Thinlung - 10

THINLUNG.. (10)

Ziaktu: Toni Râlte

Mpa chu a in luahna te fanu, tleirawl ve ek ek tawhin a zu hmu hmasa ber a niawm e. Chawhmeh suah tuma kal a ni nghe nghe. Mpa hi in hnuai berah a awm a. A zuk puk deuh bawk. Kawngka a kik fe hnuah pawh a rawn hawn theih loh vangin kawngkhar awng atangin a va bih a, choka leh inleng kawmna hi a inzawm vek a. Tui dehna bula mihring niawm tak inkhai chu a va hmu thuak a. A va hmuh chiah theih chiah si loh. A pa te han punin kawngkhar chu an tichhe ta a. An hlauh ang ngeiin Mpa chu tui dehna chunga khanchhuk sang vak loah hrui thlungin a lo inkhai a lo ni a. A lei a seh tut a, a meng rû bawk. A thi chiang tawh hle. An buai ta nuaih a. Ruang pawh an la thla nghal. Postmortem pawh a ngai ve bawk ang chu. In neitupa Pu Ringa sawi hmangin, tun hnaiah inah a awm tam lo hle a, Pu Mawia thihna a la rei lo bawk nen, an in lamah a tâp ve deuh a niawm e. A awm ve viau bawk. Zosangi nen an chungchang pawh pu Ringa chuan, "Nia, kan hria alawm. Amah MPa pawh hi kan han zilhhau ve tak naa, tlangvala pumpa, mahnia chhia leh tha hriatna nei a ni a. Zosangi lah hian a tithiam viau aniang chu maw, Mpa hian a nep zo ngang lo ni maiin ka hria. Mahse, mak deuh chu nimin piah khan Zosangi te ina a zuk kal kha a rawn haw a, a rawn peng kawi a. A mitmeng a dik vak lo, 'Zosangi saw hmeichhia pawh a ni lo, ramhuai anih saw' a ti ringawt a. 'In inhau deuh em ni? ' kan lo ti a. 

'Hau lo. Mahse, saw nu sawn a pasal pawh kha a that aniang. Mi rapthlak anih saw' a ti leh ringawt a. Kan zawh chian hmain a chhuk leh ta daih bawk si. Ta tang khan Zosangi te in lamah pawh kal ta loin niminah pawh kan thenawmte workshop-ah a inhlawh ve a, an inkar a buai deuh hlek anih ka ring" a ti ta a. Beng chu a verh ve deuh. In chhung kan han dap a, a khumah chuan a mu tih hriat takin rizai te pawh a inthlep fel lo va,tin, a chuar deuh tun bawk. Mei a zu nasa ve hle aniang,chhuatah sikret bung a tam ngang mai. 

"Sir, hei lo en teh" Mawitea'n a tih chuan, ka va pan vat. Dawhkan lian vak lo hi a khum epah a hung ve a. Bible leh lehkhabu pahnih khat a awm ve bal bawk. Dawhkan chungah chuan pen hian lehkhaphek hi a lo delh a. Chuta thu inziak chu a nia Mawitea'n en tura min tih. 

"Zosangi fanu Thlamuani kha keimah ngeiin ka vithlum a ni. Ka îtna a rei tawh a, khami zan khan ka rui deuh bawk nen, a room luhna te chu ka hre vek tawh a. Kawngka kha ka kik a, a rawn hawn rualin a hmui ka hup a, pawngsual ka tum. Mahse, a tal nasat em vangin ka hlawhtling thei lo va, a chhungte bulah a sawi chhuah ka hlau si a, ka kawnga ka pai ka chemte chuan ka vit ka mai a ni. Tual ka thah vang khan Zosangi thlengin natna ka siamsak a, Zosangi ka hmangaih em vangin hrehawm ka ti a, ka zak ngawih ngawih a ni. Chuvang chuan hetia ka nunna lak mai hi ka phutawk tih ka hria a. Ka ti ta mai a ni e. Zosang, min ngaidam hram rawh aw" tih a lo ni. 

