Thinlung -6

THINLUNG.. (6)

Ziaktu: Toni Râlte

(Adds kha min click-sak khan, 10sec vel nghah a ngai ve thin aw.. Min click sak dawn vangin ka lawm e 😍😊

"Imma, Hei.. Thianpa, leh vung vung a che" ka thianpa Bena'n a rawn tih chuan, ka phu uih. Ni ngawt mai. Thil hi ka lo ngaihtuah leh vung vung zel. Bena chuan, "Rahsivengah chuan kan zuk kal lawk dawn em ni ang? Zuk enpui ve loh chuan" a ti nghal mawlh mawlh a. 

"A tha lawm. Kal ila" tih pahin ka tho ve nulh. Siamteii, Constable kan hruai bawk. Rahsivengah hian rukruk case-ah Enquiry lak a ngai a, Bena hi incharge a ni naa, a tak leh a mei ang maia inzui kan nia, kei ka lo awl lai a ni bawk nen, ka zu kalpui ve dawn a ni. 

Ka han kal ta duai a. He lai Lunglei hmuna ka thawh leh ka training inkara thil thlengte kha inhriat chak ve chu ka ring tho. Lungleiah hian kum 2 ka awmna a ni ta a, Chanmari-ah ka nu cousin te in hnuaiah ka khawsa ve a. An hnena awm pawh a theih tho nain, mahnia inbawl hran ve kha ka duh zawk. Mitmei ven ngai lam hi ka thiam chiah lo. Ka in luah chu a zau hek hawk viau, mahni chuan ka thawl angreng, mahse, thiante ho hi a khat tawkin an rawn lengin chaw kan ei khawm leh let let thin a, ka khawharna tam zawk pawh an ni hian min chhawk thin khawp mai. Lunglei hi chu zin ve zeuh zeuh mah ila, ka la chenchilh lutuk lo va, hetia ka han chenchilh takah chuan Aizawl ai mahin a boruak a nawm bakah a la thawl a, a thawventhlak zawkin ka hria. Ka tawmím angreng a, ka awmna vengah pawh hriat em em ka nei mang lo. Nula phei chu vawikhatmah ka la rim lo. Kohhranah inhmang hmanin kan hna vangin kan khawsa meuh lo bawk nen, ka inhawlh lar lo ve khawp mai. Ka in luahna te inah hian ka leng lut zeuh zeuh a. An ni lah an hulhar si a, an fate lah hmun dangah an awm nen, han kawm tur pawh an awm meuh lo. 

Rahsiveng chu kan zu thleng thla a, Bena bialnu te veng a ni bawk a. A phur hurhin ka hria. Tleu veng an tih lamah chuan kan inzui thla zel a. A hmun kan zuk thlen chuan, engmah an lo la khawih danglam lo va. A harsa lem lo. In mal ding a ni a, a awngrawp lam deuh tawh chu a ni. Assam type a ni. In neitupa chu a sam a ţuak pheuh pheuh tawh a, a mitmeng erawh a fiah hle. Min lo dawngsawng vat a. A nupui tur awm ka hmu miah lo. Mipa naupang leh hmeichhe naupang pahnih an lo awm bawk a. An nu niawm tak, la valai tak, thau lam, hmai mawm hmuar hi a lo thu bawk. Inneitupa chu Pu Ruata a ni a. Ani chuan thil thlen dan a sawi a. 

"Hei ka tu leh fate nen hian kan ni mai a. Nizanah khan Mami chhang chiah pasal hi a pum a na a, Rahsiveng tho hi an ni a. Mami nen kan va kal ve a, naupangho erawh TV an en a. Zan dangah pawh anmahni hian an lo awm ve mai zel. Kan makpa chu rin aiin a lo serious a, damdawiinah te kan han kalpui a. Kei erawh Mami hian, "Naupangho an ngaihtuahawm.. Va haw rawh" a tia. Kan makpa nauin min va thlah a. An lo mu tawh a. Ka mu ve nghal mai. Mami a lo la hawn si loh vangin kawngka pawh ka kalh ta lo va, Zing lam dar 4 vel a ni maithei, kawngka a inhawng rak a. Mami ni turah ka ngai a, ka lo ngaihven lem lo. Mami te room lamah a lut bawk nen. Almira hawn ri chu ka hria, ka muhil zui leh mai. Mahse, zing dar 7 velah Mami chu a rawn haw ta chauh si a. "Dar 4 vela lo haw kha i ni emaw ka tia" ka ti a. A phâwk hle nghe nghe. 

Chuan Hei Bawiha hian, "Apu, nizanah khan ka mumangah kan almira saw mi pakhatin a hawng a. A chhuak leh daih a" a ti a. A mangphan emaw a lo hmu ve a ni maithei. Rang takin Mami nen Almira chu kan va en a. Mami'n unit hruaitu te zara kawngba sahna tur a contract vena sum zawng zawng chu a bo a bang awm loin a lo bo fai leng mai. A vaiin Nuai 260000 vel a niawm e. Zep thu a cheng lo, kan lo fimkhur lo deuh bawk a. Hetiang inrawkna hi kan la tawng ngai meuh lo va, rawk thamah tumah hian min ngaih kan lo ring lo bawk nen.. Mami hian niminah khan bank atangin a han lachhuak ve chauh nghe nghe a. Rilru a hrehawm khawp mai" a ti ta charh charh. A fiahfai khawp mai. Almira te chu kan han en a. A kawngkhar pawn lam an kalh lo va, safe erawh an kalh a, chabi lah Mami chuan a ak daih bawk si. Eng chabi tak hmang ang maw.. Kar chhiatna a awm lo va, anih chuan chabi pangngai hmangin a hawng a nih a rinawm. Bena chuan thla te an la ve luklak a. A hnemhnanpuiawm viau chu ka ring hran lo. 

