Thinlung - 8

THINLUNG.. (8)

Ziaktu: Toni Râlte

"Tu nge i hming pum? "

"Isabella Lalrempuii" 

"Thil thlen dan kha han sawi teh le"

A aw a thian a, tuisik chu a in khawlh khawlh bawk. Amah hmachhawntu Kan police hmeichhe zinga tha ber pawla kan neih, Julie chu a melh chat a. A mitmeng lian kel kawl, zahawm ru tak si chu a thim deuh raih bawk. 

"Chemte kha phawi chhuah ka tum mai chauh a ni. Ka lak chhuah tum laiin ka nu khan min lo hmu ta si a, min puh ta mai a nih kha.. " a ti dam thlap a. Keini a sira lo thlir vetu te chu min melh kual ralh ralh bawk. 

"Engkim han sawi teh, a bul atangin" Julie chuan a ti fiak thak a. 

A thut dan a siamrem zauh. A kut pahnih chu dawhkanah dah chhuakin a suih thlap a. Tihian a sawi ta a. 

"Ani kha ka nau a ni a. Thlamuani a ni. Muani tiin kan ko thin. Dar 10 bawr velah ka mu a, a room bul chiah kha ka room a ni. Ani erawh phone-in tu emaw a bia a. A bialpa a nih ka ring. A bialpa Zotea nen hian kum khat dawn chu an inzui ve tawh a ni. Tin, zep loh chuan riahte pawh an riak dun fo. Kan in awmdan chu inhrethiam maiin ka ring a, in hnuai ber dawr sirah khan step a awm a, inpui pawh si loin kan room a pawh a ni. Chuta tang chuan awlsam takin Zotea pawh a lo lut mai thin. Ka lo chau ve deuh bawk a, ka muhil deuh nghal mai. Mahse, Muani thaw hrãwp hrâwp niawm takin min tiharh ta a. Ka inbengkang vat. Zotea a lo riak leh ang a, sex an hmang a nih ka ring deuh a. Zan dangah ka hre zeuh zeuh bawk nen. Mutthilh leh ka tum lai takin Muani chu hmui hup chunga thei leh thei lo va rak ang hian a rawn au leh ta a. A ring lem lo. A hmui kha sawi tawh angin hup beh tum niin a lang. Ka ngaih a tha ta vak lo va. Bang phen atang chuan, "Muani.. I tha em? " ka va ti a. A reh tlawk tlawk. Chu chuan ka ngaih a titha lo zual ta a, ka tho ta a ni. Chuan, a room kawngka chu hawn tumin ka bei a, vanneihthlak takin a lo inkalh nghet chiah lo nge a inhawng ta mai a. Chutah chuan chhuata Muani lo let reng ka va hmu nghal. Inhmuh tawh ang khan a hnungzangah chemte a bur vû bawk. Ka hamhaih naa, chhan hman a la nih takin tiin chemte chu phawi chhuah tumin ka vuan nghal a, khatih lai tak khan ka nu a rawn tlan lut a, min rawn hmu ta a ni. A rak nghal tuar tuar a. Kan awmpuite ho pawh rawn harhin, thenawm khawveng te nen.. Kei chu tualthattu-a min puhin, kan khawtlang hruaitute khan mipui kut za zual lak atangin min la hrang ta nghal anih kha.. Ka sawi hmaih hauh loh tur chu in hnuai atanga Muani room luhna kawngka kha a inkalh lo tih ka hria. Pawn lam atangin tu emaw a lo lut zawk a ni.. Tu emaw" a ti nghet ta charh charh a. Dawt sawi hmel a pu si lo. Kei erawh chuan rilru mang deuh rohin ka ngaithla a, ngaihtuahna han senzui ngaihna ka la hre mang lo. Ruatdiki ni turah ka chan a, chu lam hawi ngawr ngawra ka lo dawnsawn vangin ka remkhawm thiam mang lo a ni ber ang chu. 

"I nu chuan chemte i chelh vang maiin engvangin nge a rinhlelh ang che. A hmain buaina in lo nei tawh a ni zawk lo maw? I rinhlelhawmna tur" Julie chuan a ti leh khauh. 

A chil a lem khawlh a. A zat vang ni miah lo va nui hul hakin"Ani chuan englai pawn min ringhlel alawm" a ti sap a. 