"Sir, tikhan Isabella case chu a fel thei mai lo maw? " Mawitea'n a tih chuan, "Ka hre lo. He thuziak hi Mpa ziah ngei a ni tih kan hre si lo va" ka ti a. Ngaihthat mang lohna ka nei miau a ni. Pu Ringa te ka bia a, Mpa kutziak an hmu tawh em tih ka zawh chuan, "Ngawi teh, ani kha school pawh a kal mawni le.. Thawkkhat lai khan hei mami hian, "U Mpa hi Bible ka chhiar thiam lo i ti sia, i kawl ve reng a' a ti a. "Ka kawl ve mai mai.. A thlamuanthlak ve alawm" a to mai a. Chhiar pawh a thiam loh chuan ziah phei chu a thiam dawn mawni ka ti. Mahse, a hisap erawh chak tak a ni. A chhut chhuak zung zung mai" a ti ta a. Ka thaw hawk. Kawng a khirh lehzual dawn ta. Mpa hi amah intihlum nge thah a ni zawk tih chu kan hre vat turah ngai ang. 

Ruang pawh an khaw lama thawn turin an ruahman a. Zosangi hmel hmuh tur a awm lo. Kan haw lamin an inah ka zuk peng zuai a. A hmel lan dan ka hmu duh tlat a ni. Min hmuh chuan a phâwk vak lo. 

"Mpa Thihna velah em ni inkal? " a lo ti chat. 

"Aw.. Ti nge i va rawn lang lo ve" ka ti ve mai a. 

"Ka tan va lan ve kha a zahthlak alawm. A lehkha hnutchhiat te kha.. Ka fanu thattu a lo ni reng a. Engtin nge khatiang mi nunrawng kha ka lo ngainat theih ni" a ti bawrh bawrh a. An inngaizawng tih chu zep buai a tum lem lo niawm tak a ni. Zepin awmzia a nei vak lo bawk nen. 

"Khaw nge Isabella" ka tih chuan, "A patea te inah a phei a nih kha.. Kan boruak teh hrep hi ka hne tawh khawp mai. Bella tak pawh hi ka lainat zozai tawh e. A patea te lah an hrãng ropui si.. " a tih mek laiin in hnuai atangin mi pakhat a lo chho a. Ka hmuh vawikhatna a ni. 

"Vawiinah bungrua khu lak belh a ngai ang. Ka chhinchhiah tawh e" tih pahin kut a sil a. 

Ka mitmeng atangin a hrethiam nimaw, Zosangi chuan, "Ka nau a nih hi.. Kan nufa chauha khawsak chu ngaih a ngam lo em a ka tia, ka chah phei a. " a lo ti vat a. Tlangval lian val lo, mitmeng hriam lam deuh, fai vang mai a ni. Bella a awm bawk si lo va, kei pawh ka chhuak zui ve ta nghal a. Ka chhuah dawn khan, "Tikhan Mpa'n ka fanu a that tih a inpuang tawh si a, Bella chu a fihlim a ni mai lawm ni? " Zosangi'n a ti a. 

"Engmah a la chiang lo" tih chauhin ka chhang. A hmel ngui deuh rawih pawh ka hmu thei. A fahrawn, hnawk a tih em em chu enhvanga ngaihtuah leh lawi si nge a nih ang? Rin dan ka neihah chuan in leh lo chungchangah Bella hi a lama tang tura a duh vang a nih ka ring ve tawp. Nia, Pu Mawia fanu ngei mai a la dam chhung chuan a patea te pawh an che na lutuk ngaminna rinawm loh a ni. 

Mpa chu dar 3-4 inkar vela thi a nih a rinawm a. A taksa dangah hliam a nei lo. A inawkhlum tak tak pawh a ni thei e. 

Ka nuin min lo bia a. "Ruatdiki a lo kal a, sitting rooma kan chhungkaw thlalak kan tar kha a melh vung vung a, a mitmeng a buai nak mai. Mahse, pangngai tak chuan a haw ve leh mai a" a tih chuan ka lungphu a lo rang leh hman. A va harsa thin êm. Pasal nei mai tur a ni tawh a, min hrechhuak lo law law se a tan chuan a tha zawk ang. Mahse, min hrechhuak ta se, va ru chhuak daih ila tihte chu rilruah a awm tho bawk. Heti taka hmangaih leh thlakhlelh nei ve mipa dang hi an awm ve ang em le? 

