Thutiams2-18

THUTIAM(S2)- 18

Ziaktu: Toni Râlte

Kum tawp pawh khel lo vin a lo thleng chu a ni ve ta reng mai. Nauteii te pawh class an kal tawh lo va, in lamah a pa nen an inawm nitin mai. Nguri te school pawh an chawl ta bawk. Pu Mawia pawh treatment lain kar hnih chhung Zemabawk lamah a va awm leh a. Nauteii a va riah zauh chang a awm bawk. Lawmsanga pawh rin ai tak chuan a tha a, an hlauhthawn ang em emin thil pawh a thleng rang hran lo. Pu Rempuia theihtawp chhuahna pawn rah a rawn chhuah ve zel a, an nu pawh rawn fim chho ve tial tialin, Hotute phalna angin pro pastor a awm tho bawk a tiin an nu te khua Tlungvel lamah Masi chawlh an va hmang dawn a ni. An nu tan ber hian chu chu a tha hlein a rinawm. An awmna khuaa an awm reng zawngin an rawn kuai lungleng leh emaw te kha a niang a. Pu Rempuia tan a thaw ippik thlak thin em mai. Hetih mek lai hian Muanpuia leh Terini te pawh Muanpuia chhungte lamin innei mai turin an nawr ve reng a, mahse, Kum tawp te a lo ni bawk nen, kum thar lam nghah law law an ti deuh nge ni, bakah an dam a tha hlawm si lo va, khatiang kara inneihna lo huaihawt kha a inthlahrung ve pawh a niang e. 

Mamawii te pawh kha an chhuak fel ve tawh a. Muanpuia chu a rawn zai leh nasa viau, Sunday vawi khat phei chu a thiannu nen an rawn tlawh hlawl mai. Terini'n thingpui a lum mek lai a ni a. Muanpuia erawh zan lam a duty dawn vangin a uniform a nawt mek thung. An rawn ri hlut a, Terini phei chu a hamhaih hman lek lek a ni. Mahse, pangngai takin a lo be ve mai. 

Muanpuia thawmhnaw nawt lai chu, "Khawi ka lo nawh ang che. Terini pawn nawhsak awm che alawm.. Tiang te chu mipa hna a ni hleinem" A ti deuh sar sar a. Terini a ner sak. Muanpuia chuan, "A buai ve bawk sia, ka ti ve thei tho lawm" zaidam deuh hian a ti a. Mamawii thiannu Eli chu thau lam, ngo zet mai, nelawm tak a ni a. A tawng duhin Terini pawn Mamawii aiin a ngainatawm hlein a hria. 

"Thiani hian a sawi reng si che a. Khaw nge i fanu pawh chu" a ti hliai a. 

"A nu Nguri te in lamah a leng a nih kha. An la phei deuh reng a, saw lam an hulhar tawh nen,. " Muanpuia'n a lo ti ve a. 

"Terin, thingpui tui deuhin lum la, a hmeh kan lo tum ang" Thawmhnaw nawh pah chuan Mamawii chuan a ti ham ham a. 

"Aw ka lum zo tawh. A hmeh pawh a awm alawm.. Nawt zo la, kan in dawn nia" a lo ti tha ve mai a. Thawmhnaw a nawh zawh chuan Muanpuia bulah a ngheng pha tawk vel hian a thu nghal chat a. Damdawiina a awm lai khan a nalhin a inchei zawk bawk a, Muanpuia pawn a melh ve zauh zauh. A lerh vanga melh erawh a ni lo maithei. Terini chuan thingpui a siam a, Eli a ti ti suam suam. Muanpuia pawn a nel nghal nge ni, an titi a rual phian mai. Terini thingpui rawn sem chu, Mamawii chuan no chu a chelh nghet turah ngaiin a thlah mai a. Ani lah chuan a lo chelh nghet lo nge chhuatah chuan a tla ta a. A keh chhawk mai. "Awii, ka tihpalh lutuk. I thlah ringawt a. A sa sia, ka lo keng nghet lo a ni" a ti chul a. Terini chuan, danglam lem lo hian.. "Pawi lo, ka lo siam leh mai ang" tiin a kal nghal a. Mamawii kekawr tlangah thingpui chuan a buak ve hlek a, a zuk bengfai thuak thuak a, "Fimkhur lo reuh e mai a.." a ti hlak hlak a. 

