Thinlung - 2

THINLUNG (2)

Ziaktu: Toni Râlte

Rosy chu nula fing fel leh titi thiam tak a ni bawk a. Ka nu leh pate nen pawh an inngaina nghal hle. Kei erawh chuan, ka hnaih vak duh lo. Lateii nen kan inbia a lo ngaihthlak atang khan.. Leh min melh dan ka lawm lem lo. Eng anga hmeltha pawh nise, min zuam ang ziazanga min melh sek thin hmeichhia hi ka mil vak ngai lo. Ka be chhe hran lo thung. Keini pawh class kan tan chho a, Lateii nen kan hlimna a la kal tluang ve zel e. Hlimi te thianho erawh ka hmu ngai meuh lo, kan department a lo inang lo bawk a. Lateii nen kan inzawm atanga ka nun danglam chu thiante pawn an hai bik lo va, "Lerh i bansan a. A lawmawm" an ti fiamthu fo. Ka nui ve mai zel. 

Tlai khat ka class bang chu Lydia leh Rosy chauh an lo awm a. 

Rosy chuan, "I patea a tlahniam thut a, damdawiin lamah an phei ta a nih kha.. " a lo ti vat. Patea hi chu aw, a bawksawp ve reng mai chu a nih hi. Nu Puii hi a fel em zawk a, tihian engkimah a kep a; ani hi nei lo se zawng a tlachhe viau ngei ang. Ka nu in min lo call zui ta bawk a, "Bawiha, hei a tha vak lo a, chhung leh khat pawh kan inkokhawm tan a, nang pawh chaw eikham veleh i patea te in lamah lo va phei rawh aw. Rosy te kha chuan in lo nghak mai rawh se.. " a rawn ti a. Rosy chuan chaw ei a siam nghal mawlh mawlh. Kan inbe tam lem lo. Chaw eikhamah ka insiam nghal a, ka room kawngka bulah a rawn ding a. 

"I kal dawn mi? Rawn lan ve pawh a that nen, Lydia awmpui a ngai sia" a ti thuphung a. 

"Nia, lo awmpui rawh. Hruai ve chu zan a ni sia" ka ti a. A rawn lut a, "Khaw maw i sam kha.. " tih pahin min kuai her a, a siam mawlh mawlh. A shampoo rim a nam chak chak, a no nalhin a fai ngang si. Mahse, chutiang zawnga en loh hram erawh ka tum. Kei aiin a hniam chhe lo va, min rawn melh zawk, a nui sak a. 

"I lan that loh te ka hlau ve alawm" a ti sep a. 

"Hhaa.. Va inlak luckna hun pawh a nih loh chu" ka ti ringawt a. 

"Mahse, i luck alawm" a tih laiin door bell a ri a. Rosy chu a chhuak vat. Kawngka chu a zuk hawng a. Kei pawh ka chhuk ve nghal. Ka rin loh deuhin Lateii leh Kuri an lo nia! Ka hamhaih zawmah. 

"Ehe! Teh hlawl che u chuan.. Min hrilh si lo va"ka ti ta ringawt. 

Kuri chuan, "Atea'n in chanchin a sawi a, rawn lan ve a tha kan tia.. Kan lo kal.. I inpeih tawh mi? " a lo ti vat a. Lateii erawh chuan Rosy daih a lo melh! 

"Peih a ni mai. Atea sawm phei ila, phei nghal mai ang u. Rosy, Lydia chu lo awmpui mai rawh aw.. Kan kal" tih leh kal ka rual a. 

Rosy chuan, "Umm lo ngaihtuah suh,. " a ti a. Kan chhuak zui nghal. Atea kan sawm phei a. Patea te in pawh kan thleng phei rang viau. An lo awm nual a. A fate nen hian Thanpuii vang khan kan inpawh tha lutuk lo naa, unau ta na nâ na chu mi hrang ai chuan kan inen dan erawh a dang deuh e. Kan thu ve ngawt ngawt rih a. Damdawiin lam chanchin kan ngaicháng a ni ber e. Lateii chu a ţawng duh mang lo va, mawlhtu nei niawm takin a ngawi ran reng mai. 

