Thutiams2-17

THUTIAM (S2)- 17

Ziaktu: Toni Râlte

(Adds kha aw.. Ka duatte u) 

Lawmsanga pawh a tho harh peih viau, a khawsik pawh a rawn awm leh ta lo. Mahse, a dar leh mal bawr vel erawh a sil ţhûm thung. Zingah Ruata'n chaw a rawn dah a, Terini te pawh rawn phei vein an ei ho a. Chaw ei kham lamah test neuh neuh nei turin an inpuahchah ţan ta a. Chawhma chhungin test vawi hnih a paltlang hman. A nat dan leh a haihawt thut thin thu te Nguri'n Doctor bulah a lo sawi tawh vangin, a tuk lamah test dang neih leh tur a ni dawn a. Chawhnu lam chu mu hahdam ve rih ang chu. Candy mutthilh chhungin Terini'n Lawmsanga chu a lo vil pah a. Nguri a zuk haw ve lawk a, inbual fai leh mamawh lam te in. Nguri rawn let hnuah Terini a haw ve leh thung. Damdawiin khata an han awm ho chu eng emaw chenah a zia phian mai. 

Pi Lawmi erawh a ngui bûr mai a. Chaw pawh a ei tlem ngang mai. An pa ngaihtha lo chuan a chhan a zawt ta nge nge a. 

"Ka mumang a chhe lutuk a, ka awm a tinuam lo vek mai. " a lo ti a. 

"Mang mai ma vanga khatia awm bûr tur a ni hleinem.. Eng nge i hmuh han sawi reng reng teh" an pa chuan a ti chuar chuar a. 

"Aa.. Mama (Lawmsanga) hi kan huanah tuikhuah bulah khan a lo thu a. Kan lo au vak vak a, engmah a hre lo. A sam lah chu a lo tla kawlh vek a, amah lah chu a cher bawk si, Nguri hian va hnaih a tum thin a, mahse, amah Mama hian a lo hnungchhawn zel mai a. Nguri phei chu a ţap par alawm.. Mak ka ti ania.. Tunah a dam lo bawk nen, awm a tinuam chiah lo a ni" Pi Lawmi chuan a ti ta mawlh mawlh a. Pu Mawia erawh chuan, "Akhai! Mumang mai mai zawng engmah a ni lo e. Ngaihtha deuh khan awm rawh. Test te an han nei chho ang a, damdawi an ei ang a, a rawn haw vat mai ang" a lo ti a. A rilru tak erawh a nuam chiah bik lo. Ni e, Pathian zarah an chhungkua hi an vannei a, An fate pawh an tet lai chhung zawngin damdawiin han den rap hi an nei ngai lo tihtheih a ni. Mapuia a han accident pawh khan an chiái reng a, Ruthi nen an inthen tirha Lawmsanga chetsual kha damdawiin an luh vawikhatna a ni hial maithei a ni. Chuvang chuan hetianga serious deuh hlek thil an han tawn takah chuan an thla a phang hma ve deuh bawk a ni. Nguri rualin an nupa pawh an chho ve a, eng han tihtheih ni lo mah se, Amah Lawmsanga tan pawh a nuam ve reng reng a. Nauteii school bang pawh Sangpuia nen an rawn lang ve ta bawk. 

An rawn luh tirh chuan Nauteii zak chu a sen ap ap a, mahse, puitling lungfing vek tawh an ni bawk a, Sangpuia chu an lo be siam siam a, Lawmsanga ber pawh chuan, "I rawn kalpui thlap mai a. A tha.. Tiang tur hi a ni. Ka fanu hi a mawlin a â si a, i chhawmdawl a ngai nasa dawn a nia" a lo ti ve a. Zep tit tet neih a hun tawh lem lo bawk nen. 

Sangpuia pawh chuan, "Amah te chuan kal ve lo se min duh nak alaia, mahse, rawn kan ve reng reng che ka duh sia.. Titau chungin alawm kan rawn inchhawm" a lo ti a. An nui hak hak mai. 

"Pa, naktukah chuan i lo haw thei tawh ang tiraw? " Nauteii chuan a ti sep a. 

"Ka hre lo le, i nu hian Damdawiin hi a nuam e mai. La awm ang a ti deuh tlat a" a pa chuan a ti a. Nguri chu Nauteii chuan a melh rum nasa mai. 

"A nawmna a awm lo, dam lo an tam si, an nat hmel hlawm bawk si.. Duh leh anu chu awm se, nangmah lo chhuak la a ni mai" a ti tân tân a. Nguri chuan, "Nuam deuh asin, chaw leh chawhmeh te kan dawng reng a, engmah tih a ngai bawk si lo, mut mai mai bak.. " a lo ti ve zauh. 

Inkan hun a tawp zui ta mai bawk nen, Pu Mawia ho chuan an chhuak ta dial a. Nauteii erawh Candy a va hmu zuai. A lo ngai ve tawh hle aniang, a lo ban ve nasa mai. Mahse, rei an inpawm hman lo. Sangpuia motorin in lam an pan ta dial a. Pu Mawia chuan thutak deuh hian, "Sangpui, kan naui hi i duh ve tak tak mawni le? A ãtzia i hre ve kur awm si a" a ti a. 

