Thutiam s2- 16

THUTIAM (S2) - 16

Ziaktu: Toni Râlte

"Pa, Lawmsanga awmdan hi ka ngaih a tha miah lo mai. " tiin Nguri'n Lawmsanga inbual hlanin a awmdan leh a haihawt thut thu vel chu a sawi malh malh a. Pi Lawmi a lo mangang hman. Pu Mawia chuan, "A va mak bawk ve mawle aw. Engpawhnise, incheck up a ngai a nih chu.. Ani ang kumah chutia haihawt let tawp chu a awm lo deuh, a fiamthu a nih si loh chuan" a ti chuar chuar a. Nguri pawn a lo pawm hle. 

"Ruthi, towel.. Ka lo ken luh theihnghilh daih. Vatin" Lawmsanga aw an hriat rual chuan an inmelh rual ţhawt hlawm a. Nguri a che vat, towel keng chungin bathroom a pan nghal. Lawmsanga chuan a lo la vat a. A rawn chhuah chuan Nguri chu khumah a lo thu a, a pasal chu ngun zetin a lo melh kiau. 

"Min va melh chiang ve. A zâmawm rum rum alawm le.. " Lawmsanga chuan a ti nghut a. 

"Lawmsang" Nguri chuan a ti sap a. 

Nguri a va melh a, "Eih, ka nupui duhtak.. Eng nge ni ta? " a ti phur sârh a. 

"Eng ni lo ve. Zanriah kan peih tep.. Lo inthlak la, kan lo siam ang" tiin room a chhuahsan a. 

"Mapuia leh Becky chu an rawn ei ve dawn em? " Lawmsanga'n a tih chuan, a ding leh chawt! Hrilhhai hmel zeta a pasal melhin, "I uang lo tiraw? " a ti hawk a. 

"An lo ei dawn emaw ka tia" a lo ti sup ringawt. Nguri chhungril chu a hniam rawih rawih ni maiin a lang. A pasal hi a dik hlawl lo. Eng nge a chungah thleng ta ang? Ruthi hming a lam a, A thianpa Mapuia (Fâm ta) leh Becky (Nguri thiannu) te hming a lam leh daih bawk. Lawmsanga hriatna hi a tha thin lutuk asin. Nguri haihawt te hi a hauin a hriatpui zawk thin kha a ni ngai a. An zanriah ei pawh puitling pathum te chu an ngui khawp mai. Naupangte erawh chuan engmah an la hre ve lo, Lawmsanga pawh a titi surh surh a. A nu leh pa leh a nupui te nguina pawh chu a hrechang lo a nih hmel. 

"Pa, vawiinah a u te an infawp" Nauteii chaw eikham chuan a ti zauh a. 

Ni e, Sasa khan a rawn awm nileng ve bawk a. Nauteii'n an infawp lai a lo phawk pek chu niin. 

"Fawp ve bawk ang chu.. Bialnute nen chuan" a pa chuan a lo ti a. 

"Mahse, an zak lo si" Nauteii chuan a ti leh hram. A u chuan, "Min enthla ni maw? Nang pawh in sir nen in infawh ve tho kha aw" a tih chuan rang lutukin, "Teuh lo.. I zak lo em mai a," tih pahin roomah a tlan lut zuk. A pa leh Mapuia'n an nuih hawk hawk a. Nguri erawh a nui lui thei ngang lo a ni e. 

Ni e, Sasa kha a rawn leng ta ngei a. An hlim dun kher mai. A pi leh pute lah Pu Mawia farnu Pi Sangi pasal chhungte an lo zin vangin an va leng daih bawk si. Hun awl chu an ngah dun khawp mai. Ateii chungchang te sawiin, Sasa pawh chuan a huat loh thu leh a khawngaih ve zawk thute a sawi hial a ni. Chuti em ema Sasa hi rilru kawi a lo ni lo aniang e. A khat tawka infawp sekin, a tawp erawh thlen theih a ni lo va. A changtupa ke a na miau si a. Mapuia insum zo lo ţhelh chuan, "A tih dan chu a awm reng" a ti pek a. 

Sasa lah chuan, "Ka thiam lo vang., " a lo ti tlat. A eng tak chu sawi ang maw? Mahse, an rilru erawh a inang aniang, Mapuia pawn a nawrlui bik lo. Pi Lawmi te rawn haw hnuah pawh Sasa chuan thingpui te a lum ve leh a, Pu Mawia phawk chhuak lah pek chuan an chibur dahna thlengin sasa chu a'n hrilhfiah tak tak a.. Sasa pawh zak viau mah se, a hlim ru kher mai. Amah ai mahin Mapuia a la hlim zawk awm e. 

