Thutiams2-15

THUTIAM (S2)- 15

Ziaktu: Toni Râlte

Rinliana hi a pian leh murna chu Pukpui a ni a. A tet lai chhung zawnga a hriat chian em em chu a pa zu ruiin a nu kut a thlak thin thu a ni. Farnu pakhat a nei a, a farnu leh a nu chuan a pa kut an tuar thin. Ani erawh mipa a ni a, a pa chuan a duat ve deuh ber. Hun a kal zel a, Zotlangah a pa hna chhete hmun vangin an pem phei a. Veng mawngah mi zawng zawng kawmthlangah an khawsa a ni. School a kal ve zel a, an retheihzia ngaihtuahin lehkha a thiam theiin an class-ah pakhatna a ni char char thin. A pa pawn a chhuang reng a. Tum lian tak a nei ve a, zirna chu chhunzawm zel a, hna pangngai ve tak thawha a nu leh a farnu te nena chenho a ni. A pa hian kutthlak ngai lo mah se, a nu leh a farnu chunga a nunrawn êm vangin a hmangaih hleithei lo a ni ber mai. Tin, a pa hlawh beitham tak chu an chhungkaw tan a hnenhnanpui awm lem loh, a nu chu mi inah inhlawhin, insuk te, buh thlei te leh a dang dang a thawk thin. Mi khawngaih a hlawh a, a thawh phu loh hlawh a lak chang a tam mai. Chung a sum hmuhte hmang chuan a fate chu a chawm a ni ber e. Rinliana chuan a retheihzia hriain thahnemngai takin zirna chu a chhunzawm ve zel a. Uniform a chhiat bik vanga enhran leh a thiante ngei pawhin an diriam chang a awm thin. Chungte chu a tuar ngat ngat a; lehkha zir nasatah a tlak a, Pawl 10 phei chu top 3-ah a lang ve hial a ni. Tichuan, class ix leh xii chu BHSS-ah lutin science a la a, hetah pawh an zirtirtu ten a thahnemngaihzia hriain an duhsak a, hmuhsit leh tihduhdahna chu a tawk ta vak lo. Amah intitlangval rual a lo ni ve tawh bawk a, school chawlh niah a inhlawh ve thin a. A sum hmuh ang angte chu a khawl ve zel a ni. A zirna senso a sang chho ve zel si a. 

A tawi zawngin Class xii pawh tha takin a zo a, College a kal ve dawn ta reng mai. A pa erawh zu in a seh nasa tawh a, mi pangngai a pha zan tawh lo thung. A nu hriselna a tlahniam ve zel bawk nen. College chu zing lamah a kal ta a. Chhunah hna a thawk thin. 2nd year a zir laiin Zoteii nen an intawng ta a. A vawikhat hmuhna atangin Zoteii zunah chuan a uai nghal hnâwp a ni ber e. Zoteii lah ngaihzawng la nei ngai reng reng lo tih takah Rinliana'n a han mitmei chu a lo tuiral hneh ve hle mai a. Zoteii awmna te in saknaah Rinliana chu inhlawh nitinin Zoteii nen pawh hun tha an nei ta fo mai. Mahse, Zoteii chhungte chuan an lo hre ta si a; Rinliana chu an lo duh awzawng lo mai. Ni e, a la rethei bakberh ve êm bawk a ni. A nu leh pate lah an chhuanawm em em si loh a. Buaina chu an hmachhawn chho ta reng mai. Rinliana lahin Zoteii chân chu a hlau si. 

Tlai khat Zoteii thiannu te ina an inhmu ru chu Zoteii pi te chuan an rawn zawng tih an hre ta a. Zoteii a thlaphang em em a, Rinliana chuan a khawngaih si. Ama lamah rinchhan tlak la awm lo mah se, Zoteii a khawngaih vangin an tlan dun ve ta ngawt a. Kalna tur lah an hre chuang lo, Rinliana te inah an awm ve ta ran a. Mahse, Rei an innupa hman lo. Zoteii chhungte chuan, "Palai te pawh rawn tir ula.. Pangngai takin in la invuan ve ang chu" tiin an thlem a. Zoteii chu an hruai haw ta a ni. Mahse, An hruai hawn zan la lain Zoteii chu Hnahthial lama an chhungte hnenah an thawn phei ta rap mai. Rinliana'n a lo hriat chuan a thinrim rilru na chu Zoteii pi te in hal a tum hial ngje nghe. An chanchin pawh a than nasat phah reng a ni. Tichuan, an inkar chu tawp angin a lang ta. Mahse, Rinliana a la beidawng awzawng lo. 'Nupui pakhat bak neih ka tum lo' a ti hmiah mai a. A zirna chhunzawm lehin thi leh thau pawlhin a bei chho a. Mahse, a rilru natna leh tawrhna khan a ni lo zawngin a hruai peng ve lo thei lo va. Zu in a ching chho ve ta tlat! Zirna erawh a la chhunzawm reng thung. 

