Mama

MAMA..

Ziaktu: Toni Râlte

"Engtin nge khatih chhung zawng khan i lo inthup theih zawk le.. Min lo bum char char tihna ania, i lo tenawm hle mai" ka ti hlawih hlawih a. Ka insúm thei tawh thlawt lo a ni e. Ka pasal, kum khat erh awrh ka lo neih ve tawh chuan a zia diktak a chhuah ta chu chu ania! Rapthlak hian. 

"Ngawi mai mai teh. I tawng thei sia a. " a ti hmuk a. Sawi tur a hre vak lo tih ka hria. Ka túm búr a, ka che tau sawk sawk a. 

"Pasal te chu engtin pawn awm se an zah thiam a ni ngai, i ankhum nghal vak zel a" kan pa nu chuan a lo ti ve a. Ka melh kâwk. Mak tak a ni, kan pa ka hauh ve hian an tan tlat zel. Min tanpuia ka thlavâng an hauh te chu a hnai lo lutuk. He inah hian mo pahnih kan awm a, kan dinhmun erawh inang lo tak a ni. Ka mopui Mapuii chuan a hmingin hlawh a nei ve a, a lal reng bawk a. Engtin pawn awm se an sawisel ngam thak lo. Kei erawh chhehchhawl ka ni chiang khawp mai. Ka vui hran lo naa mahni inkhawngaih chang ka nei fô. Kan pa lah hian thawhchhuah a nei der si lo, han indang ringawt dawn ila eizawnna neih bawk si loh chuan a ngaihna a awm lo a ni. 

Unau pathum zinga milai ni turin ka lo piang ve a, ka pa chu lo neia eizawng ve mai a ni. Ka nu chuan puan a thui thin thung. Thingtlanga seilian kan ni bawk a, rual kan awt em em bik lo. Khawsak a lo awlsam ve bawk nen. Ka han nula chho a, luck pawh ka luck ve fu. Tuna ka pasal hian tihtakzetin min ngaizawng a, khawi kipah min zuiin ka mei a ni thei zel mai. A tirah chuan ka ngei a, ka ning em em thin. Mahse, a rei a, ngainatna chin ka lo nei chho ve ta a. Kan inngaizawng ta a ni. Inkual reng ta na ná nâ chu kan lo inveng seng ta lo va, ka rai ta. 

Ka pa ngaihdan a ni lo em em naa tihtheih a awm tawh si lo, kan innei ve ta rawih kha ania. An khawsak a awlsam deuh a, a pa hi kan khaw middle schoolah Headmaster a ni a, anu erawh eichawp dawr a nghak thung. Puia (kan pa) hi chu a tul tulah a inhlawh ve mai thin. Puia nau Sanga a awm leh a, an upa ber hmeichhia chuan pasal a nei tawh. Sanga nupui hi ania Mapuii ka tih kha. Kan inneih atanga rei vak loah an inru ve a, Mapuii hi chu kan khaw thenawm ami a ni thung. Kan khaw primary schoolah mi ai a kal thin a, a lal phah ta a nih hi. Kei erawh class X kha ka pass ve hram a, Aizawlah ka han kal zawm ve naa ka lungleng lutuk ka haw leh tawp. Tikhan ka tangkhang chho a, ka chawl zui ta mai a ni. Mapuii erawh chuan cl xii a pass ve tlat a. 

Fanu ka han nei ta a. Duat a hlawh ve viau. Mahse fate lakah chuan thikthu a lo chhe deuh nge puia u Rami fate ai hian a tlatlum lo riauin ka hre thin. Kan in lamah erawh kehthei dawmin an dawm thung. Mi thatchhia ka ni lo va, che peih tawp ang chi, hnawk ngaithei lo ve deuh ka nia. Ka lawi achinah an in chu fai tak a ni. Fak eraeh ka hlawh chuang lem lo va. Ka â èm a, han vuivai kual vel hi ka thiam lem lo. Rik chuan rik pawp mai hi ka duh dan a ni ve bawk a. Mapuii nen hi chuan inhman hleih ve tak kan ni, zingah hian dar, 7 aia hmaa a thawh awm ka la hre miah lo, a lo thawh veleh atangin school kal turin a insiam nghal a. Tlaiah a lo bang a, a mu nghal thin. Inbual turin a rawn tho a, ka eirawngbawl sa a rawn ei leh tawp a, ka rin luih ve deuh vangin chaw ei kham thleng seng chu a ti ve thin. Thleng erawh ka sil tho zel. Ka nu te a be thiam em em a, a ko heuh heuh a, a tilawm thiam takzet. Mahse, a thatchhiat em vang nge a thau luang mai. Kei erawh fa ka neih hnu thlengin ka khal mawi tawk hle. Amah aia nalh ka tum ve tlat. 

