Ka roommate - 3/

KA ROOMMATE (3)

Ziaktu: Toni Râlte

U Muani chuan, "Asang, lut ang u. Ti nge hetia i awm? " a ti a. Naupang deuhte chuan an hlau deuh nge an rawn kal hnai ngam meuh lo. 

Asangi chu a tho nalh a, tuma chelh hman rual lohin room lam a pan nal nal. Room khata mut dun a huphurhawm ta riau mai. Ruati pawh chuan, "Lo riak mai ta che. " a ti nghe nghe. Mahse, he thil hi a tawp thleng hmachhawn ka duh ve tlat! Min tihhlum êm chu ka ring lo. Thinthia mut erawh a harsa khawp ang le. Thil awmdan pawh tumah ka hrilh ta rih lo. Naktuk lamah warden te nen sawiho chi niin ka hria, Asangi hi Doctor panpui tawp chi a ni. Hetiang chuan mi â ang tak takin a khawsa dawn. A chanchin min hrilh zawng zawngte kha dawt a nih loh chuan a nun a khawngaihthlak ka ti tlat! Ni e, Pathianin mihringte min siam a, mipa leh hmeichhiaah min siam a ni. Kan anpui kawp tura min siam miah loh laiin, mihring piang vanduai hi an awm thei tlat si a ni. He lamah hian ka liberal phian a! A dik lo tih hre mah ila; va hriatthiampuina chin ka nei thung a. Tumah va deusawha va diriam kha ţul berin ka hre lo. Mahse, thenkhat hi chu intihhmuh te pawh an ni ve tho chuan a lang. Mizo ten kan hriatthiam vak loh chuan Bisexual zawk hi niin a lang. Patil kan tih mai hian kha hmeichhia kha va pa deuh thûng tura ngaihna kan nei sa a, mahse, tun laiah chuan nu zim zêm pawh an anpui te nen sex hmanga climax thleng, mipa mamawh miah lo hi an kuh ţûn mai. Mipa pawh kawp thei tho an ni nain, an hmeichhiatpui ten an tilawm zawk fo nia!  

Ka'n mu ren rawn a. Mut erawh a va chhuak lo èm. Asangi chuan lehlam a hawi a, a muhil bikin ka ring lo. Ka ţawngţai mawlh mawlh reng a; ramhuai kaihhnawih thil ni lo mah se; zep loh chuan a rau lam hi ngainat a har ve riau a. A ngaihruatna hmanga a kawm thin a thian chu Tlingi a ni ngei mai a! A nih chuan Tlingi chu a thi tawh em ni ang? Amah Tlingi hi hriain an awmna te hre ve ila chhui dan zawng a awm mawle.. Ka lo muhil ve sek a niang, thawh ka hai phah. Chaw pawh ei loin class ka kal ta mai. Nilengin Asangi bak ka rilruah thil dang a leng thei lo. Kan ban chuan Asangi a lo la haw lo va, ka ngaihtuahnaah eng emaw a rawn lut zawk. Mahse, tihchi ni berin ka hre si lo. Asangi lehkhabu vel chu ka en chak tlat! Diary te a ziak ve thin a ngem ka hre lo a, ziak thin se chhiarsak ta ila.. Tih lam a ni. Mahse, ka ngam ta ngang lo. Ka inbual hlanin a lo haw ve aniang, ka inbual zawh chuan a lo thu a. Min melh lo. 

"I tha em? " ka ti a. 

Min chhan pawh ka rin loh nen, "Ka tha.. " a ti hul hak a. 

"Nizan kha ka tihpalh aw.. Tlingi kha engtin nge a awm? " ka ti ta law law a. 

"Ka hre lo.. Nilengin kan la inbe lo" a ti ta zel a. Tâwt up up hmel a pu, insawithawlna tur a mamawh niin ka hria. Mahse, a va inbual a. Ka ril a tam tawh sia, chaw ka zuk eisan daih. Ka eikhamah Warden ka han tlawh ta a. Min lo kawm a tum hrim hrim a lo nia. Nizan lama thil thlengte chu ka sawi ta vek a, a chal a chuar leh nang nang thin a. Mak a ti ve hle tih a hmelah a lang reng mai. 