A beng bulah, "I mood a va chhiat hmel ve" ka ti sup a. 

A che hrat, "Kha nu awmdan kha ka duh lo" a ti teh ngawt a. Ka lo bo deuh hû mai. 

"Rosy kha mawle.. Min thik hmel tawp" naupangchhia zet hian a ti a. Ka nui suk. 

"I ngaihbel a nih chu. Ka u thiannu a nia, ka u ang a ni ve mai," ka ti a. 

"A hmeltha sia, i tan chuan ina awm a nuam ngawt ang" a la ti deuh deuh. Thik hi a nei khât viau a, Rosy a thik ve mial pawh chu lehlam zawng tak chuan a nuam phian tho. 

"Nang aiin hmel tha ka ti lo" ka ti zawi sup a. Ka patea fapa phone a rik takah chuan kan ngaichang a. A tawngkam atangin ka patea chu a kal chiah tih kan hre thei. Kal mai tura ngaih mah nise, a tawp tak tak a han thlen chuan min nghawng ve khawp mai. In vel chu kan singsa sawk sawk a, ţap thawm nen, kan chhangchhe viau. Lateii leh Kuri pawh anmahni veng ang maiin an che ve sawk sawk a, ka mit a tlung khawp mai. Patea ruang chu rei vak loah a rawn thleng a, Nu Puii a tap nasa kher mai. A hmangaih ve em bawk a. Ka khawngaih hle. Ruang pawh ka kil ve ta rih lo, Lateii te an awm ve si a. Han kilsan daih kha nuam an tih loh ka hlau a. Chumi zan chuan kan tlaivar ta a. Lateii nen pawh Rosy chungchangah inhauhna kan nei leh tawh rih lo. 

Pate thih sarhu lai vel khan Rosy nen inah kan awm tam bik zual a. Ka nu ten nuam lo a ti ang tih an hlauh vangin awmpui ve turin min ti thin a. Kan innel ve sâwt hle. Amah kawm nuam leh fiamthu duh tak a ni bawk a, kei pawn a hmaa ka lo ngaih ang kha ka bansan hret hret. Min beisei angin a awm ngai lem lo va, a bialpa thlalak te hial min entir takah chuan Lateii nen kan chungchangte pawh ka hrilh ve a, hmeltha a tih thu a sawi ve nasa. Lateii bulah pawh ka sawi nghe nghe. Ani pawn a thik ta vak lo. 

Zan khat erawh ka u meetingin a chhuak a, ka pa erawh an thawhpui pa damlo kanin a chhuak a, ka nu pawh tihtur a awm lo em mai tiin patea te inah bawk a chhuk a. Lydia lah chhun lamah a lo nuam lo deuh nge, nachhawkna kan pe a, a muhil hma ropui. Rosy nen bawk kan inkawm leh a. Tv kan en dun a. Kan titi a tam zawk mah. Thutthleng sei hmawr ve vea kan thu chu a thu thluang ta a, a ke chu ka mal chungah a rawn hlang ta a. Min nel satliah vangah ka lo ngai ve mai. 

"Imaa, ka ke hmawr kha hmet lawk teh, a na thin a. A za ka ti mai" a ti a. Kei pawh chuan ka lo hmet ve mai. A ti a dîpin khawih a nuam hle mai. A chawn te pawh chu a hlim zel a, "He lai pawh" a ti a, ka hmet ve zel mai. A hnu deuhah, "Ka lo malis ve dawn che mi? Ka thiam asin" a ti a. Kei tlai kan ban hnuah khan thenawmte kudamah tihtur awm lo tiin buhfai ka thiarsak ve a, ka hlawh ve nual nghe nghe. Ka lo rawl ve deuh tho nen, "yesii" tih pahin ka bawk nghal a. A tho vat. Kawr chhanah ka dar vel chu a hmet ta a. A sawi angin a thiam phian mai. 

