Thinlung - 1

THINLUNG.. (Chapter-1)

Ziaktu: Toni Râlte

(Adds kha khawngaihin aw 😊😍

"Thinlung hian a ţha ber pawh a thlang thiam lo fo a. A mamawh pawh a hre chiang lo fô thin. Mahse, Thinlung inhmutawn thinlung pahnihte chu rinawmnainna phuar khawm a. Innawrkal tawnin an suangtuahna leh duhthusam ram an inkhalh thleng ţhin. Hmangaihna thinlung neitu chuan rinawmna hi a langsar berah a par chhuahtir thin.. Thinlung hi a va hlû emm… "

Ka hming chu Imanuel Lalremruata a ni a. Aizawl Dinthar vengah kan khawsa ve a; Pathian zarah Police niin, ASI ka ni ve a. Ka pa hi Lalhmingliana niin, ka nu hi Sailo ziding Ngurzikpuii a ni thung. Unau hi pahnih chauh kan ni a, ka farnu ka u hi Chennai-ah sumdawnna kalpuiin a hun a hmang tam zawk a. Mahse, ka cousin Thanpuii fanu Lydia a nu Thanpuii'n raicheha a thihsan avangin ka nu, nau lawm ta reng reng chuan a chawi seilian ta a. Thanpuii chu ka patea fanu a ni. Ka patea te chhungkua hi an vanduai deuh a, amah ka patea lah hrisel lo, bawrhsawm tak a ni a, nu ber Nu Puii hian hna a nei hlauh zawk a. An ei bel ber a ni ve. An fate zingah Thanpuii hian vanduaithlak takin phaia lehkha a zuk zirnaah Negro kan tih mai black fa a rawn pai haw a, an te ber a ni a, an rilru a nain, nakinah pawh anmahni chawma ei tling tura an ngaih a ni ve a, tikhan sawn a rawn pai haw ta si. Ka patea thinrim lutukin a hnawtchhuak a, kan inah a rawn tlu lut ta a. A rilru na nen, a taksa hrisel lo nen thla 7-ah nau a hrig a, raichehin a thi zui ta kha a nia. A thih takah chuan patea te nupa pawh an inchhirin Lydia pawh enkawl an tum reng a. Mahse, ka nuin, "Fa kan nei tlem si, kan bulah seilian zawk rawh se. Chhungkua vek tho alawm kan nih" a tih tlat avang leh an lo hnawhchhuah tawh vanga an inthiam loh vangin min chuhpui ta lo. Lydia chu kan chhungkaw tihlimtu ber a lo ni ta zawk a. Kan unau zinga naupangber ang mai a ni. Kei nen erawh kum 23 laiin kan inthlau a nih chu! Kei hi ka vannei a, zirna lamah ka tluang bawk nen, tin, ka pa hian Department pakhatah officer a ni ve bawk a, kan harsa lutuk lo nen, ka tluang ta phian a. Ka chak em em Police ka ni thei pawh ka hlimin nuam ka ti hle. Ka nu hian Doctor ni turin min duh a, mahse, Ka tui miau si lo. Ka pa erawh ka nih ang angah a lungawi ni maiin ka hria. Ka tet lai chuan ka û hian min vel ţap zing thin. Ka chawrchein ka sa a chhia a, thiante zingah a budelh ka ni ziah. Mahse, ka han rawlthar chhuak, kum 17-18 ka han ni chho kha ka ţhang ta awk a. Ka tetlai hre pha te chuan tuna ka landan hi mak an ti ziah nghe nghe. 6'1 ft ka ni a, Kan kawmthlang lawkah ka thianpate gym a awm bawk nen. Ka kal ve fo a, ka sa pawh a inphut mawi tawk ve viau e. Hmel hmaiah ka pa ka chhun a, ka vun erawh ka nu lamah kalin ka hâng lem lo. Tenawm khawpa ngo erawh ka ni lem lo thung. Ka pa hi a tlangval laia Dinthar veng keite an tih mai thin, insual hrat zet, sual ve thawkhat tak a ni thin a niawm e. A sa pawh a nalhin a lian viau. Ka nu erawh nu hleitling ve tawk tak, nunnem leh zaidam em em si a ni. Ka pa hi ka nu chhungten an duh lo hul hual a, ka nu pawh hmun dangah an awmtir hial a ni. Mahse, mi luhlul ka pa chuan, "Ka hmangaih a, ka va nei awm e aw" a ti mai a. An dahbona hmunah va zawng chhuakin a va ru chhuak a, ka pa pa ka pu te khaw hlui Khawhai lamah kum khat ka nu nen an inru nia! Chutiang taka tumruh ta chu an inrem lo thei ta lo va. Mahse, ka nu chhungte lam tan makpa belhfakawm ber a ni leh ta lawi a.. Engkimah an rawn leh an vuivaina pawh an thlen ber a ni leh ta zawk a ni. 