"A buaithlak e. Han hnawhchhuah chi ngawt lah a ni si lo. Eng pawi mah a khawih si lo. Lehlamah a khawngaihthlak letling.. Engtia han tih chi nge ni ang le" a ti a. 

"Tun sundayah hian Evangelist Sawmtea te team kha hun min hmanpui turin sawm la, Sawmtea kha kawmtir tawp ila" ka ti a. Doctor panpui chu a duh dawn si lo va, a huphurhawm ve em a ni. 

"Nia, lo sawm ka lo tum sa reng reng a, mahse, ramhuai kaihhnawih ni pawn ka hre lo, a mental lam a ni zawk lo maw? " a ti a. 

"Niin ka hria.. Mahse, Doctor a rawn duh rih dawn si lo va. Kawm phawt se, Pathian atang chuan tihtheih loh a awm chuang hleinem" ka ti a. 

"Nang pawh fimkhur rawh. Chutianga a vau phei che chuan.. Kei chu mi râp deuh a, ka kawm vak ngam lo. I huai ka ti ngawt mai" a ti a. 

Ka nui ringawt. "A nih Tlingi kha a chhuah hnu khan a chanchin i hre zui em? " ka ti ta a. 

A hmui a tisawi a, "Ka hre zui chiah lo. Hostel dangah a insawn ni maiah ka ngai a.. " a ti a. 

"A chhuah chhan i hria em? A sawi em?"

"A chhungten haw tura an tih thu a sawi a, mahse, kan hostel neitu te bulah chuan hostel danga insawn a tum thu a sawi thung" a ti a. 

"Asangi nunah hian pawimawhna lian tak a nei a ni. Ngaihtuah la, an awmdun chhung khan khami Tlingi ruih zan bak kha buaina an nei ngai em? Han inhêk ang te" ka ti ta duah a. 

A lu a thing nar nar a, "Nei miah lo. An block ami thenkhat phei chuan an inngaizawng aniang an ti hial zawk. Khum te kha an dawhzawm a, roomah an tawm dun ngar ngar mai zel" a ti a. Ka rindan sa a ni chiah. Tlingi nen khan inlaichinna an neih loh chuan, he Tlingi hian tun thlengin a rilru a tibuai lo vang. 

Ka zu chhuk chuan lehkhabu a lo chhiar leh a. 

"Lehkhabu chhiar hi i peih ve ngawt mai. Eng lehkhabu nge a? " tlangnel takin ka ti a. 

"Bible chu a ni lo" a lo ti zawi sap. Ka nuih a za deuh thut. 

"Asang, Min hua em? " ka ti a. 

"Hua che mah ila tihtheih a awm tawh hleinem..i chhuak duh bawk si lo va" a ti a. 

"Ka chhuah duh loh vangin em ni Tlingi chu a rawn kal duh tawh loh? " ka ti ta hmiah a. A lehkhabu ken lai a khup thawk. Mitmeng hriatthiam harsa zeta min melhin, " Ka hre lo. Keimah pawh hi min hua niin ka hria" a ti ta a. Nizana min huatna mitmeng kha hmuh tur a awm tawh lo. Chu chuan min tingampa aniang chu, "Nimin lama i sawi bak kha sawi chhunzawm leh la.. Inpuih dan a awm maithei asin" ka ti ta tawp a. A heh a pet fân a. Namnul deuh hian, "A tha alawm.. " a ti nghat a. Khumah a thu phei, ka va thu ve nghal. Kan inhmachhawn leh ta ran mai. 