"Sawi chiang teh" Julie'n a ti leh fak. 

"Ani saw ka nu ni loin ka pa nupui a ni miau a. A chiang em? " tiin a dak deuh vah. 

"I nuhrawn maw? Aw le. A tha e, he thil hi a ril riau dawn niin a lang tlat. I pa tunah khaw nge a awm? Hmuh tur a va awm lo ve" tiin a han her kualsak a. 

"Mitthi angin khumah a mu reng mai. Coma-in a awm a. Kum khat leh thla 4 a ni tawh. Ani chu tha se, in kutah ka awm hauh lo va, tin, Muani pawh a thi hek lo vang" Thinrim hmel deuh hian a ti chang fak a. A mitmeng pawh a ling vât mai. 

"I pa chu engvanga Coma-a awm nge a nih? "

"Accident a tawk a. Hna thila Aizawla a zin tur kha Truck nen an insu a. Natna benvawn a lo nei nual nen, tisawn a mu ta reng mai a ni. Nurse kan rawihsak a, a harh hun kan nghak tawp mai. " a ti pangngai a. 

Julie phur zawng tak thil a lo ni nge ni.. "Inchhungkaw chanchin kan hriat tura i duh chin min han hrilh teh.. Engkim.. I nu dik tak khaw nge a awm? Unau i nei em? Tih te.. Engkim" a ti ta zung zung a. Isabella chu a khi sak. 

"A tha alawm.. Ka nu dik tak chu kum 14 ka nih khan a boral tawh a. Cancer vangin a nia. Nau mipa ka nei thin.. (A kun a, a hnuk a ulh emaw ni) A hming pawha ko phal loin Bawiha ka ti thin. Ka pa hian Lungleiah sumdawnna hraw ve tak pahnih a nei a. Pakhat chu mi dang enkawltirin pakhat erawh amah ngeiin a enkawl thung. Ka pa thawhrim zarah in leh lo tha tak neiin, rual awtin kan awm ngai lo. Ka nu boral hnuah erawh ka pa khan a tuar lutuk a, a ât phah ţhelh a ni. Zu a in phah nasa bawk. Keini unau kan la naupang si a, chhungten min lainat bawk nen. Ka nu nuteii fanu tuna ka nuhrawn ni ta, Zosangi sawn min rawn awmpui ta a.Muani saw a pasal hmasa laka a fa a ni, ani pawh a rawn hruaitel ve a, nau pahnih ka nei tiin kei tak pawh ka lawm khawp mai. Kum khat vel a awm hnuah ka pa rilru hnehin ka pa nen an innei ta a ni. Kei chuan beiseina sang tak ka nei, chhungkaw hlim leh nuam tak kan din leh ngei dawn e tiin. Zosangi chu ka pa nupui a nih hma leh a nih hnu a dang chho ta a. Ka pa rilru a hneh thiam em em a, Lehlamah ka nu vanga ka pa tawrhna lak atanga khai chhuaktu a nih vangin huat ka duh lo va, nu ang taka en pawh ka tum ve thin. A chhan chu ka pa hi ka hmangaih em a ni. 

