Thutiams2- 9

THUTIAM(S2)- 9

Ziaktu: Toni Râlte

"Hello, " Rki chuan Sasa call dawn chu a lo chhansak a. 

Lehlam ami chuan, "Sasa-i a ni em? " a rawn tih chuan,. 

"Aih, a thiannu ka nia, a muhil rih a" a ti a. 

"Nih chuan nakinah ka lo be mai ang" tiin a dah zui nghal daih. Rki pawh chuan a dar san ak chungin a dah ve nghal a. 

Shalomi chuan Sasa dp melh vang vang chungin, "Ka nau ai chuan i hmelthat hran loh hi.. Mapuia chu i nei dawn bik reng reng lo a nia. Ateii hi mipa vangin a la ţap ngai lo. A mittui man hi i pek ngei a ngai ang" a ti sap sap a. Shalomi hi sawi tawh angin pawisak nei em em lo, hruanghruau ve deuh mai a ni a. Tawngkam thiam tak, mi dang tlawn thiam leh tilungawi thiam tak a ni roh a. Fb-ah lah a friend list a full pap tawh a.Chutiang avang te chuan, thei ta riaua inngaiin, eng emaw issue lian tak a lo awm te hian thu te ziak kur ve ngei nguai thin a, faktu an awm lo thei lo va; chu chuan amahah inrintawkna a tha lo zawngin a neihtir a, a thu leh hla te chu ngaihchan hlawh viau angah te ngaiin mi vanduaina leh vanneihnna remchanga hmanga thu neih ve sek te hi a tih dan a ni thin. Theih loh neih duh loh anga langin, mi inkara hèm han thlak mai te chu chin thanah neiin ngaihsanawm ta riauah a inngaih phah ta a ni. A thiamna te a tha zawngin hmang se, mi dang tan malsawmna a nih dawn tehlul nen. Tin, a rukin ruihhlo a ti ve nasa a. Mahse, pawn lamah erawh beramno ang maiin, Zu in thin hmeichhia te deusawhna lamah chuan thang a chhuah var var mai. Pawngsual an awm apiangin a hmeichhiatpui thenkhatte nen pawngsual tawk mek chu an lo lepse ta thin a. Mipa laka mark that tum ranin, "Kan incheina hi uluk ila, zu in mi hmeichhia te chuan pawngsual a phu ve reng alawm" tihte chu a ţawng duh dan a ni thin a. Mi thenkhat lahin an lo thlawp ve tum hrang a, a tawng thei si a, lamţang siam a thiam bawk nen..pawngsualtu tan hian a nuam thin awm mang e aw.. Chutihrualin Victim tan chuan ngeiawm tak tur a ni. A chhungril nun kha leh tûr chak tak kha mi mithmuhah sual kai lo ang maia a lantir leh theih vanga vawiin thlenga la nui thei a ni. Shalomi ang hi kan tam ang.. Chapo leh mi ten an ngaisang ta viaua inngai te, nihna lo pui anga langa chhungril nun bawlhhlawh khuhbo tuma silhfen zahawm inbel thinte pawh hi kan kat nuk ta ve ang. Mahse, Shalomi'n a hmachhawn tur Sasa hi Shalomi letling chiah a ni thung a, A nihna anga a lang ngam leh dik nia a hriatah tumah hlau ngai lem lo Sasa nge chak ang A dera nunga fin kherek chhuah thin Shalomi tih chu hunin a la hril ang chu maw.. An inkarah Mipa dik tak Mapuia a la ding ve cheu bawk nen.. 

Remi leh a nî Nguri chu an thu dun ran a. Remi chuan nuam lo a tih hmel kher mai. Nguri chuan a vahnu melh kar chungin, "Heng hi engtia thleng nge? I nu leh pa te bula i sawi ngam loh thlengin min hrilh la ka duh. Ka pui thei ang che. I la naupang a, hmabak tam tak i nei.. Heti ringawta i vanglai hun i hman hi ka remti thei lo " a ti dam thlap a. Remi chu a che sek mai. Nguri a serious em avang chuan, "Ni, dik tak chuan kei pawn ka duh bik lo hetia awm hi.. A chhan ka hre lo. Ka inthunun thei thin lo alawm" a ti ta a. A zah hmel viau. 

"Kum engzat i nihin nge sex i hman? " a lo ti khauh. 

"Kum 14" a ti zawi sap a. 

"Ţhanthi i nei tawh em? Chutihlai chuan? "

"Nei lo. Mahse, sex kan hman hnu lawkah ka nei a" a ti ta a. 

A nî ţawng leh hmain, "Nî, miin ţhanthi neih hmaa sex hman chuan an hur hlen duh an tia.. Chuvang a niang. A nih i ring em? " a ti ta sek sek a. Nguri chuan khap daiin, "Bawihte, dâwt a nih chu. Ţhanthi neih hmaa sex hmangte hi an hur hlen lo. Mizo ten dik emaw kan tih kan thanhnan vang mai mai alawm. A ni turah kan ngai a, nang pawn mi sawi i hriat atangin khawlo hlen turah i inngai tlat a. Chu i rilru chuan a kaihhruai tawh che avangin insum buai i tum tawh lo va, piangsual anga inngaiin sex chu i palzam ta viau zawk a ni e. Siamthat theih vek a la ni. Enkawl leh counselling i la mamawh mai chauh a ni.. " a ti ta dap dap a. A vahnuin thi a neih hmaa sex a lo hmang erawh pawi a ti vawng vawng mai. 

"Mahse, mipa nena kan awma min mutpui an tum hian, ka virgin tawh lo tih an hre sa vek a.. Lo ţan luih vak khan min nuihzat mai mai ka hlau thin a. Bakah a nawmna ka hre tawh a. " zak chung chung chuan a ti ve a. Chutiang em ema inbunruahna a la tawng ngai lo. A nu leh pa ten chutiang zawngin an la kawm ngai tlat lo va, a thiantha te bulah lah a sawi ngam bik si lo. Nguri hi a zah em a, bakah a chhan a hre lo, engkim a sawitir zel thei hi. 

