Thinlung - 13

THINLUNG (13)

Ziaktu: Toni Râlte

(Adds kha.. Ka tuaite u 😘😍

MALSAWMI INPUANNA:

"Ni e, mi piang danglam bik ka ni a. Nikhua ka hriat theih ata ka nunah sum leh hausakna aia hlu a awm ngai lo. Pawisa tam tak neiha nawmchenna lipui han liluh pap pap aia thlakhlelh ka nei ngai lo. Ka nulat lai hun chu inhriat ve a tulna a awm lem lo bawk a, ka sawi kher a ngai lo e. Pasal ka nei a. Rinawma hi hausa viau lo mah se; ka hmangaih miau a ni. A hna avangin hmun hrang hrangah te kan han awm kual a, ka chhungrila duhâmna pawh pasal fanau han neih takah chuan a zuai ve telh telh ka ti mai. U Mawia leh Zosangi an han innei ta a, khata tang khan ka rilruah ngaihtuahna tha lo a rawn lut leh tan ta a ni. Keini lah in chu nei mah ila, ka duh angin a nuam tawk lo a, hma hun ka thlirin ka fate pawh an nuamsa thei dawnin ka hre lo. Kan pa hlawh ringawt hi chu kan khamkhawp lo deuh a ni. Khatia U Mawia a neih avanga nakina Zosangi chan la tha tur chu ka thik a ni ber mai. Vanduai asiamin U Mawia lahin accident a lo tawk ve mek bawk nen. Khata tang phei kha chuan ka chhungrila min turtu chu a nasa chho ta hle a. Kawng ka dap chho tan ta a ni. 

Zosangi leh Mpa te boruak ka hre vek a, Thlamuani'n a ngaihtheih lohzia te thlengin. Chu chu remchangah hman ka tum ta ran a. U Mawia berin nikhua a hriat tak loh avangin Mpa pawh kan pa hian a chhawr ta zeuh zeuh a, kan inah pawh a rawn tal tam ve ta viau. Zosangi a duhzia leh neih a tumzia ka hre kar a, tin, Mpa kha mizo ni lo tih takah thlem thluk mai pawh a harsat ka ring lo. Tichuan,Mpa chu ka hnaih ta hret hret a, Zan khat kan pa zin chhungin ka ko ta a. Muk takin ka titipui ta a ni. A bulah chuan, "Muani nen kan inkawm a, a huatzia che a sawi nasa mai. A nu nen in inneih ai chuan a nu pawh thlauhthlak hial a duh a. Zosangi lahin Muani saw a hlau ve bawk si, Zosangi hi duh viau mah la; Muani sawn i kawng a la dal dawn. Kawng i dap chu a ngai a ni. Kei chuan innei ula ka duhpui che u. U Mawia lah sawti mai saw a ni tawh si a. A dam rei dawn lo tih a lang reng bawk si" tiin kua ka hreuh chho a, Misual a ni hran lo va, Chutia ka sawi avang mai chuan ka hneh mai bik lo. Muani erawh a mil bik loh thu leh hnawk a tih ve zia a sawi thung. Mahse, kan inhmuh apianga remchang ka lak tak zelah chuan, zawi zawiin a rilru ka hneh chho a. Muani sawi niawm takin thu ka veivir chho a, Zosangi bulah erawh engmah sawi lo turin ka ti thung thin. Ka hneh chho ta tih ka hriat takah chuan, " Muani saw dah bo daih la ni mai lawm.. Chuan, a room bul chiaha awm Bella sawn in thawm a hre ngei ang a, a va bawihsawm lai nanchintirin amah saw tualthattuah inpuh lel mai dawn alawm. Jail-ah a tang ang a, Zosangi nen chuan vanram inchen thei a ni mai. Mahse, Zosangi bulah Bella hian Muani a huatzia leh mi bula thi daih se a duh thu a sawi thin angin i sawi lawk vek phawt ang. Chuti a nih loh chuan Zosangi'n a ringhlel lo palh ang" tiin ka vehthlem tan ta a. 

