Thutiams2-14

THUTIAM (S2)- 14

Ziaktu: Toni Râlte

Police station an thlen chuan, Nguri chuan thil awmzia chu a sawi ta malh malh a. Rinhlelhna a neih te a fiah chhoh dan leh a nu room-a damdawi a chhar thu te thlengin a sawi ta a. An case IO Pu Pianpuia pawh chuan a ngaithla uluk hle. 

"Tunah hian ka u hi an target leh mek niin ka hria a. Amah a in veng thei rih a, engmah a la thleng lo niin ka hria. Mahse, kan chet hmanhmawh deuh chu a ngai a ni" Nguri chuan a ti sap a. 

"Finfiahna kan nei chaurau riau a. Hmanhmawh ut uta chet lak pawh a rem lutuk lo mai thei. A hmasa berah chuan an pahniha enthlak a ngai ang. I u chuan a nupui enthla se, kei ni lamin Rinliana… Man chhuah a har lo khawpin ka ring" Pu Piana chuan a ti a. 

Nguri pawh chuan a thusawi chu a pawm tho mai. Chet han la vak dawn se, an ni lam an lo ţan ve tlat chuan finfiahna an nei lo ang a nia. An bet zawk thei ve tlat a ni. Chutianga thuthlun ruk nei chung chuan an haw leh ta phawt a. Rinfela biain Remsanga te ina rawn chhuk lawk turin an ti a. 

Kar loah ani pawh a rawn chhuk ta a. A hmel phelh phang leh a mit hnuai val deuh te chuan mut a hmu tha lo tih a tilang chiang hle. 

"I nupui chungchang ka ngaihven chhan hi sawi a hun tawhin ka hria a" Nguri'n a tih chuan, "Ka hre vek tawh alawm" a lo ti sup. Mak ti zetin an melh hlawm a. Hah hmel zet hian a lo thaw hulh thung. Chutah zan lama a thu hriat leh a nupui chet dan te chu a sawi fai ta leng a! Remsanga a sa phat hman a. Nguri'n a khap dai thei hram. 

Rinfela chuan, "Tin, tukin tukthuan ei kham mi dang awm loh lai khan, Ro chungchang vel ka tifel tawh em tih min zawt a. A hminga in leh lo dah turin min ti bawk. Tian a tia, "A hma pawn ka nu atangin in buai tawh a. Buai ka duh ve lo. A mualphothlak si a, tin, Dini te nupa lah an huamhap sia, zan khat mit chhin te lo tawk ta la, ka fate nen hian min hnawtchhuak duh maiin ka ring. Ka mi chuanzia leh ka fahrahzia i hria a, vakvai tura min kalsan chu i duh bikin ka ring lo. I pain i tana a dah in leh lo saw chu Malsawma te tan dah la, tuna kan awmna erawh ka hmingin dah la ka duh' a tia. A rilru chu hre vekin ka inhre tawh a ni. Tin, an hmanhmawh hle bawkin ka hria" a ti ta a. 

Nguri pawh a thinrim chu a sen ţan ţân mai. A monu Zoteii nihna dik tak hailan a nih takah chuan kan pawnlam landanin kan chhungril nun a lo thup theihzia a hre chhuak uai uai mai. 

"I fimkhur hle a ngai a nia. Engmah rinhlelhna nei miah lo angin i la awm a ngai. I ringhlel tih i lantir zeuh chuan kan hling hman lo palh ang.. Emaw i nunna thlengin a tuar thei ang. Han haw la, vawiinah Zoteii a chhuah leh chhuah loh lo ngaichang reng ang che. Mutthilh pawh a thiang lo a nia.. Ka nu leh Remi te thlarau avang pawhin kan ţan tlan a ngai a nih hi" Nguri chuan a ti dap dap a. An pawm hle mai. Remsanga erawh a thinrim em vangin tuna hlin mai a duh thu te pawh a sawi nasa, mahse, Lawmsanga'n zaidam takin a lo khap thung. Heng zawng zawng zinga na leh tuar ber erawh Rinfela a ni lo thei lo. A nupui duh taka a neih, fa pathum lai hrinsaktu ngei khan a phatsan chu a ni si a. Chu mai piah lamah a nu leh a fanu ngei pawh thihna khura nawrliamtu a ni ta bawk si. A han ngaihtuah hian an nu nungchang danglam awm hun vel chu hriain a inhria. An fa naupangber an neih hma kumah a nih nghe nghe kha. A nu a hmu mawh tan a, phone a hmang ngun viau zel bawk. Mahse, chutia a danglam a chinah a pasal chu duat sa lohin a duat leh thung lawi a! Rinfela te ang, pa awm mual mual, ngaihtuahna thui nei vak lem lo tan chuan chutia an nu rawn insiamthar chu nuam ti taka lo dawnsawn bak kawng dang awm hek lo le.. A nu a hmumawh thin tih mai loh kha chu an nu mize inthlak kha a lo lawm viau hman zawk a nih kha.. Mahse, Rinliana nen an lo inkawp ruk vang vek a lo ni zawk si. Chhunah hnathawkin a chhuahsan a, a nu nen in an lo nghak thin kha a nia. A nu khan a mo kha a hek ngai miah lo thung. Zoteii erawh chuan mut hmunah a nu lenchehzia, in lama tihtur a hriat lohzia a chham khum fo a, ngaiah a nei hman hial ngje nghe. Mahse, a nu kha mi lenglam vak a ni miah lo. A tute bulah khan a tlei tawkin Malsawma tan phei chuan nu a ni ringawt zawk kha a ni si a. 