Thingpui kengin a rawn let leh a, Mamawii thutna bul thutthleng banah chuan dahin, "I chelh nghet zo leh lo palh ang" nui sâng chungin a ti a. Muanpuia a rukin a lo khi suk. Terini chu a duh phawt chuan a lo nghal thiam ve a nih dawn hi. Eli chuan an boruak chu hrethiam takin, "Terin, i thingpui siam chu a tui hle mai. Kei thingpui lum hi ka thiam lo lutuk a, a thlum vût zel ringawt" tih pahin a dâwt khulh a. 

"Thingtlang ho hian an lum thiam phian asin.. Thingtlangah chuan an la inrim ve thin bawk a" Mamawii chuan a lo ti ve leh kher a. 

"Khawpuiah chuan hmeichhia zawkin mipa an rim thin a" Terini chuan choka lam pan pahin a ti ve zat. An boruak chu a alh tha viau. Muanpuia chuan dik dawna a hriat loh vangin, "Bawihteii chu i va ngaihven dawn mawni le.. Nauteii khan a sawp chau leh vek ang e.. " a ti ta a. Terini chuan no sil rawk rawkin a kut a hru hul a. 

"Umm.. Ka va kal ang e. Chaw kan ei nghal ang. Lo inbawl ve mai rawh" a ti nghat a. A chhuak zui daih. 

"Aah! A titau ve ringawt.. Zam lo ham ham hle mai" Mamawii chuan a ti zui sap a. Muanpuia chuan chhan a tum zuau a, Eli zawk chuan, "A la naupang á ve a nih kha.. " a lo ti daih. Muanpuia pawh a ngawi zui ta a. Terini a awm ta lo bawk a, Mamawii chuan a bag chu zen rak rakin, blenders a rawn phawrh hlawl a. 

"Dawm ila.. Spot a awm si lo va, rem tih lohna i nei em? " muanpuia melh chung chuan a ti a. 

Remtih loh ngawt chu a nuam bik lo nen.., "Lem ila a ni mai lawm" a lo ti ve mai a. A rilru erawh titaua kal liam ta Terini chungah hlir a awm thung. Mamawii chuan no va lain, Fridge a va hawng a, sehhmeh tur awm te chu la chhuakin a neitu ang maiin a che sawk sawk a. Muanpuia tan lah khap chi ni hek lo le.. Kawngka an kalh leh te te hnuah an in ho ta a. No hnih vel an lem hnuah chuan Eli phei chu a in ţhang vak lo nge a nuam riau tawh a. A tawng duh bual bual hle, mi pawisawi ang zawng erawh chuan tawngkam a cheh lem lo. Mamawii erawh a in ţhang tih a hriat viau. A sip hlek hlek chauh a, Muanpuia chu a mitmei pah reng ni maiin a lang. Muanpuia erawh duty tur a la ni si a, no 2 bak a in duh lo. No 4 dawn a in hnu chuan Mamawii pawh a meng si sap tawh a. A tawng ve bual bual lo naa, a tawng chhunah zawi sap, awmze nei deuhin a tawng ve thung. Eli chu a rukin a text a, "Mawli, chatthla der rawh. Tawng bual bual tawh suh" a va ti a. Eli'n a hmuh chuan, "Yesii" a rawn ti. Zahzelah no chanve a lem leh a, "Pawi intih loh chuan thutthleng seiah hian ka'n mu lawk aw. Ka lu a hai deuh tlat" Tih leh mut a rual nghal a. 

Mamawii chuan, "A eirawngbawltu ber a titau sia, eirawng kan bawlsak a ngaih hmel.. " a ti lang lang a. 

