Thutiams2-22

THUTIAM (S2)- 22

Ziaktu: Toni Râlte

(Adds kha aw.. Min la hriatsak tiru 😍

"Bawiha, i va tho thei lo ve.. School i kal dawn lo mi? " Sangpuia chuan a nu aw a hriat chuan a mit a nuai chat chat a. Zing dar 5 velah a muhil ve chiah kha a nia. Thawh a hai pawh a awm e. Ni e, nizanah a hmangaih, a enchimloh Nauteii'n ţhenna thu a rawn sawi a nih kha. A phone a switch off tlat vangin engmah a tithei si lo. Mapuia a call dawn chuan êmah a ti ve deuh bawk si. A rualpui ngaihzawn a duh thu kha a sawi a, chuti teh thuta thutlukna a siam chu a zo hlawl lo a ni ber. A inring hman ngang lo a ni. A chhan dik tak tur awm a ngaihtuahin a hre si lo. Nizana a chhuah kha a lo hria em ni dawn le tih a ngaihtuah a. Ni e, Zanriah an ei hma lawkin Mateii a rawn lut a. Ngen taktêa ngenin, "A rei dawn lo, chaw ei chhungtê a ni mai. Miin min nuihzat tur ka ngaingam lo a ni. Ka sawi lawk ve vek tawh sia.. I bialnu i hlauh chuan ani pawh ka dil mai ang" ti hialin a rawn ngenngawl a nih kha. Anu pawh chuan, "Chuti na nâ na chu va kalpui mai rawh. Thian hi chu inpuih a tha alawm" a lo ti a. Nauteii bulah zanriah ei tawh anga insawiin meeting a neih thu a va sawi a nih kha. Hrilh ta se a thinrim dawn a, thlem leh fê a ngai dawn si a. Hre lo zawk se la, engkim a kal dik a rin vang zawk a ni. Mateii nen an va chhuak ta chiah a. Zanriah ei khamah an awm hnufual leh a, a rualpui deuhte bulah a chetla khât tawh deuh a, a kawm mi tak mi an lo awm ve bawk nen, Football chungchang sawiin ani pawn nuam a ti ve ta zêk a nih kha. Mateii nen lah an intekrek hrang hek lo. Amah Mateii chuan a beisei deuh tih chu a hai lo, mahse, bialnu a nei tihah a chiang ve tawp. In a thlen meuh chuan dar 10 a lo ri vah tawh a. Mahse, Nauteii a la mu dawn lo tih erawh a hria. A va call a, a reject ta zel a nih kha. Tichuan, a hnu lawkah inthenna thu a rawn sawi ta a ni. A tifiam anih ringin a ngaichang a, mahse, a reh zui ta hmak si. A hrilhhai leh mangang, rilru nâ avang khan a tal tlaivar ta thak a ni. Phak chuapin a tho a, a rit bur mai. A intifai sawk sawk a. Chaw pawh a ei tlem ngang mai. Phur lo zetin School kal tur chuan a chhuak ta a. Nauteii te class-a luh a huphurh khawp mai. 

Nauteii pawh amahin a thu leh ta ran a. Msi a insawn ta daih bawk si. Mahse, Msi insawnna tlar ami Kimkimi a rawn insawn ve ta daih. "A chep em mai. Bakah nuam lo i ti ang" a ti reuh a. Nauteii pawh a lawm kher mai. A zahthlak ve bawk a, mahnia thut khar mai chu. Msi chuan a bula thute chu a hrilhru sep sep a, Nauteii an rawn melh leh zauh zauh thin bawk. Engahmah ngaih loh a tum tlat a ni. Tlaiah Muanzuala'n a rawn hruai dawn lehnghal. Msi chuan hmu ve se a duh hle bawk. Ni e, an kum angah chuan inrunluih te hi a nuam fo thin nia! A rilru a kal ding laklawh tawh a, Sangpuia chuan a thinlungah hmun chang vek rih mah se; a bumna avang pawh khan a ring a la tikhawng ve tlat a ni. Short break laiin Nauteii leh Kimkimi te chuan tui an va la a, an let leh room an lut chiah chu Msi chuan ring leng lawng hian, "Thiannute ngawih ngawih bialpa lo ngaihzawn ruk ching hi chu an tenawm tawp.. A rukin an hur ngawt ang" a ti lang lang a. Nauteii chungah an mit a fu thup bawk. Ngawi rengin a kal zel tawp a, mahse, Msi bula thu Teteii chuan, "Hetiang ho hi chu mipa pawn an ngainep. Tih atan chiah an duh" a ti a. An nui hawr hawr hlawm. An nuih erawh a za tak tak lo. Nauteii chu a ding ta dat a. Msi chiang taka va melhin, "I bialpa ka chhuhsak theih che avang hian i la zak chuang miah na nge? Kei chu ka bialpa te hi tuman min chhuhsak thei lo ang" a ti ve ta ngat a. Msi a nui tawp chiang hle. A ding hluai a, "Zawngi, nang angin ka tenawm ve lo. Thiante bialpa ka melh tai ve ngai lo" a ti a. 

