Thinlung - 3

THINLUNG.. (3)

Ziaktu: Toni Râlte

Amah ber ka be thei si lo, lungawi lo, rilru mang zetin ka let ta sek. Ka hriat loh karin ka lo muhil ve ta aniang. Ka harh chuan dar 7 a lo pel tawh. Zan lama thil thleng ka ngaihtuah chhuak a, ka ner sawk. Ka inphih fai a. Ka mood chu a chhe ngawih ngawih a ni ber mai. Lydia pawh ka be lumlam peih meuh lo. Chaw ei hmain Lateii chu ka call leh ta a. Rei fe hnuah mutchhuah hmel tawkin min lo chhang. Thinrima thil ti buan buan chi ka ni lem lo va, a insawifiahna ngaihthlaksak phawt pawh pawi ka ti hran lo. 

"Nizan kha eng nge a awmzia? I hnute te kha" ka ti zawi sup a. A reh deuh dûk.. 

Chutah, "Kan inbet a. Ka hlim a ngai sia nih kha" a rawn ti a. Ka lungawi lohna chu a thuahhnih kher mai. Holam taka a ngai chuan min tithinur a ni ber e. 

"Eng thilah nge in inbet a? " ka ti a. 

"Beer in tamah" a ti satliah a. 

"I hnute kha i tlangzarh tihna asin. Mi dang hmu an tam lutuk. Ka lawm lo. Khatianga i inshow ngam chuan, engtin lek nge ka hmuh phak lohah i khawsak ang. Ngaihdan ka siam thei lo" ka ti bung nghut nghut a. 

"Sorry, babe, nizan kha chu ka inthlahdul ve lawk a nih kha.. Engmah thil dang a thleng lo. I lungawi nan eng nge ka tih ngai ang? " a rawn ti no ngher ngher a. Mahse, chuti maia thlem lungawi chi ka ni lo. 

"Tunah chuan inbe rih lo vang. Ka thei rih lo" ka ti ta tawp a. Ka dah nghal. Inthiam lohna a nei tak tak pawhin ka hre lo. An lo sawi thin dan hi a dik te pawh a ni mahna le. Ni 2 chhung ka reh ta a. Zep loh chuan ka duh ve em vangin ka ngai a, min lo biakna leh ngaihdam min dilna te chu chhan ka chak zek zek fo. Mahse, ka inlak luhlul a ngai rih ka ti ve a. Ni 3-ni chhunah a thiannu ka la hmuh ngai loh, Jenny hnen atangin msg ka dawng ta a. "Imma, Lateii thiannu ka nia, khawngaihin lo ngaidam tawh teh. A inchhir lutuk a. Hrehawm a ti tawp, khami zan khan beer bak a in lo, thiannho vek kan ni tho a, a pawi turah kan ngai lo va, tikhan an lo capture hram a nih kha.. Kan lawm lo lutuk. Lo hrethiam rawh. Lateii ka hre chiang a, hetiang lamah chuan a fihlim tawp aw.. " tih lam vel a ni. Tlem chuan ka thep ta deuh e. Mahse, Lateii'n min lo biak leh phawt loh chuan ka va be hmasa duh bik lo. Zan tirah min lo call ta chiah a. Ka laksak lo thei ta lo. 

"Khawngaihin min be tawh la. A hrehawm em mai" a rawn ti ţiau a. Ka thinlung a dek zak mai. 

"Aw be tawh ang" ka ti a. 

"Lo phei la.. Ka ngai che" a rawn tih leh takah phei chuan, a hnute pic ka mipatpuiin an kawl ru thúm ang tih lam ka ngaihtuah chang tawh lo. Ka insiam sawk sawk a, an in lam panin ka phei ta a. 

A chhungte pawh an lo awm. Min lo be ve siam siam. A pa hi Pu Pachhunga a ni a, a nu erawh Pi Thangliani a ni. An smart-in an polite viau. Milian chhung tih takah an rilru pawh a pui deuh nge nge ang chu. Lateii nen a room thlang lamah kan awm dun leh ta daih a. Khawthlir a nawm bakah boruak a nuam tawk lek bawk nen, Insi rialin kan thu dun a. 

"Ka tihpalh aw.. Tiang khan an lo cover ang tih ngaihna ka hre lo va, ka lo rui ve tho nen" a ti sep sep a. 