"Aizawla khatia ka awm hnu khan ka nun pawh a pangngai chho ve viau tawh a. Mipa ngei ngaihzawna pasal lam te pawh melh ve tan ka tum.. Ka tum ve tak tak a ni. Ka thawhpui pakhat hian min bem ta reng a. A hmeltja lo naa, a felin mipa diktak zia a pu a. Ka ngaina kei pawn. Risk lain ka nihpui ta a. Amaha in luah a ni bawk a, a bula insawn ve mai turin min sawm ta reng a, fees chawi ngai lo va awm theihna chu tiin kei pawn ka hnial ta lo va, ka insawn lut ta a ni. Kan hlim dun ve thin lutuk, Tlingi rawn lan hma chuan. Amah ka bialpa chu Lawma a ni a, Thingtlang atanga awm ve tho niin mahse, a fingfelin a awmna vengah pawh thiantha a nei nual mai. Nupa ang deuha kan awm chu pawi a ti bik lo nge, kei pawn ka pawisa ta lo va. Mahse, nau ka pai ang tih ka hlauh vangin indanna ka ei thin. Min hriatpui vek tho. Thla 3 kan awm dun hman, mahse, khang thla 3 chhung khan ka hmeichhe kawp te atanga nawmna ka dawn ang kha vawkhatmah ka dawng lo. Ka hrethiam lo zawk nge phei chu ka hre lo. Ka tum ve nasa a, porn site te hi ka lut ngun. Ka piansual rukna chu tihbo theih a nih beiseiin theihtawp ka chhuah. Amah Lawma pawh zei lo a ni lo, ka harsat rukna hre lo mah se; min tihlawm tumin theihtawp a chhuah thin. Mahse, Fake climax bak ka thlenpui ngai lo. Hrehawm a ti ang tih ka hlauh vangin lem ka chang mai mai chauh. Ka nun chhungril khua a har a, sex ka tem ve tingtang si, a nawmna pawh pha miah lo va chutia mipa pakhat tana inpumpek chu a ho riaua hriatna ka nei thin. Mahse, mi dang ka kawpsan duh chuang lo. 

Tlai khat chu Lawma hian hmeichhe pahnih a rawn hruai haw a. "Ka thiante an nih hi.. Chaw eiah ka sawm a. Hei chawhmeh pawh" a ti a. Mi thikthu chhia ka ni thin naa, Lawma lakah ka thikthu a chhe ngai meuh lo. A thiante pahnih chu kei pawn ka lo welcome ve vat a. Pakhat chu Ropuii a nia, pakhat chu Tlingi a ni. Tlingi chu a hleitlingin a pian a nalh a, a sam sei hle bawk. A hmel pawh a tha. Tin, Ropuii ai chuan ka nel zawk bawk. Vawikhat inhmuhma mah se, kan inkawm nghal bawrh bawrh a. Lawma an chhaih reng bawk. Tlingi chu dawrah a thawk a, Ropuii erawh zirlai a la ni thung. Hlim takin zanriah chu kan ei a. Zanriah ei hmain zu an in a. Lawma hian lem ve hlak a ching thin, ka hau ngai lo. Kei erawh college-a ka nun chhia kha kalsan ka duh tawh em a. Zu pawh ka hnar hram zel a ni. Tlingi te pawh chuan an in ve a. Rui khawpin an in lem lo. Mahse, chaw ei khamah an in leh a. Chu erawh an kai ta riau mai. Ropuii chu a haw ngam ta lo va, Chuvang chuan Tlingi pawh chu a haw ta bik lo. Chhuatah mutna ka siamsak a. An mu dun ta a. Keini pawh kan mu zui. Lawma a chatthla a, ka harh kar thung. Ka rilruah Tlingi chu a awm ta tlat mai a! Ka hrethiam lo, ka ngaihtuah ngut ngut a ni mai. Ka va tho ta tawp a, Ropuii chu a lo hnar suk suk mai. Tlingi erawh phone a lo khawih a. 

"I va mengrei ve" ka ti a. 

"Nia, ka mutchhuak thei tlat lo" a ti ve mai a. Ka va zung a. Tlingi chu ka ít ni maiin ka hria..chhungrilah min nawr et et tu a awm si a.. Kan pindana let leh ta mai lo chuan, "Ka lo mu ve aw.. Lawma a hnar ring lutuk a" tih pahin ka inthawlh lut ta hmiah mai a. Mak ti awmin a awm miah lo. A phone a dah a, insi rialin kan mu ta a. Ka insum zo ta ngang lo va, ka kuah a, ka fawp ta tawp mai! Mak takin mak ti awm leh hamhaih angin a awm chhin eih lo. Min lo chhanglet ve nghal hmiah bawk. Ka ngampa chho ta zel a. Mi pahnihte lah an chatthla hmak bawk si. Mitmei ven tur awm ta lo chu kan inphelh ruak ta vek a. Thla 3 chhung ka tuihalna chu Tlingi chungah ka hrithla ta a ni. A vawikhatna a ni lo tih ka chiang viau bawk. 