Hun tam a liam hnuah Zoteii pawn pasal a nei ta hial a. Rinliana erawh mitthi ruang zai hna thawkin hna pangngai tak a thawk ve ta chu a nia. Zu in pawh a la ching zeuh zeuh. Zoteii awmna hmun leh pasal a nei tawh tihte a hre chho a, Zoteii a dem hauh lo. Mahse, neih let leh erawh a tumruh hle. A nu leh pa am boral tawh a. A farnu lah a thlawi bawk. Mahse, ngaihtuahawm tak a ni hran lo. Sumdawnna te a khawih ve bawk nen. Tichuan, hotute berawnin Hnahthiala insawn a dil a. A vanneih asiamin a hlawhtling hlauh mai. Hnahthialah chuan a awm ta. Thla hnih vel a awm hnuah Zoteii nen an inhmachhawn leh ta a. Kha ta Zoteii hmel landan tak kha aw! Ramhuai a hmu emaw tih mai tur a ni. A tirah chuan a ţang nasa a, pasal a neih tawh thu leh fa hial a neih tawh vanga a let theih tawh loh thu te pawh a sawi. Mahse, Nupui pakhat bak neih tum lo Rinliana tumruhna a tiderthawng eih lo. Zoteii a hmuh a hmuh fo takah chuan zawi zawiin Zoteii pawh a nem chho ta a. Lehlamah a tawn hmasakber engmah a nih loh lai pawha a tana ding ngam kha a ni ve bawk a. Rinfela hi chu a chhungte tihluihna vang deuha nei a ni ve bawk nen. An inkar chu a alh chho leh tan ta a nih kha.. 

Pi Sangi khan thui tak an kal tawh hnuah a hrechhuak ta hlauh mai a. Khami zan Remsanga te ina a leng haw lam kha Zoteii leh Rinliana te an inpeng thingbuk hnuaia an inkuah lai a phawk ta tlat mai. Ani fimkhur thiam ta lo chuan thawm a lo nei ve bawk si, Pi Sangi'n a hmu tih an lo hre lo thei lo va. Zoteii a haw vat a, Pi Sangi pawh a rawn haw ve nghal. Thil dang an sawi hmain Zoteii chuan an pa chu a mutpui ta daih a. Pi Sangi pawh chuan Zoteii awm loh hlana a fapa chu hrilh a tum ve reng reng a, a chhan chu Zoteii nen boruak eng emaw an lo neih zeuh zeuh tawh avangin a fapa chuan a thusawi nazawng a awih a ring lo a ni. Mahse, khami zan a mutthilh hnu lawkah khan Rinliana leh Zoteii te inthurual chuan tho leh tur awm lovin an rekhlum ta a ni. Damdawi a dunlop hnuaia awm kha chu Pi Sangi hian mutthilh theih loh chang a neih vangin a rukin a tui lum inah a pawlh zeuh zeuh thin. A faten an hriat erawh a duh lo. A ruang postmortem an hlauh vangin Zing vartianah Rinliana chu thihna chhuanlamin a zin ta daih a. An him ta phawt. Remi kha chu a nu leh Rinliana kha rinhlelhna a lo nei ru sa nge ni, a nu kha a lo zui ru chu niin, an man chhuak ta si a. An rekhlum leh ta ringawt mai a ni. Tichuan, hmawng kungah khan zanah Rinliana khan a zuk khai ta a ni. Hlauh tawhah chuan mihring hi a lo chak theih viau mai. An tum vawrtawp erawh a thleng hman ta lo a ni e. Hmangaihna vang veka thleng a ni ve miau a. Anmahni rilru atang chuan an demawm hran loh e. Mahse, tualthah thubuai vangin damchhung lungin tantir an ni dawn ta chu a nia. Ni e, Rinliana tan chuan nupui pakhat chauh a awm reng tawh dawn a ni. 

Nguri te nun pawh a hahdam chho ta a. Chutihrualin Rinfela chu puibawma ngaihven a ngai dawn tih an hai lo. Remsanga te leh Dini te pawn an thlithlai reng ve a, Amah Rinfela a inlak sehhel ve êm vangin ngaihtuahawm lutuk ang chuan an la lang rih lo. Mi lainat an hlawhin thenawm khawvengte pawn an rawn ţawiawm ţha em em reng a. Malsawma rawlthar a ni chho tan ve bawk a, an te ber Remrema pawh thil hrethiam lo rual a ni tawh bik lo bawk a. Malsawma chuan a pi kha a nu ang maia a lo neih deuh vangin a nu leh a bialpa ten an tihlum tih a hriat chuan a thinrim em em a, a nu pawh a huat phah reng bawk. A pa a khawngaih a, a thiam ang tawka hnem a tum ve nasa hle. Remsanga fanu Seni'n an khawhar mangan lai chhung zawng chu a rawn awmchilh bawk a. Ani a mawng a zangin in chhung khawsak relah pawh Rinfela chuan a ring deuh tawp a ni. An in a lian ve si a, an pafa thum tan ringawt chuan a zau lu deuh bawk a ni. Rinfela chu a langah chuan tuar lo awm leh patling tak angin han lang thin mah se; a mut hmunah erawh a rum ve fô a, a fate hmakhua chu a ngaihtuah ber pawh a ni lo. Pathian zarah hlawh chhete a nei ve a, a in pakhat zawk luah man lah a tlem chhe lo bawk. Sum leh pai chu a buaina a ni lo. Mahse, kha chen rinawm taka a lo vawn tawh a nupui ngeiin phatsan mai duhtawk lo va a nu leh a fanu nunna hial a la thei chu a hrethiam thei ngai dawnin a lang lo. Mak a la ti reng a,,rinhlelh chang lah a ngah. A nupui a hmangaih luatah Rinliana zawk te chu a han mawhpuhin thiam loh a han chantir nasa zawk thin naa, uirenu hmel a mitthla leh lo thei thin lo. Amah lainata hnem tumtu te chuan, 'I la tlangval a, nupui dang nei leh vat rawh. I fate hian nu an mamawh' tih thu an chham khum thin. Mahse, chung thil chu a haw rih. Chuti maia danglam thei mihring a nih miau loh vangin. Mahse, a hma lam hun erawh Pathian kutah a nghat ve tawp mai a ni. 

