Ka roommate - 1

KA ROOMMATE..! (Part- 1)

Ziak tu: Toni Râlte

"Hei i roommate tur chu aw, Asangi a nih hi.. " kan warden chuan a ti a. Asangi chu a rawn hawi zauh a, a lehkhabu chhiar lai chu a bih leh nghal daih. Ka hnual rawih mai. Keimahin ka bungrua te chu ka chingfel ta mawlh mawlh a. A ţawng lo va, ka ţawng bik hek lo. He hostela ka lut hi ka inchhir ţan mek niin ka hria. 

Ni e, kan hna thilah thla hnih chhung training tura min koh avangin kan institution hnaih ber vengah hostel ka zawng kha a nia. Aizawlah hian chhungkhat chu nei ve thleh thluah mah ila; an hla deuh tawh bawk nen, tin, training tur kan ni si a, kan bang tlai dawn si a, inthlahrunawm ka tih vangin mitmei ven ngai lo turin hostel ka zawng a ni. Hostel chu a awm nual naa, an full zel bawk si. A tawpa tawpah tuna ka awmna hmun hi ka hmu fuh ta a. Warden be pawpin, thla 2 lek chu awm min phalsak ve ta hram a. Mahse, Single a ruak tawh lo va, double pawh pakhat chiah a ruah thu a sawi. Ka umzui lo thei ta lo a ni. He hostel atang hian kan trainingna tur hmun chu 5 mins vel kal a ni a, a zia ka ti viau. Mahse, ka roommate khawsazia avang chuan, kei thian ngaina leh ri bawrh bawrh chi chu ka nuam lo mêk chu a nih hi. Room a zau lo a, thla hnih lek thang tur mah ni ila, hmeichhia hi chuan neuh neuh kan lo ngah lo thei lo nen.. Ka inrem fel meuh chuan, ka roommate ai mahin ka cham rei hmel zawk. Ka inrem leng lo lam mah a ni. 

Ka inbual zo, chaw ei hma si chuan ka chhungte ka bia a. Khumah ka tlu zal a. Asangi chu ka va melh zauh zauh. Kei aiin a cher hlek a, a tawi zawk maithei bawk. Ngo tak, mahse, a vun nung lo chi a ni. A hmel tak kha chu min rawn melh zauh bak kha min hnungchhawn zawnga a thut vangin ka hrechiang lo. Hmelchhia chu a ni lo tih ka hria. A sam chu a dar thleng vel a ni a, a ngil zaih bawk. Ti nge min biak duh miah loh ni.. A polite loh thlak ka ti mang e. Nge a rooma ka awm ve hi min lawm vak lo zawk ni. A ta a ni bik miau si lo va, ka awm ve a ngai tlat si a ni. 

Kei hi Rempui tiin min ko mai a. Lalrempuii ka ni. Mizoram chhim lam khaw pakhatah hnathawkin ka awm ve a, kum 28-na ka hmang ve mek a ni. Nula lian lam, sa tha ve lam ka ni a. Ka hmel chu a thlirtu a zir a niang chu. Ka mizia erawh keimah ka infakna ni lo se, tupawh kawm ve thei ang chi, nuih heh leh ri bawrh bawrh chi ka ni a. Thian pawh ka ngah ve angreng. Thian ka ngaina a, mahnia awm ka thiam meuh lo thin. Kum lam a lo naupangchhia tawh lem lo bawk a, khawi hmunah pawh keimah hian ka inchingfel ve zel tawh a, tumah ka pur buai ngai lem lo. 

Ka ril a ţam angreng tawh viau, Dar 5:15 velah Asangi chu a tho nalh a. A thleng a la a, a chhuak daih. Chaw a ei dawn a nih ka ring. Ka zep lo, ka ngei. Chutiang em ema min lo hmumawha min biak takngial pawh hreh chu ka la tawng ngai lo va; polite lo ka tih piah lamah mawl ka ti. Rilţam tawh bawk nen, ka thleng ka la a, ka chhuak ve a. Ka chhuak chiah chu kan room ep chiah atangin tleirawl pahnih an rawn chhuak ve a. Min melh hrek hrek ringawt. Zah theih loh chhuahin, "Dining hall awmna pawh ka hre ve lo" ka ti sap a. Samkir zawk chuan, "Lo kal rawh" a ti a. Ka zui ve ta ngawt. Kitchen lam pan chuan kan inzui thla ta a. Chaw kan dawh lai chuan, "Roomah i keng chho dawn nge, he tah i ei dawn? " samkir bawk chuan a ti leh a. 

