ka roommate - last

KA ROOMMATE (Last) 

Ziaktu: Toni Râlte

Ka rak tuar tuar a, Mi dang ho an rawn lang vat. Asangi pawh chu a rawn tho ve a. Mak a tih hmel hle. 

"Eng nge.. Rempui, i tha em? " U Muani chuan a ti dat dat a. Ka khur nasa lutuk chu min chelh bet bawk. Ka ţap ta tawp. Ka awmdan nge dik lo, Asangi pawh ka hrethiam tawh lo a ni. Mamgan hmel deuha Asangi'n min lo en reng chu ka va melh a, "I dik lo nge ka dik lo.. Engmah ka hrethiam tawh lo" ka ti mawlh mawlh a. Keimah pawh chu ka ni hûih mai. Roomah kan lut a, khumah ka thu hnawk. An zawhna zozai chu engtin nge ka chhan ang aw tih ka ngaihtuah, Asangi han puh fo lah chu dikin ka hre si lo. Amah lah a mangang leh hrilhhai ber berah a tang bawk si. 

"Aa.. Thil ka hmuh sual a.. Ka dawih zo vek tawh sia. Chuvang a ni e" ka ti ta ringawt. An awih loh hmel hlawm ngei mai. Awih lo mai mai teh se a. Min ţinsan hnuah Asangi nen chauh kan awm ta a. Ka hlauhthawnna erawh a la kiang tak tak lo. 

"Rempui, eng nge i hmuh? Dik takin min han chhang teh. Kei pawn engmah ka zep ngai loh kha" a ti ta a. Kei pawh chuan zawi te tein ka thil hmuh chu ka hrilh ta a. Rapthlak a tih ve hmel hle. 

"Ka va hrethiam lo em.. Ka mu char char bawk sia.. Ka damlai thla a niang a" a ti ve a. 

Ka ngawi reng. Chumi zan chu ka tlaivar ta nge nge a. Thim a kiana khua a var hi chuan hlauhna te pawh an bo ve thin. Kei pawh lu rit burin class kal turin ka chhuak leh ta poh a. Zan ka huphurh ngei mai. Nilengin ka mood a chhia a ni mai e. A ngaite bawkin zan hun pawh a rawn inher chhuak leh ta a. Roomah ka tawm char char, ka zun a chhuak tawngkhawng tawh si, "Asang, zung ang" ka ti ta tawp a. Ka awmdan hrethiam takin a tho nalh. Sawmtea nen an inkawm atang khan ani chu a muang sârh mai ni hian ka hria a, ka thik lek lek hial. Amah vangin kei hlauhlawpin ka awm fo tho si. Bathroomah pawh a rawn lut ve zel a, a zung ve nghal law law bawk. Kan zung zo kawngka ka hawng tur chu pawn lamah a inkalh ta tlat! Kan sawi vak vak a, a nghet kher mai. Phone kan keng lut bawk si lo va, Room hnai ber ami Hriati chu kan ko ta vak vak a. Ani pawn min lo chhawn ve vat. A rawn hawng nge a ri rak a,kan hawng thei ta. Huiham.. A tu chuan nge maw lo kalh phiangsen ni. Ka zawt kual peih vel lo. Kan mu tur chu, "I hlauh viau chuan khum kan dawhzawm mai dawn mi? " a ti a. 

"Ngai lo, ka hlau lo" ka ti ve tlat. Zep thu a cheng lo, Lesbian nena khum khata mut dun chu ka ngam mang lo a ni zawk. Kan mu ta a. Zan hmasa ka tlaivar chian em vangin phone pawh khawih zui tawh loin ka maimichhing nghal a. Ka muhil zui ve mai. Mahse, ka chhip sam hi a rawn pawt sawk mai! Ka va harh chiang tak. Ka mutna chung lam ka melh nghal vat. Tumah an awm lo. Asangi ka va en. Lehlam hawiin a lo mu. Ka sam chu ka siamtha a, mutchhuak la cham bang nen ka chhing zui leh a. 

