Thutiams2-20

THUTIAM (S2)- 20

Ziaktu: Toni Râlte

February thla tirah Muanpuia te chu insuih ve tura thu tihtluk a ni a. Thenawm khawveng te tan a mak deuh dawn a ni mai. Mahse, Pathian hriatpui thlapin an la mudun lo miau a. Muanpuia zawk pawh hi insum ve thei tak chu a ni. A hriatchhuah tak chu, "Kan hmangaih ten an remtih miau loh pal luih hi thil harsa tak a ni zawk" tih hi. Terini rinawmna leh huaisenna, a rilru thianghlimna te chu a ngaisang telh telh a ni ber. Nitin zantin a hmu a, A ril arah ni miah lo Candy chunga a chet dan leh a enkawl dante chu a nu dik tak pawn a tih hleihtheih loh tur a ni hial awm e. Candy phei chuan a nu dik zawk hmu ngai tawh hek lo, Terini chu a nu dikah a ngai hmiah niin a lang. Hnute an inpe lo a ni mai. Muanpuia fanu a nihna vang pawh ni loin Terini chuan a lainat tlat a, a dinhmun nen a chan lo thei lo va, tha taka enkawl a tum ve bawk a ni. An khaw lam a ngaihtuah ve fo, a nau chanchin pawh hriat chu a nei zauh zauh. School a la kal ve a niawm e. Mahse, in lamah zirpuitu nei lo na nâ na chu an classah a tlahniam pawl a ni a, ngaihthah a nih tlat avangin a nungchang pawh a mawi hran lo a ni awm e. A nu leh a laizawn bakah a pahrawn te a huatna chu a pung deuh deuh mai. Mi huat hi a duh lo viau naa, an ni laka that chhuaha an laka nem chu harsa a ti ve tlat. 

Muanpuia nen pawh an sawi dun ve a, inneih hma ngeia a nau chu va lak chhuaha an bula chentir turin thu an titlu ta a. Pasal hial a nei ve dawn a nih chuan a nu a la dam ve a, nu man te pawh a ei ve chu a ngai ang chu.. A nu hnen atang chuan thuamchhawm leh engilo a beisei hran lo. Tin, in khata cheng dun, inkutsuih mai tur an ni a, thuamchhawm a mamawh lo. Nguri erawhin a ngaihna a hai lo va, Lawmsanga u Teteii nen inbiain Terini tana eng emaw hlu tham leh a mamawh tak tur ngaihtuahsak erawh an tum ve khiau thung. Biak ina inneia mi nawlpui te nena lawm tur an ni lo bawk a. A zia viau. Mahse, mi thenkhat chuan an sawi duh viau ve thei. Hetiang hi mizo society-ah a la hluar hran lo bawk a. Thenkhat ngaihsam deuhte tan chuan chendun chuan nupa anga awm dun ang hialah a ngaih theih mai awm e. Mahse, an inneih hma zawng hi chu Terini chu awmpui a ni ve tlat! 

Nauteii pawh class xii a zir ve dawn ta a. A nuin a fuih nasa, Board exam hmachhawn tur a ni ve miau si a. Mapuia pawh an final exam chu tha taka hmachhawn turin a inpuahchah nasa ve hle. A pa bak rilru kamtu a nei ta rih lo bawk nen. Nia, Ateii pawh dam takin a chhuak ve tawh a. A hriatna te pawh a pangngai chho ve zel a, a rawn be ta vak lo. Sasa nen an boruak a tha a, thikthu vanga han inbah zauh chang zawng a awm. Mahse, thutawp an sawi ngai tawh lo a ni. Pu Mawia pawh mi te rin ai leh beisei ai daihin a tha reng tlat! Tawngtaisakna a dawng nasa bawk a, amah hian hneh a tum bawk nen. Chemo an khai lai tih loh chuan awmhmunah a awm mai mai ngai lo. An nu Pi Lawmi zawk chu a bawrhsawm chho zawk a, mahse, ani pawh chutia han ngaihtuahawm vût erawh a ni lo ve. Lawmsanga mawlh hi a ni, a natna kha a stage a lo sang tawh nge mawni dawn ni.. Nitin a hniam zel niin Nguri chuan hria. Chuvang chuan an hotu te hnenah ngenna siamin a aiawh turin Schoolah pawh mi a tir ta tawp a. A pasal chu a hun tam zawk pek a duh a ni. A harsatna te hrethiamin hotute lam pawhin an lo pawmsak bawk a. Nitin an inawm chu a ni ta mai. Lehlamah han chhuahsan nitin kha Pi Lawmi a chauba ve tawh nen, an enkawl zo lo lam a ni. Lawmsanga lah tih phut phut ching a ni si a. 

"Naute, bialpa thar ka nei a.. Awii.. Chhe lo tawp.. Ka hmuh ang che" tih leh a phone phawrh a rual a. A thiannu chu a bialpa thlalak a hmuhtir ta a. Msi bialpa thar chu a chhe hran lo, Nauteii pawn, "A nih kha.. Then miah suh. A hmeltha" a lo ti ve vat a. 

"Mahse, awii a zei mah mah a.. Hrethiam em? " tiin a nui har har a. Nauteii a meng buai deuh, "Zei te chu a tha daih zawk ang chu" a ti sep a. 