Rilru hmang tam lem lo tih takah ka tum ruk dan leh ka ruahmanna chu mak ti awm pawn a awm lo. Kei pawn Zosangi bulah, An tana Bella hnawkzia, mi bula An ni nufa chu hnawhchhuah mai a duhzia a sawi angin ka sawi ta a. Zosangi pawh hian a la hre ngei ang. A fahrawn mil lo sa a lo ni bawk a, Bella chu a haw ta hle a nih kha. Mpa chu ka nawr na telh telh a, a thluak ka su a ni ber e. Zosangi a duh luatah a mit a del bawk si. A harsa lutuk lo. Ka beisei ang chiahin Mpa chuan Muani chu a khawih ta a. Amah Mpa khan engtin chiah nge a va thah tih a sawi bik lo va, ka va hriatpui tawh bik lo kha lam chu. A thah zawhah Mpa ka hrilh lawk tawh angin, Zosangi a call nghal a, "Muani roomah va kal teh, tun lawk khan, Kan veng tlangval zurui ten, "Bella a thinrim khawp mai. Tu emaw ber chuan an tuar ang" an tih thawm ka hre tlat.. Va enfiah teh" a va ti ta a. Hei hi risk ka la sual ang tih ka hlau viau. Zosangi kha a â em a, kan tluang ta hlauh zawk a ni. Ka duh angin thil chu a kal ta ti mai ang, Isabella pawh jail-ah hun a hmang ta a. Ka thaw huai e. Mahse, Mpa chuan nakinah min la chuk ve thei dawn tih ka hria a, ka fimkhur a ngai tih ka hria. Chuvang chuan kawng dang relh leh a ngai hle. U Mawia a la dam miau a; rawn harh ta thut se, ka suangtuahna chu meivapah a chang dawn tih ka hai lo va. U Mawia dah tha tur chuan ruahmanna ka siam leh ta a ni. Bdi kha ka hre sa tawh a. Innel tak chu kan ni hran lo. Ka chhui nasa a, nula fel tak a ni tih ka hre si. Ka buai hman khawp mai.,. Mpa bawk tirh leh mai ka rilruk hman a, mahse, rinhlelh kai ta se, Muani thihna thlengin a inkaihhnawih chhoh ka hlau ve tho a, bakah Pu Mawia nupui ngaizawng mah se;Pu Mawia hi a tan chuan pathian ang a ni tlat! A tihhlum theih ka ring ta chiah lo. Kawng dang ka dap leh ta zawk a ni. Bdi kha ka kawm nel chho a, U Mawia te inah khan ka leng fo bawk. Zosangi hi chuan min tichhe ngam ngai lo. Bdi nen kan inkawm nel takah chuan, "I Pa Rinawma nen kan sawi dun a. Isabella pawh kan la sawipui dawn a. Hetia thi si lo, nung si loa khawvela awmtir ve reng hi kan lainat a. A enkawlna senso a ngai ve reng bawk nen, Zosangi pawh kan hrilh tawh a. Nakinah kan tan i la din a ngai dawn a, thil sual ti loin kan dam tlanna tur zawk i ti tih i hre reng tur a ni" ti ang zawngin ka kawm chho a. Hmeichhe fel a ni ka tih tawh kha.. Khawiahmah a sawi chhuah ka ring hek lo. 

Tin, Zosangi ka kawm bawk. "Ngaibtuah teh, tihian pasal neih pawh duh mah la, U Mawia hi a la thi si lo va, i tâng reng mai dawn asin. Amah i hmangaihzia lantir nan pawh i kaltir mai hi a hun tawh a ni. Isabella lah jail-ah hun a hmang daih a, Tihian in pawh zalen takin in luah zui zel thei dawn tihna a ni.," ti zawnga ka han kar dek dek chu, ani chu lam chu rilruah a lo nei sa nge, ka beisei phak bak aimahin min dawngsawng tha ta a. Engvanga an ruahmanna inrawlh ve ka nih tih lam a ngaihtuah pha tawh lo. 

"Chet lak dan tur ka hre mai lo a ni. Kei chuan ka tihlum thei si lo va. Rinhlelhawm tura kalpui chi a ni bawk si lo" a tih chuan, "Ka hria alawm. Ka lo buaipui ang. Mahse, kan inremsiamna ni rawh se. Insumdawnna hi tiral la, hmun 3/1 min pe ve ang. A bak erawh i kutah awm se" ka ti ta a. A hmanhmawh ber bera a tan vangin ngaihthat lohna nei miah loin sumdawnna pawh a tiral ta chung chung a. Hmun khat chu min pe ve nghe nghe. Bdi lawmman tur pawh tumtir ka duh vangin, a ac atangin pawisa ka lakchhuahtir a nih kha. Sumdawnna pawisa a dawn kha chu nakinah Bella hian buaina a rawn neih hlauh thil thuah khawih che rih lo turin ka ti thlap bawk. Ka ngaihtuah nasa em em a, ka cher kawk kawk mai. Kan pain a hre ve ang tih kan hlau bawk si. Chet vat a ngai ta a ni. 

A hnuah, "Isabella pawh kan sawipui tawh e. Ani pawn a pa a hmangaih em vang zawkin thutlukna harsa tak a siam a ni. Tin, a pa a boral chuan ani pawh jail atanga lak chhuah dan kawng a awm dawn a. Damdawi ka lo ngaihtuah ang a, a vein-a vih luh kha i hna tur a ni mai. Inthiam lo la ka duh, tin, thil tha min tihsak dawn avangin lawmman pawh ka pe ang che. Zosangi pawhin a hriatpui thlap tawh e.. " Tiin Bdi bulah ka ti ta a. A hreh ru tih ka hria. Mahse, chhungkaw thutlukna anga ka sawi tlat avang leh Isabella lak chhuah theihna hmanrua anga ka sawi avang khan a rilru a siam ve ta a niang e. Min pawmpui ta a ni. 

Tikhan U Mawia chu a chiu a, a muhil hlen ta chu a nih kha.. Mpa zawk hian engmah a hre lo emaw ka tih laiin, in lama che tla tam ta na nâ na chuan hriat tlem azawng a lo nei ve a lo nia! Kha kha a thih chhan pawh a ni ta a ni. 

