Thinlung - 14

THINLUNG.. (14)

Ziaktu: Toni Râlte

Ka nu nen kan inbiak leh hmasak berin Isabella chungchang ka hrilh ta a. Ruatdiki nen cousin an nih thu ka sawi chuan a thaw hawk. "Pathian remruat dan pawh hi hriatthiam a har thin mang e aw.. Bakah Mama, case lo nei tawh a ni si a, mi hmuha inzui reng te kha a mawi lo ang. Mi kan tawng tam bakah kan zeldin peih si a, a ni lo zawng zawnga tawng cheh kan ching si.. Fimkhur deuh ula" a rawn ti a. Ka nu nge nge thin hi chu. 

"Nupui nei rual ka nu ve tawh tho sia, neih vat ka duh" ka ti a. A nui har har mai, "Mahse, he lamah awm thei ula ka ti mang e. Kan khua a har em mai" a ti a. A dik ka tihpui khawp mai. Lydia nen pawh kan inbia a, kan inhmu lo rei a, min ngai vak tawh pawn ka hre lo. Bakah sawi tawh angin a intinula ve deuh mawni.. Thanthi a han neih chho takah chuan a vunte pawh a mam chhoh bakah a êng ve ta hlek bawk a, ka lawmpui. Hrehawm a ti ve thin si a. Hminga te nupa pawh an la hlim dun ve zel a, fa pawh pathum lai an nei tawh. An chhang a zing angreng si a, Awmteii a buai thin viau ang. Mahse, a naupan ngaihtuahin a chhel reuh tlat a. Nu Puii te pawh an innghirngho deuh reng naa, an la inpawm ve zel chu a nia. 

Kan buai viau lai khan kei pawh Pathian khawngaihna azarah SI-ah ka kai chho ve ta bawk a. Bena te tan chuan an Sir ka ni ta. Mahse, han intihlala han intihvei hi ka til thenna lam a ni ve chiah lo bawk a, Stationahah pawh kan nunphung a la danglam lutuk lo. Case lian tham pakhat Tualthahna te a thleng a, ka la ta lo rih. Bella te case kha kan ching rei angreng si a, hotu ten min khawngaih ve ta a niang. Ka hahdam rih phian e. Isabella hnena ka tiam tawh angin Ruatdiki te inneih hmang tura Aizawl lama phei ve chu ka rilruk a. Chawlh pawh ka la fel ta. Phurn erawh ka nei lem lo. Tu nge bialnu hluite inneihnaa kal tura phur viau ngai? Isabella vang a nih rualin Ruatdiki'n min sawm ngawrh ve si a, engkim hmu chung zela hmachhawn kha ka duhdan a ni ve bawk nen.. Eng tak va ang imaw.. 

Lateii te pawh an tha ve zel a. A chhungte an awm tawh a, ka inhawlh lawr ta vak lo, ka hman lo ve bawk nen. Bella pawh Aizawl zin hawnah a in singsak pawh a tum ta law law a. Sunday zanah ka va leng phei a. A ni fanu Mateii nen an lo awm. Mateii chu Bella ang lo takin a thau chum but a, a zakzum viau bawk. Ka thut hnu reiloteah roomah a tawm ta daih reng a. In lianpuia hmeichhe pahnih tlawng an awm hi chu ngaihtuah chu an na deuh a ni. Amah Bella lah hian a pawisak vak hmel si loh. 

Kan inngheng chial a, a kut chu ka khal neuh neuh bawk. 

"Inneih vat ka duh a" ka ti sup a. Min melh hâw.. 

"A mak! I va hmanhmawh" a ti hlar a. 

"Ka hlauthawng alawm" ka ti khawmawi a. 

"Ka buai rukna chu innei dawn ta ila, khaw nge palai intirh ang" a ti ta daih a. Ka va en a, a meng hnual raih mai. Ka lainat kher mai. 

"I patea leh i ni te hnenah a ni mai lawm.. Chu lam chu ngaihtuah lo vang" ka ti a. 

"I chhungte tan ka tling awm lo. Ka fahrah sia" a ti leh a. 

"Ka nu bulah i chanchin ka sawi vek tawh. Innei vat se min duh zawk a" ka ti a. A hlim hmel leh ta deuh. 

