Thinlung - 12

THINLUNG.. (12)

Ziaktu: Toni Râlte

Ka harh chuan dar 8 a lo ri ţêp tawh. Thawh ka hai ve ngei chu. Lateii zai rat rat thawm ka hre nghal a. Lehlamah zing lama mahni ei leh in tur bawl tuih tuih kha a hneawm ve a, hetia reilote chhung min chhawk pawh a zia viau. Nizan ka hawn khan a lo mu tawh mial a. Min beisei leh tlat ang tih ka hlauh nen, ka lawm angreng hle. Ka phone ka dap nghal a, Bella miscall 3 ka hmu. Call back ta chuang lo chuan, whatsappah ka lut a. A msg a lo awm ngei e. 

"Thil mak deuh a thleng leh tawh. Zing dar 5 a la ri lo tih khan Zosangi rak tuar tuarin min tiharh a. Ka va chhuah chuan thlabar hmel zet hian, "I pa thla ka hmu. Ka khum bulah dingin min lo melh reng. Mi râp lutuk" a lo tia. Awih ngaihna pawh ka hre lo. Mikhual room atangin Hmuna a rawn tlan chhuak bawk. Zosangi khur zawih zawih ka hmuh khan dawt muhlum a sawi chu ka ring bik lo deuh" tih hi a lo ni. Pu Mawia thla a hrâng tihna em ni dawn? Ka va thawh chuan Tukthuan a lo peih titih der tawh mai. A inbual fai sar bawk a. He nu hian ka rilru hneh a tum niin ka hria. 

"Nizan kha i tlai ta sia, ka lo nghak ta lo mai che anih kha. Ka chau ve deuh bawk nen" a lo ti a

"Nia, umm a ngai hleinem" ka ti ve mai. 

Vawiin chu IO roomah ka inkhung chawrh chawrh. Pu Rinawma te chhungkaw profile ka chip vek a, Zosangi leh Hmuna pawh ka en tha leh vek. Tin, Isabella pawh ka hmaih chuang lo. Ka thinlunga a tlak nat tawh dah lian lo vin ka chhui ve tho chu a ngai si a ni. Mpa chiah ka hmabak ta. A thi tawh a, mahse, ani pawh inhnamhnawihna nei ve nia ngaih a ni miau a. Sawi tawh angin ani hi chu Pu Mawia belbul chawttu a ni a, a tunhma nun lam han chhui theih vak a awm tlat lo. Mizo ni lo mah se; Mizo tawng a thiam a, tin, a palianin a hmel pawh a chhe vak lo, Zosangi pawn a bitum ta chat kha a nia. Buaina erawh Mpa a thi chauh a, Hmuna nen rinhlelh an kai leh thei nghal hi a ni. Hei tak hi kan mutân pawh a nih hmel e. Mpa thihna chhan kha chhui chhuak ngat ila chuan, engkim hi a fel duak ka beisei. Chhun chawlh laiin Bella ka text a, "Inah i awm em? " tiin. 

"Awm e. Zosangi rooma camera kam dan ngaihtuahin ka tei sek. Hun awl min pe duh miah lo hi hriat ruk te an nei mawni ka ti hial tawh" a rawn ti a. Camera chu kam thei se thil kan hre awlsam dawn asin le aw. Zosangi a â bik tlat lo hi a buaithlak.

Bdi te inah ka va kal leh lawk. Pawimawhna a nei ve tlat si a ni. Khami zana an in nghaktu a nau ka kawm leh a, ngun taka ngaihtuah turin ka ti bawk. Ka hriat duh tak ka hre leh ta. A zo tep tawh e. 

 Lateii'n min lo call a, "Imma, enteh, tlaiah chaw eikhawm an ti leh a. Partner an nei vek dawn a, i lo tel ve mai a ngaih hmel. Ka single kuk bik dawn a". a rawn ti a. Ka va tui tehchiam lo em. Min ngen nasa bawk sia, ka um e ve ta mai. Mahnia ei leh tawl ai chuan a zia ve tho ang chu maw. 

