Thutiams2-23

THUTIAM (S2)- 23

Ziaktu: Toni Râlte

Vawiin chu Sangpuia'n School a rawn kal lo. Nauteii a ngui rawih thei. Nimin lama an boruak vang kha a nih a ring deuh. Phone a ken miau loh vangin biak ngaihna a awm lo. Msi pawh a zuai tan viau mai. A inngaihtuah harh ve ta deuh pawh a ni mahna. Kimkimi nen an la thu dun ta reng a, an inmil phian. An sawi duhzawng a lo inang ve bawk nen. Kimkimi pawh amah ang tho va thil sawi phawng phawng thin a ni a; an frank dun bawk si. Nuihna tur a tam thei khawp mai. Tlaiah Muanzuala'n a lo nghak leh a. An inphur leh ta poh. 

"Naktuk chu i thei ang tiraw? "A rawn ti a. Lenchhuahpuiah a sawm tak e. 

"Ka lo tum dawn nia" a ti ve mai a. Tunah rih chuan Sangpuia chiahin a thinlung a luah. Mahse, Muanzuala chu tihbeidawn nghal ngawt kha hrehawm a ti laklawh ve tawh si a. A tal buai chho tan chu a ni ta reng mai. Ama remhriatna a la rintlak tawk lohzia a chiang khawp mai. In a thlen chuan a nu a lo awm lo va, A pa leh a piin kawlbahra an lo ei mek a. A ei ve nghal. Apa chu a hmu thar riau hian a hria, a sam/lu a lo meh fai vang vang a ni maithei. A lo be suam suam a, an ei mek laiin a nu a rawn haw a. A inkhai bawr hle. A fanu melh chungin, "I inbual zawkah ka be duh che a nia" a ti sap a. Nauteii a bu nghat. A inbual lai chuan, nimina Sangpuia thinrim lutuk hmel kha a mitthlaah a rawn lang a. "Min hnek dawn emaw ka ti tawh a" tiin a phun sap. Nia, a thinrim thawkhat khawp mai. Virginity chungchangah an inhnial bawk si. A nu chuan eng thilah tak be duh ang maw.. A inthlak fel hnuah a nu te roomah chuan a lut ta a. 

"E.. Lo kal rawh.. Vawiin inzir tha em? " a lo ti sawk sawk a. 

"Tha ni mai" a ti ringawt. A nu chu a rawn kal hnai a. 

"Tu nge rawn thlahtu che kha" a ti ta a. A lo hmu a ni ngei mai le.. Nauteii chuan, "Muanzuala a nia.. Ih.. Msi bialpa thin" a ti zawi sap a. 

"Ti nge Msi a thlah zawk loh a? " a ti leh ta zel a. Engmah zep theih a ni tawh lo tih hriain a nu chu engkim hrilh vek law law a duh ta a. A thaw hak a, "Nu, sawi tur ka ngah mai" a ti te te a. Msi birthday an lawm atanga sawi chhoin nimina thil thleng leh Sangpuia nen an inbiakna te chu a sawi fai ta leng a. Chutia a han inbunruah takah chuan a thawl huai mai. A nu chuan ngun takin a lo ngaithla a. A fanu chu a en ngun kher bawk. 

"A nih chuan Sangpuia aiin Muanzuala chu i thlang ta a.. A dik em? " a ti ta khauh a. Nauteii a buai ta nak mai. 

"Ka.. Ka hre lo.. Ih, Sir chu ka thinrim rih em alawm. Mahse, ka thinrim vak tawh lo" a ti niah niah a. 

"Muanzuala i ngaihzawn chhan kha a dik lo phawt. I hmanrua a ni tih hre ta se, a rilru a na dawn asin. Tin, i thiannu Msi rilru i tina bawk. A tirah khan Muanzuala hnenah khan tha takin rinawm loh a that lohzia te hrilhin, be zui tawh lo la, Msi bulah pawh sawi zui kher lovin.. Engtikah emaw a la hrechhuak tho ang. Mahse, i hmanhmawh mah mah a. Msi hmakhua i ngaih luatah i hrilh vat a. Ani lah Muanzuala a duh luatah nang thlengin rinhlelhna a nei ta lo si che a.. A pawi vek. 

