Thutiam s2- 2

THUTIAM (S2) - 2

Ziaktu : Toni Râlte

(Adds mawlh kha 😁

SAII.. 

Saii hi a hming pum chu Saidingpuii a ni a. A tleirawl chhuah phat hian an veng tlangval hawiharh ve tak nen an inru a, naupang takin a thlawi ve ringawt. An la naupan em vangin inneih an la phal lo va, a hnuah phei chuan an inthen zui ta daih a. Kha a tleirawl nun pelhe ve zuai khan a nunah nghawng a tha lo zawngin a nei ta a, a sihhnip chho ta riau. Zu a in thei mai bawk a. Mahse, langsar tak chuan a va che ngam bik lo. Singapore lamah te pawh han inhlawh ve zak zakin, sum hlutna te a hre chho ţan a. Pasal tur pawh a duh uluk chho ta. Muanpuia hi whatsapp group pakhat atangin a tawng a, a bur nghal chat! Hmeltha a tiin a duh hliah hliah a ni ber. Tichuan, Mizoram lama a rawn hawn hnuah inhmuin inzawmna an nei chho a, amah saii hi hmel tha tak, hleitling leh nalh zeih zawih tak a lo ni bawk a. Muanpuia pawn han kawp satliah atan chuan a iai hran lo. Mahse, Saii rilru a lo hrethiam hlek lo va, an kal thuk ta tawlh tawlh a. Zan khat an riak dun chu zingah a zui haw ta hmiah mai kha a nia. Muanpuia lah mi tawngtam lo leh mi hmai eng zah chi lo ni bawk nen, Saii chu lungsi vak loin a nei ve ta mai kha a nia. Mahse, nupa na nâ na chu han inngainatna piahlamah hmangaihna te pawh piang chhoin fa an neih hnuah phei chuan an inzawmna a thuk viau tawh a ni. 

Mahse, Saii chuan ze tha lo a chhuah ta zeuh zeuh. Amah ina awm ber a ni a, Pi Lawmi hi a upat tawh ngaihtuahin a hrisel reuh a, an pa nen huan lama tui ta chu an huan lamah ina awm mai mai ai chuan tiin an liam fo a, a chang phei chuan an riak hial thin. Chutiang chu a nih vangin Saii chu in nghaktu a ni mai a. Nauteii tan a tha lo chho ta riau mai. Ni khat Nauteii chu a inrinlawk lohin a period thut mai a, zahthlak takin a thut tlang ve ta tlat. Haw a dil a, an lo phalsak ve mai. Ina a zuk haw chu, a inbual nghal a. A nute Saii erawh an roomah naute a mutpui nge an thawm a reh viau. A kawng leh tai chu a na viau naa, nachhawkna a ei duh lem lo. Thingpui a lum a. 

Saii chu rawn chhuakin, "School i tlan bo ni maw? " a rawn ti nghal thawr a. 

Thil awmzia a sawi chuan, "A that hlauh chu.. Machine-ah sawn insuk tur a awm a. Lo su la, chumi zawhah in hi tifai vek ang che. Ka leng dawn" a ti ram hmak a. A nuteii tawng dan chu mak a ti deuh naa, a chhang chuang lo. Saii chu nau puain a chhuak zui a. Nauteii chuan bal bawm hnih dawn chu a su ta a. A nuai pahin in pawh chu a tifel a. Saii a lo hawn lai pawn a la che reng, a nau puak lai chu thutthlenga dah pahin, "Nau hi lo awm ang che. ka inbual dawn" tih leh rooma luh a rual a. Nauteii chuan chhuat a nawt mek a, a zo lek lek tawh. Naute (Candy) lah chu a za harha harh ve ngang ni ta chu chhuata chhuk a tum chu a tla thla ta bawp a. A ţap nghal vawn vawn. Nauteii chuan a pawm vat a, a lu chu a tuaisak a. Saii a rawn chhuak nghal. 

"Hmangaihzual, engvangin nge i nau chu i velh tah a.. " a rawn ti pung pung a. 

"Ka vel lo, a tla a nih kha" a lo ti mai a. 

"Dawt dawt anih chu.. I nau hi i u nen hian in enhrang hrim hrim.. In thik anih kha" a ti a. Nauteii ngei ve chuan, "Nang ai mahin kan duat zawk alawm le" a lo ti ve khauh. Saii chuan huatsa na a lo nei a ni chêk ang chu.. Hmangaihzuali chu a va kek sawk a, a lo inrin loh vangin Candy chu chhuatah a thlauh palh ta hlauh mai. A hma aiin a tap uar sauh a. 

"Awii awii, i va rapthlak reuh ve.. Naute pawisawi lo pawh i tina duh a nia" tih leh chhuat nawhnaa a nâka hawlh a rual a, a na viau aniang, Nauteii chu a let tawp. A nak chu a dawm a, a tap lo tah chu. Naute chu pawmin ang hlak hlak chungin roomah a lut ta a. Nauteii chu harsa ti taka thoin a nâk chu a dawm pah a, a na zawk zawk mai. A ţhen chak chak a, thei leh thei lo va din a tum lai takin Nguri a rawn haw ta a. A fanu chhuat atanga thawh tum, harsa tih hmel zeta ţhen nang nang a hmuh chuan makti zetin, "Bawihte, eng nge thleng a? " tih leh va kuah a rual a. 

A nu a hmuh chuan a mittui a tling deuh pam a. "Nuteii'n min hawlh a" a ti a. A hma ni lawkah Nauteii sa duh em em Vawk sa thin, Saii'n, 'A rimchhia' tia a lo paih tawh vanga lungawi lo sa ta chu.. Nguri chuan.. "Saii, engvangin nge ka fanu i lo tihnat? " a ti ta tuar a. 

Buaina chu a inţan chho ta. Saii a rawn chhuak ve a, thinrim hmai sen ţeuh chungin, "I fanu zawk khan ka fanu a tina zawk aw. Ve khanglang a che.. Khatin mi ti mai mai suh. In nufaa ka nawr chhuah nghal loh che u" a ti ta phiar phiar a. Nguri chuan dik dawna a hriat loh vangin a fanu chu ngawi rengin roomah a luhpui a. Thil thlen dan chu tha takin a zawt ta a. Dawt tel miah lo vin Nauteii pawn a lo sawi ve mai. 

