Thutiams2-13

THUTIAM(S2)- 13

Ziaktu: Toni Râlte

(Adds chu 😁😍

Zari nen an inbiak takah chuan Rinliana chungchang chu a zawt ta tawp a. Zari chuan a han ngaihtuah vang vang a. A hre mai thei lo. A pianzia leh hmelhmang te Nguri'n a han sawi chuan, "E.. Aw ka hriain ka hria. Zotlangah an awm tawh loin ka hria. Ih, nupui kha a nei a, mahse, a nupui chhungte khan an duh lo va. An pawt ţhen ta a. Tah khan Rinliana chu a awm bo ta daih a, khaw nge a awm tak ka hre miah lo" a rawn ti ta a. 

"Eng nge an chhungkaw dinhmun te? A nupui nen chuan fate an nei em? " Nguri'n a tih chuan, "Ka hrechiang lutuk bik lo. Ka patea fate leh a nupui chu an inkawm ve thin a. Chuta tanga ka hriat ringawt chu a nia. Fa an nei hman lo. A nupui pawh chu a chhung ten hmun dangah an awmtir daih alawm.. Chuan, Rinliana te chhungkua chu han duh chi an ni ve lo bawk a, a nu hian ngaihzawng a nei reng thin, a tar atarin a pa hi vai a nia. Ani lah zu a heh em em bawk. Tunah phei chuan a dam tawh lo maithei. Farnu a nei a, sumdawng a nia. Chubak an chhungkaw chanchin ka hre lo" fel takin a rawn ti leh thlap. Nguri pawn lawmthu a hrilh mawlh mawlh mai. 

"A nih Zar, Rinliana nupui chu a hming i hria em? I patea fate nen an inkawm chuan" a va ti leh a. 

"Zoteii an tiin ka hria. Puan thui an zir ho thin a. Engtin nge maw Rinliana te ang a duh ni an ti an ti ve.. Ngur, ti nge min zawh vak? Buaina a awm deuh mi? " ngaihtha vak lo hian a rawn ti a. 

"Umm.. Nakinah engkim ka chian hunah ka rawn hrilh ve ang che.. Ka lawm lutuk ania aw.. " tiin an inbiakna chu an titawp ta a. Nguri'n phone a dah rual chuan a khi ta sak mai. 

"Ka lo rin dan nen a inang chiah e. Zote, Rinliana hi i pasal hmasa maw lo ni a.. Chuvang em ni i pasal nu leh i fanu nunna hial pawh i lak a ngaih tak.. Ngawi tak rawh u, nuam insa rei dawn hauh lo mai" ama hriat tawk lek chuan a ti ta sap sap a. 

Rinfela te inah chhoin, A beisei ang takin Zoteii chu a lo awm lo hlauh.. Thenawm te inah a kal lawk an lo ti mai a. Rinfela nen an roomah Nguri chu a lut ru zauh a. An damdawi bur chu a en nghal zung zung. 

"Eng nge i zawn? Ngur" Rinfela'n a rawn tih thut chuan a phu zawk a. Inthiam chiah lo hian, "I mut dawnin damdawi ei lai i nei em" a ti a. 

"Nei nang.. " a lo ti si. 

"Ee.. Tuilum kha i la in ziah tiraw? " Nguri'n a tih chuan, "Umm la in, Zing lamah hi chuan ka in regu tawh lo, ngati nge? "

"I tuilum in tur chu nangman em ni? Chhuang thin"

"Zoteii vekin, ani pawn a in ziah alawm" a lo ti a. Nguri a phur leh ta sârh mai. 

"Aw le.. Zanin atang chuan nangmah ngeiin insiam tawh ang che. A nih loh pawhin in tawh suh, leihbaw vek rawh," a ti ta a. Rinfela a mengphawk hle. 

"Eng nge awmzia? " a ti a. 

"Ka sawi ang chuan ti phawt rawh. Sawifiahna hun a awm rih lo. Ka chhuk dawn" tih leh chhuah a rual nghal a. Rinfela a hrilhhai ngei mai. Mahse, Nguri hian eng emaw tum ruk a nei ni ngei chuan a hria. Eng nge a nih erawh a hre lo thung. 

Mapuia lehkha zir ning chu bathlarah a tei fua fua a. A nau pawn a la chhiar ring lauh lauh khawp mai. A phone hmetin Sasa a call a. 

. "Ka zir thei thlawt lo. Ka ning. " a va ti tâwng ringawt. 

"Hahchawl ve la.. I zir nasa lutuk anih kha" a rawn ti dam diai a. 

"I zir bik lo mi! " a va tih chuan, "Ka en thuak thuak ringawt.. Naktuk hun a la awm tho ka tia" a rawn ti ve a. 

"Chuti inhmu lawk ang. Ka ngai che" a ti ta a. Sasa a rawn nui hak. 

"Lo phei la" a ti ve mai. Dar 9 a ri ţêp tawh naa Mapuia a insiam a. A pi bulah, "Ka intiharh lawk dawn.. Ka zir ning rih" a ti sup a. A chhuak zui nghal. Sasa te kawtah a ding ran a. Msg -in, "Ka lo lut zak tawh e. Lo chhuak mai la" a va ti a. 

