Thutiam s2- 12

THUTIAM(S2)- 12

Ziaktu: Toni Râlte

Remmuani chu a hmu hmasa bertu sawi danin, "Damdawiin thlang khamah hian bawlhhlawh tenau deuhte hi chu ka paih mai zel a. Tukinah pawh khan ka zuk paih a, ka let leh lam kha ka tum loh tawpin hmawng zara a lo inkhai hi ka han hmu ta mai a ni. " tiin. Remi ruang chu postmortem a ni ta nghal a. An lak thlak chuan a lo khawng vek tawh. Inawkhlum dang ang lo takin a hmel a danglam lem lo. A maimichhing a, a lei pawh a seh lem lo. Mitthi ruang pangngai ang a ni mai. Zoteii leh Rinfela chu an ţap fap fap reng a. Nguri erawh a mittui a hul hiau tlat! A lungawi hlawl lo. Remi hi a inawhhlum a ring thei lo. Inawkhlum ngam tur khawpa huaisen niin a hre hauh lo bawk. Tin, inawhhlumna chhan tur a neih a hre lo, a nun chhungril kha lo tuihal viau mah se; a ni nen an inkawm atang khan a nun pawh siam a tum ve viau a. Khatia pasal um anga an han ngai pawh kha Nguri chuan a nih a ring ta hauh lo mai. Eng emaw inphum ru chu a awm chiang a ni. Police lam pawh an rawn lang ve a. Zoteii leh Rinfela te chu an kawm a. A hma tlai lam atanga a bo tawh thu leh pasal um emaw an tih thu an sawi a. Report pawh thehluh an tum thu an sawi bawk. 

A hma tlai lama Remi lo hmutu awm an han zawng kual a. An vâng nasa mai si. Postmortem result-a a landan chuan inawkhlum ni ngei chuan a lang bawk si. A thâwkna dâwt hnawhtu a awm vanga hnukchat tih a lang ve bawk si a. A thih hun nia an sawi erawh zan dar 7-8 inkar vel daih a ni lawi a! A ruang khawng tawh dan atang khan a dik maithei. A nih chuan engvanga inawkhlum nge ni ta ang le? 

Remi ruang chu an vui liam ta chu a ni mai a. A pi thihcham êm pawh a thlen hmain ani pawn a pi a zui ve ta chu a nia! A runthlak mang e. A nu chuan a tuar hle tih a lang.. A ţap bang hleithei lo a ni ber e. Rinfela tak pawh a insum thei lo a chha a ni e. A fanu upa ber a ni a, lo pelhein naupangtê ni chungin rilru tihah viau thin mah se, hmuh hmasak ber hi chu an lo tla na deuh pawh a niang e. Remi chu a pi thlan bulah zalh a ni ve ta. A vanglai a hmang chho dawn chauh a, a uihawm kher mai. 

Nguri rilru erawh a chawl thei hlek lo va. Zanriah ei hma si, mi reh lai takin a chhuak ru zauh a. Damdawiin lam a pan ding nal nal. A beisei ang takin Pi Tlani pawh a lo la inhawng a. An inhre sa tawh bawk a, an inbe hlut mai. 

"Tukin khan kan buai ta èm a. Ka rawn be hman ta lo che a. Kan nau thih chungchangah hian zawh duh che ka nei a ni" Nguri chuan a ti nghal thâwr a. Pi Tlani a lo meng â deuh, "Awii eng nge maw ka hriat ve ang le.. Mahse, min han zawt ta poh che. A pawi lungrun tehzawng a ni e. Ka khawngaih em mai, a la naupang si, a pi mitmu em pawh a la keh lo a nia" a ti luam a. 

"Amah Remi kha i hmu tawh thin hrim hrim em? He lai hnaiah" Nguri'n a tih chuan, a lu a lo thing a. 

"Hmu ngai lo. Bakah mi hi ka lo chîk lem lo a.. " a ti a. 

Mahse, chutia an inbiak lai tak chuan Pi Tlani dawra thawk nula ti ila tleirawltè mai, Sa tha lam leh hang lam lek lek chuan, "Nimin khan ka hmu.. Mitthi in sawi kha. Saw lam atang sawn a lo kal phei a. Damdawiin hmar lamah sawn a phei.." a rawn ti ta a. Nguri lung a phu rang ngei mai. 

"Aw haw! I va fel em.. Mami, tu nge i hming? " a ti nghal seuh seuh a. 

Pi Tlani zawk chuan, "Nunui a nih hi.. A fel ania. Lo inkawm r'u, Chow ka va lei lawk ang e" tiin a chhuahsan zui a. Dawra chawl chu vai putar leh nu chawhmeh zuar zo niawm tak, berh ve hmel tak an ni mai a. Mitmei han ven chiam tur an awm lo. 

"Nunu, nimina i hmuh hun chu dar engzat vel nge? " Nguri chuan a ti a. 

"Ih.. Dar 3-4 inkar vel a ni mai thei. Ka chiang bik lo. Amah a ni tih ka hriatna chhan pawh kan dawr bulah hian a chapal kaih kha a chat a, a siam tha a, a ding reng a. " a ti ta a. Nguri chu a phur sawt. 

