Thutiams2- 10

THUTIAM (S2)- 10

Ziaktu : Toni Râlte

Nguri'n a nu room a chinfel lai chuan Malsawma a lo lut a. "Anî, anuin thingpui lo in rawh a ti" a rawn ti a. 

"Aw ka hman tep e" a lo ti a. A nu room hi an thiat tel ve lo va, a zau hran lo. Lehkha pawimawh te chu file-ah fel takin a awm thlap a. Han chinfel em em tur a awm hran lo. Zawn chu a nei a, eng nge a zawn erawh a hre mai lo. A nu khan sawi duh zawng a nei chiang a ni. A dunlop chu a let thawk a, a leh thlak rual chuan lehkhaa infun thil dip var hi a rawn tla ta a. Chhuatah chuan a darh deuh niaih mai. Rang takin a en vat a, a han hnim chuan eng nge a nih a hre mai lo. Uluk zawkin lehkha dangah a tuam a, chhuata tla chu a phiat khawm a. Sulhnu engmah hnutchhiah lovin a chhuahsan ta a. Thingpui an in lai chuan, "Ka nu kha a muhil thei lo thin em? Kan tet lai pawh khan mutthilh theih loh chang kha a nei thin a" a ti thuphung a. 

Zoteii chuan, "Neih vak awm pawh ka hre lo. A mu hma a, a tho hma ni mai zelin ka hria" a lo ti a. Thingpui in zawhah Nguri chu Dini te in lam panin a kal a, an pa a lo awm lo hlauh a, a remchang phian e. 

"Ka hriat duh chu, Zoteii leh ka nu kha han inngeih loh deuh emaw han inbakkaih chang an nei thin em? " tiin a u Dini chu a zawt a. 

"Nei ve tehreng e. Keimah nen pawh kan inhau hrep tawh alawm. Zoteii khi a fel viau dawn emaw ka tih laiin a mo rei tak hnu khan a huatthu a chhe chho riau a, ka nuin ama pawisaa a thawmhnaw ve tur a han lei te kha a hmumawh thin a. A fate a duatsak tehlul nen. Chuan, Remmuani nen khian ka nu kha inti thei thak lo, eng lai pawha inhal an ni bawk. " a lo ti ta bawrh bawrh a. 

"Engvanga Remi nen teh daih chuan inmil lo nge an nih? " Nguri'n a tih chuan, "Kan Remmuani nungchang khi dik hek lo. A lerh si a, ka nu khan a zilh hau ve thin a, kha kha a hua mawle.. Zoteii'n Remi a lo tan ve tumhrang nen, Remi avanga an inhauh khi a tam mai. Ka nu khan a sawi tha duh lo em zawk a" Dini chuan a ti hlaih hlaih a. 

"Rinfela a inrawlh ve ngai lo mi? " a tih chuan, "Khi pa khi duapzula a nih khi. An nu tih ang ang khian a awm ringawt. Kei te hi a u ka nia, min zahderna pawh a nei tawh lo. An nu khian a fuih khawlo vek alawm. Ka nu dawr hralhna kan chang ve te kha thenawm khawveng zawng zawngah a sawi darh a, ka nu ta a ni a, a duh duhin a ti thei reng sia, a hralhna sum an chang ve lo pawh ni hlei lo. Ka mil thei tawh thlawt lo" a lo ti leh hmiah hmiah a. Dini hi chu Nguri zia nen letling tak, thil ti tu tu chi, insumkar vak lo chi a ni ve bawk a. 

"Kei chu U Din, mi dang hrilh chuang lo la, ka nu thih danah khan ka lungawi thei lo a ni. Eng emaw hi a awm ka ring tlat" a ti ta tawp a. Dini pawh a ngawi dat. 

"Nia, a hmaa kan sawi tawh ang khan kei pawh ngaihthat lohna riau hi ka nei tlat a. A chhan ka chhut thiam bawk si lo" a lo ti ve a. 

"Tihian ngawi rengin ka veh dawn a. Eng emaw chu hriat ka nei thei maithei a ni. In pa pawh lo hrilh rih suh aw" Tiin Nguri chuan a chah a. A chhuahsan ta nghal a. 

Sasa pawh rin aia hma a sawn chak avangin leh doctor an ngen nasat avangin in lama inenkawl zui turin damdawi chu an chhuahsan ta phawt a. Mapuia pawh a hlim hle. Class erawh a la kal thei rih dawn lo thung. Sasa laka a hriat duh kha engtin nge a hriat chhuah ang tih a ngaihtuahna lamah a chau zo. Mipa thenkhat tana awlsam kha ani tawnhriat reng reng la nei lo tan chuan kalpah mai a harsa ve bawk a ni. Shalomi chuan a call a la duh ngai lo va, whatsapp-ah chiah a biak theih. Mi dang han hrilh vak chi niin a hre bawk si lo. 

"Sasa chuan engtikah nge nau chu a tihtlak a? " tia a va zawh lahin, "Amah zawt rawh. Mahse, a sawi duh bik kher lo maithei.. " a lo tihsan mai si. 