"An mu tawh.. Ka nu te.. Lo lut rawh, " a tih takah chuan, ngampa tak chuan a lut ve ta mai. Bathlar thlang lamah bawk an thu dun leh a. Van chu a thiangin arsi pawh an de chuai mai. Nghet taka inkuah chungin an titi sep sep a. 

"I pa hian ka chungchang a sawi tawh em? Min ngainat loh hmel ee" a ti a. 

"Sawi nang. Ka pa chu a mizia ve ka tih kha. An nel ngai lo, mahse an kawmchian chuan an ngaina zel" a lo ti a. 

"Ka nute lo hawn veleh chaw rawn ei rawh aw" Mapuia chuan a ti a. Sasa a lai deuh, "Zahthlak awm.. Mahse, bossin i tih te chuan" a ti ta tho a. An infawp vawng vawng mai. Khatia an virgin ve ve an inhawnsak hnu khan vawi khat chiah sex an la hmang a. A nawmna lo hre pawp laklawh Mapuia tan chuan insum a harsa deuh thin. 

"Sitting roomah phei ang" a ti ta sup a. Sasa lah chuan a music a lo man nasa si.. "An lo tho leh thut anga, min phawk ange" a ti a. 

"Ni bawk si.. Exam zawh ni chu khawiah emaw kal teh ang. " a ti hawk a. 

"Nia.. Mahse, Mapui, sex vanga inzawmna neih ka duh lo ania" a lo ti a. 

"Kan inzawmnaah hian a tel vek tawh alawm.. Sawi hran theih pawh a nih tawh loh hi.. Mahse, i duh lo chung chu ka tilui ngai lo vang che" a ti nghet charh a. Sasa chuan a biangah a fawp zauh. Dar 11 velah a haw ta chauh a. 

"Terin, vawiin tlai chu ka thiante pahnihin chaw an rawn ei dawn a. Uisa an rawn keng dawn a. Chu erawh chu keimahniin kan siam mai ang. A thlai lam kha lo siam âm deuh mai rawh aw.. " Muanpuia chuan a ti mawlh mawlh a. 

"Umm.. In tlai ang em? " a lo ti var a. 

"Tlai over lo vang. Dar 4 velah chuan kan rawn thleng thei ang" a lo ti a. Muanpuia tlan liam lai chu a thlir reng a. Saii nen an inthen hnu hian zu a in leh ta zauh zauh a. Rui khawp leh buaina siam zawng chuan a in lem lo. Fate nu meuh nena han awm hran chuan nunphung a tikhaihlak ve lo thei lo a niang e. Mahse, Terini chuan a ngaihbel nge Saii awm tak loh a chinah Muanpuia chu thawveng leh zalen ta sawt hian a hmu a, a tawng tam vak lo em zawk a. A fanu leh ama tan hian eng emaw holam deuh tak pawh hi a rawn hawn ziah thin. Candy lahin a nu ngai hmel reng a pu si lo. Saii pawh a reh rih khawp mai. Mahse, nizanah khan Terini chu a rawn text a, "I u-in hmeichhia a rawn hruai lut tawh em? " tih a ni. A hruai luh loh thu a sawi a. 

"Ka ngaihtuah hian khamini khan i u kha i va hrilh aniang, kan awmdan kha. Zan riak tura kal ni si, a rawn haw leh danah khan. Nang hian min tihchhiat i tum a, Muanpuia nupui nih i tum alawm.. A dik em? " a rawn tih chuan, Terini a sa ve zak mai. 

"I rilru that loh ang ang hi mi dang puttir tum thin suh. Amah pawh i zawt thei ang, engmah ka sawi lo.. " a va ti ve hmak a. 

"I hlawh petu che ka nih loh a chinah chuan min zah ta lo hle mai" a rawn ti hram. A chhang peih tawh lo. Saii te ang hrawn harsa lutuk a awm ta lo chu amah Terini ngei pawn nuam a ti lo thei bik lo ang chu.. Mahni ril arah fanu te ngei pawh enkawl thei lo, hmangaih tawk thei lo nu chuan a phutawk a hmu a ni mai. Saii a ngaihtuah chhuah apiangin A nu kha a hrechhuak ziah lehnghal a. Engtin tak awm zel ang maw..? 

Nguri pawh Zoteii chhungte tlawh tura chhuah a duh viau laiin a nu thihcham a ni si a. Han bo daih kha a mawi a tih chiah loh vangin inpui lamah a chho ta a. Lawmsanga erawh zing atangin eirawng bawlin an buai tawh thung. Rinfela a hmu fal thei mai lo va. Inleng te lo chhawn ve a ngai bawk nen. Zoteii chu a han chík viau nain ni dang aia a danglamna a hre hran lo. Dar 11 a pel fel vel tihin Rinliana pawh a rawn lut ve hlawl mai. Nguri chuan a awmdan tihdanglam loh hram hram a tum a. 