"Chuan i enzui nge? Damdawiin hmar lamah a kal tih engtin nge i hriat? " a tih chuan.. "Damdawi dawr ami ten thil an rawn order a, ka va pe a, ka hmaah a kal a, chuan hmar lamah a peng phei ta a ni" Fel takin a lo ti leh a. 

"Nunu, ani kha ka nau fanu a nia, a thih danah hian thil fel lo eng emaw a awm ka ring a. Chuvang a nia. Nang pawn i thu hriatte hi tu bulah mah sawi suh aw. I tan pawh a hlauhawm thei dawn ania. I hrethiam ang tiraw? Chuan, Remi chu a rawn chhuak emaw a hnuah i hmu zui tawh lo em? " a ti a. 

"Aw.. Hmu zui tawh lo; bakah nimin tlai kha kan bang hma ve deuh bawk a" a lo ti a. Nguri chuan Rs. 500 a phawrh a.," Kha hei hi la rawh. Ka sawi tawh ang khan tu bulah mah engmah sawi suh aw" a ti leh a. 

"Aih, a ngai lo. A ho lutuk. Ka la lo vang, ka lawm" a lo ti tlat! Nguri chuan a mizia tangin a la dawn lo tih hriain, Nunui kekawr ipteah chuan a hnawh lut lui a. "Ka lawmthu sawina angah min lo ngaihsak mai rawh. Ka lawm lutuk ania" tih pahin a nuih sak a. Pi Tlani lo kir leh hmain dawr chu a chhuahsan ta a. Remi chu niminah damdawiinah amahin a kal ngei a, Damdawiin hmar lamah chuan Doctor ho quarter a awm tih pawh a hria. Rinliana chenna hmun pawh a awm tih a theihnghilh hauh lo. Hmabak kó takin in lam a pan ve ta hnak hnak a. 

Remi thih thuin a han den takah chuan Mapuia pawh a ţhawng ve kher mai. A nu nen inbiain, "Amah leh amah a intihhlum chu ka ring lo ee.. A mak ka ti hle mai" a ti ve sup sup a. A nu chuan, "Engpawhnise, tihian Remi a ni leh ta zel si a, kan cham leh deuh a ngai dawn a ni. Chawlh pawh ka lak belh ta mai. I nau leh i pi leh pute kha lo enkawl tha la aw" a rawn ti a. Pu Mawia zia lai a ni hlauh a, a zia tak a awm. A papuia te nupa an lo inthen ve leh bawk nen, mahse, Muanpui te chu an rawn insawn phei dawn lo a niawm e. Terini a awm tho bawk nen. 

Ni e, Saii te chu a tukah khan bungrua la tur chuan an rawn kal ta ngei a. Saii pawh a la rawn tel hram. Pu Mawia te nupa an va phei ve bawk a. Inthen chu tha ti chiah lo mah se; a neitu ber Muanpuia'n a duh miau si a. Intihluih theih ni hek lo le.. Saii chhungte lam chuan beisei nei takin an han zai tak naa, Muanpuia berin, "A bo abang awm lo khan a bungraw chin chu la fai vek rawh u. Uire bungrua ka kawl duh lo ve" a lo ti hmiah mai si. 

Saii a ling leh phat, "Ka uire leh uire loh i hria mi? Nang zawk kha alawm uire chu.. In hnathawhna lamah bialnu i nei tih pawh ka hria.. Ve khanglang che hian" a lo ti bâwih bâwih a. Engah vak a ngai lo. "Bialnu te chu nei ila, ka makna che a rei tawh ang" a ti awlsam êt a. Bungrua lah chu a duhâm hrep, Choka bungrua thlenga lak a tum erawh Pi Lawmi a inrawlh ve ta a. "Ngawi teh, Saii, heng em em hi chu la lo teh. Nangman i leia i rawn chhawm luh an ni lem lo bawk a. An pafain an la khawsa reng dawn a, an mamawh ve bawk e. " a lo ti kalh. 

"Zat leh zatin kan insem ang chu.. " a la ti ham ham a. 

"Hman lai upa te chuan uire chuan bungrua engmah an chuh thiang lo an ti zawk asin. I pasal a fel em zawk a, a la laktir duh zawk che a. Zat leh zat lam kha chu i sawi ri lo ngam teh ang" Pi Lawmi'n a ti chang fak. Tuman an chhang ngam lo. 

Saii cousin nuthlawi ûn ve tawh lam, hmai duk pheuh pheuh, sam buang thûng hian an kal dawn tawhah, "Ka pi, infapa te pahnih chu an nupui ten an uiresan ve ve tawh chu a nia. An pa thei lo a niang a.. " a ti a. A nui lui sak bawk. 

"Ni e, a lo ni mahna le.. A pawi ngawt mai. " Pu Mawia'n a ti ringawt. Muanpuia a lo za ve zak mai. "Ka pa theih leh theih loh chu nang nen kan han test dawn em niang.. Mahse i nei loose tawh awm em mai. I hmel atang reng khan.. " a ti ta zêk a. Saii'n, "I va zak lo tak.. Ka u hi chutiang mi a ni ve lo aw" a rawn ti a. 

"Ni e, nangmah ang an nih loh chuan a tha vek e. Kal vat teh u. I hmel kha ka hmu peih tawh lo" a lo ti sawk sawk.. 

