Thutiam s2 - 6

THUTIAM (S2)- 6

Ziaktu: Toni Râlte

A scooty a hun that lai takin Mapuia a rawn tlan lut a. A melh zawk ringawt. Mapuia chuan a bike chu hung thain helmet a phelh a. Muangchangin in chung lamah a chho ta a, a kal pelh tak Sasa leh Rki te chu an awm ve tih hre map lo ang maiin a pel a ni. Sasa leh Rki an inmelh hrek hrek. Sasa chuan biak hmasak a hreh si, mahse, a hmaa a awm dan kha a ngaihtuah letin tlawm hmasa zawk tur a ni tih a inhai lo. Khati em em lo deuha lo ti tur a nia sin le. Khami zan khan Tetea thianpa khan risk a tum tak tak lehnghal a. Tetea lahin a rawn um e vak si lo. Thinrim takin rui chungin a haw ta kha a nia. A pain a kam khat nghe nghe. A pa hi fate hau chiama kut thawh chi a ni lo hlauh zawk a, a nuta ten an hre lo pawh a lawmawm viau. An beng duh mai dawn si a. Mapuia kha in hruai hawntir mai mai se a tha mai tur. Tunah lah biak chu sawi loh a melh pawh a melh duh tawh lo chu a ni sia le.. 

Mapuia tak erawh a thawveng huai mai. Sasa a ngaihna leh thlakhlelhna te chu la kiam mah suh se; khati taka tlawma siam thei hmeichhia kha chu chelh zuia vawn a tum lo chiang hle. A ngaihzawng hmasa ber, a virgin hlohna a ni nachungin, mipa luck lo zawk zawk a ni bik lo va; Sasa aiawhtu chu a la tawn ve mai a inring. Khatia a kalpelh pawh khan anmahni a ni tih a hria, an hmel a hmuh khan a thinrimna a zual a. Melh pawh a melh peih thlawt lo a ni ber e. Lunch break-ah a ngaitein a thianpa ve ber Samua nen canteen lam an pan leh a. Sasa pawh Sangzuala te nen an lo thu laih mai. Samua chuan, "In inbreak mi? Vawiin in va inzui lo ve" a ti sup a. Thian mah nise, inngaihzawnna lam hi an insawipui khât ve angreng a. 

"Aw" a lo ti hul hak. 

"Bruh.. A pawi lo, zep lohah chuan Sasa chu a lerh hmel ka ti, a zeihawi tlat" a ti ve nghut a. Mapuia a nui ringawt. Lehlamah Sasa laka rilru a lo pek hman êm vangin mi nazawngin a mizia leh nungchang ni tura an sawi hi a dik lo tihsak a châk thin. Sasa hi a lo lerh a nih pawhin an nih chhung na nâ na kha chuan a kawp lo va,a rinawm ve chuan a hria. Khatiang dawt neuh neuh kha chu amah Mapuia a hlauh ve vangte pawh a ni tho a. Mahse, Tetea te ina thil thleng erawh kha chu a palzam thei thlawt lo a ni ber. 

Sasa pawn a rawn hmu ru reng. Runluih a chak lehpek a! He hmeichhia hi a la naupang a, a â em a ni. Mapuia mizia a hrechiang tawk lo pawh a ni mahna le.. Sangzuala chu hlim hmel zetin a be der siam siam a. A nuih pawh chuan a nui ring lui ngei bawk. Reivak loah commerce lam ami Sangteii leh Lily te an rawn lut ve a. Lily hi tihtakzeta Mapuia startu a ni. Mapuia te bulah thuthmun an rawn rem ve chat. Eitur an chah chhungin an titi ve a. Mapuia chuan runluih rawngkai pawh ni hran lovin a lo be tha ve mai. Sasa hian Lily'n Mapuia a star tih a hre sa a, chutia an han thu ho a hmuh chuan a na leh si. Mapuia lahin a runluihna chu eng he hu-ah a lo ngai lem bawk si lo. A chhungrilah a insawh tau nghat ngjat a. An thil ei zo an chhuak tur chu tihpalh nge tihluih pawh a hriat loh, Sasa chuan Lily dhoi chu a vai buaksak ta hlauh mai a! A kekawrah a baw ta nuai mai. An ri nghal hak.. Lily hian Sasa leh Mapuia an ni thin tih a hre ve kar bawk. Boruak a tang ru viau. 

"Ka tihpalh lutuk.. Sorry mawlh mawlh" Sasa chuan a ti tak naa, a mitmengah pawi tihna a lang lem lo. 

"I va fimkhur lo ve mawle.. I mit a del em ni? " Lily lah senior most tih takah hlauh a nei vak bik si lo. 

"Ka tihpalh ka tih kha.. Ka duh vanga tibua ka ni lo. Min hrethiam rawh" Sasa chuan a ti a. 

"I tihluih a nih kha.. Engtin nge class ka kal tawh ang a.. Heti chungte chuan. Junior te te si, i nghal tlat.. Nang hi" Lily chuan a ti hlak hlak a. 

"Senior i nia.. Min hrethiam zawk ta che.. Naute chu" a lo ti ve khauh. Lily run tawk a lo tling. 

