Thinlung- 7

THINLUNG.. (7)

Ziaktu: Toni Râlte

Mami a rawn thu fel a, ka lam kan hawi ţhap mai. Rei vak lo a ngawih hnuah, a aw a thian kharh a. Hetiang hian kan pian ve hmaa thil thleng chu a sawi ta a. 

"Unau hi panga kan ni a. Nangni chuan pali angin inngai ngei ang. I pa Sangliana a upa ber a, a dawtah kei, i pa Hmuna nen kan inkarah hian hmeichhia a awm a. Kan farnu neihchhun Nubawihi chu. Chuan, i pa Hmuna a ni a, kan teber chu i Nu Puii pasal I patea kha a ni. Ka pa, in pu kha vaihlo hmanga sumdawng thin a ni a. I Pi hian tuibur a thlawr thin bawk. Aizawl mihlun kan ni lo va, kan khaw hlui chu inhriat kha. Khawhai atangin hetah hian kan pem thla a ni. I pu kha pa taima leh viak tha tak a ni bawk a; i pi lahin a thlâwp tha bawk nen. A sumdawnna chu a lian chho ve zel a, Thingtlang khaw pilril tak takah vaihlo lei turin a zin thin. A vaihlo hmang khan kan unau min chawm puitling vek a ni ber mai. Inhriat angin kei hi tlemin ka danglam deuh a, Ka unau dangte ang lo takin ka rawlthar chhuak kha ruihhlo han tih ve te, insual te kha ka hrat ve a. I pu pawn min hrin nasa thin khawp mai. Nubawihi hi kan farnu neihchhun a nih piahlamah duat loh theih loh khawpa pawisawi lo leh nunnem a ni a. A hmeltha hle bawk. A tleirawl chhuak kum 15-16 a nih lai phei kha chuan kan vengah na nâ na chuan a lar ve pawl tak a ni ve thin a ni. A chhuan pawh kan chhuang ru ve hle. Ruatdiki pa te saw unau paruk an ni a, Thanliana nen sawn kum khat chhuak kan ni awm e. Thanliana u-ah hmeichhe pahnih an awm a, Thanliana chhang chiah hi mipa niin, an te ber erawh hmeichhia bawk a ni. An farnu te pawh an felin an rual bawk a, inleng an ngah thei fu mai. Chutiang karah chuan Thanliana chhang chiah Rinliana chuan kan Nubawihi chu a rawn hel ve ta tlat a. Rinliana hi Thanliana ang lo takin harhvang leh tawng duh tak a ni a. I ni a rawn rim chang pawh hian fiamthu nuihzatthlak tak tak thawhin kan nuihpui dar dar thin. Mahse, vanduai asiamin Nubawihi duhzawng a ni tlat lo pek a. Kan Nubawihi chuan bialpa a lo nei ru ve reng chu niin, kan veng thenawm lawka hmeithai fapa Nunzira nen an lo inzawm ru ve ran mai a lo ni. Nunzira chu a nu leh a farnu te nen an khawsa a, tlangval fel leh thawh hreh nei lo, inhlawh chawp chunga lehkhazir a ni. Ka pa phei chuan a iai lo khawp zawk mai. "In nupui pasal turah ka inrawlh dawn lo va, in thlan sual leh in vanduai deuh a ni mai" tih hi a thurolum a ni. Nubawihi leh Nunzira te an inngaizawng tih Rinliana'n a lo hriat chuan, a thinrimin a tlawmngai hle a niawm e. An chhungkua an khawsa thei si a, hmeithai fapain a han luahlan chu a la na ngang mai. Tin, Rinliana hi chapo lam rawng a kai ve deuh a, hetia han en mai chuan mi fel tak angin lang mah se; han inhnial nikhuah velah a ţawng lian thei riau a niawm e. Chu tak chu Nubawihi pawn a hnawl chhan a niawm asin. 

Hun a kal ve zel a. Nubawihi'n kum 18 a tlin chuan Nunzira chuan palai a rawn tir ta a. Khanglai chuan kum 18-a pasal neih hi thil mak a ni hran lo. Ka nu chuan fanu neihchhun ni ta bawk chu a ui ve hle a. Mipa lamin nupui kan la nei si lo. Mahse, Ka pa khan Nunzira kha a ngaina ngang nge, "Mualpho a hlauhawm e" tiin a lo inrempui ta mai a. Keini ho chuan ka pa thu kan pawm tlang ve mai. Nubawihi te inneih tur thu a lo hriat chuan Rinliana chhungril suahsualna chu a rawn inzar chhuak ka ti mai. An inneih hma thla khat vel a la awm tihin Mitthi lumennaa kal Nubawihi chu a lo ru chhuak daih a niawm e. A thiannu Tlani sawi danin, "Zun zunga kan chhuak harh kha kan veng rawlthar Kima hi a rawn kal a,'U Nunzira'n lo kal lawk teh a tia' tiin Nubawihi chu a rawn ko a. Ani ngaihtuahna hmang thiam lem lo chuan a pawimawh aniang chu tiin Kima chu a zui a. "Thiani, min lo nghak rawh. Vawiinah kan imhnial deuh a, a thinrim viau a niang,ka'n thlem dai lawk ang e' a ti nghe nghe. Kei pawh eitur an siamna lamah a tul ang ang ka pui ve nghal a. Mahse, Nubawihi chu khawvar thleng pawn a rawn lang ta si lo va, ka mangangin U Sangliana ka hrilh ta a ni" tiin. 

