Thutiams2-11

THUTIAM (S2)- 11

Ziaktu: Toni Râlte

Rinfela nupui Zoteii hi a pian leh murna chu Zawlpui lam daih a ni a. Vanduaithlak takin thla 2 lek a nih laiin a nu hian tuihri vangin a boralsan a. A pa chuan nupui dang, Tuikuk neiin a fel viau naa, fa dang an han neih hnu chuan Zoteii chu a ngaithei ta mang lo va. Tichuan, Lunglei lama a nu pa farnu a pi te inah a awm ta a. School te pawh a kal ve a, mahse, lehkha lam chu a timi vak lo nge; a bansan ta thuai a. Puanthui te a zir chho ve a. Nula hmeltha tak tia sawi theih ni lo mah se; amah hi rualkawm thiam tak, nuih duh deuh mai a ni a. Kum 20 a nih khan Hnahthialah a pi nuţapa te chhawmdawl turin a rawn awm ve leh ta a. Rinfela nen hian an intawng a, an innei zui ta mai a ni. Sawi tawh angin an puk lawk a, Remi hi an inneih hnu thla 6-naah a piang nghe nghe. An inneih tirh kha chuan mo fel, pasal te zahthiam tak kha a ni a. Mahse, mihring hi kan danglam ve zung zung bawk nen. Pi Sangi a upat ve deuh tak hnuah kha chuan thuneihna chan a tum luatah a ze tha lo a chhuah ta zeuh zeuh a nih kha.. Rinliana nen hian engtiang chiahin nge an inzawm tih chu hunin a la hril ang chu.. 

"Pangparah chuan rose hi ka hre lar ve ber. Anu hian a ching nual a, an hming pawh ka hre ve hlawm lo e a" Nauteii chuan Sangpuia leisak Rose sen duk nalh zet chu a khawih niap niap a. 

"Kha pangpar nen khan in mawina a inchen chiah" a lo ti sup. 

"Inlak ril vak a ngai lo, a tenawm" a lo ti si. Cottage-ah an pahnih chauhin an awm ve ran a. Ni a la tlangsan deuh avangin dil pawh chu an la thlir kual rih lem lo. Sangpuia chu puitling tih takah Nauteii zâm ruk dan tur a hre sa a, a zâm loh theih nan titi tur a vawrh kal reng a, Nauteii sawi duhzawng tur a ngaihtuahna lamah a thluak te chu na vek maiin a hre hial nghe nghe. Mahse, a rin aiin Nauteii pawh a confi ve a, thian inkawmngeih tak ang maiin ni hlimawm tak chu an hmang ve a ni. 

"A lum eee, inphelh thawl ve rawh" A tshirt hlih pah chuan Sangpuia chuan a ti a. Tawnzau leh boxer nen a awm teng teng mai. Nauteii chuan, "Ngai lo" a ti tlat. Sangpuia nuih a za deuh a. 

"Ka ît che i hlau mi? " a ti hû a. 

A lo bu nghat. 

"I mit chauh pawh kha lang se, ka ît tho che lawm. Ka ît che avang khan ka bawh ruak ruak dawn che tihna a ni lo, inthlahdul la, hahdam rawh. Ka ei lo vang che ka duat" a ti dam thluam a. A lum ve bawk si, Nauteii pawh chuan, "Min en reng lo vang che" tih pahin a kawr chu a phelh ve a. Tawnzau leh pyjama nen a tei ve ta thuak thuak a. A nalh thlawt a ni. 

Exam nan kar khat erh awrh chiah a awm tawh si a, Sasa pawh intichak luiin class a kal chho ve ţan a. A la damkawr tih chu a lang viau. An class ami te pawn a chanchin an lo zawt ve siam siam a. Tha takin a chhang ve mai. Lunch break-ah Sama te nen Mapuia te nen Canteen piaha Restaurant-ah an va chawl daih a. Canteen chu a lun bakah nghah rei a ngai thei si a, a tui falua lo bawk nen. An ning ve thin a ni. An thut fel hnu lawkah Ateii leh Becky bakah mi dang pahnih an lo lut ve chiah a. An bul lawk dawhkan ruak chu an rawn chuh ve that. Sasa chuan Ateii chu a melh lo lui hram hram a ni. Nuam a ti chiah bik lo nen. 

