Thutiam s2 - 1

THUTIAM (S2) - 1

Ziaktu: Toni Râlte

(Adds lamah ţang leh ang aw..) 

Lawmsanga leh Ngurnunsangi te fanu Hmangaihzuali'n kum khat a rawn tlin meuh chuan duhawm tak a ni. A chum buang mai a, a sam chu a kir chiat a. Biangsum tereuhte a la nei zui bawk; a ngoin a tlei mual mual bawk si. An colony chauh ni lo veng chhungah lawmtu leh awm chak an kat nuk mai. Tin, Lawmsanga te chhungkua hi a pa atanga veng chhunga langsar leh mi te rawn kai an lo ni ve bawk nen. An tu leh fate tan pawh vanneihna a tling tihtheih a ni. Hmangaihzuali chu a ú Vanropuia (Mapuia) chuan, "Naute' ti ngatin a ko thin a. Mi dang zawng pawn an zawm lo thei lo. A nau chu a duat mai mai khawp a! A chang chuan mi dang mi hrangin an pawm te a phal lo hial thin. Ina a awm tawh phawt chuan a kuah hlu hlu reng mai, a nau pawn chutiang na nâ na chu a lo ngaina bik lo thei lo va. Mi dangin an han hauh fiam changte hian a ù lam panin a bawkvak hrup hrup thin. Nguri te nupa nun chu a hlim a, chimbuaitu an nei rih lo. Chhungkua an inremin Pu Mawia te nupa lah an mo chuan an mit a tlung em em a, Mapuia nî Teteii leh Lawmsanga farnu dang pasal neia chhuak tawhte lahin an ngainain nau ang tak takin an en bawk. Lawmsanga û Muansanga (Police) erawh inah a awm tam lo em zawk a, Nguri chu a ngaina ve viau tho mai. Muanpuia u chiah mipa erawh nupui a neih tirhin an nute khaw lamah hnathawk a ni bawk nen, in hrang an chang nghal mai. Chutiang chuan, Pu Mawia te nupa, Lawmsanga ù chiah Teteii leh chumi û Muanpuia te bakah Lawmsanga te chhungkua chu in khatah inngeih takin an khawsa chho ve mek a ni. 

Vanneih asiamin Hmangaihzuali'n kum 2 a rawn tlin chhoh khan Nguri chuan an veng chhunga High School-ah Zirtirtu hna a hmu ve ta hlauh mai bawk a. Nakinah in hrang chan ngaih hun te pawh lo awm mah se; khawsak dinhmunah an hniam em em bik lo ang chu.. Lawmsanga lahin a phak ang tawkin taxi a la khalh ve reng bawk. Nguri hminga a pain in leh lo a dah kha siamremin, engmah chan neih loh aiah tiin Rinfela tana a pain a dahsak zawk kha changin inpui chu Rinfela kutah a awm ta a. Pi Sangi hoin a nupui fanaute nen an la khawsa zel a. Pi Sangi pawh mipa lam ngaihsak ta lo vin, Kohhran leh khawtlangah a phak tawka inhmangin a tu te kilkawitu ber a ni chho tan ta a ni. 

"Ni, khaw nge Nauteii" Mapuia school bang chuan a ti lut nghal a. Nguri hnathawka a chhuah a ngaih tawh vangin a pi leh a ni te hian an lo awm mai thin. Teteii hi phai lama chhuk leh tur a ni naa, a hriselna lam dinhmun vangin a pain chhuk a remti ta lo va, an in atanga hla vak lo hmun lun laiah Restaurant changkang zet siamin in lam atangin a enkawl ta zawk a. Manager fel tak a nei bawk a, Nguri a chhawr theih vak ta si lo nen a nu puiin in lam a chenchilh tam zawk mah a ni. 

"Ih, kawm thlang ten an rawn la a nih kha" a ni chuan a lo ti var a. A inthlak sawk sawk a, thingpui pawh in ta lo chuan a nau chu a zuk kai chho leh rih. Heti taka a nau a ngaina leh a duat hi Lawmsanga te nupa pawh an lawm reng a. Teteii leh a pi te hian Mapuia chu a dinhmun a tlahniam ang tih an lo hlauhpui thung. Mahse, Nguri fin vena lam tak a ni. A fapa chu a en hran phah lem lo va, fanu a neih hma ang tho khan a la ngaihsak reng a ni. A chhan chu Lawmsanga fapa a ni miau a. 

Tlaia Nguri rawn haw chuan a ei chak deuh emawni Sangha tharlam zet zet hi a rawn hawn a. An chhum nghal chuk chuk a. Nguri inbual zo a lu a hruk mawlh mawlh laiin rooma Mapuia leh Nauteii inkhualtelem chu, Mapuia chuan, "Zawng khawro..! " a ti ta mai a! Nguri a phu zawk. A va melh nghal kâwk a. Nauteii lah a lo nui hek hek mai si. Mapuia chuan a nau hmaah posi lain movie an en thina an tawngkam hman chhe pui pui chu a lo hmang ve a lo nia. Nguri chuan dik dawnin a hre ta lo. 

