Thutiams2- 21

THUTIAM (S2)- 21

Ziaktu: Toni Râlte

Khatia an huana an picnic-a an thiltawn teh hrep avang khan chhungkua pawh an ngui nghiai a. Lawmsanga ber hi a buaithlak zual ta a ni. A rilru kal dan a khawlo zo tlat mai a. Chhungkaw nun tihlim lotu, tibuaitu leh Nguri tan phei pawh phurrit angah a inngai a. Chu chuan ama khawvel bîkah chentirin tumah a kawmin a hmu peih lo a ni ber e. A rilru chuan a taksa thununin a chaw ei châkna te a tibo a. A tlahniam chak angreng hle. Nguri thlengin a nghawng lo thei lo. A pasal rihna tlahniam zel te, amaha awm a duh tam tial tialte chuan a thla a timuang hleithei lo. A lainat a, a khawngaih. Tihtheih neih a chak em em. Mahse, amah Lawmsanga ber chu a chak tawk tlat tawh si lo. Puih theih pawh a harsa ve bawk a ni. 

Hetih mek lai hian Muanpuia leh Terini te inneihna tur pawh an inpuahchahna a kal chho ve mek zel a. Muanpuia a phur surh surh khawp mai. Tebera pawn Muanpuia chu a nelin a ngaina nghal viau mai a. Amah Muanpuia tan tak pawh mipa naupang han chhawnchhaih tur awm kha a lawmawm hranpa ve bawk a. An inneih tur pawh thenawm khawveng te chuan an hre ve fur tawh a. Mak an tih rualin an lawmpui thiam phian bawk. Terini pawh a zûm dûk duh tawh bik lo. Nguri leh Teteii ten a thuamchhawm tur an ngaihtuahsak chu a inthlahrung hle. Muanpuia pawn tul a ti lem lo viau naa, an tum ve tlat si a. Khap theih pawh an ni bik lo. Hun a kal ve zel a, an inneih ni pawh a lo her chhuak ve ta hlawl mai le. Terini chuan chhungkaw hlutzia a hrechiang thar ngei mai. A pasal neih niah pawh a thisen zawmpui chu a nau bak tuman an tawiawm ve thei lo va, a zakin a inthlahrung ngawih ngawih mai. Mahse, muanpuia chhungte lam an hung em a, an tuam mawiin thilpek pawh a dawng tha viau mai. Tu khawkha an sawm vak lo bawk a, rin ai tak chuan a huhurh ang em em thil a thleng lo e. Nguri leh Teteii ten an thawh hlawk hle. Terini tak pawh a lawmin a hnuk te a ulh lek lek hial. Muanpuia hmel hmuh erawh a nuam takzet a ni.

A tawi zawngin inneihna hlimawm tak chu an hmang zo ta chu a nia. Lawithat zan te hi a awm ve ngai a nia. Terini a zam ru kher mai. Pumpelh ngaihna awm hek bik lo le.. A thianghlimna,harsatna karah pawh a lo venhim ve hram hram chu a pasal tan a hlan ta chu a nia. Pathlawi zei leh lungfing tih takah Muanpuia a che thiam a, na a hre vak lo. Tin, Muanpuia a hmangaihin a duh ve bawk a, nupa nun pawh a huphurh ang aiin a awlsam ve mai e. Tebera leh Candy te erawh Nguri te in lamah an riak phei thung. A u te inneihna pawh hlim taka hmanpui duh ten mah se, Lawmsanga erawh a chhungrila inmung reng a natna chuan a duh ang pawhin a hlimtir thei lo. Midang zawng hlim taka an nui a hmuh erawh chuan nuam a ti.

"Ngur, Khawvel hi a fair lo i ti ve em?Pathian hi dem changte i nei ve thin em?" Tiin muthmunah an nu a zawt a.

"A chang chuan ka vui thin. Mahse,Ka beiseina hi a tawp thei miah lo va, hei hian na tawpkhawk leh beidawngin min la awmtir lo mai niin ka hria" a lo ti a.

"Keimahah lawm lohna i nei em? Ka chak lo tiraw? Ka nep tiraw?" Lawmsanga'n a ti mawlh mawlh a.

"I chak tawk alawm. Tu mipa mahin i natna ang hi an hneh thei bik lo vang.mahse,ngen duh che ka nei a..nangmahin awm tam suh. Tuna i la hriat theih lai hian i thiante leh i ngainat te hi kawmin an bulah chetla tam la ka duh a ni.ih maw, i la nuna i la thawk ve tek tek chhung hi chuan, ka tan damchhan a la awm asin" Nguri chuan a ti ta mawlh mawlh a. Lawmsanga pawn dik a tiin Nguri chu zahawm a ti bawk. A lo pachang hlein a hre bawk a ni. 