Lungleia restaurant lar ber pawl, 'Hannah' ah kan lut ta a. A thiante pawh an lo fel viau. Ka hriat ngai erawh an ni lo. An thiannu sam tawi, senior lam lek lek chuan, "Chuan, Late, engtikah maw kan tih huk dawn? " a ti sar sar a. Lateii chuan ka bana rawn vawn pahin, "Nakkum lam kan tinzawn ve a' a ti sap. Awmdan tak pawh ka thiam lo e a. Chaw leh chawhmeh pawh a tui viau e. An titi nak nak reng a, an titi ka zawm ve zauh tih loh chu ka tawng mang lo. Kei he lamah hian ka mawlmang angreng a, ngainatte bulah lo chuan ngawih mai thlang thin kha ka nia. Kan ei kham tan tihin washroomah ka va lut zuai a. Corridor zawh a ngai a, Ka chhuak leh chiah chu hmeichhe lam washroom atanga pu Rinawma nupui Pi Malsawmi rawn chhuak nen kan insu thelh. A nui saih a, kei pawh ka bu zauh. Min hre lo a ni maithei. Kei erawh chuan an chhungkua ka chip hneh viau tawh thung. Eng tak he laiah ti ve ang maw.. Kan dawhkan ka pan lai chuan ka zawng ru deuh a, thlanglam tukverh zawna dawhkanah chuan a lo thu ran a. Amah hmachhawntu chu ka va en chiang deuh a, mak ka ti hran lo. CJM pu Dinga a lo ni reng a! Bella khan min hrilh tawh tak kha mawle. An inbiak thiamzia te chu. Heti taka thahnem ngai, nu duhâm hi ka nu a ni lo va ka lawm khawp mai. Keini pawh kan chhuak zui ve nghal a, ka thaw hawk mai. Insangmar teuhin ka lo awm rei thawkhat a niang e. 

In kan thleng a,kan inthlak nghal. Sitting roomah kan thu dun a. 

"Ka bialpaah an ngai che kha i lawm lo em? Kawng dang ka nei lo anih kha" a ti a. 

"A ho em mai. Ngai ve mai mai rawh se" ka lo ti satliah. Min rawn melh sar sar chungin, "Beiseina ka la nei reng a" a ti a. 

"Late, duhtawk teh. Thian kan ni ka tih kha" ka ti dek dek a, "Thian kan nia, sex kan hmang leh si" a ti hlar a. 

"Duhthlanna ve vea hmang kan ni. Tun hnuah thleng tawh lo bawk se ka duh. Zu kan in tawh lo vang' ka ti nghal a. A ner sak. 

"Chance san lai tak a nia, ka rai mai thei asin" a ti a. Ka nui hawk. "Damdawi i ei kha i hre tawh na nge? " ka ti a. A hawihai deuh. 

"I rui ve deuh mah mah a. I hre chhuak zo lo a ni maithei. Damdawi i ei alawm. 'Rai hman ka la ni lo' i tia" ka ti a. 

"Chupawh nise, 100%in a rinngam hleinem" a ti hram. 

"I rai lo vang" ka lo tihsan. Call ka dawng ta bawk a, ka roomah ka luhsan ta daih a. 

"Aw.. Bella" ka tih rualin,. 

"Patea a lo kal a. Inhnukdawk mai turin min rawn ti leh. Kan inhau hrep a. Thinrim takin a chhuak ta a nih kha" a ti nghal mawlh mawlh a. 

"I nuteii leh cjm pawn chaw an ei dun kha.. An bei mgawrh khawp mai. Engpawhnise, a tawp i thleng ve hrim hrim ang chu.. Zosangi te chu engtin nge? " ka ti a. 

"Umm.. Zanriah ei hma deuh khan a inbual a, Hmuna in hnuaia a awm hlanin ka va kam hram e. Thudik kan hre thuai ang" a rawn ti a. 

"Bella, thil dang daih. Mpa kha i hriatna a rei tawh viau ang a tiraw.. Muani nen khan buaina an nei thin em? " ka ti ta daih a. A ngawi dat. 

"Nasa takin Muani khan a hua. A nu pawh a ankhum thin. A zak ve thin a, a nuin bialpa a nei kha. Mpa phei chu a hnawtchhuak hial thin" a ti ta a. 

"Mpa chuan a haw ngawt ang. Mahse, Zosangi chuan a fanu kha chu a hmangaih ve hle a ni lawm ni? " ka ti a. 

"Tun thlenga ka la chenpui theih chhan pawh nuhrawn tha tak ni lo mah se; a fanu kha a hmangaih ve tlat a ni. Tin, a thlahthlam ngai lo. Bialpa a nei kha a thiam lohna chu a ni ngei ang a, Muani'n a hauh hrep pawn a tilet ngai lo. " a ti ve ta zel a. 