Bdi chungchangah kha chuan, ni e, U Mawia a boral takah khan thudik a hre leh ta si a nih kha. Isabella rawn chhuakin a pa thihna a tawrhzia leh ka pasalin mak a tihzia te a hmuh takah chuan, bumin a awm tih a hre ta a. A che buai chho a nih kha. Thudik puan a duh a, a ngam si lo. Amah ngeiin U Mawia nunna kha a chhat miau si a. Chu erawh kan bum vang a ni, thudik sawi dawn ta se, finfiahna a nei si lo. Tawngkam maia hneh kan ni si a. A thih hma tlaiah khan min hmu turin a rawn kal a, Pawisa min rawn pe let a. "Ka tuar thei tawh lo" tih chiah a sawi. Thudik a sawi mai dawn emaw tiin rilru hrehawm takin ka awm phah ta a. Mahse, ka chanchin hriat leh chu damdawi tam tak a bar tih a ni. Ka thawveng ta huai mai. Mahse, boral ta se report te thehlut ta si se.. Min chhui chhuah theihna tur thil kawl a nei em tih ka ngaihtuah ta a. A phone-ah khan thil tam tak kan sawi dun si a, a pawi thui dawn tih ka chiang. Zosangi ka be ta a, tichuan, An inah han kalin chhuanlam siaminna roomah a va lut a, phone kha a ruksak ta a nih kha. Kan fihlim leh ta phawt ti mai ang. Bdi pawisa min pek let kha ka ac-ah ka thun ta vek. Ka kawl reng chuan kan pa ngaih a that loh ka hlau si a. 

Bdi thih thu ka han sawi hmasa ta daih a. A chanchin kan sawi kal lai a nih vang a ni. Bdi rilru hah tizualtu Mpa thihna kha ka sawi kân zawk a, Ni e, Mpa kha thi lo tur a nih laiin thil pawi tak a thleng ta si a nih kha. Kan Zosangi chengchawng hi ka rin ang a lo ni lo va. Mpa kha a bialpa hlun emaw ka tih reng laiin Hmuna a la lut leh ta si a nih kha. U Mawia thihna pawh a rei loh laiin khatia a che chung kha kei ngei pawh ka thinur. Han inchachhuah dawn ila Isabella a awm ve kur tawh bawk si. Hmuna a rawn lan takah chuan Zosangi chet buaitirna hun remchanga hman tumin, In leh lo ka buaipui tan ta a. Kan pa hneh hi chu a harsa lo. Ka zia hi a kai ve tawh bawk a. Thiam taka ka sawipui takah chuan in leh lo chu kan ta turah a ngai ta hmiah reng a. Remchang takin Zosangi lahin Hmuna a lalut ta bawk nen.. Ka pasal lusun lungpuam laia hmanrua a tan chuan a tha ber awm e. In leh lo kan buaipui chho tih Zosangi'n a hriat khan a che buai ta chiah a, A lama tang tur awmchhun Isabella chu hum a duh ta reng a nih kha. Khatih lai khan Mpa hian a rukin keimah ngei pawh min vau tawh a, chuvanga Zosangi leh Isabella tan duntir ka tum tak ni. Mpa chu ka tan a hnawksak ta si a. Mpa bulah, "Zosangi zawk hi a ni a bul chu, Hmuna lakah tisawn a kalsan leh thei che a nia. Inthup eng ang mah se, in khata cheng dun chu eng nge an tih ang tih ring thiam mai rawh" ka ti ta a. A thikthu cho chhuah awlsam lai a lo ni bawk nen.. 

Zosangi chu an pa U mawia thihna tura ruahmanna an siam dan a lo hriat ruk thu hmangin a vau ta a. Zosangi chuan a hlau lo thei ta lo. Mpa kha mawl viau mah se, tu bulah mah engmah a lo sawi chhuak lo kha a mak! Zosangi bulah tlan lehin, "A ka kan hup a ngai a ni. U mawia thih dan a puanzar chuan kan chhe vek a ni mai. Kan tan dun hun a ni leh tawh. In leh lo chu theihnghilh rih ang, engpawh nise, kan lo chang a nih pawhin i inenkawlna khawp chu i hmu ang. Mpa hi kan dah that a ngai" tiin ka kar ta a. Buaina in a chim reng â ruai a ni bawk a, Mpa chu thah dan tur ruahmanna kan siam thei ta a. Hmuna pawh kan hnuk lut ve ta a nih kha.. Khami zan khan Zosangi leh Hmuna te va kalin, Zosangi a lut hmasa a, ngaihdam te dilin Mpa rilru chu a va hneh leh thei mai a. Mahse, Mpa rin loh leh beisei loh takin Hmuna a rawn lut ve a, a hamhaih lai takin a rekhlum ta a nih kha.. Inawkhlum anga lantirin leh Lehkha ziak hnutchhiahin an chhuahsan ta a. Hetah hian Zosangi fin ka chelh lo ve ta hlek. A tan Isabella a la tangkai dawn a, in leh lo chu Isabella la awm ve chhung chuan kan chang thei bik lo vang tih hriain Mpa chuan a fanu a that tak tak tih hre miah chuang lovin, a thah angin kutziak a hnutchhiah lui ta a nih kha.. 

(A dang a ro ta nge, tuisik a in khawlh khawlh a)  

Tichuan, tunah chuan in leh loah kan bur thei ta a. CJM nen inpawh tak kan nih vangin ka huphurh lo. Mahse, chuti maia awlsam a lo ni lo va. Isabella a lo â lo bawk nen, a theih ang angin hma a la ve ta si a. Kan che hlawhtling mai thei ta lo. Ruahmanna dang ka siam leh ta a ni. Zosangi chu inremsiampuiah ka sawm ta a. 

