17th July

17th JULY..

.

✍Toni Da Râlte..

.

"Min fawp rawh" ka tih chuuu...ngenngawl zeta a mitmeng si set chu ka zuk nuih saih a. A hmui chhah lek lek, fawh nuam zetah chuan uluk zetin ka hmui ka nghat a. Kan inkeih tawn tawn a. Ka sam chu a kek țil leh takngial dawnin ka hria a, ka inlahrang ta a.

.

"I bulah hian engvanga insum harsa ti em em bik nge maw ka nih le?" A ti vei sup a. A mithmul buk leh chhah țha zet chu ka melh reng a. A ngaite bawkin min rawn kuah leh thawk a. Khumah chuan kan inbuan leh ta thial thial mai. Dan pangngai angin ani chu chak zawkah a țang leh a. A vawi tam takna atan ka taksa chu a ta liau liauah a siam leh ta! Zah a sawi theih tawh loh a, ka taksa nawmna nasa takin a tuam mek chu a khur der der a. Amah chauh ani lo. Keipawh hi alakah chuan hmeichhe sihhnip tak ka ni thin.

.

Kum khat kan inngaihzawn hnu thla 2na a tangin inngaihna sualah hian kan tlulut tawh a. Vawi tamtak ka lo hnar thin kha, rei tak kan inzinbo san avanga kan inthlakhlelhna chuan a rawn hneh a. Insumzo loa kan taksa kan inneihtawn atang chiah khan kan inkar chu a nghet zual sauh a! Thikthu erawh ahma aiin kan pe chhe ve ve. Kar thum danah te kan inhmuh avangin kan chance neih chu kan bawhpelh ngai lo. Sex chuan kan pahnih chungah thuneihna a nei tlat tawh a! Han hnawl leh hnuhnawh turin kan chak tawk lo si a.

.

Kan zo a, damdawi min pe a. Ka ei a. Ngaihtha takin kan awm leh mai a. Chutiang nun chu a tha lo tih hrereng chung siin ka hnar phal ngang si lo. Zantin kan pahnih nun kawng chu ka chhut thin a, a dik lo a siamthat a ngai tih ka hria. Mahse, siamtha tur chuan keima thawhrimna chauh a tawk zo si lo. Min hmangaih tih hi confi takin ka sawi ngam, mahse, innei tur êm chuan kan la puitling tawk lo. Sex hmang ngam khawpa huaisen te kha innei ngam lo tawk vela dawihzep kan ni leh si!!

.

"Ruat, ka nuten Shillonga min dah an tum a" a rawn ti dût dût a.

.

"I kal daih ten, engtin nge ka lo awm anga?" 

.

"Chhuanlam ka siam char char reng alawm le"

.

A chhuanlam siam chu a chhungten an pawm thei lo aniange..thla khat lai chu Shillongah a awm ta. Kan inbe awl lo a. Thikthu chhe tak ka nih vangin ka titau thlem chu a hnapui ber ani mai e. 

.

Zan khat chu " Rin, ka rai!" Ka ti a. Phone atang chuan a rawn thaw hawk ri chu ka hre thei.

.

"A va mak! Damdawi i ei ziah sia"

.

"Shillong i chhuk dawn zan khan ka ei loh kha"

.

"Ni dawn tak" a ti tawi tak a. Chumizan chuan kan hmalam hun tur sawipui ka duh a. Mahse, helhkam lian tak nei ang maiin a țawng a sak tlat.

.

"Lo haw vat ka lo tum ang. Chumihma chu lo inthup hram hram rawh" a ti a. Ka pawm lo thei lo.

.

Thla khat a liam leh țep ta. Ka mangang ru kher mai. Tumah chuan min la ringhlel lem lo chuan ka hria. Ani lah chu exam a ti thul, Shimla a an zin te chhuanlamah a hmang thul! Ngaih a țha ta vak lo. Ka rilru hah vang nimaw...chaw ka ei thei lo em em a. Ka cherin ka dawldang sawt viau! 

.

Tlai khat inchunga ka puanpho seng tur chu stepah ka lum pek a! Ka pilh nin nian tih loh chu hliam dang ka nei lo. Mahse, zanah chuan namen loin ka pum a rawn na ta a. Ka vial ka vial ta mai. Ka va inthiar a. Karei!! Thi khar hlawm lian pui pui a rawn chhuak ta mai. Ka tai lah chu a sat in a sa hum mai mai a. Thil pakhat chu a chiang ta. NAU KA CHHIAT tih hi.

.