"I patea te leh Mpa kha an inhre ve em? " ka tih chuan, "Hre tehlul e. Ka pa dam loh hnuah phei chuan patea te motor kha a khalhsak chang a tam mai. Keinin chhawrna tur vak kan nei tawh si lo va, Dawrah lah thawh nilen tur a awm ngai si lo" a ti ta a. Ka phur ta kher mai. 

"Sum lamah pawh a buai vak ngai lo tiraw? " 

"Chu lam chu ka hre chiah lo. Zosangi hian a chawm pah ve tho bawk a" a ti a. 

"Chuan, nangmah i tha em? Chaw i ei tha maw?" ka ti leh daih chu a rawn nui hak. 

"I va kal kual tak" a rawn ti ringawt a. Kei pawh ka nui ve. 

"Ka ngaihtuah che ka tih kha" ka ti a. Ka lai ve deuh.

"Ka tha kei chu.. Nang i tha em? Aruati nen in inbia em? " a rawn ti duah a. 

"Ani hi chu i cousin mah nise, sawi lo thei ila ka duh" ka ti nghut. 

". Okay, a tha lawm. Chuan maw.. Ka pa thla vel kha ngaihdan i nei em? " a rawn tih chuan, "Thlahrang ka la hmu lo va, ngaihdan siam thiam a har ka ti, " ka ti a. 

"Ka hnenah te rawn inlar zawk se tha tur" a ti sap. Sawi tur a vâng leh tawh. Lateii'n min lo ko sek bawk sia, a aw a hre pha nge, "Inleng aw sin chi i nei ni maw? Va kawm rawh. Laklawh tawh lo ula" a rawn ti zauh a. Amahah feelings ka nei tawh tih a hrethiam lo mawni le.. 

"Ka mikhual a nih chu ka cousin a nia" ka ti ta ringawt. Kan inbiakna kan titawp a. Ka va chhuah chuan, Esi leh Mamawii an lo awm ve reng a. Hei vang hian Lateii chuan min lo ko sek a niawm e. 

"In va fel ve" ka'n ti ngawt a. Esi hmel chu a hlim vak lo. 

"Kan rawn tlawh zuai che. Mamawii te inah ka riak dawn a" Esi chuan a ti a. 

Mamawii chuan Lateii melhin, "Engtik nge i hawn dawn? " a ti sap. Lateii chuan a sawi a. 

"Hmm.. Esi tan a ngaihthatthlak loh ve em a ka ti mai mai" a la ti zui! Ka va melh hrâwk a, min en duh miah si lo. 

Lateii hmel pawh a tum deuh nghal hmuk., "Imaa bialnu a nih loh te chuan ngaihthat lohna chhan tur a awm chuang a mi?" a ti ve sak. Boruak a ţang riau mai. 

Esi chuan, "Lungleiah chhung innei lo ni maw? " a lo ti ve khauh a. 

"Neih hi.. Imma inah ka thlen hi" 

"Ee.. Cousin inni tih ka hre lo alawm. A ngaihthatthlak sawt e" Esi'n a tih chuan, Lateii a meng râng teh e. A sawi vek tawh si. Han sùt leh chi ni nghal lo chuan. Mamawii thingpui ka lumtir a. Thudang ka sawipui ta hram hram a. Thingpui in zawhah an chho ve leh ta mai a. Ka thawveng huai. 

"Bialnu i nei dawn anih pawn kha nu kher kha chu ni suh se. A chhe ve mah mah" Lateii'n a tih chuan ka nui hawk hawk. 

"Ka bialnu tur chu ka la hmelhriattir ang che.. Hmeichhe danglam tak a ni" ka ti ta a. A meng hnual rawih mai. A pawi mai mai tawh lo. 

A tukah Isabella min ngenna angin an inah ka va kal a. Zosangi te bakah Pu Rinawma te nupa an lo awm bawk. 

"Ani hian he thilah tangkaina a nei em ni? Engvangin nge i koh? " Pu Rinawma'n a tih chuan ka îp deuh. Mahse, Bella chuan, "Ka ko duh a ni mai. Hawh, Remruat, ka roomah" tih leh min kaih a rual nghal a. Ka zui ve mai. Min melh danah khan min lawm hlawm chiah lo tih ka hre mai. An sawi dikna chen a awm, thlahrang chungchanga police va inrawlh daih khan awmzia a awm tehchiam lo ve bawk a ni. A room chu a rimtui hle. Chairah ka thu a, ani erawh khumah vaipa thutin a inkual ram a. A hmel a thutak kher mai. 