Hetih lai hian kei chu ka pa zuiin Bungţhuam-ah kan zin daih a. Vaihlo la tur bawkin a ni. An lo buai hle a niawm e. Nunzira lahin engmah a hre si lo, Chutah i Pa Hmuna hnenah tlangval thenkhatin Rinliana'n, "Nubawihi hi ka khawih chhe phawt ang a, chuan Nunzira kutah ka hlan ang. Nunzira hi ka hmakhalh dawn ani" tia a rui lungpuam thusawi an lo hrilh a. Hmuna chuan Rinliana a ringhlel ta nghal a. An inah U Sangliana nen an va kal a, mahse, an ni pawn Rinliana rawn haw loh thu leh khaw nge a kal an hriat bik loh thu an lo sawi a. A tlan bopui ngei niin a lang. Keini ka pa nen kan zin hawng pawh kan buai ve nghal a. Kan thlen zan hian Rinliana chu an inah a haw thu kan hre ta a. Ka pa hoin kan va kal vat. Mahse, "Nia, Kima kha ka kohtir ngei mai a. A lo kala min hmuh rual khan a tlanchhe nghal daih a ni. Kima pawn chu chu a hria ang. Khatia ina a hawng lo tih ka hriat khan ka hlauthawng ve bawk si chu kan huan lamah ka tlanchhe ve ta daih a.. Engmah ka hre lo" a ti ta tlat mai a. Kan awih lo nasa, mahse, Kima ngeiin, "aw U nubawihi chu a tlanchhia alawm" a tih ve tlat vangin kan buai ta em em ani. Police hnenah kan thlen a, hmalak vak dan a vâng si. Nunzira zawk te kan han ringhlel thut thut a. Mahse nakin lawka a pasal ni mai turin tuna taka a ruk ngawt thu a awm si lo. Amah lah a mangang ve em em bawk si. Nubawihi bo atanga ni lina-ah Rinliana te in atanga hla lo tak, ramhuai lian kawn kan tih mai thin, chumi kawrah chuan Nubawihi ruang an chhar ta a ni. A lo chhe tawh viau a, a rim pawh a na hman angreng. Kan rilru nat dan leh thinrim turzia chu inhriatthiam ka ring. Kan farnu neihchhun, kan chhuan ruk ve em em, chutia tuma dawmhlum loha thi tlaw reng chu tu chuan nge lungdam taka thlah liam thei ang. Kei nen phei chuan inchhangbung tih takah kan inngai bik a, A ţan pawh kan inţan bik thin. A tukhum a kak duai a, tin, ruang hmu hmasabertu khan a puan bih lai a tlak thu leh a kawng hnuai lam chu engmah a inbel loh thu a sawi a ni. Anih chuan pawngsual hnua thah a ni tih a chiang reng mai. Khang lai huna khatiang thil rapthlak thleng ta chu zoram pawh a deng chhuak hneh hle. Ka nu leh pa te pawh an rum kâwk kâwk a ni ber e. Pawi tak maiin Nunzira rilru na lutuk lah chu a rilru a buai chho a, rei pawh a dam ta lo. Nubawihi thihna zet chuan min deng na khawp mai. 

Kei erawh phuba lak tum ranin ka khawsa ta a. Police lamin rinhlelhawm han man mah se, mitthi tawh khin chu a harsa si lo va, a thattu an man thei lo. Rinliana bak rinhlelh ka nei reng reng lo va, remchang ka melh ta ran mai. Mahni tawka veng chhung insual huai ka ni a, Rinliana chu ka hlau therte lo. Mahse, thudik hriat phawt erawh ka duh ve a. Kima kha ka chhui ta a, Kima hi an chhungkua an harsa ve a, farnu pahnih nei vein fapa awmchhun a nih vang nge a sual ve deuh a. Zu han in leh ganja han zuk te a duhthawh ve thin hle. An retheih ngaihtuahin a ruihna tur ruihhlo chu a lei thei riau a. Chu tak chu ka rinhlelhna a ni. Ka chhui ka chhui hnuah zan khat chu mitthi kan nei leh a, a ruang hi lumen tur a ni nghe nghe. Kima chu ka zawng ru char char a, a thiante nen an awmho a. Ka thianpa nau Hriati ka kohtir ta a ni. Rinliana' lo kal lawk rawh se a ti tiin. A rawn lang rang viau. Min hmuh chuan a meng phar deuh a, mahse, engmah thil dang a sawi hmain ka lo ruahman lawk tawh angin damdawia ka chiah ka romol hmang chuan a ka ka hup ta chawih a. Kar loah a zawi ta hniang mai. Miin min hmuh a hlauhawm ve bawk nen, ka thianpa nen hmanhmawh takin thim thamah kan zawn ta a. Heta ka thianpa ka tih hi I I Pa Rova te naupangber Lawma a ni nghe nghe. A boral tawh. Lawma te in relah kan luhpui a. A harh hun kan nghak ta a. A rawn harh chuan vau titih thlem titihin ka dawp ta a ni. Ani la naupang ta na nâ na chu a inpuang rang khawp mai. Khami zan khan Nubawihi chu a tlanchhe ngei a, mahse, Rinliana nen umin A ka an hupsak a, Ramhuai liam kawnah khan an hnuk phei a lo ni a. Kan veng kha heti takin a la lun lo, tin, ram awl kha a la tam bawk. Kawr an thlen hnuah Kima chuan a hlawh tur pawisa lain a kalsan leh thu a sawi ta a ni. A hnu lam thil thleng chu in ngaihtuah thiam maiin a rinawm. Kima a inpuan takah chuan Rinliana chu police kuta hlan turin Lawma chuan min ti a. Mahse, ka rilru a dang daih. Khatih lai khan ka pa râwn nachang hria ila chuan tunah pawh nangni hian intuar lo mai tur.. Mahse, keia rilru sak laklawh, pawisak nei tawh lo laklawh chuan mit aiah mit, ha aiah ha tih changchawiin, Mitthi khuaa ka farnu tirliamtu Rinliana chu ka kut hmang ngeia mitthi khua nawrliam ve ka duh ta tlat! Ka thin a rim tharin ka rilru a na thar bawk. Mangang leh chhantu ngai ngawih ngawiha ka farnu thlabar taka siamtu Rinliana chu thah ka chak ta zek zek mai a ni. An inchai laia Nubawihi thlaphan dan tur leh mangan dan tur ka mitthla phei chuan ka sahal, tun thleng hian ka thin a la tâwt thin. A rukin remchang ka dap ta ran a. Kima erawh Rinliana bulah engmah sawi lo tura vauin ka kaltir leh ta mai. Hmanrua mai a ni bawk a. 

