazarvenga an chanchin hre awm deuhte ka atanga ka hriat danin Pi zosangi bialpa chu an Driver ni tawh thin, Pu Mawia accident tak avanga an dawr lama hnathawka an chhawr zui tak Mpa an tih mai a niawm a. Tlangval zawng a la ni a, an sawi ruk danin mizo a ni chiah lo nia sawi a awm. Pu Mawia khawthlang lama a zin tuma lo bel ve chawt niin an sawi a, an inchhawr zui ta niawm tak a ni. A lian thelh thawlh bakah a hmel pawh a chhe lo viau. Pi Zosangi te inah hian rei tak chhung a khawsa ve hman a, mahse, an pahnih inkar thuruk a rawn lan takah khan Isabella hian a hnawtchhuak an ti! Mpa chu Bazar vengah tho in te takte luahin a khawsa ta a ni. A rukin an la inbelbul zel tih erawh sawi lang lo mah se, a hriat theih. He thihnaah hian Mpa hian inrawlhna a neih ka ring ve ngawt mai. Mahse, thil pakhat min tibuaitu a la awm. Muani kha Pi Zosangi fanu a ni si a, a thihna avanga hlawkna tel tur tu nge ni ta ang? A ma fanu ngei chu a thahtir a rinawm si loh. Isabella thah a tum ang a, a hai zawk a ni thei ang em? A rinawm chiah si loh. Muani bialpa Zotea kha khamizan khan Muani nen an inhnial thinrim vangin a kal miah lo tih a sawi a, a chhungten an hriatpui bawk. Bakah a bialnu a thah vanga hlawkna tel tur a nei hran lo. Isabella a rawn chhuah takah chuan in leh loa an buaina chu a reh mai ang chu ka tih laiin Pu Mawia nau Pu Chhana chuan chan ve tumin a la bei ta fo mai. Mihring rilru hi zawng a mak a ni e. A sawi danin, "Inpui a ni a, ka pa khan ka hmingin a dah a, mahse, kei hna thil vanga ka awm kual chhen vang khan amah enkawltu ber U Mawia kutah a dah ta mai kha a nia. Chu pawh lehkha engmah a awm lo. Tisawn a neitu angin an luah zui a, hetia amah ber a awm tak loah chuan ka ta tur chiangsa a ni. Bella pawh ka u fanu a nihnaah ka chhawmdawl tur a ni a, kan bulah a khawsa ve mai ang chu" tih a ni. An history ka hre ve lo va, sawi tur ka hre lo, khalamah chuan. 

Ka in luahna te fanu Mamawii a lo haw a. Ani hi kum 21 vel a ni. Bangalore-a a hun tam zawk hmang thin a ni a. Chhungkhat mah ni ila kan inhre pawh lem lo khawp mai. Nel pawh kan innel vak lo. A lo haw atanga ni 3-na zanah a pa a rawn chhuk a. Ka mu ha ka lo nawh mek lai a ni. 

"Imma, i puih ka ngai. Mamawii awmna kan hre tlat lo. Ani hi pasal a um ta nge khawiah emaw an lo sahâwk zawk ni. Mi dang hrilh vak a nuam si lo va, kan pahnihin kan zawng kual lawk dawn em mawni ka ti.. Ka kut ka tina deuh a, motor ka khalh thei si lo va" a rawn ti chhur chhur a.

"In be thei lo mi? " ka lo ti a. 

"A phone a off tlat a. Anu lah a phi sek tawh si. Chawhnu lamah a chhuak a, engmah chanchin a rawn sawi si lo va" a ti a. 

"A thiante inah chaw a ei pawh a ni maithei sin. A lo haw khat ve bawk sia.. " tiin ka'n tawng thlamuan a. 