Hmalam melh ran chungin, "Duh tehlul e. A âtna lai tak hi lawm duhawm chu" tiin Nauteii a va melh leh zauh. Ani lah a lo nui tak ang vur vur a. 

Muanpuia pawh chaw dahin a chho ve leh. Mamawii lahin a lo nghakhlel tumhrang a. Muanpuia chu a va text a va text tawh zawk. Ani mi â ni ta bik lo chuan a rul tawkin a lo chhang ve zel a, chu chu Mamawii chuan â takin beiseina insiam nan a lo hmang ve si.. Terini bulah phei chuan, "Candy nu ka la ni lo vang tih a sawi theih miah lo nia aw" te a ti vel a. Terini rilru a hre der si lo. Nge a hriat ruk vang zawka chutia sawi chu nge a nih ang tih hriat a ni lo thung. 

"Hei sakhi sarèp ka lei a, i ei chak ka ring a. Ka lo kensak che" Muanpuia chuan Terini melh chung chuan a ti a. An ni pahnih hi chuan phone hmangin an inbe tam meuh lo. An inbiak ve chhunah Candy chungchang an sawi a. Chu chu ni deuh mai. 

"Tui ngawt ang" Terini chuan tiin hrang khat chu a hmawm nghal hmak. 

"Awii.. A sa râwpthlak lutuk, Lal Terin" Mamawiin a lo tih chuan ani lo ngei sa ve tawh bawk si chuan, "I ei ve chak vang a nih chu" nui tha duh hlek lo chuan a ti a. Mamawii nui pawh a tawp riai riai mai. Muanpuia lah chuan Mamawii chu a rawn ngaihsak tha duh der bawk si lo, Terini leh a fanu chu a vil khur a, a uap run a ni ber e. 

"Kan chhuak thei tep tawh. Doctor khan naktukah pawh in chhuak thei tawh maithei.. Zanina in awm dan azirin min tia.". Terini chuan a ti a. 

"A that nasat chu, i awm loh chuan ina awm pawh a nuam lo. Bakah ka ning.. " a lo ti nghut. 

Mammawii bawk a rawn inrawlh leh a. "La chhuak bik suu., chhuak rual ang u.. A khawharthlak dawn em mai" a lo ti a. 

"In chhuak ve tep tawh emaw ka tia" Muanpuia'n a ti a. 

"Nia, nizanah a khua a sik leh a mawle.. A zia lo tak tak.. A thil ei vang mawni te ka ti" a lo ti a. 

"A va pawi ve aw.. Chhuak ve vat ula a tha a nia" muanpuian a ti liam puat a. 

A duh ang leh beisei anga Muanpuia awm ta lo chuan a tihnual deuh a, mahse, tlawm a hnêkin beidawnsan erawh a tum ikhaw lo mai. A fapa zun chhuak a va zunpui a, an let leh lamah Terini tiffin sil tur nen an intawk a. Terini chu a lo man chawt, "I sawi lo mi? " a ti sap a. Terini a bo deuh hman a, mahse, a hre chhuak leh vat. 

"Sawi e " a ti a. 

"Engtin nge a tih? " nghakhlel deuh hian a ti a. 

"Engtinmah.. a ngawi reng a" a lo ti mai a. A fapa a awm ve reng sia, chutiangte sawi a ti rilru pah bawk. 

Nimin tlaia Muanpuia awm dan kha a ngaihtuah let a, Mamawii kha duh ve ang deuhte khan a awm vel sia, ti nge tuna a rawn kal leh hian a ngaihsak miah loh le a ti rilru a. A lawm ve ringawt lehnghal. A va let leh chuan Muanpuia leh Candy chu an lo inpawm a, Candy pawh a nui ar ar mai. A pa na nâ na hi chu a ngai ve bawk a ni. Mammawii pawh a lo thlir ve reng bawk. 

"Nu Nguri te i kan dawn em? " Terini chuan a ti a. 

"Umm dawn e.. Va kal ila" a lo ti a. 

"Pawi lo" tih pahin a kal a ni deuh mai. Beisei nei taka lo thlir ve rengtu Mamawii chu an kalsan ta daih a. A hnual ngei mai. A thinte pawh a rim lek lek hial, mahse, tihtheih em em a nei bawk si lo. A fapa lakah te chuan a'n thinchhe ngawt a. A che maksak ve khawp mai. 

Lawmsanga chu a lo thu mu a, a malpui chu Nguri'n a lo hmehsak a. Candy a hmuh chuan, "A va dam tawh ve.. Ka naute chu aw.. " a lo ti chul a. 

"Khawi ka lo hmet ve ang" Terini chuan tiin Lawmsanga mal veilam chu a hmet ve nghal a. Lawmsanga chuan a u leh Terini melh tawn zauh zauh chung hian, "Nangni pahnih hi innei law law r'u.. In induh ve ve tih ka hria a nia" a ti ta hlawl a. Nguri pawn khap a tum lem lo aniang, "Nia, kei pawh ka lo tia" a ti ve a. Muanpuia pawh a lai lek lek, Terini phei chu a hawi chhuak ngam tawh lo hrim hrim. 