"Hetah ka ei mai ang" ka ti a. An ni erawh roomah an keng chho. Asangi chu amahin dawhkan sei pui a lo kil a. Va thut ve erawh ka tum lo chiang bal. A hnunga mi pahnih thute bulah chuan kalin, "Ka lo thu ve thei ang em? " ka ti a. An lo bu nghat. Ka thu a, ka ei ve nghal mial mial. Asangi chungchang sawipui tur ka duh a, mahse, chutia han sawi dawt chu ka ngam chiah bawk si lo. 

Zanah ka chau ve deuh bawk a. Ka mu hma angreng khawp mai. Tlawm hmasak a tha e tih changchawiin, ka mut dawn chuan, "Ka'n mu tawh mai ang e. Ka mutna bul light hi chu ka off dawn asin" ka ti a. Min en miah loin, "Off la ni mai lawm" a lo ti! Ka chapona in a tlin ta bik lo ve. Ka va be leh awm lo tak ti rilru chungin ka mu ta a. Phone erawh ka la khawih. Ka lungawi theih ngang loh avangin warden ka text ta tawp a. 

"Ka roommate hi a va dangdai ve. Eng ang mi nge a nih a? " ka ti tawl mai. 

"A be tawh che em? " a rawn tih chuan, ani pawn a lo hrethiam tih ka hre mai. Kan awm dan vel chu ka hrilh a. 

"Hrethiam hram rawh. Thudik tak ka sawi ang. Tumah a be ngai lo tawp. Roommate pawh a nei rei thei ngai lo, a insawn duh bawk si lo va; a bul chiah kha a ruak tawh sia, nuam lo ka ti ve lutuk a nia. Single room a awl veleh insawn turin ka hrilh ang" a rawn ti ta a. Mak ka ti hle. 

"Fees kan chawi ve vek si a, hetiang lutuk chu thla hnih lai kan la awm dun dawn lehnghal. Awl a awm thut chuan min hrilh vat rawh aw. Ka insawn nghal ang" ka ti a. Ani pawn min hrilh nghal tur thu a rawn sawi a. Phone dahin ka maimichhing vang vang. Ka lo muhil zui ta nge ni, eng vang nge ka hre lo. Ka harh hlawl mai. Asangi pawh a lo mu tawh a, kan room light kan off vek avangin a thim deuh ruai mai. Thim hi ka hlau lem lo va, ka vanneihna lam tak a ni. Zing dar 1 a pel fel chiah. Hostel pawh a reh tlawk tlawk mai. Kei hi zun chhuak mutpui lui thei miah lo ka ni a, ka zun a chhuak over lo nain, ka harh ta sa sa tiin ka va zung a. Thla a eng angreng viau. Thawm dim zetin ka zung zo chu ka mu leh ta a. 

Chuta ka muhil chu maimizialin ka awm ni maiin ka hria. Ka khum mawng lamah hian Asangi chu a lo ding reng mai a. Kawngkhar lam a hawi daih thung. Chutah kawngka chu rawn inhawngin mihring rawn lut erawh ka hmu lo. Ka lo en reng ringawt. Asangi chu a dawhkan bula chairah chuan a va thu a, a kut chu mi biak nei niawm takin a zaizir vak vak bawk. Ka muhil tih ka inhre si, ka harh lawi si! Maimiziala kan awm hi chuan eng emaw hlauhna hi a awm zel thin hi.. Chutiang hlauhna chuan min tuam rûn mai a, ka hlauh erawh ka hre si lo. Chutia Asangi che tla ka en reng lai chuan a tho a, ka lam rawn hawiin chik hmel em em hian min rawn en ta mai a! A hmel erawh a pangngai vek. Ka hlau lutuk, harh ka tum a, ka kezungpui ka han tiche thin. Ka harh chhuak zo si lo, ka va mangang tak êm.. Asangi chuan a khum lam a pan leh ta a, mahse, a khumah chuan mihring an mu tlat! Chumi ka va hmu phei chu rak chhuah ka tum ni maiin ka hria. Ka hrawk a phui vek bawk si. Mahse le.. Ka theihpaling kawhah ka beih takah chuan ka harh chhuak ta hlawl a. Ka harh rualin Asangi khum lam ka va melh nghal. A che hrut a, lehlam hawiin a inzialmum nghal daih. Ka lungphu ranzia chu aw.. Ka mut a la chhuak ngang mai a. Ka mutthilh leh chuan ka man zawm ka hlau si, tui ka in ta ringawt. Darkar chanve zet chu ka harh ta kar awm e. Mahse, a hnuah ka lo muhil zui ve leh ta hram. 