Kan pa hi thla hnih liamta atang khan zu rim a rawn nam haw ziah a, a tirah chuan a inthup ve nasa, mahse, a rei zel a. A inthup seng ta lo a ni ber. Kan inkhak ta zeuh zeuh mai. 

"Zu hi chu in tawh lo teh. Hna pawh thawk lo mai rawh, zu i in ai chuan" ka han ti ngawt thin a. 

"Hna a thawh lohin eng nge in ei ang? Nang lah Mapuii angin thawh chhuah i nei ve si lo" ka nu leh bawk. Ka ten thin. Eng nge maw thawk se min tih le.. Fa thla thum mi ka pawm mèk a ni sia. 

Hun a kal ve zel a, hrehawmna tam tak hi ka sual ve ka ti lo thei lo. Inthen ringawt ka duh bik loh vangin ka dawhthei ve hram hram a, a chhungte leh ka mopui ngeiin min hmuhsitna te chu mènah ka thlak hram hram thin kha a nia. An ngeiawm theihzia chu, U Rami te nufa an rawn leng a, eitur an rawn keng a, mapuii te nen ka tel lo vin an han ei ngei zel a.. Mei nei deuh deuha min tawng khum chang lah a tam. U rami lah hi pasal nei tawh si, ro rawn rel ve phèt hi a tum zel a. Ka fanu kawr leisaka pek ai chuan a fate hak hlui pawh mi dang pe duh ngat kha ania. Ka awt lo nasa. A hmelchhe ropui si.. 😆

Vawi khat ka nu te ina kan pa te nen kan va leng a, chaw kan ei nghal nghe nghe. Kan leng khât ve bawk a. Kan pa chuan zu a in lo ve khiah a. Ka lawm ru hle. Kan inhlat em em lo naa ka leng zen zen lo. Ka pa hian a phal thin lo bawk a. Bakah ka leng hman ve vak lo. Ka buai thei èm mai. 

Zanah kan haw a, in kan han lut chu U rami te pawh an lo awm ve a. An lo zi nak nak a. 

"Mo kan nih tawh chuan mahni in lamah hian len zen loh tur, a mawi lo. Puia, in nu hi hrilh ve rawh, len apiang lahin chaw ei nghal zel ringawt. He lamah mapuii a buai em em a, a eirawngbawl peih lo zawk mawni.. In va ei rikngawt" U Rami chuan a lo ti nia mawle.. Khawvel mihringah hian a va zak lo ber tak. 

Puia chuan, "Amahin a kal hleinem, ka kal ve tho alawm.. A leng khât em mai a " a lo ti ve a. Ka lawm ru ve tawp. 

"Chupawhnise, he lamah an buai alawm" a ti leh tâlh a. 

"Nang pawh i awm tho a, lo pui ve mai la ti nia, a thuhrimin Mapuii hian eng nge a tih ve thin, engkim zawng zawng Lateii'n a khawih a, mapuii te chu a mu reng ringawt alawm. Tlai khat lek a che lo pawh chu in va la na awm em em ve.. " a ti ve ta zèk a! Ka lo íp deuh naa ka lawm ru tho. 

"I va zak lo ee.. Mapuii te chu nitin school a kal a, a chau ve bawk ang chu, ani te chu in a nghak tawp a, eng nge a tih vak chuan" ka nu a ni thung. 