Thutak deuh zawkin Nguri chuan, "Ka ti tak tak, Terini tluk hi i hmu lo vang, i fanu nise a nu ai pawn a hmangaihin a buaipui zawk a. Candy pawn a nu tak ai mahin a ngai zawk a nia. In in iai tawn loh phawt chuan innei vat rawh u. " a ti a. 

Muanpuia chuan, "Ringawt zel che u hian, amah pawn min duh ngawt ngawt nang" a ti sup a. 

Lawmsanga chuan, "A hmel ka en hian a duh che tih ka hria.. Ni lawm ni? Terin" tih pahin a nui suk a. 

Kun chal chung hian, "In ninawm" a lo ti hluk. A laih leh zah lutuk vang a ni tih amah aia upa te chuan an hrethiam lutuk tlat. 

"Candy dam se, kei ka dam that hunah sawi rem vat ila a tha ang" Lawmsanga'n a tih chuan, "Eng nge in test result lam te? " Muanpuia chuan a ti a. Nguri chuan a la that rih thu a lo hrilh a. Lawmsanga jection a hun leh takah chuan Nurse in a rawn chiu a, an inchiu zo, Terini lam hawiin, "Ih… Englo.. Engtikah nge in chhuah ang? " a ti bah nak a. Nguri'n a lo melh chiang leh ngang mai. Muanpuia pawn Lawmsanga mitmeng buai deuh chu hmuin, "Terini te maw.. an chhuak thei tep" a lo ti vat a. 

"Aw terini.. " tiin a phun sup. Terini hming a theihnghilh leh thut tih Nguri te chuan an hai lo. Inkan hun a tawp ta bawk a. Muanpuia pawh a haw ve hnai ta a, Candy pawm chungin Terinin a zuk thlah ve leh hram a. Candy ban te taktea vuan chungin, "Bawihte, lo haw vat ru aw.. ka ngai tawh lutuk che u.. A u nen hian" a ti sup a. Terini lungphu a lo rang hman. 

Candy chuan a pa chu a ngen ve deuh mawni a nur nâng reuh a. Terini chuan chhohpui a tum a, a pa a ban lawm lawm mai si, a han pawm leh rih a. 

"Chhungkua ni ta ila" Terini melh chungin a ti ta a. A mitah pawh en ngam lo chuan, "Kan ni reng alawm le" a ti nghat a. 

"Ni lo, ka sawi awmzia i hria alawm"

"Ka hre lo"

" Duhawm viau lo mai teh" 

"Khawi.. Candy kha, haw rawh" tiin a rawn la chawt chawt a. A tlan chhohpui nal nal. Khi vur vur chungin Muanpuia'n a thlir a. "Zei lo ve hle mai maw" a hriat tawk lekin a ti sup. Hlim takin a haw ta a. A muthmunah erawh a nau Lawmsanga chu a ngaihtuah rauh rauh a. Hlauhthawn rukna a nei ve tlat chuan a kap run a. Eng han tihtheih a awm bawk si lo. 

Lawmsanga muhil hmel thlir vawng vawng chungin thil tam tak a ngaihtuah a, internet lamah Lawmsanga natna tur awm chu a zawng nasa tawh. Alzheimer chu a nih a ring êm lo va, a kum ngaihtuahin leh a nat dan ngaihtuah hian ni turin a ring phal lo a ni ber mai. Terini hming a han theihnghilh chawpchilh mai te kha.. A nupui fanaute hi theihnghilh ta vek se.. Chutiang ngaihtuah thlen loh hram chu a duh thin. A chhan chu a na zawk zawk zel a. Eng pawh tawkin eng natna pawh lo vei mah se, Lawmsanga chu chhawmdawl zel a tum bur thung. 

"Duati.. Min va chhang bung thei ve" Mapuia chuan a va ti a. Nia, Chhun atang khan Sasa chuan a chhang tha duh lo riau a ni. 

"Engkim hi ka hne.. Ka luak an tichhuak" a rawn ti teh tawp a. 

"A va mak awm ve.. Eng nge a chhan ni ta ang"

"Ka hre bik mi? " a rawn ti lawi si! 

"A nih chuan min hne loh hunah inbia ila.. Lo tha vat rawh aw" a va ti a. 

"Ka hne che ka ti mi? Ninawm lutuk" a rawn ti leh bawk si. Sasa awmdan chu a hrethiam phak lo. 

"I thinrim mi? Eng nge i tawn a.. Vawiinah te" a va ti leh a. 

"Rim lo.. Ka ning a ni mai.. Engkim hi.. " huiham.. 

Mapuia rilru pawh a buai ve map mai. Chumi zan chuan an inbe hleithei lo a ni ber mai. Sasa zawkin a rawn mang tha a, mahse, ani chu a mut la chhuak hek lo, groupah te a han lut kual ve leh a. 

"Ti nge i online vu reng a, tu nge i biak a? Ateii mi? " ringhlel zetin a rawn ti leh bawk si. 

"Tumah ka be lo. Groupah ka lut kual ve lawk a. I mu tawh maw ka tia" zaidam takin a va ti a. 