Becky leh an thian pakhat Dingi te titi chuan mei a nei angreng hle. Becky chuan, "Chu chu lawm Lalpuii pawn a then phal tak tak si lo va, Bena a move on dawn veleh tikhan intihhlum te kha a tum kual vel a, Bena lah a rilru a tha sia, a lo khawngaih lo thei si lo va, tikhan Rinpuii kha rilru na deuhin a siam phah ringawt. A bul chu Lalpuii vek.. Ka ten teh mai ania" a ti hlak hlak a. Sasai te chuan an hre pha vek. Mapuia erawh a awmdan a danglam lem lo. 

Dingi chuan, "Dik chiah, ka ten ania. Bena tikhawp khan a tina a, a runluih kual vel a. Rinpuii a kawp ve tan tihin a tuar zo leh si lo, Lalpuii te ang mizia hi chu cheap ka ti tawp. A selfish thlak bawk si.. " a lo ti ve mial mial a. Ateii chuan, "Aa.. Bena pawh khan Rinpuii kha a duh ve hman riauin ka hria. Lalpuii kha inrawlh leh lo se chuan an tha daih maithei a ni, " a lo ti ve a. Sasa thin chu a sa phat phat. Mahse, Rki'n a malah a rawn ţham a, insum turin a hrilh tih a hai lo. Sama erawh chuan engmah chiangkuangin a hre ve lo bawk a, a nui leh huah huah ringawt tawh. An eitur chah a rawn thleng a, an ei tan dawn chiah tihin, Becky bawk chuan, "Aa.. An thil ei saw a class lo e.. Ka thil order kha ka cancel leh si dawn. A dang ka'n chah teh ang" a ti a. Waiter a ko nghal zat bawk. 

Sama lah chuan fiamthuin, " A tuizia aw.. Mizo hrawkah chuan hetiang sachek kha fak hi lem a nuam ber mai," tiin a han hawp puk puk a. Sasa leh Rki an lo nui thung. Mapuia chuan Ateii te lam vawikhatmah a hawi lo. Ateii te titi kha hre lo a ni bik lo va, an awmdan cheap lutuk zawk chuan Ateii a lo ngaih thin dan pawh a tidanglam dâwrh thei mai. Sasa chu insum thei a ti ru viau nghe nghe. 

An ei zo an chhuak tur chu Ateii chuan, "Sasa, i dam chiang tawh maw? I landanah kha chuan i la dam chiang lo a ang deuh. Inenkawltha rawh, exam a hnai tawh bawk sia" kam thlum zet hian a ti a. 

Sasa chuan nuih var var chungin,, "Umm.. Ka dam chiang thawkhat reng mai. Damdawi mum lian an awm hi chuan" a ti ve ngat. Counter lam an pan zui ta nghal a. Ateii te chu an ner nawng ringawt. Mapuia lahin a rawn zai eih bawk si lo. A tlawmthlak veng vawng viau mai. 

College an panna kawngah, "An titi kha i lo hria maw? I laka beisei a neih sanzia kha. Ka thiam loh a ni tih chu ka hria. Nang pawn dawt i sawi aniang, ngaihzawng angin i be ve tho aniang" Sasa chuan Mapuia bulah a ti a. 

"I hmuh vek kha kan inbiak dan. Khatiang khan ngaizawng ve ila ka be lo vang. Ka tan chuan thian, min tihnat avanga ka kawm thar ang a ni. Nang nen inthen hlen dawn mah ila, ka nihpui kher lo mai thei.. Mahse, ka chiang lo" Mapuia chuan a lo ti a. Sasa pawn a hnial zui lo. A bialpa hlutzia a chiang thar a, thlah leh chu a tum lo bur tawp mai a ni. 

Lawmsanga te lui kal kha an rawn hlawhtling haw khawp mai a. A khi deuh sûng reng mai. Ram kal hi nuam a ti ve reng reng bawk nen.. Mahse, a chau ve viau mai. Zan muthmunah Nguri chuan Damdawiina a va kal atanga a thil hriat te chu a hrilh siam siam a. Ngun takin a lo ngaihthlaksak. 