"Aa.. I hrethiam lo vang. Nia, sawi pawh a nuam lo. Kan Mamawii hi zawng ngaihtuahawm tak a nia. Bangalore-a kan awmtir chhan pawh hei vang hi a nia. Mipa tha lo kawp a ching tlat roh a, pawisak a nei vak bawk si lo, dar 10 a ri dawn tawh a. Rawn hawn loh a hun tawh lo a ni" a ti zawi ta sup a. Ka hrethiam deuh. Nia, Mamawii ka hmuh tirh phat khan nungchang tha zawk zawk a ni bik lo ang tih ka hrethiam ve mai. Mahse, mi hi an lan dan ang ngawta teh tur erawh an ni hran lo. Tlawmngaih chhuah a ngai miau si a. Pa Chunga nen chuan kan inzui chhuak ta poh a. A kalna tur awm lam kan pan a, a thiante lah chu an lo hawihai angreng si. A tawpah Ramtharah kan chhuk leh a, a thiannu ve ber te inah kan lut a. A thiannu chuan, "Chhunah khan min lo text a, Alex te nen Helipad- lamah an kal tur thu a sawi a" a ti ta a. Pukpui lamah kan inkhalh chho leh ta. Pa Chunga chu a phun nuah nuah reng a, a lan dan hi a bawrchhawr naa, a zaidam phian zel. An nu a ngam vak lo bawk. Pukpui kan tlan pel a, Helipad lam chu kan pan a. A reh viau. Motor pawh kan tawk mang lo. Kan chhuk a, kan han hawi kual deuh a, thawm a reh bawk si. "Nang saw lamah, kei he lamah aw" tiin kan inthen hrang a. A hmun a zau ve deuh vangin vah thui pawh a ngai ve deuh. Ka kalna lamah chuan tumah han hmuh tur an awm lo. Ko pang awih tlan deuh lai ka la hmabak a, thawm a awm chuang lo va va pawh loh ka tum ta mai. Ka inher chiah tihin ka mit sir chuan eng emaw thil dum hi a va hmu thawi fua a. Ka lehhawi vat. Thing bul ngheng hian a thu a, a hnuai chu khampang, lum hlauh chuan inchhan ngaihna awm lo ni. Mak ka ti deuh a, kan inkar chu pen 50 aiin a tlem thei lo vang. Zawi muangin ka pen phei a, a che chang eih lo. Ramhuai te hi a ni mai lo maw tih ka rilruah a awm. Mahse, huai lam hi chu ka ngaina lo nain ka hlau tehchiam lo. Thla a eng lutuk lo naa, ka pan mek chu hmeichhia a ni tih ka hre thei. Kawr dum a ha a, a kekawr erawh a pawl lam niin ka hria. A sam a thlah a, ral lehlam tlang lam chu a melh ni maiin ka hria. Ka tiphu thut ang a, a tla thla palh ang tih ka hlauh vangin thawm neih hmasak ka duh a.. Ka aw ka thian ta a. A phu ta tho. Mahse, ngai a awh vat. A rawn hawi phei a. Thla eng mang lo karah chuan chu hmeichhia chu ka rin loh lutukin Isabella a ni tih ka va hre thei ta a. Mak ka tihna erawh ka thup hram hram. 

"Hetah.. Eng nge i tih? " ka ti a. 

Hma lam a en leh daih. "Heta awm hi ka duh a ni" a ti zawi sap a. 

"I hlau lo em ni? " 

"Hlauh tur a awm em ni? Nang pawh eng nge i tih? " a ti mai a. 

"Mi kan zawng a. Hmeichhia, i lo hmu mial em? " ka ti nghal zaih a. 

"Keimah anga tualthattua an puh ve tho em ni? " tiin chiang zetin min rawn melh a. A mit chu a sèn râm bawk. 

"Ni lo, ka in luahna te fanu a nia.. Thu sawn teh.. I hnuai khu kham vek a nih khu" ka ti a. 

"Tla ila eng nge pawi? Ka pa leh Bawiha te pawh an awm tawh lo va, ka neihchhun laksak vek ka ni tawh alawm" a ti thâm ţiak a. A hrawk chu hnawhtu a awm tih hriat takin harsa ti zetin a chil a lem khalh a. A dinhmun ka hre ve vek a, sawi mai tur pawh ka hre lo. 

"Bella, chak taka i awm a ngai asin" ka ti ta ngawt a. 

A nui hul hak. "Chak tawk ila ka ti ngawt mai. Mahse, ka chakna zawng zawng hipkangin a awm tawh. Tihtheih ka nei tawh lo. Ka nu leh pa leh Bawiha te lu nghahna inah ngei pawh mikhual mai ka ni tawh" a biangah mittui a rawn luang a. A hruhul nghal vat. 