"In lamah a che nasa thung alawm, engkim vawk chaw chhum, in tihfai, rawngbawl, insuk.. Tu nge ti thin.. Ina in lo hawna fai taka lo dah ziahtu hi ka nupui a ni.. In en dan hi ka ngaihdan a nih lohna a rei tawh. Ka la áng ang ka tia ka insum zel a, ka rawn sawi ta a nih hi. Mapuii pwh ka nau nupui i nia, fa pawh i la nei lo, schoola va kal ringawt kha chauhna tham a ni lo, in awl lutuk, ka hre vek, i lo haw chuan kan nu hi pui ve tawh rawh. Kha i awm awl lutuk a i thau mum kung kha.. " kan pa chu a alh ve hle anih dawn hi.. 

"Awii leh, bawrh bawrh a che. In nute in lamah in va kal a, i pi ten an lo fuihpawrh che a ni maw" U rami chuan a lo ti a. 

"Nang pawh hi i rawn lang tam mah mah, i in chu i pasal te in a ni, mi pawn an sawi duh teh mai che nia, nitin rawn lawr reng ringawt. Ro rel te hi i la rawn tum khanglang a, ka farnu mah nila, ka dím vak lo vang che. Rawn kal zen tawh suh. Tlai khat lek kan nu leng pawh i hmu thei lo va, i khak nghal ania, i pasal te chhungkaw rilru tur tikhan ngaihtuah rawh. I zak lawm ni"? Awii kan pa chu ka hmu hmel tha tawp. An ngawi daih. An chhang ngam tawh lo aniang. 

Mut hmunah kan pa chuan, "Ka thinrim ve deuh tlat anih kha. Engmah hi ka hmuh hmaih hleinem. Ngawi tak rawh, bawihteii hi han leikang deuh se, kan in dang hmiah ang" a ti a. Chumizan kan nupa nun hmang chu a nuam hle mai. 

Khatia kan pain a hauh tak hrep vang kha ni maw, a hma aiin min hmu mawh zual a. Mahse, huaisenna ka neih ve tawh tlat vangin ka diau duh thak lo. Kan pa min fuih ruk angin, Fin thiam ka tum ve tlat. Mapuii school bang rawn thlen rual deuhthaw hian ka insu daih zel a, a rei thei ang ber ka insu a, vawk chaw ka chhum pah bawk a. Dar 4 velah eirawng ka bawl chauh thin a. Ka pa inkhawm tur hi a tlai phah deuh thin, "Ka buai lutuk a, ka bawl hma thei lo" ka ti mai zel a. "Mapui, i pui lo mi? " ka pain a ti thin. A zak ve ang em le.. A sim chuang hlei lo va. 

Tin, tukthuan eina senghawi leh sil hi chu ka kuta tla a ni bawk a. Ka ti vek zel a. Zanriah erawh kan pa min fuih ang thoin, ei kham rualin panhnah ka roll loh leh kuhva rah ka thel that zel. Mapuiin a seng loh chuan a awm reng a, ka nuin a seng phah fo. Chutia a seng a seng tak foah chuan mapuii a tirh phah ta zel a. Thleng pawh sil tumna ka nei miah lo bawk a, an sil lo thei si lo va, an chawh tawp 😂 Mapuii chu a túm búr zel. Thih ngama han thatchhiat mai chu aw.. A khawngaihthlak zawk. 

Mahse, chhungkua kan hlim vak lo. Kan pa lah a rawn nam haw ve zeuh zeuh zel bawk si. Anu te hriat laiin ka hau tawh ngai lo bawk. Ka lamah kan pa a tang nia ka hriat vangin ka thla a muang rawk a, hriat loh lamah ka nu ten kua an lo hreuh chu niin. 

Chung lai chuan kan khaw kawng laih a ni a, inhlawhna a tam èm vangin khaw thenawm atang pawn an rawn kal fur a. Mapuii nutapa pawh a rawn kal ve a, kan inah a rawn thleng a. Biaka kan ti mai a, tlangval lian ziah zuah tak, a ú ang lo taka nelawm deuh mai a ni a. A mawng a zángin min puitu ber a ni a. Nau anga ka en vangin kei pawn ka duat thiam a, ka nau nen an inkawm thin nghe nghe. Kan pa pawh a inhlawh ve thin a, zu lah a in nasa tial tial bawk. Bawihteii pawh kum khat a ni ve ta reng mai. A birthday pawh ka nu ten lawmna pawisa kan nei lo an tih vangin keima nu te lamin min lawmsak a, kan pa erawh a inthlahrung ve deuh. Inthlahrung awm reng pawh a ni. 

