Thutiam Last

THUTIAM- (Last) 

Ziaktu: Toni Râlte

Lawmsanga leh Ngurnunsangi inkarah buaina neuh neuh awm zauh mah se; chelh loh na nâ na chu man inhlan zan an thleng ve ta rup mai. A chhunah Nguri thlahna hun hmangin chhungkhat leh thenawm hnai vai ten chaw hlui an kil ho a. An insensona zawng zawng pawh Pi Sangi'n a tum vek a ni. Nguri tan chuan ui leh i reng a nei ta lo. Nguri pawh a lung a chhe lek lek a ni. Zanah Lawmsanga palai te rawn thawkin, man inhlanna chu an nei ta a. A tukah Aizawlah an phei tawh dawn a ni. Tupawh chu an hlim ni maiin a lang, Dini te nupa leh Pi Sangi U pu Rema te nupa tih loh chu! Ni e, Pi Sangi chu roomah ko lutin, "In leh lo pawh i hminga an dah duh loh a hnu, engvangin nge i insenso duh. Ruai tenau i buatsaih a, i pawisa hmanral kha tuin nge rul dawn che" tiin an khak a ni. 

Pi Sangi a ri ve thak mai. "Ka fanu naupangber tana ka tihtheih hnuhnung ber ka tihna kawngah hian min sawisel turin tuman thuneihna an pe lo che u. Ka pawisa a nia, ka duh dan danin ka hmang ang" a ti ve hmiah mai. 

Dini chuan, "Anih chuan in leh lo tal hi i hmingin thlaktir ta che" a lo ti hlar a. 

"I buaina tur a awm lo ve. A thu thu a ni. Kei te chuan dawr ka nei reng alawm.. He inah hian la chen ve min phalsak ringawt pawh hi ka lawm tawk e" a lo ti leh hmak bawk. An nu mizia danglam ta viau chu mak an tiin an hrethiam lo viau. 

Pu Rema chuan, "A nih chuan i sawi tawh ang khan.. Dawr luahman chu min sem ve dawn ta em? " a ti a. 

Rum zeta melhin, "Ka chak loh leh enkawl ka ngaih em em laia min ensan theite tan hian ka sum dere pawh hi ka thehchhuak dawn lo e.. Dawr luah man te, Rinfela in an luah man te chu keiman ka la vek ang. Nguri'n a mamawh changin a rawn ţhâm thei bawk ang" a ti ta khawl khawl a. 

Dini chuan pawr zetin, "Kei i fanu dik tak zawk hi min theihnghilh tawh a ni maw? " a a lo ti a. Pi Sangi a khi sak. 

"Ka fanu dik tak chuan amah hringtunu a zahpui a, ka hrin loh fanu zawkin tlaivar thak thakin min bawihsawm a. Dini, i nu mizia i hriat kha, ka duh lohnaah min nawrlui lo vang. Vawi khat mah ka inah hian rawn khawtlan tawh ngai bawk suh. I duh leh i pute hi i bel dawn nia. In rilru chhiat dan a inang bawk a" a tih bawrh bawrh hnuah a chhuak zui daih. Pu Rema te an inmelh hrek hrek ringawt. Pu Zairema a thih chiah khan a hlawkna tel tum rana khawsa ta chu Pi Sangi rilru chu an hneh ta thuai a. An tum ruk dan takah chuan Tuna an awmna in leh lo hi Sangi'n chang se, Dawr erawh saw chu Pu Rema pe tura inremsiam deuh kha an ni tawh a. Dini erawh tuna an in hnuai hi an pa nen luaha, a pain ram a pek ve kha hralha sumdawnna bultan an tum kha a nia. An suangtuahna a bo tan chu a ni ta mai. 

"Naktuk ni tawh se.. Tiraw" Lawmsanga chuan a rawn ti vau vau a. 

"Nia, mahse, ka huphurh tawp" Nguri chuan a ti a. 