"Umm ka hrethiam alawm. Mahse, Sex hi infiamna a ni lo a nia. Kan nunkhawchhuahna hriltu a tling asin. Hmeichhia i ni a, i thinlung tih lohah chuan mipa tana i hlutna tehna langsar tak chu i taksa kha a ni. Mipa nazawng bula i inphalrai khan engmah i hlawhchhuak lo. An hmangaih phah chein an zui duan duan lo che. An châk changa inhrikthlakna hmanrua atan chauh an duh ang che. I inhlan theih loh avanga nuihzata hmusittu che an awm a nih ngat chuan chu mipa chu mipa ni tlak a ni lo a ni mai. Tin, a tam pawh an tam lo khawp ang. " Nguri'n a tih lai chuan, "Bialpa nghet te lakah hian a nih? " a lo ti khauh a. 

"I chesual tawh a. Vawi khat kha a tawk. I chetsual tawh remchanga hmanga i pelhe lehzel chuan kawng dik zawhna chance i nei dawn lo asin. Bialpa nghet, fel tak nei la.. Sex hmanpui che a tum pawhin, 'Kha chen ka lo awm khawlo tawh a. Min venghim zawk rawh. Nun pangngaia nun ka duh' tiin ngen la, a hnar che a nih chuan i ta tur a ni lo tihna a ni mai. Hmangaihna hi ropui deuh mai ania sin. Mipa, nangmah venghima sual kawng i dai hlau reng renga thununna lekkawh thin chuan a hmangaih satliah lo che a, i thlarau thlengin chhanchhuah a duh tihna a ni ang. " A ni chuan a ti leh ta mawlh mawlh a. Remi pawh chuan dik a ti viau. Nauteii nen inrual mah se, tawnhriat a ngah tawh a, ningkhawng pawh a hre zawk. A chhungril nun sihhnipzia leh nem zia chu a mahin a inhria. Chhuah a chak ve fo, khai chhuaktu a hmu si lo chu a tihngaihna hre loin a hmuh theih tawk hlimna nia a hriatah a tal ta chiam zawk a ni. 

Nguri pawn Zoteii leh Rinfela bulah Remi chungchang chu sawiin, zanah chhuahtir tawh lo tur te, a kalna en uluka a thian kawmte thlenga fimkhurpui turin a chah mawlh mawlh a. In chhungkhurah sex edn sawi tama fate zilhhau tam tur te pawn a hrilh a ni. 

Zoteii lah chuan, "Chutiang sawite chu a.. A hurthlak em mai. A sawitu nih pawh a zahthlak" a lo ti khanglang. A monu a lutuk chu Nguri chuan pawi a ti. 

"Khatianga nangmah anga zahmawh anga ngai tlat an kuh ţun vang alawm Remi te ang rual lek lek virgin lo, mipa hre em em an tam a, naupangtea nau an pai thin. Chu mai a ni lo, HIV pai an tam tawhzia te hi.. In chhungkhur atanga bul kan tan lohin khawi atangin nge kan tan ang? Lo zak tawh reng reng suh. Engmah i hrilh lo chung pawha i fanuin virginity a ngaihlu miah lo leh sex a addict thei hi zak zawk rawh.. " a ti ta zèk a. Zoteii'n a chhang ngam tawh lo. 

Rinfela pawh chuan, "A dik chiah.. Ngur, i sawi dikĺ Kan lo harh har lutuk a ni" a lo ti ve a. A nau mah nise, Nguri chu a zahder thiam tlat. Remi pawh uluk zawka enkawl tura intiam chungin an inthlah ta a. 

Nauteii lung a leng ţan. School kal a chal tawh hle ringawt. Sangpuia nen inbe kur dup mah se; inhmuh theih loh chu a ning. Bakah a pu te a ngai tawh. A pa bulah a rukin hawn a ngen ta tlut tlut a. A pa lahin, "A la hun lo deuh, naute.. Dawhthei hram hram rawh" a lo ti si. 

"Anu bulah min sawisak la, school kal ka ngai tawh sia, keimahin sumo-ah min thawn haw mai r'u" a la ti hram. Lawmsanga pawh chuan a fanu chuti taka haw chak chu tiin Nguri a sawipui ve a. Nguri pek chuan, "A bialpa a ngai tawh a nih chu.. " a lo ti si. 

"Tu a bialpa maw? Kan naute hian bialpa a nei a maw? " a lo ti hû! 

"Hrilh che ka tum reng a, hun a la awm lo alawm. An School-a an zirtirtu nen an inngaizawng alawm" a lo ti a. 

"Kan Hmangaihzuali mai mai chu'h! In chhungah naute angin a awm a. Pawn lamah a lo lerh hle a ni maw? An sir te a ngaihzawn ngam vei a" Lawmsanga mi butut chuan a ti leh ta mai. 

Nguri'n, "Khaih khaih, insûm thin teh. I fanu hi kum 17 a hnaih ve thuak tawh a, Ngaihzawngte chu a nei ve bawk ang chu. A neih avang khan a va lerh tihna a ni lo. Em em che hian" a lo ti a. 

"Aih, ka duh lo. Kum 20 a nih hunah chiah nei rawh se. Pasal neih pawh hi ngai ka ti lo" a la ti khur khur. Nguri nuih a za. Lawmsanga chu a mawl vang a ni lo, a fanu hi a duat êm a, a lakah rilru a sèng nasa si a, mi dang hnena dah kha a ngaingam lo a ni zawk. 

"Nei rawh se.. A pawi lo. Tawnhriat neih te hi nakin zelah mi dang kan puihna tur kawngah pawh a tangkai ve fo asin. Bakah An Sir hi ka mi rin zawng tak a nia. Kan Naute hi chutin i hlauh angin a tichhe lo vang" a lo ti a. Achawii a lo lan avangin an ngawi ta rih. 