Kum 17 ka nih thlengin ngaihzawng ka nei lo. Ka zak! Keimah ka inhmu tling lo va, ka tet leh chawrche avang khan ka inkiltawih a ni ber ang chu. Star erawh ka nei ve thin. Mahse, min duh dawn lo tih ka hriatchian em vangin a tu amah ka belbul ta lo. Kum 18 ka han ni chho a, College te kan han kal chho ta bawk nen. Startu ka nei ve ta mial a. A vawikhat nan ka nei ve ta, mahse, a rei lo. Khata tang khan ka nei chho ta zel a; Mipa zei tak ka ni lo naa, ka bialnu te hian min duh ve thei zêk. Ka pa hian hmeichhe treat dan min hrilh ve nasa bawk a. Chuvangte pawh chu a niang. Ka nu hian a tha lo zawnga ka pa ka chhun a hlau ngang a niang, min zilh ngun hle bawk. Mahse, thisena inzawmna chu a lo thuk deuh nge college life kha ka zo ta vak lo va, insual leh zu han in zeuhah te ka ramtang chho a. Taksa fit lai, mahni tawka kei ka ni intih hun lai a lo ni ve bawk nen, a lar pawh ka lar.. Mahse, a tha zawngin ka lar vak lo. Insualpui ka hmu ve zel si a. Tlawm ka hreh ve nen, ka thi haw hne hnu fo! Mahse, ka insualpui te zawk hi a na zawk leh tlawm zawk an ni ve fó. Han hneh ngang loh erawh ka nei ve tho tih chu ka zep lem lo. Khatianga rorum taka ka awm kha hmeichhe thenkhat tan ka lo 'man' deuh nge, min duhtu an lo awm ve zel tho si a. Duh aiin ka pal tam ta riau. Sex-ah erawh ka harh har ve phian. Kum 25 ka nihin sex ka hmang. Kha nu tak kha aw.. Ka theihnghilh tawh ngaiin ka ring lo. A zei êm a ni. Mahse, ka nunah pawimawh zuina a neih tawh lem loh vangin ka sawi zui kher lo vang. 

College ka chhuah hlimin hmeichhe danglam tak ka tawng ta a. A hming chu Lalduhawmi a ni a, a hming ang maia duhawm a ni. Late tiin kan ko thung. Hmeichhe lian lutuk lo, zen thlirh thlerh, ngo tak, zei zawi lam a ni a. Innocent deuh mai a ni. Ka thianpa Atea cousin a ni a. Atea te ina kan len tumin a lo awm ve a. Ka hmuh phat atang khan ka thinlungah nghawr det thil a awm nghal. A aw te chu a nuin a no si, amah hrim hrim chu a no a ni tawp. Intino chawp erawh a ni miah lo thung. Atea pawn min hmelhriattir ve a. Lateii chu Shillongah lehkha zirin a awm thin a, chawlh hmangin a rawn haw ve zawk a ni awm e. Zanah zu kan in a, Atea chu Lateii number ka dil ta chawt a. Ani kamnam lah chuan, "Thianpa, i lerh ve ropui sia, Lateii hi chu i duh tak tak dawn loh chuan tibuai suh. A inno ropui sia.. " a ti a. 

"Tihnat phal chi a nih loh kha.. Khawi vat" ka ti a. Min pe ve mai. Mut dawnah Lateii chu ka call ta a. Mutchhuah hmel angreng tak hian min lo chhang a. 

