Thutiams2- 19

THUTIAM(S2)- 19

Ziaktu: Toni Râlte

Christmas leh kumthar inkar chu chhung leh khat leh kohhran ho te ţawngţaipuina vang nge tluang takin an hmang ve thei a. Nguri pawh a lawm viau. Nauteii leh Sangpuia pawh an hlim dun ve leh khawp mai. Urlawk zan bakah kum hlui thlah zanah te Sangpuia rawn lengin, Nguri te nen an hmang ho thin a. Nauteii pawh han zah tit tet kha a hun ta lo bawk nen, inpawh taka han hmanho chu nuam a ti ve hle. Lawmsanga pawh Sangpuia chungah a lawmin a rintlak hlein a hria a, Kumhlui thlah zanah ar an kang ve a, an la ei hma si, dar 11 velah Sangpuia chuan Nguri te bulah, "Kan va leng chhuak ve lawk ang e aw. Kawn chei te pawh fan a chakawm ve sia" tiin a dil thlap mai. An lo remti ve mai bawk a. An chhuak dun ta a. Thla an la nasa ngang mai. Kawn chei te fang kualin, coffee te an han in dun a, School uniform a hak loh chuan a lang nula ve zaih mai a, Sangpuia chuan en nin harsa a ti ngang mai. 

"Class xii i ni tawh dawn sia.. I intinula sawt dawn a nih kha" Sangpuia'n a tih chuan, "Ka lerh sawt ang" a lo ti zauh a. A chalah kuk zeuh pahin, "College chu kal tawh lo mai rawh. Innei ang" a ti ta thâwr a. A rawn melh râng ngang mai. 

"Ti ve ziah suh. Khawhar in ka la kal lo ka tih kha.. Bakah nulat ka la duh" a ti a. 

"Nih min phatsan ang em? " thutak zet hian a ti a. 

"Hmalam hun ka hre bik hleinem. Nge ka phatsan ngawt ang che" a ti hmarh hmarh a. 

"Naute, zep loah chuan ka hlauthawng a ni. I hmeltha si, u la naupang bawk si, hmabak tam tak i la nei a.. Kei erawh nupui neih rual zet tawh ka ni sia, i kum rualpui deuh hmeltha leh changkang tak tak ten an la hnaih dawn che a.. I nghet lo vang tih ka hlau a ni" a ti ta charh charh a. Nauteii pawh a inngaihtuah muk hmel hle. 

"Ka hre bik lo. Nia, ka la naupang em a. Mahse, i sawi anga mipa dang va ngaihzawna lerh kual erawh anu te pawn an phal dawn lo va.. Ka ngam ka ring lo.. Ka duh ve em che hi" a ti niah niah a. 

A lawmna tawk sawi zo thei lo mah se, Nauteii chu a rinngam rih phawt a ngai tih a hai lo. Inneih erawh a la hla deuh dawn a ni mai a. A nu lah chuan mo neih a chak thu a sawi a sawi lehnghal. Mahse, a bialnu la naupanzia kha a hre ve chêk ang a, a nawr a nawr bik lo vang chu maw.. Hawn tuma motor an pan lai takin, "Hi.. Sangpui.. Ve teh hlawl che chuan" Mateii ngei mai khan a rawn ti hlawl mai a. 

"Ehe! Nang ni pawh chu… " a lo ti ve a. Nauteii'n a thikzia a hre tawh a. A fimkhur ngang mai. 

"In nu kha tiraw? Nula a an ve viau hi, " Nauteii melh zauh chung chuan a ti hak a. 

"Nia.. A duhawm a nia" a lo ti mai a. 

"I rawn len duh loh aiah coffee i show thei" Mateii chuan no zeta melhin a ti a. 

"Tehlul e.. Va la u la.. Kha" tih leh pawisa phawrh a rual nghal a. "Hawn kan lo tum mek a.. Tui deuhin lo in r'u" tiin Nauteii a kai a, an kalsan ta nghal a. Nauteii pawh a thinrim ta lo. Motora an thut hnuah, "A lerh hmel ee" a ti a. Sangpuia a nui suk. 

"Lerh mai mai teh se.. A ho em mai tiraw? " a ti a. A lo bu ve nghat. An kalsan tak Mateii erawh chuan an kal ta chu thlir liam chungin, "Ka star kumhlun a nia, ka chhuah dawn lo hrim hrim.. Sawtiang hmeichhe naupang khin te chu a nep lutuk.. Lecturer a ni tawh bawk si.. Chhuah phal chi a ni lo" a ti láng lâng a. A thiante an lo nui hak hak. Tlemin an rui deuh bawk nen, an zak vak lo hlawm hle. 

Chutiang chuan Nauteii leh Sangpuia pawh thianghlim takin hunpui an hmang tluan a. An hlim dun bakah inpawhna thuk zawk an neih phah a. A tha khawp mai.