A nui lui sak. "I bialpa rintlak lohzia ka hrilh mawlh mawlh che a. I awih duh lo va, keimah zawk min puh daih a, min insawnsan vel a.. Ka duh loh thleng ti turin min nawr a nih kha.. I chawh ngawt mai. Muanzela lah chuan min duh mai sia maw.. A then nghal vang vang che kha. " a ti ve ta sak sak a. An class ami te hian thudik hria se a duh ve bawk a tin ni. A ruka Nauteii startu mipa ho chuan a thusawi chu an ring nghal hmiah reng bawk. Msi a rawn kal phei a, an inhmatawn ran mai. 

"Nangman i thlem a, i bem anih kha. Muanzuala chuan a fiam kual mai mai che. Eng atanmah a ti lo che. Sex hmanpui atan bak a ti lo che" a ti hlawih hlawih a. Duh aiin Nauteii kut a che rang. A hriatchhuah meuh chuan Msi biang a ri thlawp tawh. An class ho chu an au dual mai. Thinrim zetin a rawn kek ta buan buan a. Mahse, Nauteii chuan a lo nam leng lawp. Khawih let erawh a tum hran lo. Msi thinrim chu a ţap deuh par tawh nghe nghe. Dar a ri tawh tih an hre lo nge, Sir Sangpuia a rawn lut hlawl mai. Msi leh Nauteii thinrim taka inhmachhawn mekte boruak chu a rawn man thiam nghal chat. A va kal hnai a. 

"Eng buaina nge in neih? " a va ti a. A aw pawh a nelawm hran lo. 

Msi chuan, Ţap deuh pir per chung hian, "Sir, Hmangaihzuali hian ka bialpa bulah ni lo loin min lo sawi a. Kan inthen phah a. Thiante bialpa chhuhsak ching a nih hi.. Mi tenawm a nih hi" a ti hlap hlap a. 

Nauteii erawh chhuat melhin a ngawi ran mai. Sangpuia ber kher a rawn lut chu pawi a ti.. A hmel a hmu ngam rih lo. Sangpuia chuan, "Hmangaihzuali, Malsawmtluangi thusawi chu a dik em? " a ti chang fak a. Hetiang tawngkam hian vawikhatmah a la be ngai lo. Nauteii tan chuan a hmingpuma koh pawh a na thawkhat viau. 

 

"Dik lo" a ti sap a. 

"Min en rawh. Khatin kun chhil chhel suh. Hetiang thila buai rual pawh in la ni lo. In zahpuiawm mah mah a ni" a ti nghut nghut a. Nauteii chu muangchanga dak chhuakin Sangpuia lam a hawi a. 

"Msi bialpa hian an inngaihzawn lai rengin min bem a. A rinawm lohzia Msi ka hrilh a. Mahse, min huat phahin a bialpa ngaizawngah min puh a. Thutna te sawnin, msg leh status hmangin min tiel vak vak a. Ka hua a, a bialpa rinawm lohzia tihlan nan a bialpa chu ka chhuhsak ta a ni. Mi pangngai chu nise a zak tawh tur a nia. Mahse, a la zak lo a nih hi" a ti ve ta piap piap a. A reh dûk mai. 

"Zah thuah chuan nang pawh zak tur i ni. Thiante bialpa te ngaihzawn reng reng.. Msi tan chuan i ngeiawm ve bawk ang chu.. Lerh lutuk hi pawi deuh a ni. " Sangpuia chuan a rilru nat hrikthlak nan a lo ti a. 

Nauteii chuan tawrh harsa a ti hle. Thutna an pan hmain, "Nia, mahse, ka zak lo. Ngaihzawng nei reng chunga an ngaihzawngte buma mi dang an kawp thei anih chuan hetianga ka ti hi ka zak eih lo" a ti ta hmiah mai. Ngawi rengin thutna a pan a, a thu a. Lehkhabu a bih ta char char. A thusawiin Sangpuia a den dan erawh a dang daih. Tikhan Nauteii thinrimna leh an inthen chhan chu hrechiangin a inhria. A bul chu amah vek a ni. Mateii kha lo chhuahpui lo nise heng hi engmah a thleng lo vang. Mateii nen an chhuak dun tih a hre bawk si, Msi lahin a lo elsen ve reng bawk si thinur lutuk inhrikthlak nan Muanzuala a hmang ta tih a hai lo. Siam that theih a la ni ang em tih erawh a hre lo. A class lak lai chu a rilru a lut lo chiang ngei mai. Boruak a ritin engkim chu a chul vek ni maiin a lang. 

Ni dang aiin an bang hma hrat a. Gate piah lawkah Muanzuala'n a lo nghak ran mai. Msi te an kal hmasa zawk a, Muanzuala pawh chu an va hmu ve ngei e. 

"Eng nge i tih dawn? " Msi chuan a la ti ngam! 

"Ka bialnu ka nghak" a lo tihkhum ve mai bawk a. Msi tan chuan nâ bakah zahna a tam khawp ang le. A khawngaihthlak, thil hrethiamin a tirah Nauteii sawi kha dawngsawng thiam se chuan ti em em hian a na lo tur. Muanzuala insawifiahna te a lo awih ringawt a. Muanzuala leplerhna chu mi pathumin an tuar ta der chu a nia! 

Nauteii pawh a rawn phei hnalh hnalh a, an piah lawk dawr bul atangin Msi te chuan an lo thlir reng tih a va hmu. Chuvang chuan confi luih a tum hram hram. Msi te mai bakah an school balcony atangin Sangpuia'n a rawn thlir tih erawh a hre lo thung. 