"Remi postmortemtu kha i ni tiraw? I va fel ve aw" pangngai takin a lo ti a. 

"Umm.. Fel vang pawh a nih loh hi.. I nu vui niah ka rawn lang ve hman ta si lo va; a thihchamah tal tiin ka rawn tei lut ve a nih hi " a lo ti ve duam a. 

"A lawmawm lutuk.. In buai dawn tehlul nen" a lo ti a.. Mi dangin an lo biak vangin a kalsan ta rih. Zoteii erawh Rinliana a rawn lan atang chuan chiktu tan chuan a danglam hret tih hai rual a ni lo. A helhhawlh kan ti dawn nge, a tawng duh sawt a, a phur sûrh ni maiin a lang. An zai tui lai takin Nguri chu a chhuak zauh a. Kawtah Rinfela leh Lawmsanga te chu an lo thu dun a. An bulah va thu vein, "Tuilum chu nangmahin i inchhuan ta em? " a ti nghal hmiah a. 

"Ka tum a, Zoteii'n 'Ka lo chhuang ang' a ti deuh tlat sia. Ka chhuantir ta mai. Mahse, ka in lo. A rukin ka leih bua a, thil awmzia erawh ka hre ve chak ngawt mai" a lo ti a. 

"In nu leh Rinliana hi ka enthla mek a ni. A bak chu hre rih lo la a tha. In nu bulah rinhlelhawm leh ngaihthat lohna turin awm hlek suh ang che. I hrethiam em? " a ti chang fak a. Rinfela pawn Nguri mitmeng tak ran mai a hmuh chuan palzam chiah a ngai lo nge, "Umm.. Awm lo ang. Mahse, ka hre chak e" a ti hram a. Lawmsanga chuan, "Kei pawn thil zawng zawng ka la hre bik lo ania. Nghak ve ngat ngat phawt mai ang," a lo ti a. 

Nauteii class bang chu amahin a haw hnak hnak a. Vawiin Sangpuia a rawn kal lo leh, a sawi danin, "Ka cousin Lawngtlai ami a lo zin a. Bazarpui a ngai a. " a ti! Chawlh a la zeuh zeuh chu mak a ti hran lo va, mahse, School a lo kal loh chuan a reh tlawk tlawk a. Engkim a ninawm si. Vawiin pawh kein a haw phah. A u lah an exam lai anih vangin an bang hma si a. Taxi a melh kual deuh naa, kea kal pawh a tha tho mai tiin a kal zel a. Veng pakhat a thlen chuan kawnah tak hian mi an lo zi deuh niaih niaih a. Motor accident a awm em mawni tih rilru pu chungin a va thlek ve dâk dâk a. A rin loh lutuk a va hmuh avang chuan a mit a la sawn rang kher mai. Mipui hual chhungah chuan Sangpuia leh nula pakhat, hmeltha zet mai no sûk mai hi an lo ding a, an bul lawkah mipa pakhat sam sei lek lek, sual hmel angreng tak a lo ding bawk. Chu pa chu a pawr khawp mai. 

"Ka side reng a, in side lo lamah in rawn tlan zawk alawm" a ti lung lung a. 

Sangpuia chuan zaidam deuhin, "Ngawi teh, ka pu, ka side-ngei alawm.. I hre sual aniang. I rawn tlan chak ve bawk nen.. A pawi khawp mai. Tihian kan buaina chu tawp rawh se. Ka motor hi siamna man i tum dawn chuan a tam tham deuh a, kal thui lo zawk mai ang" a lo ti a. 

"Ka motor pawh a rân nuai hi. In chawi ngei tur a ni" a la ti hram a. 

Sangpuia bula ding nula chuan, "Ka pu, tha takin kan dawr che a. A tisualtu zawk mah i zâm loh chuan i duh chen chen kal ila a ni mai lawm. I motor râng ai chuan kan motor i tai chhiat man hi a tam zawk a. I chawi ve a niang chu" a ti hlak hlak a. A zaidam vak hmel bik loh hle. Nauteii chuan kalsan mai chu a thei bik lo nge, Sangpuia'n a rawn hmu ang tih hlau takin mi phên atangin an buaina chu a lo thlir ve a. 

Mipui zinga tlema zahawm deuh, pa thau lam chuan, "A ni tak e. Inremna an duh na nâ na a.. Chawi i inhuam te chuan i thu thu alawm. Kei ni ila lawmthu ka hrilh ang a, ka kal vang vang ang" a lo ti ve a. Samseipa pawh chu a inngaihtuah ve deuh nge a ngawi vung vung a, a hnuah, "Aw a tha alawm. Mahse fimkhur tawh ang che. Kha i bialnu nge i nupui zawk nge phei kha chu a tirah khan a tawng tam mah mah a, lo zilhhau ang che" a ti ta a. Hmeichhia chuan, "A nupui hual ka nia.. Ka pasal hual diknaah chuan sawi theih ka nei ve alawm.. Kal ang.. Sangpui" a ti ram hmak a. Sangpuia chuan hmalam a rawn melh zauh a, a ding khawng ta reng mai. Mipui kara uiniform ha chunga ngam leh ngam lo va lo thlirtu hmeichhe naupang mitmeng a va hmuh chuan chetsawn zai a rel thei hlek lo mai. A thu hriat vanga thinlung chî rì taka awm mek, nâ ti em ema lo thlirtu Nauteii chu a hnungtawlh hret hret a, Sangpuia melh leh zawkin hmalam panin a kal ta vang vang a. 