A ngaihven ta na nâ na chu Rinliana, huana a feh ni ka hre ta kar a. Chhungte bulah chhuanlam siamin an huan lam panin ka zui ve ta vat a. Kal pui a nei lo nia ka hriat vangin ka hlim ru hle. A tul thuta hman turin chemte, kan zinnaa khawchhak lam thianin min pek ve ngat chu ka pai ran bawk. Rinliana hi lehkhazir lam a misa loh vangin tihian a tul tul a thawk ve thin a ni. An khawsa thei a, an hah lem lo. Thingpui an ching nasa a, a hlawkna pawh an tel ve viau. Thawm dim takin a thingpui lo lai chu ka veh ta ţhem ţhem a. Mipa e ti lo chuan a zai rut rut bawk. Chutia enghelh leh helhkam nei hlek lo va muang taka a awm theite chuan ka thin a tiur zual a, ka inngaihtuah thinrim leh ta hlur mai. A hnunglam atangin ka nam ta vak a, a tlu bawkkhup nawk nawk, a rawn hawi chhuah chuan a hmai bul chetah ka zuk hnaih a, "Rinlian, vawiin hi i tawpna tur a ni. Ka farnu neihchhun pawngsuala a nunna i chhahsakna phuba chu lakin a awm ngei dawn e" tih leh a hrawka reh ka rual nghal a. A hamhaih em vang khan chet a la hleithei lo niin ka hria. A hrawk chu a ri bawrh bawrh mai. Kei lah tha thlah ka tum der si lo. Rehhlum ringawt chu a thi nuamsa dawna ka hriat vagin ka thlah leh a, a lu chu lei charah ka sawh ta nghek nghek a. Thawm a chhuah miah lo kha a mak! Ka inkhawih tui bawk a, tawp nachang ka hriat meuh chuan a hmai chu thi hlirin a bawh khat tawh. A mar erawh a la phu det det e. 

"Ka farnu hnenah khan ngaihdam dil ngei ang che" tiin a nunna chu ka chhahsak ta a ni. A ruang ka thlek mek laiin Ruatdiki pa Thanliana ngei sawn aw a rawn thian ta kharh mai a. Ka phu chiang ve khawp mai. Thinrim em emin min rawn melh a, a khur hlawk hlawk bawk. "Ka nau i that a maw? Zawngsen, i nunna kha ka la ve nghal dawn" tih leh chempui phawrh a rual ta mai a. Ka ding vat. 

"I nau hian a phutawk a hmu a ni. Ka farnu khan khatianga thih kha a phu reng reng lo. I duh leh ka nunna chu la rawh. Ka unau ten ka thihna phuba an rawn la ve leh ang a, phuba lakna tawp thei lo nen damchhung hun chu kan thlah ten an hmang tawh ang" ka ti ta a. Thanliana saw mipa dik tak tiin ka chhal lo thei lo. Thudik ka han hrilh hnuah chuan, a nau ruang chu siam thain, inthunun tak siin, "Kan naute thisen chhuahna chu he lai hmunah hian tawp rawh se. Mahse, hei erawh hrereng ang. Kan thlahte kal zel nen inzawmna kan nei thiang lo a, kan thisen hi a luang dun thei tawh ngai lo vang. Chu chu min tiam ang che. Tichuan, he lai hmuna thil thleng hi a theih chin chin zêp kan tum bawk tur a ni" a ti ta a. Ka beisei loh chhanna ka han hmu chu kei pawn mak ka ti. A unaupa nunna latu ka ni a, police hnena min hlan te pawh ka lo ring a. Ka inpuahchah lawk vek tawh zawk kha a nia. Mak ka ti tih a hmuh chuan, "Ni e, a mak ang. Kei chuan rawng taka pawngsualna hi ka hua a ni. Ka nau hian zahpuiawm takin i farnu chungah thil rapthlak tak a thlentir a, a nunna in a tuar phah ve ta hial a. Police kutah hlan ta che ila, ka nau thiltih tenawm tak kha a rawn lang chhuak ve dawn tho, nakin thlengin kan thlah kal zel ten an la hria ang a, chhungkaw mualphona mai mai tur a ni. He thil hi kan kalpui thui zel chuan a tawpna a hlimawm vak loh ang" a ti leh a. A sawi chu a dik ka ti. Chutihrualin khatiang em ema mipa insum thei kha ka vawikhat hriatna a ni. Thanliana nen chuan inremsiamna kan nei ta a. Kan thlah kal zelte nena inlaichinna neih loh hi.. He thuruk hi ka diary-ah ka ziak a, ka thih hnua inchhiar atan. Mahse, ka thih hmain ka sawi chhuah a ngai ta a nih hi. Tichuan, Rinliana chu lum hlum anga puanzar a ni ta a. Kei chu ka him. Mahse, Thanliana chu a ruk takin ka zah a ni. Ka thiltih rapthlak tak khan vawiin thlengin min vaw let ta a, thinthi diaia mutthilh te hi ka nei ngai mang lo. Kan Pathian ngeiin phuba la lo tura min tih laiin ka mihring duhna ka kal thuipui a, a vuak let chu ka tuar ta chiah a nih hi.. Ka phuba laknain min tihbuai thin vangin sual rawng ka bawl chho leh ta a, I nu chhungte pawn min iai phah ta hial anih kha. 