"Min lo nghak rei tawh em? " a ti a. A nui sen sen bawk. 

"Rei lo.. Ka thleng ve deuh chiah" a lo ti ve mai a. Muanzuala hi Msi tan pawh a uiawm ve bawk a ni. A hmel tha a, a changkangin an hausa ve leh zel bawk si. Tleirawl tan chuan star awl tak tur a ni. Nauteii te aiin kum 2 emaw lekin a u a, College a kal ve mek bawk. Msi nen an nih chhan pawh kha dik tak chuan, Muanzuala leh a bialnu inthen hlim a ni a. Muanzuala thianpa Opa leh Msi te hi 2nd cousin niin, Opa bulah a star thu a sawi reng zel a. Ani Muanzuala single tir a lak nat lai lo ni bawk nen, Msi a chhe vak lo bawk a. An ni ve ta mai kha a nia. Zep thu a cheng lo, Msi nen an nih that ve reng lai pawh khan a then tak a ex kha rawn let lehin Muanzuala hian a rukin a kawp char char a ni. Mahse, Nauteii a rawn lan takah khan Muanzuala hian a thlah ta ve ve a. A ex pakhat erawh chuan Nauteii a hre ve lo thung. Nauteii a hmuh phat khan hmeltha a tih piahlamah a nungchang kha duhawm a ti a, belhchian a chak ru em em kha a nia. Zah theih loh chhuahin tikhan a va be kual a. Msi bula engkim a lo hrilh erawh kha chu pawi a ti ve deuh. Msi bulah Nauteii chu a fiam mai mai thu sawiin, a la hneh thei hram a. Nauteii khan a duh ve theih a rin loh vanga Msi pawh la vuan mai chauh a ni. Mahse, a danglam leh ta thut a. Awlsam takin hmeichhe pahnihte chu a kalsan ta hmak a ni. Nauteii rilru a hre reng reng si lo. 

Bike-ah Nauteii a thu chho chiah tihin, Msi a rawn lang ve leh hlawl. A duhtawk a la hmu lo aniang e. 

"Muanzual, He nu hi i hrechiang lo a ni. A ngaihzawn chhan che hi ka laka phuba a lak duh vang mai a ni e.. I la hre zel mai ang. I la chawh ngawt ang" a va ti ta zêk a. 

Engmah an lo sawi lo. An tlan liam daih. Msi chu a tlawm ngei mai. Nauteii erawh chu tleirawl tih takah chutia a han runluih leh Msi na tuar hmelte chuan a awm a tinuam riau. A dik lo tih hre tho mah se; la tih zel a duh. Vawiina Sangpuia tawngkhum dan avang pawh khan Muanzuala nena inngaihzawn zel chu a duh rih tlat! Mahse, Muanzuala chu a rintlak tak tak loh tih erawh a theihnghilh hauh lo thung. Kan Nauteii hi a chesual ang tih erawh a va hlauhawm si em… 

"Mahse, Amah nen in inbiak hmaa rinhlelh nghal ngawt pawh a dik lo ang. Keiman ka lo be dawn nia. " Nguri chuan Terini bulah a ti mawlh mawlh a. A rilru kap tlat thil bunruak turin tukthuan eikhamah Candy paw chungin Nguri te a va tlawh kha a nia. Nguri bulah nimina thil thleng, Mamawii tawngkhum dan leh Muanpuia phone a check dante chu a sawi malh malh a. Uluk takin Nguri'n a lo ngaithla. 

"Engmah tawnhriat ka la nei si lo va; tih dan tur pawh ka hre lo. Amah ka zawt ngam bawk si lo va" a ti chuai raih a. Nguri'n a thiam ang tawkin a lo hnem ve a. 

"U Muanpuia hi ka hrechiang chu ka ti dawt ngam lo va, mahse, Police ka hriatah chuan mi invawng ber pawl a ni ka ti. Saii nen an inneih lai pawh khan Saii a han pelhe deuh pawh khan hmeichhe danga han ţuan tumna kha a nei vak lo. Chuvang chuan kei chuan ka ringhlel dawt ngam lo. In innei ve chauh lehnghal a, tikhawp hian a chhawmdawl che uin, Tebera tan lah a tha em em a. Candy enkawltu atana a duh vang ringawt chein tiang thil zawng zawng hi chu a tih theih ka ring chiah lo" A ti a. Terini pawh a thawl ve huai mai. Candy pawh Nguri te inah a bual nghal law law a. Nguri leh Lawmsanga te an chhuah dawn vangin Pi Lawmi'n, "He tah zanriah chu ei mai r'u.. A khawharthlak, Nguri te an awm loh chuan" a tih tlat avangin an awm tlang ta law law a. Muanpuia pawn a lo hnial lem lo. 

Nguri te nupa pawh an insiam mawlh mawlh a. Lawmsanga pawh a intiphur ve hram hram mai. Dar 3 rik hma deuhin an chhuak a. A chhuah lohna a rei tawh deuh a, veng chhung mi te pawn an en duh hle. Hminga te in thar chu an zu thleng thla a, An lo awm nual tawh mai. Lawmsanga te nupa chu an lo lawm thiam ngei mai. An tam lo naa, an ri ve nak nak mai. 