"A huphurhawm loh, tlan koh ang ringawt a nia.. Lungkham suh ka duat" a rawn ti zangkhai vah a. 

"Ka zak " te chu a han ti kawisawi ve a. Lawmsanga hmel hmuh erawh a chak tawh takzet a ni. A tuk nghakhlel leh huphurh ru tak chungin a muhil ta siai siai a. 

A tukah chuan an chhungkhat hnai zual te nen Aizawl lam chu an pan ta bung bung mai. A pa Rinpuia te inah innghatin an ni lawm pawh an lo phur khawp mai. A tira a buaichuar nen, Nguri thuamchhawm pawh a tam viau lo naa, a changkangin a tha hlawm khawp mai. Amah an khawngaih atalangin a pa lama a chhungten an thuam tha ve bawk êm a ni. Mi vannei tak a ni e. Zanah inhruai mai tur an ni tawh a. A tuk tlaiah Lawmsanga te in lamah chaw hlui an kil dawn a ni. Zan dar 8-ah Lawmsanga te lam chu an rawn kal ta a. An inchei ve deuh naa, tun laia mo thuam tak tak erawh a pha lem lo. An han inhmu chu an lai ve leh hnuhnawh ta vel a. Ni Zami a phawk si, a lo fiam lai zel a. An nui ho dar dar reng mai. Becky leh Mapuia ten an tawiawm tha khawp bawk. Dar 9-ah Pu Rinpuia in atang chuan chhuakin Lawmsanga te in lam an pan ta a ni. A thuam chhawm te erawh a tuk lamah an dah phei dawn chauh thung. Zan zana han rik bung bung kha a tih chi loh ve bawk nen. Ngurnunsangi chu Lawmsanga nupui ni turin a lawi lut ta. 

Becky leh Mapuia te nen roomah an inkawm a. Inleng an nei tawh lo bawk nen.. An meng rei angreng. An hawn hnuah Nguri chuan inbual a rawt ta tlat! A boruakin a uap ve bawk a, a lo thlan nasa deuh pawh a ni maithei. Ihe lo in Lawmsanga pawn a zawm ve thuai a. An inbual dun ta. Inneih zan a nih vang nge mawni dawn ni.. An helhhawlh nge, an awmdan a danglam ve huih mai. Lawmsanga tak pawh ni dang aiin a cool a, Nguri chu a melh leh vawng vawng thin. A lawm a kim hmel kher mai. An inbual zo a, an han inthlak fel a. Becky leisak underware sexy zet chu a ha a. Lawmsanga'n a chil a lo lem khawlh. Nguri'n a va hmu hman si. A nui hawk a, "Em em a che" a ti hlak a. 

Lawmsanga erawh boxer nen a awm mai. Nguri lotion inhnawih chhung pawh chu rei a ti. A inhnawih zo khuma a rawn mu chu a lo kuah nghal thawk. Nguri chuan, "Hmanhmawh siah. Ţawngţai ve phawt ang" a lo ti hlar a. Lawmsanga pawh thuawih zetin a thu chhuak ve a, ri loin an tawngtai dun. An tawngtai zawhah inkuah chialin an mu a, Nguri chala fawp zauhin, "He hun hi ka nghakhlel tawh lutuk a, nizanah phei kha chuan ka tlaivar titih asin" a ti thawm sup a. 

"Kei deuh" lo ti vetu a nupui ni ta chu uluk em ema melhin, duh em emin a fawp ta a. Nupa an ni tawh bawk a, an zalenna chu an hmang thiam kher mai. Ni e, lawi that zan te hi a awm ve ngai e. 

Nguri thawhhai hlau lutukin zing dar 5-ah alarm a set tehreng a, a thawh chuan tumah an la tho lo. Thingpui a lum laiin Bawihtea a lo tho a. Ani hi chu tho hma ve chi hrim hrim a nia. 