Sangpuia chungchangah chuan dawt a hrilh che kha dik lo pawh a ni maithei. Mahse, thudik hrilh ta che se la; i dawngsawng thiam kher ang em? I thinrim tho dawn ai chuan tiin i hriatchhuah tawh loh ringin dawt var a sawi ta mai a nih kha.. Kha kha a tihsual pawh a ni mahna le. Mahse, dawt a sawi chhan dik tak chu a rinawm loh vang lam ai mahin i nat leh thinrim a hlauh vang a ni zawk. A chang chuan dawt hi dawnsawn a nuam fo zawk thin reng a ni.. Mipa nangmah hmangaihtu che rilru nasa takin i hliam mek a ni. Ngaihdam a dil che a, bawihte, tupawh hian chance vawikhat hi chu kan phu vek a nia. Mihring kan ni miau a.. " Nguri chuan a ti ta dap dap a. Nauteii pawh chuan a ngaithla tha ngang mai. A nu thusawiah hnial tur a hre lo. 

"Nih chuan, Muanzela hi thudik ka hrilh mai dawn mi? " a t hap a. 

"Hrilh la, kalsan la.. Sangpuia hnenah kir rawh. Chu chu i thlang lo a nih chuan, Sangpuia thlah la.. Muanzuala tan rinawm thung rawh. Tin, Virginity kha chu fiamthu pawn sawi leh tawh suh ang che" a lo ti a. 

"Sangpuia chu ka be hmasa hreh eee.. Ka khawngaih tho nain, ka la ngei deuh bawk sia.. Aa.. Ka hrethiam tawh lo" buai hmel zet hian a ti hlar a. A nuin a lo nuih. 

"I inchhirna tur thil engmah ti suh. Sangpuia hi kei chuan ka ring ngam.. Mipa tha tak a ni tih ka hria. Mahse, rinhlelhna i neih fo dawn ai chuan, kal mai rawh. Rinhlelhna nena inhne reng inlaichinna chuan hlimna aiin hlim lohna min siamsak nasa zawk" a nu chuan a ti sap sap a. A han inngaihtuah vang vang a. Thutlukna felfai tak siam harsa a ti viau mai. Sangpuia chu a rilruah a lian em em nain, Muanzuala han then ringawt chu a ui ni berin a lang. Mahse, nakin thlenga a bialpa ni tur chuan a ring ngam leh chuang hauh si lo. "Zaninah ngun tawkin ka ngaihtuah ang" a ti ta ringawt a. 

A fanu chungchang an pa a han hrilh ve chuan, Lawmsanga chuan, " Teirawl lai a nia, han chet pelh nawk nawk chang te pawh a nei ve ang chu.. I dimdawiha i khuahkhirh leh lutuk chuan i tikhaw lo zawk ang e aw" a ti a. 

"Tun hi kalpui leh dawmkan an ngaih hun lai ber a nia lawm. Keimahah ka inchan a.. Ka tleirawl chhuah tirhte khan ka pa kha nangmah ang mai a ni a, ka tihsual vete pawh enliama palzam mai thin a ni. Ka nu lahin a hrin loh fa ka nih vang nge nunkawng dik min hrilh hre ngai si lo va.. Ka dai sual phah ta reng a nih kha.. Ka nulat chhuah thlengin ka thianghlimna kha hum thei mah ila, i hriat angin hmangaihnaa ka tluk luh khan ka chak zo ta lo a ni. Nauteii ka hrilh anga min hrilhtu nei ve ila chak takin ka hmachhawn ngei ang.. " Nguri chuan a ti ta a. Lawmsanga chuan a hrethiam ta deuh. 

"Nu i nia, i duh ang chuan enkawl rawh. Kei chuan ka duatin ka hmangaih lutuk a, nã ka siamsak ai chuan enliam zel mai ka duh sia" a ti ta nge nge a. Mapuia chunhchang pawh an sawi. A zir zelna tur chungchang te leh a bialnu thlengin. Lawmsanga chuan a pu dam lai ngeia tu hmel hmuhtir ve theih a chakawm thu te a sawi luam a. Mahse, Mapuia a la naupang deuh tih chu Nguri thutlukkna a ni thung. Mipa hi chu inneihna meuh thlentir tur chuan, kum 29-35 inkar hi nise nawrkal chawp an ngai lo tlangpui. Hmeichhia erawh kum 17 leka pasal nei te pawh fa an neih chuan an puitling deuh mai zel. Chutiang ang kum leka Nauteii pasal neihtir erawh an tum bau lo thung. 