"Zoteii leh Rinliana te inzawmna chu kan hriat phawt a ngai anih chu.. FIR thehlut ringawt ila, finfiahna zawn chhung nen, ruang phawrh ngai dawn bawk.. Chhungkua kan mualpho te pawh a hlauhawm si a. Rinliana chu hriatchian tum phawt mai ang" Lawmsanga chuan a ti mawlh mawlh a. 

"Nia, mahse, fimkhur a ngai viau ang. Ka nu thihna nen a inzawm lo ve thei tho a.. " Nguri'n a lo ti a. An pa melh sawr sawr chungin, "Muhil tawh rawh. I chau awm si.. " a ti zawi raih a. 

Nguri chala fawp zauhin, "Umm nang pawh aw.. Ka hmangaih che" tiin Nguri a kuah thawk a. An ngawi dun ta vang vang a. 

Remi zing tho chuan phak chuap hian, "Nu, nizan khan i chhuak tlatin ka hria.. Khaw nge i kal a? " a ti a. A ham bai bai bawk. Zoteii chuan rum zeta a fanu melhin, "Khawiahmah ka kal lo e a.. Thawh hmat te hi zir teh. Tlai zet zetah hian i rawn tho a" tiin thu dang a lo sawi zung zung a. Remi lah chuan, "Awihawm loh e, i lo luh lai kha ka hre reng e a" a ti leh hram. Rinfela chuan an nu melh chungin, "I chhuak ami? " a ti a. 

Zoteii chuan, "Teuh lo lutuk, a mangphan aniang he nu hian" a lo ti hlak hlak. 

Chutah an pa melh leh chungin, "I luhai reng te chu vawiinah va inentir ila.. Nguri te an la awm tho a. In pawh an lo nghak ve thei tho alawm" a ti a. 

"Aa.. An ni rin ringawt pawh chu.. Chutin a nasa em em lo, a rawn hai ve zeuh zeuh ringawt alawm" an pa chuan a lo ti a. Zoteii chuan a nawr na ngam lo. Tukthuan an ei zui ta nghal a. 

Terini bazar kal hawng in an va luh chuan a chek ve hlak mai. Chhuatah chuan zu um ruak pahnih a let bul a, pheikhawk in khing lo a lo darh niaih bawk. Thutthleng seiah chuan nula pahnih hi a bawkkhup zawngin an lo mu hnar kuk kuk bawk a. Chhuatah mipa thau lam, hang lek lek hi a zangthal zawngin kawr ha lovin a lo mu tung bawk. Terini chu thawm dim takin choka lamah a lut a, a chawhmeh lei te chu a dah fel sawk sawk. Tukinah Muanpuia zan khat riak turin Thenzawl lamah a phei a. An hna thil a ni awm e. An pa awm loh chu a hriat leh hle mai. Chhuata thil tla darh ho chu a chhar zung zung a, zu rim lah a nam hum hum bawk si. Chutia a chet mawlh mawlh lai chuan Saii te room atang chuan mi pakhat sang lam, hmelchhe vak lo hi a rawn chhuak hlawl mai a! Terini nen an inhmachhawn ta ran mai. Mahse, Saii a sam tawn tha mawlh mawlh chungin a lo chhuak ve a. Terini a hmuh chuan, "I lo haw tawh ni maw? Eirawngbawl hmain Bawihteii va la lawk rawh. A pite inah" a ti nghal zung zung a. Tui a va in khawlh khawlh. 