Class pawh kan kal chho ţan a. Zing dar 9:30 atanga tlai dar 4 thleng han thuta ngaihthlak chu a chauhthlak ngei mai. Ka zawi haw hnawk zel. Ni 3 ka awmnaah pawh Asangi nen chuan kan la inbe lo. Pawi pawh ka ti tawh lo. Awm ve lo angah ngai ila a tha mai e. Inrinni a ni a, Asangi chu a inchei mawlh mawlh a. A chhuak ve dawn a ni ngei ang. A chhuah hnu lawkah kan room dep chiaha awm hi a rawn lut ta nawlh. Ani nen hian vawi hnih chaw kan ei dun tawh a, a hming pawh Ruati a ni. Te takte mai, tawng duh ve tak mai a ni a. Ka thian neih ve chhun ang a nih ber chu. Ka khumah thuin kan titi ta a. 

"Asangi mizia hi a mak ka ti ee.. Nang i awm rei tawh a. I hre deuh em? " ka ti ta thlawt a. Ka zep buai peih tawh lo a ni. 

A ngawih dat hnuah, a hawi leh zak zak a. 

Zawi sap hian, "He laia awm ho chuan i rawn awm duh hi mak kan ti vek alawm" a ti ta a. 

"Han sawi chiang teh" ka ti vat. Chutah chuan, hetiang hian a sawi chho ta a. 

"I hriat angin hostela awm te hi a tam zawk chu college zirlai an nia. Kei leh U Muani saw hnathawk kan ni mai. Keini pahnih hi kan block-ah chian kan senior ber tawh ang. Nikum kum laihawlah Asangi hi a rawn lut a, a rawn luh tirh chuan hetiang hi a ni lo. A tawng duh ve reng, Company pakhatah hna a thawk ve a, an khua erawh chhim tawp lamah daih a niawm e. A hming ka hre ta mai lo. Roommate pawh a nei ve a, thla 3 vel chu an awm dun hman. Zan khat chu a roommate kha Tlingi a nia, Tlingi khan zu a lo keng lut nge mawni a in aniang. A khami rui khan buaina a zawng chho a, Asangi chu a tâwng ta hrep hrep a. A samah te a va kek thul, Asangi tihngaihna hre tawh lo khan a namthlu a, a namthlukna lamah khum mawng kil zumah a tukhum a tauh ta a. A thi ta zur zur mai sia, Warden pawh a rawn chhuk. Tlingi chu damdawiinah an hruai ta a. An lo thuisak a, a tukah a rawn haw ve leh mai. Mahse, a hnu kar khat lekah Tlingi chu a inla chhuak a, khaw nge a awm tak kan hre lo. Khata tang khan Asangi mizia hi a danglam chho ta a ni. A ngawichawiin tumah a be ngai ta lo va, kan biak pawn a rul tawk chiahin min chhang thin. Tlingi a ngaih vang emaw amaha awm hrehawm a ti a nih kan ring ta ringawt a. Mahse, a mizia chu a danglam dan a mak chho ta zel. Thlasik lai te khan zan lai dar 12-ah tuivawt ten a inbual a. A roomah amah chauha a awm chung hian a nui hawk hawk fo. Kan bengchhen deuh emaw kan han rik laih te hian, "Rehhlum in duh loh chuan ngawi chipcham rawh u" te hi a rawn tia.. Naupang deuhte phei chuan an ţih ru ţan ta a. Kei hi a room bul chiaha awm ka ni bawk a, ka hlauh chang a awm ve thin.. College naupang an haw tawh hnu, U muani te nen kan pathum chiaha kan awm lai te khan U muani bulah ka va riak thin. A chhan chu Asangi hi amaha phun bul bul te, nuih leh huk te a ching a. Zan reiah phei chuan a rapawm duh em a ni. 

