Thinlung- 16

THINLUNG… (16)

Ziaktu: Toni Râlte

Thawk a han la leh halh a. 

"Pastor, Zothansanga fa ka pai mek a ni. Ani hian neih min tiam a. Tihian vakvai turin min hnutchhiah leh si, he inneihna hi a thleng thei lo" a ti ta a. Kan phu suau mai. Zothana chu ka va melh a, a phâwk dan chu khawngaihthla a la ngawih ngawih. A hrilhhai tih a lang reng mai si! Aruati tak pawh chu na tuar hmel a pu a, mak a ti tih a lang hle bawk. Kan ri ta nuai nuai a. Pastor tak pawh a hamhaih ve bawk nen, hetiang thil hi a la tawng ngai bik lo a nih hmel a, thu han zaizap dan tak pawh a thiam bik lo a ang khawp mai. A hnu deuhah mike atangin, "Le.. I ngawi teh ang u. Aw khawngaihin kan thuthmunah thu vek ila, he thil thleng hi a zia lo takzet a ni. Thil thleng khât tak a ni. Keia lo rel fel chi niin a lang tlat lo. Mo leh moneitu chhungte lam an inbiak a ngaiin ka hria. Tunah rih chuan inkhawm hi ţin rih phawt mai ang. Ka'n ţawngţai ang e" tih leh ţawngţai a rual nghal a. Kan sahâwk hulh tawh a, rilruah eng dang mah a leng thei tawh lo. Mipui kan ţin hul hul a, mo leh moneitu chhungte erawh an la thu khawm. An hmelah mak tihna leh hrilhhaina bak hmuh tur a awm meuh lo. Kha hmeichhia lah kha a la ding reng a, inneih thulhtir chu a tum hmel kher mai. Tu nge a nih ang? Ka hmuh vawikhatna niin ka hria. Hmeichhe hmel tha a ni lo a, a dawldangin a tla kuam si. A rai tak tak te pawh chu a ni maithei. Nge he thil phênah hian eng emaw inphum ru a awm zawk ni ang? Police rilru atangin ka lo chhut lo thei lo. Zothana hi ka hrechiang em em lo naa, ka hriat theih chinah Aruati hi a duh ve takzet tih ka chiang khawp mai. An han inzui pawh khan amah ka huata ka thik tak tak theih loh chhan chu ka hmangaih anga a hmangaih ve nia ka hriat vang a ni. Ngaihngam takin a kutah Ruatdiki kha ka hlan thei a nih kha. Tunah inneih ni ber kherin hmeichhia an rawn tlazep chu a nia! Thil dangdai tak zawng a ni e. Ka nu te nen pawh kan sawi ho ve nasa, Ka nu chuan, "Innei se a tha tur, Aruati tan pawh i tan pawh' a ti a. 

Ka pa chuan, "Zothana te lam zawk a ni ka khawngaih ni, an hmelah an hrilhhaizia a lang reng mai si. " a lo ti ve a. 

Nuteii chuan, "Awiii Aruati tak pawh kha a rilru a nat hmel tawp" a lo ti a. Hei chu kei pawn ka hmu thei. Keimah min hrechhuakin min hmangaihna kha nei let leh pawh ni se, a tun huna a lo pawm leh a neih hial tur Zothana'n khatiang a tawng kha nâ ti ve tur chu a ni. Na ti loin lawm viau zawk ta se, hmeichhe hmasial leh rilru chhe tak angah ka ngai ngei ang. 

Chanchin hriat a chakawm ve si a, Bella ka va text ta a, "Inneih thulh loh theih a ni si lo va, an thulh fel ta rih a nih kha. Kha nu kha Police lamin an la dawn a nih hmel" a rawn ti a. Ka kawm ve chak angreng hle. Dawt ngialngan taka inneih a kham ngam em chu ka ring si lo. A tak tak a lo nih teh chuan Zothana chu mak ka ti khawp ang. An inneih hi ka hringnun zawh leh zel tur atan pawh a pawimawhzia chu inhriat kha. Kei chauh ka ni lo, Isabella thleng pawn a nghawng thei. Chawhnu her tawhah Mimii'n min lo call a, "Lo phei ve ta che. Aruati hi rawn hnem ve rawh" a rawn ti a. 

"Engtin nge a awm? " ka tih chuan, "A ţap.. Aa.. A nun hi ka khawngaih em mai. A natna lah hian a la kiansan hlei thei si lo" a rawn ti bah nuaih a. 

"Aa.. Ka rawn kal vena chhan tur a awm lo. Inrawlh ka duh lo. Min hrethiam ru, lo hnem hram hram teh u" ka ti a. Phone ka dah daih. Ka nu eirawngbawl laiin a bulah ka va thu ve a. Inneih an thulh thu bakah Mimi min lo call dan te chu ka sawi a. 

"Naktukah Phei ula ka duh. He thilah hian Zothana te lam tan rinhlelh i kai thei dawnin ka hria. Va lan phei chu tum buai suh. " a ti hmiah mai. Ka ngaih dan chiah pawh a ni. Ruatdiki ka bialnu a lo nih tawh thin vanga an chungchang engkima inrawlh chu ka duh lo bur. Mahse, zing lama Mimi thusawi thenkhat, Isabella a sawi dante kha ka sawi a. A ngaithla uluk viau. 

