Thinlung- 11

THINLUNG.. (11)

Ziaktu: Toni Râlte

Esi leh Mamawii te chu an la tho lo va, an mang a chhe dun kher mai. Esi kha ka khawih ta lo kha a nia. A lawmawm lamah ngai ang. Ka intat lut thuk ang tih pawh a hlauhawm alawm. Tui lo zetin chaw ka ei a. Mamawii chu ka va kai tho bawk. An rawn tho phak ve chuap a, a thing rim an nam ham ham mai. Ka chhuah hmain an chhuak ve thei hram e. Kei pawh phur fahran lo chuan ka chhuak a. Station ka thlen rualin Bena'n min lo bek bawr nghal. "Puii khan a duh tak tak che" a ti! A va hun lo thin em. Ka melh kâwk a. 

"Chutiang ngaihtuah hman turah min ngai em ni? " ka ti hluk. A nui vur vur ringawt. Thlamuani thihna kal zela rinhlelh te list chu ka en nawn leh vek a, tuna Biakdiki thihna nen hian inzawmna a nei lo pawh a ni thei, Pu Mawia thihna leh Bdi thihna erawh engtin emaw suihzawm hram dan awmin ka hria a. Ka thluak a buai ve hle. Nizan ka lo lem ve nual bawk nen. A hmasa berah kan case kal lai pel rawk khawpa ka chet phawt a ngaiin ka hria. Bdi vui liam phawt se, a chhungte va hmuh ka rilruk ta a ni. Isabella ka text a, "Sumdawnna chu intifel thei ta em? " ka va ti a. 

A hnu daihah, "Tifel thawkhat. A phut angin Zosangi pawh 50% chu ka pe ve ta mai" a rawn ti a. 

"I hman veleh i patea te chhungkaw chanchin hriat ka duh ang. I hriat theih chin chin" ka ti a. 

"Ka lo ti ang" a rawn ti. Ni e, hmaih ka neiin ka inhria. Pu Mawia nau pu Rinawma te chhungkua ka lo en kan thui lu deuhin ka hria. Muani chungchangah khan inhnamhnawihna an nei lo a ni maithei, Pu Mawia thihnaah erawh tel vena an nei mai thei asin. Heti taka an u thihna pawh a la rei loh em em laia in leh lo-a an buai dan atang hian ruahmanna eng emaw tak chu an nei sa niin a lang tlat a ni. 

Chhun chawlhah ka riltam bawk a, Paratha hlai hlep hlawp leh soup tak zet ka ei a, ka harh hawk mai. Tuna kam canteen nghaktu te hi Vani nu te kha an ni tawh lo va, ka la nel em em lo. An nula sang er ur, hang lam deuh, hmel erawh chhe vak lo chu thian dangte chuan an chhaih an chhaih leh tawh a. Zohmingi a ni a, fiamthu a dawl hlein ka hria. An thil siam pawh a tui. 

A hnathawkte zinga nula chum biang buang, hnute lian zet hnenah chuan, "Lalhriat, rawn kal lo mah la a pawi vak lo asin le aw.. In thenawm lawk an ni sia, a mawi lo.. " a ti a. 

Hriati chuan, "Nia, mahse, Terema a rawn kal dawn lo emaw ka tia.. I buai ka ring sia" a ti ve a. 

Zoi chuan, "A mak e, Bdi chu damdawi a ti ve tih ka hre ngai lo reng reng" a ti lehzel a. Hriati chuan ner deuh nâng hian, "Kei pawn ka hre lo. Ka ui ee, a fel si, kei te hi min duat thei asin aw" a ti ve vawng vawng a

An hming sawi chuan ka beng a verh lo thei lo. Bena bakah ka thian tha em em tho Hruaia te nen chauh kan awm tho bawk a. 

"Bdi intih chu home nurse kha mi? " ka ti a. Min rawn melh rual ţhawih. 

"Umm, tukin dar 4 bawr vel khan a thi a.. Hei Hriati te thenawm hi an nia" Zoi chuan a lo ti vat a. 

"Damdawi te kha insawi a, a OD tihna mi? " ka ti ve zel a. 

"An tia lawm. Damdawiina an kalpui chhan kha damdawi a bar nasa lutuk a, an kai harh zo lo an tia. Mahse, hei chen ka hre tawh a, damdawi rui chi a ni lo" Hriati chuan a lo ti ve tlat a. 

"Damdawi te chu hriat a harsa asin.. An ruih leh ruih loh" ka ti a. 

"Chu pawh nise, chutiang ti chi a ni lo. Kohhranah pawh a inhmang asin. Bakah a fel lutuk" a ti ve zel a. Kan ngaihtuahna a inang lo nasa si. 

"A nih leh Mate, Bdi chu a hma khan Isabella te inah a pa enkawl khan a thawk ve tiraw? " ka ti ta a. 

"Thawk e, pu Mawia kha a thi ta sia, thawh lehna tur a zawn mek laiin tihian a thi ta sia.. Mahse, pu Mawia thih hnu khan a zia a dang an tia.. A enkawl ber khatia a thih vang kha a niang, amah a rilru a tha sia, an lo inenkawl rei ve bawk nen. " a ti leh ta zel a. Ka chhungril phurna chu ka thup a ngai hial mai. 

"A dik ang. Doctor te pawh hian an dam lo enkawl rei tawh thi chu an tuar thin alawm. Bdi pawh chuan a tuar ru viau ang" chawhphur tum takin ka ti a. 