Christmas te kha amahin hetah a hmang hmiah. A haw lo hrim hrim. Warden pawn a awmdan hi a hria a, chhuahtir ngawtna chhan tur a hre bik si lo. A roommate tur an rawn luh lahin ni 3 pawh an awm thei ngai lo. Asangi awmdan an mil loh leh an ţih tlat vangin an chhuak leh nge nge zel. Single room a ruak mai si lo va.. Tihian roommate pawh nei thei lovin a awm ve ta reng a nih hi.. Ka lo khawngaih ru khawp mai che a. Rin aiin i tuar thei ta phian a.. A mak ka ti tawp, Asangi awmdan hi chu.. Ka hrethiam tawh bik lo" tiin. Ngaihnawm ka tih piahlamah mak ka lo ti ve hle. 

"Ramhuai nen an inzawl te hi a ni mai lo maw le" ka ti a. 

"Ka hre lo. Chutianga ngaih theih tur chuan a awm chuang si lo va. A hnaah nise a kal nitin a, hunbi nei thlapin engkim a ti bawk si. " a lo ti ve a. Ka rilru a buai hle. 

"Aa. Thla hnih chhung lek chu ka awm ve thei mai ang" ka ti ta ringawt a. Lehlamah chuan, ka naupangchhia zawk zawk tawh lo bawk a. Ka awm tluan ve theih mai ka ring a ni. Ruati te ho an awm tho a, a hranpa takin tumah kan inkawm hman tak tak chuang lo bawk nen.. Asangi pawh kawmngeih tum chu a tha. Mahse, ka mihring chapona hian a tlin bik si lo a ni. 

Thim hnuah a rawn haw chauh a, eng eng emaw a lei nual mai. Ngawi rengin a singsa malh malh a. Kei erawh ka chaw eikham chu thuin phone ka hmet thung. Chaw a zuk ei a, kei erawh Ruati roomah ka leng daih, kan titi nasa a. Nuih pawh kan nui nasa mai. Dar 9 bawr velah mu turin ka phei ta a. Asangi chu a lo mu tawh. Lehlam a hawi a, a muhil em ka hre lo. Light ka off a. Phone khawih pahin ka mu. Ka muhil zui ve ta mai.. Kawngka kik ri niawm tak kik dat dat thawm avangin ka harh ta a. Kan block luhna kawngkapui erawh kan hnaih vak lo, zan a rei tawh a, a ring mai mai a ni. Ka'n ngaichang deuh a, thawm dang a awm leh tak loah chuan ka maimichhing zui leh ta mai a. Ka muhil tan siar siar tihin zawitea phun ser ser niawm tak ka hre leh ta a! Ka meng nghal kâwk. Thim hlau lo mah ila; Huai leh hrâng lam hi chu ka ngaina viau bik lo. Zangthal zawngin ka mu meng ta reng a. Phun ser ser thawm chu Ruati room atanga lo chhuak niin ka hria.. Amah a muhil daih tawh si. Mutpui a neih awm ka hre bawk si lo. Ka tihngaihna hre lo hawi kual chuan Asangi khum lam ka va en chu ka rak ţhawt! A zangthal zawnga mu chung tho si hian meng bial kuau chungin min lo melh reng a nih chu! Ka hmu sual lul lo mai. Light ka on vat. Ka khur der der bawk. A en ruala Asangi ka va en leh chu mak ka ti thlawt! Min hnungchhawn zawngin a lo saisir leh daih nia! Khum chîk thawm ka hre lo va, tin, ka rak thawt rual deuhthawin light ka on bawk. Chutia inher sawnna hman awmin ka hre lo. 

 Ka rak thawm kha a ring lo nge an hre lo hrim hrim, tumah chu an rawn harh lo bawk. Light on chung chuan ka mu leh a. Ka zun rawn chhuak ţan chu ka va zunpui ngam tlat lo. Ka tai te chu ka han nem a, intingaihtha luiin, "Ka cheh em lo vang" ka ti rilru a. Mahse, ka mut a chhuak hlawl lo. Chhungrilah ka hlau a ni ber. Asangi'n min melh kur kha ka hmusual aniang tiin ngaih tihthat ka'n tum sasawi thin a. Mahse, a chiang telh telh lawi si! Ka rilruin ka tawngtai ngat ngat a. Ka hlauhna te pawh zawi zawi chuan a kiang chho ta e. 