"Innei ta ila, in hi kan hralh mai dawn mi? " a ti leh ta zel a. Chu lam daih daih chu ka lo ngaihtuah ngai miah lo. 

"Kha lam chu i thu alawm" ka ti ta ringawt. Ka kuah hnai a, a shampoo rim chu ka hip vang vang. 

"I ex kha a rawn lang leh tawh em? " ka ti zawi sup a. A che hret. 

"Engtin nge i hriat? " a ti he haw a. 

"Hliam i tawk tawh tih i sawi kha" ka ti ta zaih a. Mamawii te hming sawi kher kha tulin ka hre lo a ni. Hma lam a melh a, "Ih.. A nupui nen an inthen a. Kumtirah khan.. Mahse, kan veng a inang lo va, ka hmu vak ngai lo. Vawi hnih vel chu min lo bia a, khatia ka lar tak hnu kha chuan a reh hmak.. " a ti sep sep a. 

"Pathlawi ka elpui dawn ni maw? " ka ti fiamthu a. 

"Ruatdiki nen in inthen dan leh ani nen kan inthen dan a inang ve lo alawm. Aruati chu a duh vang reng a ni lo va, Mka erawh a duhthu ngeia min phatsan a nia, chuvang chuan ka kir thei tawh lo.. Ka ngaidam lo a ni ber ang chu" a ti ta a. Ruatdiki hming sawi fo a ngai thin hi chu aw.. 

"Umm ka hrethiam alawm.. Ka ring tawk che" ka ti a. Ka fawp zauh. 

"Chuan maw.. " a ti a. Ka bu nghut. 

"Ka virgin tawh lo a" a ti sap a. A inthlahrung hmel chu a va duhawm tak. 

"A pawi lo" ka ti a. 

"I tui lo sawt em? " a ti lehzel a. 

"Chutiang mipa ka ni lo. Bella, thudik i sawi a, a tawk.. A bak hriatbelh ka duh lo" ka ti a. 

"Nakinah i hriat hunah ka bum che emaw i tih ka hlau a. Mahse, virgin tawh lo mah ila, inneih hma chu insum tum ila tiraw? " confi angreng tak hian a ti leh lawi a. 

"Ka theih chuan aw" ka ti a, "I thei ang. Police i nih kha" a ti ta daih. Kan nui dun a. A tuka zin tur kan ni si a, kei pawh haw lam ka hnaih ta a. 

Mak ka tih chuan, Bella nen hian chiang taka han inhriatna kan nei lawk lo naa, kan inkawp atanga kan innel leh kan inpawh nghal em em hi a ni. Hmeichhe zei chu a ni hran lo. A laih te pawh a lai nasa thin. Mahse, ka nghet nghal churh, ka ngaih a tha em em mai chu a nia mak ka tih ni.. Tin, a sawi tawh ang khan Aruati laka ka beidawnna leh a hliam min hnutchhiahte hi amahah tihdamna ka zawng chu a ni ve mai. Chu erawh hre kher lo se a tha e. 

Ka chhungte ka ţhawn thut duh vangin engmah ka hrilh lawk lo va. Mak an ti teh ang chu. Ka motorin kan kal a. Thlen hma kan duh vangin zing karah kan kal a. Haulawngah chaw kan ei. Eikhamah kan tlan lehnghal a. "Ka pa motor saw ka hralh ang nge ka khalh ve mai ang tih ka ngaihtuah a" a rawn ti a. 

"Khalh ve la.. " ka lo ti a. A rawn thle hâw a, "Min zirtir rawh aw" a ti sap a. 

"Yes boss" ka tih chuan a nui har har a. 

Sialsuk thlen hma deuhah Bolero hi a lo chhia a. Sumo pahnih an lo ding ve bawk. Keini pawh kan la tlai chhe lem lo bawk a, han tlan pelh mai a harsa ve bawk nen, kan ding ve ta a. Ka va chhuk a, "Kha! Inchhia ni maw? " ka va ti a. An rawn hawi thap a. 