"Ka duh leh ka mu ang a.. Ka thu thu.. I lerh avang hian ven i ngai alawm" a rawn ti leh hrep. Mapuia chuan thil a hre chhuak ta thut. A nu in a sawi thin,, "Hmeichhia chuan kan period hma kar khat velah Pre-Menstrual Syndrome kan tuar thin a. A la na deuh chu kan sual em em a, kan huatthu a chhiain, engkim kan hne a. Mipa te kan ten a, kan thikthu te hi hoteah a chhia a, a chang phei chuan kan thinur lutuk te hi kan ţap tawp zel" a tih kha.. Sasa pawh hi a PMS ve a ni mai lo maw le.. Tih a ngaihtuah ta a. 

"Duati, i pms a ni lo maw? Tiang i ni ngai si lo va" a va ti ta a. 

Rei fe hnuah, "A niang.. A hrehawm tawp.. Tunah pawh ka ţap.. Ateii nen in inbia emaw ka tia" a rawn ti ta a. Mapuia pawh a thaw huai mai. 

"Hahdam deuhin awm rawh. Tumah ka be ngai lo, groupah ka lut ringawt alawm.. Ka hmangaih che. I tan ka rinawm aw.. " a va tih chuan, Sasa pawh tlem chuan a rawn nem ve ta a. 

Mipa ho hi an khawngaihthlak ve thin ngawt mai. An bialnu pms lai hre thiam laia inthen ta hlawl te pawh an awm châwk a ni. Hei hi chu mipa lam pawh hian hrethiam ve se a tha khawp ang. An pms loh laia an thinrim insûmna kha a rawn invawrh chhuak tawh thin a, an bialpa te chunga hrikthlak nghek chingte an awm ve a, hrethiamtu an mamawh em em, dimdawih an ngai bawk. An pawisawi lem lo pawh an hmel huat fo a, a then phei chu an tenin an luak an tichhuak ngawih ngawih thei. Sim ngawt theih lah a ni bik lo va, anmahni pawh hian hrehawm an tiin a hnuah an inchhirin nuam lo an ti ve thin lutuk ania.. Mipa lam khan lo hriatsak hram teh u. 

Hetih lai mek hian Pu Mawia te chhungkaw chungah buaina dang a rawn inţham ve mek a. Vanduaina pawh hi a hlawp hlawpa a lo kal chang hi a awm ve thin bawk a ni. Pu Mawia fapa upa ber Pastor Pu Rempuia, Chhim lama bial thuta awm mek chuan harsatna a tawk ta tlat mai a. Patling tih takah a pa te bulah engmah a sawi duh lawk lo va, a nau Lawmsanga lo dam lo ve bawk nen, va tihbuai belh kha a duh bik lo a ni. Mahse, a zozai ta deuh a ti deuh nge ni Zingkarah a pa a rawn hrilh ta nge nge a. Pastor a ni bawk a, a buaina pawh a rau ruih mai. 

A bial thut mekah chuan harhna a thleng a, Zoramah pawh hria an awm nual tawh. Mahse, chu harhna chu a rei telh telh a, Pu Rempuia chuan a hmu danglam ta tulh tulh mai si a. Ni e, Thlarau Thianghlim chang intite awmdan chu a maksak chho ta êm a ni. Tleirawl lamah pawh a kang kai tan a, nona leh khurbing an tih mai rawng a kai chho ta a. Tleirawl te te ho chu Biak inah riak khawmin a hmei apain an inawm pawlh sup sup mai a! Thenkhat lahin zia an lo khel ve tumhrang bawk nen. Thlarau Thianghlim fa pai te pawh an awm chho ta nawk mai. A nupui ngei pawh chu rau mak tak chuan man vein an kohhrana Pavalai pawla ami parawl pakhat, hlimsang thin nen an khurbing ta tlat mai le.. Chu chu a buaithlak ta em em a ni. Kohhran tih vuivai a hlauhawm piah lamah sawiselna chhakchhuak tawh hlek lah chu, "Thlarau Thianghlim i sawi chhia" tiin an kawhrawn tawh mai si. Pu Rempuia sermon lai pawh, "Pulpit atang khan chhuk rawh. Pathian pawi i sawi ang e" ti hiala an vau ngam tawh chinah chuan, an rau chan danglamzia chu a lang chiang mai awm e. Kohhran hruaitu te pawh an lu a hai chho viau a, Upa te zingah pawh ngaihdan inang lo an awm nuk si. Pu Rempuia rilru chu a buai ta em em a ni. 

Pu Mawia pawn thurawn han pek mai tur a hre bik lo. Hotu lian zawkte kuta dah mai turin a hrilh ta a. Pu Rempuia pawh chuan Headquarter lama an hotute a hrilh lo thei ta lo va. Hotute lamin an chanchin an han ngaihven chho ta chu Kohhran thenkhat chu an lawm ta lo va. Pu Rempuia chuan beih a tawk nasa hle a ni. Mi dang zawng aiin a nupui ngeiin, "Ring lo mi" tia a kawk chu a tan chuan a na bik a. An nu chhuah a phalsak lo te chu mihlim thenkhatin an lo deu a, an sawi darh a. "Thlarau Thianghlim dodaltu sakawlh" te an lo ti thul. A tan chuan awm ngaihna a vang ve khawp mai. Tawngtai ngawt mai loh chu. A lama tang mi tlemte te nen chuan Pathian puihna dilin chaw nghei leh tlaivara tawngtai an nei ta fo a, a fate an la puitling chiah lo bawk nen, a luhaithlak ve khawp ang le. A pa thurawn angin chawlh dil ta se, a bial ngaihtuahawma an awm laia han chawlhsan daih chu Pathianin rem a tih a ring bawk si lo. An hlimna thlarau chan lah chuan a daih rei zèk lehnghal. Pathian thinurna an tawngbaw palh ang tih pawh a hlauhawm khawp mai. 