Hetih rual hian Mapuia leh Sasa te inkar erawh a tha lutuk lo. A chhan pawh Ateii vang tho a ni. Khatia Ateii accident an han kan ţum khan an beisei loh tawp thil a thleng a, chu chuan Sasa nen an inkar boruak thlengin a sawi danglam phah ta a ni. Ni e, Ateii kha a lo insawh na riau a. A lu lam a lo sawh tel deuh nen, a hriatna lam a khawih pawi ta deuh tlat mai a. Sama leh Mapuia rawn kal pawh kha tu te nge an nih a lo hre mai lo. A mitmeng a buai nak mai. A ban dinglam ruh a tliak a, a nak ruh thenkhat a auh bawk. Chuan, a lu a sawh bawk a, lehlamah a hmuna a boral nghal lo kha a vannei zawk hle a ni. Mapuia te pawh chuan awm dan an thiam mang lo va, amah a dam lo ber lahin a hre hleithei tlat si lo. Zawi zawia a hriatna te rawn tho tur a nih thu Doctorin a sawi tawh a, nawr vak chi niin a lang lo. Mi rilru tluang tih takah Mapuia pawh chuan a lainat viau mai. Sasa nen an inkar tihhnawk chang nei thin mah se, Hmeichhe sual tak chu niin a hre thei bik lo.. A lo duh ve kha a ni mai a. Sasa te ang mizia nei ve phei se chuan a che na zawk hle maithei a ni. Rei mawi tawk an thut hnuah haw turin an inthlah a, Ateii cousin in a rawn zui chhuak ve zat. Gate bulah an ding a. Chu nu chuan Mapuia melh pahin, "Nangmah vang veka thleng a ni a. I rulhlet ngei chu a ngai ang" a ti ta siah a. Mapuia a lo hamhaih ngei mai. Sama pawh chuti tho chu.. 

"Eng nge i sawi awmzia?" a ti nghut a. 

"Khami zan khan i be duh twh si lo, a rilru na lutuk kha ka hnenah a rawn inbunruak a. Ka thiam ang tawkin ka lo hnem ve a, a tap nasa asin. A duh ve ngawih ngawih che a, nang lahin thiam loh chantirin hrilhhai takin i siam a. Riak tura ka tihin a duh si lo va, rilru hrehawm takin a inkhalh haw a, a ngaihtuahna kal ding lutuk vangin tikhan truck kha a va su ta a nih kha.. A hmuna a thi nghal lo te kha a mak zawk. A bul chu nangmah i ni.. I nunrawn em vangin tiang hi a chungah a thleng a nih hi" a ti ta tâwn tâwn a. Hre pha dang an awm loh hmel a, a zia. Sama pawh a ngawi reng ringawt. 

"Shalomi kha i ni em? " Mapuia'n a lo ti a. 

"Aw.. Ni chiang e. Ateii hi ka nau te zinga ka chhuan ve ber a nia, hetia intihnat hi ka phal bik lo. I thiltih man hi i la hmu khawp ang" a ti hmarh hmarh a. 

"Keimah vanga thleng ang chuan sawi suh.. Chutihrualin a chetsualnaah pawi ka ti khawp mai.. Lo dam rawh se" Mapuia chuan a ti a. An kalsan zui nghal. Mahse, a rilru erawh a nuam thei ta mang lo va. Ateii chu an sawi anga amah vanga chutia awm a nih takzet chuan mahni inthiam lohna a nei nasa dawn lutuk. Shalomi lah khan a ngam siah siah mai si a. Mapuia bula sawi mai pawh duhtawk loin Sasai hnenah msgin a lo sawi ve leh kher nen, "Mapuia pawh a inthiam lo viau mai a. Ka bula a sawi dan chuan, 'Sasa hi a hma ang khan intihhlum a tum leh mai ang tih ka hlau a. Ka la vuan hram hram a ni. Ateii ka duh loh vang em em pawh a ni lo' a ti che a. Chuvang chuan inngaihtuah chiang la, Ateii leh Mapuia te hi hun siamsak rawh." ti ang zawngin a lo bei si. Sasa rilru a na lo thei bik si lo. An buai ta nuaih mai. 

A nu leh pate rilru tihhrehawm belhchhah a duh loh vangin a mimal nun buaina chu amahin a tuar ve a. Shalomi'n dawt muhlum a lo sawi erawh pawi a ti takzet. Sasa bula thudik a sawi lahin, "Khatiang khan mi pangngaiin dawt chiang lutuk an sawi lo vang" a lo ti hmiah bawk si. Ateii chu kan pawh a kan leh ta rih lo. Nikhua a hriat loh lai pawn a la tibuai zui zel zawng a nih hi. Urlawk zanah Sasa te in lamah a phei a, a cousin nen an chhuah thu an lo sawi a. A call a la duh si lo, Rki a be ta a. An lo awmho ngei a. A va thlen ve chuan a hlauhthawn ang ngeiin Sasa chu a lo rui leh viau mai. Thinrim saa kal a ni ve bawk a, an inhau ta hrep mai. 