Muanzuala msg, "Naktuk chu ka nghakhlel tawh. Ka helhhawlh aniang. Ka mut a chhuak thei lo" a rawn tih chu a chhiar a, a hmelah engmah a lang lo. 

"Nia chakawm tawp. Khaw nge kan len dawn? " a va ti a. 

"Khaw nge i kal chák? Lalsavunga park saw chu ka kal zing tawh sia, ka hne ve deuh a. Reiek lama kal i duh em? " a rawn tih chuan, Nauteii pawh a phur ta deuh. Reiekah a la kal miah bawk si lo va. 

"Umm.. Duh, mahse, a hla lo mi? Zan riahte a ngai ang e", a ti a. Muanzuala a nui huk. 

"Ngai lo vang. Nileng hun kan nei dawn a. A nuam ngawt ang. " a rawn tih chuan a thaw hawk mai. Sangpuia pawh khan la kalpui a tum tak asin mawle.. An kal dawn tih hria se engtin tak ngai ang maw.. 

A hrechhuak thut nge a status a zawng nghal a. 

"Miss you" tih chiah a hmang. Amah a sawina a nih ring deuh, ringngam si loin a awm. A va be ngam chiah si lo. Bakah a online lo hrim hrim. Ngaihtuahna thar a nei ve ta hlawl a. Naktukah Muanzuala a chhuahpui ang a, chuta a awmdan leh nungchang azirin a then ang… a duh loh dan zawnga a awm vaih chuan, thenna thu a sawi ang. Sawi dan tur nen lam a ngaihtuah ta vak a. A hriat loh karin a muhil ve ta mai e. 

Tebera rawn rak ţhawt chu zan laiah chuan a ring duh phian. Terini pawh a harh nghal hlawl mai. Room lehlama mu Tebera chu a rum tuah tuah a. A tho ta nge nge, Muanpuia erawh a harh lo a nih hmel. Tebera te mutnaah chuan a va phei a, Candy nen khum hran ve veah an mu ve tawh a ni. Candy hi a fel reuh a, zun pawh a cheh lohna a rei tawh mai. Zan tirah Terini hian a mutpui a. A mutthilh hnuah a insawn mai thin. Tebera erawh ngaihtuah vak a ngai lo. A va luh chuan Tebera chu a lo tal nasa mai a. 

"Teber, teber, i harh em? Heii… engtin nge i awm? " tiin a sawi nawk nawk a. A rum tuah tuah chu a tawp a, fiah mang lo hian a rawn meng ta a. A u a hmuh chuan muang huai hmel a pu deuh. 

"A nuin min hlap a lo tum a. Ka lo tlanchhia a" a ti tial rian a. Mangchhia a mang ve a nih awm chu.. 

"Mumang a nih chu.. A tha vek e.. Muhil leh tawh rawh. Anu chu a rawn kal dawn hleinem" a ti siam siam a. A nau lu chu a chulsak hliau hliau bawk. 

"U, ka hlau thut zel a. Kan in hi" a ti leh a. 