"I kawr hi ka hlim mai aw" tih pahin a hlim nghal a. 

"I va mam reuh e.. Mipa ve si" a la ti zui. Ka rum nghut ringawt. Ka dar mai ni lo ka hnungzang te chu a hmetin a hrual vel a, ka hriat loh karin ka ngaihtuahna chu a kal peng daih nia! Mipa ka ni a, thisen lum thei, fit vanglai a ni bawk nen. A kut han thlak dan vel chuan dawr a dap riau a ni. Nuam ka ti tho bawk si. Ka zak ve tho bawk. 

"Umm.. A tawk mai" ka ti tham ţuak a. Thawh ka hreh viau, ka hnuailam dik lo a hmu ngei dawn sia. Mahse, ka thawh hma chuan ka taksa thlawp zaih hian a rawn bawk ta mai a! Ka meng phar awk mai. 

"Tian awm lawk ang. Reilote" a ti sar sar a. Ka zauthau nasa tawh si. A va hun lo e aw.mipa ka lo ni kher kher chu aw. 

"Rosy" ka ti a. 

Ka beng bulah a rawn thaw lum ham ham. Lateii nen kan nih atangin ka flirt ngai tawh si lo va, Lateii nen kan mudun ngai bawk si lo, zep loh chuan a nawmna lo pawh ve tawh laklawh chuan insum harsa tak a ni. 

"A dik lo, hei chu.. Ka dik lo a nia" ka ti hrâwk a. 

Min rawn kuah titih, "Pawi ka ti hleinem" a ti sar sar a. Eng nge Mawni a hmeichhia mahin a ngam te chuan ka ti ta mai. Ka zangthal a. A awmah a rawn bawk nghal thlawp. Ka lo kuah a. 

"Hetah lo hian aw" ka ti sup. A tho a, mikhual roomah a lut nghal vut. Ka inngaihtuah tho nain ka hnar zo thlawt lo. A hmel thain a itawm si a. Ka zui lut ta nge nge. Ni e, a thleng ta vek mai. A zei bawk a, zawngchhang zel tura min siam a tum ka ti ngam sak. Ka rin aiin a lo la nei tight lehnghal. Mi hur tak zawng a ni lo maithei. Mahse, ka lakah hian eng nge a duh? Min ngaizawng em ni ang? Bialpa a nei tho si. Ka hrethiam tawh lo. Ka mut hnuah Lateii lakah ka inthiam lo ve chauh! Rinawmna ka vawng zo lo va, hmeichhe dang ka mutpui ta chu a nia! Amah Lateii'n ka chungah hetiang hi ti ta se ka va na dawn si em.. Rosy chu hnar zel tawh tumin ka insang phek a, a hunah ka buai leh tho ang em tih erawh ka hre lo. 

Hun a kal ve zel a, Rosy pawh ka pehhel tang tang zel avangin hun thawl kan nei thei ta vak lo. Lateii lakah inthiam lo viau mah ila ka inpuang ngam si lo va. Hrehawm ti ru deuhin hun ka hmang. 

Inrinni zan a ni a, "Lo leng phei la, ka nu te an chhuak a" a rawn tih vangin leng turin ka insiam a. Ka chhuak tur chu Rosy chuan awmze nei zeta min rawn melhin, "Nuam takin aw" a ti zauh a. Ka nui ringawt. He nu zia hi mak ka ti viau mai. 

Lateii room thlang lam bathlarah kan thu dun a. Zan a thiang nuam hle. Kan kut kan inkhalhsak neuh neuh a, "Juice ka zuk la lawk ang aw.. " a tih mek laiin a phone a ri a. Ka hmuh ve hmain rang tawka lain a off hmiah. A hmel pawh a dik lo deuhin ka hria. Juice la tur chuan a chhuk a. A rei lem lo, a rawn thu chiah tihin a phone bawk a ri leh. A rawn call tu chu chiang vak loin ka zu hmu hman, "M" tih ringawt niin ka hria. 