"Min fight nasa thei lutuk a. Thuruk tawpkhawk ka hrilh ang che. Tuma bulah sawi suh aw.. Ih, ka virgin a hawng a" a ti sar sar a. Nauteiin mak a lo ti nasa. A thiannu chu a virgin tawh lo tihna a nih chu! An class ami te chu an virgin vek a ring ve tawp kha a nia. Mahse, an dai chin a lo inang lo nasa a niang e. 

"Ngati nge i hawntir? I ui lo mi? " a ti hawk a. Msi chuan ngaihsam hmel deuh hian, "Min hmangaih lo a nih kha a ti zel a. Inthen ka hlau ve bawk sia, 31st dec. Khan kan ti a.. Mahse, a na rap.., " a ti liam puat a. Nauteii ngaihdan a ni vak lo. A nu sawi fo angin Christiante hunpui hi thalai tam tak chuan nawmchen nan leh damchhung inchhir nan kan hmang thin a, hei hi a fuh hlawl lo. Pathian pawh a zahawm a tih thin kha a thiannu chuan a zawm lo tih a hriatin a rilru a na deuh. Msi bak an schoolah thian nghet a nei bik lo va, pawi a lo tihpui ve tawp a ni mai. 

"Hmang tawh suh u. I rai ang e" a ti a. 

"Hm.. Damdawi a tam lutuk.. " a lo ti leh mai si. Sawi tur pawh a hre tawh lo. Sangpuia nen hun fal an nei ve nual tawh, tilui duh nise tharumah pawh a hneh loh lutuk tur a ni. Mahse, Nauteii duhthlanna a zahsak ve tlat hi Sangpuia zahawmna ve tho a ni. Nauteii pawn Msi chanchin a hriat atangin Sangpuia a ngaihsanna leh a duhna chu a pung sawt mai. 

Doctor nen an inhmachhawn ran a. 

"Phai lamah te hian hei aia enkawlna tha zawk a awm lo em ni? Min refer mai la.. " Nguri chuan a ti khur dat dat a. 

Doctor chuan, "Pawi ka ti. Awmzia a awm lo a ni. Sum insenralna mai mai a ni dawn a. Damdawi kha a hunbi takah l lo pe zel phawt rawh u. I pasal hi ka rin aiin a hniam hma tlat a, a lo tuar ru rei tawh viau a nih ka ring. Bakah a natna dik tak a hriatna khan nghawng chu a nei dawn chiang sa a.. A pawi khawp mai" a ti chuar chuar a. Nguri'n a chil a lem khawlh, "Tukin ka rawn kal hmaa ka bualfai khan a sam pawh a tla ţan a.. " harsa tih hmel zet hian a ti a. Thil dang daih ngaihtuah hmel a pu. 

Doctor tan pawh sawi tur a vâng hle a niang. A heh a liak zauh zauh ringawt. Enkawl dam theih loh natna lo awm hi Doctor te tan pawh hian a huatthlaawm ngawt thin ang. Kawng dang awm se an ti ve ngawih ngawih thininna rinawm. Lawmsanga natna ang phei chu mizo thenkhat te tan chuan âtna chi khat a ni mai dawn a, Mi â dahnaa dah chi ni chuang si lo, lainatawm tawk leka hriatna fim la nei ve tho si natna kher kher Lawmsanga'n a lo vei hi a pawi lungrun tehzawng a ni e. Damdawi nen Nguri pawh a haw ve leh ta hnak hnak a. A ngaihtuahna a kal ding deuh nge horn ri tuar vangin a harh zawk. Car pakhatin a lo su lek lek a lo nia. Hmanhmawh taka insasengin, "Ka tihpalh lutuk.. Ka lo inngaihtuah muk deuh a" a ti sawk sawk a. 

"Nguri" a rawn tih chuan phâwk zetin a va hawi a. A thil hmuh vang chuan a ding khawng zawt. 

"Aldrin.. " a ti sep a. Car chu kawngsir deuhah parkin a rawn chhuk a. A inchei zahawm hle. 

"I dam em? " a rawn ti. 

"Engtin nge i chhuah a. " a lo ti tâwng a. Aldrina hi a tan hun chhung a la zo chiah lo naa, ukil ten thiam takin an dinsak a, An bail thei ta hram kha a nia. A nu a boral atanga kum 2-ah a pa pawh a boral zui ve a. A farnu pasal nei tawh te chhungkuain an inpui chu an luahlum ta a. Aldrina a rawn chhuah takah chuan an in lamah let lehin Aldrina chu amah chauhin a khawsa ta a ni. Nupui neih lam pawh a ngaihsak ta lo va, Nguri'n a serh a tlawhsak khan nghawng a lo nei thui riau aniang. A pa thei lo zui ta tlat a. Mi tilreh ang chauh a ni ta a ni. A kum te a lo tam chho ve tho bawk a, a tal talin a tal chho ve a, a pa in a hnutchhiah sum bakah in hmun leh engilo te hmangin sumdawnna chhete a tan ve leh a. Mi nazawngin Nguri kidnaptu a ni tih an lo hre ta lo bawk nen, a nun pawh a nuam chho ve khawp mai. 

