Hlilda

Chhiar lo te in la awm takin.. 

HILDA..

.

- Toni Râlte

.

Chutiang êm êma ka vawikhat hmuhnaa min neltu leh min ngamtu hmeichhia chu ka la hmachhawn ngai hauh lo a. Min rawn nek salh salh te chu makti hmel hian ka lo en hu hu lah tak a! Nula upa tak chu a la ni lo tih a hriat. Kum 23-25 inkar bawr vel anih ngei a rinawm. Ngo ser sawr, inkhaithli zaih mai, mit hmul er tân leh mawngbawr vâwng lah mai a ni reuh a. A nau chaw bawm lah chu lian pur si lo hian a te chhe hauh si lo. Kekawr dum mar em em, punk ru zet a ha a. Kawr nghawng zau lam lek lek, a dar veilam kawrban uai thla hnup mai a ha bawk a. A sam erawh mak takin a dum siau thung a. A hmai tung lam, a hnar ngul sang vah leh a hmui sen hlar te chu a mit cheina ai mahin an langsar a. " A hmelchhia" titu chuan dâwt chiang tak a sawi ngeiah ka ngai ang.

.

Ka țhianpa bialnu a ni hlauh erawh ka lawm ru viau thung si! A chhan pawh nula nungchang țha zawk zawk lo ani tih haider rual a nih loh vangin min nek salh salh danah min ngaihzawn mai ka hlau a ni. Ve tak hian a! Kei akara min lo duh der ve anih te chuan bawp khai vu vu zawk tur ka nih tehlul nen...chu hmeichhia zet erawh "ka phu lo" tiin k'n tlip mawi hram teh ang.

.

"Ka hmuh hnu i ang tawp" min han tiah! A aw lah chu a tliang ral mai a. A mawi. 

.

"Ee...ka hre leh si..hmannia K. Lalrinsanga lehkhabu Release ni khan ka hmu che" ka chhan hma hma chuan a lo ti leh hmanhmawh a. A ni dawn tak e. Khamini kha chuan ka chhuak ngei tak alawm..mahse..

.

"I kal ve mi?" 

.

"Kal e. Lehkhabu Release apiang chuan ka dam anih phawt chuan ka kal ziah. Ka hmelhriat an nih leh nih lohah ka buai lo" ta deuh deuh chuan!!

.

"Lehkhabu i chhiar ve thin maw?!" Ka meng pawng hlawt a..

.

"Tehreng..engpawh ka chhiar duh. Chhiar tur ka neih loh chang chuan Kristian Tlangau te ka chhiar thin" a nui har har a. Ka hmuh tirh lai ai kha chuan ka ngaina hlek. Ka anpui alo nih ve mial avangin. Mahse, a hmel leh mizia, incheina a tang te chuan rin a harsa viau lawi a.

.

Ka in chhete chu chhuahsanin țhiana te chu chance ka pe ta a. Kawmchhak dawrah kuhva hring ka han thelpui teh ngawt a. Ngaihzawng nei ve lo nafam chu țhian ten min awhthik ta fô mai chu a nia. Ka in luah lah sual rawngbawl nan an hmang chhen a. Hman man te pawh hi ka la siam ang ti nia!! 

.

Zanriah chu ka țhianpa nen kan ei dun a. Chhun lama a chet țhat vang nge ni a phur surh surh khawp mai. Mahse.."He nu zei lutuk hi chuan ngaih a tițha lo mawle" tiin a phun bul bul a. Ka rilru chuan "ka hmuh tirh atang khan ka ngaih a tha lo tawh" ka lo tih pui a. Ka sawi chhuah vaih chuan min melh shala leh tûn dawn si a.

.

Hun a liam ve zel a. Hilda pawh ka inah chuan a ngampa tawh ngang mai. A ngampa mah mah ka ti keichuan. Inchung pitar sițik deuh vang hian ka lo ip châwih châwih thin. Nikhat chu amah chauhin a lo kal a. Kei chu Kan țhian pakhat lehkhabu ziak turin proof Reading tih sak tura min tih tlat vangin ka lo inchhawp hnawk rum mai a. Computer hmaah chuan țhuin, Screena thu inziak te chu chhiar niawm takin a melh tlawk tlawk a. 

.

"Samy, kan ințhen...Ruatfela nen" a ti hawk a. Ka melh zauh a. Sawi tur phei zawng ka hre lo.

.

"A chhan chu a thik che a" chhei le!! Ka phu deuh zuk mai. Bangbo takin ka melh reng a. Nui lui tih hriat deuh, nui mawi tho si hian min seih khum te te phawt a. "Dâwt hi ka ngaina ve vak lo a. Ka mipa ngainat leh duhzawng tak i nih thu ka hrilh pek alawm mawle" a'n ti mai chu'h!! Hlauhlawpin ka tlanchhe țep mai.

.

"I â anih chu" ka lo ti sup thei chauh. "Ka fin vang zawk alawm. Kan inngaizawng daih dawn nia" a la ti ta deuh deuh.

.

"Bialnu ka nei ve thlap thlap alawm"

.

