Thutiam 5

THUTIAM(S2)- 5

Ziaktu: Toni Râlte

Sarah chu a bengchheng zêk mai. Hmelhriat a lo ngah ve tumhrang nen, Lawmsanga hming chu a lar ta viau. A driver pui a thianten an hriat chuan an thinrim ngei mai. Hminga ngei pawn a lo hriat chuan a ţek chhawk. Ani hi thudik hretu a ni miau a. Sarah chuan a thianpa chu dawtin a puh tih a hai lo nasa, Lawmsanga zia hre ţhang apiangin an awih lo bur a ni tawp. Hmeichhia pawngsual ur ur chi a nih lohzia leh damdawi lama a inhnamhnawih lohzia hretu lah an tam. Mahse, amah Lawmsanga hre ve lem lo te chu Sarah lamah an ţang thung a, Social media lamah pawh Sarah thlavang hauhin an rak nasa khawp mai. An veng chhungah pawh Sarah chuan ţan a hlawh viau, chutih rualin amah hrechiangtu te chuan an awih mang bar lo thung. Muanpuia chuan a nau chu a kawm a, a chinchhuakin engkim a hre ta bawk a. A hahdam huai mai. Thil a punlun zawnga kalpuia court hial thlen rup rup ai chuan tiin Sarah ngei chu kawm a tum ta a. Police station lamah koh a ni ta a ni. Muanpuia chuan a kawm fal ta a. 

"Thudik engkim ka hre tawh a. Lawmsanga hian dawt a sawi loh tih pawh kan finfiah thlap tawh e. Thenzawla i damdawi lak thinna te pawh tlanbo an lo tum laiin kan mi leh sa ten an lo nangching a, thudik an sawi bawk. I mizia leh sumdawnna engkim kan hriat tak avangin i lakah Lawmsanga hian defamation case siam a tum ta zawk a. Tuna i case hi i lalet a nih loh chuan i mualpho zêk dawn ania.. Inngaihtuah chiang nasa rawh" a ti ta hmiah hmiah a. Sarah pawh a meng tal tawp tawp mai. Hmeichhe â a ni lo va, Police ngeiin chutia hmaichhana a han tih takah chuan a zâm ru ve takmeuh a ni. Dâwt chu tlo hek lo le. 

"Mahse, min pawngsual man kha chu a chawi ngei tur a ni dawn lawm ni! " a la ti tâlh a. 

"A pawngsual miau loh che chuan engmah chawinna chhan tur a nei lo ve. I pawngsual zawk alawm.. Nangman.. I hlawhtling lo hlauh zawk a" Muanpuia'n a lo ti hmak si. A dang titih ta der. Han tang viau dawn se, finfiahna engmah a nei lo. Lawmsanga'n CD a hmang a ti lawi si a. Medical test-ah pawngsual a nihna a lang thei dawn si lo. A pal buakah a tang dawn a ang ta hle. Hetiang case belhchiandawl lo lutuk hi chu Police lam pawn an ning ru viau zawk thin. A mualphothlak ve tho bawk si a. 

Sarah chu a mangang tan ta chu a nia. Police lam lahin an thawhpui nau a nih vang lam ai mahin Lawmsanga mize nghet leh zamna nei miah lo chu an lo ring ru viau bawk si. A thusawi zawng zawng an han enlet leh pawn sawi sual leh khap sual a nei lo va, engkim chu a chiang tawk vek em em a ni. Sarah chuan a tal awk tih hriain case chu lak let a duh ta a. Lawmsanga chu a zalen leh ta phawt. Tin, Sarah zâm leh em em chhan chu Hminga'n a lo vau vang a ni. Ani hian a hrechiang ngang si a, A tawpkhawkah Hminga chu a thianpa tan a ding duh dawn tih a chiang tlat. Chutah meuh chuan zoramin amah chu an kawhrawn dawn a ni. A damdawi vangin jail a luh a ngaih hmel ta zawk a. A vawtuin ek a cheh hma khawp mai. Lawmsanga zalen thu leh dawt hmanga hek a nihzia Media lama puanzar a nih takah chuan Sarah demna leh tenna thu a tam kher mai. A chhungkhat nih pawh thil zahthlak a ni. Lawmsanga erawh a thin a dam thei meuh lo, a mualpho hman ta tho si a, thudik hre tawh mah se, mi nawlpuiin an thlir dan leh en dan chu a dang hman tawh si. Nguri tak pawn pawi a ti. Sarah chu hmuha han inkhuainuai rap rap pawh a chak ve khawp mai. 

