Thinlung - 5

THINLUNG.. (5)

Ziaktu: Toni Râlte

Hminga te in kan zu thlen thlak chuan an lo awm deuh thup a. Police te pawh an lo awm tawh, Hminga chu a ţang nasa ngang mai. Mahse, report a lut miau si a, an hruai lo thei lo. Ka pa bulah, "Pa, tual ka that lo, nangni tal chuan min ring r'u aw.. Engvangin nge naupang ber kher lehnghal chu ka thah ang.. Ka that lo" a ti mawlh mawlh a. Ka pa pawn a va din hnaih a, "Ka ring che alawm. Lo lungngai lo phawt rawh, thuawih takin han awm la; ka lo buaipui vek ang" tiin a thlah a. An hruai chhuak ta. Awmteii a ţap pur a, an fa a la sen si, ka khawngaih takzet. Thil thlen dan teh phut chuan min tihamhaih zo a, chet lak dan tur emaw ngaihtuahna han sen dan ka hre lo. Ka pa lo betu kha Nu puii te thenawm Pa Rka a ni a, thil a lo hresual ve deuh bawk a, Rehhlum ni loin, Tukverh atanga namthlak angin Hminga chu an lo puh zawk a lo ni. Ani hamhaih ve tawh si khan rehhlum angin a lo hria a niawm e. Ka pa kutah engkim a innghat a ni mai e. Mi nawlpui an ţin hnuah ka pa chuan thil thlen dan a zawt ta a. Awmteii chuan insut hlawp hlawp chungin, " Zingah khan an unauin an lo phei leh a, ka nuin chaw ei ve rawh se a tih vangin chaw pawh ka chhum kep a. An inkhualtelem leh a, nizanah U Hminga hi inkhel a en rei vangin a la mu a, ka kaitho duh lem lo. Dar 8 velah Kimkimi kha kan roomah a lut a. Nidangah pawh an lut fo zel, ka hauh pawn a sawt lem lo. Ka make up te hi an lo khawih ve tawp tawp zel a, chuvang chuan kei pawh ka va lut ve vat a. Ka rin ang ngeiin lipstick a lo khawih leh a, ka hau nghe nghe. U Hminga a rawn harh a, mil lo sa ta ngang chuan, 'Kan roomah hian rawn lut tawh suh u. Nunphung inhre lo lutuk' a ti a. Kimkimi pawh a chhuak ve mai. Hetih lai hian ka nu te nupa chu thenawmte ar enin an chhuak a, tlaiah Pa Rema te chhung nen chaw eikhawm an tih vanga ar pawh va en an ni. 

U Hminga inthiar zo rawn chhuak chu bathroom bula bawlhhlawh bawm kan hun bulah sawn Kimkimi a lo thu a. Bawlhhlawh bawm kha a hai a, a hnawk nuaih nghe nghe. Ka buai deuh vangin ka la hau lo. A u zawk erawh a pa te roomah a awm. U Hminga bawk chuan a hau leh a, "I tifai thei mi? Dah rawh. Tifai vek rawh" a ti a. Roomah a lut leh mai. Tukthuan kan peih dawn hnai a, A u zawk chu a pate ko turin ka tir a. Kimkimi chu hetih lai hian tukverh thlanglamah a dak mek thung. Naute a tah vangin hnute ka pe leh sawk sawk a, U Hminga'n, "I tla ang e.. In harh lutuk hi chu aw" a tih ri ka hriat rual deuhthawin Kimkimi tla ri kha ka hre zui nghal. Roomah ka awm daih a, a tlak dan tak ka hmu lo. U Hminga'n, "Khai aw! " tih leh tlan chhuah a rual nghal a. Kei pawh ka va chhuak ve nghal. Ka nuten thawm an rawn nei nghal a. U Hminga'n Kimkimi chu a rawn pawm chho. A lu a thi a, nikhua a hre lo tih a lang. An buai ta nuai nuai a. Pa Rema u U Thiangi rawn phei khan, U Hminga chu kawkin, "I namthla a nih kha.. Lemchan tum suh. Kan hmu reng che" a ti ta ringawt mai a ni. U Hminga pawh a hawihai khawp mai. Chung chu thil thlen dan ka hriat theih chin chu a ni mai" a ti ta a. Ka thaw huai mai. Ka pa pawh engthawl hawk hmel a pu. An rawn sawi dan khan Hminga rehhhlum anga sawi a ni si a, a hlauhthawnawm ve bawk a ni. 

Ka pa chuan, Nu Puii te nupa a be ta bawk a. Chutah chuan a nia nu thenkhat ka ngaih dan a dan phah tak ni. Nu Puii chuan, "Hmutu an awm a ni mai a. Chutiang a nihte chuan a thah a ni lo tia lo ţan ve vak kha awmzia a awm lo. Ka fapa mah nise, Kimi te unau a huatzia ka hria a. Hetiang em a ti duh ang tih erawh ka ring phak lo. Mahse, danin a chungah ro a rel ang chu" a ti hmiah mai. A fapa chungah rinna chhete mah a nghat ngam lo chu mak ka ti a, rapthlak ka ti bawk. Ka pa pawh a meng kâwk mai. 