"Ka'n be lawk aw.. Ka thiante an nia.. Shillong lam" a tih rualin a la nghal a. A kal sawn hlek bawk. Englishin an inbe zui nghal a. "Inleng ka nei a. Nakinah" a tih hnu lawkah a dah a. A rawn kal hnai nghal. A nui sáng a, "Shillong ka zin chak.. Ka ngai ka thiante" a ti a. 

"Kan la zin dun dawn nia. Chawlh veleh" ka lo ti a. 

"Tak tak aw" ka beng bulah a ti sap a. Ka bu nghut. Lungawi lohna tur la hre hran rih lo. Rosy laka ka phatsanna khan min la titìm ve deuh bawk nen. 

Ka kuah a, kan infawp.. Ka duhthawh leh ta riau mai. Ani pawh a thaw a rang tan viau. A hnute ka tham tawn tawn a, thutthlengah chuan ka bawh ta a, a rawn meng awk. 

"Tunah chuan ni lo.. " a ti leh sap. Ka duh a, nupui atan pawha ka hual a ni si a, ka khawih chhe leh ta lo phawt. Ngaihtha takin ka haw ve leh tak kha. 

Rosy chuan min text zeuh zeuh a ching chho ta a. Ka reply lutuk lo. Hlat ka duh, in khatah kan awm bawk si. Lateii nen kan la tha viau. Ka khawihchhiat theih loh ka bialnu te zinga awmchhun a ni a, ka ngainatna a zual bakah ka ngaisang tel bawk. Zanriah ei hma deuhin Rosy chuan pangpar tui a va pe a, a pe zo verandaa ka thu chu ka bulah a rawn thu ve a. 

"Ima, thil hrilh tur che ka nei asin" a ti a. 

"Sawi la" ka phone khawih pahin ka ti a. 

"Ngaih loh lamah ngai suh aw. I bialnu hi ka nau ex a nia.. " a ti ta mai a. Ka phu ve zawk mai. 

"Engtin" ka ti ringawt. 

"Ka hmuh hmasak ber khan ka hre nghal. Ka nau nen khan an ni rei ve em a, kan chhungkua chuan kan hre vek. Mahse, Naga lakah a phatsan a. Shillonga an awm laiin.. " a ti ta duah a. Ka lung a phu rang sawt mai. 

"Ti nge min hrilh? " ka ti ta zawk a. 

"A bialpa nen an live in tih i hria ang a, ka nau hi shillongah a la awm reng a, a bialpa nen an la inbiak reng thu a sawi a" a ti ta a. Ka ngawi vang vang ringawt. Sawi tur ka van a ni ber mai. 

"A bialpa nen an la inbiak reng chuan ti nge i ngaihzawn duh ka tia" a ti leh ta zel a. 

"An la inbia tih i chiang maw?" ka ti a. 

"Ka nau leh a bialpa thianpa hi an inkawm ve thin tho alawm.. A hre chiang turah ka ngai" a ti a. Ka awm a nuam lo viau. Lateii call dawn fo dan te, a hmel danglam zeuh thinte ka mitthla a. Thil dik lo chu a awmin ka hria. Mahse, chutin thutlukna ka siam ngawt ngai lo. 

"Hriatchian ka lo tum ve chhin dawn nia" ka ti ta ringawt a. 

"Keima lam vangah ngainsuh. Buma i awm ka phal loh vang a ni e" a ti a. Ka va melh kâwk, "Nang pawh bialpa nei chungin min mutpui a" ka ti ta hlawl a. Ka sawi tum ber pawh a ni chiah lo. Ka sawi zo tawh si. 

"Nia.. Mahse, bialpa ka nei tak tak hleinem.. Pawi tihna ka nei lo" a ti hmiah mai. A lut zui daih bawk. Ka ngaihtuahna a kal thui angreng viau mai. 