"Nia, in ei ve nghal ang a.. " tih loh thu awm hek lo. Mamawii chuan insawi luh dan a hre zet mai. Muanpuia pawh chuan inven deuh a ngai dawn tih a hai miah lo. Eli a mut hnu chuan, "Kha hei chiah hi" tiin no chanve a rawn pe a. A lo insak ve mai. Mipa ngang a nia, chutin a rui ve lem lo. A rawn ngheng deuh talh talh a, "Mipa mak tak i ni.. Ka rilru i hre vek sia" a ti no sep a. 

"Eng i rilru maw! " a lo ti ve mai a. 

"Terini bulah pawh ka sawi a, kan inbiak pawn mi pangngai tan hriatthiam loh tur a awm lo" a ti zat zat a. 

"Aa.. Nia, Kei aia tha i phu alawm.. Kei chu pathlawi ka nia" mawihnai tak chuan a ti ve a. 

"Kei pawh nuthlawi ka nia.. Eng nge buaina tur? Hmanniah lah khan Terini kha nei tur ang deuh te khan i insawi a. Ka ring lo lutuk kha ka nuih a za zawk" fiah titih hian a ti a. 

"Dawt a ni lo maithei sin.. A hriat ngawt loh" a lo tih chuan, "Nangni ang mipa vantlang chin chuan awmpui nula te chu in nei duh dawn lo tih ka hria alawm" a lo ti nghat a. 

Muanpuia ngaihdan a pel ţan. Mahse, Eli a zah der ve a, zak lutuka siam kha tha a ti si lo. 

"Awmpui nula ang pawn ka lo en hleinem" a ti ta zawk a. 

"Ninawm.. Terini lam ka sawi peih lo, lo len pawh i tum lo va.. Ka rawn leng ta tawp zawk a nia. Min hmuh leh i tum miah tawh lo a nia.. I sual ve e" a ti leh ngher ngher a. A ten ru viau mai. 

"Ka tum lo pawh a ni lo.. Ehe! Dar 3 a ri hnai ve ta reng mai. Eirawng bawl a hun dawn tan.. " a ti hluai a. Mamawii beiseina chu tihhlawhtlinin a awm leh ta lo. A tûm bâr a. Eirawng pawh a bawl leh ta chuang lo, Eli zawk chu rawn thoin a che surh surh a. Bawl em em a lo ngai lo bawk. 

"Chaw ei ve ringawt chu a zahthlak.. Hawn lam hnaih teh ang" Eli chuan a ti a. 

"Ei ru.. In ei loh ten.. Chawhmeh a tam si" Muanpuia'n a lo ti vat. Mahse, Mi pangngai tak a ni bawk a. A thiannu chu a kai harh lui a, "Haw ang. I rui mah mah a nih hi" a ti a. Mamawii lah chuan sehchilh deuh nawk nawk hian, "Ka haw peih lo ka riak mai ang" a lo ti. 

"I va zak lo tak.. Khawi tho rawh.. I lem hnem em a ni.. Muanpuia pawh a zahawm" a ti leh a. 

,"He pa ve hi a.. Mahni awmpui te nei ţuk ţuk duh khawpa mihring mize hniam a lo nia.. Tenawm lutuk" a ti ta hrep a. Eli a zak kher mai. Muanpuia erawh a nui sak ringawt. A chelh buai duh ta lem lo. Terini rawn haw thut se, buaina a tam dawnin a hria. Eli chuan Mamawii chu kuah chhuakin scooty in an inphur liam thei ta hram e. Eli te kal liam hnu lawkah Terini leh Candy pawh an rawn thleng ve mai a. Mak ti deuhin, "Chaw in ei nghal dawn emaw ka tia" a lo ti a. Terini chuan a hnar a len hak hak a, "Hm… Zu in in leh ni maw? " a lo ti daih. 

"Nia an lo keng a. No 2 ka lemsak ve a nih kha " a lo ti a. 

Rum zeta melhin, "Tenawm" a ti hlak a. Muanpuia a lo nui suk. 