A rawn nawr sek si avangin Sangpuia chu motorah lutin a tlan zui nghal a. Thu kam khat mah a chhak chhuak lo. A bula hmeichhia chuan a be mial mial a, a biakna erawh engmah a hre lo. Tla mai tur mittui khap per sak chunga tawlh liam Nauteii hmel chauh lo chu a mitthlaah an lang thei lo. 

"Ka biak che chu.. " a rawn tih tuarah chuan a break thut. A bula thu hmeichhia melh kâwk chungin, "Op, i ti mah mah.. Ka nupui hual i ni lo ve" a ti vawt raih a. A tlan zui lehnghal. Opi erawh a ngawi hmak a, a tum bûr mai. 

In a thleng a, a piin, "I riltam em? " a tih pawh chu a ngaihsak thei tawh lo. Roomah a lut a. Inthlak pawh inthlak lovin khumah a zangthal zawngin a mu tawp. Chunglam melhin a mittui chu a luang ngiai ngiai a. 

Awmdan tur a hre lo. Engmah a hrethiam hek lo. Nupui hual nei lai maw a lo ngaihzawn a? A cousin bazarpui tur anga insawi kha a lo fawr kual mai mai chu a nia. Na a ti lutuk a, ama tawkah tawrh dan tur pawh a hre lo. Engkim chu a tan a vawikhatna vek a ni miau si a. Tah vak a chak a, a pi ten an hriat a hlau si. 

"Ka naute, ngati nge.. Eng nge thleng? " a pi rawn lut chu a hmu miah lo. 

A tho sawk sawk a. "Engmah ni lo, pi.. Ka chau deuh a" a ti thâm chhalh a. A pi chuan awm a awm a ni tih a hrethiam vek. Mahse, sawi tura nawr erawh a tum rih lo. 

"Inthlak la, thingpui ka siam aw.. Va in rawh" a ti dam dap a. Nauteii pawh chu a inthlak nghal sawk sawk. Sangpuia hmel ringawt a mitthla a. Hrehawm a ti. Thingpui in pahin a phone chu a khawih a. Sangpuia'n a rawn call ta chiah e. A hmet busy nghal hmak. Vawi 7 dawn a rawn call a, a hmet tawp zel si. A pi lo thlir rengtu chuan thil nih dan a man thiam tan. 

"Be rawh.. A sawi duh te chu sawitir ve phawt ta che. Bawihte" a lo ti a. 

"Dawt bak a sawi dawn lo" a ti hmak. 

A û a lo haw a. A inthlak laiin a piin a va luh chilh a, "I nau saw a dik miah lo. Tu emaw phone call pawh a reject char char a nia" a ti a. 

"Ka lo be dawn nia.. " Mapuia chuan a ti sup. Nauteii inbual laiin call a lo kal leh a, Mapuia chuan a lo laksak ta a. 

. "Mapui, i nau ka va be duh ve" Sangpuia'n a tih chuan, "A inbual a. Buaina in nei deuh em ni? A awmdan a danglam tlat" a ti a. 

"Aw.. Nei e.. A pawi lutuk a ni tawp. Hrilhfiah ka duh a, min ngaithla duh si lo va. Khawngaih takin reilote tal min ngaithla hram turin lo ti hram teh" Sangpuia ngenngawlzia a hriat chuan a pawimawh tawpkhawk ang tih a ring thiam nghal. 

"Ka lo hrilh ang. A la naupang em a, lo hrethiam rawh" a ti a. Phone pawh an dah zui ta rih. Nauteii inbual zo chu, "Sangpuia i ngaihthlak a tha. Engpawh thleng se vawi khat tal chu ngaithla rawh" tiin a lo hrilh a. 

"Nupui hual a nei alawm" a nau chuan a lo ti sap. Mapuia a kang awk mai. "Eng a?! Eng thil maw? " a ti hrãwk. 

"Aw.. Vawiinah a nupui hualin a pasal hual a nih thu a sawi alawm" a lo ti ve nghek. 

Mapuia chu a awm a nuam ta lo hle. A nau hian dawt a sawi a ring si lo, anih chuan Sangpuia zawk chu dik lo zawk a va ni mai awm ve aw.. 

"Chu pawh nise, ngaithla tho phawt teh" a ti ta zawk a. Sangpuia hmel leh nungchang atangin a nau chu a bum duh a ring bik lo a ni. Call a rawn kal leh ta ngei a. A û ngenna a ngaihpawimawh em vang zawkin Nauteii chuan a la ta hram a. 