"I dam em? " Aldrina chuan a ti leh a. 

"Aw ka dam" a lo ti hul hak a. Inbiak chu a phur fahran lo tih a lang reng mai. 

"I dam chuan a that chu.. Lo dam zel rawh. I chunga ka thiltih avanga ka hloh leh chân te hi a tam tawk tawh a. Tun atang chuan inrem thei lo mah ila, intibuai tawn tawh lo vang aw" a ti dam thluam a. 

"Aw le.. Nang pawh lo tha rawh. Anih phawt aw" tih leh kal a rual a. Aldrina chuan a thlir zui vawng vawng mai. Khatih laia a lo atzia leh Nguri a atchilh tlat hun lai kha a ngaihtuah chhuah apiangin pawi tiin a rum tlawk tlawk thin. A nu leh pate ruang pawh kil thei lo khawpin a thiltih man a tuar ta si a. A hna zahawm tak a tihminghliau bawk.. Sual man hi chu a ţha ngai lo rêng a ni. Nguri pawn a ngaihtuah zui ve rauh rauh mai.

"Ka u-in nupui a rawn ru ve ringawt a" Sasa chuan a ti sar sar a. 

"Chu! Laizawn i nei tawh dawn nih chu.. I lawm awm" Mapuia'n a ti a. 

"Umm lawm ve tho, mahse, an nu hi ka hrechiang lutuk lo va. An inngaizawng tih pawh ka hre lo.. A fel hmel reng fel chu" a ti a. 

"Engtikah nge kan inneih ve ang"Mapuia chuan a lo ti khauh. 

"Kan upat hunah" a lo ti a. 

"Kei chu ka ngam tawh reng"

"I zak lo, i la naupang ve tho aw"

"College zo la, innei ila.. Hna ka nei ve tawh ang a" Mapuia chuan a ti a. 

"I thu vek alawm boss.. Mahse, ka pa hian a hminga hna neihtir ve min tum tawp a.. Fanu mal ka lo ni ve bawk nen" a ti a. 

"Hna ka neihte chuan i neih ve kher a ngai lo. Fa tam deuh ka duh dawn a. I enkawl an ngai dawn" Mapuia chuan hlim zetin a ti a. 

"Ka tlin bik dawn mi? " Sasa chuan a lo ti a. 

"Tlin ang, i hrisel ve tho kha.. A tlem berah pasarih aw" 

"Vanropui, em em a che.. " Sasain a rawn ti hlak hlak. An nui dun hawk hawk a. Anmahni tawkah an khawvelah an hlim thin teh e. Mapuia pa chanchin pawh Sasa hian a ngaihven ve reng a, a khawngaih ve takzet a ni. 

"Ticket chu ka la fel e. Lo kal ve i phal bawk si lo va. I sual" Muanpuia chuan chawhmeh bel hawn zauh zauh pah chuan a ti a. Terini an khaw lamah a nau hruaiin a haw dawn a ni. A huphurh ru viau. Terini awm loh chhung chu Inpui lamah an awm pafa rih mai dawn niin a lang. Terini pawh a phur fahran lo. Engtin nge an lo dawnsawn dawn a hre lawk bik lo nen. Mahse, kal chu ţul a ti ve bawk si, Candy te pafa pawh a ngaihtuah ve khawp mai. 

"Ngur, lo en ve teh.. Arsi khi" tukverha dak vuang vuang chungin a ti lung lung a. Nguri pawh a va kal ve a. Van chu a thiangin arsi a pe un mai. An inngaihzawn laia hostel balcony-a an inbiak thin laia arsi an thlir dun laite kha a hrechhuak uai uai mai. 

"En rawh, ka kawh khi i hmu em? Arsi eng bik deuh khi.. Khi ka kawhna khi.. Hmm.. Khi khi ka arsi bik a nih khi.. Ka thih hunah pawh lo thlir thin la, arsi kaltlang khian ka lo hnem thin ang che" a ti mawlh mawlh a. Nguri chuan a nguina thup chungin, "A hmingah Lawmsanga phuah nghal daih ila" a lo ti a. 

"Umm.. Chuan nangma arsi ve tur kan zawng leh ang.. E aw khi khi a eng ber khi.. Chawngmawii a ni chiang, mahse, tun atangin a hming thar chu Nguri a ni tawh aw" a ti leh chul a. Nguri chu a lo nui lui thung. 

"E vawiinah Aldrina ka hmu asin" a inrin hmain a ti hlawl. A sawi zo tawh si. Lawmsanga chuan a hre kher ang em pawh a hre si lo. A rawn hawi nghal vut a, a mitmeng a rum nghal sawt. "Kha zawngsena kha maw? Engtin nge a lo chhuah theih? " a ti ro huk a. Nguri a lo hlauthawng. 

"Aa.. A farnu thih ngamin a dam lo a, jail atangin police te venna hnuaiah a rawn kan ve a" dawt var a sawi ta tawp. Lawmsanga thisen zâm pâwng ţawlh ţawlh chu nakin lawkah a thunun thei dawn lo tih a hai si lo. 