Zanah Lateii chu ka dawp ta a, "Ka thianpa Shillonga awm nen kan inbe pawp a, i naga bialpa nen inla inbiak reng thin thu a sawi a. Tin, in living bawk a, ka bulah lem virgin angin i insawi bawk si" ka ti ta hrep mai. A sawitu ten an sawi chiang thin bawk a, thil dik lo chu a awm ngeiin ka ring tawh. 

"Rosy khan a hrilh che a ni maw? Nia, ka ex ú a nih kha.. Muana u a ni tih ka hriat khan hetiang hi a thleng dawn tih ka hriatna a rei tawh" a rawn ti daih! 

"Eng nge a awmzia? " ka va ti a. 

"Muana khan min atchilh lo chauh a, ka hmangaih si lo. Ka mangang khan Mike (naga) kha ka thianpa a ni tho a tiin ka kawp der ta ringawt anih kha.. Living tih tak kha chu Mike in luahah kan leng ve thin a, chaw te kan ei fo mai. Chu chu an sawi punlun a ni mai. Nia, Mike nen kan la inbe zeuh zeuh, ka thianpa a ni miau a. Nupui pawh a nei tep.. I awih loh chuan ka biaktir dawn che nia" a rawn ti ta a. Ka lo awih leh vek! Rosy ka laka a awmdan te ngaihtuahin leh a nau chunga Lateii lo chet tawh dan ngaihtuahin dawt a sawi lo vang tih a hriat bik loh ve bawk a ni. Engkim a tha leh ta vek mai. 

Mahse, Rosy chu ka kamkhat ta tho. Nuam a ti lo nge, thla chanve a liam hnuah a pute inah a awm ta daih. Ka thawveng huai e. Min mawlh ve tlat thin si a. Bakah hnar a harsa thin si. 

Tibuaitu em em awm lovin hun kan hmang chho ve zel a. Mahse, chhungkaw lamah buaina naran lo tak kan tawk chho ta a. Kan rin loh leh kan beisei loh lutukin ka patea nupui Nu puii chuan pasal a nei thut mai! Chu pawh an thenawm pathlawi, a fate awmpui lo. La upa lem lo tak a ni! Ka patea lung em pawh an la phun loh chu thuhran, a mitmu pawh a la keh si lo va. Uire ang chu a ni mai awm e. Mahse, ka pa te lam chuan,, "Aa.. Kan naua kha a hrisel loin a bawrhsawm si a, i nu puii lah nu hrisel, harhvang tak a ni ve bawk nen, engmah sawi buai a ngai lo e. An induh a hnu.. A tha reng, a khua pawh a har lo deuh ang chu" an ti thei ta zawk a. Mahse, ka patea fapa Hminga chu a hel tlat! Hminga hi Thanpuii chhangtu a ni a, nupui nei ve tawhin fa erawh an la nei lo va, Hminga u hmeichhia leh mipa te erawh nupui pasal neiin an chhuak tawh a ni. A nu chu a hua a, an innghirngho ta fo mai. Ka pa an rawn pun thin bawk nen.. Hminga hi kei aiin a u a, mahse, an unau zinga ka kawmngeih ve ber a ni thung. Ngawi chet chet, luhlul zet mai a ni a. A nu pawn a lakah ngawhngawl a chhuah lutuk ngam bik lo. Nu Puii pasal U Rema chu pa sual tak zawng a ni lo, an nu nen an inthen chhan pawh kha an sawi danin an nu kha sumdawng ve thinin a nun dan a fuh chiah lo niin an sawi a. Tunah pawh pasal a nei leh daih tawh nghe nghe. Nu Puii a fan ve miau si a, tihtheih vak a awm lo. Hminga nen erawh an inbe hleithei meuh lo. U Rema lahin engmah thawh a nei bik lo va, Nu puii hlawh an ring ve mai kha a nia. Hminga tak hi chu schoolah mi ai a kal ve thin. Chutiang tehnuai an nih vang chuan ka pa te zawkin Nu Puii chu nawrin, Patea thih atanga thla 3-naah a lung kan phun ta mai a. Nu Puii te pawh man leh mual an inhlan zui ta nghal a ni. 