An nufain eirawng an bawl zui a. Pu Mawia te nupa erawh huanah an riak leh dawn a ni. Mi dang pawh an rawn hawng sap sap a. Zanriah an kil dawn chuan, Saii chuan an pa bulah, "Sawtiang ka fanu nena hnawk min ti em emtu te bulah chaw ka ei peih lo" a lo ti ni ngei tur a ni. Muanpuia lah chuan engmah hrechiang lem lo chuan, Nguri bulah, "Kan nu nen in intithiam lo deuh em ni? An ni nufa hi hnawk in lo ti viau anih chuan tha takin sawi rawh u" a ti ta a. 

Lawmsanga a meng â viau. Nguri chuan thu zaizap takin chhun lama thil thlen dan chu a sawi ta a. Room atang chuan Saii chuan, "An nufain an tang rual a nih kha. Min sual rawn vang anih hi ka kut pawh ka tihchet that ngam loh. Dawt vek a nih kha an sawi" a lo ti hlawih hlawih a. 

Muanpuia chuan, Nguri melhin, "Nguri, fel ka ti viau thin che a. Mahse, Saii hian dawt a sawi lo vang. Hriatpuitu a nei ve tlat lo va. Ka haw lai pawn a mu reng alawm.. Eng emaw tak chu in ti a ni ngei ang.. Tin, Hmangaihzuali pawn ka fanu chu engvangin nge a tihnat ngawt? A pawi a sawi em ni? " a ti ta pung pung a. Saii thlavang chu a hauh ta viau mai. 

Lawmsanga chuan ţawng hun a ni tih a hai bik lo va, "Ngawiteh, ka u, tha takin a sawi theih. I fanu hi tuman tihnat kan duh lo. Nauteii phei chuan a atchilh thawthang a nia. A tina lul lo vang. Saii pawh lo chhuak se, tha takin sawi ho ang u" a lo ti ve a. Mahse, a rawn chhuak duh si lo. 

Nguri chuan, "Ei phawt ang u" a ti ta ringawt a. Muanpuia pawh chu tau zui vein chaw pawh a ei ta bik lo. An ei kham thleng vel an seng fel lai chuan, Saii chu a rawn chhuak a. 

"In chhungkaw bil hian in ţangrual ţhâm a. Ka nu te lah hian hlawh nei zawk chu an lo pâk deuh nge nge a nih dawn hi.. Ngawi tak ru, naute han leikang se hna ka zawng ve ang. Hetia inhnuaichhiah reng hi ka hne tawh" a ti hmarh hmarh a. Tuman an chhang lo. Dik tak chuan he thil in up tanna hi chu a rei tawh. Amah aia mo rei zawk ta na nâ na chu Pu Mawia te pawn eng emaw changa han rawn te an nei ve thin a, an chhungkhat lo leng te lahin Saii mit tikham tawk velin an lo titha ve deuh thin bawk nen. A inngaihbel chho a, Thleng a sil ve changte hian ti bik leh thlei bik anga innngaiin a titau bûr thin. In lam hna ni se nau a pawm hnu phei chuan a khawih mang lo. Vawi khat Nguri bai siam tuizia Pi Lawmi'n a sawi zauh a, chu chu la nain a titau tawh bawk. A rai lai pawn tu te pawh khawi lo kal se, a ei chak zawng bakah raipuar tana tha an rawn leisak thin, chungte chu lawm tak aruangin Nguri'n a lo leisak ve te chu, 'Min hmusit' ti zawnga la duh tlat kha a ni ve bawk a! Eng emaw a thawh ve deuh changa titam bik riau leh hah hle bika inngaihna te a nei a, chu chuan thil zeldintirin a rilru a kawih phah vek a ni ber. Nguri hian rai kawr tur tha tak tak a pe fo a, "Kan pa hian hlawh nei lo a ni lo. Nanga hak hlui ka duh lo ve" tia hnawl thin, a then phei chu mi dang pe daih duh kha a nia. Nguri tan tak pawh han dawm thiam a har ve bawk a ni. 

"Nu, ka thawk zawngin a sak.. Ka thaw full thei lo" Nauteii thleng sil zo chuan a nu bulah a nâk na chu a sawi a. Engkim lo hre ve vek, a u chuan, "I nâka a hawlhna che chu maw? Khawi maw ka lo en chhin" ring leng lawng hian a ti ve deuh kher a! Nguri'n a khap naa, a ngawi tlat. 

Saii beng a verh ta zak aniang chu.. Room atangin an hriat phak ngei tur hian, "Hmm.. Saw mihring lah sawn Hmangaihzuali thlavang hauh saw a tina ve sia.. A nau tak tak pawh ni hlei lo saw tisawn a duat ve em em a. Nakinah chuan a la michuang mai mai dawn sia.. A chawh ngawt ang" a rawn ti ta tâwn tãwn a. Nguri thin a sa ve ta zak mai. A ding hluai a. "Saii, i sawi loh tur i sawi tam tawk e. Ka pasal u nupui nihnaah ka zah che a. Ka tilet duh lo mai zawk che. Rawn chhuak rawh. Ngam leh ngam chu inkhawih teh ang" a ti ta hmiah mai. 

Lawmsanga'n a khap duh thak lo. 

Saii lah chuan rawn chhuah pahin, "Ve mai mai che hian. Sawi dik loh ka nei em ni? Eng nge ani kha dawt inhrilh reng? Vanropui, hre rawh. Ngurnunsangi fa i ni reng reng lo, Ruthi zu ngawlvei, uirenu fa i nih hi.. He mihring hi i nu a ni lo" a ti ta bawih bawih a. Lawmsanga chet hmain Nguri a che ta. Saii biang chu a ri ţhak mai. Muanpuia a rawn ding ve nghal vat. 

"Ka nupui kut i thlak a maw? Ka nau nupui tiin ka lo fak ve em em che a, kan nu khan thudik a sawi lo mi? Eng nge in huat a? " tih paha ben a tum chu a nauin a kut a lo mansak ve chat. 

"Û, ka nupui kut i thlak dawn ai chuan keimah hi min thlak zawk rawh" a lo ti dam ruih a. An inelh ngat ngat mai. An thawm a ring ve deuh nen, Lawmsanga nî leh papuia te ho an rawn lut ta nak nak a. Hetih lai hian Nauteii leh Mapuia chu kil khatah an lo inkuah ran a, Mapuia mitmengah chuan chhiar hleih theih loh thil a awm. 