"Naute, i hriat ang kha engmah a ni lo. Vawiin ami kha ka cousin ka tih Opi kha a nia. Kan bazar zo haw lam kan insu palh a. Tikhan a sawi ve ringawt anih kha.. Ih maw, ni e, ka zep buai lo vang. Ka cousin ka ti tak naa, ka nu te lam atanga kan chhung hla tawh tak a nia. Hman atanga min ngaizawng tawhtu a ni. Kei chuan ka duh lo, ka hnar zel thin.. Engvangin nge khatiang khan a sawi theih ka hre lo. Naute, dawt ka sawi lo. Nangmah bak hmangaih ka nei lo" Tlangval puitling meuh awphawi chu a mangan hmel kher mai. Mapuia chuan a lo hriat phak ve vek avangin Sangpuia chuan dawt a sawi a ring ta lo. 

"A hmelthat em kha.. Ni daih ru" Nauteii chuan a ti a. 

"Nang hian min then mah la, ani kher hi chu ka duh dawn chuang lo. Mawh.. Khawngaihin.. Zaninah ka rawn kal ang aw.. I pite bulah pawh ka sawi vek mai ang. Inthen ka duh lo. I duh chuan titau rawh. Kar khat pawh titau rawh. Mahse, min then suh" a rawn ti ţâwk ţâwk a. Mapuia ngeng a chhun pha tlat. 

"Ka tihtauh te chuan inthen ang kan ni mai. Ka titau thiam lo" Nauteii lah chuan a ti si. Tlem chuan a na ngut ngut kha a zia tawh. Sangpuia insawifiahna a hriat tak vang pawh a ni mahna le. 

"Ka rawn hmu ang che aw" a rawn tih chuan, "I lo kal chuan ka then che a ni mai" a ti leh lawi si. 

"Aw le.. Ka lo kal lo vang. Naktukah Schoolah kan inhmu ang a, tlaiah ka thlah ang che. Hmaichhanah kan sawi dawn nia" a ti ta a. 

"Kha nu kha in inah a awm alawm.. Zanah pawh in mu dun ang a" Nauteii chuan a ti nghat nghat a. Sangpuia chu za vak lo hian a rawn nui huk. 

"Ka nau nen an mu dawn. I rin tlat loh chuan amah hi be rawh aw.. Lawk.. " a ti ta mai a. Nauteii chuan a u a va melh vak ringawt. A lo buk khum nghut a. 

"Aw hello. Nauteii maw.. Ih, Opi ka nia, hei U Sangpuia cousin ka nia. Vawiina ka pasal hual anga ka sawi ve ngawt chhan kha chu a hma khan ka lo ankhum hrep sia, U sangpuia laka thunei ve ang deuha lan ka duh vang a nih kha.. Min lo hrethiam rawh aw. Ani nen chuan unau alawm kan nih" hmeichhe aw tliang lam hian a rawn ti ta a. Nauteii chuan chhan vak ngaihna a hre lo. 

An inbiak zawhah, "U, kei chu ka thin a la rim" a ti hram a. 

"Dam tawh rawh. A hmeichhia ngeiin a rawn sawi fiah tawh kha.. Sangpuia hi misual a ni lo vang. Keiin ka rin chuan ring ve tawp rawh" a lo tihsak a. A u thu a kawi a ngila zawm thin ni nafam chu a nâ te pawh a zia ta huai e. Lehkha erawh a zir thei ta lo. 

"In nula chu chawhmeh siam a va thiam ve.. Ka eitui ngei mai" Muanpuia thianpa Valpuia chuan a ti zuah zuah a. Uisa ai mahin Terini bai thak chu a ei nasa zawk reng a. 

"Thiam tak a ni. Nupui tlak mawle" Muanpuia'n a tib chuan, Zuala zawk chuan, "Nei la.. In nu a awm tawh bawk si lo" a lo ti sur sur. Terini erawh roomah Candy a awi daih a. 

"Ti ang lo siah.. Naupang a nih hi" a lo ti hluk. 

"Hmeichhia te chu fa an neih meuh chuan an tar zung zung a, naupangtê hi neih tur" Valpuia'n a lo ti ve a. Uisa nen zu nen, hmeichhia awm lo mah se, nuam an ti ve viau mai. Muanpuia thawhpui te vek tho an nia. Terini pawh Candy mutthilh hnuah a rawn chhuak phei a. An eina te chu a sengfel zung zung a, Valpuia chuan, "Terin, eisiam i thiam hle mai. I pasal chu a vannei dawn a nih hi" a lo ti lung lung a. 

" ka lawm e. In eitui chuan a tha a ni mai" a lo ti ve a. Zuala zawk chuan a en ngun kher mai. Terini hi sawi tawh angin nula hmelchhe zawk zawk a ni hauh lo va, a lian vak lo tih mai a ni. Amah mi zawiawi leh mi pawisawi hlau, nun tlawm tak nei a lo ni a, belchiang duh tu tan chuan iaiawm loh tak a ni. 

"Kan la meng dawn a. I duh chuan mu tawh mai rawh.. Kan bengchhen deuh chuan lo sawi la aw" A thleng sil zawhah Muanpuia'n a lo ti a. Zuala ta pek chuan, "Mawina, lo thu ve rih rawh. A nuam ve lawm.. Thil te hi i lem ve duh em? " a lo ti a. Muanpuia'n a melh rum ngang mai. 