U Rema erawh a ngawi reng. A fanu thihna chuan a nghawng ve deuh a ni mahna. Ka pa ţawng hun ka nghak zo ngang lo va, "Hminga tih a ni thei lo. Tu chuan nge hmu a? An hmuhte chuan ti nge an rawn chhan loh? Ti nge a tlak tirh pawn an rawn lan loh? An rilru chhiat vang a nih chu.. " ka ti ve ta hrep a. Ka pain mitmeiin min khap. A vai film mah mah. Mai mai a na.. Hetiang thil serious lutuk angah lem te lo chan ţalh. Ka ten hlawm lutuk. 

A sarhu lai a ni rih si a, eng han sawi vakna chi ni hek lo. Ka pate unau erawh an thukhawm. Hminga tih a nih an ring lo vek. U Rema te tanchhan neihchhun chu, Kimkimi u khan pawn atangin Hminga'n Kimkimi a va chelh lai a hmu a, chu zawng chu a ni mai. Hminga khan hlan thlak a tum pawh a ni thei. Thil dang chu thil dang nise, a nu ngeiin a lam a tang thei lo kha Hminga hian hria se na a va ti dawn êm.. ka pa ten an buaipui dawn a, a tâng rei em lo turah ngai ang. 

Chhungkaw buaina neuh neuh kan nei bawk nen, Ngaihzawng lamin min uai rit vak lo va, a zia phian. Lateii pawh a la reh. Ti ila, min runluih thin niin ka hria, a status leh dp vel. Engah teh vak ka ngai lo chu kei pawn mak ka ti. Ka rilru tilet thei tur thil ka tawng zeuh zeuh a, a lawmawm lamah ka ngai. Atea te pawh buaina an la nei lo va, Kuri nen kan inbe zeuh zeuh. A inthlahrun thu leh Thari tan a nat turzia te min rawn hrilh thin. Hmeichhe sual tak chu niin ka hre lo. 

Mahse, zan khat Atea'n min lo call a, "Bawiha, buaina lian deuh ka nei. Ka rilru a hah takzet.. " a rawn ti a. 

"Eng nge sawi teh" ka lo ti a. 

"Thari a rai! " a rawn ti ta mai. Ka phu zawk mai. A va mak mawlh mawlh dawn ve aw. 

'I fa a ni mi? " ka'n tikhawmawi ve a. 

"Enteh, chu chu ka buaina.. A chhungah ka titla ngai lo. CD ka hmang zeuh zeuh bawk. Raina chance a awmin ka hre lo" a ti ta a. A serious ta deuh e. 

"Thla engzat nge? "Ka ti a. 

"Thla khat vel a niang. Amah a period loh vangin a intest a. A lo rai ta sia.. Nichin lawk khan min rawn hrilh.. Engtin nge ka tih dawn.. Ka buai" a ti bah nawk nawk a. A hah thawkhat ang, a tawngkam hman dan leh a thawk lak dan atang pawn. 

"Buaithlak dawn ve.. Engpawhnise, Thari chu biak chian a ngai anih chu.. I pa te i hrilh tawh em? " ka ti a. 

"Ka hrilh ngam i ring mi? " a ti hlur a. 

"La hrilh lo la a pawi lo. Thari chu ka lo be ve dawn nia.. Kuri pawh engmah la hrilh suh" ka ti a. 

Thari chu ka va be nghal. "Pawi ka ti lutuk.. Ka duh vang a ni bik lo a nia a.. " a ti a. A khawngaihthlak tho bawk si. Kan Atea hriam lek lutuk hi chu aw..! Thari vang liau liauin Lateii ka biak phah. Thari ka rinhlelhna lam ni loin Atea lo kha mipa dang kawp ruk te pawh a nei ve thei tlat. Atea'n an sex hman dan a sawi khan kei pawn ngaihngam lohna ka nei ve tlat a ni. 

"Late, Thari hi tu nge a bialpa thar" ka va ti tâwng a. Min la reply lawk lo zui. 

"Ngatan nge i tih? " a rawn ti a. 

"Ka hre duh. Ka bem duh a" uang titihin ka ti a. 

"Ve che.. Lerha, i bem thlu nguar ang. Bialpa nghet a nei ve rin ran e" a rawn ti ta a. Chu chuan awmzia a nei thui viau. 

"Nih chuan Atea kha a lo kawp a ni maw?"

"Kawp mai mai lo, a bialpa nen an inbreak ve lai a nih kha.. An ni leh daih tawh.. Atea pawn sawn a thlaksan ve tho a. An phutawk chiah" a rawn ti a. 

"Nih chu.. A lawmawm e.. Ka bem lo mai ang" ka va ti a. Min rawn chhanna pawh seen loin chat ka clear daih. Min biak zui a chak tih ka hria. A moodah ka awm lo. 

Atea bulah chung vel chu ka sawi ta a. Mahse, buaina kan la nei. Thari chuan a bialpa nghet zawk chu ti nge a puh loh? An nih leh tho si chuan. Atea fa tak tak a pai zawk em mawni dawn le.. Hunin hril teh se a. 