IO room-ah ka buai a, thingpui pawh ka chah ta mai. Mpa thihna leh Muani thihna inzawm theih dan ka han chhui zawn a, zeldinna bak neih ka nei rih si lo. Hmanrua ka hmu thei meuh bawk si lo. Ka sa chan ber Mpa a thi leh ta hlauh si a! Pu Ringa thusawite ka han khaikhawm a, Mpa khan Zosangi rapthlak a tihzia a sawi kha a nia. An ni hi an lo intithiam lo ang a, Mpa hian a ka a an an hlauh vangin Zosangi te lam hian a ka an hup ta tihna a ni thei ang em? He tih mek lai hian Isabella pawh hmaih chi a ni hauh lo. Ani hian min dai khalh zung zung ve thei tlat. Zosangi nen an inkar buaina kan hre vek a, a pa a la chân ve lehzel a. Phuba lak hna a ţan chho ta mai em ni ang? Zosangi kan rinhlelh theihna tur kawng a sial chawp pawh a ni thei. Mahse, a hmel ka mitthla hian pawisawi lo hmel hmuhin ka hmu teivet a! He hmeichhia hi ka hriatchian a ngaiin ka hria.. Zosangi pawh a rukin ka chhui tho a. An khua chu Sangau lam daih a ni a, a fanu Muani pa nen khan an innei lo tih te thlengin ka hria. Tin, Bella nu nuteii fanu an ti tak naa, A nuteii tak tak a ni lo va, Bella nu leh Zosangi nu te hi pa hrang an ni tihte thlengin ka hre tawh. Tin, Zosangi fa paina, Muani pa hi mi pasal pawm lai a ni a, an nupa pawh an inthen phah a niawm e. Mahse, A mipa zawkin nupui thlak a duh tak loah chuan an inpawm leh ta a. Zosangi fanu Muani erawh a ngaihsak ve viau a niawm e. Tuna a nau anga a sawi mipa pawh kha chhui ve deuh a ngai dawn a ni. Tunah rih chuan Isabella zawk hi enthlak a tulin ka hre ta tlat! Mpa thih thu min rawn hrilh vat te kha a thang kam lama kal tura min signalna a ni thei. 

In chungte inah ka peng kawi a. Mamawii chuan kekawrbul chhing fahran hain tawnzau nen a lo awm teu teu mai a, nail polish a lo inhnawih hliau hliau mai. A pa a chhuak a, a nu erawh thenawmte inah a kal thu a sawi. Chhuah leh mai ka tum laiin, "Nizan kha sorry aw. Ka lo kai deuh a nih kha.. Nang chuan i hrethiam ang. " a ti liam puat a. 

"Nia, mahse, i pa te rilru a hah thei si a.. Khatiang kha chuan awm tawh suh" naute zilhin ka han ti ve hram a. 

"E taka! Kar tawpah i inah khuan chaw kan lo ei khawm dawn.. Ka thiante an chhe lo hlawm teh mai a nia.. Hria maw" a ti lar lar a. A thawveng halh chu a awhawm letling. Ka nui ve ringawt. 

Tuilum sa ver vawra inbual ka duh vangin tui ka lum a. Chawhmeh siam chawp a ngai lo va, a zia e. Ka inbual zo chu ka har deuh hawk mai. In bal hi ka ti hleithei thin lo va, hmun ka phiah surh surh laiin kawngka an rawn kik a. Ka va hawn chuan, ka rin loh lutukin Bella a lo ni! 

"Engtin.. " ka ti hû a. Min melh kal chungin, "Zawn hmuh nan hun ka hmang rei vak lo.. Ka lo lut thei ang em? " a ti sap a. Ka bu nghut. Hmun ka phiah zawm leh dawn chuan, "Khawi.. I zei lo em mai" tih pahin hmunphiah min chhuhsak a. A phiat ta hliau hliau a. Ruatdiki ai chuan a u hlek ang, a chezia leh tawngkam a naupangchhia lo em mai. A phiah zawhah chairah a thu a. Kei pawh ka thu ve a. 

"Lo kal chhan ka nei a. I hriat tura duh ka nei. Mpa khan ziak leh chhiar a thiam lo. Lehkha a hnutchhiah kha dawt a nih ka ring a ni" a ti ta halh a. Ka hriat hnu ni mah se, Amah Bella ngeiin a rawn nemnghet leh chuan min ticonfi sawt. 

"A thiam lo tih engtin nge i hriat? " ka ti ta tho a. 

"Dawra min puih thin lai khan eng emaw chhinchhiah ngai leh ziah tur a awm nual zel a. A thiam loh thu chiang takin a sawi tawh. Pakla hisapah erawh kei pawn ka tluk meuh lo thin. A chhiar thiam lo bawk " a ti nghet charh a. 