"Umm.. Kohhranah pawh a inhmang lutuk tawh lo. I sawi takah chuan damdawi a bar vak pawh kha Pu Mawia thihna a tawrh vang a niang a" a ti hlut a. Ka lo nui ringawt. Hei hi chu a ni thei lo. Mahse, Pu Mawia thihna nen erawh a inzawm tih ka thinlung hian a chiang tlat. Ka zawt zui duh ta rih lo. A ngaihte a tha lo reu reu ang. 

Zoi zawk chuan, "Isabella sawi takah chuan ka khawngaih e. Muani lah a thah ang te khan an sawi a. Ka awih lo rapthlak. Muani kha chu a duat lutuk, Muani leh ka naute hi an inkawm ve thin a.. Ka chiang" a lo ti ve a. 

"In va hrechiang ve. A nih Mpa hmannia inawkhlum kha inhre ve em? " ka ti a. 

Zoi chuan, "Ani kha chu la hre ve vak lo, a hmel chu ka hria. Isabella te chu a lar ve lawm.. Bazar vengah te chuan" a ti ta daih a. Ka duhtawk ta rih. Remkhawm harsa ru tak, rinhlelhawm kat nuk bawk si kara thudik zawn chhuah hi a khirh zêk zel. Tisual lo tu kan rek palh ang tih a hlauhawm bawk si. Zosangi te chetpelhna kan chân ruk deuh a ngai tihna a ni mai. 

Chawhnu lamah Isabella chuan file min rawn send a. A patea te chhungkaw chungchang a ni ngei e. Ka tibuai lutuk ang em aw. Lehlamah kan inpuitawn tihna a ni ve tho mai. Uluk takin ka chhiar ta a. Pu Rinawma chu sawrkar hnathawk niin, a hlawh pawh a beitham lem lo. An nu hi Hmar lam mi a ni a, pasal hneh thiam tak, inhauh nikhuaa tawngkam duhtui tehchiam lo a ni thung. Fa pathum an nei a. An upa ber chu Bella aiin kum 1-in a naupang a. Sawn pawmin fa pakhat a nei. An milai mipa erawh Pune-ah lehkha a zir thung, an te ber hi Muani nen an inrual khat viau a, ngawi chet chet, pawn lama inlar lo tak a ni. Bella sawi hmangin a pa chhungte dang zingah an ni nen hian an inpawh lo ber a niawm e. A patea fate nen pawh an inpawh em em lo. An intlawh pawh lutuk lo va, Pu Mawi that lai kha chuan kum khatah vawi hnih tal chhungkaw chaw eikhawm an nei thin. Mahse, tikhan a han na chho ta a, a pa farnu a chhang chiah bak hian a rawn ngaihven vak lo a niawm e. Pu Mawia hian farnu pathum a nei a, pakhat chu Aizawlah pasal neiin hmuh pawh an inhmu khat angreng. Pahnih te erawh Bazar vengah tho pasal an nei a. Tin, Pu Rinawma lo zawk a unaupa hi Khawthlangh a awm thung. Ani hi chu a rawn hnawksak ve lem lo a ang. Pu Mawia nau Rinawma leh an te ber Bella nî tho Pu Tluangi te hi in leh loah an buai ta ber chu a ni e. Pu Rinawma nupui hi Aizawl milian chhungkua atanga lo zi chhuak a nih vang nge a hmelhriatte an hrawl ve riau a. Tuna Lunglei CJM pawh a hmelhriat tha tak a ni a, Bella te chan a chhiat phah mai thei a ni. Tun laiah unau inkarah pawh engmah hi a fair tak tak thei si lo va. 

Ka chhiar chhuah dap hnuah rilru lem pawh nei lem loin ka thu tlawk tlawk. Bella ka ngaihtuahnaa a rawn luh rual chuan, Ruatdiki a hria tih kha ka hrechhuak zawk! Boruak dangin min nèk reng a, ka lo hrechang tawh hlek lo a lo nia. Tin, Ruatdiki hrim hrim pawh ka ngaihtuahnaah a lut khat ta riau. Sawi tawh ang khan ka beidawn vang kha a ni pakhat tawh a. Ka lawm daih zawk. 

"Ruatdiki kha i hria tiraw? " ka va ti tâwng a. 

"Tu Ruatdiki" a rawn ti he haw. 

"Aw.. Hman zana i sawi kha mawle.. " ka tih chuan, "Nia, nang pawh ka hre daih tawh che lawm" a rawn ti ta mai. Ka phâwk hru mai. 

"Eng nge a awmzia? " ka ti a. 

"A va ho e aw.. Ka hria che ni mai. Pasal a neih dawn kha, va tel ve i tum em? " a la ti zel a. 

"Tum lem lo, nang i tum mi? " ka ti thung. An inkawm thin a nih ka ring. 

"Tel thei tur pawh ka nih loh hi.. Bakah min hre tawh lo alawm.. A hriatna a hloh hnu khan" a ti ta a. Mak ka ti telh telh. Kan inngaihzawn lai, min la hriat lai khan Bella hming a sawi rik emaw a hmel ka hmuh emaw ka la hre si lo. 

"In inhriat dan chu sawi tawh teh" ka ti ta hmiah. 

"Ruatdiki nu saw ka nî a nia" a ti ta mai a! Ka phone ka thlauh ţep a ni. Nu Dini saw Isabella pa farnu maw?! Eheu! Khawvel hi a va zim thin ve. 

"Ka van hmu ngai lo che. Aruati nen kan nih lai khan" ka ti a. 

"Min hmu lo vang, ka rawn zin khât angreng a. Kei pawn a takah ka hmu bik hleinem che" a ti a. Phone atangin min hria a nih hmel e. 