Muanpuia pawn chawlh a la ta rih mai. Lehlamah Nguri te tihbuai reng pawh a inthlahrunawm a tia, Terini a hah dawn si a, tlema a awl ve theih beiseiin chawlh pawh pawh la a ni reng a. Mahse, riahpui erawh a riahpui dawn lo, Terini aiin a tangkai nep zawk miau a. In lamah eirawngbawl leh eng ilo a lo khawih ve pawh thil manhla a ni ve. Nauteii khan chhun lamah a han awmpui ve chawt a, Candy hian Terini hi nu ang thawthanga a neih tawh vangin Zan êm riak tur chuan amah Terini lo chu han tih chi a ni bik lo a ni. Eirawng a bawl vat vat a, Ei in siam lam hi chu a nu hian an unau hi parual deuh mah se, an tetlai atangin eirawngbawl a thiamtir vek a ni. A peih pawh an peih viau mai. In chhung chet erawh amah Muanpuia hi chuan a peih tehchiam lo va, Terini awm lo chu in pawh a ţhing riapin a hria. Chaw a ei sawk sawk a. Khaw thim hma ngeia Damdawiin thlen a tum a ni. 

A han thlen chhoh chuan Candy chu an lo jection dawn mek a. A lo ţap tuar tuar mai. A lainat ngei mai. Naute mai a la ni si a. Terini chuan a pawm bet a, a chul hliau hliau bawk. An chiu zawhah chuan a ţap bang ve mai. Mahse, Terini kut atangin a kalsawn duh hauh lo. A ngheng chawt reng mai. Candy chu a hrai hmasa a. A puar tawh hnuah pawh Terini chu a ngheng reng mai si. Muampuia mangang chuan, "Bawihte, a u khan chaw ei ve rawh se.. Lo kal rawh lem" tiin a han ban a. A lu a lo thinsan nar nar a. 

"Eheu! Nulatê, a u kha a ril a tam tawh alawm.. Hawh le, enteh, thil tha deuh ka nei ania aw" Mamawii chuan rang zetin a rawn ti ve a. Candy chu a ban nghal a. A tirah a duh mai lo. Mahse, chocolate a hmuh hnu chuan hreh hmel zetin Terini kut atang chuan a kal hrang ve ta a. Terini pawh chuan chaw chu a ei ve sawk sawk a. Muanpuia lah chuan a vil run si. 

"Thu sawn ve la, min vil run a. " a ti ta nge nge a. Lo nuih huk pahin, "Zakzum reuh mang e" a lo ti hluk a. Mamawii leh a fanu inkawm lam chu a thlirsan ta a. Mamawii chu fa nei tawh tih takah naupang han chhawnchhaih vel chu a thiam riau a. Candy pawh a tlei mual mual khawp mai. Muanpuia chuan lawmthu sawi ve reng reng a duh a, a va kal hnai a. "I fapa em ni? " tiin khuma mu chu a kawk a. Mamawii chuan, "Aw nih hi.. Hei tlaiah khan a khua a rawn sik leh ringawt a. Pawi tak tak" a lo ti ve a. 

"I fel hle mai. Kha.. Candy pawh a nuih vur vur tawh kha.. Duh hi a nei mang ngai lo a nia" a ti a. 

"Kan naute chu a fel alawm tiraw? " tih pahin Candy chu a piai zauh a. Muanpuia lam hawi lehin, "A u hi a la naupang ve bawk sia, mahse, lo ngaihtuah suh. Ka awm alawm.. Naupang hi ka ngaina hrim hrim a, kei chu" a ti siam siam a. 

"Nia, a nih dawn kha. Tikha chuan ka ngaihtuah nep deuh tawh e. I lo awm remchang chu a tha hle mai" tiin an awmna vengte an han inzawt nghal a. 

"Khaw nge a pa..? " a ti thut. A sawi tum pawh a ni chiah lo. Mahse, a sawi tawh si. 

"Aa.. Kan inthen tawh a" Mamawii chuan a lo ti sap a. 

"A pawi hle mai. Chu! Nuthlawi leh pathlawi kan inkawm a ni maw" boruak tihzangkhai tum takin a ti a. A hnung lawka thu Terini chaw thial lai a tawp chat. A fian ken lai chu a hum ruh hle nghe nghe. 

"Ni e mawle.. Nang pawh i lo thlawi ve reng a.. Hehe, Candy a la te si a. A pawi ngawt mai" Mamawii chuan a lo ti thliam a. Muanpuia chuan Mamawii chu nu fing fel tak niin a hria. A tawngkam bungrua a felfai thlarh bawk si. Terini te pawh a ngaihtuah lo sawt mai. 

Terini chuan tiffin a va sil a. A sil pah chuan, "Thlawi leh thlawi te chu innei daih ula ti nia" a ti hlak hlak a. A tawng ri hre pha an awm em tih a en kual leh vat vat. A inthiam lo leh deuh bawk si. Mahse, Mamawii chu zep rual lohin a thik tih amah pawn a inhria. 

"Ka va zak lo tak.. Nge ka thik ve ringawt le.. A sualna pawh ka hre tawp si lo va.. " te a ti thul. Muanpuia zawk te chu a ngei lek lek a. Amah leh amah a intihrehawm ve khawp mai. A va luh lai pawh chuan an rawn ngaihven hauh lo. An titi tui hmel ngang mai. Titau si, an hria ang tih hlau siin a insawh tau nghawng nghawng a. Candy lah a la tlei bawk si. A phone te chu a khawih ve ta ringawt a. 