A ni Sangi ten thil awmzia an han zawh chuan, Lawmsanga zawk chuan hmaih nei lovin engkim a sawi ta a. Tuman Saii chu an thiam meuh lo. A papuia chuan Muanpuia melh chungin, "Û zawk i nia, thu chiang te hriat tum ta zawk che. Hetia inlek ur ur tur em ni? I zia i va hloh nasa ta ve.. Nguri leh Saii pawh mo ve ve in ni, kan en dan che u a hrang lo. Nguri pawh i pasal u nupui a nihna angin Saii pawh i zahder ve tur a nia, Saii pawn nang aia mo rei leh awm rei zawk a nihnaah rawn der ve te pawh a tha.. Chhungkaw inrem lo kan ni ngai lo va, hetia inkhikkhak hi kan zia a ni ve lo" a ti ta khak khak a. Tuman an chhang ngam lo. 

VANROPUIA.. 

"Nute, i sawi zawng zawng kha ka hre vek tawh. Hman hmanah ka nihna dik tak, ka nu dik tak ka hre tawh e. Mahse, ka nu hian Nauteii ai mahin min hmangaih zawk emaw tih tur a nia. Kei pawn ka hmangaih. Chuvang chuan min hringtu a ni lo tih ka hria tih hi a hriat ka duh lo va; ka zep zawk a ni. Khatianga ka nu hmaa tawngkam rapthlak tak i hman avang khan kei chuan Papuia nupui angin ka en leh thei tawh ngai lo vang che.. Kei chu ka tha.. Min ngaihtuah suh u" Tih pahin Mapuia chu in atangin a chhuak a. Tuman han umzui an tum lem lo nge, an en liam ringawt. 

Khami zan atang khan boruak chu inlumlet chhoin Pu Mawia te rilru pawh a buai chho ta viau a. Saii lah a tawrhhlelhawm telh telh a, Nauteii'n naute a pawm ve changte hian laksak lawp pahin, "I lo rekhlum palh ang" tih te hi a tawng duh dan a ni. 

Teteii'n an boruak a lo hriat chuan thinrim takin a vahpa thlavang a rawn hauh ve leh. A chiri nuaih mai. Muanpuia lah Saii chuan a hneh thiamin an nu bâwihah a tang nghet tial tial si a. Chhungkua inrawn khawmin, Pu Mawia chuan, "Aa.. Inchenpawlh leh awmho hi inngeihna pawh a ni ber lo ve. Mizia a inang lo va, duhzawng leh ngainat zawngte pawh. Saii pawh a demawm loh e. Chuvang chuan in hrang chang ve poh mai teh se.. An pain hlawh a nei tho a, keini lamin kan pui thei dawn tho bawk a. In khata chenho dul dula inkher leh chhungrila inngur tawn sia chenho ai chuan in hrang atanga inhmangaiha induhsak hi a tha zawk e. An hreh loh chuan ka in pakhat saw luah rawh se.. Amah Muanpuia tana dah ka la tum tho tho a ni bawk a" a ti ta a. An pawm tlang hle. A ni bawka chhungkua ngei ngei pawh mize hrang hrang nei kan ni miau a, tin, Mipa chuan nupui a nei ngam anih chuan a nu leh pa te tel lo pawhin a venghimin an innghahna lungpui a ni thei tur a ni a, puitlin zir nan pawh in hrang chan hi a tha ber mai. Saii pawh a lawm ta hle aniang. A phur hurh hurh khawp mai. 

Mapuia erawh khami zan atang khan a zia a dang chho riau mai a. Kum 22 a ni ve tawh a. An inah erawh naute ang maia an la en ni mah se, khawlai leh college-ah chuan a inla puitling ve viau tawh. Saii'n a nu chungchang a sawi kha a hriat vawikhatna a ni. Nguri a zah êm vang leh a hmangaih êm vang chauhin hre vek sain a insawi mai mai zawk. A nu tihnat chu a duh lo tawp a ni mai. Mahse, a nu dik tak, Zu ngawlvei, uirenu a ni tih a hriatna khan a mipa thinlung a vilh na em em a. Tu pawn engtin pawn sawi se, a nu thisen a ni miau si a. A chang chuan Nguri ten thudik an hrilh duh lo chu a thinrim tho bawk. Mahse, an hmangaih vang tih erawh a threthiam. Hmana Nu Ruthi tia a koh mai, a nu dik tak anga a ngaih lem loh kha a nu dik tak a lo ni reng si a. Zawn chhuaha engvanga amah leh a pa chu uiresan nge a nih zawh a duh ta hial mai. Tin, na a tih leh em em bawk chu a nau duat Hmangaihzuali, Naute tia a koh, tihnat a phal ngai loh nen unau dik tak an ni lo tih a hriatna chuan a tikehchhe lek lek bawk. A nau nen an inkar a hlat duai hi a phal lo va, a nau chu a neihchhun tluk hialin a hmangaih a ni. 

Mapuia hian kawng engkimah a pa a chhun ti ila kan sawi sual tampui lo vang. A pa a chen der tawh. Mitmeng hriam lam deuh, mitmu dum fiah kak mai, hmui chhah lam lek lek, khabe kual ruh pawh nghet chet chawt a ni a. A mizia pawh a pa ang tho, tawng tam lo tak, thil chîk ru zet, thian ngaina tho si, mahnia awm nuam ti chi a ni a. Hmeichhe thenkhat tan chu a boring tihtheih tur a ni. Ngaihzawng pakhatmah a la nei lo thung. A tleirawl chhuah khan an vengah star tu a ngah a, a ze zawi leh luhlul ru tak si chuan hmeichhia a hîp a ni ber. Mahse, chung amah startu te chu biak pawh a be ngai lo. A duhzawng an ni lo nge, ngaihzawng lam a ngaihsak loh hrim hrim vang tih chu tu hriat va ni suh. A nau vangin mipa pahnih a hnek tawh bawk. Thiante thlavang hauh a tina hle. Lehkha thiam thei tak tia sawi theih tur chu a ni lo naa, a rualpawl tawkin pawl a sawn ve zel a. Zing tin a pa nen an in hnuaiah exer lain, a pa hian insual a zirtir tih mai theih tur hian a hrual thin. Mahse, a pa sawi a la hriat reng chu, "Tumah va tih hmasaka va cho hmasak loh tur. Min cho anih erawh chuan vawi khat hnar a tawk, a vawi hnihna a thlen tawh chuan thih thlenga beih tur" tih chu.. Chuvang chuan insual thiam viau e ti lo chuan, tlawmna nun pawh a zir nasa a, mi a sual zen zen lo. Hmeichhia leh naupang kutthlak phei chu mipa lohna ang hialah a ngai thin. 