"Ka thin i tirim palh ange. Hetia i tih chhan pawh ka hria.. Mapuia vang a nih hi.. " a ti ta hmiah mai a. Mapuia an melh thup. Ani lah a thil ei ruahna thleng a lo melh veng veng si. 

"A teuh lo mai. Tu nge Mapuia pawh ka hre lo e a " Sasa chuan a pride hmachhuanin a ti leh hlak. Mapuia a nui hawk. An melh leh thap. Sasa mita chiang taka melh chungin, "Ex te hming pawh theihnghilh tur khawpin ngaihzawng i lo ngah tawh a nih dawn chu.. Ly, kal ang. Kekawr chu a dang ka lei ang che" tih pahin a wallet a phawrh a, an ei man a dah a, Lily a kai a, an chhuak daih. Sasa hrilhhaizia leh natzia chu tuman an hai a rinawm loh. Chawh titu lah a rukin an tam. A awmdan te reuh vang hian khatia tih kha a phutawk ve bawk a ni. A thinlung erawh na tak a ni. A rin loh leh beisei loh lutuka Mapuia khawsa chuan a mah leh amah pawh a inrinhlelhtir hial mai. Ni e, Mapuia kha amah aia upa zawk leh mipa zawk mah nise; ngaihzawng la nei ngai lo tih takah engkim kha hrilh hriat a ngai ve a, Sasa chuan chu tak chu amah thunun nan leh alaka inlek nan a hmang thin. A duhtawka a ankhuma a thikthu vanga mi dang a block sak chang pawn engmah a sawi ngai lo. Dawhthei takin a nghak thin kha a nia. Hman zana thil thleng kha Mapuia chuan an ruih vangah ngaiin a rei hnuah chuan a pawmzam ve mai a lo beiseina te chu an thlawk bo zo ta vek mai. A rin ang ngawtin chu mipa chu a lo chaih thei hauh lo. Chu tak chu Sasa tan chona a tling si a ni. 

Chawhnu period pawh kal peih tawh lovin a haw tau a. A roomah a mu char char. Ţah em zawng a ţap lo ve. 

An College piah lawka thawmhnaw dawrah kekawr chu an va lei a. Lily hamhaih lah chuan sawi tur a bar pawh a hre lo. Mapuia khawsazia chuan a timangang lek lek zawk. Mahse, college an thlenpui hnuah, "Ka ex a lo nih tawhnaah thupha ka chawisakna angah i ngai dawn nia" Mapuia chuan a ti a. Lily tan chuan a lawmawm em em chuang loh. Mapuia a duhna erawh a pung sawt thung. 

Pu Mawia pawh zemabawk lamah chemo khaiin a va invawm lut ve a. Pi Lawmi'n a awmpui thei hlauh a. A zia e. Zan hnih an riah hnuah tukthuan ei laiin Nauteii'n, "Nu, apu ka ngai tawh e. Vawiin chu va kan ang u" a ti ta nge nge a. A pu tak pawn a ngai tawh viau ang. 

"Nia, a tha khawp mai. Ani pawn a ngai tawh viau ang che. I u nen va kan ula, in banah" Nguri pawh chuan a lo ti a. 

"Vawiin chu ka va hman loh hmel, Kan practice hun a ni sia" Mapuia'n a lo ti a. Football an practice hun a lo ni ve bawk si a ni. Nauteii chuan, "Taxi ka hmang mai ang" a ti a. A pa taxi kha khatia Sarah vanga an han mualpho takah khan driver dang ruaiin an khalhtir tawh a. Lawmsanga erawh awm mai mai thiam hek lo, huan lamah a feh tluk tluk mai a ni. 

A nuin taxi fare a pe bawk a, phur takin school a kal. An test paper an sem a, A titha viau. Miss Feli paperah erawh 20/marks-ah 11 chiah a hmu. A thiam ve vek khan a hre sia, complain a duh viau a, mahse, buaina an neih leh a hlauh deuh vangin a ngawi ringawt. Sir Sangpuia test paper a dawng chu a khup nghal hmak. Msi'n a hmuh ve a hlau tawp. A chhan chu thil dang a awm vang a ni. 18 marks a hmu a, mahse, a hnuaiah, "Ka bialnu tur i nih vanga hmu tha i ni lo a nia. I thiam em vang zawk a ni. Chuan, duhawm lutuk thin suh.. Min tilai thin" tih thu a lo inziak kulh mai! Nauteii chu a sen ap ap a, mi dangin an mitmei lo tih a hriat vang chuan a thaw huai mai. An bang hma hlauh bawk a, a pute bulah awm rei theihna chance a nei thei tih hriain a hlim ru hle. Taxi a chan mek laiin, "Lo kal rawh" a rawn ti leh ta. Naupang dang an haw zut zut laia chutia a rawn bia chu a ngei nasa. Ner nawng chungin, "I zak lo" a ti ringawt a. Vawiin chu bike zawk a lo keng a lo ni. 

"Hmanhmawh la.. Min en thup a nia" a la ti zui! Nauteii a ţap lek lek a ni. 

"Ka kalna tur pawh i hre lo" a ti hlak a. 

"I sawi mai dawn alawm" a lo ti nghut. 