Tin, Engvangin nge ni (aunt) in nei tih hi kan thup tlat kan tih chuan, Ka pa khan, "Nubawihi thihna hi a rapthlak em a. Nakinah in tu leh faten a thihchhan an la chhui ang a, buaina a punlun palh ang e. Tun atang chuan mitthi a nih tawh angin a hming hi lamrik ni tawh suh se.. A thlalak leh sulhnu zawng zawng pawh dah bo vek rawh u. Pathianin Phuba min laksak tawh bawk a. I sawi ri tawh lo vang u" a tih vangin kan thup ta a ni. Tin, sawi chhuah fo khan kan rilru a na mai mai bawk nen. Rinliana a thih khan veng chhung mi tam zawk chuan, "Nubawihi thlarauin phuba a la aniang" an ti sup sup hlawm. A rukin an lo ringhlel ve reng a lo nih dawn kha. 

Tichuan, tunah tihian Rinliana u fanu nen inlaichinna in lo nei ta si a. A tirah khan pawi ti mah ila, tlangval thalai in ni a, chuti taka in luh thuk ka lo ring lo va. I training te khan in inthathen mai beiseiin aw ka pawh ka chhuah ta lo a nih kha. Mahse, ka beisei aiin in kal thui a. Thanliana rilru pawh a lo ni ve chiah. Tichuan, hman zana i va len zan khan Thanliana'n min rawn bia a. Kan inhmu ta a ni. 

"Thutiam chu thutiam a ni a. Kan intiamnaah khan thisen a luang a nih kha. Ka fanu ka thunun ang a,i fapa i thunun ve ang. Nangni leh keini zawng khawvel dangah zawk le" tia min chahna angin kei pawn pawh then dan tur che u ruahmanna neih ka tum a. Mipa i ni a, khuahkhirh i sawt dawn hauh lo. Thanliana a che ta a, i beidawnsan mai beiseiin ka kut ka la phuar a. Mahse, i pa ang chiahin i tum a lo ruh a.. Ka fapa, tunah erawh i bansan ngei ngei a ngai tih chu i hrethiam ang tiraw..? " Tiin. 

In chhung chu a reh tlawk tlawk mai. Hriau pawh tla se a ring ngawt ta ve ang. Ka thaw hawk a. Ka pa pawh chauh hmel zetin thutthleng nghenchhan chu a ngheng rawk. Mami leh ka nu erawh chhuat lam an melh ran a. Sawi tur reng reng ka hre lo. Sawi loh tur lah ka hre hek lo. Chhungkaw thuruk rapthlak tak avang chuan ka chau a, ka hah a ni. Ruatdiki pawh ka ngaihtuahnaah a lut thei lo. 

"Ni e, Mama, i pa thutiam vawn hi i vawnpui chu a tha ka ti.. I kal tlang luih chuan i pa hian hremna a hmachhawn ngei dawn si a. I pa ka inpuantir theih nan tawngkam te kha ka cheh lui mai mai zawk anih kha.. I pa hi a khawngaihthlak asin.. " ka nu chuan a lo ti dam dap. 

Ka rum nghut. 

Ka tho a. "Ka mu phawt dawn" tih chiah ka sawi. Ka room lam ka pan nghal bawk. Ka muhil dawn miah lo tih erawh ka chiang thawkhat viau e. 

A khirh em vang leh harsatna avangin Aruati lah a hlu telh telh a, ka ngai tulh tulh si. Mahse, ka pa thutiam avang erawh chuan, neih erawh ka tum ta lo thung. Ni e, ka pa hi tualthattu mah nise, demna ka nei lo. A farnu laka a tihtheih a ti a, ka chhuang zawk. Mipa tam tak hlen ngam loh titu a ni a. Vawiin thlengin kha a thiltih khan a la zui zel lehnghal. Hahdam taka awmtir a hun ve tawh. Pal luih ka tum lo ve. Mahse, ka duhthusam hmeichhia Ruatdiki, ka nupui a ni thei lo tur erawh pawi ka tiin tawrh harsa ka va ti tehreng em.. Ani kha ka hmangaih asin. 

Tichuan, kha hun thim tak atang khan Aruati nen kan hringnun zinkawng chu a tawp ta ti mai ang. Kan thinlung erawh a la inzawm reng thung. Ani pawh college a kal tawh a. A nunphung a danglam vekzia leh a hlim hmel hmuh a khat tawhzia te chu Teteii hnen atangin ka lo hre ve thin. In a chhuahsan ngai mang lo va, a room chu a khawvel a ni ta ringawt a niawm e. Vawikhat tal hmaichhana inbiak ka chak a, sawi tur tam tak kan neiin ka hria. Teteii chu ka ngen thin a, min khawngaih ve bawk aniang, Remchang a lo zawng ve a. Sunday chawhnuah tihtakzeta Aruati chu sawm chhuakin len harhpuiah a sawm a. A pa te pawn an lo phal mial aniawm e. Chutia an fanu neihchhun, ruang kal thei ang chauha a danglam tawh avang chuan boruak thar hip se an duh a ni ve ang. Teteii chuan min rawn be vat a. An thiannu Mimi te in lam panin ka tlan phei ta nghal a. 

Min hmuh chuan a îp chawih niin ka hria. Mimi te chuan min thlahfal ta a. Sawi hmasak tur ber pawh ka hre lo. 

Mahse, "Chhungkaw thuruk kha i hre ve tiraw? " ka ti ta a. A bu nghat. 

"Kha vang khan em ni? " ka ti leh a. 

"Umm.. Ka pa vanga ti ka ni" a ti zawi sap a. 