Mapuia pawh a rilru a chawl lo. Sasa chanchin a ngaichang reng a, a thinlunga lian ber chu a chiang ta hle mai. Ni e, Sasa chu a lo hmangaih takzet a lo ni. Ateii chuan a rilru kilkhat pawh a chang pha lo. A mizia erawh a ngainatawm a ti reng. A thian nise a duhtawk viau mai. Rki'n a harh deuh thu leh inbe tura a duh thu a rawn hrilh chuan a call ta vat a. Aw thâm chhil chhel hian a lo chhang a. 

"Thil i ei thei tawh em? " a ti a. 

"Umm.. Thei ti ila a sakhat lam an la phal chiah lo va. Hnahthial chu a nuam em? " a rawn ti ve a. 

"I tel lo chuan khawi hmun mah a nuam tak tak thei lo" te chu a'n ti ve a. Chutiang tawngkam chu a hmang ngai tawp si lo, a lo luangliam ve deuh a niang e. Sasa chu thei leh thei lo hian a rawn nui a, a hlim tih a hriatna ringawt pawn Mapuia ngeng a chhun pha nia! 

"I luck awm sia.. Betu che i nei leh nual tawh lo maw? " a ze ngaitè bawk chu.. Mapuia pawh a nui tawp. A thikthu chhia hi chu a reh ngai dawn lo a nih hi. Mahse, Sasa hian thikthu nei ta miah lo se, an inngaihzawnna chu a boring viau maithei a ni. 

"Nei vak nang. Kei aia tha an lo tam lutuk a. Awm ve zawk la chu min lerhsan daih ang" a lo ti ve a. 

"Lerhsan ngam chi pawh i nih loh kha a.. I sual si, luhlul si" a rawn tih chuan an nui dun hawk hawk a. 

Remsanga leh Achawii te fapa Dina games atchilh lutuk chu a buaithlak lam a ni e. Chaw pawh hi a ei hman ţâwk awm e. Zing dar 3 dawn dawn te an inkap a. A hun awl zawng zawng chu games khelh nan a hmang tih theih a ni. Achawii a âng hlak hlak reng mai. College an chawlh lai a lo ni ve kher bawk nen. Chhawr theih pawn a awm si lo. Hauh a sawt mang bawk si lo.

"A manganthlak tehzawng a ni e. Mut nachang hre lo, thawh nachang hre bawk si lo kawl hi chu aw.. I mit te kha a la del mai ang. Khatiang renga i awm chuan" Achawi'n a ti hlak hlak a. Dina lah chuan, "Nianwm.. Ka hun awlah bak ka khel lo" a lo ti hlur a. 

"I hun awl chu i chhungkaw tan tangkai takin hmang ve ta zawk che. I bialnu pawn a nin tawh che kha.. I be ngai si lo, i ngaihsak si lo.. Then daih che se la a tha ang" a nuin a tih chuan, "Pawi lo.. Nge games khelh laklawh laia min lo biak ve sek zel.. Ninawm" A lo ti hmiah. Achawii a chek hlak hlak ringawt. Dina ang hi kan tam mai. A bikin mipa.. Chhungte zarah phone tha pangngai an nei a, tangkaia hmang mang si lo hian, games khelh nan an hman loh pawn social media-ah tu tu emaw an troll a, an sawichhe luai luai a. A hahthlak lam deuh zawng a ni e. An games khelh atang te hian pawisa thawk chhuak ve tal se a tha tur, thawk chhuak tur khawpin an pro leh tak tak chuang si lo. Hetiang mihring hi chhung tin hian kan kawl fur awm e. 

"Mapuia hian games te a atchilh ve em? " Achawii'n Nguri bula a tih chuan, "Atchilh pakhat chu a nei. A pa atanga a chhawm ar sual huai vulha in sualtir hi.. Ka simtir thei lo chu a nih hi" Nguri chuan a lo ti ve a. 

"Awii chungte chu a la zia lutuk. A hun zawng zawng a hmang nang. Kan Dina ve hi zawng" Beidawng zetin a lo ti a. 

"Nia, a phone te pawh saw a ar man atanga a neih ve a nih saw.. Mahse, ka support em em lo, an zuk inbet-na hmunah hian mi hruanghrau pui pui, kawlhsen tak tak an tam ve thin sia, awmna hmun azir hian kan lo danglam ve bawk nen.. Ka ngaihtuah thin teh mai a nia" Nguri chuan a ti a. 

Nauteii pawh a ngen nasat em vangin sumo-a thawn haw ringawt chu an hreh si a, Mapuia nen an haw dawn ta a ni. Nguri te nupa erawh a nu thihcham thleng an cham ang. Nauteii a phur tawh nasa, a tilang hreh ve deuh bawk si. An insiam laiin, "Û, nang pawh a ruk tak chuan hawn i chak reng sia, khatia inlak ngui vak a ngai lo. I bialnu i ngaih ve tho kha" a ti sar sar a. Mapuia a nui huk, "Chak vanga khik reng tur a nia mi? " a ti khauh a. 

.. "Ka khi reng a mi! " ngaihthat loh hmel deuhin a u chu a en a. 

"Aw.. I khi sûng reng a. I helhhawlh bawk si" a lo ti chu a u a ngei bawk si, zak ve deuh bawk si a u chu a chum ringawt. 

Remi a rawn lut ve hlawl. Mapuia chuan a lo melh zauh ringawt. "U Mapui, engkim kha ka tihpalh aw" a ti a. A hmelah zahna a chambang bawk. 

"A ho lutuk. Fel deuhin lo awm la, kum tawpah i rawn zin dawn nia" Mapuia chuan a lo ti a. 

Nauteiii pawh chuan, "Nia, lo zin rawh. Huanah kan kal dawn nia.. A nuam rap" a lo ti ve bawk. An unau inpawh leh inngeih tak chu Awt zetin a thlir reng ringawt. Mahse, Mapuia a duh rukna kha a la kiam chuang eih lo. Mipa a nihna anga ìt ni loin hmeichhiain mipa a duhna ang hian a duh ve tawp a ni ber. Sawi ngam chi a ni tawh der si lo. 