"Mama, ka fing chu ka ti hauh lo va, mahse, Isabella ka hmuh khan hetianga hêm thlaka che duh tur niin ka hre lo a ni. Aruati ka demna lam ni lo se; A rawn harh chhuak khan a shock lutuk ang a, i nghah reizia leh a hun laia in induh theihzia te hrechhuakin a inngaibtuah lungpuam vak ang a. Mahse, Isabella nen in inzui tih a hre bawk si nen, a zeldin kualna hi a ring ta mai em mawni chu aw ka ti" a ti ta dap dap a. A ruka ka lo rin leh ngaihdan pawh ka lo siam ruk dan a rawn nem nghet chiah a. Ka lawm viau mai. 

Nuteii chuan bai chawk rawk rawk chungin, "Bakah kei chu mak ka tih chu, a hun laiin lo induh viau pawh ni ula, kum 3 dawn tisawn a hriatna a hloh a, a rawn harh chhuak a, Zothana a duh lo nghal ringawt saw a mak ka ti.. Nangmah vangin rilru hrehawm tho mah se, Kha chen lo inzui tawh an nia.. " a lo ti ve mawlh mawlh a. Ka nu chuan, "Aa.. Chutin Zothana laka a rilru chu a danglam chuang lo vang. Danglam vek nise nei tur khan thutlukna a siam bik nang. Ka sawi ang kha a nih ka ring. A rawn harh chhuak thut, Mama nen an hun lai a hre chhuak khan a lung a tino zual ang a, Mama hi a hmangaih ber ta emaw a inti a niang. Zothana nen hian innei tha hle hle nise, Mama hi a rawn vei zui tehchiam ka ring hran lo.. " a lo ti thung a. Ni e, Ka nu sawi hi ka pawm deuh mai. Aruati hian min la hmangaih em em vang lam ai mahin kan nunhlui a hrechhuak ta si leh Bella lo tlazep ve laklawh si khan a ni lo lamah a rilru a hruaipeng ta daih a nih ka ring. Inneih an thulh hi a pawi thlawt.. 

Atea leh Johny an rawn leng a. Ruatdiki te chungchang bawk kan sawi ho leh. Anni pawn Zothana thlavang an hauh deuh tlat zawk. Kan hriat tawh angin Atea te leh Zothana te hi chhungkhat an ni a, Atea sawi hmangin, Zothana chu a ţang nasa ngang mai. Kha hmeichhia kha a hmuh vawikhatna a nih thu bak sawi tur a hre lo a niawm e. A rilru a na hle bawk niin Atea chuan a sawi. A zahthlak bawk si. 

"Aruati chu a lawm zawk ang em le? " Johny chuan a ti sup a. Min rawn melh zauh bawk. 

"Lawm lo a niang, a tah nasat thu a thianten an rwn sawi tlat" ka lo ti hmuk a. 

"Tak taka na tur chu a ni, a zahthlak dawn ropui bawk si. An inkawp rei ve angreng sia" A ti ve leh thliam a. 

"Chuan, Isabella nen chuan mi naktukah chuan inphei dawn? " Atea chuan a ti a. Ka lo bu nghut. 

"Kei chu Bella kha ka duhpui che. Bakah a hausa ni lawm ni? I vannei lel lawl ngawt mai. Aruati chu hnawk a tam tawh em mai. An inneih thulh chhan velah an ngai palh ang che" Atea chuan a ti a. 

"Nia, bakah maw keima lam pawh hi ka dik chiah tawh lo nge, ka nghak rei ve bawk a, Aruati laka ka feelings hi a dal ka ti mai. Khawngaih chu ka khawngaih. Mahse, a hma anga bultan leh tur chuan ka thinlung hian a pawm hlei thei tawh lo a ni ber mai" ka ti ta a. Chu thu ka sawi chu ka thawl huai mai. Khang kum 3 chhung khan rilru rethei leh baihvai reng rengin hun ka lo hmang tawh a. Beiseina nen ke ka pen ve hram hram a. Amah vangin Lungleiah ka tlanchhe ta hial bawk kha a nia. Mahse, khatah pawh amah kha ka la nghak ru reng a, pasal a neih dawnah meuh erawh ka theihtawp phak bak a ni tawh tih hriain ka beidawng ta kha a nia. Isabella hi rawn lang lo pawh nise, tuna ka rilru hi ka put tho ka ring a ni. Tin, mi dang pawn min dem ka ring lem lo. 

Johny pawh chuan, "Bawiha, i tuar rei thawkhat tawh alawm. Tuman an thiam lo lo vang che. Amah Aruati pawn ngaihtuah chiang nise i laka intlahrunga thlah thei tur che a ni zawk" a ti ve a. 

"Nia, Tunah chuan Zothana zawk hi a khawngaihthlak ta ber a nih hi. A duh ve sia" ka ti a. 

Chaw ei pawh a tui nek lo ve. Zan tirah Bella ka call a, "Naktuk chu ka rual chuan i phei dawn em? " ka tih chuan, "Ih.. Aruati hi an boruak vangin Pa Thana ten ka bulah rawn awm rih se an tia.. " a rawn ti a. Ka nui hawk. 

"Aman a duh lo tawp ang" ka tih chuan, "A duh" a ti nghat. Lungawi vak lo awka in a ni a sawi ni. 

"A duh a maw? A haw viau che emaw ka tia" ka tih chuan, "Remruat, bansan mai ka duh a ni. Nang leh Aruati te hi ka thlah mai ang che u. Buaina ka duh tawh lo" a rawn ti halh a. A sawi awmzia ka bo deuh. 