Sasa ţanchhan chu, "Ka thih i hlauh vang ringawtin a mawihnaiah min chelh a, i rilru tak tak min pe lo" tih a ni. Shalomi khan a thluak a lo su hman viau a nih hmel. Mapuia lah inti mipa ve tak, insawifiah vak tum lo chi a lo ni ve bawk si. Sasa chuan Shalomi thusawi a rin loh a lo rin vang a nia, mahse, dàwt hi awih a lo awl viau a niang e. 

"Ateii pawh ka hriat hlau takin i han kan a. Min hrilh la, kan pahnih pawn kan kal thei. Chuti em ema sual ka ni bik lo. A dam i duh a, a bula awm i chak a, kal ta che. Kei chu ngaihtuah ka ngai lo. Ka thi lo vang. Thihchilh che hi ka tum tawh lo" Ţap lek lekin sasa chuan a ti hlwk hlawk a. 

A lo chek hluk, "I hriat zawng zawng kha dawt a ni. Tunah kan pahnihin Shalomi chu va hmu ila, va zawt ila.. Insawifiah ka thiam ve lo" a ti a. 

"Ateii i kan atang khan min ngaihsak nep sawt tih hrerhiam lo khawpin ka mawl lo. I rilruah ani kha a lian zawk tihna a ni mai" Sasa chuan a ti khur leh dat dat a. A heh a pet fan fan mai. A lungpuam tawkin a lo lem ve bawk nen. 

Mapuia chuan, "Nia, khatia Shalomi'n keimah vanga thleng anga a sawi takah kha chuan ka rilru a tibuai ve bawk a ni. Chutiang anih vang chuan nang kalsan chein ani ka vuan dawn tihna a ni lo.. Zu ka in tawh lo vang i tia.. Hei i in leh a.. Zanin te hi hman ho kan tum ve reng sia, duh loin i kal hrang a.. I duh dan sawi rawh. Min pawisa lo mah mah a.. Thinrim pawn hmaichhanah tha taka sawi fel tur a nia.. Tiang hian i che leh tlat zel a" a ti ta hmak hmak a. Rki chuan Mapuia mitmeng a hmuhin a thutakzia a hria. Sasa chu a kheuh a, "Inbengdai rawh. I dik lo zawk a nia.. " a ti a. 

Sasa chuan, "Hmm.. Inthen pawh chu i cho ta at at hle mai tiraw? Ni e, kei ang hmeichhia hi chu ka tha tawk ve lo alawm.. Ka natzia i hre thiam phak bik lo a niang e. Thutawp siam la, ka pawm ang" insùm tih hriat tak hian a ti a. 

"Ka va haw ang e. Eng pawh sawi ila min ringhlel zel si a.. Nuam deuhin inhmang dawn nia.. Nih phawt u" tiin eng thu mah an sawi hmain a kal zui ta daih. Awm vete hrilh a hai hle. Sasa tak pawh a hrilhhai. Chutia mamawh tawh lo ang maia a kalsana thlem tum miah lo va a hnuchhawn theite chuan a tina zual a. Nuam pawn chumi zan chu a hmang thei lo. A tuk Christmas zinga a msg dawn lek phei chuan a vaw chau hnâwp a ni ber e. Ateii leh Mapuia thlalak a ni. Khumah Ateii a mu a, a bul maiah Mapuia thuin an inbe mek a nih hmel. Zingkarah a ţap hawk. Nizanah khan a han kal a ni ngei ang le.. Ral riai riai ni maiin a inhria. Mapuia hnen atangin eng thu mah a dawng hek lo. An inkar chu a tawp ta angah a ngai a, nâ chu a ti. A beisei dan chuan Mapuia khan a thinrimna te kha zaidawh taka thlemin a hriat loh hlana Ateii a han kan te kha ngaihdam a dil a lo ring a. Mahse, Shalomi sawi kha a dik a ni maithei.. Amah aiin Ateii chu a pawimawh ta zawk si a. 

Thil thlen dan chu hei hi a ni. Khatia Mapuia a hawn hnu lawk khan Ateii thiannu Becky khan a lo call a, "Min ngai sia,zanin chu han hmanpui ka duh a, a hriatna pawh a rawn let ţan a. Nang pawh hmuh che a duh a niawm e. Khawngaih takin han hmu lawk ang hmiang. Ka nauin scooty a hmang daih a, kalna tur pawh ka nei lo" a rawn ti a. Rilru ippik taka zan hun hman ai chuan tiin rem a lo ti a. Bakah Ateii hriatna a that takah chuan a thusawi duhte pawh ngaihthlaksak a phu vea a hriat vang a ni. Ngui ru tak chungin an han thleng chho a, Ateii chhungte pawh an lawm viau. 