"Nizan dar 2-3 inkarah Zosangi a rawn rak chhuak leh a. Hmuna'n a riahpui ta mai. Ani lam chu thuhran nise, ka thil tawn zawk hi phone-a sawi mai chi niin ka hre lo va, chuvang chuan ka ko ta che ni. An thusawi kha chu engahmah ngai suh. Englo a nia, Zosangi te mut that leh hnu lawkah ka muhil thei lo kha ka tal sek a. Dar 4 a ri dawn hnai tihah Muani roomah ke pen thawm ka hre ta a ni. A ring tial tial a. Phun ser ser thawm te, almira hawng thawm te ka hre ta zel a. Ka aw ka thianlui vak a. A reh leh ta vang vang. Mahse, a hnu lawkah thil hnuk ri hruih hruih thawm a ri leh a. Chutah hmeichhe nui awr awr thawm a rawn ri leh ta a. Ka hlauh i ring em? Ka hlau eih lo. Ka thisen in a ngam vang pawh a ni lo, Muani thla a nih phawt chuan ka hlau lo mai zawk a ni. 

Ka va en fiah ta ngat a. Tumah ka hmu lo. Mahse, mihring thiltih ni ta se, kawngka kha chhunglamah a inkalh tlat!,kawngka ka tih chu pawn lam atanga Muani room luhna kawngka kha a nia ka tih. A room kawngka saw chu pawnlamah keiman ka kalh thin. Ka tifai fo bawk. Khum hnuaite pawh ka en a, tumah ka hmu lo. Mak deuh ta chu a rooma ka awm mek lai ka zawn lai khan hlauhna ka nei ve ta deuh tlat a, ka chhungrilah ka khur ta hleuh hleuh a. Hmanhmawh deuhin ka chhuahsan ta a ni. Zingah Zosangi te bulah ka sawi ta a, an hlauh hmel viau. 

Hmuna pawh a tawngchhuak ve ta a. In chung khi i hriat angin tuman an luah lo va, kan tifai reng thung. Hmuna hian bungrua thenkhat a han lak hian hlauhna riau a neih thin thu leh a ţih ruk theihzia a sawi ta a, Zep loh chuan a hma atangin in chung khi chu kei pawn ka nel vak lo, a luh pawh ka lut ngai zen zen lo a ni.. Tun hnaiah ka pa thla a inlar a, Muani room atangin thawm ka hre bawk a. Ngaihdan i nei em? " a ti ta dap dap a. Ka chhungril phurzia a hrethiam lo zawk a nih hmel. Zosangi'n a pa thla a hmu nia a insawi hmasak ni atang khan kei chu ka lo za ru viau tawh zawk a ni. A chhan chu hmelma lam hi an hmanhmawh tawh em em a, an che sawk sawk tawh. Chutak chu keini a changtute lam tan a tangkai thung si a ni. 

Ka hawi kual te te a, "Bella, kan tan chance tha elkhen a ni. Engtik nge i patea te nen in court hun tur? " ka ti su su a. 

"Kar leh zirtawpni khi" a ti sap a. Vawiin hi Nilaini a ni. A karah hun a la tlazep nual. 

"Zosangi ten awmna tur kha an la zawng reng em? " ka ti leh a. 

"An hmu tawh nge engmah an sawi tawh lo. Chuan, sumdawnna kha tukinah Zosangi'n, "Ka share hi lei rawh. Ka enkawl thei dawn chuang lo" a tia.. A chhan ka la ngaihtuah hman lo" a ti a. 

"Bella, i room mah nise, engkim ka sawi thei lo. Hmun dangah inhmuh dan ngaihtuah ang. " ka ti ta a. A phur hmel sawt. Kan va chhuah chuan Pu Rinawma te pawh an lo la awm a. Min melh no tehchiam lo. Isabella chuan, "Kei chuan nizana ka thawm hriat kha mihring thiltih a nih ka rin vangin Remruata hi ka ko mai a ni e. Thlahrang tih vel ka ring ve lo" a ti nghat a. Sawi tha ka ti viau. 

Zosangi chuan, "I ring emaw ring lo emaw i pa kha ka hmu ngei a ni. Mi hrang bula sawi chi ni lo, min uap rengtu hi a awm alawm.. Kei zawng zan hun hi ka huphurh em mai" a lo ti hlak hlak a. 

Pi Malsawmi a lo tawng ve chiah, "Engpawhnise, kei chu huai lam hi ka ngaina mang hlek lo. In leh lo chungchanga kan buaina pawh hi inhnuhdawh mai te ka duh. Ka u lung kan tiawi lo te pawh a niang" tiin an pa chu a melh a. 