Bolera khalhtu niawm tak pa lian leh sang thlerh thlawrh, hmel chhe lo tak hian, "A nih hi hei a zia lo tak tak a ni" a lo ti a. Sumo driver te khan an enpui tho nain ka va bih ve a. Motor khawl lam hi ka hre thui ve vak lo bawk a. A eng lai nge chhia pawh ka hre lo. Kan awm ve ta reng a. Mizo tlawmngaihna hi chu aw.. Chenho hi a va nuam thin tak em.. Isabella pawh a rawn chhuak khawthawng ve a. Hmeichhia tih takah a han selfie ve luklak a. 

Kan bulah rawn phei vein, "A tha dawn tawh em? " ka bulah a rawn ti a. 

"Ka hre bik lo" ka tih mek laiin, Nichina Bolero khalhtu niawm tak ka tih khan, "Ehe! Bella, hetah teh daih? " a rawn ti a. Bella pawn a va en ve vat. A hmel danglam nghal chu ka lo hmu hman chiang. 

"Mka tehdaih chu! Nangmahni a lo ni maw? " a tih takah chuan, chu pa chu a bialpa hlui, kum tam tak a lo kawp tawh Mka ngei kha a ni tih ka hrethiam ve mai. Ka awm a nuam ta vak lo. Bella chuan, "Mka a nih hi.. Mk, hei Remruata " tiin min han hmelhriattir nawk nawk a. 

"Eng nge intih dawn? " Mka chuan a ti a. 

"Ka cousin te inneihna hmang turin kan zin dawn anih hi. Nangni? " a ti ve zat a. 

"Ka ni te nufa inentir tur ka hruai a, hei kan chhe ta hlauh sia. A zia lo tak tak" a ti ve mawlh mawlh a. Pa sual tak ni chuan a lang lo. Ka sir dinglamah an ding dun a, kei erawh ka ding zum zut ringawt. Mka pawh chuan motor chinchang a hre vak bik lo nge, a lo thlir ve tawp mai. 

"I chanchinte ka lo hre ve a. Ka lawmpui khawp mai che. Chua, nangmahin em ni i khawsak tak! " Mka chuan a ti a. 

Bella chuan, "Mateii ka awmpui a. " a ti a. 

"Ka lo la leng ang ka ti reng a, ka buai ve angreng a, dawr ka kutah a awm tawh bawk nen. Ka la rawn leng tho ang" Mka'n a tih chuan, Bella chuan, "Nia.. Umm.. " a ti niah niah a. Ka mitmei a veng ve tih ka hria. Driverte an tang bawk a, an siam tha ta a niang, Mka chuan pocket money pek a tum sateh a, an duh lo nasa. Lawmthu sawi mawlh mawlhin an inkalsan ta a. An kal dawnah, "Bella, ka rawn bia ang che" a la rawn ti hram. Bella a bu nghat. Kei chu ngawi rengin motor lam ka pan a. A rawn thut luh rual chuan ka start nghal. Ka tawng si lo va, min rawn melh ralh ralh tih ka hria. Sawi tur ka hre rih lo. Mka kha ka thik a nih ber chu.. Thik anga lan ka hreh ve tho bawk si. 

"I tau chiang" a rawn ti ta a. 

"Engvangin? " ka ti hmuk. 

"Mka kha" a ti tawi tak a. 

"A ho em mai a" ka ti nghut. 

"Ani kha a nia ka bialpa hlui chu" a ti a. 

"Ka hria"

"I thik em ni? "

"Thik turin min duh em ni? " ka lo ti thung. 

"Dik tak chuan, Aruati harh chhuah hun atana invenna tur chu mamawhin ka inhria a" a tih chuan ka ding ri hráwih. 

Phawk zetin min rawn melh a. Hlauthawng hmel a pu deuh bawk. 

"Chu! Invenna i lo nei a ni maw? " ka ti rum ul a. Ka mitmeng pawh a hriam ngawt ang. 

"Ka sawi awmzia i hria" a ti hmak a. 

"Aw ka hria e. Ni e, invenna neih a tul lo ve. I duh chuan pan rawh. I hmuh ruala i mitmeng danglamzia kha ka hai reng reng lo.. Min ringzo miah lotu tan ka hun ka khawhral ngai lo" ka ti ta hmawk hmawk a. A ngawi reng leh lawi si! 

Ka tlan leh ta a. Ka tlan chak vuk vuk khawp mai. Ka rilru a dam hlawl lo. 