"Keimah ka nia, Imanuela kha.. Atea thianpa kha.. I mu tawh mi? " ka ti a. Ka rui tih hre lo se ka duh. 

"Mu tawh e.. Ti nge min lo biak? " a ti a. 

"Aa.. Ka be chak che a. Ka number hi lo save ve la tiraw.. " tiin ka han nuih tlawn a. Kan inbe rei lo. A mu tawh sia, han biak lumlam vak dan ka hre bik lo nen. Mahse, a tuk atangin ka text ta zeuh zeuh a. Felfai takin min lo chhang ve mai zel. Atea sawi hmangin an hausa a, a nu leh paten hna an nei ve ve nen, an in pawh an vengah a nalh ber pawl a niawm e. Mahse, ka zâm phah lo. A zia chu ka duh a, amah hmeltha ka ti bawk. Single hlimchhawn lai a lo ni bawk a. Bem thluk ka tum khawp mai. Ni 5 vel kan inbiak ve tak ziahh chuan, ani pawn min ngaina tan ve ta riauin ka hria a. Bialpa a neih loh thu te pawh ka hre ta.. Ka huai sawt. 

Sunday zan a ni a, a inkhawm ban ka nghak. An ban thu min rawn hrilh rualin an inah a vawikhat nan leng turin ka phei ta a, an sawi ang ngeiin an in chu a ropui ngang mai. Ka call a, min lo hmuak a, pyjama leh tshirt eng nen a lo kal zan zan mai. A va duhawm tak. A chhungte erawh an lo awm lo, a nu leh pate mitthi râla an kal thu leh a unau te'n hla an zir thu a sawi a. An awmpui nula erawh a roomah a awm a niawm e. In chungah kan inzui chho a, a room bul sitting roomah kan inkawm ta a. Sawi tur em em ka hre lo, amah zawk chu a titi siam siam a. Ngaihthlak a nuam khawp mai. 

"In result a chhuak dawn hnai em? " a ti a. 

"Ka hre lo. Chhuak ve dawn tawh ang. Ka ngaihven vak lo" ka ti a. 

"I pass chuan Shillongah lo zir zawm ve daih la" a ti a. Min rawn melh sar sar bawk. 

"A chakawm.. Ka nu hi lawm hmun danga zir hi a phal thin lo va" ka ti a. 

"Ni ve reng, fapa mal i ni sia.. Duat lai kha" a ti salh a. Ka nep zo ta lo nge a banah ka man a, a kut chu ka humsak ta a. Nula ka rim vawikhatna a ni sia, a ruk tak chuan ka zâm ve hle. A kut ka humsak takah chuan a ngawi zui daih. A lai ve niin ka hria. 

"Ih.. Ka duh che a" ka ti ta phawng mai. Han thluaithlum chiam kha ka thiam ngang lo a ni. 

A nui ringawt. Mahse, a kut a laksawn loh danah beiseina ka nei tho. 

"Min duh ve tho tiraw? " ka ti ta hmiah a. A mitah ka en bawk. 

A lai tih hriat zetin a meng kual a, a heh a liak zauh bawk. "Ka hre lo" a ti sap a. 

. 'I hre lo maw? " tiin a kut chu ka hum nghet salh a. 

Min rawn melh hâw a, "I rinawm thei ang maw? " a ti ta sep a. 

"Ka kawp ngai lo" ka lo ti vat. 

"Kei chu ka thikthu a chhia asin" a ti leh a. 

"Kei fee" ka ti ve vat. Inhrethiam tawn zetin kan nui dun a. Engkim a thaah ngaiin ka lamah ka kuah hnai a, ka chak em em a hmui chu ka fawp ta a. Ka rin ai daihin a zei! Zan nuam leh hlimawm tak a ni. Mut pawh a tui khawp mai. 