Damdawiin angah chuan rei tak muthilh theih ni hek lo le, Lawmsanga pawh a harh hma viau. A taksa nâ them thum pawh a zia ta deuh. A thu chhuak a, a khum bula mu mek a nupui chu a thlek vang vang a. A mutui suk suk si, tihharh duh lohin amahin a va zung a. A lu erawh tlemin a hai deuh. A ngaihtuahna chu tawi tup hian a hria a, a chhah lûk bawk. A han inphih fai a. A hmel tla ve kuam chu a thlek vang vang a. A ner sak ringawt. Nguri chu a mu rei thawkhat tawh tihin kaihthawh tumin a va pan hnai a. A hming a theihnghilh ta tlat! A nupui a ni tih erawh a hria. A hming a ngaihtuah thin, a bo telh telh nia! A mang a ang ve ta phat mai. Mahni nupuite hming êm han theihnghilh chu! Nguri darah chuan a zuk sawi a, "Tho tawh la" a ti ringawt a. 

Nguri pawh a harh ve mai. A tho vat a. Lo melh vung vungtu a pasal chu melh zauhin, "I khuasik leh em? " tiin a chal a dek zauh a. A lu a lo thing ringawt. Inphihfai turin a chhuahsan a. Awmhmunah a nupui hming a lo ngaihtuah ngat ngat thung. A kut te chu a hum ruh a, a mangang a ni. A thaw te chu a sa phat phat nia! A manganzia hre miah loin a nupui lo lut chuan, "I ril a tam tawh em? Ka nu te kan bia ange" a ti siam siam a. 

"Tam lo ve.. " a lo ti ve mai a. An pa khawsik awm lo chu a lawm hmel viau mai. A nu te a bia a, Ruata bawkin tukthuan a rawn dah dawn a ni. Chawhma chhung zawng Lawmsanga chuan a nupui a ko ta lo. A tah te lam a chhuak, a nupui a ni tih hre sia a hming a hre thei tlat lo chuan a tilungngai takzet. Doctor Lungmuana hnenah a test result chu tlai dar 4-ah lam tur a ni a. Nguri pawh a tawngtai mawlh mawlh mai.Terini te pawh vanneihthlak takin an chhuak thei dawn ta. Muanpuia'n phur zetin a rawn hruai a. An insiam lai vel chuan Mamawii chuan, "In va ngaihawm dawn tak.. Chhuak tawh mah ula, min rawn kan ve thin tho la tiraw? " Muanpuia bulah chuan a ti a. 

"Ni e, Ka nau a awm a. Rawn kan pahin ka rawn kan thin dawn che u nia" a lo ti ve mai a. 

An siam zawh an kal lek lek tihin, "Lo dam vat vat ru.. Ka nupui neih niah in rawn lang ve thei lo vang" Muanpuia chuan a ti leh zauh. Terini awm nawm lohna chu vih thep ang mai hian a thep suai suai mai. Mamawii hmel erawh hmuh theih khawpin a danglam thung. 

"Tu nge i neih dawn? " tawngkam mawihnai pawh a hmang hleithei bik lo a niang. 

"Hei mawle" tih pahin Terini chu a kuah a. Mamawii mitmeng chu hmuhnawm tak a ni. Thikna meialh chu a alh hlauh hlauh a ni ber e. Engahmah ngai loin an chhuahsan ta nghal a. Nguri te an tlawh leh zuai hnuah In lam panin an inkhalh haw ta a. Terini hmel hmuh a nuam sar sar khawp mai. Muanpuia lah bang bik hek suh. 

Dar 4-ah Nguri chu Dr. Lungmuana hmu tur chuan a kal ta a. A chhungril khur chu tihreh tumin a insangmar hram hram a. A rilruin, "Lalpa, ka rindan hi dik lul suh se aw" a ti mawlh mawlh mai. Kawngka kikin lo lut tura sawmna a hmuh rualin a lut nghal a. Pu Lungmuana chuan thu turin a lo hrilh vat a. Nguri chu a lo melh vang vang mai. A ngaihtuahna erawh hriatthiam hleihtheih a ni lo thung. 

"Eng nge result chu? A tha ang tiraw? " Nguri aw chu a ri chang chang a ni. 

A aw a thian kharh a. 