Asangi mutna lam bang ri dawt dawt avangin ka harh leh hlawl. Ka va hawiphei a, Kareii! Asangi chu a lo awm ingeuh nasa ngang mai. Ka sawi thiam dan ber chuan a taksa pum chu na chhuak vek se, a eng ber nge na tih pawh hriat loh khawpa taksa siam danglam ang hi a ni mai. Ka tho vat a, hlauhna reng ka nei lo. "Asang, i tha em? Engtin nge i awm? " ka ti vat vat. Ka banah nghet zetin a rawn vuan a. Min rawn melh chho vah a, a rapawm lek lek. Aw hniam thawp sùt hian, "Min kalsan rawh. Hetiang hi nih ve i duh loh chuan" a ti a. Ka hrethiam lo. Thawm pawh ka dim peih tawh lo, "Ka kalsan dawn lo che. I awmdan hi a dik lo, na i nei em ni? " ka ti sawk sawk a. A eu leh zawk zawk thin. 

"Amah a ni.. Tlingi… min nghaisa mek a nih hi" a ti hrâwk a. Chhuatah a let thla tawp. Bawkvakin kan room zimte chu a kal hual ta a. Ruati ten kawngka an rawn kik.. Asangi chuan zaizir hian hawng lo turin min rawn khap. Ka hlau ta deuh. A khumah ka ding khawng reng ringawt. A eu vak a, a thaw hlawi hlawi bawk. Chhuatah mu lehin a ke chu a khawng ngat ngat a, a lu lam chu a khur ngawt ngawt bawk. A hmelhmai siam danglam lo mah se, a awm dan chu rapawm tak a ni. Ka rilruah thil pakhat chiah a awm. "A kawchhungah ramhuai a lut" tih hi. Ka ngaihtuah rualin kan room kawngka chu ka va hawng nghal rap. Thawm kan siam hak mai. Asangi awmdan an rawn hmuh ve takah chuan an tawlhhnung dial a. An ţi hru hlawm mai. Asangi chuan a sam a kek nget nget a, a meng pual tan ta bawk. Tawng a tum a, a hrawkah a ri bawrh bawrh mai. U Muani chuan upa bet chan chang takin, "Warden han ko vat ru.. Ti ru, living roomah zawn phei ang u" tiin min melh kual hlawm a. Kan che nghal sap sap. Asangi taksa chu a khawng nget ngawt hle. A tal buai hauh lo thung. Cushion phahin chhuatah kan mut a. A lo zau deuh tawh a, a tan thawk lak pawh a harsa lo deuh ang chu. Han sawngbawl vak dan kan hre si lo, Ruati chuan a chelh bet a, "Asang, kan tawngtai ang aw. Lo maimichhing ve la" a ti a. College naupang ho chu a hlawmin an ding thap, an hlau tih hai rual a ni lo. Warden pawh a rawn lang ta a. Tawngtaina chu kan nei ta. A tira ka lo rin ang chiah thil a thleng, kan tawngtai lai chuan Asangi chu a nui har har a, a lu chu a thle sawn sek bawk. A chang leh thut a tum a, kan nem mu leh zel thung. Kei phei chu ka tawngtai ve mang lo. 

"A dera nung ho tawngtaina chu chhanin a awm ngai lo. Bawlhhlawh ho" a rawn ti ta piap mai a. Mahse, tumah an chawl lo. Ruati phei chu tihtakzetin a tawngtai. Ramhuai leh Pathian inbeihna boruak uap zet ka vawi khat temna a ni a, ka awm thiam lo. Ka hlau a, mahse, kan tam tho nen.. Ka intihuai lui ve tawp. An tawngtai zo a, Asangi a danglam si lo. Amah hnaih berah ka thu a, ka hrawkah a rawn rek ta a. Ka lo inring hman teuh si lo. Mitmeng bial kulha min melh chung hian, "Nang mi tenawmnu vang hian kan duh ang kan tithei lo va.. Vawi tam chhuahsan tur chein kan hrilh che a. I awih duh lo vei a. Tunah chuan kan ta hi kan la tawh dawn" a ti ta chher chher mai. Asangi aw phawi tel mah se, a aw chu mi dang aw nen a inpawlh tlata hriatna ka nei. Mi dangho chuan a kut chu lakthlak an lo tum a, kei erawh ka tal thei lo, min rehna chu a na lutuk tlat. An pawhthlaksak thei hram.. Ka uak nghal tuarh mai. Ka khuh bawrh bawrh bawk. Warden chuan, "A dik dawn hauh lo. Pu te kan bia ang e' tih leh chhoh a rual a. Phone a lo keng bik lo a niang. Amah hnaiha chelhtu te kut a thing per zel si a, tumah pawh chuan, kan hnaih tha ngam tawh lo. A hmel a rapawm sâwt bawk si. Kan hostel neitu Pu Malsawma leh an mikhualpa an rawn lang ta hlawl a. Asangi chu a rum nghat. Pu Malsawma hi an kohhranah rawngbawltu a ni a, hetia en mai chuan pa hruanghrau na tak, thinchhe hlek hluk deuh leh zu heh hmel zet a ni. Mahse, a hrechiangte tan chuan pa hlu tawpkhawk, mi dang khawngaihna ngah leh thilphal tak a ni thung. Asangi bulah chuan a thingthi nghal zat a. A mikhualpa pawn a zawm ve zat. 