Lateii nen chuan 24hrs hi kan inbia a ni ber mai. Tihtur kan nei vak lo bawk nen. Hmuh pawh kan inhmu ngun. An ina len nuam ka ti vak lo va, Atea roomah kan inhmu mai zel. Atea chhungte pawn an hre vek a, ka kawp an hlau vek. Ka lerh ve thin tih mai loh chu min sit em em bik lo a nih hmel. Lateii nen kan han inzawm takah chuan insual pawh ka bansan ta deuh a, ka insual pawn a hria ang tih ka hlau thin kher mai. Zu erawh a rukin ka la in zeuh zeuh. Sim thut a har ve bawk nen. Harsatna em em awm loin thla khat chu kan ni ve ta reng mai. Mahse, result a chhuak a, kan pass ve ve. Zir zawm zel dan turah kan inhnial chho ta a. Aniin Shillonga awm a duh a, kei ka nu ten MZU ah min tirh an tum si. A tawpa tawpah Lateii chuan min duh leh thlakhlelh vangin a pa te a hmin ta hram a. MZU-ah a kal ve dawn ta. Ka va hlim tak. Ka duhna a pung sawt mai. 

"Mama, tho tawh rawh. Chaw kan ei dawn" Lydia chuan ka lu a rawn sawi nawk nawk a. A tawng la fiah mang lo chu a lawmawm thin. Ka va kuah a, ka khumah chuan ka kuah thlu a, a rak leh ruai mai. A pa thisen lam a pawl a, a sam a kir chiat bakah a vun a hâng ve deuh. Háng beh erawh a ni lo. Kan tan chuan a hmeltha ber tho tho. 

Ka pawm a, room chhuahsanin choka lam kan pan a. Ka nu chuan hmarchapui a lo bawl mek. "Tho tlai thei lutuk. Vawiinah Admission pawh zuk la tawh ang che.. ". A lo ti a. 

"Vawiin chu Atea te nen chhuah kan tum asin" ka ti a. 

"Khawiah chuan maw.. "

"A cousin te dilah sangha kan man dawn" ka ti satliah a. Lateii te dilah kan kal dawn tih ka sawi lang duh rih lo. Eng emaw ti zawng hian ka la zak roh a, ka bialnu te hi tumah ka hrilh ngai lo. Mami erawh chuan a lo hre zauh zel. 

"Atea cousin nen khan in ni chiang" Mami rawn lut ve chuan a ti ta chiah reng a. Ka hawi zuk zuk. 

"A chhiat loh kha.. Mahse, Shillongah bialpa hnamdang a nei thin an ti ania aw" a tih leh takah chuan, "Nei ve bawk ang chu.. A nei tawh hleinem" ka lo ti vat. 

"Mahse, an sawi dan khan a nasat hmel tawp. Mahse, a hmel ka hmuh khan chutiang tur hmel a pu si lo va. " a ti leh ta zel a. Ka ngei ru viau 

"Mi pawh hi a.. An sawi loh tur hi an sawi peih thei sia a" ka ti hluk a. Mami pawh chuan, "Nia, ka thiannu Hriatpuii nau te khan an sawi a. Ka awih vek chuang lo" a lo ti leh lawi a! Hriatpuii nau Bethsy ka mitthla nghal. Shillongah a awm ve thin tak e.. Tin, Bethsy thiannu Hlimi nen thawkhkhat lai khan kan ni ve tawh bawk. Mak ka ti vak lo. An duh leh lo sawi mai mai teh se a. 

Atea, kei, Lateii leh Atea bialnu Kuri te nen Lateii te dil lam kan pan ta sang sang a. Boruak a nuam khawp mai. Lateii te dil ka han ti tak naa, a chhak lawkah Picnic spot an nei bawk a, a changtlungin a lûn hle bawk. A thlangah huan ti ila kuhva huan a awm a. Chumi hmunah chuan dil lian vak lo neiin sangha an dah ve a, picnic pahin chawhmeh tur kan man mai zawk dawn a ni. 

Atea nen nghakuai kan chiah a, len kan deng thiam bawk si lo. Lateii leh Kuri pawh la inkawm tam lo mah se: an innelin an titi thei viau. 

"Kuri saw vawiin chu ka'n fight teh ang.. Chance min pe ang che u" Atea chuan a ti sur sur a. 

"In englo tawh maw ka tia" ka lo ti a. 

"Englo nang, a khirh reuh lutuk. A la virgin a nih ka ring. " a ti a. A nui vur vur bawk. 