"Naute, i u hian bialnu a nei tiraw? " mapuia chhuah zawk hlan chuan a ti a. 

"Nei e.. A dam lo a, a hmeltha tawp. Mahse, a te ve reuh lutuk" a lo ti sam êt a. Remi chu a na ve vawng vawng mai. Engmah a sawi tawh lo. Nauteii chuan Remi mood chu a hrethiam pha teuh bawk si lo. He nau ât dan hi chu,.. 

"Aw hello" Sasa chuan a ti a. 

"Sasa.. Min hria em? " mipa aw in a rawn tih chuan, "Hre chiah lo" a ti a. 

"Nia hre lo maithei. Ka number hi lo save ve rawh aw.. Remruata ka nia" a rawn tih chuan, "Tu Remruata nge aw.. " a lo ti. A

"Nakinah whatsappah ka rawn sawi ang. Min lo save ve phawt teh aw.. Khawngaihin" a tih rualin a dah daih. 

Shalomi bulah, "Chuan, tikhan engtin zel.. Ka thiam tawh lo a nia" Remruata chuan a ti a. 

"Lungngai suh. Ka awm alawm.. Tikhan i be zeuh zeuh ang a. I star thu te i hrih zeuh zeuh ang. Hmanhmawh lo la.. " Shalomi chuan intifing zetin a ti a. 

"Umm.. Mahse, min duh ve kher nang" a lo ti. 

"A duh ve kher che a ngai lo. Bia la a tawk a ni mai. Ka hrilh zel dawn che lawm" a ti hlar a. 

Remruata chuan, "I bialpa ka ni ve a. Mi dang be tura han intih daih chu.. A mak thei ee" a ti nang nang a. Shalomi a nui hawk hawk, no zeta a bialpa melh chungin, "Tu emaw tan kan thawk alawm. Ka nau an tihnatna man ka thing dawn chauh a ni.. Nangmah i rintlak ber a, chuvang alawm ka tihtir che.. I fel kha duat" a han ti sar sar a. Remruata amah aia kum 4-a naupang ta chu a lo nem ve leh diai mai. Remruata nen hian thla 2 chiah an la inngaizawng. Amah Shalomi hian group atangin a hria a, a bitum chat. Amah aia naupang ngaihzawn hi nuam a tih piah lamah a bum theih rual vel an ni a. Tunah hian Remruata chauh lo mi dang pawh a kawp ru reng. A hmelchhe lo va, a zei reuh bawk si nen. Pawisa a ren lo viau zel bawk a, mipa pawn an hnar thei ngai bik lo. 

A plan chu a hriat theih ta ruak e. Mapuia a biak pawh si avangin Sasa va biak leh kha a tihchi dawn loh tih hriain Sasa tibuai turin a bialpa a ruai ta rup chu a nia. Mi pangngai tih chi a ni chiah lo naa, Shalomi erawh chuan fing taka ti angah a inngai tlat mai si a. Bialpa te han tawktarh mauh mai pawh chu.. Hmeichhe pakhat a tling ve reng reng e. Sasa pawn Remruata number chu a save ve ta nge nge a. A ngaihtuah zui hran lo. Mapuia a rawn haw dawn tih a hria a, a hlim a, a thawveng em em. A beisei phak loh an boruak tha leh ta chu thi chhawnga thawh chhuah a ngai tih a hai lo va, thih erawh a tum nawn leh tawh lo vang. A awmzia chu Mapuia hi a lak atangin a kaltir tawh ngai dawn lo. Chu chu a tum nghet bur mai a ni. 

Sumo chhungah driver berin cigaratte a pet vu a, an hnunga thu lah chuan tuibur a pik puat puat roh nen. Nauteii pum ruak, nuam lo sa si chuan motor a rui ta mai a. Luak tur a nei bawk si lo. A uin a buaipui nasa ngang mai. Mapuia dawhtheihnain a tlin ta lo nge, "Ka pu, motor chhungah chuan meizial zu tawh lo ula, bakah thil rim na tuibur leh khaini te kha insum ve deuh teh u.. A zia lo em mai" a ti ta khawl khawl a. An ngawi dâk mai. Mi dang tana harsatna siam ai chuan insûm ve mai hi kan chenhona kawngah pawh a a lo tha em em a lo ni. Nauteii chau tawngkhawng chu a muhil ta bawrh bawrh a. Harsatna an tawk leh ta rih lo e. 

"Terin, ka bengbeh saw ka va hmu lo ve.. I khawih em? " Seni chuan a ti lâng lâng a. 

Terini chu roomah rawn lut vein, "Aih hmu miah lo. " a ti a. 

Seni chuan rum angreng deuha melhin, "I hmuh lohin tuin nge hmu ang? Tukinah pawh i phiat a. Hetah hian ka dah alawm.. Amahin a kal bo lo tawp ang" a ti hlaih hlaih a. 

. "Ka hmu miah lo tak tak" tim dai hian a lo ti leh a. 

"Kutkem nei hi chu ka kawl duh thak lo a nia. Ka bengbeh kha a man a tam sin, rangkachak ngat a nia. Ka ui teh mai a nia. I lak chuan tha takin min pe la, engtinmah ka ti lo vang che" a ti hmuar hmuar a. 

"Aih, Ka u, ka la lo tak tak.. Hmuh pawh ka hmu lo.. Dawt ka sawi lo" Terini chuan a ti ve mawlh mawlh a. Muanpuia inbual zo chuan, "Eng nge ni leh ta pek? " a rawn ti lut a. 

. "He rukrunu hian ka rangkachak bengbeh kha a lo ru khanglang alawm le.. Rawn la vat rawh. Lalrinmawi" Seni chuan thinrim zetin Terini chu a melh ran a. Terini chuan, "Ka lak miau loh chuan pek tur che ka nei lo. Pathian hmingin ka sawi ang, ka la lo tak tak" Muanpuia nena melh tawn chungin a ti a. 