Kha mi hun atang khan Tlingi nen chuan inzawmna thuk tak kan nei ta a. Kan ina a rawn riah chu a tam zawk awm e. Lawma lahin min ringhlel ngai der si lo. Kan cher dun kâwk kâwk hial reng a. Induh thu leh inngaih thu kan infah chiam ngai lo, a takin kan lantir tawp mai zel. Chutiang taka inkawp nghet ta chu Lawma nen kan inlaichinna pawh chhut chah ka duh ta a. Kawp reng kha ka thei bik lo a ni. Thinrimna ka zawng fo a, thik tur te ka dap kual bawk. Ani lah a zaidam si.. Mahse, zan khat chu Tlingi nen kan awm dan a hmu ta a. Hmu se ka duh em em hran lo naa, a hmu kha lawm lohna ka nei lo. A thinrim a, min ten hle bawk. Min tawngkhumna te chu ngawi rengin ka dawngsawng a. Min hnawtchhuak zui bawk nen., a zan la lain ka inla chhuak a, Tlingi te hostelah ka insawn lut ve ta nghal a. Lawma chanchin chu ka hre zui ta lo. 

Tlingi te hostel chu ei a chhiat bakah room a zim em em a, hostel dang kan zawng ta a. Tuna kan awmna hi ka hmu ta a. Ka insawn lut hmasa a, ani pawh fees vel an tihfel hnu lawkah a rawn insuan lut ve ta bwk. Kan pahnih khawvel chu chimbuaitu nei miah loin kan chen dun ta a ni. Kan inhau ngai lo va, engmah thuruk kan nei ngai hek lo. Miin min hre mah se, pawi tihna kan nei lo. Mahse, Tlingi chuan zu la in zeuh zeuh a ching a. Ka haw si. Zu a in pawn ka bulah bak in lo se ka duh. Mahse, zan khat chu a rui sual ta a. Ka thawhpuinu Remi a thik kual a, kut te hial a thawh chho ta a ni. Ruati te pawn hei chu an hre vek ang. Min an khum a, min kek a, ka dawh char char. Mahse, kei zu a in reng ka lo ngei sa ve deuh nen ka tuar ta lo va, ka nam thlu ta a. Khum tlangah a tukhum a tauh kak a, a thi nasa ta mai. A zan la lain damdawiinah kan hruai ta a, an lo thuisak a. Ka inthiam lo lutuk. Mahse, ka insum zo ta bik lo a ni. A dam hnua a rawn luh leh chuan boruak chhia em em a awm zui lo. Mahse, a hmaa kan inlaichinna ang kha chu kan pha ta lo. Mut pawh kan mu dun ta lo va, ka ngaiin ka thlahlel tho si, engahmah min ngai lo niawm taka hmeichhe dang bula a va riak chhuak thinte chu thinlung na em emin ka lo nghak thin. Kan dik thei ta ngang si lo va, amah zawk chuan chhuah a tum ta a. Khami tum pawn ka chelh nasa, mahse, "Ser kan insiamsak tawh a. A rem tawh lo" a ti tlat si a. A chhuak lui ta a ni. Ka chhui kal reng a, an khuaah a haw lo va, A thiannu in luah a fin tih ka hre zui ta a. Ka tliak hnawp a ni ber. A thiannu nena an khawsak dan tur ka mitthla chang phei chuan ka puakkeh lek lek hial zel. Ka mizia leh nungchang pawh ka hloh ta tial tial a. Tlingi bak ka rilruah an awm thei ta lo. Kan hnathawhnaah pawh min be tawng zo ngai ta meuh lo va, ka awmdan chu a dik lo tih ka hria. Mahse, ka sim thei lo, ka ngaihtuahna ka kawm a, ka suangtuahna hmangin Tlingi bulah ka awm thin. 