Ka khum mawng lama ka dawhkan leh chair bulah chuan a ding a, a sam chu a huihmam leh thuak thuak thin a. Ka lehkhabu te chu a zu bih leh dâk dâk thin. Ka hmu reng si. Ka harh thei chai bawk si lo. Maimizial hian ka awm khât viau asin le aw.. Chutah a hma ami ang bawkin kawngka chu a rawn inhawng leh ta riai riai a. Rawn lut an awm tih hriatna ka nei, rawn lut chu ka hmu thei bawk si lo. Ka chairah Asangi a thu a, a chairah chuan hmuh theih loh 'thil' chu a thu bawk niin ka hria, an inhmachhawn a. Ka hriat ve theih si loh hian an inkawm ta a. Asangi pawn zaizir a hmang nasa. Ka kezungpui tihchet tuma theihtawpa ka insanmar hnuah mang ram atangin ka harh leh ta! Ka thaw huai e. Ka thu chhuak vat a, tui bawk ka in. Asangi chu a khumah a mu. A thawk danah a muhil ni ngei pawn ka hria. Asangi nge dik lo keimah ka hrethiam tawh lo. He room zawk hi em ni ang? Hlauhna chambang lahin min kiansan duh malêk a! Heti renh reng chuan thla 2 ka awm thei dawn em ni? 

Class kan kal nitin leh ta. Kar khat chhung chu kan pangngai. Keimah zawk hian chutia inhmelma ang maia awm reng chu harsa ka ti tawh lutuk a, Tlawmna zawng zawng sawmkhawmin zan khat chaw kan ei kham chu, "Asang, min hua em ni? " ka ti ta bawl a. 

Min rawn melh zauh a, a heh a liak a. "Haw lo," a ti nghat. 

"A nih chuan room khat zimteah kan awm sia, hetia inbe ngai miah loa awm hi hrehawm i ti ve lo mi? Kei chu hrehawm ka ti.. Harsatna i nei emaw min mil lo anih chuan sawi hreh suh" ka ti ta a. Ka thawl hawk mai. 

"Harsatna chu ka nei. Mahse, ka sawi kher lo vang. Ka haw lo che. Mahse, chhuak vat tawh la ka duh ngawt mai" chang fekfawk hian a ti ta a. 

Ka dang titih der mai. Sawi mai tur a vâng. Mahse, intingampa luiin, "Thla khat leh tlem ka la awm dawn sia.. I va hrehawm rei dawn ve. Chu ai chuan inkawm ve ila.. Thian te ni ve zawk ila" ka ti a. 

A zat vang ni miah lo va, nuiin, "Thian a?! Ka mamawhin i hria em ni? Awm mai mai teh" a ti ro halh. 

.

"Aw ka hmuh dan che chuan thian i mamawh.. I khua a har" ka lo ti ve hmiah. 

A rawn hawi a, min seh duh mai hmel a pu. A insehruh a, meng phar kâwk chungin, "Ngawi rengin awm la a tawk" tiin room a chhuahsan daih. Awmhmunah ka insawh tau fê mai. Tihngaihna awm ngang lo chu chet lak vak ka tum ta bik lo e. Warden hnenah ka thil chah lam a ngaih vangin a roomah ka han chho a. 

Green tea te a lum leh sia, ka thu ve leh ta reng. Asangi nen kan inkar te min zawt leh a, ka sawi vek mai. Za lo zetin a nuih ve ngawt kha. Kei chuan, "Khawi khua nge a nih? " ka ti ta a. An khaw hming chu a sawi a. Ka hria a, ka la zin lo thung. Chhim tawp lam daih a ni. 

" A zia hi mak ka ti em mai.. Tihian enliam tawp mai ang ka awm rei dawn chuang lo" ka ti tawp. Ani pawn min lo pawmpui viau. Ruatinsawi ang tho khan, "Tlingi a chhuah hma kha chuan a pangngai asin le aw.. Tlingi chhuah hnu atang khan a zia a dang vek a" a ti ve. Tlingi chu a nunah a pawimawh viau a nih hmel e. Ngaihtuah vak a sawt lo. Ka chhuk chuan a lo mu leh diam tawh. Kei pawh ka insingsa a, ka mu zui ve. Ka mutui phian e. Mahse, zing dar 4 velah kan room kawngka kalhna ri rak vangin ka harh. Mi harhvang ve tak ka ni bawk a. Ka meng zawk a, kawngka chu a lo inhawng hiai mai. Asangi erawh a mu si! A va mak e aw.. Eng nge thil awmzi hi ni ngai le.. Ka tho a, ka va kalh a, ka let leh chiah chu ka phu chiang lutuk, ka hmazawn ka hmai bul chetah a rawn ding luah mai. Ka tawlhhnung dâwrh a. 