"Inho mai mai e a. A hmeichhe thu hla em mai. Ka u khan a in hi luahlum turin min duh zawk pawh a ni mahna. Kan Zosangi lah a dik chai si lo va" tiin Zosangi a va melh kâwk a. A lo tim dai mai. Tihtur em em ka nei ta lo bawk a. Ka chhuahsan ta rih. Mahse, Pu Chunga, Mpa in luahna te inah ka peng kawi ta hram. An nu nen an lo awm hlauh lehnghal a, a zia tak tak a ni. 

"Mpa kha Pu Rinawma te pawn an lo chhawr ve thin tho a ni maw? " ka ti a. 

"Chhawr e a. Mahse, Mpa khan "Pu Mawia a tluk lo. Ka nel thei lo" a ti ve mauh mai a. Rinawma saw zawng a zia saw a dang ve deuh bawk a ni" a ti a. An nuin thingpui sen hang ngei mai min lo pe a, a manhla thin teh e. 

"Tlangkam atanga ka hriat danin Mpa leh pi Mali saw an inbakkaih deuh tawh an tia, inhre ve em? " ka tih chuan an nu nen an inmelh zauh. Pu Chunga chuan aw thian kharhin, "Ka hre ve hauh lo. Mahse, Mpa khan a nel lem lo hle chuan ka hria.. Pi Mali saw inti mitak thiam ve tak a ni a, kei pawn ka nel tehchiam lo" a ti ta a. Han zawh vak tur ka hre tawh lo. 

"Leh lawk, a ruang kha in thawn thla ta kha a nia, a bungrua vel an rawn la tawh em? " ka ti a. 

"Aw rawn ka tawh e. A pa leh a nau ten an rawn la vek e. Mpa kha a tha ve riau, a ac-ah pawh sum a lo dah ve nual a niawm a. A pa te pawh an lawm ve hle a niawm e" a ti a. Ka bu nghut mai. 

Station ka thlen chuan, Bena'n, "Thiana hma i sawn deuh tawh em? A hmawr i bawk hnai deuh tlata hriatna ka nei" a ti a. Ka nui suk. 

"I hre dik maithei. Nghah hlek a la ngai" ka ti a. A zawng zawng ka hrilh ngai lo va, ani pawn min zawt lui ngai bik lo. Zohmingi te soup siam ka hawp leh ta puk puk mai. An titi leh hlut a, "Zoi, Pu Mawia thla a hrang tih vel te kha inhre ve em? " ka ti satliah a. Hriati zawk chuan, "Awii kha kha tak tak mi? An sawi a. Mak ka ti. Ka hlau" a lo ti hliai a. 

"Nia, tak tak anih chuan a zia lo khawp mai" ka ti ve mai a. 

"Ka nauten an sawi a. An in khu kei ka ţih tawh hrim hrim. Muani lah thah a ni bawk sia, a hrang pawh a awm ka ti, " Hriati chuan a ti leh a. Thudang kan sawi ta daih. Chawhnuah bank-ah ka kal leh a, ka duh ka hmu ta bawk. Ban hnuah Isabella nen kan intiam tawh angin chaw ei dun turin kan chhuak ta a. Ka kal dawnah Lateii'n, "I bialnu hual chu mi? " a ti zauh a. 

"Umm.. A thlalak ka la hmuh ang che. Nangmahin lo ei mai rawh aw" ka ti a. A hmel a hlim lo kher mai. Mahse, heti hian ka lakah beidawng law law se ka duh a ni. 

Isabella nen kan case kal lai chungchangah thu tam tak kan sawi dun a. Kan phur dun viau bawk. 

Chaw pawh kan ei puar e. 

"Bella, in saw i kutah awm ta se, nangmahin i khawsa ngam ang em? " ka tih chuan, "Hlauh tur a awm em ni? Mahse, ka tum dan chuan, luah theihin siam then ta ila te ka tia" nui chungin a ti a. 

"Chang ta lo la, awmna tur te i ruahman em? " thutak deuhin ka ti a. 

"Ruahman lo, in luah tur ka melh dawn apiang hian ka inthiam lo tlat zel.. Ka hrethiam lo" a ti a. Chu lam chu ka sawipui duh lo. 

"Pasal nei mai la" ka ti thut. Min rawn melh kâwk a. A lai deuhin ka hria. 

"Hmm.. Ngaihzawng ka nei hleinem" a ti zawi sap a. 