"Inhmu lawk ang hmiang. I chhuak thei ang em? " ka ti a. 

"Ka tum dawn nia. Min rawn hruai la" a ti mial a. Phone atanga sawi fel theih loh a awm tlat a ni. 

Ka insiam sawk sawk a. Ka chhuak nghal.. Kan ina hruai phei mai ka rilruk ta mai. An chhungkua an buai rih bawk a, ani chhuah leh chhuah loh chu an bengkhawn vak a rinawm loh. Kan in lamah kan inphur phei ta a. A ngawi ran mai. Ka nu te nen rei vak lo an inbiak hnuah ka roomah ka hruai lut a. Khumah kan thu dun a. 

"Engtin nge ro an rel chiah? " ka ti a. 

"An buai khawp mai. Zothana an demna thu bak hriat tur a awm meuh lo. Pa Thana phei chu a thinrim hle tih a lang. I hming pawh an sawi ri lo thei lo va. Pa Thana chuan "Imanuela pawh harsa takin ka hmin a, ka fanu hnenah lah khawngaih ka dil phah bawk. Zothansanga'n a rawn tichhe ta vek a, ka fanu na takin a siam a, kan chhungkua kan zak bawk. Engpawhni rawh se, Zothana te nen chuan engtikah mah inzawmna kan nei tawh lo vang " a tia.. Ka ni te pawh an thinrim bakah Aruati hrehawm ti lutuk kha an khawngaih si. Boruak a rit khawp mai" a ti mawlh mawlh a. 

"A nih hmeichhia kha police-in an la tih kha a dik em? " ka tih chuan, "Ka hre chiah lo. Kha lam chu Zothana te buaina tur zawk niin ka hria.. Mak ka tih zawk chu Aruati sawn a hmangaih thin che tih chu ka hria. Mahse, Zothana hetiang a nih tak chiah hian Zothana a hmangaihzia a lang ka ti mai. A tuar na lutuk.. Chu chu nia mak ka tih em em, nizan lawkah tikhawp khan nangmahah a luangliam bawk sia" a ti a. Ka lo bu nghut ringawt. 

"A harh chhuak thut khan a shock lutuk ang a, keimah chauh kha min ngaihtuah a niang. Innei se engkim a fel mai tur. Kei chuan Zothana hi ka la ringhlel thei lo.. A mak lutuk, ka rilruah hian sawi thiam si loh mawlhtu a awm" ka ti a. Min rawn melh kâwk, "I ring ve tho maw? Kei pawh. Thil thlen thut dan ka ngaihtuah hian tu emaw ruahmanna a nih ka ring. Mahse, ka sawi chhuak duh lo. Nang leh kei heti hi kan nia, eng emaw zawnga an ngaih ka hlau em a ni" a ti ve a. 

"Bella, a mak a nih hi.. Kan lo phei kher kher hi a pawi ta ber niin ka hria. Kan tikhaw lo vek ni berin ka hre tawh" ka ti nghut a. Nuam ka ti lo tak tak. 

"A dik ang. Ka thiam loh a ni. Lo nawr loh tawp tur che a nia. Bakah Aruati bula kan chungchang ka lo hrilh te kha pawi ka ti. Khang vangte kha a niang.. Min huata hetia thil a kal" a ti a. A kut ka vawnsak vat, "Engpawhnise, kan pahnih inkar chu danglam phah suh se. Ka tiam tawh che a, ka tichhe lo vang. " ka ti nghet charh a. Ka inringtawk sawt bawk. 

"Pa Thana'n, "I U Bella amah chauhin a awm tho a, boruak thar te va hip la, va awm khawthawng rawh' a tia, Aruati chuan a hreh hmel ve tho. Mahse, i hriat kha a pa saw an hlau si a. Khatianga a tih tawh ber chuan kei chu hnawksak mai ka ni tawhin ka hria a, kan la inzui rei lem lo bawk nen.. Hun pek leh mai che u hi ka duh a ni" a ti zawi sap a. Chhuat lam a melh ran bawk. 

"I duh a maw? " ka ti ro huk. 

"Min la hmangaih chuang hleinem. A ni lo'm ni? " ka mitah tak a rawn melh a. Ka zâm lek lek. 

"Ka hre lo" ka ti bung nghut ringawt. 

"Kha chen i lo nghah tawh kha a lo thleng a. Lawm ber tur i ni asin" a ti sap a. 

"Ka lawm si lo chu a nih hi" ka tih rualin, "Chutak chu ka hnawksakna a ni. Ka lakah i inthlahrung a, laklawh deuhin i awm phah a nih kha" a ti ta chat a. 

Ka va hnaih hret, "Bella, i hre lo a ni. I rin dan hi a dik vek kher lo. Ni e, Aruati vangin Kum 3 chhung ka single a, ka nghak a nih kha. Mahse, khami chhung zawng khan hlimna ka hmu lo, hmuh a hnekin Zothana nen an chanchin bak hriat ka nei ngai lo. Dik tak chuan vui pawh ka vui ve thin asin. A tana mi pawimawh a chhungkua te leh a thiantha te a hriat chhuah theih laia kei a hmangaih leh amah hmangaihtu min hmaih bik kha ka vui fo mai. A tawpah ka bansan ve ta a. Ka bansan veleh tihian a rawn thleng leh a. Lawm viau tur ka niin ka inhre lo. " ka ti ve ta bawrh bawrh a. 