Mami chu thu a han zawt a. "Bank atangin sum i la chhuak tih hria an awm em? " a han ti phawt a. 

A ngawih vung vung hnuah, "Awm ti ila, kan makpa nau Rina ka han inhruaitir a. Ani sawn a hre ve ang a, chubak chu kan chhungkua a ni mai. Unit hruaitu te an ni leh bawk ang a" a ti ta a. Rina chu kan target phawt mai loh chuan. 

Pu Ruata chuan, "Kawngka kan kalh lo tih leh nizana kan makpa vanga kan buaina hria chu an nih ngei a rinawm" a lo ti ve khauh a. Rina chu a rinhlelh hmel riau. Rina address te kan han la a. Mami erawh chuan, "Rina chu a nih ka ring vak lo. Tlangval fel tak a nia.. Kan dinhmun a hre ve vek bawk si" a lo ti a. Mahse, kan rin ber te hian min lo bum thei nasa a. Tumah hi rin bur rih loh tawp mai hi a him mai. 

Bena bialnu Lucy te inah kan peng kawi a. Thingpui sial tawk min lo lumsak. Lucy nen hian kan inhre tha ve tawh viau. Nuthlawi fa pakhat nei a ni a, hmeichhe thian ka nei ngai mang lo va, Lucy hi a hmasa ber a ni maithei. Hmeichhe fel tawp chu a ni vein ka hria, a zau a, mi harsatna a hrethiamin engpawh sawipui ila a lo ngaithla thei vek a, tumah han biakchhiat leh i a nei ngai hek lo. Nuthlawi anih vanga han zuamawm emaw han sihhnipna lah a nei mang hlek lo. Bena pawh hian duh hleuh hleuh tak a ni. Bena ten in an la sa rih a, chuvanga la innei lo mai pawh an ni. Bena chhungte lam pawn an iai hauh lo. Amah Kan Bena pui roh hi zu nan ina han ruihsual zauh hi a ching thin a. Chutiang ni loah chuan mi fel leh zaidam, fiamthu duh tak a ni. Lungleia ka awm tirh ata kan la inthlah ta reng reng lo. Thian dang nei nual mah ila, Bena nen hi chuan unau ang maiin kan inzawmna a tha a ni. 

Inrawkna chungchang vel te chu kan sawi a. Lucy chuan, "Rindan neih thiam a harsa, an khawngaihthlak khawp mai. An harsa ve angreng sia, bakah khang pawisa lah kha an ta a ni bawk si lo.. Hlawhfa an lo ruai hman tawh bawk si" a ti ve luam a. 

"Rina chu i hre ve hrim hrim em? " Bena chuan a ti a. 

"Hria ti ila, ka hrechiang lutuk lo, kan awmna a inhlat deuh bawk a. Tlangval awm ve mual mual ni maiin ka hria.. " a ti mai a. 

Lucy nu vawk chaw zawng pawh a rawn haw a. Vawk hi sawm pahnih lai an vulh a ni. An compound a zau tha bawk a. An la hlawk ngawtin a rinawm. Min lo be ve chul a. 

"Mami te chu an vanduai ngawt mai. Mansak ngei ngei teh u" a ti ve luam a. Kan man thei ang nge maw.. 

Kan haw lam, Station kan thleng tep tihin Thana thlang Bridge bul one way atang chuan KTM 125,Duke, Pawl lar vât hi a rawn dawk zawk mai a. Tlema tlemah kan insu lo chauh. Bena a rum nghut. Bike pawh chu a ding a, a rawn hawi a, Siamteii chuan, "Hmeichhia a la ni zui! " a ti sap a. Ka va thlek ve zauh a. A hmel ka hmuh rual chuan ka thlawk dawn emaw tihturin ka insangmar thei nia mawle.. Mahse, Bena chuan signal a pe zauh a, a tlan zui leh nghal. Ka thlir liam vawng vawng mai. 

"Hmeichhia te te, bike ka khalh ve e hi an tia.. Thiam ziktluak mang si lo" Bena chuan a ti hluk a. Tumah kan tawng lo. Ka rilru ka lo kawm leh daih. Kha hmeichhia khan ka nunhluiah min letpui leh vawn vawn mai. He thil hi ngaihtuah fo ka duh tawh lo asin. Ka duh tawh loh vanga Lungleia min sawn tura dilna thehlut pawh kha ka nia.. Mahse, min umzui zel zawng a nih hi mawle.. Station kan thlen hnu pawh chuan ka ngui vek. Inthup hram hram mah ila, Bena chuan min lo man thiam chiang. 

"Bro, i tha maw? " a ti sup a. 

"Ka hre lo" ka ti ta thlawt a. 