"Chuan ka thiante hian chaw an ei nghal dawn a. I bawl kep dawn nia. Dave, ka intleuh zuai ang a, min va chhuahpui zuai rawh aw.. In leih dai ve rawh nang pawh" mipa melh pah chuan a ti leh zat zat a. Roomah a lut leh nghal daih. Terini pawh ngawi rengin Pu Mawia te in lam panin a phei ta hnak hnak a. A chhungrilah lungawi lohna leh Saii tenna chu a rawn lian tulh tulh mai. Amah chhawrtu a ni nameuh mai, mahse, chutianga zahawm lo lutuk leh a pasal thlima hun a hmang chu a hua a ni. Fanu a nei bawk, a fanu pawh hrechang lek loin tikhan nuam a chen chu a nia! Ama dinhmun a hre chhuak zawk. A nu pawn a fate aiin mipa a thlang a, an inthen darh phah ta chiah reng a. Pawi a ti. Muanpuia a khawngaih takzet a ni. Englai pawn a chungah Muanpuia chu a tha thin a, demna tur leh sawiselna tur a hre lo. Chuvang chuan hetia a zin bo hlana Saii a lo che vak hi a ngei ngawih ngawih. Pi Lawmi te bulah te chuan sawi vek mai tur em ni ang aw tih te a ngaihtuah hial! Mahse, a buaina tur niin a hre chiah si lo. Hetiang chhungkua atanga Candy a seilian tur chu pawi a ti. Pi Lawmi chuan a lo be siam siam a, an fel thei ania. Candy chu a lo harh tawh a, Terini chu a lo ban hiam hiam mai. An inpua a, eirawngbawl a la ngai si a, thu khawmuang lovin an phei leh nghal. In a thlenin Saii te chu an lo chhuak dawn vel mek a, "Ba lam tur ka nei a, ka chhuak lawk dawn. Chawhmeh chu i tih ang ang kha lo siam mai rawh. I u in a lo biak che chuan, a nute a tlawh lawk ti ang che" A ti zung zung a. Davida nen chuan an chhuak zui nghal. Candy chu toys khalhtirin eirawng a bawl zui nghal a, a ngaihtuahna a kal thui hle. Nula pakhat zawk chu a rawn harh a, a uak bar bar mai. Terini a hmuh chuan, "Puih i ngai em? A zia lo hle mai. Kan lo in hnem deuh a ni" a ti sawk sawk a. Nula lian tak, sam buang thung mai, mit leh hmui hnawih nasa ve tak a ni. 

"Aih ngai lo ve.. Ka tithei alawm" a lo ti dam diai a. 

"Aa.. A nuam lo, tihtur awm chuang hleinem.. Khawi ka lo pui ang che" a ti leh sawk sawk a. Terini antam then lai chu a rawn thenpui a. A landan ang lo takin a fel phian mai. 

"I U Saii te chu an chhuak ta mi! " a tih chuan a lo bu nghat a. 

"I rin ang kha a ni lo ania aw.. David kha Saii best friend a nia. Engtinmah an awm lo a nia" a han ti ngawt a. A puangzar lek fang a ni zawk. 

"Rindan ka nei hran hleinem" a ti ve mai a. 

"Mahse, Saii hi chu nu a ni tawh tih a theihnghilh thin a, a pawi. Muanpuia lakah zeppui hram rawh aw. Amah Muanpuia pawh a khawngaihthlak" a ti zung zung a. An titi tui ta phian mai. 

"Hmm.. Khawi a tawk.. Ka thawchham dawn" Nauteii chuan Sangpuia nam pah chuan a ti tham chhal a. An infawp rei ngat ngat bawk a ni. 

An thaw ham ham a. Sangpuia phei chu a inpeih tihtih der tawh. Mahse, Nauteii hi a hun hmaa khawih chhiat a duh lo, a chhung ten ring takin a bulah an kaltir a. An rinna tihchhiatsak a duh bik lo a ni. 

Nauteii khur ru der der chu hre rengin, "Inkiss hi zir i la ngai nasa.. Min hám vak zel a. I áng phuau zel bawk si.. A nuam lo" a ti ta a. Nauteii a meng ráng nasa ngang mai. 

"I zak thlawt em? Kei ang rualah chuan ka zei khawp zawk ang aw" a ti tán tán a. A rilru thianghlimzia a lang, a kum rualpuite zingah infawh chu sawi loh sex-a fihlim lo an tam vei nen, amah aia zei lo lehchhawnga a ngai pawh chu a rilru a tha tih a hriat ngawih ngawih. 