"Min la hmangaih em? " ka tih chuan, chiang em emin min rawn melh a, tleirawltê thusawia mawi lo hian, "U Imma, chuti maiin hmangaihna hi a bo thei lo. Harsatna vanga bo mai thei hmangaihna chu hmangaihna lem a ni zawk ang" a ti a. Ka va kuah chak tak em. 

"A pawi tiraw? Pawi ka ti.. Aruat.. Tihtheih neih ka chak. Kei pawn ka pa saw tlawm takin ka siam thei bik si lo. " ka ti a. Ka thaw a hah. 

"Nia.. Ih, lo innei lui ta pawh ni ila kan hlim ka ring lo. Kan pa te ve ve inkara ser nung cham reng tawh tur avang sawn" a ti khauh a. 

"Mahse, ka ngai thin lutuk che" ka ti thawr a. Min rawn melh leh zawk.. "Nang aia nasain" tih leh a mittui tla hruk a rual a. Ka tuar thei thlawt lo. Ka kuah ta chawt a. Ka pawm vawng vawng mai. Ani pawh ka âwmah a bei hle hle mai. 

"Kawng dang awm se ka va ti êm.. " ka ti vawng vawng a. 

"Nangmah hi awm bo la.. Ka thei ang.. Ka hmuh che chuan ka nep zel a. " a ti ţiau a. Chu chu a hmaa ka rilruk dan kha a ni ve reng reng a. Ka la kherh chiah lo thung. 

"Pasal i neih hma chuan nupui ka nei lo vang" ka ti nghet charh. A rawn hawi chhuak a, "Aih, i nei hmasa zawk tur a ni. Nei la, ka nei ve ang" a ti hap a. Kan inmelh leh ngawt ngawt. Mipa pawh hi insanmar a va har ţhin êm. 

"Pathian hian ti nge induh tak si, awmdun thei si lo va min siam kher kher le.. Ti nge ka patea khan i nî chu a lo thah kher kher ni.. Ka va haw tak em" insút hlap hlap hian a ti a. Ka insehruh nasa ngang mai. 

"Ka pa pawh kha lo insùmin i patea nunna kha la lo nise kawng a awm mahna" ka ti a. 

"I pa kha ka dem lo kei chuan" a ti ve hram. Chutiang khawp chuan he hmeichhe naupang hian min hmangaih ve asin. Ka ngaihtuahna a insual nasa khawp mai. "Duatte, hun hi liam se, kan pate rilru pawh a danglam ve mai thei asin.. Nghak dawn ila i thei ang em? " ka ti ta chawt a. 

"Ka damchhung pawn ka nghak thei che.. Mahse, ka pa hian a rilru a sawhsawn ngai lo" a ti sap a. Bei hi a dawng ngawih ngawih. 

"Aw le.. Ka hmangaih che a. I pa hian kei aia letin a hmangaih bawk ang che tih ka ring. I pa thutiam tichhetu i nih ka duh lo va, i pa i tihnat ka phal hek lo. Chuvang chuan, ka tel loin hlim tum la, hmabak tam tak i nei.. Pasal tha tak, hmangaih em emtu che nei la ka duh. Kei pawn rawn biak chea rawn tihlunglen che ka tum tawh lo vang. Pathian ruat kan ni anih ngai chuan hun tha erawh a la inher chhuak em em ang. Hlim rawh aw.. Dam reng bawk la" ka ti ta mawlh mawlh a. Mipa ka nia lawm le.. Beidawnsan tur thil chu ka beisei fo lo vang. Ka pa avang pawhin he inlaichinna hi ka pal chah a ngai a ni. Ka thei ngei ang. Hetia rem thei ngai lo tur inzawmna vuana intihkhawtlai hian awmzia a nei hlawl lo. Amah Aruati ka hmangaih avang pawn keimah zawk hi ka inlak hran a ngai a ni. Mahse, kan hawn dawnah, "A tawp nan vawikhat chauh" tiin ka fawp vawng vawng a. Ani pawn hnialna min nei lo. Kan infawp zo chu, min en kar chungin, "Ti ang.. Ka thianghlimna hi min laksak rawh. Mi dang tan ka phal lo" a ti ta mai a! Ka rilru insual nasatzia kha aw.. 

"Ni lo ve.. Nakinah pasal i la nei ngei ang a, i pasal tan i hlan kha a hlu ber e. Ka hmangaih vang chein ka khawih dawn lo che.. Mahse, thianghlim takin nung reng ang che aw" ka ti ta a. Ka rilru pakhat erawh chuan ka duh ber hmeichhia, rei tak ka lo insumpui thin taksa chula khalh chu a chak alawm. Ka thlahlel ngawih ngawih bawk. Mahse, mipa ka ni. Ruatdiki hi ka nupui a ni lo. Ka hmangaih a, eng ang mipa nge pasalah a neih dawn ka hre lo, chuvang chuan ka venhimpui zawk a ngai a ni. 

A tawi zawngin, Ruatdiki vangin Lunglei lama min transfer turin ka kherh a. Mahse, kan hlawhtling lo. Thinrim teuhin hna ka kal thin. Aruati chu ka hnaih ta lo va, ani pawn min hlat ve hret hret e. Hlim erawh kan hlim thei lo. Ka chhungte pawn min hrethiam khawp mai. Tin, Zu ka in phah nasa. Chu chuan ngaihsamna min neihtir lo thei lo va, hmeichhe han kawp lawp lawp te ka nei chho ta a. Chutianga ka awm chu Ruatdiki beng a thleng lo thei bik lo a, rilru na em emin hun a hmang thin aniawm e. Ka runluih miah lo. Mahse, hlimna ka zawng ve a ni mai. Hlimna erawh ka hmu lem hlei lo va. Ngaihzawng nghet neih phei chu hla tak a ni. 