"Umm a that chu, zalenin he leilung hi rawn rap tawh suh se.. Ka rekhlum duh mai ang" a ti chher chher mai. An pa ban va chulsak heuh heuh pahin, "Arsi ang khian eng dun reng ila tiraw? Kan tar hnu thleng pawn" a ti sar sar a. Lawmsanga mood pawh chawp leh chilhin a inthlak ve mai. 

"I eng reng ang chu.. Nguri kha i ni miau a. Nauteii leh Bawiha ten fa an neih hnu thlengin i eng reng tur a ni. " a lo ti dam thlup a. 

"Nupa hlim tak kan nihna hi setana hian min thik aniang ka ti thin a.. Pathian remruata pawm thiam hi harsa ka ti thin" Pangchang takin Nguri chuan a ti ta a. A rilru dik tak pawh a ni. 

Lawmsanga a ngawi vung vung, a lung a chhe deuh a ni maithei. 

"Vanramah hian nupui pasal a la neih theih i ring em? " a lo ti daih. 

"Ring lo".... 

"Vanram pawh chu a va nuam chuang awm lo ve.. Ka ta i nih theih lohna hmun chu ka tan hremhmun ang tho a ni dawn asin" A mitmenga tawrhna thuk zet inphum chung chuan a ti ta a. Nguri mittui bawk hi a lo hnai leh thin. Lawmsanga awma bei thlapin a lungphu ri a ngaithla a. 

"Eng lai pawhin, khawi hmunah pawh i ta ka ni" a ti sep sep a. Duat taka a nupui lo kuahin, thlifim thaw heuh heuh karah arsi chu an thlir dun ta reng a. 

"Ka nu, in lo dam maw? " Terini aw chu a zangkhai hle. 

Mak ti zeta lo melh rengtu te chu a nuih sak a. An khua a chhuahsan lai hmel kha a pu tawh mang lo. A lian zawkin a vun pawh nalh tak a ni, tin a thawmhnaw lah a faiin a zahawm hle bawk. 

"Terin leh..! " A nau hmeichhia khan a ti chul a. 

"Nia, keimah.. In lo dam em? " a ti leh a. 

"Dam e.. Lo kal rawh. Aizawlah i awm daih tih kan lo hria a. Ngati nge i lo hawn? " a lo ti a. A nu erawh a la chechang lo. A melh reng ringawt. A pahrawn erawh a hmu lo. 

"Ka nu, mak i va ti awm ve. Kum khat bak ka thang bo hleinem.. " a ti a. Nelawm zetin a nui bawk. 

"Eng maw i lo tih ber dawn? " a nau chuan a ti leh a. Hnawk an la ti ru reng niin a lang. 

"Tebera ka rawn hruai dawn. Ka bulah ka awmtir dawn a ni" a ti ve ta a. A nu chuan, " A awm ang lo e a. Engvang chuan maw? " a lo ti hluk. A nu zia pawh a la ngai reng mai. A hmel erawh a dang tawh hle, zu a in nasa tih a hriat ngawih ngawih. A dum duk cher chur mai a, a dul a kiarin a mawng a zuih ţat bawk a. Hmuh tlak a awm lem lo viau a ni. 

"Ka hruai dawn. Amah pawh ka be tawh a. A duh vek tawh. Chuan, pasal ka nei dawn a. Ka pasal nen kan bulah a khawsa ve ang" a ti nghet charh. 

A nau chuan, "Pasal a?! Tu nge? I hmu zo ve mi" deusawh nuiha nui chung hian a lo ti a. An inah innghat lo va, a thiannu te ina a innghat pawh hi a tifuh hle a ni. An chhungkaw chanchin pawh a hre nual. A nu leh a pahrawn kha an inthen tawh a, mahse, kha pa khan a la zar zeuh zeuh, a thatchhe si a, zu a duh ve tho si chu a nu bak belh tur a hre bik lo a ni mahna. Innei chiah si lo, awm dun tam si ang zawngin an khawsa a nih ber chu. Chuan a nau hmeichhia kha a rai a. Nau a chhiat thung. A chhiat ring lo va a tihtlak ring an awm nual. A nau chiah mipa erawh amah aia upa ve fe nupuiah neiin Kolasib lamah an nu te khuaah an lo awm daih a lo nia. Lehlamah chuan a tha zawk daih awm e. An te ber tebera erawh sawi tawh angin School te chu a la kal ve naa, an family background vangin a nunphung a hniam hle a ni. A thlen tirh khan a nau chu kohtir nghalin a kawm a. Tebera phei chuan a u chu a lo hre vak tawh lo. Mahse, naupang â tih takah Aizawl lam sawi takah chuan awm daih a duh thu a sawi ta mai a. A u nen an inhmuh thu erawh sawi rih lo turin Terini chuan a hrilh a ni. A lo sawi bik lo a niang, Terini an hmuh khan an phâwk em mai. An in leh lo lah a lo tlabal viau mai a. An enkawl fai bawk si lo.. Zu pawh an la zuar reng a, Zanah phei chuan tlaivar dawn dawnin pahoin card an deng thin a niawm e. Hengte avang hian ania Terini pawn Muanpuia kal ve a remtih loh, a seilenna hmun zahpuiawm tak chu a zahpui a ni. Zahpui awm tak pawh a ni ve miau a. 