"I tana phurrit nih ringawt hi ka duh dan chu a va ni lo thin em" a tih rual rualin,"Englaimahin ka tan phurrit i ni ngai lo. I awm hian ka hlim a, I ta nih reng hi ka duh a ni" a lo ti vat a. Inthlahlel zeta inpawm chungin an chhing ta vang vang mai.

" Rawn hawng r'u..mi hur pahnih" tia au thawm an hriat rual chuan Terini te chu an harh hlawl. Muanpuia chu a ner sawk." Saii ngei a ni" a ti sup a. An inha tha sawk sawk a. Muanpuia'n kawngka chu a va hawng a.

" In lo zak thei lo dun pap pap hle mai. Kum khat em pawh kan inthen hmain tiang hian inkhawsa leh thei chu a nia..tenawm lutuk" Saii chuan a lo ti nghal hlawih hlawih. Engah lem vak a ngai lo a ni teh chek ang chu..

"Eng nge i duh?" A lo tih khum a.

"Ka fanu ka duh. Nuhrawn hrawntir ka phal i ring em ni?" Cho zet hian a lo ti a.

"I bula a awm te chuan nuhrawn hrawn nen eng nge a danglamna?" A lo ti nghut. Saii a alh hle. Terini rawn phei ve chu melhin,"Zakthei lonu,i lawm tawh em? Kan inneih lai atang tawhin Muanpuia hi i lo thlem thin tih a chiang reng mai. Kan inthen theihna tura ruahmanna siamtu pawh kha i ni ngei ang" a ti ta piap piap a.

"I hre sual hlauh a nih chu..terini hi theihtawpa ka beih hnua hneh chauh ka ni e..sawi tur dang i la nei em?Bawihteii kawl chu a ngaihtuah pawh ngaihtuah duh tawh suh. Kan bulah a him tawk, A mamawh lo che" Muanpuia chuan a ti ta a.

"A nu ka nih hi..i va zak lo ve. Kei chuan pasal ka neihsan ve lo tlat mai.." A ti khang khang a. Ngeiawm zetin a nui bawk.

" Nu a mamwh a, a nu atana tha ber Terini ka nei a nih hi..tin,kei pawn nupui tha tak leh min zah thiam,uire ve ngai lo tur ka mamawh a. Ka lawm a kim ta..chhuak tawh mai teh..kan inneih tuk a nih hi" Hnehsawh zetin a lo ti let ve a. Saii chu a ang char char, a thiannu chuan chhuahpui a tum thin,a tang tlat bawk si. Terini erawh a fin vang ni maw..a ngawi kar mai a. A tawng ve chuan an inbakkaih dawnin a hria a; a ngawi ta law law mai. Saii thiannu chuan a nawr nasa bawk a, ang hlawk hlawk chung chuan an inhawnpui thei ta hram e.

"A va hahthlak thin em.. Terin, hrethiam rawh aw" Muanpuia chuan inthlahrung ru deuh chuan a ti a. 

"Umm.. A ho lutuk.. Ka hrethiam alawm" a lo ti ve mai. Saii chuan a pasal hluiin nupui a han neih meuh chuan hrehawm ti leh ber berah a tang leh tho chu a nia! Muanpuia angchhunga awm nawmzia, a nawmsak leh a neihnunzia te a hrechhuak uai uai mai. An in lamah lah a lal lo nasa mai si. Lal a hnèkin an monu chuan hnawk a tih hmel thei hlein a hria. Thawhchhuah a nei em em bawk si lo nen. A han sumdawng ve lawp lawp thin tak naa, incheina leh engiloah a tlakral nghal zel a, in chhungkhur tan a tangkai tehchiam loh avangin a inthlahrung lo thei bik lo ve bawk a ni. Tin, Zu leh sa lam a la ti kal reng bawk a, a chhungte tan chuan han lawm viauna chhan tur a vâng ve hrep ang. Mahse, a chantawk a ni a, a pawm mai a ngaih hmel. 