Zan khat chu ruah a sur bur bur mai a. Keia rui pentawng ka harh hlawl. Tui ka in khawlh khawlh laiin ka phone a ri ta a, Teteii a ni. "U Imma, hmanhmawhin Damdawiin lo tlan rawh. Civil hosoitalah.. Aruati a buai" a rawn ti ta mai a. Ka va harh chiang kher em. Ka nu te pawh ka kai tho. Ka pa hoin Damdawiin kan pan ta nal nal mai. Aruati nu in ţap pur chungin min lo chhawn a. Ka bo hu mai. Ka hmangaih chu a kal ta emaw ka ti hman, mahse, a lo ni êm lo. Teteii'n ţap chungin, "U Imma, i sual em alawm. Bialpa pawh a la neih ve hma hauhin hmeichhia i kawp kual a, i phur kual a. A hmu ve vek thin che u. A hnaih thei tawh bawk si lo che a, a rilru na lutuk kha inawhhlum a lo tum a, U Zuala'n a va hmu hman hlauh a. A nunna an chhan hman hram anih saw.. Nangmah vang vek" a ti mial mial a. Kei erawh ka kha a chih. Sawi tur reng reng ka hre lo mai. Ka mang vek. Ruatdiki'n inawhhlum a lo tum a maw? Hmeichhe nunnem, leh derthawng tak, mi pawisawilo tak mai khan ama nunnna ngei lak a lo tum a maw?! Chu pawh kei a bialpa hnaisailo, ama tawka hlimna zawng ve avang mai mai hian.. Ka kut ka hum ruh a, Ruatdiki pa hmaah ka va ding thawr. 

'Ka pu, nunhlui chu nunhlui a ni. Khawngaih takin i fanu hi min neihtir rawh" ka ti ta tawl mai. Min melh vung vung a, ka bulah ka pa a rawn ding ve zat bawk. 

"Imanuel, thisena thutiam hi chu chuti maia nawhreh theih a ni hleinem" a ti chang fak a. Ka pa a inrawlh ve ta. 

"Thana, a tawk tawh em em e. Keini pahnih thutiam vanga ka fapa leh i fanu ten tawrhna an hmachhawn hi ka hmu thei tawh lo ve. Kei pawn ka fapa ka hloh mek asin. Hremna min pe la, an ni hi an duhthusam thlentir rawh" a ti ta a. A aw chu a khur lek lek. 

Ruatdiki nu a rawn tawng ve ta bawk. "Paa, thil thleng tawh chu thil thleng tawh a ni. Kan fanu saw en teh, a kal mek asin. I thutiama dinngheh i phal loh vang ringawta a nunna in a tawrh hi ka phal thei thlawt lo. I fanu neihchhun anih saw" ţap chungin a ti a. Engkim chu a reh leh ta vawng vawng mai. Tumruh takin ka ding khawng lah a, engpawh thleng dawn se, Ruatdiki hi ka nei dawn tiin ka intiam mawlh mawlh mai. Ka pa bawk chuan, "Police ko rawh. I unaupa nunna ka lak hremna chu min pe rawh le.. Mahse, ka fapa leh i fanu hian chhungkua an din ang a, kan chhungkaw hnih inkara thisen chu an nuai bo ngei tur a ni" a ti nghet charh a. Ka pa chu ka va en a, A mitmeng thuk tak leh a tumruhzia ka hmuh chuan min lo hmangaihzia ka chian thar phah hle. Ruatdiki te upa ber U Sanga a rawn lang ve ta bawk. Ani hi chu a pa thachhang dawltu a ni bawk a, a thu leh hla pawh ngaihpawimawh a ni thin. 

A pa bula dingin, "Ka pa, inngaihtuah rawh. Ka patea pawh khan pawisawilo nunna a laksak ve tho asin. He inrem lohna hi phumbo a hun tawh. Ka farnu sawn nunna a neih leh ka duh a ni.. Khawngaihin" a ti sup a. Chutiang meuha nawr a nih takah chuan, Pu Thanliana mitmeng rum ul pawh a nem sawt hle. 

Hah hmel zeta thawk la halhin, "Ka fanu neihchhun, mi â ang maia a khawsa hmuh hi ka tan a nuam bik reng reng hleinem.. Aw le.. Ka fanu ka hmangaihna chuan hnehna chang zawk mai rawh se. Hminga, i hremna hmuh tur chu thih hnu piahlam atan ni rawh se.. Thutiam chu ka chhu chat e. " a ti fiah kâk a. Ka benga a mawi dan chu tu hian nge sawifiah thiam ang le.. Ka mittui ka khap per ve sawk mai. Ruatdiki kha a lo inkhai hman tawh a, Zuala ngaihtha lo va lut khan a va pawm kang hman a, mahse, a thawk erawh a buai phah ta kha a nia. Kan va phei atanga rei fe hnuah a rawn harh chauh a ni. A meng buai hle reng a. Min hmuh phei chuan a mit a khap sak sak ringawt. Ka lainat lutuk hi ka ţap lo chauh. Chuti taka min hmangaihna pholangtu hmeichhia chu engtikahmah tina tawh lo turin ka intiam mawlh mawlh hial a ni. A kut ka chelhsak a, "Ka awm tawh aw.. I tan ka awm reng tawh dawn.. I pa leh ka pa pawh an inrem tawh asin.. A awmzia chu nang leh kei hi kan innei thei dawn" ka ti sup sup a. A meng phawk takzet, a pa a han melh a, a lo buk khum nghut a. Min rawn melh leh a. A der tel miah lo va nuiin, "Ka lawm lutuk" a ti sep a. A mittui a rawn luang zâwih bawk. Ka nu leh a nu pawh an lo inhru ve mawlh mawlh mai. Ruatdiki tumruhna chuan chhungkaw hnih inkarah inremna a rawn siam ta a. Mi â ang maia vakvai tawhte kha mi pangngai dinhmunah min hlangkai leh ta. Damdawiinah a awm rei lo va. Khawvel chu a va nuam thar êm.. 