"I thusawi hi ka awih ta lo tawp mai. Sasa tihbuai i duh vang hrim hrim niin ka hria. Ni e, Sasa chu ka zawt ang a, i number pawh ka pe ang. Dawt i sawi anih chuan dawta i puh vanga hremna i hmu ngei ang" tiin a vau ve ta hmiah a. Shalomi te ang fing ziktluak si lo tan chuan a hlauhawm tan ta viau mai. A mangang ru ta reng bawk a. A intihhlauhawm duh luat vanga duh aia a lo kal thui ta chu pawi a ti ru ta hle. A number a thlak mai loh chuan an rawn zawng chhuak duh mai dawn si a. "A va ngaihtuah tawi thlak tak" tiin amah leh amah pawh a inhau ve nasa. Remruata lahin hma a sawn thei der lo va, Sasa chuan engahmah a lo ngai der si lo. "Mai mai hian a, ar talh dan chi khat chauh a awm lo ve" te chu a'n ti ve ngial a.. Kawng dang tha zawk han dap mai tur erawh a vân viau lawi si! 

"Tak taka ka lo tawng tam deuh a nih kha. Nau a tihtlak tak hi chu ka hre chiang bik lo va, mi sawi ka hriat a nia. Mahse, ka cousin boral chhan erawh Sasa a la ni reng" a va ti ta tawp a. Mapuia a khi suk. Shalomi hi hmeichhe mak tak a nih dawn hi a ti rilru a. 

"I cousin thih chungchangah chuan buaina ka nei lo. Thih a duh a, a thi a ni mai. Sasa pawn mawhphurhna a nei lo. Min lo be tawh lo la ka lawm ngawt ang. A nih phawt le" tiin a reply. Hmanah a Ni Sangi fapa amah aia kum 2-a upa hian bialnu a nei a, chu a bialnu chuan a duh khawp mai. Amah Hlima pawn a hun lai chuan a duh ve ngang bawk. Mahse, Hlima kha Pune-ah zirna avangin a awmbo ta a, a awmbo hlanin a bialnu Sawmi chuan mi dang a kawpsan ta a. Hlima'n a hriat chuan a tuar na khawp mai. Kum tawp chawlhah pawh a rawn haw ta lo reng a, nikhua a rei a, Pune-a mizo awm ve Nancy nen an inkawp ve ta a. Sawmi laka a natna te pawh a kiang chho ve zel a. Mizoramah rawn hawin thla khat zen zawn a rawn cham a. Sawmi chuan a rawn haw tih hriain a rawn belbul leh chat. Hlima ngaihdan a ni tawh si lo. A thiamna chitin hmanga a han thlem pawn Nancy tan a rinawm ve tlut si a. Sawmi chuan, "Ka ta i nih dawn loh ai chuan ka nunnain tuar mai rawh se" tiin a vau pek a. 

Hlima chuan, "I thu alawm. I nunna kha ka pek che pawh a ni lo a" a lo tihsan hmiah. Sawmi lungpuam chuan damdawi a lo rui ve nge, a damdawi hnathawh vang nge tih erawh a hriat loh. An bathroomah a lo inawkhlum ta mai a! Mahse, a mak tawp. Hlima chu chhete mahin a nghing lo. "A duhthlannain min phatsan a. Ka duhthlanna hi a palzam thiang bik lo. A thihnaah hian mawhphurhna ka nei lo. A duh a hmu a ni mai" a ti hmiah. 

Chung thil a ngaihtuah avangin Mapuia pawn Sasa vanga lo intihlum hial an awm anih pawhin Sasa chu demna a nei hran lo. Mahse, Hlima te boruak nen khan a inang lo ve thei tho tih erawh a hria. Amah vanga Sasa'n intihhlum a tum hial tum te a ngaihtuah chuan, Sasa pawh hian intihlum thei lo tur khawpin a lo tina em mawni le tih chu a ngaihtuah ve tho. Amah ngei a la zawt ang chu.. 

"Ate, Mapuia chu theihnghilh tum tawh mai rawh. A bialnu khan a hauh na si, zahna i hmu mai mai zawk ang" Becky chuan a ti mawlh mawlh a. Ateii chuan ral hla tak thlir chungin, "An la inthen mai i ring lo mi! " a ti khauh. 

Becky chu a dang titih a, mahse, "Ka hre lo le.. An inthen hun nghah tawp pawh chu.. Mi dang hmu zo lo pawh i ni lo va" a ti niah niah a. 

"Hmangaih inţawm hi a lo hrehawm em mai. Sasa chu Mapuia'n a la hmangaih zawk tal a.. Kei chu thian bak chanvo ka nei bawk si lo. Week lai khan lo kawm malèk tur a nia. Ka beisei kha a sang êm a. Amah lahin min be tha ve tho bawk si.. " Ateii chuan a ti a. A rilru a nâ tih a hmelah a lang reng mai. 

"Nia, mi inkara tlakzeh ai chuan bansan daih a tha zawk. Sasa hi a rapthlak reuh si a, a la timualpho duh mai ang che tih ka hlau.. Bialpa tha deuh kan zawng dawn nia" Becky chuan a ti sar sar a. A thiannu chu a khawngaih ve hle a ni. 