Nauteii erawh a nu anla be hleithei lo, a thiannu bialpa chungchangah khan. A nu rilru tihbuai belh leh a hlauh bakah han sawi dawt kha a hreh ve deuh a ni. Muanzuala lah chu a rawn nasa telh telh a, block em chu a hreh ve si. Rawn ngaizawng tawp anga lang si lo hian, eng eng emaw chhan loh theih loh ang hi rawn zawh a ching a. Hmeltha a tihzia thu lah a sawi sek. Chutiang taka a zuam pawh chu Nauteii chuan amah leh amah a inthiam lo angreng a, Sangpuia hriat pawh a hlau. Ama thutlukna anga Msi hrilh mai a duh ta a. A lo ngaikawi ang tih erawh a hlau viau. 

"Ms, thil ka sawi ang a, thinrim miah suh aw" a ti te te a. 

"Umm.. Sawi la" a lo ti sap a. A huphurh ru ngei mai. Mahse, a thiannu buma a awm reng chu a duh bik si lo. 

"Ih, Muanzuala hi then la ka duh. A lerh" a ti ta tawp a. Msi a hawi â deuh. 

"Engtia lerhin"a ti nghat a. A lungawi hmel vak loh. Nia, Muanzuala hi a duh ve bawk êm a ni. 

"Min lo be thin a" a ti sep a. Msi a meng phawk viau. Mahse, nui lehin, "Ka thiannu i nia, a rawn be ve bawk ang che chu.. " a ti mai a. 

"Ih, chutiang lamin min be lo. Min duh ang deuhin a awm thin alawm.. Hmeltha min tih thu te a sawi thin" a ti ta vek mai. Msi chu a tùm deuh hmak a. 

"Chuvang chuan then la ka duh. Kei lo pawh biak a nei em em ang.. A rinawm loh" Nauteii chuan a ti leh sak a. 

"A va mak awm ve. A fiamthu a niang. Ani hi chu a uang ve peih a. Ka thiante biak uan hi a ching hrim hrim" a ti tak naa, a thian dangte a biak ngai erawh a hre hran lo. 

"I hrethiam lo a ni.. I birthday pawh khan min en dan kha ka duh lo. I bialpa a nia. Ka insûm hram zawk a ni. I tan a rinawm lo ka tih chuan awih mai rawh" Nauteii chu a vin lek lek mai. 

A rin loh lutukin, "Naute, ka thian tha emaw ka lo ti che a. Hetiang rilru hi ka lakah i put ka ring miah lo. Muanzuala chu i lo duh ve viau a nih chu.. Chutin aniin a be hmasa ringawt lo vang che.. I lo mak hle mai. " a ti ta daih. Nauteii a hrilhhai kher mai. Msi tana a thahnemngaih vanga sawi a ni reng sia. A thaw hap ringawt. Nilengin an inbe hleithei ta lo. Hrehawm a ti a, a lo sawi kher kher a, Muanzuala kha lo block mai zawk se, nakinah mi dang laka a lerhna te chu Msi chuan hrechhuak zawk mai se a ti leh hnuhnawh a. A nu a lo rawn lo chu a inhaw rum rum mai. Muanzuala thlengin a ngei phah vek mai. Bana Sangpuia'n a thlah pawh chuan a ngawichawi riau chu a chhan a zawt ta nge nge a. 

Zep nei loin a sawi ta tawp. Sangpuia a chek hluk. "A va zak lo ve.. Bialpa i nei tih i sawi lo mi? " amah dem tum titih chuan a ti a. Nauteii thin a ur hlur tawh. 

"In ninawm.. Ka sawi vek. Ka sawi hnu pawn min lo be zel alawm le aw.. " a lo ti nghat nghat a. Sangpuia pawh a nem ta deuh, "Msi chuan a la hrechhuak mai ang. Nakinah" a ti ta zawk a. 

"Chuan, Muanzuala chu block ang che.. A chiang em? " thupe aw deuh hian a ti nghut a. Nauteii pawh a bu ve nghat. 

"Ka sawi fo thin kha a nia.. I rualpuite hian an ît che, ngaihzawn che an cha.. Ka hlauthawng a ni" a ti leh a. Nauteiin a lo melh vung vung ringawt. 

"Khatin hrethiam lo niawm takin awm suh. Ka sawi dikzia i la hre telh telh dawn" a ti leh hmuk. 

"Nih chuan inthen ila" a lo tih chuan, A brake tuarh. Nauteii pawh a rak ţhawt mai. 

"Sawi leh rawh. Chu chu i duh maw? " Sangpuia aw a nelawm ta loh viau mai. Nauteii chuan a hlau deuh. Ţi zetin, "I sawi reng a, ka ning alawm" a ti sep a. 

Motor a start leh a. Muangchangin an tlan leh ta a. 

"Min then i duh chuan min hrilh hreh suh ang che. Nangmah inhrem lo la" a ti dam ta thlup a. 