"Seni, nangmah hian i dahna te i hai a ni zawk lo maw?"Muanpuia chuan a ti a. 

"Nge maw ka hai ngawt ang le.. Hetah ngei hian ka dah.. Khawiahmah a kal sawn lo vang.. He nu hi dâwp deuh a ngai anih hi. Kha bengbeh kha chu ka ui teh ania. Ka hmu let tur a ni ringawt" Seni chuan a ti tân tân a. 

"Terin, i lo la palh a nih chuan tha takin pe la.. A man a tam ve sia, a ui ve a nih hi.. " Muanpuia'n zaidam deuhin Terini chu a hrilh a. Terini erawh a mittui a tling pam tawh, "Ka la lo sia lawm.. Hmuh pawh ka hmu lo. Ka piantirh ata tu thil mah ka la ru ngai lo" a ti a. A ţap lek lek tawh a ni. 

"Stationah hruai la, han dâwp rawh u" Seni'n a tih chuan, "Nangmah khan ngaihtuah teh. I dahna i hai a nih ka ring. Terini hian dawt a sawi ka ring lo" Muanpuia chuan a lo ti khauh. 

"Khanglang che u chuan.. Ka tan e te i tih le.. Zawnga" a ti ta mai a. Terini a awm si avanga insùmin Muanpuia chuan ngawih a chuh ta rih a. 

Tukthuan pawh Saii chuan a ei ve leh duh lo va. Candy hrai pahin Terini chuan a ei zawk zawk. An eina a sengfel mek laiin Saii thiannu Diki a rawn lut hlawl mai. "Khaw nge" a ti nghal a. 

Terini chuan, "U, U diki a lo kal" tha takin a ti a. 

Muanpuia pawh a la chhuak lo deuh. Diki chuan, "Ka awm rei hman lo, hei a bengbeh ka hawh hi ka rawn dah zawk.. Ka kal leh nghal dawn. Min nghak a" a ti liam puat a. A chhuak zui daih. Saii a rawn chhuak ve chiah. Muanpuia chuan Diki dah bengbeng chu la kangin Saii hmai bulah a va khai lang a, "Saii, hei hi tu bengbeh nge? " a ti hul hak. 

"Khawi.. Ka lo theihnghilh a nih kha.. Niminah a hawh a. Nizan an party dawn vangin.. " a ti a. Zak hmel a pu eih lo. Muanpuia run lutuk chuan bengbeh chu pe ta mai lo chuan chhuatah chuan a paih thla a. 

"Hrep tak che hian.. Dawt sawi pawh i lo hnehsawh hi. Tun hnuah mi tumah puhchhe ringawt tawh suh ang che. " a ti ram hmak a. Saii chuan bengbeh chu chharin, "Ka theihnghilh a ni mai lawm.. " a ti vin hlar. Muanpuia chhuak tur chuan, "Ngawi hmak rawh" a la rawn ti hram. Terini chungah a tuan leh ngeiin a rinawm. 

NilenginnTerini chu a tir kual ta chiah reng a. A kut a awl mang lo. Candy lo awm ve ngai bawk nen. Saii erawh thutthleng seiah muin a nui uar uar a, thil a ei pah a, a online char char. Nu nuamsa tak zawng a ni e. Mahse, fb velah chuan buai leh thawk nasa a inti thin teh e. Kan nihna tak pholan a nih ngai loh fo avang hian social media kal tlanga inteh tawpte hi bansan a hun viau a ni. 

MC kawta an unaua an din ran laiin Sangpuia chuan a rawn call a,"Motor parkna tur a awm remchang lo, hospital thlangah khan lo phei lawk mai ru.. In bawr em? " a rawn ti a. A u a awm ve si.. "Nge i lo kal a.. " a lo ti hlar. 

"Aw ka hmuak ve che.. Khawi i u ka lo bia ang" a la ti zui. A u chu phone a pe a, an inbiak chhung zawng a lo zak ngar ngar. A u chuan, "Phei ang. Taxi lah a ruak a vang si.. " a ti a. An bawr lem lo bawk a. An phei dun a. Sangpuia chuan a lo nghak vang mai. An thut luh hnuah, "Sangpuia ka nia.. " tiin Mapuia nen chuan an han inchibai chawpchilh a. Nauteii a lo lai em em zel. 

Mapuia phawk a chhuak ve nge, "Ka nau lungleng ka rawn hawnpui ringawt alawm. Hawn a ngen sek sia" a ti ta a. Nauteii'n a lo chhiatkhum a. "Ka ring a ni. Mi hi a ngai thei leh lutuk a" Sangpuian a lo ti ve bawk. 

Hmangaihzuali tihngaihna hre tawh si lo chuan, "In hmelchhe dun èm mai a.. In chhia" a lo ti hrep ringawt. An nui hawk hawk a. Hlim tak chuan an in lam chu an pan ta a. Mapuia pawn Sangpuia chu mipa tha tak a ni ang tih a ring thiam mai. A nau tan pawh a iai lo hle. A nau dawmthiama venghimtu mipa an nih phawt chuan a pawm thei vek mai e. In an thleng a, Sangpuia pawh a rawn lut ve. A zah loh vang ni loin Nauteii chhungte nena inpawh vat a duh ve tawh a ni. Pi Lawmi te nen an inhre sa tho bawk nen. Pu Mawia pawn a lo be ve suam suam mai. Nauteii motor chuang chau nen rei awm loin a hawnsan ta thuai a. Hmangaihzuali hlim rukzia an hre si lo. 