"Happy Birthday.. Terin" Muanpuia chu a melh reng ringawt. A hmel dam thlup leh chauh hmel lek lek kara a mitmeng nung sár te chuan hmuh a tinuam ngawih ngawih. A kutah chuan gift lian vak lo a keng a. A hamhaih atalángin, lak mai nachang pawh a hre lo a. 

"La rawh. I birthday present a nih hi" a ti leh sup a. Zùm deuhin a la a. 

"Ka lawm e. Ka birthday a ni tih pawh ka lo hre lo va" a ti sap a. 

"Ka la hrereng alawm.. Hmana i sawi kha" a lo ti a. Inthlak turin a room lam a pan nghal. Terini chuan a thil dawn chu roomah luhpuiin thinphu dup dupin a hawng a. Silver ţhi hrawl ve tak, rit nalh mai hi a lo ni a. A man a tlawm hran lo vang tih a hrethiam nghal. A damchhunga a vawikhat nan thi chu a han awrh ve ta a. A vun no leh nem tak nen chuan a inrem kher mai. Darthlalangah chuan a inmelh vang vang a, a vanneihna kal tluang chho tan chuan a hmel pawh a kap eng sar mai. Muanpuia pawh a inbual sar sar a. A sam huh hlap mai tuai chhoh pah chuan darthlalangah a in en a. Mipa hmelchhia hi chu a ni mawlh lo alawm.. A vei nuih suk a. A awmdan chu naupangchhia riauin a hre leh nge, lai ru deuh chungin sahbawn chu a inhnawih mual mual a. A mitthlaah Terini hamhaih leh lawm hmel kha a rawn lang a. Zan hnih lai chu he Terini taksa suangtuaha hisap chung hian hun a lo hmang tawh tlat! Tihbo a duh a, zahpuiawm a inti. Terini chuan a taksa lang tam thei thawmhnaw a inbel ngai lo va, mahse, ni 3 kal ta khan a inbual zo towel chauh venga rooma a awm lai kha Muanpuia rawn hawin a fanu lawm tuma a va luh tumin a va hmu ta a. Kha ta a zak lutuk hmel te mawlh kha.. Khatah khan a taksa nalhzia a hre vek hman. A bawp sei thlarh te, a nghawng leh awm bawr var hai mai te kha.. A in thing nawk nawk a. "Mai mai a.. Ka ngaihtuahna hi hria se min ten ngawt ang' a ti rilru a. A inbual ta sawk sawk a. A inbual zawhah zanriah ei a hun tawh bawk a. An siam zui nghal. Candy pawh a nikhua viau tawh a. Mahse, a harh lutuk hi ven reng a ngai. Terini a hah phah thin hle. 

"U, ka lawm lutuk ania aw. Thi ka awrh ve vawikhatna. A to dawn sia" Terini chuan a ti a. 

"To lo e.. I inhmeh hle mai" tiin ngun zet hian a rawn melh a. 

Terini lai chu a sen ap ap mai. Candy lah engmah hrethiam ve hek lo, ama buai buaiin a lo buai ve a. 

An ei khamah a tifel leh sawk sawk a. Muanpuia erawh a fanu leh terini melh tawn chungin hahdam zetin cigaratte zuin a thu duai a. A thleng sil zo rooma a lut tur chu, "Terin, tihtur pawimawh i neih loh chuan lo thu ve lawk teh a" a ti sup a. Thuawih zetin a thu ve mai a. 

"Bialpa chu i la nei ta lo mi? " a ti hawk a. 

"Aw nei lo" 

"Ngati nge? "

"Ka hre lo"

"Nei suh" a inrin hmain a sawi. Terini'n a rawn melh kâwk chuan a sawi zo vek tawh si. "Aa.. Ka sawi awmzia chu, i duhzawng tak an nih loh chuan nei suh" a ti bah nak a. 

"Umm.. Nei lo vang" a lo ti fel leh diam. Sawi tur a vâng ta hle. 