"Nei la" a mita melh ran chungin ka ti a. 

A heh a liak zauh, "Aa.. Nei hman pawn ka khawsa hleinem. Bakah criminal te chu min duh nang" a ti a. 

"Criminal i ni hleinem.. " ka ti nghut a. 

"Nang pawh nupui nei la" a ti a. A nui bawk. A zei lo ve ngawt dawnin ka hria. 

"Ka nei dawn alawm.. Ka nupui duh hian a duh ve chuan" ka thutak ngang mai. Ka zak em em lo bawk. 

"Hmm.. Ruatdiki nen khan innei ula a tha tur.. I hming kha chu ka hre zing asin aw. I thlalak pawh ka ngah thin" a ti a. 

"Ruatdiki a sawi leh ta.. " ka lo ti hluk a. Inthiam loh hmel deuh hian, "Aa.. Tihpalh. In inhmangaih em alawm " a ti sap a. 

"Pathian ruat kan ni lo a niang. I ring ve em? " ka ti a. 

"Ka hre lo le.. A hriatna nei let leh ta se.. I pawm leh ang em? " a ti ta a. Zawhna chhan awlsam tak a ni hauh lo. Ni e, Ruatdiki zunzam hian min la fan tho, mahse, ka ta tur ni loa ka ngaih tawhna hian min khai dingin min tichak mai mai a ni. A hriatna hloh tawh kha nei let lehin inthiam lo leh tlawm em emin, "I Imma, engkimah ka tihpalh" min ti se, kei hian ka hnungchhawn lui thei ang em? A hriatna hloh hi a duh vang a ni lo tih ka hria. Zothana laka a luangliam pawh hi amah Zothana hi a hmaa an inkawm dan te kha hre chhuak leh ni ta se, a duh kherin ka ring lo. A tan mi thar chan a chang ve miau a, kei aiin a thinlung a hneh thiam ta zawk a ni mai. Zothana va dema va haw tur pawh ka ni bik lo, inelnaah a chak lo zawk ka ni tih pawm a ngai a ni mai. 

"Remruat" a rawn tih fiah kakah chuan ka phu zawk. 

"Zawhna harsa deuh ka zawt che a, tihpalh.. sawi tawh lo vang" a ti sap a. Bella melh ran chungin, "Aruati hian a hriatna hi nei let leh lo se ka duhpui zawk. Engkim a khirh vek dawn si a.. Tiraw? " ka ti a. 

A bu nghat. "I thlirna zawn atang chuan a ni mahna. Mahse, kei pawh a tan mi thar ka nia, a hmaa kan inkawmna boruak kha ka ngai thin tho asin" a ti a. A cousin a ni miau a, a ngaihtuahna chu dik ka tihpui. Pudding kan ei mek laiin kan cabin dawt chiah atang chuan inhnial thawm a rawn chhuak a. Kan inmelh zawk. 

"Heti zawng chuan min nawr miah suh. A tirah kan sawi sa vek. Zanina i chet that dan azirin i hlawh chu ka pun ang. Ngampa viau suh" aw fiak thak hian a ti a. A thinrim hmel angreng. Kan lo titi tui atalangin lehlam thawm kan hre lo a ni maithei. 

"A aw chu ka hriat hnu a ni chiang mai" Bella chuan a ti zawi sap a. Ka lo bu nghut. Mahse, fiah ve reng reng tha kan tih vangin kan chhuah dawnah Bella chuan tihpalh thilthuin Manager dawhkanah a tui in lai a thlauh palh a. "Ka tihpalh lutuk" tih paha a rawmawla dawhkan a hruk buai chhung leh Managerin a kekawr a tihfai mek lai chuan Register chu ka pawt phei zauh a, kan cabin kha 8 a ni a, kan cabin hma chiah no. 7-a hming lo lang chu ka zu hmu hman hram e. A chiang e. Pawisa kan inpe fel a, kan chhuak ta. A haw tur chu a beng bulah, "Tha takin le" ka ti sup a. A lo bu ve nghat. Ka bialnu tur a nih hi.. A ni ngei tur a ni. 

Zan lam tihtur vâng riau zel hi a ninawm thin. Zanin chu ka lung a leng deuh nge, ka tingtang la chhuakin bathlar lamah ka va zai rut rut a. Zai hi ka thiam lo viau naa nuam ka ti. Lateii'n coffee min lo siamsak a, a rawn chhuak ve. Thla chu a mawi tawk chauhin a eng bawk. Ka rilruah Aruati leh Bella an inlan chhawk zut mai. Ka bula ding ve reng Lateii erawh chuan a chang pha meuh lo a ni e. 