Hminga tan pawh han tihtheih vak awm hek lo, hel ru zetin an la khawsa ho a. Mipa a ni bawk a, a lungawi lohna a lang chhuak em em lo. Man leh mual an han inhlan fel hnu lawkah chuan U Rema chhungte lamin U Rema fate pahnih an va la chhuak a, Nu puii te bula chentir an tum ta a. Chu em em chu Hminga ngaihdan ni ta hek lo, an inngur nasa ngang mai. Tin, Hminga ka thiam vena bawk chu, Khatia an han inneih that takah khan U Rema chhungte lam an rawn lawr zingin, an intithu em em mai a. Engkimah rawn banin, Nu puii hlawh te chu a then a zar chan ve an rawn beisei a! A fapa awm ve reng ta chuan a ngaithei seng bik lo ve bawk a ni. Nu Puii hi a hlawh a tam chu thuhran, U Rema hi a lo duh ve viau niawm tak a ni. An pa sawi chu ihe lo va tihsak tum mi a ni lehzel a. U Rema te in lama lawi an ni lo bawk nen, a inthlahrung nge hriat va ni suh, a pawisa te pawh a then a zar va pek te pawh a ching a. Chu chu a tur ve rengah ngaiin thla a thar tawh dek dek chuan hlawh thenkhat beiseiin an lo vir ve chhen a niawm e. Hminga chuan ka pa a rawn pun leh ta hial a. Ka pa pawn a zozai a ti ve deuh nge, Nu Puii chu a ko chho ta hial a. 

"Rema fate school fees leh an mamawh i tumsak tawh aliama i hlawh hi chu chantir ve a tul lo. I fate nupa an awm ve a, in khata khawsa ho in ni. Hminga mitmei i ven ve pawh hi a tha a nia" tiin a kamkhat a. 

Nu Puii chuan ka rin loh deuhin, "Ka u, ka pasal a ni tawh a. Ka tan chuan ani aia pawimawh an awm hleinem. An ina kan awm lo va, ka ngaihtuah ve an ngai alawm. Bakah ka hlawh a nia, a sem chhuah lam chu ka thu thu a ni. Hminga te nupa ka ngaihthah pawh ni hlei lo.. " a ti ta mai a. 

Ka pa chuan, "A dik alawm. Mahse, Lutuk chin a awm ve a, khawsa thei lo zawk zawk pawh an ni hran lo. Inpuihtawn zel a tha. I pasal thi tawh inah i awm a, pasal i nei a, i lalut a. I pasal te chhungkua i ngaihtuah zawk anih chuan ngah nge an inah i lawi luh mai loh? " a ti ve ta hmak a. 

"Hminga te nupa an ngaihtuahawm sia lawm. Bakah mi ina va lawi lut chi ka nih tawh loh hi.. Ka kum te ngaihtuah la" a lo ti a. 

"Ni reng a. I va lawi ta lo rau rau, engkim engkima i fate mit tikham khawpa i va ngaihtuah hi a tul ber lo kan ti reng a ni.. Amah Rema chu mi tha a ni, kan hria.. Ani pawn i fate mitmei a ven ve pawh a ngai asin" ka pa chuan a ti a. 

Chutia ka pa nen an han inţim tak hnuah chuan Nu Puii pawh a zia ta deuh a. Keiin a rukin Hminga ka fuih ve char char bawk. Vawi khat pawh sundayah ka zuk leng thla a, Hminga nen zu kan in dun a. Kan in zo room atanga kan chhuak chu U Rema fa te pahnih hian fridge hawngin bawnghnute an lo tibaw nuai mai a. A u zawk hi kum 13 vel a ni a, a nau zawk erawh kum 9 vel a ni maithei. Hminga nupui Awmteii chuan a hau ta a. "Ka laksak ang che u ka ti mawlh mawlh a. Kha intihbuak kha.. Tifai vek ru" a ti hmarh hmarh a. Ani raino thinchhiat lai ni bawk nen. 

