Thinlung - 15

THINLUNG.. (15)

Ziaktu: Toni Râlte

Ka nu ka ko lut a. Thil thlen dan chu ka sawi ta a, a chek hlak. Khumah kan thu dun a, sawi tur pawh ka hre lo. Ka nu thurawn ka ngaichang tawp. 

"Mama, Pathian remruat hi kan hrethiam lo fo thin. Mihring kan ni miau a. Kha chen Aruati i nghak a, hmeichhe dang reng reng ngaihsak lo leh ngaihven miah loin. Tunah i nunah Bella i lalut a, Aruati lah naktuka pasal nei mai tur a ni. Ngun takin ngaihtuah la; Aruati hi i la hmangaih tih ka hria, tukina a hmel i hmuha i awmdan atang khan engmah ka hai lo. Mahse, tihian han ngaihtuah teh, Aruati i thlan avanga tawrhna hmachhawn tur mi pahnih an awm phawt. Zothana sawn i hmangaih ang tho khan a hmangaih ve tih hria la, Isabella hian risk lain a zui bawk che tih theihnghilh lo la.. Aruati i hnawl avangin nang leh amah erawh in na thung ang.. Kei chuan chutiang chuan ti rawh tiin ka nawr thei lo che. Rilru fim tak hman hun aw" a ti dap dap a. Ka sahal tlat! Engmah ka ngaihtuah tak tak thei lo. Naktuk an inneih ni a ni mai tawh si, keimah vangin thulh ta se.. Huiham.. Isabella leh Ruatdiki hmel ka mitthla chhawk zut zut a. Ka thawk a sak. Ka phone a rawn ri a.. Isabella a ni. Ka nu melh zawk chungin ka la a. 

"Lo phei la.. Aruati nen insawi dun a tha ka ti" a rawn ti ta a. 

"A chhungten an hre ve em? " ka tih chuan, "A pa chuan a hre lo. A bak chuan kan hria" a rawn ti a. A aw chu a rit, a ngui hle bawk. 

"Eng nge i ngaihtuah ve" ka ti sup a. 

"Engmah.. Ka ruak vek" a rawn ti tawl. Bella ka biakin amah ka khawngaih a, Ruatdiki aw ka hriatin ka tuiral bawk si. Ka thiam loh nge ka chunga Pathian thil rel dan ka hrethiam lo zawk. Ka hlauh ang ngeia vanduaina lo hnai leh ta chu ka sehhelna hian a buan hneh meuh lo a ni. 

"Nu, eng pawh nise, ka va phei ang a, Aruati pawh ka va be ve ang e" ka ti ta a. 

"Aw chu chu a tha khawp ang. " ka nu pawh chuan a lo ti a. Ka chhuak zui ta nghal. Ka thiante pawh engmah chu ka la hrilh lo. Tihngaihna an hriat bik ka ring lo. Aruati te in kawtah chuan ka ding ran a, ka lut ngam lo tawp mai. Ni e, ka zak. Engtin emaw ka awm a ni ber. Bella ka call ta tawp a, kawtah ka awm tih a hriat chuan, "Hetah inchungah rawn tlang rawh. Inchung zawlah kan awm e" a rawn tih takah chuan, in chhung atanga min hmuh theih loh dan tur bera biru chungin stepah chuan ka pen chho pawk pawk a. Ka han thlen chhoh chuan, khawthlang lam hawiin hmeichhe pahnihte chu an lo ding ran a. Thli a thaw deuh bawk a, an sam a chhem leng vawn vawn mai. Zawi muangin ka pan phei a, ka aw ka thian nghal kharh. An rawn hawilet rual ţhawih a. 

An pahnih chuan ka melh tawn sek a. Sawi tur reng reng ka hre lo. Aruati aiin Bella chu 2 inch velin a sang hret ang, an hmel leh pianzia a inang a. An danglamna chu an mizia chiah a ni mai awm e. Tu zawk nge hmelthaa piannalh zawk thlan ngai se, harsa ka ti viau ang. 

"Inpahniha insawi dun a tha. In hnuaiah ka chhuk ang a, tikhan lo inkawm r'u.. Remruat, hei hi hria la ka duh, min vengthawng lovin i thinlungin a hrilh ang che khan ke pen ang che.. Kei chu ka tha.. Nang pawh Aruat, ka unaunu, ka hmangaih leh ngainat em em i ni a, eng thutlukna pawh siam la, i laka ka rilru hi a danglam dawn lo a nia.. Ka kal aw.. Rilru fim takin le" Isabella chuan zangkhai zetin a ti ta zung zung a. Ka lo melh hâw ringawt. A chet dan confi leh zangkhai viau chu mak ka lo ti. Mahse, a insanmar ruk nasatzia erawh a kut hum ruh dan atangin ka man thiam ve mai. Koh zui hman lo va min kalsan tak avangin Aruati nen chauh chuan kan awm dun ta ran mai. 

