Thutiam - 4

THUTIAM(S2)- 4

Ziaktu: Toni Râlte

Nguri chuan Lawmsanga a va kai tho nghal a. Ani pawh a ţhawng ve hle. An pathum chuan insiam nghalin, Ruthi an dahna hmun Damdawiin lam chu an pan ta a. Tumah an tawng lem lo, an ngaihtuahna an kawm nihmiang. An va thlen chuan ward panggaiah a lo awm a. A chhungte tam vak lo an lo awm ve ţaih bawk. Ruthi hi a pasal nen fa pahnih an neih hnuah an inthen ta kha a nia, an pain ngaihzawng dang a neihsan leh tak vang a ni. Amah Ruthi lahin lo zir bik hek suh, a han thlawi leh ta kha zu leh sa hmunah a tal nasa a. A fate pahnih pawh an pain enkawl duh bik hek lo, thawkkhat lai phei kha chuan home-ah te an dah ve lawp lawp a. Ruthi chhungte lam khawsak a lo harsa ve bawk si a, an pa chhungte lahin an lakah kut an sil hlauh bawk si. Nu la dam renga fate home-a dah ngawt chu tlawmthlak ti vein a pi te chuan harsa chung chungin an enkawl chho ta a. A u zawk phei chu kum 13 lai a ni ve tawh nghe nghe. A nau mipa erawh kum 7 a ni a. Ruthi nau chiah naupangtêa pasal sûn hian a lainat ta viau a, fa pakhat chiah a nei bawk nen, a u fate chu ama fa ang thawthangin a enkawl chho ta a ni. An vannei letling phian. 

Pasal angreng deuha neih te pawh Ruthi chuan a nei chho mawlh mawlh a, a nun chu tla chhe sawt tak a ni. Hetianga khawhar leh mal taka a awm lai te hian Lawmsanga bak a hrechhuak ngai lo. A inchhirin tawpin tai a nei thei lo va, a tihsual pawizia a hrechhuak nawn un un mai a ni. A tlai tawh si a. Kar hnih vel chhum lo chat lo va zu a han birh ta chu engmah ei tha hek lo, a taksa chuan a zo ta lo va. Damdawiin luhpui ngai hial khawpin a awm chho ta a ni. Mapuia hian a nu hi a rukin a mitmei ve fo, a nu a zah avangin a chanchin leh eng ilo han zawh tur a hre mai thin lo va. Ani Ruthi lah a thlawi hnu khan hmun hrang hrangah a vak kual a, Driver ţawng ve tak te kawpzuiin khaw hrang hrang a zin kual a. Han zawn hmuh mai theih turin a khawsa bik lo bawk a ni. 

Men pawh meng tha hleithei lo khawpa chauin a lo mu a. Hmana Lawmsanga nupui, Vanropuia nu Ruthi kha a hmelah hmuh tur a awm tawh lo. Ruhkawl vunin a tuam der der ang chauh a ni. Khawngaih duhtu tan chuan khawngaihthlak tak a ni. Mapuia chu a va thu hnai a, amah hringtu a nu chu melhin a ngawi vang vang a. Ruthi nu zawk chuan, "Mami, hei i fapa a lo kal ania.. I hmuh chak em kha.. " lungchhe insum zet hian a ti a. A mit vun chu a rawn phu der der, fiah mang lo hian a rawn meng a. A fapa tlangval hial lo ni tawh chu a melh ţâwk ţâwk a. Thei leh thei lo hian a nui ve hram bawk. A aw erawh hriat hleihtheih a ni lo. 

A vawi khat nan, Mapuia chuan, "Nuuu" a ti ta a. Lawmsanga te nupa pawn ngawi rengin an lo thlir ve tlawk tlawk. Nguri tak pawn Ruthi chu a lainat takzet a ni. Lawmsanga pawh ngawi ngul mah se, Ruthi na tuar hmel leh hmel hmuh tlak alawi pawh nei tawh lo chu a khawngaih a, an nunhlui tam tak te pawh a rawn inlar zut zut ve hial a ni. He hmeichhia hi a nupui a lo ni ve tawh thin a, fapa hial hrinsaktu a ni tih a theihnghilh lo. Chutihrualin amah phatsana uiresantu a ni tih a hrechhuak nghal zat bawk. 

Ruthi chuan a fapa a lo nghak aniang tih theih turin Mapuia a hmuh hnu chuan a thaw a zawi ta tial tial a. A chhung ten doctor an ko chul a, mahse, A hun a ni tawh aniang e. Chhan tlak a awm ta lo. Ruthi chu a fam ta. Mapuia chuan a nu kut cher zet chu humsak vawng vawngin, "Ka nu, thlamuang takin chawl ang che aw" a ti sup a. A thinlung chu a na ve hle. Nu leh fa inzawmna hi chu a karah thil tam takin tlakbuak thin mah se, a nghetin a ril bik êm a tin ni. Nguri te nupa pawn an fapa chu an hlamchhiah ngawt thei bik si lo va, Ruthi ruang pawh chu an zui ve ta nge nge a. A tuk lam vuinaah Mapuia a lan ve tha an tih vangin tlaivar erawh an tlaivar em lo. 