"Nia.. Mahse, Mapuia hi ka hmangaih alawm" a ti ve tlat! Beidawng zetin Becky pawn a thiannu chu a melh reng ringawt. Ateii pawn thil tam tak a ngaihtuah ve a. Mapuia chu bansan a tum ve thin. A hmel a hmuhin a buai leh vek zel bawk si. Nizanah pawh a va call a, a busy char char a. A nghak ngat ngat. Mahse, a hnua a call lehin a switch off leh daih bawk si, whatsappah lah nise zingtin leh zantin a wish a. Tawi tete baka reply a dawng ngai lo. Mapuia thinlungah hmun a chang ve miah lo tih a pawm thei thlawt lo a ni ber. Hmangaihnaah chuan zahzumna pawh hi automatic-in a lo bo ve thei a nih dawn hi. Ateii pawn zak chung chungin mi bialpa tih a hriat reng, thian anga en tura sawmtu Mapuia chu a lama hnuh hnaih tumin theihtawp a chhuah ve zel chu a ni si a. Beisei a nei a, Sasa mizia a hriat avangin Mapuia nen hian an nih reng a ring phal lo. Chu hun remchang chu a nghak ve tawp a ni ber e. Hmangaihna zet hi chu aw.. 

"Naute, english-ah i hmu sang ber a nih hi.. I bon thei e nang chu" Msi'n a ti sar sar a. Hmangaihzuali erawh a ngawi reng ringawt. Sir Sangpuia a lo lut a, an test paper a rawn sem diat diat a. Nauteii pawh chuan a check ve leh a, a ngaihdan chuan a bialnu a nih vang maiin mark a pe tha emaw a tia. Mahse, a lo ni bik lo, a lo thiam ve bawk a ni. Mahse, Sangpuia chuan a hnuaiah, "Hmanhmawh vanga hand wriing tihchhiat tawh loh tur" tiin a comment kulh mai. A khi sak a. A lungawi veng veng mai. Break laiin Msi chuan a phone pai ruk chu phawrhin, "Naute, ei zo vat ila, khutah chuan min kalpui rawh aw.. Kan inhmu zuai ringawt dawn" a ti a. Ni e, thla khat dawn hmu si lova a biak, Pubg a khelhpui thin Johny nen an inhmu dawn a ni. Game an khelh dun atanga intawnga number indila inbe tawn chho kha an nia. Call te thlengin an inbe chho a, mahse, Johny hian a hmel dik tak Dp -ah a hmang ngai lo. Chuti chung chuan Msi chuan a pro em vangin a atchilh a, a duh huam huam a ni ber. Vawiinah Johny chu an school piahah thil a rawn lei dawn vangin an inhmu dawn a lo ni. 

"Ka zâm ve deuh,' an nghah mek lai chuan a ti a. 

"A ho lutuk.. Hahdam rawh" Nauteii'n a lo ti ve ngial. 

Rei vak lo an nghah hnuin Msi phone chu a ri ta ral ral a. Johny ngei a ni. "Hello" a tih rual chuan, "I hnunglamah lo hawi teh" a rawn ti a. A hawi vat. Bike-a thu chungin a rawn bia a. Mahse, Msi chu a ding khawng lah ringawt. A hmuh tum dan nen a inang lo nasa lutuk. Johny chu amah aia kum tlemtea upa hlek chauh, changkang tak ni turah a ngai a. Tuna a hmaa ding erawh dum ren run, hmuihmul ţo fur leh kuhva eina a hmui bawr vela sen sûng mai, balh hmel zet a ni tlat! Nauteii pawn a melh ve reng ringawt. "Lo phei ula" Johnya'n a tih chuan, "Dar a ri dawn tawh a. Kan kal mai ang" Msi chuan a ti hmawk hmawk. Nauteii a kai lawk a, an School step-ah a chhohpui hlawk hlawk. Nauteii hrilh a hai, Johny tak pawh hrilhhai zetin a thu reng ringawt. 

"Ti nge hetia i awm? A khawngaihthlak em kha" Nauteii'n a ti a. A thaw hlawi hlawi bawk. A kal chakpui êm a ni. 

"Awii a hmel kha ka ten.. Ka luak a tichhuak. Ka zak, Naute, ka zak lutuk. Ka lo be nasa ve sia. A thlalak min lo thawnte kha amah tak tak emaw ka tia.. Ka ngei lutuk. Ka duh teuh lo khatiang" a ti hlak hlak a. Nauteii chuan a hriatthiam loh hmel nasa. 

"Mahse, i bialpa a nia" a ti hliai a. 

"Khatiang online sas mai mai. Ka block daih dawn.. A chhe em mai" a lo ti tân tân a. 

"I la hmuh miah loh i duh a maw? " a lo ti hû. An thlalak vel an inthawn fo turah a ngaih vang a ni. 

"A pic min rawn thawnah te chuan a chhe lo ve tho sia lawm. Mahse, Dp-ah a hmang ngai lo thung a. Tumah hrilh suh ang che. Ka zak ania" Msi chuan a ti a. Nauteii pawh a bu nghat nghat ringawt. 

Chawhnuah ruah a sur nasat deuh vangin class lak a harsa a. A then an muthlu a, Nauteii pawh dawhkanah bawkin a hriat tham lekin a zai rat rat a. Suangtuahna a nei a, hetiang ruahsur hnuaiah hian Sangpuia nen khawi hmunah emaw inkai rialin kal dun se, Nauteii chuan vawt a tih vangin Sangpuia chuan a jacket hak lai chu rawn haktir vel se… tih vel mai mai a ni. Amahin a lo khir leh vur vur zel a, an piah maia thu Mabiaki chuan, "Ti nge i khik ver ver reng a. I ngaihtuah ka hria" a rawn ti chu a harh kâwk. 