"Ka duh lo" a lo ti zawi sap. Sangpuia hmel tak run leh tawrhna inphum ru deuh a hmuh chuan a khawngaih. Chân a hlauhzia a hriat chuan phatsana then a tum lo ve tawp. Bultanpuitu a ni a, chuti maia awlsama a thlah theih a inring bik lo. Msi erawh chuan a rilru a tihrehawm ve khawp mai. An inthianthatna a chhe vek ang tih a hlau. 

In a thlena phone a khawih chuan, Msi msg a hmu nghal. "In inbiakna chu lo ss teh a" a rawn ti. Ni dawn tak e, a hrilh tawh ta sa sa a, engkim hrechiang law law se a duh a ni. 

A va thawn ta nghauh nghauh a. Msi chu a deng na ve ngawtin a ring. Muanzuala chu a block duh mai rih lo, Msi nen an inthen chuan eng emaw tak a rawn sawi a rin vang a ni. Msi a reh ta vang vang a. Dar 10 bawr velah Muanzuala chuan, "I va mawl tak. Nge Msi i lo hrilh vek a" a rawn ti ta. 

"Ka hrilh ang chu. Ka thiannu ania lawm" a ti ve a. 

"Ka fiam ve mai mai che a nih kha. I lo ngai thutak a. Engatanmah ka ti tak tak lo che. " a rawn tih chuan a khi sak. 

"A lawmawm nasat chu.. I ninawm bawk sia, ka block daih dawn che.. " tih leh block a rual ve nghal rap. Tikhan an pahnihin inchingfel mai rawh se. 

Mapuia pawh a pa vanga a rilru hahna te chuan han lempil thin mah se; a bialnu nen an inkar pawn a rilru a luah lo thei bik lo. An inkar a la tha a, mahse, an inhmu khât deuh. An la exam lo deuh a, lehkha a zir uluk ve deuh bawk nen. Ateii'n a rawn be leh zeuh zeuh a, mahse, thian angin a ni thung. A nuna Sasa leh Ateii ten hmun an chan dan a ngaihtuah chuan mak a ti ve hle thin. Ateii chu a khawngaih a, a hmangaih si lo. Sasa chu a hmangaih a, a khawngaih tel bawk. Hei hi a ni hmangaihna leh khawngaihna danglamna chu.. Mi tu emaw hi kan khawngaih thei, mahse, tu emaw kan hmangaih a nih chuan kan khawngaih tel ngei ngei thin. Hmeichhe thenkhat ten amah duh ngawih ngawihtu an khawngaihna chu hmangaihna emaw tiin an han vuan ve ngawt thin a, khawngaihna ringawt chuan kawng thui tak a lo thlenpui thei thin lo va, hnena leh ninna a rawn piang thuai a, an khawngaih vanga an pawm kha na tak tuar turin an thlauhthla leh fo thin. Khawngaihna avang ringawta tuar tlang thei hi an awm a rinawm loh. Mahse, khawngaihna atang hian hmangaihna a piang thei ang em? Chu erawh a tawng tawh ten an hria ang chu. 

"Teber, in school thar chu a nuam em? " Muanpuia'n a tih chuan, "Umm.. Mahse, english an uar lutuk a. " a lo ti mai a. An veng chhungah an luhtir ve ta kha a nia. A la bil hle mai. Terini'n a han enpui lawp lawp thin tak naa, ani pawh Thingtlang School atanga chawr chhuak a ni a, an zirlai nen a lo inang vak tawh lo nen, a thiam a tam lem lo hle. Muanpuia lah a hna vangin hun awl a nei thei meuh si lo. Tutor rawihsak mai te pawh an sawi dun tak hial kha. Terini a hlim veng veng thin. Chuti taka Tebera laka Muanpuia tha leh a hmangaih chu. Pasal thlang fuh a intiin phu lo hlein a inhria. Muanpuia chhungte lam lah an felin an zau si, an va tlawh changte hian an ngaihsakin vuivaina a neih pawh an hnena thlen zel turin an ti thin. Hmana hmeichhe tleirawl rethei tak, a nu leh a laizawnte ngeiin an hnawhchhuah tak khan a suangtuah thin khawvel thar a hmachhawn ta chu a nia.. Chhungpuinu nih te chu a ngaihtuah phak ngai loh kha a ni zawk a. Candy nuhrawn a la ni ang tih hi he ina a awm tirh kha chuan a mumang lamah pawh a mang pha ngai lo asin le.. Pathian remruat dan hi chu aw.. 

