Thutiam s2 - 7

THUTIAM (S2) - 7

Ziaktu: Toni Râlte

Individual items lam an zo a, team work lam an bei chho leh kha a nia. Mapuia leh Ateii pawh house khat na ná na chu an la inzui ve det det reng a. Ateii chu Mapuia mil zawng mize nei a ni, a dam raih a. A ni ve phawr phawr lo va; uluk taka thil sawi thin mi a ni bawk. Mahse, ngaihzawng anga han treat erawh a la tum hran lo. Ateii rilru chu hriain a inhria. Sasa vanga rilru la hawng lo pawh a ni hran lo. Tihsual leh a hlau rih a, a inthunun rih zawk a ni. Ni 2 liam taah khan voleyball an khel dawn a. Mipa lamin an khel hmasa a, Mapuia pawh a che tha leh hle. A team te chu a chakpui ti mai ang, an house chu a pumpuiah pawh point hmu sâng ber an la ni rih. Hmeichhe lamin an han khel ve thung a. Ateii leh Sasa pawh an chhuak ve leh. Sasa chu a che rang thet thet reuh a, a score nasa viau. Mahse, game tawp lamah a ţang lutuk Ateii tana ball a set tur chu a set sual ta hlauh mai a, Lehlam lah ţang ve bawk. Point khat chiahin an inthlau tawh. Thin a phu dup dup tawh mai. An ţan leh hma siin an leader chuan, "Sasa, i chau tawh anih kha.. Lo chhuak rih mai rawh" tiin a aiah mi dang a luhtir ta a. A ball set sual vangah a ngai mai. Mahse, a hmel hmaiah lungawi lohna a tilang duh lem lo. Vanneihthlak takin Ateii chuan a rawn score ta hlauh a. Point khat takmeuhin an chak ta hram. An lawm chu an zuang tawr tawr hlawm a. Ateii chu an bekbawrin an lawmpui thiam hle. Sasa erawh Rki nen an thu ran a. Tuman an rawn chibaiin an rawn bekbawr ve lo. Mapuia'n Ateii hmaihmaah ngei, "Nangmah vang liau liau a ni e.. I zarah kan house kan champion dawn " a tih chuan Sasa thin a khei ve ta zak mai. Voleyball kha Sasa tel lo se an chak a rinawm loh. Setter tha lutuk a nih piah lamah a kat zeuh zeuh a, a team te a rawn cover leh thei zel kha a nia. Rki ngaihdan ni lo lutuk, a thiannu khawngaih ve bawk si chuan.. Ring leng lawngin, "Sasa, tel lo ta la, kan va chak lo chiang dawn ve. A pumpuiah khan point 8 pawh i tel lo chuan kan score thei dawn chai lo a nih kha… nang hi chu aw.. Ka duhnu" tiin a kuah chuk chuk a. An rawn hawi thup mai. Sasa chuan nui lui tih hriat zet hian, "Ni lo ve.. Ka tel lo pawn an tha tawk alawm" a ti sap a. A mittui tling pam chu a tlak hlauin lehlam a hawi daih. An asst leader chuan nuam a ti chiah lo ni tur a ni. Sasa chet thatzia an hai bik si lo va.. 

"Nia, Sasa, nang chu awm lo la.. Kan chak kher lo vang" a lo ti khawmawi ve a. Mahse, a nat tur angin a na vek tawh. Chawhnu pawh awm peih loin a haw ta daih bawk. Rki pawn a zui ve. A tukah Football an khel dawn a. Hei chu mipa lamin an khel thung dawn. Hmeichhe lam erawh au phur turin an inpuahchah nasa viau. 

Sasa pawh phur fahran loin a kal ve a. Mapuia pawh a va be tawh rih lo. A thinlungah hmun a chang tawh lo nia hriain va tihbuai chhen kha a inthlahrung ve tawh a ni. Rki nen bawk an thu dun leh ran a. Sasa hi sawi tawh angin a luh tirha a mizia thawveng halh leh confi tak avang khan senior ten an ei lo ru ţhûm a, a lo luck ve leh zêk bawk si nen. Rki bak thian hnai tak pawh a nei lo a ni. Football chu an han khel ta a. Mual ko team lam pawh an au nasa ngang mai. An house erawh an la inkhel ve lo. Chawhnu lamah an inkhel dawn chauh. Lunch break-ah Sasa te chuan an tiffin ei turin field thlang hmun zawl an pan a. An ei zo an chho leh tur chiah chu Mapuia leh Ateii rawn inphur thla mek hi anmahni tawk zawngin an rawn tlan a. Sasa chuan en loh hram a tum. Mahse, An bul maiah an din si vangin a hmu lo thei lo va. Ateii chuan, "Sasa, tiffin in pai mi? " a rawn ti nalh a. 

"Ummm kan ei zo chiah a" pangngai takin a lo ti ve mai a. 

Mapuia rawn chhuk a helmet a dah zo chu, Ateii a kai nawlh a. "Kal vat ang. Min inthlakpui loh chuan" a ti nghut a. An kal zui nghal. 