Zan khat chu mitthi kan nei a, lumen tur anih vangin kan pa pawh tlai deuh tawh takah a va kal ve a. Bawihteii a hritlan deuh vangin mut kan hmu tha meuh lo. Zan reiah Biaka a lo hawng a, bawihteii ka lo awi mèk a. 

."Ti nge i lo hawn daih?" Ka lo ti a. 

"Naktuk kha thawh tho tur an ti sia, ka chau sa ve deuh nen.. Ka lo haw ta mai " a ti a. Mutna a siam a, sitting room thutthleng sei a zawm a, a mu mai thin a. 

"Duati chu a mu thei na nge? " a ti a. Ka lu la lo bu a. Ka awi leh darh darh a. A mu fel ve ta aniang, ka va mut a,. Ka va zung leh a, ka zung zo chu, "U late, enteh, he lai hi a bawk tlat a, ka ngaih a tha lo e, a rawn na deuh tlat tawh lehnghal" tih pahin a khel veilam hi a khawih a. 

Khaw maw tih paha ka zuk khawih chu, ka petek palh a, ka zuk bawh ta ruak a. Kan ri deuh khut khut mai. Chutia kan buai lai tak chuan kan pa a rawn lut thut. Kawngka kan kalh lo hrim hrim a. Room atangin ka nu a rawn chhuak ve chiah bawk. 

"Eheee… ka in chhungah ngei mw.. Suahsual rawng in lo bawl a" kan pa chuan thinrim sehchilh hian a ti ta mai!  

"Ka hlauh ang ngeiin maw" ka nuin a lo ti bawk. A ngaihna reng kan hre lo. Mi dang an lo tho ve zel bawk a. Uire melhin a ni min melh ni. 

"Nang mi hurnu kha i lo tenawmzia ka hre chiah, ka nu ten min hrilh lai khan lo awih hle hle ila tha tur.. Chhuak rang rawh" kan pa chu a kainam tawh si, mahse, chuti ang teh thut chu ka beisei loh lutuk anih vangin awm dan tur pawh ka hre lo. Ka hawi â vek. 

"Eng nge in sawi awmzia? Upui? " Biaka chuan a lo ti ve bawk a. 

"Nang kha lo ngawi hmak rawh. Naktukah i haw vang vang a, mi nupa inkar tichhe tur ringawta i lo kal hi ka ring thei lo. Ka pa a thinrim ngawt ang" Mapuii chuan a lo ti hlawih hlawih a. A ngaihna hi kan hre lo tak tak. 

"Nge i la din reng. Insiam rawh" kan pa chuan a ti leh a. 

"In sawi awmzia hi pakhatmah ka hre lo" ka ti ta a. 

"Biaka nen hian kan rinhlelhna che u a rei tawh mai, kan inah em em hi chuan hetia in lo awm ngam hi ka ring lo asin. Min va zah lo em em ve" ka nu bawk. Ka pa erawh mitthi inah a kal ve daih a. 

"Awii in hre sual anih chu, chuti ang engmah a awm lo. Engtin nge chutiang te in rin theih zawk? " ka ti hú a. 

"Chhuanlam ka ngaithla peih lo. Chhuak rawh. I hmel ka hmu peih lo. I bungrua pawh naktukah i rawn la dawn nia. Uire mah la, bungraw lak chu ka phalsak hram ang che" Puia.. 

Uire..! A mi den dan a dang deuh. Mahse, min thawn em vangin ka nat tur angin ka na lo. Ka â huih tlat a. Biaka pwh chuan thil awmzia a lo sawi ve a. An ngaithla lo. An awih miah lo bawk. Kan pa chuan min nawr chhuak ta a. Ka fanu pawh hruai lo vin ka nu te in lamah ka phei ta hna hna a. Ka nute bula sawi dan tur pawh ka hre lo e a. 