"Aruat.. I tha em? " ka'n ti ngawt a. 

"Umm ka tha chuan ka hria. Mahse.. " a ti hnual raih a. Ka va hnaih deuh a, ka insi thawthang a ni mai. 

"Engkim a buaithlak tawh sia tiraw? " ka ti a. 

"Zothana hi ka nei duh lo a ni. Engtin nge nangmah hrereng chungin mipa dang bulah ka chen theih ang? " a ti ta a. 

"Engmah hi hrechuak lo twp zawk la a tha tur.. Zothana rilru a na dawn asin.. Isabella pawh" ka ti ta tawl a. Sawi a hun ber lo tih ka hria, mahse, ka pik mup mup si a. 

"Nia.. A dik.. Engkim hi ka thiam loh vek a ni. Hriatchhuah ka tum nasat vangin ka taksa thlengin a tawrh phah a. Ih maw, ka hriat chhuah hma che pawh khan eng emaw hi chu a awm tawh alawm. Nangmah ka hmuh che khan ka chhungrilah hian ka sawi fiah thiam si loh eng emaw hi a rawn awm thin. Mahse, i nau ang khan min en bawk si a. Ka chhungte ka zawh lahin ka duh ang chhanna ka hmu thei si lo.. Inzawmna eng emaw lo nei tawh angin ka hre thin. Mahse, tikhan i awm bo ta daih a. Kei pawn ka ngaihtuah zui ta bik lo. Zothana hi fel ka tiin min duh ve tak tak niin ka hria a.. Mahse, kan awmdun lai reng pawh hian keimahah kim lo eng emaw hi a awm thin. Chutak chuan ka rilru pwh a tihah thei lutuk. 

In rawn phei hmaa in ina kan kal tuma in chhungkaw thlalak ka en khan, engtin emaw ka awm leh a. Ka rawn biak che pawh hian feelings ka nei thin. Ka rindan chuan, 'U imma nen hian eng emaw tak kan tidun tawh a niang' ka ti thin. Bella'n in chanchin min hrilh chiah khan ka hriatthiam miah lohin thikna a rawn awm ringawt a. A chhan ka hre bawk si lo. Ka dik lo chho ta a. Khami hma pawha mumang ang deuha chiang lo ruaia ka lo hmuh thin te kha a rawn fiah ta tial tial ka ti mai. Ka ngaihtuah lui ta vak vak a. Damdawiin kan thlen hma khum bula ka tal buai hma khan ka hrechhuak vek tawh.. Mahse, ka lu kha a keh mai dawn emaw tih turin a na a. Ka tuar thei ta ngang lo a nih kha.. 

Ih maw, ka hrechhuak vek tih hi ka zep hlen zawk mai ang ka ti a. Mahse, ka thei lo.. Ka thei thlawt lo a ni. Kha chen ka lo hmangaih leh min hmangaihtu kha ka hre tawh tih haider lui tur chuan lem ka chang thiam tawk lo a ni e.. Ka tihpalh aw. Min ngaidam rawh" tiin a ţap ta zawih zawih a. Awm dan ka va thiam lo tak em. Ka khawngaih ngawih ngawih bawk si. A samah ka va chul a, dimtein ka lamah ka pawt hnaiah, ka awm nghengin a tap ta bawrh bawrh a. Chubak tihtheih ka nei rihin ka hre lo. 

"Aruat, Pathian thil rel dan hi kei pawn ka hrethiam lo a ni. Sawi tur pawh ka hre lo.. " ka ti tham ţuak a. Ka lungphu tin chu, 'Ka hmangaih che' tiin an au chhuak niin ka hria. Hmel phelh phang leh mit sen râm chungin a rawn hawi chhuak a. Thla eng chuan a hmelthatzia chu a rawn pholang chiang kher mai. Inngaitlawm leh kimki, mahni inthiam loh ngawih ngawih hmel min hmuhtir avang chuan ka tuiral a ni ber mai. Ka khur thei hial. 

"Min hua em? Kha chen kha ka lo hrem che a. Ka hriat chhuah hun che nghakin i lo tuar ve ngawt ngawt a. Kei lahin Zothana ka pansan che a. Eng thil nge ka tih hi le.. Engtin nge ka mipa hmangaih em em hi ka hriatchhuah loh theih? " a ti mawlh mawlh a. Hetiang zawnga min nawr chuan mipa hian a thutiam a theihnghilh thei mai dawn e a.. Bella.. 