"Aih duh lo ve. Candy saw a harh thut thut zel a, ka va mutpui zawk ange" tih pahin a nui seih a. Room lam a pan nghal. 

"Khaw maw a number min pe teh. Ka ngainat chi tak a ni. Keini ang pathlawi te min iai loh chuan, kherh pawh ka inhuam riau ania" Zuala chuan Muanpuia bulah a ti zut zut a. Muanpuia tan pek loh a nuam tawh si lo va, Terini number chu a pe ta a. Mahse, eng emaw ngaih ngam lohna riau a nei, amah chuan a hrethiam chiah lo. Zuala te ang mi phunglung leh zu duh ve tak tan chuan Terini chu a phal meuh lo niin a hria. Thudang sawiin an titi ta daih a. Saii chungchangte pawh an sawi. Valpuia'n, "A neih a la chen deuh nge a nalh thei turh turh riau. Mahse, an in lamah sawn a lal vak lo chuan ka hria.. " a ti a. 

"Nalh rawh se.. Pasal te a hmuh ve leh phah ang a a tha" Muanpuia'n a lo ti sam êt a. 

"Tak ana.. Nang hi i bialnu tur ka hualsak che ka tih kha aw.. I tlangval lai atanga star tawhtu che a nia. A senior ve deuh tawh nain in inhmeh tawk khawp ang. " Zuala chuan Muanpuia bulah a ti a. 

"A la hma e, chutiang ngaihtuah nan chuan" a lo ti sup duh chauh. 

"Hma lo ve a. Nupui neih leh vat hi a tha. Keini ang hian i tal hiar chho ve mai ang tih a hlauhawm.. Ziri chu kawp ngei ngei ang che. Hmeltha si, fing si, nungchang tha bawk, hna nei bawk. Ani aia tha i hmu tawh lo vang" a lo ti leh hmiah hmiah. Room lana mu meng reng Terini chuan an ţawng rin em vangin an thusawi chu a lo hre ve vek a. 

Zuala'n Muanpuia bialnu tur a hualsak tih a hriatna chuan engtin emaw a khawih deuh. A na deuh zawk niin a hria. A chhan a hrethiam lo mai pawh a.. Muanpuia chuan nupui fel tak nei leh se a duh em em rualin, chutia a thianten an hualsak tih a hriatna chuan a tina tel ve ta tlat si! A bangbo viau mai. 

Nguri pawh a inbual fai vâk hnuah, Zoteii chhungte tlawh tur chuan a chhuak ta vang vang a. Lawmsanga chiah a hrilh thung. Lawmsanga erawh Rinfela te in lamah a tul tul ti turin a thawk chho ve leh ta poh a. Nguri zah hle lo se chuan hawn daih a chak ve tawh hle. Nauteii a ngaih tawh bakah a pa pawh a ngaihtuah ve bawk a. A u te lo inthen ve lehzel nen, in lamah chinfel tur neuh neuh awmin a hre ve tawh. Mahse, a nupuiin thil pakhat a buaipui urhsun laia lo hawnsan daih kha a duh bik si lo va.. A la chám ve ta reng chu a nih hi. A fanu nen an inbe zeuh zeuh zawk a, a pa hriselna pawh a la tha rih bawk. 

Zoteii te chhung, Hnahthiala a rawn awmna te in a thlen chuan an lo inkhar ţhiap a. Mahse, a kal ta sa sa tiin kawngka chu a va kik ta dat dat a. Reivak loah a rawn inhawng a. Nu tar lam lek lek, hmai zur ve tawh tak hian a lo hawng a. 

"Lo lut rawh" a ti sap a. Nguri chu hre awm pawn a lang lo. 

A lut zui ve mai a. Sitting roomah chuan patling upa tawh lam hian tarmit vuah chungin lehkhabu chhah ve tak hi a lo chhiar mual mual a. Choka lamah Nguri te ang rual vel tur hian eng emaw a lo siam mek bawk. Chung zawng chu a va hmuh te an ni. 

A thut fel hnuah Pa chuan a rawn thlek chiang ve chauh a. Ani chuan a hre deuh a nih hmel e. "Eng nge i duh tak le? " Pitar zawk chuan a ti a. 

"Min hre vak lo maithei a. Nguri ka nia, Rinfela nau saw ka nia. Aizawl lamah pasal neia ka awm vangin he lamah chuan min hre em em lo. In dam tlang hrim hrim em? " a ti a. 

Pa chuan "Niin ka hre reng che a. Kei ka mit hi a fiah tawh meuh lo va. Kan dam tlan lai tak chu a ni e.. Eng nge i duh ve tak mial? " a lo ti charh charh a. 

"Aa.. Eng dang a ni lo. In nau Zoteii chungchangah a nia. Ih, hriatchian ka duh deuh a ni" a ti ta tawp mai. An inmelh ta hrek hrek mai. A khuh kharh kharh hnuah, Pa chuan, "Engti zawngin nge hriatchian i duh le? " a ti a. A mitmeng chu a chiang lo, a mumal vak lo a ni ber mai. 