"Nguri maw khah? Umm.. Nguri, i pasal natna hi natna vâng angreng tak a nia. Mizo zingah phei chuan vei hi an tam lutuk lo. Kei phei chuan pahnih bak hriat ka la nei lo. Engpawhnise, enkawl theih erawh a ni tih ka sawi duh a. Pachang taka i awm erawh a ngai dawn a ni. I pasal hian Parkinsons Disease a vei a ni. Alzheimer nen a thawh dan hi sawi hran hleihtheih loh khawpin a kal kawp titih a, mahse, natna inang erawh a ni lo. Alzheimers aiin a thawk nep thung. A hun kal tawha a chen veng veng hun a awm ang a, a hun kal tawh hriat chhuah zawh miah loh hun pawh a nei ang. 

Tin, hming a hrereng thei thin lo va, tunah chuan a la tir a. Amah pawh a inthunun thei ngei ang. Nangman i zira i enkawl thiam erawh a ngai dawn a ni. Taksa nâ, lu na, khawsik te hi taksaa a lan chhuah dan langsar a ni a. A rei hnuah chuan a sam a tlakawlh ang a, a beng te pawh a la ngawng thei dawn a ni. Damdawi hi he lama kan kawl chin hi ka duhthu an sam lo deuh a, ka chah dawn a. A lo thleng vat ang. 

In hriat tur chu a rilru hliamsak te, tihthinrim te a hlauhawm. A thinrim tawh chuan thunun a harsa dawn a ni. Engtikah emaw chuan nang leh in fate ngei pawh hriat loh hun emaw mi dang daih anga ngaih hun che u a la nei dawn a.. Chutih hunah chuan chhel takin aw.. Nu fing fel tak i ni a, i ngaihtuahawm loin ka hria.. I pasal hi in kianga a la awma a la hriat theih lai che u hian, duat takin enkawl rawh u.. " a ti ta dap dap a. Lo dawngsawngtu Nguri thinlung erawh chemte zum taka vih sawk sawk ang mai a ni. Ni e, he natna thawh dan chu Doctor sawi aia tam mah kha a hre tawh. A chhan chu internet a lo rawn nasa tawh lutuk tlat. Ni tura a rin phal loh ngei kha a pasal chuan a lo vei maw?! A va na ve mawle.. Nguri.. 

"Doctor chuan eng nge a lo sawi? Ka tha tiraw? " titu a pasal chu a melh vawng vawng a. Doctor khan hrilh vek turin a ti kha a nia. A va harsa si em. Lawmsanga mi sehhel, a chhungkua ngaihtuah em emtu hnena nakin lawka a hmangaihte a la theihnghilh vek dawn tih thu hrilh tur hian Nguri a pachang tawk lo a ni ber e. A insangmar a, inhumruh chungin, "Parkinson disease i vei a. I hriatna te hi zawi zawiin a la bo dawn a ni. " a ti ta tawp a. Lawmsanga a ngawi vang vang mai. A tawng theih lawk loh chhan chu a hnukulh vang a ni. Engkim a tha vek ang tia a inhnemna te chu an bo ta vek mai. Engtin nge a hmangaih a nu leh pa, unaute, a nupui fanaute hi a hriatna atanga a paihchhuah phal ang? 

Nguri hnem nan, "Aa.. Alzheimer a nih èm loh chu.. Nguri, i pasal hian ka theihnghilh dawn renh reng lo che.. Ka phal teuh lo" a ti tak naa, a mitmengin a thusawi a thlawp lohzia Nguri chuan a hmu chiang si. 

"Engpawhnise, Damdawi te tha takin i ei ang a. Rilru hahdam takin i awm bawk ang a, kan pahnihin kan hmachhawn zel dawn alawm.. I tan ka awm reng ang.. Lawmsang" Nguri chuan a ti nghet charh a. Lawmsanga chuan a nupui mittui tling kiau chu melhin, "Ka hmangaih che.. Ka nupui i ni hi inchhirna ka nei ngai lo aw" a ti sup a. Nguri biangah mittui a luang ta.. 

Chhungkuain Lawmsanga natna an han hre ta chu, pi Lawmi phei chu roomah lutin a va ţap a. Mapuia pawn a heh a pet fan fan mai. Tupawn Lawmsanga chu an lainat a, Nguri an khawngaih bawk. Nupa awhawm leh hmuhnawm, inngeih leh inzah tawn tak, inlungrual tak an ni a, tuman chu chu an hai lo. An hlimna kehchhe mek chu tu chuan nge lungawi taka lo thlir thei bik ang le?! Nauteii erawh tuman an hrilh ngam lo. Hre rih lo se tiin thu an titlu ta ngawt mai. Muanpuia pawh Terini vanga a hlim tehlul nen, A nau vang chuan a hnual vek.. Terini tak pawn hrehawm a ti ve kher mai. Pu Rempuia pawn a nau duat chanchin a han hriat takah chuan a tan chaw ngheiin a tawngtai nghal a. A buaina pawh tawrh a har tawh tehlul nen, chhungkua atanga hetiang buaina dang han tawn leh chu patlin harsa a ti ve khawp mai. Lawmsanga u chiah Teteii'n a lo hriat ve chuan a rawn lang nghal vat. A nau chu a lainatin Nguri a ngaihtuah bawk si. Chhungkaw thinlung a na a ni ber e. 