"Aw.. Ni mai teh se.. A rei anga, i la zei ve èm ang chu" Sangpuia chuan a ti nghut a. 

"Inha la, dil chu i zuk fang tawh ang. Ni a dai deuh tawh e" a ti nghal zat. Nauteii pawh a inthlak sawk sawk a. Sangpuia nena infawh nawmzia kha a hrethiam ve vek. A inthiam lo deuh dawn a, mahse, " aa anu pawn inkiss chu a phal ve tho" a ti rilru leh ta zawk a. 

Nguri erawh ama buai buaiin a buai ve leh a. Chhungte ka tlawh chhuak dawn e tiin a pa lama an chhungte ho a tlawh kual a. A patea te inah thingpui in a thu khawmuang a. A patea nupui Pi Tei nen an titi a. 

"Nute, Damdawiina thawk Rinliana khi i hre ve em? " a han ti phawt a. 

A chhan chu A nuteii hi Wada -ah thawkin Damdawiin hi a tlawh ve fo vang a ni. 

. "Hre ve e.. Teh daih che chuan, ti nge? " a lo ti a. 

Lawm ru tak chungin, "Ka hmuh hnu a ang ka ti sia, ka hrechhuak thei mai si lo va. Hnahthial khua chu a ni lo tiraw? " a ti a. 

"Ni nang, Lunglei lam a nia, A fel pur pur ania. Nupui fanau lah hi a la nei lo nge ni, tisawn a parawl ta reng ringawt a" pi Tei chuan a lo ti ve a. 

"Ti daih ila, Zoteii chhungte lakah hian ka lawm vak lo ve a. In bul ania ka vui ve mai mai. Ka nu thih sarhu laia an rawn lan bak kha an rawn lang leh ta miah lo va.. Mak ka ti ve reng" Nguri chuan a ti leh daih. 

Pi Tei chuan, "Ngawi teh, Fela nen an inneih hnu hian an intlawhpawh ta mang lo zawk, Fela kha an lo duh vak lo nge phei zawng ka hre lo va. Zoteii tak pawh hian a tlawh khat angreng. An pa nen an inbakkaih nikhua pawn a thiannu Zoi te inah zel sawn a tlan thin" a lo ti ve a. Nguri a bengvar leh sawt. Achawii kha zawh a tum deuh naa, Achawii leh Zoteii hi ui leh kel thlunpawlh ang deuh, inngeih lem lo, a lang apaua inbe ve mai mai an ni tlat a. Achawii chuan a hriat vak a ring lo a ni. Thingpui an in zawh chuan a patea te chu a chhuahsan leh ta phawt a. Hmabak a ko hlein a hria. Zoteii leh Rinliana te inkarah hian eng emaw chu awmin a hre bawk si.. An inngaizawng em niang tih a han ngaihtuah lahin Zoteii chu chutiang mi êm a nih a ring phal si lo. Lunglei atanga rawn pem ve ve an nihnaah chuan hriat tur eng emaw tak zawng a awm a beisei a ni. Hmanhmawh taka chet lak chi a ni mang bawk si lo. 

Sasai te balcony thlang lamah thu dunin, thlifim an dawng dun a. 

"Exam a hnai tawh sia, thiam ka la nei mang si lo. Ka rilru a hah" Sasa chuan a ti. A. 

"Ka lo leng leh bawk sia.. Ka haw mai dawn mi! " a lo ti a. Melh ralh pahin, "A tul lo bawk aw. Lo leng lo mah la ka zir peih chuang lo. Nang chu college i chhuahsan tep tawh sia.. A hrehawm dawn e" a ti niah niah a. 

"Ka pa hian Pune lama min tirh liam ve a tum deuh lehnghal" a lo ti khauh. 

"Awii.. A ngai lo, engtin nge ka awm ang a? " a lo ti hlar a. 