"Hmuna nen in chungchang hi hre lo an awm tawh lo a. Mpa in that tih erawh an hre lo. Ka ka ka an chuan, jail-lama pawh luh tur in ni. Kei chu ka insawi fihlim thei. Mahse, min thawhpui thintu i nih angin ka hrethiam che ang a. In hi Hmuna nen chhuahsan u la, In leh lo kan chan hunah kan in luahlai hi kan tiral dawn a. Chuta sum zatve chu pekin i awm ang. Lehkhaziak nen thlap inremsiam i duh pawn ka thei. U Mawia nupui i la nih ve miau avangin chuti maiin in hi kan chang thei dawn lo. Ka rawtna hi pawm ta lo la, Hmuna nen cheng dun ta reng ula Isabela mit intikham thuai dawn a, a la hnawtchhuak duh mai daen che u. Chutih hunah chuan chan alawi i nei dawn lo.. Chuvang chuan ka thu i awih a ngai. In hi chhuahsanin pasal um angin kalsan rawh. " ka ti ta a. Hei erawh a inngaihtuah ve nasa hle. Hmuna nen an nunhlui chu ka hre lo, mahse, U Mawia thih hnu lawka a rawn lan avang khan an inzawmna chu a thuk hle tawhah ka ngai. 

"Chhuahsan mawl tawp chu ka hreh ve êm mai. Mi min ngaihdan a chhe sa tawh bawk si.., " a ti ve ta tlat a. Ngaihtuahna thar ka neih leh phah ta a nih kha.. Thlahrang kha. Kha thlahrang lem khan tibuai ta se, chumi avanga in chhuahsan ni ta se tih ka ngaihtuah rualin Isabella pawh awlsam takin a chhuak ve duh mai lawng maw tih ka rilruah a rawn lang ta zat a. Ka hlim viau nghe nghe. Tuna ka ruahmanna tenawm tak hi chu kan pa pawn min hriatpui ta. 

Thlahrang chu ka ruai ta a, a che ta a. A bak chu inhriat kha.. Isabella erawh hlauhna a neih ve loh vang khan Zosangi te chhuah hnuah, "Amah maia awm a tha lo ve" tiin kan luahpui ang a. Kum khat vel a ral hnuah dah bo mai theihah ka ngai ta mai. Zosangi roomah camera a kam tih rin ngaihna ka hre lo kha ka vanduaipui ta a ni e.. Chuti ni lo se, ka ruahmanna hi naupangchhia viau mah se, a hlawhtling ngei ang le.. " tiin. 

Boruak a reh tlawk tlawk mai. Bena pawn a chil a lem khawlh mai. Chutiang nu rapthlak leh huaisar chu ka tawn vawikhatna a ni. A ruahmanna kha lem viau anga lang siin, finfiah theih miah loin mi thluak a su a, tawngkam hmangin a hneh a. A kut thawh ngaiah a fihlim leh hlauh lawi si! 

Ni e, Ka rilru a insual nuai nuaina karah Pi Malsawmi profile ka han bih chian khan rinhlelhna mak tak ka nei ta tlat a. Lateii nen chaw kan ei chhuah tlaia cjm nen ka hmu dunte, in leh lo chan a duhzia te ka hmuh khan.. Thisen rim a nam tlatin ka hre ta kha a nia. Ka zeldin kualna chu a tak angah ngaiin ka bawhzui a. Mpa atangin ka chhut tha leh a nih kha. Pi Malsawmi ac ka check khan, Zosangi'n a ac atanga a lak chhuah zat chiah kha a a/c-ah a dah lut ve chiah bawk a. Bdi thihna nen a inzawmah ka ngai thei ta a ni. 

Pawimawh tawpkhawk erawh Isabella nen chaw kan ei dun tuma kan cabin bul maia pi Malsawmi aw kan hria kha a ni a. Fiah kher kan duh vangin Register en nan Bella pawh a chetsual luih nghe nghe kha. Kha tah khan, Pi Malsawmi leh Dinpuia" hming a chuang kiau a ni. Dinpuia chu a thlahrang chhawr a ni ngei mai. Hlawhtlin vat a tumna lamah a che hmanhmawh deuh a, thlahrang kha ruai ta lo se kan la man kher pawn a rinawm loh. Zosangi zawk kan um rei deuh a, ani pawh Malsawmi uite mai mai a lo ni si! Mihring pakhat chu a tling ve reng reng e.. 

Zosangi leh Hmuna te chu inpuantir vak pawh an ngai tawh lo. Malsawmi'n a sawi fiahsak vek tawh si a. Malsawmi thuhnuai leh a duh duha a kaih kual theiha an awm chu pawi an ti tlawk tlawk hle mai. A tlai tawh si. Zosangi ngat phei chu a fanu a chân phah lehnghal. A fanu nunna chhattu chu Mpa mah nise; A fawng vuantu chu Malsawmi a ni tlat si. Mpa kha chuan Zosangi a hmangaih leh duh em vanga khatia che ta kha a ni mai a, A duh leh beisei anga thil a kal tak loah khan thudik puang vat nise, thihna dang a thleng lo mai thei a ni. Bdi thlengin an tawrh phah ve ta si a. He nula hi a khawngaihthlak takzet a ni. Inbumna tenawm leh rapthlak takin a hnuk a chhat ta si a. 