"I daw...i nei lo tih hi ka hming ka hriatchian tluk zetin ka hrechiang"

.

"Ka duhzawng i ni ve lo"

.

"Ka ring chiah lo" ti nge maw a confi em em chu le..

.

"Zan hnih khat tal chu min hisap tawh ang" 

.

Khai a! A hre ru reuh emawni le!? Ni e, hman zanah zu ka rui pek a. Țhianpa in an in chukha dan min hrilh kha ka ngaihtuah chhuak tlat a. Bathroomah ka va tawm kuk phah tak kha mawle...het shala..

.

Chumitlai chuan fiamthu titihin ka nawr chhuak hram a. Ka bialnu atan êm chuan ka iai! Eng nge..hmelchhepui pawh ni mahila, thiante chul hnu rih chu ka tha a na ve tlat! Mak theihtawp in nitin a lo kal ta ziah mai. Ka țhiana lah chu ngaihzawng dang neiin a nui leh sun sun tawh si. Val hi ka buai ta. Hilda duhawmna leh mawina chu mipa mipatna hian a dawl zo lek lek zel mai si a. Bialnu neih ve vat ka duh, vanduaithlak takin hmanhmawh taka ka bialnu ni duh mai tur ka hmu thlawt si lo. Eng titiha kei chu a duhzawng tak ni thei nge ka nih tih ka hre ikhaw lo mai. Lehkhabu chhiar ka peih vang aniang chu maw..hmm..

.

"Hilda, ka thianpa bialnu hlui i ni a. Ngaihzawn che hi ka tum lo. Nang pawn min bansan tawh rawh" tiin inti zahawm takin ka hnar a.

.

Ka mita chiang kelkawla min en chungin, " Awle" a ti sap a. Hawilet miah loin ka in a țang chuan a chhuak ta a. Thla khat chuang deuhthaw a nuiri leh hmel fai sar, ka hnungzang a hmehna thin a kut nel thep leh a wai wai chhum te eitur awm lo leh a thawm hriat tur awm ta ngai lo chu thawveng hawk awm tak ka nih laiin, ka ippik puiin ka khawhar takzet a ni.

.

A number chu vawitam ka hmetchhuak fô a. Vainu rawn țawngin "Switch off" atih bak chhanna dang ka dawng ngai lo. A thawm riva reng reng hriat tur a awm ngai ta lo. A bialpa hlui ka țhianpa lah kha Thingtlang lamah a hna vangin a buai hle mai si a. Ka zawt duh ting tang lo.

.

Thawmhnaw en tum em em pawh niloin Bazarah chuan ka vei thuak thuak a. MC lama chhoh ka tum chu, stepah Hilda ka tawk ta thut mai le..ka thinphu ran zia leh phur ruk zia kha..a hmel chu a dang bai a. A cherin a dam that loh hmel kher mai. A kutah ka va chelh ta tawp a. "I dam em?" Ka ti a. Mitmeng buai deuh nak hian min melh kawk a.

.

"Min hai aniang" a ti ta a.

.

Thla tam pawh a ral hmaa chutianga mikhual anga min en leh thei mai chu ka lai a na kher mai. "A lo nih chu" ka ti hmak a. Kal tumin ka inher a. "Hilda i zawng ani maw?" Aw fiah fai tak hian a rawn ti a. Ka ding chawt mai. 

.

Restaurant fianrial ve deuhah chuan kan lut dun a. Inhmatawnin kan thu a. 

.

"Hilda chu a țha em? A tha tiraw" ka ti sek sek a. A phirpui nula chuan ngunthluk leh fimkhur zetin min melh a. "A țha lo ang tih ka hlau ngawt mai" a ti ta mai a!

.

"Hilda chu unaunu duhawmber a ni. Ka nu damlai chuan ka nau mipa te nen kan unau thumin chhungkaw vanram kan chên thin a. Ka pa chuan sawrkar hna chhete a thawk ve a. Mahse, tumah kan awt bik lo. Kum 14 kan nih kumah ka nu chuan cancer vangin min boralsan a. Ka pa phei chu kum 2 dawn mi â ang maiin a khawsa thin. Chutihlai akarin ka nau mipa chu Truck in a chil a. A ruang hlawm tlak loh khawpa chhia a ni nghe nghe. Hilda leh ka pate nen chuan khawhar takin kan awm a. Ka pa chuan zu in a ching țan ta a. Dem ngam tur pawh kan niin ka hre lo.

.

Kan khawsak a harsat tak êm vangin Hilda chuan zirna lama rual ka pawl ve nan tiin amah chuan class 10 a pass hmain school a bang ta a. Thingpui dawrah te inhlawhfa in kei chu min chawm a ni. Ka pa chuan nupui a nei ve leh ta a. Ka nuhrawn chu nu sual tak chu a ni bik lo. Mahse, a fa chhawm nula kei aia naupang hlek hian sawn a pawm a. Kan khawsak a harsat zual phah khawp mai. Kan unaunu thar chu țawngkam chaltlai tak a ni reuh a. Hilda nen pawh an inbakkaih chang a tam thin. Chutiang hunah chuan ka pa chuan ka u chu a tan ngai meuh lo thung. 