"A mawi chiah lo alawm. Beer i in pawh engtia tih thu loh, khatianga inchawi reng reng" ka ti nghut nghut a. 

"Nia, a hmaa kan thianho tihdan a nia. Mawng te hi kan hlim fo mai.. Hmeichhia vek kan ni tho a, kan tia.. Mahse, ka ti tawh lo vang" a ti zung zung a. Ka bula a awma a pang ka han deh leh takah chuan ka lungawi lohna pawh hawlh thèp ang mai a ni leh tawh. He nu hi ka duh hle a niang. Ka kuah a, ka fawp leh vawng vawng mai. Ka chhungril la dik famkim chiah lo vang nge ka duhthawh zual a, ani pawn min dang hran lo. Ka kal thui zel a, a tawp thlen mai ka pawisa ta hauh lo mai. Thutthlengah chuan ka bawhthlu a, a tang lo. 

Ka'n nawr deuh a, "Ka nu te an la meng si" a ti sap a. Ni ve bawk si, insum a harsat tawh hnu hian tihian a ti ve ziah. Ka insiam tha sawk sawk a, lungawi vak loin ka thu a. 

"I thinrim mi? Hun remchang a awm mai ang.. " a ti seuh seuh a. Ka lungawi zawm ve leh mai. 

Hun a kal chak viau, Lateii nen pawh kan boruak a la tha rih e. Class pawh kan la kal tluang viau zel e. Rosy chanchin kha ka hre zui ta meuh lo va, kan inbe ngai lem lo bawk nen, hmeichhe mak tak zawng a ni vein ka hria, sex min hmanpui a, a ngawi zui daih a. Min ít ve hrim hrim te pawh a ni mahna le.. Kuri leh Atea an inthen a, Atea chuan a tuar na phian! Kuri'n a lo kawp ve khanglang a lo nia. Mahse, a na rei lo. Lateii'n a thiannu Thari a tihpui ta vat a. Kan pali bawkin kan inzui leh ta dam dam mai. Thari hi Khawzawl khua niin Aizawlah a nau nen in an rawn luah a, a in luahah pawh kan leng ngun ta viau. Friday chawhnuah pawh kan lut leh ta dial a. Mahse, kan awm atanga rei vak loah Thari chuan bazar a ngaih chhuanlamin Atea chu a sawm zauh a. Chance min pe a ni mai ang chu. Thari nau lah an khuaa a hawn lai tak a lo ni bawk nen. Chu hun remchang chu bawhpelh ka tum lo nasa.. Thari khumah kan inbuan ta thial thial a. A ţang na lo.. Mahse, ţang lo tawp zawng a ni lo. Ka phelhruah vek takah chuan ţanin awmzia a nei lo tih a hre ve ta nge, "Min dim rawh aw" a ti sap a. Min dek reuh hle. A hmel fai leh duhawm zet, a mitmeng hriatthiam harsa tak si chu ka melh vang vang a, hmuhnawm ka va ti tak. Ka ta liau liau ni tura siam chu ka tum bur mai a ni. 

"A na lo vang" ka ti sup a. Ka che zui nghal. A taksa chhunga ka lut chiah chu ka phu deuh awk. Ka beisei san vang nge ka hre lo.. Hmeichhe virgin a ni tlat lo mai le! Beisei leh ngaihdan sa ka neih tawh vang nge ka hnual nghal rawih rawih thei nia! Mipa thenkhat chuan inhrthiam ngeiin ka ring. Chet pawh ka la tha thei ta meuh lo. Mahse, ka ti tawh ta sa sa tiin ka insangmar hram hram a. A tawp erawh kan thleng hram e. Phurna chhete mah nei miah lo va ka duhber ka bialnu mutpui hi a nawm i ring em? A teuh lo! Kan zo fel ka inha tha nghal sawk sawk a. Ani pawh a che ve vat vat. Min rawn melh a, "I lungawi hmel ka va hmu lo ve" a ti ta a. Ka hmelhmaiah a lo lang viau a ni mahna. 

Ka zep zo ta ngang lo va, "I la virgin emaw ka tia" ka ti ta tawp. 