"Timaw chaw chu in ei loh? " a ti a. 

"Zanah i duty dawn sia, eirawngbawlsak i ngai sia lawm" a lo ti hlar a. 

"Ka bawl vek tawh.. Ka thiam ve reng alawm.. "

"U Mamawii ten an bawlsak che a nih kha" a lo ti vat. 

"A rui rap.. Engmah a tithei lo" 

"Nih chu" a ti leh nghat. A la lungawi zan lo tih chu a lang reng mai. Muanpuia erawh chuan chutia a han titau vel chu cute a ti a, a thlir dauh dauh mai. Candy chaw a hrai zawhah chaw ei a siam tau nghat nghat a. 

"Eng ber khan nge i thin tirim? " zaidam deuhin Muanpuia'n a ti a. 

"Ka thinrim bawk lo aw" a lo ti nghek. 

"I tihtauh leh tauh loh hre lo tur khawpa pathlawi mawl ka nih loh hi" a lo ti leh khauh. 

"Nge sawtah khan min tirh kher? Ka hnawksak a niang ka tia" a ti ta a. 

"Teuh lo.. Nuam lo i ti ang tih ka hlauh vang zawk alawm.. " a lo ti vat. Chaw an ei kham meuh chuan Terini pawh a lungawi ta nge ni a nui ve leh thei ta a. Muanpuia pawh ngaihngam takin a kal ta a. Terini hi a huaisen reuh a, zan lama a duty pawh hian Candy nen chauh an riak mai zel a, a changin Nauteii an riahpui thin bawk. 

"Aw a dik khawp mai. Mahse, ka pa he ti hi a ni si a, han chhuahsan chi an ni lo. Lawmsanga lah in hriat tawh ang kha a ni bawk nen, kumin chu U Remsanga te nen hlim takin lo hmang phawt teh u" Nguri'n a tih lang lang ri chuan a kai harh a. Nguri chuan tu tak bia ang maw a ti rilru a. A tho chhuak a, Nguri rawn lut chuan, "U Rinfela ten mas hmang turin min rawn sawm a. Mahse, kan theih loh thu ka lo hrilh a.. An khua a har ve ngawt ang" a ti siam siam a. Rizai a thlep fel pah a. 

"Tu nge Rinfela chu? " a lo ti leh hu a. 

Zaidam takin, "Ka u chiah kha mawle.. Hnahthial khua ami kha" a lo ti a. A ngaihtuah buai peih lo. A hrechhuak zo rih chuang lo. Muanpuia ten chaw an rawn ei dawn vangin choka lamah an ri hlut a. Candy hlim thawm leh Nauteii'n a lawm ri pawh a tha khawp mai. A va chhuak phei a. A u chu a va hre mai, Terini leh Candy chu a hre leh ta tlat lo. A mitmeng buai nak chu hmuin, "Terin, i U Lawmsanga nge hmel tha keimah" Muanpuia chuan a ti vat. Terini a ni tih a hre leh thei chiah. 

Terini pawh chuan Lawmsanga natna a lo hre ve vek tawh bawk a. "U Lawmsanga fee" a lo ti uar vah a. An nui dar dar mai. Candy ninhlei harh ve tawh si chu Lawmsanga hmai phihna bulah kalin a bawp lehlam chu a pawm bet tlat a, a nui ar ar bawk. Lawmsanga hian a duat ve viau thin bawk a, ani Candy chuan a la hre ve khiau ni tur a ni. 

"Tu nau nge? Bawihte, a va duhawm ve" tiin Nauteii a en a. Nauteii hrilhhai zia chu hmuin Pi Lawmi chuan, "I u fanu i hai lehpek a ni maw.. Candy hmelthateii a nih hi.. Tiraw" tih pahin Candy chu a pawm vat a. Lawmsanga a inthiam lo kher mai. Chutihrualin Candy nu pawh Terini angah a ngai nghal hmiah, Candy nena an lo inlawm tawh dan engmah a hrechhuak thei chuang lo. Rooma a luh hnuah Nguri bulah, "Ka u te saw engtik kumah nge an inneih? An fanu saw a la te bawk sia" a ti nuah nuah a. Nguri a inngaihtuah rauh rauh. 