A nu thihna chuan a tingui viau naa, a mize thanhnan sa kha a ni tho a, enliam mai mai thintu te tan chuan danglamna vak a awm lo. A bialnu Sasa leh a chhungkua erawh chuan a danglamna an hmu thiam a. Nguri pawn a theihtawp chhuahin kawm harh hram hram a tum thin. 

Hmangaihzuali leh Sangpuia inbe ta zeuh zeuh pawh chuan danglamna a rawn chhawm tel ve zel a. Sangpuia chu ngeiin haw lek lek thin mah se, a reply lo thei ngai bik lo. Chu chu amah pawn mak a to fo. A class a huphurh ruk ngawih ngawihna te pawh a bo telh telh a. Movie a en atang ten Sangpuia nena chutia a ruk aral ang deuhthawa an han inchhai vel te chu nuam tih rukna riau a nei chho a, a chhungte leh a thianten an hriat erawh a hlau ngawih ngawih thung. 

An class-in Hmuifang an tlawh dawn a, Sir Sangpuia leh Miss Feli ten an hruai dawn a ni. Miss Feli chu tel ve lo mah se, an lawm viau dawn nen a chuh er teh si a. A then phei chuan kal chak viau mah se, Miss Feli vang chuan thulh te an han tum thut thut a. Nauteii erawh a phur viau. An kal hma zanah Sangpuia'n, "Naktuk chu ka bulah kal rawh aw.. " a rawn tih te khan amahah eng emaw a thawk. An la inngaizawng miah lo nachungin, inngaihzawn hun an nghak ni berin a lang. Zing kar atangin jla hak turah a buai phawt! An chhung buai a ni deuh mai e. A nu pawh mawng a huntir hman meuh lo. A tawpa tawpah ama confi dan berin cargo leh tshirt a ha leh tlawng! A ho leh hle sia. Mawi erawh au inti ve hlarh hlarh viau. A helhhawlh atalângin chaw pawh a ei puar hman meuh lo. A awmdan mak tak chu a chhungte pawn an hai lo. An lo phurpui zawk hle. Tiffin a pai a, a puin a nu hmuh loh laiin pawisa a pai ru zeuh bawk. 

"Bialpa i nei chiang. I phur dan teh hurh hi" a u in a tih chuan a lai kher mai. 

"Ka nei lo em mai a" a ti ringawt. 

"Tu nge a.. In class ami maw.. Sawi ve mai la" a u lah chuan a ti sek sek reng a. 

"Ni mai mai lo.. Aa. Ka nei lo hrim hrim" a ti leh nawk nawk a. Mapuia pawh a nuih a za hle. A nau chu an innghahkhawmna turah a va thlah a. An lo en duh ngei mai. Zodini phei chuan a bula thu a thiannu a sik pilh nuan hman. Naupang ho chu bus-in an kal a. Kawngah an zai phei ţhap ţhap. A nuam chho hle. Msi nen an thu dun a. An sahâwk ve lem lo. 

"Ka motorah chuan tur che lawm" Sangpuia msg a hmuh chuan a khi ţha a. 

"A zahthlak alawm" tiin a reply.

Hmuifâng an thleng a, an ri nak nak mai. Nauteii phei chu a kal vawikhatna a ni bawk a, a hawi kual nasa ngang mai. Msi nen thla te an han la ve nual bawk a, thlalak te hi a zei tehchiam lo. 

"Ms, min lo laksak ve lawk.. Nauteii nen hian" Sangpuia'n a tih chuan an hawi phawk hrû mai. Nauteii bulah a rawn ding nghal zat a, Msi chuan lai zetin a click sak a. Nauteii a venthawn vangin, "Naute, kha lo click ve thung la" tiin Msi chu a dinpui ve leh nghal a, Msi a lai nasa mai. Chutia an pathuma an inzui leh an han kal hrang deuh chu an en duh viau mai a. An phun sep sep bawk. An class-ah hi chuan Sir Sangpuia langsar khawpa star ngam an awm lem lo thung. An pathum chuan inzui ve zelin Sangpuia chuan khaw lo lang bakah an la hmuh vak loh tur thil te chu kawhhmuh pahin a hrilhfiah zung zung a. Nauteii pawh chuti lutuk chuan a insangmar tawh lo. Msi chu a û in a lo call a, an inbiak hlan chuan, "Vawiin chu i duhawm zual.. I biang taitêk kha ka piai chak" a beng bulah a rawn ti sup a. 

"I zak lo si" a lo ti hmuk. Mahse, a mitmengah huatna a lang lo va, Sangpuia chuan a ngai haw lem lo. Lunch ei dawnah chuan an kal khawm a. An tiffin theuh chu phawrhin daihlim hnuaiah chuan an ei ta hlawm a. Sangpuia lah chu an bulah a tâp ve tlat si. Nauteii chawhmeh pai te chu a eipui ve zuk zuk a, "Hei ka siam a nih hi" tiin eng hnah emawni kan ro rep hi a rawn suah a. Nauteii chuan tui a ti ru hle. Eng nge a nih a zawt ngam chiah si lo. 