"Kei chu Lateii hi ka la fight miah lo.. " ka ti a. A ner sawk. "Ka awih.. " tiel zet hian a ti a. 

"A nia lawm.. A innocent em a, ka inthlahrung alawm" ka rilru dik tak ka sawi. 

"Nia.. Ka farnu a nia, khawih lo la chu ka duh" a ti ve leh diam a. 

"Kan neih duh loh tur pawh hi kan han khawih hram zel a.. Kan sual ve ngawt mai" ka tih chuan, "Ni ve reng.. Mahse, a hmeichhiain a zir ve chuan a har ve em a ni" a lo ti a. 

"Buaithlak nih hi.. Bakah tunlaiah chuan virgin pawh hi an tlem tawh ee.. Nang pawh Kuri chu a la virgin chuan khawih suh. A khawngaihthlak" ka ti a 

"Hmm.. Nakinah mi dangin an hawnsak dawn tho sia, ka ui alawm" a lo ti! Huiham.. Hei hi mipa tam tak rilru a ni ve fo. Kan khawih loh leh khalh loha mi dang laka an chul mai hlauh vanga a hmasa ber nih hi mipa te rilru a ni ve. Sual vang leh hurherh vang hrim hrima hmeichhe khawih hi kan tam lo. Tin, an virgin tawh lo tih kan hriatchian sa te phei chu khawih ve hrim hrim kan duh tlangpui. Kan hmangaih emaw hmangaih lo emaw. Hmeichhe thenkhatin sex an hmanpui mipa ten an hmusit emaw an hnualsuat mai tur anga an ngai hi mipa zawng zawngah a ni lo nasa. Chutin kan hmusitin kan hnualsuat vek kher lo. An virgin tawh lo emaw a nih paw'n an taksa kan tana an hlan kha kan lawm ru em em zawk. Kan rilru ni lo pui min puttir tlat avang hian anmahniah ngaihthat lohna leh mahni inhmuhhniamna an neih phah a, inrinhlelhna a piang chho a, a tawpah inthen darhna hial a thleng thin. Keimah bikah chuan ka bialnu hlui te ka hmusit ngai lo, an nundanin a zir lo viau emaw engpawh nise, ka sawi zui ngai lo.insawitheih nana hman te hi A pa lo ka ti! 

"Nangni pahnih kha.. Riahchilh in tum mi? " Kuri'n a rawn ti lang lang a. Sangha pahnih lian ve tawk tak kan man tawh bawk a. Kan duhtawk. Kan phei a. Lateii chuan phone a lo hmang mek. English-a a tawng danah mizo a be lo tih chu a chiang mai awm e. 

Sangha chu kan siambawl nghal a. Eirawngbawl lam ka thiam tehchiam lo va, Atea'n a ti deuh vek. Lateii pawh chu a va be rei ve mawle.. Ka va kal hnai a. Min hmuh rual rualin an inbiakna a titawp nghal. 

"Engzat nge in man? " a ti nghal zat a. 

"Pahnih.. A tawk reng. A lian tho" ka ti a. Tlemin a hmel chu a pha deuhin ka hria. Ka ngaihbel nge mawni.. 

Chawhnu herah Atea leh Kuri te chu a chhak spot-a thlam an sak tharah an chho a. A fight ngei ang le.. Kan pahniha kan awm dun takah chuan, "Nichina i biak kha tu nge? " ka ti ta a. Min kap ve tlat a. Sawi loh theih a ni lo. 

A aw a thian kharh a. "Mike a nih kha. Ka thianpa.. Ti nge? " a ti a. 

"Timah.. Ka hre duh mai mai" ka ti puat a. Amah zawk chu a serious deuh nge, "Zep loh chuan ka ex a nia.. Naga a nia.. " a ti sap a. Ka u sawi chu a dik a ni maw ka ti rilru a. 

"Ti nge in la inbiak si a? " lungawi vak lo chuan ka ti a. 

"Aman min lo call alawm. Bialnu thar an hnampui a neih thu a rawn sawi a nih kha. Ka lawmpui.. Kan innei thei dawn chuang lo va" a ti siam siam a. 