"Mapui, he tah lo kal teh" a ti a. A aw a nem diai lem lo. Mapuia chu rang takin a va kal a. 

"Khatiang tawngkam kha khawi atanga i hriat nge? Engvangin nge i hman? " a ti ta khawl khawl a. A pi leh a ni te chuan an lo hre pha ve reng bawk. 

"Ih.. Hmanniah film kan en a. Chuta mi chu a nia" Mapuia chuan a nu melh zak zak pahin a ti a. 

"Tun hnuah khatiang tawngkam kha i hmang tawh tur a ni lo. A chiang em? Film pawh i en tur chu keiman ka select zel tawh ang. Tawngkam tha lo leh mawi lo a ni a. Hman tawh miah loh tur aw" Nguri chuan a ti a. Mapuia pawh a bu nghut nghut mai. 

Nguri room atanga a chhuah chuan, Teteii chuan, "Khatiang tawngkam te kha chu an hmang vek alawm.. An sim ve leh mai zel" a lo ti a. Mapuia hi a tette atanga fa ang hiala a lo enkawl deuh a nih vangin tawngkam eng emaw hleka an tih a ngaithei thin lo. 

"Chupawh nise, ani chuan hmang ve suh se.. i phone i khawihtir tam lutuk te hi tha ka ti lo. Hmanni pawn ML an ti emawni kha kha an lo khel a, madarchod te an tia, vai tawngkam chhe zet zet an hriat phah bakah games an khelh nasat hian tangkaipui tur thil engmah an chhar chhuak lo. Inzirna tur lam hi entir a fuh zawk" Nguri chuan diau miah loin a lo ti ve hmiah. 

Teteii chu a nuin mitmeiin a khap ta a. Engmah a sawi zawm ta lo. Tiang chuan Mapuia leh Nauteii te inkarah gap a awm ta zeuh zeuh a. Mahse, an la inrem zel tho mai. Nguri hi a â lo va, a duhsak hunah a fapa zawk a duhsak thiam tlat zel a. A ni leh a pite lawmna a lo ho ve bawk nen, hun chu a kal chho ve bek bek zel a. 

Mapuia'n kum 10 a rawn tlin hnu lawkah, Nguri te nupa chu Mapuia te school principal hmu tura koh an ni ta hlawl mai a. An va hmuh nak chuan, 

"Aa.. Englo a nia, Mapuia te thianho hian an class ami Zotea te unau hi an lo tiduhdah thin deuh em mawni.. Hmanni phei chu a kawr te kha a ţet phung mai a. A nau Lucy pawh a sam te an lo kek nge.. Mapuia lah hi a thang duh si a, an classah a lian ber a. A huai si.. An hlau riau mai a. In lamah min lo zilhhausak ve deuh teh u tiin ka rawn ko ta ngawt che u a ni. A thiante hian a thu an awih bawk si a.. " nuam ti vak lo hian a lo ti ta a. Lawmsanga te an zak kher mai. 

"Nangman zilh ang che. Kei chuan tawngkam aiin ka vaw duh mai dawn si a. " An nu bulah Lawmsanga chuan a ti a. A fapa nungchang an lo hre lo viau chu hrehawm an ti takzet a ni. In lamah a felin thu a awih ropui si a. Chutianga mahni mihringpuite ngei tihduhdah chu an chhungkaw rilrem loh zawng tak a lo ni bawk nen, Nguri pawh zilh nasat a tumruh kher mai. Sawi tawh ang khan a thang duh êm a, an thian zingah pawh a lawr zuah zel. A class a la hniam si a; amah pawh a zak deuh thin. 

Ngur School bang chu roomah lutin a inthlak nghal a. A va chhuah leh chuan Mapuia chu a nau kai chungin a rawn lut ve mek a. 

"I nau kha i ni kutah va dah rih la.. Roomah lo lut rawh" a ti hmak a. A pu te chuan an lo melh hrek hrek. 

Mapuia zawk rooma a luh hnuah a nute bulah chuan thil awmzia vel chu a sawi ta a. A pi a chek tlat tlat mai. Teteii erawh chuan, "Awii a ni lo vang. An puh vr mai mai aniang. Chutiang mizia a nei lo hrim hrim" tiin a vahpa thlavang a lo hauh a. 

"Principal chuan dawt a sawi ngawt lo vang. Kan va hmu phak tawh lo va. Zilhhau chu a ngai. A thian kawmte pawh thlaksak an ngai a nih hi. Tite chuan a thiante pawh a hruai khaw lo vek anga sin. Amah a huai si a, an hlau vek si" Nguri chuan zaidam takin a ti a. Roomah a lut nghal. 

An school-a thil thleng, Principalin a hrilhte chu a fapa bulah chuan a sawi mawlh mawlh a. Mapuia a ngawi kur mai. 