Isabella a zalen ta. Lunglei mipui ten thudik an han hriat takah chuan rapthlak an ti ve hle. Bazar veng ngat phei chuan an awih lo lek lek zawk hial mai. A kikawi kual nasa bawk a, awih mai pawh harsa ve tur a ni. District jail-ah an hun tam zawk hmang tura phurhliam an ni ta a, Isabella pawn in leh lo a chân loh mai bakah zalênna boruak a hip leh thei ta a. Ka lawmpui ber mai awm e. 

A zalenna lawm nan chaw min eipui ve ta hial a. Ani ai mahin ka lawm zawk maithei. 

"Engkimah ka lawm. Awm lo la chuan tihian ka nui leh thei ang em ka hre lo" tiin a nui her her a. A va hmeltha tak. 

"I zar zawk alawm.. Video kha nei lo ila kan chan a chau ve thei tho" ka ti a. Ni e, Video kha ka sawi kai ta lo va, Zosangi rooma thlahrang inlar kha mihring a nihzia pholanna a ni mai. A hlauhawm loh chu thuhran, a nuihzatthlak zawk a a ni. 

"Chuan, ka awm thiam vak lo. Ka ni huih mai" a ti a. A nui sâng reng mai. Eitur an lo chhawp chuan a sam chu a tawn khawm a, a nghawng var hai mai chu a lang fiah zual. 

"Nangmah chuan em ni i khawsak tak ang. " ka ti a. 

"Ni rih mai. Ka ni fanu kei aia nau ve leh chhawng sawn ka bula awm a duh a, ka awmpui bawk ang. Sawi tawh angin luah theih turin ka siam ang" a ti zawm zat a. 

"A tha alawm. I tan chuan a lian mah mah. Hlauh pawh a hlauhawm deuh ang," ka ti ve a. 

"Remruat, ih.. Case i chinfel lawm nan Aizawlah zin ang hmiang.. " tiin min rawn melh sawr sawr a. 

"I tum mi? " ka tih chuan, "I va hrethiam lo tak. Karleh nilaini khi Aruati pasal neih kha a ni tawh alawm. Mondayah phei ka tum a, lo kal ve la.. Chawlh i la ang a" a ti siam siam a. 

"Hmm.. Ka hre lo le. Inneihna va hman kha ka tum lem lo asin" ka ti zawi sup a. 

"Ka hrethiam che alawm. Mahse, i hmachhawn a ngai sia lawm. A ni lawm ni? " tiin cho hmel zet hian min melh a. 

"A dik alawm.. Nia, ka lo inngaibtuah ang" ka ti a. Thudang sawiin kan titi zel a, a lehkhazir lai te sawi chhuakin kan inkawm tui ta phian. Ka bialnu ni se ka duh tih erawh ka la sawi ta chuang lo. A hlim rih em a, a hlimna boruak lo lakpen kha ka inthlahrung. Bakah ani chuan thiantha angin min lo en ve reng thei. 

"I va hlim maw? " In ka thlen rual chuan Lateii chuan a lo ti nghal a. A tûm bâr mai. 

"Hlim tak ka ni" ka ti hmiah. He nu haw hun hi ka nghakhlel. Nge a thlenna tur ka zawnsak zawk dawn? Mahse, mawi chiahin ka hre tawh si lo. A hnawk ru tlat. A ngampa mah mah chuan ka rilru a tihel ka ti mai. A hnaiah awm pawh nuam ka ti lo. A lum em vangin mut hmain ka intleuh zuai a, ka inbual zawhah Bena min pek, wine chu no khat ka peg zauh a. A tui ka tihzawng tak a nih vangin ka lem leh a. Rui chu ka ni lo. Mahse, awm a tinuam ve. Boxer nen chauha mu mai thin ka ni a, chutia ruak keng kunga ka awm lai mek chuan, lehlam room atang chuan, "Awii.. Imaa, a na lutuk.. " Lateii aw hian a rawn ti a. A aw atang pawn na tuar awrawl zawng a ni. Ka va kal ta vat a. 

Chhuatah thingthiin khumah a lo bawk a. A lo vial deuh ngawlh ngawlh mai. "Eng nge ni ta? Eng nge na? " ka ti vat a. Hmai sen teuha rawn hawi chhuakin, "Ka pum hi.. Ka tai pawh a ni tel.. " a ti tial rian a. Ka zuk kuah a, khumah chuan ka muttir ta a. A na thawkhat aniang, a thlante a tla hial mai. A tap chiah lo naa, a mittui pawh a luang. Tihngaihna ka va hre lo tak. 

"Tlaiah eng nge i ei? Vawiinah a na tawh em? " ka ti a. 

"Aw.. Ka pum hi chu a hma atangin a na zeuh zeuh tawh. Nachhawkna ka ei a, a zia leh mai zel a.. Tunah chuan a chhawk thei lo a niang" a ti ţawk tawk a. Biak vak chi ni pawn ka hre lo. Hmanhmawh takin tui ka va lum a, chi ka al a, "In teh.. Tuilum hi an fak thin" ka ti a. Khur der der chungin a lo ban. A han in a, a chanve vel a in tihin a eu leh ngawng ngawng. A na ngang a nih dawn hi. 