Aizawl dai kan thlen thlengin zuk tawng lo va! A luhlul ve khawp mai. Mahse, Kulikawn kan luh chuan, "Ruatdiki nen in inhmachhawn huna i hmel lan dan ka lo chhinchhiah ve dawn nia" a rawn ti ta sap a. Ka ner nawk. 

Kawnah a chhuk a, a chhuk dawnah pawh, kan inbe eih lo. Kan ngawi thei ve ve khawp mai. Kan chhuah tirha kan hlim dun tehlul nen. Kei pawh mood chhe zetin kan in ka pan ta a. Doorbell ka hmet a, Rei vak loah Lydia hian a rawn hawng ta a. Min hmuh rual chuan a meng phawk kher ngei.. "Piiii… Apiiii" a ti chul a. Min rawn bawh nghal uaih bawk. "Ka naute hi a va nula tawh ve" ka ti sup a. Ka nu a rawn lang ve zat. Ani pawh a hamhaih hle. An beisei lo hle tih a lang reng mai. Tiang chuan ka pian seilenna in chu ka thleng ve leh ta chu a nia. Rilru rit ru viau mah se, hah zawng a dam ve deuh tho e. Ruatdiki te inneih hmang turin ka haw tih an hriat phei chuan mak an ti hle. 

"Mam, i phei dawnah min hruai ve tawh rawh aw.. Lunglei ka hmu ve chak" Lydia chuan a ti sar sar a. A sam kir chiata va pawt zauhin, "I luck lutuk palh ang" ka ti a. Nuteii pawh a lo la awm a, a fel thar thar ngei mai. Kan inchenchilh rei vak lo nain a fel tih kha ka hre hman. Ka nu tan phei chuan a hlu hle awm e. 

Zanriah kan ei a, ka pa pawh a lang upa ve ta riau mai. Mib dampui reng se ka duh. Isabella te case kan chinfel dante min sawipui a, sawi nuam ka ti vak lo. Bella nen kan boruak lah khati kha a ni si a. Ka chau vak lo bawk a, Atea te leh Hminga te tlawh turin ka chhuak a. Atea te pawh an in bul lawka a papuia te in hnuaiah an indang ve tawh a ni. Min lo lawm ve hle. Lateii chungchangte pawh kan sawi kha. 

Atea'n, "Kan Lateii hi a mak ngawt mai. A zia hi ka lo hrechiang lo hle a nih dawn hi.. Tlem lai pawh khan an company manager nen sawi an kai hat alawm. Kha pa nupui lah kha a nasa chi a lo ni ve bawk a. An buai nasa a niang, Lateii chu a la zak chuang lo reng reng. Manager chu phai lamah an dah ta daih a, Mi pasal a ngaizawng ngam kha a zia nia ka lo ngaih nen a inang lo lutuk a. A biak pawh ka be peih lo.. " a ti a. Mak ka ti lem lo. Ruatdiki chungchangah kan lut a. 

"Ka hmuh chang hian ka lainat thin., Zothana pawh kan nau tho a ni a, Aruati hi a duh ve hle tih ka hria. Mahse, Aruati hian a hriatna a nei let leh ang tih hlau ber a ni awm e. A thla hi a muang hleithei meuh lo. Kei pawn a hriatna hi rawn kir lo se ka duh hial tawh.. Nangma lam chu thuhran nise.. Amah Aruati bakah Zothana thlengin an tawrh phah theih sia" a tih chu dik ka tihpui. Aruati hriatna kha a tirah kha chuan a lo kir leh theih nan ka thiam ang tawkin ka tawngtai ve thin. Mahse, tunah chuan hnawk leh khirh a tam tawh a, tisawn a hlimna saw bo lo se, tihbuai ni tawh lo se ka duhpui tawh zawk. Ka tan pawh a harsa dawn nasa si a. Tin, Hmeichhe pakhat Isabella a rawn tlazep tawh bawk si. 

Kuri'n, "Nupui nei ve tawh rawh" a tih chuan, "Nakkum lam ka tinzawn" ka lo ti ve a. Mahse, ka hnual nghal rawih. Bella nen kan vawiin boruak ka hrechhuak nghal si. 