"A mak hle mai.. Hehe" ka va ti a. Min reply tawh lo. Ruatdiki han zawh dawnin a hriatna thenkhat a hloh vek si a, awmzia a nei tehchiam lo vang. 

Zan lam chu ka chau ve deuh bawk a, ka mu hma. Ka mutui phian mai. A tukah erawh ka tum lawk angin Bdi chhungte va biak rawn ka tum ta a, Min lo lawm vak lo mai thei a ni. Mahse, a pawimawh ve tlat si a. Bena'n min kalpui thei hlauh a, ka lawm tak tak a ni. Inleng an lo la nei nual a, a hmain phone atangin ka lo sawi tawh tho a, an hamhaih lem lo. Bdi pa Pu Zira te nen an in chung zawlah kan chho ta a. Pu Zira chu hmuihmul ki van mai, pa nelawm fahran loh, mahse, han biak takah chuan fel fu mai a lo ni a. 

"Pu Mawia boral hnu atang khan a mizia hi a danglam dawrh a ni mai. A tawng khat em em a, chaw lah a ei tlem si. Amah pawh a tla kawk kawk mai a. Keini chuan a dam lo enkawl thih vangah kan ngai deuh mai. An inenkawl rei ve em bawk a, Zosangi te leh Bella te nen pawh an inngaina hle tawh a ni. Tin, hlawh an pe tha a, Hospitala thawk te ai mahin a hlawk zawk ti mai ang. Chuvang chuan a tuar ve rihah kan ngai. Damdawi hi ka fanu a nih vang ni loin a ruih lai awm ka la hre lo va, tin a ruih thin ka ring hek lo. Mak deuh pakhat, ka rilru kap tlattu, nakinah inbulah ka la sawi ang ka tih rilruk ka'n sawi ang e. 

A thih hma karah khan chhun thingpui in dawnah kan nu hian, "Va ko teh.. Hei thingpui rawn in rawh se' min tia. Bdi nen hian kan ngainain a nu ai mahin min pawh zawk ti mai ang. A room pawh chu ka va lut mai a, mahse, ka thil va hmuh khan min ţhawng angreng khawp mai. Pawisa note clip chhah zet zet hi polythene-ah a lo khung mek a. Min hnungchhawn vangin min hmu ve lo. Pawisa chu a tam tham si, chutiang a kawl tih ka hre lo hrim hrim. A hlawh lak pawh hian a bo a bang awm loin a nu a pe vek thin. Thawm ka neih takah chuan a phu chiang kher mai. A rawn hawi let vat a. A mitmeng chu a dawih ngang mai. Ka ngaihbel pawh a ni ang. "Rawn kik hmasa ta che" a ti hlar a. A thinrim hmel viau bawk. Kei pawh ka inthiam chiah lo nen, ka kalsan zui deuh. Ka ngaih erawh a tha thei tak tak lo. Room a chhuahsan khât avangin han chinlehna hman a awm si lo. Chuan, damdawi a bar hma tlaiah khan "Ka chhuak lawk dawn. Ka thiannu thil ka kawl a, ka pe dawn" tiin bag nen a chhuak a. Tu nge a va hmuh ka hre lo. Tikhan kan buai chho ta mai sia, a room ka chinleh hrep pawn pawisa kha ka hmu zo tawh lo. A chhuah khan tu emaw kutah pawisa chu a va dah a nih ka ring. Chu chu buaina tham a tling lo mai thei, mahse, ka sawi ve hrim hrim a nih chu" a ti ta a. Beng a var hawk e. Ka thil chhui laiah min la pui thei zel niin ka hria. 

"A nih thil dang lawk. Damdawiina in indah luh zan khan rawn kantu che u an awm nual ang a, Pu Mawia chhung khat te an tel ve em? " ka tih chuan, "Aw.. Zosangi leh a nau awmpui thar te khan zan tirah min rawn kan a. 11 rik dawnah Isabella a rawn kal zuai bawk. Inkan hun a ni tawh lo bawk a, rei erawh a awm lo. Amah Bdi ber a biak theih si loh a" a ti a. 

"A lawmawm e. Ka rin aiin min lo dawngsawng tha a. Engpawhnise, Bdi thihna hi ka tawrhpui che u, Leh lawkin, pawisa i hmu tih a hriat hnuah chuan engmah insawi dun lem lo em ni? " ka ti a. 

"Sawi dun chu ka duh a, mahse, amah khan min hel zel ni berin ka hria. A nu leh a naute phei chu ka hrilh duh lo.. Ka biak hman lohin tikhan a kal ta si a, ka fanu khan a thihna tur kawng a zawh tih chu ka pawm a. Mahse, a phenah hian eng emaw a awm ka ring ve tawp. Ka ngaih hi a tha lo a ni ber mai.. Hriat chhuah ngei pawh ka duh a ni" a ti charh charh a. Ka lo bu nghut. Ni e, kei pawn ka ring. Nula apumpa, a dam lo enkawl boral tak vanga amah intihhlum ve ngawt thu a awm lo. Chhan tha tak chu a awm ngei tur a ni. 

Kan hawn lamah Bella te kan tlawhkawi a. Mahse, a lo awm lo. Hmuna kha a lo awm thung. Zosangi pawh ka hmu lo. "Hmuna, Sangau i tlawh lohna a rei tawh sia, i ngai ve tawh ngawt lo maw" ka ti satliah a. 

"Ngai ve e.. Sangi nen la zin kan tum alawm.. Boruak te hi han ziaawm deuh se" a lo ti ve luam a. 