"Inchhir reng reng suh ang che. Ka rawn let tawh dawn lo a nia" Saii'n a ti leh hram a. 

"Ka lawm e. Rawn let singsarih mah la, i damchhungin ka nupui hlui bak i ni thei tawh dawn lo.. A nih phawt u" tiin kawngka a khar zui hmiah. Tihngaihna vak awm hek lo, Saii te pawh lungawi lo takin an in lam an pan ta a. Terini leh Candy erawh an inawrh reng a, kil khatah a lo ding zum ve reng. Nupa inthenna chu tha ti lo mah se, inuirena kher kher chu a pawmzam thei bik lo va. Saii chu a ruk tak chuan chawh a lo ti ve hle. A laka tha em em reng Muanpuia chu a khawngaih tho bawk. Tichuan, an pathumtê chuan an khawsa ve rak rak dawn chu a nia. Muanpuia pawn nupui a nei ve leh thuai turah ngai ang. A fanu a la te si a, tun atanga nu anga a en theih tur a mamawh a ni. 

Sasa lehkha zir ning a rilrua lut thei bawk si lo chu a rum nghat a. Fail a hlau ve bawk si. A chawlh ve hlek lahin phone a ban nghal zel a. Mapuia pawh a reh rih. Lehkha a zir a ni ngei ang. Whatsapp a luh chuan Mapuia numberah lut nghalin, "Ngaih i ni" tih a va thawn leh hram. Amah chauhin a khi leh var var mai. 

Tetea msg a open zat a, "Kha pa bula i let leh atanga kan inkar hlat tawhzia hi.. min thlauhthla hmak thei ania" a rawn ti a. 

"Ka thlauhthla hran lo che. Exam a hnai tawh a, lehkha ka zir ve alawm.. Bakah nang pwh damdawiina ka awm lai pawn vawi khat pawh min rawn kan bik hleinem" a ti ve ta ngat a. A lungawi vak bik lo a ni. 

"Ka thianpa khan a duh tehlul che nen, an hausa a nia, i nawmsakna tur ka ngaihtuah ve em em a, min tihrilhhai khawp mai" Tetea chuan a rawn ti a. 

"Ka duh lo tlat. Khatiang hmeichhe zu rui fight nulh nulh ching mipa ka ngaisang lo. Mapuia hi a ka hmangaih. Neih ngei pawh ka tum" a va ti leh hmak. 

"A duh tak tak lo vang che. Mipa te chu kan duhnaah chuan kan inthup thiam lutuk. Nawmchen nan bak a ti lo vang che" Tetea tawng theihzia chu aw.. 

"Nawmchen nan mai mai pawh min hmang se, ka ta a nih tho chuan ka ngaipawimawh lo" a ti a. A rawn hnial zel a hlauh vangin phone chu dahin a zirlaibu lam chu a melh ta daih a. Mahse, a rilruah erawh a thiantha anga a lo ngaih, Mipa thian a nei tia a lo thlamuanpui ve em em Tetea a laka a awmdan chu a hrethiam lo. Khami zan pwh khan a thianpain a fight lai te khan a thian a nih takzet chuan a thianpa kha a khap turah a ngai. Mahse remchang a siamsak sauh sauh zawk a nih kha.. Chuvang chuan Mapuian a lo ngaina bik lo nen, Tetaa chu kawm vak a tum tawh lo a ni. 

"Duatte, naktuk School ka rawn kal dawn lo. Ka nu entir a ngai a, ka kalpui a phut ve tlat sia" Sangpuia msg a hmuh chuan a hnual rawih mai. Ni khat lek inhmuh loh pawh rei a ti der tawh. A chang chuan a inzahpui ve tho, "Ka la naupang ropui si, ka van lerh tak" te a inti thin. Mahse, a thiante pawn an nei ve tho tiin a tawpah a inhnem leh nge nge zel a. Sangpuia chu amah aiin kum 10 laia a upat vang nge a pa ang deuh hian a en a, a nu leh pate bula a pangchan ang mai hian a pangchang thin. Ani Sangpuia lahin a lo tlin nasa mai si a. An khawvel chu hlimawm tak a ni. 

"A va rei dawn ve" a va ti ve a. 

"In ban hun lo sawi la aw.. Ka thlah dawn che nia" a rawn tih chuan, "Engtin nge ka sawi ang a? Phone ka keng thei hleinem" a ti a. 

"Ni tak.. Naktuk chu keng ru ve mai rawh. An check lo vang. Miss Feli pawh a kal dawn lo" a rawn tih chuan, ani naupang ta chuan ngaihdan a lo nei hman pek a. 

"Hmm.. A rualin in kal lo dun vel a.. In inhmu dawn anih kha. A tha lawm.. A tawk" a va ti leh ngawt. 

"Miss Feli chu seminar-ah a kal dawn alawm.. Duati, i thikthu chhiat dan hi a chhumbung thin lutuk. I awih loh chuan lo kal ve mai la.. Ka nu pawn a hmu chak che lawm" a rawn ti a. 