A zan a zanin Mapuia pawh a hmangaih hmu turin chauh pawh sawi loin a inkhalh chho leh ta vawn vawn a. A nu in a lo awmpui a. Mi dang an awm lo chu a lawm ru hle. Sasa pawh a lo thu mu a, a rin ai daihin a lo harh tha. A nu chuan thil awmzia hrethiam takin, "I lo kal ta sa sa.. Lo awmpui rih lawk mai ta che. Nichin khan kan veng pa Pu Rumliana an rawn dah lut ve a, ka zu tlawh lawk ang e" a lo ti sawk sawk a. Mapuia pawn a hnial lo kher mai. An pahnih chiaha an han awmdun takah chuan sawi tur a bo leh ta duak mai. An ngawih vang vang hnuah, "I chhuak ve thei tep tawh ang chu" a ti sup a. 

"Nia, ka ning tawh. In lamah kan inenkawl thei tawh awm tho sia" Sasa chuan a lo ti ve vat a. 

"Chuan, vawikhatmah thih tum tawh loh tur aw" Mitmeng thuk zeta melh chungin Mapuia chuan a ti a. 

"Ih.. Min kalsan chuan ka thi tak tak tawh ang" a lo ti a. Sasa kut chu vuanin, "Ka kalsan dawn hleinem che. Mahse, kan insiam that ve ve a ngai a ni" a ti ta a. 

Sasa pawh chuan, " A dik alawm. Engkim kha ka thiam loh vek a ni. Ka sual em a. Kei chu.. " a ti a. A hmelah pawh a inthiam lo tih a lang reng mai. 

"Kei pawn dik lohna tam tak ka nei ve tho alawm. Ateii chungchangah pawh ka lo runluih ve bawk che nen.. Amah thlengin a nat phah a. A pawi ngawt mai" a lo ti dam thlup a. 

"Nge a nat ve ngawt a? Ngaihzawn pawh in inngaizawng hleinem" Sasa zia a lo lang leh ta. 

"Nia, amah khan bialpa treatin min lo treat ve tawp a.. Ka hrethiam tawh lo. " a lo ti ve mai. 

"Tak taka kan duh deuhte lakah hi chuan beiseina hi a sang duh bik em alawm.. Ani pawh a tha mai ang" a lo ti ve leh thliam a. Sasa sam darh niaih zutsak pah chuan, "I mizia hi thlak la ka duhna leh thlak lo la ka duhna a inchen chiah. Thlak ta la, Ateii te mizia ang nei la a boring ka ring si, thlak ta lo la.. Kan inhauh leh fo ka hlau bawk si.. " a ti sup sup a. 

"Mapui, mizia hi chu thlak hlawk a harsa a sin. Ka mizia hi harsa taka ka neih a nia, ka hlimpui theih awmchhun a ni thin. A hma chuan Ateii te ang bawka zakzum leh zawiawi ka ni ve. Mahse, ka upa ve zel a, tuna ka ze tel lo hi chuan ka tam damkhawchhuah a harsa dawn tih ka hria a. Ka chapo anga miin min ngai te, thawveng leh ri phawr phawr anga min ngaihna te hi a tak takah chuan a ni vek lo ania. Hetianga miin min ngaih hian an ngaihdan ang taka awm ka tum thin. Chutianga ka awm chuan ka confi sawt a, ka chak sawt zel" Sasa chuan thutak zetin a ti ve a. Mapuia pawn a ring thlap mai. 

"Nia, mahse, kan inkarah chuan chapona leh luhlulna hian hmun chang lo se, mipa zawk ka nia, ka upa zawk bawk a. Ka thu zawk ang.. Chu chu i pawm ve tur a ni" a ti a. Sasa a nui kar kar, "Umm.. Thu zawk rawh. Mahse, thu ve chang ka nei ve tho ang" a la ti hram a. An nui dun a. An hlimna chu a alh ve leh ta hlep hlep mai. 

Mapuia chu kun hniamin Sasa chu a fawp zauh a. "Damkawr laia infawh chu ka confi lo, ka thaw a uih palh ang" Sasa chuan a lo ti a. Chutiang a mizia ri pawp pawp tak chu a nia Mapuian a lawm em em thin si chu.. 

A nu a rawn lan takah chuan Mapuia pawh a haw ve ta a. A chau ve hle. Nauteii pawh kak zeta muin a lo hnar leh sûk suk tawh. Puan a sin thattir hnuah a mu ve ta chauh a. 

Nguri chu a muhil thei reng reng lo. A mumang mak tak avang chuan a thaw leh halh thin. Lawmsanga erawh Nguri kuah chungin a thaw sùk sûk a. Tihharh hlau deuhin a tho ţhem ţhem a. 

Ni e, a mumangah khan a nu a lo hmu a. Tuna an mutna khum mawngah hian a lo ding reng mai. A hmel pawh a pangngai vek. Lungngai hmel erawh a pu deuh. "Ka nu" Nguri'n a tih chuan, sawi duh nei, sawi thei si lo mangang hmel hi a pu a. "Nu, eng nge i duh? " a tih leh pawh chuan, a han ang zuau thin a, a tawng chu a ri chhuak zo lo niin a lang. Mangan hmel deuha a awm laiin a rawn thim tial tial a, thim chuan a nu chu a khuh bo ta vek a, Nguri pawh a harh zui ve ta nghal kha a nia. Mang awmze nei a nih a ring tlat! A tir phat atanga a lo rinhlelh rukna kha a rawn belhchhah leh a. A nu thihdanah khan eng emaw inphûm ru chu awmin a hria a ni. A chhan a ngaihtuah thiam mai si lo. 