Tlingi'n min chhuahsan atanga thla chanve velah chuan zan khat ka mut dawna ka va intleng leh zawk rooma ka lut chu ka khumah Tlingi ngei mai chu a lo thu khar mai. Ka tawng tur chu zaizirin min khap vat. Mak ka ti em a, ka hamhaih bawk. A lo let leh taah ngaiin ka lawm bawk si. Ka inthlak zawh veleh min kai a, Bathroomah min luhpui ta a. 

"I tan ka lo let leh a ni.. Tun atang chuan kan inthen tawh lo vang' a ti a. Ka hlim lutuk chu ka tap titih hial mai. Ka kuah chawt a. Ani pawn min thlahlel tih hriat zetin min lo kuah ve. 

"Mahse, khaw nge i bungrua te" ka tih chuan, "Heta ka lo lut leh tih hi khawiahmah sawi suh ang che. Zan tin i bula mu turin ka rawn kal thin ang. I hrethiam em? " a ti ta a. Ka lawm luatah engmah ka ngaihtuah thei si lo va, ka lo pawm hmiah hmiah tawp. Tichuan, chumi zan atang chuan Tlingi nen kan inzawm leh ta a. A sawi ang khan tumah ka hrilh lo, a rawn kal ru thinah ka ngaih vangin. Roommate ka nei ta zeuh zeuh a, mahse, ka awmdan maksak tak avangin tumah an awm rei thei lo. Chu chu kan duhthusam a ni tlat si a. Mi â angah mi dang hian min ngai tih ka hai lo. Pawi ka ti lo. Tlingi ka ta a nih chhung chuan. Mahse, Zan khat a rawn kal leh lai takin warden hi a rawn lut ta a. Bihrukna hman a awm tawh si lo. Ka hlauthawng kher mai. Mahse, mak tak maiin warden chuan Tlingi chu a hmu ve hauh lo! A chhuah hnu chuan Tlingi bulah mak ka tih thu ka sawi ta a. Ka ngaih pawh a tha lo tan ta. takin khawsa mah ila; thluak fim tlem azawng ka la nei ve miau a ni. Ka hmel lan dan a vangin Tlingi chuan harsa titakin he thu hi a sawi ta a ni. 

"Pawi ka ti lutuk, mahse, mi nung damlai angin ka awm ve thei tawh lo. Asang, kei hi ka thi tawh. Ka ngai em che a, ka kalsan thei si lo che a ni"a ti ta a. Ka keh vek a ni ber e. Thlarau nen kan lo inkawm thin a nih tak chu! Hlauhna ka nei lo naa, mak ka ti a, na ka ti bawk.. 

"Ngati nge i thih? Engvangin.. Ka uang lo a nia" tiin ka chhal mawlh mawlh a. Ngui zeta min melh hian, "Ka rawn tlawh hmasak ber zan che khan ka thlarau ka thlah tawh a ni. Bathroomah ka tlu a, min chhan hman ta lo a ni. Ni e, Ka chhuahsan hnu che khan zu ka in nasa a. Mumalin ka khawsa lo chho a, ka thiannu mang pawh ka tiang nasa thin. Ka bawraw telh telh a, ka taksa a chak lo telh telh bawk a. Bathroom ka lut kha ka luhai leh ka taksa chak lo lutuk ka tlu palh a. Ka lu ka sawh ta si a, ka nunna an chhan hman ta lo a ni. A zan azanin kan khaw lamah ka ruang pawh an phur nghal a, ka thlarau erawh i bulah a la cham bang ta a nih hi.. Ka kalsan thei si lo che a. Tin, ka kal tak avangin i nunphung i hloh vek tih ka hre ta bawk a.. Asang, min ngaidam rawh aw.. Engkim kha ka thiam loh a ni" a ti ta ngawih ngawih a. 