Hminga ukil tur ka pain a ngaihtuahsak a. U Rema chhungte lamin inbiakrem an duh miau si lo. Hminga chu puhthluk an tum ni berin ka hria. Mahse, Court lamah chuan eye witness an mamawh dawn a, Kimkimi U Nuseni thil hmuh kha chu witness a tling thei kherin ka ring lo. Hminga chu central jail-ah hun a la hmang rih a. A rilru a hrehawm ve khawpin ka ring. Inrinni zan a ni a, ka pa te inkhawm hlanin Lydia nen kan awm a. Awmteii te nufa an rawn lut hlawl mai. A rilru a buai hmel em em lehnghal. 

"Eng nge thleng? " ka ti sawk sawk a. 

"Ka pa te inah min va thlah zuai hman em? Khu inah khuan U Hminga tel lo chuan ka awm duh tawh lo" a ti tham chhal a. A naute chu Lydia chuan a lo lawm vat. 

Ka pa te an rawn bang zui ve bawk a. Awmteii chuan, "U Hminga tel lo chuan a nuam hlawl lo. Ka nu khuan tawngkam mei nei zet zetin min tawngkhum reng a. Zaninah pawh khan, 'Inpa lah chu damchhung a tan hmel si a. I tan chuan haw daih a tha zawk ang. He inah hian chan tur engmah in nei nufa dawn si lo va. Tualthattu tan chuan engmah ka dah dawn ik lo va' te a tia.. Pa Rema pawh khu a dang tawh tawp.. Nizan hmasa te khan a rui a, kan mu tawh kha min tâwng vak vak a, 'Tualthah hmang nena in khata chenho ka duh lo. Ka fanu a thah aiah a fapa saw ka va rekhlum ve teh ang' te a tia. Ka hlau lutuk. U Hminga te lah an court thei lawk bawk si lo. Chuan, U Thiangi te ho hi an rawn lut reng bawk a. An ngampa zual, kei chu chhiahhlawh ang lekah min ngai, min tir kat reng a. Ka thlavang hauhtu an awm si lo.. A hrehawm em mai. U Hminga lo chhuah hma chu kan in lamah awm rih ka duh a ni" a ti ta a. 

Ka pa ngaihdan a ni ta lo nge, "Mai maia.. Puii te khanglang chu.. Kan ngawi kan ngawi a, min zuam ta a ni maw.. An tum dan ka hre vek, Hminga dah boa nangni nufa chhuahtir che u a, khu ina lal hrawt khu an tum a nih khu.. Thiangi te lah mi fing kherek, a rilru chhiat vanga pasal pawh hmu zo lo an tih kha a nia. Eng nge mawni le.. Hminga papuia ka la dam alawm le. Chuti mai chuan an nuamsa hauh lo vang" a ti ta tûn tûn a. Ka nu pawh chuan, "Ka lo rin ruk sa a nia. Rema te lam khuan Puii khu an hneh tawh em a ni. A thluak an su hneh lutuk, tikhuan Puii chu a upa zel ang a, a boral hunah phei chuan Rema te ta a ni mai dawn a.. Chu chu an ruahman lawk vek niin ka hria" a lo ti ve a. 

Buaina a ril telh telh mai. An hlauh ber leh an kawng daltu ber Hminga lah a kut an la phuarsak tlat si. Mihring rilru chhhia leh duham lutuk hi chu aw.. 

Kan buai atalângin Police hna dil pawh kan lo mangnghilh têp a. Ka nu berin a lo hrechhuak a. Kan va ti ve vat. Hmuh inring lutuk lo chuan ka awm a. Hmu lo mah ila ka la na em emin ka ring lo. Class pawh ka la kal tho a. Atea te buaina ni bawk, Hminga te ni bawk. Lung a zing duh hle. Atea nen ruahman rukna kan nei a, Thari bialpa nghet hriatchhuaha biak tawp kan tum a ni. Atea chuan engtin tin emaw Thari bialpa Sama chu a lo hrechhuak ta mial a. Thari te in luahna venga awm, chhungkaw pangngai leh amah pawh tlangval pangngai tak a lo ni a. Mahse, Tun hnaiah Thari nen an inkawp vak lo niin a lang tlat! Thari a rai tih a hriat vang nge thil dang vang ni ang? Lateii khan Atea nen an inthen hnuin an nih leh tawh thu a sawi bawk si. Sama kan zawh chuan kan virpilh palh ang tih a hlauhawm bawk nen. Kan thiandunin kan meeting tlut tlut ringawt. Atea te inneih lah a hnai ve zel si. Sama chanchin chu keiin ka chhui ta a. An thenawm lawkah ka classmate hlui Rinawmi a lo awm hlauh a. Va kawm thar lehin ka hriat duh chu ka zawt chho ta a. 

"An ni nghet ve lutuk, Thari hi heta an awmna a rei ve tawh a, a rawn awm atangin an inkawp chat. Sama hian a duh ve bawk a. Mahse, thawk khat lai khan a chhan ka hre lo, an inthen ve zuai a. Sama hian a la na viau nghe nghe. Kan lo inhnaih bakah kan inkawm ve thin bawk a. A sawi ve sup sup zel. Mahse, a hnu lawk nikum kumtawp vel khan an tha leh a. A leng leh zut tawh. Tun lai tak hian an inzui leh ta lo va, a chhan ka hre miah lo.. " a ti. 