Mitmeng sen rûma min en chungin, "I hnawksak hle a ni" a ti ta a. A aw chu a ring lem lo. Ka chhan hmain kawngka a hawng a. Bathroom lam panin a phei. Ka ding khawng reng mai. Ka hlau ţan, he nu hi. Mahse, eng emaw inthup a awm chuan ka hre si. Chu thil hre chhuak tura beih chu tulin ka hre ta a. Phungbawm pawh sawm ngei a tulin ka hria, keimah mai chuan a chet dan a rawva angreng sia.. Ka hlau! 

A tuk atangin a rukin Ruati leh U muani te chu ka be ta a. An ni pawn ka thusawi an hriata Asangi awmdan an hriat takah chuan chhui chian ngei tha an ti ta a ni. A hautak ru zêk dawn mai. Eng ber nge kan chhui dawn ka hre lo. Mahse, Zana Asangi chet dan leh ka maimizial fo te chu a inkaihhnawih ka ring ringawt. He hmeichhe mak tak hian eng emaw tak chu a kawl a ni. Hlauhlawpin min siam reng bawk si. 

Zan 2 chu engmah a thleng lo. Mahse, ka hriat chhun chu Asangi a zung zing hle. Ka harhvang ka tih tawh kha, ka lo harh ve zel bawk si. Mahse, a zung zo va, a rawn mu ve leh mai zel. A tuk zanah erawh thil thleng a awm. Mutthilhsan daih ka hlauh vangin ka intiharh lui hram hram a. Dar 12 a ri chiah tihin Asangi chu a va zung a. Ruati leh U Muani te pawh an la meng, kan intext ta zauh a. Asangi chu a rawn mu ve leh mai a. Kei pawh muhil angin ka thaw der sûk sûk mai. A che seuh seuh a, a ri a ri mai. Ka hre lo der ţang ţang thung. Dar 1 bawr vel a ni maithei. Kawngka chu thawm dim zetin a va hawng ta a. A phun sar sar bawk. Ka meng ngam si lo, a khumah chuan a thu a. Tu emaw chu a bia a ni. A lam hawia saisir sa ka nia, ka meng dere ta siar siar a. Amah bak hmuh ka va nei lo. Mahse,, Asangi chuan biak nei niawm takin melh a nei thung si. Ka hlauhna lungphu ri chu a hre pha ang tih ka va hlau tak êm… ka che ngam eih bawk si lo. Kut zaizir a uar leh hle. Tin, a nui bawk nia! A nui sen sen reng mai. Chutiang taka Asangi nui hmel chu ka hmuh vawikhatna a ni. Tu nge a kawm thin, hmuh theih bawk si loh chu ni ta ang le.. Ka che lo thei ta ngang lo va, muhil harh hlawl angin ham bai bai chungin ka che ta a. Asangi lam chu ka hawi nghal bawk. Chechang map loin min lo melh kiau mai. 

Zahzelah, "I va mu har ve" ka ti ţial rian a. Ka hlau tih ka hmelhmaiah a lang ang tih mawlh ka hlau. 

A ngawi reng. Kawngka inkalh lo chu va hmu thut angin, "Ehe! Kawngka kan kalh theihnghilh a nih saw" tih pahin ka tho a. Ka va kalh ve hmiah. Ruati te an la meng turah ka ngai a, tlemin ka hlau nep deuh. Asangi chuan chhuat lam a bih ran a, lungchhe hmel te pawh a pu lek lek mai. Ka mutsan a. Ka muhil lo. A tho a, a chhuak leh ta. Engmah manchhuaha hailan tur kan nei leh ta chuang lo. Mahse, ngaihdan erawh ka nei thiam ta deuh e. A tukah a lo hawn hmain kan sawiho ta a. A awmdan leh chetdan kan enin Imaginery friend kan tih, ngaihtuahna/suangtuahna emaw a tak tak anga kawm a nei niin kan hre ta a ni. Chu chuan mi dang pawh hnawksak a tih phah a. Kei thlengin min mil lo phah niin ka hria. Tih vak dan erawh ka hre lo. 