"Engmah hlauhawm a awm lo. Kan awm vek alawm. Hei Candy pawh i bulah a mut hi" a ti dam diai a. Tebera pawh a maimichhing ve leh mai. Candy mut dan a siamrem leh te te hnuah an room lamah a phei ve leh ta a. A mu chiah tihin Muanpuia phone a ri tleng mai. Msg a ni ngei ang. En châkna chuan a tuam hlup hlup a niang chu. Va ban da dain a hawng ta a. Sms pangngai a ni. Jenny hnen atang bawkin, "Kan pa chu thursdayah a zin dawn.. " tih chiah hi a ni. Terini lung a phu dawt dawt mai. Engvangin nge a pasal zin tur thu chu Muanpuia a rawn hrilh ringawt ang? Tun ang zan laiah lehnghal. A chhan tur awm a ngaihtuah a, Thursday chu ni 1 chiahin a dang tawh. Muanpuia a night loh lai a ni bawk. A va riak dawn em ni ang? Engmah a hrethiam lo. Phone chu a ngai angin a dah leh a. A mutchhuak a reh vek. A lo thlamuan tawhna leh a ngaihthat lohna te a reh tan mek tawh a nia.. Tunah a hlawp hlawpin hlauhthawnna a rawn kal leh ta si. A inkhawngaih ngawih ngawih. Muanpuia chuan bialnu neihsan ta se, tumah belh tur a nei bawk si lo, thenawm khawvengte lahin a langah be tha hurh mah se, a dinhmun danglam tak avang chuan an thik ru tih a hre ve reng si. A nau nen an vakvai leh awm chu a ni sia.. Chutiang a ngaihtuahna chuan a lung a tichhia a, a mittui pawh a tla ta hial mai. A pasal tui taka muhil bawrh bawrh chu a melh vawng vawng a. A enkawl danah chuan sawiselna tur a hre hauh bawk si lo. Mahse, a ringhlel miau bawk si.. A thu ta hlawl a. "Lalpa, i kutah engkim ka nghat e. Min pui ang che" a ti sep a. 

Number a hriat ngai loh atanga phone call rawn kal chu meng chiang mang hlei loin a la a. "Sasa" a rawn ti dam thlup. 

"Tu.. Tu nge aw" a ti a. A mut chhuak chu a khap sek sek bawk. 

"Keimah Davida.. I mu tawh law.. " a rawn tih chuan a bo deuh hman a. Mahse, Davida chu a hre leh nghal. Pubg a khelhpui thin, la inhmu miah si lo va, whatsapp vela a biak ve thin, fel tak kha a ni. 

"Teh daih chuan.. Um mu tawh a" a ti a. Tlem chuan a harh deuh. 

"Ka lo tiharh che a ni maw? Zia lo tak.. I rawn khel khat tawh lutuk a, ka rawn call mai mai che. I reh em a" a rawn ti leh a. A tawng danah chuan ruih a neih hmel.. Mahse, Sasa chu a chiang ngam chuang lo. 

"Nia, lehkha zir a ngai tawh lutuk a. Ka khel tawh rih lo" a ti ve mai a. 

"Aa.. I mut a chhuah hmel si, ni dangah ka lo be zawk ang che. Muttui phawt aw" a rawn ti a. Sasa pawn a lo chhang ve a. An dah zui nghal. A muhil leh nghal daih. A tuk atangin Davida chuan whatsapp atangin a rawn be chho leh tan a. A dam loh atang khan a khel zui ta miah lo kha a nia. David nen pawh an inbe tawh ngai lo. A pubg group awmna te a left vek bawk nen. 

Mapuia'n a rehsan rih bawk nen, a khua a lo har ve tho bawk a. David nen chuan an inbe chho leh ta a. Chutia inngaizawng anga inbia pawh an ni hran lo. Thu ho tete an sawi dun a, Sasa khawhar a chhawk viau. Mapuia nen chuan ni khatah vawi li chauhte intext chang an nei a. Ani lah a hman ve bawk si, Davida chuan a rawn hnem takzet a ni. Tin, Pubg pawh a khel leh ta zeuh zeuh mahse, match khat lek lek te a khel a, a hma anga addict leh a hlau a ni. Mapuia lah a la reh vung vung si a. "Ka rinawm tho chuan" tih chang chawiin a nuam tihzawng leh a khawhar hnem tur chu a ti chho ve leh ta chu a nia. Thil tha ber a ni ang em erawh a hriat loh. David nen an inbiak tak foah chuan zing kara a morning wish a hmuh loh ringawt pawn a mood a danglam phah chho ta tlat mai a. Mapuia msg ai maha Davida msg a chhan hmasak changte pawh a awm ta nawk mai. Zan khat phei chu an inhlat ta lutuka inhriain, Mapuia hnenah chuan, "A rei thawkhat ve tawh alawm.. Min ngaihsak ve tawh la; a hma anga awm leh kha ka duh a ni" a va ti ta tawp a. A chhan chu Sasa hi mi â a ni lo va, A thinlunga Davida tla na tial tial chu a hrethiam a, a duh si lo a ni. 