"Taxi te hi rawn khalh ve leh mai la.. I fit daih zawk lawng maw? " Ramtea chuan Lawmsanga melh pah chuan a ti a. 

"Aa.. Ni ngawt mai.. Ina tawm tlawk tlawk ringawt chu a ninawm ve tep zel. Kan nu hian min awm hlauh zawk a" tih pahin an nu a melh zauh a. 

"Nia, chaw bel bula tlat theih hi a nuam ber mai" tiin an nui ham ham a. Nguri beisei ai daihin Lawmsanga pawh chuan nuam a ti ve a. A thian hluite nena han titia zahmawha han rak leh te chu a nuihpui ve suk suk a, chu ringawt pawh chu Nguri tan chuan hmuhnawm a tling ve a ni. Hmeichhe lam chuan rawng an bawl a. La inhre ngai lem lo mah se, an inkawm thei hlawm fu bawk. Hminga nupui Dami chuan, "Lawmsanga chu ka khawngaih tak tak a ni aw.. Kan pa phei chuan a natna a hriat tirh phei chuan a tahpui lek lek hial asin. A natna hi a dangdai ve bawk nen" a ti siam siam a. 

"Ni e, kan vengah pawh tawrhpuitu hi kan ngah teh a nia. Mi hi an fel tak tak a ni" a lo ti ve luam a. 

An thian zinga tlangval awmchhun bialnu nuthlawi fingfel zet, Marami chuan, "Awii.. Hman deuha hmeichhe pakhatin thubuai a siamsak ve ngawt lai te khan Dingtea hi an thinrim khawp a, ka va pawngsual tak tak zawk dawn mawni te a tia.. " tih pahin a nui a. Nguri pawh a khi sak mai. Khang thil chhe lam kha chu Lawmsanga hian hrereng tawh lo mah se, pawi a ti lo khawp mai. Chutianga titi ho zel chuan zanriah pawh an peih ve ta mai a. Changel hnah an lo sat teuh a, chhuat dungah phahin zo takin an ei ta a. An chaw lak a thain hmeichhe lam pawh an puar ngei mai. Nguri rin ai takin Lawmsanga pawn a ei hnem ve a. A lawm takzet a ni. Chaw eikham an insingsak fel hnuah mei zuk te an han siam a. 

Hminga lighter hawh a dil tur chu a thianpa ngawih ngawih hming chu a theihnghilh leh ta tlat! A mitmeng buai atangin Nguri chuan a lo hrethiam nghal a. "U Hming, lighter a lo keng lehpek lo a nih kha.. " tih pahin awmze nei deuhin a melh a. Hminga pawh chuan hrethiam takin a lo pe vat bawk. Lawmsanga chu a inthiam lo angreng viau, a hrechhuak zo ngang si lo va. Hawn lam an an hnaih chho a, Hminga te in an chhuahsan chiah tihin hmana pawngsualtua puhtu, Sarah leh mipakhat hian Hminga te kawt an rawn thleng ve chiah. Hminga nen hian an inphur ngai tawh mang lo naa, Sarah hian tichhe ngam hek lo, tunah pawh an in thar lawmpui turin thilpek eng emaw nen a rawn lang ve hlawl niawm tak a ni. Lawmsanga te an hmuh chuan Sarah chu a ding chawt. Lawmsanga erawh chuan a lo melh liam mai a. A hre tawh lo a ni ngei ang le.. Sarah chuan, "Nangmah vanga ka chân leh hloh hnemzia hre miah lo va khatia i la awm thei kha a mak ngawt mai.. A pangngai loh thlak" a ti ta mai a. Nguri pawh a ding chawt mai. Lawmsanga lah a lo hawi hû ringawt. 

"Eheu! Min hre miah lo ang te chuan an awm vel a.. Tenawm tha ve " a ti leh sak. Nguri ngaihtheih zawng a ni ta lo va. 

"Zah tak aruanga khatia i la tawng ngam le.. Mi pangngai ni zawk la kimki tlat tur i ni aw" a ti ve ta khauh a. An thawm hriaiin an rawn lang nghal a. Hminga chuan, "A zia lo thin

. Sarah, eng nge in rawn tih dawn? " nelawm vak lo hian a ti a. 

"In thar kan rawn lawm ve dawn mawle.. Ka mood erawh a chhiat phah.. He mihring ka hmuh avang hian" a lo ti ham ham a. Lawmsanga mitmeng chu a buai hle. Hriatchhuah a tum nasa tih a lang. Nguri chuan a va chelh a, "Kal ang. A hai che a niang. Hahdam rawh" a ti sap a. Kalpui mai a tum laiin Sarah bawk chuan, "I pasal kha a â a ni lo maw? Engtin nge kei hi min hai theih a? Khatiang khawpa min tihmualpho hnuah" a ti zui leh hram. Duhtawk ve mai se tha tur. 

Nguri chuan, "I duhtawk thei lo em ni? I va nasa ve. Ka pasal hian hmeichhe tenghneng tak tak hmelhriat neih a duh lo ve. A chiang em? " a ti ve ta ngat. Sarah lah thinrim cho sa ni bawk chu a ling phat mai. Mahse, Hminga chuan, "Duhtawk r'u.. Ngur, nangni pawh va haw phawt r'u.. Ka lo hrilhfiah ang" a rawn ti ta a. Boruak siam vak kha Lawmsanga tan a that loh vangin Nguri pawh chu ngawi rengin a kal ve nghal a. Lawmsanga erawh a la ding..! 