Ni 2 hnuah chanchin ka zuk hrilh a. Ka beisei loh lutukin " I titla anih kha..ka rin dan chiah ani. Nang nen inzawmna kan nei tawh lo e" a rawn ti ta a!! Boruakah ka leng vâwn vâwn ni mai hian ka hria. Na tak ka ni. Rilru hah leh mangang reng renga tuma hriat loha ka inkharkhip lai te khan eng nge ka tan a tih? Lo haw tura insawi reng si kha a hmel hmuh tik a awm si lo. 

.

Kar khat chhung chu milim ang maiin ka awm thin a. Ka chhungte ngaih a tha lo tih pawh ka hria. Ka inthunun thei thlawt si lo. Ka thuruk chu ka sawi ngam bawk si lo. Kan huanah ka chhuk ziah a. Huan mawng fai laiah chuan hmawlhte kawkalh ka siam a, ka phun a. Ka naute thlan tiin ka rilruin ka vawng a.

.

"Ruat, Rinpuia kha Judithi nen an ni a. A inluahah nupa ang chiahin an khawsa mawle" titu ka thiannu aw ri chu hla ta riai riai hian ka hria a. Ka mang vek. Ka kehsawm vek ...ni e, kehchhe leh tur chuang ka awm tawh lo.

.

Hun a liam a. Kum a ral a. Ani pawh a rawn haw a. Veng khat kan nih vangin kan inhmu lo thei lo. Min be lo a. Ka be bik lo. Ka tawrh chu a nasat êm vangin Christmas chu ka pute khuaah ka hmang a. Chutah chuan hmangaihtu ka tawng a. Mahse, ka hmangaih let ngam tlat lo. Sex a fihlim lo, Rinpuia khalh chul hnu leh nau chhiat tawh ka nihna hian tu mitmeng mah min hmachhawn tir ngam lo.

.

"Ruat, i dam em? " rawn titu chu amah kha a ni a. Ka reply lo.

.

Ka haw hnuah chuan, zankhat chu dawrah top up thun turin ka kal a. Dawrah chuan a lo țhu ve kur a. Let leh na chi ani si lo a. Ka thun zawhah rang takin ka kal sawk sawk a. Umzuitu ka nei tih ka hriat chuan ka lo tlai tawh a. Ka banah a rawn chelh a. Mitmeng hriatthiam theih loh hian min melh a. 

.

"I bialpa nen chuan hun in hmang nuam thin maw? A fa chu titla ve tawh suh aw" a ti chang fak a! Khaw vawh vang ai mahin ka khur a. 

.

"Aw tehreng mai..nangpawh i bialnu raipuar lai in phatsan tawh suh" ka ti nghat a. A kut chu ka thing thla a. Ka hnungchhawn ta a. Shillonga a chhuk leh vat lo chu mak ka ti deuh a. Mahse, a chanchin chu ngaihven ka tum eih lo. Ka na tawh a. Ka induhtawkna te ka neikir leh tawh. Phuba chu ka la lo anga. Mahse,ka hmakhua tur chauh ka ngaihtuah a ngai a ni.

.

Huanah ka thu a. Ka naute thlan chu ka melh reng a. Ka tlawh khat hle tih ka hria, ka inthiam lo deuh a.

.

"Naute, lo piang ve la chuan vawiinah hian nangmah vang pawhin ka nui anga, i pa min phatsan na pawh ka tuar thiam deuh tur" tiin ka phun sep sep a. Kut dam tak hian ka koki chu a rawn vuan a. Ka han hawi chhoh chuan,mit sen ram kara inthiam lohna chu ka han hmu a.

.

"I cousin Rinmawii khan nau i tihtlak thu leh bialpa i neih thu min hrilh lo nise vawiinah hian kan naute hi kan chân lo tur" a ti thawp sat a. Mak tiin ka lo meng phar a. Rinmawii chu ka rai thu ka hrilh tak kha le..ka mirin awmchhun anih vangin amah chauh ka hrilh anih kha.

.

"Ruat, na ka ti lutuk a. Rawn haw tuma ka inbuatsaih mek lai ani a. Mahse, ka thulh leh ta zawk a. Zantin hian i bialpa nena inchetla dun tur ka mitthla a. Ka țap thin. I taksa leh rilru hi ka ta ani. Midang ta ni turin ka phal lo" mipa biangah mittui a luang a. Kei chu ka ngawi reng. Sawi tur ka hre lo. 

.

Chumi zan chu 17th July ani a. Nunbul ka țan that leh na leh vawiin thlenga ka hmangaih vanga ka hlimna ințanna bul a ni. Mak tak maiin ka nau chhiat zan nen a hun a innag chiah bawk!!

.

Tunah chuan ka nui leh thei ta a.☺

.

(Toni tihtur hre lo ..ziah mai mai ania. I chhiar chhuak a a lawmawm ve tho e.