Thil zep vak khan hma kan sawn thei lo zawka ka rin vang leh Rinawmi ka rintawk vangin Atea te chungchang chu ka sawi ta vek a. Rinawmi pawn a hrethiam khawp mai. "Lo hriat ka tum dawn nia" a ti ta a. Sama nen sex an hman ve ngei a rinawm a, Atea zawk a puh chhan hi Atea fa a nih vang nge thil dang vang tih hriat a ngai tlat a ni. 

Kar loah Rinawmi chuan chanchin min rawn hrilh ta a. "Sama sawi dan chuan, 'Kan inthen zuai khan kawp a lo nei hman a. An che na viau aniang. An in luahna te khu ka nu te nen inkawmngeih tak an nia, ka nu bulah a lo sawi sia. Ka nuin a lungten ta tlat a! Thari a lo zuk hau a.. Ani induhtawk ve si chuan min kalsan ta a ni' a ti.. A ni mai thei, Sama nu hi nu kherkhiap ve tak, zahawmna lam thupui ve chi a nia maw.. " a rawn ti ta a. Chuvang chuan Atea fa ni lo pui hi Thari hian a puh tihna em ni ang? 

Awmteii kha ka pa te fuihna vang leh enthlak hna thawk pah tura fuihin Hminga te inah an awmtir leh a. Tuar hram hram turin kei pawn ka fuih ve nasa. A la naupan ngaihtuahin a chhel reuh a, Hminga a hmangaih bawk nen, a tuar thei ta viau. Nu Puii te lam pawh eng chen nge an kal hriat ni lo mah se; an thawven danah hnehna chan ngei an inbeisei niin a lang. Court ni a lo thleng ta a, Nuseni chuan a thil hmuh dan te a han sawi a. Hminga ukil in a han kawm chiang bawk a, "Pawnah ka awm a. Apa Hminga'n Kimkimi a va vawn lai ka hmu a ni. Chuan, a nam bawk" a ti a. A nam tih lai tak hi a tira a sawi loh a ni. Sawitirtu an awm tih a chiang. 

Ukil chuan, "Anih a nam chuan a tla ta a. A tlak veleh khan eng nge i tih? Engtin nge i awm? " tiin a han zawt a. 

"Ih.. Ih.. Ka hre lo.. Ka au vak a" a ti ringawt. 

Awmteii lah khan thil awmzia a sawi chiang viau bawk si. Kimkimi tlak rual khan Hminga a tlanchhuak a, thawm tuman an la nei lawk lo. A hnuah Nu Puii te an rawn lang chauh a nih kha. 

"I au chuan i bulah mi an awm em? I nau tlaknaah chuan ti nge i kal ve loh! " tia an han zawh chuan, a riat nawi ta mai mai a. Chhan vak ngaihna a hre lo. Nu Puii te thung chuan, "Nuseni au lai kan hria a. Kan va tlan nghal" an ti a. 

Mahse, ka pa lo call tu Pu Rka khan, "Nuseni au lai te chuan Hminga hian inah a pawm lut tawh. " a ti si. An inkalh nuai mai. Lehpek atan an dah ta rih a. Beiseina a sang ta deuh e. Hminga chu a rilru a hah ve bawk aniang, a cher kuam mai. Awmteii nen an inhmer vawng vawng a, an fapa chu a melh vawng vawng bawk. 

"Lo tuar hram hram rawh. Pathianin thudik a hria ania.. " a ti sup a. Awmteii erawh a la naupang bawk a, a hnuk a ulh tih ka hria. Ka khawngaih dun hle a ni. 

Chumi zan chuan Atea a rawn kal a, roomah kan inzui lut. A hmel chu a êng sawtin ka hria, ka ngaihbel nge ni. 

"Thari'n nau a chhiat a" a ti zawi sup a. 

"Ehe! " ka ti ringawt. 

"A tha ti tawh mai ang.. Tikhan buaina kan nei tawh lo angah ngai ang. " a ti a. 

"Umm.. A lo hrilh che mi? A va mak thut ve" ka lo ti a. 

"Nizan khan ka va leng a, Sama nen an chungchang te ka va sawi a, kan sex hman dan te pawh ka sawi. Ka rilru a hmin chiah lo tih a hrethiam aniang. Mahse, engmah a sawi ve lo. Chuan zanriah ei hma deuh khan min lo call a, "Ka tlu a. Nau ka chhiat" a rawn ti. Ka va ngaihsak duh ang em? " a ti mawlh mawlh a. 

"A nau a awm tawh a, va ngaihsak vak pawh Kuri te lam hian an hriat ka hlau. Mahse, damdawiinah a awm chuan va tlawh ve chu a tha" ka lo ti a. 

"A awm lo, inah a awm. A nat vak hmel pawn ka hre lo. A titla zawk mawni aw ka ti" a ti lehzel a. 

"Aa.. Engpawhnise, aman a rawn tihbuai tawh loh che chuan engmah sawi tawh lo mai rawh. Buaina a awm leh ang" ka ti ta ringawt a. 