"Kha nu vang kha mi? " a ti ta a. Ka mitah min melh ran bawk. 

"I hria em ni? Kha nu kha" phawk zetin ka ti a. A lu a thing, "Kha vang khan alawm ka kaltir vat. " a ti a. Sawi tur ka vân hle. Bena hian ka nunhlui leh ka thiltawn engkim a hre ve vek a, a chhan chu engkim ka hrilh awmchhun a ni miau a. Vawiin ang reng renga ban vat vat ka chak hi a la awm awm lo ve. Kan ban rualin chak zetin ka inkhalh haw a. In ka lut chu ka zawi nghulh mai. Eirawng pawh ka bawl peih ka ring lo. Kiki-a ka call a, "U Imma, i duh ang chi a awm lo. Stag leh Rum chiah a awm.. " a rawn ti nghal var a. 

"Stag chu a ni mai.. " ka ti nghut. Blenders leh teachers hi kan hmuh phakah a class ve deuh a ni chauh a, chung pahnih bak chu ka la ngai lo va, Kiki pawn a hrechiang tawh a ni. Sehhmeh tur, A nu te hotela bawngsa roast ka chah tel bawk. Zanin chu nunhlui ka'n chhui leh lawk mai ang e aw.. 

Dar 9 bawr velah chuan ka thil in pawh a thawk chho tan a. Ka room bathlarah chhuakin chhuatah ka thusawp niaiah a, Ral lehlama veng thenkhat eng uar chu ka thlir vawng vawng a. Ka ngaihtuahna leh thinlung chu kum 4 liamtaah khan a let leh ta vawn vawn mai.. 

PTC-a ka awm chhung khan buaina leh harsatna em em ka tawk lo va. Training kha a hautak ka ti lem lo, hrehawm ber zawk chu Ruatdiki ka ngai kha a ni. Mahse, thla 4 vel kan awm hnuah zan lamah a ruk deuh reuha phone khawih theih a ni tih ka hre ve a, ka chhungte ka chah ta vat a. Min lo kan tumin an rawn keng ta ngei a. A zia ta viau. Call chuan kan inbe mang lo, text msg kha kan type nasa dun thin mang e. Mipa hi chuan thu type te hi kan ning viau thin a ni ngai a. Lung a len tak tak chuan a lo ninawm awzawng lo. A voice msg, rizaia inlukhup chunga ka ngaihthlak thin lai te kha.. A aw no nem leh tliang ral mai ngaihthlak ninawm lohzia kha.. Ani pawn min thlahlel ve takmeuh tih ka hria. Han inbiak zeuh zeuh theih takah chuan lunglen a nep tan a. Thla kua pawh chu kan hmangral chho ve ta chu a ni reng mai. Sawi hmaih loh tur chu, Hminga kha ukil ten theihtawp chhuahsakin an bail a, a la court ve zak zak erawh a ngai thung. An han chenho leh takah chuan neuh neuh a tam telh telh a, Awmteii leh Nu Puii lah an inmil hlawl tawh bawk si lo. Nu Puii chhungte lam an rawn hrág chho ve zel bawk si. An buai ta nuaih mai. 

Mahse, Ka pa te lam an tawlh duh bik si lo va, ukil lam nen an han ţan tlan takah chuan; In leh lo chu Hminga kutah dah a ni ta a ni. Ka pa nau chiah Pa Hmuna hi ka pa te zia nen a zia a dang deuh a, Nu Puii a ngei ve lutuk kha na khek khawkin a tawngkhum a ni awm e. "Uire i ni. Uire.. Tichung chuan kan la inzawmpui chein kan nau vangin kan la chhawmdawl che a. Hetianga min rul let duh hi i tenawm ka ti.. I pasal te in lamah va inbengbel rawh u" a ti deuh hrep a niawm e. Chu chu la nain, Nu Puii chhungte lamin an hruai chhuak ta a. U Rema te in lamah pawh awm chuang lo chuan, Nu Puii nuta te in hnuaiah U Rema fate nen an khawsa ta a ni. Hna nei a nia, an harsa chuangin a rinawm loh. Hetiang buaina hi ka pa duh loh leh zahthlak tihzawng tak a ni a. Mahse, Hminga te nupa tan a tawp thleng an tan ve a ngai miau si a ni. Hminga te chhungkua chuan in chu an luah ta a. An hlimin nuam pawh an ti viau. Nu puii te nen erawh an inbe chhunzawm vak ta lo nge, an boruak a reh rih khawp mai. 

Training kan zo ta a. Kei pawh ka zalen ve ta deuh e. Ruatdiki nen kan han inhmu zet chu sawi thiam ngaihna awm lo khawpin kan inthlahlel a ni. Kan inhlat thei lo a ni tawp. 

"U Imma, ka lo rinawm reng ania aw" a ti sar sar a. A mitmeng fiah kak, zahawm em em chu ka melh vawng vawng a. 

