Thutiam- 3

THUTIAM (S2) - 3

Ziaktu: Toni Râlte

VANROPUIA.. 

A msg dawn chu a melh vang vang a, "Hello.. " tih te mai zawng a ni. A lo thawntu Dp a en chuan a khi suk. He nu hi a hria. Sangzuala bialnu kha a ni chiang. Canteen-a a au pui lung lung kha a ni. Reply a tum hran lo. A nau nen ML an khel a, lehkha zir zawhah mut hma si hian an khel dun thin. A nau aiin a noob zawk ziah lehnghal. An khel zawhah an mu nghal a. A phone a han en leh chuan, kha nu bawk khan, "Induh ve" a rawn ti leh. 

"Chutia mi? " a va ti ve ta nge nge a. 

Hmeichhe betu a nei ve zeuh zeuh, a tu amah a chhang ngai lem lo. A hmelhriat leh a thiante bak lo chu a be ve mang lo, tin, whatsapp hi information atan bak a hmang meuh lo tihtheih a ni. Movie a en loh paw'n You tube lamah a video duhzawng a en mai zel. 

"Umm, biak i har tawp" a rawn ti leh a. 

"Ka har loh hi" 

"I har alawm le aw" a tê reuh bawk a, a thinchhiat hmel a ti. 

"Ti nge min lo biak a? " a va ti ta tâwng a. 

"Hmeichhiain mipa an biak hmasak hian eng nge a chhan ni thei awma i hriat? " a rawn ti a. 

A bo leh hû! A nau la muhil lo chu kovin, "Mipa tu emaw va be hmasa ta la; engvang nge? " a ti a. Nauteii lah chuan ngaihtuah chiang mang hlei lo hian, "Duh vang nih loh pawn ngei vang aniang" a lo ti si. 

"Min duh emaw min ngei aniang" a va ti ta ringawt. Smiley nui uar uar lai a rawn dah tuar a. 

"I va kaw lo tak" a rawn ti bawk. Mapuia pawh a khi ve suk. He nu hian a duh aniang tih ngaihdan a nei nghal. Mahse, vanduaithlak takin hetianga mipa ngam lutuk hmeichhia hi a ngaina lo va, a duhzawng an ni hek lo. 

"Nih chuan ka mu dawn a. Muttui" tih pahin a dah nghal daih. A rilruah kha nu khan hmun a chang zui tawh lo. A tuk class a kal an room a lut chu Sangzuala'n, "Thianpa star tu te che ka hria nia aw" a lo tih chuan, mak a ti viau. Sangzuala sawi chu nizana rawn betu kha a nih a ring si, a nih chuan Sangzuala nen an ni khan a hre bawk sia. A bangbo hle.

"Tu" a ti hû a. 

"Dawr a nei, restaurant.. I chawl fo.. Ta tang chuan a lo star che" a ti ta daih a. Mapuia a nui hawk. Kha hmeichhe te takte kha a ni lo tih a hriatnain a tihnual deuh erawh mak a inti! 

"Ka hre lo chutiang" a ti a. An sawi zawm tawh lo. 

Lunch break -ah Canteenah bawk an chhuk leh a. Engvanga kha nu kha zawng ru deuh ringawt nge maw a nih le.. A inthiam lo ve ringawt lehnghal. A phone a hmet a, whatsapp a hawn chuan, "Hmalamah lo hawi teh" a rawn ti. A hawi nghal hmiah. A hma zawn tak, hnunglam sia amah rawn melh kiautu chu a va hmu ta. A lai em em zui.. A hawi chhuak ngam ta mang lo. Chunu chu zak thei lo a ti a, Junior lehnghal si, chutia a awm vel chu nasa a ti ru reng. Mahse, chu hmeichhiain a star tih a hriatna chuan a awm a tinuam tlat lawi a! Awmdan tur pawh a hrethiam teh nuai lo. 

Bana bike a la chhuak tur chu scooty a la chhuak tur a va nangchin lehnghal. A zak takzet a ni. A rawn nuih ver ver a, a nuih let ve naa, a â huih mai. 

"I haw nghal dawn mi? " a rawn ti a. A aw lah chu a mawi zèk. 

"Aw.. " a ti hmuk ringawt. Bike chu nawr chhuakin a tlan nghal vang vang. 

Tlaiah zanriah an ei hma deuh siin a pa chu a thianpa Mapuia nuin a lo call a, Mapuia hian nupui fanau neiin in hrang a chang ve tawh a ni. Inkawm nan hun an nei vak tawh lo naa, an la inlenpawh zeuh zeuh. Mapuia nu chuan, Mapuia nikhaw hre lo va a tluk thut thu te rawn sawiin, damdawiinah an phurh phei chiah thu a rawn sawi a. Lawmsanga a ţhawng kher mai. Nguri te pawh a hrilh ve nghal a, apa thianpa a ni bawk a. Pa Mapuia chu an ngainain chutia a awm ta thut chu mak an ti kher mai. 