"Khang thil thlengte kha engvang nge? " tiin a tawp a khar a. 

"Ih, Zotea hian min cho ve alawm" a ti ringawt a. 

"Aw.. A cho ve ang che chu.. Mipa leh mipa te chu inhlauh tur pawh a ni lo va. Chumi avanga va tihduhdaha a kawr te pawhthler a ngai hleinem. Thian atan sawm daih zawk la, in inrem ni mai tur. Tumah hi kutthlak ringawt tur a ni ngai lo" tiin a thiam ang tawkin a hrilh malh malh a. 

"Nu, chu pawh a ni vak lo. Ih, hman niah tawh Nauteii ka lenpui laiin, 'I nau kha i nau tak tak pawh a ni lo.. Nakina ka bialnu tur a la nih kha' te a ti a nih kha. Ka ngei alawm" Mapuia chuan a ti ta a. Nguri ngeng a chhun zawk. A fapa chu chiang taka melhin, "Enteh, Bawihte, Nauteii hi i nau a ni. Tu ten emaw i nau a ni lo ti mah se, i nau a ni tihah chiang tawp la, mi thusawiah buai reng reng suh. Chuan, mahse, kut inthlak chu a tha chuang lo ania, chutianga an lo tawngkhum che chuan min hrilh vat zel ang che. A tha em? I sim tawh ang tiraw? " tiin a han nawr a. 

A lu a bu nghut. He nau hian a pa a chhun teh chuan a luhlul dawn tih Nguri chuan a hai reng reng lo. A pa lah hian a hau duh malêk a.

A zilh zawhah an chhuak a, Mapuia chu a nau nen bawk dawrah an kal lehnghal. A nu leh Teteii bulah chuan Zotea'n Hmangaihzuali chungchang a lo sawi dante chu a sawi a. A lungawi loh thu te. 

"An va zak lo ve a. Ve mai mai a. Hmanni lawka rawn awm lehnghal. An sawi loh tur an sawi vang a nih chu.. Keimah hian ka la vel ang" Teteii chuan a ti hlaih hlaih a. Pi Lawmi chuan, "Khaih! Nula senior tih takah insum thin teh. Nguri, kei chu hetiang hun hi a thlen ka la ring hrim hrim. Mapuia bulah hian engkim hi hrilh vek chi zawk em mawni ka ti hial.. Nakinah a puitlin hunah te hre chhuak ta se.. " a lo ti nem diai a. 

Nguri pawh chuan, "Ni e, a pa nen pawh kan sawi dun fo alawm.. A nau hi a atchilh si a, hrilh ta ila a na dawn lutukin ka hre bawk si. Ka hrethiam lo, ka pa leh U muanpuia te ngaihdan pawh la ve ila" a lo ti a. 

Teteii lah pek chuan, "Hrilh a ngai thlawt lo. Miin an lo hrilh pawn dawt tihsak zel tur. A rilru na tur ka hmu thei lo. Ruthi pawh a rawn lawr ngai tawh chuang lo va, tihian engmah hre lo se a tha zawk" a lo ti hmiah bawk si. A buaithlak a ni e. 

Sawi hmaih loh tur chu Nguri hian Hmangaihzuali'n kum 5 a tlin khan nau a pai leh a, mahse, vanduai asiamin a chikawngah a lo pai a! A puakkeh tep a lo nia. An zai ta chuk chuk a. Loh theih lohin a chhul paih a ngai ta a ni. Tichuan, nau a pai thei tawh lo tihna a nia. A sarhu lai chuan a tap nasain a rilru a na em em a, Lawmsanga tak pawh a hnual ve hle. Fa ngah kha an sawi dun ve nasa thin kha a nia. Pathian remruat zawng dal rual a lo ni si lo. Fa pahnih tlawng han neih chuan dammawh hritlan nikhuain thla a phang hma bik em em a. Pu Mawia te pawn pawi an tihpui takzet a ni. Mahse, hun a lo kal ve zel a, Nguri pawn rilru a siam nasa. "Fa dang nei teuh ta ila, Bawihtea tan hian nu tha tak ka la ni reng thei ang em? A ni hian pasal a neihsan hun te a la awm ve ang a, a pi leh pute an dam reng dawn lo bawk nen.. Kei leh a pa bak belh tur a nei dawn lo va, chuvangin amaha innghata mawhphurhna la lo thei lo turin Pathianin rem min ruatsak zawk a niang e. Ani hi awm lo phei se chuan fapa ka nei dawn lo tihna a nia.. " ti zawngin rilru a siam chho a, an pa bulah pawh a sawi nghe nghe. Tichuan, hunin an lungngaihna te pawh chhilh bo ve zelin an fa pahnihte chu keh thei dawmin an dawm chho ta reng kha a nia. 