"A thla pawh la hman lo khawpin i che buai a nia.. Ka hmuh i phal lo zawk aniang" a ti hlak hlak a. 

Nia, thla kha ka la hman miah lo tak alawm. 

. "Thlalak ni loin a tak ngeiin i la hmu dawn nia" ka ti a. Min beisei ngam vak tawh lo nia ka hriat vangin ngaihmawh thamah ka ngai tawh lem lo. 

Dar 10 velah ka mu ta a. Bella nen kan intext zeuh zeuh. 

"Mu tur chuan ka lut chiah e. " a rawn tih chuan, "Ka sawi ang khan aw" ka ti a. 

"Lutuk.. Phone ka dah.. Muttui " a rawn ti a. Ka la be chak asin le. Mahse, a muthilh vat kha a tha si. 

A rimtui zet chu ka lo hip vang vang a, ka khi suk bawk. A kut nel thep chuan ka biang a chul a, ka hmuiah a tawp chat. Rawn kun hniamin ka hmuiah chuan a rawn fawp dek dek a. Maimichhing chungin ka lo dawh hurh hurh a, ka taksa thlawp zaihin a rawn bawk a, ka lo kuah ve chial mai. 

"Imma, ka hmangaih che" ka beng bulah a ti sap a. Ka harh kâwk. Mangpui ka mang emaw ka tia, a tak ramah ka lo cheng chu niin.. Ka chunga bawk mek Lateii chu ka nem thla vat, chhuatah a tla thla a.. "Aaiihah" a ti tuar. Ka thu chhuak ve nghal. Engtin nge?! 

A mitmeng atangin a harhfim lo tih ka hmu thei. Ka room kawngka kha ka kalh emaw ka ti asin le. Ani zu rui hi a rawn lut ve ringawt a nih dawn hi. 

"I roomah phei rawh" ka ti khauh fang a. Ka thinrim hran lo a, ka lawm lo thung. 

A rawn ding chhuak a, a ke a phet leh thin. "I duh ve tho kha.. Eng nge ni vak? " a ti niah niah a. 

"Late, khawngaihin ka lakah engmah beisei tawh suh. I laka ka rilru a tawp tawh. Thian kan ni. Hman zan kha chu theihnghilh rawh" ka ti ta hrâwk a. La na hmel pawh a pu lo. 

Ka kai chhuak ta hmiah a. A dik dawn lo. Haw vat se a tha e. 

Ka harh rualin phone ka check nghal. Ka beisei ang chiahin, "Engkim a tha e.. " Bella hnen atangin ka dawng ta a. Video min rawn thawn bawk. Ka nui chhuak hawk mai. An thlahrang chu a che zei kher mai. Tunah chuan Isabella zalenna kawl a eng dawn ta e. 

Chhun dar 12-ah, "Zosangi te chu an insiam mek" a rawn ti a. Thlahrang hnathawh chu a chak awm mang e aw.. . A nui hnuhnung zawk kan awm ngei dawn e. Chawhnu herah Isabella te in chu kan pan ta vang vang a. Zosangi te pawh an lo la awm e. Pu Rinawma te nupa pawh an lo awm leh tawh. 

"Pi Zosang, tualthahna thubuaiah man i ni. In chhuahsan i lo tum mek bawk a. Kan tlai lo chiah chiah a nih hi" inringtawk zetin ka ti ta a. A mitmeng chu a hmuhnawm letling. 

"Eng a?! Tu nge ka thah a? Tu chu nge ka thah? " a ti tuar tuar a. Hmuna paw'n, "Ni e, Tu nge a thah? " a lo ti ve a. 

Hmuna lam hawiin, "Nang pawh i bang hauh lo. Tualthattu i pui a, hremna i pumpelh dawn miah lo a nia.. " ka ti nghet charh a. An meng tal tawp tawp ringawt. Pu Rinawma chuan, "Hei, eng nge thil awmzia kan va hre lo ve.. " a lo ti hû a. He pa hi chuan engmah a hre lo tak tak ang. 

"Ka pu, hei aia mak i la hre dawn.. " tiin a bula ding a nupui pi Malsawmi chu melhin, "Nang pawn min rawn zui a ngai " ka ti hriam hraih a. A zam lo kher mai. 

"Engvang ngawt chuan maw? " a ti sang vah a. 