Ka nuhrawn anih atanga kum 3-naah ka nau duat, Bawiha chuan ka rin loh lutukin Drugs Over dose vangin min kalsan ta a! Vawiin thleng hian rin harsa ka la ti. Zu takngial pawh in ngai lo khan engtin nge OD khawpa Drugs kha a luhchilh theih? A roomah ngei hmuh a ni a, a damdawi tihna hnuhma leh sulhnu a awm vek bawk si. Doctor te lahin OD a ni an ti mauh bawk si a. Hetah hian Zosangi chuan, "Inring tha lutuk a, ka hriat rukna a rei tawh alawm. Ka hau thin a, min zah ve bawk si lo va. A pawi tak tak a ni. A pa tal hi hrilh tur a nia" a ti nghe nghe. Englai pwha a nghenchhan leh a zualkona, kei a u in engmah ka hre lo chu ka inthiam lo va, ka nau thihna khan rei tak min nghawng. Ka mumal lo chho viau a ni. Mahse, khuarei a lo awm ve a, zawi zawiin ka tawrhna pawh a zia chho ta a. Buaina neuh neuh chu awm thin mah se, Ka pa a la tha a, a chingfel thei zel. Nia, ka pa hian ka nau boral atang phei chuan min duat zualin min ngaihlu em em a. A rilarah awmchhun ka lo ni ta bawk nen. Zosangi mit pawh a kham thin ngawt ang. Muani pawh a duat tho naa, fanu dik tak chu a dan a dang lo thei bik lo. Hetiang boruak karah hian Muani nen erawh buaina kan nei ngai lo. A nu ang lo takin a rilru a thianghlim a, ú ang tak takin min en a, kei pawn nau angin ka en bawk. Tikhan ka pa in accident a han tawk ve leh zel bawk a. Ka rilru dik loh nge ka ngaihtuahna kal sual ka hre lo va, Ka pa natna vanga Zosangi rilru hrehawm lai awm hi ka la hmu miah lo. Dawr saw a kutah a awm a. Kei hi MA (Eco) ka zawh hnuah ka pa sumdawnna pakhat zawk saw ka khawihpui ve deuh a. Pakhat zawk mi kuta a dah kha chu ka pa accident khan a inenkawlna sensoah tiin Zosangi hian min rawn miah loin mi dang kutah a lo hlan tawh a ni. Ka lawm lo viau naa, Ka pa kha phai lam te kan panpui nasa a, a lo hautak ve bawk nen, engmah ka sawi zui ta lo. Tin, Zosangi sawn ngaihzawng a nei niin an sawi a. Kei chuan ka la hre ve lo. Mi sawi ka hriat a nia. Inleng hrim hrim hi kan ngah thin a, chungho zing ami pawh chu a lo ni mahna.. Kha lam chu ka buaina tur ni chiah pawhin ka hre lo.. Chung zawng chu a ni mai e" a ti ta a. Kan ngawi thap mai. A sawi tawi kim viau e. 

"I nu kan biak ve phawt a ngai ang" Julie chuan a ti a. Isabella chu a bu nghat. 

Tak ana Bena case khawih mek, inrawkna pawh kha amah Bena ka tawiawm ta vak lo va, a hnua ka zawh lehin Rina an tih kha a han kawm vel a, engmah a hriat loh thu bak sawi tur a nei lo a niawm e. An la chhui kal reng tih a sawi. Hna hi a chak thei reng bik lo va, pawisa kha hmu let leh se ka duhpui ngawt mai. 

Sangha ka ei chak deuh a, Tlabung pengah a tharlam deuh ka zuk lei a. Tlaiah ka inbual zawhah ka kang ta sar sar a. Chawhmeh siam hi ka thiam lo, kan inah lah ka nuin min awl hneh si a, ka inlak pa na lam nge ka pui ngai vak bawk si lo. Mahnia han awm takah chuan a bo theih hu hu thin khawp mai. Ka kan mek laiin ka nuin min lo call a, "I U mami te nufa an rawn phei a.. " a tih chuan, "Nge awmzia? An rawn tlan ve deuh mi? " ka ti a. 

"A ni ber ang chu.. Mama'n ngaihzawng a lo nei niawm tak a ni. Chiang tak chuan kan hre bik lo. Hei hi a nia, an inneih ka remtih loh chhan, kum inthlau lutuk chu buaina a tam bik a. Mami lah a lo upa ve zel bawk si.. A pawi tak tak a ni" a rawn ti duah a. 

"A va zia lo tak ve mawle.. Mami chu a tha maw? " ka ti a. A that thu a sawi a, Kan inbiakna kan titawp. Mami chu ka ngaihtuah mang e. Fapa pakhat an nei tawh a, A pahnihna tur erawh a chhiat hlauh mai a. A la pai leh ta lo a ni. An hlim viau zel kha a nia. Mama chhungte nen lam pawh an intithei viau bawk. Amah Mami hi a sual lo va, tin, a lo fing tawh bawk nen, sum leh pai ang zawng pawn a chhawmdawl ve nasa a, a sumdawnna kha mizoram lamah a chhunzawm a, Mama nen an run ta zel kha a nia. Ngaihzawng dang a lo neihsan a nih teh chuan ka sa khawp ang. Neih loh hlauin a hel reng a, tun ataka phatsan leh kha ka hrethiam bau lo. 