"I inthiam loh thu te ka lo hria a. A pawi ka ti. Inthiam lo suh. Nangmah vanga thleng a ni lo a nia. U shalomi hi chu a thinchhe ve a, hrethiam rawh.. " Ateii chuan a lo ti a. Mapuia pik rukna pawh a kiang huai mai. Sasa chungchang erawh engmah an sawi lo. An pehhel hran hram a ni ber. Tiang chuan inrem tlang takin chumi zan chu an hmang ve ta kha a nia. Mapuia pawh a rilru a dam ta deuh. Sasa bulah pawh sawi tho a tum, mahse, va thlema va biak chawng chawng kha a duh bik rih lo a ni. Christmas zingah an in wish ta miah lo va! In wishna ni tha ber a ni tehlul nen.. Zingkara msg pakhat lek vangin an nileng hun chu a nuam lo thawthang chu a ni ta ber. Mapuia lahin va biak hmasak kha tlawmah a la ve si, Sasa lahin a tum bik si lo. In ep run leh inhrereng chung siin Isua piancham chu an hmang liam ta ringawt. 

Ruaitheh niin Sasa chuan status a up a. "Kei aia hmangaihtu zawk kutah a awm tih rin theih tal hi ka va duh èm" tih hi. A luangliam khât ve a. Tun hi a vawikhatna a ni hial awm e. Mapuia pawn a lo hmu ve chat. A rilru a dek riau, a nghawng ve det bawk. Sasa chuan Ateii nen ni angah a ngai ta hmak tih a hria. Engtin nge a tih ang aw tih a ngaihtuah ta vang vang a. 

Status bawkin a chhang ve ta tawp. "Kan hmuh leh hriat ang hi a ni ngai lo. Fiah tura dawhtheih a ngai ve thin" tiin. A hrethiam em ang chu maw.. Va biak hmasak lah eng vang tak ni maw.. A hreh tlat si. Lehlanah a rilruah Sasa bak an awm thei chuang si lo. Inngaihzawnna rahbi harsa lai leh mi tam tak kal hran chhan an tawng ve mek a ni. Chapona leh chapona innêk hi chuan rah ţha a chhuah mawh khawp mai. Pakhat a tlawm ruala tlawm ve ve thei reng si hi, chapona hian min phuar tlat zel chu a nih hi maw.. 

Muanpuia leh Terini te pawh sawi dunna fak awm lo mah se, inngaizawng ang mai chuan an awm chho ve ta ringawt a. Mahse, Muanpuia chuan vawikhatmah a la fawp lo. Terini hi a inla hrang zel si a. Bakah an thenawma rawn awm thar te hian an rawn chim nasa ngang mai a. Hun fal leh han inbengberekna hun a awm thei meuh lo a ni e. Urlawk zanah lah Muanpuia a duty ţut a! Ruaitheh zanah lah Nguri te in lamah an phei daih bawk si. Mahse, Muanpuia hi pathlawi tih takah a dawhtheiin a zaidam tawh a, nawr vak a tum hran lo. Nakinah a nupui a la ni tho dawn tih ngaihtuahna a nei ve a. Mahse, ni 29 zanah erawh thil duhawm vak lo a thleng ta a. An thenawm awm thar tea an pa ber nau tlangval chhe vak lo hi a rawn zin a, kum thar a rawn hmang dawn a ni awm e. Terini a hmuh phat atang chuan a zùnah a uai ve ta nge, zah pawh dawn lovin a belbul chawt mai a. Muanpuia te lah an hna thilah an buai zual lai a lo ni a. In a luahlum em em si lo. Chu pa Ropuia chuan Terini chu a duh thu pawh a hrilh hmiah mai a ni. Terini a zakin chhan dan vak pawh a hre lo. 

"Thian ni zawk ang" a ti tawp a. 

"Bialpa i nei mi? " a tih chuan a bu nghat a. 

"Tu nge? A va rawn leng ngai lo ve" a tih chuan, Muanpuia a nih thu a sawi hreh si. A chhan chu an thenawm khawvengte pawh hian an hre lo mai ni loin rinhlelh enah an en lo bawk a. A bialpa nen in khatah an khawsa dun tih an hriat a duh bawk si lo ve a ni. 

"Aizawl khua a ni lo va" a ti ta ringawt a. Mahse, Ropuia chuan a zuam nge mawni a lenchilh thulh chuang der lo va. Mipa hmelchhia leh sual tak pawh a ni bik lo. Mahse, a thinlung ramah ţhiah theih loh a inhung bik tlat tawh a. Muanpuia tan chuan a rinawm ve em em tawp mai a ni. Ni 29 zanah chuan, Muanpuia pawh dar 12 thleng duty turin a chhuak ve leh a. Candy lah chhun lamah a tal hah deuh nge a muhil hma nasa mai a. Ropuia a rawn leng leh a. An titi mai mai. Thingpui a siam lai tak chuan a hnunglam atangin a rawn kuah ve thawr mai a. A phu zawk nghe nghe. 

"Eng nge i tih? " a ti hlar a. 

"Khawngaihin, Terin, ka duh em che a ni. Bialpa i nei lo.. Ka hre vek tawh. Ti nge min duh ve mai loh? " a rawn ti deuh ham ham a. Zu rim a nam deuh bawk. Terini hnar fing tak chuan a hai lo nasa. Ropuia kut chu a thingthla lawp a. Thinrim zetin, "I va zak lo ve. Bialpa ka nei emaw nei lo emaw hetia min khawih ringawttu hi ka duh lo. Khawngaihin min chhuahsan rawh" a ti khur dat dat a. 