"Ni lo, engmah i thiam loh a awm lo ve. I natna zawk ania. Ka dem reng reng lo che.. Dem che a hnêkin ka hmangaihna che a la pangngai reng. Mahse, Aruat, kan inkarah hian Zothana leh Isabella an ding tawh si a ni.. Chu chu kei pawn chinfel ngaihna ka hre bik lo" ka ti a. 

"Ni e.. A dik a ni. Bella lah ka unaunu, baihvai em em a ni a. Keimah vanga na a tawrh ka duh lo. Zothana lah kha chen min nghaka min dawm hram hramtu a ni bawk a. Aa.. Thi daih zawk ila ka duh a ni" beidawng zeta a tih chuan, "Chutiang sawi hlek suh" tiin ka kuah thlawp a. Ani pawh nghet zetin min kuah ve bawk. Tuna kan dinna lei hian khawvel dang daihah min thlawh bopui daih mai se ka va duh êm.. Ani hi ka la thlahlelin, Ka la ngai ngawih ngawih asin. 

"Inhmangaih takte pawh hi an duh vang ni miah lo va an kal hran a ngai thin asin" ka ti sup a. A rawn hawi chhuak.. "Zothana chu ka nei ang maw? " mittui luang zawih zawih chung hian a ti a. Ka tuar thei ta ngang lo. A mittui chu hruksakin, a hmuiah ka fawp ta vawng vawng a. He hmui suangtuah hian zan tam ka lo tal tlaivar thin a ni lawm ni? A taksa peng tin khawiha chulsak leh chak reng rengin ni ka vuiliam thin anih kha le.. Tunah ka khawih theihin a awm ta chêng a, ka va hlimin ka va phur si lo em.. He hun hi ka hua.. Ka haw lutuk a ni. 

"Nei lo ta la, eng nge kan tih chuan ang? " ka ti ta a. Chiang zetin kan inmelh kal bawk. 

"Tlan bo mai anh hmiang.. Khawiah emaw tumahin min hriat lohna hmunah" a tizawi sap a. Ka lo rum nghut. 

"Insawi zo tawh em? " kan piah atanga rawn titu avang chuan kan inthen phawk. Kan hawi phei nghal a. Pu Thanliana chu a rawn pen phei ta chhat chhat mai le.. A hmel lan dan chu ka hrethiam lo. Thinrim hmel a pu lo va, hlim hmel a pu hek lo. A buai tawp a ni mai e. 

Kan bul a rawn thlen chuan min rawn en a, "Imanuel, pawi ka ti, invanduai mang e tiraw? " a ti hniam ruih a. 

"Ni e.. Mi vanduai tak kan ni" ka ti ve ringawt. A fanu a melh leh a, lainat hmel em em hian a thlir ta ngawih ngawih a. "Naute, engkim hi a pawi a ni. Mahse, naktukah inneih thutiam i chham a ngai ngei dawn a ni. Khawngaihtakin i pa ngenna hi tihlawhchham lo hram rawh aw.. " ngenngawl zet hian a ti a. 

Aruati chuan hnuai lam a bih zauh a. A heh pet fan fanin, "Pa, kawng dang a awm ngang lo em ni? " a ti ţiau a. Pu Thana a insut hruih, kei erawh ngawi rengin ka ding mawl ve tawp. 

"Bawihte, i pa hi ka upa tawh a, ka dam rei tawh dawn lo. Ka dam lai ngeia Biak in hawng ngeia pasal i nei lai hmuh hi ka duhthusam hnuhnung ber a ni. Chumi hmu thei tura ka la dam ve theih chhan zingah Zothana hi a tel asin. Thi mai tura ka ngaih ka fanu kha khawvel dang pe lehin, tihian i rawn damkhawchhuak leh a. Kei chuan inneihna hi ka thulhtir thei lo a ni. I pa ngenna hi khawngaihin zawm rawh aw" a ti leh dap dap a. A aw erawh a khur lek lek. 

"Pa.. U Imma hi ka hmangaih asin" a ti leh a.

"Aruat, i pa sawi hi a dik a ni. Engkim hi a khirhin a hnawk vel vek tawh. Inneih hi thulh chi a ni tawh lo.. He thil hi huaisen taka kan hmachhawn a ngai a ni. Kan thei ngei ang" ka lo ti vat a. Lungchhe zetin min rawn melh. A duh ka hria, mahse, a duh hi tihlawhtling ta pawh ni ila kan hlimna a famkim thei dawn chuang lo. 

"Ni e, induhdan chu zawm ka tum ang. A chhan chu ka thiam loh a ni miau a. " a ti hul hak a. Chu a ngaihdan fahran chu ka hua. 