Rki chuan Sasa ding khawng reng chu lainat zetin, "Kal ang. Hmachhawn ta che. Biakhmingsangi i nih kha.. Mi chak, engmahin tihnat ve theih loh i nih kha" tiin a fuih a. A zat loh em avanga nui hawk chungin, "Ni e.. " a ti sap a. Thawk la hawkin an chho zui ve ta nghal a. Inkhelh chu an han tan chho leh a. Mapuia te pawh an lut ve ta. Sasa chuan a thlir ngawih ngawih ringawt. A au ve lo auh pawh. Ateii te ho an au nasa a, Mapuia a chet that deuh chuan Ateii chuan kut a lo beng khep khep thin. Chu ringawt pawh chu Sasa tan hmuh hrehawm a nih tawh tehlul nen.. First half a ni a, an rawn tlan phei khap khap a. Ateii chuan bottle lo lek vain Mapuia hmaah a lo ding leh ran a. Ateii biangah piai zauh paha, "Fel lutuknu" Mapuia'n a ti sup chu Sasa bengah ring tak a ni. An bul maiah a thu ve tih hre lo ang hmaka nui chunga an titi leh an inmelh relh relh chu hmangaihtu tan chuan enliam a har ve khawp ang le. Mi chapo leh luhlul, mize tlang tak nei ni ta fam chu a tawpkhawkah a che chhuak leh lo thei ta lo va. Thei tui siamsa chu no-ah thli chhuakin Mapuia chu a va pe ve ta ngat a. Ateii chuan a rawn melh phawk hle nghe nghe. 

Mapuia chuan Sasa thinlung natzia hrethiam miah lo vin, Runluih chaknaa a khah ve si avangin, Ateii melhin, "Nangman min va laksak la" a ti ta a. Chu chu Sasa tan ţèk den tluka na a ni ta a ni. No chu a paih tawp a. A bag a la a, hawikir eih lovin field chu a chhuahsan ta vang vang mai. Mapuia chuan a thlir ve tawp ringawt. A chhungril inthiam lohna chu dah thain, Ateii chu nui chung bawkin a lo chhawn a. Rki thin sa ve phat bawk chu an inkarah tak rawn kal tlangin, "Tenawm dun e" a ti nghat a. Sasa umin a kal ve vang vang. 

Khami zan atang khan Sasa chu a mumal lo chho a. A thinlung na lutuk, puahkeh châka sahal chu a damchhunga a la tawn ngai loh a ni. Ţah a duh a, a ţap thei si lo, a mittui takngial pawh a tla thei lo. A roomah a tawm tlawk tlawk a. An week programme chu hriat pawh a hre tawh lo. A chhungte pawn tihngaihna an hre lo va. Chaw a ei lo va, tui erawh a in. A muhil thei lo va, a awm tawp a ni ber. A tihsual atang veka engkim chu thleng a ni tih a hria a, thiam a inchantir thei lo leh Mapuia a dem thei hlek lo chu tawrh harsa a ti takzet a ni. Ni e, Mapuia kha demna tur a awm lo miau a. Amah vekin engkim chu a tichhia tih a hria. Chu a mawhphurhna chuan a tichhe zual a, a siamtha thei tawh si lo chuan a tibeidawng bawk a ni. 

Mapuia chu biak tumna pawh a nei tawh lo. A tan chuan mi tenawm, hnawksak, ninawm a niin a inhria a. A phone pawh a khawih mang lo. Rki'n a rawn awmpui chang a awm a. Thian tha a lo tling zet mai. Mak tak mai chu mihring thinlung hi a lo nat tawpkhawkah chuan taksa hi a tuar hmasa ber a ni mai awm e. Sasa pawh chaw mumal ei lo leh mut hmu ta lo nafam chu ni 2 chhung lek pawn a cher kawk thei mai. A nu ten Rki an biak azarah a nat chhan an hre ve chauh bawk. Chutiang taka hmangaihna a lak runthlak an la hre ngai lo va, mak an ti kher mai. 

Khami zan khan zan tir dar 8 bawr velah a taksa chau tawngkhawng a muhil ve hlauh mai a. Mahse, a mumangah lehzel pawh Mapuia chuan lo hnawlin a lo kalsan leh si. Dar 10 velah a harh hlawl a. A thin tawt lutuk chuan a thaw te a tichham lek lek mai. A â vek a ni ber mai, Depression neih tum ngai reng reng lo, 'Sasa ka nia.. Hneh loh ka nei lo vang". Ti thintu khan dam thlakhlelhna a nei ta miah lo mai a! A tho ţhem ţhem a. A u chiah mipa hman deuha a stress vanga doctor ten an chawh mut duhna tel damdawi, a ei zawh tak loh mum 23 zet chu va lain a melh vang vang a. "Ka thi a nih pawhin a lawm zawk ang" tih a ngaihtuahna chuan a hruai peng thui lutuk tlat. Mahse, a rilru fim beitham ve tak chuan a tawp nan tiin Mapuia nen an inbiak tawhna zawng zawng chu a chhiar chhuak leh dap a. Mittui nei ngai reng reng lo kha a biangah mitttui a luang zawih zawih mai. "Ka lo hmangaih êm a nih hi.. Ka la naupang sia, ti nge hetia ka awm le.. " te a ti thul.. "Ka virgin i hawng a, tuman i sulhnu hi an chhui tawh lo vang" a ti bawk. Inngaihtuah vak a duh loh vangin damdawi chu a bun chhuak a. A mum te takte te a ni a, vawi hnih barah a hmang a ni. Minute tam a liam hmain a zal ta raih raih a. A thim mup mup a. Engmah a hre lo zui ta kha a nia. 