Teteii hi tunah kum 35-na a hmang chho ve mek a. Mipa hi a ngaihsak lo khawp a. A tleirawl chhuahtirah ngaihzawng a neih bak kha a neih awm a chhungte pawn an hre lo. Nula tlawntlai leh hleitling zet, tawng tam em em lo, fiamthu erawh duh ve fu a ni a. Mi thenkhat chuan Nguri nen an inhrawn theih an ring lo ru fur a, mahse, an inngeih phian mai. Amah Teteii a sual loh piahlamah Nguri hian Teteii lalzia hriain a zahder thiam a, a û en thiam tlat a. Teteii tan chu chu hlu tak a ni. A vahpa vang hian vawi hnih erawh an inkhak deuh tawh a. Mapuia kum 7 a nih laiin An kawmthlang naute nen mi dilah lo kal ruin sangha an lo man pek a! Nguri'n vawi hnih a kutphahah a hlapsak a. Chu chu a ni chuan hmuh hrehawm a lo ti si. An han inkhak deuh chu Nguri chuan, "Ù, ka zah lutuk che. Mahse, ka fapa tan nu ka ni a, ka enkawl dan leh ka zilh danah chuan thuneih tum lo hram rawh u. A thatna tur bakin ka hauin ka zilh lo. In duat ka hria, mahse, nakinah pasal chhia thate pawh i la nei ang a, in hrang atangin min rawn enkawlpui thei tawh dawn lo. Chuvang chuan tuna siamthat a awla a nunkawng siam ka tum lai hi chuan tumah inrawlh lo ula ka duh a ni. Hmangaihzuali pawh hian tisual se ka vaw tho ang. Hrin leh hrem an ngaih chang a awm ve" a ti ta sak sak a. 

Pu Mawia'n a lo la fuh ngang mai. "Ngurbawih, i tidik lutuk. Ka lo hrechiang lo hle mai che. Ka mo niawm tur reng i ni e. Khatiang tur kha a ni. A pi leh Teteii hian an duat khaw lo zo takngial dawnin ka hre thin a. Mahse, i awm tawh a, ka hah a dam huai e" a lo ti thên mai a. Teteii chu a lungawi lo viau naa, Nguri awm loh laiin a unaute leh a nu leh pa ten an han zilh hau takah chuan Nguri finzia leh Mapuia chu a fa ang taka taka a en vang a ni tih a hrethiam ve ta a. Chuvang chuan a ngaina sawt, Mapuia leh Nguri inkarah inrawlh tumna a nei tawh lo. Mahse, a ruka a vahpa pawisa pek erawh a sim hleithei lo a ni. Hmangaihzuali pawh a duat lutuk, mahse, a hmasa ber hi chu a dan a lo dang pawh aniang e. Hmangaihzuali chu chhungkaw duat rawn a ni tho a, A papuia (Muanpuia) te hlei hlei hian an atchilh a, ina a awm tawh chuan a len tawh hnu thleng pawn an inpaw ur ur reng mai a ni. Lawmsanga hian a khawih tam lo ber zawk awm e.

Muanpuia hi tlangval hnahkhat a ni tawh lo va. Lawmsanga nupui neih hma khan nupui a nei tawh a, fapa pakhat neiin an nu chuan a chhungte a ngeih hlawl si lo va, in hrang an han chang ve ren rawn a. Mahse, an nu chhungte lam lal hurh siin Muanpuia te chhunglam an ţi dûk lawi a. Ani hna nei ni bawk nen, a awm loh hlanin card te dengin an lo ri deuh luih luih reng chu Pu Mawia'n Muanpuia zawk chu a kam khat ta a. Muanpuia leh an nu inhnial chhoin an inthen deuh thut mai a ni. A fapa pawh an nu chuan a hruai nghal a, a hnuah a rawn beisei leh dûk dûk reng nain, amah Muanpuia hi a rilru a let ta nge a ngaihsak zui ta miah lo va. An nu hlui chuan pasal te nei chhoin an fapa pawh Muanpuia te lamin va lak an tum a. An lo phal lo nasa ve mai a. Court lamah te pawh an inkhing zak zak hman a ni. Muanpuia te lamin an chang ta a, Mahse, vanduaithlak takin kum 2 zen zawn an chenpui hnuah an school picnic tumin a tui cheng a tla hlauh mai a. An chhan hman ta lo a ni. Hetia a fapa a boral hian an nu hlui te lam chuan report te an lo thehlut kawkalh a. Mahse, vanduai vanga thleng a ni miau a. Muanpuia pawh vawiin thlengin a inthiam thei lo, a nu bulah awm se a la dam ang em tihte thlengin a ngaihtuah thin. Chutihrualin a nu pasal kha vai a ni a, a sualin a kut a ram si. A fapa khawsakna atan a duh mawlh si lo va.. Nupui pawh ngaihsak lem loin a leng ta ziai ziai chu a nia. A hmel tha a, a luck zawng a luck ngang mai. Ngaihzawngte chu a han nei ve thin tak naa, tihsual leh a hlauh vang ni maw neih tak tak atan chuan a tîm leh zel a. Kum 40 a hnaih chho ve ruak tawh a, neih chu a hun thawkhat tawh viau mai. 