"I zak lo em mai a. Ka hmu ngam teuh lo. Lerh min ti dawn lutuk" a va ti vat. Miss Feli a thikna chu a reh leh chu a ni mai. Hetiang hun Tleirawl zahzum laia bialnu bialpa neih hun lai, hmuh chak si, hmuh ve tuma zaka lai em em, pehhel tum leh ngat ngat hun lai hi a lo nuam ber mai. Kan rilru pawh a la thianghlim a, kan vei leh suangtuahna pawh a la sang lem lo. Nauteii pawn chu a hun hlimawm, a vawrtawp thleng lek lek tawh chu nitin zantinin a nuihpui chu a ni ve ta reng mai. 

Remi thih atanga ni 3-naah Rinfela chu luhai vangin a pai chawn chawn leh pek a! Nurse an ko va, a BP te an han check chuan a normal ti ila tlem chuan a sang ve deuh. Luhaina tham vak a ni si lo. A luhai hi a nu damlai atang khan a sawi zauh zauh tawh a. A thil ei te thlengin a nghawng lo thei lo. Amah pawh lu a sûn zawn bawk a, a tla kuam reng a. 

"Inentir ang ka ti mawlh mawlh a, i duh tlat lo alawm" An nu chuan a ti hmuar hmuar a. 

"Aa.. Remi thihna hian min la nghawng ve deuh bawk aniang e. Ka tha mai ang" a lo ti a. Mahse, Nguri te nupa chuan an ngaihtuah ta riau a. 

"Naktukah ka han kalpui ange.. In lo nghak u la" Zotei'n a tih chuan, "A ngai lo. Keiman ka han hruai dawn nia.. Lo awm zawk rawh' Nguri chuan a lo ti chat. Zoteii chuan nawr ngam hek lo, helhkam nei niawm takin a thu ngawi ta ran a. Nguri'n a melh ulukzia erawh a hre lo maithei. 

"Ngur, police ruai mai rawh. I kal thui ang a, i nunna atan pawh hian a hlauhawm ka hlau a ni" Lawmsanga'n mut hmunah a ti sup sup a. 

"Police chuan inawkhlum angah an ngai a. Tih vak dan an hre rih lo alawm. A tul hunah chuan ka pun mai ang. Ka enthla tih hi hre lo se a tha a ni mai. " a lo ti a. 

"I u tal hi chu hrilh ve la, inpuih theih dan a awm mai thei asin" Lawmsanga'n a ti leh a. 

"Nia, la hrilh chu ka tum tho alawm.. Hriat tam loh hi a him rih zawk.. Zoteii leh Rinliana te hian pawisak an neih loh hmel si" a lo ti ve a. 

"In lam i ngai tawh em?huan lam te i ngaihtuah tawh viauin ka ring a. I lo va haw rih zawk dawn mawni te ka tia" Nguri chuan a tih zawm zat a

"Ka fanu ka ngai tawh.. Mahse, a tlei viau aniang, min rawn be khât em mai.. Haw bik lo ve, huan lam chu a la hnim rih chuang lo ang. I tel lo va zan khat mut pawh ka thei tawh lo vang" Lawmsanga'n a tih chuan, Nguri chuan a thlek sawr sawr a. Lawmsanga a lo nei hi inchhirna pakhatmah a la nei ngai lo a ni. 

"Terin, i chhungte pawisa i thawn duh em? " Muanpuia chuan a ti a. 

"Aih, an mamawh hleinem. " a lo ti hul hak. Terini chanchin a kip a kawia a la hriat loh vangin mak a ti deuh a. An hman bawk a, a zawt ta a. Terini pawn zep nei loin engkim a lo hrilh ve vek. Muanpuia chuan a khawngaih tawh sa nak alaiin a khawngaih zual sauh. 

"Lungngai suh. Dinhmun kan han siam tha leh ang a, Candy leikang deuh se, i nau pawh chu kan bulah kan awmtir ve dawn nia. Chhungkua kan ni a ni mai.. Keini pawh chawmdawl kan ngai si a" a ti dap dap a. Terini tan a thlamuanthlak hle. 

"Mahse, Candy hian nu a mamawh alawm. Tun atanga nu anga a en nghal thlap theih tur nupui tur zawng rawh. A khawngaihthlak" a lo ti a. 

Muanpuia a nui hul hak. "I thlirna zawn chu ka hrethiam. Mahse, Terin, hmangaihna tih velah hian ka inhnamhnawih peih ta mang lo a ni e. Nei duh ila Pathian zarah kei fa pakhat chauh la nei te chu min iai lo tur an awm ve tho ang, keimah zawk hi ka tha a za meuh tawh lo a ni.. " a ti dam thlup a. 

"Ka hrethiam alawm.. Nia, mahse, i fanu hi ngaihtuah rawh aw" a lo ti a. Terini chu rawn melhin, "Bialpa i nei ve tawh em? " a ti ta thut a. Terini a lo hamhaih nasa. 

"Aih.. Nei lo.. " a ti bah nak a. 

"Nei hman pawn i khawsa lo a nih hi.. Tunah chuan engkimah ka ring dawn che a. Pawisa leh eng ilo pawh tul i tih angin i hmang thei ang. Bialpa neih na hun pawh i nei ve tawh mahna.. Heti ringawta damchhung hman zawng a hahdamthlak loh em mai" Muanpuia chuan a ti a. 