Saii te in dan hnu lawkah a nu in a ko a. A va luh chuan, "Tun lai chu kan inkawm khat hle mai. Inah i awm tam lo lutuk a.. " a lo ti sawk sawk a. 

"Nia.. Thian kawm a nuam thar a" a ti mai a. A nu chuan ngun zeta rawn melhin, "Kha thil khan a la tina reng che em ni? " a ti ta sap a. 

"Eng nge i sawi? " a lo ti naa, a nu chu a bum thei dawn chuang lo tih a hria. 

"Khamizana i sawi te kha dawt a ni tih ka hria alawm. A thawng viau che tih pawh ka hai lo. Keimah min venthawn vangin i sawi mai mai anih kha.. Dam a hun tawh alawm. Bawihte.. Kei ka awm a, i pa a awm bawk a. I nauin nise a hmangaih em em bawk che. Thil dang a ngai tawh chuang em ni? " a ti ta dap dap a. A rilru a khawih viau. 

"Nia, Nu, zep loh chuan ka na alawm. Ka nu nihna dik tak ka hriatna khan min tina em ani. Mahse, tunah chuan ka tha tawh ang. Engkim a pangngai leh tawh ang" a ti ve ta a. Nguri pawh a lawm hmel hle. 

"I pa hi zah hle rawh aw. I nuin a phatsan tawh chungin nangmah vang chauhin khawvel a hmachhawn leh a, a hmangaih lutuk che a nia" Nguri chuan a ti a. 

"Ka hria lawm.. Nang pawn min hmangaih bawk.. Nu, min ngaihtuah suh. Ka tha tawh alawm" a ti a. A rilru tawtna te chu a thawl huaiin a hria. An nufa inbiakna chuan boruak pawh a tinuam chho leh tan a. A pi leh pute lahin an fuih ve reng bawk nen, engkim chu a pangngai leh tan ta a. 

Nauteii'n class X a pass chuan ani chuan B.A (Pol. Sc) , final a zir ve mek thung. Hrangbana College-ah lutin, a nau nen an inphur chhuak nitin thin. A ngen nasat ve êm vangin Bike an leisak ve kha a nia. A nu hian a ngaihtuah thin, chetsualna a tam thin si. 

BIAKHMINGSANGI.. 

5'2ft vel lek tur a ni a, a cher tia sawi dawna itawm loh tham khawpa cher nisi lo, khal ru ve zèk, te fel rin ren, kim ve biai mai a ni a. A fresh a, nuih a heh em em bawk. Thian a ngainain thian pawh a ngah. A lerh pawh a lerh thawkhat ve viau thin. A luck miau a. A hming hi a common lo hle bawk a, tupawn 'Sasa' tiin an ko thin. A tetlaia a û-in a koh dan chu a pu hlen ta a ni ber. Ramhlun North lama khawsa a ni. Kuminah College a kal ve tan dawn a. Unau pathum niin, a mi lai a ni a, hmeichhe awmchhun a ni bawk. Khawsak pangngai ve tak an ni a, an nei le lu hran lo thung. Hrangbana college-ah in admit vein, a 1st day chuan phur zetin a insiam a. Make up a uar tehchiam lo va, a thiam pawh a thiam hran lo. Class XII kha Distinction-a a pass avangin a patea, Dubai-a khawsa mek chuan Scooty leina tur a rawn thawn vang vang a, a te reuh si a, khalh pawh a zir rei angreng. Mahse, a ngam hrim a, a thiam chho ve mai. A thiannu ngawih ngawih Rki'n a rawn au lang lang a. A nuin pocket money a pek chu la zauhin, "Thanks mom" a ti puam ţâlh a. Khi ţha chungin a chhuak ta a. Rki nen an college lama an inphur phei chu an phur bawk nen, an titi char char mai. Tleirawl anga la ngaih theih an ni bawk a, an zat leh thak ve hun lai ti mai ang chutiang chu a ni bawk a. Chhe lo deuh melh hun lai kha.. Chuvang chuan an pheikhai a zâng viau. College an thleng a, an room tur te an han zawng a. Rki nen Education an core ve ve dawn a. An awm hrang lo tur chu nuam an ti hle. Mahse, junior an la ni bawk a, chuti takin an zia an la chhuah ngam meuh lo. Canteen phei chu an melh ngam lo tihtheih a ni. Senior ho lahin junior zinga chhe lo fal an lo melh a, hmeichhe lamin ei loh zawng an lo nei ve mek bawk. Chutiang karah chuan ni hlimawm tak an hmang a. An hawn dawn Scooty a lak chhuah dawn lai takin a piah maia Bike chu mi pakhatin a lo nawr ve mek a. A va hawi phei leh a rawn hawi phei chu an mit a intawng siah mai. Sasa chu a nghilh deuh dup ni maiin a lang. A vawikhatna a ni. A vawikhatna tak tak. Mipa lakah khatiang ţêk kha a la tawng ngai eih lo. Mipa erawh chuan en pawh rawn enzui lem loin a bike chu a nawr chhuak a, a tlan zui daih. 

"Rk, i lo hmu em? I hmu tiraw? Kha pa kha kan target ang" a ti ham ham a. Rki lah a phone a bih lai a lo ni si. A lo hawi á hau mai. 

Sasa thinlungah erawh kha mipa, amah aia kum 3 vela upa awrh tur, mitmeng na zet, hleitling tak kha a châm veng veng nia! Amah leh amah te chu inbiain, "A va'n mak! Ti nge hetia ka awm le.. " te a inti thul. A rin danin senior most a ni ngei ang,. Engtin nge a contact theih tak ang le?! Sasa hi thenkhat tana eiawm loh zia pu ve zauh thin a ni a. A che over thin titu pawh a tawng nek zel, chutihrualin a ze tha lam erawh mi ngainat a hlawh a, a thilphalin mi dang tanpui nuam ti chi a ni thung. Tin, love affairs bikah hian, "Ka neih duh loh tur ka ngaizawng lo vang" ti ve ngat chi, kawp satliaha tumah kawp duh lo a ni. Class XI a nih laiin a vawi khat nan bialpa a nei a. An inzui ve nasa,. Thla 4 hnuah an inthen. Khami hnu atang khan a nei chho ta zut a. Rei erawh a ni ngai lem lo. Mahse, tumah a bumin a kawp ngai lo thung. A bialpa te dik loh hmasak vang zelin an inthen thin. A star tawh chu nihpui ngei a duh bawk. 