Tikhan a ni ta rum rum mai si a. Ka chunga inphiarrukna rapthlak zet chu awih harsa ka la ti cheu! Mumang kan thanharhsan ang mai hian a la fel duak tura ngaihna ka la nei tlat. Ka nu kamtam pheng chuan a lo sawi darh a, hre lo abar pawh an awm ta lo. Ka mualpho ta hle. Biaka lah a ngaihna hre mang lo vin a haw ve daih bawk si. Thinrimna chang pawh ka hre lo ka chhung te erawh chuan min ring tih ka hria. 

"Áaa.. A ni em em lo ve, heti khawpa min duh lo tu te chhungkua nena inlaichinna neih reng chu a tluan pawh kan tluang lo vang.. Bungrua chu i va la mai teh ang u"ka pa chuan a ti ta a. 

Dik tak chuan a hmain Puia hian min rinhlelh thu te lo sawi thin nise chuan ka hrethiam ang. Ka lakah thinrim ang pawn a awm ngai si lo, mahse, nupa nun erawh kan hmang khât fu. Tin, inah a awm tlem em em a, zu a in nasa hle bawk. Ka lo dawhtheihna te kha a thlawn ta mai dawn chu anih hi. 

Bungrua kan va lak zingah chuan, Puia hnenah thil nihna dik tak ka sawi leh hram a. A túm búr a, a meng sen rúm bawk. "Eng pawh sawi la, awmzia a awm lo. Ka ring therte lo che" a ti ta hmiah. A tawk fú mai. Ka thinrim ve ta, ani zu rui reng, nam reng bula mut pawh kha ka kham ve reng reng tawh. An in chhung hrehawm tehreng nen. Mahse, uire chhuah anga ka chhuak chu ka lung a dam lo, mi min ngaihdan a dik mawlh si lo va. Lehlamah erawh min ring tawk, ka nu te zia hrechiang te an awm ve tho a. Min tan tu an awm ve reng, engpawhnise, thudik chu a la langchhuak em em ang. 

Bawihteii erawh ka awmpui a. Ka u hian pasal a nei tawh a, ka nau mipa hian bawihteii chu a atchilh thawthang a ni. Ka chang hman meuh lo. Kan inah chuan ka nuamsa thawkhat zawk viau mai. Kan inthen chhan ngaihtuah fo lo phei ila chuan ka hlim ngawt ang. Uire nih hi ka duh miah lo asin le.. 

Ka pa thianpa Aizawl ami hian puanthui zir ve turin thu min rawn teh fô a, ka nau zirna chhunzawm a ngai ve bawk nen. Ka pa remruat angin Aizawlah ka pa thianpa te in hnuai luahin kan han in dang ve ta thawr a. Bawihteii erawh ka nuin, ka khua a har dawn em mai, tiin a la tè hle chungin hruai a phal ta tlat lo. Apa te lam mitmei ka veng ve deuh bawk si, mahse, engmah an lo sawi lem lo aniang. Bawihteii lah tlei em em, min ngai lo lutuk emaw tih tur a ni roh a. An duat sual ang tih ka hlau deuh. Ka nulat laia ka lo zir silawn tawh vang aniang puanthui chu ka thiam chak khawp a. Ka tih mi tak a lo ni. Dawrah ka thawk ve nghal a, tichuan sum tlem te te chu ka thawk chhuak ve ta mai. 

Dintharah kan awm a, Kohhranah pawh theih ang angin kan tel ve a. Mahse, kei chu ka lang tam lutuk lo, ka buai ve bawk nen. Lung pawh a leng hman meuh lo a ni e. 

Maliana (ka nau) chuan nuam a ti khawpin ka hria. College ka kal ve mek bawk a. Ka lo duat ve bawk nen. Kan hlim unau ve thin rak rak khawp mai. 

Zan khat chu kan thenawm tlangval a rawn leng nawlh mai a. Mama hi Mizoramah a awm tam lo va, a awm ve chhunah pawh a chhuak lutuk lo. An hausak èm vang hian kan pawh ngam lo va. Apa hi department pakhata Director ni lai a ni a, anu lah Doctor a ni bawk. A nau hmeichhia hi designer niin ka ngaisang nasa thin. A ú te pahnih hian nupui pasal an nei tawh thung. Colony khatah an awm ho vek a, an inngeih sia, nawm hmel ka ti thei tawp. Mama hi software engineer niin mi hlawhtling tak vek an ni. 