"Engmah kha i thiam loh a awm lo.. Hei hi chu vawi khat mah sawi tawh suh aw.. " ka lo ti hrâwk a. Pu Thana pawh chuan, "Ni e, I thiam loh pakhatmah a awm lo. Chuan, Inleng te an awm ve reng si a. Bawihte, intichak hram hram rawh. Zothana pawh a hrilhhai lutuk ang e. Imma, nang pawn min hrethiam rawh aw. Ka haw lo che tih chu i hriat tawh kha. He thil hi kan kal tlangpui lo a nih chuan, ka zahawmna thlengin ka hloh thei dawn tlat! Min hrethiam hram teh u" a ti mawlh mawlh a. A dinhmunah ding ve ta ila, a tih ang tho hian a ti mai thei. Aruati chu a inhru hul a, dak vah hian, "Aw le.. Ka hmangaih miah loh nei turin min duh ve ve a. Ka hrereng ang. Chuan, ka tithei em em ang.. Ruatdiki ka nih hi.. Min ngaihtuah reng reng suh u" a ti ta mai a. A rilru kal dan tehdaih chu ka rin loh lam a ni. 

. "Chutiang zawngin kan sawi lo asin.. I hrethiam lo anih kha.. " ka tih mek laiin, "Kei aiin Isabella a tla na tawh zawk a nih kha.. Ka hrethiam alawm. A pawi lo. Ka tuar thei em em ang" a ti leh hmiah. Pu Thana pawh a meng phar awk mai. Aruati chu a kal sawn nghal a, a rawn hawi let eih lo. Hrilhhai zetin kan thlir dun a. Pu Thana chuan, "A pawi lo, khatiang zawng pawh khan ngai se pawi tihna ka nei lo. Inneih hi ka thulh thei lo a ni. Mipa i ni a, kha chen i tuar tawh a, tunah pawh i hmachhawn thei em em ang.. Chuan, i chungah ka lawm e. Mipa dang chu nise zanin la la hian an ru chhuak duh mai awm si a. Ka fanu i venghim a, ka lawm e" a ti mawlh mawlh a. A kal ve nghal daih. Ka hrilhhai zawk mah e. An pafa rilru ngaihtuah dan chu ka hrethiam pha lo. Aruati kha chuan tlanbo pawh a hnial lo va, keiin aw ka pawh tak lohah chuan, min hrechhuak thei lo kha ama thiam loh anga ngaiin a inla hrang ta kha a nia. Mahse, chu chuan min tina em em thung si.. 

Rilru mang zeta hawn phei mai tuma chhuk ve ka tum lai takin Bella a rawn chho ve chiah. Kan inmelh dun ta ran mai. 

"Hawn i tum em ni? " a ti sap a. 

"Umm, boruak ka tikhaw lo zo ang tih ka hlau deuh. Chuan, i tha em? " ka ti a. 

"Ka tha reng alawm kei chu.. Aruati kha a rawn lungawi loh hmel lutuk a, eng thutlukna nge insiam? " a ti a. Ka thaw hawk a,"An innei ang. Zothana nen" ka ti nghut. 

"Khaw maw.. " tih pahin ka beisei loh lutukin ka lungphu zawnah a kut a rawn dah a. A phu dup dup mai si. 

"I thinlungin ti tura a hrilh ang chein pen rawh ka tih che kha" a ti tham chhal a. 

"Ka ti alawm" ka ti nghet churh. Min rawn melh haw a, a hmel chiang taka ka hmuh chuan ka ipikna leh phurrit te chu a kiang deuh hawk hian ka hria a, tunah chuan amah chauh neih ka nei rih bawk nen, ka ngaihbel pawh a ni maithei. 

"Remruat, Aruati'n Zothana a nei lai chu i thlir liam thei ang maw? " a ti chuai raih a. 

Ka bu nghut a. A kut chu laksakin nghet zetin ka humsak a, ka fawp zauh bawk. "I awm tawh alawm. Bakah ka tiam tawh che kha" ka ti a. Hlim hmel a pu hran lo. 

"Min haw ngawt ang" a ti a. 

"Huatna chhan tur che a nei lo. Keimah min hua se, nasa takin min hua se a tan pawh a tha zawk ang," duhthawh fahran hian ka lo ti a. 

"Umm.. EngPawhnise, mipa i nia, i thutlukna chu i hrechiang turah ka ngai e. Va haw rawh. Kei pawn ka lo kawm ang. " a ti dam thlap a. Isabella mize nghing hleithei lo hian a ni min hip thin chu! A chiâi ve but ngai lo va, a hlim lahin mit tikham khawpin a phî ngai hek lo. A beng khawihsak niap niapin ka lamah ka kuai hnai a, ka fawp zauh. 

"Ka tan i awm reng tur a ni. Nghing lo la, Aruati nungchang avangin i awm tinuam lo ngai suh aw. Min ring ang che" ka ti sup a. A bu ve nghat mai. Ka kalsan a, A la hma deuh bawk a, Atea te in lam ka pan leh ta rih. 