Kar khat class a kal hnu pawn kha pa kha a hmu leh ta reng reng lo. A zawng ru nasa thei hle naa hmuh tur a awm lo. Garrage lamah te an nghak deuh thin naa, a awm chuang lo! A bike no. Tal a lo chhinchhiah lo te kha a pawi a ti. Chutiang khawpa mipa vei leh hmuh chak chu a nei ngai reng reng lo. Chuvang chuan a nia zah pawh sawi lo va hmuha biak a châk em em ni. Mahse, kar thar ni hmasa berah chuan kha pa ngei kha a hmu ta. Rki hreh chung chung Canteen-ah a chawlhpui lui tlat a, Junior dangte pawh an chawl tho tiin. A chhan chu kha pa kha a chawlh ve a beisei vang a ni. An thut atanga reivak loah Kha pa ngei kha mipa pahnihte te nen an rawn lut ta zan zan a. A dress engkim chu a dik thlup vek. Chutihrualin fashion-ah a buai em em lo tih erawh a lang. 

Hmeichhe aw sin lam hian, "Mapui, rawn thu ve ru" a ti lauh a. Chu pa chuan a va melh zawk. A hming a hre ta phawt e. Chunu lam chu an pan a, Sasa te dawhkan ep chiah a ni. Amah hmachhawn zawngin Mapuia chu a thu ve kher bawk. Sasa chuan Rki bulah, "En nghal suh aw.. Tshirt var ha saw, en suh ka tih kha.. Aw saw a sam a tuai mek.. " a ti ru sar sar a. Rki pawh chuan a va hmu thiam mai. 

"A chhe lo em anih saw" a ti ve mai a. An thil chah a lo thleng a, an ei mial mial lai chuan an dawhkana thutna awlah chuan, mipa pahnih hian, "Kan lo thu ve mai aw" tih pahin chair an pawt nghal a. An thu a ni mai. 

"Junior in ni maw? " pakhat hâng lam chuan a ti nghal. Rki chuan a chhang nghal. Sasa hmazawn chiaha thu mipa samkir lek lek, ngo puak mai, hmelchhe lo tak chuan Sasa chu a en duh angreng hle. Sasa pawn a hai lo va, mahse, a thil ei lai bak a ngaihtuah lo. 

"Marina ka nia, Hei ka thianpa hi Sangzuala a nih hi.. " Hanga bawk chuan a ti leh a. A fel riau mai. Rki pawh chuan an hmingte chu a sawi ve zat a. Sasa a la tawng miah lo. 

An subject lak te sawi hoin an titi mam mam a. Sangzuala chuan, "I va tawng duh lo ve.. I zak ami? " tih pahin Sasa chu a melh a. A ni chuan hawi â hû chungin, "Aih.. Ih, ka eitui lutuk a" a ti niah niah a. A nui sak bawk. 

"Number te inpe ve ila" A tih chuan a ner ru sak. Hetianga vawikhat lek inhmuhmaah number indil nghal thawr hi ţhing a ti tlat! Rki zawk chuan a pek tak si-ah chuan a pe lo thei ta bik lo va.. Sangzuala chuan khik suk pahin, "I rin aiin he tah chuan ka lal maithei ania" a ti zauh. Sasa rilruah mil lohna a piantir a ni ringawt. 

Sangzuala chu a au lung lung a, "Vani, lassi no li rawn dah leh tawh e.. Vawiin chu sava note ka chhar thar a.. Ka'n treat ang e" a ti a. Canteen-a awm a hmelhriat zawng zawng tihtheih deuhthaw chuan an rawn melh thup. Sasa bik chu an rawn en bikin a lang. Sasa erawh chuan mak tih hmel deuh hleka rawn melh vetu Mapuia lam chu a lo melh daih. Hriatthiam si loh hian a awm a nuam ta lo hle. Senior most an ni bawk si a, Sangzuala sava nih chu a duh hauh lo mai. 

"Ti nge khatia i tih a? " a ti nghat a. 

"I chhe lo em alawm" a lo ti mai a. 

"Chu pawh nise" a la ti fan a. 

"A ho lutuk.. Zanah kan inbe dawn nia" a lo ti daih. 

Nilengin Mapuia bak a ngaihtuah leh ta lo. 

Sangzuala chuan a rawn text ta ngei a. A chhang tha peih vak lo naa, Mapuia a lo hre miathei tih rilru puin, "Ih maw.. Mapuia i hria em? Sang ve deuh kha" a va ti ta ngawt a. 

"Mapuia te chu an tam eee.. Eng subject nge a lak? " a rawn ti a. A hre der si lo. 

"Chu pawh ka hre lo. Ka thiannu ex a nia, ka thiannu a tina tawp a, ka ngei ve lutuk a.. " a ti ta ringawt. Sangzuala lah mi â ni hek lo, hmeichhia han kawm kual dan a hre si a. 

"Tu Mapuia ber nge niang aw.. Kan class-ah pathum an awm a. Pakhat hi chu a sang vak lo, pakhat hi a sang a, mahse, nerd kan tih ang hi a nia.. Bialnu a la neih pawh ka ring lo. Pakhat thung chu lerh ve deuh a nia.. Chu chu a niang" a rawn ti ta roh a. 

Sasa chuan a zawt zui zel ang tih hlauin, "A ho em mai. Hriat pawh ka hre chak lo e a.. Khatiang" a ti vel a.. 

Mahse, a hnuah, "In class thlalak i nei em? Lo thawn zuaih.. U Emy hian star tawk a nei a" a ti zaih. A khi vur vur zui. Sangzuala chuan a rilru hre hek lo. An picnic tuma an thlalak chu a thawn ta a. Sasa chuan zawn a nei nghal, a hmu chiang khawp mai. Sangzuala bulah chiah a la ding zui! An class-ah a sang ber.. A melh ngawih ngawih mai. Sangzuala lah chuan, "Tu nge i cousin star chu" a rawn ti. Mapuia chu feia kawh pahin, "He pa hi" a va ti hmiah. 

Smiley nui uar uar rawn dahin, "Nerd ka tih kha a nih hi.. Mapuia chu.. Mahse, a fel ve lutuk. A tawngmawh èm a, bialnu a nei ngai lo" a rawn ti a. A zak thei lo ta sa sa, "U Emy pawn a nei ngai bik lo. A dawrah an chawl ve zeuh zeuh a, ta tanga hria chu a nia. A number i nei mial lo maw? " a ti ta zel a. 

Sangzuala chuan Mapuia number chu a rawn pe ta. Sasa thin a phu dup dup mai le. Mapuia vang chuan Sangzuala chu a be tha ve ta phian. Tin, a rin aiin a lo fel ve bawk nen. Mahse, a rilru dik tak a hriat hunah chuan nasa a ti ve khawp ang le. 