"Aa.. Bialpa lam hi ka ngaihven lo ve hrim hrim a. Ka nei chak hran lo" a ti sap a. 

"Pasal tha deuh i la nei em em ang. I phu alawm.. " Muanpuia'n a ti a. Terini chu a lai deuh nge, thingpui a va lum ta ngawt a. Ni e, bialpa lam hi a ngaihsak hlawl lo, Muanpuia sawi ang deuh khan hun a nei lo ve bawk a. Tin, a ngaihdanah chuan awmpui nula mai mai chu tu'n an duh tak tak a ring lem lo a ni. Tihian a hlim tawk rih, Candy lahin a ngaina si, a nau erawh a ngaihtuah fo a. A nu te khan a thluak an suksak ve tawh anih phei chuan a nau pawh chu a chhanchhuak theiin a ring lo. 

Rinfela chu Nguri nen Damdawiin lam panin an chhuak a. Inleng neuh neuh an la nei bawk. Lawmsanga erawh Nguri patea nen ramvak turin an chhuak ve leh. Makpa tihtur tul ang chu a ti zo ve thawkhat rih bawk a, ram lam bawk hian a lung a len thin. Silai hi a hma khan a kawl ve reng thin a, Mahnia chhuaha sakhi emaw sazaw emaw han kah changte pawh a nei ve fo. Ruthi nen an inneih hnuah khan a nu in ramchhuah a phalsak ta lo va. Silai pawh an hralh ta daih kha a nia. Hnahthial lam chu a ram a la ngaw tha bawk a. A phur viau mai. Nguri te an chhuak fel tihin, Zoteii te inah chuan Rinliana a rawn chuangkai ve hlawl mai a. An inleng dangte chuan tu nge anih an hre ve fur hlawm. Zoteii chuan, "Teh hlawl che chuan, i lo lan ve teh tlat le" tiin a lo dawngsawng vat a. 

Rinliana chuan thuthmun rem pahin, "Nia mawle.. Saw laiah sawn ka rawn kal a, a remchang em a tiin ka rawn lut kawi ve lawk a ni e. In fanu kha ka lainat em a, rawn ral ve hrim hrim ka duh alawm mawle" a ti charh charh a. 

"A va lawmawm ve aw.. Lo thu rawh. Thingpui pawh a so tep ang" Zoteii chuan a ti sawk sawk a. A hma lawkin innel takin an lo inzui kawi hrep tawh tih tumah chuan an ring thiam kherin a rinawm loh. 

Chutiang chuan Nguri te unau an bo chhung deuhthaw Rinfela chu a thu ve ta reng a. A haw tur Zoteii'n a va thlah chuan, "Hun remchang a awm mai ang. Damdawi kha lo pe char char phawt mai rawh. Remi heti hi a ni rih si a, chet lak leh vat pawh mi ngaih a tha lo palh ang e" Rinliana chuan a ti sup a. Zoteii erawh chuan mi dang hriat theih tur siin,"A nih aw.. I tilawmlawm lutuk e.. I lo la leng fo dawn nia" a ti lang lang a. Inhrethiam tawn takin an inthlir liam a. 

Nguri leh Rinfela te erawh Doctor hmaah a awmdan vel sawiin an thu dun ran a. A luhai leh chaw ei tui loh thu bak sawi tur erawh a nei tehchiam lo. Doctor chuan a BP te chu a han check ve leh a, a sang hlek chauh a ni. Damdawi a chawh phawt a, eng a an loh chuan lo kal leh turin a ti bawk. Pi Tlani dawr a lo inkhar a, chawlh a duh tehlul nen. Awm khawmuang loin an unau chuan an haw ve leh ta a, an in penga an chhuk lai takin peng atanga rawn tlan chhuak mek Rinliana chu an va hmu hman a. Nguri chuan hmel danglam chaung lo hian, "Rinliana hi a hmain i hre tawh em? He ta a lo thawh hnu si hian" a u bulah chuan a ti a. 

"Hre em em nang. Kan inhlat bawk nen.. Ngati nge? " a ti a. 

"Ka ti mai mai. Lunglei lam tho a ni sia, Zoteii te nen hian an lo inhriat ve takin ka ti mai mai" a ti a. 

"Zoteii hian hmelhriat a nei vak lo aniang, Hnahthialah pawh hian a la intimikhual ka ti mai. A chhungte lah hian an ngaihsak vak bawk si lo" Rinfela chuan a ti a. 

"Ni ngawt mai. Nangmah an duh loh vang che mawni zawk ni te ka lo ti rilru asin. Remi thih ni leh ka nu thih ni bak lan pawh an rawn lang lo a nia" Nguri chuan a ti a. 

"Ka lo vui ru ve deuh asin. Zoteii tan tak pawh a hrehawm ve ngawt ang. Kan chhungte lam hlirin min tawiawm sia" A u chuan a ti ve a. Ngawi rengin in lam an pan dun ral ral a. Nguri erawh chuan Rinliana kha an in peng atanga a lo tlan chhuah chhan a hre chak leh tlat. Zoteii chuan zo chhang a lo kang mek a, Inleng chu pali nga vel bak an awm lo. Chhun lamah hi chuan tihtur nei hi kan ni ţhûm hlawm a, han inlenpawh vak hi a rem lo ve bawk a ni. 