"Terin, ka va haw tawh ang e. Hei Mamawii hi a fel khawp mai. Eng emaw tawh thulhah pawh a rintlak ang.. Nang pawh i zangkhai phah dawn a nih hi" Muanpuia'n a rawn tih chuan a ner sawk chak lutuk. Mahse, a ngam si lo. 

"Nia, a fel tawp' a lo ti hul hak a. 

Muanpuia chuan a fanu chu pawmin, "Lo dam vat la.. Naktukah ka lo kal leh ang. Thil tui tawk tawk ka lo kensak ang che aw.. A u thu lo awih la.. A tha em… " tiin a biangah chuan a fawp nawk nawk a. Candy za ti chu a nui ar ar mai. Terini chuan Candy pawm chungin kawngka thleng a va thlah a. 

"Chhun lamah chuan lo kal a ngai hran lo. In kha lo tifel ve la" inthlahrun hmel tho si, thuneih hmel fe si hian a ti a. 

A rawn hawi let zuk a, "I awm loh chuan a ţhing rup mai. Nauteii ka tihfel tir mai ang. Nang pawh lo inenkawltha rawh aw" a ti nghut a. A kal liam nghal. 

Mamawii chuan Terini hnenah Muanpuia number a dil ta ngei a. A pe lo ngam bawk si lo. A va han ngei tak. Amah ze zawi chi a ni hlauh a, a ngeizia vel a tilang lo thei zawk. Mahse, nuthlawi lungfing chin tawh Mamawii chuan a lo hrethiam ru khiau maithei bawk. 

Nguri chu Nauteii zai riin a tiharh a. Thiam lo zeta a zai rat rât chu an in hnuai naupangin a lo zawm ve lehnghal. Khi sak chungin a tho a, Lawmsanga a la mu! Nguri a thawh khalh deuh ziah thin kha a nia. 

An pa chal vel chu a va dek a, a lo sa vur mai. Hlauthawng takin a tho a, "Lawmsang, hei.. I harh em? " tiin a sawi nawk nawk a. 

A rum tuah tuah ringawt. A sawi leh nawk nawk hnuah a rawn meng a, a mitmeng chu a buai hle ni hian a lang. Nguri chu a thlek vung vung a. 

"Ngati nge hetah ka awm? " a ti ta hû a. 

"I khuasik nasa lutuk, kha damdawi hi ei teh.. Phawt a" tiin a tung tho a. Damdawi a dawlh zawha a mut leh hnu chuan, "Ka taksa a na vek.. Ngur.. School pawh kal lo mai teh.. Min awm rawh" a ti tham ţuak a. A hmingin a rawn ko leh lawi si! Nguri hlauhthawnna chuan a vawrtawp a thleng chho ţan der mai. A pasal chuan vawiin hi Sunday a ni tih pawh a hre lo a nih hmel e. Lawmsanga a mutthilh leh hnu chuan choka lamah a va chhuak phei a. A nu chawhmeh chawk mek bulah a va ding a, "Nu, Lawmsanga hi a dik lo. Tunah pawh a khuasik, a taksa a nat thu a sawi a. A pang a sa vur mai. A pang sa saw reh se, kalpui mai ka duh a ni" a ti ta mial mial a. Pi Lawmi pawh chuan, "A mak teh thut e mai a. Ngati nge niang aw.. I pa lo haw se kan sawi dawn nia, " a lo ti a. Pu Mawia erawh thil khawn in a chhuak a. Nauteii chuan an tawng ri chu a lo hre pha ve nge ni… "Nu, apa chu a dam lo maw? " a lo ti vat a. 

"A khuasik a. Damdawi a ei tawh e. Naute, in khawm banah i papuia in va tihfelsak rawh aw. A rawn sawi a. A khawngaihthlak anih saw.. " a ti a. Nauteii pawh chu a bu nghat. Mapuia erawh a la tho lo a, in chhung dungah hi chuan tiang nen a vei a vei ve thei tawh a ni. Pu Mawia lo hawn lai vel chuan Lawmsanga pang sa pawh chu a dai ta deuh a, a la muhil thung. Nguri chuan a pa bulah a han sawi ve leh a. 

"E.. Tha i tih ang ang khan ti rawh. Ruata te pawh an awm lai a nia, an rawn kal ve thei ang chu. Kei erawh ka chairman thla a ni sia.. " a lo ti a. 

"Nia, Ruata ka sawm ang ka lo ti hrim hrim a. Va inkhawm rawh u.. Amah pawh sawn kal chu a duh leh kher a nge maw le" Nguri pawh chuan a lo ti a. Tukthuan ei dawnah an pa chu a va kai tho a, "Tlem tal ei tum ta che. Ei khamah Damdawiinah kan chhohpui dawn che" a ti a. 

"Aa.. Nimin kan huan kalna lamah ka rawl ve a niang. Kal a ngai lo. Hei ka zia tawh lutuk. " a lo ti a. 

"I zia lo.. I zia hauh lo" hnai taka rawn melhin a nupui chuan a ti sap a. An nu mitmeng tak ran mai melh chung chuan, "Eng nge i sawi awmzia? " a ti sup a. 

"I haihawt thut te, hmanlai huna i cheng leh thut zel te hian ka ngaih an titha lo a ni" Nguri chuan a ti a. 