"Ka va insiam lawk ang e. Damdawiin kan hnaih alawm. Kan tlan chho dawn nia" ka ti ta a. Ka insiam pahin Mamawii ka call pah, min kalpui turin ka sawm a. A lo peih ve mial e. Lateii chu kan hruai chho ta a, Mamawii nen an inbakkaih deuh nain Mamawii rilru a zau ka ti khawp mai. Kei ai mahin a bawihsawm nasa zawk a ni. Damdawiin kan thleng a, casualty-ah kan lut nghal. Lateii chuan a aw rawl pawh a chhuah hleithei tawh lo. Doctorin a han en chuan, "A rilphir a nih hi.. Zai a ngai ang" a ti ta a. Ka rin loh lam daih a ni. An buaipui ta chuk chuk a, keini pawh hawnna chi ni hek lo. Lateii chhungte number ka nei si lo va, Atea ka va be ta tawp a, a lo hrilh ve tawh mai aniang chu. Lehlamah a zinna lama damdawiin thlen ngai hial khawpa natna a tawk chu ka lainat ve khawp mai. A duh vang a nih bik loh dawn tehlul nen. 

Coffee kan in dun laiin, "A duh hmel che ee.. I ex tiraw? " Mamawii chuan a ti ta sap a. Engtin nge maw a hriat ni. 

"Aw.. Nih kha" ka ti ve mai a. 

"Ka hmuh hnu a ang. A hmel chu tha ka ti. Mahse, hmeichhe tha tak a nih ka ring lo. Kei anga tha lo ni loin" a ti leh kher. Ani hi chu ama sawi dan takah zu leh sa lamah a che ngap ve a, mipat hmeichhiatna lamah erawh Alex nen bak sex an hman loh thu confi takin a sawi ngam a ni. Ni e, Lateii nen an chak lohna a inang chiah lo. 

"Chuan, Esi hi i duh ngang lo tiraw? " a tih chuan ka thil in lai ka phuh thelh. A frank thin lutuk hi. 

"Zep loh chuan.. Aw" ka ti a. A khi sak. "A hmeltha vak lo ve bawk a ni. A pian hi chu a nalh reng… chuan, bialnu nei ve la" a ti a. 

"Ka tum mek.. I hre mai thei amah pawh" ka ti a. 

"Khaw maw" a ti vat. Vawiina kan chaw ei dun tuma kan selfie-na chu ka hmuhtir ta a. A en rei ngang mai. "Isabella a ni tiraw? Hmanni deuha a nau thattua an puh kha" a ti ta mai a. Rin aiin kn Bella chu a lar zek a nih dawn hi. 

"Aw ni e, i lo hre ve ni maw? Mahse, vawiin khan a a zalen chiah e" ka ti a. 

"Ka u nen an inkawm ve thin, college an kal laiin. Kei ai chuan a u hlek.. A khawngaihthlak tawp" a ti sap a. A awmzia ka bo deuh. 

"Engvang chuan maw? " ka ti a. 

"Ih, ka u khan a sawi thin a. A nu thihna kha a tuar tawp a, ruihhlo te a tih phah ve a niawm e. Chuan, bialpa nghet lutuk kum 15 a nih lai atanga inkawp tawh khan nupui a neihsan bawk a, chung vel zawng zawng nen chuan, amah pawh a danglam phah vek a tia.. Kawm pawh an inkawm ta vak lo, mahse, tualthattua an puh khan ka u chuan, "A that lo ang. Ka ring lo bur, Bella hi mi fel famkim chu a ni miah lo, mahse, tualthat tur khawpa nunrawng a ni lo" a ti ve tlat.. " a ti ta a. Ka hriat ngai loh ka han hre thar leh ta chu ka lawm rualin, Bella bialpa chungchang chuan ka rilru a pawt na deuh. Ka chhui ve fe khan ka hre miah si lo. Tu tak ni ang maw? Chutia a kuma a kum inzui tawh, han inphatsan chu a na ngawt ang le. Kei Ruatdiki vang pawn tikhawp khan ka hliam rei a nia. 

Lateii chu zing dar 1 pelh hnuan an zai zo hram. An zai hlawhtling tih kan hria a, kan thaw huai e. A rilphir a lo puakkeh lek lek tawh a lo nia. A chhungte nen pawh kan inbe thei tawh a, A zia deuh huna Aizawla inphurh phei dan tur te kan sawi bakah a nu a rawn phei dawn aniawm e. Rawn phei lohna chi pawh a ni bik lo bawk nen. Ka bula a thleng chu mak an rawn ti viau, a nu ngeiin, "A putea te an awm reng alawm. Engah teh daih nge i bulah a rawn thlen le? " a ti! Lateii a ni miau alawm le. 

Hna kal pawh ka phur lo. Ka meng rei si a. Ka nguai khawp mai. Bella nen kan la inbe mang lo. A la buai ve rih viauin ka ring. Bakah hman ata tawh hmeichhia ti huam huam chi ka ni lo va, ka ngawihtheihna lam tak a ni ve. Mamawii nen kan sawi dun kha ka ngaihtuah rauh rauh bawk. Chawhnu lamah Bena hoin Rahsivengah bawk kan chhuk leh a. Case tenau buaipui paha a bialnu hmuh zeuh hi nuam a ti ber mai. Puii kha a haw tawh a, min bem tlat ang tih ka hlauh deuh vang khan ka leng duh tawh rih lo kha a nia. Ngainat loh zawngte hi chu beiseina siamsak loh mai hi a finthlak zawk awm e. 