Miss Feli pawh a hawi valh valh mai. A inla chhe lo leh kher mai bawk a. Sangpuia awm vangin a insum ve deuh nge a nui hmel te pawh an hmuh ve kha. Nauteii te nena an awmho laiin a rawn kal a, "Sir, Khutah ka thiante inah min zu kalpui lawk ta che.. " a rawn ti a.. 

"Nangmaha kal i hreh viau em? " Sangpuia'n a tih rual chuan Nauteii'n hmuh phak si loh hian a banrek a sik vawt vawt a. A na reuh zèk.. "Aw.. Nia kal ila" a ti ta nge nge a. Nauteii a venthawn vang a ni. Feli chu rawn hawiletin rum elkhen zet hian Nauteii chu a rawn melh lehnghal. Ani nena buaina neih hi a duh hauh lo. An zirtirtu a la ni tlat! 

Sangpuia nen a thiante in an zu thleng chu thingpui an lo in mek a. An ri hlut mai. Sangpuia chu a hmelhriattir a. Awmze nei zeta a meng kual vel chu Sangpuia chuan a ei vak lo. He nu hian a lo ngaizawng ru ve reng zawk em mawni dawn ni. A hmeichhe duhzawng a nih loh mai bakah Nauteii bak a thinlungah an leng tawh rih lo. Ning ru zet chuan a thu ve ta reng a. A phone la chhuakin, "Ka ning tawh e. Ka rawn chho chak tawh" naupangchhia zet hian a han ti a. 

Nauteii pawn, "Keini pawh kan thu mai mai. Haw daih ka duh tawh. " a rawn ti ve. Sangpuia tel lo chuan a lo nuam famkim vak bik lo a niang e. Hemi nia an inzui chhung reilote atang khan an inkarah inpawhna tha zawk a thleng ve tih erawh hai rual a ni lo e. 

Pu Mawia result kha Lawmsanga'n a va lamsak a, an inentir khan damdawi a chawh bakah test neih ve hrim hrim tha a tih vangin test neuh neuh an nei a. Tlaiah result an lam nghal a. A tuka Doctor an va hmuh leh chuan Biopsy la turin an lo ti a. Ngaihthat lohna pawh nei lem loin a va la kha a nia. Lawmsanga pawh chuan enghelh lem lo vin result chu a va ngaihven a. Biopsy te chu an la fo a, hei chu thil nih dan phung ve reng a ni tih a hria. 

Darkar chanve hnua Doctor room atanga a rawn chhuak erawh a hmel a thim mâk mai. A mitmeng dul ruih leh muk tak atang chuan a pa result chuan a deng tih a lang. A hawn kawngah te chuan Nguri a be hmasa phawt dawn nge dawn lo tihah a inngaihtuah buai a. Engpawhnise va biak phawt chu tha a tih vangin a call ta nge nge a. 

"Ngur, Ka pa chu a pumpui a lo cancer alawm le.. " a ti dat a. A ngawi leh daih. Nguri thaw hak ri a hre pha.. 

"A va mak dawn ve aw.. Engpawhnise, lo haw phawt la.. Zanriah eikhamah ka pa te pawh kan hrilh dawn nia. Ka ni te ho ka lo hrilh ve dawn nia" a rawn ti dam dap a. 

A pa hi a ngaisang a, a zah bawk. Pa a zawnga pa nih tling leh patling tak a ni a, a fate mai bakah a chhung leh khat a farnu leh a unaupa te thlenga kilkawitu a ni. Inpui chu tu tan pawha zalenna hmun a ni a, chuangkai leh mamawh rawn lam an indawt zut thin reng a ni. Chutia a pain tihdam theih loh natna a neih tak siah chuan kalsan hun a la nei ngei dawn a, a pa tel lo va a chhungkaw uap chu patlin a ngai hle dawnin a hria. Hui pap chungin in lam chu a pan leh ta phawt a. 

Hetih mek lai hian Pu Mawia te nupain Saii pawh an va ko ve a, ani haw chaka za ruai reng tawh chuan chapona a lo nei lo nasa mai. An in chu nuam a ti tehchiam lo a ni. Inpui lamah Muanpuia te pafa an la khawsak avangin inpui lamah an inhruai ta phawt a. Nguri'n rawng a lo bawl mek a, A pute in thlen rual deuhthawin Nauteii pawn in a thleng ve chiah. Mapuia erawh a roomah a tawm daih thung. Saii chu mikhual ang deuhah a inngai nge, a zum ve dûk a. A fanu erawh Lawmsanga ni faten an awm rih thung. Nguri chuan a lo be siam siam a, an pa pawh a rawn thleng ve mai. A hmel ngui nghiai chu tuman an chik lem lo nge zawhna an nei lem lo. Muanpuia a lo thleng a, Saii a hmuh chuan a meng rum deuh a. A thu la loa va ko an ni bawk nen. Mahse, Pu Mawia'n, " Nupa in ni tawh a. Karah fa in nei tawh bawk a, hetia inmihran kual reng hi a tha lo e.. Inngeih takin awm tawh rawh u.. saii pawh nupui i nih angin nung la, in pa zah thiam la; Mama pawh zaidam te pawh i zir ve a ngai ang. In lamah an nufa chauhin an awm a, an khua te pawh a har ve thei.. Tlema in insiam rem ve ve a ngai a ni" a tih tak dap dapah chuan engmah an sawi zui lo. Zanriah an ei zui nghal a. 