"Chutiangin ka lo awm elo? Va mak ve. Ka khawsik vang a niang. Engmah a ni lo. Insiam rawh. Chawlh i la rei tawh si, Va kal rawh. Ka tha mai ang. Ka nu a awm dawn tho" a lo ti a. 

"Vawiin chu sunday a lawm" a lo ti nghat. 

"Ee.. Kan inkhawm dawn lo mi? " a lo ti leh hu a. 

"Dawn lo. Chaw kan ei ang a. Damdawiinah kan kal ang" a lo ti nghet charh. An nu chu a hnial zui ta lem lo. Tukthuan an kil lai pawh chuan that lohna a neihawm hriat a ni lo. Terini leh a u te sawirem dan tur te a sawi zuk zuk a, Nauteii lahin a on thiam si. "Ih maw.. Pa, U Terini pawh hian a star hmel tawp. Apapuia hi chu a chhe lo ve chiang em alawm.. Ti nge amah ai hian i hmel that loh le ka ti" a lo ti a. 

"Ka tha zawk lo mi? " a lo ti nghut a. 

"Tha zawk lo. Mahse, Nu Saii ai khan a nu a hmeltha fe zawk" a ti leh daih. Mapuia chuan, "Nu, U Ruata chu i sawm dawn mi? " a lo ti a. 

"Umm.. Ka hrilh tawh kha.. In i lo nghah a ngai dawn a nih hi.. Lo tei tam lo la aw" a lo ti a. Ruata chu Lawmsanga ni fapa,Sipai, chawlh hmanga rawn zin a ni. 

Ruata'n motor a khalh a, Lawmsanga te nupa nen chuan damdawiin lam chu an pan ta a. Mahse, an rawn tum ber Doctor kha a zin lai a lo ni hlauh mai. Han admit ngawt dawn se Lawmsanga chu a tha tung bawk si. Medicine doctorin damdawi eng emaw chu a chawh ve a, chu ringawt hawn chuan an hawng leh nghal. Nguri a lunghnur ru hle. Tha thara an pa chu la checkup tir a tum ruh hle. 

Chawhnu lamah Muanpuia pawh a rawn lang leh ta hlawl. Eitur a rawn keng nual a, Mamawii te nufa pawh a kensak ve nghe nghe. Mamawii chu a pasal hlui leh a farnu ten an rawn kan ve mek a lo nia. A hmel a hlim lem lo hle. Terini leh Candy chuan eitir chu an ei mial mial a. 

"In pawisa hi ka mamawh lo hrim hrim. Ka nei ve e. Ka fapa enkawlna khawp chu.. Min chhuahsan tawh ula ka lawm ngawt ang" Mamawii'n a tih chuan Muanpuia te chu an va hawi phei a. Mamawii chu a thinrim hmel hle. A pasal hlui chuan "I nei lo kan ti lo. Ka fapa a nia, ka pe ve duh a ni mai. Sawi theih engmah i nei lo" a lo ti ve thak a. 

"Ngaihtuahawm ber hian rawn lang der vel lo ula a tha a ni mai. Mai mai a.. Kan mamawh lo che u" a ti leh hlak hlak a. 

"Fa hmangaihber awma i han awm tehchai le.. Damdawiin luh ngai hial khawpa siamtu chu tu nge? Ngawi tak rawh. Han dam fel se ka hawnpui dawn khawp mai" an pa hlui chuan a ti ve pung pung a. 

"I va han zak lo tak.. I chhungte hlau em em khan i fapa pawh hi engtin nge maw i han enkawl ang ni.. Nepa, chhungte thu thua awm kutah hian ka fapa hi ka dah lul lo vang" Mamawii chuan a ti ve leh a. 

An pa hlui farnu chuan, "U Mamawi, i ti mah mah. Kan thu thua a awm lohzia leh i kawih hran hnehzia kan hre ve alawm. Khatiang zawng kha chuan tawngkam cheh suh. Kan hrechiang ve che em mai" a lo ti ve hmiah mai. An boruak a dik lo chho dawn tih hriain, Mamawii chuan, "Aw.. A tha.. Engpawh sawi ula. Ka fapa hi in ngaihtuah a ngai lo. Kal tawh ru" a ti ta vat a. Muanpuia awm ve ta lo se chutiang chuan a tlawm kher ang e maw le.. 

An chhuah hnuah Muanpuia lam rawn hawiin, "Tenawm lutuk.. Ka ning a nia. Tihian a langsar chinah hmangaihber awm hian an rawn awm a. " a ti hlak hlak a. Muanpuia lakah chuan thiamchan a tum hmel hle mai. 

"A zia lo hle mai. Lehlamah an fapa a ni ve miau bawk sia lawm. " Muanpuia chuan a ti a. 

"An ni nen sawn inzawmna neih ka duh tawh lo. A chhungte thu thuin a awm a. Ka retheih êm mai. Awmpui nen kan danglamna a awm lo" a ti leh duah a. 

Muanpuia chuan, "Kha.. I fapa a awm ve si a, insum rawh. Eng nge nizan lam te in mu tha thei em? " a ti ta a. 