"Teh hlawl che chuan.. Lo thu rawh" ka lo ti a. Sang zet mai, cher lutuk lo, ngo lam deuh, hmel nelawm vak lo a ni a, a tawng tam bawk si lo va, thiana siam a huphurhawm viau ang. Hman deuh khan Zarkawt nula lar ve deuh pakhat hian a rawn awmchilh thawthang a, ani mama lah chu a zinbo hmiah si. Mama nu leh pate tihngaihna hre si lo chuan an hawn tir leh ringawt a niawm e. Chutianga nula hmel tha te star rawn chu ania. A lakah chuan tè tak ka ni. 

"Lenna tur a vâng em a.. " a ti satliah a. Kan in chhaka U marami dawrah hian kan inhmu ve zeuh zeuh thin a, vawi khat an inah thil khawnin ka lut tawh bawk. Inthenawm hnai e ti lovin kan in hre har angreng. Anu hi a fel èm a, Biak ina min hmuh te hian min lo be zel zawk a, kei chuan a hranpain ka hnaih ngam lem lo. 

"Nia, lo leng ve rawh. Khua a har lo ve deuh ang chu" ka lo ti a. Ka nau erawh an group sumtuakin a hnatlang daih a. 

"Lo len hi chu ka tumna rei tawh. Ka thulh leh zel a" a ti dam thlup a. 

"Ti nge? " ka lo ti deuh há a. 

Laih hmel deuh hian, "Ka zak a"a ti ta a. Ka nui hawk. A inhmeh lo lutuk a. 

Tichuan, thu ho mai mai sawiin kan titi ve bawrh bawrh a. Kei lah mi tawng duh tih takah ka tawng bawrh bawrh a, nuih ka lo duh ve bawk nen, kan hlim ve reuh tawp. Thingpui te ka lumsak, ka nau a lo haw hnu reivak lo ah a haw ve ta a. 

whatsappah kan inbe ve ta fo a. A nau ka ngaihsan deuh khan vawi khat a thil design thui turin min rawn ti lehnghal a.. Ka lawmzia kha.. Uluk theihtawpin ka lo thuisak a, ama hak tur a lo ni nghe nghe a. Ka inchhuang ru khawp mai. 

Kum khat zet khawpuia kan han awm takah chuan sum pawh ka thawk chhuak ve ta nual a, awm mai mai thiam lo tih takah puan ka thui loh karin eitur te siamin ka zuar kual leh thul. In luah man leh kan unau hman tur bakah ka nute pawh tlem a zawng ka thawn ta fo a. Bawihteii thawmhnaw tur pawh ka thawn hnem thawkhat viau mai. Ka ngai ve thin khawp. Ka nu rilru hi hriaiin ka inhre deuh, "Nula angin awm leh se pasal tha tak nei se" tih hi a duhdan niin ka hria. Mahse, kei chuan fa ka nei tih ka theihnghilh loh zat zet uire chhuahin ka chhuak tih pawh ka theihnghilh ngai lo. 

Mama nen chuan kan inbe ngawrh ta viau a. A past life te min hrilh ve thin. A lo vamduai ve hle tawh a lo nia. A bialnuin mi dang sâwn a pwmsan dan te a sawi chuan ka inpuang ve lek lek thin. Nuthlawi ka ni tawh a, fanu ka nei tih hi chu ka hrilh tawh. Kan inthen chhan erawh ka sawi ngai lo. 

Fur lai a ni a, ruah a tla fuap fuap a. Khaw lai pawh a diak a, chhuah peih chi pawh a ni lo. Ka nau lah kan khuaah thiltih eng emaw a awm vangin a haw daih si. Khua a har hle mai. Ka lo beisei ruk ang ngeiin mama a rawn lang ta hlawl a. Ka lawm ngei mai. 