"Police a nia.. Kan pa tur chu.. " a ti ban chat a. 

"Ve ngei chuan.. Chuan min lo sawm tihna mi? " a nau chuan a lo ti a. 

"Ni deuh e. Ka nu hian nu man a ei ve a ngai dawn sia" a ti ve mai a. A nu erawh a ngawi reng.

Buaina tawh a hlauh deuh vangin Terini chuan an VCP lenchilhin, thil awmzia a hrilh vek a. An VCP pawn a lo hrethiam khawp mai. Amah Tebera berin a duh phawt chuan kalpui mai theih turah an ngaihsak deuh. Buaina a awm tak leh inrawlh an hreh loh thu thlengin an sawi a. Terini pawh a lawm ve hle. Mikhual chan a chang titih deuh a, a thangbo rei lo nain a hmaa an khawsak dan avang te pawh khan a tuallim lo em em a, tu khaw khain an ngaihsak lem lo bawk a ni. Tebera chu a nu leh a u te chuan an lo vau deuh a niawm e. "Aizawla i awm chuan an hralh diah che ang a, vai ramah kut i dawh mai ang" ti ang zawng ten an lo vau a. Ani lah a â ve bawk si, Zan tirah Terini thlennaah va kalin, "Min hralh daih dawn chuan ka lo kal duh lo" a ti ta a. Terini nuih lam a za. Tha takin a nau chu a hrilhfiah a, School a luhna tur te, an awmna lai hmun te a hriatthiam dan turin a hrilh ta malh malh a. Naupang tih takah a lo awih ve leh thliam. Zep thu a cheng lo, an in saw nuam a ti bik lo va, an tirh reng bakah han hnial ve hlek se vuak leh kuk a hlawh nghal a. Tha zaia inbiak a awm ngai bawk si lo, invin leh inhrawk khur khur rengna hmun chu nuam tak a ni thei lo hrim hrim. Zanah te hian naupangtê si hi a vak a vak zel, thian kawm tur a nei ngai lo va, a chhan chu nu leh pa dangte chuan an fate zana chhuah an phalsak ngai lo. Ani erawh an en liam tawp a, eng pawh ti se engah mah an ngai lo. Mi thei pawh ru se hauh an tum chuang lo va, an duh loh dan anga a awm ve hlauh erawh chuan na lua a awm lo thung. School-a a mamawh te hi han sawi ve thin mah se, a tawpkhawkah lo chuan tihsak a ni ngai lo. A mum mumin a mum ve tawp a ni ber e. Chuvang chuan Terini pawn chhanchhuah a duh kha a ni rèng a. Enkawl erawh a hautak viau dawn tih a hria. A nu leh a nau (laizawn) te erawh a thinlungah an tla na tawk tawh lo va, an awm awma awmtir mai a duh tawh. 

Ni 3 lai a cham hnuah Tebera nena Aizawl pan tur chuan an inbuatsaih chho ta a. Hmangaihber niawm fahranin Terini nu lah chuan a ui bet ve tlat si. Mi ngaiha mawihnai a zawng ve pawh a niang e. Mahse, amag Tebera'n, "Aizawlah a û bulah ka awm duh. In bulah ka awm peih tawh lo. In sual si" a tih tak zelah chuan han ui beh vak pawh kha a sâwt lem lo. Harsatna lian tham em em tawk lo vin Terini nen chuan Aizawl chu an pan ta vang vang a. 

"Nu, Msi birthday a nia. Chaw eiah min sawm ve sia.. Ka kal ve dawn aw" Nauteii chuan a nu bulah a ti sar sar a. 

Nguri pawn an fate nun a nguai lutuk ang tih hlauin, "Umm va kal rawh. Present tur te i lei tawh em? " a lo ti a. Nauteii a hlim hle. Msi pek tur thil lei turin a u nen an chhuak nghal a. Perfume a leisak.. Mapuia thlansak a ni nghe nghe. Sangpuia erawh chuan kal ve tur dangte a lo ngaihtuah daih. A tel ve thei dawn si lo va, Nauteii chu a ngaihtuah deuh. Zanriah an ei ang a, zanah dar 8 vel thleng an la awm dawn bawk si. A rualpui ho bulah a chetla dawn chu a nia, a rilru a lo hah lawk ve em em ringawt. Nauteii kal tur chu a nuin a chei a, kawrfual, a nî Teteii leisak a khup chung hret, simple tak si a ha a, a sam a thlah ve hnâp bawk. Chapal kaih sintê a bun bawk a. Hmuh a nuamin a fresh kher mai. A ù in Msi te inah chuan a va thlah a. An inhmuh chuan an rak chul mai. Gift te chu a han pe a, Msi a lawm kher mai. A sawm tam lo va, a bialpa te thianho pathum bakah Ama thiante bik pali vel a sawm ve. Msi nu leh pate hi sawrkar hnathawk ve ve an ni bawk a. An nei reuh khawp mai. An felin Nauteii te ho pawn nuam an ti viau. Msi bialpa te pawh an lo thleng a. Nauteii chuan a thlalak a lo hmu tawh a, a hai lo hle. Msi chuan a thiante nen a han inhmelhriattir dan dan a. Nauteii chu mipa lam chuan an en dun bikin an ngaihtuahna erawh hriat a ni hran lo. Hetiang bunah chuan zahzum vak chi a ni lo tih hriain Nauteii pawh a titi ve nasa mai a. Msi thian a la hriat ngai lohte nen pawh an inkawm thei nghal mai. Eirawngbawlpui an ngai lem lo bawk a. In hnuaiah Msi roomah an chhuk thla ta dial a. Ruihhlo tel loin an hlim ve lutuk tho e. 