Nauteii te erawh chuan a pa an han hmu leh ta chu an lawm viau a, hmingchhiat mualpho lam erawh an ngaihtuah phak meuh lo. Mapuia erawh chuan Sasa a hrilh ve a, pawi a lo tihpui vein chutia case an lalet erawh a lo lawmpui viau thung. An la inbe ngawrh hle a, chutihrualin sex an hman atang khan an thikthu a chhe dunin innghirngho chang an nei zeuh zeuh. Sasa zawk chu a tawrhhlelhawm zeuh zeuh. An awm dun tawh phawt chuan Mapuia phone a chuh that a, a check sak vek zel. Thik tur lah a hre ziah bawk. Mapuia lah hian betu a ngah ve zêk a, a tumah a chhang ngai lem hlei lo. Hmeichhia tawh phawt amah rawn betu te chu Sasa chuan a block nghauh nghauh zel. Mapuia erawh a lo nui ringawt thung thin a. Inhauh leh inhnial te hi a thiam ve vak lo. Ngawih lamah a ramtang mai thin. Sasa áng hlak hlak chu hmuhnawm a tiletling zawk. 

Hetiang boruak karah hian Hmangaihzuali leh Sangpuia te pawh an inbe tam ve ta khawp mai. Sangpuia phei chuan a zirlai tihbuai a hlau viau nain be lo chuan a awm thiam tawh mang lo. Mahse, Nauteii lehkha zir hun a hre tawh a, a lo nghak ve ngat ngat thin. Chutin inngaihzawn lam rawngkai an sawi dun vak ngai lo nain an thusawi hote te pawh an hlimpui thei zel tawh. School kal pawh Nauteii chu a phur ve sârh zel tawh a. An class-a Sangpuia a rawn luh apiangin a lungphu erawh a rang thin. A thianten an hriat erawh a hlau hle. Hetih rual hian Miss Feli khan Sangpuia chu tihtakzetin a lo ngaizawng tawh a. Awmze nei zet zeta biak mai piah lamah khawi ilo kalna lama han hruaitel ţalh dan a zawng hram hram thin. Sangpuia tan lah thawhpui an ni a, han hnar fithla thak kha nuam bik hek lo. Nikhat lunch break-a canteen-a an zu chawlh tumin, Nauteii te pawh an lo chawl ve a. Miss Feli chu Sangpuia hnaih leh nek zawngin a awm lui ngat ngat. 

"E.. Taka! Sangpui, zanin chu aw.. Min kalpui loh chuan " a ti deuh nghar nghar a. Nauteii te an hnung lawka thu an ni a, an tawng an hre pha vek. 

"Ka hre lo le.. Zan lam hi chu ka chhuak peih vak thin lo va" Sangpuia chuan a lo ti khawmawi a. 

"Hmm.. I phakar kan sawifel vek tawh kha.. Min lo lam ang che" Feli lah chuan a lo ti deuh hmak bawk si. Sangpuia'n Nauteii a va thlek zauh a, a lo melh kiau mai. 

"Ka hrechhuak chiah, zaninah group meeting kan nei dawn. Secretary ka ni sia, kal loh chi loh" a ti ta zung zung a. Feli a meng râng kher mai. Sir Rama chuan, "Keini pawh kan awm ve reng a, nge maw ani kher pawh chu" a lo ti fiamthu a. 