Eikhamah Lawmsanga ni te leh an pasal te bakah an papuia te nupa pawh an rawn leng a. Saii lo hawn vangah mi dang chuan an ngai anih hmel. Mahse, Nguri'n engkim a lo hrilh tawh vang a ni. An thutkhawm kim hnuah Lawmsanga chuan, a pa result chu a sawi ta a. Naupang erawh an awm lo thung. Pu Mawia erawh a danglam lem miah lo; a chhan chu Lawmsanga rawn haw kha a ngui tih a hre tlat a, Zanriah ei khama an ni te ho rawn len luh danah a result vang a ni ang tih a ring thiam mai a niawm e. 

"Aa.. Pathian remruat hi chu keini dal zawh rual a ni hleinem. Ka la tha a, treatment te kan la chho ang a; eng em ka ni lo vang" a ti chuar chuar a. A chhungkua a hnem thiam kher mai. Pi Lawmi erawh a lungchhe deuh tih hai rual a ni lo. Nguri tak pawh a ngui khawp mai. Muanpuia'n a hrethiam lo ber zawk. Tawng pawh a tawng thei meuh lo a ni. Ni e, mihringte hi chhel viau thin mah ila; natna rapthlak anga kan ngaih ten kan chhungkua min han luhchilh meuh chuan pachan hi a lo har ve thin bawk a ni. Amah Pu Mawia a hahdam em zawk a, amah hnema thlamuan tumtu te a hnem khalh ta vek zawk a. Lehlamah chuan a vanneihthlak zawk viau. 

Nauteii'n a pu natna a hriat ve chuan, "Nu, apu chu engtikah nge a thih ang? " a ti ta chiah reng a. A tawngkam thiam loh lutuk vang a ni tih an hrethiam. 

"Ka naute, pasal i neih thleng ka dam dawn.. Ka thihsan phal lo che" a pu chuan a lo ti vat. Nauteii erawh a men par a, a tah a chhuak takzet. An inputu ve èm bawk a ni. Mapuia erawh mipa a ni bawk a, a pachang thei viau. A rilru erawh a kalthui ve khawp mai. 

"Mapuia nen khan hmanni khan khaw nge in kal? " Sangzuala msg chu nui rah rah chungin Sasa chuan a chhiar a. 

"Lalsavunga park-ah kan va fawr a" a ti hmiah. 

"I cousin nen chuan i tihpui ta mi? " a la rawn ti deuh deuh. 

"Aih" tih chiah a sawi. A tuka Mapuia an classroom-a a va luh rual rualin Sangzuala chuan, "Lalsavunga parkah khan eng nge in va tih a? " a lo ti nghal tâwng a. 

"Kan va leng ve" a lo ti mai. 

"A cousin nen chuan in ni ta mi? " a ti leh hram a. Chiang kelkawla Sangzuala melhin, "Amah Sasa nen hian kan inngaizawng alawm" a ti thawp sup. Sangzuala mengphar vel chu a enliam hmiah. 

Mi chut, mawl leh huih deuh hleka a ngaihin a sava bu bual a hup khalh chu Sangzuala chuan a la na ngang ngang hle. Han tih vak dan a hre bawk si lo. Sasa mizia chu mak a ti ta kher mai. A lo bawl kual vel mai mai chu a nia, phuba lak ve ngei a tum ran mai. 

College khata lut ni bawk, inngaihzawn bawk chuan remchang apiangah an inkai ve det det zel a. An insan hleih viau naa, an inhmeh ru zêk. A pu natna te chu a hrilh ve a. A nu thih thu leh a nu chungchang erawh a thiante takngial pawh a hrilh lo. A chhan a hre bik lo. Tunah rih chuan Sasa vang hian a la hlim a, a bula awm a thlahlel tial tial bawk. Sasa cousin, Serchhip ami te unaua in luah an awm a. Chumi te inah chuan an inhmu thin. Infawh na nâ na chu an zei tawh viau. Ni khat chawhnu lama an inhmu chu engin nge mawlh tehreng ni, Mapuia chu a duhthawh ta hrat a. Sasa thaw pawh a rangin a mitmeng pawh a phelh ve phang tawh mai. Sasa nghawng var hai leh a hnute mum nalh tak a han nawka a han fawh kual vel chuan mipa a nihna a rawn pholang ti mai ang. Ni danga a insum theih thin tehlul nen.. 