Rinliana pawh a awm mai mai bik lo. Nguri hnawhbo dan kawng a la dap ve ngar ngar tho mai. Aizawl lama a thianpa, Thawk khat laia sum leh paia a lo tanpui tawh kha be pawpin, Nguri address te a va hrilh a. 

"Thianpa, ka thiltum min daltu a ni tlat mai a. Amah tihnat ka hreh si. Min puih a ngai a ni. Fa pahnih a nei a, a fapa emaw a fanu chungah khan eng emaw tak kan thlentir a ngai. Mahse, chhiatna tawpkhawk erawh ka duh lo. Nguri hi Aizawla rawn haw lo thei lo va siam ka duh mai chauh a ni. Lo ngaihtuah teh" a va ti a. A mamawh laia lo pui tawhtu na nâ na chu a lo palzam thei awzawng bik lo va. 

"Theihtawp ka lo chhuah ang. I laka ka ba pawh ka rul pah a ni mai lawm.. " a rawn ti a. Rinliana pawh a khi ve suk mai. He Rinliana hi a lan danah pa tha leh zaidam pui mai, thian kawm thiam tak a ni a. Ngainat pawh a hlawh ngiang reng a, Hnahthiala a rawn awm hnuah pawh hian chhungkhat ang deuha neih a nei nual tawh a ni. Hnahthiala a rawn awm chhan a tihlawhtling teuh tawh viau a, mahse, Nguri hi a rawn tlazep ta tlat si. A khawih tel lo thei ta lo a ni. 

Pu Mawia treatment lak a hun leh tawh vangin an nu nen Zemabawk an pan leh a. Zan riah erawh an tum lo. Nauteii erawh inah awmin a insu turh turh a. Chhuat te nawtin a zai rat rat mai. Mapuia chu an class ami an thianpa nu vuinaah a kal thung. A insuk zawhah tukverh darthlalang a nawt leh a, ear phone vuahin a zaipui ve sasawi a. Tumah an awm lo hlauh a, nui an awm lo a ni mai. Tukverh thlanglam a nawh hliau hliau lai chuan Sangpuia'n a lo video call a, phun hlak chungin a laksak hram. Tawnzau leh boxer nen chauh a awm si a, "I va inha bul ve " a rawn ti nghal chiah. 

"A lum alawm" a ti a. 

"I bulah ka awm chak.. " a rawn tih chuan, "I hur e a" an ti leh thawr a. A hahthlak thin. 

"I ngaihtuahna a hriat em mai.. Hmangaihzual" a rawn ti ve a. 

"I ngaihtuah kha ka ngaihtuah lo zawk aw" te chu a la ti ta deuh deuh. Sangpuia nuih hi a za thin mang e. An inbiak fe hnuah Sangpuia chuan a rawn thlek chiang deuh a, "Duati, tu nge i hnunga ding kha" a rawn ti ta mai. Nauteii a hawi let rang ngei mai. Tumah a hmu bawk si lo, hlau zetin a phone chu a tlan chhuahsan daih. A pi te inah a tlan lut. 

. "Ngati nge? I va thlabar hmel ve" a pi Sangi'n a lo tih chuan, "Thlahrang a awm. Kan inah" a ti a. A thaw hlawp hlawp. 

"A va awihawm loh e aw" a pi Sangi'n a tih chuan, "In awih loh leh rawn kal ula.. Ih, Kan invid call a, ka hnunga ding a hmu alawm" a ti a. 

A cousin Felina chuan, "Tu nen nge in vid call" a lo ti a. Sangpuia hming hi a sawi hreh thin si. 

"Ih.. Mi te te nen" a ti niah niah a. A pi Sangi chuan, "Lo kal teh. Chutia nula a pumpa in atanga rawn tlan chhuak khawpa siamtu che chu eng nge a nih va en ang" a lo ti a. A pi hnungah biru deuh titihin a kal a. An va luh chuan a phone pawh a lo la let bal a. Pi Sangi chuan room tin a lut lawr a. 

"I biak khan a tihthaih che a niang. Hman atang tawhin kan inpui hi a hrâng ngai lo. Bum theih hian khawsa ziah suh" a ti hlak hlak a. Nauteii hlauhna pawh a bo ta deuh. A phone chu lain Sangpuia msg a chhiar nghal a. 