A la naupan deuh vangin neih nghal erawh tihchi a ni lo va, pawi kan ti lo. Tibuaitu kan nei tawh lo va, an inah ngampa takin ka leng ngam tawh a. Ani pawn chaw a rawn ei zeuh zeuh. Kan veng chhungah min hre lo an awm tawh lo va, tuman min ngaizawngin min kherh buai peih tawh lo. Thikthu vanga buaina kan nei ngai lo ti ila, a sual a chhuah chang hian kan thawhpuinu Msi hi a thik thin. Msi lah hian a thik thin tih hriain chimawm a rawn chhuah thin a. Mahse, a tawpah nuihnain hmun a chang leh nge nge thin. Hun pawh a kal ve zel a. College a zawh veleh inneih kan tum ve tawp mai. Kei pawh ASI-ah ka inziak tling chho a, Tihian hun han kal deuh se, SI ka tum leh deuh. Ruatdiki vang chauhin zu pawh ka in ta lo. Kohhhran ka bel chho a, ka chhungte pawh an lawm. 

Hetih lai hian chhungkaw chungchangah han peng ve lawk ila, Mami kha Mama nen inneih an tintuah ve a. Ka nu a hel deuh naa, Ka pa in rem a ti miau si a. Inneihna ropui leh hlimawm tak kan hmang a ni. Hemi hunah pawh Ruatdiki chuan min tawiawm ve zar zar zel a. Mami nen tak pawh an inngaina ve khawp mai. Mami awm ta lo chu ka nu chuan mo a awt ta nghal reng a. Lydia awm lo phei se chu kan tlem ta lutuk chu a hrehawm ngawt ang le.. Mahse, vanneih asiamin ka pain an thawhpuite awmpui, a pi a sual em vanga awmna tur dang zawng mek hi a rawn hawn a. Nuteii a ni a, Kei aia naupang hlek, nula hlim thei leh tawng duh tak, thuawih leh taima tak a ni a. Ka nu a lawm hle, an induat pitu mai sia. Nuteii awm ve chuan min tiphuisui ta viau e. 

ASI-a ka luh hnu lawk thla hnihna velah khawvela ka kehchhiat chian berna ni chu a lo thleng ta a ni. Sawi fo loh ka duh a, a chhan chu mipa mitah hian a kuanga leng lo mittui a tling thin a tin ni. Vawiin thlenga ka nuna hmeichhia an len tak reng reng loh chhan.. Khamini kha anchhia ka lawh thin.. 

"Ima, imma, " ka ngaihtuahna ram atangin ka harh zawk. Ruah mal tla phuar phuar chuan ka hmai leh thawmhnaw te chu a lo nan huh fup tawp a. Ka hawi chhuak a, ka room atanga bathlar chhuahna kawngka nghenga Bena lo ding chu ka han hmu phe ruai. 

"Ka thian, khatia i awm ka rin vang ania ka lo kal.. A tha lo.. Hawh lut ang" a rawn ti a. 

Khawpui a ri dur dur.. Kawl a phe zuai zuai bawk. Min rawn kuah a. Ka lo kai hle a niang, ka ke a nghet lo khawp mai. Khumah min nghat a. 

"Hei i huh hman a nih hi.. Lawk.. Inthlakna tur ka lo laksak ang che" a ti sawk sawk a. Kei erawh a zangthal zawngin ka mu thlawp. Chunglam chu ka melh reng a. 

"Thianpa, Pathian hi a awm aniang tiraw? " ka ti sup a. Inthlakna keng chungin min rawn chhuk melh a. 

"A awm.. " tih chiahin min chhang. Min kai tho a. Ka thawmhnaw huh chu kei pawn ka phelh ve mai a. Thei leh thei lo chuan ka inthlak a, ani erawh chuan ka zu um leh eitur vel chu a va lalut a. "Zanin chu ka riak ve mai ang. Ruah hian min dang dawn tlat' a ti nuah nuah a. Ka lo nui hawk ringawt. 

"Imanuel, mipa i nih kha.. I tawrh chhuah tawh natnaah khan kir fo tawh suh.. Enteh, Lucy thianu a lo zin a. Lawngtlai ami. Chhe lo tawp.. Kan la rim dawn nia" a ti zung zung a. Pawr zet hian, "Tu nge chu chu? Ruatdiki maw? " ka lo ti tuar! Min rawn melh vang vang a. 

"Ni lo.. Ruatdiki a ni lo" a ti bung nghut. 

"Ruatdiki ni lo hmeichhia reng reng chu ka tan engmah an ni lo.. Engmah" ka ti pawr leh hlur a. 

"I va naupangchhia tak.. Police zurui ţap.. Inhmeh lo lutuk" a ti nghut a. Ka nuih a tiza ve ta deuh. takin ka nui hawk hawk a. 

"Engmah hre lo va mutthilh ka duh" ka ti ta a. "Tehreng e" tih pahin zu min thlitsak chu min rawn pe a. Ka lo tlak nghal hmiah. Ni e, ka die chiang khawp mai. Natna chu ka mutthilhsan ta kha a nia.. Ruatdiki zunzam erawh chuan ka mutthilh lai pawn min la zem chiai thoin ka ring a ni. Ni e, ka hmangaihna hi a lem a ni lo tih hi nitin ka chiang telh telh mai. 