"Kei pawh ka rinawm.. Ka ngai lutuk che a ni" ka ti a. Ka han fawp leh vawng vawng a. Duhthawh luat pawh a awm thei meuh lo. Mahse, ka sava note hi a hun hma chuan ka khawih phal si lo. Insum a va har thin tak. Chutia veng khata tlangval leh tleirawl inngaizawng ta chu kan lo inthup seng ta bik lo va. Kan chhungte ve ve lam pawn an hre ta thuai a. Ka nu chuan, "An chhungkaw thlah misual tak an awm lo. A fel ang. Nghak puitling hram hram la" a ti a. Ka pa erawh chuan, " Kan cho phak êm dawn em mawni le.. An khawsak a tha si" a ti thung. Chu lam buaina chuan min tibuai pha lo. Ruatdiki neih theih hun ka thlir a, ka nupui nihtira chhungkaw din chiah ka suangtuah thin. Kei ka hnaah ka kal nitin a, ani college lamah. Kan inhriat pawh takah chuan zan lam ka hman hunah ka rim ve ta zeuh zeuh bawk a. A chhungten min be chhe lem lo. Ruatdiki sawi tawh angin a pa erawh a tar lam fa a nih deuh vangin a fanu hi a veng viau a, hmingchhiat leh mualpho a hlau ve bawk a, a lo awm ve chuan tlem chuan a nuam lo ve deuh thin. Mahse, ani pawn min huat vang ni loin a fanu a ven vang a ni tih ka hrethiam tho. Boruak a tha a, engkim chu a fuh vel vek a ni mai. Christmas te pawh an inah kan hmang dun a. Lateii anga pawn lam leh thiante nena ruih dual dual lam kha a lang ve lo va, harhfimin thianghlim takin kan hmang dun a. A thiante rawn tel ve pawn an rilru a la thianghlim em em a, kei meuh pawh ka inhmu serafim ve lek lek zel. Kum thar kan han chuangkai a. Atea te chhungkua pawh an la hlim viau. Kuri a lo fel riau a, Atea nu nen an inzawm tha khawp mai. 

Ka rilruk dan chuan Ruatdiki hian college zo se, neih mai ka duh a ni. A chhungte rilru erawh ka hre lem lo. Ani Ruatdiki pawn hnialna a nei lem lo. Engtin nge kei hi min duh ve em em theih tih ka ngaihtuah fo mai. Kei aia hmeltha leh hausa zawk a hmu nasa dawn si. Chuvang chuan neih vat ka duh. Kan hna lamah ka pa thu angin IGNOU-ah MA ka zir tha leh a. Ka pass hunah ASI - a luh ka tum dawn ani. Ta tang chuan SI, chutiang zelin Inspector.. A hminga hlawh han neih takah chuan sum hlutna pawh ka hre chho ve ta zel a. Mahse, Ka duattei tan chuan engmah ka ui ngai lo. Thil ka leisak tam narawh. Tul a ti ngai lo nain nuam ka ti miau si a. Ani pawn a pawisa khawl ve atang ten sana te min chahsak ve a. A hlu thin takzet. 

"Imma, i dam maw? " a msg ka hmuh rual chuan ka ner sawk. Lateii a nia! 

"Dam ve tawk tawk, nang? " ka va ti a. 

"Dam meuh lo. Mi pawh i rawn kan duh lo va" a la rawn ti ngam! 

"I dam lo tih pawh ka hre hleinem. Pasal i nei maw ka tia" ka va ti a. A chanchin hi Atea'n a sawi ngai bawk si lo va, ka ngaihven lo nasa bawk si. Ka lo hre lo chhiava a ni. 

"Ka nei hleinem. Nei angin min lo sawi ve ringawt anih kha.. I ngaihawm hle mai" a rawn ti a. 

"A va lawmawm ve.. Nang pawh i ngaihawm" ka'n ti ve rawk a. Ka ngai lem si lo. 

"I bialnu pawh a chhe lo khawp mai. A la naupang deuh tih mai loh chu.. " a rawn tih chuan mak ka ti deuh. Ka chanchin a la ngaihven reng zawk em mawni dawn ni. 

"Nia, kan innei tep" ka ti a. 

"In inneih ka ring lo.. " a rawn tih chuan, "Engvangin" ka va ti a. 

"Holam taka kan tawp kha ka lung a la awi thei hlawl lo.. Ka rawn kherh leh dawn che" a rawn ti ta mai. Lateii ka hriat tirh lai nen chuan danglam tak a ni. 