"Umm.. Tha ve reng. Lal Terini mut nghehzia kha ka ngei lek lek alawm. Candy a tap a, zuk harh miah lo va. Ka va pawm ta ringawt alawm.. Kan inawi rei viau lehnghal" a ti ta zat zat a. Terini a hawi phawk hle. 

"A ţap maw? A va awihawm loh" a ti hâ a. 

"Ţap e mawle.. I muhil nghet sia, ka kaitho duh ta lo che anih kha.. I chau ve aniang ka tia.. " a lo ti leh a. Terini hmelah chuan awih lohna a inlar nasa. Muanpuia pawn mak a ti deuh. An inah pawh Terini chu a harhvang ber leh Candy a ngik ruala inperh tho at zel kha a ni si a. A chau ve deuh em mawni dawn ni. Mamawii lahin dawt ringawt chu a sawi hmel loh bawk si. 

Terini chuan nuam lo a tih hmel viau, chu chu a hmuhin, "I chau tawngkhawng ve deuh aniang. Mamawii lo awm hlauh chu a tihzia hle mai" tiin a hnem a. Terini chuan sawi tur a hre lo. 

"Eitur te hi min rawn ken a ngai lo asin. Amah hian a ei thei vak si lo va.. " Mamawii chuan a ti leh a. 

"Aa.. Nangman i ei mai dawn lawm.. Tiangah chuan kamram te hi a tui duh bik alawm" a lo ti ve a. 

"Tukin Doctor ward rawn fang kha chuan kan chhuah theih tep tawh thu a sawi a. Nangni pawh in chhuak ve tep ang chu maw" Mamawii bawk. 

"A ni maw? Terin, eng nge doctorin a sawi ve? " tiin Terini a melh a. 

"Engmah chhuah lam chu a la sawi lo. Damdawi hi a course a injection zawh phawt a ngai a tia" a lo ti a. 

Mamawii bawk chuan, "Kan chhuah daih chuan Terini te unau an ngaihawm dawn mang e. Nang pawh in lamah te pawh i rawn leng ve ang chu tiraw? " Muanpuia a melh ralh a. 

"Leng tuk e a. Kan veng a inhlat hleinem. " a lo ti ve mai a. Lang lo atangin Terini a ner sawk. Mamawii chu a ngeih thei der lo mai. Amah pawh chuan rilru chhia te a inti thul.. Hrehawm a ti ve hle. 

Candy leh a pa an inpawm chhuak a, "Ka thianpa kan va kan ve lawk ang e. Nizan zan laiah khan an rawn dah lut a" tiin an chhuak daih a. An chhuah rual rualin, Mamawii chuan, "Terin, i u hi ka duhzawng tak a ni. Mahse, hmeichhia ka ni sia, ka tan han hnaih vak a rem si lo va. Lo sawi ve la" a ti ta sar sar mai. 

Thinlung na ru em em chungin, "Umm ka lo sawi dawn nia. An nu nen an inthenna a la rei si lo va. Engmah ka tiam thei lo che aw" a ti ta sap a. 

"Umm ka hrethiam alawm.. Bakah amah pawh hian min haw vak lo chuan ka hria. Nizana ka va biak pawh khan min chhang ve zel a. " a ti a. 

"I va be ta law? " nuam ti vak lo hian a ti a. 

"Bia tihah i mu tawh em tih vel mai mai.. A khawhar ru ve viauin ka hria. " a lo ti a. 

"Nia, a khawhar ve lutuk, a fanu hi awm lo phei se chuan a hrehawm a ti viau ang" a lo ti ve a. 

'Lo sawi ngei ngei rawh aw.. Kan chhuak tep tawh sia. Kan chhuah hmaa engkim hriat ka duh" Mamawii chuan a ti leh ham ham. Terini te ang nula zakzum leh pawisawilo lutuk tan chuan chutia mipa bem hmasak chu thil mak tawpkhawk a tling awm e. Mamawii lah chuan a palzam hmel angreng si. A sawi ve poh aniang chu. A lo duh ru ve maithei bawk a, Lo duh ta se, innei ta se.. Tih a ngaihtuah thlen chuan a hnuk a ulh titih. A rilru lehlamah chuan, "Aa.. Ani te chu min chhawrtu a nia, nge ka lo nat ve vak" a ti tho. A nuna mipa rawn lut ve ta chu hlimna aiin lawm lohna a ngah ta zawk a. A pal ve bawrh bawrh ringawt si, a rilrua awm te bunruahna tur thian tha a nei bawk si lo. A khawngaihthlak letling. 

Sasa inkhawm bang, Rki te ina a peng kawi pawh a haw ve dawn mek a. Scooty a ken loh vangin pheikhawk sang nen a phei hnak hnak a. An in thlen hma kawiah Tetea leh a hmaa lo bem vetu Bonny te an rawn phei ve mek a. Tetea nen hian an inbe khât tawh khawp mai. An rawn hmuh rualin, "Induhnu, in inah kan rawn peng kawi a. I lo awm si lo va. Inthlak vat la, Rki pawh sawm rawh. Bonny birthday kan lawm dawn" Tetea chuan a ti nghal ham ham a. 