"Hmm.. Thlamuani leh Pu Mawia i thah avang khan" ka ti ta a. A meng alh hlap hlap mai. Isabella chu a laiah a rawn chhuak a, a chhungte ho chu melh kualin, "Engkim ka hre vek tawh a ni. He inbumna rapthlak lutuk atanga min chhanchhuaktu Remruata chungah lawmthu ka sawi nghal e. Pate, nang pawh harh tawh rawh. I thluak suksakin i awm a, engmah i hrethiam lo a nih kha.. " a ti fiah kâk a. 

Pi Mali chuan, "Finfiahna innei lo. Tin, tumah ka that hek lo" a lo ti hlak a. 

"Hei hi nizana i thlahrang rawn tirhte chettlat dan a nih hi. " Bella chuan a phone lek vâ pahin a ti a. Pi Mali mitmeng chu a buai ta deuh. 

Pu Rinawma thinin a tuar ta lo nge.., "Sawifiah ru.. Hei hi eng nge awmzia? Engmah ka hrethiam lo" a ti tun tun a. 

"Station lamah le.. Tunah chuan kan kal phawt zawk ang" ka ti a. Constable te chuan an pathum chuan an handcuff a, kan phur phei ta vawk vawk a. Thil a thleng thut ve bawk a, a mak dangdai ve viau ang. Khatia ţhawn thut kha ka duh ve bawk a ni. 

Ka hmaah an thu ran a. Thinrim hmel an pu. Zosangi tak erawh beidawng tih hriat zetin a hui leh pap thin. Pi Mali chuan, "Hetia intih hi ka duh hauh lo a nia. Ukil ka be duh" a ti nghal pang a. Ka lo nuih. 

Pi Zosangi lam hawiin,"In chhuahsan te i lo tum a, in leh lo kha i duh viauin ka lo hre si a. " ka ti satliah a. 

"Ka.. Ih, ka awm ngam tawh lo alawm. U Mawia thlain min tibuai reng a" a ti bah nak. 

"Thlahrang?! Khatia hlauh der kha kei chu ka thiam ve miah lo vang. I che tha khawp mai" ka ti elsen vel a, Pi Mali zawk a lo insehruh nasa. 

"Khai! Nang chu i va thinrim awm ve.. Thlamuani thah a harsat loh ang chiah khan thlahrang rawih pawh a awlsam i ti viau ngei ang. " ka ti a. Min rawn melh vawt raih raih khawp mai. Zosangi chuan, "Ka fanu kha he nu thah hi maw? Tak tak em? " a rawn ti nghek. A thaw a rang viau bawk. 

"Aw.. I fanu kha pi Malsawmi thah a ni. " ka ti nghet charh. 

Zosangi mitmeng a ling ta phat, Pi Mali lam chu hawiin,"Zawngi, a sawi hi a dik em? Dawt min lo fah char char a ni maw? Ka fanu khan i pawi a sawi em ni? Engvangin nge i thah? Mawh? " a ti ta tuar tuar a. 

Pi Malsawmi chuan dawhkan a bih reng ringawt. Zosangi'n a va keh chuan an thelh ta a. 

"Engkim bultanna chu Pi Malsawmi hian min sawisak se a lawmawm ngawt ang. Inzep hun a ni tawh lo bawk a. Engkimah kan daikhalh vek tawh che... Inpuang la, hremna tinep turin ka ngensak thei che" ka ti ta a. A kut a hum ruh a, a melh ngai a melh ngawt ngawt. Nu hmel tha tak zawng a ni e. A nunrawng deuh a tin ni. 

"Engtin nge min rinhlelh theih? " a ti ta daih a. 

"I chanchin ka chhuina atanga ngaihdan nei chauh ka ni. I fing thiam khawp mai. Mahse, kan nunhlui hi phumbo theih loh chin a awm ve miau si a. I nutapa nupui thihna avangin rinhlelh i kai tawh tih ka hriat khan ngaihtuahna thar ka nei ta mai a ni., " ka ti a. A nui sak. Beidawng zeta nui hul hak a ni. 

"Ka thiltiah khan inchhirna ka nei lo tih ka sawi duh e" a ti hawk a. Ka lo melh tlawk tlawk.. 

"Min man lo la chuan, Isabella ngei pawh hi ka target a nia sin" a ti zawi sap a. 

(Ramri buai nen, ka hah rimtawng nen, ka ziak thui thei lo aw. Ka chau. Ka khuasik ve deuh a. Min lo tawngtaipui hram teh u.