An en hrek hrek tawh bawk si, Ngei ru deuh chungin bike-ah chuan a lawn ta nge nge a. An tlan chhuah rualim Sangpuia banbulah a sik ngar ngar.. 

"A na tawh ee.. Min thlah ve tawh la" a rawn ti dam thlup a. 

"I chhe lutuk" a ti hlak. 

"Khawiah maw kan kal dawn? " a rawn ti a. 

"Apu kan ka duh a. Zemabawk Cancer Hospitalah" a ti ve mai a. Chu lam pan chuan an tlan nghal. 

"Naute… " a rawn ti a. 

"Tawng vak suh. Bike chuan laia tawng vak hi a thing" a ti leh hlak hlak. 

"Miin ka bialnu angah an ngai vek tho che a. Ni tawh law law mai ang" a la rawn ti. A helmet chu a chhiatkhum nghek nghek ringawt. 

A chhan loh vang ni maw.. Ngawi reng chuan an tlan ve zel a. Hospital an thleng a, Sangpuia zawk chuan Nauteii pute awmna te chu zawtin an inzui lut ta a. 

A pu chu khumah a lo mu a. A chauh ve hmel angreng. A pi erawh khum bul thutthlengah magazine niawm tak a lo chhiar a. An han inhmu chu an rak chul mai. Surprise a duh vangin engmah a hrilh lawk lo bawk nen. A pu phei chuan thei leh thei lovin a lo ban ţawk ţawk a. Sangpuia pawh ngaihtuah chang tawh lo chuan a pu chu a va kuah hnup a, "Ka ngai tawh lutuk che a" a ti sar sar a. Pi Lawmi chu fing fel tih takah Sangpuia chu a lo welcome vat vat a. 

"An sir ka nia. " tiin Sangpuia pawh chuan fel takin a inhmelhriattir a. Nauteiin a nachang hre tawh hek lo. Pu Mawia phawk lah chuan, "Naute, hei hi mi zana i biaka i nuih ver ver reng chhan kha" a ti! Nauteii zak leh lai bawk si chuan, "A lo kal ve ringawt.. A zak lo tak tak" a lo ti zui.. A mizia an hriat tawh vangin Sangpuia pawh a nui nasa saah a tang. Pu Mawia erawh chuan Sangpuia chu a rukin a chik hle thung. Nauteii pawn a haw tak tak lo tih a hria, a la nau ve êm mai a. Ani Sangpuia lah nupui nei rual zet a ni ve tawh si a, an lo inbum thlu ang a, tih sa loh loh te an lo ti ang tih a hlau ve a ni. Mahse, Sangpuia chu a lan dan leh tawngkamah ringawt chuan mipa fel leh rintlak tak ni chuan a lang. A tunu chu a nulat tak tak thleng a dampui theiin a ring lo va, mipa tha tak tawng se a duhpui a ni. 

Pi Lawmi chuan, "I u eng nge a an? " a ti a. Ani hi chu Mapuia pi bik a ni ve a. 

"A tha vak lo aniang. A nui khát tawp.. A bialnu nen an inthen aniang ka ring" a lo ti liam leh puat a. 

"A mak thei zung zung.. Naktukah min rawn tlawh rawh se.. " a pi chuan a ti a. Chawhmeh leh eng ilo hi an driver in a va dah mai thin a. Mi dang ho hi anmahni buaia an buai ve bawk avang leh Pu Mawia te hian an phut loh em vangin an va lang hman rih em em lo a ni. Rei tawk tak a pu te bula a awma a pangchan hnuah a puin, "Vaw haw tawh rawh u. In sir pawn tihtur te a nei ve ang.. Lehkha kha tha takin va zir ang che. Ka rawn haw tep tawh ania" a ti ta a. Nauteii pawh thuawih takin a bu nghat nghat mai. 

An inphur chhuak leh ta poh a. "Ka thianpa inah kal lawk ang aw. Lehkha lam tur ka nei a, he lamah kan kal ta sa sa" Sangpuia'n a tih chu a lo hnial lem lo. A thianpa chu Bawngkawnah amahin in a luah a. Zorema a ni, Baktawng khua a ni teh daih bawk. A be lawk a, a awm lai tak a lo ni bawk. An zuk thlen chuan an han thu khawmuang ve a. Zorema lah â hek suh, "In lo kal lai tak a ni bawk a. In min lo nghahsak zuai mai teh u.. Dawrah mamawh lam ka ngai, ka chabi ka tibo a, in kalh lo chuan ka chhuak ngam si lo" a ti ta a. A chhuak zui daih. An pahnih chiaha an han awm takah chuan Nauteii thaw a sa phat phat mai. A zak a ni. 

"Zah vak a ngai hleinem.. Naute.. Engtinmah ka ti dawn lo che. Ka sawmna kha min pawmsak tawh la ka duh a ni" Sangpuia chuan a ti ta a. Ani pawh a zâm ve deuh em mawni a kut a tiche neuh neuh reng mai. 

"Ka la naupang si" a lo ti dat a. A tawng zawi kher mai. 

"Ka hria alawm. Mahse, upa ta la, min duh leh si lo la.. Ka na dawn asin. " naupangchhia takin a lo ti ve a. 