"A la rei lo.. " a ti ta tawp mai. Thudik hrilh se a rilru a buai mai mai dawna a hriat vang a ni. Muanpuia te lah innei ve tep tawh an ni tho bawk nen. Hetih lai mek hian Nauteii erawh an roomah lutin a u bulah ţap ţeuh chungin, "Candy a hre miah lo.. Apa sawn" a ti hawk a. Mapuia'n a lo kuah vat.. 

"Engtin nge Candy saw a hriat loh theih .. " a ti leh a. 

"A pian lai vel khan inah a awm tam si lo va, kan chenpui bawk si lo va.. Chuvangin a theihnghilh rih a niang.. a hre leh vat mai ang.. " a lo ti dam duai a. 

"U, zep in nei mi? Ti nge Apa hian thil a theihnghilh reng? Nizanah pawh a nu kha Ruthi tih hlirin a ko a. A nu Sap hming a niang ka ti ringawt a" a ti ta. Mapuia thinlung a na zawk mai. 

"Umm.. Anu christian hming a nia.. Bible ami Ruthi kha a pu ve alawm." a ti ta tawp a. A nau chu thudik hrilh turin a huaisen tawk tlat lo. Ruthi chu a nu diktak, uiresantu kha a ni tih a hria, engvangin nge a pa nunah chuan a lo luh leh ni ang? Nguri tan a va na dawn em.. Pasal ten an nupui hlui hminga an han ko sek tur chu.. Ngaihtuah chian chuan na tak tur a ni ve. Ni e, Lawmsanga mi tum khat, rilru nghet zet khan Ruthi kha a lo hmangaih takzet a, khatiang a tina tawh chung pawh khan a hming erawh a la theihnghilh thei bik lo a ni ngei ang. Nguri tan chhel a ngai ngat ngat dawn hle mai. 

Sangpuia nen bazar tura an han chhuak chu a lai leh kher mai. Vawikhatmah mipa a la bazarpui ngai si lo. Thil lei te chu a thiam lo, a nu nen hlir an bazar thin bawk nen. Kawrfual dawrah an lut a. Hak chhin te chu a zak a! A hahthlak. Sangpuia'n, "Zak suh.. Ka lo va chhuak ang " a ti ta ringawt. A va inthlak a, simple leh nalh deuh si, Rs. 6300 man chu a lei ta a, Sangpuia rawn luh lai chuan pawisa a pe dawn mek a. 

"Lawk, ka pi, min pe tlawm ve em? " Sangpuia'n a rawn ti a. 

"Min dil si lo va" dawr neitu chuan a lo ti ve mai a. A nui var var bawk. 

"Min pe tlawm ve la.. A man a to ve bawk si.., " a ti a. 6000 in an la ta a. Dawr neitu pawh nu fing fel tak zawng a ni e. 

"I duh leh i awh deuh i lei tawp tawp nghal a, nêp ve phawt zel tur.. Chumi hisap chuan an zuar vek alawm.. Mak lutuk" Sangpuia chuan a ti nghut nghut a. 

"Ka hre hleinem" a lo ti ringawt. A bialnu chu nu a nih hunah pawh bazar lama tirh vak chi a ni dawn lo tih a hria. Sangpuia pawh chuan a thawmhnaw te a lei ve a. A hak chhin apiang lah chu, "I inhmeh " a lo ti thei zel bawk si. Sangpuia nuih a za thin mang e. Chawhnu lamah restaurant-ah an chawl dun a. An thu fel deuh chiah tihin an piah lawk atangin, "Ehe! Dear Sangpui. I dam maw? " hmeichhe nu leh hleitling zet mai; vun nalh tak hian a rawn ti a. A nui sang bawk. 