"Chhuanlam hi a ngah thei hrim hrim, He pa hian.. Ninawm" inla tatu zet hian Feli chuan a lo ti hlak hlak. 

Sangpuia chuan nui chungin, "Rama nen va kal ula.. In inhmeh dawn tawp" a lo ti zauh. Feli a tûm bâr mai. Nauteii chu langsarin nui lo mah se; a chhungril a khi ver ver thung. Sangpuia chu a hmu hmeltha sawt nia! A inhriat loh laiin a thikthu a lo chhe ve hle tawh a lo nia! An la inngaizawng tawp si lo. 

"Sasa, i lo mak kher mai. Min lo bum char char a.. Mapuia nen in ni reng sia" Sangzuala msg chu ner sak chungin a chhiar a. 

"Ka bumna che ka hre lo e a. Ka bialpa i ni hleinem" a ti ve hmak. 

"Hre rawh. In tluang chuang lo vang. Mapuia hi ka hrechiang, a rukin a lerh zêk ania" a'n ti ngawt a. Sasa pawh a nui tawp. Sangzuala erawh chu mi chapo ngang a ni a, amah aia chut leh zei lo zawk nia a ngaih Mapuia'n a sava bu hual a lo hupkhalh chu tawrh har a ti tlat. Kawng a dap dawn chiang a ni. 

"Nguri, he thil hi eng nge a awmzia? " Lawmsanga aw chu a nelawm tehchiam lo. Nguri phone lek va chungin a ding khawng run mai. Nguri chuan a phone chu lain a han en a. An thawnpui tlangval la naupang tak Apuia msg a lo nia. 

"I sam rawn ţawn rawh. A nalh" tih chauh a ni. Lawmsanga tan erawh vei tham leh enghelh tham a tling miau sia le. 

"Ka hre nang, tihian min rawn text ve ringawt zel. Ka chhang ngai lo" Nguri chuan nem takin a ti a. 

Meng rum ûl chung hian, "Ti nge i chhan ngai loh? Chhang ta che. Ka nupui i ni tih sawi rawh.. Tunah" a ti vin thak. A pasal zia hrechiang tawhtu Nguri chuan thuawih takin, "Min lo be tawh suh. Pasal nei lai ka nia. Nula be rawh. " tih chu a thawn ta a. Lawmsanga pawh a nem ve leh ta deuh. Mahse, ngaihthat lohna a la nei tho. A hmuh phak lohah an nuin hna a thawk a, schoolah engtin chiah nge an va inbiak thin ang tih te thlengin a zeldin kual a ni. 

A ni lah taka Ngur lah fa pakhat chauh nei niin hna rim thawk bawk si lo chu a nalh telh telh zawk emaw tihtur a ni ve a. Inchei a thiamin mipa a hip viau mai. Lawmsanga driver pui Bonny phei chuan a star hlum lo chauh, a thianpa nupui ni lo se chuan a bawhzui duh mai te pawh a rinawm hial a ni. Mahse, Nguri hi an hrechiang lo a ni. A pasal mizia vang pawh ni loin amah ngau ngau hi a rinawm ve tawk. Lawmsanga hi a duhtawk khawp mai. 

"Nu, nauteii hian biak a nei ve a nia aw.. Zanah hian an intext a, a nui vur vur zel" Mapuia'n chaw ei laiin a ti pek a. Nauteii chu an melh thap mai. Ani lai leh zak lutuk chuan a chaw bar tur a thulh tawp. "Ka thiante sin aw" a ti naa, a laih danah awm chu a awm chiang. 

"I zirlai tibuai khawp te khan i lo be ve ange aw.. A tha lo ania" a pa chuan a lo ti a. 

"Teuh lo mai" a ti zet a. "Ka be ngai lo" a ti leh lawi si! A u chuan a lo nuih char char. 