"I thawkrim bawk a, i chul deuh rupa ka hriat ni" Lucy chuan a lo ti a. A ni ve bawk ang. 

Lateii damdawiin awm thu te kan sawi kai a. Mamawii a tlawmngai thei hlauh a, ka hna kal chhungin a lo awmpui dawn a ni. He mamawii hi ka fak riau mai, Zu leh sa lama chak lo nazawng hi an lo sual lem lo hle tih pawh ka hre thar. Lucy thingpui sial zet kan in zawhah kan chhuak leh nghal a, Venghlun leh Rahsi veng inrina lai tak kawr kan thleng chiah tihin Venghlun atanga rawn tlanthla mek Tlangval sang lam, lian thelhthawlh leh Bella rawn inphur thla chu ka va hmu ta a. Ka lungphu a rang sawt mai. Min rawn hmu ve lo niin ka hria. Bena chuan, "A bialpa mi? " a ti sup a. 

"Ka hre lo" ka ti hul hak. 

"Bro, in inzui nasa ve angreng sia, i ngaina hmanin ka hria.. A dik em? " a ti a. 

"Dik e. Zep loh chuan" ka ti hmiah. A khi suk a. A sawi zui tawh lo. Kha pa kha tu nge a nih? Bella lah kha a hlim hmel phian bawk si. Awmhmunah ka thikthu ka lo tichhe ve ringawt. Ban rualin Lateii ka tlawh kawi a, a lo harh tha viau. Chaw pangngai a la ei thei lo a, a zia tak a awm. Ka tan a buaithlak ve bawk nen. Mahse, Lateii nuin a putea te a lo bia niawm tak a ni. Ka awm mek laiin an rawn lang hlauh a, Mamawii nen kan haw zui thei ta hlauh. Kan haw hawngah Mamawii chuan"Ani khan a hmangaih che a nih kha.. " a ti sap a. Hmalam a melh ran bawk. 

"A ho" ka ti nghut a. 

"A sawi nasa tawp. Chau chung chung khan, 'Ka hmangaih lo emaw ka ti thin a. Mahse vawiin thlenga ka la theihnghilh loh danah hian ka hmangaih a niang. Ka thiam loh vek a nia. Ka lo inzep kual vel kha a pawi tawp" a ti asin" a ti hap a. 

"Nia, a pawi.. Mahse, ka hmangaih ve lo" ka ti a. Kan sawi zui tawh lo. Lateii putea fanuin a riahpui dawn a, a nu a lo thleng tawh bawk. Zanriah ka ei laiin Lateii bungrua an rawn la nghe nghe. Ka thaw huai mai. Ka nin vang ni loin a chhungte kuta a awm kha ka lawmpui zawk. Kei ka buai si a. 

Bena leh Opa te an rawn leng a. Ka khua a har dawn lo hlauh e. Opa te pawh thla thar lamah an innei thei dawn e. Ka lawmpui hle mai. Opa'n artui a kan leh sur sur danah zakzeh an rawn nei tih ka man thiam nghal. Bena lah a khi hui reng bawk. A zia e. Kan dawm nawm lai takin Bella msg a rawn thleng ve hlawl. 

"I va reh ve" tih a ni. Ka khi suk mai. Mahse, ka lu lam a kai chiai tawh vang ni maw, ka lungpuam leh zah theih loh fawn khawm chuan, "Inpa kha ka hlau a" ka va ti ta a. 

"Tu nge kan pa? " a rawn ti hu. 

"Vawijnah pawh in inphurh kha. I hlim khawp mai" ka ti a. 

"Awii.. A hahthlak ee, ka ni fapa a nih kha" a rawn tih chuan ka zâng hawk thei. Tun hun aia chance tha hi a awm thei chuanga ka rin loh vangin.. 

"Isabella, ka duh che a ni. Ka bialnu ni rawh" tih thu ka va thawn ta a. Zãmna tlem zawng a awm ve e. 

"I rui a nih kha" a rawn tih chuan ka ner sawk. Engtin nge maw a hriat ni. Ka zak thei lo ta sa sa, "Rui mah ila, ka rilru a danglam hleinem" ka ti a. 

"I harhfim hunah le" a rawn ti a. A hnua ka text leh pawn a seen tawh lo. Ka bialnu i ni dawn khawp e. 

A tuk tlai, Damdawiin kawta ka bike ka hun that laiin, "Remruat", a rawn ti a. Ka lehhawi vat. Isabella a ni. Nilengin kan inbe lo. 

"Eng nge i tih? " ka ti a. 

"Ka thian pakhat ka tlawh a. Nang zawk? " a tih chuan, mi kan ka tum thu ka sawi ve a. Kalpui a nei lo bawk a, ",Hawh min lo kalpui ve rawh. Amah hi a nia ka mikhual ka tih kha.. A hmu ve chak che" ka ti a. 

"Tlai tawh hi" a tih chuan, "Nangmah chauhin i khawsa tho a, i thu ber alawm" tiin ka kai hmiah. Min zui ve mai. Lateii chu a nu nen an lo awm a. A muhil a lo harh chiah a niang, a hmel a phak deuh. Bella chu a hmu duh ngang mai. "Lateii a nih hi.. Late, hei Isabella, i bula ka sawi thin kha" ka ti a. A mawi hnai chuan a nui naa, a mitmeng chuan dawt a sawi thiam meuh lo. Bella pawn a hmu thiam ngeiin ka ring. Amah Lateii ber a lungawi vak loh vang chuan awm reina chi ni hek lo, Lateii nu erawh a fel duam duam viau. Kan chhuahsan ta thuai a. 