"Sasa, ka thei lo.. Ka.. Ti mai dawn" a ti tham ţuak a. Sasa erawh a ngawi tawp. A hnar bik lo tih Mapuia chuan a hrethiam lo zawk nge mawni. A ngawih reng takah chuan a hnial lo a ni ang tih a ring thiam ve ta nge, a chhunzawm ta a. Mipa fa nge nge zirtir an lo ngai bik lo. Chumini chuan virgin ve ve chu inngaihna sualah an tlu lut dun ta a ni. An han zo chu an inchhir ve ve naa, a tlai tawh si. Mahse, an virgin ve ve avang chuan an inngainatna leh induhna erawh a pung sawt thung. 

Saii te nupa pawh an in luah lamah an phei leh tawh a. A zia pawh a dang ve sawt viau e. Hetih mek lai hian buaina chhum dum inmûng mek a rawn lang ţan ta tlat. Chu buaina chuan Lawmsanga te nupa a rawn pan ding ngut ngut lehnghal. Nupa hlim leh awhawm, infiama thian ang chiaha inkawm thei, infuih a ngaih pawha innawrkala intuamdam tawn thin te hi setana pawn a thik deuh a niang e. Lawmsanga chuan buaina tenau lo tak a tawk ta tlat mai. Sawi tawh angin a la upa lem lo va, driver zingah erawh a senior pawl a ni tawh thung. Nguri hi chuan khalh tawh lo se awm ve mai mai tawh se a duh reng laiin amah Lawmsanga hian a hna thawh ţhan han bansan chu a duh bau si lo va. Mahni motor khalh a ni bawk a, awm mai mai ai chuan a thlanawm zawk ve bawk a ni. Hetia nupui fanau neia a patlin ve viau tak hnuah pawh hian hmeichhe thenkhat zahpah nei lem lo a phurh chang chuan meinei leh awmze nei taka han bekbawrtu hi a tawng awl lo va,pa anih hnu hian a luck sawt zawk emaw tih mai tur a ni. 

Thawhlehni zing a ni a, khuma a la mut laiin a thianpa driver ve tho, Hminga'n a rawn call a. "Thianpa, hei kan nu nuteii te dam lo buaipui an ngai tlat mai a. Vawiin hi kha Sarahi bungrua va lakpui hun kha a ni sia. Pasenger hlun a ni sia, han thulhsan ngawt ka hreh sia, nang lo tlawmngai mai teh a. A bulah ka sawi tho a, nangmah i nih chuan a pawi a ti lo va. A fimkhur ve a" a rawn ti a. 

Harh chiang mang hlei lo chuan a lo e aw liam ve mai a. Dar 1-ah Sarah chu Thenzawlah va hruai tur a nih awm chu. Sarah hi Hminga passenger hlun a nih ang khan a lo hre ve nel nual tawh a, kawm tak erawh an la inkawm tam lo. Nuthlawi a ni tih chu a hria, sumdawng a ni a, . Mahse, a bungraw zawrh te erawh han hausakpui thur thur tur chi ni chuan a lang lem lo,chutihrualin a neih hmel riau thung. Chawhma chhung a service phawt a. Lawmsanga phurh nawmna chu a passenger zai a ngai thiam a, an titi duhzawng te a sawipui ve thei zel a. Kum lama upa deuha a hriat te fare a laksak ngai lo bawk. Tin, Eng mi pawh nise, a motora rawn chatthla lut titih khawpa mi ţâwng pawh nise, a hmusitin a vin ngai lo. An duhna hmunah a drop thlap thlap thin. Vawi khat phei chu a phurh nu kha nula naupangte a ni a, a thianten an chhuksak vek tawh si, an in a sawina hmun an thlen chuan a rui lutuk kal tha thei tawh lo chu a paw hmiah mai a ni. Chuvang chuan mi hriatrei pawh a hlawh a, an hmang nawn fo reng bawk. 

Sarah zawkin a rawn bia a, an inbiak zawhah a va lam a, Thenzawl lam chu an pan ta vang vang mai. 

"Khalh chak lutuk lo mai rawh. A theih chuan thim hnua hawn ka duh mah zawk" Sarah chuan a ti a. Nu lian lam, hnute lian ve tak, samkir, meng dur ham mai leh hmui sen ham reng mai a ni a. Mahse, a lan dan atanga teha a nasa ngawt ang tih rinngawt tur a ni hran lo. Mahni lu zo ve tak, a chhungte pawh chawm mek a ni ve a. A duh lohna lamah chuan a rapthlak ve tho chuan a rinawm. 

"Kan thim dawn chuan kan nu kan be lawk ange" Lawmsanga chuan a ti a. Khaw thim thleng hian a service ngai mang lo. A laklawh fe a nih loh chuan. Nguri hian a remti tehchiam lo bawk a. Zanriah ei hmanin a haw ngei ngei thin. An nu chu a be ta ngei a, Hminga avang zawkin a lo hrethiam ve mai. Hminga nen hian inzura ve tak, ani pawh nupui fanau nei duah tawh a ni a. Nguri nen pawh an inhre tha ve viau a ni. 