"Umm.. A that chu. Mahse, inbe tawh lo ula tiraw! " ka ti a. 

"Be tawh lo vang.. " a lo ti vat. Inhnial nan kan hun neih chu ka phal si lo va, ka rilru nawm lohna dah thain ka kuah a. Ka fawp vawng vawng mai. Thlama khum lian vak lo an hunah chuan ka kai phei a. A vawikhat nan ka fight ve ta a. A ţang ve tak naa, a ţang na vak loa ka hriat vangin,ka tilui zel. 

A hnuah min nam vak a, a tal chhuak a. "Ti lo vang. A tha lo. " a ti tham ţiak a. Kei pawn ka tumlui lo. 

"I la virgin tiraw? " ka ti ta tawp a. A bu nghat. Min rawn melh a, "Inneih zanah " a ti sap a. Ka rilru nawm loh rukna te chu a kiang duak duak a ni ber e. Duat deuhin ka pawm a. 

"Umm.. Ka tilui tawh lo vang che. Ka insum thei alawm.. " ka ti sup sup a. 

"Ih maw.. Nakinah zel pawh i hriat tur chu, Shillong ka awm lai khan ka sawi tawh angin Mike nen kan ni tih kha hria an awm ve nual a. Ni lo pui puia min sawina te, dawt belha min sawina te i la hre mai thei. Keima ka atanga chhuak a nih loh chuan awih lo la ka duh. Pathianin engkim a hria a.. Nang pawn thudik i hre ve zel mai ang.. " a ti sep sep a. 

Ka hmin hle. Ka duh bawk a ni. 

"Mi sawi mai mai.. A ho lutuk. Kan pahnih kan pawimawh ber.. Ka tan rinawm la a tawk" ka lo ti ve a. A hlim hmel chu hmuh a nuam kher mai. Tih tur a vâng riau si a, games te kan khel ta vel mai mai. A hnu deuh feah Atea te pawh an rawn chhuk a, Kuri hmel chu a phelh deuh phang hian ka hmu.. Ka ngaihbel lehpek a niang.. 

Ni hlimawm tak kan hmang a. Puar takin zanriah kan ei bawk. Lateii nen chuan hringnun a duhawmin a mawi takzet a ni. 

A tukah Admission pawh kan pali bawkin kan zuk la leh. Kuri hi Pol. Sc la tur a nia, Keini Atea nen Geography, Lateii erawh English a ni thung. Hawn hmain gate bula canteen-ah inhnawh puar turin kan va lut ve a. Kan thu fel chiah tihin Hlimi te thianho an rawn lut ve chiah. Min rawn hmu ve bawk. Hlimi hi te fel at mai, confi zet a ni a; a hmel pawh a tha. Mahse, kan nih lai khan ka hne hman. Ka hua chu a ni lo, ka hun zawng zawng neih a tum kha ka hne a ni ber e. Mipa chuan hun thawl kan lo duh ve thin bawk nen. Kan intha then deuh tawp kha a nia. Amah hi chuan min rawn la be zeuh zeuh. Thian angin ka lo chhang thin. 

Kan bul lawka an thut vangin an tawng pawh kan hre vek thei. Hlimi thiannu, Nuteii chuan, "Awiii a hmel nen a inhmeh lo, a fel hmel hmel nen" a ti sar sar a. A hma lawkin an inhrilh ru tawh a. Eng emaw tak an rawn sawi kha ka ring reng a. Lateii erawh chuan engmah a hrethiam lo vang. 

Hlimi chuan, "Phaia awm te hi chu a tlangpuiin an ni vek alawm. Tihian an lo haw a, fel leh tha ber ang hian an rawn inlan leh a.. Ka nuih a za thin" a ti zawt zawt a. Lateii thil ei lai pawh a chawl dat. 

"Chu chu lawm.. Hnam dang ngaihzawng neiin an live in tih hriat miah loh te hian an awm thiam mawle.. Bialpa te bulah an inla serafim thiam thei rap" Bethsy, ka u thiannu Hriatpuii nau chuan a ti lang lang a. Ani pawh MZUah a rawn kal ve dawn a nih hmel. 