Damdawiin a han thleng chho chu Rki a hmu hmasa ber.. "Khaw nge" a ti nghal vat a. Rki chuan ţap deuh par chungin, "A hmuh theih loh.. Tunah chuan" a lo ti ţiau a. 

"Ti nge.. Engtin nge? " zawhna a va ngah tak em

"Nangmah vang vek.. Nangmah vang a ni" a lo ti tãwn tâwn mai. Mapuia pawh a hawi phe ve ruai mai. A ngaihzawng hmasa ber, thil thar tam tak a zir chhuahna, a tha emaw tha lo emaw a la tih ngai loh a tih bultanna, a thinlung a hlan hmasak ber hmeichhia chu a thinlung tihnatsak a nih vangin thichhawngin a let reng mai si a. Mipa inti tan chuan pal liam mai a harsa ve khawp ang le. 

Rki chu hmun fal deuh hlekah a kalpui a. Mahse, zawhna han chhang thei pawn a awm si lo. 

"Ih maw, Mapui, mihring hian tihsual kan nei thin. Vawi khat na nâ na chu kan chesual a, kan tipalh ve thin. Mahse, chanve vawi khat tal hi chu kan phu ve asin. Sasa pawh a mizia i hria a, a mizia hresa veka ngaizawng i ni. A dik lo ka hria. Kei pawn ka hau. Mi induhtawk leh luhlul tak a ni a, a mipa lo tawn tawhte anga treat che pawh a tum ve thin. Amah pawh a inchhir a, a vawi khat nana a tlawm ve pawn ngaihdam a ni lo va, ngaihdam a hnêkin i runluih char char a. A la naupan em hi.. Mihring ve tho a nia. A na ve thei tih i theihnghilh a niang e. Khamini atang khan a mumal tawh lo. I tina em a ni" Rki chuan tlema a mumal hnu chuan a ti ta mawlh mawlh a. Mapuia pawn a lo ngaithla tawp. 

"A thi ang em? " a ti zawi sup a. 

"Ka hre lo. Doctor kha chuan a dam chhuak leh anih pawn ngai awh chhung a rei deuh ang a tia. A kawchhung lam a lo chhe nual hman bawk nen.. " Rki chuan harsa ti zet hian a ti a. 

"A thi tur a ni lo" a'n ti ngawt a. A rilru erawh buai tak a ni. A nuin a lo call a. Engkim hrilh mai a duh ta a, a hrilh ta vek mai. 

"Min hrilh ve tur alawm.. I pa nen kan lo kal ve tur a nia.. Tunah eng nge a an? " a rawn ti a. 

"A mu tawp ringawt. A mar chu a la awm an tia.. Nu, a thih chuan engtin nge ka awm ang? " A ti khur dat. Nguri chuan a fapa thlaphan rukzia hriain, "Bawihte, a mar a la awm chuan a dam chhuak ang ka ring. Boral tur nise damdawiin thlen hmain a kal tawh ang. Kan lo tawngtai ange aw.. Chanchin min lo hrilh zel la.. Rilru hahdam taka awm tum hram hram rawh" a ti dap dap a. 

Chumi zan chuan Sasa chu a harh chhuak lo hrim hrim a. Mapuia te pawh an tlaivar ta thak mai. 

Nauteii pawn a u chunga thil thleng chu a lo hre ve a. A khawngaih si, tih vak dan a hre si lo. Zinga a rawn haw a ngui nghiai te chu tihhlim a duh. A thiam bawk si lo. 

"U, a thih ka ring lo. Kei chu,.. A hmeltha bawk sia, a thi lo vang" te chu a han ti ve ngawt a. A u pawh a khi suk mai.

A nu pawn chanchin a zawt ve luam a. Sawi vak tur a awm lo. Nguri chuan an inkar chu a chin chhuakin a zawt ta a. Mapuia pawn zep nei hlek loin a lo chhang ve hmiah. Zu leh sex thlengin. A nu bulah hian engmah a zep rei thei tak tak lo a ni ber mai. Lawmsanga pawn a lo ngaithla ve kur chu niin, "Bawiha, chutiang mize pu te chu ngah nge maw i lo ngaihzawn reng reng le aw.. A pawi asin. " a lo ti chu Nguri'n a melh na ngat ngat khawp mai. 

"A eng miziaah chuan nge i lung dum lotu awm a" a ti khauh. 

"Aa.. Mipa rilru atang chuan a ngeiawm ve alawm. Hmeichhe chapo leh tlawm hreh lutuk te chu.. Kei ni ila Bawiha ang tho khan ka che ang" a lo ti hmuk a. 