"Aa.. Ka hman lo. Thil khawn ka ngai a. Ka lo tel ve lo mai ang. Rki pawh a hman chuang lo" a lo ti a. 

"Nge maw i induh ve vak le.. Kan ring vek tawh che u, call i pick duh si lo va" a hma aia ngenngawl zawk hian a ti leh a. 

"Ka nu te pawn an remti lo vang. Min hrethiam zawk r'u.. " tih pahin kal pelh mai a tum a. Tetea chuan a lo vuan chawt. Mitmeng hriam lam lek leka melh chung hian, "Hei.. I chanchin tuitang lo zet zet hretu ka nih hi.. Tihian veng chhungah thianghlim ber angin awm suh. Zu i ruih thin thute hi sawi duh ila chuan i mualpho tawh ngawt ang. I bialpa laktlak loh zet avang khan inlak hran vak a ngai lo aw" a ti ta mai a. 

sasa lah duai bik hek suh. Tetea kut thinthlak lawp pahin, "Sawi darh vek la ti nia. A ho e mai. Zu ka rui ve a ni mai a. Tunah ka rui pawh ni hlei lo. Nula tam zawk hian an rui ve thin tho. Pawi ka ti awzawng lo, sawi darh mah la. Chuan, ka thian inti ve si, ka bialpa i sawi chhe reng a. Chuvang ania ka inlak hran. Ka bialpa mil thei lotu chu ka kawm thei bik lo.. " a ti ta hmak hmak a. A kal zui nal nal. Tetea chu a rui deuh bawk nen a phun nuah nuah a. Bonny chuan, "Bruh., a ho lutuk. Hun tha a la awm mai ang. Engahmah ngai suh.. Kal ang" a lo ti a. 

"Biakhmingsangi ve mai mai hi a.. Ka inla e te hi a ti ve a. Lerh ropui si.. " a ti a. A thianpa a zui ve nghal. 

In a thlen veleh Mapuia a call nghal a. Mapuia pawn a lo ngai leh tawh hle. Thil ho mai mai sawiin an inbe leh ta reng mai. Tetea te chungchang erawh a hrilh lem lo. Tetea rilru chu mak a ti chho tan viau. A ngaihtuah let leh hian zu an in dun tuma Tetea kut hlei thinzia leh chatthla se ti niawm taka zu a intir nghek nghek zel te a chhui let a, a thian dik tak angah ngaiin a bulah thlamuang takin zu kha a in ve thin kha a ni si a. 

"Hmm.. Tumah hi rinngam tak tak an awm lo a nih hi. Min venhim a hnekin min bawhbeh an tum zawk zel si a" a ti rilru vang vang a. 

Class X ho a zirtir mawlh mawlh lai chuan, an peon, Pu Liana chuan kawngka bul atangin, "Madam, i lo chhuak lawk thei em le? " a rawn ti a. Nguri thin a phu nghal. Zirlaite lam hawia buk nghat pahin a va chhuak a. Zawi deuh sup hian, "In lam atangin an lo call a, in pa a ngaihtuahawm riau a niawm e. A khawsik a sang hle an tia" a ti ta a. Zinga a chhuahsan dawn kha chuan a harh tha viau asin mawle. School kal loh a tum pawh khan, "Va kal rawh. I chawl rei tawh si, zirlai an ngaihtuahawm. Ka tha" a ti tlat kha a nia. Tunah chawhnu period khatna an kal mek a ni. Lunch breakah khan a va call a, a la thei si lo va, a muhil a nih a ring kha a nia. Hmanhmawh takin in lam panin a inkhalh haw ta nghal a. A va thlen chuan Pi Lawmi te nupa bakah Pi Sangi te chhung pawh an lo awm thap mai. 

"Ka pa, kan chhohpui nghal mai dawn lawm ni! " Nguri chuan a ti nghal sawk sawk a. Lawmsanga chal chu tuivawtin an lo dep mek a. Amah chu nikhaw hre lo ang maiin a chhing tlat bawk. An han insingsa vat vat a, Hmanhmawh takin an tlan chho ta a. Nguri chuan a kuah ran a, a be reng bawk. 

A rawn rum leh nghut thin a. Damdawiin thlen hma traffic jama an tan lai chuan, "Rampui, hetiang tur hi a ni lo asin.. A pawi lutuk" a rawn ti chhuak hlawl mai. Nguri chu na zawk zawk mah se, a pasal chuan natna mak tak a vei tih a hrethiam tawh a, a kut chu lo vawnsakin, "Damdawiin kan thleng tep tawh aw.. Tuar hram hram rawh" a ti dam thlap a. Lawmsanga chu thei leh thei lo va rawn hawi chhuakin Nguri a melh vang vang a, "Tu nge i nih? Khaw nge Nguri? Ka nupui khaw nge i dah? " a ti ta nghut nghut a. Motor khalh mek Ruata chuan mak tih hmel zetin a rawn thlek hâ a. 