Chaw ka chhuan mek laiin Teteii''n min lo call ve tehmial a. Kan inbiak lohna a rei ta viau, amah zawkin, "I rilru ka tithar mai mai. Inbe tam lo ang" a tih vangin leh keima lam pawh ka insum nasat vangin kan inbe ta vak lo. A mimal chanchin erawh min rawn hrilh zeuh zeuh tho. 

"U Imma, ih.. Englo a nia" a ti niah niah a. 

"Umm sawi rawh.. "Ka lo ti vat. 

Thawk a la halh a, "Pasal a nei dawn asin" a ti zawi sap a. Ka tliak leh ta hnâwp mai le.. Ka bing chuk chuk a, "Ih, kha.. Zothana kha a nia.. " a rawn ti leh a. A aw chu a hla ta duai hian ka hria. 

"U Imma, i tha em? " a rawn ti lang lang a. 

"Ka tha e.. Tete, ka lawm e.. I rawn sawi a. Duhsakna ka hlan e aw" ka ti tham ţuak. Ka dah daih. Awmngaihna ka hre leh dawn ta lo. Ruatdiki'n pasal a nei dawn anih chu! Ti nge a pasal tur chu ka nih loh? Ni e, a bula dinga inneih thutiam ka chhampui tur khan mipa dang a chhampui dawn maw?! Ni lo.. Hei hi thleng tur a ni mawlh lo asin. 

Chaw ût rim vangin ka harh hlawl. Ka lo thu rei viau a nih hmel. Mipa intipa ve tawk tak hi hmangaihna avangin ka va derthawng rei ta em. Chaw ei zai pawh ka rel leh thei ta lo. Chaw chakna pakhatmah nei lo va, ei luih hi ka tihdan a ni miau lo va. Ka nu bawkin min lo call leh. Ka la lo tep a ni.

"Aw nu" 

"Mama, i hre tawh em? " a rawn ti tîm dai a. 

"Aw.. " ka ti bung nghut. 

"I chak tawk a nia, mipa chak tak i nih kha aw.. " a rawn ti a. Ka chhing sawk. Naupangchhia taka ka nu mal chunga bawha ţah hawm hawm ka va chak êm. 

"Ka tha alawm. Nu" harsa takin ka ti hram a. 

"Ka beisei. I pa nen pawh kan tawngtai ania..hei hi in pahnih tana Pathian ruat kawng a nih ka ring tlat a ni" a rawn ti dap dap a. 

Pathian, Pathian.. Ka ning zozai ta. Ka kawng tura a ruat hi engvangin nge tawrhna hlir a nih bik? Ka hlim hi ti nge min phalsak ve loh? Inhmangaih takte kha ti nge min pawhţhen? Hmabak hlimawm tak nena ke pen mek te kha engvang chuan nge thim a pek bik? Au vak vak ka chak kher mai. Khumah ka thu a, chhuat lam ka bih ngat ngat. Ruatdiki, ka hmangaih ka enchim loh kha mi dang tan a vul tawh dawn maw? Zothana'n a khal chul tawh ang maw? Ka sahal a ni ber mai. Ka ding a, ka vei nghut nghut ringawt. Ruatdiki hmel ka mita cham reng hi paih bo daih theih nise ka va duh êm. Tihtheih nei si loin ka hmangaih chu ka thlir liam dawn ta maw?! 

Kawngka kik ri bengchheng zet avang chuan ka ngaihtuahna chu a chawl dûk a. Tun ang hunah tu tak ni ang maw? Phur fahran lo chuan ka va hawng a. Opa leh a bialnu Vani an lo ding dun ral mai. Phawk zetin, "Ehe! " ka ti a. 

"Kan lo riak dawn.. Kan inru ve tawp" Opa chuan a ti a. An rawn lut nghal. Opa hi kan thawhpui tho a ni a, Court lamah min duty san ta daih a. Rawn lenluh zauh chang erawh a nei thin. Vani erawh kan department Canteen nghaktu Nu Tei fanu a ni a. Dawr atanga inchhara inngaizawng chho ta an ni. Opa hi pathlawi fa pahnih nei tawh a ni a, pa tha pui, ui nei lo, uang ve thei tak a ni. Zu han in zeuh a chin vang leh a pathlawina vang nge Nu Teii hian a iai deuh a. Vani pawh dawra kaltir a phal ta lo kha a nia. An inthen tawh emaw tih laiin tihian an rawn inru leh roh si.. 

"Inruk kher? " ka ti hluk a. 