"Ka lelo ve ngawt mai. Ka inthiam chuang lo. Kuri ka hmuh lah hian ka khawngaih bawk si.. Nupui ka nei ve ringawt dawn chu a nia.. Tlangval hi a nuam asin le" a ti ta mai a. Ka nui ve hawk. 

"I puitlin deuh a ngai dawn ania.. " ka ti ve a. Nupui neih lam hi chu ka la ngaihtuah ngai eih lo. 

"Lateii te pawh an inthen leh tawh kha. An nih rei ka ring lo rengah" a ti a. 

"Pawi ve.. Ni reng se a that nen" ka lo tihsan. Ka lak lap zia a hria a, min sawipui vak duh lo. Amah ngeiin min duhpui bawk si lo. 

Biak ka nei chho ve a. Kei pawn. Kan veng tleirawl hmeltha leh no zet mai, Ruatdiki a ni. College zirlai a ni a, a la naupang naa mipa mit a lakzia chu han titi khawm hian a hming a ri ve ziah. A nu leh pate fanu neihchhun a ni a, u mipa pali a nei. An duat viau bawk. A pian a nalh reuh a, a vun a nalhin a mam bawk si, an khawsak a sang naa, an ngaihsanawmna chu an induhin an chapo ve lo. A u te nen pawh kan inkawm ve zeuh zeuh. An zauin thenrual an kawm thiam khawp mai. Ruatdiki hi hostela awm reng reng thin a nih vangin ka lo hmu mang ngai lo va,kan Kohhran a lo inang lo bawk nen. Kan inbiak tanna pawh amah hian min lo call sual (?) a.. "U van" a rawn ti he haw a. Ka nih loh thu ka hrilh chuan a nui har har a, nui mawi ka ti riau. A number ka save a, a dp ka han en takah chuan ka hre ta a. Ka en ka en mai, hmeltha ka lo tih satliah kha a ni thin a. A number ka neih takah chuan biak zui ka chak a ni teh chek ang chu.. Whatsapp lamah ka be ta a. Min chhang tha duh riau chuan beiseina min neihtir ta bawk nen.. Kan inbia kan inbe ve ta a. A la naupanna a lang leh zauh thin. A sam hi a kawng thlengin a zuah siau a, a dum thlap bawk, a heh a sen hiam a, biangsum a nei kâk bawk. A mithmul sei er tan te, a mitmeng lian kel kawl te chu hmuh nuam lo a ni hran lo. Bakah nuih a duh em em a, tleirawl nuih duh hun lai a ni bawk nen, hote pawn a nuih a tiza vel vek mai. Kei hi ka rualpui an nih loh chuan kei aia u te lama ţuan ţhang ka ni a. Tleirawl lam tak hi ka la bawhzui ve vak lo. Han deal vel dan ka thiam lo khawp a. Mahse, inbiak tak rengah chuan a tih ve theih mai zel. Ani chuan min lo hre daih tawh a lo nia! "U Imma, i lar alawm.. Ka thianten an sawi vak zel che" a tih chuan nuam ka lo ti ru ve khawp a.. Haha.. 

"Anih nangin? " ka tih chuan, "Aahh! Ka sawi ve ngai lo. Ka zak alawm" a ti mai a. 

"A nih bialpa i nei mi? " ka ti ta hmiah a. 

"Nei mai mai lo" a ti a. 

"Kei pawh ka nei lo. Hehe" ka va tih chuan, "Hmm.. Nge i sawi kher? " a rawn ti a. 

"Ka sawi chak" 

"Hm.. A chhan a awm ang" 

"Awm te chu awm e.. Ka bem dawn che" ka ti ta thâwr a. Min biak danah beisei ka nei ve laklawh tlat a ni. 

"I zak lo siah" a rawn ti ringawt a. Ka khi vur vur mai. Sava note duhawm tak, tuma la khalh chul loh nia ka hriat avangin ka duh telh telh mai. Lateii te ang hmeltha tak, nun inthup, chhungril nun kawrawng si ai chuan ri ve phawng phawng, tleirawl pawisawi lo zet hian min hîp viau a ni. 

Atea te inneih niin an rawn kal ve hlawl a. Kuri naute nen an lo inkawm ve thin a lo nia. Min hmu chu a va lai tak! A duhawm tulh tulh bawk si. Mi an sawm tam lem lo va, a nuam tawk khawp mai. Chaw ei khamah an thianho thutnaah ka va thu ve ta chawt a. An insik ru nawk nawk chu ka hmu ru reng, nuam ru mah se; ka lai ve deuh. 

"Engin nge inhawn dawn? " ka ti a. Ruatdiki bula thu chuan, "Ka hre bik lo.. Hei Aruati hi chuan Scooty a keng a. " a lo ti a. Scooty a lo keng kher chu aw.. Thlah ka tum nen. 

"Ka va thlah dawn che u nia.. Nakin deuhah" ka ti a. An ngawi thap. An zak tih ka hria. Ruatdiki chu ka va melh a, min lo melh kiau. A va hmeltha keu kuau tak. 

Sawi tur ka van ta rih. Ka thianten min lo au bawk nen, ka kalsan leh daih. A hnuah msg-in, "I scooty kha khalh hawtir tur i hre lo mi? Ka thlah duh che sin" ka va ti a. 