"A nih chuan rindan i nei em? Tu thiltih nge ni ang? " ka ti a. 

"Zosangi leh a bialpa tharte saw an nih ka ring a ni" a ti ta a. Ka meng deuh awk. 

"A bialpa thar a?! " ka ti sup a. 

"Umm.. Saw pa saw ni 5 liamtaah kan inah a rawn awm a. Mahse, Lungleiah hian a hmain a awm tawh tih ka hria a ni. An khua atanga a chah phei a ni lo. Sangau lam biak pawh ka tum mek a, ka biak tum hi a tlang thei tlat lo va" a ti ta zel a. Ka hriat duh a rawn hre zel mai chu ka ngaisang letling. 

"A bialpa tih i chiang maw? "

"Hei chu ka rin thu mai chu a ni. Mahse, he pa rawn lan atanga reilotea Mpa a thi hi ngaihtuah ve mah teh.. " a ti dat a. 

"Nia, kei pawn rinhlelhna chu ka nei. Mahse, Mpa nen khan an inhau deuh hrim hrim a ni awm e.. A hma khan" ka ti a. 

"Ka hria. Mpa khan saw pa Hmuna saw a thik a. An inbakkaih deuh alawm. Niminah pawh a rawn lang lo. Tizawng hian ngaihtuah teh, Mpa hian Zosangi bulah, 'Engkim ka sawi vek ang' tiin lo vau ta se. Zosangi tan chuan a fanu nunna pawh a lak theih chuan a bialpa satliah nunna chu lak a harsat ring suh" 

"Maw?! Muani kha engtin nge Zosangi thah anga i sawi theih? " ka lo ti nghek a. Min melh thîp vâwt chungin, "Keiin ka thah loh chuan, Zosangi bak that tur an awm ka ring lo a ni. Muani khan a nu kha a zahpui thin a, Mpa nen an inngaizawng kha a haw em em thin asin" a ti ta a. A ngaihtuah ang hian ka la ngaihtuah chiah lo va, a chhan pawh nu leh fa inkar hi a ril lutuk tih ka hriat vang a ni.

"A fanu nunna em chu a la duh dawn em ni? " ka ti zawi sup a. 

"Tunah hian Zosangi hian ka fihlim theih dan tur kawng a dap tih ka hria. A chhan chu ka pa fanu ka ni a. In leh lo hi ka patea ten min chhuhsak loh theih nan ka dama ka nun ve hi a ngai a ni. Chu chu Zosangi duhthusam a ni rih.. Ka patea ten min bansan hunah kei chu min dahbo leh mai ang. Tichuan, ka pa ro khawmin a duh duhin a nung tawh ang" a ti ta mawlh mawlh a. Ka lo thaw kâwk. 

Isabella rilru chak lutuk chuan ka ngaih a titha lo lek lek zawk. Amah chhui chian ka lo tum lai mek a ni bawk si. 

"Bella, tunah hian nang hi suspect i la ni reng tih i hria tiraw? " ka ti nghut a. 

"Ka hria. Pawisawilo ka ni tih fiahna ka zawn hi a sual chuang em ni? " a ti ta khauh a. 

"A nih chuan Zosangi te kan rehchhuah theihna tur kawng kan dap a ngai anih chu.. Finfiahna tel lo chuan engmah kan thleng dawn lo va" ka ti ta a. 

"Aw ka hria e. Ka duh ber chu maw.. Muani thattu hriatchhuaha Ka pa kha thah a ni em tih pawh hriat ka duh a ni. " a ti zawi sap a. Lehlamah he hmeichhia hi a chhel khawpin ka hria, tualthattua puh niin, jail a tan laiin a pa thih thuin a deng bawk a. Chutah a pa unau ten an in leh lo ngei chhuhsak tumin hma an rawn la bawk. A tan nun ngaihna a vân dawn tehlul nen, a thluak a la fim kâk hi mak tak a ni. Police te ni ve se la, a chhawrtlak viau ngei ang. 

Khua a thim chhulh tawh a. Ka ril pawh a tam ve ta deuh. "Chaw ei ve ta che" ka ti ta daih a. 

"Aih.. Ka haw ang. Chanchin kan inhrilh zel dawn nia.. Nang hi ka innghahna awmchhun tih hi hre reng la ka duh a ni" a ti ban chat a. Min en chiang thei mai bawk si, ka lai lek lek zel zu nia! 