A leng ve ta reng a, kan inkawm hian inngaihzawnna lam kan sawi ngai meuh lo, kan titi duhzawng a inang ve deuh a, kan titi a rual mai zawk a ni. Current a rawn thim a, ruah lah a tam tial tial bawk. Insi deuhthawin kan thu a. Thingpui a in a. Ka pasal nen kan inthen chhan min zawt ta a. 

Engmah zep awm lo vin ka hrilh ve ta vek mai. Ka thawl hawk nghe nghe. A chek tlak tlak a, "In pa chu a mawl hle mai. Hetiang khawpa hmeichhe tha a kaltir phal che nia" a ti sup a. 

"Ka tha tawk lo aniang. Tunah chuan nupui neih a tum niin ka hria" ka ti a. 

"A that chu nei daih rawh se. Ka zalèn sawt dawn anih chu" a ti leh a. 

"Eng nge awmzia? "

"I hre reng.. "

"Hria ila ka zawt nang che"

"Aw nupui nei lo va a la awm ve reng chuan, a rawn beisei leh che ang a, fate pa na na na chu tiin i lo hnar thei lo emaw te kha a ni anga, ka na dawn asin"

Ka va melh kâwk a. Min lo melh ve. Ka lai ngei mai. Ka kut a rawn vuan ta chat a. 

"Late, hei chen hi kan inbe ve tawh a, puitling ve ve kan ni tawh bawk a. Ka awmdanah i hai ka ring lo bawk. Nang pawh hian min iai hran lo vin ka hria.. Chuvang chuan inthup kual tawh lo mai teh ang"

Sawi tur ka hre lo. Zep nák emaw ka vei em em a, hmuh reng ka chak a, kan inbiakna te hi ka chhiar nawn zing thin.kar khatah vawi thum tal a lo lan loh chuan ka ippik vek tawh zel a, duhthusamin amah mitthla chungin ka muhil thin. Mipa tha leh fel, rilru kawi pu miah lo, hmeichhe zahthiam tak a ni a. Ka dinhmun leh nihna hre vek chungin min kawm serh lo va, khaw laiah min zui hreh hek lo. Khawsak dinhmunah ka phu lo lutuk tih hre tho mah ila, beisei zawng ka nei ve thin chiang alawm.. 

"Mam, ka hrethiam lo. Kei te chu a" ka ti niah niah a. 

"Khatianga inngaihtlawm der vel kha i inhmeh ve lo aw. Min duh ve reng kha" a ti ta mai. Ka nui tawp. Min rawn kuah zui zat a, kan infawp bawrh bawrh nghal. Kei lah kan pa tih loh mipa ka la fawp leh eih si lo, kan duhthawh dun ngar ngar hle mai. 

Ruah lah a sur cherh cherh bawk si, a romantic kual vel vek. Mahse, duhtawk hun a awm a ngai tih ka hria a. Ka insaseng ta a. 

Ruah sur banah a haw. Dar 3-ah! 

Ka khawvel chu a thar ta sur mai. Venthawn erawh ka la nei. Mama chhung te hi. Kei thingtlang nu akara nuthlawi lehnghal chu, min iai hian ka ring khawp mai a. A bulah phei chuan ka sawi duh hrih chuang lo. Buaina dangin min delh hrih lo se ka duh a ni. Ka nau pawh a lo haw, hrilh ngai lo vin mama nen kan inngaizawng tih a hre ve nghal. Tin, sawi tur a lo nei haw nual bawk. Ka awm loh a chin chu puia te chhung chu an lo buai ta hle aniawm e. In lama che tu ber ka awm ta si lo va, Mapuii lah a hma ang bawka lal hrawt kha a la tum tho si, ka nu a hah phah ta a. A âng a âng thin a niawm e. A ma tihdik loh hmasak ania, a chawh ka ti hle. Tin, puia pawh zu a in nasa em em a, tunah phei chuan nuthlawi zu zuar a luhkhung titih a niawm e. A pawi hle mai. Ka fanu chuan a pa chhungte lam atangin ngaihsakna a dawng vak lo, pawi ka ti lo. Min chuhpui ang tih te reu reu hi ania ka hlauh ni. 