HMANGAIHZUALI.. 

A han tleirawl chhuak chho ve ta chu a nalhzia hahîpa sawi an awm chho nawk mai. Nu leh pa chhun tur a nei tha bawk a. A sang zuaih mai a, a ria chum bat reuh bawk si. A dul a thep zaih a, a kawng lah a fek bawk si. A mawng bawr erawh a hlai lo naa, a khal túrh mai a. A hnute pawh a bial mum nalh viau e, a len erawh a lian falua lo. A vun a nalh bawk, hmelah a nu a chhun viau a, a tetlai samkir kha a la pu reng a, kir bup ni si loin a kawi ngek a, tihkir chawp a ngai tawh lem lo. A nuin sam rawng thlak vel a phal loh vangin a dum tle sar a, miziaah a pa a chhun deuh thung. Thil tih neuh neuh a thiam ve lo va, tih chuan tih tawp; Thingtlangah awm se, ram hnathawk tur chi a ni. In lam chet pawh a nuin zirtir hle lo se chuan a che phuailuai ngawt ang. A zaidam lem lo viau a, a tawngkam pawh a chhum bung deuh. A nî Teteii la nula reng mai pawh chu mak a ti deuh nge, "Ni, pasal i hmu lo mi! " ti deuh tawp chi kha a nia. Mahse, Pasal a han neihsan dawn tak takah chuan a ui leh sia, "Min chhawm ve mai rawh" a ti leh hmiah. A len tawh hnuah chuan Teteii pawn Mapuia ai mahin a duatin thil pawh a leisak nasa reng a ni. A chhan chu a mizia hi pawisawi lo tak nisi, mi vengthawng thiam meuh lo, â taka ţawng ve tawp chi a ni a. A nu pawn a zilh ve nasa. A mize kentel ni maw.. a sim hleithei lo a ni ber e. A cousin te hi mipa vek an ni bawk si a, nu zim zem taka han chet chu kahase a ni ringawt. A pa mangangin, "Hmangaihzual, i patil chuan i nasa lo khawp ang" tiin a vau hial tawh nghe nghe. Mahse, a taksa pianzia leh landan erawh a mawiin hmeichhe dik tak nihna nei a ni thung si. A tawngkam bungrua leh a thian kawm dan hi a nu zin zen lo a ni mai e. 

A u school luhna hnu zelah a lut chho ve a. Rin ai takin lehkha pawh a thiam ve e. A papuia'n nupui a nei ve ta bawk a. An chhungkua an tlem thei tak tak lo. Khawhar lo takin a lo seilian tihtheih a ni. Teteii'n pasal a neih tak hnu khan in an la sa zo lo nen, a ni roomah a û nen an mu thin a. An titi nasa thin. Zan khat chu thil nuihzatthlak angreng tak, ho lem si lo an tawng pek alawm. An room ti tawh mai ang leh a papuia te room hi indawt chiah a nia, Zan khat chu an hriat ngai loh thawm an hre ta a. Muanpuia nupui Saii hi a nulat lai pawha harhvang ve tak, mipat hmeichhiatna lamah pawh duai lo ve tak a ni a. Muanpuia hi kherh taktea kherhin a zui hawng tawp kha a nia. Neih loh theih in an inbat tang si a, an nei ta tawp mai kha a nia. Chumi zana an nupa nun hmang chu Saii chuan thawm a dim lo deuh nge, Nauteii te unau chu an inmelh hrek hrek a. Mapuia chuan a hrethiam ve mai a, Nauteii erawh la bo tak a ni. A hawi â reng a. A u lah chuan hrilhfiah tang e ti hek suh. Mak ti zetin chumi zan chu a mu a. A tukah, a thawh rual rualin, "Nute, nizan khan i dam lo mi? I rum nasa sia.. Ka lo kal tep a" a ti ta mai a. Nguri'n mitmeiin a lo khap, a hrethiam der si lo. Muanpuia a nui ruh ruh ringawt. Saii lah chuan eng he huah a ngai lo nge, "Nia, i papuia nen kan inbuan a" a lo ti mai a.. A hnuah Nguri chuan roomah ko lutin hrilh hriat a hun tawh tih hriain, Sex awmzia, virginity hlutzia leh nupa nih hma chuan hman loh tur tih te chu a hrilh fai ta leng a. A bu nghat nghat mai. A vanneih asiamin chumini ber kher chuan an School-ah Sex education an zir ta bawk a. A varpawh ve ta. Zahmawhah a ngai lem lo va, a thiante lai kual nuihza te chu a hrethiam vak lo. A nu thuchah, "Eng anga i hmangaih leh hmangaihtu che pawh nise, i pasal a nih hma loh chuan i taksa i hlan tur a ni lo. I hlan theih loh vanga inthen duhtu mipa chu kalsan la, dawhthei taka i pasal a nih hun nghak thei mipa hi Pathianin he khawvelah hian a piantir ve tih hrereng ang che" tih thu chu a thinlungah mosia dan ang maia chiangin a inziak kalh mai. A nu hi a ngaisang a, a nu ai mahin a pa a la ngaisang, a zah pawh a zah dun reng a. A nute nupa hlim theihzia leh inngeihzia a hmuh leh hriat atangin, "Anute ang hi ni ve ila.. Pasal ka neih hunah apa ang hi ka zawng ve ang" a ti thin. 