"Eng nge that lohna ka neih? Awmpui ve mai mai i nih hi.. Kei angin ka duh che chu lawm hle rawh. Mai mai che hian" tih pahin rawn kuah leh mai a tum a. Terini chu a che zawk, Gas bula chemte a hma lawka bawnghnute hawn nana a hman chu a chuh ta rap a. Ropuia hmai bula lek pahin, "I kut hmawr pawh khan min khawih tawh suh. Zak thei lo lutuk, haw vang vang rawh. Eng atanmah ka ti lo che" a ti ve ta tâwn tâwn a. A thin a rim takzet a ni. 

Ropuia chu a tawlhnung hret a, rum zeta Terini melhin, "Ve khanglang a che. Ka hlau che emaw i ti mi? I u a awm lo, tuman an chhan thei lo che. Zaninah hian Ka ta i ni dawn khawp mai" tih leh rawn bawh a rual nghal a, Terini hamhaih inring lo bawk si chuan a chemte ken chu a thlauh palh ta hlauh a. Chhuatah an inbuan thial thial ta mai. Ropuia chu a chak zet mai, Terini ka a rawn hup phui hmak a, a kut lehlamin Terini ban te takte chu a hmer kawp thei bawk si. Mahse, tlawm a tum eih lo, a kum a la tam lo, mahse, he lamah chuan huaisen ve tak a ni.. Ropuia pawn a duh ang chuan a ching zal thei ta lo rêng a, mahse, Terini chu a chau ru tawh viau. An thawm a ring hran lo, mahse, an boruak erawh alh nasa tak a ni thung. 

A rilruin, "Lalpa, ka tlawm i phal ka ring bik lo. Min pui turin tu emaw rawn tir hram teh" a ti mawlh mawlh a. Ţap si loin a mittui a tla par tawh bawk. Pathian hian a fate leh amah ring tlattu te hi a lo hmangaih khawp a lo nia. Mapuia leng haw, A papuia'n, "Hei thianten an talh laklawh sia, Fridge-ah khan lo dah mai rawh se, an mut tawh chuan in inah dah mai ula, ka haihawt sia, ka theihnghilh palh ang" tiin uisa 2kg vel tur hi a khai haw tir a. Chu mi pe tur chuan kawtah a ding a. Kawngka a inkalh lo hlauh bawk. A hawng chiah chu a ding chawt mai. Thil awmzia man thiam nghalin hmanhmawh zetin Ropuia chu a va ţham kang lawp mai! A beisei loh lutuk thil a thlen vangin Ropuia pawn chet lak nachang a hre bik lo. A hawi â ho mai. Mapuia lah chuan a rem lai laiah a khawih tawh mai si a, a hmui dinglam a kak nghe nghe. Ani mood fuh chiah lo inhrikthlakna chu a tuar ve ta thung a ni ber e. Terini rawn tho chuan Mapuia chu a dang bet thei ta hram a. 

"I tha em? " Terini chu a melh a. Mittui tling kuau chungin a lo bu nghat. A thlabarzia erawh a mitmengah a lang si. 

"He zawngsena hian a phutawk hremna a hmu khawp ang. Papuia ka'n call ang e" tih leh phone phawrh a rual nghal a. A tawngkam pawh a mawihnai thei bik lo a ni e. Hmeichhia leh naupang dimdawih tak chhungkua atanga lo seilian a ni a. Terini ni kher lo mah se; a chhan tho ang. Hetiang inrikrapna hi a duh lo bur mai a ni. Ropuia chu a tlan chhuak ta phut a. Umzui a tum laiin Terini'n a rawn chelh vat, a lu thing chungin, "Buaina a punlun mai mai. A hlawhtling chuang lo va" a ti sap a. Mahse, Hremna pek tum tlattu Mapuia chuan a papuia a be ta tho a. An patrolling lai a ni a, mahse, a rang a rangin a lo haw nghal. A rawn thleng hma ngang mai. Terini chu a pawm chawt a, "I tha em? " a ti dam thlup. Muanpuia angchhunga a han awm takah chuan a lo chhel vena zawng zawngte kha an bo ta nge, a lung a no ta riau a. Insum thei lovin a tap ta hawk a. Duat takin a lo pawm chial a, a chhipsam vela fawh nawk nawk pahin, "A tha vek.. Engmah hlauh tur a awm tawh lo aw.., " a ti sup sup a. Mapuia pawh a la awm ve reng. A hnu deuhah Terini chuan thil awmzia chu a sawi ta a. Muanpuia mitmeng a hlauhawm tial tial thung. Ropuia chu a lo hmumawh ru hle tawh a, Terini mitmei a ven vang leh khuahkhirh lutuk anga lan a hreh vangin a lo ngawi rih mai mai zawk a lo nia! A thinrimna chu a alh ta a ni ber e. 