"Zothana pawh a hre chhuak chuang hleinem, bul an tan thar mai chauh alawm. Kei ngei pawh min hre lo" a lo ti a. 

"Ni e, bultanpui leh loh kha ka tum lo a ni lo. Chance ka nei ve tlat lo alawm. A u enin min en a, a rualpui zawk Zothana kha a tla na em em a, ka tan inrawlh ngam zelna chi a ni lo. " ka ti rum hawk. Ka thin a rim lek lek mai. Ni e, Aruati kha a natna vanga khatiang dinhmuna ding kan nih vangin ka vuivai rukna pawh ka sawi duh ngai lo. Keimaha ka awma ka inngaihtuah lungpuam chang chuan thin tawt leh rilru hrehawm takin ka awm ve fo. Amah dem zawnga tawngka cheh ka hreh thin a, tunah ka puak chhuak ve tawh a ni mai. 

"Aruati hi i hmangaih tawh lo em ni? " a ti tawl mai. Kei pawh ka bing deuh. 

"Chu chu chiang takin ka sawi thei lo. Ka hmangaih thin tih erawh ka sawi ngam. Tun dinhmunah chuan hei chauh hi ka duh, Ka kiangah awm rawh " tiin a kut chu ka hmer vawng vawng a. A inngaihtuah nge a ngawi vang vang mai. 

"Remruat" a ti sap a. Ka va melh, min rawn melh ve chiah. A mitmengah khan min thlakhlelhna ka hmu thei. A hnena thu ka tiam tawh vang ni loin he hmeichhia hian min mamawh tih ka hriatna hian kalsan lo turin min chelh ding tlat zawk a ni. 

"Min thlah tawh la" a ti a. 

"Lawk" tiin ka lamah ka pawt hnai a, ka fawp ta vawng vawng mai. Ani pawn min hnar lem lo. 

"Naktukah chuan engtin nge niang? " kan infawh zawh chuan ka ti a. 

"Ka hre lo. Kei chuan hnial ngaihna ka hre lo phawt" a ti dam thlap. 

"Chanchin min rawn hrilh leh la ; engpawhnise, an tih tlat leh kan pathumin kan phei mai aniang chu", ka ti a. 

"A tha lawm. Naktuk thut thut pawh an ti lo maithei. A bichilh ve deuh bawk a" a ti a. 

"Chuan, min ring em? " ka ti thut. A hamhaih ve deuh nge a ngawi dat. 

"Ring" a ti zawi sep. Chuta min rawn melh kiau chu a ni duhawm leh thlahlelhawm em em chu. Ka va thlah a. In chhungah erawh ka lut ve ta lo. 

Ka mu fel chiah tihin, Call ka dawng a. Zothan a lo ni. 

"U Imma, thil hi a va buaithlak ve le.. Ka rilru a na ngawih ngawih" a rawn ti a. A na thawkhat a niang, a thawk lak dan pawh a tawt hmel kher mai. 

"Nia tiraw? Mak ka ti. Ka hrethiam lo" ka ti ringawt a. 

"Min hrethiam la.. Aruati'n a lo bia che em? A hriatna a nei let leh tawh a, nangmah ka rinhlelh vang che ni miah loin eng emaw hi a awm niin ka hria a. a hmeichhia lah kha ka hre ngai chai si lo. Thil thlen dan hi a mak ka ti em mai" a ti bawrh bawrh a. 

"Kan la inbe miah lo. Biak pawh ka tum hek lo. Nia, i tan chuan ka rinhlelhawm viau ang tih pawh ka ring. Mahse.. He thil hi kei pawn engmah ka hre lo tak tak.. Kha nu kha i hre lo tak tak a maw? " ka ti a. 

"Umm ka vawikhat hmuhna a ni. " a rawn ti nghet charh a. 

"Police lam khan an la niin ka lo hria a. Eng nge in thu kal zel dan? " ka ti a. 

"Ka pa alawm. Ka pain, "A mualphothlak mai mai e. Kan fapa thiam loh leh dik lohna kan puangzar lek fang a ni dawn a. Engmah sawizui a ngai lo. Kan fapa hi a lo laktlak loh em a nih hi" a ti zêk a. An sezawl chhuah ringawt a nih hmel. Kei lah chhuah min phalsak lo va.. Min dem vak ringawt a. Ka thusawi tuman an ngaithla duh lo" a rawn ti bawrh bawrh mai. Ka khawngaih viau. 

"A va zia lo ve aw. I dik a nih chuan hailansak i phu alawm. Tu emaw ruahmanna pawh a ni thei a. Chutia thu leh pawh awm lo va tawp ringawt te chu" ka lo ti ve a. Zothana pa chu a tiawm ang lo hlein ka hria. 

"Ni e.. Chu chu a nia ka lo biak chhan che. Hmanni Lunglei lam i case chinfel dan te kha ka lo hre ve a, he case hi a rukin min laksak la ka duh a ni. Min pui hram rawh. Aruati pawh kei ai chuan i hnaih thei deuh ang a.. " a rawn tih chuan ka phu zawk. Khai aw! 

"Kei chuan engmah tihtheih ka neih ka va ring lo em.. Mahse, nia thudik hailan hi chu a tha alawm. Naktukah Lunglei phei mai ka lo tum asin" ka ti a. 

"Khawngaihin.. Ka dikna chanvo hi min haichhuahsak hram rawh. Tlang rawngin ka sawi ang, Kei chuan Ruatdiki hi ka ringhlel a ni. " a rawn ti ta a.