"I va â tak e aw.. Nge maw phone te chu i tlan chhuahsan le.. " tih a ni. 

"I mawl hmuar em anih kha.. Khatiang insawi thaih chi a ni mi? Min lo be tawh bawk suh" thinrim zetin a va ti a. A rawn call nghal zat. A reject hmak hmak mai. Tûm burin darthlalang chu a nawt fai leh a. Number dang a tangin call a dawng leh a. Sangpuia tho a nih ringin a la lo phawt. A rawn rik leh takah chuan a pawimawh a nih ringin a pick up ta a. 

"Naute, keimah Sasai, i nute number ka nei si lo va, i û in accident a tawk a" thlaphang zeta rawn titu aw a hriat rual chuan a hit mup mai. A khur titih a. "A u chu engtin nge a awm? A thi lo tiraw? " a ti nghal chul a. 

"Aih thi lo ve. Tunah Civil Hospitalah a awm a, a ke ruh hi a tliak a ni maithei. Chubak chu hliam a nei vak lo. Lo thlaphang lutuk suh. I nute hrilh rawh aw. I u phone hi a tlukna lamah a chhe daih aa.. Lo lungngai lutuk suh. Hei kan tam mai.. A thiante" a rawn tih chuan tlemin a awm a nuam ta deuh. A khur erawh a la reh fel chiah lo. 

A nu number a hmet chhuak a, a call nghal. A la lawk thei lo lehnghal. Hah hmel angreng tak hian a lo la a. 

"Aw bawihte" a rawn tih rual chuan, "Nu, a ù a accident. Damdawiinah a awm. A ke a tliak" a ti nghal zawt zawt a. Nguri hamhaih erawh a ngawi det. 

"Engtin..? Tunah a bulah i awm em? " a rawn ti dam thlap. 

"Awm lo e.. A bialnu khan min lo bia alawm. Engtin nge ka awm dawn, Nu, a pute an awm bawk si lo" tah chhuah hmel zet hian a ti a. 

"Tunah i pa nen kan insiam ang a, kan lo haw nghal ang. I pite chu keiman ka lo hrilh dawn nia. Insiam la, Sangpuia kha sawm la, i u bulah va awm rawh" a rawn ti ta a. A nu sawi ang chuan a insiam sawk sawk. Nguri'n an chhungkhat hre tura a duh ho chu a be kual thung. Sangpuia han sawm chu a hreh ru viau nain, a tel ve chuan a thlamuang sawt dawn tih a hria a. A call ta nge nge a, "A u a accident a. Min va kalpui rawh. Tunah" a ti tawp. A zia hre tawhtu Sangpuia pwh hmanhmawh takin a insiam ta sawk sawk a. 

Damdawiin an thlen chuan Sasa sawi ang khan an lo awm nual mai. Sasa chuan a lo dawngsawng vat. Mapuia chu a ke an zai nghal avangin inzaina room atangin a lo la chhuak lo a. Sangpuia chuan thil thlen dan a han zawh chuan, Mapuia thianpa Sama chuan, "Tunah Police ten an kawl mek a. A driver kha. Mapuia hian side a la reng, mahse, kha taxi driver khan a rawn su lui ni maiin ka hria. Side draine a lo awm hlauh zawk a, tah khan a tla lut a. A ke saw chu engtin nge a tliah dan ka hre bik lo, bike khan a delh ve deuh bawk nen.. " inzawm lo zet hian a lo ti a. 

"Driver. Chu a rui mawni le" Sangpuia'n a tih chuan, Hriata an class ami thoin, "A brake a fail a tia.. A lo fail tak tak a nih chuan a thiam lo lutuk bik hran lo vang. Mahse, Kobang te pawh sut mai tur ania. Mapuia a va tai kher kha chu tihluih a ang mah zawk" a lo ti ve a. Tlan ho vek an nih vangin an lo hmu chiang ve bawk nen.. 

A u a la hmuh theih si loh a, Sangpuia nen chuan an nghak ve ta ran a. A nu nen a khat tawkin an inbe reng bawk. Sasa pawh ngui leh awm nuam lo takin a thu ve ran a. An thianpa nu vuina lama kal tur te pawh an kal sang sang tawh. Sasa bakah Hriata leh Sama tih loh chu Nauteii te an ni tawh mai. Lehlamah ngaihtuahawm em em a ni lo bawk a, lo awm ve teuh kha a rem lem lo. 

"U Sasa, ih, a u chuan na a ti em? " Nauteii chuan ţi angreng tak hian a ti a. 

"An chetsual lai takin ka awm bik lo va. Hei Sama hian min lo hrilh a, ka va thlen chuan OT-ah an nawrlut tawh" a lo ti a. 

"Ka khawngaih e, na a ti dawn sia.. " Nauteii chuan a ti vawng vawng mai. 

"Nia, exam kan la zo bawk si lo, ka rilru a nâ.. Ka khawngaih" Sasa chuan a lo ti ve bawk a. 