"Naute, ka hmuh hnu i ang ee.. ML i khel ve thin em? " Msi Bialpa Muanzuala chuan a ti a. 

"Aih, khel ngai lo.. " a lo ti ve mai a. A en ngun dan em em chu a lai! Msi erawh in chungah theitui a han la a. 

"ML khel ve thin nen khan in inang tawp.. Kha nu khan i pic a hmang zawk pawh a ni maithei ni" Muanzuala chuan a ti leh a. Muanzuala thianpa Opa chuan, "Naute, in vengah ka ex a awm.. I hria ngem aw.. Lindai a nia. Sang lam, cher ve lam kha" a lo ti ve a. Nauteii lah chuan a hre ikhaw si lo. 

"Inah ka tawm nasa a, kan kohhran ami te pawh hriat loh ka ngah mai. " a ti a. Muanzuala bawk chuan, "Bialpa i nei em? " a rawn ti thut! 

A hamhaih deuh a. Mahse, zak sen ap ap chungin, "Umm" a ti ta ringawt. 

Zanriah an ei lai te chuan Muanzuala chuan a rawn melh leh zuk zuk zel a. Nauteii lah chuan a hmu fuh thei ve bawk si. Nuam lo a tiin, Muanzuala chuan Sangpuia nen an nih te hi a hria mawni le tihte a ngaihtuah thleng. A chaw ei pawh a tui vak lo. Ei khamah an han inkawm leh a. Zai te playin a phur fal te chu an lam ve a. Cake te an zai hnuah phei chuan, Msi room thlang lam bathlarah chuan an chhuak zauh zauh mai a. Nauteii chuan a ngaihna a hre lo hle. A hnu deuhah, Msi chuan, "Naute, i drinks ve duh em? Va ti ve rawh" a rawn ti sar sar a. Zu an in tih a hrethiam. 

"Aih, ka in lo mai ang" felfai takin a lo ti a. An nawrlui lem lo. An lam lai chuan Muanzuala chu a bulah a rawn thu chawt a. 

A beng bulah, "I thiannu aia kan intawng hmasa lo hi a pawi tiraw.. Hmelthatê" a rawn ti ta mai a. Nauteii a chiái ţhelh a ni. Mahse, inthunun vatin, "I ti ang lo em mai. Msi bulah va kal rawh" a lo ti fiah fak a. Msi zawkin Muanzela chu lampui tura a rawn kaih avangin an kalsan ta a, Opa khan a rawn sawm ve naa, "Ka lam thiam lo" tiin a hnar. A nuin a rawn call ta chiah bawk. Bathlarah chhuakin a va bia a, "I u a rawn kal dawn aw.. Lo haw tawh mai rawh. Laklawh deuh mah ula" a rawn ti. Nauteii pawh chuan a lo hnial lo khawp mai. Kar loah a u pawh a lo thleng a, Msi te nen chuan an inmang tha ta a. 

Dar 10 velah Msi chuan, "Kan pa khan i number min dil a. A thianpa nen tihpui che u a tum a. Nihpui ve rawh aw.. An fel tawp.. An chhe lo si" a rawn ti ta mai a. A bialpa mizia a hrechiang lo lutuk chu a khawngaih zawk. 

Muanzuala chuan a rawn text ta ngei a, "Chhelote, i mu tawh em? Ka number hi lo save ve rawh aw" a rawn ti. 

. "Min hrethiam la.. Bialpa ka nei a. Tumah mipa dang biak a phal lo" a ti ve hmiah. Muanzuala chu a ngei pawh a ni lo, a tenin a ten. 

"A ho e.. Kan inngaizawng dawn hleinem.. Tian inbe ve mai mai ila.. " a la rawn ti fô! 

"Sawi tur a vâng ee" a ti ve a. A hnua a rawn text leh pawn a reply tawh lo. Sangpuia phei chuan hria se, a thîk ngawt ang. Msi bula sawi mai chi em mawni dawn ni te a tia, a ngaihtuahna a buai ve hle. Mahse, a thiannu ve ngawih ngawih a nia, a bialpa lerhzia chu hria se a duh bawk si. A nu a hrilh phawt mai aniang chu.. 