"Khai! Mateii chu! I lo haw ni maw? i dam em? " Sangpuia pawh chuan a lo ti ve chul a. An inchibai lai chuan Nauteii chuan a lo melh kar ringawt. 

Mateii chuan Nauteii chu a rawn thlek zauh a, "I nau kha mi? " a ti sap a. 

"Ni lo ve. Ka zirlai a nih hi.. I chhungte an dam em? " Sangpuia chuan a lo ti sawk sawk a. 

"Aw dam e.. Lo leng ngei ngei ang che.hria em? I ngaihawm, sawi tur a tam.. Rawn kal ang che" ngam zet hian Mateii chuan a ti a. Sangpuia pawh chuan, "Dawn chiang.. Thil min rawn hawn lam pahin" tih pahin a nui sak a. Mateii chu mawi zeta nuiin, "Phakar thei.. Umm.. Ka lo be dawn che nia.. Nih rih aw. Saw ka thiante nen kan ni sia" tih pahin Nauteii a melh leh zauh a. A kalsawn ta nghal a. Nauteii a ngawi ngal mai. Lungawi lohna mak takin a tuam hlup hlup mai. An thil order a rawn thlen thleng pawn a la ngawi! Sangpuia chu zawhna engmah a zawt lo nachungin, "Phaiah kan awm ho thin a, a fel reuh lutuk, nurse a zir a. A thiannu nen in an luah a, kan duh hun hunah chaw kan va ei a. Kan inhmu lo rei ve ta riau mai" a ti suam suam a. 

"Zawt che ka va ang ve" a rawn ti ta chat a. Nauteii a va en chuan mitmeng tak ngâk, zahawm zet hian a lo melh kiau mai le.. 

"Min zawh takin ka tia" a ti sup a. 

"Ka hre châk lo" a lo ti fak. A lungawi tehchiam lo tih chu a hriat reng mai. 

"Eng berah khan nge i thinrim? " a ti ta. 

"Ka sawi peih lo" tiin a eitur chu a ei vat vat a. A ei zawhah a ei man dawhkanah a dah a. A kal daih nia! Sangpuia hrilh a hai ngei mai. Nuam lo a ti hle bawk. A ngaihtuahin Mateii bula 'Ka zirlai' a ti kha a hua a nih a ring ta ber. Amah Nauteii a venthawn vang zawka sawi a ni si a. Inthiam lo ru deuh siin a ei ve vat vat a. A tho ve vat. Mahse, Nauteii reng reng hmuh tur a awm lo. A call a, a switch off hmak bawk si. A va ho e aw.. 

A thawmhnaw lei te pawh chu rem tha ta lo chuan khumah a zangthal zawngin a mu hnawk a. Chunglam melhin Mateii hmel kha a mitthlaah a rawn lang nghal. Miss Feli a thikna te chu nepte a ni ringawt. Sangpuia lah khan a lo be tha huam a. A thin a rim takzet. 

"Thinrimna tur i va tawng lehpek ni maw? " a u tawng ri vangin a harh zawk. A lo melh run mai. 

"Ka ngei alawm.. Kha nu kha a hmeltha bawk si, nge a biak that huam huam ni.. " titau tih hriat zet hian a ti hlar a. A u a lo nui hawk. 

A phone lek kangin, "Hei a changtupa chuan min lo call a nia" a ti sup a. 

"Pick up suh. Ka be dawn chuang lo" a ti nghat. Mapuia erawh kal hrangin Sangpuia chu a be ta a. A nau lungawi loh dan vel te chu a sawi a. Sangpuia pawn a rawn hrilhfiah. Mipa leh mipa ta na nâ na chu an inhrethiam tawn viau mai. Nakinah a nau chu a hrilhfiah ang chu.. 

Sasa nen pawh bazar an tum ve a. Eng nge a leisak ang aw tih a ngaihtuah mek laiin Call a dawng a. Sama a ni. An inbe khat ve a, an intheihnghilh chuang lo thung. 

"Aw.. Thianpa" a ti a. 