"Ka thianten an hrethiam dawn asin" a rawn ti! Ka nui hawk hawk. 

A la innocent kher mai a.. 

Kan buai neuh neuh a, a zualpui kan zawh hnuah hawn lam pawh kan hnaih tan ta a. An bulah ka va kal leh a, "Tu tu nge ka thlah dawn che u" ka ti a. An inmelh kual hrek hrek. Ruatdiki thiannu ber nia ka hriat chuan, "Ih.. Aruati hian a kut a tiulh deuh a, scooty a khalh thei si lo va, keiman ka khalh haw sak ang a, Aruati leh Mimi hi va thlah la.. Teruati nen kan lo inphur ang" a ti ta zung zung a. He nau hi a fing ru tlat! Kan music a man chiang a ni. Sawi buaitu awm hek lo, Aruati te pahnih chu ka phur ta a. A hnungah an thu ve ve. A thiante bulah a lo hrilh tawh a nih ka ring deuh. Mimi te in chu a hla zawk a, "Mimi va thlah hmasa mai ang aw.. I u biak lawk Ka duh a" ka ti a. A u chiah hi keini ai chuan a nau hlek a, mahse, kan inkawm ve zeuh zeuh. A ngawi reng. Mimi zawk chuan, "Nia, min lo thlah hmasa mai ru" a ti a. Kan tlan tlang ta. Mimi kan thlah hnu chuan, kawng zau laiah ka ding a. Khua a thim tawh. 

"Lo thu chho la" ka ti a. 

"A ho ee" a ti naa, a chhuk a. A rawn thu lut ta tho. Hmalam a melh ran a. A sen ap ap mai. A zâm ru hle tih ka hre thei. Hmuhnawm ka ti si. 

"Kal ila" a ti lawi rât a. 

"Hmun dangah kal lawk ang hmiang. An hau che ang em? " ka tih chuan, min rawn melh kâwk a., "Aih, chi loh, Teteii te khan scooty an dah tawh chuan min ngaihtuah leh ang" a lo ti vat. 

"La dah lo turin hrilh lawk mai la, an hriatthiam vek tho kha" ka ti a. Nawr luih erawh ka tum lutuk lo. 

"Khaw nge kan kal ang.. Hawn tlai a chi hleinem. Apa in min lo call leh tep tawh ang" a ti a. 

"Reilote" tiin ka va melh a. Min rawn melh ve chiah bawk nen, kan mit leh mit a intawn chuan engtin emawni ka awm. Nuam ka ti chem chem. A phone a hmet ta niap niap a, Teteii chu a call aniang, a ring ral ral a. "Kha nangman be rawh" tih leh a phoneeemin pek a rual a. 

"Hello, Tete, keimah Imma, Aruati hi ka thiante inah ka kalpui lawk dawn a. Scooty kha lo la dah lo mai ta che. A chhungten an ngaihtuah takin" ka ti a. 

"Okay.. Ka lo kawl rih mai ang. Mahse, rei su aw.. Pa Thana'n min lo call leh ang" a rawn ti a. A fel ta. 

"Kan rei lo vang" ka ti sup a. Ka tlan chhuak nghal. Atea tih loha ka kawm nasat ber Johny ka be pah a, ani hi a room hi in hnuaiah a awm a. A rooma kawm ka tum a ni. Chhuah a lo tum mek a, mahse, chabi a dah tur thu a rawn sawi. A fel leh ta duak e. Johny roomah chuan buaina nei loin kan lut ta a. A zum dãk mai. Khumah ka thutpui a. Kei atak pawh sawi tur ka vân mang e aw. Tihnat a awlsam hmel si a, ka tîm phah vek. 

"Ka duh che tih i hria tiraw? " ka ti ta a. Amah pawh ka en duh lo. Ka zâm ve deuh nge. 

A kun daih a. A kut tin a sik niap niap ringawt. Ka va hnaih ta deuh a, "Min duh em? " ka ti a. 

"Umm" a ti! A zawi em em lehnghal. Mahse, ka hre pha tho. 

Ka kuah ta a. A ţang bik lo. 

"Engtinmah ka ti dawn lo che. Tikhan kan ni tawh aw. I rinawm ang tiraw? " ka ti ta zung zung a. Ka zâm rukna a bo ta deuh bawk. 

"Rinawm ang. Nangmah zawk hi i lerh hmel si" a ti sap a. Ka nui ringawt. A lu chu ka kuai her a. Min en ngam lo. 

"Ka mitah en rawh.. Min en rawh.. Umm.. Ka bialnu i nia, ka kawp lo vang che.. A chiang em? " ka ti nghet charh a. A mitmeng zahawm zeta min en kal chungin,"Kei pawh ka rinawm ang" a ti ve ta sap a. Ka insum zo ta meuh lo, a heh lah a sen hiam si.. A hmui chhah lam lek lek tuihnai lutuk chu melh ringawt ka duhtawk lo. Ka fawp ta a. A dawh mawl tawp. A zei hlawl lo. Mahse, inkiss te hi chu inzirtir theih a nia. Kan infawh zawhah a thaw halh a. 