Mapuia chuan, "Exam zo phawt ang aw.. Duati " a rawn ti a. A thinrim hlur ringawt. Exam erawh ni 2 chiahin a dal tawh tho thung a. A chang leh inngaihtuahin,Mapuia zawk hian biak ngawrh deuh a nei ang a, min thlauhthla tan a niang tih te, zawi zawia min hlat a tum aniang tihte a ngaihtuah thin. Chutiang karah Davida lah chuan a rawn ngaihsakin ngaihzawng treat ang ni si lo, a ni lo tih dawna rem chiah si lo ang hian a rawn treat thin a. An inbiak tawh chuan Sasa chu a hlimin a phur thei viau mai bawk a. Thil chu a tha lo chho dawn a ang riau. 

"Ka tlan chak i ti em? " Muanzuala chuan a ti lawng lawng a. 

"Aih, a nuam zawk daih" a lo ti ve mai a. Zingah khan a chhuah dawn khan a nuin uluk takin thil a hrilh leh kha a nia. A nu hlauhthawn ang chu thlentir loh a tum. Sangpuia tih el nan khan Virginity te kha a han sawi ve tak naa, a thinlungin a tum tak tak teuh lo. Reiek pawh chu rin aia hmain an thleng a. An pahnih chiah an han nih takah chuan Nauteii chu a zâm deuh. Muanzuala chuan thla a laksak sek lehnghal. A modelah a tang a ni ringawt e. Phul hmunah daihlim hnuaiah an thu dun a. Eitur an kente chu an ei pah bawk. Sangpuia nen ni ta se, a romantic lehzual ngawt ang tih a lo ngaihtuah leh daih thung. 

"Thil ngaihtuah vung vung zel suh.. I ât hmel" a rawn tih chuan a nui a, "Ka á reng alawm" a ti ve mai a. A rawn hnaih hrat a. 

"Ih, maw.. Kan nih atang hian tumah hmeichhe dang ka be ngai tawh lo asin. Min lo biak pawn ka chhang lo tawp zel.. Nang chu i be zel tiraw? " a ti nuah nuah a. 

"Awihawm loh e.. Tumah ka be ngai lo" a ti vat. 

"Msi khan min lo text thin a. 'Keimah min runluih nan a ngaizawng mai mai che a nih kha' a ti thin a.. Tak tak a ni em? " a ti ta a. Nautei'n a chil a lem khawlh. 

"Ni lo ang" a ti nawi nak. Muanzuala lah chuan a chîk ve viau lehnghal. 

"Ni mah se, kan inngaihzawn phawt chuan pawi ka ti lo.. I rinawm tho chuan" a ti awlsam leh êt a. Nauteii rilru a buai ru tawh hle. Thudik tak hrilh mai a tum laiin tiang hian a ti leh bawk si. Sangpuia a la duh thu leh a then tak tak theih loh thu sawi chu ti nge maw a harsat viau mai le aw?! 

"Ih.. Maw.. Inthen ta ila. Engtin nge i awm ang? " a ti hliai a. 

"Inthen thu chu sawi lo la.. Ka duh lo, ka duh ngai lo ang. Min then mah la ka then ve dawn chuang lo che" a ti ta tlat mai. A va buaithlak tak. 

"Mahse, Msi'n a duh bawk che sia, ka tan a nuam lo ve em a. Min sawi peih bawk sia.. " a ti a. 

"A ho! Ani khan engmah sawi tur a nei ve lo. A tluk loh vang che a nih kha.. Engahmah ngai suh" a lo ti hmak a. 

A rawn kuah ve thlup a. Tumah an bul hnaiah awm ta lo chu a ngampa ve ta deuh nge, a lamah a kuai hnai a. A fawp ta a. Nauteii chuan a dawh mawl tawp ringawt. A rilru a chiâi nuai a ni ber e. Infawh bak a kal chuan thenna chance a ti rilru a. Mahse, Muanzuala chuan a duhtawk daih.! 

"Hmm.. I va zei lo em em.. " a la ti zui! Nauteii pawh a nui tawp. 

"Zei vak a ngai mi? " a ti a. 