Chutiang em ema min thlahlela min ngaitu chu kei pawn ka ngaih ber a ni si a. Ka khawngaih em em zawk. Mitthi a ni tawh chu rin harsa ka ti a, hlauhna pakhatmah nei lo mah ila, mitthi leh mi nung awm dun chuan boruak eng emaw a siam lo thei lo. Mahse, ka hriatthiam theih loh erawh thlarau chu khawih theih an ni si lo va, Tlingi chu ka khawih thei vek bawk si. Tin, room inhnaih te te kan ni a, kan inkawm te chu Ruati te pawn an hre thin ngei ang a, Tlingi tawng an hre ve ang em le.. Tih te ka ngaihtuah. Tlingi a inpuan hnuah pawh chuan kan la inkawm zui ta zel a. Kei ka bawraw telh telh bawk. Zan lai khawvawh vanglaia inbual dunte hi nuam kan ti a, Christmas chawlh pawh kan blockah keimahin ka hmang. Keimah ka ti tak naa, Tlingi nen kan hmang a nih ber chu. A chang chuan, "Ka kal a hun tep tawh ang. Ka cham rei tawh si a" a ti thin. Ka phal ngai lo. 

Mahse, i rawn lut ta a. Engkim a danglam chho ta a nih hi. Nangmah vangin kan inhau fo a, hun thawl kan nei thei ta mang bawk si lo. Mahse, mihring pangngai bula ka khawsak tama Tlingi nen kan inkawm khât takah khan ka rilru up beh tlat anga awm pawh kha a rawn fim chho ve telh telh a. Nunphung pangngaia nun leh chakna te ka nei chho ve zel a. Tin, ka chhungte ka ngaihtuah thin bawk. Keima nawmsakna leh duhna ringawt ka kalpui thui lutuk a, ka hmalam hun bakah ka thlarau nun thlenginna chhe tawh tih ka hai lo. Kha khawvel chep tak kha chhuahsan ka duh ta a. Tlingi'n a phal si lo. Mahse, ka ngenna a ngai pawimawh a, min kalsan a. A zûn erawh a hnutchhiah thung si. Ka ngai a, ka dam lo ta hial a nih kha. Mang lamah ka hmu a, ka ko a, ka au thin. A rawn let leh ta nge nge a. Mahse, nizan khan i tirbo ta a nih kha.. Ni e, a kal bo tawh aniang.. " Asangi chuan a ti ta dap dap a. A hah hmel hle.. Tui a va in khawlh khawlh a. Sawi tur a vâng kher mai. Mitthi thlarau nen maw an lo inkawm thin le? Rin ruk sa mah nise a tak tak a ni tih han hriat chuan, ka awm a nuam lo ruai thei. Engtin emaw ka awm, min mawlh tlat. 

Mahse, intipachang hram hramin, "Tunah chuan kalbotir tak tak rawh. I nun a chhe vek tawh alawm. Bultan lehna chance a ni mai" ka ti a. 

"Ka khawharna erawh hi chuan min kiansan ngai lo. Ka tawngtai lohna chin pawh ka hre tawh lo. Lo let leh ta se, ka hnar thei ang em ka hre lo" a tih chuan, "Tun sundayah hian Sawmtea te teamin hun an rawn hmang dawn a. Inkawm ula.. A puih theih che ka ring" ka lo ti vat a. 

Chhuat lam melhin, "Ka hre lo le.. Pathian hian min ngaidam thei pawn ka ring lo"a ti tham chhal a. 

"Sual sima inchhir te chu a ngaidam vek thei" ka lo ti a. 

"A nih Rempui, thudik takin min chhang rawh aw. Ka kawm thin kha Tlingi thlarau a nih tak tak i ring em? " a ti zawi sap a. Ka inngaihtuah buai hle. Ka zep lo, ka ring miah lo! Ka pa sawi ka la hriatreng chu, "Thlahrang hi an awm tak tak lo, ramhuai te hian mitthi hmel ang takin lem an rawn chang mai mai alawm" a ti thin. Tlingi pawh a thi a, a thlarau kha he leilunga a cham reng theihna chhan tur ka hre lo a ni. 

"Dik tak chuan maw.. Tlingi thlarau a nih ka ring lo. I khawhar lai denchhenin remchangah Ramhuai ten an rawn hmang niin ka ring. Mahse, ka rinthu a nia" fimkhur takin ka ti a. 