"Nauteii chu pasal nei suh se.. Hetah awm ve reng mai rawh se. Kan ngai dawn si" Pi Lawmi chuan a ti a. 

"Hmm.. Ka nei ve chak tho lawm" a lo ti. 

A pu chuan, "Mawina.. Ka dam lai ngei hian nei thei se ka duh asin. A la naupang em mai pawh a" a lo ti khauh a. An ngawi thap. Pu Mawia chu inenkawl tanin a na te la rawn chhuak em em lo mah se; Cancer hi chu a dam hlen thei lo tih an hre vek si. An hlimna pawh a chuai nghal titih. Nauteii zawk chuan, "Pu, i dam reng dawn alawm tirae" a lo ti a. Tlemin boruak a pangngai ta deuh. 

An lo intiam tawh angin Weekend a ni bawk a, Mapuia pawh Sasa te ina leng tur chuan a chhuak ve ta a. A zâm ru viau. Nula rim tur hian vawikhatmah a la chhuak ngai lo. Sasa chhungte han kawm khawmawi vel dan tur a bangbo si. Mahni tawkah a huphurh ve ngar ngar khawp mai. A va thlen chuan an lo awmkim thap lehnghal. Sasa u erawh a thut hnu reivak loah a chhuak a, Sasa chuan a chhungte bulah a han hmelhriattir ve a. A pa chu a nelawm tehchiam loh nain a nu erawh a nu ang maiin a lo be siam siam a, a felin Mapuia pawh a thaw huai mai. Reivak loah Sitting roomah an insawn ta daih a. A khawr tut erawh a la reh fel lo. 

"Insanmar vak a ngai lo " a beng bulah a rawn ti sap. A nui hawk a. "Ka duh vang a ni hleinem mawle.. " a ti ve ringawt a. 

"I pu tur saw a nelawm loh nain a sual miah lo ania aw" a la tizui! Mapuia chuan a tih fo dan angin, "Nasa nu" a ti sup. 

Phone bawk an inkhalh thleng leh ta. Mapuia hian tihdan a hre ve tawh a, inhauh ziah ai chuan tiin a clear lawk vek tawh zel. Sasa phone hi a check ve zen zen lo a, hemi zan erawh tihtur awm lo nen. A ensak ve ta a. A hmuh duh loh deuh deuh a hmu ve ta nual mai. Sangzuala nen an biakna chu eng he huah a ngai lo va. Mahse, "Tetea" tih nena an inbiakna erawh a mit tikham tur a hmu ve ta tlat. 

"Nizan khan ka haw hnu khan i bun leh lo maw? In ve tawh suh. I luak ve ziah a" tih te, "In pa chu ni ila aw.. Pubg i khelh hi ka phal lo ang mawle. I lerh thei ropui si" tih te vel a ni. Sasa chuan nawi zet zetin a chhang thung. Mapuia huat erawh thil dang a ni. Nizanah khan dar 9 velah, Sasa hian, "Zanin chu ka chau riau.. Ka mu hma dawn" a rawn ti a. An inmangtha kha a nia. Tin, pubg hi khel tawh lo turin a ti fo bawk. A lo la khel reng tih a hriatna chuan a tithinrim bawk. A ngawi ta run chu Sasa chuan melhin, "Eng nge buaina i nei mi?" a ti a. 

"Ka va haw tawh ange" tih pahin thawh a tum a. A banah a lo chelh vat. 

"Eng nge i hriat? Sawi la" a lo ti a. 

"Nizanah zu i in a. Pubg i la bansan lo bawk" Mapuia chuan a ti ta khauh a. 

"Chutin a bansan thut theih bik hleinem.. Min lo sawm ve thin bawk sia, min hrethiam ve la.. Zu kha chu Tetea'n a lo keng a. Ka in ve chhin chak a, ka in ve anih kha" Sasa chuan a ti ta zat zat a. 

"Hmeichhe zu in ka ngaina lo" a lo ti hmuk. 