"Ngai chuang lo. Tikhan a ngaihthatthlak daih zawk. Mahse, hei hi vawikhat chiah ka lo khawih.. " tih pahin a hnute a kawk a. Nauteiin a lu a thing nar nar.. Nui chungin, "nakinah i inrin loh laiin ka khawih ang" a ti a. Chawhnu lamah an fang leh thuak thuak a. Mi dang kal vete chuan an en duh hle. An hmeltha dun bawk a ni. Muanzuala modelah a tang leh ta reng mai. An chau ta deuh bawk a. Hawn lam an hnaih chho, Muanzuala bike dahna an pan lai chuan, "Ehe! Saw en teh.."Muanzuala'n a ti thut! Nauteii a hawi ve nghal. Chulai tak chuan Muanzuala chuan Nauteii hnute chu a piai sak ta zauh a. A tlanchhe nghal. Nauteii chuan a um ve nghal a, an nui hawr hawr mai. Chutiang taka Muanzuala bula a nuih theih a inring lo kha a nia. A nuiin a hlim hle mai si. A awmdan chu a hrethiam tawh. Hawn kawngah te chua, an vawiin hun hman danah Muanzuala chu han sawiselna tur reng reng a hre lo. Msi nen khan sex te kha an hmang dun sia, hmanpui tum a han fight te kha a ring deuh a, thenna chance-a hman tum ranin. Mahse, chutiang chu engmah a thleng ta bawk si lo. Tin, an pahnih inkai dun rial, miin a ruka an en tih a hriat te khan nuam a ti ru ve em em a, amah ang rual tleirawl ten Muanzuala a ruka thla an laksak a hmuhte khan a lo chhuangin a hlim ve veng veng a, a chhan a hrethiam si lo. "Muanzuala hi ka lo duh viau mawni le" a ti rilru nuah nuah mai. Aizawl khawchhung an luh hnuah erawh thil dang a ngaihtuah ve ta a. Sikulpuikawn an thlen lai takin Sangpuia car a va hmu thut! A hai lo chiang. A vanduai asiamin Sangpuia lah chu a rawn hawi ve chiah bawk! An inhmu chiang dun ngawt mai. Rilru na tih hriat zetin a rawn melh vawng vawng mai a, Nauteii awm pawh a nuam lo kher mai. Sangpuia a hmuhin a khawngaihin a ngai a. Muanzuala bula a awm lahin a hlim tho bawk si. A mumal thlawt lo, he nau hi.. Amah leh amah pawh chu a indem ve hial, "Mi lerh tak ka nih dawn hi.. " te a inti ve hial a ni. In a thlen meuh chuan a chau viau mai. 

Lawmsanga exer la lai chu Nguri chuan a thlir ru reng mai. Chutia a pasal han insangmar leh ta chu a hlim takzet. A dam thei emaw thei lo emaw hmasawn a tum zelna kha a duh ber a ni. Rah tha pawh a chhuah ngei ngei ag chu. Lawmsanga pawn a rawn hmu ve a, a nui sak mai. 

Thlan hluam chungin a rawn pan a. Tui a lo pe vat. 

"Ka lo fit tawh lo lutuk a.. Ka rawl ngawt ang" a ti hlawi hlawi a. 

"Zo artui ka leisak tak che. Mut dawnah nimbu tui nen i ei dawn nia.. " a lo ti vat a. A nupui khabe tuai zauh pahin, "Aw le.. Ka lalnu.. Mi famkimnu" a ti sup a. Nguri pawh a nui ver ver mai. An nupa chuan in chhungah an lut dun ta a. 

"Vawiin chu bazar ila.. " Mateii msg a hmuh chuan a ner sawk. 

"Ka hman lo" a ti tawng a. 

"Ti hmuk hmuk nge a? " a rawn ti ta chiah. 

"Nangmah ka chhuahpui che avang khan ka bialnu khan min then a ni. Engkim a pawi vek "a ti ta hmiah a. 

"A va zia lo ve. Chu! I single ni maw" a rawn ti vel. 

"Single chuang lo. Ka nghak zel dawn" a lo ti ve sak. 