"A ngai a nih hi. A nu saw a ngaihna awm hek lo" Opa chuan a lo ti a. 

"Chaw in ei tawh em?" ka lo ti daih. 

"Ei loh a hun tawh mi? I la ei na nge? " Vani'n a lo ti a. Ka bu ringawt. 

"Thianpa, i that loh hmel riau, eng nge thleng? " Opa chuan a ti a. 

Ka nui hul hak. "Ka tha reng. Mikhual roomah sawn mu mai ru. Thawm dim ve deuh ula, ka fit teh mai ania" ka ti fiamthu a. An nui hawk hawk. Zan a rei tawh tho bawk a, ka mutsan ta mai. Lehlamah an lo lang chu ka ngaihtuahna kal ding lutuk tur tihkianna a ni ve a. A lawmawm viau zawk mai. Ka mengrim tawngkawng tawh nen, Ruatdiki vanga ka lungngaihna pawn min hneh zo ta lo nge, ka lo muhil ve daih a. Mumang ka la nei zui! 

Kha Isabella nen khan Theiriat tlangah hian kan lo kal a. Phulah thu dunin kan hma lama chhum dum chhah zet lo kal zut zut hi kan lo thlir dun a. "Hawh, ruah a sur dawn aniang.. Haw ang' ka lo ti a. 

"Aih, ruah chu do ka duh. Lo nghak ang" a lo ti deuh tlat a. Ka lo kai dat dat, ani ţang nasa si thinrim bawk si chuan, ring leng lawng hian, "Remruat" a lo ti vak a. Ka phu zawk a. Ka harh zui nghal. Engvang nge mawni ka lungphu lah chu a rang em em zui. Khua a la var chiang lo deuh a. Ka tho duh ta lo. Remruat tia min kotu hi a tlem zawk an ni. Imma ti hi ka larpui zawk a ni thin a, Ka pa Hmuna hian, "Remruat" tiin min ko a, a fate pawn chutiang chuan. A bak chu thiante nen kan uan deuh chang hian min ko leh lawp lawp a.. Isabella khan ka mumangah Remruat tiin min ko kha a nia.. Awmzia a nei ang em le.. Tih ngaihtuah mai mai chuan ka lo muhil zui leh daih. Ka harh leh meuh chuan Vani te chuan rawng an lo bawl a, ka va tho chhuak ve. 

"Engtin nge inawm dawn. Awm ve rih law law u la.. Vani an rawn hruai hma chu" ka ti a. 

"Chi dawn mi? Ka chhungten nupui ka ru tih pawh an la hre lo tawp ang. " Opa chuan a lo ti a. 

"Ka hrilh dawn alawm.. Ka khua a har ve tho sia.. Awm ve rih ru.. Chawlh i la mi? " ka ti zat a. 

"Umm la ve ngei e.. Nia, Vani hian kan in lama hawn a hreh bawk sia.. A thu thu ni teh se.. Kan chhungte ve ve erawh chuan hria se a tha" a ti a. Ka mawhphurhnaah ka ngai ve deuh. 