"Umm.. I duh duh ti tawh rawh. Tlem kan lem lawk ange" tih leh rooma luh a rual daih. Upat tawh lamah a lai thar ve leh ta vel a. A nuam viau lawi bawk si a. Khumah thuin a ngawi run run a, Terini pawn Candy chu, "Ka pua ang che aw.. Hawh le" a ti lang lang a. An inawimu leh dawn a ni ngei ang. He nula tuaitir pawisawilo zet hi a kut atangin a chhuahtir thei lo. A theih loh, Candy chauh lo pawn amah ngei pawn a mamawh tawh. Mahse, tihnata tihhlau a hreh em em thung si. Ngaihzawng vawikhatmah la nei ngai lo chu engtin tak hneh ang maw.. Mipa zei tak a lo ni bik lo chhap nen. Lawmsanga rawn mai te a duh ta rum rum mai. A nau hi chu ani aiin a sehhel thei zawk a, zah te pawh a tuar chak deuh a. Hmeichhia hi a hneh thiam riau zel a. A la rawn ngei a ngai dawn anih hi. Tihi chuan in chhung khatah an cheng si a, a insum hleithei dawn hauh lo mai. 

"Engvangin nge ngaihzawng nei lo tura min tih le? " a mut hmunah Terini chuan a lo ngaihtuah ve mek! A room lehlam lawka mu mek mipa lian leh sang tak, police uniform inhmeh zet, dam thluam leh tihnat hlau taka dimdawih taka enkawltu chu a ngaihtuah lo bik reng reng lo. A thianten a nupui tur an zawnpui tih a hriata a nat veng vengna chhan kha a hrethiam chhoin a inhria. Mahse, Muanpuia chu a phu hlawl lo. Ani thingtlang nula, chhungte tlanbosan, nula mawlmang ve tak te chu nawmchen nan chauh te chuan a lo duh ve mahna. Mahse, nawmchenna atan ringawt chuan a inphal bik si lo. 

Inhlan tawn ngam si lo va, invei rukna thinlung neitute pahnih hian engtikah nge huaisenna neia thurûk chu an phawrh chhuak tak ang le?! 

Mapuia pawh a ke ringawt a ni bawk a. A taksa dang chu a tha viau a. Exam pawh a exam thei ta lo kha a nia. Final a la ni lo bawk a. Pawi a ti em em hran lo. Sasa erawh mitmei ven a ngaih ve si avangin a rawn riak ta rih lo. Nguri te an rawn thleng ta bawk nen, Nguri'n a riahpui a ni. Nguri'n Sasa a han hmu ve ta chu nula duhawm tak a ni tih a hre nghal mai. Sasa chu a zak ve tho nain Nguri zawhna te chu tha takin a chhang ve zel a. An inpawhna a tha chho khawp mai. Kar khat tling lo deuh an awm hnuah Mapuia ning tawh lutukin chhuah a rawt ta a. In lamah an inenkawl thei tho a, a ke dressing ngaiah lah an thenawmah nurse a awm tho bawk nen. An inla chhuak ta a. Pu Mawia pawh a tha thawkhat rih bawk a, chhungkaw kima an han khawsa leh ta chu an hlim viau mai. 

Exam zawh niah Sasa chuan Rki sawmin Mapuia kan turin an in lam an pan a. An in hi a vawikhat kalna tur a ni. Mapuia'n tih takzeta a sawm vang a ni pakhat a. Zep loh chuan a zám ru ve deuh. An kal mek laiin Rki chu a patea'n a lo bia a. A patea nupui Durtlang damdawiina awm mek a chhuah dawn vangin pui turin a lo sawm a. A patea te ina awm reng reng thin a nih vangin a pa tak te zawk ai mahin an inpawhna a tha zawk awm e. Kal lo thei lo a nih tak siah chuan amaha a va kal a ngai dawn ta chu a nia. A huphurh ngei mai. Sama tal awm ve se tha tur, ani lah exam an zo hmasa a, a ni te khuaah a lo zin daih bawk si. Nuam ti vak lo chuan a inkhalh phei ta a. 

Pi Lawmi'n a lo dawngsawng a. A fel hle. "A thiannu in a rawn kan ve bawk a, a roomah an awm kha.. Va lut ve rawh. Thingpui ka rawn siam ang" a lo ti siam siam a. Tu a thiannu tak ni ang maw ti rilru chungin Mapuia room lam chu a pan a. Kawngka chu a inkhar phui lo nain a chhung a va hmuh theih chuang loh a. Kik a tum zet a, mahse, mawlhtu a nei nge ni zawitèin a hawng a, a lut ta a. A thil hmuh avang chuan a ding chawt. A melh ta tlawk tlawk a. Khumah Mapuia chu muin, A lu leh bek vel chu Atei'n a lo chul kual mek vel a nih chu! Thikthua khat Sasa tan chuan palliam a harsa ve ang. A aw a thian kharh a. Mapuia a rawn meng nghal. Ateii pawh chuan rawn hmu vein, a kut erawh a lasawn eih lo. 