Pi Sangi khan a dam lai khan a rilru thlak lehin an pain a tana a dah dawr hmun kha a hralh a, hmun thumah thenin hmun khat chu Rinfela a pe a, a bak chu Dini te leh a û te chhung tan a pe kha a nia. U leh nau inzawmna hi zawng a lo chhe hlen thei tak tak lo ve bawk a ni. Dini te pawn a nu sum pek hmang chuan sumdawnna bul an tan ve a. An hlawk chho ve viau, a u te erawh chuan eng emaw mai maiah an tlakral a. An beh ngaiin an pa bet ta reng mai. Pi Sangi pawn puih leh tumna a nei tawh lo, thahnem a ngaihpui tehlul nen rilru an nei lo lutuk chu a ngei ve deuh a ni. Sawi tawh angin Rinfela te hian fa pathum, Remi, Malsawma leh Ricky te an nei a. Pi Sangi hian a duatpui ve khawp mai. Malsawma phei hi chu Ricky nen an inhnaih chilh deuh vangin a pawm deuh chawt a, Malsawma tak pawn a nu te ai mahin a bel zing zawk awm e. Inngeih takin an chengho emaw tih laiin in hmun lo ram vangin an innghirngho chho ta zeuh zeuh a. Rinfela in luah man kha Nguri ac-ah Pi Sangi hian a dah lut zel mai si a, Chu tak chu Zoteii ngaihdan a ni lo chho ta a ni. Nguri nihna dik tak, unau dik tak an ni lo tihte a hre chho ve nen. A lo duhâm chho zel a, Rinfela hminga in leh lo la awm reng a ni bawk si a, An pa chu an in luah man la turin a nawr ta fo a. Rinfela hi mi pangngai tak, u leh naute thu zawm chi a ni si. An nupa inkar boruak pawh a chhe ta zeuh zeuh a. Pi Sangi'n chung chu lo hre thawiin, Nguri a be ta vat a. Ani Nguri lahin "An nupa inkar that loh ai te chuan kei te chuan cheng khat mah chang lo mah ila pawi ka ti hleinem. Kan mamawh tawk chu kan nei ve rih alawm.. Lo tifel rawh u" a rawn tih avangin kum 5 dawn chu Rinfela te kutah a lut tawh a ni. Chumi buaina kalzel leh tuna pi Sangi thih ngawt dan hi chu a inzawmin a rinawm si loh a. Nguri rilru pawh buai ve tak a ni. A nu chenpui te chu a mal mala thlur binga enthlak a tum rilru ta a. 

"Pi, ka mawza ka hmu zo lo. A nu hian a sukin khaw nge a dah le" Nauteii chuan mangang zetin a ti a. 

"Aw i nu be mai la. Bawihte" a piin a lo tih chuan a nu chu a call nghal.. "i form dahnaah ka bang lo mi? Chutah lo ka dah ngai hleinem" a lo ti si. A awm bawk si lo, a mawza hlui zawk lah a pain huan kal nan a that hi tiin a lo bunsak tawh si, han bun leh chi ziazang a ni tawh si lo. A men puai tawh mai. An chhung buai ringawt. Khawiah tak awm ang maw.. 

"School kal ngei ngei ka ngai asiii.. Ka ning" tiin thutthleng seiah kamiz ha vek tawh, kekawrte nena la awm siin a mu tau ngût a. An thlir reng ringawt. 

"In hotute ka'n be mai dawn mi? " a puin a tih lahin, "Silipar nen kal se min ti mi? " a ti hlar bawk si. Huiham.. 

A pu mangang chuan, Mapuia bulah, "Han tlansak zuai mai teh.. Chhuah chhoh chiaha Pi Tlani te dawrah khan an khai ve thinin ka hria.. " a ti ta nge nge a. Mapuia pawh chuan a nau mizia hriain, chabi a la ta vat a. Vanneih siamin an School mawza rawng chu an lo nei hlauh. Nauteii chu a pe ta a, mittui tla par chungin, "Ka lawm e" a lo ti a. 

"I bialpa kha biak mai tur ania.. A lo sawisak che anga.. " Mapuia'n a ti zauh. 

"I ninawm.. Min chhaih reng suh aw.. I bialnu a dam loh ve tho kha" a lo ti vin leh thak. A pi leh puten hmuhnawm ti zetin an lo thlir thung. Tukthuan pawh a ei tam hman lo, tlai a hlau bawk nen. A u in a thlah thei hram zawk a. An School a thleng chu a thaw huai mai. 

Mapuia pawh muangchangin class kal turin a chhuak ve ta a. Sasa nen an intext zeuh zeuh bawk. Sama nen bawk an inkawp leh a, Sama hi amah aiin kum khatin a u a, Mapuia ang lo takin a thau a, a zia hi a duhawm em em thung. Englai pawn a nui tih theih a ni. Tuman a pawi an sawi hlei thei lo, huat enah tumah a en ngai lo a ni ber mai. Ngaihzawng lamah a hlei lo nasa khawp a, an bil dun viau mai. 

"Ka hmu reng che. Class te i rawn kal ve tawh a.. " Ateii msg chu, "Nia, khaw nge in awm a" tiin a reply a. 

"Vawiin chu tiffin kan pai lo va, canteenah kan chawl ve.. Lo kal ve ula" a rawn tih chuan, "Sama'n sachek tuina a hria a, min hruai daih alawm" tiin a reply a. 

"Tunah khan tu bulah nge i awm mek.. " Sasa msg ve thung. 

"Sama bulah sachek ka hawp dawn mek" a va ti a. 

"Ei teuh teuh rawh.. I zâng si" a rawn ti zui! Mapuia'n a thil hawp lai a hák tep. He nu han chimawm theihzia hi chu aw.. 

Sangzuala khan tihbuai a tum viau kha a nia, khatia an inkar boruak a chhiat lai khan tan a la sateh naa, Sasa khan chiang takin, "Khawngaihin min ngaizawng tawh suh. Ka mipa duhzawng i ni lo. Bakah Mapuia hi neih let leh ka tum a ni. I bula ka nuih avang ringawtin ka duh che tihna a ni lo. Thian nih i duh chuan ka thei" a lo tih khum si a. A zakin na a ti a, a beidawnsan ta thlawt kha a nia. Mahse, mipa na na na chu amah Mapuia han huatzuina leh han er runna ang rilru kha a pu ta bik lo va, hmeichhia te zawng nise an inbakkaih lo chauh ang chu.. Mipa te hi zawng siamtu duan dan ang tak hian an rilru thlengin pui rukna riau hi chu an lo nei nge nge zel e. 