"Aw le.. Theihtawp kan chhuah dawn nia. Fimkhur la.. Eng emaw i tawk anih chuan min rawn hrilh vat zel la aw.. " ka ti ve luam a. Kawngka biang vuan chungin a rawn hawi leh thut, "E taka, Remruat, Ruatdiki i hre ngai em? " a ti ta a. Ka tawlhhnung deuh hret, melh kâwk chungin, "Hria" ka ti thâm ţuak a. 

"Ka ring.. A nih aw" tiin a nui sak a. A chhuak nghal nal nal. Engtin nge Ruatdiki nen an inhriat teh daih? Nge a sawi Ruatdki leh ka Ruatdiki hriat hi an inang lo zawk. Kei lah khan hria angin ka lo insawi hmanhmawh tawh si. Aa.. Khalam chu buaina tur a awmin ka hre lo. Kei leh kei lo ang takin chaw ka ei hnem fu mai. Ka lawm viau. 

Tv ka en laiin Mamawii a rawn lut a. Kekawr tlawn a rawn va hram e. 

"Chaw i ei bang em? Ka titau a. Ka rawn ei dawn" a ti mawl tawp a. Ka chhanna pawh nghak lo chuan amah chuan a dap nghal rawk rawk. Mi chimlim tak chu ni ila ka ngei ngawt ang. Mahse, a zia hi ka lawm riau! A thawveng halh leh enghel a nei miah lo hi a awhawm ka ti em a ni. Bakah nizan atang khan min nel sawtin ka hria. A tha daih zawk. Chhungkhat kan ni ve si a. A ei mawlh mawlh a. 

"Ka ning, ka pa lah hi thaibawih ropui si, ka nu hi a hlauhin a hlau a. Ka nu lah milian pâk huam chi, tenawm lutuk. Zaninah U Henry te lo len an tum thu a sawi a. Ka be tha peih dawn si lo va, kan inhauh phah a nih kha.. Hetiang inla lian satliah, chapo si ka kawm peih teuh lo" a ti bawrh bawrh a. Han chhan vak ngaihna pawh ka hre lo. 

A eina a tifel leh vek a. Ka bulah a rawn thu a, ka bula sikret chu a rawn ban ve zat. A pak khu laih laih mai. 

"Kar tawp chu aw.. Keimahniin kan bawl vek ang. Ka thiannu nen ni ru.. Awii i thlalak a hmuh atangin a tuiral nghal ringawt a nia aw" a ti leh hliai a. Ka nui hawk hawk. 

"Bialnu nei hman pawh ka ni lo" ka ti a. 

"Enjoy ve tur.. Nei ang che. Nangmahin i awm lehnghal a, eirawng i bawltir thin dawn alawm" a la tizui. 

"Nih Alexa nen khan in ni mi? " ka ti a. 

"Ni ve reng e. Mahse, ka nu hian a duh hlawl si lo va. Lo len pawh a lo leng ngam lo. Alexa nen chuan maw tleirawl chhuah hlim atanga inzui kan nia. Vawi li vel kan inthen tawh, kan ni lehzel.. Ka virgin hawngtu a nia.. Neih ngei pawh ka duh" a ti ham ham a. A frank si.. Khawhar a hnem phian mai. A hnu deuhah a pa a lo chhuk a, a rawn ko a. 

"Henry te an lo thleng tawh" a tih rual chuan, "Kan in hnuaipa a luhkhung lo ti mai ru. Khitiang mi chapo leh hur hmel deuh ka kawm peih lo" a lo ti hmiah. Pa Chunga hrilhhai hmel chu ka lainat deuh a. 

"Mamawi, han chho rawh.. Zanin chiah han kawm ve la.. I nu te an zak lutuk ang" ka ti ve a. Min rawn melh rum ngang mai. Mahse, a hnuah chuan a inngaihtuah ve ta nge, a tho ta a. "Ninawm lutuk.. Nuih luihna lamah biang a kham leh dawn anih hi" a ti zui hram. Ka nui ringawt. A ze tlang lutuk leh a duh loh lam a pe na ve lutuk chu lawmawm lamah a kal, tin, a rilru a chhe miah lo vang tih ka ring bawk. Heta a awm ve reng dawn chuan ka tan pawh a khawharthlak loh deuh ang chu.. 