Hminga te ka zu tlawh ve leh zuai bawk a. An naute te an duhawm si, kei nau lawm chi, lawm thiam mang vak si lo ka ni a, an te ber dawttu ka tihtah leh tak ngawt kha. 

Hminga chuan, "Ka nu hian min rawn biak a ching a. A inchhir thu a lo sawi ve ziah. Zep loh chuan, nu leh fa inzawmna hi chu a kar a hla hlen thei tak tak lo va, kei pawh hian khawngaih chang ka ngah mai. " a ti churh churh a. 

. "Pasal nei lo va lo let a duhte chuan pawiti suh u. Lehlamah patea boral vang khan ngaihtuahna fim a hmang hleithei bik lo a nih kha. U Rema te lam lahin an hneh thiam si a" ka ti ve a. Awmteii pawn, "Dik chiah. An ngaihzawn rawn lo chauh a nia. Kei chu ka nu kha ka dem em em lo. Lo awm daih se ka ti, ka fate hian pi leh pu an ngai ve sia" a lo ti. Mi rilru tluang tak zawng a ni e. Dar 9 velah ka haw ta a. Bella msg ka la dawng lo. Ka thawn chhuak bik hek lo. Mut hmunah ka ngaihtuah a. A hlauhthawnna pawh kha a awm ve reng chuan ka hria; Aruati nen kan chungchang engkim a hre ve miau si a. Tin, a hlauhthawn zualna chhan nia ka rin chu, induh lo inthen kan ni tlat lo lai hi a ni. Aruati'n a hriatna nei let leh ta se, keiin ka lo khawngaih leh mai a ring niin ka hria. Kan inzuina a la rei lo va, min rin nghal bur hi chu a rinawm bik loh a ni. Mipa zawk ka nia, che hmasatu tur zawk ka niin ka hria. Mahse, Mka laka khatiang tawngkam a cheh kher khan mi run ve em a ni. Mka lah a lo pathlawi ve mek bawk si. 

Dar 11 bawr velah a online kur avangin ka va text ta nge nge a 

"I va mengrei ve" tiin. 

"Ka chhun che a" a rawn ti. 

"An lo lawm em? Aruati te chu" ka ti a. 

"Umm.. Aruati nen hei kan mu dun a" a rawn ti a. Sawi leh tur a vâng ka ti mang e. 

"Aw.. Muttui u le.. " ka ti ta ringawt. Aruati vang ringawtin kan inkar chu hla ta duai niin ka hre tlat. 

"Ka hrilh a.. " a rawn tih chuan, "Eng chu? " ka ti vat. 

"Kan chungchang.. A tan chuan thil thar a nia" a rawn ti ta a. 

"Eng nge a sawi? " ka va tih chuan ka inchhir leh deuh. Ruatdiki dawnsawn dan ka hre chak ringawt pawh chu a inthiam tawh lo. 

"U Imma chu a fel alawm.. In inhmeh lutuk" a ti.. " a rawn ti leh a. Chutiang thu Aruati ka atanga a chhuak chuan chhetein min la tina thei tho nia! Aw.. Ka nep nge ka chak lo. Ti em em hian Ruatdiki hi ka lo hmangaih a nih dawn hi.. 

"A that nasat chu. Tikhan i thla a muang tawh em? " ka va ti hram a. 

"Engkim hi risk vek angah ka la ngai fo.. Min hrethiam ve bawk ta che" a rawn tih takah chuan, ka harh zawk. Ni e, engkim hi risk a ni ve tlat. Aruati hriatna neih let leh neih let lohah kan hringnun hi a innghahna chen a awm ve tlat a ni. Mahse, kei tal hi ka inrintawk a ngai. Isabella ka thlang tawh a, Ka vawn tawh chu ka thlah tur a ni lo tiin ka intiam rilru ta a. 

"Bella, ka thlang tawh che. Eng pawh thleng se, ka thlah dawn lo che. Chu chu chiang dun teh ang aw" ka va ti ta a. 

"Ka beisei.. " tih chiah a rawn dah. Mahse, keiin ka vawn tlat chuan ka lak atangin a tal chhuah ka ring bik lo. Hmeichhe nghet tak a ni miau a. 