"U, Candy hian ka lehkhabu a lo pawtthler vek a" Tebera chuan a ti lang lang a. A lungawi vak loh hmel hle. A va phei vat. Candy chuan a lehkhabu pawhthler chu a lo la hum ţûn mai. 

"Awhaw.. A va pawi tak.. Candy, i û lehkhabu chu pawhthler tawh loh tur aw.. I pawhthler leh vaih chuan, ka hrem tawh ang che.. Teber, a dang kan lei dawn nia. A tha ho kha zir phawt mai rawh" a ti mawlh mawlh a. Sitting rooma an inleng an thenawmnu Remi chuan a lo ngaithla kar mai. Remi hi Ropuia u nupui kha a ni nghe nghe. 

Terini a va let leh chuan, "Fahrawn neih chu eng nge a an dawn? Han luhchilh chiah chuan a dan a dang a nia aw" a lo ti nghal a. 

"Aa.. Candy te chu fahrawn angah ka ngai hleinem. Kan inneih hma pawha ka enkawl kha a nia" a lo ti ve mai a. 

"Inpa hian a ţan bik em? Inpa mitmei ven changte i nei em? " a ti leh ta zel a. Terini pawh chuan mak a ti deuh. 

"Aa.. Chutiang ka hre ve lem lo. Candy hian a pa aiin min ngaina zawk mah a " a lo ti thên a. Remi pawn a sawi zawm tawh lo. 

Mahse, chumi hnu ni 3-velah chuan Terini'n Candy a tihduhdahzia leh a nau nen a enkawl dan a indanglam hleihzia a thang hat mai. Amah phei chuan a lo hre lawk lo. Muanpuia beng a thleng hmasa zawk a. A awih lo viau. A hrilhtu pawh an kawmchhak pitar, pitar ti ila a la tar chhe lo, hman deuh, len bak tihtur nei lem lo ang hi a ni a. A office bang a lo ko peng a. "In nu hi an sawi duh viau a nia. Chhun lamah i awm ngai si lo va, engmah i hre ve si lo. Candy tap thawm hi kan hre zing riau asin. A nau rawn awm ve achin hi a zia a dang tlat.. " awmze nei deuhin a lo ti a. Muanpuia chuan eng he huah a ngai lo. Mahse, A farnu Teteii'n a rawn biaka Terini'n Candy a en hrang em ni tih a rawn zawh hial takah chuan eng emaw dik lo chu a awm deuh em mawni le tihna rilru nen Terini bulah a sawi ta a. 

Terini a hrilhhai letling. A nuih te lam a za. "A va mak dawn ve aw.. Ka enkawl dan a la ngai reng. Tihrehawm ila amah Candy pawn min ngaina tawh nang.. Ka nau a lo awm ve tak avangin danglam hû turah min ngai a niang.. " a lo ti mai a. Muanpuia ngaihdan pawh a ni. 

"Mahse, Terin, hei hi hre reng la, fahrah leh vantlang an tangrual an ti thin. Eng emaw deuha Candy i tih chuan sawi duh tawk an awm leh dawn. Saw.. Remi te ang ho saw an hman si a, lo leng fo lo mah se pawi ka ti lo. Nu lenglam lutuk hian mi pawi an sawi duh,. Ka ringtawk che alawm.. Kei chuan.. Mahse, mi sawi theihna tur lakah inven hram hram a tha" a ti ta a. Terini a bu nghat nghat mai. 

A dik a ni. Thenawm hman em em, mo leh a nu inkara hêm thlak chingte, nu leh a fahrawn inkara thu veivir peih deuh te hi zuk awm a! An hman lutuk a, an thatchhiat vang hian mi pawi an sawi an sawi mai thin. Nu, fanau nei duah tawh, mi ina lenglam thei reng te inchhungkhur te hi a tlabal thei a nia.. An pasalte zir loh te pawh a ni ve tho mai. 

Pu Mawia zing tho, a inthiar chu a pum nâ a rawn zual a. A chhel hle naa, a inthiar zo chu a thu hnawk mai. A pum a dawm a. Amah pawh a sen vek thei. An nu chuan, "Khai! Mama pa, i tha vak na nge? " a lo ti thuai a. 

"Aa.. Ka pum hi a rawn na deuh alawm le" a ti hram hram a. 

A hmel atangin a na satliah lo tih a lan avangin Pi Lawmi chuan Nguri a ko chul a. Nguri pawh chuan a pa hmel a hmuh rual chuan a tawrhna a namai lo tih a hmuthiam nghal. 