Mama nen chuan harsatna nei lo vin kan la inkawp tluang ve zel a. A chhungte beng a thleng ta hial a. Mahse, eng he huah an ngai lo nge ka lo hlauhthawn ang kha a thleng ta tlat lo. Ka rin loh lam atang daihin buaina a lo thleng leh tawh. A mak hle mai. 

Ka pain min lo bia a, a aw khurh nasat danah a thinrim hle tih a lang, "Naktuk la laah rawn haw ang che. I nau kha chu hostelah kan dah mai ang. Nuamchen turin khatah khan kan awmtir lo che. Min va tizak em em ve, i lo uire tak tak anih dawn hi" a rawn ti ta zèk mai le.. Ka bing mup mup mai. A ngaihna ka hre lo. Ph a dah hmak bawk si. Ka nu ka be ta a. 

"I pa Chhunga khan i pa a lo bia a, in fanu hi ka rin ang a ni lo, hei a mualphothlak hle mai. Kan in hnuai an luah reng pawh hi ka remti tawh lo. Tlangval a khawi hut hut a, an riahchilh thul. A nau lahin engmah a sawi ngam si lo. Rawn hruai vat ru" a rawn ti a, i pa rilru a na teh asin" ka nuin a tih chuan ka rum hawk. Rapthlak ka va ti tak. 

Ka nau bulah ka sawi a, a ngaihna a hre bik lo hle mai. Ka thinrim thinthawk thut chu in chunga chhoh ka tum a, ka nauin min lo dang a. Kan inpawt nasa ngang mai. A mangangin Mama a call tawp. A lo kal rang ngei mai. 

Thil awmzia ka nauin a sawi chu a thinrim ve hmel hle. Chutah thil ngaihtuah niawm takin a ngawi vang vang a. 

"Umm ka hrethiam ta. Jenny thiltih vek a nih hi, min ngaizawng nasa alawm. " a ti ta a. Jenny chu Pa chhunga fanu, kan inchung nula a ni. Zan tirah a rawn kal ziah bawk, mama len chhung zawng thawm a nei a, a chang leh a rawn chhuk ve thul. Ka hrethiam ta vek mai. A va zak lo tak. 

Ka pa chu ka call leh ta a. Mama zawkin a bia. 

Aw dam thlapin thil nih dan a sawi ta dap dap a. Ka lung a lo phu nasa hle. 

A tukah kan insawn chhuak ta rum rum a, mama te in hnuai ber kan luah ta hmak. A vawtuin ek a cheh ta. Jenny chu a va chawh tak em.. 

(Ka hmanhmawh lutuk.. Ka type zo tep) 

Ka pa thin pawh a rim viau naa engmah kan sawi ta lo. Kan khuaa mas hmanga ka haw chu, Puia a rawn hrang ta hle mai. Zu seh vangin a lo hmel chhe ta hle bawk. A lehlam zawng tak chuan a chhungte buma a awm vang khan ka khawngaih letling. Mawl lutuk hi chu a pawi a ni. Mapuii lah a rai thei lo nge a thau mum kung reng ringawt a. An inngeih lo tan hle an ti bawk. 

"Late, ka rin aiin thil a kalsual a, thil ka lo tisual nasa hle a ni. Min ngaihdam theih chuan ka lawm ngawt ang. Pawi ka ti lutuk" a ti a. Ka pasal hlui chuan. 

"Ka ngaidam che alawm.. Chuan, nakkum march thla hian pasal ka nei dawn a. I rawn tel ve ang chu" ka ti a. A hmela tawrhna nasa tak chu en rei duh lo vin ka kalsan ta a. 

Pasal ka neih dawn chuan bawihteii an rawn chuh ta chat a. Kan buai ta deuh. Mahse, ka huaisen ve tawh bawk a, nasa takin min beilet ngam ta bik lo. Ka pasal tur mama hian ka fanu chu a pawm thlap mai si a. 

Kei aia vannei hmeichhia hi an awm leh kherin ka ring lo.. 

(Awiii nileng hun ka nei emaw ka tia, sei deuha ziah ka tum ania.. Hei buaina a awm leh tlat. Khawngaih mittui tla zawih zawihin min lo hrethiam hram ru aw.. Ka hmangaih che u tih erawh in hriat kha..