English subject a test ve hman tak loh avang khan a retest chu a ngai ta ngei a. Mi zawng zawng ban hnuah an roomah an pahnih chauhin an thu dun ran mai. 

Nauteii chuan zam chung chungin a ziak malh malh a. Sangpuia pawn tihbuai duh loin a hnunglamah a veng. Rei fe a reh tlawk tlawk hnuah, "Ka ning, a tam si.. Titlem ve deuh ta che. I bialnu ka nih hi" a rawn ti hlawl mai. A va pan hnai a.. Ziah tur a lo tam ve bawk a ni. 

"Aw.. I ziah chin kha dah mai rawh.. I thiam tho turah ngai ang" a ti dam thluam a. 

"Ka duh bik lo" a ti leh lawi si. 

"Hmanhmawh lo la, a la tlai lo ania. Hahdam deuh khan chhan tum rawh ka duat" a rawn tih chuan.. 

"Min duat loh hi" a lo ti sap. A biang taitek leh a zâm leh hmanhmawh vanga a chal thlan hliam te chu hmuhnawm ti zetin a lo thlir vawng vawng a. 

"Ka zo" a rawn tih chuan a va pan leh vat. Awiii a hawrawp chu a hmanhmawh vang ni maw a pherh nuaih mai. "I hawrawp chu aw.. " a ti nuah nuah a. 

"Aw.. I chhiar thiam tho ang. Ninawm.. " a lo ti hluk. 

"A tha lawm.. Lo indah fel la, ka thlah dawn che aw.. Ka va insiam ve lawk ange" tih leh paper nen chhuah a rual a. Nauteii chuan a rilruin, "Zirtirtu ve si, nge min duh ve vak le.. A mawl e" a ti nuah nuah. He nau zet hi chuh! 

"Bawihteii pawh a lian ve tawh bawk a.. Fa dang neih hi a hun tawh viauin ka hria.. Fapa ka awt a ni" Muanpuia chuan an nu bulah a ti surh surh a. Saii chuan, "Pakhat hi ka lo duhtawk viau asin.. A paitu nih loh chuan engmah in hrethiam lo" a lo ti hmak. Muanpuia rilru a na kher mai. 

"Chutia a paitu tur berin i pai duh miau loh te chuan pai duhtur dang ka zawn mai a ngai anih chu.. Fapa ka nei ngei tur a ni" a ti nghet charh. Saii a mangang leh si.. 

"I va zak lo tak, i rilru chu a tenawm hle mai. I duh tawkin va zawng rawh. Mai mai a na" a ti khawl khawl a. 

"Ka zawng ang. Ka nupui i nia, fanu pakhat chiah min neihsak a, i duhtawkin i inpenparh a. I nuamsa mah mah a, fa sen pawm leh pawh i hreh tawh anih kha.. Chuti taka zalenna hip i chak chuan i kal thei ka tih fo kha. Kei anga dawhtheitu che hi chu i damchhung pawn i hmu tawh lo vang" a ti ve ta sak sak mai. A inup rei ta bawk a, a puakkeh ve a niang e. 

"Tun laiah fa an nei duah tawh ngai lo. I pai ve lo va i hrethiam lo anih kha. Fa nei teuh ila chawm zo leh si lo ila eng nge kan hmabak? Bawihteii pawh kan chawm zo ţâwk ania" a la ti ham ham mai. 

"Ka hlawh hian fa pali pawh a chawm thei e. Nang sum enkawltu zawk hian hmang thiam hek lo che. Invaivur nan i hmang a, nupui angin i khawsa hleinem. Ka sawi peih tawh lo. Ka beidawng tawh. Saii, patlingin ka beidawng a tih hi chu a pawi thui viau ania. Mang tha le" tiin lehlam a hawi a. A maimichhing vang vang. Saii chu a la âng char char naa muanpuia chuan kam khat pawn a chhang tawh lo.. 

Sasa chuan nin hmel zetin, "He pa hi tu nge le.. Mi rawn text ve sek.. " tih pahin Remruata dp chu a en chiang a. A la hmuh ngai pawh a hre lo. A rawn biak atang khan a khat tawkin, "Ka duh che e.. I va hmel tha tak. " tih angreng a dawng deuh reng a. A chhang ngai hlei lo thung. Amah ang chiahin Mapuia pawn Shalomi msg a dawng ve malh malh fo.. 

"I bialnu Sasa nunhlui zawng zawng kha hria la chuan e.. A laka i rilru chu a let chiang khawp ang. Tualthattu a nih kha. Amah vangin ka cousin a thih phah asin. A nau tihtlak vangin" a rawn tih zan chuan a lo enliam mai mai thei ta awzawng lo va. Thil dang zawng aiin nau tihtlak mawlh chuan a kap ta tlat. Sasa zawh dawt chu a ngam chiah si lo. Chu nu thil rawn sawi chu a awih lo, mahse, chiang taka a rawn sawi ngam si chuan a rilru a tibuai si a ni. Sasa virgin kha a hawng a, engtin nge khami hmain nau a tihtlak theih ang? Tawnhriat lah a nei tlem nasa mai si a.. 

"Sam, hmeichhiate hian an virginity an loss hnu hian virgin angin an awm leh thei em? " tiin Sama a va zawt a. 

Sama lah chuan, "Virgin again a awm alawm. Mahse, a to ve an tiin ka hria. Doctor ten an siam thatsak leh thei a.. Ti nge chutiang zawhna te i neih? " a rawn ti a. 

"Ka cousin hian a hre duh a. Chuvang mai mai" tiin a chhang. 

Shalomi hnenah, "I mi sawi Sasa leh ka hriat Sasa hi mi thuhmun an ni em ka hre lo va, a thlalak lo thawn la" a va ti a. Shalomi hnen atangin Sasa thlalak, hlim taka a nui lai chu a dawng nghal zat.. A melh vawng vawng a. 

"Dawt a nih ka la ring tho. Chhui chhuah a harsa hleinem" a la ti fan a.. 

(Ka va ziak thui ve 😂