"Sangi hi nei daih la, pa hausa i ni mai" ka ti fiamthu a. A mitmenga eng emaw lo lang zawk chu ka chik hle. 

A nui tak naa, a nuih a za hlek lo tih pawh ka hria., "Unaute chu chi nang" a ti a. Ka sawi zawm tawh lo. 

Mami nen kan inbia a. He lamah buaina, Sawlamah pawh buaina bawk. Hah a va dam lo thin tak. 

"Mam, enteh, a sim turah ka ngai a. Ka hawna a la rei loh nen, nizan khan number dang atangin an inbe leh tih ka man chhuak a. A bulah chuan ka la sawi lo naa, mit ngeia hmuha prove ka duh si a, ka la ngaichang. A tenin ka ten tawh. " a rawn ti bawrh bawrh. Sawi mai tur pawh ka hre lo e a. 

"Ni e, kut man ngei hi a tha. Nang pawh i rilru a let thei ang a. Lo tuar hram hram rawh" ka va ti a. 

Kan inbe zo ka whatsapp ka han hawng chu, number ka save loh atangin,,"Induhpa, i la thi em lo maw? " a rawn ti a. A dp ka en vat. Lateii ni reng chuan! Ka reply lo. 

Eirawng ka bawl laiin Mamawii a lo chhuk leh a. 

"Esi chu i duh ve tho tiraw? A sawi reng che a, a ninawm zawk. Nihpui ang che" a ti leh hmiah hmiah. Ka nui ringawt. 

"Nui suh. A zei teh mai a nia. Bakah a sual lo, a drinks ve zeuh zeuh a ni mai. Ka thiannu ve ber a nia, ka tan pawh a nuam lo" a ti leh a. 

"Ka duhzawng a ni vak lo a" ka lo ti. 

"Mipain duhzawng leh duh loh zawng innnei ve vak mi? " a ti he haw. 

'Nei tehlul e. Esi chu chhia ka ti pawh a ni lo. Mahse, ka la inpeih lo alawm.. Hnaah ka buai bawk si" ka ti a. Kawngka an lo kik dat dat. Ka va hawn chuan ka ding chawt. Bag ak chungin min lo nuih sâng mai. A hmel a la paih vak lo, a hma ai mah khan a hmel tha zawk mahin ka hria. Ni e, Lateii a ni tlat! Hetah tehdaih chutah pawh ka in luahah kan inhmu ang tih ka lo ring ngai lo. 

"Hetah, eng nge i rawn tih dawn? " ka ti hu a. Ka aw pawh a nelawm vak loin ka ring. 

A nui saih a, "Hna thilah kan rawn zin thut sia, Hotel thlenna mai tur ka hre si lo va, ka rawn pan ve tawp che. Call i la. Duh lo a nih kha" a ti a. Ka ner sawk. Ka ph ka charge daih a, ka lo hre lo a ni maithei. Mamawii a awm ve vangin ka insum hram hram, "Ka thiannu a nih hi.. Lateii, Late, hei hi Mamawii inchung nula a nih hi" ka ti sawk sawk a. Ka beisei loh tawpa ka bialnu hlui ka mikhual dawn vang chuan ka hamhaih ve deuh. Lateii thisen sang lutuk chu mipa e ti lo chuan ka ngei lek lek mai. 

Mamawii chuan, "Ka chho dawn.. Esi chu aw.. Lo be tha ve ang che" tiin min siai zauh a. Lateii awm vang nge mawni, "Nia, be tha ang" ka tih ve tak ngawt kha. 

"Chuan, sawlai saw mikhual room a nia. Bathroom pawh a awm nghal.. Nangmahin lo che ve tawp tawp phawt mai rawh aw" inthunun tum takin ka ti a. 

Inthlahrun hmel lek lek hian, "Imaa, ka duh vang reng a ni bik lo a nia aw. Hotel book ka tum a, a lo khat vek tawh sia, i awmna lai ka hre bik si lo, Atea ka va zawt tawp alawm" a ti niah niah a. Lehlamah Lunglei a lo zin vawikhatna te pawh a nih hmel a, bialnu hlui te an lo ni bawk nen, baihvai lutuka a awm chu ka khawngaih ve tho. Atea hi tlem lai khan zan khat riakin a lo zin tawh a, ka awmna lai a la hrechiang fu a nih dawn hi. 

"A ho lutuk, va intifai rawh. Ka khua a har loh phah zawk ang a, a tha daih zawk alawm," ka ti a. A kalsawn ve nghal. Vawksa ka siam a, sa siam hi chu ka thiam ve deuh. Mikhual ka nei ve miau si a, chawhmeh chhe deuh han hmehpui kha a nuam lo. A inbual zawh meuh chuan zanriah ei a hun ta thuak a. 

"Ei nghal mai ang aw.. " tih pahin ka siam nghal a. Min rawn pui vat. A ngampa sarh sarh vak lo. Nuam a ti vak bik lo mawni. Ngawi rengin dawhkan kan kil a. Boruak uap lutuk tihreh tumin, "Eng hna berah maw i rawn kal" ka ti a. 

"Survey angreng ka rawn nei dawn a. Bakah biak tur an awm nual" a ti ve mai a. Company pakhat hnuaiah a thawk tih ka hria, ka ngaihven thui lo. 

"Mahnia awm nan chuan a lian mah mah a nih hi.. Lunglei lamah hian min rawn sawn thut maithei a. In luah tur min la dappui ve la a tha ang" a ti a

"Nia, mahse, a vâng ve riau zel. Kan zawng dawn nia. In dam tlang hrim hrim maw? " tiin titi dang ka vawrh a. 