"Anu ten an hriat chuan min vaw duh mai ang"

"An vaw lo vang che. Keiman i nu chu ka be mai ang. Ka kutah awm la, him taka awmtir che ka duh a ni. Ka ta i nih loh chuan ka venghim thei dawn si lo che a. Mipa sual leh bum hmang i tawn ka hlau" a ti ta duah a. 

"Ka hre tawh bik lo e a" a ti ringawt. An inmelh dun ta reng a. Sangpuia chuan Nautei'n a lakah feelings a nei ve tih a hrethiam, khawiha hrawm a chak, mahse, a tihlau ang tih a hlau bawk si. Awmdan thiam harsa a ti ve hle. Hmeichhe naupang zuna han uai tak mai chu.. 

"Min duh em? " a ti ta khawl a. 

"Mawh.. " a ti leh. 

A heh a pet zauh a. "Ih.. Ka duh ve tho chein ka hria" a ti zawi ta sap a. 

"Nih chuan, ni ila" Sangpuia pawh chuan zawi sup hian a ti ve a. 

"Engtin nge kan awm ang" a lo ti hû. 

A nui hawk a, "Awm vak a ngai lo. Tian kan inbe zeuh zeuh anga. Rinawm ve ve ila.. Pasal i neih ngam hun thleng ka nghak ang che.. " a lo ti nghet charh. 

"Umm" a ti a. Sangpuia chuan va hnaih hretin, "Nih ka fawp ang che aw" a ti a. Nauteii a ter at. "Infawh rih ka la duh lo.. " a ti ţhak a. Tihluih chi a ni lo tih hriain, "Okay, i duh hunah a ni mai lawm" a lo tihsak. Zorema a rawn thleng ta bawk a. An duh ang an sawi hman bawk nen. Rilru chhungril hlim takin an inphur hawng ve leh ta a. 

Hmana Nguri deusawhtu Rampuii khan vai fa rawn pai hawin tunah chuan a fa pawh a lian ve tawh viau. Amah pawh a rawn haw ta bawk a. A vai fa pai chu zah tak aruangin a chhuang zawk em mawni, A nulat tirh mizia kha a hloh ta vek mai. Inchei zet zetin a leng chhuak reng a, Mizoramah hnathawh tur mai a lo awm remchang si lo, Loan te pukin dawr te a han hawng ve lawp lawp a. A dinhmun chu a tha ta vak lo. Lawmsanga hian Rampuii a hmuh apiangin hei hi a hrechhuak ziah, "Mihring hi kan lo va danglam thei em" tih hi. A hriat thin Rampuii kha ni tawh miau hek lo le. Amah Rampuii pawh a inngaihtuah lungpuam chang chuan, Lawmsanga'n a thianpa a thik lai te khan zaidawh takin lo hrilhfiahin a thianpa pawh kha han thlah ve lawk mai se la, engkim kha a pangngai ang a, tunah chuan Lawmsanga nupui a ni ve mai tur.. Khatih lai khan Lawmsanga mize dik tak hre si loin a lo palzam ve ringawt a. A tisual hlen ta chu a nih hi.. Ni e, inngaihzawnna leh inhmangaihte inkarah hian ţhian hmingpu hian hnawksak chang leh khikna siamtu an nih theih chang a awm thin. Opposite sex te nen hian rei tak ţhian ţha tak a nih theih loh. Rei tak thian tha ni theia insawite hian kawppui an nei ve ve tlangpui.. A nih loh pawhin a tu emaw zawk an hmelchhe ve hle tihna a ni thin. Siamtu min duan dan a ni a, Thian nihna hmanga bultanin inkawmnela in ngainatna chuan thikthu a piantir a, chu thikthu chuan par rawn chhuangin thian nihna kalpelin inngaihzawnna kawngah a hruai peng ta thin a. Chuvangin kawppui neih tawh chuan opposite sex te nena inkawma inpawh em em hi kan kawppui te tan en liam mai a harsa ve tih hriat a tha viau. He thil vanga inthena na taka inhliam hi an tam tawh a sin. Rampuij ngei pawh a ngaihsam luatah a hmangaih a chân a, a nun ngei pawh a hloh tel kan ti lo thei lo vang. 

Nguri a hmuh chang mawlh hian thikna hlira a khah thin vangin tihnat ve theih a chak a. Kawng a hre si lo. Nguri dinhmun saw ka luah zawk tur a nia sin tia inhrosak bak tihtheih a nei meuh tawh lo a ni e. 

"I u hi a dang riau. I zawt em? A cool sa nak alaiin a cool lehzual a" a nuin a dal kan chawh pahin a ti a. 

"Chu chu lawm a dang tawh ee.. A ngawi reng zel bawk sia.. Ih, a bialnu nen khan an inhau aniang" Nauteii chuan a ti a. 

"Lo zawt ve la.. Kan bulah a sawi ngam lo pawh a ni thei a,, " a nuin a tih chuan…, "Umm,' a ti ringawt. A pa a lo hawn vangin an sawi zawm lo. 

"U, ti nge i van hlim lo thei em em? " room-a an awm lai chuan a ti ta nge nge a. 

"Ka hlim alawm" ti mah se; a mitmeng nguizia chu Nauteii'n a hmuh hmaih bik lo. 