"I cousin a ni lo" a tih chuan ka va nuih a., "Aw a ni lo" ka ti a. 

"Ani khan a duh che a nih kha" a ti sap a. 

"Ka hria", tih chauhin ka chhang. 

"Chuan" awmze nei fe hian a ti a. 

"Ka duh lo. Ka duh zawk che" awlsam zet hian ka ti a. 

A ngawi rauh rauh. Ka va hnaih hrat a. "Chaw lo ei rawh aw. Mahnia awm ve vr kan nia, naktukah i inah ka ei ve ang a" ka ti ta sauh sauh a. Zak lo chu ka inti ve reng. Mahse, zahzum hun loa zah tut hi engkim chânna. 

A nui hawk a," A chawpchilh em mai. Chawhmeh i nei awm lo si" a ti a. 

"Ka neih ve lai tak.. I siam thung ang" ka ti a. 

"Mateii a lo riak dawn a, ka tlai ang e," a ti a. 

"Chaw eikhamah i haw nghal dawn nia" ka ti hmiah. A hreh vak lo chu mak ka ti zawk. Ka lawm hle tho si. Lehlamah min zah der vea a tana ka theihtawp chhuahna te kha a hre ve bawk a ni. Ka in lam pan chuan kan inzui thla ta a. In chungte an lo inkalh thap mai. Chaw an ei chhuak dawn a ni ngei ang. Thlen rualin rawng a bawl nghal a. Ka inbual san thung. Ka va chhuah lai chuan phonein tu emaw a be mawlh mawlh a. A biak zawhah,"Aruati a nih kha.. Min rawn sawm nawn leh a" a ti a. 

"Ka bialnu i nih dawn chuan kan kal dawn nia" ka lo ti. Min melh kâwk. 

"Ruatdiki laka i natna hrikthlak nan min hman i tum tihna em ni? " a ti fiah ta kâk a. 

"A teuh lo. Ka dam tawh. A lakah ka beidawng tawh. Nun bul tan that ka duh a ni.. Bella," tiin ka va hnaih a. A hmui a tisawi a,, "Ka ngainat zawng tak chu i ni alawm. Mahse, hlauhthawnna ka nei a.. I hriat kha" a ti ta a. Ruatdiki vang a ni tih ka hai lo. 

"Bella, ka sawi ve thiam ve vak lo. Ka duh che a, Aruati cousin i ni tih ka hria. I dinhmun ka hria a, venhim che ka duh bawk. " ka ti nghet charh a. Ka mitah tak a rawn en a, "Hliam thuk tak ka nei tawh a. Ka dam fel chiah naa, khatiang tawrhna kha hmachhawn leh ka duh tawh lo.. " a ti sap a. Mamawii thusawi ka hrechhuak nghal. 

"Ka nawrlui lo che. Hmeichhe thiltithei tak i ni a, i hausa bawk. Mipa tam tak chuan an rawn hel ngei ang che. Duhthlanna i kutah a awm alawm" ka ti a. Roomah ka luhsan zuai. 

Zanriah kan ei dun chu tu ngawi thei thei kan ti mawni.. Sawi tur a vâng bawk a ni. 

Mahse, a tithei tawh ngang lo nge.. "Ih maw.. Aruati'n i thlalak min rawn thawn khan mipa danglam tak i ni tih chu ka hre tawh. Min hmakhalhtu a awm a, ka ngawi mai a ni" a rawn ti ta hlawl mai a. Ka lawm lutuk chu ka chaw ei lai ka hak thelh. Tui ka in a, min lo nuih char char. Ka that deuh hnu chuan, "Chaw eikhamah ka fawp dawn che" ka ti nghut. 

Ka sawi angin ka ti bawk. 

Nunhluia hliam lo paia natna ruk nena khawvel lo hmachhawn tawhte hringnun chuan par a rawn chhuah ve tan chu a nia! Isabella hi ka hmangaih tiin ka la chhal ngam lo. Mahse, hmeichhe danglam tak a ni a, min hîp em em a ni. A hausakna te, a rosumte avanga thlang ka ni lo. A dinhmun diktak, a baihvai rukzia te, a thisen zawmpuite'n an rauhsan in lianpuia khawhar taka che tla thin hmeichhia hi ka khawngaih a, ka duh tel ta bawk zawk a ni. Tun tum chu Pathian pawn ka vanneihna khua hi tisei ve tawh se ka va duh êm.. 

Ka va thlah a, inah ka lut ta lo mai. A luh dawnah, "I bike hi hralh rawh. Emaw kan chhuah dun chuan keng tawh suh. A hnawk" ka ti sup a. Mawi zeta nui saih chungin,"Aw le.. Pu" tiin a bu nghauh a. Chu lai tak chuan Ruatdiki min hriatchhuahtir zawk! Khai! Eng nge ka sawi leh tak.. Ruadiki bawk maw.. Ni lo.. Isabella hi ka bialnu a ni tih ka hrereng tur a ni. 

Mut a tui duh teh e…. 

(Crime kalsanin Romance lamah kual lut leh tan ang aw 😂😂