Lawmsanga'n, "Bawiha, chaw ei vat vat ila, kan pahnihin i han kal mai ang.. " a ti sawk sawk a. Chaw eiin an ei kham veleh Motorin an tlan liam pafa ta nghal a. Damdawiin an va thlen chuan Mapuia chhungte bakah a then leh rualte an lo awm nual a. An nuin Lawmsanga a hmuh rual chuan a ţap nghal hawk. A sawi danin zanriah a ei kham a kam va thuah kha, 'Ka lu a hai hle mai' a ti hman awrh a. A tlu nghal deuh mai a niawm e. Stroke a nih ngei a rinawm. Mapuia pawh kil khatah a lo ding ngawi ve reng a. A pa te erawh ICU zawnah an ding thung. Chutia a din ngawih reng lai chuan, "Ehe! " tih ri chuan a ngaihtuahna a rawn tiharh nghal zawk. A hmazawna rawn ding, hmeichhe te taktè chu a melh run ringawt. 

"Eng nge i tih? " Sasa chuan mak ti deuh takin a ti a. 

"Ih, ka pa thianpa a awm a. Ka kal ve" a ti ve mai a. 

"Tu nge chu chu? " a va dilchhut tak. 

"Pa Mapuia.. " a ti leh hmuk. 

"U Mapuia saw i pa thianpa law.. Ehe! A va'n mak.. Tu saw nge i pa chu? " Sasa chuan a ti vat a. 

A pa a kawk zauh a, "Pa Mapuia chu i hre ve zawk mi? " a ti ve a. 

"Apatea fapa a nia" a lo ti a. 

"Nih chu" tih bak han sawi tur tehchiam a hre tawh lo. Sasa lah chu a bulah a ding ve tlat bawk si. Rei fe an din hnuah, "Ke a kham duh e, hawh coffee zuk in ang" Sasa chuan a ti ta a. A lo remti viau. Din reng kha a ning ru tawh viau a ni. A pa bulah a va sawi zauh a, an chhuk thla nghal. Damdawiin tuala thutthlengah chuan thuin coffee chu an in pah a. 

"Sangzuala nen khan in nihna a rei tawh em? " sawi tur a hriat loh em vanga sawi a ni. 

Sasa chu a nui hak a. "Kan ni awzawng lo" a ti a. Mapuia chuan, "I hming pawh ka la hre lo" a lo ti leh daih. Sasa chuan a hrilh a, "Sangzuala hnen atangin i number ka nei zawk alawm" a ti zui zat. 

"Ngati nge? A pek ringawt che" a la ti kawkalh. Sasa a nui hak hak ringawt. Dar 11 a ri hnai tawh a, pawn lam boruak pawh a reh ţan viau. 

"Naktuk class i kal dawn em? " Mapuia chuan a ti a. 

"Kal ka ring lo. Kan tlaivar hmel sia.. " a lo ti a. 

"Umm.. " a ti leh tawp. Ni e, hmeichhe tana a boring dan tur zia chu. Mahse, Biakhmingsangi tan chuan a ninawm ve loha a zia chu a lawm em em zawk. 

"Nang pawh kal lo mai la" a ti a. 

"Engvang chuan? " a lo ti hmuk. 

"Ka kal dawn si lo va, hmeichhe dang i lo hmu palh ang" lehlam hawia lei chhuah zuk pahin Sasa chuan a ti a. Mapuia lah chuan, "I nasa sia" a lo ti! 

"Ka hria" a lo ti ve hmak. Mak takin chu hmeichhia chu mil loh rukna nei mah se; a bula awm nuam a ti. Hmeichhia tumahin khatiangin an ngam sarh ngai lo. Polite takin an bia a, a then phei chuan an hlau emaw tihtur khawpin an tlawn deuh hial thin

. mahse, Sasa chu a ni ve lo. A ngam sãrh a, a zia a hloh miah lo tih a chiang. 

"Lut tawh ila, a vawt tan" Sasa chuan a ti a. 

An inzui lut leh ta hnak hnak a. Pa Mapuia chu rin aiin a lo serious riau a, Lawmsanga tan chuan hawnsan chi ngawt a ni lo. A fapa bulah, "Lo zuk hawng mai ta che. Thuthar a awm leh ka rawn hrilh mai ang che. Naktuk class kal i ngai sia" a ti a. Mapuia pawh chuan a pawm mai. A hawn dawn chuan, "Ka hawnsan mai ang che u. Ka lo tawngtaipui ve ang.. Shawl tal i bat lo va, a vawt sia.. I hritlang ang e" Tiin Sasa bulah a ti ve duah. An inthlah liam, Amaha an in a pan chu a ruak huai hian a hria. Kha nu bulah kha chuan a insanmar tung a ngai ve lo va, a awm ang angin a awm tawp a. A hahdamthlak a ti.. 