Nguri chuan, "Nang pawh i thikthu chhe turu buru kha tu hmeichhiain nge dawl zo se i tih? Mihring hian mizia kan nei vek, kan mizia hi harsa taka kan neih te pawh a ni ve fo a nia.. " a lo ti ve leh a. Lawmsanga lah dang duh hek lo, "Ka thikthu te chu i dawl zo ber a, kan inneih reng hi" a la ti hram. 

"Aw.. Keimah ang vek an ni lo reng a. Keiin ka nei thei che ang hian, Sasa tan pawh Mapuia chiah hi a tana awm a ni ve thei. Chuvanga natpuia thichhawnga awm a nih reng hi. Bawiha, Ka ngaihdan chuan Sasa hian a mamawh che a ni. He hmeichhia hian thununa nawrkaltu a mamawhin ka hria. Ngaihzawng i neih vawikhatna a nih avangin i duap a, a thu i ngaichang a, chu tak chu hmeichhia hian inlulin nan kan hmang thin. Kan thu thua awmtir theihah kan ngai ta thin a. Kan kal thui zel a. A tawpah kan na châwk zel. Chutiang dinhmunah chuan Sasa pawh a ding niin ka hria. A hmangaih lo che a ni lo, mahse, i dawhthei rei lutuk a, zilha han hrem a awm lo va, i thinrim tawpah i rehsan tawp a. Ani lahin i duhzia hriain i ngaihdam emaw i kir leh mai a lo ring si. A rin anga thleng ta lo chu a tuar na ta lutuk anih ber chu.. Hmeichhia chu thunun kan ngai reng asin" a ti ta dap dap a. 

Mapuia leh Lawmsanga chuan dik an ti viau leh lawi si! Lawmsanga tak pawn sawi tur a ván leh ta duk e. Nguri nge nge. 

Week closing function a ni nachungin Mapuia chu kal a tum lo. Lawmman dawn tur a neih nual vangin a thianpa Sama chu a call a, a ai lo awh mai turin. Chaw a ei khamah a inbual fai a. Darkar hnih vel a muhil ve zawk a. A harh hnuah damdawiin lam a pan leh nghal. Sasa chu a lo harh ve tawh a lo nia. Mahse, a chhungte lo chuan an la hmu thei lo. A la meng â hle a, tawng pawh a la tawng lo a niawm e. Rki nen an thu dun chawt mai. Rki chuan Sasa tun hma nun, a bialpa ten an duh theihzia leh aniin a kaih kual nasat thinzia te a sawi siam siam a. 

A tawpah, "Ti nge nangmah hi a duh em em chhan che ka hre lo. A hmuh tirh phat che atang khan a luangliam nghal tawp. Sex in hman te pawh ka bulah chuan a zep lo. A sawi vek. A virgin hawngtu i ni te hi a lawm zawk asin" a ti ta a. Mapuia ngaihtuahna a kal thui viau. 

"Ka virgin a hawng ve tho asin" a ti sup a. 

"Ka hria alawm.. Anih leh thil pakhat chiah, Ateii nen khan in ni tiraw? " Rki chuan a ti a. 

"Ni chiah lo. Amah hi chuan bialpa treat deuh hian min treat tih ka hria. Kei pawn ka iai hran lo, mahse, ka hre lo. Kim lo a awm" a ti ve ta a. 

An ngawi dun ta vang vang mai. 

"Rk, thil zu ei ila.. A nuteii ten an awmpui rih a" Sasa nuin a rawn ti a. Mapuia chuan nuam lo a ti hle. Amah vang veka thleng a ni si a. Mahse, Sasa nu Pi Buangi chuan engmah thleng lo ang maiin a be hmiah hmiah a, Mapuia tana nawm lohna tur engmah tawngkam a cheh duh lo. 

"Nizan pawh i tlaivar thak tawh si a.. I chau dawn em mai. Va chawl hahdam rih rawh. Doctor pawn naktukah chuan ward pangngaiah a dah theih tawh ang a tih kha" a ti siam siam a. 

"Aa.. Ka chau hran hleinem.. " a lo ti ve a. Sawi tur vak a hre lo. Pi Buangi hi Nguri ang chiaha fing fel, rilru ngil tak mai a ni a. A fanu nat chhan te pawh hre mah se; A vawi khat lenna atang khan Mapuia zia tur awm ang a lo chhui thiam vek tawh a. Amah Sasa dik loh hmasak zawk a nih a ring tawp mai a ni. A chhan chu a fanu mizia a hre chiang em a ni. 

"Ih, maw, ka u chu ka khawngaih tawp. A bialnu kha a hmeltha bawk sia, a thih chuan a uihawm dawn eee" Nauteii chuan Sangpuia bulah a ti ve vang vang a. A pu an va kan zo, Zorema inah an peng kawi leh pek a ni. 

"A pawi hle mai. Mahse, a tha leh mai ang. Khatin nangmah thlengin ngui phah lo la" Sangpuia chuan a ti a. 