"Nangmah chiah bialpa ka la nei ania" a ti a. Ka lawm veng veng. 

"Ka lawm lutuk.. Ka tina ngai lo vang che" ka ti ve sup.. A chhungte lam ngaihtuah ve a ngai si a. Ka hawpui ta a. Rilru a hlim veng veng mai. Zanah thianho bula ka sawi chuan, "I duhkhawp ang nge maw.. I ex te an zei hlawm sia.. Tleirawl experience nei lo ngaihzawn hi chu a nawm rualin zirtir an ngai nasa lutuk a. Ka peih lo kei chu" Johnya'n a ti a. A dik ve tho mai. 

"Bakah Lateii nen in inthenna a la rei si lo, Lateii i duh ve ropui sia, a rawn zar leh che chuan i hnar thei lo ang nge" an ti bawk. 

"Ruatdiki hi ka duh em em rih. Hmalam hun chu ka hre lo.. " ka ti ta mai. A hunlai zel a ni e. 

"Mama, tho rawh.. Apiin dar 8 a ri tawh a ti" Lydia chuan min sawi nawk nawk chungin a ti nuah nauh a. Dar 7:30 a ri chiah tih ka hre thei. Ka nu tih fo dan a nia. Min kaihthawh hian dar zat a sawi danglam ve ziah. Mahse, ka tho ta tho. Ka inphih harh laiin Thenawmpa Pu Roa a lo lut a. 

"Kha.. Kan Imma pawh a tlin ve kha aw.. In lo hre tawh em? " a rawn ti a. Ka hmai phih lai ka chawl dat. Ka nu chuan, "Ehe! Tak tak em ni? Khawi atangin i hriat? " a lo ti sawk sawk a. 

"Aw.. Kan makpa nau pawh kha a tling a, an lo post aniang. Khaw nge ka hre bik lo.. Imaa khan a hria ang" a lo ti mai a. Ka inhru hul sawk sawk, ka phone ka en vat. Min lo congratz liam liam ka hmuh takah chuan ka tling ve tih ka hre thei ta. Mahse, result en ve hrim hrim ka duh a, min rawn pe a, ka hming a lo chuang vang mai. Police ka ni ve dawn ta. Ka awmdan chu a danglam ve deuh. Ruatdiki msg pawh ka dawng ve zat, "Ka lawmpui che. Uniform i inhmeh dawn e" a rawn ti. Ka khi suk. A thil ngaihtuah tehdaih chu aw.. 

Ka pa a lawm hle. Ka nu erawh eng em em a sawi lo. A lawm lo hran lo thung. Tlaiah chhungkhat sawmin arpui tuilai kan talh a, kan ei khawm ve laih laih mai. Ka bialnu hi rim ngam a la ni si lo, ka hmu chak ve thin si. Teteii bawk a tangkai thin, Note siam dunpuiah a va sawm a. Teteii te nen hian an inhnaih bawk a, a chhungte pawn an lo phal ve mai. Teteii te in lam ka pan nghal var a. Johny te in lam ka panpui leh ta vang vang mai. Khawlai emaw kawngsir vela hmeichhe awmdunpui hi ka peih ve lem lo. Mitmei ven a ngai thin bawk nen. Kan inhmuh ruk zauh zauh avangin ani pawh a lai chhe vak tawh ngai bik lo va. Khumah inkuah rialin kan mu a, a sam ka zutsak heuh heuh a. 

"Thla kua chu a rei eee.. Ka lung a leng ngawt ang" a ti sep sep a. 

"I lo rinawm thei ang tiraw? " ka ti a. 

"Thei e.. Mahse, a hrehawm dawn e. Biak pawh kan inbe thei awm si lo va" a ti a. A lung a leng lawk tih ka hrethei. Kan ni tan ve chauh a, training in ka kalsan leh daih dawn sia, ka hrethiam ve reng. 

"Hun te chu a kal ve zung zung alawm.. Chhel deuhin lo awm rawh aw.. Kei pawn ka ngai dawn lutuk che" ka ti a. Ka hnîm ve ruih mai. Inhmatawna saisir dunin kan inmelh tawn ran a. A biang ka chul ka chul mai. Chutah ka che hret a, ka fawp ta a. Inkiss ka uar bawk a, a bo lo tawk chuan a thiam ve tawh khawp mai. Kan duhthawh tan tân khawp mai. Ka kuah bet a, ani pawn min kuah nghet ngang mai. Ka sam te chu a tham ve nawk nawk a. Ka thaw a rang chho tan, a duhawmin deh a nuam takzet a. Kei mipa fit ve tak tan chuan insûm beh reng harsa ve tak a ni. A hnute pawh kawr chhana khawih thin kha a kawrah ka zen kut a, a lawngin ka khawih ta nawk nawk a. Ka hum tawk viau, a bial kerh mai a. A kawng hnuailam te pawh ka dap chho tan. A ip leh zawk zawk thin a. A tawp thlenpui mai ka rilruk ta hial.. Mahse, chet ka han lak dawn chuan, "Aih, U Imma, ka duh lo.. Khawngaihin" a ti ta hrâwk a. A mitmeng tak zet leh a mi ngenngawlzia ka hmuh chuan, ka khawngaih ta tlat a. Tin, khawih chhiat chawng chawng kha ka ui.. Ka ringtawk a, mipa tha tak ni lo mah ila, a insum theih phawt chuan a hun taka thlenpui ka thlang zawk tho mai. Kan insiam tha a. A khur der der mai. Mihring ve tho a ni a, a thisen a lum ve thei tih ka hai lo. Bakah min duh ve em a, a bialpa hmasa ber ka lo ni bawk nen. 