"Fiamthu ka ngaihtuah a" a ti sawk sawk. 

Miss Feli chu a hnawksak tan ta riau mai. Sangpuia tak pawn tihvak ngaihna a hre tawh lo. Amah aia upa zawk a ni a, a ngam nasa mai si. Office-a an thutho lai reng te hian msg-in, "I dress kha i inhmeh thlawt. Mahse, rawn nalh vak zel suh. Student ten an star ang che" tih angreng, "Chawlh hi awm lo se, ka hmu reng thei che ang a" tih vel te a ni thin. Ka duh che ti dawt si lo hian awmze nei zetinna rawn be thin a. A chhang thiam thin lo. Bialnu a nei tih sawt ringawt ta se, "Ka zawt che mi? " lo ti leh si se.. A buaithlak. Nauteii hi a bialnu a ni tih an hriat a hlau, a chungah a ţuan ngei dawn si a. 

Rki nen Sasa roomah an lut a, a nu chiah a lo awm vangin Sasa roomah lut mai turin a lo hrilh vanga lut an ni. Khumah a lo mu diai a, a phone chu a lo lek mek bawk. An va luh chuan, "Awii.. Min van tiphu chiang tak. Rawn sawi lawk tur alawm, " a lo ti siam siam a. Chairah Mapuia chu a thu a. Rki erawh khumah. Eitur an ken te chu dawhkanah an dah a. Sasa room chu a zau over lo naa, a khat tha hle. Engkim chu felfai takin a inrem thlap a, hnawk leh mit tikham tur reng reng a awm lo. A mizia nen a inhmeh lo tawp. 

"Tukinah chaw i ei tha em? " Mapuia'n a ti a. 

"Ei tha ve e, rawtuai kan hmeh a, ka ei teuh a, ka pumin a zo leh si lo.. Ka e reng mai" zak map lo chuan a lo ti a. An nui hawk hawk. 

"A changtupa hi a hmanhmawh lutuk a, last period ka kal loh phah" Rki chuan a lo ti a. Sasa chuan Mapuia va melh relh chungin,"A rawn tlanpui vawk vawk che ni maw? " a lo ti a. 

Eitur an ken thenkhat chu Rki'n a kheh a. An ei a. Mapuia chuan a sawi duh chu sawi mai pawi a ti lo. Rki lah engkim hriatpuitu a ni ve bawk nen. 

"Ih, Sasa, hman velah nangmah vangin mi pakhat a intihhlum phah tawh mi! " a ti ta a. Rki leh Sasa an inmelh kâwk. 

"Engtin nge i hriat? " an ti rual ţhawt. Mak an tihzia chu an hmelah pawh a lang thei.

"Ih, min hrilh a. Miin.. Han sawi chiang teh u.. Engvanga intihlum nge a nih a? " Mapuia chuan a ti a. 

Sasa chuan lays hmawm thaih pahin, "Hmm.. Ih, keimah vang pawh a niin ka hre lo. Mahse, a chhungte khan min mawhpuh tlat a.. " a ti a. Mapuia a lo ngawi. 

Sasa bawk chuan, "Ruatsanga a nia, Chaltlang ami.. Class XI ka nih lai khan min bem nasa tawp a. Mahse, bialpa ka neih bakah amah kha hei ka duhzawng a ni lo a nih chu. A hmel pawh a chhe lo, lian ve deuh a nia, mahse, a mizia kha ti phawr phawr chi, attention seeker kan tih ang type kha a nia. Ka lo hnar a. Xii ka nihin ka bialpa nen kan inthen a, kumtirah a nia. Chuan, Ruatsanga bawk chuan min bem leh a, ka duh chuang lo. Ruatsanga cousin Atea nen kan inbe thin a, Atea chu College kal lai a nia, a fel tawp. Ngaihzawn chu kan inngaizawng hman lo. Atea bulah Ruatsanga chuan ka chanchin ni lo deuh deuhin a lo sawi a; Atea'n a sawi leh vek si. Ka thinrim ve lutuk kha Ruatsanga chu msg in ka va hau ta hrep a. "Ka duh dawn chuang lo che. Engtikahmah.. Ka chanchin lo ngaihven tawh suh. " tih velin. 

Chu chu a lo la na deuh nge, Atea nen pawh an lo insual phah a. Atea chuan a lo sawisa ve deuh aniang. An chhungte pawh an buai phah ve deuh a. An insual zo an ina a haw tur khan, "Hmeichhe pakhat vangin i nau ngei pawh min sawisa duh ania. In hre khawp ang. Zaninah hian Ruatsanga hi a ruang inhmu ang" a lo ti aniang. Mahse, ngaihthat lohna pawh an nei lo. Tikhan an theihai kungah a lo inawkhlum ta mai sia.. Atea zawk mawhpuh ta lo chuan keimah vek min mawhpuh a. A u te ho phei chuan min rawn ankhum nasa a, tih vak ngaihna ka hre lo kei chuan.. Chung vel chu a ni mai" a ti ta siam siam a. Mapuia pawn a ngaithla uluk viau. 

"Engtin nge i hriat teh daih? " Rki chuan a ti a. 