"Engpawhni rawh se, hremna chu a hmu khawp ang. Chu chu ka tiam a che" a ti vawt raih mai. Hlawhtling lo mah se, A hlawhtlin ang tluk deuhthawin Muanpuia thin a nâ, a duh leh a ngainat, a nupui atana a hual lawk tawh, dimdawih taka a enkawl, ani zu rui satliahin a lo ching phar vel chu a ngaihdan a ni lo bur mai a ni. A sawi ang ngeiin a tukah Ropuia chu Police ten an rawn la ta hmak a, a û te nupa pawn tih vak ngaihna an hre bik lo. An zak ve hle bawk. Mapuia chungah Muanpuia te chu an lawm takzet. Ani kha va kal ta lo se, Terini kha a tlawm lo vang tih a sawi theih loh ve bawk a ni. 

"Mapui, In awmdan hi ka hrethiam lo. Nang pawh i mak ka ti.. A duhzia che i hre ve vek sia, "Rki'n a rawn tih chuan, "A ngaihdan leh zeldin dan kha a tak tak emaw a ti a nih kha" tiin a chhang a. A rilru erawh a buai ru ve viau. Ateii pawh a tha chho ve hret hret a, Shalomi'n a chanchin a rawn hrilh ziah. A zawt ngai azeng pawh a ni si lo va. Mahse, a mawhphurhna chin a awm ve a vangin tha tak chuan a lo dawngsawng ve mai. Engvanga Sasa laka tlawm leh han thlem chu hreh tlat nge a nih a inhre bik lo. A tidik lo hmasatu a nih a inhai si lo. Zu a in khum vang kha a nih a ring ta ber. Rki sawi danin Sasa chu a tawm tlawk tlawk a niawm e. A hma anga boruak a awm leh hlauin a nu te chuan an veng ru deuh reng a niawm e. A online ngai lo va, status pawh a nei ngai lo. Mapuia erawh Sasa letling chiahin inah a tawm ngai mang lo, Sama nen an leng chhuak deuh reng a, Sama bialnu an rim tluk tluk mai a ni. Sama pawn an inkar chu a zawt ve thin, mahse, "Inhmuchhuak phawt rawh se" tih chu a chhan dan a ni mai. A engah chuan nge inhmuchhuak tura a duh a hre chuang lo. A beisei leh duhdan nia lang ta ber chu, Sasa chuan rawn be hmasain, zu a lo ruih vanga pawi a tih thu sawi se a duh niin a lang. Mahse, a ngawi ve veng veng bawk si. A tan hunpui nuam lo ber pawl a la niawm e. 

"In inthen em ni? " A nuin a zawt leh ta chat mai. A lo chîk leh hle a niang e. 

"Then chiah lo. Kan awmdan hi ka sawi thiam lo, Ateii nen ni turah min ngai nghet tlat a, ka thusawi a ngaithla duh si lo" a ti hul hak a. 

"Mipa i nia.. Chingfel ta che. Engtin nge nangma lam atanga buaina tawh fo hi i duh zawk? Sasa lam a fel thluam laiin Ateii vangin in buai ta zauh zauh a. Hei hi chu i kut liau liau, i chinfel tur a ni. " Nguri'n a tih takah chuan a hrethiam ve ta uar uar mai. 

"Mahse, Sasa chuan ka thusawi a awih hleinem" a la ti hram a. 

"A awih theih nan a takin lantir ta mai che. Tunah pawh hmu turin i kal lo va, i be lo va, i ngaihven si lo. A tan te chuan rin ngaihna i vâng viau ang" a ti leh ta sak sak a. A nu nge nge.. Ni 31 chawhnu lamah chuan Sasa hmu turin a chhuak ve ta nge nge a. Rki a sawm phei a. Ani thiantha tih takah a lo inhuam hle. Sasa pa a lo awm lo hlauh a, a nu chuan tha takin a lo dawngsawng leh. Sasai room lam an pan zui ta nghal a. A zâm ve riau lehnghal. Sasa chu a lo mu a, lehlam a hawi bawk. Rki chuan a ko a. Muangchangin a rawn saisir a, Mapuia a hmu thut chu a meng kâwk mai. A hmel chu a tla ve kuam a, a dâng hle bawk. A nui lui sak a. 

"Eng nge in rawn tih dawn? " a ti sep. A thu chhuak ve nghal a. 

"Kan lo kan dawn che.. I tawm reng sia" Rki chuan a lo ti vat. Mapuia eraeh chuan Sasai a melh ngawt ngawt thung. 

"Ani ve hi" Sasa chuan Mapuia kawh zauh pahin a ti leh a. Rki'n a rawn nghawk dawt takah chuan, "Engkim siamtha turin ka lo kal" a ti ta a. Sasa mitmenga phurna lo lang zawk chuan, Mapuia chu a haw lo tih a lantir mai awm e. Rki chuan zei takin thingpui lum chhuanlama hmangin hun thawl a pe ta a. An ngawi rei dun khawp mai. 