"Dawt a nih chu.. I hlim loh chuan ka hlim thei lo" a nauin a tih takah chuan, a chhungril kawrawng, mawlhtu chu a lo thup seng tak tak lo tih a hrethiam ta a. A nau bianga piai zauh pahin, "A nih ka hlim tawh ang. A tha em? " a ti a. A nui sâng bawk. Nauteii pawh a bu ta nghat nghat a. 

"Rk, a hrehawm ka ti. Ka be hmasa duh si lo. Ani lah a reh tlawk tlawk a.. Awm ngaihna pawh ka hre tawh lo" Sasa chuan a va ti a. 

Rki chuan, "Dik tak chuan i tidik lo alawm. Mapuia anga dawhtheitu che an tam lo asin. Hman zan khan i tina em a ni. Kei pawh ni ila ka biak tawh che ka ring lo" a lo ti hmiah. A sawi dik lo miah lo. 

"Ka ruih lai a nia, a hriatthiam mai ka ring mawle" 

"Hrim hrimin bialpa te pawh an ruih loh laia lo ruih ve sek te kha tu mipain nge hrethiam seng ang. Pubg pawh ka hrilh zing che, i luhlul em a. I tilui ngar ngar a, a dik lo ve em a ni. Insiamtha la, tlawm takin ngaihdam dil rawh. A la ngaidam thei mahna che" a lo ti zêk. Mahse, Rki hian a sawi dik, Sasa hi zilh a la tum ve reng reng bawk a. Mapuia nen hian inkawm tam lem lo mah se, mipa dik tak zia a pu tih a hre ve a, Sasa te ang tunlai ve tak leh ngaihsam tak tan chian mipa tha tawp a ni. 

"Nia, ka'n dil ang e. Ngaihdam chu" Sasa chuan a ti a. A ngui hle. Mapuia last seen a check awl lo va, a status a check chhen a, ama status a view leh view loh a en kal reng bawk. Mahse engkimah Mapuia chu a reh si a ni. A mangang tawh. A chapo vang veka thleng a ni tih a hmuthiam tawh bawk. Mapuia chu a duh a, a duh lutuk. An han inzawm chiah khan Mapuia'n a care leh a dawhtheih em vangin ngaiah a nei ta deuh a, an inthen a rin loh vangin.. Sex an hman phei kha chuan thikthu chu pung mah se, Mapuia'n a phatsan a ring lo hulhual thin. A rin leh beisei angin engmah a thleng ta lo chu a nia. Hmeichhe chapo tukdawl tur hian mipa chak an ngai fo reng a ni. 

Saii te nupa karah buaina a piang leh ta tlat! Muanpuia rilrem loh zawng tak Saii chuan a lo ti leh pek chu niin an inkhak leh ta zeuh zeuh mai. Sawi tawh angin Saii hi thil thar lawm chi tun lai ve tak a ni si a. A fa neih hnuah lah a intuaihnum chho a, a nalh leh viau bawk. An pa hlawh chu thla hnih dawn lai chu an kham lo titih ta tlat mai a. Muanpuia'n a han chhut a han chhutin, in chhung bungrua leh eng ilo an lei a hre si lo, an fanu lahin thil thar man man tak a neih a hre bawk si lo. An nu closet a han en nak chuan thawmhnaw thar man to tih hriat zet zet bakah puanzeh ropui zet zet a lo awm dul mai a! Nitin hnathawka chhuak reng reng a nih avangin chung chu a lo chik lem lo a ni. An nu chu a be ta ngei a, "Ka chah a nih kha.. Inkhawmnaah ka thing thei bik lutuk a" a ti mai a. 

"I nalh bawk alawm le.. Ka hlawh phu lohin i fashion a sang a nia. Mi nu te hi nang ang an nih ve pawh ka hre ngai lo. Tun thla phei chu kha.. Gp la chhuak lo ila chu kan nghei dawn anih kha.. A mak em mai" Muanpuia chuan a ti khak khak a. 

"I phun peih sia aw.. Mipa ve si. Hetiangah inrawlh ve vak a ngai lo. Ka thu thu" Saii chuan a ti hmarh hmarh a. 

"Mi inah hian han leng lut teh. Ka hlawh aia hlawh tlem zawkte in chhung phuisui zia hi. Saw, Telawma te chhung te saw va en mah teh. An nu a fel bawk a. An in chhung saw phuisui tak a ni. Keini ve i incheina a sang chang a, kan indan tirha kan bungrua min indanna bak thil thar kan neih awm pawh ka la hre lo. In chhung nise i tifai tha peih si lo. Ka kham riau tawh ania"Muanpuia chuan a ti ta hmak a. 

"Telawma te nen chuan min khaikhin duh suh. An nu sawn an pa a hlau em a, a thin theih em reng saw.. Biak inah te hian a kimkit duk zel hi..in pawh ka tifai ve reng.. Naute kan nei a, a tihnawk leh zel alawm" Saii'n a ti zat zat. 