"Shalomi in hria em? " a lo ti thung. An hre lo ve ve aniang, an lu an thing a. 

"A va mak ve.. Shalomi'n mitthi kha ka cousin a tia.. Min rawn hrilh alawm" a ti ta a. Sasa chuan, "Khaw maw a lo biakna che chu ka lo en ve chhin" a ti ta zel a. Mapuia pawn a pe ve mai. Sasa chuan a chhiar ta vek a, thinrim hmel te a rawn pu leh thut thut a, a chang leh a nui leh hak thung. Phone a en zawhah rawn dak chhuakin, "Nau titla ang ten min lo sawi vel.. Rk.. A mak tawp" a ti ta a. 

Rki pawh chuan, "Ehe! Va mak tak ve.. Tu tak ni ang maw? " a lo ti ve bawk a. Mapuia ho chuan Shalomi chungchang chu an khel chho a. Sasa chuan nau tihtlak chungchang chu a ngai holam khawp mai. Chuvang chuan Mapuia pawn dawt a nih a ring hmiah. 

"Engvanga in pahnih inkar chu tihchhiat duh tlat nge a nih ang aw? " Rki chuan a ti vang vang a. 

Sasa chuan tîm lek lek hian, "Mapuia'n min hrethiam se, rin ka nei. Mahse, amah ka huat vang a ni lo, Ateii hian tel vena a neih inring lo maw?" a ti ta a. Mapuia pawn hei hi a lo ngaihtuah ruk fo kha a ni chiah reng a. 

."Mahse, Shalomi khan a cousin thihna vang a nih thu a sawi sia" a ti a. 

"Chutak chu kei pawh ka buai, Ruatsanga cousin teah Shalomi ka hre miah lo. Ka hre ve deuh vek kha a nia. A chhan chu min lo biak nasat hlawm avang khan.. Atea ka'n zawt chhin" Sasa chuan a lo ti ve vat a. A phone a hmet zui nghal. Sasa nuin thingpui a rawn dah a, a chhuak leh nghal daih. 

"Atea chuan, 'Kan cousinah Shalomi an awm lo. Mahse, Ruatsanga te unau zinga upa ber dawttu Duati khan Shalomi tih hmingpu thian a nei chuan ka hria a rawn ti a nih hi" Sasa chuan a ti a. 

"Ka hrethiam ta chiah. In boruak vel kha hmanruaah a rawn hmang a nih dawn hi.. Mahse, engvangin nge min inthentir chu a duh em em ang? Duati chuan a tihtir aniang a" Mapuia chuan a lo ti ve a. 

"Ateii kha be teh. Shalomi i cousin number kha min lo pe ti deuh thawr la, a chiang mai ang" Sasa chuan a ti thung. Thuawih takin Mapuia pawh chuan a be ve ta mai a. Rei vak lo hnuah, "Ngatan nge i tih a? " a rawn ti. 

"A chiang e. Shalomi chu Ateii cousin a nih ngei chu" Rki'n a lo ti vat. Engkim hailan a han ni ta chu Mapuia pawh a thaw huai mai. Shalomi pawh a block nghal daih. 

Nguri chuan damdawi dip chu kengin Damdawiin lam a pan a. An pa chiah a kalna tur a hrilh. Lawmsanga leh Remsanga te erawh luiah an kal, Lawmsanga a kal chakna a rei tawh bawk a. A phur viau. Rinfela te erawh inleng an la nei ve reng a, khawiahmah chhuak thei an la ni lo. 

"Hei hi eng nge a nih min hriatsak thei la ka duh khawp mai" Nguri chuan doctor bulah a ti a. A damdawi ken chu a pe nghal a. Doctor chu a lo fel khawp mai. Damdawi chu a han hnim vang vang a, tlem a liak zauh bawk. A ngawih vang vang hnuah, "Melatonin chawh dip a ang ka ti deuh. Rim a neih vak loh danah hian.. Eng nge i rawn kalpui chhan" a ti ta a. 

Melatonin chu sleeping pills a ni tih Nguri pawn a hria. 

"Nia, Doctor, Hnahthiala i awmna hi a rei tawh em? " tiin a lo zawt daih thung. 

"Rei lutuk lo, thla 6na vel chu a ni tawh ang" a lo ti a. 

"Hmannia nu pakhat mu hlum, an postmortem tak loh, khami fanu kha ka nia. Zep miah lohin a thih danah khan ka ngaih a tha thei thlawt lo va, thudik ka zawng mek a ni. He damdawi hi a dunlop hnuaiah ka chhar a. Khati zawng kha a la awm. Ngaihdan i nei em? " a ti ta a. 

Doctor chuan Nguri chu a melh vang vang a, "Ngaihdan siam thiam chu a har deuh, i nu kha stroke vanga thi te pawh a nih theihna lai a awm. Bp sang leh zunthlum kha a nei an ti ve tlat a. Chance chu a sang angreng. Mahse, nia a fanu ber i ngaih a that tlat loh chuan kei atan sawi ve tur vak a awm hran lo. Ka sawi theih chu Melatonin hi ei tam chuan a mut hlen theih tih zawng a ni mai" a ti ta dap dap a. 

"A nih thil pakhat leh lawk.. Postmortem thintu kha a lo haw tawh em le?" Nguri chuan a ti a. 

"Aw. Nimin tlai khan a rawn thleng a. " a lo ti a. 