Ka kut a rawn vuan a, mitmeng thuk zeta min melh chungin, "Thisen a chhuah loh vang hian kan virgin lo tihna a ni lo. Ka tetlaiin Cycle ka khalh nasa a, tin, martial arts lamah ka kal ve bawk nen. Kan instructor pawn, 'In hymen hi a thler thei, chumi anih vang chuan in virgin lo tihna a ni lo' min ti asin.. Min ring lo tiraw? " a ti sep sep a. Ka lo inngaihtuah nasa. Hmeichhe virgin chu ka hawng tawh ngei a, a inang lo tih ka hre si. Han hnial vak dan ka thiam loh bakah a rilru ka tina ang tih ka hlau ve tho nen.. 

"Ka ring che lawm.. " ka ti ta ngawt a. Ka chhungrila a thawh dan erawh a dang ta deuh. Min dem maithei, "Nang pawh i virgin tawh si lo" tiin. Mahse, thiamthu sawi min phalsak a nih chuan hei hi ka sawi ang. 

"Ka virgin tawh loh avangin virgin ngei ka beisei phak bik lo. Ka pawm thlap. Ka bialnu dang te pawh an lo gin tawh bik lo fo, ka hmuh dan leh ngaih dan a dan phah lem lo. Mahse, Lateii chu a dang. Ani chuan chance vawitam min bawhpelhtirin a la virgin emaw ka tihnaah min insumtir nasa tawh a. Ka bulah ngei a virgin thu a sawi bawk. Chuvang chuan a hmasa ber nih tumin leh beiseiin ka che a, ka beisei ang ka hmu ta lo kha ka lawm lo a ni ber mai.. Chutah pawh thiam loh min la chantir duh tho anih chuan hnialna ka nei lo ve" tiin. 

Chumi zan pawh chuan ka ngaihtuah nasa. Ka rilru te a na bawk. Mike nen khan an lo inngaizawngin, an lo live in tak tak em ni ang? Sex la hmang miah lo ni ila chuan ka hrethiam lo mahna. Ka lo hmang ve nual tawh si a, ka rin aiin a tight lo bawk si.. Aa.. Min va tbuai tak. Chumi vang ringawta han then pawh chu thil tih chiah ka ngai bawk si lo. Ka tui ta vak lo a ni e. Hunin a la hril ang chu.. 

Ka awmdan leh rilru hrethiam niawm takin Lateii lah chuan a hma aiin min hnaihin min duat a. Ka laka inthlahrung niawm tak ten a awm thul. Kei thluak hmang tam lem lo tan chuan hriatthiam a har viau. Mi dang han hrilh chi lah a ni si lo. 

"Sex kan hman atang khan i danglam.. Ka feel thei.. " a ti ta chiah reng a. 

. "Awihawm loh e" ka ti satliah. 

"I duh i hmu a, min bansan i tum tihna mi? " a la tizui! 

"I ho em mai a. Chutiang vanga ngaizawng che ka nih lohzia i hria," ka ti hmak. Ni e, A lo virgin loh vang ringawta then chu keimahah nuam tih lohna a awm.. Prove ka nei bawk si lo. Chhungrilah ka buai ru ve hle ringawt. 

"Bawiha, Imaa.. Hei harh teh. Rosy kha a thi a nia! " ka u aw ka hriat rual chuan ka harh nghal kâwk! Ka tho rang ngei mai. 

"Eng a?! Eng maw? " ka ti nghek a. 

"A inawkhlum" a lo ti zawi sap. Mak tihna leh awih lohnain ka khat. Rosy te ang nula hmeltha leh hmabak hlimawm tak nei a inawkhlum anih chu! Chhan tha tak zawng a awm ngei ang le. 

"Tunah khaw nge? Engtin? " ka ti leh sawk sawk a. 

"A pute bathroom-ah a inawkhlum an tia. Tunah chuan an postmortem mek ang" a lo ti chuai raih. 

"Ngati nge a inawhhlum ang le? " ka ti a. 

"I hre lo maw? I hriat ka ring a. Hei vang hian" tih leh a phone khawih a rual a, min rawn pe nghal zat. Ka hmuh chuan ka phu ve zawk mai. Rosy leh mipa (a hmel lang lo) sex hmang lai a lo nia. A rei lo naa, Rosy hmel chu a lan chian bakah a puanhnuai thil, a kumkar zawng zawng a lang fiah khawp mai. Mipa lak ngei niin a lang bawk. Ka lo la hmu ve miah lo chu a mak! Tiang lamah ka thiante hian an nei hma thin a, a hmu hmasa pawl ka ni thin. 