Kuri'n naute a lo mutpui a. Atea erawh a lenkhang a lo hlum tha mek thung. Ani hi khawpui pa e ti lo hian, lui kal leh ramvah hi nuam a ti a, a ramvachal ve phian bawk. A hoa lui kan kal tawh chuan kan hlawhchham ngai lo tihtheih a ni. 

Aruati nen kan chungchang leh zanina thil thleng zawng zawng chu ka hrilh fai ta vek a. Ngun takin a lo ngaithla a. 

"Bawiha, i rilru hrehawm dan tur hi ka hrethiam. Isabella lah Aruati cousin a lo ni ve bawk si. Aruati harh hun hi a hun lo nge a hun chiah zawk ka hrethiam lo. Mahse, thutlukna i siam dikah ka ngai zawk e. Mi inneihn thulhtirtu ni ta la, i pa te rilru tur han ngaihtuah teh. I hma i sial lohna khan nakinah a la tihlim daih zawk ang che. Lehlamah hmeichhia chu a chul nel peih peih an tih thin kha. Aruati pawh an han innei ang a, zantin khum khata mutdun na na na chuan hmangaihna pawh a piang chho ve mai ang. Fa an neih hunah phei chuan, nang chu a hrechang hauh tawh lo vang che" a ti dam ta dap dap a. Atea nge nge, rilru a timuang huai e. Kuri rawn tho lehin thingpui te a lum leh a, titi dang vawrhin ka thu ve leh ta reng mai. In ka thlen meuh chuan an lo mu vek tawh a. Kei pawh mu turin ka inbuatsaih nghal. Mahnia han awm takah chuan rilru a rit leh tan a. Thawk ka la hawk hawk reng mai. Sikret pawh a hek duh ngiang bawk. Bella lah a online thei mai si lo. Call tawp mai ka duh ta a, ka call ta mai. Chanchin ka hre chak ve tho si a. 

"I mu tawh mi? I reh daih sia" ka ti a. 

Hnar ping aw lek lek hian, "Mu tawh e. Ka nuamsam lo va, ka mu hma a. Ka lo muhil daih alawm" a rawn ti a. 

"Damdawi i ei em? " ka ti vat. 

"Umm ei e.. I mu ve tawh em? " a rawn ti a. Thil ka ngaihtuah chhuak, Kan inbiak lai khan hritlang ang pawn a awm si lo, ka haw hnu lawka a hritlang thut chu thil thleng theiah ka ngai lo. A tah vanga a hnar ping a nih rinna ka nei nghal. 

"Bella, i tha lo. I tap tiraw? " ka ti ta a. A reh deuh dat hnuah, "Ka tha alawm.. Aa.. Remruat, thil hi a buaithlak em mai" a ti ta ţiau a. 

"Engkim sawi teh. Hmaih nei loin" ka tih chuan, a insut hraih a. A kalsawn niin ka hria. A rawn tawng leh chuan a aw a khawk vangin bathroomah a lut a ni ngei ang. 

"Ih.. Ka hlauh ang ngeiin Aruati chuan min hua a ni. In thutlukna kha ka tihtir ah che a ngai a. Ka pa Thana chuan min tan naa ka nî te leh mi dang chuan min dem vek. Hawnna tur awm se chuan hawn daih mai ka chak. Engmah ka ti si lo va.. Ti nge hetianga min ngaih theih? " lungchhe zetin a rawn ti a. Ka ner sawk. Latnatnain ka khat nghal bawk. 

"Khai aw! An va timak ve. Keiman engkim ka lo sawifiah mai lo a ni. Anih kei khan lo hnar ta lo ni ila, i ni te chuan inneih thulh an remti tihna em ni? " ka tih chuan, "Ka hre lo. Chu lam pawh an sawi ber lo. Aruati zualko danin a zir chiah lo nge ka hre lo va. Ka nî min tawngkhum dan chuan, 'I nau hmangaih a ni thin tih hrereng chungin tihian i ruksak a, Bawihteii a hmangaihna kha nang hian i lakbosak vek a ni. Pasal a neih dawn aruaia rilru na taka siamtu hi nangmah i ni" a tia.. Ka hamhaih vek. Sawi tur pawh ka hre lo. Ka pa Thana thung chuan, "Bella hian engmah tihsual a nei lo. Keimah ngeiin Imanuela ka ngen zawk a ni. Min zah avang chauhin Bawihi hi a hnar a ni zawk. Imanuela leh Bella te thiam loh a awm lo va, Aruati thiam loh pawh a awm lo. Pawi ber chu a harh chhuak tlai hi a ni zawk.. Chutah chuan tumah mawhpuh a tul lo" a ti a. Mahse, ka tan a nuam tawh chuang lo.. " a ti sep sep a. A insut leh faih thin. Hmeichhe chak tak a ni a, rilru na leh hrehawm taka siamtu te hian an hre sual a ni. 