"I chiang maw? Ani pawn hrehawm a ti hle asin" ka ti a. 

"Ih maw, i laka a rilru putdan la danglam lohzia hi ka hria alawm. Kan inzui chhung pawh khan keimahah a duhkhawp a hmu lo ti ila sex lam ni loin a hlimna vawrtawp ka thlen ve thei ngai lo tih ka hria.. Khatia a rawn harh leh lek phei kha chuan inneih theih loh kha a duh ber dawn tih ka chiang a ni" a ti sak sak a. 

"Chu! Kei ber kher pui turin min ngen lawi si! " lungawi vak lo hian ka ti a. 

"A chhan chu a rukin i chhui tih tuman an rin dawn loh vang a ni. Mi dang ruai ila anmahni hnaih a ngai dawn a, an lo ringhlel nghal dawn.. Nang chu eng lai pawhin an lawm che tih ka hria alawm" a rawn ti ta a. A dik ve viau tho mai. A rilru a hahin a ipik ngang a niang, kei A nupui hualin a vei ruk mipa ber kher hnenah puihna a rawn dil a nia! Mipa inti tan chuan a tlawmthlak dawn lutuk. Zothana hian rilru kawi a put ka ring ta lo. 

"Ka hre lo le. Ka tiam thei lo che tih erawh hria la; ni e, tupawn kan dikna chanvo kan hmuh hi chu a tha a ni.. " ka ti ban chhalh a. Lawmthu a rawn sawi. 

Mutthilh a har mang e aw. 

A tuk zing ka harh rualin phone ka hmet nghal a. 

"Pa Thana te chuan vawiin tut tut lo deuha phei tur chuan min ti ta ngei e. Eng nge i ngaihdan? " Bella msg a ni. 

"Aw.. A tha alawm. La cham rih pawh a pawi lo. Thil buaipui tur ka nei ve tho a" ka ti a. Zothana puih chu ka rilruk ta a ni. Tumah erawh hrilh ka tum lo. Isabella takngial pawh. 

Tukthuan kan ei khamah Zothana nen inhmuh kan rilruk a, kha nu kha a hmasa berah chuan ka hmuh a ngaiin ka hria. An sezawl chhuah ngawt mai si a, mahse, Zothana fa tak tak a pai a nih ngat chuan kha nu kha a rawn inlar leh ka beisei. Inneih hial a kham ngam anih chuan a hnu lehah chuan rawn lang ngam lo tur niin ka hre lo. Ka nu te erawh chuan, Lungleia phei nghal mai kha min duhpui ru viau. Inveng ve reng renga khawsa an ni a. Mualpho a hlauhawm ve bawk a ni. Mahse, Ruatdiki lakah chuan inhamtan ka tum eih lo, mi mawl ka ni bik lo va, mi ten kan pahniha min hmuh dun pawh ka duh hek lo. Sawi a tam mai mai. Ka insiam mawlh mawlh laiin, Lydia a rawn lut a. 

Ka bulah a tâp hraih hraih mai. Eng emaw min dil a duh tih ka hrethiam mai. "Kya he.. Ka duat" ka ti a. 

"Ih maw.. Ih, zinga ka walk hian ka pheikhawk hi bun a nuam tawh lo lutuk a.. Chuan, ka thiante chu an nei class thei tawp bawk sia.. Api bula ka sawiin, 'A la tha' a ti tlat a.. " a han ti niah niah a. Ka khi suk. 

"Chuan, engzat man nge? " ka ti a. 

Phur zet hian,"A man pangngai chu maw 6500 a nia, an discount a. 4700-in.. A mawi tawp. Ka inhmeh dawn bawk sia" a ti zung zung a. 

"An rawn deliver dawn em? " ka tih chuan, "Umm.. Gpay hi apiin ka neih a la phal si lo va;nang chu i khawih tiraw? " ngenngawl zeta min melh hian a ti a. Ka nui hawk hawk. Ka phone chu hawnsakin, "Kha thawn rawh" ka ti a. Amah vek chuan pawisa chu a transfer ta nghal a. Ka biangah rawn chuks zauhin,"I hmeltha a, i fel ber" a ti zauh. He nau hi chu aw.. 

Kei pawh Zothana hmu tur chuan ka chhuak ta a. Ka thiante tlawh tur angin ka nu te bulah erawh ka insawi. Kan inhmuhna tur hmun ka thlen chuan a lo awm vang tawh. A punctual hle mai. A hmel chu a tla kuam mai, a mu mang lo tih pawh a hriat. 

"I rawn chhuak thei hram a maw? " ka ti a. 

"Aruati nen inhmu tur angin ka insawi tawp alawm.. Ka pa chuan a remti lo naa, ka pal lui hmiah" a ti hul hak a. 

Coffee kan chah a. 

"Kha nu kha ka hmuh phawt a ngai. A address te tal chu i hria ang chu tiraw? " ka ti a. 

Meng hnual rawih chungin, "Engmah ka hre lo. Ka chiâi vek avang khan ka fim si lo va, Biak ina ka hmuh bak kha ka hmu tawh lo hrim hrim. A hmel pawh kha ka hrechiang lo" a ti ta mai a. A va khirh tak. 

"I pa te talin an hria ang chu" ka tih chuan, "Ka ring lo. Amah ber ber khan chhuah mai turin Police pawh a hrilh kha a nia. A chang chuan ka pa pawh hi ka ringhlel.. Kan inneih theih loh hi a duh a niang ka tia" a ti bul hmuk a. A pa chungah chuan a lawm vak lo a nih hmel. 