"Tum buai lo mai rawh" ka ti a. Chat ka clear nghal daih. Ka reply tawh lo. A hnawksak ka phal lo. Ruatdiki nen kan inkarah hian tumah an tlakzeh ka phal lo bur. Ka thiante pawn mak an ti! Sex kan la hmang miah lo phei chu mak an ti zual! A mak ve bawk a ni. Mahse, mipa hi mipa mah ni ila, hmeichhia hian min lo kaihruai thui thei khawp mai. Hmeichhe fing phei chuan an thunun zung zung thin hi maw.. Tiang kha a ni mai. Bakah ka vannei a, thu tha hrilha min zilhhautu nu leh pa ka la nei a, an thusawi tam tak zawm loh nei fo mah ila; zawm chin leh thinlunga hriat kar chin kan lo nei ve a. Khang khan kal sualna turah min veng ve bawk a ni. Tin, mahni han infak ta lawk ila, Hmeichhia hi nawr luih ţawng ţawng ka la nei lo. An duh loh chuan tihluiha sual luih ang ziazanga nawr hi ka chapona hian a tlin ve lo ka ti mai. Mahse, an duhthlanna ngeia ka tan an inhlanna hi ka zahsak a, an virgin leh virgin loh lam ka va care lem lo. Tumah ka hmusit zuiin han entleuna ka nei ngai lo ti ila Lateii kha chu a dan a dang tlat a. Mipa dang rilru pawh a nih ve tho ka ring. Inthup nun hi kan ngaisang tehchiam lo va, innocent ber niawm fahrana kan bula an chettlat a, lang lo lama an lo chet nat daih te hian kan duh loh dan deuha rilru put chang chu a awm. Inzahtawn thiama inrintawnna hian nun chu a thuam famkim mai zel e. Chu nun chu Ruatdiki nunah hian ka hmu a ni. A hmelthatna leh duhawmna chu thuhran daih. A ze duhawm tak, inla no ni si lo va, no si.. Puitlinna rilru la pu phak si lo va, a inla puitling ve thinte hi a lawmawm riau a. Tin, a rinawmna hi ka ngaisang bawk. Ni e, zep thu a cheng lo, ka training chhung pawh khan tihtakzeta ngaizawngtu a hmu le lu e. Mahse, "Bialpa ka nei a" tih chhanna a pek vek zel avangin tu'n an beisei zawm ngam lo mai. Hmeichhe thenkhat chu bialpa nei reng sia mipa dang biak ruk nei tho, beiseina siamsak tho si leh chhanna tak tak pe ngam si loin midang hun an khawhralsak thin. Mipa lam pawh kan ni tho. Mahse, mipa hi chu mipa ka nih vanga infak lam ni loin hmeltha kan tihzawng tak leh duhzawng tak pawh bialnu nghet kan neih chuan kan enliam thei mai. Han biak ve zauh chang chu nei mah ila; hmeichhiate angin beiseina han siamsaka han biak ngawrh hi a tam zawk chuan kan nei mang lo. Mipa lerplerh piah lama hurherh zual te hian zung thei tawh phawt an bawhzui a ni mai. 

"He nu hi tu nge? " Mut hma deuha a lo thawn chu ka en a. Ka rum nghut. Ka rin aiin Lateii chu a che rang mai ka ti. 

"I bialpa kha ka ex.. Keimah min theihnghilh theih nan a ngaizawng mai mai che" tih thu a lo thawn chu niin. A rui mawni dawn ni. 

"Lateii a nia, ka ex a nih hi. Block rawh. A huangtau zual ang. Kei pawn ka block ang" ka va ti a. 

"Aw le.. Pu" a rawn ti. Thu te hi a awih thei sia.. Sawiselbovi a ni ringawt e. Kei pawn Lateii chu ka block. A tlawmthlak naa, kawng dang ka nei rih lo. A ninawm dawn tlat. 

Mami a lo haw dawn a, ka pain a zuk hmuak. An sumdawnna a kal tluang viau naa, a hriselna lam dinhmun a tlahniam tlat mai a, chawlh a rawn hmang lawk dawn aniawm e. Lydia a phur nasa mai. A awm ve bawk e. Ina ka hawn chuan ka u pawh chu a lo thleng tawh a. A cher kuam mai. A thu bawk sia. A zuk dam lo hrep maw tihtur a ni. Lydia nen an insi leh reng tawh mai. 

Tshirt leh lukhum min lo hawn a. A man a tlawm lem lo tih a lang. Ka lawm ve khawp mai. Zanriah kan ei laiin Pa Rova bawk a rawn lut leh hlawl. Ani hi kan inleng reng reng thin a ni a, a nel pawh kan innel tawh viau. 

"Mami chu i rawn tluang maw.. Pasal neih hma chu chhuk tawh suh. Nei rual i ni tawh, " a ti lung lung a. Ka u pawh a nui ve tawp. Mama nen khan an la ni reng a, an rinawm dun tlauh tlauh khawp mai. 

Pa Rova bawk chuan, "Kan thudang alai chuan, Hmanni kan nula inawkhlum kha a thla an hmu thin a niawm a. A hmutu te hian dawt an sawi nge kei ka hmu ve chak mang e " a ti chuar chuar a. An sawi thawm chu ka hre ve rei ruai. 

"A va mak bawk awm ve mawle.. Kha nau kha engvanga inawkhlum nge maw a nih chiah le" ka pa chuan a ti a. 

"Sawi dan a tam, thudik tak tuman an hre lo. Ngaihzawng vanga ngai an tam ber chu a nih kha mawle" Pa Rova chuan a ti a. Thleng an seng fel mek. Ka nu chuan, "A pawi em mai.. A hmeltha reuh asin mawle" a lo ti ve a. 

"Hei Kan Imma bialnu Ruatdiki te upa ber dawttu nen sawn sawi an kai deuh chu a nih kha.. An inthen a tuar thiam lo kha a intihlum ta niin an sawi a. Mahse, thudik a nih leh nih loh hriat va ni suh" Pa Rova'n a tih chuan, min nghawng ve deuh. Ruatdiki'n engmah a sawi ngai si lo. 

Pa Rova sawi tak azarah, Ruatdiki nen kan inbiak chuan, "Saroni kha a thla a hrang an tia.. " tiin ka sawi hmawr hmuh a. 