"Ateii nen kan inngaizawng lo va, kan inngaizawng ngai lo bawk ang. Ka thusawi engmah i awih duh lo va… min ringhlel nghal ringawt a. Mi dang zawng zawng chuan dawt an hrilh che a ni thei. Ka lak atang chuan dawt mai mai i dawng ngai lo vang. " Mapuia chuan a ti nghet charh a. 

"Mahse, i reh hmak alawm" a lo ti sap. 

"I reh ve tho" 

"I reh hmasa lawm"

"I online kur pawn min be hleinem" 

Sasa chu a nui hak., "Hmeichhia ka nia.. " a ti a. 

"Mipa ka nia, ka thinrim ve thei tho" a lo ti ve bawk. Mahse, an inhnialna chuan inpawhna tha a rawn siamsak ta zawk a. An lo natpui leh siamthat theih reng buaina chu a kiang ta duak mai. 

"Min ngai lo lutuk a.. Chu zawk chu a ni" Sasai'n a tih mek laiin a va thut hnaih thut a, Sasa tawng mek lai chu a fawp thut! A lo meng kâwk mai. 

"Kan inhrem rei peih mai mai e.. Nuam deuha hmang ve thei tur.. Kan mawl lutuk" Mapuia chuan a ti sup a. Sasa pawh chuan "Zanin a la awm alawm" a lo ti ve thlap. A fel leh ta thlup mai. Sasa pawh a mitmeng a nung leh ta sar mai. Mapuia a thawkchhuak thlawn lo ve. Chumi zan pawh chu Sasai te inah an Pahnih chauhin in chung zawlah hun an hmang dun a. Mei te chhem vein, Ar an hem hmin a. An hlim ve lutuk. Ateii hming lam a ni lo va, Shalomi pawh hriat reng a ni ta lo. An lawmpuiawm thin e. 

Kum thar an chuangkai ve ta reng mai. Chhungkaw kima an han hmang leh thei chu Pu Mawia pawh a hlimin Pathian hnenah lawmthu a sawi mawlh mawlh mai. Kum upa lam ni tawh mah se, mi taima leh thothang tha ngang kha a nia. A natna pawn a hneh hleithei meuh lo. A chhel bawk nen, a na satliah chu a sawi duh ngai lem lo. A fapa Lawmsanga a ngaihtuahna zawk chuan a delh rit thin. Ani Lawmsanga pawh a taksa lam chu a la tha viau a. Nguri hian engkim a sawi duh lem lo va, a rilru lam leh a hriatna lam rawih telh telh pawh chhungkua chuan an hre mang lo. Mahse, Lawmsanga bula zantin mua tho leh thin a nupui chuan a pasal hriatna tlahniam telh telh chu a hai reng reng lo va, An inneih thlalak bakah an fate tetlai, an pian hlim thla te, An chhungkaw kim lai thlalak te bakah Nguri nen bika an thlalak hrang hrangte chu Nguri chuan an roomah a tar dul mai a. An hmel zawnah an hming a ziak thluah bawk. Lawmsanga tan veka a tih a ni. A pasal hian a theih chen chen a chhungkua chu hria se a duh takzet. A theih loh chinah eraeh engtin nge a hmachhawn ang tih a la hre bik lo. A theih chhung duata enkawla tihhlim a duh a ni. 

Pu Rempuia te chhungkua pawh kum lo thar chuan an chhungkaw nunah rah tha a rawn chhuah tih loh rual a ni lo. A nupui Puii pawh 31 zanlai inkhawmah thlarau pawl tharna dawngin, a lo kal tawhna kawnghlui a han thlir let chuan hrehawm a tiin a pasal chu a zah ngawih ngawih mai. A inten ru hle bawk. Ngaihdam dilin Pathian hnenah pawh a inhlan thar ta bawk a. Pu Rempuia lawm pawh a kim leh ta. An fate lah an hlimin an nu leh pate inrem tharna chuan boruak a tinuam takzet a ni. Ni e, pastor nupui ber khatia thlarau pawlna dangdai tak a han dawng kha chu a zia lo lam deuh zawng a ni e. Beidawng lo va ţawngtai mi Pu Rempuia nupui a ni hlauh zawk a, a vannei letling phian mai. 

Pu Mawia incheck up hun a nih vangin Nguri chuan a kalpui dawn a, Pi Lawmi'n a kawng a herh khaw lo deuh a, chet a la ngam meuh lo a ni. A pa nen an chhuak dun a, An beisei ai daihin result pawh a lo tha e. Lawmsanga vanga an rilru hmin kim lo tih loh chu harsatna lian tham an tawk hran lo. In lam pana an hawn mek laiin, Nguri chu Nauteii'n a lo call a. 

"Nuuu… lo haw vat rawh. Apa hi" a rawn ti ţiau mai. Hlauthawng zetin "I pa chu engtin? " a ti tuar a. 