"Asangi i ni lo. Tu nge i nih? " vin angreng tak hian Pu Sawma chuan a ti a. 

A hmui a petsawi a. Nui rah rah chungin, "Tu nge ka nih chuan ang? Keimah Asangi ka ni. Pua, i hostel hi ka tan a zim lua a ni.. Ka thiante an leng ve lo" a ti fak fak a. 

"Tu te nge i thiante chu? " 

"An tam mai. Tunah pawh i bul maiah khan a thu.. Heti hian ti ang. Min tibuai loin room min pe u la, ka tibuai bik lo vang che u" a ti a. 

"Hei min tibuai chu a ni tawh reng alawm.. Mi dang tibuai lo mah la, Asangi nun intibuai a ni. A nun ngai kha pe let rawh u.. " a ti fiak thak. 

Chutia a tih pah chuan Asangi sam tla hnuang chu a va huih kiansak a. A lo thle sawn rang kher mai. 

"Chhuahsan rawh u. Isua hmingin thu ka pe a che u" Pu Sawma chuan a ti leh khap a. Asangi chu a tal ta phut.. Mahse, mikhualpa khan a lo man bet vat, khuma a awm ang khan a taksa chu a ingeuh leh tan ta a. Naupang lam phei chuan an mit an hup tawp. An hmu chak ve tho bawk si. Asangi chu a inthlep kual ka ti mai. Mahse, Pu Sawma chuan a pawm bet a, mikhualpa khan a lo pui vat. 

"Chhuak rawh u. Ramhuai bawlhhlawh ho.. Chhuahsan vat rawh u.. Asangi hi Isua ta, Isua fanu a nih hi" a ti khawl khawl a. Asangi chu a zawi ta hnawk mai. A meng mang lo.. A chauh hmel ngawih ngawih. Pu Sawma te chuan an zawn phei a, roomah a khumah an mut ta a. Tui te an intir bawk. 

"Ka hria.. Ka hre vek a ni. Ka duh lo, ka duh lo va.. Ka hnar a. Mahse.. Ka chak tawk lo a ni.. Phuba la turin an rawn thawk a nih kha.. An kal bo hlen lo vang" chau zet hian a ti tham chhal a. Pu sawma chuan a lo thlamuan vat.. 

"Ka muhil chak" a ti zawi raih a. A muhil zui ta a niang. Kei erawh kan roomah ka mu ngam dawn miah lo mai. Mahse, Asangi han riah chhuahsan chu niin ka hre si lo, ka rilru buaizia hriain Ruati chuan, "Ka lo riahpui ang che" a ti ta hlauh a. Kan mut meuh chuan dar 3 a ri thuak tawh. Ka va chau êm.. 

A tuk chawlh a ni hlauh zawk a. Nileng deuhthawin ka mu a ni mai e. Ka phu leh zawk zawk thin. Asangi erawh Pu Malsawma khan ama thu ngatin Mizoram Evangelist tha ber pawla an sawi bulah a hruai ta a. Eng nge an va an ka la hre lo. Chawhnu dar 3 a ri thuak tawh a. Ka mu pawh ka mu nghet tawh mang lo. Ka mut reng laiin Room kawngka inkhar vek siin hman zana mumanga ka hmuh Tlingi nei ngeia ka hriat kha a rawn lut ta a. Ka khum luah dingin min melh ngawt ngawt mai. Hlauhna leh zâmnain ka khat a, thawh daiha chhuahsan la tum lahin ka che thei si lo. Tlingi ti tawh mai ang, chu lah chu kal bo mai tum hmel a pu si lo. Ka mumang a nih hi tiin ka inhnem a. 