A ngaite bawkin Lydiain min lo kai tho. "Nula an lo leng" a la tizui! Tu tak ni ang maw. Ka va thawh chuan, Bella leh Aruati te an lo nia! Ka laih dan chu pui tak a ni. Boxer nen ka ni ţung bawk si. Roomah ka lut leh zuk a, ka va inthlak ta sawk sawk a. Ka nute nen an lo titi a, Aruati chuan min melh chungin, "Ka lawm ee.. In lo phei thei a.. " a lo ti a. A aw pawh a la ngai reng asin mawle.. 

"Kha khan min tur hneh em alawm" tiin Bella ka kawk zauh. Aruati chu a nui hawk hawk a. A nui ri leh a nui hmel pawh a la danglam chuang lo. Ka nu bulah Bella chu ka hmelhriattir ve nghal a. Ka nu mit a tlun hmel hle. A zah deuh vang nge Bella tak chu a tawng tam lem lo. 

An chhuah dawnah, Ruatdiki chuan min rawn din hnaihin, "U Imma, zanah rawn phei ve rawh aw.. " a ti sap a. A mitmeng kha ka hrethiam chiah lo. Hmana min melh thinna mitmeng kha a ang riauin ka hria a ni. "Nia, ka lo tum ang. I phur tawh mai sia maw.. " ka ti fiamthu a. 

A nui seih a. "Nang pawh i phur ve tho kha" a ti zauh a. An chhuak nghal. A sawi awmzia kha ka hre hauh lo. Eng thilah nge ka phur ve chu? Isabella nen min sawi chhan a ni mahna le.. Ka nu chuan, "Hmeichhe tha tak a nih dawn kha. Bella chu" a ti a. 

Nuteii pawn, "Mo atan ka duh chi" a lo ti zauh. Ka farnu angin a awm ve tawh ka ti mai, engkimah a intithu em em mai a ni. Mahse, kan lawm daih zawk. Chhungkua kan ni miau alawm le. 

Tukthuan ei khama ka phone ka en chuan, "Thinlung chu a thup theih. Mitmeng erawh chuan dawt a sawi ngai lo" Tih thu hi Isabella hnen atangin ka dawng ta a. A sawi awmzia ka chiang lutuk tlat! Chhan dan tur reng reng ka hre ta lo. Chhan loh ngawt chi niin ka hre bawk si lo. 

"Sim ngawt theih a ni lo va. Khatiang a nih avang khan ka phatsan ta che tihna a ni lo" ka va ti ta a. 

"Chuvang chuan Mka laka ka awm dan pawh i hrethiam ang chu" a rawn tih takah chuan ka thaw huai mai. 

Mami te nufa an rawn leng a. A fapa nen kan inngheng reng mai. Mami nen pawh hmaichhanah an nupa buaina te chu kan sawi dun thei ta a. 

"Hetianga a awm tanna hi bawihtea ka neih tirh lai vel daih kha a ni tawhin ka hria. Nia, kan kum a inthlau a, kei ka inhliam nasa bawk si nen.. Sarah khan a lo mitmei ve zauh zauh bawk anih ka ring. Tunah hi chuan an fimkhur viauin ka hria. Sarah pawh ka la ban loh chhan chu man chhuaha mit ngeia hmuh ka duh vang a ni. Zep loh chuan ka ring zo tawh si lo va, ka hlim thlawt tawh lo. Ka nu te lahin mei nei deuh deuhin min kheng reng a. Hmanni pawh, "Mipa te hi chu kawngka an kan rual hian tlangval an ni leh mai zel a. Hriatthiamna chin neih a ngai" a ti vel a. 