Ni 2 lai Sasa chuan class a rawn kal lo. Mapuia te chhung lam an parual deuh nen, ani nula fel leh mawngzang ta na nâ na chuan a pui deuh chawt mai a lo nia. Chu ni 2 chhung leka Mapuia khawhar rukzia a hre lo chu a uihawm zawk ngawt mai. Mahse, text msg in tawite te chuan an inbe ve ta zeuh zeuh. Sasa pawh a hlim chho viau. 

HMANGAIHZUALI

Sir Sangpuia'n lecture a pek mawlh mawlh lai chuan thil dang a lo ngaihtuah daih pek a! A ngaihtuah lah chu a ho viau. Vawk te, bawng te ho hian depression an nei ve ang em le? Tih a ni. A ngaihtuah kual vak vak a, Vawkte hi chu an mawl hmel deuh a, an nei ve vak a rinawm loh. Bawng zawk hi an mitmeng hi a ngui thei si a, depression an nei a ni ngei ngei ang. Tumah an en ngam bawk si lo, hnuailam an melh reng ringawt a.. Tih lam vel daih a ni. 

'Hmangaihzuali" tia Sangpuia'n vawi hnih a lam rik hnuah a harh chauh. Msi'n a lo nghawk harh a ni zawk mah. 

"Yes sir" tih leh din a rual a. 

"Veng veng thin chuan aw.. Eng nge i ngaihtuah a? " ngun zeta melh chung chuan a ti a. 

"Ih.. Englo, Vawk leh bawng" a ti niah niah a. Sangpuia khi suk a hmuh chuan a awm a nuam deuh.

"Engtin nge chutiang daih daih te i ngaihtuah theih? " a ti a. 

A ngaihtuahna te a sawi takah chuan an class chu an ri mam mam mai. Ho an tih bakah an nuih a za lutuk tlat. Sangpuia ber pawh a insum zo lo a chha a ni e. A rilru kil khatah erawh, "A inno zia hi" tih a ri thung. 

Lunch break laiin Msi chuan, "Sir Sangpuia hi Xii commerce ami Cindy khian a bem an ti asin" a ti sar sar a. Cindy chu an school-a hmeichhe lar ber a ni. An hausak bakah a hmeltha em em a, a nungchang a chhe over bawk si lo. Thian pawh a ngah hle. 

"An inhmeh ngawt ang. Ni se" Nauteii chuan a ti mai a. 

"Mahse, Sir hian a duh lo an tia" Msi chuan a ti nghal zat. "A va â tak" Nauteii'n a ti hmiah. 

"I star ve miah lo mi! " Msi chuan a ti zawi sap a. 

"Star pawh ka hre lo. Bakah a upa tawh eee" a ti niah niah a. Nia, Kum 10 laiin an inthlau! 

"Upa zawk chu an tha daih zawk alawm.. Pasal pawh mahni aia naupang neih a tha an ti" Msi bawk chuan a ti leh a.

"Aa.. Hmangaihna a ni zawk" a lo ti ve ngial. Hmangaihna chu eng nge a awmzia pakhatmahin a la hrethiam chai si lo. 

Zanah lehkha zir zawha a phone a en chuan, "Bawng leh vawk i la ngaihtuah em? " tih thu hi Sangpuia hnen atangin a dawng a. A khi ve sak. 

"Aih.. " tih chiahin a chhang. 

"Naute, ngaihzawng i nei tawh em? " a rawn ti deuh tâwng chu mak a ti deuh. 

"Nei lo e" a ti a. 

"Nei dawn ta la, eng ang mi nge i duha i dream ve thin? " An sir mai mai chuh! 

"Tumah ka dream ngai lo. Ti nge min zawh? " a u ai chuan a laktlak deuh e. 

"Ka zawt mai mai che. I la naupang sia, i tawnsual ka hlau a" a rawn ti. 

"Kei chu Anu ten bialpa neih an la phal lo va. College ka kal hunah ka nei ve chauh ang" a va ti zuah zuah. 

"Good girl" tih a rawn thawn a. Chhan ngaihna a hre tawh lo. An sir rawn tawngdan chu mak a ti ve deuh. He pa hi a lerh ru viau mawni le tihte thlengin a ngaihtuah ve phah. 