"A thinrim lutuk, roomah a inkalh khum a, a ri bur bur mai. Kan lut thei si lo" a rawn tih chuan, a chhing sawk.. Eng nge thleng ta ang le.. Hmanhmawh zetin an kal ta a. Pu Mawia tak pawh a hmanhmawh ve hle. In an thlen chuan Mapuia hoin sitting roomah an lo thu thap a. Nguri chuan an room kawngka chu a kik nghal, "Keimah Nguri.. Lo hawng rawh.. " a ti lang lang a. 

"Nang Ramhuainu kha thlawk bo nghal rawh. Ka hmu peih lo a che. " tih chhanna a dawng nghal. A tawng sehchilh dan atangin a thinrim hle tih a lang reng mai. Zaidawh deuh zawkin Nguri chuan, "Lawmsang, keimah Nguri ka ni.. Khawngaihin lo hawng teh " a ti leh a. 

"Tu nge Nguri ka hre lo ve.. Khatin min bum kual tum reng reng suh. I tlangvalpa kha va um rawh" a rawn ti ţeng chhuai thung. Ruthi bawk maw..?! Ngati nge he hmeichhia hian a thih hnuah pawh buaina a rawn siam ziah mai le.. A rawn hawng duh thlawt si lo va. An thu ta tawp ringawt. Nguri thinlung chu a na em em a, mahse, a fate hmuh laia na lutuk anga lan a hreh ve si. Pu Mawia chuan a hmuthiam ve vek a, a lainat kher mai. Nauteii chuan, "Tunah chuan zep tawh suh u. Apa hian natna a nei a ni. Sawi vek rawh u. Anu pawh a hre tawh lo va, ti nge in sawi loh? " a ti ta hlak hlak a. A mittui a parawl kiang bawk. 

A hun tawh tih hriain Nguri chuan zaidam takin a fanu chu a hrilh ta a. A tawp lamah phei chuan Nauteii chu a ţap ta tawp. Chutah zet chuan tumah insum thei an awm ta lo. Mapuia meuh pawh a inhru ve mual mual mai. Nauteij chu a tho lawk a. A pate room kawngka bul atang chuan, "Paaa.. Keimah i fanu duat Nauteii ka ni.. Khawngaihin lo Hawng rawh.. Mawh.. " tiin a ngen ta a. A ril arah a fanu duat ngawih ngawih ţap thawm chuan a thinlung a chhun phak a niang e. Rei vak loah a rawn hawng ta a. A pa chu a lo kuah chawt, ţap hlawp hlawp chungin, "Pa, min thihsan suh aw.. I thi dawn lo tiraw! " a ti mawlh mawlh mai. Lawmsanga mitmeng buai zet chu Nguri pawn a lo melh ve ngawih ngawih. A thinlung hi a na a ni. A nâ tih hian a sawifiah phak zo lo vang. 

Lawmsanga chuan room chu a lo suasam nasa ngei mai. Thawmhnaw a let rem rum a, banga thlalak te chu a thler hei huai bawk. Ngawi rengin Nguri chuan a tifel nghal mawlh mawlh. Khuma thu chungin a lo thlir reng a. Nauteii te erawh an kalsawn tawh thung. 

Hah hmel zeta thaw hawkin, "Min then ang che. I hria em? " a ti chang fak a. Nguri a phu zawk. Mahse, ngawi rengin a thiltih lai a ti mawlh mawlh. 

"Nguri, ka sawi chu i hria em? Min then rawh" a rawn ti leh tuar. 

A pasal lam chu hawiin nem takin, "Ka thei lo" a ti sap a. 

"I thei ngei ang. Nguri i nih kha.. Min then la, ka nun atang hian rawn kir leh tawh lo turin kal bo vang vang ang che. I hrethiam em? " a ti nghut nghut a. 

"Pawi ka ti lutuk, mahse, ka thei lo" Nguri chuan a ti leh sep. Lawmsanga a rawn tho a, Nguri tukhum sama rawn thamin a kuai dak a. A mita mittui tling khat vek chung leh hmui khur dar dar chungin, "Ka mamawh lo che. Ka hmangaih hek lo che. Ruthi chiah kha ka la hmangaih awmchhun a ni. Chuvang a ni a thih tawh hnuah pawh a hming ka la lam thin. Nang chu ka nupui satliah mai i ni.. Kal bo rawh.. Kal bo ang che.. Khawngaihin" a ti dat dat a. A tawp lamah phei chuan a thingthi hnawk a.. A hmai a hup ta tlawk tlawk mai. Nguri chu a thingthi ve a, a pasal kut chu lak thlak pahin, "Ka damchhung leh i damchhungin ka kalsan ngai lo vang che. Chu chu i laka ka thutiam a ni. Min hmangaih a, min mamawh bawk.. Lawmsang, i nupui hi min bum theih i ring ami? " tiin a insumtheihna baw hawk chu a ţahpui ta zawih zawih a. Thingthia inkuah chungin, an ţapdun ta. 

Lawmsanga nge vanduaia Nguri zawk tih hi zawhna chhan harsa tak tur a ni rèng a ni.. 

(Vaccine ka la ve e ka tia.. Ka rawn ziak tam hman lutuk lo a ni e. 😍