"Ehe! I lo thleng tawh law.. Lo kal rawh. I rawn thlen thu min lo hrilh tur alawm" Mapuia chuan a lo ti sawk sawk a. Sasa a la ding khawng reng. 

"Lo thu rawh.. Sasa, i va fel ve.. I lo kal ve a" Ateii chuan a lo ti a. Sasa thin a khei leh zak. A neitu zawk niawm hrima chutia a tawng vel chu a ngaithei thak lo. 

"Ka lo tibuai che u niin ka hria.. Ka kal leh zawk mai ang e" a ti chang fak a. A mittui a tlak loh nan a mit a khap sak sak. Mapuia tawng leh hmain room chu a chhuahsan a, Pi Lawmi'n a lo biakna pawh chu chhang mumal thei loin Mapuia te in chu a chhuahsan ta vang vang mai. 

Mapuia te ri hlut vang chuan Pi Lawmi pawh chu a va lut ve a. Mapuia chuan ke na chung chung chuan chhuah a lo tum chu niin, Ateii chuan a lo dang mek a. 

"Eng nge a awmzia? " a va ti a. 

Mitmeng nelawm vak loh hian, "Pi, khawngaihin min kohsak rawh. Sasa.. " Mapuia chuan a lo ti a. Pi Lawmi a bangbo teh e. 

"Eng nge a awmzia sawi phawt teh" a ti a. 

Ateii zawk chuan, "Pi, Sasa khan kan pahnihin min hmu dun sia, min thik a nih kha.. A pawi ka ti lutuk.. Keimah vang vek a ni" a lo ti dam thliam a. 

Mapuia chuan, "Ni e, i thiam loh vek a ni. A thinlung na hmel hmuh ka duh tawh lo asin" a lo ti nghut a. Ateii awm chu a nawm loh hmel kher mai. Nguri a rawn haw ve chiah. Thil dik lo a awmin a hre deuh nge a rawn lut ve nghal a, Mapuia chuan thil awmzia a lo hrilh a. 

" A va zia lo thin ve aw.. Engpawhnise, Ate, nang pawn nuam lo ti suh. Thikthu te chu a awm ve tur alawm. Zanah i be dawn nia.. " Tiin a hnem a. A rilru te te erawh chuan Ateii chu inthiam lo hmel ai maha thaw hawk hmel pu zawka a hriat vangin, "Sasa thinrim pawh a awm dawn anih hi" a ti thung. Ateii pawh rei awm loin a haw ve ta a. Mapuia erawh a tûm bûr a. Sasa a call tlang thei bawk si lo. Ateii khan a rawn kan dawn tih pawh a sawi lawk lo va, a rawn lang ve tawp kha a nia. Rei an thut hmain, Mapuia chu a lu a nat deuh vangin a mu a. "Ka lo hmet ang che" a tih vangin a lo dawh ve mai kha a nia. Sasa rawn hmuh atan chuan a duhawm fahran lo a ni. Ateii kha mi dang ni tal se chuan thuhran. Sasa nena boruak lo nei hat tawh a nihna pawh kha a pawi thui takzet a ni. 

"Naute, college chu ka bul atangin kal tawh mai ta che" Sangpuia'n a tih chuan, "Engtin" a lo ti hû a. 

"Xii pass la, innei tawh mai ang ka tihna a nia" a lo ti a. 

"Ehee! I va tenawm tak.. Nulat pawh ka la nulat loh hi.. Api chuan khawhar ina kal hman lo te hian pasal i nei ang e.. A zahthlak a tia sin. Khawhar inah pawh ka la kal lo" a lo ti hmarh hmarh a. 

"Nih chuan, mitthi in neih veleh kal tawh la" 

"Apa in a phal lo sa. Tlangval ka kalpui a hlau alawm" 

"I u zui mai la"

"Xii pawh ka la pass loh hi, ka pass hunah ka kal chauh ang. I hmanhmawh viau chuan mi dang nei mai rawh. Nulat ka chak ve nak alaia" a lo tihsan a. Sangpuia pawn nawr chi a ni lo tih a hrethiam. Mahse, he naupang hi a kut atangin laksawnin a awm ang tih a hlau em em a ni. Venhim reng a duh rualin a venhim hleihtheih loh in amah zawk hian khawvel tharah a liamsan si ang tih a ngaibtuah chang chuan a tâwt vek thei.. Tin, ngaihzawng vawikhatna nei hi an vâng viau si a, Nauteii chuan college te kalin boruak dang a han hip ang a, a rualpui mipa chhe lo leh zei tak tak ten an star ngei dawn a, a sava note hi a him reng chiah ang em? Chung zawng zawng a ngaihtuah avang ania inneih mai a duh tawh ni.. Ama lam chauh a inngaibtuah tih erawh a hria. Nauteii tana pasal neih ngawt mai harsat turzia a hrethiam ve tho.. Engpawhnise, He Hmangaihzuali hi a thlawhsawntir thei lo tih a pawm tawp mai a ni. 