Tih takzeta star tu a nei a. Class X zirlai a ni. Peka a ni a, an veng thenawm ami ania. Peka chu hmeichhe ho zawng zawng star tihtheih a ni. A lian a, a pa em em bawk. Basketball khelh a thiamna chu an star chhan a ni deuh bawk. Mahse, Nauteii mitah chuan Peka chuan mawina a nei lem lo. A thian kawmte a thuhnuaia a dah dan atang chuan a ngaina lo ve tawp mai. 

Vawi khat a school bang, amah chauha a haw thla chunan school thlang lawka kawng pengah Peka leh a thiante ho chuan an lo chang a. Hemini hian a kal rualpui thin Veni a kal lo va. Amaha haw a ni. An lo chhaih liam liam a, Peka chuan a rawn pan ta nalh. 

"Induh thiam hle mai" tih pahin a sam tawnna chu a phelhsak a. A ding ngawi ran mai. 

"Enteh u, a chhiat lohzia hi.. Ka bialnu hi" a ti lung lung a. Nauteii ngaihdan a ni lo nasa; Peka kuta a sam tawnna chu va banin, "Tuin nge ka bialpa lo ti che a. Bialpa nei rual ka la ni lo va. Tin, ka duhzawng i ni lo. Khawi ka sam tawnna kha" a ti hriam hraih a. Peka mitah a melh ran bawk. Peka nui hmel chu thinrimnain a thlak a, chapona zia a rawn lang tan ta. 

"Ve lutuk a che. Nang lo pawh hi ka hmu lutuk. Khawvela hmeichhe hmeltha ber i ni lo aw.. " tih pain sam tawnna chuan a awmah a rawn perh a. Nauteii chuan a âwm dawm chungin, "Nang ngaihzawn che ai chuan hmelchhe tawk nih ka duh zawk. Chapopa" a ti vin thak a. Peka thiante chu rawn phei vein, "Bro, fawp rawh.. A hmui virgin hawnsak rawh" an rawn ti vel a. An school hi a pen hleh avangin veivak an awm hnaivai bawk si lo. Nauteii chuan an thusawi chu engahmah ngai loin kal luih a tum a, Peka chuan a lo dang ta tlat. 

"Ka fawh nge i duh? I kekawrte phelh" a ti ta a. Chutiang idea ţhing lutuk chu Nauteii tenzawng tak a ni. Mahse, an rin ang a ni hauh lo. Eng sawi set set lo chuan a kekawrte chu a phelh ta sawt sawt a. A kerek a thlen veleh a chawi chho leh vat. Mak tia an ka hô lai chuan chak zetin a kal pel a, a tlanin a tlan ta hial a! In a thlen hnuah a thinrimna chu a rawn nung thar leh a, a u a hrilh vaih chuan Peka a hnek dawn tih a chiang. Mapuia chuan a dik lohnaah pawh a tan fai vek zel tih a hai lo. Tun tum chu ka zep rih phawt ang, a khawih vaih chuan a khawih na dawn sia a ti rilru ta zawk a. 

Zanah a nuin an zirlai a enpui laiin, "Nu, a u hi hmeichhia khawih lo turin in zilh ve ngai em? " a ti sap a. Nguri'n mak tih hmel zetin a rawn melh. 

"Ka sawi awmzia chu, tun laiah i sawi ang khan pawngsual te a hlauhawm sia, keimah chauh min hrilh a. A u pawn hmeichhia a pawngsual ve thei tho sia, a that lohzia in hrilh ngai em? " a ti ta a. Nguri chuan a fanu chu a melh vawng vawng mai. A harh chhuak ti ila, Mapuia bulah chuan, "Ngaihzawng i neih ve pawn khawih chhiat tum loh tur; i khawih dawn apiangin i farnu chunga thleng tur ni ta se tih ngaihtuah la, inthunun ang che" tih thu chu a lo hrilh tawh ngei mai. Mahse, pawngsual chungchanga mipa tam tak mindset dik tawk lohzia leh chumi thanhnana pawngsual an awm apianga a victim dem ching a hmei a pa an tam tawhzia te a hria, a fapa pawn chu rilru dik lo zet chu a lo pai puitling ve mai ang tih a hlau a ni. 