"Aw le ka lawm e.. Doctor, khawngaihin kan inbiakna hi chhuak rih lo se ka lawm ngawt ang" a ti nghet charh a. Doctor pawh chuan, "Buaina tur a awm lo ve. Mahse, nangmaha beih ai chuan police i sawm mai zawk lo a ni" a lo ti a. 

. "Police ka sawm chuan misual an fimkhur sawt dawn asin" a lo ti ve mai a. Inhrethiam takin an inthlah zui nghal. Nguri chuan Damdawiin a chhuahsan hnuah a thlanga thingpui dawr lun vak loah chuan thingpui a in a. Mi kal vel chu a thlir pah a. Dawr neitu nu chuan, "Nguri kha i ni tiraw? Zorema fanu kha? " a rawn ti hlawl. A va melh vat a, "Aw ni e.. Min hria ni maw? "Nelawm tak hian a ti ve a. 

"Hre tehlul e, i tetlai chhung zawng zawngin in thenawm lawkah khan kan awm alawm.. I nu Tlani kha alawm ka nih." a tih takah chuan a hre chhuak ve ta uar uar a. An han inchibai leh rih a. A nu thihna avanga pawi a tih thu te a sawi ve luam a, veng kar a inhlat tawh bakah a fanu dam loh vanga a rawn lan ve theih loh thu te nen.. 

"Rinfela nupui hnenah khan ralna pawh ka pe ta ringawt a. Nimin tlai khan a lo kal remchang em a ka tia" a tih chuan Nguri beng a verh deuh. 

"E.. Zoteii kha a lo kal maw? Nimin tlai khan chhungte tlawh kual ka tum a, ka sawm a. Ani kha a lo chhuak ta daih sia.. " Nguri chuan inthup zet chungin a ti a. 

"Aw.. Rinliana nen an rawn peng a. Amah lah khan min hre vak si lo va, mahse, ka han insawi a, ralna te chu ka'n pe ve ngawt a.. Rawn len hram erawh ka la tum ania" Nu Tlani chuan a ti bawrh bawrh a. Nguri erawh chuan nimin tlai lam a lo mitthla daih. Dar 3 velah Remsanga te inah a zuk inbual a, inpuia a chhoh leh khan Zoteii kha a hmu lo reng a, Dini te nufa leh Remi te nen eirawng an bawl kha a nia. A kalna a lo zawt miah lo kha pawi a ti deuh. Mahse, hei a hre ta tho a. Dar 5 rik dawn hnaihah Zoteii chu inkhai bawr angreng takinna rawn haw tak kha mawle.. A bazar ni mai turah a lo ngai a. Tu nge Rinliana chu ni ang aw.. 

"Nu Tlan, khawmaw kuhva ro chu" a ngaihtuahna chu chu pa chuan a rawn tibuai a. Pa thau lam, hang lek lek, lu kawlh tul mai, kuhva heh hmel zet a ni. 

Pi Tlani chuan a pe a. Pek pah chuan, "Taka Rina, zanin ka rawn kal hman tawh loh takin mateii te kha thil ka thawn dawn che mawni le" a ti a. 

"Ngawi rawh, tunah chuan ka chhuak lawk dawn. Tlaiah ka rawn peng dawn nia" a ti a. A kal zui daih. 

"Kha kha tiraw Rinliana chu.. Ka hmuh hnu a ang ka ti reng a" Nguri chuan thinphu dep dep hian a lo ti vat a. 

"Aw nih kha.. Mitthi ruang a zai thin a. Eng nge khah.. Pormostem an ti mawni.. Khatiang ang khan" Nu Tlani chuan a lo ti a. Nguri chuan eng emaw chu fiah ta kuar hian a hre ta tlat. Mahse, a la suihzawm nghet hleithei lo thung. 

"Amah kha chuan min hre tawh lo a nih hmel. A rei ve ta deuh bawk a. Zoteii atanga ka hriat tho a nia. Nupui fanau a nei ve tawh em le? " ngaihngam zetin a ti siam siam a. 

"Nei lo em mawni ka ti. Amah mai hian quarterah a awmin ka hria.. " tiin a lo chhang a. 

Nguri chuan thawh pahin, "I ngaihawm thin hle mai. Lo dam zel rawh. I hman remchan veleh min la rawn tlawh ve ang chu, i fanu pawh chu la rawn kan ve tur a nih chu.. Ka va haw phawt ange.. " tiin a eiman chu a pe a. 500 tlang a dah chu lain kir a tum laiin Nguri chu a lo kal bo hman daih. Pi Tlani pawh a nui sen sen ringawt. 

"Mapuia'n i number min rawn dil a. Eng nge awmzia? " Ateii chuan Shalomi bulah a ti a. A class bang an inah a pengkawi a ni. 

. "I pe mi! " a tih chuan, "Pe lo, min rawn reply tawh si lo va" hlauhthawn hmel angreng tak hian a ti a. 

"Ka number ka thlak dawn. Chuan, Mapuia chu i bansan thei lo mi! " Shalomi chuan a ti a. 

Thut hnawk pahin, "A harsa ka ti. Amah bak vei ka nei si lo va. Sasa nen hian an la inthen ka ring deuh bawk si. Awmdan tur pawh ka hre lo" a ti nghat a. 