"I mizia lah hi a.. Hawiharh ve la, tun laiah chuan in lo an awm tawh mang lo, kan enjoy ve a ni mai. In reng tur a ni lo va, inah tuma hriat loha kan lem zeuh te chu a pawina a awm lo. Pubg te pawh khel ve rawh ka ti ka tia.. I duh lo anih kha" Sasa chuan a ti hlak hlak a. An inhnial ve apiang hian Sasa hian thiam a chang ziah, sawi tur a hria a, a dak thei ve bawk nen. Mapuia zawk hi a thiam lo ang maiin a ngawi run thin. Tun tum erawh a lungawi thei ngang lo aniang, "Engpawhnise, ka va haw phawt ange" tih leh thawh a rual a. A kal zui hmiah. Sasa chuan hrilhhai zetin a thlir liam tawp. In a thlena a ph a en chuan Sasa rawn ankhumna a tlar thla dul mai. A rawn insawithiam leh vek a, a dik lohna ngei ngeiah pawh ngaihdam a dil duh lo. Ngaihdam han dilin a tihsual te pawm nise Mapuia mi tha elkhen chuan a pawmzam ve leh mai tur. Pride hi a hnawksak ve thin a ni e. 

Mapuia tihngaihna hre lo lutuk chuan, "Keimah ang ni lo mipa ngaizawng mai rawh" a ti ta tawp a. A lo helh khawp mai. 

"Chu! Min then tihna maw? Khatiang vang mai maia thutawp i siam dawn anih chuan a tha alawm.. Sex min hmanpui a, i duhtawk i hmu tawh a. Chvang anih kha" a rawn ti a. 

"Ka then thu che ka sawi lo" tih chiahin a chhang. A phone a off daih,. Inhauh a ning. A mu ngawi ran a. A nau phone bih nui var var chu a thlir reng ringawt. 

Sasa pawh a mu tau ngût a. Mapuia'n a rawn chhang duh tawh bawk si lo. A thin chu a rim em em tawp. A dik lohna a hre duh miah lo chu a mak hle a ni. A inngaihtuah thinrim lungpuam chuan amah lo betu mipa thenkhat te chu be ta chiam a. Status-ah thawveng deuhin a lang bawk. A up chhan ber Mapuia lahin a view bawk si lo. A insawh a insawh ringawt mai. A tukah pawh zing tin a dawn thin morning wish a dawng ta lo phawt. Tlem chuan a mangang tan deuh. Va be hmasatu nih a duh bik si lo. Mapuia ve thung chu a pa nen huanah an feh daih a, phone pawh a keng lo. Sasa nen an boruak chuan a tingawichawi zual a, a pa chuan hai hek lo, "Thil dik lo a awm deuh mi? I hmel pawh a ngui deuh tlat" a ti ta a. 

"Ka mu tha vak lo a. Chu chu aniang" a lo ti. A pa bulah em chuan a sawi hreh ve deuh a ni. Sasa nen chuan inthen ta se bialnu neih leh pawh a peih chuang lo ang. Sex avang khan Sasa chu then a harsat deuh, a virgin a hawnsak tawh si a, an inthen chuan mipa dangte a inkhawihtir a hlau. A mizia a hrechiang si a. Chu mawlh chuan a kap a ni. 

In an thlen veleh a phone pawh chu a en ve a. Sasa msg thar a lo awm bik lo. An luhlul dun ve khawp mai. Biak hmasak tumna erawh a nei lo. Sasa status erawh chuan a tina deuh.. 

"Mipa thil hrethiam lo lutuk leh boring lutuk nena inzawmna neih chu nun a zalen lo. Ka sim" tih a ni. A comment chak viau naa, a insum. Sasa chuan boring a lo ti viau a nih awm chu. Chu a status chuan Mapuia nunah eng nge nghawng a neih a hre lawk kher lo vang; Mapuia runluih a duh vang a nia.. Mahse, a pawi maithei. 