Lawmsanga nen pawh an sawi dun a. Ani hi zawng a thu a rum mah mah zel a. "Hmeichhia tupawh han pawngsual teh se. Ka chansawm barh ang" a ti leh tawp. Nguri pawn an pa zia a hria a, engmah a sawi zui lo. Remchang a hmuh veleh Mapuiah bulah chuan, "Hmanni thla hmasa lawka hmeichhe pakhat zu rui, a thianpain a pawngsual kha i la hria em? " tiin bul a tan a. 

"Hria e.. A khawngaihthlak ngawt mai" a lo ti ve mai a. 

"Video te kha a darh nasa sia. A pawi tak tak a ni. Anih khatah khan hmeichhia khan dik lohna a nei in i hria em? " a tih chuan, "Neih awm pawh ka hre lo. Zu kha rui lo se chuan a ţang ve thei deuh mai tur a nia. Ka bulah chuan awm se ka chhan ang" a pa ang chiahin a ti a. 

A nu pawh a thawl deuh huai. Mahse, "Bawiha, zu a lo rui emaw a lo chatthla emaw engpawh ni rawh se, tuman pawngsual hi an phû lo va, tuman pawngsual theihna an nei hek lo aw. Nang chuan hei hi vawng reng rawh. Nakinah i la puitling zel ang a, Hmeichhe zu rui chatthla emaw saruak deuhthaw a awm te tan mi hlauhawm ni ve ngai suh. Venghimtu zawk nih i tum tur a ni. I bulah thlamuang takin zu an ruiin an awm ngam tur a ni. Chutiang chu hmeichhia ten kan ngaisang a, kan zah a, an thu pawh kan awih. Puitling leh zahawm takin i farnu anga ngaiin an tihsual te pawh i zilh mai tur a ni.. I hrethiam tiraw? Nang hian tu emaw i bialnu emaw lo sualin a duhthlanna tel loin lo khawih ve ta la.. Kei ai mahin i pa hi a na zawk ang. A chhan chu i pa hi mipa dik tak a ni a, a fapa pawh hian a hnung i zui tur a ni" Nguri chuan a ti ta dap dap a. Mapuia pawn ngaihtuah nei tih hriat takin a lo ngaithla khiau mai. 

"Naute, niminah i kekawrte i phelh ami? " an class room a lut chu a thutpui Linda chuan a lo ti nghal vat a. A hawihai deuh naa, a hrethiam vat. 

"Phelh e" a ti nghat a. Chuveleh an au rual dual mai. Nauteii chu an melh hrek hrek bawk. 

"Ka mipa duh loh fawh ai te chuan ka kekawrte rawng an hmuh kha pawi ka ti lo fe" amah melhtu te melh kual pah chuan a ti leh nghat nghat a. 

"I kap ami pawh an hmu a ni lawm ni? " an class mipa tawngthei zet Zira chuan a lo ti a. An khek leh tuar tuar hlawm. 

"Tu nge hmu a? Lo hruai ula" thut pahin a ti a. 

An ngawi deuh dâk.. Mahse, Nauteii er ru em emtu Hlimi hian, "U Peka thianpa Kima khan ka hmu a ti" a rawn ti a. Nauteii a nui hawk. 

"Kima bulah chuan ka kap awmdan va zawt ru. Ka buai peih lo. " a ti a. A hriat phak tur si hian, "Peka'n hlip rawh a tia, a hlip hmiah a nia. A lo duh awm hle mai. Eng atanmah Peka'n a ti awm si lo va" an ti sur sur a. Nauteii chuan hmalam a en tlat thing. 

Lunch break-ah Veni nen tiffin an ei dun a, Veni hi chuan a ţan tlat thung. An ei mawlh mawlh laiin class X ami Peka atchilh em emtu Ruati leh a thiante an rawn lut a. An rawn pan ding nghal. 

"Hei, nang hi i va nasa ve a. Peka te i lo bem ngam ve law.. Ui ek tlukah pawh a ngai lo vang che. Ve mai mai a" a rawn ti nghal thâwr. A chaw thial lai chu a han lem te te a. 

"In ankhum ka thiam ve lo. Insual zawk mai ang" a ti hmiah mai. An hrilhhai letling. Mahse, an pangngai leh vat. Ruati thiannu Zonuni chuan, "Aia upa i va zah lo ve. Senior kan nih hi " a lo ti zauh a. 

An zavaia melh kual chungin, "Peka in tih ve chhen saw ka ngaihzawn ai chuan hremhmunah ka tla mai ang. Va hrilh ru.. " a ti a. 

"Niminah pawh i panty hlip turin a ti che a, i hlih kha.. I duh huam huam zawk alawm" Ruati chuan nuihsawh lek lek hian a ti a. 

"Amah zawt rawh thudik chu.. Min fawh nge ka duh panty phelh a tia.. Ani fawh ai chuan ka tia ka phelh anih kha. Tikhan ka duh lohzia i hre tawh em? " a ti sak sak a. A pumruaah an ni ai mahin a dawlhkai zawk a, a hlau bik der lo. 