"An ngheh hmel ka lo tia. Bansan zawk mai la a tha zawkin ka hria," Shalomi chuan a lo ti a. 

"Ka hre lo le. Tihbuai te hi ka chak rum rum zel.. Mahse, Sasai hi a rapthlak sia, ka hlau ve deuh bawk si" a tih chuan, "Tihbuai ka tum a, Remruata ka biaktir a, mahse, sawi tawh ang khan an nghet reuh lutuk. Sasai pawn Remruata chu engahmah a ngai lo.. " Shalomi chuan a ti a. 

"Ka ngei teh mai a nia. Tikhan Mapuia nen an inthen ve em em a, a dam lo leh kher kha alawm.. " Ateii chuan a ti hmarh hmarh. 

"Tihdan ka hria.. Dam lo ve mai la" Shalomi'n a tih chuan, phawk zetin, "Engtin? " a lo ti hâ a. 

"Mapuia hi mangantir ve reng reng ang. A rilru hriat nan pawh. Tunah chuan Sasai saw a zak lo sia, a la phuar mai mai aniang. Khati khawpa be tha ve si che chu dam lo ve chiah la a inhrechhuak ve mai ang" a lo ti phar phar a. Ngaihtuah tawi tih takah Ateii pawh chuan, "Nia, min be chhe ngai lo biak chhiat chu.. Mahse, engtin nge ka dam loh ringawt ang? Class kal a ngai bawknsi" a lo ti a. 

"In exam tep tawh tho a. Exam zawh atangin game kan play ve dawn nia.. Mai mai a, Sasai saw ka ngei hrim hrim.. Ka thiannu nau pawh amah vangin a boral tawh" a lo ti ram hmak a. Ateii chuan mak a lo ti viau thung. 

Shalomi hian a tir khan Sasa hi Duati nau Ruatsanga intihhlum chhan kha a ni tih a hre bik lo. Mahse, a pic a hmuh khan a hmaa Duati'n pic a lo thawn tawh kha niin a hria a. Duati chu Sasa pic va thawnin, "I hria em? " a va ti a. 

A rawn hre nasa mai. A bitum tur Sasa chu a hre ta chiah a. A ngei sawt bawk. Mahse, a duh angin a che thei ta bik si lo a nih kha.. 

Muanpuia leh Saii te nupa inkar pawh a khi thuk ta viau. Muanpuia rilru a hel laklawh tlat si a. Saii chuan a dik lohna chu a hria, mahse, siamthat tuma tlawm taka beih chu a hreh laklawh tlat. A nun a nuam rih a, a hman a, a duh duh a la nei thei bawk. Terini hian sawi duh nise sawi tur a ngah ang. Muanpuia chhuah hnuah a hma ang bawk khan mi nasa zet zet ho an rawn leng lut thin a. Saii chuan Terini leh a fanu chu leng turin a tirbo thin. An va haw leh meuh chuan an lo haw ve tawh a, mahse, in chu a lo hnawk niaih zel. Saii chuan zu rim a nam ngai miah lo naa, ruih nei hmel erawh a pu thin. Terini chuan engmah a sawi ngam bik si lo. Zan khat chu Muanpuia te an rawn haw tlai deuh a, thim hnuah pawh an la rawn haw lo. Chaw pawh an ei san a. Terini'n thleng a sil lai chuan, Candy chu a talna lamah a intipalh nge, a ţap ta vak a. Saii thutthlenga mu zawn reng bulah chuan kalin, "Maaa.. " a ti a. A ţap hlawp hlawp. Saii chuan a ngaihsak map lo. A phone a bih ngat ngat. Candy chuan a nu hnute chu dapin a va pawm titih a. 

"Ninawm.. Kal teh" tih leh a fanu chu chhuata paih thlak a rual a. Candy chu a ţap nasa ta kher mai. Terini chuan a thleng sil lai chu dahin a va pawm ta vat a. A huaisenna zawng zawng sawm khawmin, "U, i timak e.. I fanu a nih hi" a ti ve a. Saii lah a mood chhe sa nen, a rawn tho a, "Ve khanglang a che. Ka thu thu.. Lo inrawlh ve suh" tih leh Terini naka chhuih a rual a, an roomah a lut zui daih. A nâk chu a na ve deuh bawk si, Candy buaipui ngai nen. A buai khawp mai. Muanpuia a rawn haw ve chiah. Chhuat laia Terini leh Candy lo inbawihsawm lai chu rawn nangchingin, "ngati nge ka fanu duat chu a lo tah a? " tiin a fanu chu a va pawm nghal a. Terini tho tur chu a nâk na zawk avang chuan a thu leh hnawk, a thut pah chuan Muanpuia banbulah a va pawt si, Muanpuia lo thu nghet lo nen Terini chu a va bawh titih a. Lai zetin, "Ka tihpalh.. " Terini chuan a ti sap a. A ding nghal vat. 

"Na i nei em ni? " Muanpuia chuan a ti a. 

"Aih. Ka tha" a lo ti vat. 

"Khaw nge i U hi? " a tih rualin Saii a lo chhuak ve chiah a. 