"I mumang a ni lo" a rawn ti ta mai! Inperh tho zawk tur ka nih laiin ka khawng vek. Amah chu ka en lo thei si lo. A hmel landan chu a dang tial tial a, a sam chu a bawrchhawr telh telh bawk.. A hmai ngo ve tak kha a dang da bei a, a duk tlek tluk bawk, a hmui pawh chu a dum duk tlat. Ka sawi thiam danin mitthi tawh hmel a pu.. A nui ta a. A ha lah chu a eng ţhut mai bawk si.. A nuih rual chuan thil rimchhe lutuk, a uiha uih pingling hi a rwn nam chhuak ta a. 

"Awii a va uih ee.. Eng rim nge le.. Sazu thi a awm aniang," Room lehlama awm ten an tih sap sap ri pawh ka hre thei.. A nih chuan kei hi ka muhil lo tihna em ni? Tlingi chu Asangi khumah a thu a, thawh ka tum leh ngat, ka thei chuang lo. 

'Tum buai duh suh" a rawn ti lehnghal. Room lah chu a pum uih tawh. Mitthi uih rim chiah chiah a ni. 

"Asangi hi ka ta a ni.. Tuman an chhanchhuak lo vang" a ti leh a. 

Kei erawh ka hlauhna a bo tan ta thung. Ramhuai ka hmachhawn tih ka hria.. Pathian neitu ka ni a, min awmpui dawn bawk. 

"Kalsan zawk rawh u. Tihtheih in nei lo ve. Pathian ta a nih hi" tiin ka chhang a. Ka tawng zawh rualin Room lehlama awm Dingi te chuan, "U Rempui… tu nge i biak? " an rawn ti lang lang. Keimahin ka awm tih an hre ve tho sia. 

Ka ngawih leh daih avangin, "A tawngvai a niang.. " an tih sap sap ka hre zui nghal. Tlingi chuan huat hmel zetin min rawn melh a, a kut ţawih tan mek duk vek chu a rawn phar chhuak a, chu erawh ka hlau! Ka îp chawih chawih mai. 

"Kal bo rawh" ka ti tuar a. Kan room kawngka an rawn kik ta. Tlingi chu hmuh tur reng a awm leh tawh lo. Kei pawh ka tho leh thei.. Kawngka ka va hawn chuan, Asangi a lo ding vang a. A hmel chu a zangkhai vah mai. 

"I lo tha em? " a ti zawmah a. Ka chhang lo. Ka bu ringawt. Rimchhia engmah a awm tawh lo. Engkim chu a pangngai vek. Ka thlan chhia erawh ka hnungzangah a luang thla raih raih thung. 

"Enteh, Rempui, vawiin chu ka vannei lutuk.. A ropui a ni tawp mai. Thutlukna ka siam a. I hre ve duh em? " Zangkhai takin Asangi chuan a ti a. 

"Sawi teh" ka lo ti. 

"Ih.. Pasal nei lova ka damchhunga Pathian rawngbawl turin ka inpe a.. " a ti ta a. Ka va melh kâwk.. A hlim nasa mai si. 

"Ngati nge? " ka ti ringawt. 

"Aa.. Pasal nei chi ka ni lo alawm. Ka piangsual miau si a. Mi tu emaw thinlung ka fiam duh tawh lo. Keimah hian ka nihna ka pawm tawh a, keimah bawkin ka tuar mai ang. " a ti nghet charh. 

"Mahse, Pathian nen chuan hneh theih loh a awm lo asin.. Engtin nge Pathian rawng chu bawl i tum? " ka ti a. 

"Keimah anga nun thuruk nei, chhungril kawrawng, mi dang bula inbunruah rem si lo te chhanchhuaka Pathian hnen thleng tur hian theihtawp ka chhuah dawn a ni" tumruh tih hriat zet hian a ti ta a. 

"Mahse, rawn lang leh ta se.. Zan hi ka huphurh ngawih ngawih zel asin kei chu" ka lo ti tawp. Ka sawi dik a ni. 

Min rawn melh a, a nui saih, "Ka awm tawh alawm.. Keimah alawm min beih dawn. Keimahah Isua Krista a nung tawh a. Ka hneh tawh ngei ang" a ti a. Ka lo thaw ve huai ringawt. 