Mapuia chu an zai zo ta a niang, an rawn nawr chhuak ta a. Sama leh Hriata leh Sangpuia te chuan Ward-ah an nawr lut a. Amah Mapuia chu a la meng â ruai mai. Damdawi hnathawh a la reh lo bawk nen. Khuma an mut fel hnuah Sangpuia chuan, "A va ât theih tak. Bed sheet leh rizai vel engmah kan keng hleinem.. Hei Sasai a awm tho va, i zuk la leh lawk ang hmiang. A mamawh tur thil te pawh" Nauteii en chungin a ti a. 

"A pawi hleinem" a lo ti ve mai a. Sasa zawk chuan Mapuia mamawh tur thil te chu a lo sawi a. An chhinchhiah fel hnuah an chhuak leh ta a. 

Nguri a thinrim ţeuh mai. Hnahthial lama an hnuchhui an la zo fel si lo. Lawmsanga chuan an hnuchhui lai hrerengin, "Keimahin ka va haw phawt mai ang. Eng em a ti lo vang" a ti tak naa, Nguri'n a duh teuh si lo. A fapa na tuara a leh reng laia he laia lo tei fua fua chu a duh bik lo a ni. An hawn hawngah pawh an inbe tlem kher mai. Hetiang thil hi an tawng zen zen lo va, an fate chunga a han thlen ve takah chuan dawnsawn dan an la thiam vak lo a nih hmel. Lawmsanga pawh a tlan chak fia fia khawp mai. 

Pi Lawmi te nupain Mapuia chetsualna an han hre ve ta chu Pi Lawmi a buai em em a, a phi chung a ni ber mai. An pa buaipui ngai bawk si. A tupa duat, a enkham loh kha na tuarin a let reng chu a ni si a. Nguri te lah awm bawk si lo. Bathroomah a lut sek mai.. A va tawngtai reng a. An pa erawh a inthunun thei viau thung. Lehlamah Sangpuia lo tel ve chuan an thla a timuang ve deuh bawk a, ani a puitling tawh a, Lawmsanga ai pawh a lo awh rih thei maiin an ring a ni. 

Nauteii te chuan mamawh an lam khawm zawk zawk a, Sasa khan hrilh lo phei se chuan lak khawm tur an hre lo leh pek ang chu. An bo dun ve angreng sia. Damdawiin an panna kawngah, "Chhunah khan nge khatia i awm? " Sangpuia'n a ti sup a. 

Melh râw pahin, "I mawl alawm.. Zirtirtu ve si, mawl lutuk" a lo ti zêk a. Huat a hnekin a lo nuihpui hawk hawk. 

. "I lo va dawih em em.. Khatiangte hlauh? " a ti hram a. 

"Ka dawih vang a ni lo. Min tiphu alawm.. Ka lungphu a tha lo va" a lo ti hmarh hmarh a. 

"Dawih lo la, i phu nang.. " 

"I tawng thei anih chu a"

"Tawng tawh miah lo ila i hlim dawn mi? "

"I chhe lutuk" chutianga inhnial chho zuah zuah chung chuan Damdawiin an thleng a. Muanpuia pawh a lo awm tawh a. Sama leh Hriata te erawh an haw tawh aniang, an lo awm tawh lo. Sasa erawh khum bulah a la thu ngat ngat mai. Mapuia pawh nikhua a rawn hre tan a. A meng â ruai pawh a fim chho tan. Nachhawknain an jection nghal bawk a, na em em a la hre rih lo. A ke erawh an tuam so lûk mai. A nau a han hmu chu a khi sak a. 

"I hlau awm" a lo ti zawmah a. 

"Hlau e.. I thi maw ka tia lawm" a lo ti leh phawng a. 

"Ka thihsan phal che i ring mi?ka nu te chu an lo haw maw? " a lo ti a. 

"Umm.. Haw mek, apa in a khalh chak leh dawn sa a, an lo thleng tep ang" inla puitling deuh hian a lo ti a. 

Muanpuia chuan, "I nu te rawn thleng fel se, Cabin book ve mai a tha ang. Nge an lo thlen hmain ka va book mai dawn mawni.. A rush thei riau mai a. Ward pangngai chu thalai in ni sia, kantu neuh neuh in nei a, mi dang lakah a inthlahrunawm thin" a lo ti ve a. 

"I tih dan dan ni mai" Mapuia'n a lo tih chuan, "Ka awm remchang tho a, ka va sawi ange" tih leh kal a rual nghal a. 

A thlamuanthlak ţhin hle mai. 