 

Zing dar 4 bwmawr velah apa chuan call dawngin a thianpa, a hmangaih em em Mapuia thih thu an rawn hrilh ta a. An chhungkuain an tho vek. An insiam nghal mawlh mawlh a, an kal vek dawn a nih hmel e. Lawmsanga chu a ngawi ran mai a, a tuar hle tih a hmelah a lang reng mai. A u nen bawk an inphur leh a, a u pawh a ngawi reng ringawt. Pa Mapuia te in an va thlen chuan an lo pungkhawm tam tawh viau a, ruang erawh a la thleng lo. An thlen atanga rei vak loah ruang chu a rawn thleng ta a. Ţap thawm a nasa kher mai. Nauteii pawh a insut ve hlap hlap mai. Pa Mapuia'n a duat thinzia leh an ina a lo len changa an infiam nasat theihzia te a hrechhuak a. Mapuia te hian fa pali lai an nei a, an te ber chu Candy rual vel chauh a la ni nghe nghe. An nu a khawngaihthlak takzet a ni. Nguri pawh a tap nasa khawp mai. Lawmsanga erawh patling takin a awm a, a mittui erawh a khap per sak sak thung. 

Vuina programme zawhah thlalakna te an nei a, Lawmsanga te chhungkua pawn an lakpui ve. Thlanah pawh an zui ve zak. Thlanmual atanga an hawn lam chuan a ú leh hmeichhe pakhat insi riala kal dun a va hmu fuh a. Mitthi vui e ti lo chuan a khi sak. A u hian hmeichhe chungchang vawi khatmah a la sawi ngai lo. Bialnu a la nei miah lo tih pawh a hria. A u te chu a hnaih hret hret a, "U" a va ti sap a. Mapuia rawn hawi chu a laih hmel kher mai. Nauteii chuan a u bula kal hmeichhe hmeltha leh duhawm tak chu a melh zauh a, Sasa zawk chu a lo fingfek bawk a, "I nau law? " a ti a. Mapuia a bu nghut. 

"Ù, i bialnu mi? " a ti leh ta phawng. Mapuia'n a melh rum chu a hrethiam lo lui ve tlat. Sasa erawh a nui deuh a, "Ni lo ni lo" a û in a tih hluk hluk takah chuan a awih ve leh mai. 

In an thlen hnua a phone a han hmeh chuan, "I awm lo va a va hrehawm" tih hi Sangpuia hnen atangin a dawng leh ta. Nuam lo a ti ru ta hle. 

"Sir, ti nge tian i awm zel a! " a va ti ta tâwng a. 

"Engtin nge ka awm? " a rawn tih chuan chhan vak ngaihna a hre leh si lo. 

"Ih, hei lerh deuh ang hian i awm" a va ti ta ngawt a. 

"A nih chuan ka hrilh ang che. Naute, ka vei che a ni. Ka hria. Mihring pawisawi lo lutuk i ni tih chu.. Inngaihzawnna lamah engmah tawnhriat i nei hek lo tih pawh ka hria. Mahse, ka hre bik lo, ka vei che a, ka duh che a ni tawp.. Chumi avang chuan min huat phah lo hram ang che" tih thu a rawn thawn ta a. Nauteii chuan vawi li a chhiar chhuak. A thin a phu dut dut. A zak bawk si. A tah te a chhuak lek lek. 

"Kan sir i nih kha" a va ti ringawt. 

"In zirtirtu ka nih vang hian ka ngaizawng thei lo che a ni lo. Mahse, i zirna tibuai khawpa ka awm anih erawh chuan zirtirtu ni tlak ka ni lo tihna a ni thung ang. Min duh ve rawh ka ti lo che. Mahse, ka duh che tih erawh min hriatsak la ka duh. Ka nghak thei che. College i kal thleng" a rawn ti ta zel a. Awmdan pawh a thiam tawh lo. A inbual ta daih. Mahse, a inbual chhung pawn a rilru a chawl chuang lo. Ti nge a ngaihzawn ve ringwt? Sangpuia chu zak lo a ti a, a ngei a, a hua. Mahse, misual niin a hre bawk si lo. 

Zanah pawh lehkha a zir hleithei lo a chha a ni e. A thaw leh hawk thin. A nuin a awm dan a hmuh chuan, "I nuamsam lo mi? Rilru i va pe thei lo ve" a ti nem diai a. 

"Ngei deuh ka nei a. Ka ngei lutuk hi ka hua" kawkalh zet hian a lo ti a. A fanu serious zia hai ta lo chuan, "Eng nge? Tu nge? Eng nge thleng? " a ti ta mawlh mawlh a. Nauteii chu a zak ve leh deuh si, mahse, a sawi ta vek law law a. A tawpah, "Nu, ka hua.. A zak lo em mai. Mahse, misual a ni lo a" a ti lawi a. Nguri chuan a hrethiam kher mai. An sir Sangpuia pawh a hria, mipa fel leh puitling tak niin a hmu. 