Terini hmuakin Muanpuia pawh MC kawtah a hawi vual vual mai. Terini tel lohna hmun khawharzia a hre chiang ta hle mai. A fanu tak pawh Nguri ten duat teh mah se; Terini tluk an lo awm thei lo a niang e. A tlei thei meuh lo. Nauteii hian a chhawnchhaih peih em zawk a, a zia zia a awm. Terini chuan a nau a rawn hruai thei tih a hre tawh bawk a, a fanu hmangaih taka enkawltu a ni a, a phutawk ang ngeia rulh a tum ve hle. Terini te khaw sumo a rawn thleng ta a, a lo thlir vauh vauh. An rawn chhuk takah chuan a va ko a. An innuih sak mai. Terini tak pawh hian a ngai tawh hle. Terini nau Tebera chu a hawi nasa ngang mai. Aizawl chu pui a tih hmel khawp mai. A demawm hran loh e. Muanpuia motorin in lam panin an inphur ta a. Inpuiah zanriah chu an ei phawt dawn a ni. Zan pawh an riak nghal maithei bawk. Nguri te pawn an lo dawngsawng tha hle. Tebera erawh a la zûm deuh a, Nauteii anga ţawng phawng phawng chi a ni bawk a, amah Nauteii ber chuan a lawm hle. Chaw ei khamah a ek a chhuak ta tlat. A u in bathroomah a va hruai a. Terini reng reng pawh a lo mangnghilh nge mawni dawn ni, European type-a ek dan a lo hrilh si lo. 3mins velah Tebera chuan ţah aw ţiau hian, "Û, ka e thiam lo" a rawn ti ta ruan a. Terini a va phei vat. Tebera chu Comode chunga thut tum tumin a lo ding dihlip nasa mai a. Terini chuan a tihdan tur a hrilh ta vat. Lungmuang tak chuan a e ta a. A ek pah te chuan a zai ve rût rût a. A'n faifuk vel thul. A awmna hmunah chuan a thla a muang tih a lang reng mai. 

"Teber, pawl engzat nge i zir? " Nauteii chuan han chhawnchhaih vel pahin a ti a. 

"Paw thum" a ti mai a. 

"A nih i hmingpum han sipel teh" a tih chuan, "Nghing.. Hmingmawizuala" a ti leh mai. Nauteii chuan a nuihpui nasa mai a. Tebera pawh chuan a nel nghal viau. Nguri'n a bulah a ko phei a., muanpuia chu kawkin, "Hei hi au Terini pasal tur a nia. I u tur a nia. Mahse, apa ti mai rawh.. Apa han ti teh," a tih chuan, Muanpuia melh vung vungin, "Apa" a ti ta a. Muanpuia pawh lai deuh takin a lo eih ve lauh mai. Candy chu kawhhmuh lehin, "I nau a nia. I duat hle tur a ni. Bawihte tiin i ko dawn nia" an ti bawk a. 

"Kan inang lo e.. Unau te chu an inang asin" a ti pek a. 

An hlimpui phian. Lawmsanga pawh a khi ve suk suk. Terini te inneih chungchang vel an sawi ho bawk a. Terini man chu an thenawmpa Pu Liantlinga'n a dawng dawn a ni. Inpuiah an bialtu pastorin a inneihtir ang a, An nupain Muanpuia inah an lawi lut dawn a nih ber chu.. A dangdai khawp mai. Mahse, Terini tan chuan a tha zawk, mite angin pazawn te neiin a hranpaa lawi luh te ngai dawn se, thuamchhawm te a neih ve a ngai dawn a. A tlin lo vang. An remruatna ang ang chu a pawm vek tawp mai. 

Muanpuia te inneih hmain Lawmsanga rawt angin an huanah chhungkaw ho an picnic dawn a. Teteii te chhungkua pawh an rawn tel thei dawn e. An phur tlang kher mai. Pu Mawia ber chu a phur ber berah a tang a. Nauteii pawh a tuichen kawr tur te siamfelin, Sangpuia bulah report a pe siam siam mai. An huan lam panin an inzui ta thliai thliai a.. Huan an thleng a, an ri chul mai. Thenkhatin ei rawng an bawl a. Thenkhat tui an cheng, chawhmeh leh engilo zawng an awm bawk. Lawmsanga leh Nguri chu huan thlang ta zawk nimbu hmunah an kal a, Lawmsanga lung chu a len hmel ngawih ngawih. A en ngai te chu a lo en leh ngawih ngawih thin. 

"Vawiin chu hlim ni alawm.. Lawmsang, i nuih loh chuan ka nui thei lo a nia" Nguri'n a ti a. 

"Ka hlim.. Mahse, ka lung a leng a ni. Hrisel taka ka hnathawhna hmun ka hmuh hian thil tam tak ka hrechhuak a ni" a lo ti a. Nimbu te chu an lo dun a. 

Teteii leh Terini ten ei rawng an bawl thung. An inkawm thei phian a. Terini hi tupawn an ngaina a ni mai. Muanpuia luck thinzia te Teteii chuan a sawi a, an nui leh bawk bawk thin. Pu Mawia te nupa erawh dil bul velah naupang chetla an thlir dun a. Rilru kamtu nei mah se, hlim tak anga lan an tum hram hram a ni. Muanpuia leh a makpa te erawh a nu te hmuh phak loh deuhah an lem dun a. Tam phei chu an in chuang lo. Lawmsanga te han thlen chhoh chuan naupang ho chu an lo rak teng tung mai. Candy pawh a hlim ve barh barh viau. Teteii pasal Dina rawn phei chuan ngaihtuah lem lo hian, "Ngur, Aldrina kha a lo chhuak.. Ka hmu asin" a ti ta mai a. Nguri'n Lawmsanga a melh vat. A mitmeng ling phat chu a hmuh hmaih lo. Mitmeiin Dina chu khap a tum a, a hrethiam der si lo. 