"I va ho tak, khatiang naupang lutuk ang kha chu a chi loh, an lerh duh" a rawn tih leh phei chuan, "E" tih chiaha chhangin a block zui hmiah. Mateii chu a haw hlur a ni tawp mai. A ngaihtuah a ngaihtuah hian a na tulh tulh mai. Nauteii bula thudik a lo sawi mai lo a inchhirzia hi aw.. Mahse, a hun lai kha chu a sawi ngam ngang lo a ni. Dâwtin pawi a khawih thuizia a hrechiang ta hle bawk e. Nauteii chu bansan tak tak tumin thutlukna han siam mah se, vawiina a hmel a hmuh khan a buai chhe leh vek tawh. Nauteii mitmengah khan amah thlakhlelhna a hmu tlat a ni. A la kalsan bik lo tih leh a duhthlannah chuan a che buai mek tih a man thiam tlat! Chutak chu engtin nge a chinfel ang tih a ngaihtuah a ni. Nupui nei rual zet ni ve tawh mah se; a duh ber nei let leh tura chet lak dan mawihnai tak a hre bik tlat lo a ni. Nauteii nu a be mai dawn em mawni tih thlengin a ngaihtuah.. A ngam chiah bawk si lo. A nih nih ni ang tiin Nauteii chu a call leh ta tawp mai. A lak pawh a rin loh laiin a lo pick up ve mial e. 

"Vawiin chu a nuam em? " a ti te te a. 

"Umm nuam ve tho" 

"Naute, i duhthlannah hian i lungawi takzet maw? " a ti hniam raih a. A lungte chu a leng veng veng mai. 

A ngawih vang vang hnuah, "Ka hre lo.. " a rawn ti chuai raih a. 

"Ngaihtuah chiang rawh.. Nakinah i inchhir ang e. " a ti a. 

"Nupui neih vat i tum mi? " a rawn ti teh daih. A hawihai hle. 

"Awihawm loh ee.. Ngati nge? " a ti hu a. 

"Aa.. Ka ti mai mai. Muanzuala hi then dawnin a then theih ringawt hleinem.. Engkim ka hrilh dawn mi? " a rawn ti let zawmah. Mipa tan tlawmthlak viau mah se, Sangpuia chuan a hmangaih em em si a, Nauteii rilru thianghlim leh pawisawi lo tak buai em em si chu a puih a ngai tih a hria. 

"I duh tak tak loh chuan kaltir rawh. A hun pawh i khawhralsak ve tho asin" a ti zawi sup a. 

"Min duh sia.. Ka khawngaih deuh.. Aa.. Ka hre tawh lo. Nangmah vang vek a ni. Nge dawt min hrilh? " tiin bul a rawn tan leh ta. 

"Phone atang chuan engmah kan sawi kaw dawn lo. Naktuk inkhawm banah chhuak lawk ang hmiang.. Rem i ti em? " a ti ta tawp a. 

"Umm.. " tih chiahin a chhang. Nauteii chet dan chu a naupanchhiat rualin pawi a khawih thui zêk dawn chu a nih hi. 

A sms dawn, lo inhawng sa avang chuan Muanpuia chuan, "Msg hi i lo hawng em ni? " Terini bulah a ti a. A mitmeng erawh a dam thlup thung. 

"Aw.. " a lo ti hmiah. 

"I rilru a tibuai leh vak ang chu.. A dik em? " muanpuia chuan a ti a. 

"Aw tibuai khawp mai" a lo ti ve mai a. Terini bana chelhin, "A zawh hma chuan engmah ka la hrilh thei lo che a ni.. I ngaih ang kha a ni lo tih hre phawt rawh.. Khawngaihin.. Ka phatsan lo che" ngenngawl zetin a ti a. 

A mitah tak rawn melhin, "Nupa karah thuruk a awm a maw? " a ti ta sap a. 

"Chutiang a ni lo.. Engkim i la hre vek dawn alawm.. " a ti a. 

"Ka hriat vek tur tho tho te chu sawi mai ta che" a lo ti ve khauh. Muanpuia chu a inngaihtuah buai deuh hle.. Thawk lak hawk pahin, "Aw le.. A tha alawm.. Jenny pasal hi kan veh mek a ni. Chhan tha tak avangin. Chumi kawngah chuan Jenny hian min pui a ni" a ti ta a. Terini a thaw huai, mahse, "A pasal manna kawngah a pui che u a maw? " a ti hâ a. 