"Keimah ka ni, keimah.. Lawmsang, Nguri ka nia lawm.. Tawng tawh suh.. Kan thleng dawn e.. Hei" a lo ti sep sep a. Ruata pawh engmah a hrilhfiah hman rih lo. Casualty -ah an lut nghal a, a khawsik sang lutuk tiziaawm turin Nurse te chuan nachhawknain an lo jection nghal a. A tlun titih bawk nen, Ruata chuan a han bawh lum leh vang vang thin a. Nguri thlabar hmel chu hai theih pawh a ni lo. Thil tam tak lo tawngin amah ngei pawh ruk bo tawh niin nghaisak hial lo tawk tawh mah se, a hmangaih a pasal laka hetiang dawnsawn hi chu a thiam meuh bik lo aniang e. A chiâi ru kher mai. Nurse ho lah chuan Lawmsanga tawngvai bual bual te chu, "A khawsik san vang a nih kha. Damdawi khan a chhawk ang a, a zia mai ang" an ti sam êt a. A thinur hlur mai. Rei vak lo hnuah Lawmsanga pawh chu a pang a dai tan a, a muhil ta chiah chiah mai. An admit tak bawk avangin Ruata pawn mamawh a zuk lam khawm leh te te a, ward lamah an insawn chho ta nghal a. Nauteii school bangin a pa chanchin a han hria chu a'n ţap phawt a, a piin,"A dam leh vat dawn alawm.. Khatin nula an awm ngai lo, " a tih takah chuan,"Ka khawngaih alawm. A dam lo ngai si lo va" a ti ţiau a. A awm ve tho mai. Lawmsanga hi nikhua an hriat tirh ata a dam lo khât ve bawk êm a ni. Mapuia pawh a pa natna danglam tak a hriat thawi tawh avangin awm nuam lo zetin a mu ran a. A tawngtai mawlh mawlh bawk. A pa chuan Alzheimer a vei ve ta mai em ni ang? Vei ta se a nu mawlh a khawngaih a ni. A chhungkua a theihnghilh hunah phei chuan… chu thil a ngaihtuah thlen phei chuan a tawt up up mai. A farnu Nauteii a lainat lawk bawk, a pa a hmangaih em em leh kehtheidawma dawmtuin mi hrang ang maia a han en tur a mitthla chuan a nau hrilhhai dan tur a hmu thiam vek si.. Awmhmunah a lo na ve ngawt ngawt mai. 

Muanpuia pawn chanchin a hriat rualin a nau chu a han hmu nghal a. Terini te nen an ward inang lo mah se, a tlawh kawp theih dawn a, a zia zia a awm e. A nau nat dan vel Nguri'n a hrilh sep sep lai chuan hrehawm ti zetin a lo ngaithla a. Nguri hmel thutak ran leh thlabar tak avang chuan a nau natna chu a satliah miah lo tih a hai lo. Tihtheih a nei bawk si lo. Neih a hnekin ani pawh a fanu neihchhun a damlo ve mek chu a ni si a. 

"Engpawhnise, Ngur, thlaphang lutuk suh aw. Doctor ten an han en ang a, natna eng emaw a nih pawhin enkawl dam theih a ni em em ang. " a han ti a. 

"Nia ka beisei khawp mai. Candy te pawh ka la hmu hman lo.. Nakin deuhah ka va hmu ang ka lo tia. Ani chu a zia deuh ang tiraw? " a lo ti a. 

"Aw a zia tawh lutuk. Kan chhuak thei tep tawhin ka ring. Lo lungngai lutuk suh. Pathian zarah Naua chu eng em a ni lo vang" tiin a han hnem leh a. Nguri pawh tlem chuan a thawl ve deuh e. 

Terini te chaw a va pe leh a, Lawmsanga an rawn dah lut tih pawh an la hre bik lo va, mak a ti hle. Lawmsanga te chu pa hrisel leh fit thelh thawlh, ramvachal tak kha niin a hre si a. Muanpuia a rawn lan leh takah chuan Mamawii pawh a rawn phusa leh ngher ngher tawh a. Terini chuan a ei lo tawlh tawlh. Mahse, tihlan em chu a hreh ve si a. Chaw a ei lai chuan, Mamawii chuan, "Candy hian nu a mamawh a nih hi. Terini hi chu a la naupan deuh bakah nau han khawih leh eng ilo vel a la zei vak si lo va. Ngaihtuah a ngai" Muanpuia bulah a ti zat zat a. A chaw ei a tui loh phah vek mai. 

"Ni ngawt mai. Min lo zawnpui la" muanpuia lah chuan nui chungin a lo ti a. Awmze nei zeta Muanpuia melhin, "Hmu saah inngai rawh" a ti sap a. Terini chuan a lem lui thei tawh ngang lo. A ei ruahna sil tur chuan a chhuak ta daih a. A tah te lam a chhuak. Mahse, tihtheih a nei si lo. 

"Terini hi a fel i ti ve em? Ka fanu hi a hmangaih tak tak a ni. Ani chu awm lo se kan pafa chan chu a chhe ngawt ang." Muanpuia chuan a ti dap dap a. 