Lawmsanga chu damdawi ei tur nen damdawiin atangin a chhuak ve ta phawt chu a nia. Engkim a pangngai ang veka kaltir tum teh mah se, a harsa lam a ni. Amah hi pachangin sehhel hle lo phei se chuan a hmalam hun ngaihtuahna avang ringawt pawn chau mai thei tur a ni. Nauteii erawh a pa lo chhuak chu a lawm em em a. A bulah a tâp leh chawt tawh. Chungte chu Nguri lung tichhetu an tling zel tawh si.

Mapuia pawh a dam chho ve zel a. A kal bai hlen ang tih an hlauh nen, thiamna a sang tawh bawk a. A pangngaiin a kal leh thei dawn a, amah pawh a lawm kher mai. Kum tawp a ni chho tawh a, class pawh a kal tawh lo law law. An zirturtu te an be sa bawk a, an lo hrethiam ve mai. Zir tur erawh a thiante atangin a la khawm ve reng tho a. Sasa pms pawh a zia chho a, an hlim dun leh viau tawh e. Ateii erawh a reh rih ta vang vang mai. A thawventhlak a ti viau. A pa natna avang chuan hnual deuh mah se, thalai an la ni bawk a. Engkimah inbawhbehtir loh erawh a tum ve a ni. A pa a awm ta lo anih pawhin a nu leh a farnu te tana a pa aiawh zo nih a tum ve khawp mai. 

"Pa, tah hian i signature a ngai.. Lo sign rawh aw.. Tiffin ka va siam lawk" Nauteii chuan a ti a. Lehkha chu a pa a pe bawk. Nguri inbual zo a rawn chhuak ve chiah bawk a. 

Lawmsanga chuan lehkha chu a melh vung vung a, a hming sign-na tur zawnah chuan a pen chu a tin ran a. Mahse, a buai.. A hming a hre lo! Nguri chuan hnunglam atangin a lo thlir reng a, a pasal buai rukzia a hmuh chuan, "Nalh deuha sign kher a ngai lo, Hawrawpte khan Lawmsanga ti mai rawh.. Signature-ah lehzel chuan lerh thin suh" ngaihsam hmel tak hian a lo ti a. Lawmsanga pawh a bu nghut mai. A hming a hrechhuak leh ta. 

Nguri school kal hlanin a nu nen an inawm thin a, rin ai taka Pu Mawia a that leh tak avangin tlem chuan an hlim lohna pawh a nep ta deuh e. Huan lam a ngai thin viau a, hlawhfa te ruaiin an han sam tir ta mai. Amah han chhuak vak chi a la ni meuh si lo. Mapuia class kal tawh lo ina awm ning bawk si chu a ni teteii dawr a nghahsak thin a, a zia phian mai. Nguri hian a kal dawnin Lawmsanga damdawi ei tur a dah chhuak sa thlap zel a, ei hunbi pawh Alarm a set sak vek zel. Pi Lawmi a rintlak loh vang ni loin an upa ve tawh a, lo hriat loh theih te a awm takin tih thuah a ni. 

"Puii, chhuak suh. I chhuak dawn miah lo ania. I awm dan hi Pathian duhzawng a ni lo" Pu Rempuia chuan a ti khur dat dat a. An fapa rawlthar, a kum thansana lian uaih tawh chuan, "Nia, nu, chhuak tawh suh. A zahthlak e mai. Thianten min chhaih thin a nia" a lo ti ve bawk. 

Puii chuan a pasal leh fapa te melh rawm rawm chungin, "Pathian hnathawh hi dodal chi a ni lo a nia. Hremna in tawk palh ang e.. Ka kal dawn" tih leh kawngka nam hawn a rual a. Pu Rempuia a che ve phat. A nupui chu a pawt let dâwrh a, kawngka a kalh nghal hmiah. 

"A ţul a nih chuan tharum pawh ka hmang hreh lo vang. He inkhurbinna tenawm lutuk hi ka hne zozai tawh e. Pastor nupui i ni tih hi theihnghilh suh. In hlimna rau chan hi Pathian atanga chhuak a ni hek lo, setana hnathawh, hurna thlarau a nih hi.. " a ti ve ta piap piap mai. Mi zaidam tawpkhawk a ni a, an nu hian han ankhum hrep thin mah se, tilet ve ngai lo, a ngeiawm zawk alawm tih tur khawpa dawhthei leh zaidam a ni ve a. Mahse, zanin zet chu a tuar thei tawh lo aniang e. A bial chhunga kohhran thenkhat Harhna chan chu a uchuak lam hret tawh a ni. Hotu lian zawk ten han khap tum viau mah se, an hneh mang tlat lo va. Lo tantu mai bakah a lo khaptu te chu ring lo hmuha an hmuh miau avangin lo swisel pawh inthlahrunawm tak a ni ve a ni. 