"Ngawi hmak la, insiamthat tum ang che. Bawihteii pawn thil thar a nei ngai lo, nangmah chiah inngaihtuah suh. In chhungkhur hi vei ve la, thianghlim takin dah la.. Mu huat huat reng lo khan. IG lama inpost-a i fanu hmangaihber anga rak chhen lo te khan, a tak takah hmangaih rawh. I kuah aiin Nguri ten an kuah hi a tam zawk hial ang. Nang aiin Nguri pawh a ngainat zawk daih reng hi.. I insiamtha lo va i duh dana i nung chho zel dawn te a nih chuan in in lamah lo va nun chhunzawm zel mai la.. I hlut tur angin i hlu tak tak chuang lo.. Hetah" Muanpuia thinrim tawngkam a ni tih hrethiam ber tur Saii chuan ngawih aiin a pasal hliama chi phul a la duh zawk mawni.. "Inthen lah hi i sawi ziah a. Ve khanglang a.. Hna i neih vang hian thei viauah inngai suh. Tih tak emah chuan hmu zo lo ka ni bik lo" a lo ti ve leh páng pâng a. Muanpuia zaidamin a tlin dawn hlek lo. Kut an inthlak leh mai ang tih hlauin a chhuak ta daih. A pa te in lamah a phei ta a. 

Nguri te nupa bulah an nupa inkar boruak chu a hrithla ta a ni. 

"Saii mizia i hria a, a nulat laia a zia te kha a hloh vek thei bik lo alawm. Mahse, i thinrimna hi a awm ka tihpui che. Nu a ni tawh a, pasal fanaute aia ngaihpawimawh a nei thiang lo. Ani pawh a inngaihtuah ve turah ngai ang" Nguri chuan a lo tihpui a. 

"Pa nih hi ka tlin lo aniang. Ka nupui pawh ka thunun hleithei lo chu a nia.. " Beidawng zetin Muanpuia'n a ti a. 

A nauin, "Aa.. Mihring ve lem inthunun tawp hi a har ve bawk a ni. Nang pawh hnathawkin i chhuak a, zan lamah te hi chuan uap ve la.. Saii te pawh eng emaw thil thar te han hawnsak ve zauh zauh la.. Tha tetein in inkara siamthat ngaite sawi dun ula.. A tha ngai. Thinrima inhauh chuan dik ve veah kan inngai tawh thin si a.. A dik thei lo" a lo ti ve nghut nghut a. Muanpuia pawh a thawl huai mai. A nupui pakhatna nen an lo inthen tawh a. Nupui han thlak leh emaw han then leh kha a zahthlak a ti ve bawk si. Saii awmdan hian a lung a tiawi hleithei bawk si lo, a khawngaihthlak zawk ngawt mai. 

College week an hmang chho tan a. A nuam chho hle. Mapuia te leh Sasa te chu house khatah an la awm zui a. Sasa khan ngaihdam dil a tum zet a, mahse, "Min hmusit ang" tihna rilru puin, "A theih chuan ka thei ve tho ang' tia incho phurin a be ta lo kha a nia. Tlawmpaseka a la tlat hi a luhlul vang a ni pakhat. Tin, a pangchan vang ti bawk teh ang. Mapuia hi rin aiin a sportman zêk a. Individual item-ah pawh an house ai a awh chho zar zat mai. Race -ah tuman an phak lo, a fal nalh. 200 metrs race an tlan zo, hah vanga thaw hluam hluam chunga an house thutna a rawn pan chu hmeichhe ngawichawi leh zakzum ve tak, hmel erawh tha ve reuh tak Ateii chuan bottle lek vâin tui a lo pe a. Mapuia tak pawn mak a ti deuh. A tui pek chu a in khawlh khawlh a. Lawmthu a sawi sup. Sasa mitmeng erawh râng tak a ni. Ateii chu a melh ráwm rawm a. Amah Ateii erawh chuan a lo en ve lem lo. Thikna meipui chu a alh chho tan ta. Mapuia chu Ateii bulah a thu ve nghal chat bawk. Ateii hi Junior ve tho niin, Sceince lam daih a ni thung. College-ah a inlar tam lo va, a zia a zawih em vang leh a zahzum deuh vang hian tuvak mahin an notice lem lo bawk. A thiannu Peki nen an inkawp deuh tawp zel a, Mapuia hi chu a lo hre ve daih tawh thung. A lo ralkhat star ve em em thin a, Peki takngial pawh a hrilh ngam lo. Khatia Mapuia hah thaw hluam hluam kha lo khawngaihin a zah theih lohna zawng zawng sawm khawmin tui kha a pe ve ringawt mai a ni. Sasa nen an ni tawh tih pawh a hre ve tho a, mahse, an inhnaih tak loh em vangin an inthen tawh angah a ngai a ni. 

An awmna veng leh an subject lak te an han inzawt a. Mapuia pawn Ateii chu hmeichhe fel leh nungchang tha tak a ni tih a hre nghal mai. Ateii hi a te lutuk lo va, Sasa ai chuan a ngo lo deuh maithei. A sam sei ngil tak chu a tawn kawh vah a, an house Tshirt blue color chu kekawr dum tight lam lek lek a ha a, converse dum bunin a simple bakah a hmai pawh a chei ve lem lo. Chanmari-ah an khawsa tih Mapuia pawn a hre chhawm ve zel a. 

"I van tawm thin awm.. Ka hmuh vawikhatna che a niang" a ti hial ngje ngje. 