Hun a kal ve zel ti ila, Isabella chanchin ka chhuina pawn ka hriat ngai loh tam tak min hriattir ve zel a. Zosangi'n a hralh tak Bella'n a enkawl ve zuai an sumdawnnaa a hnuaia thawkte ka kawm atangin a tam zawk chu ka hria a ni. 

Isabella chu hmeichhe vawt reih rawih tak, chutihruala mi dang tana thil phal tak ni lawi si a niawm e. A hnuaia hnathawh a hrehawm loh a, chutihrualin inthlahdah a harsa hle bawk. A khawng reuh a, hmeichhia anihna ang leh a naupan vanga zuam sual awl tak a ni. Thian a kawm ngai lo an ti tlat! Muani nen khan inkhawm leh eng ilo nikhuaah an inzui chawt tih an sawi bawk. Tin, thla tin a nau thihchamah a thlanah a kal ziah thu leh chaw a nghei ziah thu an sawi bawk. Ngaihzawng lamah pawh a ngaihzawng neih thu hria an awm lo nge, mipa lama a sulhnu sawi thei pakhatmah ka tawng lo. A pa damna a duh ber a, sum leh pai hian a tibuai ve vak lo a ni maithei. A pa dam loh tirh khan a stress ve deuh bawk nen, a rui lai vawi li vel an hmuh thu erawh an sawi. Hmeichhe mak tak a nih thu an belh tel ziah lehnghal a. Ni e, kei pawn hmeichhe dang aia a danglamna chu ka hre tawh. He nau hi a mawl hauh lo tih pawh. Amah ka chhui ru tihte hi a lo hre ru reng tawh mai thei a ni. He tih mek lai hian Bella patea te chuan CJM an bekbawr nasa hle tih thawm te ka hre chho a. An kal thui mah mah deuh chuan ka hria. A fanu a la dam a, a nupui lahin pasal dang a um pawh ni hlei lo, heti taka an u thawhchhuahsa an chuhpui hi Nu Puii te chhungkua te kha min hriatchhuahtir deuh. Mihring hi kan lo duhâm khawp mai. Zosangi leh Bella chu an tan dun nge nge a ngai dawn ni pawhin a lang. Bella thurawn ang khan Sangau lam pawh ka be pawp thei a, Hmuna chu an lo hre ngei a. Mahse, Kum 6 dawn Sangau a chhuahsan tawh thu an lo sawi. Bella khan dawt a sawi lo a nih hmel. Hmuna putea nupui leh Zosangi ni pasal te hi an lo inchhungkhat a niawm a. A hla tawh angreng viau. Bella rin dan anga inngaizawng an nih vaih chuan, MPa thihna leh a lehkha hnutchhiah khan awmzia a nei ngei dawn tih a lang. 

Mpa kha tlangval sa nghet ve tak, sang lam a ni a. A rih pawh a rit ve viau ang. Mi pakhat mai chuan a khai zawh a rinawm loh. Mi pakhat sulhnu a ni thei lo. A lehkha hnutchhiah kha Zosangi kutziak a nih leh nih loh kan han chhui a. A ni lo phawt. Hmuna kut hnu a nih leh nih loh hre turin Hmuna kutziak kan nei tlat lo. Bella bawk a tangkai dawn vangin ka hrilh ta nge nge a. Kan chhui a ni tih hre lo se ka duh si a, an hriat vaih chuan Zosangi thluak a tha ve tho si a, kan inchelh loh ka hlau deuh. Bella chuan dawr bungrua an mamawh chhuanlamin Hmuna chu a tir ta zauh a, lo ziak thla turin.. Chumi keng chuan min rawn hmu leh thlap. Kan han enkawp a. Khai! A inang kher mai le.. Hmuna kutziak leh Mpa hnutchhiah lehkha chu.. Rilru a kal kawi chho ta. 

Bella fin lehzia bawk chu, In leh lo chungchanga Zosangi thurualpui tur a nih laiin, Zosangi kar nan a hmang ve thung. A tan hlana an sumdawnna a tihral kha a lakkir leh theih chuan in leh lo inchuhnaah a thurualpui tur thu a lo hrilh a.,Zosangi rilru a buai hle a niawm e. Pawisa erawh a ac-ah a la awm thlap a, a la khawih che lo. Engvanga hralh ngawt nge a nih tih erawh hriat a ni lo thung. Amah Zosangi chuan, "Bella ulkil rawihna man a to si a.. Dawr bungrua lah a chahna kan nei mang tawh lo nen.. Ka tiral ta mai a ni" a ti thung. A inngaihtuah fe hnuah, "Sumdawnna ka lakir ang a, mahse, 50% chu ka chan ve tur a ni" tiin a nawr ve thung a. Bella pawh a tawlh lo thei ta lo. An inrem chu a ni ta mai. Sumdawnna an nei let leh a, in leh loah an bur thei ta. An boruak hnawk nuaih karah kei hi ka tâng ve tlat bawk si a. Kalsana phumbo vat ka chak tawh a ni. 