Khi suk pahin, "Jenny hian then a duh a ni" a ti hul hak. 

"Engvangin" a dilchhut sual ang tih erawh a hlau deuh. 

"Ka hre lo. A ning tawh a ni mahna.. " a lo ti ve mai. A dang erawh a zawt ngam tawh lo. A ngaih erawh a tha tak tak thei hauh lo. A chhan sawi tur hre si lo hian mawlhtu a nei tlat. Tihkian dan a hre chuang si lo. 

"I va busy rei ve" Mapuia aw chu a nelawm loh lek lek. 

"Nia, Rki nen kan inbe lawk a" Sasa aw chu a tîm deuh. 

"Naktuk kha i nei lo tiraw? " a rawn ti ve leh mai a

"Um… ti nge? " a lo ti a. 

"Ka ti mai mai. Ka rawn be khat deuh che sia.. Ka rawn be mai mai che. Min ngai em? " a ti a. 

"Umm.. Ngai e" a lo ti liam puat. Mapuia chuan ngaihthat lohna a nei lem lo a nih hmel. Rei pawh an inbe chuang lo. Inadjust chu a hun tawh viau mai. Hmeichhia hi chu anmahni ngaihsaka ngaihventu te hi a tirah ten zawng han nei mah se, an khawhar lai leh an sihnnip lai tak nan fuh chuan an tawlh ruak ruak mai thin a. Nghet churh hi chu awm bawk mah se, inthlahdul hun lai nei vek kan ni si. Ngaihthat tawh vanga inngaihsak loh deuh ngawtte hi tawrh a harsa tho.. Boruak alh hlep hlep reng lo mah se, tihthara chawh nun fo hi chu a ngai a ni. 

A inthlak sawk sawk a. Anu bulah, "Sir nen kan inhmu dawn" tih leh chhuah a rual nghal. 

A nu pawn a chhang hman lo. A enzui vawng vawng ringawt. Sangpuia chuan an in pengah a lo nghak ran tawh a. Motora a luh rualin WBR lamah an tlan nghal. 

Tlema hmun biru ve deuh, mi tlawhpawh lohna deuhah an ding ta a. An ngawi vang vang mai. 

"Min la duh em? " a ti tâwng mai. 

A rawn melh kâwk a. "I â mi? " a ti hû. 

"Muanzuala chu then rawh aw" 

"Entin? "

"Ka ex a lo let leh a, ka la hmangaih sia, ka let leh ta mai i ti ang"

"Duh lo ta se"

"A duh loh ngawt theih a ni lo. I thutlukna a pawimawh"

"Ka lo tum ang. Mahse, intiamna ka duh" a ti ve ta a. 

"Aw.. Vawikhatmah dâwt ka hrilh leh tawh lo vang che. Ka intiam e" Sangpuia chuan a ti nghet charh. 

"A tha e.. " tih chiahin a chhang. Sangpuia insum zo tawh lo chuan a va kuah a, a lo tang lem lo. Fawh a tum erawh chuan a thle sawn a. "Tunah chuan Muanzuala bialnu ka la ni rih.. Ka then hunah min fawp chauh dawn nia" a ti ta tlat. 

Beidawn hmel zetin, "Huiham

.. Hmangaihzuali tak hi chu aw.. " a ti nghut.. Mahse, an ipikna leh mawlhtu awm thin kha a kiang duak thung a. Sangpuia a hlim veng veng mai. Nauteii erawh tlemin a hmabak a la ko deuh a, a la hlim famkim thei lo. 

Muanzuala msg tam tak hnuaiah chuan, "Inthen a hun. Ka ex a lo kir leh a, ka la duh sia, inthen mai ang" a va ti ta a. Nuam lo chu a ti ve reng mai. 

Muanzuala chuan rei fe hnuah a rawn reply ta a. 

"Tupawh ni rawh se.. Ka then dawn chuang lo che. Ka bialnu i ni reng dawn. I duh leh min kawp mai rawh.. " tih thu hi.. 

"Aaa… ka ning… nuuuuu" tiin Nauteii chu a au chul mai.. 

(Vawiin chu buaina neuh neuh ka nei a. Ka rawn dah tam thei lo aw.