Muanpuia rawn let leh chuan, "Kan insawn nghal mai dawn mawni le" a rawn ti a. A va tiawlsam phian mai. Mapuia chu Muanpuia leh Sangpuia te chuan an nawr a, Sasa ten bungrua an keng thung. Cabina an han insawn fel hnu chuan khua pawh a lo tlai duai tawh a. Muanpuia pawh chuan, "Ka zuk hawng ang a, chaw chu zantirah ka rawn dah leh mai ang. Naute, nang leh i pite pawh kan inah ei mai rawh u. I pite lah an rawn tlai dawn si.. I nute pawh ka lo chhumkeptir mai ang" a ti zung zung a. A papuia nen hi chuan an la inngainain an la inpawh em em a. Mahse, mapuia zawk hi chu hmana Saii te nen boruak an neih atang khan a hla ta deuh a, mipa ve ve ni bawk si chu A papuia nen pawh an inpawh ta lutuk lo a ni. Mahse, thisena inzawmna hi chu a lo chak a niang e, Muanpuia chuan an nu leh pate ai a awh zo ngawt mai. 

"U Sasa, i duh chuan va haw tawh rawh. Kan lo awmpui thei alawm" Nauteii chuan a ti ngial a. 

"Nia, ka haw ţêp.. Engtin nge niang aw.. I nute an lo thleng tlai dawn sia, an chau ve dawn bawk si, nangman ami riahpui ang? " a lo ti a. 

"Umm ni tawh mai. I riahpui ve châk em? " a ti ta roh a. Sangpuia'n a banpuamah a lo hmet zauh, a sawi hman vek tawh si. Mapuia thei leh thei lo va lo khi suk erawh a hmu ve lo. 

"Aa.. Châk chuang lo e. I buai dawn chuan min lo be dawn nia aw. I nu te an chau dawn sia, tihbuai ai chuan ka awm tho a" Sasa chuan thutak deuhin a lo chhang a. 

Mapuia chu a zung thei rih si lo va, a tai a puar tawh si. Sangpuia chuan a va sawisak a, an rawn siak sak ta a. Nauteii chuan a lo thlir reng a. A la hrethiam ve vak lo a niang. An siak mek lai chuan, "Hmeichhia te hi engtin nge zun an siaksak ve ang le? " a ti leh pek a! Sangpuia'n a beng bulah, "Ri phawng phawng thin suh. Nakinah ka hrilh ang che" a ti sup a. A hrethiam ve a niang. A sawi zawm tawh lo. Sasa pawh hawn a tintuah tan a. Mapuia bulah, "Lo tha rawh aw. Thil ei hram tum la.. " tiin a nuih sak a. 

"Nauteii nen min riahpui mai ula" a lo ti thám ţuak a. 

"Ka nute ka lo dil dawn nia.. I nau chu i ring zo vak lo mi! " fiamthu hian Nauteii en chungin a ti a. 

"Mut a duh sia, kaihthawh a inthlahrunawm thin alawm.. Bakah zawhna mak deuh deuh nurse te a zawt leh ang" nui chung hian a lo ti ve a. Nauteii chuan, "In phakar e a.. Ka hrethiam ve vek aw.. In inngai a nih kha.. Lo riak ve mai rawh. U sasa, bakah zun dawn pawn zunpui tur ka nei dawn lo asin" a ti ta a. An nui ta vek. 

"Ka lo riah theih dawn chuan ka rawn hrilh ang che. Ka va haw phawt ange. I u hi lo enkawl tha la aw.. " Sasa chuan a ti a. Mapuia va melh lehin a chhuahsan ta a. Sangpuia'n a va umzui leh hnuhnawh, "Ka va thlah ang che" a ti a. 

"Aih, scooty ka keng alawm" a lo ti a. 

Sangpuia chuan Muanpuia'n chaw a rawn dah thleng a nghahpui thak. A hmaa an zuk haw zawk khan Nauteii chuan riahpui a inring sa ve nge a lo inbuatsaih ve sa vek a. A zia hlauh mai. Nauteii'n chaw a ei zawhah Sangpuia pawh chuan, "Ka va haw ange" a ti a. Chaw lah chu Muanpuia khan a lo ken kep bik lo nen, sawm er teh mah se, a ei duh bik si lo. A riltam tawh ngawt ang. Nauteii chuan gate thleng a va thlah a. 

"Ka lawm e aw.. Awm lo la chuan.. Ih" a ti a. A tawp daih. 

"Ka ngaithla a nia.. Sawi zo ve law law la" a lo ti nghut a. 

"I chhia.. Ih, awm lo la chu ka ţap ang" a ti ringawt. A sawi tum chu hriain a inhria, rilru hlim takin A hmangaih a naute duat chu a kalsan ta a. Nauteii chuan ruak huaiin a inhria. 

Nguri te pawh rin aiin Aizawl an lut hma. An in tlawh hmain Muanpuia in lam an pan hmasa ta a. Pi Lawmi te nupa pawh an lo awm tawh a. Chaw eiah an lo nghak niin, zanriah ei a hun tawh viau avangin rei pawh an thut hmain chaw chu an bar thuak thuak a. Terini eisiamzia an sawi an sawi mai. Pu Mawia pek chuan, "Ngawi teh, Terin, Mama hi nei mai teh a.. Ka monu a tan ka awt riau che a ni" a ti a. Pa phawk ngang kha a nia, a nui duh thak bawk si lo. Terini lai leh zak a sen ţan ţán mai. 