"Aa.. Engpawhnise, Police lam pawh ka lo be pawp dawn nia. Insezawl chhuah chu a pawi takzet a ni. Nang pawn i nawr ve ik lo a" ka ti a. 

"Ka hamhaih vek tak tak. Aruati lahin min ankhumin a tap nasa tawh bawk sia.. " a ti a. Ka hrethiam tho mai. 

"I fa a pai tak tak a nihte chuan inneih pawh a kham ngam a, a rawn dikdak leh ngei tur a ni" ka tih rual rualin, "Nang pawn ka fa a pai a nih i ring ve tho a maw? Ka ni lo. Pathian hmingin Ruatdiki nen kan inzui hnuah vawikhatmah ka la pelhe lo" a ti ta thak thak a. A sen ţan ţan bawk. 

"Inbengdai la.. Hahdam tak khan awm teh.. In inneih duh lotu 158.33333333 angah ngai ta ila, Ruatdiki chu a rinhlelhawm ber chu a nia. Mahse, Inneih hi duh lo takzet ni se inneih hma zanah ngei pawh khan inthulh tawh ang. Amah berin a duh loh miau chuan a chhungte sawn an nawrlui lo vang.," ka ti a. 

"Chu chu a nia min tibuai ve thotu chu, inneih duh lo nise engvangin nge Biak inah a rawn kal ang? Bakah rilru nat hmel taka min ankhum te kha lemchan mai mai ni chuan ka hre si lo. Amah bak han rinhlelh tur ka hre chuang bawk si lo.. A chhungte chu ka lama tang vek an ni si a" a ti a. Ka ngawi vung vung ringawt. A nu pi Dini ka mitthla a, Bella sawi kha thudik a nih chuan Pi Dini hian ruahmanna a siam ve pawh a ni maithei. Chutah pawh keimah nen a la inkungkaih kual tho. Huiham.. Keimah vang vek nia ka hriatna hian min uai rit lutuk. 

"I theih ang angin kha nu kha hriatchhuaha zawn hmuh lo tum la, keiin Ruatdiki te ka lo mitmei thung ang. Hmanhmawh lo ila, chuan, thil hi fel ta se, Ruatdiki hi neih leh i tum tho ang em? " ka ti a. Ka en chiang kher mai. 

"Ka hre lo chu chu. Ama ruahmanna a nih loha engmah a hriat ve loh chuan, amahin a hreh a nih loh bawk chuan ka nei ang. Duh leh ka ru tawh mai ang" a ti sup sup a. 

"A tha.. Keimah chu min vengthawng lo ka, Aruati dinhmun khi a khirh ve hle tih i hriatthiampui a ngai a ni. Kan nunhluiin a tibuai a, nang i awm tawh bawk si, khawngaihthlak tak a ni" ka ti a. 

"Umm ka hria alawm. Anih thil ka zawt ve ang che aw.. Aruati hian umzuiin vuan ta che se la;, bul i tanpui leh ang em? " a ti ban chhalh a. 

Coffee ka dawt khulh. Insangmar ru chungin, "Ka ring lo. Hnawk a tam tawh a" ka ti a. Zothana hi a hma chuan ka elpuipa a ni thin kha a nia. Tunah chuan, ka khawngaih a ngai ta zawk chu a nih hi.. Zothana a nih vang lam ai mahin, Police ka nih ang pawhin thudik chu hai chhuahsak turah ka inngai ve bawk. 

Kan la awm mek laiin Mami'n min lo bia a. "Mam, i phei ta lo tiraw? Tunah hian Hotel Eros -ah min kalpui teh. Ka mamawh che" a rawn ti ta mai. 

"A va hmanhmawhthlak ve mawle.. Tunah khaw nge i awm?" ka ti a. 

"Kan dawrah ka awm.. " a rawn tih chuan, a hla lo bawk a. Zothana nen thu inchah mawlh mawlh chungin ka chhuak ta vut a. Mami chu ka va lam a, a hmel phelh phang leh mitmeng rum âl atang chuan thil thleng a awm tih ka hre thei mai. Ngawi renga kan tlan hnuah, "Vawiinah ngei hian ka man chhuak dawn a ni. Ka thiannu Lti kha i hria em? Kha khan Hotela an lut dun lai a lo hmu a, min lo call nghal a ni. Sarah dawra a rawn kal loh danah ka lo ringhlel ru reng a, Mama lah zing atangin a phi sek a, Dawrah ka rawn kal hman lo, ka hna dilna tur document tihfel ka ngai a' a tia.. Ka rin ang ngeiin thil a thleng a nih hi. An hre khawp ang. Mi tenawm pahnih chu" a ti bawrh bawrh a. Heti taka a thinrim hi ka hmu ngai mang lo. A awm ve bawk e. Hotel pawh kan thleng ta thuai a. Manager chu vai a lo ni! 