"In chhunga mi pakhat an hlim loh chuan kan vaiin hlim a har ka ti kei chu" Nauteii'n a tih chuan dik a ti ru viau. Chhungkua chu pumkhat ang mai an ni si a. 

"A dik chiah alawm. Engkim a tha leh vek mai ang.. Lo hnai teh" tiin Nauteii chu a pawt hnai a. 

"Mi hi an inngaihzawn hian eng emaw te an ti ve thin asin. " awmze nei zetin a ti a. Nauteii chuan a lo melh haw.. 

"Ka hre ve e aw.. Mahse, ka zak alawm" a ti a. Ţap mai tur hmel a pu. 

"Maimichhing la.. Um.. Ka fawp chak che sia.. Khawngaihin" Sangpuia chuan a ti zawi sup. 

A maimichhing a. "Rei deuh lo aw" a ti tham chhal a. 

Sangpuia chuan hnaih leh hretin Nauteii hmuiah chuan a zuk fawp ta a. A lo dawh mawl tawp. Mahse, Bung thar an kai ve ta renh reng e. 

"Ka la zirtir ang che. I zah loh hunah " a la ti zui. 

"Ih maw.. Anu chuan min hrilh zing lutuk a. Infawh chu inngaizawngte chuan an ti ve thin tur pawh a nia, mahse, sex hman erawh tih loh tur a ti bur. Chuvang chuan infawh bak kei chu ka duh lo a nia" A zah theih lohna zawng zawng sawmkhawmin a ti ta a. 

"Ka hria alawm. Nu fing fel tak i nei a. I vannei lutuk. Nangmah ang rual virgin lo hi an tam asin.. Nang chu virginin pasal i nei ang. Ka nupui i ni bawk ang" Sangpuia chuan a lo ti nghet charh. Nauteii pawh a thlamuang huai mai. 

Muanpuia chuan an nu rawn lem lo in awmpui nula naupangtê, Thingtlang lam mi a rawn hruai lut a. A hming chu Terini a ni. Awmpui an mamawh lem lo nain, Terini zinkawng hi a thui ve deuh a. Muanpuia te thawhpui Zira te awmpui a ni thin. Mahse, Zira nupuiin Terini chu a tiduhdah lutuk a, Terini mangang chu a rukin a chhuak ta tawp a, an zan patrol-na lamah mi bathlara a lo thu lai an va hmu ta a ni. Zira pawh a tel ve nghe nghe a. Hruai hawn a tum chu Terini chuan a lo duh lo nasa mai a. "Ka lo kir duh tawh lo a ni. Khawngaih takin min hrethiam rawh" a ti tawp mai. Zira pawh a hrilhhaiin a zak khawp mai. An nu suahsual lutuk vangin a thiante zingah a mualpho ta a ni ber. Mi dang chuan awmpui an lo neihsa bakah an mamawh si lo. Muanpuia lah chuan a khawngaih bawk si, An nu thatchhiatzia hriain Terini chu a hruai haw ve ta tawp a ni. Saii chu a lawm viau loh pawhin a thinur hle ngei ang. A rin ang ngeiin a lawm mang hlek lo. A chhan pawh sum a ui vang a ni ber. Roomah an inhnial bap bap a, Terini erawh nuam lo ti zetin living roomah a thu khar mai. Pan tur a nei bawk si lo. 

Kum 21-na a hmang ve mek a, A pa hi kum 16 a nih laiin a boral tawh. Unau panga lai an ni a, amah a upa ber, a nu hoin an han hmeithai ta a. A naute an la te si, an te ber. Phei chu hnute hne lai a la ni. Pawl sawm a fail a, a bansan nghal. Thingtlangah chuan thawh tur a vângin ram hna a ni deuh tawp mai si a. Khawtlang tlawmngai ten lo an vahsakah chuan a nu nen nitin an feh thin. Rethei bakberha lo seilian chho ve zelin, kum 20 a tlin meuh chuan a naute pawh an lo leikang ta deuh a. Tin, pahrawn an nei ta bawk. A nu mangangin zu a zawrh tak atang khan an nun chu a buaichuar zo ta a, zu ngawlvei, thatchhe tak hian a nu chu rawn luhkhungin, a nu aia kum 8 vel zeta naupang a ni. A nu lah chuan a lo titha viau mai bawk si a. An khuaah han pur tur chuang chhungkhat an nei bawk si lo. A nau chiah mipa hian mi motor zuiin inah a awm ngai mang lo va. A dawt leh chiah hmeichhia erawh kum 16 lek a nihin sawn a pai ta hlauh a, a fa paina ten an duh leh bawk si lo. Mahse, a fa chu thla li lek a nihin khawsikpui vangin a boral a. Intuaithar lehin a nu zia a chhawm bawk a. Zu pawh a nu ai mahin a khawih tam ta zawk a ni. An te ber dawttu hmeichhia erawh a pa farnu neihchhunin an khua Thingdawl lamah a la phei ta daih a. An pa nen fa an nei thei lo bawk a, an fa angin a awm a. A vannei ta viau. An te ber mipa erawh school a la kal ve thung. Chutianga chhungkaw chhenfakawm loh tak atanga rawn thanglian chho zelin a nu pasal nen chuan an inngeih lo chho ta a. A thatchhe lutuk leh. Chawmhlawm si a zak thei lo lutuk chu Terini chuan a ngaithei bik si lo, ani chuan zu zawrh te chu sim turin a nu pawh a ngen fo. Kohhran leh khawtlangah te a rualpawl tawkin a inhmang chho ve tan a, zahna a tawng deuh reng a, an eizawnna avang chuan a tel tha ngam meuh tawh lo a ni. A pahrawn nen an inhauh lah hian a nu leh a nau te chuan a pahrawn chu an lo tan zel bawk si. A thinrim thei hle. Zan khat a pahrawn zu ruiin a nu kut a thlak chu ngaithiam loin a hnawtchhuak a, an buai ta luai luai mai. A nu thlavang hauhtu zawk nisi kha a nu chuan a ţim ta erh a. "Kan nupa inkarah lo inrawlh ve suh. I buaina tur a awm lo" tiin. A rilru a na ngang mai. 