"Hei hi a darh nasa tawh mi? " ka ti a. 

"Darh nasa aniang. Rosy pu khan FIR a thehlut a, a thehdarhtu an chhui mek a niawm e" a lo ti a. 

"A sex hmanpui kha a ni mai lawng maw? A bialpa a nih ka ring" ka ti a. 

"An man tawh alawm ani pawh. Mahse, a ţang nasa a, mahse, Rosy khan a then a, chuvang chuan a timualphoah ka ngai. Amah bak rinhlelh tur ka hre lo. Awiii ka khawngaih ee. Rosy chu.. A rilru hah dan tur te kha.. Nang pawh insiam ve rawh. A ruang kan zui ve a ngai. Kan inah kha chen a awm a, kan thlah ve loh chuan" Ka u chuan a ti zung zung a. Kei pawh chu ka tho nghal vut. Rosy chu Lawngtlai lamah phurh phei tur a ni a, Chhim lam ka la zin lo bawk nen, va zui ve chu pawi ka ti vak lo. Lateii ka va hrilh ve a, "I va lerh ang e aw, " a la ti hram! Ani nen kan inkara neuh neuh a awm lai a ni bawk a, Boruak thar hip nan pawh a tha viau tak ang. Mahse, chutiang zawnga ka ngaihtuahna kal chu ka inthiam vak lo. Rosy chu ka ui ve khawp mai, inawkhlum duh tur khawpa nawrtu a nei chu pawi ka tihpui. A timualphotu chu hrem ni ngei se ka duh takzet. Lehlamah Rosy kha nula tlang tak, confi tawk tak kha niin ka hria a. Khatiang mualphona kha mizo nula dang te pawn an tawng fo, thihna em a thleng ngai lo. Rosy chuan ti nge a tawrh tlang mai loh tih erawh ka ngaihtuah. Thil dang inzep pawh a awm a ni maithei ni. Keia chhui chhuah chi ni nghal lo chuan. 

Chawhnu lamah Rosy ruang pawh phur theih turin an peih ta a. Zuitu pawh kan thahnem phian. Thenrual a lo ngah ve viau a niawm e. Ka hmelhriatte pawh an awm ve. Muangchang lem loin kan tlan ta char char a. Lunglei tak hi chu ka kal ve tawh. Lungleiah pawh khawtlai loin Lawngtlai lam kan pan ta zel a. Tawipui south-ah Lawngtlai lam ten min lo hmuak a. Kan thim lut tawh a ni. Ril pawh a tam ta viau, mahse, muangchan chi vak ni hek lo le, Lawngtlai lam chu kan pan leh ta ngat ngat a. A khat tawkin ka u leh a thiante an han tap leh bawrh bawrh zel a. Tluang takin Lawngtlai pawh chu kan lut ve ta. Ka rin aiin hmuaktu a ngah! A hmeltha em bawk a ni. A thih dan lah a runthlak ve bawk si. An in leh lo pawh vantlang chunglam a ni. A nu mawlh chu a lainatawm., a tah hla chham avang chuan keini mipa lam pawh kan khap ve fuk fuk thei mai. Mikhual ho chu kan ril a tam dawn tih hriain, Khawtual lam chuan eitur min lo pe vat vat hlawm a. Hah a dam huai huai mai. Kan chau ve bawk nen, tlaivar em kha chu kan zo lo dawnin an hria nge, Rosy chhung leh khat te ho chuan riahna tur min pe ta a. A tlai viau tawh nain han chhin hlek pawh a tha e tiin kan muhil ta hlawm. 