Inrinni a ni a, ka insu a. Mi dang ho chu bazarin an chhuak nual aniang, a reh hle. Ruati erawh a ke a tina a, a awm ve. Ka insu zo, clip ka va la tur kawngka ka hawng chiah chu ka ding chawt. Asangi chu a dawhkan kilin a thu a. Khum lam hawiin, "Tihdan tur ka hre tawh alawm.. Amahin a chhuak mai ang. Mi dang ang khan.. Nang hi chu tuman an luahlan lo vang che" a lo ti mial mial mai. A nui har har bawk. A biak chu boruak mai a ni si! Ka aw ka thian a, ka lut a, a rawn inher zawk mai. 

"Tu nge i biak a? " ka ti ro hak a. 

"Tumah"

"I biak kha.. Tu emaw chu.. Nge mi â angin nangmah leh nangmah i inbe zawk" ka ti leh fak. 

"Ka duh duh ka bia ang. I sawi tur a awm lo ve" a ti chhum hmak a. 

"Asang, i awmdan hi a dik lo, ngaihtuahna hmangin thian i siam a. A dik lo ania. Rilru lam doctor i rawn a ngai. I piangsual mai dawn" ka ti ta râwt râwt a. Min rawn melh chiang kher mai. A hmui chu a khur deuh hlak hlak bawk. 

"Ka sawi dik tiraw? Ka hre vek alawm. Tu nge i thian chu ka hre lo. Mahse, bansan rawh. I tihtawp a ngai.. " ka ti leh hmiah. A thleng vek tawh a, inthup tit tet ka peih lo. 

Clip pawh chu la la ta chuang lo, kan indinchilh ran mai. 

"Ka nun a nia. Tupawh ka kawm ang. Ani chauh hian min hrethiam.. Tuman min kawm ve duh tak tak lo. Ani chiahin min hmangaih" tih pah chuan khum lam chu a kawk zauh zauh. Engmah leh tumah ka hmu ve der si lo. 

Ka chil ka lem khawlh, "Enteh, Asang, a tha lo tak tak.. I thian nih duh kan awm hi.. I harsatna chu sawi rawh. Puih che ka tum dawn alawm" ka ti ve ta tawp. Za lo zet hian a nui a, khum lam chu melhin, "Min puih a tum a nih chu.. Hehe.. He nu hian" deu zet hian a ti hlang hlang a. 

Boruak chu a reh dûk. Kei chuan, "I thian chuan eng nge a sawi ve a.. Ani kha mihring pawh a ni si lo. Mi dang hmuh leh hriat hlau renh renga kawm a ngai bawk si.. Ka awm hi.. I thian ka ni thei" ka ti leh a. 

Pawr zet hian, "Kal bo rawh" a ti tuar. A mitmeng a sen râm a, kut min thlak duh mai niawmin a kut chu a humruh hle bawk. Clip ka la a, ka chhuak zui. Beih deuh a la ngaih hmel. 

Ni 2 zet kan inbe ta lo. Mahse, Asangi chu a hlim miah lo tih ka hria. Zanah nise a mu hma a, a tho ngai tawh hek lo. Zan khat phei chu a rawn rum chhuak a, ka va kal vat. A lo thlan hliam a. Na tuar hmel a pu, a pang lah chu a sa em em lehnghal. Damdawi te ka eitir a, ka muttir leh a. Ka khum lam ka pan tur chu.. 

"Rempui.. " a ti dat a. Ka thu leh. 

"Aw.. Sawi rawh" ka ti vat a. 

Meng â deuh rei ruai hian, "A kal Bo tawh. Ka ngai a ni" a ti ta sap a. A thian kha a ni ngei ang le.. 

"Maw?! Engtin nge a kal bo? " ka ti a. 

"Keiman ka kalbotir a.. Mahse, ka ngai ngawih ngawih" a ti ta a. A ţap ta nghal. Ka zuk kuah a. Tuna Asangi ka kuah mek hi chu, Hmeichhe derthawng tak, puitu ngai em em, no tak a ni tawh. 

Mittui kar atanga min rawn melhin, "Tlingi vanga engkim hi thleng a ni.. Tlingi kha ka hmangaih a, ka haw bawk.. " a ti a. Tlingi chu ka hre ve lo, a hming erawh ka hria. 

"I sawi duh em? " ka ti a. 

A lu a thing. "Hun thawl hmasa berah ka hrilh ang che. Mahse, nangmah chauh" a ti sep a. A maimichhing zui daih. Kei pawh khum lam panin ka mu a. Mutthilh erawh a har ngang mai. 

(Heti chen hi ni rih rawh se aw.. Lehpekah Asangi inpuanna kan ngaithla dawn nia 😘😍😊