A tukah a pahrawn pawh a rawn haw ve leh mai a. Terini nen an inbe eih lo. Chumi hnu kar khatna velah an zu thuhruk a bo a, he mi lai vel tak hian Terini chuan mi huan thlo-a a inhlawhna atangin inkhawm puan tur, puanzeh man to ve tak mai chu a lo lei ve kher bawk nen. A inhlawhna a khawl ruk ve kha a lo tling khawm tam a, a daih ve mai. Chutia an zu thuhruk bo leh Terini puan lei a lo innan takah chuan an ringhlel ta a. "I hralh ru" tiin an ankhum hrep a. A nu pasal phei chuan kut te a thlak nghe nghe. A nu chuan a hnawtchhuak ta hial a, a thiamthu pakhatmah an ngaihthlaksak duh lo a ni. Chumi zan chuan a thianu te inah riakin a thiannu putea chuan Aizawlah an chhungte hla ve tawh tak ten awmpui an duh thu a sawi ta a. Inbe pawp chhoin Zira te awmpui ni turin Aizawlah a rawn kal ve ta tawp mai a ni. A rilruk dan chuan a hlawh khawl ve zel a, a tam ve deuh hunah mahnia in dan vea an te ber Bawihpuia chu awmpui a tum rilru ve a ni. Mahse, a beisei loh ang vekin a thleng ta si anih kha. Zira nupui hi rethei taka seilian, a vanneih vang liau liaua Zira, hlawh nei nupui ni ta a ni a. A retheih tawhna te avang pawha hrethiamtu niawm ber si kha a han hausa leh a nei ve ta deuh chu a tawrhhlelhawm ta em em a ni. Mizo upa te hian thil hi an lo hre ngang mai a.. "Lal ngai lo lal a nâ, an lal a kha" an lo tih thin kha Terini chungah ngei pawh a thleng ta chu a nia. A tawrha tawrh zawh rual a nih tak loah chuan a tlan chhuak ta tawp mai a ni. Sum tlem azawng erawh a khawl ve hman. A chhel em zawk a, an thenawm te phei chuan, "i la awm rei thei ber. Pakhat phei chu ni 3 chiah a awm hman.. Nang hi awmpui pangana i ni" an ti.. A dinhmun a hriatchian em vangin a tuar hram hram kha a nia. Kut awl lai a nei ngai lo va, a thu hle hle lai a hmu thei ngai lo, tirhna tur ringawt a zawng thin. Tin, tisual palh hlek se kut a tuar nghal zel a. Zira nupui zet chu mi hausa ni chi a ni lo tawp a ni. Pathianin a la hnuk hniam em emin a rinawm. 

'Eng nge a tih ang a? Tihtur a awm lo" Saii'n a ti hlak hlak a. 

"Tihtur te chu a tam alawm. Eirawng nise zingah ka bawl ziah a. Tlaiah ka lo hawn pawn peih loh chang i lo la nei thin ania. In chhung nise a felfai lo bawk. A dinhmun avang pawhin kan awmpui ang. I sawi buai thei lo. Tin, thianpa Zira nupui angin awm ve hlek suh ang che. Ka mualpho dawn ania.. Hre reng rawh" Muanpuia'n a lo ti hmiah. Saii pawn hnial vak ngaihna a hre bik lo. Lehlamah a awl phah dawn ve tho a, sum chu uiawm deuh mah se; online na hun a ngah dawn tho chuan ti rilru chungin an pa thusawi chu a pawmsak ve thei ta hram a. Terini pawh room lian lo tak an pe ve a. Muanpuia a fel bawk a, Terini pawh a thla a ngam ta deuh e. 

Ceiling var pup chu a han hmu phe ruai a, a mit chu khap fak fakin a melh kual a. 

"Sasa" a nu aw a hriat rualin a nu hmel pawh a hmu zui nghal a. 

Tawng a tum a, a aw a chhuak thei lo. ICU atangin Cabin lamah an sawn chhuak tawh a. Ward pangngai kha chu kantu a ngah ve riau si a, mi dang tan hnwksak nih an hlau deuh a niawm e. 