Training tura kal hun pawh a hnai ve zel a. Ka kal hma deuhin Nu Puii ten Awmteii an hnawtchhuak ta a. Kan rin dan sa a ni. In leh lo te pawh a hminga dah tumin hma an la a, mahse, a hmain ka pa te an che lawk vek tawh. Ukil chuan chutimaia dah theih a nih loh thu a lo sawi ve tlat a. Hminga signature an mamawh thu leh amah Hminga remtihna a ngaih thu a lo hrilh si. An thinrim viau a niawm e. Mihringte hi duhamnain a salbeh tawh chuan zahna hi kan lo bosal thei khawp a lo nia. Nu Puii pawh pasal a neih atangin a mizia, nunphung engkim a danglam chho dawrh dawrh a ni mai e. U Rema chuan thil a lo tithei viau a nih dawn hi.. Hminga case an chinfel hma siin Training turin ka kal ta kha a nia. Ka kal hma zanah Ruatdiki nen dar 10 thleng kan awmdun. Vanneihthlak takin a nu chhungte lamin chhiat an tawk a, a nu leh pate an kal a, a u te lah an chhuak ve bawk si. Teteii nen an riak dun dawn a. A rukin a roomah kan awm dun anih chu! 

Tetei'n min lo veng thung. Thinthi takin awm dun thei lo mah ila, kan inthlakhlelhna a kiam phah lo va, chumi zan phei chuan ka zep lo mai ang, a tawp ka thlenpui ţep a ni. Ka phelhruak vek hman, a taksa nalhzia chu kei pawn ka chil ka lem khawlh. Min duh em vang leh a rilru zawng zawng min pek vangin ka duhna leh beiseina tihhlawhchham a hlau a, hmin zan lo chungin ka tana inhlan mai a tum ve kha a nia. Mahse, mipa mah ni ila, thluak fim ka la nei ve a, a mitmenga a huphurhna lo lang chuan min hneh ka ti mai. A thawmhnaw ka haktir leh vek a, mak a ti viau nghe nghe. Ka pawm vawng vawng a. 

"Ka khawih chhe phal lo che. Nupuia neih che ka duh dawn a. Thawhchhuah te ka nei ve phawt ang a, min lo nghak hram hram la.. A hun takah i thianghlimna chu aw" ka ti ta a

. kha ta min ngaihsanna leh a hlim hmel kha vawiin thleng hian ka mitthlaah a la cham thin zu nia! A duhawm em asin. 

"U Imma, ka duh lutuk che. Ka lo nghak reng ang che. Mipa dangin min ngaizawng mah se, ka lo rinawm tlat ang" tiin min tiam thlap a. Ka thla a muang hle. A nu te lo hawn hmain ka chhuahsan ta a. Mut a tui lem lo khawp mai. Police hna ka lo dil khe kher pawh pawi ka ti lek lek alawm le.. Inngaihzawnna hian hna a lo thawk ril thei khawp a lo nih hi. 

Atea'n min rawn thlah ve a. Zawi sup hian,,, "Kan Lateii pawn a shillong bialpa a um tak kha" a ti a. Ka phu ve zawk mai. 

"Maw? " ka ti hu a. 

"Umm.. Nizan khan an inru daih alawm.. A lo kawp char char che a nih hmel.. Ka cousin mah nise; hnamdang laka a han mualpho ta hi ka ţan hlek lo. Theihnghilh daih rawh. Ruatdiki a awm tawh" a ti hmawk hmawk a.

"A bialpa chu he tah a rawn kal tihna mi? " ka ti a. 

"A niang.. Ka hre lo.. Anu bulah Lateii chuan, "Ka hmangaih ber ka zui ta mai.. Min lo ngaihtuah suh u" tih msg a thawn alawm" a ti satliah a. A vei zui tehchiam lo a nih hmel. 

"Ruatdiki saw i kutah ka dah a nia. A la naupang si a. I lo mitmei deuh loh chuan" ka ti a. 

"Kha lam chu lungngai suh. I thiante kan awm hi.. Bakah a nghet ang, a lepler vak tlat lo.. Ka rinzawng tak a ni reuh tlat" a ti a. Ka muang suai suai mai. 

Thla kaw (9) hnua inhmu leh turin kan inthlah liam ta vang vang phawt mai.. Ruatdiki tan msg ka hnutchhiah a.. "Ka rawn kir leh vat ang. Ka ring che a. Ka ta ni reng ang che" tiin.. 

"I tan ka rinawm loh chuan keimah ka ni lo tihna a ni mai. Ka lo nghak reng ang che" tih thu min rawn tiam ve.. 

Mahse, hmalam hun tuman kan hre lo.. 

Ti phawt mai ang. 

(Naktuk nghak leh mai ang aw 😘