Muanpuia zawk chuan, "Putar te chu a duh bik nang.. Tiraw.. Terin" a lo ti a. 

"Aa.. I tar lo e" a lo ti ringawt. Lawmsanga leh Nguri an inmelh ralh a. An boruak hap an hrethiam ta deuh. Terini chuan a iai hran lo tih Nguri chuan a hre ve tlat. Muanpuia lahin Terini chu phu loh enin a en thung tih a hai lo bawk. A rilru tetein, "Bawiha han tha fel se, la suihzawm tur che u a nih hi.. Candy tan pawh a tha dawn lutuk" a ti a. Lawmsanga rilru pawh a lo ni ve chiah mai. 

Chaw an ei kham atanga rei vak loah inpui lamah an inkhalh phei leh a. An han insingsa a, an inbual fai hnu chuan a lo tlai duai mai. Mapuia pawh an la han hmu hman ve ta rih lo chu a nia. A nau an be kal reng a, ani lah games a lo khel em mawni, "Ninawm.. 5mins danah min lo call a, ka khel tha hman hleinem. A tha, a dam.. Chuan U Sasai pawh a lo riak ve reng a, be ve mai r'u" a lo ti hlak hlak mai. Nguri a nui hawk. 

Sasai number chu a la ta a, Nauteii ai ngawt chuan chanchin a zawh tlak deuh e. A tawngkam leh a aw a fiahfel thlap mai. Mapuia a riahpui ve chu ngaih loh lama ngaih a hnekin an lawm em em zawk a. An hmuh nikhua loh phah hran lo. A tu chuan nge naute bula awm reng chung leh ke tliaka mu reng lakah nungchang mawi lo lantir duh tehlul ang le..? 

Hnahthial lam boruak erawh a sang zet mai. Rinfela khan an nu kha a lo enthla kar bawk a, dar 11 velah Zoteii chu bazara ba pe tur angin a chhuak a, Zoteii chhuah thu chu Nguri te leh police te a hrilh ta vat a. Nguri te nupain an umzui nghal a. An vei vahna lamah an hah hle nghe nghe. Khatia an veivah lai tak khan a nia Mapuia chetsual thu Nauteiin a rawn hrilh tak. A tawp an thleng ve hman ta lo chu a nia,. Mahse, Police lamin an umzui ta bawk a. Tlem chuan thla a muang ta deuh. Rinliana hmu phak rengin duty an indah a, a inah erawh inhmuh an tum lo nge, Rinliana chu Zoteii chhuah hun awm velah khan in a chhuahsan ve ta chiah a ni. 

An umzui ru ta zel a. Bazarah chuan Zoteii chu a lut thla ta ngei a, Sa dawrhna bula eichawp dawrah lutin eng emaw a lei laiin Rinliana a rawn teilut ve bawk. Dawr atanga chhuak dunin stepah an chhuk a, field lam an pan thla zel a. Zuitu an nei lo angah an inngai ta nge, an thlamuan hmel khawp mai. Field piah lawka veng dang panna kawngtum lun vak loah phei dun lehin chu kawngţum chu zawh rei a lo ngai lo va, kawng chho ulh zetah chho lehin Rinliana quarter a lo pawh reng chu niin. A piah lawkah Remi inkhaina hmawng kung kha a ding nghe nghe a ni. Rinliana inah chuan lut dunin a in kawngka erawh pawn lamah a la inkalh reng lawi a, a chhan chu thlang lam tukverh atanga an luh vang a ni. Duty pathum chuan in chu an hual ta a. An tawng ri hriat theihna tur an han zawng a, a vâng riau mai si. A reh tlawk tlawk ringawt mai a ni. Va luhchilh ta ngawt se engmah an hriat phah awm bawk si lo. Rilru a buai ta map mai a. Mahse, Pu Piana chuan Rinfela a ko phei ta a. Zoteii pasal a nihna angin a nupui leh Rinliana va phâwk anga kaltir mai chu an tum ta a ni. Talaa a la inkalh miau si avangin kawngka kik pawh chu a sãwt dawn lo tih an hria a, tala tichhe thiam an ruai leh te te a, thawm siam lem lo chuan an tichhe ta a. Kawngka chu dim angreng taka hawngin an lut ta ţham ţham a. Rinfela chuan bed room lam a pan ding nghal a. Thawm ngaichangin an ding leh phawt a. Thawm zawng an chhuah ve ngei alawm.. Rinfela bengah erawh ţek tla aiin a ngaihnawm lo zawk ngei ang le.. Ni e, Zoteii thawm chhuah chu thawm dang ang ni hek lo. Pu Piana chuan Rinfela a khawngaih vang zawkin chet la turin zaizirin a hrilh ta zauh a. Inti pa lui leh thawk la hawkin Kawngka chu a pawt hawng ta a. Ni e, khumah chuan a nupui duhtak, a fate pathum hrinsaktu chu ruak ngalngatin a lo mu a, a chunga bawk mek Rinliana ai sawn that lohna neiin a inhre hauh lo asin. Eng nge a neih bik ang? A neih ve loh eng fakau chu nge a neih bik? A aw a thian kâwk a. An tawp chiang kher mai. An mitmeng chu râpawm lamah pawh a kal lek lek e a. Mak an tihzia chu hai rual a ni lo. 