"Aruati chuan a be duh che em? " ka tih chuan, "A teuh lo mai. Tunah pawh a thiannu nen an riak dun.. A la naupang a, tin, a natna khan tlemin a rilru a la tino bawk nen, hetia ka chunga a tuan ta daih hi ka hrethiam lutuk. Mahse, ka ni te lehzelin min tawngkhum dan hi na ka ti a ni" a ti a. 

"Lungngai miah suh. Keimah ngeiin ka la hrilhfiah hlawm ang. An fanu chu Zothana nei turin an duh tho a, kei hian la hmangaih reng tho se min duh tihna a nih ber chu.. I muhil thei ang em? " ka ti a. 

. "Ka tum ang" a ti ringawt. 

"Ka lo hruai mai dawn che mi? " ka tih chuan, "A ngai lo. Naktukah pawh hian rawn lang lo la ka duh a ni. Min hmuh dun chuan engkim a buai palh ang. I hrethiam tiraw? " a ti a. Amah ka khawngaih leh lainat vang hrim hrimin, "Umn ka rawn lang miah lo vang. Chhel takin aw. Inneih zawh velah kan phei daih dawn nia" ka ti nghet charh. Kan inmang tha zui ta a. Isabella ka lo duh hmanzia ka hrechhuak nghal. Lehlama chutiang zawnga Aruati ten rilru an pu chuan min tihel ta tlat a! Insawifiah buangbar vel pawh tul ka ti lo. Mahse, Bella chunga an tuan dawn anih chuan ka tawng chhuak thung ang. Ka lawm lohna riau chu ka sawi tawh ang khan, Zothana nen inneih thulh tir nise, kei khan lo hnar ta ni ila chu an thinrim anih pawhin awm ka ti ang. Chutiang ni si lo va, Aruati laka la luangliam reng tura min duh sia mi dang hnena kaltir an tum tho si kha min hmu nep nge min zuam ka hre lo. Ka lawm lo ve tawp mai. 

Ka muhil har bawk a. Min kai tho duh lo nge, ka harh meuh chuan dar 9 a ri tep tawh. Inneih kha dar 11-ah a ni a. Mahse, ka kal dawn chuang lo a, ka che hmanhmawh hran lo. Ka nu chuan, "Kal ve i tum na nge? " a ti a. Ka bu nghut. Ka awm danah biak zui ka chakawm lem loh a niang. Min be zui lo. An ni erawh an kal ve ang chu. 

Bella msg, "Aruati mzia dang ta lutuk hi tawrh a hrehawm hle mai" tih chu,"Engtin nge a awm? " ka va ti a. 

Min rawn call nghal. 

"I online thei si lo va, i la tho lo a nih ka ring a. Ih, ka sawi thiam lo. A thiante nen an inkawm a, a hlim hmel viau lawi si. Ka hriat ngei turin, 'Rukru leh ruk theih mihring hi chu angkhat reng an nia.. Hnaih loh an him" te a tia. Remruat, kan chhungkaw inzawmna thleng hian a nghawng thei dawnin ka hria.. Ti nge? I ruk mai loh? " a rawn ti tawl mai. Bella te ang mi rilru dam tan chuan chutia inelsen kual vel chu a hrehawm thawkhat viau a ni ngei ang. 

"Khatia a awm nasat poh leh amah ka hmangaihna kha a tlahniam telh telh tih a hrethiam lo a niang" ka ti hmiah. Ka hmangaihna a la chambang tih hi chu Bella bulah pawh zep tulin ka hre lo a ni. 

"Chuan, Ka nîin tukthuan ei laiin, 'Ani nen sawn inneih intum anih chuan, kei chu min hrilh loh ka beisei a nia' a ti bawk a. U Zuala'n, "Ka nu, em em che u hian.. Bella thiam lohah engkim inpuh hi a dik lo. Ruatdiki hriatna hloh chhung kha chhut teh, kum 3 tal tawp a nih kha. Khami chhung khan Imaa sawn lo nghak char char turin inbeisei tihna nia.. Inzak lo mah mah. Keima tawn ni ve ta se; Ruatdiki zawk hi indem ang. Thil hi ngun taka thlir thiam tur.. " tiin kan thlavang a hauh a. An inhnial zui hrep. 

Hawn vat ka duh" a ti a. Ka insehruh hman. Chutiang rilru kawi tak an put chu ka ring phak miah lo asin. Ruatdiki zualko dan hian a zir lo em mawni zawk le.. 