"Awii nia, kha kha maw.. Ka hlauhzia hi. Au Zuala vanga inawkhlum angin an sawi bawk sia.. Au Zuala pawh hi a ngui vek mawle.. A roomah a tawm reng zel" a rawn ti ta a. Zuala u U Muana hian nupui a nei ve tawh a, fa erawh an la nei lo. A nau chiah Zuala hi a tlangval chhuah tirh khan nupui a ru ve a, mahse, an la naupang em mai tiin an pawt then a. An inthen hlen zui ta a, an unauah chuan Zuala hi a dang ber awm e. A te deuh a, a hâng bawk. Tin, a sual ve thin a, sual tihah zu han ruih te, mi han sual te a ching ve thin. Tun hnuah erawh Kohhranah pawh a inhmang chho viau tawh. Zuala nau chiah Mapuia erawh kan inkawm ve zeuh zeuh ka tih kha. Zau tak, fiamthu duh tak, ngaihzawng lam pawh ngaihsak mang lo a ni. Ruatdiki nen pawh an inngai thin viau. Inchhangbung tih takah. Chumi zan ka mu chu mumang mak deuh ka nei ta a. Pa Rova thusawi kha ka mangphan nge pawh ka hre lo. Saroni nen hian kan veng field- lam hi kan lo pan dun a. Scarf hring hi a lo vawr a lo vawr a, "I va harh tak" ka lo ti hluk. 

Field thlen hma kawng zau laiah min dinpui a. 

"Hemi ka scarf hi ka theihnghilh daih a. Ka hmangaih berin min pek hmasak ber a nia.. Ka tan a hlu em em a ni. I bialnu kha lo hrilh la, scarf kha an inah ka theihnghilh daih si a, min lo pe hram rawh se.. " a lo ti a. Mumanga thuchang, mak pawh ka lo ti lem lo. "Ka lo hrilh dawn nia" ka ti a. Ani chu field lam panin a kal hmasa a, ka um phak thei hlek lo. Field chu kalpelin thlanmual lam a pan ta a. Ka lo enzui ringawt. Ka thangharh ta nghal bawk. Mak ve mai mai tak chu a ni. Saroni nen hian kan inbe ngai mang lo, hriat zawng kan inhre ve tih mai a ni. 

Kan hna thilah buaina neuh neuh nei thin mah ila; kan chingfel leh zung zung zel a, a zia phian. Chhunah Ruatdiki nen kan inbiak chuan ka mumang chungchang chu ka sawi ta a. 

"Chu chu lawm.. Hmaichhana hrilh che ka chak a, ka la sawi lo mai mai. Nizanah U Saroni khan min lo tlawh aniang ka ti mai. Au zuala roomah a ri a ri a. Ka hlauhzia chu aw" a rawn ti hlut a. Ka khawngaih reuh. A dawih ve sia. Zanah an inah ka leng dawn tho a, chuta sawi atan chuan kan khek ta a. 

A pa a lo awm lo hlauh a, ka thaw huai mai. Insi chetin kan thu dun a. An monu Tei nen pawh kan inkawm thei viau tawh a ni. 

"Nizan chu maw.. Ih, hei Au zuala nen kan room a inhnaih em khi.. zan laiah ka harh hlawl a. Au zuala room kawngkhar niawm tak inhawng chik ri ka hre zui a, ka mutchhuak a bo vek. U Saroni hrân thu vel ka hre tawh bawk sia.. Chuan ka mu meng reng a. A hnuah Au Zuala hi a rawn rak ta thawt a, ka phu chiang tawp.. Mahse, a reh leh daih. Ke pen ri ang deuh ka hria a, Au Zuala anih ka ring a, mahse, ka room leh a room inkara plant kan dah bulah sawn ke pen ri chu a tawp ta a. Hlau chung chungin ka tho a, ka va en a. Tumah ka hmu lo. U Saroni a nih loh takah. Zingah Au Zuala ka zawhin a thawh loh thu a sawi bawk si" a ti sep sep a. 

Ka mumang kha ka hrilh nawn leh ta vek a. A bu nghat nghat mai. Chutih lai tak chuan Zuala chu a rawn chhuk a, "I lo leng ni maw? " tih pahin a nui sâng a. A mitmenh eraeh a ngui riaua hriatna ka nei. Ruatdiki insum thei tawh lo chuan, ka mumang chu a lo hrilh ta zung zung mai a. Ka lo îp deuh. Zuala chuan a chal a chuar leh nang thin a. Min rawn melh leh zauh zuah bawk. 

Chutah, "Chu ngei chu a nih dawn chu.. Zantin thinthia min mutthilhtir thei lotu chu.. A scarf chu ka roomah a awm reng alawm.. Mahse, engtin nge ka pek ang? " a ti ta a. 

"A thlanah va dah chi a ni ang em? " ka lo ti a. 

"Ka va dah nghal ang e" tih leh in chunga chhoh a rual nghal. A zan a zan chuan a va dah dawn niawm tak a ni. 

Ruatdiki pa a lo hawng a, Ruatdiki chuan thil awmzia a lo hrilh ve nghal. Mak a tih ve hmel hle. Min rawn melh vung vung a, ka rin loh lutukin, "Imma, Aruati hi i hmangaih em? " a ti ta daih a! Kan thusawi nen a va inchawbe lo tak. Ka zak ve deuh bawk a, ka hamhaih hle. 