"A pasal hmasa nen an inthen hnu khan hetah a rawn awm ta kha a nia. A rawn awm chhan kha a pasal in duhpui loh vang a ni em? " a ti ta bawrh a. 

A chil a lo lem khawlh ringawt. Nu zawk chuan, "Aa.. Nia, a pasal kha kan duhpui lo êm a. Saw lama a pi te khan min rawn ţahawh deuh tawp a. Kan lo awmpui ta mai a ni" a ti ta a. 

"Um.. Chuan a pasal hmasa kha Hospitala thawk Rinliana saw a ni tih ka hre ta a, an pahnih hian an la inhmu zauh zauh tihte nen, he thil hi in hriatpui em? " a ti leh ta khawl mai. Anmahni chu a ngei pawh a ni lo, chutia chang deuh khaka a tih loh chuan an zuam ang a, engmah an sawi duh loh a hlau a ni. 

"Aa.. Ka hre miah lo chu lam chu.. Rinfela nen an innei kha kan lawmpui em em a. Mahse, duh angin kan rawn ţawiawm tha thei lo. Dik tak chuan ka'n sawi mai ang a, Amah Zoteii sawn min ngeih ţhuai lo mai si a. Rinfela pawh kha a duh vak lo chunga nei tura nawrliam kan lo ni bawk nen. Karah nau an lo pai nen. Khatih lai kha chuan Rinliana saw a rawn lang rih lo bawk a, chuti lutuk chuan a harsa lo. Mahse, Rinliana a rawn lan leh takah khan buaina a rawn thlen ang tih hlau reng rengin kan awm a. Amah Zoteii pawh rawn kalin Rinfela bula engmah sawi lo turin min rawn vau a. Kan inhnial fe nghe nghe. Kha vang khan min hnaih duh ta mang lo va. An inhauh chang pawn kan inah a rawn tlan ngai hleinem" Pa chuan a ti ve ta mawlh mawlh a. An hriat chin a inang reng tih Nguri'n a hriat chuan a hnual deuh. 

"Ka pu, sawi chi a nih leh nih loh ka hrethiam tawh lo mahse, ka ring tawk che u a, ka sawi mai ang. Tuna ka nu thihna leh an fanu thihnaah pawh hian thil dik lo inphûm a awmin ka hria a ni. Chu chu ka la chhuizawn hleithei si lo a. Ka buai ta nuaih a nih ber hi.. " a ti ta a. Boruak chu a reh tlawk tlawk mai. 

Rei fè hnuah Pa chuan, "Police i hrilh lo em ni? " a ti sup a. 

"Hrilh rih lo. Ka hrilh chuan an bibo ang tih ka hlau a ni" a lo ti a. 

"Fimkhur rawh aw. I chhui tih an hriat chuan i nunna thleng khan a tuar thei a nia. Ka sawi awmzia chu i hrethiam em? " a mita en chungin a rawn ti a. Nguri chuan chiang kel kawlin a lo melh a. 

"Ka hrethiam e. Rinliana nge Zoteii zawkin vau che u.. " a ti ta sap a. 

Pa zawk chu a tha tha hrut a. 

"I nu leh in nau thihna lam chu kan hre lo va. Mahse, Rinliana hian Zoteii hi a nupui a ni thin tih hi mi dang bula sawi lo turin min vau a ni. Kan nunna thlenga kan tawrh theih tur thu a sawi a. Tin, i nu leh in nau kha a rawn khak tel zauh bawk a, 'An ni kha in zui ve a ni mai' a rawn tih danah sulhnu chu an nei a nih ngei ka ring. I mi hmuh angin pitar putar kan ni mai tawh a. Kan fapa lah sipai niin he lamah a rawn awm khat si.. Tihian kan fanu pasal nei rawn kir leh hian min enkawl a ni ringawt tawh a. Buaina neih kan duh lo a ni. Mahse, Zoteii te chetdan hi a dik lo a nih chuan an lama ţan kan tum reng reng lo a nia" a ti ta dap dap a. Nguri pawn a thusawi awmzia chu a hrethiam khawp mai. 

Police a pun tawh mai dawn em ni ang tih chu a ngaihtuah rauh rauh a. A chet tlai vaih chuan Rinfela hian a tawrh ve a hlau a ni. An ni pahnih lah Nguri'n a enthla tih an hriat vang ni maw.. an hmanhmawh telh telh mai si a. Lawmsanga nen sawi dun phawt a titlu ta rih a. 

"Nu, min va ngai lo ve a.. Lo haw tawh r'u" Nauteii'n a rawn ti lâng lâng a. 

"Min ngai lo zawk aw. I bialpa ringawt i ngaihtuah a" a ti ve sak. Nauteii chu za lo zetin a nui hak hak a. 