Tape te playin an tlan zel a. Sarah pawh a muthlu duar duar mai. Thenzawl an thlen meuh chuan a tlai ve rawih tawh mai. A khaw pawnah an la tlan zel ang lawi a. Thlam angreng deuh, a bula dil lian lem lo awmnaah dingin an va lut a. Nupa ni mai awm hi inthlahdah zetin an lo mu duai a. Sarah chuan, "Puia, kha Ar va lei la.. Chhum hang ang u. Hetah chaw kan ei ang.. " a ti nghal zat. A thu hmel viau. Ihe loin Puia chu a kal nghal a. In chhung chu a tlabal angreng viau naa a fai ve tho mai. 

"Lawmsang, hei hi Chhini a nih hi.. Ka bungrua hi tihian him takin min lo kawlsak thin a" tih pahin Sarah chu a nui deuh a. 

Puia chuan arpui tuilai ngei mai a rawn lei haw a, Buh zu fun hnih lai a rawn paipawn haw bawk. An nupain ei rawng an bawl nghal vat vat a. Sarah erawh thutthleng seiah phone khawih pahin a mu duai thung. Lawmsanga tihtur hre lo pawh chuan phone a khawih ve ringawt. An nupa chu puih a duh viau naa, an siam dan te a lo inang lo thei tiin a pui duh ta bik lo a ni. Zanriah chu dar 7 rik hma deuhin an peih hram. Ei hmain buh zu paw phât mai chu an lem ta khalh khalh a. Sarah pawn Lawmsanga chu a pe ve, ani buhzu ngei mai in khât ta chu no khat lek tiin a lo in ve mai a. A tha hle aniang, a hai chhawlh nghal nia! Sarah erawh a dose a sang zek. Lawmsanga erawh chuan a in belh tawh lo. Chaw an ei zui a, an eitui phian. Zanriah ei khamah a tlai zel bawk nen, hawn lam an tintuah ta nghal a. Lawmsanga awm ve reng lai chuan Chhini chuan sarang dum lian angreng tak hi a rawn pawm chhuak a, Sarah chuan a bag zenin pawisa note clip chhah fahran a lo pe bawk. Lawmsanga ngaih a tha ta mang lo. Bungrua a tih chu chu sarang chu a ni ngei ang a, eng tak ni ang maw.. A leina pawisa lah kha a tam riau bawk si. A rilruah thil pakhat a rawn lang nghal. No 4 a nih a ring. Sarang erawh chu phelh tawh loin taxi back seat-ah an dah a. An tlan chhuak zui ta nghal. Sarah chu a la kai viau aniang, a tawng duh barh barh hle. 

"Hminga'n a hrilh tawh tho che ang a. Mi dang bulah chuan sawi suh aw. Hei vang hi a nia zan tlan ka duh" a ti sar sar a. 

"No 4 tiraw? " Lawmsanga chuan a lo ti a. 

"Umm.. Ka vawi thumna tur a nih hi.. Keini ang hnathawh tur nei lo tan chuan kawng dang a awm lo a ni" a lo ti a. 

"A zia lo hle mai. No. 4 kan phur dawn tih chu hria ila ka kal hauh lo vang mawle" a ti nghut. Sarah erawh chuan lung loah lak tum loin, "Nia, kei pawn pawi ka ti.. Mahse, I rintlak ber ka rin vang a nia.. " a lo ti a. 

"Tun hi a tawp nan hmang la, Pathian zarah eizawnna te chu taimak phawt chuan a awm ve zel asin" a lo ti khawmawi ve a. Mahse, a sim a ring lem lo. A hlawk dawn tih a chiang ve tlat. Thenzawl khaw chhung an pelh hmain an ding leh zuai a, in pakhatah Sarah chu va lutin buh zu bawk a rawn pawm phei. Dispo cup te lei lehin an tlan zui leh ta a. A tlan chak tawh angreng. Motor veivak an tam lo bawk a. Rei deuh thang kha a duh chiah lo a ni. Mahse, a passenger ber chuan zu in a duh leh tlat mai si. A dinpui leh rih a. Ani pawn no khat chu a inpui ve leh hram. Sarah chu duh aiin a kai deuh tawh chu a ni. An tlan tan tur motor a start leh tur chiah chu a rawn kuah ta thuak thuak mai a. 

"Mutthilh tum rawh" a lo ti ngial. 

"Enteh, in nu hrilh lo la, ka hmuh hmasak ber atang che khan pa hi ka ti tawp che a maw.. Hminga hi i chanchin ka zawt fo, ani pawn ka awmdan atangin a hrethiam tawh ang ka ring.. Ka rilru ka sawi ve mai mai anih chu.. Nangni ang te chuan min duh dawn chuang lo va… " a ti hawr hawr a. Ngawi run chungin motor tihnun a tum leh chu a rawn hup leh chaih. 

"I hmanhmawh em mai… hire tur che ka nia, ka thu te chu ngaichang ve bawk la.. Mawh. Tihteh" tih pahin a rawn bawh thuak a, Lawmsanga hmui chu a nul thuak hman. A hawisawn vat. Nguri a mitthlah a lang nghal. 

"Ni lo.. Nupui ka nei tawh. Pangngai takin awm rawh. Khawngaihin" a ti chang bawng a. 