HMANGAIHZUALI.. 

Veni kha a pa hnathawhna khua East Lungdarah an awm ta daih sia. An veng chhunga a kawm ve deuh ber a ni si. School kalpui tur a nei lo kha a nuar phawt. "Ka bang mai ang. Huanah te ka feh ve ang a' tiin a chhungte a nawr a. Nguri ngaihdan a ni lo nasa.. "Hostela ka dah nghal loh che.. A sawi pawh sawi suh" a ti hrep a. 

"Kalpui tur ka nei hleinem. Class-ah tu nge ka thutpui ang? Thian ka neih loh hi" a ti tân tân a. Ni e, Class X kha 1st div-ah a pass ve hlauh a, School dangah Secondary chu a kal tawh dawn a ni. A nu ten a u te college hnaih lama School tha ve si-ah an admit hmiah a. Ani ang tleirawl tan chuan thian tumah nei lo va va pawng luh ve tawp kha a nuam lo ve bawk a ni. 

A nuar a nuar mai si a, lo duat hlum lo chauhtu a pu pek chuan, "Open-ah te hian kan exam tir mai zawk dawn mawni le.. Heti taka kal hreh chu" a ti dèk dêk a, Nguri a ling phat. "Em em lutuk a, School pangngaiah lut rawh se, nunphung hriat nan pawh a tha. Thian nei lo tih vel mai mai, a nei chho ve mai dawn alawm.. Khatiang khan a thlavang hauh ziah suh u" a ti hlak hlak a. Lawmsanga'n zawi supa, "Chhim keite" a lo tih chu hriain, "Nang pawh hi kal teh.. Hau ve ta che.. Ngawi dûk reng mai" a ti leh hrep. 

A nu thu hnial ngam awm hek lo le, Nauteii chuan a ni hmasa ber hmang tur chuan lungchhe zetin a chhuak ta a. A pain a thlah dawn a ni. A pi leh pu ten an thlir liam a. A puin, "A han ţap ang em aw.. Ka naute chu ka va khawngaih reuh em" a ti sur sur a. 

"A nuin a tana tha a tih ang hi chu hnial lo phawt ang.. " an nuin a ti thung. 

A pa nen an tlan zel a. A û erwh class an la ţan lo deuh nen, huan lamah a feh daih. 

"Pa.. Anu hi a sual tiraw? " a ti sap a. A men puai bawk. 

Lawmsanga chu a rukin a khi suk a, "Sual lo e.. I tana tha tur vek alawm bawihte" a lo ti a. 

"Hmm. Nang pawn i tan a nih kha.. I hlau si" titau tih hriat zet hian a ti a. 

A pa chu a nui hawk hawk, "Anih i nu chu ka hnawtchhuak daih mai dawn mi niang? " a ti a. 

Nauteii chuan a phal leh si lo, "Chhuahtir em em chu ka khawngaih ve tho lawm.. Kan schoolah chuan ka sual ngawt ang" a'n ti ngawt a! A pa hian a va lawm thin tak. 

"Tumah sual tawh lo tur i nuin a tih kha aw.. Mahse, an tihbuai chhen che chuan an tihbuai leh ngam tawh lohna tur chein rik rap tur.. He thu ka hrilh che hi i nu hrilh miah suh" a ti sur sur a. 

Nauteii chuan a pa va melhin, "Kha.. Anu hi chu i hlau alawm.. " a lo ti ţiau. Mahse, a pa a lo nuih hawk hawk vang chuan ani pawh a ţah nuih a. School an thleng a, hreh zeta an School lam a pan chhat chhat chu a pa chuan lainat hmel zetin a thlir liam ta a. 

Ţi zetin an class room-ah a lut a. Tlar hmasa ber dawttu-ah chuan thuthmun a rem ve ta. An rawn luh belh zel a. Amah ang rual vel tur zahzum ve hmel tak hi a lo phei zan zan a. Nauteii thutna chu melhin, "Ka lo thu ve thei ang em? " a ti sap a. Nauteii lawmzia chu aw.. A bu nghut nghut a, a tawlh phei nghal var. Thutpui a nei ta. Chu a thian thar chu Msi a ni a, Thakthing veng atanga lo kal a ni. An inbe tam lo hle. Mahse, thian an han inchhar chu an lawm ru ve ve thung. Zanriah an ei laiin a thian chhar thar chu a sawi zung zung a, a phur leh viau tawh. Nguri chuan, "Ka tih reng kha.. I huphurh vak a" a lo ti a. A pu leh a pa awm pawh a nuam ta sawt mai. 

Hun a liam a. A û ten class an tan chho ta bawk a, a û nen an inphur nitin ta a. Nikhat class room a lut chu an class ami Zodini, an ni aia upa hlek tur fingfel zet hian, "Naute, Lo thlah ziahtu che hi i sas ami? " a lo ti a. A nui tawp. 

"Ka u a nia" a tih chuan Zodini hmel chu a hlim sawt. Ani â beng buang si chuan, "I star chiang" a la tizui! Zodini a sen ap ap mai. 

Zodini te bakah mi dang a û lo star rutute chuan an be tha tanin an rawn kawm chho tan a, Msi nen pawh an inthlah chuang lo. Tiffin an pai mai zel a. Nuam a ti chho ta phian. 1st term exam-ah pathumnaah a inhlang kai a. A pain Arpui tuilai a rawn leisak nghal rap. Final em pawh a la ni si lo. 2nd term an luh leh chuan Nauteii nunah thil thar a rawn thleng chho ve tan ta a. Zirtirtu thar an nei a, A hming chu Vanlal Hmangaihsanga a ni a, Sangpui tia koh a ni thung. Tlangval kum 27 a ni a. A pate viau lo naa, palian lutuk tia sawi theih ni si lo, hmel dam dup mai, a zaidam tih hriat ngawih ngawih a ni. A aw avangin hmeichhe ho chuan 'man' an ti nghal. A mizia an hre chho zel a, Zirtirtu chu a hna hliah hliah niawma mawiin nuam a tiin a zelthel ngai lo.Tupawn harsatna sawi se chinfelsak duh mi a ni a, English-ah a la a, Literature-a a tuiza pawh a hriat mai. A nuih hian a vei nuih suk zel a, a biang veilama biangsum hi a khuar kalh thin. Chu chu hmeltha an tiin Nauteii takngial pawn hmuh nuam a lo ti ve thin tawp. Mahse, a star ve lo. A vei hek lo va, an Sir a ni a, an Sir angin a en mai. 