"Lo kal ta che" a va ti a. Mahse, Lawmsanga chuan Sarah chu a lo melh ngawt ngawt mai. 

"Eng nge khatia mi melh ngawt ngawt a.. In nu saw va zui duan duan rawh. Thaibawihpa" Sarah chuan a ti fiak thak. Nguri a let leh ngat a, Sarah hmaah dingin, "Thaibawih tia i ko leh a nih ngat chuan, ka beng duh mai dawn che a nia.. Ka pasal hi thaibawih a ni lo e. Tin, nang hi ngawi hmak la a fuh zawk ang. I thil chân leh hloh tawhte kha i cho chhuah vanga thleng an ni a. Ka pasal i tihmualphona ba pawh i la tlak hek lo. Chuvang chuan engmah sawi ve tawh suh. A chiang em? " a ti ta khawl khawl a. Sarah chuan Nguri mitmeng thim raih chu do let ngam hek lo, a ngawi ta dâk mai. Lawmsanga a kai a. An tlan haw ta nal nal mai. 

"Tu nge? " tiin a zawt char char. Nguri pawn engkim a hrilh ta law law a. A chek tlak tlak mai. "Hmeichhe zakthei lo tawh na laileng hi chu aww.. Ka hrechhuak lo chu a vannei zawk hle mai" Lawmsanga chuan a ti ta nghut a. Ni e, lehlam zawng tak chuan a lawmawm viau e. 

"Lehkha i zir emaw tia. I online leh kulh a" Sasa msg chu a seen lawk duh lo. Tun hnaiah tê hian a nun chu a romantic hlawl lo a ni ber e. Ni hnih thum liam ta vel atang mai khan a ni. A chhan a hre lo. A lehkha zir nasat vang nge phei chu a hre lo. Final a nih tawh vangin theihtawp chhuah a duh a ni. Sasa nen inbe reng tho mah se; va ngaiha thlakhlelhna ang kha a chuai rih tlat! Ateii leh hmeichhhe dang phei chu an msg a seen lo tawp mai. Ar sual huai leh Football chungchang sawina group velah a lut kur dup reng a. Chubak whatsapp-ah tihtur a hre lo. Status a view ngai lo va, amah pawn a nei ngai hek lo. Zanin pawh lehkha ka zir dawn e tiin phone a dah ve a. A thiam deuh vek tawh si a, a online leh kha a nia. Sasa hian a lo chang kar zawk em mawni. 

"Nia.. Groupah ka lut lawk a" a va ti a. 

"Groupa i luh hma khan min be thei lo mi? " a rawn ti. 

"Aw duati, inngaizawng tih vanga inbiak reng kher tur tihna a ni hleinem. Thil dangte pawh kan ti ve bawk ang chu" a va ti ta a. 

"Hm.. Min be peih lo tih ka lo hre lo a. Tihpalh. Online nuam le" a rawn ti nghat a. A out zui nghal. Va thlem pawh a tum lem lo nge you tube a ensan leh daih. A pa leh a pu vang te, exam hmachhawn tur a nihna te chuan a nun an phuar ve bawk nen, ngaihzawng lamah a rilru a pe thei rih lo a ni ber. Thil dangah pawh a pe tak tak thei chuang lo, engkim chu a hne zung zung ringawt mai a ni. 

A tuk zingah pawh Sasa chu a la reh zel. Nuam lo a tih deuh vangin a va wish ve leh hram a. Dar 10 velah a seen chauh. A rawn reply lo. A chhan va zawha va biak lumlam a tum leh ta chuang lo. Engkim chu a nih niha awmtir a duh rih. Amah Sasa a hne ta viau pawh a ni lo, ngaihzawng dang neihsan dawn se a phal dawn lo nasa.. Mahse, induata in tihlawm tawn boruakah a cheng rih hlawl lo a ni ber e. Hei hi hmeichhe tam takte pawn kan hriatthiam loh fo a ni. Hmeichhia pawn pms kan nei thin ang hian, Mipa pawh hian space mamawh ngawih ngawih hun an nei thin. Chhungkaw boruak a rih viaute hian hun thawl, inngaihtuah veng vengna hun te an mamawh a. Engkim an tui lo ve thin tih hriatsak a tha. Hmeichhe thenkhat chuan duat nih ringawt an thlakhlelhna lamah an ngaihzawngte chhungril buaina an ngaihsak thin lo va, an duh ang leh beisei ang duatna leh ngaihsakna an dawn loh khan an vui a, an na a. An tau a.. A tawpah kal hranna a thleng hial thin. A hnuah hmeichhe thenkhat chu an inchhir ve leh châwk zel a, Kan pms laia min hrethiam tura kan duh tehlul nen, hun thawl an mamawh laia kan zarbuai leh sek zel leh kan thinrim tlat thin hi chu inngaihtuah chian a tha khawp mai. 

Chawhnu lamah Sasa chuan, "Hun thawl i mamawh em ni? " a rawn ti ta a. Mapuia sawi thiam loh, a mamawh ruk a ni. 