"Kei pawh chutiang ngaihdan chu ka nei thin alawm.. Umm.. A tlai tawh. Thawh i hai leh ang, mu tawh rawh" a ti sawk sawk a. Amah chu a mu tha sawt sawt. Biak chhunzawm chi ni hek lo, ka mu ve ta ngawt a. Ngaihtuahna erawh a kal thui hle. Hetiang thil hi khawvel ram dangah chuan a thleng thin maithei. He lai ram kilkhawra thleng atan chuan a makin a awihawm loh lam a ni e. Asangi chu a muhil mang loin ka hria, ka thanharh apiangin a lo harh ve thei zel. Ka khawngaih a, tih vak ngaihna erawh ka hre lo. 

Inrinni zanah chuan huai leh hrâng te chu an rawn thawk tan ta ka ti mai. Dar 11 velah ka mutna chung tukverh chu a rawn ri dawt dawt a, bang daidepah ngaiin ka han en lem lo. A rawn kik leh a, ka la en duh chuang lo. Kan awmna lam bathroom kawngka chu a inhawng leh ta thuai a. Ka lungphu a rang tan. Ka hriatna thazâm ten hlauhawm a hnai tih min rawn hrilh niin ka hria. Bathroom bul kawngkapui chu hawn tum niawm taka sawi ri a ri leh a, zan zung thin apiangin kan kalh nghal zel thin. Asangi lam ka va hawi a, zangthal zawnga muin chunglam a melh kal mai. Kawngka pawttu chu va fiah ka ngam chiah si lo. Mi dang hi an harh ve lo nge ka hre bik lo. Ka inlukhup a, mutthilh ka tum leh. Mahse, rizai ka theh hlim lehnghal lawp.. Ka thinphu ranzia chu a chhuak mai ang tih mai tur a ni. A chhan chu kan room kawngka chu a inhawng tlat a ni. Keima kalh ngei kha a ni sia. Asangi lah a la chechang eih lo. Ka thu ta tawp a. Bang nghengin Asangi khum lam ka hawi. Light ka on bawk. Thil rapthlak lutuk ka damchhung pawha hmuh ka duh ngai loh tur thil ka hmachhawn ta. 

Asangi mu zangthal chunglam melh reng chu amahin a kang ta vu vu mai le! Ka rak tuar, mahse, ka chesawn thei miah lo. "Ruatiiiii… ruatiii" tia ka au ţial ruan chu ka hria. Asangi kang mek chuan ka lam a rawn hawi a, a mitmeng lian kelkawla min melh chungin, "Bawlhhlawhnu, ngawi hmak rawh" a rawn ti ta a. Ka au tawp chawt! A mu thla leh a. A nui zui har har bawk. Kan roomah chuan kan pahnih chiahin kan awm lo tih ka hre thei. Ruati lah kha ka auh nasat nen a rawn lang thei miah lo. Tlan chhuah mai tumin chet ka tum a, a harsa fat fat kher mai. Chhuat ka zuk rap thei ta a, ka ding chiah tihin a ri bur a, ka khawhmuh a thim nghal dûk, ka chal na zawk ka hre nghal bawk. 

. "Rempui, Rempui… " tih chu hla tak atanga ri ni maiin ka hria.. Ka mit chu harsa ti takin ka meng lui a, ka khap lui sak sak bawk. Ka mutchhuahzia chu a mak zawk! Ka han men chuan Asangi khum leh ka khum inkar chhuatah ka lo mu reng mai. Ka thu vat a, Asangi chuan ngaihtuah hmel zetin min lo melh kal bawk. Amah chu hlau tih hriat zetin a kut chu ka lo beng per lawp a. Ka khum lamah ka zuang kai nghal rawk rawk. Mak ti zetin min melh a, ka khurh nasatzia lah chu a mak zawk. Tawng pawh ka tawng thei lo. 

"Ti nge.. I tha em? " aw nem diai hian a ti a. 

Ka chhang thei lo. Ka khumah a rawn thu zui. Ka hlau tih a hrethiam miah lo mawni le.. 