"A.. I lo rinawm em em tawp ang. Kei chu chiangsa a nia. I rinawm thei ang tiraw? " thutak zawk hian a ti a. Sasa chuan chiang taka rawn melhin, "ka tihnatna che man tozia kha ka hria alawm.. I tana rinawm chu ka tan a harsat ka ring lo. Mahse, nangmah zawk hi ka hlauthawng thin. I bialnu hmasa ber ka nia, hmeichhe dang kei aia hmeltha leh fel tak tak ten rawn zar ta che se la.. Enchhin i duh vang hrim hrim pawn i pen mai ka hlau thin" a ti ta duah a. A hlauhthawnawm ve bawk a ni. 

"Thil i ngaihtuah nasa lutuk anih chu.. Chutiang chu lo thleng pawh nise, ka hmangaih che a. Ka phatsan che chuan ka hmangaih lo che tihna a ni dawn asin. Mipa ka nih chuan mi ka hmangaih che ka tih tawh chu engvangin nge ka phatsan ang? " a ti ta khauh a. Sasa chu a hahdam huai mai. Mapuia a lo tawng hi a lawm ngawih ngawih. 

Arsi an inhmuh tam siak a, an nui hawr hawr reng mai. Tuman an rawn hmu pha lo bawk a. Mapuia chuan Sasa chu a lamah kuah hnaiin uluk zetin a fawp ta vang vang a. Mipa ta na ná na a lo nghei rei ve tawh bawk nen, a lo insangmar leh ţùn hman a. Sasa pawn a hai lo, mahse, a hmun chuan a zir mawlh si lo va. 

"Exam zawh veleh in huanah kal ila.. " a ti sar sar a. 

"Lutuk.. Chuan" awmze nei zet hian a rawn melh a. A hmelthatzia chu aw.. "Chuan… ih.. I ta ka nia" Sasa chuan a ti sap a. Hnai taka inmelhin an nui dun a. 

Ateii erawh lehkha zir tur inchhawp siin phone a kheuh malh malh reng a. A mood-ah a awm thei meuh lo a ni ber e. Exam chu zawh vata Mapuia rilru en nana han dam loh der vel chu a chak tawh hle. Ani pawh a vawikhat tawnnaah a luangliam nghal a, a dai thuk mah mah dawn a nih pek hi.. Kan ta tur ni hauh lo te bawhzuia an laka beiseina kan la nei tlat hian natna min siam thin. Beisei tur awm lo pui pawh beiseina insiamchawpin rahbi kan la intuk chawp hram hram zel a nih hi maw.

Saii te pawh zu an in leh phawt hnuah Terini siamsa ei turin dawhkan an kil ta thap a. Terini erawh an rualin a ei hman lo. Candy awm a ngai bawk nen. A retheihthlak mang e aw. An rui lungpuam lah chu hmeichhe pakhat lo ţap, pakhat a lo inhrosa bawk. Chaw pawh an ei hleithei lo. Saii leh David erawh an rui over lo niin a lang. 

"Terin, muanpuia'n a lo bia che em? " Saii chuan a ti a. "Be lo' a lo ti sap. 

"A tha.. Thil thleng hi a them pawh i sawi tur a ni lo vang. I sawi tih ka hriat chuan pawisak ka nei dawn lo a nia" a ti ram leh hmak a. Mipa lo awm ve khan, "A huai thei asin.. Ka nau hi chu" tiin a rawn on khanglang nen. An pa a nin thu leh inthen a duh thu te, Muanpuia'n a la chelh tlat thu te a sawi ta zut zut a. Terini a lo îp chawih chawih mai. An eina vel a sengfel leh vek a. An ni erawh woofer-ah ring tawka zai playin an la rak duai duai mai. Hawn pawh an tum lo a nih hmel. Dar 8 velah Saii leh Dave chu roomah an lut leh that a.. Terini chuan Candy chu a roomah a va mut thung. A en ngawih ngawih a, a khawngaih takzet a ni. Heti taka a nu ngeiin a ngaihsak loh leh nalh leh nawmsak a duh zawk avanga a thlahthlam hian tu pawi mah a sawi lo asin le.. A hmai a phih lai chuan kawngka chu an rawn kik dat dat a, hlauthawng ru takin a va hawng. A tawlhhnung dâwrh mai. Muanpuia chu a uniform nen a lo ding ran mai. Terini hmel lan dan atang chuan engkim a hrethiam nge a rawn lut tlang pawp a. An zai play lai chu a off nghal hmak. Lo thu ve te chuan mak ti em emin an melh kuau hlawm a, an mitmengah hlauhthawnna a inzam tel bawk. 