"Ka mamawh niin ka hria" a va ti ve a. 

"Umm.. Ka hrethiam alawm.. Ka lo be buai sek che a. I pu leh pa vang pawha i buai dawn tehlul nen, engpawhnise, tunah rih chuan inngaihtuah vak vak lo la; lehkha kha tha takin zir phawt mai rawh. Kei pawh ka lo reh rih ang. Min ngaih chuan min lo call mai la aw.. Love u,.. " tiin emoji love lem a rawn dah a. Mapuia pawh a thêp suai suai mai. A nun buai nak alaia Sasa lehzelin a tihtauhsan chuan a thin a tawt dawn lutuk. Sasa a duhna pawh a pung leh sawt mai. 

"Ka lawm e.. Duati" a va ti a. Nunphung pangngai a neih leh vat a beisei hle. 

A zangthal zawnga muin an meng dun kar a. Muanpuia pawn a phone a khawih lo. 

"Nguri'n a sawi a. Buaina i nei deuh em ni? Harsatna i neih chuan sawi hreh suh" Muanpuia chuan a ti ta a. Terini chuan zah leh tîm a hun lo tih hriain, "Zawhna ka nei a" a ti sap a. 

"Umm sawi teh" a lo ti a. 

"Ih, Hmanni khan i phone ka check a, a chhan pawh Mamawii'n check tura min tih vang a nia. Jenny msg kha ka hrethiam lo a ni" a ti ta a. Muanpuia a ngawi vung vung. 

"Candy i hmangaih luatah kei hi a enkawltu atan min nei em ni? " Terini chuan a ti ta tawp a. Sawi a harsa ngang a niang, a sawi zo chu a thawl huai mai. 

"Ngaihtuahna mak pui pui hi nei thin suh. Jenny kha ka ex a nia. Vai pasalah neiin Mizoramah an rawn inbengbel tawh. Ex tih vang khan induhna kan nei tawh lem lo, amah pawn thian hluiah min ngaiin min rawn be ve zeuh zeuh chauh. Nupui ka nei tih a hriat khan kha thu kha a rawn thawn ve ringawt a nih kha.. A hma lama inbiakna kan nei lo, inneih chungchangah. Chuvang ania reply pawh ka reply loh ni.. I rin dan kha engmah a ni lo. Ni e, ka fanu hian nu a mamawh ka hria. Nu a mamawh vang ringawtin ka nei lo che, ka neih che avang hian ka fanuin nu tha tak a nei thei a ni zawk. Ka lawm bawk" a ti nghet ta charh charh a. Terini pawh a hmin ta hle. 

"Aa.. Engvang pawh nise, kei leh Tebera chunga i thatna avang pawh hian ka lawm tawk tawh tho mai" a ti ve sep a. Muanpuia a rawn inlet thawk, a rawn kuah a. 

"Ka nupui i ni a. I ni reng bawk ang. Nupui thlak ka tum tawh lo. Lo inthen pawh ni ila, ka leng tar tawh law law ang.. Chuvang chuan nang pawn min then tum buai lo law law rawh" a ti sup sup a. A nupui nghawng chu a fawp kual dan dan a, Terini za ti si chu a lo tal arh arh a, inchhaih titihin an inbuan thial thial a.. Chumi hnuah duhthawh taka infawpin nupa nun hlimawm tak an hmang zui ta nghal a.

"Kha Muanzuala khan i hmui them pawh a fawp a nih chuan, ka pawtsawm ang.. I hria maw? " Sangpuia msg chu nuam ti vak lo hian a chhiar a. Nia, fawh em chu an la infawp lo. Hun thawl an la nei lo bawk a. Kar tawpah Muanzuala chuan len chhuah a rawt a, chhanna erawh a la pe lo. Muanzuala chu hmanrua mai mah nise, ngaihzawng nei ţhang tawh a ni bawk a. Nauteii rin ai daihin a zei.. A rawn ngaihsakin a duat thiam em em a, statusah ni se Nauteii tihchhan hriat takin a luangliam ngei nguai a. An ni ang tleirawl tan chuan nuam ve tak tur a ni. Tin, Nauteii chu a dah pawimawh thiam reuh phian a. Pubg a khelh dawnah pawh a rawn dil thlap zel! Khawiah pawh chhuak dawn se a kalna tur leh a kalpui turte a rawn sawi thlap a, hmeichhe thian a kawm ngai lo bawk. A tirah ngei viau mah se, ni hnih thum lek an han nih takah pawh Nauteii chuan a ngaina chho ta riau a. Schoolah lah Msi runluih a la nuam chho zel bawk si. A rilru kal dan danglam ta lutuk chu a chang chuan a dik lo nia hriain siamthat dan a ngaihtuah ve tho. Sangpuia erawh englaimahin a theihnghilh ngai lo thung. Class a rawn lak te hian a ngui tih hi a hriat ngawih ngawih. A cher deuh bawkin a hriat. Sangpuia chuan a rawn text reng naa, a chhang ngai lo. Nêm dawna a inhriat chuan a thik em em Mateii nen an awm dun lai kha a mitthla leh thin. Ti nge? A bum? Thudik kha engvangin nge a sawi mai loh? Chu thil chuan a thin tirim thar lehin a luhlulna a kai chhuak leh thin. Sangpuia pawn thudik chu a rawn sawi tawh reng. A awih lo pawh a ni lo, mahse, a kal laklawh tawh a, a kal ta zel mai chu a nih hi.. 