"I tui a hal em? " a nuin a tih chuan a mitmeiin a hrilh a. Tui chu fiantein a rawn tulh a. A in tam thei chuang lo. A chau ngawih ngawih a ni ber. A pum chu a ruak vek ni maiin a hria. Nia, an thuah nasa bawk a ni. Mahse, damdawi effect kha chu chambang tawk a la awm tho mai. 

"Sasa" mipa aw a hriat chuan a tang hrû a. Chu aw chu a hre tawh thin. A hawi kual hleithei si lo. A hnuah a kut chu a rawn vuan lum ta ther ther a. Mapuia ngei mai chuan nui sâng chungin a rawn thlek a. A mumang emaw a ti hial. A melh ta vawng vawng a. 

"I tha a nia aw.. I tha chhuak tep ang" Mapuia chuan a ti a. Rki pawn a rawn tuihnih vat. Chaw pangngai ei an la phal loh vangin drip an khai kal reng a. Tlem chuan a chak chho ve ta aniang. 

"Ka.. Ril a tam" a ti sep a. A aw chu a ri chang chang a ni. 

"Chaw ei an la phal lo va, tuar hram hram rawh. I ei thei tep ania" Mapuia bawk chuan a rawn ti leh a. 

Mapuia melh kiau chungin, "Khaw nge Ateii" a ti ta sap a. Mapuia chu a chhing sawk. A vei hle a ni ngei ang le. 

"Ani te chu an inah a awm ang.. Rawn kal vena chhan tur a nei hleinem" a ti ta tawp a. Sasa mitmeng chu a la mumal vak lo, mahse, a men ât ruaina karah pawh Mapuia a thlakhlelhna erawh a la de ve vâ vâ tho mai. A lo hmangaih takzet a nih dawn hi. 

Sasa a lo harh ta bawk a. Rilru hlim takin Mapuia pawh a haw thla ve a. Han riahpui em chu a zak ve rih. Bakah Sasa pa hi a nel hlawl lo. A be vak ngai bawk si lo. In a thleng chiah tihin Ateii'n a lo call a. An inbe tam lo kher mai tun hnaiah. Ateii hi chuan a rawn text deuh reng a, mahse, tawi te te bakin a chhang ngai lo. 

"Aw Ate" a ti zangkhai vah a. 

"I reh chhan ka hria.. Sasa a lo dam lo ni maw? Tunah eng nge a an? " a rawn ti a. 

"Nia.. Umm a tha ti ila a rawn harh tawh a" 

"Ti nge a dam loh reng reng le.. A zia lo e" Ateii chuan a ti a. 

"Nia pawi tawp.. A tha mai ang. Nang i tha em? " a ti khawmawi a. 

"Tha vak lo. I reh sia" titau awka lek lek hian a ti a. Mapuia a inthiam vak lo. Sasa vangin Ateii beiseina a siamsak a. Thutawp la siam em lo mah se; Ateii te ang amah lo duh sa em em tan chuan bawh ruak ruak lo thei loin a siam ve tlat si a ni. Tunah Ateii chu a rilruah a tlaknat tawk lohzia a hrethiam leh hnuhnawh si. Ni e, Ateii bula kim lo thin kha Sasa thichhawnga mu reng bula a awm khan engkim a awm vek a, a kim vek lawi si a nih kha. 

"Nia, zanah ka rawn bia ang che. Kan intifai ve lawk ange" a ti ta ringawt a. A inbual lai te chuan Sasa hmai dang bel, amah thlahlel ngawih ngawih kha a mitthla a. A khawngaihin a lainat ngawih ngawih mai. Hmangaihnaah hi chuan a hmangaih nasa tu zawk hi a tuartu kan ni leh thin a, mahse, kan tawrhna hi a thlawn a ni ngai lo thung. Sasa nen an boruak chhiat atang khan Mapuia hian nasa takin a tuar a ni. Mipa a ni a, a lang ve vak lo a ni mai. Zan tam mut hmu tha lo leh thil ei tha thei lo hialin Sasa a hmangaihna kha a vahvaihpui ve tho, Sasa erawh a mizia avangin a nihna letlingin a lang a, tuar awm lo tak anga langin a nui lui a. A hmangaih chu runluihna hmanga hneh theih inringin a hmachhawn a, mahse, a rin loh ang taka Mapuia a chet ve chiah khan a mah a induhtawkna leh luhlul vena te zawng zawng chu phumbo an ni ta vek anih kha.. Hmangaihna kawng chu rahbi pahnihna an zawh ţan ve chauh a ni zawk. 

Zanah Ateii nen an intext a. 

"Dik tak chuan rilru ka pe vek tawh che a. Tihian Sasa in harsatna a tawk a. I kal leh daih a.. Ka tan chuan a na ve khawp mai" Ateii chuan a ti a. 

Mahse, inngaihzawnna chungchang an la sawi ngai lo tak chu Mapuia tan hmanrua a ni ve tlat. A lo ngaihsak deuh tak avanga inngaizawng awma a awm ve ngawt kha Ateii pawn a tuar ve dawn tihna a ni mai. 