"Saii, Saidinglian, " aw nelawm vak lo hian an room kawngka bula ding chungin a ti a. Room chu a ri deuh khat khat.. A hnu feah Saii chuan a rawn hawng ta a. A hmel phelh leh a mit hnawih pherh phang chung chuan tim dai hian a lo chhuak a, Muanpuia chuan a lo en uluk kher mai. An khum lah chu a chuar tun a, David erawh hmuh tur a awm lo. Muanpuia chu roomah lutin bathroom a hawng nghal a, a duh a hmu lo. Almira lian tak chu hawng lehin Davida lo tawm ru khar chu a hnuk chhuak ta a. Ngawi rengin Davida chu a hnek ta mial mial mai le.. Mi dang chu an ri chul a, an rawn chelh vat hlawm. Saii pawh chuan, "Eng nge i khawih ringawt a. I va zak lo ve. Engtinmah kan awm lo" a ti phar phar a. 

Muanpuia chu a la ngawi ta fan. Duhtawk a ngah ta nge Saii chu a pan ding nalh. Eng sawi set set loin a hmaiah a beng thlawp a, Saii a awp rawk. Chhuatah a tlu ta a. Muanpuia chuan Saii chhipsama kek chungin a kai tho a, Kawngka lam a panpui nghal. 

"He in hi vawi khatmah rawn rap leh tawh suh ang che. Nangni ho pawh kha chhuak ru.. Chhuak ru.. Ka hmu peih lo che u. David, Saii thiantha inti siin i thiannu chu a pasal lak ata i uire a, i nei ngei tur a ni. A tha em? Saii, hei hi hre rawh. Ka damchhungin ka ngaidam dawn lo che a. Rawn tlawm kual vel kha a ngai hran lo vang. A tenin ka ten tawh che. Ka fanu hi ka ta a ni bawk ang. I bungrua chu naktukah i chhungte i rawn laktir dawn nia.. Kal ru" tih leh mi dang pawh chu nam chhuah a rual nghal a. An thenawm te chuan tukverh atangin an lo thlir ru thap mai. Saii chuan thinrim takin, "Zawnga, hmela, engmah hrechiang loin tihian min hnawtchhuak a maw? Lo ngai reng rawh. I la inchhir khawp ang.. Tenawmpa.. I la chawh dawn khawp e" a ti hlawih hlawih a. Mahse, Muanpuia ngeng a chhun pha eih lo. Kawngka a khar a, a kalh nghal hmak. Kil khata hlau zeta lo ding ngawi reng Terini bulah chuan, "Engkim a tha vek mai ang. Tunah chuan min puih a ngai rih dawn a ni. Terin, ka fanu hi i enkawl rih a ngai dawn aw.. Khawngaihin min chhuahsan suh ang che" a ti dam ruih a. A thinrimna te kha phumbo ang maiin a hmelhmaiah hmuh tur an awm tawh lo. 

A lu bu nghat nghatin, "Umm ka enkawl ang" a lo ti sap a. Muanpuia chu roomah lutin zan khuain a rawn chhuak leh ta lo. 

Pu Mawia'n an chanchin a hriat chuan an nu bulah, "Ngawi teh, Mama nu, ka fapa te pahnih chu an nupui ten an uiresan ta ve ve chu a nia. Hei hi vanduai vang ni ta berin ka hre ta lo. Keini nupa hian kan tihtur pawh kan ti lo a ni mai ang a tih ka ngaihtuah. Kan fanu te erawh an nghet viau a,,zirtirna kan pe nasa bawk a. Kan fapa te hi nupui fanau chunga inlek dan tawk leh patling nih hi kan lo hrilh tam lo hle a ni ka ti ta..Lawmsanga leh Muanpuia te hi a nihna takah chuan nupui an enkawl thiam tawk loh vanga heng thil hi tawng an nihna chen a awm ve asin.. I hrethiam tiraw? " a ti nghut nghut a

Pi Lawmi pawh chuan, "A ni ngawt mai. Nguri hi chu aman a zir em a, tin Lawmsanga chu a lo chetsual tawhna atang khan a inzir a. Muanpuia erawh an nu hmasa kha uire chiah lo mah se; Saii mizia nen an danglam vak lo hrim hrim a. Hrethiam ve tawh tur a ni asin le.. Mahse, tunah rih chuan amah demna ang zawnga kan zilh chu a sawt rih lo vang aw" a lo ti ve a. An fate thil tawn avang chuan an zakin hrehawm an ti ve kher mai. 