Ni khat chu Zirtirtu ten an rawn check thut mai a! Phone ken ruk hrat te, meizial leh sahdah bakah make up eng emaw pai ru te an man thin. Tin, uniform pawh an check uluk viau zel. Nauteii chuan buaina a nei ve lo. Engmah a pai ru ve ngai lo miau a. Msi pek chuan phone a lo pai ve chu ni ila, a tihngaihna hre tawh lo lutuk chu a panty chhungah a dah ta tawp! Mi dang pawh tihngaihna hre hek lo, an thutna hnuaiah te an dah a. Mahse, check thang ta ngang chuan an man nghauh nghauh mai. Nauteii te pawh chu an han check ve ngial a. Engmah an hmu lo. Msi erawh a checktu khan engtin tin emaw a kap bawr kha a lo tawk zeuh nge, a hre ta tlat. Phawrh turin a ti a, hreh zetin a phawrh, an nui hluah hluah mai. Nauteii thu tawh sa chu an miss zinga strict leh an ngei rawn em em Miss Feli chuan a rawn kawk chat a. 

"I sam hi rawn pawtngil tawh ang che. " a ti hmak a. Nauteii sam hi sawi tawh angin, a kawi ngil ngel a, a ţawn pawn a lang ve deuh. 

"Miss, ka tihkir chawp a ni lo va, ka nuin tihngil a phal ka ring lo" a ti sap a. Sir Sangpuia chu an bul maiah a lo ding ve reng bawk. 

Miss Feli chuan, "I nu nge thu kei.. He Schoolah hian" a ti leh kher a. Nauteii ngaihdan a ni leh ta lo. "Ka nunah chuan ka nu a thu zawk" a ti ve hmak. Miss Feli a thinrim ta nge a rawn pan hnai a, a tiang ken laia Nauteii sam hawlh kual pah chuan, "I nghal zêk mai. I sam ka tansak zawk dawn che mawni aw.. Khaw maw i pawnfen pawh kha a va chhing ve" tih pahin a pawnfen chu a hawlh leh a. A chhing reng reng lo, a khup a khuh pha zân. A mawi lo lam lek lek zawk kha a ni reng sia. 

"Lo tingil ang che. A chiang em? He laiah mi lerh kan mamawh lo" a ti hlak hlak a. Nauteii chuan, "Ka tiam thei lo che.. Miss, ka nu nen inbia ula" ngenngawl takin a ti a. 

"Ka sawi ang chuan ti mai rawh. I mit te kha i line elo? Khawi maw? " a ti leh ta zel a. Nauteii mitmu hi a dum chian bakah a mithmul (eye lash) hi a sei er tan a. Chiang taka en loh chuan a hnuai lam phei hi chu sintea line a ang lek lek thin. 

"Vawikhatmah ka mit ka la line lo.. Miss" a chhang ve zel bawk si. 

"I hmai va phih rawh" tiin hmai phih tura an tih ho te zingah a nawr phei a. Thinrim. Zetin Nauteii pawh chuan a va phih. A landan a ngai reng tho si. A thiante pawh chu a rukin an phun hlak hlak reng a. 

"Ani pawh underpant thla lang kulh khawpin a inha tight ziah, a inhnawih nasat theih theih nen, a sam pawh a buang ve thûng alawm le.. Entawn tur a awm lo em mai. Class lak laia phone a khawih peih peih nen"tihte chu an Miss Feli an sawi dan a ni. 

Nauteii chu ngun zetin a lo melh a. A danglam si lo. Sir Sangpuia chuan a lo lainat deuh nge, "Miss, a line lo vang, khatiang chi kha an awm alawm.. Ka cousin pawh a nia" a lo ti ta a. Miss Feli chu a insûm hram. "Mahse, naktukah sam ngilin min rawn hmu ang che" a la ti hram. 

"Ka pianpui sam lehzel ka tihdanglam a ngaihna School-hi ka chhuahsan zawk mai ang. Tingil mah ila, a rawn kir leh dawn tho.. Miss.. " A inrin hmain Nauteii a ţawng! An en ţhup mai. A bag a la a, a chhuak vang vang.  

SANGPUIA.. 

"Kha nau zet chu" a ti rilru nauh nauh a. A mitthlaah Nauteii, pawisawi lo hmel tak, hmeltha fiah kâk mai chu a rawn lang leh thin. Vawi tam an class room-ah lutin lecture a pe fo, a lo notice ngai miah lo chu mak a inti! Lehlamah an vaiin mi 60 an nia. Chhinchhiah kim a lo har ve bawk a ni. Miss Feli khan a ti ve mah mah tih a hai lo. Tin, a mil vak lo bawk. Amah aia senior a nia, a khak duh lo mai mai zawk. Zirtirtu an nih chuan naupangte hriatthiamna chin te, an zai ngaih a hun laite pawh a awm ve fo tur a ni. Naupangin an harsatna leh buaina an hrilh ngam loh khawp zirtirtu nih te hi a duh loh zawng tak a ni. Class room-a luha zirtirna va pek tawp hi an hnathawh chhan a ni ber lo, an nunkawng siamthaa an hmalam hun tiènga sahkuaksak hi an mawhphurhna a ni tlat. 

A tuk School a kal chu Office-ah Nauteii leh nu pakhat lo thu ran chu a va hmu nghal a. Miss Feli a lo la kal lo va, an nghak a ni mai thei. Nauteii chuan uniform a ha lo va, Smart pant dum,simple tak leh kamiz purple tak tha deuh hain, Nula te pawh a ang ve ţêp. A sam chu a ţwn a, mahse, a ngil lo. Miss Feli a rawn kal ta a. Nauteii nu nen chuan inbiain an inhnial titih a. 

"Miss, Hrethiam hram rawh. Ka fanu hi a lo â ve bawk nen, pangchanna rilru a la paih thei bawk si lo va.. A sam chungchangah chuan a pianken ve reng a nia, khawngaihin tihdanglamtir lo hram rawh u. Nakinah a rawn kir leh tho dawn a" Nguri chuan a ti mawlh mawlh a. Feli erawh induh hmel deuhin a thu deuh larh. 

Mahse, Nguri'n, "Principal hmuh a ngaih pawn kan hmu mai ang e" a tih takah chuan a dang nghal vek. 