"Ho e mai. Khawvel alawm. An duh duhin awm teh se.. Mahse, Pathian an bum thei chuang lo. Tihian Kohhranah an inhmang ang a, promotion an hmu leh zung zung mai ang.. " an thiannu ka la hmuh ngai loh chuan a rawn ti ve leh bawk a. An tawng ring angreng sia, mi dang ho pawn an melh hrek hrek mai. Lateii erawh a thil ei lai a ei zawm leh tawh a. Amah an sawi chhan tih ka hria, a inhre ve ang em ka hre lo. Kan eizo kan chhuak tur chu, Bethsy chuan, "Ima, Kha kha mi in nu thar chu.. Naga pa ex a ni tih a hriat miah loh",, a rawn ti a. Ka sa zawk mai. Lateii pawh a nghing lawihin ka hria. 

"Nang pawh Rinhlua sakawr i ni tih a hriat miah loh.. " Atea a rawn tawng. Bethsy a ngawi chiang pta daih. Kan boruak erawh a nuam vak lo. Lateii chu ka khawngaih zawk, hrehawm a tih hmel lutuk chu. Kan tlan haw nghal a, kan ngawi char char. An inpengah ka ding a, an in lam a pan hmain, "Pawi ka ti lutuk.. " a ti sap a. Ka khawngaihna a zual sawt. 

"Engahmah ka ngai lo khatiang.. Zanah ka lo bia ang che.. Chaw ei teuh rawh aw" ka ti a. A bu nghat. Min nuih sak a. A chhuk thla ta a. Bethsy leh Hlimi ka ngei ru hle. Hmeichhia lo ngei hi ka duh ngai lo naa, vawiin kha chu an che over ve det a ni. 

In ka thlen chuan Lydia a lo lang leh vat. 

"Mama, mikhual kan nei a.. Ih.. Nula a nia, a hmeltha lutuk" a lo ti niah niah. Tu tak ni ang maw.. 

Ka inbual zo, ka zu chhuk chu.. Living room thutthleng seiah ka u leh hmeichhe pakhat hi an lo thu a. Ka nu erawh eirawng a bawl. 

"Mam, hei ka thiannu Rosy a nih hi.. Rose, hei ka nau aw" a ti zung zung a. Lydia khan dawt a sawi lo tih ka hre chiah. Rosy chu hmeichhe hmeltha tak a ni.. 

Kan inchibai a. A nui mawi zet mai. Kei ai chuan a û hlek thung ang. 

"A pute inah thlen a tum a, ka phal lo nih hi.. " ka uin a tih chuan, Aizawl khua a ni lo tih ka hre nghal mai. Zawhna dang zawh belh erawh ka tum lo. 

Chokaa tui ka va in lai chuan, Lydia a rawn kal leh terh terh a. "A hmeltha tiraw? " a rawn ti leh kher! He nau hi a lerh dawn tlat! 

Tui hmuam ţûn chungin, "Umm.. Hmeltha" ka ti a. Ka nu a lo nui.. 

Rosy chu thla khat lai kan inah a awm dawn! An hna thilah training a rawn nei a niawm e. Ka u te nen school kal hoin college pawh an lo kal ho zel a lo nia. Lawngtlai khua a ni. Mikhual neih hi hrehawm an ti ang tih ka hlauh vang hian nuam lo ka ti thin.. Rosy pawh chu ka lo inthlahrung lawk ve ringawt.. 

Zanriah eikhama Lateii nen kan inbiakin Rosy vel chu ka sawi a. 

"Hmm.. Nuam i ti awm.. I lo lerh ang e aw" a rawn ti a. 

"I awm alawm" ka tih laiin signal a chhia nge, a tawp daih.

"I bialnu em ni? " a rawn tih chuan ka phu zawk. A awm ve tih ka hre si lo va. 

"Umm nih kha" ka ti nghut a. 

"A va vannei ve" a ti zui sap. Biak leh hman lohin in chhungah a lut daih. 

Hmm.. A sawi awmzia ka hre lo e a.. 

(Sei deuh ka thei rih lo. Ka ph a chiang tawh lo va. Touch hi.. A lam vak vak zel.. Ka theih chinah hriatthiamna nen aw 😁😊