"Eng nge awmzia? " Rinliana chuan a ti a. A inha tha chuang lem hlei lo va. Zoteii erawh a inha tha sawk sawk. A hmel landanah chuan inchhir hmel ai mahin thaw hawk hmel a pu zawk.. Chu tak chuan Rinfela thinlung a tina zual em em a ni. 

"Ka nupui ka rawn hruai dawn a" a ti zawi raih a. 

"Kawngka ka kalh vek sia" Rinliana chuan a ngaihna hre lo deuh hian a ti a. 

"Kan tichhia alawm.. Ka chhui char char che u a, thudik chu ka hre ta a nih hi.. Officer, he pa hian ka nupui min uiresak avangin man rawh u. Hremna a phu a ni" Rinfela chuan a ti ta a. Rinliana a lo sa zak nge, "Khanglang a. I nupui a ni takmeuh a maw? Ani hi ka nupui a la ni reng e. Ka nupui ka mutpui chu eng nge tihsual ka neih a? " a ti ta sak sak a. A inha tha mawlh mawlh bawk. 

A nupui chu pan hnaiin a mitah tak melhin, "A dik em? A thusawi hi" a ti sup a. 

Zoteii chuan a pasal leh Rinliana chu a melh tawn zak zak a. 

Chutah ban chhalh hian,, "Aw a nupui ka la ni reng" a ti ta. Rinfela chu a tawlh hnung deuh a, "A tha e. ka nu leh kan fanu nunna hial pawhin a tawrh chhan mihring hi a lo hlu viau a niang e.. Jail-ah pawh in lo innupa zel dawn nia.. Ka pu, Hruai rang teh u, ka sahal dawn tlat.. Ka duh loh dan deuhin thil a kal palh ange. An hmel hmuh hi ka duh tawh lo ve" a ti khur dat dat a. A inhumruh nasat danah inthunun a tumzia hai rual a ni lo. Pu Piana te pawn hrethiam takin Rinliana leh Zoteii chu an hling ta a. Rinliana chuan, "I nu leh i fanu chungchang i sawi kha ka hrethiam hauh lo a nia. Dawta inpuh hi ka duh lo" a la ti hram a. Rinfela insangmar zo tawh lo chu a che rang zet mai. Tuman a kuttum rawn thlawh lai chu an hmu hman meuh lo a ni e. Rinliana bek chu a ri no chhak a, a let tawl mai. A hnek na thawkhat khawp ang le.. Duty pakhat chuan a chelh vat a, Zoteii chuan Rinliana tlu chu a zuk bawh vat a, Rinfela thinlung chu puahdarh chakin a rawn so bulh bulh a ni ber e. 

Zoteii chuan, "Ani hian nag aiin min hmangaih zawk aw.. Tin, ka hmangaih vanga ka neih che pawh i ni lo" a rawn ti a. Kut a thlak leh duh mai ang tih hlauin Dutu dangin an rawn chelh belh a. Mahse, aw nem tak, thûk leh fiah tak hian, "Pute u, hlauthawng suh u. Hmeichhe chunga tharum thawh chi ka ni ve lo ve. He hmeichhia hian ben pawh a phû lo ve. Ni e, Zoi, i hmangaih chu zui la, kei leh ka fate chu mitthi tlukah min lo ngai tawh ang che. Kan tan pawh i thi tawh e.. Kal rawh.. " a ti ta a. Lo awm ve dangte chuan a hmel landan avang ringawt pawn an lo khawngaih vein Zoteii chu an ten hmel kher mai. Rinliana te chu an hruai chhuak ta a. Rinfela erawh in lam panin a tlan haw nal nal mai. A hawn kawngah te chuan a zak leh rilru na si chu khamah ka zuang thla mai dawn em niaang tih te thlengin a ngaihtuah a ni. A taka den a han nih takah chuan patling meuh pawh hi an lo kehchhe ve thei chiang a ni. A fapa te pahnih a mitthlaah an rawn lang a. Ani a kalbo chuan tu ten nge tuamhlawm ang a, rawn enkawl ta ang? A thisen zawm neihchhun Dini te an chhangchhiat bakah an khawsak a chuti tehlua si lo. A thisen zawm ni miah lo Remsanga leh Nguri te tihbuai reng lah a inthlahrung tawh si. 