"Aw a tha alawm.. I rawn sawipui vang chauhin ka lo hrethiam ang e. Mahse, zirtirtu biak dan tur erawh lo zirtir tawh la" Miss Feli chuan a ti fak a. Nguri chuan lawmthu a sawi mawlh mawlh a. A fanu chu melhin, "Lawmthu hrilh rawh" a ti zauh a. A hmin lem lo tih hriat zet hian Hmangaihzuali chuan, "Miss, ka lawm e" a ti sap a. An chhuak zui ta nghal. 

Sir Sangpuia class la tur nen an innang ching a, "Vawiin chu i chawl dawn em ni? " nui chung hian a ti a. Nauteii pawh chuan, "Chawl mai ang. " a lo ti ve mai. 

Hmaichhanah chiang lehzuala a hmuh phei kha chuan Sangpuia chu engtin emawni a awm. A sawi thiam chiah bik lo. Ni e, naupangchhia a ni tawh lo, a chhungte phei chuan nupui nei turin an nawr deuh reng tawh a. Kulikawnah an khawsa a, A pa erawh nikum hmasa khan a chuap TB vangin a boral tawh a. A nu hoin a û pasal nei rawn let, fa pakhat pawm leh a nau mipa leh hmeichhia te nen an khawsa ve mek a ni. A nu hi Senior Nurse niin, Amah hian tihian hna a nei ve leh ta bawk a. An dinhmun pawh a zia chho ve viau. A nau chiah mipa erawh vawi hnih lai nupui a ru tawh a, a nei lem hlei lo va. A hmeichhe chhungten an lo iai ve tum hrang nen.. An te ber hmeichhia erawh a piang tlai deuh a, tunah 1st sem zirin college a kal ve mek thung. 

Ngaihzawng hi pathum chu a nei ve tawh a, tih takzeta ngaihzawn chu. A hmasa ber chuan Accident vangin a boralsan a. A tuar rei hle. Chumi hnuah a nei leh a, chu erawh thla hnih chiah an inkawp, a hmeichhe chhungten an duh lo lutuk a, a tan kawp zui zel a inthlahrunawm a ni. A hnuhnung ber nen erawh kum 2 lai an inzui ve hman. M. Ed a zir lai pawha nghak ngat ngattu nisi kha, M. Ed a zawh tirha hna zawnga a vahvaih lai takin Officer pakhat, pathlawi fa pahnih nei tawh lakah a phatsan ta a. A tuar thiam lo ve khawp mai. Nupui atan pawha a duh ve tak tak kha a nia. A phatsan thei mai chu a hrethiam thei lo. Hna nei lo a nih vang a nih a ring, a bialnu chhungte kha hausa pâk deuh chi, a nu phei chu zei deuh mai a ni a. Khang vangte pawh kha a ni maithei e. Tihian a single ta ngat ngat a. An veng chhungah zirna lama a inhman nasat deuh vangin a inhawlh lawr lutuk lo va, Section lamah erawh an hre ve fú, Kohhran pawh a bel lutuk lo. Mahse, hetia hna te a neih tak hnuah chuan a nu fuihna angin a inhmang thar ve leh a, lehkhathiam te an lo ni bawk a, mawhphurhna lian tham vak lo te chu a nei ve ta nual mai. 

A tuka Nauteii te class room a va lut chu a pheikhai a zang hle. A beisei ang chiahin a lo thu khiau mai. A mitmeng lian kel kawl zetin a lo melh kiau bawk a. A lai lek lek hial. Lecture a han pe tan a, Nauteii chuan hriatthiam loh nei se, zawt se a tih tehlul nen harsatna a nei mang si lo. 

Lunch break laiin Nauteii te class groupah a lut a, Nauteii number chu a zawng ta a. Hmangaihzuali tia lo awm chu click-in a save hmak. A dp a la hmu thei lo zui! 

"Sir… Sir" a phu uih mai. Miss Hlani'n a lo nuih vur vur. 

"Eng nge maw i ngaihtuah le? " a ti hlak a. 

"Ka hre lo" a ti tawp. 

"Thil eiin chhuak ve ang u kan tia" Hlani chuan a ti a. 

"A tha lawm" tiin a zui ve nghal. Canteen-ah chuan an lo phu mur mur a. Nauteii pawh a lo awm ve tlat! Nia, hemi ni hian Tiffin a pai hman lo. An chhungkuain thawh an hai a! 

A thawhpuite titi mam mam lai chuan Nauteii chu a va melh leh zauh zauh zel a. An Sir Rema chuan, "Sir Sangpuia chu i lar hle mai. Hmanni ka hmaa kal naupang pahnihin an sawi nasa che nia" a ti aa.. A nui vur vur bawk. 

"I tiho em mai" a ti ve ringawt a. Miss Rami'n, "A tla na tlat.. Hmeichhe ho hian a class an nghakhlel thei tawp" a lo ti bawk. 

"In ninawm" te chu han ti mah se, a lawm ru viau thung. 

"Ti daih ila, Hmangaihzuali kha naupang mak tak a nih kha mawle.. Miss Feli pawh kha a thinrim em mai" Miss hlani chuan a lo ti a. Sir Sangpuia beng a verh zak mai. 

Miss Muani thung chuan "Kei a cute ka tia.. A huaisen bawk si.. Feli pawh hian a ti ve mah mah zel bawk a" a lo ti hmiah. Miss Muani hi Miss Feli aia senior a ni bawk. 

"Nia, ni ve reng. A nu nen khan an inang khawp mai. An hmel kha" Sir Rema'n a ti bawk. Chutih lai tak chuan Nauteii te thil ei zo an lo phei mek a. An kal pelh hnu chuan, Sir Rema bawk chuan, "Rawn thlah ziahtu hi a bialpa ve mawni.. Ka hmu ziah" a ti a. Sangpuia thinlung a na zawk mai. A ngawi tluan ta parh. Tleirawl duhawm tak, a lo hual ruk rauh rauh chuan nitin thlah thlaptu a lo nei reng a nih chu! Chet khalhtu chu tu nge a nih chiah tih erawh hriat a tum kher mai. Nauteii hi a vei satliah tawh lo, a chak lohna leh a phurna siam thei khawpin a lian tawh tlat. 

Zanah dar 8 velah a phone a hmet nuah nuah a. "Nautê" tia a save numberah chuan, "Keimah Sir Sangpuia.. Ka number hi save rawh aw" tih thu a thawn a. Dar 9 velah daih, "Aw le.. Sir" tih a dawng.. 

"A hautak dawn hle mai" ti nghut chungin, titau tih hriat zetin a mu ta a. 

(Ka kutzungpui malistu tur bialpa fel deuh ka duh 😢😭😭