"Dam e, Taka Ruatdiki pasal neih tur kha i hre tawh em? " a ti hluai a. 

"Hria e. I hre ve ni maw?" ka ti hul hak. 

"Umm an pa tur kha kan nau alawm. Zothana kha. A pawi ngawt mai. Ruatdiki accident kha chu," a ti hniam raih a. 

"Nia a pawi.. Sawi vak ka duh lo a" ka ti hmuk. Thil dang a sawi ta daih a. Ka nin em em thleng sil a ngai lo va, a zia e. Kar khat lai a cham dawn lehnghal a. Keini hi kan inveng thei ngut ang nge maw le.. A lakah feelings nei lo mah ila; Mipa ka ni miau a. Ka hre tawh lo le. 

Tv kan en dun a. Phone kan khawih tam zawk mah. Esi chuan min lo be ngei mai. Ka reply ve zel mai. Beiseina siamsak ka duh lo. Ka tui lem lo va, duh chawp ngai hmeichhia chu ka duh rei theih ka ring lo a ni. 

"Imma, bialnu hi i la nei leh ta lo mi? " Lateii chuan a rawn ti thut. 

Ka ngawi vang vang a., "Umm.. Nei ta rih lo" ka ti sup. 

"Keimah nen khan inthen lo ila tiang hi i tawng awm si lo va tiraw? " a ti a. A sawi dik maithei. 

"Nia.. Mahse, kan inthen chhanah kha chuan thiam lohna ka neiin ka hre lo" ka ti a. 

A nui sak, "Keima thiam loh alawm. Ka hria. Ka runluih kual vel che kha a pawi ngawt mai. Mahse, enteh, a la tlai lo asin. Bul kan tan tha leh thei lo em ni? " a ti ta a. Min melh kal bawk. A hmel hi zawng a tha thlawt e. 

"Aa.. Thil chat tawh zawm leh chu a hnawk duh an tih kha maw.. Tihian thian kan ni zel zawk ang a, a tha mai" ka ti ta a. A meng hnual deuh. 

"A nih chuan ka lo thlen chilh che hi i lawm vak lo vang tiraw? Ka insawn leh mai dawn mi? " a ti a. 

Mi â ka ni bik si lo. "I ho e a. Chutiang sawi suh. Thleng min sil chhawktu i awm a. Ka lawm nak alaia" ka tihsak ta daih a.

A tukah pawh kan chhuak rual a, Venglaia an office kawtah a chhuk. Kei pawh bank-ah ka kal. Pu Mawia thih hma emaw thih hlim velah Zosangi'n Pu Mawia ac a khawih che em tih hriat ka duh tlat a ni. Bdi pawisa kawl teuh kha, 'Thamna' a nih ka ring ka tih hian thil dang puh tur ka hre rih tlat lo. Tin, Pu Zira kha ka be leh a, Bdi phone an kawl leh kawl loh ka zawt, "Mak deuh chu ina kan buaipui lai khan a khumah a awm reng khan ka hria a. Damdawiinah kha chuan kan keng lo. Hei a boral a, a phone awmna reng reng kan hre lo" a rawn ti ta chiah a. Tu emaw chuan Bdi phone a kawl ngeiin ka ring tlat a ni. Bank lam pawh a lun viau mai a, mahse, an manager leh thawktu pahnih vel hi ka hmelhriat ve, ka nel ve em emte an ni hlauh a. Ka kal chhante ka han sawi takah chuan an ngaipawimawh ve bawk a, an check ta a. Pu Mawia thih hma kar khatna Ninga ni-ah Zosangi chuan, Rs. 230000 a la chhuak tih kan hre thei ta a ni. Heng sum zozai hi eng atan nge a hman tak ang le? Pu Mawia thih hnu lawkah an sumdawnna a hralh bawk si. Rilru tibuai deuh mah se, ka kawng vaikiangtu hmanrua atan ka la hmehbel thei zel a. A zia viau. 

Pu Zira te inah ka phei leh a. Bdi damdawiina an hruai hlana an in nghaktu Bdi laizawn, an naupangber Teteii chu ka kawm ta a. Lo kal te a hre thei em tihte. 

"Ih, lo lut chu an awm nual mai. Thenawm te ho an nia, chuan ka thiante riak turin ka sawm bawk a, an lo kal. " a ti mai a. 

"Pi Zosangi te chhungkua an rawn lang ve em? " ka tih chuan, a chal a chuar nãng a. "Umm, a û an kan haw lam an rawn peng zuai a, e chuan, Nu Zosangi khan, 'Bdi khan ka damdawi chah a kawl a. Ka va la lawk aw' a tia, A û roomah a va la a.. " a ti ta a. Ka au chhuak lo chauh. A chiang ta kuar maiin ka hria. Bdi thihna leh Pu Mawia thihna hi a inzawm ngei ang tih hi ka ring nghet ta tlat. Finfiahna kan la nei lo mai zawk a ni. An chenpui Isabella chiah a pawimawh ta. 

Mi pawisa hmanna leh an bank ac details kan hria tih puanzar ngawt thu awm hek suh. Pawimawh leh ta bawk chu, Bdi khan khami tlai khan tu nge a va hmuh tih a ni leh ta. Zosangi a nih loh reng ka ring lo. Pu Mawia thihnaah a inhnamhnawih ve miau avangin nuam a ti lo va, a pawisa kawlsa pawh pek let leh duh hialin a inchhir ta a. Mahse, pawisa a pe let tawh anih si chuan, eng vangin nge thih kher a tum tak ang? Nun thara nun a tum zawk tur a ni lo em ni? Huiham, buaina hi ka hne a, kan hna a ni si. 