Vawiin chu Isabella nuhrawn statement kan la thung dawn a. Isabella pawh hren ngawt thu awm hek lo le, a chhuak rih ta phawt a. Chemteah khan a kut hnu chu a lang chiang a, a sawi angin chemte kha phawi a lo tum tak tak pawh a ni mahna. Tin, hriatthiam loh ka neih ruk chu, Muani leh Isabella room kha hmar lamah a awm a, a chhak berah mikhual room a awm bawk. Pi Zosangi te nupa room erawh an ep daih chhim lamah a awm thung a. An room leh room inkarah hian sitting room zau helh hawlh tak a awm bawk. Inchung ber chu a zuih tawh a, mahse, inleng pawimawh bik, sumdawnna kawnga an thenrual te emaw meeting pawimawh neih huna hman atan an hmang a. Room khat erawh a awm. Luah a ni lo thung. A te viau bawk nen. In hnuai ber dawr atana an hman lehlam zawng kha choka a ni thung a, living room a awm tel bawk. An in sak dan kal hmang chu a mak dangdai viau a ni. Ka sawi tum tak chu Isabella khan Muani rak thawm kha a rin loh thu bakah a hmui hupsak chunga au ve ţawk tawk a nih thu kha a sawi a. A ring thei lo hrim hrim. An room a insik chêt vang chauha ani pawn hre thei a nih a rinawm. Chutiang anih chuan, Pi Zosangi khan engtin nge Muani au thawm kha a hriat theih ni ta ang? A rawn lang ve vat mai bawk. Chu tak chu Isabella tan hmanrua a tling ve thei tlat a ni. Pi Zosangi hi nu valai lam, inhnawih nasa ve tak, incheina lam uar mi tak a nih ngei a rinawm. A fanu vui zawh hnu lawkah pawh a la dùr tha ham ham em mai. Fanu pakhat chiah nei a ni bawk a, a kum rualpuite ai chuan a lang nula deuh maithei. A sam chu a sen thâng a, a kir deuh chiat bawk. A thau lek lek naa, mawi lo khawp erawh a ni lo. Kan han belbul a, "Ka muhil thei lo a, khami zan khan. Ka let sek mai. Khatiang anih dawn vangte pawh kha a ni mahna le.. Chuan, dar 11 velah Mami au thawm chu ka hre ta a ni. Rang takin ka va tho a, ka thil va hmuh chu inhriat tawh ang tho kha a ni e. Sawi belh tur ka hre lo. He Isabella hian ka fanu hi a hmumawh em em a, a itsik bawk. Dahbona remchang a dap a ni mai. Kan nufa hian hnawk min ti alawm. Kei pawh hi eng nge ka la tawn zel dawn ka hre lo" a ti ta a. 

Ngaihtuah thiam a har thin mang e. An ţannaah an ţang na ve ve si. An chhungkaw nun kan han zawh ve chuan, "Ka cousin a boral takah chuan ka chhungten Isabella leh a nau an lainatawm, nang i tangkai deuh ang tiin min awmtir kha a nia. Isabella pa, U Mawia hi pa fel tawp a ni a. Min khawngaihin min lainat bawk. Muani pawh a duat ve reng bawk. Kan han innei ta a, Bella te unau chu an danglam ta dawrh a ni ber. Hote teah min hek a, Muani lah an hmumawh hle bawk. Apa sum kan eisak hlau niawm takin a pa sum tam zawkte chu a ac-ah a transfertir thul, a nau pawh kha a hrechiang lo mai mai. Drugs addict a nih kha. A inthup thei em zawk a. Keiin ka hauhin min zah si lo va. Ka ngawi ral ta mai anih kha.. A pa tihian a han awm leh ta zel a. Keiin theihtawp chhuaha ka buaipui laiin ani erawh nuam a lo chen mai mai a. Sumdawnna ka kalpui e tiin a pa sum a khawhralsak a, Bike te a lei kual a. Ka fahrin a ni lo va, han hauh vak a nuam lo thin si. Rilru a na duh khawp mai. 

Muani khan u ang tak taka a en laiin ani chuan a itsik tlat a. Thil thar nei hlek se a titau nghal a. A hahthlak asin. A nau bialpa Zotea lah a lo ngaizawng kual ve vel a. Hei vang hian ania Muani pawh kha a thah ni.. A lo ruahman lawk vek tawh a ni ngei ang.. " a ti hmiah hmiah mai. Tu nge rin zawk tur hriatthiam a har mang e aw.. A case IO ber kan pu lah chu, a pizawn dam loh vangin phai lamah zin an ngai a, engtia rei nge an thang dawn hriat ni hek lo. Ka kutah charge a la hlan zui! Mahni lo maha rilru leh taksa chak loh lai, thinlung hliama awm mek laiin.. Ko a va rit tak êm.. 

"He thil hi a titu dik tak i man theih pawh ka ring lo e a" Bena'n a ti sup a. 

"A harsa dawn khawp mai" ka lo ti ve bawk. 