"A lo chhuak a maw? " Lawmsanga chuan a ti chang fak a. 

"Chhuak e, a sumdawng a, a nei leh riau tawh an ti tlat" a lo ti liam puat a. Lawmsanga kut hum ruh chu hmuin, Nguri chuan, "Sawi lo vang u. Ani mai mai.. a ho e mai" a lo ti vat. Lawmsanga erawh a thinrim tur angin a thinrim hman vek tawh. Nguri lam hawiin, "I va la chhuak a ni maw? " a ti ta mai a! Nguri a meng phawk kher mai. An boruak a dik lo tih hriain Pu Mawia te nupa pawh an rawn kal hnai vat. 

Nguri melh chungin, "I la chhuak tiraw? Ngurnunsang.. " a ti hriam hraih a. 

"Aih, engvangin nge ka lak chhuah ang? " a lo ti bah nak. 

"Nangman la chhuak lo la tuman an la chhuak lo vang.. I duh ami? I pasal hetiang ka nih tak vang hian ani chu i lo duh ta zawk ami? " a ti ta hrep hrep mai. Naupang ho pawh an ngawi ta diak mai. A natna hnathawh kalzel a ni tih hrethiam mah se, a hun lohzia an hria a. Muanpuia chuan, "Nguri lak chhuah a ni lul lo mai. A ukil te khan an dinsak alawm.. Insum teh ka nau" a ti dam thlup a. 

"Aw. Tikhan in zeppui a, engmah ka nih tawh loh vangin min thlauhthlak dan in zawng a nih hi.. A tha.. A tawk e" a ti sak sak a. A mitmeng a ling hle. 

Muanpuia chuan, "Kan hmangaih vek che alawm.. Keini aiin i nupui hian a hmangaih zawk che.. " a lo ti leh. 

Lungchhe taka ding zum reng Nguri chu panin, "I uire hma ngeiin amah chu pan ang che. Kei chu neih tlak ka ni lo alawm.. Pan ngei ngei ang che" a ti nghut a. Nguri'n, "Ka pasal i ni reng ang. Hetiang hi chuan awm suh" a lo tih pawh bengkhawn loin tuikhuah lam a pan ding nal nal a, "In hrehawmna, in rilru mawlh tlattu hi a hma thei ang berin ka'n tihbosak ang che u" tih leh tuia zuanluh chu a rual ta nghal a. Nguri a rak thawt. Muanpuia leh Mapuia an zuang lut ve nghal. Lawmsanga chu a pil ta vang vang a, mahse, Muanpuia chuan a zuk pawm kang vat a, Mapuia'n a lo pui bwk. 

"Min lo dang suh u. Hei hi in tana ka tih a nih hi.. " tiin a tal buan buan a. A chak riau mai si, Dina pawh a zuang lut ve ta ringawt. 

"Pa, khawngaihin… engkim a tha vek" Mapuia chuan a ti lawm lawm a. Lawmsanga thinrim kal zel, a mitthlaa Aldrina leh Nguri hlim taka an awmdun hmu reng ta chu a soin a so a ni ber e. Amah hnaihber tu a ù hmaiah chuan a hnek ta dawt mai. Muanpuia pawh tuiah a pil zuk hman. Chutah a fapa ngei mai lo chelh ve tu pawh chu a beng ta a. A vawikhatna a ni. Nguri tihngaihna hre tawh lo mangang lutuk chu zuang lut vein Lawmsanga hmaah chuan a va ding ta a. 

"Keimah hi min khawih rawh.. Min khawih chak a ni lawm ni? I thinurna zawng zawng chu ka chungah hrithla vek rawh. Ka inpeih e" mittui sur zung zung chungin a ti ta a. Lawmsanga a ding khawng reng. Chelh pawh an chelh tawh lo. Hetianga a danglam thut thutna hi mi dang tumahin hmu ve lo se tih hi Ngur'n a duh thin a. Mahse, tunah chuan naupangte pawn an hmu ta vek mai. An thlabarin Nauteii phei chu kil khatah a lo ţap khur char char a ni. 

Lawmsanga chuan muangchang hian, "Nguri.. Min kaltir tawh mai rawh u.. Natna bak ka pe lo che u..ka thinrim chhan ka hre lo. Mi â ka nih hi.. Mi á " a ti a.. Van lam a hawi a. 

"Ka zak a ni. Thinrimna pawh thunun zo lo, mi mawl ber angin ka khawsa a. Kan hlimna tur boruak ka tichhe ta vek a nih hi.. " a ti ta ngawih ngawih mai. 

A va kuah a. Lawmsanga pawm chial chungin, "Tunah chuan i danglamna an hre vek tawh a. Kan vaiin kan hmachhawn ang a, kan hneh em em ang. Kan hmangaih em em che a ni" a ti mawlh mawlh a. Mi dangte erawh chuan chechang map loin nupa vanduai em emte chu an lo thlir vawng vawng mai… 

(Theihai ka ei a. Ka khuasik ringawt 🙁😢