"Hetiangte hi chu i la tawn tur ve reng a ni. Amah chauh lo pawn an la ngaizawngin an rilru an la hrilh ang che. I huat zel ten pasal i nei thei nang.. Mahse, min rawn zel ang che. I tana tha leh tha lo chu keiman ka hre ber ang. Sir Sangpuia pawh mi tha tak a ni. Mahse, i la naupang a, School khata zirlai leh zirtirtu inngaihzawn chu mualpho hun te pawh a la awm thei. " tiin a fanu chu a zilh pah ta malh malh a. 

"An star nasa lutuk asin" Nauteii chuan a ti a

"A nih chhe lo i ti ve em? " a nuin a tih chuan, Zak ru deuh hian, "A nuih hian tha ka ti" a ti a. A lei a chhuak zuk zuk bawk. 

Mahse, a zan mu chuan thil dang a ngaihtuah hleithei bik lo. A mitthlaah Sir Sangpuia nui hmel a rawn lang zel! A thinte chu a rim hlur mai. 

CHHUNGKUA.. 

Khatia Saii te an han indan takah chuan chhungkaw boruak pawh a ziaawm chho a, Muanpuia te pawn sual an chhuah zui lem lo. Veng khatah vek an awm bawk a, Candy pawh inpui lamah an la fo, Saii tan lah lakchhawktu an lo hlu ve tho bawk nen. Mapuia nen an inkar boruak erawh a hma a pha ta lo. Vawikhatmah Mapuia chu an in tharah a la chuangkai lo bawk. Muanpuia pawn a hrethiam ve tho mai. Saii chhungte lam an rawn lawr chho tan a, a cousin phawkphawhraw ve tak tak ten zu in nan te an rawn hmang ta fo. A nupui hmasa laka a lo tawn tawh anih avangin Muanpuia chuan khatiang thil kha thlen nawntir a duh tawh lo va, Saii bulah tha takin a sawi lawk vek tawh a ni. Mahse, nilenga hnathawka chhuak thin ta chuan a ina thil thleng engkim chu a hre kilh kelh lo va, Saii lahin a sim chuang hek lo. An pa a tilawm hneh a, khumlaizawlah a che zeiin, Muanpuia tan a hlui hnawk zel mai si a. Tin, a tawngkam a tha a, a thiam bawk nen, thenawm khawveng te lakah pawh a tlatlum chho viau mai. 

Tlai khat Muanpuia office bang chu a in chhunga nula leh tlangval hnawk deuha lo awm rum chu a va phawk ta nge nge a. A then chu a hriatsa te pawh an ni. Saii'n a hmu thut chu a phu zuk a. Ni dang aiin a lo haw hma ve bawk a ni. Muanpuia chu a hmelah a lawm vak lo tih a lang reng mai si a, awm ve dangte pawh chuan nuam lo an ti deuh nge an insiam a, an haw ta hlawm a. An chhuak fel chiah tihin Saii chuan, "Mipa mawl leh chhaw lutuk, ka thiante bula min tihzah chu nuam i va ti awm ve. A der tal pawn be ve ta che. Min tizak hle mai" a ti nghal tâwn tãwn a. Candy erawh a pi te inah zingah khan ka chhuak dawn tiin a va dah a, an rawn la dah lo a ni. 

"Ka hrilh zing tawh che. Ka nupui hmasa nen kan inthen chhan ka tih tawh kha. Thenawm khawvengten eng ngaihin nge min ngaih ang? An hmel atang reng khan nungchang tha zawk zawk an ni lo tih a lang reng bawk" Muanpuia chuan a ti ve hmak a. 

Saii chuan, "Ka cousin te an nia, i chhungte ringawt be thaa tilawm tur ka ni bik em ni? " a ti leh khar khar. 

"Ngawi mai mai teh. Khati zozai cousin i nei lo. Zu in nan leh nawmchen nan an rawn hmang tih hriat reng. Cousin i va nei tuihnai lo ve. Ka cousin te ho an felfai tehreng nenn" a lo ti ve hmiah. Saii tawng ngaihna hre tawh lo chuan, "Chhungkaw mawl leh ţhing in ni reng alawm" a ti a. Muanpuia a insum nasa hle. Ti nge maw hetiang thil bawk chu a tawn leh tak ni. An hna avang hian a chauh zualpui hian lem hnih khat han lem zauh chang a nei ve thin a, chung a kawlsa te pawh a lo phai duak loh leh a dal em em thin. An nu hian a inpui ve tih a hre ngai lo. Rindan erawh a nei thiam tan. 