Kan kal chhan chu ka han sawi a, "Kan mikhualte hming kan tlangzarh thei lo" a lo ti ve khanglang a. An rules a ni tih chu ka hre tho. Mahse, thinrim hmel takin, "Police ka ni a, khami te kha kan mi um mek te an ni. Min pui lo anih chuan i tan a la pawi zawk ang. An room no sawi vat la a tha viau ang" ka ti ta a. Vai tih takah a meng ang zuk zuk a, a dawihzep tih a hriat ngawih ngawih. Register chu phawrhin a en thla dan dan a, "Room no. 109" a ti sup a. Mami nen kan kal nghal. Mahse, kawng min lo hawn duh ta lo se tih ngaihtuahna ka nei thut a, Room service rawn let mek rawlthar ria thing theng chu ka chelh ding chawt. Thil awmzia ka sawi a, mizo a ni bawk a, a hrethiam rang khawp mai. Min zui ta nghal a. Room bulah kan ding ta ran mai. Room service chuan, kawngka kikin , "Room service " a ti lauh lauh a. Reivak loah a rawn ri rak a, Mama ngei mai chuan tawnzau leh boxer chauh hain a rawn hawng ta a. Min hmuh rual chuan a tawlhnung dawrh. Mami chu kawngka chu hawng zauin a lut nghal rawp. Khumah chuan Sarah chu rizai sinin a lo thu mu a, saruakin a awm tih a hriat mai. An hamhaih ve bawk a, sawi tur reng reng an hre lo. Mami thinur leh rilru na lutuk chu a khur dawt dawt thei.. 

Mittui tling pam chungin A pasal chu a melh a. "Tunah chuan engkim ka hmuin ka chiang ta. He hun hi ka lo nghak thin a. Ka mit ngeia ka hmuh hunah chuan kal bo hlen mah ila min dem thei lo vang ka ti thin. Ni e, ka hmu chiang ta khawp mai che u. Chuan, engkim ka titawp bawk e. Sum ka chhuah ang. Engtikah mah ka rawn let tawh dawn lo va, ka fapa pawh ka ta a ni bawk ang. Inkal thui ta sa sa, Sarah hi nei ang che. I fapa hringtu aia i duh leh i thlan a ni bawk a. Innei ang che u. Chuan, Sarah, i hna atangin i bang tih i lo hre bawk dawn nia.. Kan rawn tibuai che u a, tihpalh.. Chhunzawm leh tawh rawh u" a ti kalh kalh a. A tah mai loh nana a inthunun nasatzia ka hria. Ka unau neihchhun a ni a, ka lainat takzet a ni. Mama chu tawng tumin a ang zuau a. 

"Engmah sawi ngai tawh lo ve. Engkim a chiang tawh. Ka farnu i tihnat man hi chu i rulh ve a la ngai ang. Pa takin le.. " tiin a darah ka beng thak thak a. Ka hnek chak kher mai. Mahse, thil a khawlo zo dawn si a. Mami ka kai chhuak a, hawi let eih loin hotel chu kan chhuahsan ta a ni. Chumi tlai la la chuan Mami te nufa chu an rawn let ta a. Mama chhungte pawn sawi tur an hre lo. Keini lam pawn engkim a tawp tih kan pawm. An rethei lo vang, mahse, Phatsanna azawnga phatsanna na ber hmanga an nupa inkar khi chat erawh chuan nghawng a nei mahna le.. 

Zothana ngenna tihhlawhtlin a ngai si. Hreh ru chung chungin Pu Thana te in chu ka pan ta a. An kawt ka thleng a, ka lut hreh ngang a niang. Ka let leh ta ringawt. Kha nu an hruaina station lam ka be pawp ta zawk a. Ka thiante pawh an la awm ve a, a harsa lo turah ka ngai. Annni pawn, "Venghluia an awm thu leh an khawsak a harsat ve thu a sawi a. A mipa lam khan ngenna an rawn siam sia, kan kaltir ta ringawt kha a nia. A bak engmah kan hre bik lo" an rawn ti. Venghluiah an awm tih tal kan hria a, a lawmawm. E! A hming pawh Nunpuii a nih tak kha.. Kawng chu a awm ngei ang. He thilah hian keimah ringawt chuan hun ka duh rei dawn tih ka hriat vangin Isabella hrilh ve mai chi niin ka hre ta a. Ka call nghal. 

"Rawn kal ka tum zet a, nuam ka ti ngang lo va. Ka let leh daih. I buai em? " ka ti a. 

"Chhunah pawh min rawn be si lo va, i buai viau anih ka lo ring a. Buai lo e. Hei inchung zawlah ka awm mai mai" a rawn ti a. 

"Vawiin chu Zothana nen kan inhmu alawm" tiin bul ka tan a. Kan buaina chungchang leh kan thiltih mek chu ka hrilh fai ta vek a. 

"Bella, i rinngam ang tih ka ring.. Zothana ka khawngaih vang lam ai mahin keima tan pawh ka bei a ni. Sawi duh se mi hian min ringhlel ru thup tih ka hria.. Tin, ka hna a ni bawk a. Zothana dikna chanvo hi hmuhsak a tha ka tia.. Min puih a ngai a ni" ka ti ta a. 

"Zothana chu a va lainatawm ve aw.. mahse, Remruat, Aruati a nih hi chu ka ring thei lo a ni. Tunah pawh roomah a tawm tlat a, tumah a be duh lo. A khawngaihthlak zawk.. " a ti a. 

"Aruati thiltih a nih rin lohna chu kan nei ve tho.. Mahse, inneih duh lotu chu amah bak ni theiin kan hre si lo a ni" ka ti a. 

"A dik alawm. Mahse, inneih kha a duh. Aruati ai chuan mi dang rinhlelh tur an awm ang" a rawn ti a. 

"I nî" ka lo ti sup. 