Bella te in lam kan pan mek a ni. Muani room kha enfiah leh a ngai tlatin ka hria. Mahse, an lo chingfel vek tawh a. Pawn lam atanga room luhna kawng bul te chu ka han dap sasawi a. Engmah ka hmu lo. Balcony zau lo te a awm a, pangpar pathum an khawi tlar ţhat bawk. Chu lai hmuna ka din lai chuan, Pot pakhat phenah chuan thil hmuh ka nei ta tlat! Ka'n bih hnai deuh a, glove ti ila, sarang (Beutician hoin sam color dawna an hman thin ang kha) chi kha a ni a. Dim zetin ka pawt chhuak a. Beisei loh thil ka hmu ta. Thisen niawm tak val sen pap pap a lo awm nia! Kuhva chhahna chu niin a lang lo. A hnuai lawka bawlhhlawh bawm lian vak lo inhung chu ka hai leh ta a. Lehkha leh sikret bung a awm nual. Hei chu Muani te zuk bung pawh a ni ve thei. Ka hriatthiam loh chu he kutkawr thelem zet hi bawlhhlawh bawma paih lo va, pot leh pot inkara hnawh a nih chhan hi a ni. A hmanhmawh luat vang nge kan rilru tihbuai a tum vang ka hre lo le.. Misual hi chu eng ang pawn fimkhur mah se; sulhnu eng emaw tak min hnutchhiah hi an ching ve tlat a. A lawmawm lamah ngai ang. 

Pi Zosangi'n Isabella lakah FIR a thehluh miau avangin kan hruai leh ta poh. District jail- lama kan thawnthlak a ngaih hmel. A ukil lam ten thiam taka an nawr chuan bail theih erawh a ni mahna le.. Ka lainat reuh mang e. Hmeichhe induhtawk ve tak, luhlul leh ngeng tak niin ka hria. Tin, a mawl hauhin ka ring lo bawk. Han enchian takah chuan Ruatdiki nen inang viau mah se; an danglamna hmuh tur erawh a tam viau thung. Keia lungleng lungpuam khan ka lo hmu Ruatdiki vek zawk a ni ngei ang. A sam dum hlap, kawi lek lek chu a kawng chung thlengin a zuah a, a mitmeng chu a uk lek lek a, a lian hle bawk. A hnar ngul a sang a, tribal hnar a pawl vak lo. A hmui chu a pan lam mah zawk a, mit la deuh pakhat chu a mit chungah tak khuavang chhinchhiah a awm a, a maimichhinin a lang chiang a. A men chuan a lang zeuh zeuh. A mawi dangdai reuh ka ti. Case danglam tak a nih vang ni maw.. Ka rilru a pawt peng ve riau. Office-ah hi chuan that chang ka nei a. Ina ka hawna keimaha ka khawsak hian ka buai thung thin. Mahse, Vani te zarah tlem chuan ka zia turah ka ngai e. 

Ka inbual zo, ka inthlak laiin Mami'n a lo call a, a hranpaa calla han inbiak hi kan nei vak lo. Text hian min rawn be zeuh zeuh. 

"Aw.. Mam" ka ti a. 

"I tha em? " a rawn ti zawk hlauh. Ruatdiki vangin min ngaihtuah tih ka hria. 

"Ka tha reng alawm. Nangmahni zawk kha" ka ti a. 

"Kan tha ti ila, ka lung hi a awi thei hlawl lo. Ka rinhlelh ruk ang chiahin ka dawra thawk Numami nen khan an lo inzui ru reng alawm.. Ka ten ngawih ngawih.. Ngaihdam chu min rawn dil a. Mahse, ka la hrethiam lo. Bawihtea lah hian a ngai si" a rawn ti nghal bawrh bawrh a. Ka ner nawk mai. Mama mai mai chu aw. 

"A va tha lo tak em.. Mama chu ka rin ang a ni lo hle mai. Mahse, fa in nei tawh sia, a inchhira a sim dawn te chuan inthen hlen ngawt a tha lo " ka ti ve luam a. 

"Nia.. Ka pa te pawn an ti tho a. Kei chuan let loh pawh pawi ka ti lo. Pathian zarah kan nufa eikhawp na nâ na hi chu ka thawk chhuak ve tho a" a ti a. 

" a dik alawm.. Bawihtea pawh ka ngai, Lydiain a atchilh leh em? " ka tih chuan, "Awii Kan Lydia intinula tan hi e.. Kan nui nasa thei lutuk, mawl si.. Lo zin a chakawm khawp mai.. Chuan, Nimim khan Aruati te pawn sawmna min rawn pe ve a" a ti a. Ka ngawi dat. 

"Aa.. A tha lawm.. Va kal ve ru.. " ka ti ro hawk. 

"Mam, engkim hi Pathian ruat ania.. Kan pawm thiam a ngai. Nang pawh pa takin awm rawh. Aruati thiam loh pawh a ni lo va, kan duh angin thil a thleng thei lo anih hi" a rawn ti siam siam a. 