Lawmsanga te pawn an lo hre ve a. Mak an ti vak miah lo thung. Chu ai chuan, "Saii kha a tlawm thiamin a zeihawi mai si a. Ka u thinlung hi a hneh leh mai ang tih ka hlau" Lawmsanga chuan a ti daih zawk. Saii chu a ngaina tehchiam lo niin a lang. 

"Aa.. A let ka ring tawh lo. A rilru a lian ve tho a, Saii pawn a rawn zai ngam kher tawh lo mai thei a ni.. Ngaihtha takin awm phawt teh ang" An nuin a lo ti thung. 

Terini lo awm ve chu Muanpuia te pafa tan chuan rangkachak ang maia hlu a ni ta. 

"Ani, apain lo chho lawk teh se a tia.. Apa Rema nen" Malsawma'n a ti a. Nguri leh Remsanga an chho nghal. An han thlen chuan, Rinfela chu chhuatah a lo vei nghut nghut a. 

"Kan Remmuani a bo pek a nih awm chu.. Bo tihah tu tlangvalin nge lo ru ni.. Kan la hre thei lo" a lo ti charh charh a. Hrehawm a tih hmel hle. 

Zoteii pawh tum bùr in a lo thu a. 

"A thiante atangin a hriat theih mai lawng maw? " Nguri'n a tih chuan,,"Kan zawt vek tawh. An hre tlat lo. Ngaihzawng a neih an hre bawk si lo va" Rinfela chuan a ti a. 

"A va mak dawn ve. Tunah hei dar 10 a pel tawh nia.. Zawn mai chi a ni lo maw? " Remsanga'n a lo ti ve a. Zoteii chuan, "Han zawn vak lah hi a mualpho thlak ve bawk sia.. Ka hrethiam tawh lo. A call tlang theih der si loh. He nau hi chuan min va timangang thin tak em.. " a ti hlak hlak a. An buai ru nek mai. 

"Engpawhnise, an tlan dun ve te a nih ngai chuan, naktuk lamah chuan chanchin kan hre em em ang. Pasal neihtir hmiah hi a pawi lo a nia.. " Nguri chuan a lo ti a. Nia, a mizia leh nungchang ngaihtuah chuan pasal neihtir mai kha a pawi hran lo a ni. 

"Zanriah a ei em? " Remsanga chuan a lo ti ve a. 

"Chawhnu lama a chhuak kha a la rawn haw lo tawp" Rinfela'n a lo ti vat. A va buaithlak thin em. Tihtheih a awm rih si lo, Police hrilh pawh nise, darkar 24 ral hma chuan hma an la thei si lo. Ngaihtha vak lo chungin an mutsan ta phawt a. 

"Ngur, tho teh.. Hei harh teh.. Remmuani a thi a nia" Lawmsanga'n a rawn tih chuan a inperh tho zawk mai. Makti em emin a pasal chu a melh a. 

"Eng nge awmzia? " a ti hap. 

"Umm.. Damdawiin thlanga hmawng kungah a lo inawkhlum a niawm e. Damdawiina an hmun phiatin a hmu a nih chu.. Tirawh.. Kal vat teh ang" a ti sawk sawk a. Nguri erawh a chechang eih lo. Chhuat lam melh ranin, "He thil phèna thurùk hi ka hrechhuak khawp ang" a ti vawt raih a. 

(Vawijn chu minnduat ve mai ru.. Ka kut a kham lutuk.. Naktuk ka chawlh ni a nih kha aw.. Lo inenkawl tha ula 😘😘