Malsawma chu koin, Zoteii hriat phak loh turin, "Damdawiina thawk pa kha a lo leng ve law.. " tiin a zawt satliah a. 

"Umm.. A û a lo ral a" a lo ti a. 

A tawk der. Hriatchhuah ngei ngei ngai thil a awm a. Chu thil inthup hai chhuah dan kawng chu Nguri hian a la pawh fuh lo a ni mai zawk. Rinliana hi tu nge a nih tih chiang taka a hriat phawt a ngai. Chutianga hre tur chuan Lunglei lamah Rinliana hrechiangtu a zawn chhuah a la ngai chêu bawk. Hmabak a rit telh telh mai. 

Mapuia te pahnih pawh an inphur leh vawk vawk a. Sasa hian scooty a khawih ta meuh lo. Exam hall-ah an lut ta sang sang a. Sasa chu a hmasa berah a la thu zui. A va lawm lo tak. Mahse, a confi dan erawh a ngai reng tho. Exam dan hi a thiam riau a, a point-ah tak a chhang thiam zel a, a ziak kur nguai ngai lem lo. Tawi kim fun kim sia a ziah thin vang hian mark hmu sang falua lo mah se, a hmuh hniam phah chuang lem lo bawk. A thiam thiam chu a han chhang zar zar phawt a. A hnuah risk ngai leh herrem ngai deuh ang chu a ziak leh vat vat. Hawi pawh a hawi chhuak hman meuh lo. A zo hmasa leh ta ber mai.. Ziah zawh tawh hnua exam hall-a la thut reng, eng emaw beisei nei niawm taka a tawp hun nghak tlat ang hi a ni ve lem lo va. A ansheer sheet a dah a, a chhuak nal nal. Rki leh Mapuia nghakin Canteenah a chhuk ta nghal a. A lo ruak huai mai. 

Lassi a in mek laiin Ateii leh Becky an rawn inzui lut ve hlawl mai a. An ni tih loh chu mi pali vel bak an awm lo. Zam lem lo takin an rawn pan ding nghal chat lehnghal. A dawhkan an rawn zawm ve zat a. 

Ateii chuan nelawm takin,"I chhang tha em? I van zo hma ve" a ti siam siam a. 

"Thiam ka nei lo lutuk a, ka zo hma a nih hi.. Nangni zawk? " a lo ti ve var a. 

"A pangngai. Science hi chu han chhan sei chiam a ngai lo hi a vanneihthlak.. Mapuia te i nghak mi? " Ateii chuan a lo ti ve a. 

"Umm.. Rki nen ka nghak a. An thiam aniang, an chhang rei tlat" a lo ti a. Ateii te chuan Lassi an chah ve a, Becky chuan,, "Sasa, ngaih loh lamah lo ngai lo la.. I dam loh chhan kha damdawi i bar vang an tia.. A ni mi? Ka awih lo lutuk a" a ti ta a. Sasa chuan dawhkan hnuaiah a kut a hum ruh a. 

"Aa.. A dik alawm.. Damdawi ka bar nghek a. Ka zo ta lo anih kha" Satliah zetin a lo chhang a. Becky a dang titih, Ateii chuan, "Ngati nge? Awii a zia lo ee.." a lo ti hliai a. 

"Mapuia nen kan inhauh vang a nia.. " a ti leh êt. An tum ang lo taka chhanna an hmu chu an hawi an hawi ringawt. 

Mahse, hnar hnuaiah kâ hi a lo awm ve bawk a. "Hmm.. Mipa vanga intihhlum tum te chu.. Ani lo pawh i hmu dawn sia" Becky chuan a lo ti leh zaih. 

"Ani ni lo mi dang chu amah ni ve hek lo.. Ka tina êm a. Ka inthiam loh vang a ni mah zawk" a ti a. 

"Ti nge i tihnat..? Mapuia te ang hi chu tihnat vak chi an ni loin ka hria. An rilru a lian sia" Ateii chuan a lo ti ve leh a. 

"Nia, ka sim tawh reng alawm.. Ka tina tawh dawn hleinem.. Chuan taka, Ate, ka tihnat chhunga i lo kawm hlim kha ka lawm lutuk. Nang chu awm lo la ka chân hlen daih maithei a ni. Nangmah vang liau liauin kan ţha leh thei a. Ka lawm.. Nakinah Scho ka lak hunah thil tha tawk ka leisak ang che. Ka kalsan phawt ang che u, hei Rki a lo chhuak tawh sia" Tih pahin a ph a lek vah a. A bag lain nui sâng chungin a chhuak zui nghal. Becky chuan thinrim zetin," A va tham lo che em.. Ve khanglang a" a ti sak a. 

"Keimah vang khan an tha tak tak mi le? " Ateii chuan a lo ti khauh. 

"Awii a elsenna che anih kha.. I hrethiam hi he si lo vah.. A runluih che anih kha" Becky'n a lo ti vat. Mahse, Ateii chuan Sasa thusawi te kha a ngaihtuah let a. A sawi dik lo hran lo. Ani leh Mapuia kha inkawmin tikhan awm vel ta lo se, Sasa khan damdawi a bar lo ang a, Mapuia nen pawh an la inthen reng maithei a ni. A duh loh ber an inkar siamthat hna chu a hriat miah lohin a lo thawhsak ru reng tihna a nih mai hmel.. Pawi tia inchhir a sawt tawh hauh si lo. He hmangaihna zet hi chu a.. 