"Umm.. Nia, ka tha alawm.. Min ngaihtuah suh u. Nupa hlim tak nise ka duhsak em em" ka ti a. Ka zawi nguai mai. 

Zanriah chu mang thatna tur tak tak chauh ka ei ve a. Vani te mitmei ka ven vangin ka inthunun hram hram a ni e. An chhungte ka hrilhsak tawh a, an rawn lam vat maithei a ni. An pahnih nui dun ka hmuhte chuan ka zep lo, ka awt. Ka thik tel bawk. Ani nen pawh khan kan hlim dun thin asin mawle.. Tv kan en a, ka rilruah engmah lut thei hek lo, ka ipik lutuk chu, "Ka va chhuak harh lawk ang e.. Lo awm r'u" ka ti a. Chabi ka la a, ka chhuak zui daih. Zotlang lamah ka tlan chho a, Pukpui thlen hma deuh kawngsirah ka ding a. Ka chhak lawkah rawlthar rual khat an ri laih laih mai. He lai hmun hi chu spot nan an hmang ve thin reng a. Motor kawngkhar chu ka hawng a. Thlifim rawn thaw heuh heuh chu ka dawng a, ka ngaihtuahna chu a vak kual nasa khawp mai. Ka chhungten min ngaihtuah tih ka hria. Ngaihtuahawma awm ka duh lo. Kha chen min buaipui tawh a, an rilru tihhrehawm ka duh tawh lo. Ka paltlang ngei tur a ni. Hetiang thil thlen chhan te chu ka rilruah a lut lo thei lo va.. Ka huk pap.. 

Ka phone ri chuan min tiphu zuk mai. Ka la chhuak a, ka thlauh lo chauh. A hming dik tak pawha ka save phal loh, "Sava notê" tia ka save hnen atanga call ka dawng chu lawm tur nge lungngaih tur ka hre lo. Ka pick up lo thei ta lo va. 

"Hello"

"Hello, U Imma.. I dam em? " a rawn ti fiah kâk a. Ka chhing sawk. Ka chhungril chu a kàng mek a ni. Ka sa hut hut mai. 

"Ka dam alawm.. Teh hlawh che chuan.. I dam zawk em? " ka ti a. 

"Dam e.. I reh em alawm.. Ih maw, ka lo biak chhan che chu, Thla thar ni 17-ah pasal ka nei dawn a. Zothana kha.. Hria em? " a rawn ti sar sar a. Ka insanmar nasatzia hria se, phone chu a dah daih duh ang. 

"Aw hria e.. Ka va lawmpui che em.. " ka ti sup a. Ka thinlung erawh chuan, "Min va tina tak em" a ti mawlh mawlh thung si. 

"Nia, lo haw la.. I lo tel ve ang chu. Ka rawn swm che a nih hi.. Lo haw rawh aw" a rawn ti ngher ngher a. Kei erawh ka kehchhe nawn leh ta. A va mak fo em.. Aruat.. 

A tawng mawlh mawlh lai chuan ka tihtheih tawh ngang loh vangin ka off tawp. Ka va auchhuak teuh tak.. 

Motor atanga chhukin kham ko-ah chuan ka ding a.. Kham hnuai lam chu zuk thlirin, "Ruatdik.. Ti nge? Engvang nge? " ka ti mawlh mawlh a. 

"Ehh! Thianpa, i tla ang e.. Fimkhur rawh" tia ka sir atanga rawn au tuar chuan ka beng a rawn verh zawk. Amah pawh chu a rawn lang nghal zat a, min kuahin ka motor ngheng chuan min dintir a. Ka hmel a hmuh theih takah chuan ka tawrhna chu a namên lo tih a hria nge ni. 

"A pawi hle mai" a ti sup a. Kei aia tawi hlek, thau lam, hang lam lek lek a ni. 

"Nia, a pawi.. A pawi vawng vawng a nih hi" ka lo ti mawlh mawlh a. 

A ngaihna hre lo zeta min melh vung vung chu melh let vein, ka nui hawk a. "Ka lawm e.. Ka tha" ka ti leh sup. Motorah lutin chak zetin chulai hmun chu ka chhuahsan ta a… 

(Tawi. Hi a tha 😂