"Ka awih thlawt lo. Peka'n hmeichhia a bem hmasa ngai lo aw. I duh lutuk vang a nih kha" Ruati chuan a ti leh hram a. 

A chhang peih tawh lo. A thin pawh a rim em em lo, chuti taka Peka vanga buai chu a nu ten an hriat a hlau zawk. Tin, tunlai tleirawl ho lo zah tawh lohzia chu mak a ti bawk. An kal mai dawn emaw a tih laiin an la tawi khaw muang a, Peka te thianho an rawn lut ve mek bawk. Peka laka inlak eng emaw nan a ti ni maw.. Ruati chuan, An tiffin bula an tui bottle chhawp chu lain a hawng a, "Nang ve mai mai hian min khing duh suh" tih pahin a chhipah chuan a leih ta a. A hmaiah te chuan a luang thla nasa, a kamiz var pawh a huh dup mai. 

Peka thiante chuan, "Wow! Va huai deuh ve" tiin an lo on khanglang bawk nen. Tuia leih mai chu duhtawk ta lo chuan a tiffin chu chhuatah a paihdarh sak ta a. Hmangaihzuali, a pa Lawmsanga mize pu, lunglian tak mai ngaihdan a pel ta tlat. A ding a, tiffin chu lain chaw chu a chhar khawm a. 

A chhar zawhah a dah leh thlap. Huh hnuang chungin Ruati hmaah chuan a ding a, "Ka pu chuan chaw hi zah tur a ti. Chaw zah lotu chuan malsawmna an dawng ngai lo a ti" tih pahin Ruati hmaiah tak chuan a beng ta siah mai le. A beng na bawk aniang, Ruati chu a pawi nawk nawk a, desk a va bawh rawk rawk. A thiante pahnih khan, "Ehe! " tih pahin rawn keh an tum a, a petek zauh. Ruati thinrim chuan rak chungin a rawn pan ve leh a, che miah loin a lo nghak. A kut lo mansakin, a herhsak nawk a, a lu chu kuai thlein dawhkan chungah a nem bet a, Chang fek fawk hian, "Tun hnuah vawikhatmah min lo tibuai tawh suh ang che. " a ti a. A thiante bulah a va nawr phei nawk. Zirtirtuin, "Eng nge a.. Eng nge thleng? " a rawn tih tak avangin tumah an che chang zui ta lo. 

Koh an ni ta a. Ruati te chuan, peka a lo ngaihzawn ve avangin tikhan a ti ringawt niin an sawi naa, Hmangaihzuali huh hluam te, chaw mal darh nuaih te leh a thuhretu avangin Zirtirtu te pawn thudik an hai lo. Peka pawh an ko va, Hmeichhe chunga khatiang thil a ti leh a nih chuan hremna pek a nih tur thu te hrilhin Ruati te pawh an zilh nek bawk. Hmangaihzuali erawh huaisen an ti ru viau thung. A chanchin chu a chhungten an hre lo thei bik lo va. Nguri chuan insual that lohzia a hrilh malh malh laiin Lawmsanga erawh chuan, "Engtin chiah maw bawihte, Ruati ban chu i lo herh dan? Han zir teh.. " a lo ti ve sek! Nguri'n rum zeta melh chungin, "Nangpa lah hi.. Kal teh.. I fanu hi insual thiamtir i tum mi? " a ti hlak hlak a. Nauteii leh a pa erawh inhrethiam zetin an innuih vur vur. 

Mapuia erawh chuan a nau chu, "Ti nge min hrilh vat loh, Peka ten i panty rawng an hmuh pawh ka phal hleinem.. Vawikhat tal chu ka kuttum a la dawng ang" a ti thung. An pafa thumin khawsa ho se an ngaihtuahawm awm mang e aw.. 

Chutiang buaina neuh neuh karah chuan Hmangaihzuali pawn class X a zir ve ta a. Tibuaitu a nei ta vak lo. Peka kha class X an exam zawh zanah tu emawin a hnek duk chur mai a! Report erawh an thehlut lo. Hmangaihzuali chuan tuin nge hnek tih erawh a chiang khawp mai. 

Muanpuia leh Saii te pawn fa pakhat an nei ve ta a. Hmeichhia a ni ve hlauh b awk. An duat lehpek khawp ang. Chutihrualin fa a neih hnua a mizia chu a dang chho ta viau mai a. A mize dik tak a lang chho tan ti ila kan sawi sual awm lo ve. Nguri nen an inkarah khi a awm tan a, Nguri'n theihtawp chhuah mah se; amah Saii chuan fing kherek taka tihdan a thiam riau.. 

(Kan la sawi zel ang chu.. Love story ngawr ngawr, inkiss, intih etc. Ai chuan penkual vak hi ka signature a nih ve kha.. Lo ning rih suh u. A la romantic dawn lutuk ania 😂😂