"Hmm.. I pa thei na nge? I hmaah saruak leh inhawngsain ka awm a.. Tikhan i la thu tung ùt thei a maw? Hei vang hi aniang in nu hmasa pawh kha a uire ni" Sarah chuan a ti ta a. Lawmsanga a za zak. Mahse, hmeichhe chunga kut lek a hreh em a, ngawiah a tlak tawp. 

Tibuai chhen mah se, a tinung a, a tlan hmiah. Thinrimna rilru pu nen a khalh bawk a. A tlan muang lem lo viau. Sarah chu a áng zui hlak hlak a. Eng nge a sawi pawh a hre hrep lo ve. An hmaa motor pahnih ding a hmuh chuan a ngaihtuahna ding tak atangin a harh ta zawk a. Mi pali nga vel lo awm bawk nen, Khaw chhung an la lut chiah lo naa.. Falkawn an hnaih thuak tawh tih a hre thei. Chung lo tidingtu te chu Falkawn khua an ni maithei. A hmuh dan chuan motor an check niin a hria. Sarah chatthla pawh a rawn harh tawh a. A inang chatthla zui ta kha a nia. Lawmsanga a lawm ru hle. 

Duty an lo ni ngei e. Sarahin a va hmuh rual chuan a meng nghal kâwk mai a, a rui chu a harh chiang ta hle niin a lang. Lawmsanga rin loh leh beisei phak miah loin a che ta tlat! 

Motor atanga chhukin ţap chung hian, "Pu te u, ka va lawm em.. Min pui mawlh teh u.. Saw ramhuaipa sawn min hrengbet rei tawh lutuk.. Khawngaihin min chhan hram ru" a ti ta mai! Lawmsanga chu a hawi á hau mai! 

Duty ho pawh an rawn lang ve nghal zat a. Lawmsanga pawh a chhuk ve nghal. Motor chu an dap ta a. Sarang chu hmuh loh thein hek loh, an man chu a ni ta der mai. Sarah erawh chuan lem a la chang ngat ngat. A tap chawl lo va, eng laiin nge a kawr ban dinglam te chu a lo pawhthler ni.. Duty zinga upa chan chang ber chuan thil awmzia sawi tura a tih chuan, "He pa hi Lawmsanga a ni a. A thianpa Hminga hi ka hmang regu thin. Vawiinah Hminga a kal theih loh vangin Thenzawlah ka bungraw zawrh tur a lo thleng tawh si a, Hminga chuan a thianpa a nih vangin a ring a, min biaksak ta a. Kan kal ta a. Mahse, tum dang a lo nei ru reng a. Kha damdawi kha Thenzawl daiah kan va la phawt a. Ka rin phak bak a ni. Driver ni chungin No4 a lo zuar reng mai a lo nia! Chutiang ka hmuh chuan ka lawm ta lo va. Ka report dawn che tiin ka vau a, mahse, t min hnawh lut lui a, min vau ta hrep zawk a ni. Ka bungrua pawh mi dang nen kan inbiak a hlauh vangin la ta lo chuan min rawn hawnpui leh a. Kawnglakah zu min in luihtirin min sual zui ta bawk! A sulhnu an chhui hlauin condom a hmang bawk.. Kei zu kha ka hneh si lo va, ka hneh mawlh lo a ni. In lo awm hi ka va lawm em.. " tiin. A hmel an han en thin, a thusawi chu rin harsa an ti ve tho tih an hmelah a lang reng mai. Lawmsanga hmel tak ran leh tawng mawh zet an han en leh a, chutiang mipa a nih theihna tur a váng an ti bawk si. An buai map map hle. 

"A nih chuan hei damdawi kan man bawk a. Kumpuan thutiam bawhzuiin tun hnaia no4 hluar lutuk kan lo do a, Thenzawl lamah la thin an awm tih kan hria a, kan lo chang ve tawp a ni. Kan chang fuh khawp mai. Engpawhnise, Police kuta in luh chu a ngai dawn a" an ti ta a. 

Sarah lah chuan, "Chu chu ka duhthusam a ni e. Dama ka chhuak anih chuan pawngsual ka nihna anga report thehluh hi ka tum hrim hrim a ni" a lo ti hmarh hmarh a. 

Lawmsanga chuan, "Aw le, pute u, a lawmawm e. In tih apiang ka pawm mai e. Thudik te chu a lang leh zel alawm. Mahse, ka nupui fanaute kan be ve lawk ang e aw" tih leh phone phawrh a rual nghal a. Falkawn lamin Police an be nghal bawk. 