"Ni lo ve.. Kal thei ka la ni lo ve. Mipa ka nihna angin he thil hi ka hmachhawn a ngai a nih hi.. Kan pafa vahvaihna khua chu sei dawn mah se; chunglamin min theihnghilh lo vang" tia van lam enin.. A mittui chu a hru hul a. "Vawi khat pawh ka mittui phû lo hmeichhia avang khan he mittui hi a luang leh tawh lo vang" a ti nghet charh a. In lama lo nghaktu a fate hmu turin a tlan leh ta vang vang a. 

"Naute.. Naute.. " a u awri a hriat rual chuan a hawi chhuak nghal a. Sasa pawh a rawn harh zui ve nghal. 

"Ka tui a hal lutuk a, ka ban pha si lo va" inthlahrun hmel deuh hian a ti a. An lo dah hlatsak ve bawk a ni. Nauteii thawh hmain Sasa a che vat, tui chu lain, Mapuia chu a tulh ta a. Nauteii pawh chu a che zui ta lo. Sasa chu fel a ti ngei mai. 

"Naute, muhil leh rawh.. Kha i mumang ka hmu thei vek ania" Sasa chuan a ti a. A nui sâng bawk. 

"Maw?! Ka mumang a lang maw?! " a lo ti leh hû pek a. Mapuia'n, "Kan va chhah thin e aw.. " a lo ti zawi sup. 

An fiam tih a hriat vang ni maw.. Phun zui lem lo chuan a mu thla leh a, a chhuak bawk aniang, a muhil zui leh nghal daih. A nau muhil lai thlir pah chuan, "Khutiang a nih vang khuan alawm lo riak la ka duh ni.. Mut duh rual a ni bawk sia" a ti a. 

"Hm.. Min ngai ve pah reng reng alawm" Sasa chuan a lo ti a. 

"Dawt chu a ni lo chu chu" a lo ti zawi ve sup a. Sasa thu lai chu a kuai kun a, a fawp a. 

"Lo mu ve tawh mai la.. In chêp bawk si" a ti a. 

"I ke na lai ka tihnat belh palh ang.. Muhil tawh rawh" Sasa chuan a ti a. 

Mapuia chuan mitmeng de sawr sawra melh chho chungin, "Ka hmangaih che" a ti ta a. A vawi khat sawina a ni. Hmaichhanah. Sasa chuan a awmdan a theihnghilh zuai hman.. Mapuia kuta a kut nghat chungin, "Kei pawn ka hmangaih che" a ti sap a. 

Nauteii hnar sûk sûk bak thawm dang reng reng a awm lo. 

Mapuia sutu Taxi driver kha police lam pawn tih vak ngaihna an hre lo. A motor brake kha a lo fail tak tak miau si a. Amaherawhchu, a tai thluk Mapuia'n zai hial a tawh takah chuan senso tlem azawng erawh chawi turin an ti ta kha a nia. A lungngai lem lo a nih hmel. A chhan pawh a chawi tur zat aia tam sum a hmu miau a. A rawn thunsaktu chu tudang ni loin Rinliana ngei a ni. An chetha chho dawn emaw tia beiseina a neih laiin Nguri tel lo pawn an lo hual thei hle a lo nia. Nguri thawhchhuah azarah tho lockupah a mu ta reng mai chu a ni sia. Nguri a huatzia leh a hmuh phakah awm se, rehhlum a chakzia chu au chhuahpui mai pawh a hreh lo hial a ni. 

Nguri te pawn Hnahthial lam chanchin an hriat takah chuan an thaw huai mai. Zoteii te chu an ţang reiin an ring lem lo. Kil tin atanga dah chep an ni ve tawh bawk nen. A mo nu a rin ang a lo ni ta lo lutuk chuan Nguri thin a titâwt ţeuh mai. Achawii a fela sawiselbo a nih tehlul nen. 

Police lamin Rinliana te chu an han kawm chho ta a. A ţang rei thei ngang ngang khawp mai. Zoteii tel ve lo phei se chuan a ţang tluan thei ngei pawn a rinawm. Hmeichhia ta na nâ na chu le a lo derthawngin a lo nèm nge nge aniang e. Zoteii chu a inpuang ta a ni. Chutiang a nih takah chuan Rinliana tan pawh tlan chhuahna kawng a kaw ta bik lo va, a inpuang lo thei ta bik lo a ni. Mahse, inti mipa takin a thiltihah inchhirna pakhatmah a neih loh thu leh a thawk tawp thleng paw'n Zoteii chu a nupui a nih reng tur thu a sawi hmiah mai. Engvanga hetiang taka sehhel hi a nih ang? Mihring nunna hlut zo lo khawpa mi rawva leh pawisak nei lo hian eng ang chiaha harsatna lian tham nge a lo tawh ang? Hmangaihna thiltihtheihzia leh khawvela natna hlauhawm ber chu hmangaihna vanduai a nihzia chu i hre dawn alawm.. Ka ţhian.. Khai mah aw.. 

(A tawp daih 😂😂 next-ah aw 😢