Chaw ka ei tlem viau. Ka nu bulah naktuk maia Bella pheipui ka tum thu ka sawi a. Min ngai ve si.. Engkim a chinchhuakin ka hrilh ta vek law law a. A chek hlak hlak mai. "Dini te chu an va timak bawk ve aw. I laka inthlahrun tak a hneka chutia i bialnu thleng thlenga an haw daih chu.. Umm.. Thutlukna i siam fuhah ka ngaih phah ta hmiah e. In phei dawn nia" a ti hmiah mai. Ka nu rilru hi chu a danglam leh mai mai tawh lo vang. 

Chhungte chu an insiam tan a. Kei erawh thatchhe zetin tv ka en. Dar 10:30 rik hma deuhin Aruati thiannu, thian atana a hman loh zawk Mimi a rawn lut hlawl mai. A inchei vek tawh a. A nalh viau. 

"Insiam ta che" a ti nghal tâwng a. 

"Kal ka tum hleinem" ka lo ti awlsam êt a. Ka darah a rawn beng thawk, "I ã lutuk, i kal ve ngei ngei a ngai. Insiam rawh. Aruati'n min rawn tir a nih hi" a ti ta mai a. 

"Ngati maw? " ka lo ti hû. 

"Aw.. A pasal nei lai te chu i thlir liam ve ang chu. U Imma a rawn kal v loh chuan ka nei lo vang' a ti deuh tlat a nia aw. A la dam chiangkuang lo nen, a ti tak tak palh ang. " a ti leh suam suam a. A awmzia hi ka va hre lo thin tak. 

"Ka kal chuan thil a buai ka hlau alawm" ka ti a. Ka che chang duh chuang lo. 

"I mak em mai. Tiang khawp chuan Isabella kan dawithiamnu chuan a lo hneh tawh che a ni maw?" a ti ta daih a. Ka phu zawk mai. 

"Eng nge i sawi awmzia? " ka ti vat. Mak tih hmel deuha min melhin, "Hmm.. Engmah hre lo awm tak te chuan in awm vel ah! Amah vang veka heng hi thleng a ni tih hre ta che" a ti hlak hlak. Ka bo telh telh thung si. 

"He thilah hian Isabella hian inrawlhna a neihawm ka hre miah lo", thutak zetin ka ti ta a. Ka melh ran bawk. 

"Aruati a tawngkhum dan leh Pa Thana nen an tanrual dan te hre hek lo che. Nia, Dawithiam a ni miau a. Aruati sawi dan takah" a ti leh a. 

"Mimi, pehhel loin sawi teh" ka lo ti vin thak. 

"I mawl vek tawh a nih kha. Saw Isabella sawn Zothana leh Aruati te inneih loh a hlau lutuk a, Pa Thana hneh dan a zawng char char alawm. 'In thulh chuan nang pawh i mualpho dawn.. Chuti khati' a lo ti kual vel a niang. Chuan, Aruati'n a hriatna a hloh hma pawh khan Bella sawn a duh che tih Aruati hian a hrethiam daih tawh. Tunah in ni ta a, inneihna hmang turin a sawm thlu leh kher bawk che a. Mahse, Aruati hriatna a rawn let leh ta si a, "Eng ang pawn bei mah la, ka lak atangin i ru bo thei tawh lo vang. Pasal nei mai mai rawh. " te a lo tihkhum vel a. Aruati te tan chuan huat loh a har ve asin. An rilru a tha em zawk a, an la hnawtchhuak lo zawk a nih saw. He nu hi kei pawn keh hrep ka chak teh mai a nia" a ti ta hlawih hlawih a. Ka ngawi ta reng ringawt. Awih leh awih loh tur pawh ka hre lo ve a. 

"Pa Thana thuneihzia chu i hria ang chu. Aniin ni rawh se a tih chu tuman an hnial kalh ngam ngai lo" a ti leh a. Hei chu a sawi dik. Pu Thanliana chu a thu khawp mai. Mahse, Isabella'n ka hnena a sawi leh tuna ka thu hriat hi a inang der si lo va, rin dan neih thiam a harsa. 

"Ka hrethiam lo" ka ti ringawt a. 