Ban dar a rik rualin an insingsa nak nak a. Nauteii pawn a rukin a pha a phawrh zal zal. Sms in, "Kan bang" a va ti a. Zirturtu a ni a, ban hun awm te chu a hre tho dawn. Mahse, tun hnaiah ban hma thut chang an nei ve zeuh zeuh thin a, chuvang pawh chu a niang. Muangchangin a chhuk thla chhet chhet a. Mi dang ho chu kal liam vat se a duh zawk a ni. An school piah deuha waiting shed lam chu a pan a. A thu fel awrh tihin a rawn thleng nghal. A chuang lut that a, an tlan zui nghal. 

"Chhunah tiffin em ni i ei? " a ti a. 

"Aih, tukinah thawh kan hai a. Chawhmeh kan siam hman lo va.. Dawrah Msi nen kan chawl" a lo ti a. 

"Chuti thil ei lawk ang. Ka ril a tam ve deuh a.. Umm" a tih chuan, chhuna an thil ei tui lo zet a ei zawh peih loh kha a mitthla a. A bu nghat. Sangpuia chu inherin ngawi rengin an tlan zui leh ta nghal a. Aizawl Restaurant zinga changkang ber pawl, "Sun flower-ah" an lut ta zan zan mai. Tlak lam tukverh bula dawhkan lam chu a panpui a. Nauteii ţawng ve hmain, dawhkan kila lo thu nu pakhat, sam kir, te ve lam, ngo vang mai lam chu hawiin, "Ka nu, hei ka bialnu chu" Sangpuia chuan a ti ta a. Nauteii chuan Sangpuia banpuamah a sik ngat ngat. A biangte chu a tai hlar a, a zak lutuk chu a thaw te a sa phat phat hial mai. 

Chu nu chu an lam rawn hawiin a nui var var a. Nu inuluk tak zawng a ni ngei ang. A thawmhnaw leh inchei danah. Nauteii chu melhin, "Nauteii maw.. I hming hi chu kan in chhungah a mikhual tawh lo teh mai a nia.. " tiin a kut a pe a. Khur der der chungin a lo vuan ve chat. A han nui dawn ngial a, ţap mai tur hmel a pu mah zawk. An thut fel hnuah eitur chu an order a. Nauteii zahzia hriain Sangpuia nu chu a titi nghal siam siam a. 

"Naute, i nu leh pa te an dam tha em? " tiin a zawt a. 

"Dam tha ang. Hnahthialah an awm rih a." tawi fel takin a lo ti a. An inzawt thui zel a, a pu cancer thlengin an sawi kai ta a. Nauteii pawh a zahna a bo ve tial tial mai. Sangpuia nu chu a ngainat zawng tak a ni bawk. Eitur te an ei zawhah Sangpuia nu chuan kalna tur dang a la neih vangin an kalsan ta a. 

"Hmela, min hrilh hmasa ta che… awii chhia min ti ngawt ang" motora an chuan hnu chuan a ti a. 

"Ka sawi lawk chuan i duh dawn si lo va.. Tihpalh aw.. Bawihte" thuk zeta rawn melh chung hian a ti sup a. Nauteii a nem leh vek tawh. Chutia a bialpa nu nen an han inhmu chu a thaw ve huai zawk. 

"Neih loh che hi ka hlau takzet. I nu te lo hawn hunah chaw eiah min sawm ang che. An ni pawh la hmuh ve ka duh" a tih chuan.. Za zetin a nui har har a. "I zak lo lutuk hi ka zak" a ti a. Ani chuan engtikahmah a nu te bulah a bialpa hmu tura a swi ngam a ring lo a ni. 

"I chhang tha em?"Mapuia chuan a ti a. An exam zo kha Rki an thlah hnuah, an pahnihin Aizawl dai tlak lamah an va leng thawveng daih a. Thlifim dawngin an thu dun a. 

"Tha ve tho. A pangngai. Nang? " Sasa chuan a ti a. 

"Umm.. Ka fail lo vang.. Lo hnai teh.. Vawiinah Ateii te nen in inhmu em ni? " a ti ta a. 

"Engtin nge i lo hriat leh hman? " a lo ti ha a. 

"Hei en la" tiin Ateii'n Mapuia hnena, "Keimah vangin in lo tha leh a. Ka lawmpui che u. Amah Sasa khan a sawi a, na chu ti viau mah ila, keimah vanga mi pahnih te inzawmna a that leh chu ka lawm tho mai" a rawn tih chu a chhiartir a. Sasa a ner sak. 

"Ka lo tawng tam ve deuh bawk anih kha.. Min chaldelhna tur remchang siamsak ka duh loh vang a ni" a ti sap a. 

"A pawi lo. Tikhan ngai se, ka lakah beidawng se, mipa tha tak tawng se ka duhpui " Mapuia chuan a ti a. 

"Nia, ka haw hran lo.. Mahse, kan inhmuh hian an tawngkam hian mei a nei thei em a. Ka tih ve fak loh chuan min zuam zel ka hlau a" Sasa chuan a lo ti ve a. 