Ban dawnah Bella ka call a, "I chhuah chuan inhmu lawk ang hmiang. Sawi dun tur a awm" ka ti a. 

"Aw le, khaw nge niang," a rawn ti a. 

Inhmuhna hmun tur ka sawi a. Kei pawh ban rualin ka tlan chhuak nghal. Coffee kan chah a. In pahin kan sawi dun ta a. Ka thil hmuh chhuah zawng zawng ka sawi ta dap a, a ngaithla uluk kher mai. A bu nghat nghat bawk. 

"Zosangi hi i rek chhuak mai thei lo em ni? Dawp deuh ula a inpuang mai lawng maw? " a ti sap a. 

"A theih ngawt loh alawm. Pawimawh ber chu nang hian i lo chîk leh zual a ngai a ni mai. Eng pawh ti rawh, hei hi hrereng la, i pa thihna nen a inzawm kual vek tih hi" tiin ka melh ran a. A mit a khap sak sak. 

"Ka pa kha tihhlum a nih teh chuan phuba ka lak loh ring miah suh ang che. Duh leh ka tâng kumkhua mai ang" a ti hniam raih a. A mitmeng a ling vâwt bawk. 

"Mahse, finfiahna kan mamawh a ni. Muani thihna pawh kha ruahmanna tha tak a awm ang. Mpa thihna leh Muani thihna hi chu suihzawm a harsat ka ring lo" ka ti a. 

"Chu! Muani kha Mpa thah a nih chu i lo ring tihna em ni? " a ti hul hak a. 

"Umm ka ring. Mahse, Zosangi'n a thlahthlam takah khan engkim sawi chhuahah a vau ve a, chu chu a thih phah taah ka ngai." ka ti nghet charh a. A bu ve nghat. 

"Thil dang. Ka patea te nen naktukah CJM kan hmu dawn. Hmabak a ko khawp mai" a ti a. Ka lo lainat ve deuh. 

"I zâm em? " ka ti sup a. 

"Zâm khawp mai. Mahse, khauh taka ka din a ngai si a. Thiam thil hman tur ka nei ve bawk si lo. In saw an chang a nih chuan,Zosangi leh Hmuna saw an chhuak dawn a. Kei pawh ka chhuak ang. Mahse, ka damchhungin Ka patea hi ka pa nau a ni tih ka theihnghilh tawh ang" a ti nghat nghat a. Ka tum loh lutukin a kut ka va vawnsak ve ngawt! Min rawn melh zawk a. Mahse, ka thlah leh vat. 

"Aa.. Ih, i rilru hi a buai dawn lutuk tih ka hria. Chinfel tur i ngah si. Kei lah hma ka sawn hleithei rih si lo. Pawi ka ti" ka ti ta a. Ka rilru dik tak pawh a ni. 

"Hei bak baka hmasawn. I hmanhmawh a nih kha. Dikna chu a rawn lang em em ang; i chhui chak ka ti lutuk. " a ti ve luam a. Rilru a nuam ta deuh. 

"Chuan, i pa ac saw Zosangi hian a chhawm zui ta em ni? " ka tih chuan, "Umm.. Saw em em chu ka chuh ta lo mai. Lehlamah ka pa nupui a ni ve miau a. In leh lo kan chan loh phei chuan a intunnun nan pawh a tangkai ve dawn a. Kei chu ka pa khan min hmangaih bawk a, Ka ac-ah hian ka nawmsakna tur khawp pawisa chu ka nei tawh alawm" a ti a. 

"Engpawhnise, i patea te pawh chu kei pawn lo enthlak ka tum tho ang a. Thihnaah hi chuan an inrawlh ka ring lo lek lek zawk.. Mahse, kan rin loh lam atang hian thil hi a lo inzam thui ve phian zel a nia. Zosangi te pahnih chu ngawrh lehzuala i lo enthlak ka duh ngawt mai" ka ti a. 

"Ruahmanna thar ka nei tawh alawm.. Lo lungngai suh. E chuan, Ruatdiki'n min rawn bia asin," a ti hliai a. 

"A hre tawh che em ni? "

"Hria a, mahse, kan nunhlui a hrechhuak zo lo. Inneihna hmanpui turin min rawn sawm nawn leh a. Ka ni nen pawh kan inbia a, kan case kal laiah incharge i ni tihte ka hrilh a, mak a ti ve lutuk. Ani saw chu ka lamtang a nia, tihtheih a nei vak lo zawk a. Ka patea te pawh a ngei ve khawp mai. " a ti mawlh mawlh a. A hmel pawh a zangkhai leh sawt. Kan chhuak ta a. A bike start lai chuan, "I inhmeh ve ngawt mai" ka ti satliah a. Min rawn melh a, "Ka lawm e. Nang pawh " a ti ve ringawt. A tlan zui nghal. Ka ruak huaia ka hriat ve ringawt le.. Ruatdiki cousin a nih vang a ni mahna. Buaina hi zo se, Ruatdiki chungchangte pawh ka la sawipui thei mai thei asin. Thim thet thetah in ka lut a. Thil theihnghilh ka nei. Lateii ka mikhual tih ka lo hrechang leh tawh lo. Mahse, Zingah khan chabi spare ka pe a, a lo haw tawh aniang, Eirawng pawh a lo bawl peih vek tawh. A hahdamthlak hle mai. Ka inbual sawk sawk a. Zanriah kan ei nghal. 