A û hmel ngui zet a hmuh chuan mitmeiin a nu a rawn a. A nu chuan engmah sawi rih lo turin a lo mitmei thung. A u mood a chhiat hi chuan, amah pawh a ngui ve nghal zel si a. A pa huan kal a lo haw pawh chu a lo chiauau tha peih lo. Lawmsanga'n boruak a man thiam ve leh vat mai. Nguri a bekbawr sur sur a, aniin chhun lama thil thleng a lo hrilh a. A fapa bulah kalin, "Ekhai! Ka fapa, mipa i nih kha. Hmeichhia te chu an no a, han thinrim leh thutawp siam duh hial changte pawh an nei ve a nia. Mahse, a luhlul rei thei lo zawk an ni zel. Sasa pawh han thinrimtir rih la, a ngai leh ţêp tawh zawk ang che.. Khatin ngui bur suh. I mood azirin kan chhungkaw boruak a danglam vek zel a nia, i nau a hlim loh chuan tumah kan nuih theih loh hi.. I nauin a zui zel si che a" a ti a. A fapa darah a beng thak thak

"Ateii kha ka hua" a lo ti nghut a. 

"A pawi a ni. Beiseina a lo insiam chawp ve hman tlat si a. I chingfel thei em em ang. " a pa chuan a ti a. 

Mapuia mithlaah erawh Sasa hrilhhai hmel bak a châm thei lo. Tun tum zawng ama thiam loh vanga Sasa chu kal a ni tlat si. Awmdan a thiam meuh lo. A ngaih tehlul nen.. Zannah a call leh ta ngat ngat a. A la duh ngang si lo va.. Msg in, Ateii rawn kal dan leh an awmdan chu a va sawi a. A tawpah, "Duati, min ringhlel tih ka hria. Mahse, inthen kher a ngai lo a nia. Thutawp rawn sawi miah suh aw, ka nghak thei che. I thinrim reh hun" tiin a thlah a. 

Sasa pawn Mapuia msg a hmuh chuan a thaw huai tho. A rim laklawh ve rih si a, bakah Ateii'n a lo dawnsawn dan vel kha ani induhtawk ve tak tan chuan ngeiawm a tling ve bawk a ni. Inthen tumna rilru chu a pu bik rih hran lo. A tau ve rih a ni mai. Hei hi inngaihzawnna kawnga kan mamawh ber pawh a ni. Thenkhat te inngaizawng hi chu thinrim hleka inthen rawt nghal zel, thutawp sawi nghal zel hi kan awm thin. A hnuah kan inchhir leh châwk. Thutawp sawi nghal loh, hmanhmawh miah loh hi tlawmna a ni reng reng lo.. Thinrim apianga inthen zel dawn te chuan thinrim hi a tingaihnawmtu a ni tel thei ngai lo vang.. 

"U, Candy a luak vak a. Lo haw mai teh" Terini thlabarzia chu a hai hauh lo. An buai lai a ni lo hlauh bawk a, an sir hnenah va sawiin hmanhmawh takin a tlan haw ta a. Terini a fing fel hlauh a, Nguri te call nachang a lo hria a. In a zuk thlen chuan Nguri leh pi Lawmi te an lo awm tawh a ni. Candy chu nizanah pawh khan a pang a lum deuh a, nachhawkna an pe ta ngawt kha a nia. Chhunah Terini'n zo chhang a kang a, chu chu a ei ve a. A ei atanga rei loteah a luak ta vak a, a pang rawn lum leh nghalin a kaih titih ta hial a. A mangang ta a ni. Rang takin damdawiin lam an pan ta nghal a. Terini phei chu a ţap par mai. Muanpuia pawh a thaw a sa ve phat phat a ni. Doctor leh nurse ten an han en nghal vat vat a, nachhawknain an jection nghal bawk. A tap tawh lo va, luah tur pawh a nei tawh lo aniang, a mu hlawm reng a. Men pawh a meng peih der lo. A lainatawm reuh tak tak a ni. 

"A chhang ei kha a allergy a nih dawn hi.. Tin, khawsik a lo nei sa nen. A taksain a zo lo a nih hi. Kan han enkawl ang a, test neuh neuhte kan nei ang a. A tha vat mai ang" Doctor chuan a ti a. Tlem chuan thla a muang deuh. Terini chuan inthiam lo zet hian, "Chhang kha a hua tih ka hre lo reng reng.. Ka hre lo tak tak a nia aw" a lo ti tham chhal a. 

Nguri'n, "Umm.. I hre lo vang. Nauteii pawh hian a ei tam thei lo. A vual vak zel. Hlauthawng suh. A tha leh vat mai ang" a lo ti dam diai a. Candy chu an admit ve ta phawt. Terini bak riahpui tur an awm chuang lo. Muanpuia pawh a pate in lamah chaw a ei phei a, khaw thim thet thetah Terini chaw pe turin a chhuak a. Ward a luh hma deuh chuan nurse pakhat hi hmanhmawh deuhin naupang ward lamah a tlan phei hlak hlak a, a ngaih a lo tha lo ve ringawt. Thawm ri hak a hre zui ta bawk. Mahse, a rin loh lam daih a ni. A nupui hlui Saii chuan Terini chu a lo kek chawt chawt mai a. Thinrim zet hian, "Ka fanu hi hrai hlum i tum a nih hi.. Zawngi, ka fanu chu hnawk i va ti awm ve. Candy pa i neih theih nan tiang hi i ti tiraw? " a lo ti piap piap mai a. Mi dang awm ve te chuan an pawtsawn thei hram. Terini erawh khum bulah a ding ran a. A tawng ve lo. A mittui erawh a tling piau thung. 