Saii titau kual chuan eirawngbawl tum hek lo, Muanpuia lah diau duh bik lo chu a nu te in lamah a fanu lak pahin a phei ta daih a. Chaw pawh a ei zui ve daih. Saii awmdan leh a thian kawikhawm dan te a han sawi chuan, a pa chuan, "Mama, a pawi ngawt mai. I hna avang hian in lam i uap hman meuh si lo va; hman ang khan in mualpho leh ang tih ka hlau a ni. I thiam loh a nihna chen a awm ve bawk. I enliam rei thin a, an chin dawklak hnuah simtir i tum chauh zel ve bawk a. Thu tha zaiin hrilh la, tin, Thian pangngai tak te chu a kawm te pawh kawm ang hmiang. Rik luih luih kher erawh thenawm khawveng an zahawm ve a. I nupui a ni a, keini lo hauha lo thunun ve tur pawh a ni lo. A chungah mawhphurhna i la tawh a, pa i nih ang takin fing takin rorel mai rawh" a ti ta dap dap a. Muanpuia pawn a pawm hle tho mai. 

Zanah a fanu nen an haw ta hnak hnak a. Saii chu a lo inbual zo chiah a ni ngei ang. A inthlak mek a. An inbe lo. Candy hian hnute a la nghei fel chiah lo va; chhang a la nei lo bawk nen. A hnute châk chu a ţap ngak nghak a. Muanpuia chuan, "Kha hnute pe rawh" tiin khumah a dah a. 

Pek tum miah loin a fanu ţah lai reng chuan a inchei mawlh mawlh mai. A ţap nasa tawh si, "Maaa.. " tia a nu a han ban chu a kut lo vaipersak lawpin, "Kal teh.. Ka hne che u" a lo ti hlak a. Muanpuia zaidamnain a daih seng ta lo, a nupui chu a chhipsamah a ţham a, chhuatah chuan a thehthlu ta a. Saii a rak tuar. A dulah a chhuih bawk. 

A fanu chu pawmin, "Mihring tenawm lutuk. Kan pafaa min hne a nih chuan i chhuak thei e. Ka thei ber emaw ti suh. Engmah i ni lo" a ti ram hmak. Saii chu thoin ţap par chung hian, "Ka chhuak khawp ang. Ka hne tawh. Nitina nau awm leh ina tawm tlawk tlawk hi" tih pahin a thawmhnaw a la mawlh mawlh a. Muanpuia chuan, "A lawmawm ngawt ang" a lo ti hmuk.. Chumi zan chuan Saii chu a tlan ve ta chu a nia. Muanpuia pawh a nu te in lamah a fanu nen an riak phei ta bawk. Candy chu Nauteii'n a mutpui thung. 

Vanropuia boruak erawh a nuam veng veng rih tlat! Hetiang hian a la awm ngai miau si lo va. Sasa nen thu ho tete sawia an inbiakna te chu a chhiar nawn ta fo mai. A hmeichhe duh loh zawng tak chu a vei tlat bawk si. A nui ver ver hmel duhawm zia te a mitthla thiam tawh a, tawnhriat engmah a la nei lo erawh pawi a ti deuh. A nau lah chuan a chhaih sek lehnghal. Class kal pawh a phur viau. Vawiin phei chu Sasa hian, "Chawhnuah ka nei tawh lo va, leng daih ila" a ti a. Ani chuan period khat a nei thung a, mahse, bunk a pawiti lem lo. A lo pawm hmiah. A bike pawh a sil uluk ngar ngar teh e. 

Lunch break hunah gate-ah Sasa chuan a lo nghak ran a. Scooty a keng lo. Mapuia'n bike a nei tho bawk nen. An inhmuh rual chuan Lalsavunga park lam panin an tlan nghal ta daih. Sangzuala'n an tlan chhuak lai a lo hmu roh a, mak a tih piahlamah thikna a rawn piang nghal. Mahse, Sasa khan a cousin nen a tihpui a niang tih ngaihdan a la nei fan. 

An tlan zel a. Park-ah law law inhnawhpuar pawh an tum. An va thlen chuan mi an lo tam lutuk lo va; an inhnawhpuar zawhah an fang dun ve mai mai. Sasa thlalak uar bawk si chu cameraman-ah Mapuia chu a hmang a ni deuh ber mai. A chhak tlang pawnga thutna an siamah chuan thlifim dawn pahin an thu dun ta a. Sawi tur a vang leh ta hle. 

Mipa zawk na nâ na chu insangphekin, "Ih.. Kan awmdan hi eng ber nge? Thian nge? Inngaizawng? " a ti ta tawp a. Hmeichhe dang chu nise a zei loh em vang chuan Sasa chuan a nuihpui uar uar tawh maithei a ni. Mahse, Mapuia a duhna a len em vangin a nuihzat phal miah lo. Thutak zeta Mapuia melh chungin, "Eng nge i duh zawk? " a ti ta sap a. Mapuia chuan rawn melh let vein, a chil a lem khulh a. "Ih, ngaihzawng ka la nei ngai lo ania" a han ti te te a. 

"Ka zei dawn lo lutuk a" a ti ta a. A rilru chu a hriat ta ruak mai. 