"Ngur.. Ngurii" Lawmsanga thaw chu a sak hmel riau. Nguri chu a thu chhuak vat. A pasal chu a lo thaw kâwk kâwk mai a. Thawh phan pawh awm loin a buaipui nghal. A khua a lo sik leh nasa mai a; damdawi a eitir nghal vat. A thaw a hah tel tlat chuan Nguri a timangang deuh. Mi dang kaihthawh mai tur em ni ang a tih ruk mek laiin, "Mi dang chu kaitho lo mai ang. Ka tha tep" a rawn ti tham ţuak a. A pasal chal sa vur chu a chul a, "I tawrh ai te hi han tuar ţhen ve thei ila" a ti sap a. 

"Ka phal lo" a rawn ti a. 

"Tawng rih suh. Hahdam deuhin mu rawh.. " a lo ti vat. 

5mins hnu velah Lawmsanga thaw hah pawh a reh chho a, a thaw a sa chho tan ta bawk. 

"Mumang ka nei a" a ti sup a. 

Nguri chuan a lo beng khawn vat. 

"Kan khum mawngah hian Ruthi leh Aldrina te hi an lo ding a. Ka thlarau pawh chhuah an lo tum a, ka duh si lo. Kaihthawh che ka tum a, i harh thei bawk si lo. Ka mangang hman teh asin. Mahse, i rawn harh khan an bo ta daih a" a ti ta a. Nguri ngaihtuahna a kal thui mang e. Mumang a nih pawh a ring chiah lo. A hlauhthawnna thup hram hram chungin, "Mumang vang chuan intihrehawm suh. An lo kal leh veleh, 'Nguri tan ka dam reng dawn. Lo kal tawh suh u' tiin i lo hau tawh dawn nia" a ti sar sar a. 

"Chuan, Ngur.. I hre tho mai thei. Ka sam hi a tla nasa khawp mai" a ti zawi raih a. 

Ni e, a hre mah mah. Bathroom a tihfai apiangin Lawmsanga tihfai hmaih sam tawitete a hmu thin. A pasal chu a natna vangin a sam a tla kawlh tan mek tih a hai lo. A ri hriatna pawh a chak lo tan tawh, hei erawh amah Lawmsanga hian a la hrethiam chiah lo a ni maithei. Nguri erawh chuan a chika a chik ta ngang a nih vangin a hria a ni. 

"Sam lem mawi deuh kan lei dawn nia.. Nge lu kawlh i duh zawk? " a hlimawm zawnga lak a tum hram hram a. 

"Ka hre lo.. Ka inhmeh zawk zawk a ni mai. A chang chuan ka indem thin. Nep ka inti. Ka natna hi hneh thei tur ka ni asin" a ti hawk a.

"A chang chuan i natna hi i inbawhbehtir mah mah em aw tih chang chu ka nei ve thin tho" Nguri pawh chuan an pa tihnat hlau tak siin a ti ve a. 

"Ngawi tak rawh.. Naktuk atangin ka'n ţang chho leh ang e.. Min ring em? " a lo ti a. 

"Ka inrin aia nasain ka ring tawk che alawm" uar takin a lo ti a. 

"A theih chen chen hneh tum ang aw. Kan dan zawh loh thil erawh tihngaihna a awm lo a ni mai. Ka damchhung hun tawite hi hlim taka hman ka'n tum tawh ang e" Lawmsanga chuan a ti dam thlup a. A awhah tumruhna a lang tel. Nguri pawh a chhungril a phur ta sarh mai. Hei hi alawm a beisei ruk, a sawi ngam si loh chu.. Lawmsanga a intihchak phawt chuan a damchhung hun pawhseiin a awm thei dawn tlat a. Lawmsanga bulah a la awm tam thei dawn tihna a ni.

"Hmangaihzuali, Lalnunhlui, Lalrinpuia, Lalmawizuala leh Vanlalliana te kha in stay back ang. Test inti chhe tlat… " Sangpuia chuan a ti a. A hming lam ho chu an ê dual mai. Nauteii phei chu a ner sawk. Test kha a tichhe lo tih amahah a chiang tawk. Engvanga chutianga a hming rawn lam ve ringawt nge maw a nih le.. Msi te lah chuan, "Ngaihzawng neih chu tlakhniam phah hle mai," tiin an la tawng el zui.. A thinrim viau. Mi zawng zawng an ban hnuah Sangpuia hoin an la thu ta ţham a. Tihtur a pek chu an ziak malh malh bawk. A stay back puite chu an haw ta phauh phauh a. Vanlalliana nen chiah an ni ta. 

. "ka zo e.. Sir" Vanlalliana chuan a ti a. A va check sak a, a haw ve leh ta. An pahnih chiahin room zau puiah an awm leh ta ran e. An peon lah inchungah a awm daih si. Nauteii chuan a ziahsa chu lekin, "Ka zo" a ti hul hak a. A mitah tak rawn melhin, "kha thil kha i tihtawp a ngai tawh a ni" a rawn ti ta a. 

"Eng chu maw" a lo hre lo der lui ve tawp. 