"Hurna thlarau te i han tih le? Lalpa dan hnuaiah zel a ni kan chet ni.. Thlarau Thianghlim i tivui palh ang e aw.. Pastor ve si, mahni beramte hlimna pawh tawmpui thei lo, nupuite thlarau chan pawh sawisel duh mihring hian pastor nih pawh i phu hrep lo ve" a ti hlawih hlawih a. Pu Rempuia chuan ngawi rengin a nupui chu a kai a, Roomah luhpuiin a lu chungah kut nghatin a tawngtai ta mial mial mai. Puii lah chu a che neuh neuh a, a phun hluk hluk reng bawk. A za et et a ni ber mai. Ral khatah khuang beng thawm a rang tial tial a, a za cheng mai. A taksa pawh a che lawih lawih a, hlimsang ţul kan tih ang hian an pa tawngtai zawhah phei chuan a awm a, a sawt ulh ulh bawk. Mahse, Pu Rempuia chuan an Kohhran upa pathum leh an kohhran hmeichhe pawla a mi rin ber, Pi Nupuii te a phone kual a. An rawn lang ta vat hlawm a. A nupui chu an han tawngtai rawn leh tak tak a. An zawh meuh chuan Puii pawh a zal raih raih mai. Hlimsang te hi enkawl thiam an harsain hauh hrep chi an ni lo va, an kal sual tur lo ven chi zawk a ni. Mizorama harhna thenkhat tam zawk hi chuan nona, khurbinna hi a kengtel ngei ngei tihtheih a ni a. A tirah han hlimin thlarau thianghlim dik tak pawh chang mah se la; venpui an nih loh chuan anmahniah duhâwmna leh mi ai baka chan san tumna a rawn piang thuai a, chutah chuan setana hi a awm mai mai bik lo nen.. A rawn lang ve ta thin a, an ni rilru fim ta lo chuan an lo pawm hmiah hmiah tawh si. A tawpah thiangzau rau kan tih ang mai kha, hurna rau changin Thlarau thianghlim fa tia changchawiin an rai ta sup sup zel a! Pathian atanga chhuak zawng a ni lul lo vang le.. Hei tak hi ringtu ten kan dopuia hmangaihna nena kan venpui an ngai reng a ni. 

Mapuia leh Sasa inphur chu an inhnial rap rap reng mai a. A chhan pawh Mapuia a ni te dawr a nghahsak hnu hian a lo buai ve bawk nen, an inbe tlem sawt riau a. Sasa ngaihdan a ni vak lo a ni. Dawra a va kal ve lah khan dawra thawk tleirawl chhe vak lo hian Mapuia a lo melh tai riauin a hre bawk nen.. A zeldinna chu a tak tak emaw a ti leh tan a ni ber mai. 

"Ninawm inhnial tawh lo vang.. Kan thleng tep" Mapuia chuan a ti a. Ţam dil panin an kal mek a ni. Han lenkhawthawnna a vang ve thin nen.. Hunpui lo thlen hmaa inkawm fal kha an thlahlel ve bawk si a ni ber e. 

"Umm.. Ka hnial tawh lo vang che.. I duh duh danin awm rawh" a lo ti hlak hlak a. Mapuia thinrim ve si, tihlan thiam vak si lo chuan bike chu chak zetin a khalh ta a, Sasa chuan a hlau leh si, "I â mi? Min phurh hlum i tum mi? Tlan muang rawh"a ti tuar tuar a. A pa zia a chhawm chimawmna a rawn lang ta a ni teh chêk ang chu.. A muana muang mangtara, lir chang chang hian a khalh ta pek a. Sasa thinrim si, hau hreh ve tumhrang tawh bawk si chuan a hnunglam atangin a han chhiatkhum ngawt a. Chuti reng reng chuan an tum ram chu an thleng ve ta hram.. Cottage te an han book fel hnua an zuk luhthlak takah chuan a hmaa an inhnialna leh thinurna te kha an bo ta nge, inthlahlel tak chuan an inkuah ve leh chial kha a nia. Mapuia dam kawr rei tawh râwp tawh bawk si pawh a duhthawh tân tân viau. Sasa lahin lo hnar chu sawi loh, a lo pui ve mial mial bawk a. An lo dai tawh sa a ni bawk a, an tìm ta vak lo. An han zawh vel takah chuan, "Rai lohna an tih ziah hi ka hre ve si lo va. Kei hi ka rai maithei ni" Sasa chuan a ti sap a. 

"Tha daih zawk laawm" a lo ti liam puat lehnghal. 

"Kan la naupan em hi" 

"Kan naupang lo aniang, raina tur thil te kan ti ngam tawh ania" a lo ti khauh. Sasa chuan dik a ti ru viau. 

"A nih sex min hmanpui vang hian min en dan a danglam em? " a ti a. 

"Ka duhna che a zual sawt bakah kan inhmuh apiang hian. ahma aiin ka thlahlel zawk zel che. A mak tawp" a lo ti a. A thutak viau. 

"Inhmangaih tur kan ni ve tak tak aniang" Sasa chuan a ti sar sar a. 

"Ka beisei.. Chutiang kan ni lo anih vaih chuan, ka chhe hle ang.. " a lo ti zawi sup a. Inmelh dun vawng vawngin an infawp leh ta ringawt.. Minute reiloteah, Sasa chuan, "Kan tizo chiah sia aw.. " a ti awr awr a.. 

"Ka kham hleinem" Mapuia tih zawh rual chuan tawng lo vin chet an la leh ta sawk sawk a.. 

(Ka pms a maw. Ka â tep.. Ka hne.. Engkim hi.. Min hrethiam ru aw.. Ka ziak peih chang chang a ni e 😢