.

Vanduaina a kaltluang kan ti dawn nge..kei chuan class XII ka passed tirhin ka taksa ah harsatna ka tawk ta fô a! Vawitam ka inentir hnuah ka kal (kidney) thlak a ngai tih kan hre ta a! Kan mangan tur zia chu i hriatthiam ka ring. Hilda chuan a kal min pek chu a phal em em, mahse, a senso leh phai lama kalna tur zawng zawng kha keini chhungkaw tan chuan vana rah ang a ni. (A hmel dang bai leh cher kuam a tang chuan ka hrethiam thei mai)

.

Tichuan, Hilda chuan tum nghet tak a nei ta a. Mi inah inhlawhna tur zawng kualin,mi tih duh loh tam tak a ti thin a. Chung a thawhchhuah te chu bankah a dah nghak zel a. Keiin thawh ve ka tum lahin a remti lo bur mai si. Zahawm ka ti takzet a ni. Hmun a fang tam a. Mi chi hrang hrang a tawng tam bawk. A unaunu ka damchhuah theihna a tana tawktarh itawm tak tak te chu kei min hmangaihna avang chuan a hnar zo ta thin lo a. Mi pasal pawmlai hausa deuhte ngaizawngin an sum leh pai neihsak dan a dap thin. Ka nu leh ka pa te lah chuan ka kal thlak ai chuan kan nau sawnpawm chu an ngaihven zawk ni te hian ka hre thin a. "Naute, i kal kan thlak hunah kan unauin hmun dangah kan awm daih dawn nia" tiin Hilda chuan min hnem thin. Ka pa chuan zu a in nasat em avangin inchhungkhur a ngaihtuah lo a. Zu ngawlvei diktak a ni tawh a ni.

.

Thla khat liam taah khan tlai khat Hilda lo haw chu a hmel a dik lo a. Nidangah min tihhlim tum taka nui lui thin kha a ngawi hmak a. A hlim lo tih hairual a ni lo. Chumizan chuan a chhuak a. Dar 10 velah a rawn haw a. Nidang ang lo takin zu rim a rawn nam haw a. Ka nuhrawn in a hriat chuan a thinrim em em a. A beng a. A chhir a. In a tangin a hnawtchhuak ta a ni. Zui ve ka tum a. Mahse, "Naute, lo tuar hram hram rawh. Pawisa ka khawl ngah veleh ka lo hruaichhuak ang che" min ti tlat a. Amah chauhin zan thim hnuaiah a chhuak ta a ni" 

.

Hilda nau thusawi chuan ka thinlung a deng dawt dawt ni hian ka hria a. Tlai tin deuhthaw a rawn kal thin a. Chhunah mi inah a lo inhlawhfa thin ani tih pawh hriat loh khawpin chau hmel a pu ngai lo a. Eirawngte min bawlsak zawk thin anih kha. Ka hmangaih ve lo ani tih pawh hrereng chungin ka tan a lo inpe em em tih ka hriat chuan nuamlo ka ti a. A sum thawhchhuah dan te chu engtin pawh ni rawh se..a dinhmun angah ding ta ila, kawng awlsam chu ka zawh ve maiin ka ring.

.

"I u chu i zawng dun ang hmiang" ka ti a. Mittui tla par chung hian, "ka zawng nasa tawh lutuk. Hmuh tur a awm lo" a ti chuai raih a.

.

Hilda chu hmuh leh ngei ka duh a ni. Ka hmangaihin ka duh ta tihna a ni lo a. A phurrit ka belhchhahsak avangin ngaihdam dil ka duh a ni. Ka in peng ka thlen chuan ka piah lawka mipui inhawrkhawm tuau tuau lam chu ka va hawi a. Ngaihthat lohna lian tak nei chungin ka va pan a. 

.

"Eng nge thleng a?"

.

"Motorin mi a su aniawm e" mipui chu ka keu sawt sawt a. Kawngpuia lo let reng chu ka zuk melh a. Ka thaw huai mai. Engvanga Hilda ni tura ngai ngawt nge maw ka nih chu le..

.

Ka in chu ka han lut a. A ruakin a reh zual ni hian ka hria a. Khumah chuan ka mu hlawm tawp a. Hilda ka mithlaa hmu chungin ka lo chhing sek a. Ka harh chuan khua a thim ruai tawh a. Rim danglam tak ka hria a ni. Thil kan hmui rim nam chak chak chuan ka rilțam zia min rawn hrilh a. Mahse...engvanga..

.

Ka tho thut a. Puanzar chu ka keu a. Thuk bula min hnungchhawn zawnga ding hmeichhia chu ka hria..a va mak êm!! Ka thawm hriaiin a rawn lehhawi a. Min nuih sen sen a. Va pan ka tum lai chuan mak tak maiin a ral daih!! Makti zetin ka hawi ka hawi a. Nilo, a theih loh.

.

Nauteii number chu khur hlawk hlawkin ka hmet chhuak a..

.

"Sammy, ni e. Ka û ruang chu nichin mai khan hmuh a ni" a rawn ti ta a.