Eikhamah kan titi leh mai mai a. Keia phur thut chuan, "Late, kan inkarah engmah a awm tawh chuang lo va, zep lohin Shillongah khan i che na ve thin tiraw? " ka ti ta hlawl a. 

A nuih a za vak lo hle. 

"A mak! Ti nge min rin miah loh le.. Engtinmah ka awm lo tak tak.. " a ti naa, a hmel tîm zet avang chuan rin dan tawk ka nei thiam ve mai. Roomah a va lut a, Beer leh zu pangngai a rawn keng chhuak. Ka lo melh hru ringawt. 

"Vawiina ka dawn a nih hi.. Beer hi ka in ang a, hei hi in rawh" a ti a. Amah bawkin a siam nghal mawlh mawlh. Zu ka in ka in ve leh ta chu a nia. Hnar a harsa ve thin si. A beerah zu chu tlem a pawlh ve bawk a. In pah chuan kan inkawm leh. Kan ri ta hlut a. Kei awlsam zetin no li lai ka in lehpek kha. Sofaah inhnaih zetin kan thu dun a. 

"Dik tak chuan ka duh ve ber i nia, mahse, tikhan awlsam zetin min tawpsan a. Ka tlawmla lutuk khan ka runluih ve mai mai che anih kha. Ruatdiki nen in inkawp zui ta sia. Ka rilru nat theihzia chu aw" a ti no ngher ngher a. Keia ngaihsam pheng lah chuan, "Ruatdiki sawi chhen suh. Pasal nei tur sawi sek ka peih lo.. Dik tak chuan i thiam loh alawm" ka ti ve chhur chhur a

. ka nghawng vel chu a rawn nul thuak thuak a, mipa ta na na na chu ka lo mur ve ur ur mai. 

"Kei chuan ka la duh reng che" tih pahin ka lu chu a lamah a kuai her a, min rawn fawp nghal. Ka fawp let ve em pawh ka hre lo. A zei hiam hiam lutuk a.. Thil hrehawm tak erawh a ni lo thung. Insum ka tum tehlul nen, nghei rei tawh bawk si chu ka inthunun ve ţawng tawngna chu pal chahin a awm ta. Sofaah a vawikhatna kan tlingtla a, a vawi hnihna erawh ka khumah. Ka khumah Lateii pawh chu a riak zui ve ta nghal a. Zinga ka harh chu ka inchhir nghal, mahse, a thleng vek tawh. Lateii chu ka tan buaina a la ni maithei a ni. 

Hna dang tenau deuh kan khawih a. Mobile phone ruk tih vel lam a ni. Rilruin Isabella te leh a patea te chu a hre ve kur bawk. Engtin tak rorelna chu kal ang maw.. Pu Rinawma te hian zah an hre miah lo mawni le.. Tiang em ema han duhâwm mai chu. Chawhnu dar 3-ah Isabella chuan, "Thutlukna siam a la ni lo va. Mahse, kan hlawhchham ka ring," tih thu a rawn thawn a. Ka lo hnual ve rawih thei mawle. Ruatdiki putea fanu anih vang nge? Isabella a nih vang erawh ka hre lo. He hmeichhia nen hian tum loh leh beisei loh dan daihin kan inbat fuh miau mai si a. Ka tawiawma ka kaihhruai ngei a ngai ni hian ka hria a. Ka inrawlh thuk mah mah dawn pawn ka hria. Mahse, ka hneh zo mang tlat lo a tin ni. 

Lateii chu a thawhpuite nen chaw an eikhawm dawn a lo nia. Keimahin ka ei leh ta mai. A tihtheih ve mai zel e. Esi hi ka ning tan. A hman si, min text sek mai si. Reply loh pawn a rawn ti reng tho. Hmeichhe ho tak hi chu aw.. 

Dar 8 a pel hlek tihah, "Hetah Pukpuiah ka awm" Isabella in a rawn ti a. Ka bo hman. Sawi tur a nei a ni ngei ang. Vawiin lam boruak te pawh. Lateii a rawn haw ve chiah bawk. Chhuah tuma ka insiam uaih a hmuh chuan, "Khaw nge i kal dawn? " a ti a. 

"Hna thilah ka chhuah a ngai.. In lo nghak rawh.. Nih phawt" ka ti puat a. Ka chhuahsan nghal. A hmel nur nang erawh ka hmu hman hram. Ka nupui leh ka bialnu pawh a ni lo va, ani ai chuan bella a pawimawh zawk rih tlat. Chak zetin Pukpui lam chu ka pan a. A hmaa ka lo hmuh tawhnaah khan a awm ka ring. Chu lam chu kein ka pan nghal a. Ka rin ang ngeiin a lo awm. A sam chu a hnawk niaih a, hma lam a melh ran bawk. "Bella" ka ti sup a. A rawn hawi chuan a mit a sen râm mai. He nu hi a tap chiang mai. 

"Eng nge thleng? " ka ti a. 

A thaw halh a. Hul zeta nuiin, "Remruat, khawvel hi a tenawm tiraw? Thisena inzawmna hian mi thenkhatah chuan awmzia a nei lo a nih dawn hi. Rinawma saw ka patea chu a ni ve si a maw? " a ti tham ţiak a. 

Ka lainat takzet. Nula la naupang tak, a nu leh pa leh a nau neihchhun chân tawh, nuhrawn hrawn mek, tualthattua puh ni bawk. A chan hi a rapthlak em a ni. 

"Enteh, hmeichhe chak tak i nih kha.. Ka hria che lawm.. I paltlang thei em em ang" ka ti a. 