Zan dar 9 velah Sasa chuan a rawn call ta a. A la duh lo zet a, a rawn call leh avangin a la ta hram.. Rui ţawng tih hriat lutuk hian, "Hmela.. Tenawmpa" a rawn ti ringawt. 

"Min biak pawh tum lo.. Hmeichhe dang be vul chûk si, i lo lerh khawp mai" a ti tân tân a. Mapuia nuih lam a za. 

"I rui ni maw" a ti nghut a. 

"Rui e.. Ka chatthla hmak dawn. Ka duh duh danin ka awm dawn.. I hria em? " a rawn au titih. 

"Inah i awm na nge? " a lo ti a. 

"Ka duh duhnaah ka awm ang. Mipa bulah ka riak dawn.. " a la ti zui. Mapuia chuan a ngaihtuah ta deuh a. Phone a dah a, Rki a be ta a. Ani pawh a lo kai ve chhalh niin a lang. An awmna a zawh chuan Tetea te in hnuaiah zu an lo in ho chu niin. Tetea hi Sasa chuan a mipa thian kawmngeih ber niin a sawi a, Thik enah a en ngai lo. Mahse, mipa dang an awm ve tlat chuan a kap ta. A bansan dawn emaw dawn lo emaw a bialnu a lo nih ve tawh naah buaipui a ngaiin a hria a. A chhuak zui nghal. A va thlen chuan an lo ri laih laih a, Sasa ber chu sofaah a lo let reng mai. Rki chuan a lo be vat vat a, Sasa bialpa a nih thu midang te pawh chu a hrilh a. Tetea chuan kai chelh chhawlhin, "In inthen tawh kha.. Helai thleng thleng rawn umzui tawh suh" a lo ti a. Sasa pawh a rawn harh ve tan. Mapuia a hmu chu mak a tih hmel hle. 

"Engpawhnise, ka lo hruai haw ange.. Ti hi chuan a chi loh. A chhungte pawh an thinrim ang" zaidam takin a ti a. 

"A tul lo vang aw.. Kan hruai ve thei. Inzawmna in nei tawh lo.. ani nen hian.. Ka bialnu a ni tawh dawn" Tetea thianpa niawm tak chuan a lo ti lar lar a. Sasa chu va melhin, "A dik em? " Mapuia chuan a ti a. 

"Min hruai a ngai lo. Min duh tawh lo a, mi dang i bia a. Tuna rawn kal hi a tulna a awm lo. " a lo ti hmak mai.. Mapuia chu a ding khawng lah a, Sasa bawk chu enin, "A nih chuan ka haw dawn aw" a ti a. Thinrim hmel a pu hran lo. A inthunun thei em a. 

"I thu thu lawm chungte chu.. Inla fel ropui si,. Ka nunah hian inrawlh tawh suh. Ka duh duh danin ka awm dawn ka tih kha" A lo ti leh hlar a. 

"I hria maw.. Bansan vang vang rawh.. " Tetea chuan a lo ti zauh. Mapuia tan chuan tlawmthlak veng vawng tak a ni. A heh a pet a, nui lui tih hriat zeta nui chungin, "A nih leh le.. Inchhir miah suh ang che" a ti sup a. A chhuak nal nal. A haw lam chu a khalh chak kher mai. Thinrimna leh tlawm intihna hlirin a khat a. Sasa chu bansan vang vang turin thutlukna pawh a siam hmak e. 

A chhuah takah chuan Sasa chuan nuam lo a ti leh si, rawn ngaihtuaha rawn kal vang vang, khati teh hrepa a lo tawng khum kha hrehawm a ti letling. Mahse, zu no a han bana a han in leh takah chuan a zâng leh ta haih a. Enghelh a nei leh ta rih lo. A harhfim hunah erawh thil a danglam mahna le.. 

(Vawiin zet chu bty low chung chungin ka lo ziak hram aw.. Ka tilui thei tawh ngang lo a ni e.. Tihpalh 😢