"A nih chuan lo lalut se la.. A bialnu chu" ka tih ve ngat kha. Ka thawhchhuah an rin vang hian min tina ngam vak lo zawk a, an chawmhlawm ni phei ila chuan an nasa ngawt ang ka ring. Hei hi a lawm chhungkua chu inchenchilh chiah hian kan lo inhrechiang ber mai. Pawn landan ringawt hi chu thudik chanve a ni mai.. Mama hi chuan min tilet ngam ngai lo va, a inthiam lo tih ka hria.. Mahse, a sim chuan loh chuan inchhir ringawt khan min tidam zo tak tak lo. Ka mit ngei hian hmu ila ka chhuahsan chak tawh" a ti dap dap a. Ka khawngaih. A nulat lai atanga sawikai ngai lo, thalai te pawn an zah ruk leh a thu pawh an awih thin khawpa nula zahawm leh thianghlim kha a ni ve a. Hetiang inlaichinna derthawng tak neih hi a phu loin ka hria. Mihring takin sawi ta ila, Dik tak chuan Mama te khan khawsak thuah pawh min phu lo ti tawl teh ang. Ka pa leh Mami te rilru thatna avangin nupaah an insiam a. Hlim taka khawsa ho mai tur kha hetiang zawnga an thungrul hi kei ka dam meuh lo a ni. Ka farnu pawh hian dik lohna chu a nei ve tho ang, mi tawng tam lem lo, awmhmuna che bawrh bawrh chi a ni a. Mama chhungte han tihlawm pawh a zeihawi vak lo ang. Mahse, a sual vang a ni lo tih an hriat tho ka ring. Fa hial an nei tawh a, ka huat ber ngaihzawng inneihsan hmanga an nupa kar khi hi ka thinrim. 

"Mami, awm hlen tawh mai ru..Bawihtea hi ka mutpui char char chak" Lydiain a lo ti kawkalh. Nuteii lah chuan, "Dik chiah.. An in saw a nawm loh hmel si.. Lo haw tawh mai rawh" a lo ti. Kan han nui leh rih a. 

"A rei tawh lo vang. Nizanah pawh a call hi ka hack a. Number save loh atangin a rwn call a, darkar chanve dawn an inbia alawm.. Man chhuah hun awm thuai ang" Mami chuan a ti a. 

"Amah Mama pawh ka lo titipui ve ang. Harsatna te pawh a lo nei ve mai thei a.. " ka ti tak naa, a sawi duh ka ring lem lo. 

Chaw an ei ve nghal dawn bawk a. Kei pawh ka thiante an rawn leng a, in chungah kan chho dial. Nupui la nei lo chu johny leh Tka te chauh kan ni tawh. Johny hi chuan a ru ve zuai a, an inrem ta lo kha a nia. A ngaihsak zui ta lo a niang. Kan titi mek laiin Bella call ka dawng ta a. 

"Remruat, Ih.. Aruati lu a na vak a. Hei damdawiin kan pan mek.. Lo kal ve la" a rawn ti a. 

"A va zia lo ve aw.. Nia.. Lo kal ka tum dawn nia.. Tunah eng nge a an? " ka ti a. 

"Hei an jection a. A la chhawk chiah lo mawni.. Na a la ti khawp mai" a rawn ti a. Lainatna nasa takin min tuam leh hlup hlup mai. Ka thiante chu ka hrilh ve a. Tihtur em em a awm lo bawk a, dar 4 rik hma deuh chuan Damdawin chu kan thleng chho ve a. Zothana pawh mangan hmel zetin a lo tei sek mai. Pu Thana nen kan han inhmu leh ta chu eng emaw hian min uap run niin ka hria. Ani pawh a awm nawm vak loh hmel. Aruati chu nachhawkna chuan a chhawk ta deuh nge a lo tal tawh lo va. Chauh hmel zetin a mu hle hle mai. Bella pawh ka bulah a rawn kal vat a.. "Engtin nge a nat a.. A mak teh thut e" ka lo ti vat. 

"Chu chu lawm.. Nizan atang khan a awm a nuam vak lo niin ka hria. Tukinah khan ka ei peih lo tiin chaw pawh a ei lo. Chawhma lam khan Zothana te an lo leng a, mikhual neuh neuh kan nei nual bawk nen, kan ri deuh nuai nuai mai. Chuan a inbual zawh khan roomah kan awm dun a, 'Ka lu hi a na fek fek reng mai' a ti a. Damdawi pawh a ei chuang lo. Ka inbual zo bathroom atanga ka chhuak chiah kha khum bul chhuatah a lu dawmin a lo tal buai nasa mai a.. Ka pate ka ko nghal ta a ni.. ", a ti mawlh mawlh a. Ka thiante nen ka han hmelhriattir ve leh hnuhnawh a. 