"I lo haw tawh maw.. Chaw kan lo eisan ta mai che sin.. Khawi Bawihteii kha ka lo la ang. Va inthlak rawh " a ti sawk sawk a. Candy lak a tum chu Candy chuan a duh thak lo. A pa awmah a hmai a thukru char char. Saii chuan vin zetin "Hruaitluang, lo kal rawh. I pa kha a inthlak a ngai alawm" tih leh hnehchhuh a rual a. Candy a tap rawng rawng mai. 

"Ti lui lo mai rawh.. " tiin Muanpuia'n a lak let sak a. Roomah a luhpui ta a. Saii chu Terini bulah kalin,, " I tawng tam chuan i mitmu ka kher chhuak ang" tiin a va vau. A sawi dawn loh tehlul nen. 

Muanpuia hi Saii laka a beidawn ruk tawh avangin Saii hi a enliam titih tawh a. Siamthat tum viau mah se, chapo leh chapo indawrna hi chuan rah tha a chhuah thei si lo. Fapa a awt ve a, an nu lahin rai a duh tawh si lo. A upa tawh a, nupui thlak sek a hreh ve tawh. A vanduai takzet a ni. Chumi zan an mu pawh Saii chuan ruih a nei nge an pa chu a va nek deuh salh salh reng a, Muanpuia chuan a hrethiam reng. Mahse, a nupui chu ítna a nei lo va, a taksaah engmah thawk a awm thei lo. 

"Ka chau" tih leh lehlam hawi a rual a. A reh tlawk tlawk mai. 

"Ngaihawmnu, Naktuk chu Ţam dil chu kal tak tak ila" Sangpuia msg a hmuh chuan a khi var var mai. A nu te an rawn la haw lo bawk a, kal a duh. Zanriah ei laiin a pu te chu a dil ta a. 

"Ih, ka thiante nen a nia.. A nuam dawn lutuk" a ti a. 

Mapuia'n, "Dawt sawi loin tha takin sawi la.. Kan phalsak ang che" a lo ti khauh. Ngei hmel zeta a u melh chungin, "Sir nen kan kal chak a.. Pu, engtinmah min ti dawn lo. In awih loh chuan amah pawh zawt r'u.. Ka kal ve chak a, anu te awm lai chuan an phal awm si lo va" a ti ta a. A pi a lo nui char char. 

"E.. Va kal mawlh teh u.. Ka ngaihtuah lo che.. I fel tawh alawm. I nu thusawite kha i hrereng dawn alawm tiraw" Apu chuan a lo ti a. A lawm kher mai. A kham pah chuan, "I kal ve châk sia, i bialnu a dam lo sia.. Nei ve lo awhthik" tiin a u chu a zuk melh a. Mapuia a lo nui hawk. 

A helhhawlh atalângin mut pawh a mu tha thei meuh lo a ni e. 

"Mapui, nau tihtlak chungchang kha zawhna i nei si lo va, engmah ka sawi lo ringawt a. Min ring tiraw? " Sasa msg a hmuh chuan, "Ka rin vang chein ka zawt buai duh ta lo che anih kha" a va ti a. 

"Ka lawm e. Ka virgin hawngtu i ni tih hrereng ang che. Chuan, nangmah chiah ka nunah mipa awm la ka duh bawk" a ril riau. 

"Kei pawh ka tan hmeichhe awmchhun i nia lawm.. Ni reng la ka duh bawk.. Duhawmnu" Mapuia pawh a zak lo sâwt ve ta riau. 

"I zei sâwt vel e.. I inzir ve tihna mi? " a rawn ti ta chiah a. 

"Zei deuh ngaihzawn chuan a lo zei theih ve mai" a va ti a. An in vid call leh nghal zat. Tumah hian tibuai tawh lo se an la hmuhnawm em em asin mawle.. 

"Zote, Rinliana nen sawn in lo inhria ni maw? " Nguri'n a monu Zoteii melh ran chunga a tih chuan, Zoteii chuan, "Aa.. Aw.. Hre ve e.. Khaw khat chhuak kan nia" a lo ti bah nak. 

Ni e, Zoteii hi Hnahthial khua a ni lo. A chanchin chu phek danga sawiah khek mai ang. 

Zan dar 11 a pel tawh a. A reh thuap tawh. A tho ţhem ţhem a, a phone chu humin mi dang tihharh hlau takin pawnah a chhuak a. An in piah lawka vawk in tlabal lek lek tawh bulah chuan dingin a phone chu a bengah a dah a. 

"Hello" a rawn tih chuan.. 

"Fimkhur a ngai. Min chhuitu an awm ania" a ti sar sar a. 

"Tu nge chu chu? " a rawn ti nghut. 

"Kan pa nau Nguri mawle.. A fing si, ka hlauthawng ania" a ti leh a. 

"Hlauthawng suh. In pa chu engtik nge i rawn hruai theih ang.? " a rawn ti a. 

"Ka nu thihcham hi thleng phawt rawh se.. Miin mak an ti lutuk ang" a tih chuan, "Aw. I tih dan dan.. Mahse, tihtur hi chu zo thuai ila a tha..chetsual a hlauhawm tlat.. " a rawn tih lai chuan, in atang chuan thawm a rawn awm deuh a. Hlauthawng zetin, "Ka dah rih.. Chu! Thawm a awm.. Nih phawt" tiin hmanhmawh zetin in lam chu a pan ta a. 

Vana asi pe un te hliah thim turin chhum dum chhah zet hi a rawn inlar ve mek bawk. 

(Muah vek u 😘