"Ateii chanchin kha i hre tawh em? " a rawn tih chuan, phawk zetin, "Eng nge a? " a ti vat. 

"Nizanah truck nen an insu a, a na viau a niawm e. I lo hriat daih tawh ka ring zawk a" a rawn tih chuan, mak a ti hle. 

"A va zia lo ve aw. Kan inbe ngai tawh vak lo va, engmah ka hre hleinem.. Tunah khawi hospitalah nge a awm? " a ti a. 

"Durtlangah an tia.. Ka la kal bik lo kei pawh.. La kan ve ila, a fel ve reuh sia.. Ka khawngaih riau a nia" a rawn tih chuan, "Tehreng mai.. I hman hun lo sawi la, hun ka lo insiam dawn nia" a ti a. Sasa erawh a mitthla nghal. Mahse, thianten chhiat an tawh laia a bialnu vang ringawta kan loh erawh a tum lem lo. Ateii khan a ngaizawng ve a ni mai a, a duh ve a ni mai. Tihsual a nei hran lo. Sasa ta a nih tawh miau vangin a beiseina a hlawhtling lo a ni zawk. A ngaihtuah ru ve ta riau mai. Han call lah chu amah a biak theih dawn chuang loh a tiin a tum buai ta lem lo. 

Sangpuia chuan a naute duat chu theihtawpa hmin tum mah se, a be eih zo rih si lo va, a ngawihsan ta rih. Mateii lah chuan a rawn text sek lehnghal. Sawi tawh ang khan phaia lehkha an zir lai khan Mateii leh a thiannu nurse zir mek te chuan in an luah a, an hostel atangin a hla lem lo bawk a. An duh hun hunah va kalin chaw an va lam a, a riah te pawh an riah chang a awm. Mateii chu a fel bakah a chhe lo bawk nen, an star ru hle thin. Kum chanve dawn an inhrawn hnuah Mateii thiannu Zari chuan Mateii'n a star ruk thu a hrilh kha a nia. Mak a tihzia leh a lawm rukzia kha. Bawhzui a tum viau laiin a nu hriselna a tlahniam ta thut a, a haw lo thei ta lo va. Thla chanve dawn Mizoram lama hun a hman hnua a chhuk leh chuan, a beisei loh tawpin Mateii chu Naga mi nen an lo inkawp tih a hre ta a. A hnual ve rawih mai. Tlawh pawh a tlawh ve ta ngai meuh lo. An inhmuh chang erawh chuan mateii chuan a hnaih mah mah zel a, a kal tawh ngai loh vanga a vui thu te pawh a sawi thin. Mahse, Hnamdang a kawp ber chu a paidam hleithei ta tlat lo va. Tikhan an zir chhung khan inhaw lem si lo, inhnaih tak tak si loin an awm ral ta thak kha a nia. Mizoram lama a rawn chhuah chhoh hnuah phei chuan an intheihnghilh zui ta nge inbiak zuina pawh a awm ta lem lo. Tikhan an inhmu leh ta hlawl ringawt kha a nia. A bialpa nen khan an inthen tawh chu a ni phawt ang a. 

"Lo leng la, zaninah.. " a rawn tih chuan, "Ka vak nasa ve deuh sia, ka chau ve deuh tlat. Zanin chu ka thulh phawt ang e" a va ti a. 

"Hmm.. Min ngai ve tak tak lo a nih kha.. Nang chu i lecturer luah tawh bik a. Nupui neih te a hnai em? " a rawn ti a. 

"Ka nupui tur hi a la nau deuh a, nghah hret a la ngai dawn a ni" a tih chuan, "Vawiin ami kha mi? I zirlai a ni lawm ni? " a rawn ti vat a

"Umm.. Ka zirlai mah nise, ka duh thlu ngang sia" a ti ta hmiah. Mateii chuan a seen a, mahse, a rawn reply tawh miah lo. A buai ve pawh a ni mahna le.. 