"Pawi ka ti lutuk. Mahse, nang chu ka thian i nia, ka thian ni reng la ka duh. Sasa chu a danglam a ni. " a ti tawp mai. 

"Nia, ka hrethiam lawm.. Pawi ta ber chu i rilru dik tak ka lo zawt ngam ngai lo che kha a ni. A tirah khan hria ila ka hnaih lo tur che ania" a rawn ti a. 

"Min hrethiam rawh. Sasa nen khan lo inthen mah ila, ngaihzawng nei leh tur chuan ka la inpeih tak tak thei chuang lo va.. Thian chu kan ni reng ang chu tiraw? " a ti a. A beisei em em lo. Chutiang baka han hnar vak dan a hre si lo a ni. 

"Nia, a tha alawm. Hlim takin awm ru.. " a rawn ti a. Ka lawm tiiin a reply a. A rawn be tawh lo. A nu thurawn ang khan Sasa chu a damkhawchhuak leh te a nih ngai chuan, Hmeichhe tha tak ni tura thununa nawrkal a tum hle. Lehlamah Sasa hian a mize dik tak hi paih ta vek se, Mapuia tak zawk pawh hi a hlim chuang ang em a inhre lo. Sasa zia chu mi dang hrechiang lo ten mil loin ei lo viau mah se, a hrechiangtu ten an fak vena ber a ni lawi si a! Ni e, kha a zia chimawm zet kha nei ta lo se, An pahnih hringnun pawh hi thawnthu anga ziah a ni dawn em ni? 

Ateii chu rilru na takin a mu ngât a. Sasa chu a hua. A haw takzet. Ti nge a dam loh kher kher ni.. Dam tha nise Week closingah te khan Mapuia nen an thundun leh ang a, engkim kha a dream lawk nasa sin le. A duh anga Mapuia a hauh tlat thei lo chu pawi a ti. Mapuia khan inngaizawng angin a be ngai lo naa, amah zawkin a bialpa chei ve tawp kha a nia, khatia a tih chhoh ve zel chuan hma a sawn a rin vang a ni. A cousin a nuteii fanu Shalomi hnenah a va inbunruak a. Ani Shalomi lah nula paurau, hlauh em em nei lo, fing kherek ve zet, cousin te thlavang hauh na zet a lo ni si. Chutia a cousin zinga nungchang tha leh zawiawi ber mai tihnat a han ni chu a lo ngaithiam lo nasa mai a. 

"Ngawi tak rawh. I u ka awm alawm.. An inthen em em ang. Ka tihtheih kan entir ang e" a ti ta riap mai a. Ateii chuan khap mah se, awmzia a awm lo. A fin dan hi a mawl riau a! Pawi a la khawih thei maithei a ni. 

Pu Mawia te nupa pawh an rawn haw ta a. A tla kuam naa treatment a la tha bawk a. A na te pawh a chhuak rih ta lo. Hlim takin chawlhni tukah tukthuan an kil ho a. Nauteii pawh a tawng duh leh barh barh tawh khawp mai. An chaw kil mek laiin Nguri phone a rawn ri a. Rinfela a lo ni. 

"Ù, Anu a thi" a rawn ti teh tawp a. Dam tlan chuan chhungkua pawh han inbiak vak vak hi a tam lem lo va, Nguri pawh nitin a chhungte a be lo. Chutiang thu thin ţjawng a han hre ta chu a nghing dawt mai. 

"Eng.. Eng maw i sawi? " a ti khur dat a. Lawmsanga'n a rawn melh reng. 

"Umm kan kaitho lo" Rinfela aw chu a ri chang chang a ni mai. 

"Chuan, engtin.. A va mak awm ve" a ti bah nuaih a. Rinfela chuan a dah daih tawh. Nguri chuan a pasal va melhin, "Ka nu a thi.. " a ti sap a. A mittui chu a tling pam bawk. 

An zavai chuan an buai ta nuai mai.. Pi Sangi chu a mu hlum ringawt chu a ni mai si a! A mak hle mai. Pu Mawi te nupa tih loh Lawmsanga te chhungkua chu Hnahthial lam pan turin an insiam ta sawk sawk a, Nauteii pawh a tap ve par mai. A pi hian a rawn zin changin a duatin a chhawnchhaih peih em em a, A pi Lawmi ai mahin a ngaina maithei. Mahse, inchenchilh loh na na na chuan inngaih leh han inbiak reng te a lo theih loh a, a lo hrechang tawh bik thin lo. Mapuia pawh a pi tak ni lo mah se, a rawn zin changin Nauteii nen a en dan a danglam ngai lo va, a lo ralkhat ngainat ve viau kha a nia. A rilru kaptu erawh an zin chhungin Sasa a lo tha ang em tih a ni. Chanchin chu Rki a hrilh tawh mai aniang chu. Pi Sangi ruang hmuh hman ngei tumin Lawmsanga leh a nupui fanau te chuan Aizawl an chhuahsan ta a.