Zanriah kan ei a. Ka ei tam lo. Asangi danglam ta chu ka lawmpui rualin zana indona rapthlak tak awm tura ka ngaihna chuan ka rilru a hruai peng nasa lutuk tlat. Chhunah lah ka mu hnem mai sia. Dar 10ah pawh story ka la chhiar. Asangi chuan Bible a chhiar thung. 

. "Rempui, ka mu dawn.. Nang pawh i mit kha dim rawh" a ti a. A intifai a. A mu nghal.. Kei pawh men reng bik chu nuam ka tih loh vangin ka va intifai ve a. Ka mu ve nghal. 

Min delhtu chu a rit lu deuh a ni. Hlauthawng takin ka meng a, ka au chhuak tur chu a kutin ka hmui a rawn hup chat. A nui ţhâw bawk. 

"Sshh,.. An harh ang e.. Ngawi reng khan awm rawh" ka beng bulah a ti sur sur a. A chakzia lah chu a rapthlak zawk. Ka thaw a hah titih.. Ka hlauthawng leh hamhaih lutuk chu ka mang vek.. Min kuai thu lawp a, min hneh kher mai. 

A khumah min nawr phei ţawk a, ka petawk nawk nawk.. Mahse, ring zetin, "Ruatiii… min pui r'uuuu" tiin ka au ţial ruan hman. Ka lu a hit zawk.. A thim ta vek mai. 

Ka harh leh chuan ka awmna chu ka hai thelh a. Mahse, damdawiin a ni tih ka hre zui leh nghal. 

"I lo harh tawh maw? Awii ka van lawm" Ruati aw ka hre zui a, nui sang in min rawn en. U muani leh warden pawh ka hmu. 

"Khaw nge Asangi? " ka ti nghal chawt. 

U muani chuan zawi sap hian, "A bo! Tuman khaw nge a kal kan hre lo" a rawn ti a. Ka chhing sawk. 

Nilengin Ruati'n min awmpui.. Ka va lawm em. Ka chhungte pawh chanchin ka hrilh ta lo law law.. Min ngaihtuah dawn lutuk, Doctorin naktuka ka chhuah theih tur thu a sawi tho bawk a. Ruati atangin zana thil thlenh chu ka hre thei ta. Khatia ka au vak kha a lo hria a, mi dang pawh an harh. Kan rooma rawn luh an tum a, kawngka a inkalh si. Asangi inhrosa thawm leh nui hawk hawk te, a changa a ţap te an hre leh thin a. Mangang takin an lo awm a ni awm e. A tawpah tihngaihna awm hek lo, kawngka chu an nek ta vak a, a chhe ta a. Mahse, Asangi hmel reng hmuh tur a awm tawh lo. Kei chu chhuatah ka lo mu a, ka bek dinglam a lo kak bawk. Ka kawr hak lai a lo tet hnuang a, kekawr erawh ka la ha ve.. A rang arngin Damdawiinah min kalpui ta a ni awm e. 

Hlauthawng zetin, "Ruat, ka duh thei lo. Asangi khan min khawih ang em? " ka ti tham ţiak a. Ka ţap pur bawk. 

"Khawih lo.. Doctor kan zawt alawm.. I him vek e" a tih chuan ka thaw hawk mai. Kan awmdan leh huntawn teh nuaih avang chuan ka chau a. Ka zawi ngawih ngawih. Rilru fim pawh ka hmang thei lo. 

Zanah Ruati chu riahpui ka ngai lo ka tih ve tlat avangin a haw ta a. Damlo dang karah khawhar takin ka mu ve ta reng mai. Nurse lo kal veleh hlauhthawnnaa ka khahzia leh mut duhna min pe mai turin ka lo ngen tawp a. Nui sang chungin, "Kan hria alawm.. Doctor pawn pe tur chein min ti e" a ti a. Min jection zui nghal. Ka vai ruai a, ka chhing ta diar diar mai. 

"Rempui, min ngaidam ang che. Ka tanna khuarkhurum atang hian ka chhuak thei ngai dawn lo a nih hi.. Keimah ka ni lo. Keimaha tu emaw hi ka hneh zo ngang lo a ni. Dam takin le.. " tia ka beng bula phun sep sep thawm avang chuan ka meng kâwk a. Ka hawi nghal ruai.. Ka ep chiah kawngkapui darthlalang atanga mit sen râm pahnih min lo melh rengtu ka va hmuh chuan, boruak chu a vawt sung sung mai.. 

(A tawp aw..)