"A ni lo.. Ih, maw, nu.. Sir khan a nu min hmuhpui a. Ka zak lutuk. Chuan, i nu te lo hawn hunah chaw eiah min sawm rawh te a ti vel. A zah lohzia hi" a rawn ti har har a. Zak si, nuam ti tho si angin a ţawng. 

"Ni rawh se.. Kan rawn hawn veleh kan sawm dawn nia. I pite an tha em? I duat em? In chhung chet te kha i hman chuan ti vek zel rawh aw. " a ti luam a. 

"Eirawng ka bawl lo a ni mai. A bak ka ti vek. E taka, A û hi maw.. A bialnu a rim ziah a nia aw. Lehkha pawh a zir tha lo" tiin a u a han hek kawkalh a. 

"A va sual ve. Ka lo hau ang.. I pa hian a ngai lutuk tawh che a. Rawn be zing deuh rawh" nguri chuan a ti a. 

Lawmsanga nen Zoteii te chungchang chu an sawi dun a. Lawmsanga chuan Nguri a ngaihtuah vang zawkin Police kuta thlen mai tha a tih tawh thu a sawi a. Nguri pawn pasalte berin an tih chuan tiin rem a lo ti ve a. A tuka Station lama kal turin an mu ta vang vang mai. 

"Kha tuilum.. " Zoteii chuan an pa chu a pe a. A lo la ve mai. In awm takin a lang a, a lem duh hauh lo. Zoteii kal bo chhungin a va leihbaw ta vek a. 

"I va in zo rang ve. a sat sat nen" a rawn ti a. 

"Sâ te chu ka ngam alawm" a ti mai a. A nupuiin a ruka a chetdan a thlir ruk reng chu a man thiam vek. Inveng ru rana awm chu nuam a ti lo kher mai. An mu ta a. Dar 1 bawr velah an nu chu a tho ţham ţham a. A muhil nge muhil lo tih chu hnai taka rawn melhin a chian leh te te phawt. Ani lah mutui ber niawm takin a hnâr der sûk sùk a. Zoteii chu room atangin a chhuak ta zauh a. A thawm a reh hnuah Rinfela chu tho ve vatin an nu chu a zui ta a. Choka lama bathroomah a lut tih a va hre thei. Bathroom kawngka bulah chuan a ding ta ran a. 

Zawi sap a, "Tuilum a in duh tawh lo. Nguri vang vek a ni ngei ang. A leihbaw vek alawm" an nuin a tih chu a hria a. 

Lehlam thusawi erawh a hre thei lo. 

"Nguri pasal hi i khing zoin ka ring lo a ni. A haw phawt loh chuan chetlak a ngamawm loh" an nu chuan a ti leh a. 

"Aw le.. Naktukah chuan bazar tur angin ka lo chhuak dawn nia.. Chuan, ka lo call loh che chuan min lo call tawh suh. Naupangin an lo hmu thin a.. Ka pha thei hram zel.. Ka dah dawn a nia. Naktukah kan sawi tha dawn nia. Msg chu engmah hnutchhiah tawh suh ka tih tawh kha. A rem lo" a ti leh sep sep a. Nia, Rinfela hian a phone han khawihsak leh zauh chang a nei ve a, msg hmanga chanchin inhrilh chu a rem meuh lo a ni. 

Rinfela chu rang zetin an room lam panin a tlan let a. Tui taka muhil niawm takin a thaw leh ta sûk sûk a. A thinlung erawh puahdarh châk vek khawpin a sahal si a ni. A tâwt lutuk chu a thaw tha thei lo hial.. A nupui, rei tak chhung a lo neih tawh chuan a phatsan a maw?! Engtin nge heng thil hi a nih theih le? Engtik atang khan nge.. Zawhna tam tak chu Zoteii chiahin a chhang thei ang.. A tlaivar ta thak a nih nghe nghe kha. 

"Terin, Zuala khan a lo bia che em? " Tukthuan ei laiin Muanpuia chuan a ti a. 

"Aw bia a" a lo ti ban chhalh a. 

"I chhang em ni? " chiang takin a rawn melh a. 

"Chhang ve tho e. Mahse, ka chhang vek lo" a lo ti a. 

"Ih maw.. Ka nau i nia, i tana tha tur ka duh. Zuala hi misual chu a ni lo, mahse, a phunglung ve bakah zu a in thei viau a. Ka duhpui lo che a ni" a ti ta a. 

"Umm ka duh lo hrim hrim kei pawn" a lo ti ve mai a. 

Muanpuia thawh lai chuan, "Nih, bialnu an hualsak che kha in inbe ta mi? " a ti zawi sap a. Engtin nge chu thu chu a sawi ngam zawk tiin a inngaihtuah nghal. 

Muanpuia pawh a ding chat. A rawn lehhawi a. 

"Pasal nei phawt la.. Nupui chu ka la ngaihtuah ve ang chu.. " a ti zawi raih a. Terini chuan hriatthiam loh hmel takin a lo melh reng ringawt.. 

(Guys, naktukah Online exam ka nei dawn a. Min lo ţawngţaipui ve r'u aw 😊 chuan, naktuk chu story a awm dawn lo tihna a nih chu..lo hrethiam hram hram 😍