"Zei kher a ngai mi! " Sasa chuan a ti a. 

"Zei deuh in duh a ni lawm ni? " 

"In ti suh.. Ka duh ve kher lo. Rinawm se a tawk" a lo ti nghet charh. 

"A nih chuan ni ve ila" a ti thawp sup a. A aw khur deuh dat chu Sasa chuan a hre thei. A zâmzia a hai lo va, hmeichhia zawk mah nise zahtheih loh chhuaha chet chhuah a ngai tih a hai reng reng lo. Mapuia kut chu a va vuan a.. "Ka pawm e" a ti a. 

A thiante sawi leh movie a en atang ten hetiang zawhah chuan inkiss a ngai ve thin tih hretu Mapuia chu a chhungril a sa up up a ni ber. A rilru ten zuk ţwngţai a! Sasa kut chu lo humsak vein amah chuan chet a la ve ta a.. A lam hawiin a kuai dak a, fawh cho zet Sasa hmui chu dimtein a hmui chuan a zuk hrut a. Sasa chuan lo duhkhawp loin a nghawngah kuah zuiin a lo fawp let ta siah siah a. Mapuia tan chuan a vawi khatna leh inzirna a ni. Sasa chu zei a ti ngei mai. An infawp zo chu an lai deuh a. Mahse, Sasa chuan, "Rinawm rawh aw.. I luck dawn sia" a ti sap a. 

"Nangmah zawk kha i ngaihtuahawm.. Sangzuala te pawh kha.. " a tih mek laiin, "Sawi ve ziah suh. Ka duhzawng a ni lo. Nangmah vangjn ka be tha ka tih kha" a lo ti vat. 

"Chuan, ka lo ngaihtuah dan leh ka nu min hrilh dan angin inngaihzawn chuan inhriatchian te a tha a.. Chhungkaw chanchin vel te sawi ila" Mapuia chuan a ti a. An sawi dun ta malh malh a. An tui dun ta phian. An inpawhna pawh a tha sawt mai. 

Mapuia chuan whatsapp-a amah chauha a awmna group-ah Sasa nen an inzawmna ni 13th September leh Sasa birthday 22nd May chu a chhinchhiah ta kalh a. 

Hmangaihzuali erawh Sir Sangpuia class huphurh ru ngawih ngawih chungin hun a hmang chho a. Amah Sangpuia a hmuh chuan a huatna chu an bo leh duak thung thin. Chu tak chu a hrethiam lo. A rawn be chhen lo naa, a rawn biak hun te hi a châng deuh roh ni ten a inhria. Mi ten an Sir te nena relation neih an chak tehlul nen.. Kan nauteii hi zawng a la nau ve bawk nen, a chemkal lohna lam pawh a niang e. 

Saii tlan ve ta kha an inah zan hnih a riak ve ta chu a nia. A nau nupui Duati nen an inmil lo nghal pang. Duati lah amah ang mize nei, tumah hlauh leh pawisak nei vak lo a lo ni si. A nau lah nupui te thuawih chi a lo ni chhap nen. Muanpuia lah a reh hmak bawk si. Va biak hmasak hurh lah a hreh ve tumhrang a. A nu leh pa ten an zilh vak lo naa, an upa ber pasal nei tawhin , "I nawmsak tehlul nen, engtin nge i tlan phal zawk? Piang nawn leh mah la, saw ai saw chuan i nuamsa lo vang. " a tih zêk te chu a dik tihna chen a nei chho ve a. Duati'n a mil vak lo erawh han khin deuh rap rap a chak fo a, Mahse, chhungkaw chawmtu an ni miau si. A zan thumna turah a insum zo ta ngang lo va, Muanpuia chu tezxin, "Naute a tha em? " tiin a va be ta nge nge a. 

A hnu feah, "Aw a tha.. Ngaihtuah suh" a rawn ti chang bawng mai. A chapona a rawn lang leh a, "Ve tak che hian.. Min mamawh lo hle mai maw.. I hre dawn khawp" a va ti leh hrep. 

Muanpuia chuan zaidam takin, "Kan tha viau e. I nun i sim hunah i lo kir dawn nia" a lo ti mai si.. A insawh a insawh ringawt. 

Nguri inbual zo bathrobe nena a awm lai chuan a hnunglam atangin an pain a rawn kuah thut. 

"A va mak tak.. Khawi ka inthlak ve phawt ang" a ti chul a. Zan lama inbual hi a tihthan a ni tawh a. 

"Inthlak lo mai la" a beng bulah Lawmsanga'n a ti sur sur.. 

"A la hma hi" Ngur'n a ti hlak hlak a. 

"Pa zawk ka nih hi.. Ka lian zawk a. Ka thu zawk bawk" pangchang zetin a rawn ti leh. Nguri pawn a hnial em em a ni lo, an pa han tihparat vel hi nuam a ti ve a. 