"Ka beisei a. Mahse, ka beidawng tan chu a ni tawh. Zosangi te pawn awmna tur an ngaihtuah tan mek. Engtin nge hetiang hi a u fanu chungah an tihtheih? " tiin min rawn melh a. A mitmeng lian kel kawlah chuan mittui a tling khat vek.. Tihngaihna hlawl ka hre lo va, ka pawm bet ta tawp. A khur ngawt ngawt a, ţap rih se ka duh vangin engmah ka sawi lo. Ka farnu chanah ka dah a, ka lainat a ni. 

A inthunun theih hnuah a rawn dak chhuak leh a.,"Ngen duh che ka nei a. Nangmah chiahin min tihhlawhtlinsak thei. Thlamuani ka that lo tih hi min finfiahsak la, ka pa thattu min hriatsak bawk rawh. Chu thil a thlen chuan lawm takin ka thi tawh mai ang. Chumi hma chu ka la thi thei si lo" a ti sep sep a. 

"Thih thu sawi tawh suh aw.. I hmachhawn ang a, ka pui zel dawn che alawm. Enteh, a tawp kan thleng tep ania. I fihlim dawn.. Nghak hram hram rawh. A nih in chu chân ta la, khaw nge awm i tum? " ka ti a. 

"Ka hre lo. Lunglei hi ka chhuahsan thei lo.. " a ti nghat a. 

"Kha lam chu nakinah kan la sawi dawn nia.. Tunah chuan i chhel rih a ngai ka tih kha. Tualthattu kan man theihna tura hmanraw awmchhun i ni rih. I patea te chu theihnghilh rih la ka duh a ni" ka ti a. 

"Umm ni e, ka tum ang. He ta ka koh chhan che pawh ka la sawi lo tak e. Ka hriat miah loh hian Zosangi leh patea te hi an inremsiam a nih ka ring a. A chhan chu vawiinah khan patea te khan Zosangi leh Hmuna te inngaihzawn thu leh nupaa insiam an tum thu an sawi palh hlauh mai a! An saei chiang si.. Zosangi te bulah ka sawi leh a, a ţang nasa viau thung. Kei pawn patea te khan thiam an chan nan an rinthu an sawi ve mai mai anih rinna ka nei hman a. Mahse, zanriah kan ei khamah khan Zosangi chu patea'n a lo call a, ka hriat hlau fahrana min melh zuk zuk chunga rooma phone a luhpui danah khan thil awm a awm anih ka ring. Kei hi ka buai lutuk a, ka lo ngaihbel te pawh a ni maithei. An inremsiam anih ngat chuan, in hi an chang dawn sa.. Kei chu criminal ka ni rih miau a. Kha kha an tan chhuanlam a tling si.. Chu vang chuan ka thawpik lutuk a, he lamah hian ka tlan ta daih a ni" a ti ta mawlh mawlh a. A rilru a buai dawn tehlul nen a thluak a la fim thei zel chu ka ngaisang khawp mai. 

"Rilru sen a ngai anih chu.. Bella, hei hi hria la ka duh. In leh lo saw i chang ta lo anih pawhin pawi ti rih lo mai rawh. Tunah chuan pawisawilo i ni tih kan nemngheh phawt a ngai. Chumi hnuah misual kan thur nghauh nghauh ang a, I patea ten inhnamhnawihna an lo neih ve lek phei chuan, in leh lo pawh i chang let leh thei ang. A pawimawh ber hi hnaah nei hmasa ang" ka ti ta a. 

"Aw le.. Hmeichhia ka nihna hi a lo lang leh thin. Ruahmanna ka siam a. Zosangi roomah camera ka kam dawn a ni. Hmuh chhuah kan nei ngei ang" a ti nghet charh a. Ka lo bu nghat. Rei tawk fang kan thut hnuah, "Haw tawh ang. An ngaihtuah ang che" ka ti a. 

A nui hawk hawk.. "Ngaihtuah a?! Tu chuan nge min ngaihtuah ang? Tumah.. Tumah reng reng ka nei tawh lo" a ti hap a. Beidawng taka nui lui hawk hawk a ang ber mai. Ka inrin hmain,,"Keiman ka ngaihtuah che lawm" ka ti nghut a. Min rawn melh chawt. Kei pawh a mit zawnah ka tawp ve dat. 

Chu lai boruak reilote, ril leh thuk em em si chu ka sawifiah thiam loh a ni. A mawi a, a duhawm hle tih bak. 

"Kal ila" a ti zawi sap a. 

"Umm" tiin ka zui nghal. Bike-a a chuan dawn chuan, "Ka lawm e" a ti sap a. A hmui ka fawh chakzia chu kei pawn a chhan ka hre hauh lo. 

"Remruat" a rawn ti halh a. Ka lo melh rei deuh a ni ngei ang. 

"Aa.. Aw.. Nih aw" ka ti bah nak. A nui saih a, tuna a nui hi chu a der a tel loin ka hria. 

Ngawi rengin bike ah a lawn a. A inkhalh liam nghal. Kei pawn a hnungah ka zui ve nghal zat.. Isabella hi hmeichhe enin ka en dawn ta tlat! Ruatdiki putea fanu a ni si! Khawvel hi chu aw… 

Note: Blog leh group lama in comment hi hmaih nei miah lovin ka chhiar chhuak vek zel a nia. Ka lawm thin lutuk, min tiphurtu leh min fuihtute in ni aw.. A ngaihnawm emaw nawm lo emaw comment ka beisei ve thin a nia. 😘😍