"Nia, kan chhuak ve vak lo va. Chhunah nise tiffin ka pai mai zel a.. " a lo ti ve a. 

"Sports lam te i tui ve em? Nang hi i lo thei zêk lo maw? " Mapuia'n a tih chuan, Atei thiannu Peki chuan, "High jump leh long jump-ah pawh High schoolah chuan pakhatna a ni ziah. A inhawlh lawr zak leh tawh a nih hi" a lo ti vat a. 

"A va tha e.. Leader te hrilh tur a nih chu" Mapuia chuan a ti a. 

"Hey.. A ngai lo aw.. A zahthlak. Ka zuan lohna a rei tawh si" a lo ti vat a. 

. "Mawina, Volleyball pawh a thiam lutuk. Chuan zai pawh a thiam lehzel"Peki'n a lo ti leh chu, rum zeta va melhin, "Vanlalpek, i tawng thei aw" a ti a. A thin erawh a rim tak tak lem lo. Mapuia chuan a hre ta kar a. Hmeichhe lam chet chhuah hmain Leader te bulah a va sawi ta a. Ateii leh Sasa te an house aiawhin an chhuak dawn a ni. Sasa tan chuan chona a tling awm e. An han zuang tan a. An au nasa khawp mai. Ateii chu an la hmuh ngai loh vangin mi en bik a hlawh viau, thawmhnaw pawh a lo keng si lo va, an house asst leader in a kekawrbul a haktir tawp. Sasa erawh Secondary-ah pawh pakhatna leh pahnihna lo hauh ngar ngar thin a ni a, mi hriat a hlawh deuh sa a, a confi viau mai. High jump-ah Ateii chu a lo sang zawk bawk a, Sasa chuan a khum zo ta lo. An house point erawh an titha ngang mai. Ateii pakhatna niin, Sasa pahnihna a ni thung. Long jump an zuang leh a, Ateii zuang ţang ve bawk si chu a ţum sual ta hlauh mai a, a kerek a tina ta deuh, a bai ta auh auh a, tichung chuan pathumna a la ni phak tho! Sasa erawh tuma khum rual lohin pakhatna a ni thung. Chutia Ateii bai suih suih chu Mapuia chuan a lo chelh vat a, inkuah titihin an house thutna lam an pan ta a. Sasain an hmu zet chu a mittui a khap per sawk thei! A chhungril chu a rawn na zawk zawk a ni ber. Thinrimna leh tlawm intihna chuan a bual a, Rki'n kai lo phei se chuan a va pawt then duh hial maithei a ni. Mapuia erawh a dam ruih reng a. An thut fel hnuah Ateii ke chu a zutsak a, tlemin a lo ulh ve deuh nge, a kezungtang te chu a pawhsak bawk a. Ateii pawn zah a sawi thei vak tawh bik lo. 

Thu ho ta reng chu tlaiah pawh Ateii chu a thlah haw ta thlap a, number pawh an inneihsak tawn ta ran mai. 

Mahse, a ta liau liau anga lo hauh ve thintu Sasa chuan chuti maia Mapuia chu mi dang hnena hlan a lo tum lo kher mai. Zanah a rawn text ta ngei a. 

"I kal dawn anih pawhin khati em ema min runluih kha a ngai em ni? Na ve thei ka nih hi" tiin bul a rawn ţan phawt. 

A reply lo. Ateii msg, "Vawiin kha ka lawm lutuk. I fel si.. Naktukah ka treat ve ang che" tih zawk chu ngaihven luiin, "A ho ee.. Engmah a nih loh kha. Lo dam rawh aw" tiin a reply a. A rilru kil khatah Sasa erawh a thi renh reng lo. Dik tak chuan a tina êm a, mipa ve tak thinlung hliamsaka tlawm ngawih ngawiah siamtu Sasa chu theihnghilh a har ve bawk ang. 

"Min chhang lo mah la, ka rawn be zel tho ang che. Ka tihsual ka hria, engkimah khan ka dik lo a ni. Khawngaihtakin min ngaidam rawh. Bultan leh ang. " Sasa bawk chu.. Vawi thum a chhiar nawn. A reply leh ta chuang lo. Luhlul ve ve indona chu a pui viau loh pawn a nep viau ngei ang. 

Sasa erawh a vawi khatnan mipa vangin a ţap ve ta keuh keuh mai. A tihsual pawizia a hriat takah chuan a inhua a, Tetea te thleng pawn a hua. Pubg pawh a delete hmak. A sâwt tawh der si lo. A hun laia ngaihdam a lo dil lo kha mawl a inti a, a inhau mawlh mawlh reng mai. Rki bulah bak inbunruahna tur a hre bawk si lo. 

"Tun inrinni chu Ţam dilah kal ang hmiang. I la hmu awm si lo va" Sangpuia msg chu phur zetin a chhiar a. A chak lutuk, mahse, a nu ten an phal ang em? 

"Anu te thu thu" a ti a. 

"Ka lo dilsak dawn che mi? " a rawn tih chuan, "I mawl ami? I zak lo em mai" a va ti leh hrep. 

"Ka bulah te chuan i him dawn tih an hre vek ang" a la ti zui. 

"Ka lo dil ang. Kan pahnih chauh chuan miin min hmu ta se.. Englo angah min ngai ang" Nauteii chuan a ti a. 