"Nih kawngka saw va kalh la" a ti ta a. Nui vur vur chungin Lawmsanga'n a va kalh. Nupa awhawm leh hlim tak chu an ni chiang alawm.. 

"Ka pa chu vawiinah han incheck up ngei ngei teh se.. Ka kalpui hman dawn si lo va.. Lawmsanga a hman hram ang chu maw" Nguri chuan a nu bulah a bai chhuan chawh rawk rawk pah chuan a ti a. Ni e, Pu Mawia hi tlem lai atang khan a pum lam a sawisel ve ta reng mai a. Damdawi te chu han ei bawk mah se; eng a ni hlei thei si lo nen, Nguri'n a lo ngai serious viau mai. 

A pa lo lut a hmuh rual chuan a lo sawi nghal bawk a. Pu Mawia lah chuan, "Aa.. Engmah a ni lo vang. Aieng tui kha kan in leh deuh ang a, ka ngeih riauin ka hria.. Eng em a ni lo vang" a ti chuar chuar a. Nguri ngaihdan a ni leh ta lo. 

"Tihian ti ngawt zel suh u. Mizo te kan atna chu, na eng emaw kan neihin kan ngai serious phal ngai lo va, kan tuar ringawt zel. Chhan hman a nih tawh loh hnuah kan inluhpui chauh zel a, a dik lo. Nang phei chu kum lamah in upa tawh a, hetiang nâ hi palzam mai mai tur a ni lo.. Inentir ngei ngei ang che. Lawmsanga'n a hruai ang che" a ti ta hmawk hmawk a. Pi Lawmi pawn, "Nia, i chhel em a, i tuar ringawt zel a. A dik lo. I insawiselna a rei tawh em mai.. Kal ngei ngei ang che" a lo tih ve takah chuan a hnial ngam ta lo. 

Ni dangah chuan taxi a hmang haw mai zel a. Vawiin chu taxi a chang rei ta riau. A pa call a tum thut thut laiin.. "Lo chuang rawh.. Ka thlah ang che" rawn titu lam chu a hawi phei vat. Sangpuia lek lo niin. A thinphu a rang nghal. 

"A.. Aaih.. Apa ka be mai ang" a ti bah nuaih a. 

"Min hlau suh.. Hawh le.. Traffic kan tijám ange " a rawn ti dam thlup. Eng nge a hriat pawh a inhre lo. A thu lut ve tawp. Sangpuia a tawng char char a, a thusawi pakhatmah a hre lo. 

"Naute.. " a rawn tih dutah chuan a phu zuk a. 

A melh kuau ringawt. "In in awmna lai ka hre lo va" a lo ti sup. An veng an lo thleng der tawh a lo ania. Tawi fel deuhin an in panna kawng peng chu a hrilh a. 

"Thlawk chhuak mai tur hmel i pu.. Ka hlauhawm em ni? " a rawn ti a. Thawk la kâwkin, "Hlauhawm" a lo ti tham chhal a. Sangpuia a nui hawk hawk. 

"Engtin nge ka hlauhawm a? " a tih chuan, hmalam melh ran chungin, "Hriatna thazám hian hlauhawm lo thleng tur min hrilh lawk thin a.. Ka hmuh che apiangin ka lung a phu nasa thei lutuk a, i hlauhawm aniang" a ti ta a. Sangpuia mitmenga phurna lo lang chhuak erawh a hmu lo. 

" I hriatthiam hun ka nghakhlel hle mai" a tih mek laiin Nauteii te in peng an thleng a. A ding ta nghal a. Polite takin lawmthu a sawi a.A kal nghal nal nal. A thlir liam hnuah Sangpuia chu a tlan ve ta chauh a. A nui leh suk thin. Nauteii khan a lakah feelings a nei tih a hria, mahse, chu feelings chu Nauteiin a la hrethiam lo. Beidawnsan pui tur zawng a la ni lo e. A beiseina a sang sauh zawk mai. 

Dar 10 a ri dawn tawh a. Call a dawng. Number save loh atangin a ni. Lak loh a tum zet a, pawimawh a nih takin tiin a la ta a. 

"Bawiha, I pi ka nia, i nu nu.. Tunah hian i nu thichhawngin a let reng a ni. A kal hma ngeia hmuh che a duh khawp mai. I rawn hmu thei hram lawm ni? " rawn titu avang chuan a nghing lawih mai. A thu chhuak nghal hlawl a. A hrawkah hnawhtu a awm bawk.. Hmanhmawh taka a pa te room panin kawngka a kik dat dat a. A nuin a lo hawng. 

"Nu, ka nu a thi ţèp a. Min hmuh a duh a ni" a ti tham ţuak a…