Nguri bulah thil thlen dan dik tak chu a sawi fai ta kelh a. Nguri erawh a mangang lo thei lo. A pa a be bawk a. Lo chiâi lo turin a chah. A zâm lo, a chhan chu dawta puh a ni miau a. Mahse, hmeichhe humhalhna a nasat tawh avangin Sarah chu a ţan ve tlat chuan criminal a nih ve theihna lai a awm dawn a. Chu erawh chuan a lung a tizìng deuh. Damdawi chungchangah phei chuan a lungngai lo nasa.. Finfiah harsa ni hek lo le.. Sarah erawh a buai ru viau, a thil tihdan maksak zet kha kawng dang a neih loh vangah a ngai tawp. Damdawi kha an man ngei dawn a, A hma lawka lo hnar fithla thaktu Lawmsanga chunga phuba lakna ni pahfawmin khatiang khan a chin ţhan fo dawt thu chu a tlangaupui ta a nih kha..a fin kherekzia chu a phone atangin fiahna an la chhui thei dawna a hriat avangin an hmuh loh laiin a phone chu kawng thlangah a thehthla hmiah. A switch off hmak bawk. Tikha chuan sulhnu nei lo angah a inngai. Nakinah news-ah an chungchang an rawn chhuah ngei ang a, Puia te nupa pawn an hmu ngei ang. An lo bibo zui ve tawh mai dawn a ni. 

Police an rawn thleng a. Lawmsanga chu an hruai ta. Sarah pawh a statement lak a ngaih vangin an hruai tel tho. Tette atanga mi tha tak tia sawi theih ni lo mah se, Police hmaah hian vawikhatmah insawifiah ngaiin a la khawsa ngai lo. Nguri an kidnap tuma Police a thawhpui tih chauh lo kha chu an ni nen inthlunzawmna an nei ngai hek lo. A u Police a ni a, a chungchang a hriat hunah a awm mai mai dawn lo tih a hria. Sarah fin kherek dan chuan a nuih a tiza lek lek hial a ni. Mahse, a lo mutpui lo kha a lawm takzet.. Lo mutpui se, medical an test hunah a chi an hmu ngei awm si a. 

A rilruin, "Lawmsang, i titha e.. Buaina i nei khât tawh bawk a. Han rik rap rap te hi a nawm chang a atwm ve alawm" a inti a. Mahse, pawngsualtu anga mi ten an hre tur erawh thudik hailan a nih hmaa a chhungte zak leh mualpho tur chu hrehawm a ti em em thung. Nguri chu nu fing fel leh zahawm tak a ni a. A chhel bawk a, huaisen takin a hmachhawn thei ang tih a ring. A ringtawk bawk a. Mahse, Mapuia leh Nauteii a ngaihtuah lo thei lo. Nauteii mawlh kha.. A pa ngaisang em emtu kha.. Mi ten, "I pa chuan chumi chu a pawngsual' tia a hmaia an kawh hunah engtin nge a hmachhawn ang?! Chung thil a ngaihtuahna erawh chuan a tina zawk zawk mai. 

Nguri te lam pawh buai tak an ni. Muanpuia an va hrilh nghal a. A thinrim kher mai. Pu Mawia te nupa erawh an tihdan ang bawkin an tawngtai leh nghal a. An colony pum chu an chiâi a ni ber. Lawmsanga chu an ring lo ni loin, engtin nge chu thil chu an chinfel ang tihah an buai zawk a ni. Nauteii'n a lo hre ve lo thei lo va, a û bulah, "Ù, dawt tiraw? " a ti ţham ţiak a. 

Mapuia chuan pa takin, "Dawt chiang bang a ni e. Ka pa hian hetiang thil a ti thei lo." a lo ti hriam hraih a. Ani pawh a papuia ang bawkin a thinrim ve a ni. 

Nauteii erawh a mangang, hmeichhia tih takah a chiâi lo thei lo a ni. A ţawngţai ta ringawt a. 

"Aw Lalpa, Apa hi chhanchhuak ang che. Kha nu dâwta puhtunu khan thudik a puan theih nan hnathawk rawh aw.. " tiin. 

A tuka Zoram khawvelin Lawmsanga an hriat dan chu a va ropui lo tak êm.. News a chhiar zawh rualin Nguri chu khumah a bawk thlawp.. Mittui kar atanga meng sen râm chungin, "Lawmsang, Nguri ka la dam e. I nupui hian ka theihtawp ka chhuah ang.. " a ti vawt raih a. Tunah tak hian Sarah chu a bulah awm se; ui thi sawn hnuh taka hnuh kual a chák a ni. Mahse, chu chu tuna chet lak dan tur a ni lo tih a hai lo. 

Muanpuia kutah an innghat ta ţhap mai. 

"Ee.. Ka pa, mangang suh u. Ka nau hian hetiang thil hi a ti dawn reng reng lo. A u ka la awm ve alawm.. Theihtawp ka chhuah ang.. Amah ka va hmu phawt ange.. Chanchin ka rawn hrilh ang che u" tumruh zeta tiin a chhuak ta a. 

"Apapui, apa chu min lo biak rawh aw. Ka ngai lutuk tih lo hrilh la" Nauteii'n a ti lang lang. Nguri'n a mittui a khap per sawk. Zan khat lek inah a pa a awm lo va, a lo ngai hman der a nih chu.. 

"Tehlul mai.. Ka naute.. Apa nen in inhmu leh vat ang" tiin Muanpuia chuan a kut a vai lap lap a.. A motorah lutin a nau hmu tur chuan a tlan liam ta a. 

(Buai hi a na ve thin sia e.)