An thenawm lawka Nurse Nunui a call nghal a. Ani pawh a rawn lang ve nghal zat. Pu Mawia chu nachhawknin an chiu ta a. A chak bawk a, a chhawk rang khawp mai. Tukthuan erawh a ei peih ta lo. Pu Mawia hetianga a awm lehzel phei chuan lung a zing duh ngawt ang le.. Pi Lawmi phei chu a chaw ei pawh a tui lo. An te ber Nauteii pawh a ngui nghiai mai. A pa vanga a rilru hahna leh ipikna ten an zui reng bawk nen, a pu duhtak na tuara let reng a ngaihtuah lo thei bawk si lo. An chhungkaw chunga chhum dum zing hi a rei tawh mah mah a ni e. A chhela chhel ta ngang a ni bawk a. Pu Mawia chu chawhnu lamah chuan a rawn teihawi peih leh ta mai zawk a. A fapa Lawmsanga vang pawh hian intihharh hram hram a tum ve a ni. 

"Ngur, hei lo en lawk teh.. Driver chaw ei khawmah min rawn sawm a nih hi.. " Lawmsanga chuan a ti a. Nguri'n an pa phone a en ve vat. Lawmsanga thianpa Hminga khan, "Naktuk tlaiah ka in thar lawmna ni pah fawmin chaw eikhawm kan rawt a. Kan thianho Driver ho kha.. In nu pawh rawn hruai ve la" a rawn ti a. Hetia Lawmsanga a nat hnu hian a hranpa taka rawn kan la awm lo mah se, a chanchin an rawn ngaihven reng tho a. Bakah a natna avang hian han inkana inbawr hlut chiah an ngai bik lo nge, Lawmsanga rilru tihbuai an hlau bawk nen.. Tihian ruahmanna thar an siam a nih a rinawm. Nguri chuan huphurh ru deuh chungin, "Kan kal ang a a ni mai lawm.. Nang akar driver i nih tawh loh hnu pawha an la rawn ngaihsak che chuan" a ti mai a. 

"Mahse, hriat lohte nei ta ila" a lo ti khauh.. 

"Ka awm hi.. " a lo ti awlsam êt a. An pa chu han chhuah harhpui pawh a mamawh ve bawkin a hria. Tawm tlawk tlawk chu rilru a mûk a, kan harh vang thei thin lo. Lawmsanga inbual hlanin room a ching fel a. An khum bul dawhkana Bible an dah chu a kawm vel a hrufai a, chutia a hrukfaina lamah chuan a lara lehkha them lian lutuk lo, sei it it hi a rawn tla thla a. Zeh leh mai a tum laiin a thu inziak chuan a mit a la zak mai. 

"Lalpa, ka thih dawn darkarah chuan, Ani hian ka kut vuan chungin, 'Thlamuang takin kal ang che aw' tiin min thlah se ka duh ber a ni. Ka kalsan hnuah chuan keiin ka hmangaih anga hmangaihtu i pek ngei pawh ka beisei. Mahse, Lalpa, keimah tluk hi chu an awm ka remti lo. Kei chauh hian a thinlung lailum ber luah hlen ka duh a ni. Ka hmangaih ngawih ngawih tih i hrereng chung sia kalsan lo thei lo tura natna min pe hi nunrâwng ka ti che a ni. Ani hian min mamawh asin. Kei pawn ka la thlahlel ve ngawih ngawih asin.. Engvang nge? Engtin nge a nih theih? Hei tal hi chu min tiam ang che. Ani hi theihnghilh ka duh lo a ni.. Khawngahin.." a in sùt hraih a. Lawmsanga a rawn chhuah hma ngeiin a dah tha ta sawk sawk a. A mittui a hru hul sawk sawk bawk. Tukverhah dak vang vangin,, "Lalpa, a ngenna che kha i hria ang tiraw? " a ti sap a. 

Khawvelah hian fair lo thil hi a va tam êm.. Kan tuar ve zel bawk si a. 

"Ms, ti nge min biak duh miah loh a? Nge awmzia? " School an thlen atangin Msi chuan thian dang a kawm char char. Nauteii lahin thian nghet a nei em em si lo. Nimina a thil sawi vanga thleng a nih a rin tho rualin chutia engmah sawi lo va inkalsan ngawt chu a duh bik lo a ni. 