"Muanzuala leh nangma chungchang hi. A nih loh chuan Muanzuala ka hrilh vek dawn a nia" a ti ta zel a. 

"Kan inthen tawh, nang leh kei chu.. Nang ang mi rinawm lo ka duh lo" a ti nghat a. A inkhung sawk sawk bawk. 

"Ni e, khami zan khan ka dik lo tih ka pha lo. Ka dik reng reng lo. Chumi avanga ka hremna hmuh chu ka tuar tawk tawh e.. Khawngaihin min ngaidam tawh rawh" ngenngawl zet hian a ti a. A hmel pawh a tak ran mai. Nauteii zawk chu a zâm deuh. 

"Engvangin nge i kal? I kal ta sa sa.. Va ngaizawng ta che. Kha nu kha" Nauteii'n a lo ti vin ve thak. 

"Ka tihpalh a ni.. Ka sim tawh ang. Min ngaidam rawh. Khawngahin.. Then che hi ka thei lo" Sangpuia chuan a ti thawp sup. 

"Ka rualpui ngaihzawn hi nuam ka ti tawh zawk.. Muanzuala hi ka then thei lo" A tih rual chuan Sangpuia a rawn kal hnai nghal ruak mai. Mitmenga tuar tih hriat em em, thinrimna tel bawk siin, "Hmangaihzual, ka thiltih sual pakhat lek avangin min kalsan hlen dawn maw? " a ti chang ve ta hrâwk a. 

"A ni mai ang chu.. " a lo tihsan chu a run ve ta lutuk nge.. " Aw le.. Msi khan a lo sawi dik a nih dawn hi. A tir phat atang khan Muanzuala hi i lo duh ru ve tawh reng reng a lo nih dawn hi.. I thiannu bialpa a ni chung pawn" a ti ve ta hmiah a. Nauteii a ding khawng lah mai. 

"I zak thlawt em? Duh ila a tir khan ka nihpui ang. Nang khan min tina lo la chuan Msi min tihelna ringawt kha chu ka tuar thei.. Nang mah vang veka thleng a nih hi" a ti ve ta hlawk hlawk a. 

"Aw le.. Chutah chuan ngaihdam ka dil reng che alawm. Hei hi rilru fimin i ti lo tih ka hria.. Nakinah i inchhir ang e aw.. Naute" a ti dam leh thlup roh a. Nauteii erawh a thin a rim laklawh tawh si. 

. "A pawi lo, weekendah kan leng chhuak dawn a.. Kan che na ngawt ang. Ka virgin ka hawntir ang" a tih rualin Sangpuia'n bangah a nawr phei dawt dawt, thinrimna hlira khat mitmeng hian, "Sawi leh rawh.. Han sawi leh teh.. Hmangaihzual" a ti vawt raih a.. A khur der der bawk. Chuti taka Sangpuia thinrim chu a la hmu ngai lo. Mahse, Lawmsanga fanu Hmangaihzuali hi a kal laklawh tawh.. Dak vahin, "Ka bialpa Muanzuala hi ka virgin ka hawntir ang" a ti leh ngat. Sangpuia tuar thei thlawt tawh lo chuan a kut a lek uaih a, mahse, ţhen sawk chungin Nauteii hnunglam bang chu a hnek ta dawp a. Nauteii pawh a phu zawk mai. Chutah Sangpuia chu a tawlh hnung hret a, mitmeng ngui em em leh nui lui sâng chungin, "Aw le.. A tha e.. Kal rawh.. I duh dan chu tipuitling ngei ang che. I duhthlannah inchhir ngai bawk suh aw.. Kei chu i tan ka upa tawh mah mah a niang e.. Ka hmangaih em che avangin ka lo chelh rei mah mah che a ni.. Kal rawh.. Ti rawh.. Ka beidawnsan tawh ang che" a ti a.. Lecturn-a lehkhabu a dah chu lain, chak zetin a kal chhuak ta a. Nauteii erawh a ding khawng reng ringawt. A rilruah thil pakhat chiah a awm.. "Ka virgin ka hawntir duh tak tak i ring a. I va mawl ve.. " tih chiah. Kan mi â nu tak hi chu aw.. 

Zanah lehkha reng reng a zir theih loh vangin phone a khawih a. Status a view mai mai. Sangpuia status chu en loh a tum zet a. Mahse, a view chak ve bawk si. 

"Beidawnsan tur thil hi a lo awm ve tak tak a nih dawn hi.. I'm done" tih a ni. Nauteii thinlung erawh a deng ve dawt mai le.. Sangpuia chuan kal hlen a tum tih a hrethiam.. Chu chu a duh ber a ni si lo, mahse, tunah mai a let leh thei bawk si lo. Kan Hmangaihzuali hian eng nge a duh ber ni ta le? A nu thurawn la lo va a duhdana a chetna chuan a thinlung ngei pawh a rawn nghaisa chho ţan chu a ni si a! Zan a mut dawnah Sangpuia msg a hmu ta lo phawt.. Msg tam tak intlar thla zinga Sangpuia mangthana thlum bikzia a hre chiah. Zing a tho a, zing tina morning thintu pakhat a awm ta lo.. Rizai theh hlim pahin, "I ngam chuan kal la.. Hmela" a ti sap a. A tho zui ta nghal.. 

(Kut a va kham duh ve)