Rosy chu vuiliam a ni ta a. A thih dan leh an va hmuh dan Rosy patea sawi danin, "A video darh atang khan a nun a mumal tawh lo va, chaw a ei thei lo va, a mu mang lo tih a hmelah a lang bawk. Khami zan khan zanriah a ei ve mial a. Ka pa nen kan fuih malh malh bawk. A ngawi reng thung. Chaw eikham atangin a roomah a tawm leh ta ngat ngat a, va kawm harha han tih chiam kha kan tîm ve rih bawk nen,.. Kan mu ta kha a nia. Kei hi badminton khel thin ka ni a, ka tho hma ber thin. Ka zing tho inthiar tura bathroom ka lut tur chu chhunglamah a inkalh a. Ka pa a nih ringin ka han nghak a. Ka pa te room lamah bathroom a awm tho tih ka hriat leh takah chuan ka va kik a, mahse, a reh veng veng si. Ka pate room a la inkalh a, naupang ho lah an la tho si lo. Rosy room ka va luh chuan a lo awm ta si lo va, ka ngaih a tha ta lo a ni. Hmanhmawh takin bathroom chu ka pan leh a, ka beng dawt dawt bawk. Han bihthlakna tur lah a awm der si lo. Ka mangang chuan ka pate ka kaitho ta a. Ka pa nen kawngkhar chu kan tichhe ta tawp mai a ni. Kan hlauh ang ngeiin a lo khawng vek tawh a, kan la thla vat. Mahse, chhan theih a ni tawh lo. A thih hun kha ka rin dan chuan zing dar 3-4 inkar vel a nih ka ring. A lo tumsa ran a nih hmel.. Hnutchhiah te a nei em tih kan han en kual a. Engmah a hnutchhiah lo. Kan fanu thih dan hian min deng nain min nghawng na viau a. Thin pawh a rim. Ni e, kan fanu hi mi fel famkim zawng a ni mawlh lo a ni mahna, mahse hetia mahni nunna hial la tur khawpa nawrtu a nei hi a phû bik lo va, kan fanu nunna chhattu hian hremna hmu ngei se tih pawh hi kan chhungkaw duhdan a ni" tiin. 

A dik a ni. Inngaizawng an ni emaw nupa an ni emaw eng pawh nise, an mudun lai thla an la emaw video-in an cover emaw pawh nise, tihdarhsaka mi zawng zawng hmuha pholansak hi an phû reng reng lo. An duhthlannain video an siam a, mi zawng zawng hmuh atana siam an ni miah lo tih hi kan hriat a tha. Rosy pawh hmeichhe dang ang bawkin sex a hmang ve a ni mai. A bialpain a hmel lang tel si loin a laksak a, a la vawrh darhsak zui! Chu mai a la ni lo, Rosy nunna ngeiin a tawrh phah ta a nia. Tualthattu dik tak chu kha sex video vawrh darhtu kha a ni ka ti lo thei lo. Nun hman that leh fimkhur tluk chu a awm lo. Mahse, an lo pelhe vein an lo chesual ve a ni thei. Diriam zuia cheksawlh zui kher an phu lo. Hetiang tih chingte hi chu na takin hrem zel se a tha khawp ang. Chem lo va mi lu la an ni si a.. 

Lawngtlai chu nuam ti hman tur pawn kan awm rei thei mang si lo. Han fan kual te pawh a chakawm ve viau a nia. Mitthi vuia kal ve lem, han fankual zuai zuai kha a mawi chiah si lo. Rosy vuiliam a nih hnuah ruang zuitute chuan Aizawl lam kan pan leh ta vang vang mai. Kei pawh zin thang lo tih takah ka muthlu nasa viau. Lateii ka ngaihtuah mang lo tih min rawn biak atangin ka hre chiah. 

Class ka kal leh hmasak berah Lateii chuan, "I awmdan hi ka hrethiam lo. Inthen i duh chuan sawi mai rawh. A hrehawm" a ti ta a. Ka ngaihsakna kha a lo tlahniam hman viau a nih hmel e. 

"Inthen ka duh lo" ka ti a. 

"Duh si lo chu a hma ang khan awm leh rawh. " a ti hlar a. A lungawi chiah lo tih a hmelah pawh a lang. 

"Ka hre bik lo, ka awm dan hi.. " ka ti ringawt. Chutah ka bulah rawn thu hnaiin chiang takin min melh a. 

"Imma, thil ka sawi ang a, thinrim miah lo la, ka sawi zawhah thutlukna i siam dawn nia" a ti ta sap a. Ka lo bengkhawn hle. A aw a thian kharh a. 