Mapuia chuan Sasa biang va nul pahin, "Ka hrechiang telh telh che a. I zia hi a duhawm telh telh.. Ka duhzawng hmeichhia hi ka lo hai zawk a nih ka ring" a ti sup a. Sasa zawk chuan a hmuiah rawn tawk zauhin, "Nangmah ang hi ka la tawng ngai bik lo.. Famkimpa" a ti sep a. An nui dun a. Thlifim thaw heuh heuh karah infawpin Mapuia pawn Sasa hnute a ţham nasa leh hle. A tawp thlen chi ni hek lo. Duhtawk chin an nei lo thei lo va, an induhna chu a pung telh telh a ni ber mai. Hmabak erawh an la ngah hle si a. 

Nguri a che buai viau. Lunglei lama a hmelhriat te number lakhawmin, Rinliana hriatchian tumin hma a la mek a ni. Hnahthial khaw chhung ami te chu zawh chi niin a hre si lo. An lo sawi chhuah palh hlauh chuan engkim a buai zo ang tih a hlau a ni. B. Ed a zir laia a hmelhriat, Zari Zotlang ami number a nei thei ta hlauh a. Rinliana kha Zotlangah tho a awm ve tih a hre tawh. Zoteii pawh a awmna kha Zotlang. A inhnaih sawt khawp mai. 

Zari chu a va call ta a. Mahse, "Nguri teh daih che chuan.. Tunah chuan meeting pawimawh lutuk ka nei a. Hun ka nei tam lo lutuk a. Zanah kan inbe mai dawn em ni ang? " a rawn ti zangkhai vah a. Nguri pawn a lo hnial lo khawp mai. Zari atang hian eng emaw tal chu hriat a inbeisei tlat a ni. 

Lawmsanga te ram vak pawh zanriah nang hmanin an rawn haw thei hram. Vahrit leh ramâr an rawn hawn e. A inbual tur chu Achawii te ho hriat phak si loh hian an nu bulah, "Min bual khat tawh e.. Ka sil thûm bawk sia, ka inbual fai zo pawn ka ring lo" a ti sur sur a. Nguri a nui tawp. Tuilum khai luhsakin, "Anih lo kal rawh le" a ti a. Phur zetin Lawmsanga a lut nghal zuk. A pasal a bual pah chuan Rinliana chungchangte chu a sawi malh malh a. 

"Ka nupui duhtak, Amanda ai pawn i fing zawk dawnin ka hre tlat! I hling fuh tep tawhin ka ring. Lungngai suh. Tharum thawh a ngaihna lamah chuan kei i pasal fingvar lo zet hi min chhawr thei ang. A thluak hman ngaihna lam kha chu ka chikat rih sia" a ti lung lung a. 

"Ngawi rawh.. Lung lung thin a che.. " tih pahin nawhlungin a hnungzangah a chhu kauh a. 

"Inbual ve leh mai la.. Ngur, bathroom kan hman tangkai lohna pawh a rei tawh e" a rawn ti leh sup. Nguri chuan nui chungin, "A pawi lutuk, paa.. Vawiinah hlawh ka la ve tan chiah" a beng bulah a ti sar sar a. 

Lawmsanga a tûm nghal bur.. 

"A hun lo loah hian thi ka nei e hi in tia.. Chaw bel bulah ka ţamchhawl leh dawn a nih hi.. Ninawm.. I period rei thei si" naupangchhia zetin a ti bak hlur a. 

"Mahse, i duhawm tho ania" Nguri'n a ti zauh. A khi leh vur vur nghal. Patling, insual leh tharum thawh ngaihna hmuna sakeibaknei ang maia huaisen thin Lawmsanga meuh pawh chhim keitê Nguri bulah chuan a nem leh duai thin chu a nih si hi a.. 

Hetih lai mek hian Rinliana erawh chuan, tu emaw a be mek a. 

"Lo inrawlh ve lo ula a tha zawk ang. In hmuh leh hriat ang hi thil thleng chu a ni. Ka chanvo leh ka ta na nâ na chu ka hloh dawn lo. Engpawh ka ti ang.. " a ti bung nghut nghut a. 

Lehlam ami chuan, "An man tho tho ang che u.. Thudik a ngêt thei ngai lo ve" a rawn ti ve a. 

"In kâ in an loh chuan tuman min man chhuak lo vang e.. Hre rawh u, ka sawi nawn leh ang. Eng emaw sawi in nei tih ka hriat rualin, An ni pahnih kha in zui ve nghal ang. A chiang em? Pawisak nei tawh lo, mi nun beidawng ka nih hi.. " a ti ram hmuk a. Phone a dah zui nghal. A meizial phawrhin tukverh thlanglamah dakin a zu khi vut vut a. 

"Ngurnunsangi maw ni kha.. Ve tak chuan.. Naui, kei min khing tur em chuan i la nau deuh e.. Hnahthial i chhuahsan vat theih nan eng emaw ka tih a ngai ngei dawn anih hi" a ti leh sup sup a. 

Rinliana hi tu chiah nge maw a nih le?! 

(A ziaktu pawh hian a la khawrpum bik chuang lo a nia) 😄😆😆

(Nih leh phawt u 😍😍