"Aw ka hmangaihin ka hria" ka ti ta ringawt a. A nui suk.. "A pawi ngawt mai" a ti rum hak a. A kalsawn nghal. Ruatdiki nen kan inmelh reng ringawt. A awmzia ka va hrethiam lo tak. Eng chu nge pawi ta ang le? Amah Aruati tak pawh a hrilhhai. 

Khami zan atang khan ania boruak a inlumlet chhoh tak ni. Ka beisei phak loh lam atanga lo kal chhum dum chu vai kian ngaihna ka hre lo a ni. Aruati nen kan boruak a that reng rualin, A pa Pu Thanliana chuan buaina a lo nei tlat si. Chu buaina chu keini pahnih inhmangaihna kalkawngah hnawksak a ni ta si a.. 

Ni e, Pu Thanliana hi contractor a ni a. Tun hnuah a bansan tawh. An nu erawh sawrkar hna thawkin, a la pension lo deuh a. An khawsak a sang ka tih tawh kha, an in leh lo pawh kan vengah chuan a ber a kai maithei. Pa tha leh fel tak, thilphal tak a ni tih bak ka hre lo. Ka lo notice ve vak lo bawk nen. Aruati nu Pi Dini pawh nu fel tawp, thenrual ngah leh an kohhranah pawh langsar chin a ni bawk. Hetia ngaih mai chuan kan cho phak chu an ni chiah lo deuh awm e. Mahse, chu lam chu buaina a lo ni awzawng lo mai a. Kan pian ve hmaa inmûng tawh thurûk rapthlak tak vang zawka buaina tawk kan lo ni zawk. Ni e, Thla 3 vel a liam leh meuh chuan, Aruati nen kan zinkawng a bumboh ta hle mai. Tihtakzeta a pain kei min then tura a tih vang a lo nia! Ka rin aiin thil a thleng rang bawk. An ina ka len a phal tawh ngai loh vangin Teteii hmang tangkaiin a rukin kan inhmu zeuh zeuh a. Zan khat kan inhmu chu, "Inru mai ang hmiang" a ti thawr mai a. Ka phu zawk nghe nghe. 

"Eng nge awmzia? " ka ti vat a. Ngui zeta min melhin, "Apa hi a mak tawh lutuk, a danglam tawh. Nangmah vang hian min hua a ni" a ti ta ţiau a. A hmaa a pa nen an buaina min hrilh zauh zauh tawh vangin min ţhawng lutuk lo. Mahse, hetia Aruati pa a awm thut erawh mak ka ti ngang mai. 

"A mak ka ti. Eng nge min duh loh chhan ber? " ka ti a. 

"Ka hre lo. Imanuela chu i nei thei dawn chuang lo, in kal thui hmain then zawk rawh' tiin min vau tawp. A chhan ka zawhin, 'Ka duh lo a ni mai' a ti tawp bawk si.. Kei chu a hrehawm em mai.. " a ti sep sep a. Nghet taka kuahin a chhipah ka fawp a. 

"A chhan kan hriat a ngai a ni. Keini aia inhausak vang hi mawni le.. " ka ti a. 

"Kan hausa zawk kher lo. Kei pawn a chhan hriat ka chak" a lo ti ve vat a. 

"Nih chuan inruk chu i duh a maw? " ka ti zawi sup a. 

"Ka hre lo.. Ka la naupang ve bawk sia.. Apa tihnat hi nuam ka ti bawk si lo" a ti niah niah a. A rilru tur chu ka hrethiam. 

Kan inthlah dawn te chuan min ngai khawp a, a kal thei lawk lo. Ka ru haw mai dawn mawni ka ti hial nghe nghe. Mahse, amah zawkin, "Nghak leh phawt ila, a chhan hriat te ka lo tum ve bawk ang a.. Kei chu i tan ka rinawm reng dawn " a tih takah chuan, ka pa min zilhna fo thin, "Biak In hawng ngeia inneih hi a hlu a.. Tihhlawhtlin ngei tum hram rawh u" a tih kha ka hrechhuak a. Ruk thawt thawt pawh chu thil tha ber niin ka hre lo. 

"Aw le.. Kei pawh ka rinawm reng aw.. Hahdam deuhin awm rawh.. Ka hmangaih che" ka ti a. Kan infawp ngawih ngawih. 

Mahse, kha mi zan kan inhmu kha a lo hria nge, ka hre tawh bik lo. Aruati chu a khuahkhirh zual ta a. A nupui leh fate ngei pawn an hriatthiam phak bakin a che ta tlat mai! Pa tumtlang tih takah min pawh ţhen a tum zia chu, Aruati pawh college kal takngial pawh a phal ta lo. Kar khat chhung chu a reh ta tlawk tlawk. An chanchin thenkhat Teteii atanga ka hriat ve theih vangin ka buai hle. Chinfel ngaihna ka hre bawk si lo. Awmhmuna ka mangan thinzia kha. A phone pawh a pain a kawlsak vek avangin kan inbe thei si lo. Zan khat ka mangang tawngkhawng Chu Aruati te in lamah ka phei ta thawr mai. 

A nuin kawng min lo hawnsak a, a phâwk hru mai. 

"Aruati ka hmu duh" ka ti hmiah. Tei a rawn lang ve nghal zat a. Min lainat hmel ka hmu thei nia! 