Hmuna chu koh a ni ta a. Kan han indawp a. A ţanna a ngai reng. Indawpna hrang hrang a lo hmachhawn tawh emaw tih mai turin a ngeng riau a ni. A ţanna chu hei hi a ni. "Kan hawrawp a inan loh ten, Sangi'n ziak zirtir turin min ti a. Ni 3 chhung ngawrh takin ziak leh chhiar kan inzirtir alawm. Chu chu sangi pawn min hriatpui" tih hi a ni. Zosangi lahin, a lo tawmpui ve chat bawk si. Mitthi tawh Mpa lah zawhna han zawh tur a awm tawh si lo. Mahse, ziak leh chhiar thiam hauh lo Mpa'n khatiang khawpa nalh leh felfaia a ziak thei erawh rin a harsa ngang mai. Ka ning, ka chau. 

Kar tawp pawh kan thleng ta. Mamawii khan a thutiam kha a la hrereng niawm tak a ni. Station-a ka awm laiin, "Chabi spare hmangin ka lut aw.. Lo haw vat la" a rwn ti. Aa.. A nuam ve phian maithei asin. Ka va hawn chuan an lo ri ve laih laih a. Mamawii bakah hmeichhe pathum leh mipa pahnih an ni. Min hmuh chuan an ngawi deuh thap a. Nuam lo ka ti letling. Mamawii chuan min hmelhriattir ta zung zung a. Estheri a tih chu a sawi ve ziah kha a ni tih ka hre mai. Ka inbualsan a, ka va phei leh chuan zu rim a nam ham ham mai. "Kan in ve tawp.. Kan zah loh vang che a ni lo nia" Mamawii chuan a ti a. Kar tawp a ni bawk a kei pawh ka insum lem lo. Ka la kawl chu roomah ka va lem ve sek. Boruak a nuam chho ta viau e. Estheri chu Rosy nen khan an intiat viau ang, a ngo purh mai bawk a. A itawm ve reng. Mahse, a hmel tak chu tha ka tih chi a ni lem lo. Mamawiin a lo sawi pawp laklawh nge min dem bel sek hlawm lehnghal. Esi lah chuan pawi a tih hmel vak si loh. 

"Alexa in sawm ve na nge? " ka ti a. 

"Mother india a awm kur khi.. Alexa zahna tur engmah ka siam duh lo" Mamawiin a ti hmuk. 

Dar 7 velah zanriah chu kan ei a. Ka rin aiin an bawl tui. Ka ei ve teuh mai. An ni lam pawn min nel sawt khawp mai. Mipa pahnih leh hmeichhe pahnihte chu inngaizawng an ni tih ka hrethiam ve mai. Esi leh Mamawii an chuang a nih chu. Zu kan lem zeuh zeuh a, kei pawh ka kai ve ta riau. Dar 9 velah inngaizawngte chu an chhuak a. Mamawiin min rawn bekbawr vat. 

"Hey, hetah kan riak dawn a nia aw.. Kan rui sia, Esi pa a strict sia, ka riahpui mai ang. Ka nu te ka hrilh tawh" a ti mai a. An inah riahpui ve mai awm. A tum dan ka hrethiam mai. Mahse, ngaih a sam zo tawh a, engkim chu yes a ni vek tawh. Dar 10 a rik meuh chuan Mamawii chu a chatthla ta daih a. Esi pawh a meng phelh phang tawh. Mahse, min hip tumna a la nei tih ka hai lo. Chutiang taka hmeichhe inhawngsa chu keia kai nam pawisak nei tawh lo chuan bawh mai ka rilruk ve tho a ni. Amah zawk chu ka bulah a rawn thu a, ka zu in bang chu a thawkkhat piap a. No zeta min melh sawr sawr chungin, "Chhelopa" a ti sap a. Ka lo nuih. 