"Fel reuh ngawt mai. Candy pawn a ngainat em hi.. Mahse, terini hi nula te a ni ve si a, nakinah pasal chhia tha te a la duh ang a, chumi huna inpafa awm dan tur chu ngaihtuah rawh. Nu emaw pa emaw tel lo va fa pawm hahthlakzia chu kei pawn ka hria ania" Mamawii chuan fing takin a lo ti leh thliam a. Muanpuia rilru pawh a kal thui viau mai. Zan dang aiin a haw hma, an in lamah Lawmsanga vanga an hrehawm takin tia va len phei a duh vangin. A hawn dawn chuan damdawi lei pahin Terini chuan a thlah a. Stepa an chhuk lai chuan, "U Mamawii khan min lo biak rawh a tia. I duh ve em? " a ti hlawl mai. Muanpuia a ding chawt, Terini melh chungin, "Ka hria alawm. A awmdan leh tawng dan atang khan ka hrethiam vek tawh" a ti nghut nghut a. 

"Chuan.. I duh ve mi? " hmalam melh ran chungin a ti leh sep. 

"Duh se min ti em? A fel chu a fel hmel phian" a lo ti a. 

"Aw duh rawh. I neih tur a nia, ka duh leh duh lohin awmzia a nei hleinem" a lo ti hmawk hmawk. 

Muanpuia a nui hawk hawk a., "Titau i ang" a ti zauh. Rum zeta rawn melh chungin, "Engvangin nge ka tihtauh ngawt ang a? A nih phawt aw.., " tih leh Damdawi dawra luh a rual nghal. Muanpuia chuan Terini lut lai thlir zui vang vang chungin, "Hmm.. I rilru chu hriain ka inhre ta e" a ti zawi sup. 

Lawmsanga chu a khawsik pawh a reh chho a, chaw erawh a ei peih meuh lo niin a lang. A khawsik san vang ni maw, a taksa pawh a tla ve kuam mai. 

"Ka taksa hi a na chhuak vek ni maiin ka hria.. Ka lu hi a rawn na hmasa ber zel bawk a.. " Nguri bula a tih chuan, "I malaria ve zawk te hi mawni le.. Ka ring chiah bawk si lo, naktuk lamah test neuh neuh kan nei ang a, a hriat mai ang. Rilru hahdam deuhin awm rawh" a lo ti a. 

"Mahse, Ngur, mi hming ka hre lo thut zel te, mi ka hai thut zel te hi a hnuah ka hre chhuak leh tho zel sia. Ka tilui a ni si lo, a mak ka ti ve deuh" a rilru kap rutu chu a sawi ta nge nge a. 

"I upa tawh a, haihawt hri i vei aniang" a lo ti fiamthu a. Mahse, Lawmsanga chuan Nguri mitmenga eng emaw inphum ru chu a hmu thiam mah mah. Kum tam an lo inhrawn tawh a, amah ai mahin Nguri chu a thlaphang zawk tih a hai lo. Chuvang chuan dam a duh takzet a ni. 

"Nauteii ka ngaihtuah mang e. Min ngai ngawt ang " tiin thudang a sawi a. 

"A ngai ngawt ang che.. Nia.. Hei a lo call nghe nghe hi.. Be rawh aw" an nu chuan a ti a. Phone a pe nghal zat. Lawmsanga chuan intiharh hram hramin, "Bawihte" a ti sup a. 

"Pa, tunah khan i dam em? " a rawn ti a. 

"Aw ka dam vek.. Na pawh ka nei lo" a lo ti a. Nguri' lehlam hawiin a khap sawk. 

"Yes.. Naktukah lo haw u la.. " a rawn ti leh chung chung a. 

"Ka hre lo le.. Naktukah chuan test kan nei ang a.. A tuk lehah zawk kan lo haw ka ring. Naktukah school banah lo kal rawh aw" a ti a. 

"Kha chu chiang sa.. Ih,. Kan sir nen kan lo kal ka ring a" a ti niah niah a. A zak tih a hriat. 

 Nui hawk hawk chungin, "A va tha ve. Ka hmu ve chak teh mai a nia.. Lo hruai ngei ngei rawh. Bawihte, hei drip kan khai dawn a. Ka dah rih ang aw.. Lehkha kha lo zir tha la.. Ka hmangaih che. Muttui suk suk" tiin phone chu a dah a. 

Drip an khai sak nghal. Nguri erawh Mapuia nen pawnlamah an inbia a. Mapuia hi chuan thil awm dan a hrethiam tawh a. A nu nen pawh thutak hla takin an sawi dun thei deuh. A pa chu a ngaihtuah ve hle. "Nu, Pathian thu thu a nia. Inngaihtuah hah vak vak suh aw.. Eng em a nih ka ring lo.. " a rawn ti ve ngial a. 

"Ni e, nang pawh lo hahdam rawh. Kan tha lutuk ania. Min lo ngaihtuah suh u" Nguri pawn a lo hnem let ve a. Phone an dah hnuah pawnlam thlir vang vang chungin, "Lawmsanga nupui ka ni reng ang.. Chu chu Lawmsanga hian a hriatreng ka duh a ni.. " tiin chunglam a melh leh zauh a. A pasal hmu turin in chhung lam a pan leh ta nghal a. 

(Vawi khata sei deuh hi a ninawm aw 😊😁