A nu chu a tawlh hnung hrat a. " Imma, khawngaihin" a ti tham chhal a. 

Ka tum a ruh sawt thung. 

"Khawngaihin min hmuhtir rawh u" ka ti leh a. Inchung atangin Pu Thana a rawn chhuk thla mek bawk. Kan bul a rawn thlen chuan, "Khaw nge Aruati" ka lo ti hmiah. Pawisak ka nei tawh lo a ni ber. 

A mitmeng thuk zeta min melh ran chungin, "Imanuel, Ruatdiki chu kalsan tawh rawh. Nang leh ani chu khawvel dangah zawk aw" a ti hniam ruih a. 

"A chhan tal ka hre duh. Hetiang teh thut hi ka hrethiam lo. A chhan ka hre duh a ni" ka ti khawng ve tlat a. 

Pawi tih hmel fe hian, "A chhan chu ka fanu neihchhun tan hian i tling tawk lo a ni.. Ka thu awih la, kiansan rawh. Ani pawn kalsan tur chein thutlukna a siam tawh e.. " a ti vawt ta raih a. A mitmenga eng emaw rawn lang zawk chu ka hrethiam lo. 

"Ni lo, amah ngei ka bia ang. " ka lo ti tuar a. Zuala pawh a rawn lang ve nghal. Min khawngaih hmel a pu ve tho mai. 

Inchung kailawnah chuan a rawn pen thla chhat chhat a. Kawrfual hring par chiai hi a ha a, a sam a thlah hniang bawk. A dawldang riau a, a hmelah chuan hlimna chambang pakhatmah hmuh tur a awm lo. Ka hmaah tak a rawn ding a, nitmeng â riaia min melh chungin, "U Imma, ka nei thei lo che a ni. Min kalsan tawh rawh. Ka hmangaih tawh lo che. Ka pa duhzawng mipa chauh ka nei dawn a ni" a ti ta a. A aw chu zawi teh mah se, ka bengah a ring fô, hriatchhuah a nih thin avangin. 

Ka zawi hnawk a ni ber. Tei'n veranda thleng min thlah a. Zawi sap hian, "Hrethiam hram rawh. Mipa i nih kha aw" a ti a. Lehhawi tawh loin ka kal ta vang vang. Ka hmangaih hringtupa in min hnawl chu na ka tih rualin Aruati'n khatiang thu ka hmai hma ngeia a sawi kha ka kehchhia a ni ber mai. Ina ka lut pawh ka tawng thei lo a ni ber mai. 

Ka nu chuan ka awm dan a lo hrethiam chat mai. "Mama, i hmel a va dik lo ve. Eng nge thleng? " a lo ti nghal vat a. 

"Nu, engkim a tawp" ka ti ta thlawt a. Ka kun chal bawk. 

"Ruatdiki chungchang maw? I va hmu thei lo em ni! " a ti a. Ka chhungte hian engkim an hre ve vek a ni. 

"Hmu e. Kalsan turin min ngen a ni" ka ti sup a. 

"Khai aw! A va mak dawn ve.. A pa in a vau vang a ni lo maw? " a tih chuan, ka pain, "Maithei.. Mam, mipa takin le.. Hmeichhia pakhat chauh an awm hleinem.. " a lo ti ve a. 

"Mi dang an awm. Ruatdiki ang an ni ve lo" ka lo ti hul hak. 

Ka nu sailo rilru lian a rawn chhuak ta nge ni dawn ni.. "Ru rawh" a rawn ti hmiah mai.. Kei tak pawh ka phâwk. 

Ka pain, "Teh ngawt a che.. Ru hlek lo vang, i ru a nih ngat chuan, i pa hi i rin aiin ka danglam ang.. Hre reng rawh" tiin min rawn melh vawt raih mai a. Ka bo hû mai. 

Ka nu chuan thawk la halhin, "A ni zozai tawh lo ve.. Engkim hrilh rawh. Ka fapa hi nangni hun kal tawh vanga hetia a nat hi ka phal reng reng lo mai. I hrilh lo anih chuan, keiman ka hrilh dawn" a ti ta a. Ka pain ring zetin, "Ngurchhingpui" a ti tuar.. Mahse, Ka nu lung a lian si.. "A tawk.. Ka sawi dawn.. " a lo tihsan a. 

Ka nu leh pate chu ka melh tawn sek ringawt. Ka pa chu a thu hnawk a. A hmai hupin a kun ta tlawk tlawk a.. 

"Mama, min ngaidam teh khai.. Hetiang tur a ni tih hria ila, khang thil kha a thleng lo tur.. Ka tihdanglam theih loh thil vanga ka rilarah ka fapa ngei i kehchhe lai hmuh hi ka duh dan a ni bik lo asin.. " a ti ta vawng vawng a.. 

"Engkim ka hre duh" ka lo ti ro hulh. Ka hel vek, keimah chu, ka beidawng nghal ngawih ngawih bawk. 

"Aw le.. Engkim chu ka'n sawi ang e.. Nguri, mami va ko rawh. Hre ve rawh se" ka pa chuan a ti a. Ka nu a kal chhung chuan boruak chu a reh tlawk tlawk mai.. 

(Thau a awl eee… lockdown hi 😢😂