Ka mal chungah a rawn thu kai a, ka lam rawn hawiin, "Chuan" awmze nei zet hian a ti a. Ka hrethiam mah mah. A kuma kum hmeichhia ka mutpui tawh lo. Bathroom ka hmang tangkai thin hle tih chauh a ni. Tunah saruak leh inhawngsa ka hmachhawn mek a, engvang chuan nge ka chhuah ngawt bik ang? Bakah pa lo te min tipalh ang.. Hmmm

.. Esi chu ka fawp ta nawk nawk a, a lo zei narawh e. A taksa chu ka chul kual ruai a, a rum ngher ngher bawk. Mamawii lah kah thlak ang der a ni tawh si, mitmei ven tur kan nei lo nasa. 

Sofaah chuan ka zalh ta zar mai le.. A thawk ran danah a inpeih hle tih ka hria.. A kekawr kawng ka dap lai takin kawngka an rawn kik a nih pek chu! Shit! Mamawii nu a nih teh chuan aw.. Ka pai phei nawk nawk a. Mahse, ka inthunun leh thei hram.. Kawngka chu ka hawng a. Ka meng phawk teh e. 

"Eng.. Eng nge i lo tih dawn? " ka ti nghut a. Ka aw pawh a pawr lek lek. 

Min melh ran a. "Nangman min koh kha " a ti hriam hraih a. 

"Maw?! Engtikah? " ka lo ti hû. . Ka sawm pawh ni miah loin a rawn lut a. Sofaa Esi mu chu a melh zauh a. 

"Chawhnuah min lo call a, zaninah min hmu turin lo kal rawh.. A pawimawh" i rawn tih kha.. " a ti sap a. Ni dawn tak. Nia, chawhnu lamah khan Pu Mawia enkawltu nurse kha damdawi a lo bar nasat vangin nikhaw hre loin a awm a. Damdawiinah an dah luh thu ka hria a. Chumi chungchang sawipui ka duh vang leh Mamawii te chaw eikhawm tum, a thiannu nen min thlahfal ka hlauh luatah inven nan lo kal turin ka ti tak alawm. Pu Mawia nurse hi Bdi a ni a. Pu Mawia boral hlim khan ka be tho a, Report ziah luh a nih lem loh vangin chhui vak chi a ni lo va, ka hre zui leh ta lo kha a nia. Khatia a OD takah chuan eng emaw a awm aniang tih ngaihdan ka neih vangin Bella hi ka ko ta a ni. Ka zu ruih vangin ka lo hre chang leh tawh lo zawk a ni e

"I lo va kal tlai si ve" sana melh zauh chungin ka ti a. 

"Enthlak hna ka thawk phawt alawm" a ti zawi sap a. 

Esi bulah, "Hna chungchang kan sawi lawk dawn a. Lo muhil mai rawh" ka va ti a. Bella chu bathlar lamah ka hruai chhuak a. 

"Zosangi te em ni i enthlak? " ka ti a. 

"Aw. Unau satliah an ni hauh lo" a ti a. A mit a khap fak fak bawk. 

"Ka hrethiam e.. " ka ti a. Nurse chungchang chu bah nuaihin ka hrilh ve ta nghal a. Hmalam a melh ran a. 

"Ani pawh a nunna a derthawng mai thei a ni.. Kan zo tep tawhin ka ring" a ti zawi sap a. 

"Nia, naktukah han hmuh ka tum alawm" ka ti a. 

Min rawn melh zawk a, "ka lo tibuai che u a. Tihpalh lutuk.. Inlaklawh hmel sia, chhunzawm leh rawh. Ka kal ang. Mang tha u le" tiin chelh zui hman lohin a chhuak leh nul nul. He nu hi a.. Ka phurna a reh vek tawh tih a hre lo a ni ngei ang. 

Zing dar 4 a la ri chiah lo. Ka ph ri ral ral chu lu rit bur leh mit siai chungin ka la a.. Amah a ni. 

"Kan hlauhthawn ang ngeiin Bdi chu a thi ta" a rawn ti vawt raih a. 

Huiham.. He buaina hi chuti mai chuan a reh dawn hauh lo mai.. Ceiling melhin ka mu meng ta reng a.. Ka rilru a ruak vek. He thihna inzawm zel hi engtikah nge a tawp ang le..?!

(Chawlh ka tum zet a. Ka rawn ziak leh hram. Tun lai chu ka mit a rim deuh a. Ziah pawh ka ziak sei thei ngang lo a ni e. Min hrethiam hram hram ru aw 😢😘😍