"Eng nge i hriat a. Saii.. Khatianga che tur kha i ni lo asin" a va ti a. An rawn en thup mai. 

Saii chuan, "Engmah i hrethiam lo em ni? He i awmpuinu hian kan fanu tihhlum a tum a nih hi.. " a lo ti táwn tâwn a. Muanpuia chuan hmel danglam hlek lo hian, "I enkawl peih loh i fanu enkawltu a nih avanga i lawmthu sawina chu a dangdai hle mai.. Tin, Candy hi i rawn hauh ve vak a tul lo ve. Mamawh i ni lo. Saii, chhuak rawh. Vawikhat pawh Terini chungah khatiang kha ti leh tawh suh ang che" a ti nghet charh a. Thinrim hmel a pu lo. Terini lam chu hawiin, "I riltam tawh em? Kha chaw hi ei rawh" a ti a. Terini pawh chuan a lo la vat. A tah a chhuah hmel ngawih ngawih. Saii engmah tithei tawh si lo, thinrim leh an pa hlui laka eng emaw tih la duh si chu a insawh nghawng nghawng a. 

"Ka fanu hi ka lainat em mai. Tisawn an pahnih sawn an thlim ziah chu a ni awmsia.. Muanpui, ka fanu hi dam se ka rawn la ang" a ti ve ngial a. 

"Hehe.. Tum chhin rawh.. I duh phawt chuan.. " a lo tihsan hmiah. Awm ve dangte pawh chuan Saii landan leh tawngkam atang chuan an nupa inkar vel tur chu rin dan an lo nei ru fur a. A fapa lo awmpui ve mek an khum piah lawk ami phei chuan Muanpuia chu a thlek ngun viau. Nurse te chuan Saii chu an hruai chhuak a. A la áng char char mai. Mahse, Muanpuia te berin an bengkhawn duh si lo. Thinrim tak a ni. 

Terini chuan chaw chu a ei sawk sawk a. Candy erawh a muhil a. A pa chuan a thlir ngawih ngawih mai. A fanu hi a hmangaih a, han duat vak dan erawh a hre lo. Terini hi a ring mah mah pawh a ni maithei. A hnathawk bang a chau thin si a, a fanu nen hun an hmang dun khat ta hle tih pawh a hrechhuak. A inthiam lo ru hle. Terini ei khamah rei vak lo a thut ve leh hnuin a haw ta a. An inbe tlem viau, Damdawi lei nghal a ngaih vangin gate thleng an inzui a. "Saii kha engahmah ngai suh aw. Kei leh ka fanu tan chuan i hlu ber a nia" Muanpuia'n a ti a. 

A chhang lo. Rilru kim lo ţeuhin Muanpuia pawh a haw. Terini chu a lungawi lo nge a hre lo. A chhang si lo kha a la na tawp. Mahse, a tan chuan sawi tur a vâng ve bawk a ni. Terini a han chhoh leh chuan an khum bula a fapa kum 4 mi awm vel awmpuitu Mamawii chuan a rawn bekbawr ta vat a. Chanchin te inzawt tawnin, Mamawi chu nuthlawi a ni a, a pasal chhungten an ngeih loh vanga inthen ta angin a insawi. Nu lian lam, vun mam tak, ngo hluak ni si lo a ni a. A sam a buang tháng a, inchei fai peih tak leh inenkawl uluk tak niin a lang. Terini pawn chutia kawm tur a nei thar ta chu a lawm ve hle. 

. "Candy pa maw.. Nichin mi kha? " Mamawiin a tih chuan a bu nghat a. 

"Ka hmuh tawh hnu a ang tawp.. Mahse, ka hrechhuak thei si lo va,. In pathum chauhin mi in awm? " a ti sar sar a. 

"Umm, an inthen ta sia, ka la awmpui ve zel a nih hi" a lo ti mai a. 

"Nia, i tangkai ngawt ang. An pafa ringawt te chuan awm ngaihna a awm dawn si lo va. An nu hlui kha a nasat ve hmel tawp," a ti leh a. Terini erawh chuan saii chu hrechiang hle mah se, mi hrang bula han sawi chiam kha tul a ti lem lo va, "A sual hran lo, mahse, aa.. A thinrim ve em anih kha" a ti ta ringawt a. 

"Neih a tum tawh lo mi? Candy pa khan? Eng nge an inthen chhan? " a ti lehzel a. 