. "Ih maw.. Class Xii ka pass hlim khan bialpa duh ve deuh ka nei a, Atea pawh hian a hria. Alexa a nia, kan induh ve thei lutuk. Ani chu college kal lai a nia. Ka pain ka pass min lawmsak zanah pawh a rawn kal ve a. Kan in kan sak lai a nih vangin kan kawmthlang lawka ka cousin te in hnuaiah kan lawm a. Kan tam lo tam pawh. Chuan, ka thiante chuan zu an lo keng a, an in hlawm a. Ka in ve lo. Mahse, Alex chuan beer hi min pe a, 'Beer bak in suh. Ka phal lo' a ti nghe nghe. Ka in ve a. Cane khat ka in chuan ka rui ta hle. Tun hnuah pawlh a nei ani ang tih rin ngaihna ka hre chiah. Ka cousin te inah chuan ka riah nghal dawn vangin ka rui ve pawh chu pawi ka ti vak bik lo va. Ka cousin leh Alex thianpa pawh chu la inhre ngai lo mah se, an inkawm nel nghal hmiah. Thian dangte hawn hnuah Alexa te chuan ride an rawt ta a. Keini rui phur tawh bawk si chuan kan lo duh ve mai bawk a. Alexa motor chuan kan paliin kan chhuak ho ta a. 

Ka la kal ngai lohna hmun thengthaw deuhah kan ding a. Zu an in belh leh, ka cousin chuan a in bang tlem min pe ru ve a. Ka lo kamnam sa nen ka in thei ve mai. Chumi hnu lawka Alexa thianpa leh ka cousin chu kan piah deuhah an phei a. Ka cousin hi kei aiin a u a, bialpa pawh a ngah tawh viau. Kei erawh engmah ka la hrethiam lutuk lo. Alex chuan motorah min nawr lut a. Min fight ta a ni. Ka tang ve nasa, ka hneh bawk si lo. A sualin min sual a ni ber. Ka tap pur nghe nghe.. Ka hneh zo ta ngang lo va, ka inpe ta a ni. Ka rilru a na em em a, a tukah ka then nghal hmiah bawk. Tikhan Shillongah ka chhuk ta nghal a. Kan reh zui ta a ni.Bialpa pawh ka neih ngam lawk loh phah nghe nghe.. I bulah ka sawi ngam ngang lo a ni. Min ngai fel sia.. Ka tihpalh aw" a ti ta a. 

Ka ngawi rauh rauh mai. Sawi tur ka ván takzet. Lateii sawi chu a dik chuan ka khawngaih tho. Ka laka a inzep erawh tul ka ti hran lo. Mahse, a rilru tur awm ka ngaihtuah chuan dik ka ti tho bawk si. 

"Chuan thutlukna i kutah a awm e. " a rawn ti leh a. 

"Late.. Kan inthen lo vang. Engkim min hrilh vangin ka lawm e. Mahse, dawt inhrilh tawn tawh lo ila tiraw? " ka ti ta a. A mitmeng a nung sawt mai. Hmuh a nuam leh tan ta. 

Thinlung dam vak lo mah se, aman a zir chho ta bawk a, ahma aiin min carein engkim min hrilh ta zel a. Ka awm a nuam chho tain, ka chhungril hliam pawh a dam chho ve ta zel e.. 

Ka u pawh Chennai lamah sumdawnna huang zauh tumin a chhuk ta a. Ani hi zawng a kawlhrawng deuh a, a la naupan ang ai hian a puitling phian a. Ka pa pawn a chhuang ru ve thin hle. A inhai kaw zo vet vet ve em a ni. Ka sawi hmaih loh tur chu bialpa amah aia kum 7-a naupang a nei a. Kei ai pawn a bialpa chu a naupang a nih chu. Ka nu ngaihdan hi a ni lo khawp mai a, a hau thin. Ka u lah luhlul zet, a tih tawh lama kal na ve tak a ni si. 

"Nu, ani saw ka duh a, ani pawn min duh. Kan inhmangaih a ni. Kumah kan buai ve lo, keini ber kan buai loh chuan nangni chu buai lo mai r'u, keiman alawm nei dawn.. Min iai a nih tak leh ka chawh anga a ni mai. Tunah chuan ka then phal rih lo" a ti hmiah mai. A bialpa Mama hi keini ai chuan an khawsak a harsa deuh mai thei a. A felin kei ngei pawn ka tluk vak lo. Ruihhloah a fihlim bawk, a naupan ngaihtuahin a zahawm reuh a. Ka u bialpa a ni chu ka lawm lo hran lo va, ka lawm em em pawh ka hre chuang lo. He lama inrawlh ve vak kha ka duh lo a ni ber ang chu. Ka pa erawh chuan ka nu kam khat pahin, "Kan fanu a ni ngei a, mahse, mahnia duhdan nei hrang, duhthlanna nei a ni tih hriatsak ang. Chutin inthen te hi a awlsam ngawt hleinem. An hlim dun ve em hi" a ti thung. Ka nuin Mama a duh loh chhan ber pawh a naupan vang mai a nia. Age is just a number an lo ti mathlawn loin Ka u leh Mama te chu kum vang chuan an buai vak lo a nih hmel. An inzui ve dat dat zel a, ka u a te reuh si, Mama lah a lian ve angreng sia, nufa te pawh an ang lek lej zel. Ka u lah hian a zah thiam phian lehnghal. Chennai-a a chhuk dawn zanah an infawp lai ka phawk nghe nghe. An lung a len hmel ve khawp mai. 