A rawn melh zawk a. "Thiante bialpa ngaihzawn ching thian ka kawm peih lo" a lo ti hmak. Nauteii pawh a na ve dawt mai. Thinrimnainna rawn bual tan bawk. A rilru tetein, "Mai mai chuan a. I bialpa lerhzia i la hre ve mai ang" a ti a. Msi chuan a kalsan mai bakah a thutna pwh a sawn ta daih a. Nauteii chu amahin a thu ta ran mai. A zahthlak bakah amah inkhawngaihna a nei nasa a, nilengin a ngui. Rilru hahna tawk a ngah ve tehlul nen. Sangpuia pawn chu chu a hai lo va, tlaia an inthlah pawh chuan tihhlim a tum hram hram. A sâwt lem hlei lo thung. Nauteii te in peng thlen hma lawkin Sangpuia chuan call a dawng a. Mateii a lo ni. 

"Bawiha, zanin tlaiah min chhuahpui hram ta che. Khawngaihin.. Ka thianpa ka ring ve a, a thulh leh sia, thian hlui kan inhmukhawm dawn a. Ka mal lutuk chuan ka tan a nuam dawn si lo.. Min pui teh" a rawn ti a. Speaker a on vangin Nauteii'n a hre ve vek. 

"Aa.. Zanin chu programme ka nei a. A pawi hle mai" a ti a. 

"A mak e.. Thian kan nia, beisei dang ka nei lo.. Khawngaihin" a rawn ti leh ţâlh a. 

"Min hrethiam mai rawh" tih leh phone dah a rual a. Nauteii rilru nguai sa tawh nak alaia tihnat belh kha a hreh ve bawk a ni. Nauteii erawh chuan engmah a sawi lo. 

Zanriah an ei khamah a nuin, Chanmari-ah a u nen a tir a. A pa taksa nât changa a hrenna tur a chah a, an lo deliver remchang si lo chu a han lamtir a ni. Ngawi rengin an inkhalh phei a. Chanmari kawn piah lawka dawr pakhat atanga Sangpuia leh Mateii rawn inzui chhuak lai chu Nauteii'n a va hmu thut mai. A phu zawk mai. A lungphu chu rang tak a ni. Sangpuia khan, "Meeting ka nei a. Ka phone ka off rih ang" a rawn tih kha mawle.. Mateii te nen a ni maw an meeting dawn a?! Nauteii thinlung chu vih ang maiin a nã.. A tah te a chhuak a, a luak te pawh a chhuak ut ut. A û erawh chuan engmah a hmu ve lo a ni maithei. In an thlen rualin roomah a lut nghal a. Lehkha zir tur lachhuakin dawhkanah a pharh diai. Mahse, zir a tum lo bur! Engtin nge a thinlung hliama a awm laiin lehkha a zir theih ang? Msi lahin a huat piah lamah msg ngeiawm taj tak leh status dengkhawng tak tak hmangin a rawn umzui ve chhen bawk si. A â lek lek a ni. 

A thinrim ta thut a. "Khanglang hlawm chuan a..! In la hre dawn alawm" a ti chhuak ta hial a. Lawmsanga fanu a nihna a rawn inlar chhuak ti mai ang, a thil tawnte chuan a luhlulna leh pawisak neih lohna a kai chhuak a ni teh chêk ang chu. Muanzuala number a block kha a unblock te te a. 

"Muanzual, min duh tiraw? " tiin a va text hmiah. Ani lah chuan a lo seen rang nasa. 

"Duh tehreng mai. Mahse, min tina a" a rawn ti a. 

"A nih chuan ni ang. Mahse, i lerh tur a ni lo. " a va ti hmiah mai le. Muanzuala tak pawh a hamhaih hle in a rinawm. 

"I ti tak tak mi? A van mak teh thut ve." a rawn ti ta chiah. 

"A chhan a awm lo. Msi kha then la, min nihpui i duh chuan" a va ti a. 

"Then nghal ang. Mahse, Naute, min kawp bik suh aw" a ti ta a.

"Ka kawp lo vang che. " tiin a chhang a. A rilru pik zet chu hah hmel zetin a thawkpui hluai a. A thutlukna hian inchhirna a la thlen a ngem tih a ngaihtuah phak lo. A nu râwn a mamawh ber laiin a duh danin a che a, eng thil nge a la hmachhawn zel dawn a hre bik lo. A hriat chhun chu a nâ hle a, a thinrim takzet tih chauh a ni. 

"Fa neih vat i duh em? " Muanpuia'n a ti sar sar a. 

"I thu thu. Candy hian School te kal ve phawt se la" Terini chuan a ti sap a. 