Ka khawngaih. 

"Mahse, chu chu a la chiang hleinem. Tihtheih a la awm em em ang. Zosangi nen inţang dun ang a. In leh lo saw chu an chhuh ngawt thei lo che u" tiin ka han hnem ve sasawi a.. 

"Ka patea nupui duhámzia leh Magistrate leh ukil hmelhriat a ngahzia i hre lo anih kha.. Kei ve mai hian engmah ka hum zo dawn lo. Ka pa tal kha la dam se a tha tur.. Khawi hmuanh pawh kal ila, tualthattu melhin min melh a. Hremhmun pawh a nuam zawk em em.. Ka la thih ve loh chhan pakhat chiah a awm a ni" a ti chat chat a. A insehruh deuh bawk. 

"Pawisawilo i ni tih lantir nan i la dam tiraw?" ka ti sup a. 

Min rawn melh kâwk a, "Muani thattu ka hriat hma chuan thih ka tum lo. Chuan, i thil chhui laiah hian tangkaina ka neih dawn chuan ka pui ang che" a ti nghet ta charh a. Inringtawk hmel a pu tawh bawk. 

"Ka mamawh maithei che. Suspect ni mah la, ka rilru tak hian i nih loh rinna ka nei a. Hei hi ka sawi loh tawp tur pawh a ni. Tualthattu dik tak hi reh chhuah ka chak tawh khawp mai" ka ti ve a. 

A ngawih vang vang tak avang chuan, "Haw tawh ila.. A tlai tawh a nia. " ka ti a. Ka rin loh deuhin a rawn ding a. 

"Thil pakhat ka hre duh a. Engvangin nge khami zan khan hmuh thiang lo hmu ang maia min melh tlawk tlawk tih kha" a ti ta daih a. A sawi awmzia ka hria. 

"Aa.. Engmah a ni lo. Ka thian hlui nen in inang em a.. Chuvang mai mai" ka ti bah nak a. A nui hak, min chhoh en ha chungin, "Mi tu emaw bialnu hlui hi ka ang thei lutuk. " a ti sap a. Chutah, "Nichinah khan mipa leh hmeichhia chu ka hmu. I mi zawn chu an ni maithei. Ka lawm e.. Bye" tih leh kan piah deuha bike lam chu a pan nal nal. Ka hrilhhai letling. Mahse, Pa chunga'n min lo call a, ka harh zawk. "Hei ka hmu e, khaw nge i awm? " a rawn ti a. Isabella chuan min rawn tlanpel thuak. Thlir zui vawng vawng pahin, "Aw ka lo kal e" tih pahin ka chesawn ve nghal. 

Mamawii zu rui zet chu tawrhhlelhawm tak a ni. A pa chu a ankhum kawngtluan a ni mai. 

"Ka hmangaih ve pawh induh lo zel a, misual in ni, inrilru a chhe lutuk. Bangaloreah pawh ka chhuk tawh dawn lo. Pasal min neihtir rawh u" tih lam vel a ni. An chhungkaw boruak ka hre ve vak lo va, engmah ka sawi duh lo. Ka mut meuh chuan dar 1 a ri tep tawh. Khumah ka mu meng reng a, ka rilru chu a ruak. Mood pawh ka nei hek lo. Ka awmngaihna hre lo chuan, Ruata ka va text a. Ani hi chu zing dar 4 thlengte a meng thin a, a lo la online vú bawk. 

"Ruat, Isabella number kha min lo pe teh a" tiin.. 

A rawn thawn a. Number chu ka save ta hmak a. 

Ka zing tho ka phone ka han en chu, Isabella number atang ngei mai khan, "Keimah Isabella, Zosangi bialpa a thi! " tih hi ka dawng ta a. A thluak tibuai zawngin min chhaih kual leh ta. He thila a fawng vuantu hi tu tak ni ang maw?! 

Isabella hi ka chhanchhuak thei ang em? Nge amah zawk hian min daikhalh zawk ni ang le? 

Imanuel Lalremruata thluak hi a va buai chho ta êm 😢

(Nih u 😢