Lydia leh ka nu leh pa te nen tlawng kan ni ta si a. A khawharhthlak angreng. Lydia awm loh hlek pawh a lang thei viau. Ka u bulah khan a mu thin a, ka u ber a awm ta si lo chu a mutna turah a buai lawk nasa mai a. Ka bulah a mu duh si lo, ka nu te bula mut lah a hreh ve khanglang si. Ka pa tihngaihna hre loin, "Mama roomah khum kan hunsak mai dawn nia" a ti ta ngawt a. Ka room a zau tho bawk a, ani khum lian lem lo chu a hnawk hran lo viau. Amah vangin zan pawh ka leng rei thei ta lo. Min lo nghak ngat ngat zel si. Ngaihtuahnaah a awm ve run si a, a buaithlak. A fing chho ve tawh si a, Mami a chhuk tirh khan a lungleng lutuk kha chaw pawh a ei tha thei meuh lo thin a. Mahse, Mami'n, "Ka rawn haw leh tep, ka rawn hruai ang che" a rawn tih takah chuan a zia chho ta deuh. Mahse, zawhna maksak deuh deuh min zawh a ching thin. 

"Mami hi anu a ni em? " tih te, "Api leh apu te hi ti nge Anu Apa ka tih ve loh? " tih te hi a zawhna a ni fo. Ka nu ka pun leh nge nge thin. Nikhua rawn hre zel se la, thudik hrilh mai pawh a la ngai ang. 

"Ka thiante chu an ngo bik si. Ka dum si" a tih chang chuan ka lainat thin. Negro thisen a kai tih a hmelah a lang nasa si a, nakin zelah an la chhaih nawmnah ka hlau. A nu tal kha la dam se a tha tur. 

2nd semester exam kan zo a, thaw a veng ta deuh. Ka titha thawkhat viau bawk. He tih lai hian ka pa thianpa hian ka pa bulah Police an lak tur thu a sawi a. Kei ka nih chak leh ka thawh chak zawng tak a lo ni si. Ka nu remti vak lo chung chu dil ve ngei ka tum ta a. MA la pass chiah lo mah ila; lut phawt ila exam te chu a la theih mai turah ka ngai deuh ringawt. Ka pa pawn remtih lohna a nei hran lo. Lateii erawh a hul viau thung. Mahse, kum thar lamah daih hmalak tum a ni thung. Rilruin a hre ru ve ran mai. 

Hminga te inah hian ka tihtur nei lo hi Lydia hruaia len thlak ka ching a. Class kan kal tawh rih bawk si lo nen.. Tihtur em em awm ta lo chu kan lang zing angreng viau. A farnu fa a ni bawk a, Hminga pawh hian Lydia hi a duat ve thei fu. Awmteii pawh a rit tawh viau a, Christmas hmaa nau neih an inbeisei ve a ni. U Rema leh Nu Puii te erawh an la inkawp rem ve zel ti tawh mai ang. Ni khat Lydia nen kan leng thla chu U Rema fate an lo leng ve a. An lo che hnawk leh viau. U Rema chu eng emaw thilah a chhuak a, Nu puii erawh a awm ve lai a ni. Lydia hi a tunu a ni naa, a duat vak pawn ka hre lo. Lydia tak pawh hian a nel lo. Naupang dang awm ve ta chu Lydia chuan a va hnaih ve hrat hrat a. U rema fa naupang zawj Kimkimi an tih chuan, Lydia a hmuh rual chuan, "Kiri.. I dum si.. Lo tel ve suh" a lo ti ta mai a! Ka hre pha si. Ka thinlung a na zawk mai. Lydia hi a dum over hran lo, mahse, a hâng tih erawh zep thu a cheng lo va. A lian telh telh a, a hâng telh telh mai. A mak viau. 