"I thu zawk alawm.. A paitu tur i nia.. Ka nei che hi ka lawm telh telh.. Hmeichhe tha tak i ni" an pa chuan a rawn fawp kual dan dan a. Terini pawh a inzir ve nasa bawk a, zah loh theih tumin an pa chu a thiam ang tawkin a lo sawngbawl ve ngei.. Zei em em turin Muanpuia'n a beisei bik lo bawk a. An nupa nun pawh a nuam chho ve khawp mai. A tuka Tebera thlaha Candy paw chunga a chhuak chu a let leh lamah Mamawii te nen an inhmu hlawl mai. 

"I tum bawk a. I kherh thlu ta nge nge chu a nia. I lawmpuiawm khawp mai" Mamawii chuan a ti nghat. A nui sâwng bawk. 

"I hlawhchhamnaah ka tawrhpui a che" a ti ve hmiah. Mamawii nui lai a tawp chawt mai. 

"I va zam lo reuh tak.. I intithei hma mah mah.. Mi nupa inkara tlakzeh te chu a harsa lo lutuk ania.. Inpa pho

ne i check sak ngai lo tih a lang reng mai" a ti ham ham a. Terini a ngawi dat. 

In a thlen chuan Mamawii tawngkam ngeiawm tak kha a ngaihtuah let a. An pa hi a ringtawk viau a, a phone pawh a ensak ngai miah lo tak tak a.. Ensak ve tawh tur a ni ti rilru a. Mahse, Mamawii lakah kher chuan a ringhlel phal lo. Hmanni lawkah an innei a, chutia rinhlelhawm a awm nghal mai te chuan… mahse, nilengin a rilru a nuam lo thei. 

Tlaia an pa lo hawng inbual hlan chuan a phone chu a ensak ta ngei a. A thin a phu dut dut mai. Mamawii chuan a lo be ngei a. Mahse, Muanpuian a chhang ngai lo. Mamawii ai mah chuan Jenny tih hmingpu msg chuan a rilru a khawih zawk. 

"I fanu i hmangaih luatah i hmuh theih hmasa ber i nei tawp ringawt a. I la inchhir ngawtin ka ring. Thutlukna i siam sual a ni" tihte mai chauh zawng a ni. Mahse, Terini tan thu tam tak a tling thung. A hma lama an inbiakna engmah a lang lo. Chutak chuan a vilh a ni. Muanpuia chuan engtin chiah nge a lo sawi ve tih a hre chak. Fiahna awm thei si lo chu a zeldin kual a. " ka fanu hian nu a mamawh si a, Terini hian a lo hmangaih bawk nen.. Ka nei ta mai a ni. Candy len deuh hunah ka then leh mai ang" tiin Muanpuia chuan a sawi tur ten a han ngaihtuah a. A na zawk zawk mai. Riru hlim lo em emin chumi zan chu a hmang ta a. A rinhlelhna tizual tur tingin a pasal lah chuan a phone a bih ngun hrat. Engmah a sawipui ngam bawk si lo. A hlimna chuan a va daihrei lo êm.. Mahse, Muanpuia hi a hmangaih a, phatsan hmasak erawh a tum lo bur a ni. Candy a hmangaihna lah a kiam phah hek lo. A tukah Nguri va hmuha biak rawn a tum ta nge nge a. 

"Min be duh lo maw? Eng nge a chhan? " Sangpuia msg a hmuh chuan a ner sak. 

A seen. A reply duh lo. 

"Zawngi, i lo va mak ngai ve.. I thiannu bialpa i chhuhsak a maw? " Msi msg ve thung. A khi sak a. Hei erawh a reply, "Game nuam tak a ni.. Ms.. I cho chhuah a ni e" tiin. 

Muanzuala'n Msi a then tih a hre thei. A kal zel dan tur erawh a la bangbo. Sangpuia chu a kalsan phawt a ngai tih a hria. Kalsan tura thutlukna a siam hmain an hun lo hman dun tawh zawng zawngte kha hmaih nei miah lo vin a chhuikir ta vawng vawng a. A ngaih zawng a ngai a, bultanpuitu a nih piah lamah a hmangaih ve tawh ni pawhin a lang. Mahse, dawt chiang lutuka hrilha a thik em em hmeichhe bula a kal kha a thinlung hian a tuar thei mawlh lo a ni e. 

Msg a type a. "Sir, engkimah ka lawm. Ka rualpui ka lo ngaizawng ve tawh ang e.. Sorry" tiin.. Chu msg in engtin chiah nge Sangpuia a den nat ang tih ngaihtuah duh lo luiin a maimichhing ta vang vang a.. 

(Ka keyboard hi a dik lo nge. A muang lutuk a. Ka type tam hman ta ngang lo a ni e. A tawp tep aw.