Lu nâ bura hnaa kal hi chuan mood a fuh mawh khawp mai. Siamteii'n, "Result a chhuah tep kha aw" a tih chuan ka bo hu. Ni dawn tak, ASI ka tlin hnu kum 3-naah SI ka exam ve leh a. Hmanni mai kha a ni. Ka tlin pawh ka ring chiah lo. Ka lo ngaihven leh tawh vak lo. Bena case kal lai kha ani chuan a bawhzui a, ka pui peih ta lo. Ka chau hlauh hluah a ni ber e. Chawhnu lamah Zotlangah kan pu kan zui a. Khama lum hlum an awm vang a ni. Ruang an la chhuak tawh a, mipa a ni. Amah hria an awm mang lo va, postmortem turin an phur phei ta rih. Ka mood a chhe ngawih ngawih a ni ber. Kan ban pawn eirawng ka bawl peih lo. Eitur ka chah leh ta tawp mai. Parawl ninawmna chu eirawngbawl hi. Zu erawh in tawh rih loh ka tum thung. 

Dar 11 thleng inkhel ka en a. Ka chau ve deuh bawk nen… mu turin ka inpuahchah a. Ka ha ka nawh mek laiin call ka dawng ţut. Kan pu a lo nia! 

"Imma, Bazar vengah inthahna a thleng a niawm e. I rawn kal ve mai dawn mawni.. " a rawn ti.. Ka ner sawk. Mahse, hotu nei kan ni si. Ka insiam sawk sawk a. Ka chhuak leh ta chu a nia. Bazarveng ka va thlen chuan tualthahna thlenna hmun chu hai rual lohin a langsar hle. Kikawn thlen hma deuhah sawn a ni a, mi an lo tam khawp mai. Uniform nen ka ni bawk a, min lo kian sap sap mai. Tlemin a zuk penhleh ve deuh a, Pu nen kan inhmu ta bawk a. In chhung kan zuk lut a. Ţap thawm nen, thinrim ang thawm nen.. An ri nuai nuai mai. Pungkhawm tam zawk chu khawtlang hruaitu ten an lo hnawt darh ve mek bawk. Building lian ve lam, tlema hlui tawh lam, rawng hring a ni a, chhawng thum lai a ni. Mahse, a hnuai ber chu dawr niin ka hria. Kan han luh chuan, min lo kian sap sap a, engmah khawih danglam lohin an lo la dah. Mitthi awmna lam chu kan pan nghal a. Room zau hek hawk, nula room tih hriat deuh a ni. A nu niawm tak chu a ţap rawi rawi mai. Ruang chu chhuatah a bawkkhup zawngin a lo mu a, a hnungzangah chemte a bur vû mai. Pu chuan chemte chu a phawi a, sarangah ka lo khung vat. Ruang chu a kuai let a, tleirawl aia u hret tur, nula hmelchhe lo tak, hmai hriam lam lek lek a ni. A maimichhing a. A hnungzanga vihna bak hliam dang a neiin a lang lo. Khum chu a chuar deuh a, rizai pawh khum leh bang inkarah a tawm tùn mai. An inchai ve deuh ni chuan a lang. Sulhnu awm thei te kan han dap ngial a, thil danglam engmah a awm in ka hre lo. Bakah an ri nuai nuai a, ngaihtuahna fim neih a harsa deuh. Kan la awm mek laiin, "Zawngkhawroi kha.. Khawi ka lo that ve nghal teh ang.. Amah kha ka fanu thattu an ni thei lo.. Rawn chhuah rawh u" ţap ţuau chung hian hmeichhia hian a ti tuar tuar a. Pu pawh a meng ve awk. Kan va chhuak a, thil awmzia kan zawh hma hmain, "Ka pu, saw nu sawn ka fanu kha a that a ni.. Amah ngei sawn a ni" tiin kan piah lawk bang kil lam chu a kawk a. Ka va hawi phei chuan ka ding ngil awt! 

Patling pali hian an lo thut hual a. A kut chu an lo phuar bawk a. A thu ngawi ngal a, min rawn melh ve chiah bawk. A hmel ka hmuh ruala ka danglamzia chu a hrethiam ve nge mak ti hmel a pu zawk a, mahse reilote a ni. Ni e, a hmelah chuan ka hmangaihi hmel ka hmu atin ni. Hmannia KTM rawn khalhtu ngei kha a ni. Engtin nge?!! 

Nu chuan eng nge nge a sawi duah ka hre lo.. Zawi leh fiah tak, vawt raiha, "Ani kha ka that lo " a rawn tih ri chu ka bengah a ring ta ber mai. 

Puin, "Tu nge a hming" tia a zawh chuan.. A bula patling thu chuan, "Isabella a nia.. Ka pu" a lo ti vat. 

"Engvanga ringhlel nge in nih? "

"Zodini a vit lai ka hmu a tia.. Anu sawn" 

"Engtin? "

Nu chuan, inhru chawt chawtin, "A rak ri ka hriat vangin ka va lut a. Kha zawngsennu khan a lo vit mek a ni. Pathian hmingin dawt ka sawi lo" a ti tuar tuar a. A chian hmel viau. 

"Isabella, a sawi chu a dik em? " pu chuan a ti hriam hraih a. 

"Chemte kha phawi ka tum zawk mai a ni. Ka pu, hetah ni lo.. Custody-ah thudik ka sawi thei ang em? " a ti hul hak a. A zâm lohzia ka hmuh chuan, tualthattu a nih ka ring lo. 

Isabella chu kan hruai chhuak ta a. Ruang pawh postmortem turin an phur leh ta phawt. Kei chu ka la mang vek. Engmah sawi tur ka hre lo. Station kan thlen chuan dar 1 a pel tawh. Ka chau nghulh mai. Motor atanga a rawn chhuk chiah chu ka hmaah tak a rawn ding a, chiang mangkhena min melh chungin, "Ka thah a ni lo.. Chu chu i ring tih ka hria" a ti zawi sap a. Lightin a hmel a chhun fiah bawk a. Kei chuan a hmela Ruatdiki hmel lo lang chu ka lo thlir ngawih ngawih thung… 

(Tawk leh rih 😁