A u zawk chuan, "Vai fa anih kha.. A dum ang chu" a lo ti ve leh zat. Ka kang awk, mahse, Hminga bawkin min chet khalh leh. 

"Hey, hmelchhe lutuk pahnih kha.. Inzak na nge? Khatia ka tunu te in tih le? Hmelchhe ropui si.. Nang ni aiin a hmeltha zawk aw.. Khatianga in ti leh tih ka hriat vaih chuan ka vaw ngei ngei ang che u. Inhria em? " tiin a melh rum nghal ûl a. Hminga hi chu an hlau sa bawk a, an meng khup lap mai. Mahse, Lydia, a kum ang aia fing tawh chuan min rawn pan tar tar a.. "Mama, haw ang. An sual si" a rawn ti ta reuh a. A ţap deuh par bawk. Nu Puii chu a tawng ve ka lo beisei a, kam khat mahin a tawng lo. Ka thin a na ve ta deuh a, "Aw.. Bawihte, kan haw dawn nia. I pi ve hian i thlavang pawh a hauh ngam si lo.. Nep lutuk.. A tunu i ni tih pawh a hre tawh lo a nih hi.. " tih leh thawh ka rual a. 

Hminga chuan, "Haw suh u. Chaw ei nghal ru. Heng mi chhe tangrang hi haw tir vat rawh.. Ka hne teh mai a nia" tiin a nu chu a va melh a. Nu Puii chu a tho tuah tuah a, U Rema fate bulah chuan, "Sawtah in inah phei ang u aw..tihtur pawh ka nei reng reng" tiin a kai a. An inzui chhuak nghal. 

Hminga chuan, "Ka nu hi ka hua.. Heti em ema mipa han duh chu.. A tenin ka ten. Lydia hi a tunu a nia sin" a ti hmuk hmuk a. Lydia a awm ve reng si, a fing bawk si a. Ka va mitmei ta a. A hrethiam ve ta nge, a sawi zui ta lo. Chaw pawh chu kan ei ta chuang lo, Lydia in hawn a ngen reng si a. Ka hawnpui ta mai. Ka nu te bulah ka vui ve nghe nghe. Ka nu pawh a sa ve phat, mahse, inbengdaiin, "Lydia awm lai chuan engmah sawi a tha lo aw.. Nang pawh i sawi pawi tep anih chu.. Naupangte hian a rilru kan hliamsak a hlauhawm.. Len pui tawh rih suh," a ti ta zawk a. Ka bu nghut. 

Zanah Awmteii'n min lo call a, chhuna thil thleng vel avang khan Hminga leh Nu Puii an lo inhau hrep niawm a ni. Nupuii chuan, A pasal fate i hmumawh tiin Hminga a zilhhau a. Hminga lah thinrim sa bawk si chu a lo duai bik si lo. An inhau nasa viau a niawm e. 

"Ka nu chuan, "Chhuak rawh u, in nupa hian.. Ka kham tawh lutuk che u" a tia. U Hminga'n, 'I pasal nen hian chhuak zawk rawh u. Ka pa lu nghahna hmun hi ka chhuahsan lo vang' a ti ve tlat a. Ka nu chuan, 'Thurochhiah ka thlak ngei ang. Ve mai mai che hian. Ka pasal leh a chhungte hmumawhtu hi ka hmangaih reng thei lo' a ti leh a. U Hminga tawng leh tur ka khap thei hram.. Imma, kei chu engmah hi nuam ka ti lo. U Hminga lahin ka nu a haw si, ka nu lahin a pasal leh a chhungte ngawt a ngaihven bawk sia.. A hrehawm ka ti takzet a ni" Awmteii chuan a ti a. Ka hnem thiam der si lo. 

Ka pa bulah thurochhiah vel chu ka sawi ta a. Ka pa pawh a inngaihtuah buai ve hle niin ka hria. 

"Tlem chuan kan ngaihven deuh a ngai dawn a nih hi.. " a ti chuar chuar a. Nu Puii chu ka nu a ni lo va, ka lawm. Fa te hlamchhiah thak khawpa mipa lawm lutuk hmeichhia ka ngaihsan loh vangin.. 

(Vawiin chu tarmit ka lei ve a. Ka mit ka hmang rim si a. Ka hawn hnuah ka rawn ziak chauh a. A sei thei lo aw.