. "Min khawih suh.. ramhuai i nih hi.., "khur hlawk hlawk chungin ka ti thei hram. Min khawih a tumna chu a lalet chiang kher mai. A khum lam a pan nghal bawk. 

"A awmzia ka hre ve miah lo a nia.. " a ti zui sap bawk. 

"Engmah i hre lo maw? " ka ti hû a. Kawngka an rawn kik a, ka phu leh dâwrh. Amah chuan a va hawng a. Ruati a lo ni. 

"In thawm a va ring ve, eng nge thleng a? " a ti a. Min rawn melh bawk. 

"He… he nu hi ramhuai alawm.. Amah hi" tiin ka lo riat nawk nawk a, Asangi ka kawk bawk. Ngaihtuah hmel deuh hian Ruati chuan min lo en a. 

"Tu nge tlu kha.. Nangmah mi? " a ti a. Ka chal chu ka tuai vat. 

Asangi chuan muang ban churh hian, "Ka hrethiam bik lo, a muhil bawrh bawrh emaw ka tih laiin a tho a, a ding chiah kha chhuatah hian a tlu ringawt a, a chal pawh kha a tauhin ka hria.. A tho â aniang" a ti a. 

Thinrim zetin, "Daw suh. Boruakah i kang a, ramhuai nen in inkawm leh anih kha.. Engkim ka hmu" ka lo ti hlak hlak. Kan tawng ring deuh nen, mi dang pawh an rawn tho liam liam a, an rawn dak hung mai. 

Ruati chuan, " A zia lo em mai. Zan a rei tawh si.. Mu tawh ang u. I tho á aniang.. Mu tawh rawh. " a ti a. Ka mu ngam teuh lo, "Ruat, i bulah ka lo mu mai aw" ka ti ta tawp a. Ruati room lam kan pan phei tur chu Asangi ka va melh leh hram.. Lungngai leh inthlahrung ngawih ngawih hmel a pu.. Mahse, ka khawngaih thei tlat lo. Ka hlau em a ni. Ruati bula ka mu chung pawn ka phu leh zawk zawk zel a, Ruati tak pawh ka tibuai ngawt ang. Ka zuam ang ngawt kha a ni dawn hauh lo a nih hi. 

Sawmtea te team an rawn lang ta a. A sermon pawh ka ngaithla ngun khawp mai. Chawhnu lamah kan roomah a rawn leng ta a. Warden pawh a tel. Asangi nen chuan an inkawm dawn a ni. Kan chhuahsan ta a. 

U Muani roomah kan awm. Ka chau nghulh mai. Zan lam thilthleng chu zawitein ka sawi sep sep a. Mak an ti ve hle. An inkawm rei viau mai. Sawmtea pawn hlawhtling a intih thu leh engkim a that tawh tur thu a sawi a. Tlem chuan ka thlamuang ta deuh. Rooma ka va luh chuan, min lo melh a. 

"Ka tha vek e. Ka lawm e aw.. Nang awm lo la chuan nunphung pangngai ka hloh hlen awm si a" a ti a. Pangngai takin, "A va lawmawm ve aw.. " ka ti ve sap. 

Zanriah pawh roomah kan ei dun. Inbe tam lo mah ila, hman ai chuan a zia ta reng reng e. Zanah Assignment ka ziak a. Ka zawh meuh chuan dar 10 a ri der tawh. Asangi pawh a mu tawh. Ka hmai te phihin ka ha te ka va nawt a. Ka va zung leh te te bawk. Bathroom atanga ka chhuak chiah chu a bul mai kawngkapui chu a rawn inhawng rawp a. Asangi a lo ni. Hnai zeta inmelh chungin kan inhmatawn siah a. A hmel landan a pangngai vek. Mahse, keimahah dik lo a awm thung. 

"Mi mawlnu" a ti vawt raih a.. Kan dinna piah lawk bang kil thim atangah chuan phe zawk ka va hmu a, vana arsi leh thla te chu chhum dumin a rawn hliah thim nghal hlup bawk… mangang zetin in chhungah ka pen lut a. Roomah ka tlan lut nghal bawk. Karei! Asangi chu a khumah a lo mu reng si a!! 

(Tawk leh phawt ang 😁