"Tum tawh lo aniang. An inthen chhan tak ka hre bik lo" a lo ti leh tawp. Uire vang a nih thu chu sawi a tum bik lo. Mamawii chu a tawng duh viau a, kawm pawh a nuam viau. Mahse, Muanpuia chanchin a zawt nasa ta lutuk chuan Terini a tihnual ta deuh. A ruka a lo vei ve ngawih ngawih, amah aia boruak ngam leh zei zawkin a lo ngaihven ve chiam chu a lawm lo ve tawp. Muanpuia lah a fanu chanchin ngaihvenin a rawn kal fo dawn si a, an inbe pawp ang a, Mamawii hian a kai peng daih ang tih a hlau a ni. 

"Ka thinrim tawh lo aw. Morning" Mapuia a nui var var mai. Zan khat a tihtauh hlek pawn tawrh a har ania. Chutia a rawn lungawi leh ta chu lawm lohna chi a ni lo. 

"Yes, ka van lawm..vawiinah min rawn awm rawh aw.. Please" a va ti ve zat. 

"Ka tum ang. Tumah lo awmpui tawh suh" a rawn tih chuan, "Yes boss.. " a va ti thlap. 

Ateii erawh a awmhmunah a hma nia Mapuia nen an awmdan te kha a ngaihtuah let a, nuam a ti veng veng mai. Khatia a khawih thei ringawt pawh kha a lawm. Sasa lah a titau bawk si, hetia a tihtauh lai tak hian a tan chance a awm a beisei ve hle a ni. Mahse, Mapuia'n a msg a chhang duh miah lo chuan a tihnual deuh. 

"Min haw viau mi? Pawi ka ti lutuk.. Sorry ka tih tawh kha" a va ti leh a. Chu erawh a rawn reply ve e. Mahse, a lawmawm vak loh tlat. 

"Its okay.. Mahse, inbe tawh rih lo ang. Thian anga min en theih hunah erawh englai pawn ka biak theih e" tih chhanna chu. 

A lunghnur takzet. Chet lak dan a hre ta lo. Dam lo der ve dawn ta se, Mapuia a la dam chiang si lo. A rilru a buai ta hle.. Shalomi a be leh ngawt mai aniang chu.. A niin tihdan a hre leh êm ang chu maw.. 

Nguri te nupa huan kal tur pawh an insiam mawlh mawlh a. Chawlh a nih tawh hi chuan huan lam bak an ngaihtuah meuh lo. Nauteii erawh Candy kan turin a insiam thung. Terini han chhawk pawh a ngai ve reng reng bawk a. Candy in a ngaina ve tho bawk a, an buai em lo vang chu. Mapuia erawh chuan a bialnu a nghak ran thung. 

"Khaw nge maw ka tuthlawh ken lai kha ka dah le.. A va mak hmanhmawh e aw" Lawmsanga chuan a ti nuah nuah a. Chhuar hnuai leh store room te chu a va bih leh dak dak thin. Nguri chuan an pa chu rum zetin a lo melh a, "I hmu mi? Khatia mi melh leh raw raw? " an pain a tih chuan.. 

"I koki-a i bah kha eng nge a.. " Nguri'n a lo ti ram hmak. Tla lek lek hian a kokiah tuthlawh chu a lo inbang chu niin, nui hawk hawk chungin a la thla a. "Kan upa ve tan aniang, ka haihawt ve tlat tawh" a ti a. 

"Haihawt te chu ngaihpawimawh loh vang mai mai alawm" an nuin a tih chuan a chhang tawh lo. An inpeih hnuah in chhuahsanin huan lam an pan zui ta a. Vaivakawn an thlen chuan, Traffic point piah lawka dawrah an ni Sangi thil chah an va la a, Dawr neitu Pu Makthanga te nen inhre sa em em an ni. Lawmsanga chuan a va la a, Pu Maka chuan a lo be luam a. Nguri pawh a rawn lut ve zuai, an ri hlut a. Lawmsanga erawh a awmdan a dang riau, A hawi deuh hu hu ni mai hian a lang a. 

"Service leh mai rawh. Huan lamah i tei thla vut vut ringawt a.." Pu Maka chuan Lawmsanga melh chung chuan a ti a. Lawmsanga chuan lo melh hu chungin, "Eng chu maw" a lo ti pek a. Nguri'n a rawn melh zawk. Customer an rawn luh tak nual avangin an chhuak zui ta nghal a. Motora an thut leh hnuah, "Eng nge maw i hriat ni? Khatia i chhan hu hu a? " Nguri chuan a ti a. 

"Eng nge a sawi awmzia ka hre hleinem. Amah pawh kha a hming ka hre lo.. Tu nge khah" a ti ta mai a. A fiamthu a nih ringin Nguri chuan an pa chu a melh vat. Mahse, Lawmsanga mitmengah uanthuanna reng reng a lang hauh si lo. 

"Lawmsang,.. " a ti ringawt a. Ani lah chuan hmalam a lo melhsan daih. 

"Ka pasal hi a dik miah lo.. Eng nge thleng le?!ni lo.. Hetiang tur a ni lo" Nguri chuan a ti rilru mawlh mawlh a. 

(Tawk mai tej se.. Ka kutzungpui veilam ka ti ât a. Type a har ngat ngat khawp mai. Hmelthaho.. 😘