"Maithei, mahse, khatiang ruahmanna a siam ngam ka ring lo cheu" a ti leh bawk si. 

"I pa Thana" ka ti a, kei pawh ka tho hluai. Engvangin nge Pa Thana hi kan lo hmaih? Ni e, inneihna thlentir loh a hlauh vanga ka hnenah ngei pawh khawngaih diltu a nih vang kha a ni. Mahse, ruahmanna siam thei tur khawpa huaisen leh rorum chu amah bak an ni tlat lo. 

"Ka hre lo le.. Chuan eng nge ti tura min duh? " a rawn ti a. 

"An vai khan an chetzia, an kalna, an mibiak te i theih chen chen lo hriat tum la ka duh a ni. Khawngaihin" ka ti a. 

"Ka lo tum ang. Anih chuan kan la chám deuh a ngai dawn tihna ni maw? " a ti a. 

"Nih mai chu.. Pawi i ti em? " ka tih chuan, "Ti hran lo e. Mahse, Anmahni lam hian phei turin min ti ta se.. Eng nge ka sawi ang? " a tih chuan.. "Ka tel loin in phei dun a nga a ni mai" ka lo ti a. A pawm ve leh thliam mai. 

Isabella vangin tlemin ka ngaih a ngam tan ta. Tihtur awm hek lo ka mu ta ringawt. Mami te leh ka nute erawh an la meng thung. Naktuk zinga bungraw zuk lak an rel niin ka hria. Lehlamah ka nu te khua a har lo deuh ang a, a zia tho mai e. 

Teteii msg ka dawng nawlh. "Aruati nen kan inbiakna ka lo thawn ang.. Ka khawngaih tawp" a rawn ti a. Ka chhan hma hmain a rawn thawn nghal. 

Teteii: Zothana hian hetiang a tih hi rin harsa ka ti. 

Aruati: A ti miau sia lawm le. Kei pawn rin harsa ka ti tho. 

Teteii: I ngaidam thei lo mi? 

Aruati: Ngaihdam pawh min dil hleinem. Min rawn be lo hrim hrim. Ka hriatna ka nei leh tih a hriat khan min neih hi a duh ta lo zawk a nih ka ring. 

Teteii: Ni ve thei tho. Mahse, a duh ve em che a. 

Aruati: U Imma nen ka khaikhin thin a. An inang hlawl lo. Ani kha chuan hmeichhe dang mutpui chu sawi loh kei takngial pawh kha min khawihchhe phal lo va, a insum thei em em a, mipa dik tak a ni. Zothana erawh min hmangaih em em anga langin tihian hmeichhe dang a lo mutpui reng si. 

Teteii: U Imma lam chu sawi lo vang. I rilru a na mai mai. 

Aruati: Te, engkim hi a pawi zo vek a ni tiraw? Ka hriatna kha lo let lo law law zawk se tha tur. Tunah chuan U Imma thinlungah kei aiin Bella a lian tawh zawk a, a tan engmah ka ni tawh lo. Kei erawh Zothana ka theihnghilh thei chuang lo va, U Imma ka hrereng bawk si. Rilru hrehawm reng rengin ka awm tawh dawn a nih hi. Zothana nen hian innei ila chuan U Imma laka ka rilru putdan pawh a dang ve tur.. 

Teteii: Kawng a la awm maithei asin. Bella nen te chuan an la inzui rei lo e. U Imma pawh hian a la theihnghilh lo che tih ka hria alawm. 

Aruati: Aih, ka beisei ngam tawh lo. Kha chen ka tihrehawm tawh a. Ka chhungte pawh ka hriatchhuah theih laiin ani kha ka hrechhuak zo lo va, ka dam loh tirha a rawn len thin lai pawh khan min ngaihsak em em, mahse, Zothana ka ngaihsak zawk a. A tan khan a lo hrehawm dawn em mai. Kum 3 chhung keimah vangin a single a, tunah Bella a kawp ve leh chiah a. Ka tina duh tawh lo. An tan hnawksak nih pawh ka duh hek lo. 

Ka chhiar chhung zawngin ka thaw mang lo. Teteii'n min rawn thawn chhan chu ka hre lo, Aruati khawngaih ila nihpui leh ila min duh niin ka hria. 

"Tete, a sawi dik alawm. Kum 3 chhung khan Aruati hi ka sûn zo tawh a ni. Tunah chuan hlim hi ka phû ve tawhin ka hria. Beiseina siamsak pawh ka duh lo. Thian tha tak nih erawh ka tum" tiin ka chhang ta a nih kha.. Isabella ka mitthla pah tih pawh ka zep lo mai ang e. Ka thinlungin min hrilh angin ka che a, ka lo tisual ta a nih leh ka thinlung hi ka dem tawh mai a niang chu.. 

Dar 11 a ri tep tawh tihin, Pu Thana'n min lo call tehmial a. Ka hlauthawng ve ringawt. 

"Imanuel, khawngaihin lo phei mai teh a.. Zahthlak viau mah se, Aruati hi kan thunun thei tlat lo. Mi â ang maiin a khawsa a ni.. " a rawn ti ta mai. Hei vang hi a nih dawn hi Isabella nen kan intex laia Bella a reh hmak ni. 

"Aw le" ka ti ringawt. Ruatdiki vanga ka buaina hian eng chen nge maw a awh dawn le..?! 

(Dam chuan Mondayah inhmuh kan tum leh theuh dawn nia.. Lo dam ang che u 😍