"Eng englo tak maw? " 

"I ninawm.. I hre ve reng"

"Aih, sawi teh. Ka hre miah lo. Eng englo nge i sawi? " Sangpuia chuan chimawm a chhuah ve tlat. 

Nauteii chuan, "Hei.. Nula leh tlangval fawr ang hi" a va ti a. 

"Kan fawr dawn reng alawm.. Inngaizawng kan nia" a la ti deuh deuh. 

"Kal teh.. Ka mu dawn. Chutiang ka sawi peih lo. " a ti deuh hmak. Mahse, an inbe zel tho sia.. Haha.. Sangpuia aia mipa hlim hi tunah rih chuan an awm kher lo vang. Tuk khat a zing tho pawh a nu bulah, "Nu, naupang hian zûn an lo ngah zawk a nih hi.. A va nuam tak" a tih hluai pek kha.. Amah te chu naupang tha leh riau ten a inhria a. A nui deuh sâng reng mai a ni. Miss Feli lah hian a rawn be ve sek lehnghal a, Nauteii a venthawn vang hian engmah a la hrilh duh lo mai mai. Nauteii chungah a tuan a hlau a ni. 

Muanpuia office bang chuan eng emaw a khai bawr taih a. Saii chuan a lo en vat. Candy thaawmhnaw tur hlir a lo nia, toys te pawh a tel. A mawi hlawmin a man a tlawm lo vang tih a lang reng mai. A fanu thil thar nei chu lawmpui a hnekin, "Khaw nge ka ta ve tur? " a ti hmak a. 

Muanpuia chuan zaidawh takin, "Hei" tih pahin a bag ah atang chuan underware suit rawng sen lar tak hi a rawn phawrh ta a. Saii chuan a lo la vat. A tirah a nui naa, a hnuah, "Ti em em nge bawihteii hi i leisak vak. A ha seng dawn mi? " a ti a. A tûm deuh bawk. 

"A thawmhnaw hlui ho kha chu i nau fate pawh pe mai rawh. Thenawmah pawh mamawh an awm ang. Hmanniah kan kohhran nula hoin, 'Candy hi ka chei chak.a hmel tha sia, a kawr hi in leisak ţhing thei lutuk.. A inhmeh lo" an tia.. Ka rawn leisak anih kha. " Muanpuia'n a ti hmiah. Saii a ling leh hlar tawh. 

"Ve khanglang a, eng nge an lo sawi ve vak a tulna? A nu ka nia, ka duh danin ka chei ang. An sawi phak a awm lo" a ti hmuar hmuar a. Dik tak chuan Muanpuia khan dawt a sawi lo, nula pahnih amah ngamtlak tak ten Candy chungchang an hrilh tak tak a ni. Pa a ni a, incheina lama lerh lo chi a lo ni bawk nen, a fanu nalh leh nalh loh a lo hrethiam ngai lo va, chutia an han hrilh takah chuan Saii'n ama hma a sial dan te a hria a, a fanu leh a pasal ngei an ţhin riap laia ani a parh thei ang bera a inchei thin chu miin an lo hre viau tihte thlengin. Chuvangin Saii inhmuhchhuah nan tiang hian a che ta mai a ni. Fanu pakhat chauh an nei a, a thiante zingah pawh nalh ber tur a nih laia thlahthlam ang maia a chul rep tur chu a ngaingam bik lo a ni. 

Tin, Saii hau tawh lem lo vin aman in chhungkhur bungrua te pawh a lei ta hmiah hmiah a. Parda thlengin an thenawm nula a chahtir a, Saii zawk a leh awl der mai. Zah nachang lah chu a hre thak bawk si lo. A thinrim zawmah lehnghal. A kuta pawisa lut a tam lem loh vangin a hlim hmel hmuh tur a vâng a, nupa nun lah an hmang ngai ta hek lo. Chutiang chuan nupa inkar boruak khi hret hretin an awm chho ta a. An fanu lah Nguri te inah a chengkual tam zawk bawk si. Nauteii hian a duat êm a, khawiah pawh kal se thil a hawn ngei ngei thin. 

"Mapui, i hre tawh em? Sasa chanchin kha.. " Rki aw khur dat dat avang chuan ngaihtha lo zetin, "Eng nge thleng a? " a ti a. 

"An kai tho zo lo va, tunah ICU-ah a awm mek.. A marphu chu a la awm a niawm e" a rawn tih chuan engkim chu a vir muai muai niin a hria. A thim deuh chhulh chhulh bawk. Ni lo, hei hi a thleng tur a ni lo tiin a ngaihtuah a. A thleng miau si a. He thil thlen chhan hi ni 2 kaltaa thil thleng vang kha a ni tih a hria.. 

. "Sasa, ni lo ve.. I la kal thei lo.. I kal lo vang. Tunah chuan ni lo" ti rilru mawlh mawlh chungin Damdawiin lam panin vung takin a tlan chho ta a.. Ni 2 kal taah khan eng nge maw thleng reng reng le.. 

(Lehkha zir tan a ngai chho leh dawn a. Nitin lo dah chu ka tum tho anh a. A sei ta lo telh telh anih pawn inhriatthiamah aw.. 😊