Aruati na tehthut chu pawi ka tihpui hle. A tuk maia pasal nei tur a ni si. Zothana tak pawh a khawngaihthlak. Doctor leh Pu Thana an inbe mawlh mawlh a. Pu Thana chal chuar leh nang thin chuan ngaih a titha lo mang e. Bella chuan chanchin a va ngaichang ve ta a. Ruatdiki erawh nachhawkna khan a hneh ta nge, a muhil mek niin ka hria. Keini pawh hawn lam kan hnaih ta deuh. Eng han tihtheih vak ni hek lo le.. Inneih an thulh phah ang em le? 

Bella chu a rawn lang leh a, hawn kan tum thu ka lo hrilh a. Min rawn melh kal a, a hmel lan dan chu a dik zan lo. Lungngai hmel a pu tih dawnin a ni chiah si lo. "Min lo thlah la", ka ti sup a. Ka thiante chu an chhuk mek a. Kan zui thla ve nghal. Gate bulah chuan kan ding a. "Ti nge engmah i sawi loh? " ka ti a. Ka ngaih a tha vak lo a ni. 

"Remruat.. " a ti zawi raih a. Min rawn melh ngawih ngawih. 

"Sawi ta che" ka ti a. 

"Ruatdiki hriatna a rawn let tan mek a ni.. " a ti ta a. Ka tek chhawk mai. Ani lahin min melh kal mai bawk si. 

. "chutiang chuan an sawi a maw? ", ka ti leh sak a. 

"A hma atangin a lo intan tawh a. Amah hian hriatchhuah tuma a beih nasatna lamah a lu thlengin a nat phah ta a niawm e. Engkim a hre vek tawh em tih erawh ka hre lo", a ti a. Ka en reng ringawt. Ka chil ka lem khawlh a. Mi veivak an awm ve zut si.. A kut ka va vuan a, "Bella, ka danglam lo vang. Chu chu ring rawh. A tha em? " ka ti nghet charh a. A bu nghat. 

A mittui a tling pam a. "Mahse, engkim hre chhuak ta se, Aruati ka khawngaih ngei dawn a ni" a ti sap.. 

"Kei pawn", ka ti ve vat. Ka thianten min rawn ko tawh si a, "Chanchin min lo hrilh rawh aw" ka ti a. Ka kalsan ta nghal. Ngaihtuahna a kal thui mang e. Vanduaina chuan min rawn hnaih leh sawt riauin ka hria.. A chhan ka hriat si loh hian ka thinrim ţûn a. Ka mood a chhe ngawih ngawih. 

Zanriah ei laiin ka chhungte bulah pawh ka sawi a. Ka pa chuan, "Engpawhnise, chhel takin awm rawh. Pathianin kawng chu a rawn ruat dik thlap mai ang" a ti a. 

Mami erawh chuan, "A va hun lo tak.. Engmah hre chhuak lo law law zawk se a tha ani" a ti thung. Ruatdiki an khawngaih tho laiin, keimah min khawngaih bawk si niin ka hria. Bella atangin Damdawiin atangin an chhuah thu leh inneih pawh an thulh loh thu a rawn sawi a. Ka thaw hawk. Innei vat se ka tan pawh a tha zawk tawhin ka hria.. Mahni hma ka sial ve rih a ngai. 

Va len phei tuma ka insiam mek laiin call a lo kal a. Ruatdiki a ni. Tîm angreng takin ka la a.. 

"U Imma.. Ka duh lo.. Engmah hi ka duh lo" a rawn ti hlawp hlawp.. Ka bing mum mum mai le.. 

"Aruat, i tha em? " ka ti a. 

"Naktukah pasal ka nei dawn. Ka pasal tur chu nangmah i ni lo.. Ka duh thei lo " a rawn ti leh vawng vawng a. Khumah ka thu ta hnawk. Ka melh ngai melh ngawt ngawt chungin,, "Engkim hi a tlai tawh a ni" ka ti sup a. 

Ruatdiki ţap insut hlawp hlawp ri chuan ka kawchhun zawng zawng a rawn fan chhuak ta vek a.. 

(Ka khawsik hi nasa chu a ni lo. Awm a tinuam lo tham ve a. A tawi pawn inhriatthiamah aw.