"Naute, ka duatpui, ka ngai che. I ngawi rei tawh e. Ka rinawm lohsan lo che a nia aw.. I thinrim reh veleh smiley meng love pawp pawp kha lo dah rawh aw" tiin text msg a hnutchhiah a. A mu ve ta phawt. 

"Lawmsang, i tha em? Hei.. Tho teh.. Ka tawng i hria tiraw? " Nguri chuan a pasal chu a sawi nawk nawk. Lawmsanga chu a rum nghut nghut a, a maimichhing tlat bawk si. Chutah rawn meng thutin a mitmeng chu a sen rûm mai. A lu chu na tih hmel zetin a kut pahnih chuan a dawm a. Nguri chuan a chal chu a va hmehsak ve a, "Damdawi ka rawn la ang.. " tiin a tho leh nghal. Nachhawkna a va la sawk sawk a. Lawmsanga chu a eitir ta a. 

"Ka taksa hi a nâ.. " patling sehhel tak, Lawmsanga meuhin khur dar dar chunga a tih tawh chuan, a na thawkhat hle a ni ang. Nguri chu a mangang ngei mai. A bawp leh a khawih phak phak chu a hmet ta nawk nawk a. A rilruin a tawngtai mawlh mawlh bawk. 

"Ngur, ka thi dawn a niang " a rawn ti hlawl a! Ani pawh a tawp chawt. 

"Chutiang chu sawi suh" a lo ti vat. Mitmeng thuk leh thlahlel tih hriat ngawih ngawiha rawn melh chung hian, "Ka tan hian i tha ber thin a, i la tha ber bawk.. Ka ngai che. Ka bula i awm lai reng pawh hian ka ngai ngawih ngawih che" fiah fel tak hian a ti sup sup a. 

"Ka hria alawm.. Tunah chutiang sawi suh.. I na chu a zia deuh tawh em? " a lo ti a. 

"Ni lo, ka la hriat theih lai che hian a tam thei ang berin ka hmangaih che a, i ta liau liau ka ni reng thin tih hi sawi ka duh a ni. Ngur, ka theihnghilh hunah che engtin nge i awm ang? Ka lainat lawk ngawih ngawih che.. " Lawmsanga mitah meuh pawh mittui a tling ve nia! Lehlam hawiin Nguri chuan a mittui a hru zauh. 

"Kei pawn ka hmangaih che. I tan ka awm reng ang. Chuan, min theihnghilh dawn hleinem.. Min hrereng dawn" a ti khur dat dat a. 

"Duhthusam a ni.. Ka thih ni thlengin i hming lam liam ka duh a ni.. Ka thihsan phal lo che asin le.. Ti nge? Hetiang hi kan chungah a thlen bik? " tiin a kut a hum ruh a. A hachang a ţhial bap bap bawk. 

"Ni lo.. I thi dawn lo. Ka phal reng reng lo. Thih thu sawi tawh suh " a lo ti a. A ţap nghal hlawp hlawp. Insum tumin pachang taka awm tum thin mah se, nitin Lawmsanga chu a hniam zel tih a hai mawlh si lo. A taksa lam chu tha angin lang mah se, nupa chu an inhrechiang lo thei si lo. 

"Lo hnai teh.. Ka lo kuah teh ang che.. " Lawmsanga chuan a ban a phar a. Nguri chuan a pasal chu zuk bawkin a awm nghengin a tawm chaih chaih a, nghet zetin a pasal chuan a lo kuah thlup. 

A nupui chal leh a beng bul te fawh pahin, "Ka nupui, ka hmangaih" a ti sup sup a. Nguri erawh pangchang takin anpa chu a lo kuah nghet sauh sauh a. 

Hetiang hian ni reng se la aw.. Tiraw. Nguri.. 

(A tam thei lo.. Vawiin chu.. Lo lungawi hram ru aw. Naktuk hian exam ka nei leh a 😌 Ka rawn dah hmanin ka ring lo. Chuan, he story hi a tawp hnai tawh aw.. Naktuk chu min lo hrethiam hram dawn nia) 😘😍