"Inneihnaah pawh Bella chuan i kal ve a remti lo ngei ang chu. A chhan pawh Aruati i la hmangaihzia a hria a, mipa dang hnena thu a tiam lai chu hmuh hrehawm i ti dawn si a. Mahse, Aruati chuan rilru puitling tak puin, "Lo lang ve hram rawh se.. Ka pasal neih ni hi min hmanpui se lungmuang takin ka kal thei ang" a ti zawk asin. Chuvang chuan insiam rawh" a ti leh ta ngar ngar a. Chutianga a lo sawi tak tak a nih chuan inneih hmang tura zin phei ni ve bawk si chu va lan ve pawh chu pawi ka ti ta lem lo va. Rilru kalh kim lo zet chuan ka insiam a. Mimi hial a rawn tirh danah a ti tak tak a nih chu ka ring. Bella kha an sawi ang kha a ni tak tak thei dawn em ni? A mizia nen ka han hmehbel a, rin harsa ka ti.. Mahse, ni e, Mami sawi ang khan kan pawn lam landan ringawt hi chu inteh nan a tlak loh, inchenchilh hi a ngai ve a ni. Ka insiam zo a, ka nu te chuan mak an ti deuh nge, "Aa.. Inneih hmang tura rawn kal ka ni sia, lan ve hram a tha" ka ti ta daih a. Min hnial zui lem lo. Mimi nen chuan kan inzui chhuak a. Scooty a keng a, keiin ka khalh thung. Ka pa motor a chiangkuan loh deuh vangin ka motor an hmang si a. Zothana te veng Biak in an sak lai a nih vangin kan veng lamah an innei dawn a. Biak in lam kan pan zui nghal. An lo awm nual tawh a. Tawi khawmuang lo chuan keini pawh kan lut zui nghal a, Usher ho lah chuan Aruati thiante thutna lai mipui ep zawng tlarah min la thuttir zui! Ka hawi chhuah rualin Zothana leh a thianpa lo thu vang chu ka va hmu nghal a. A hmuh chian theih dawn hle mai. Ka duh vak lo asin le.. Mo rawn luh hmain ka hawi kual deuh thuak a, kan ep chiah a chung sanga Aruati te chhungkaw lam thu tlar diat ho chu ka va hmu. A hnung ber dawttua Tei bula thu Isabella pawh ka hmu ngei e. Min rawn melh ve kiau bawk. Sunday dress-a a inthuam ka la hmu ngai lo va, a nalh chikim viau mai. Ka hmu kim thei lo mai pawha. A kawr chu off white lam deuh, simple taka thui leh chei a ni a. A nghawng chu a zau lek lek em aw tih tur a ni naa, a nghawng lo lang var hai chu hmuh a nuam hle thung. A sam chu a chhipah a bawk a, a smart zaih mai. Bella ka en kar laiin an ding suau a, ka ding ve ngawt. Ruatdiki chu Zuala'n a lo kai lut mek a lo ni. A nalh kher mai. A sa a inphut mawi tawk bawk a, Zuala nen chuan a pheikhawk sang zawng zawng nen an inchen thuak mai. 

Pastorin hun a hmang chho a. Pastor chu ka melh lui ngat ngat a, mahse, Mimiin min rawn nghawk zauh. Ka che hrut a. Mitmei hian Aruati te lam chu a kawk zauh. Ka va hawi a, Ruatdiki chuan min lo melh kiau mai le. Ka thin a phu nghal dawt dawt thei nia! Ka lum pup pup bawk si. Ka tum reng vang pawh ni chiah loin Isabella te thutna lam ka va hawi phei chu ani pawn min rawn melh ve chiah. Awmdan tur ka theihnghilh zo a ni ber e. Ka kut ka nuai ka nuai ringawt. Inneih thutiam an chham hmain Pastor chuan, Ring leh fiah tak mai hian, "Zothansanga leh Lalruatdiki te inneih theih lohna chhan sawi tur kan awm anih chuan lo ding chhuak ru le" a ti dap dap a. Boruak a reh tlawk tlawk hnuah Pastor a ang zuau hman tihin.. Hmeichhe aw tham chil chel, zawi angreng tak hian, "An innei thei lo vang" a rawn ti ta mai le! He tiang thil hi ka tawn vawikhatna a ni a. Chhiartute pawh hian inhre zen zenin ka ring lo. Mipui chuan hnunglam kan hawi dual mai. A hnung lam tlar atang chuan hmeichhe cher lam, chak loh hmel zet, derthawng tak, khawngaihthla la zet hi a rawn pen phei ta chhat chhat mai a. 

Mo leh moneitute thutna zawnah chuan dingin, zah hmel taka rawn hawi chhuak chung hian, "Pastor, an innei thei lo a ni" a ti leh ţiak a. Kan ding deuh suau ni berin ka hria. 

Pastor pawh chu a hamhaih takzet tih a lang reng mai. A tarmit bun lai chawisan zauh pahin, "Engvangin? " a ti fiak thak a. Chu nu chu lam tual zau laiah chuan pen phei lehin.. Pastor hmachhawn zawng chuan a ding vâng a. Chutih lai kher chuan hriau pawh tla se kan hre thei ang tihtur khawpin Biak in chhung chu a reh a ni.. 

(Ka nuin dangpuithu rawh turin min tir tlat.. Tawk rih aw 😝