Naupang pahnih chu an in lamah an tlan haw a, rei vak loah U Rema farnu nula senior ve tawh lam te nen an lo phei leh a. Awmteii chu a rawn ankhum ta hrep ringawt mai. 

. "In nupa hian inhmu mawh lutuk a, eng emaw hlekah in hau reng a. In rilru chhiat dan em em hi.. " ti ang zawngin. 

Awmteii lah thinchhe ve sa ni bawk nen, "An hneawm em a ni. An rawn lut a, eitur an dap nghal a. An tihnawk a, ka thianfai leh vek a, an chhuak leh daih a. An sulhnu chhui reng hi ka kham tawh" a lo ti ve a. Ani hi chu kheuhbeuh chi a ni lem lo bawk a, a mo tirh pawn Nu Puii nen an inhnial hrep tawh. Lungawi leh ngjal mai chi a ni. 

"Mo i nih hi hre rawh. He in chhunga thuneitu hi Ka nau Rema a ni tih hi hre reng rawh u. Lo inlak lal vak kha zak rawh u.. " a rawn tih chuan ka sa ve zak. Mahse, Hminga'n min hmakhalh ta zawk a. 

"Ve a.. Ve lutuk a.. Haw mai teh u. He in chhungah hian i nau a lal ber maw? Haha.. Ka luak dawn.. I nauin ka nu a lo nei hi in lawm huam huam mang e.. A lal ber anih chuan min hnawtchhuak se la.. A ngam phawt chuan" a ti ta hmiah hmiah mai. Chu nu chuan chhan a tum mek laiin Nu Puii te nupa an rawn hawng ta a. Thil awmzia an han hriat chuan, mi mawl ni ta lo chu U Rema chuan, "Engi, i zahpuiawm lutuk, va haw vat rawh u. Awmteii hian a sawi dik chiah alawm. Ani raino awm nuam lo nen, in ti mah mah a ni" tiin a khap dai a. Nu puii tan pawh U rema chu lainat a awl viau ang. Chutiang chu an chhungkaw boruak a ni. Engtin tak kal zel ang maw.. 

"Duat, zanin chu ka bestie Mimi birthday party ah ka kal dawn a.. Remtih lohna te a awm em? " Lateii msg ka hmuh chuan ka ner deuh a. Min hruai tel a tum lo chu mak ka ti deuh. Mahse, rilru zim nih ka hlauh vangin, "Va kal rawh. Zu va in suh ang che" ka ti a. Lawmthu a rawn sawi. Mak ka tih ruk deuh chu, a thiante tu vak mah ka hre ve lo hi a ni. Min hmelhriattir lem si lo va, ka thiante erawh hriat loh a nei tawh mang lo thung. 

Dar 10 bawr velah ka call a, a la thei lo. A last seen lah 8:30 pm a ni daih si. Awm nuam mang lo zetin ka awm a. Ka mut a chhuak der bawk si lo. 

Dar 11 a pel tawh tihin ka thianpa Ramthar ami Sawma'n min lo call mial a. Eng dang a sawi lo, "Msg en teh" tih chiah. A dah leh vut bawk. Rang takin whatsapp msg chu ka en ta a. Ka phone ka thlauh lo chauh! Ka bialnu Lateii chu hnute lang hiaiin khumah a lo inpose chu niin, a ruih hmel kher lehnghal. A hnuaiah Sawma chuan, "Ka ex Lyni'n min lo thawn, an birthday lawmnaah a lo inphelh hle anih hmel.. In nu chu" a rawn ti.. Sa tak ka ni.. Sa tak.. Lateii ka call leh a, a switch off hmak! Ka khur der der thei nia! Eng nge tihtur ber ka hre ta lo. Ka ngaihtuahna a mang vek bawk. Lateii chu angel ang maia thianghlim hmuh khan ka lo hmu asin mawle.. 

Eng chhuanlam nge a rawn neih leh ang aw…?! 

(Buai a na 😢