"I va tho hma ve.. Bawiha.. Thingpui in ang aw" a lo ti siam siam a. 

"Umm.. Nang pawh i van tho hma" a lo ti ve a. A tawngkam hi a felfai thei ania.. 

"Nia, thawh hma hi a tha.. Exer kan la thin dawn nia" a lo ti ve mai a. Thingpui siamin Bawiha chu a pe a. Eirawng han bawl dawn se a bangbo riau mai si. Chawhmeh thing lah a la tam si, tlaiah lah chawhlui eikhawm an ti si a. Tihtur a vang ta hle. Hmun te chu a phiat zung zung a, Bawiha'n a pi te a va kaitho ta hlauh zawk a. Pi Lawmi'n Nguri tho tawh a va hmuh chuan, "Khai aw! ngurpui, ngah nge hma lutuka i thawh duh,? Tihtur a awm vak hleinem" a ti nghal sawk sawk a. 

"Aa.. Mo thar tirha thawh tlai te chu" a rilru dik takin a lo chhang hmiah. 

"Hahaha.. I rilru chu aw.. Umm a tha vek mai. Mahse, dar 6 hi kan thawh dan tlangpui aw.. Bawiha hi a tho hma thin a, a pa emaw ka phone emaw hi a lo khawih mai zel a. Ni dangah chuan kham hnep hnawpa mutthilh zel tur aw" a ti siam siam a. Nguri awm pawh a nuam hle. A nu nen chuan khawsak an rel dun a, Pi Lawmi mi â a ni lo bawk a, an thil dahna neuh neuh te, an chawhmeh duhzawng leh siam dan te chu a tlangpui a sawi thuak thuak a. Lawmsanga kha a zawt ve tak naa, eirawngbawl vak ngai hek lo, sawi tur a hre tlem nasa si a. Hetia a nuin a hrilh ta chu a lawm viau mai. Mi dang pawh an rawn tho ve tan a, thingpui a lo pe nghal zel a. Fel a inti ve ngang mai. A peih rei ngut ange mawle.. Lawmsanga a la tho ve lo, va kaihthawh tumin roomah a lut a. A bawkkhup zawnga muin a lo mutui ngei mai. A luah a zuk sawi ne ne a, "Lawmsang, tho rawh.. An tho vek tawh. Ka zak ve tho ania" a ti niah niah a. Harhvang ta ngang Lawmsanga chu a rawn meng nghal a. 

"Chhungte bulah zah a ngai mi? " a ti nghut a. 

"Chu pawh nise tho tawh rawh. Vawk te talh a ngai dawn asin" a ti leh a. Meng mang hlei loin Nguri banah chuan a la lawk a, khumah chuan a pawt mu ve nghal. A kuah bet tlat bawk. Nguri a tal aih aih a. 

"Hei, min thlah rawh.. Mawl thin suh" a ti hlak hlak a. 

"Khawih teh" a ti sup duh chauh. Nguri chuan a zuk dap a. A kut a la rang kher mai. Ner nak chungin," Va zung rawh" a ti nghat a. A tho nghal nalh bawk. Lawmsanga pawh rei mu loin a tho chhuak ve a. Khawvel chu a mawi thar riauin a hria, khaw hawi nuam a ti kher mai. Lawmsanga thawh hnu rei vak loah tukthuan an ei ta a. An inbe mang lo, Nguri hi chu chaw ei tlem chi a ni hrim a, a inthlahrun vang zawkin a duh aia tam a ei phah. Chaw eina vel chu Teteii nen an seng fel a. Thleng a sil zui nghal. Teteii pawh a felin a be siam siam reng a, Lawmsanga te upa ber chu a nel lo ber. A tawng tam vak si lo va, bakah a zahawm mah mah a ni. Biak erawh an inbe ve tho mai. Chaw ei kham lamah an makpa te bakah thenawm hnai ten tlai lama ruai tenau an theh tur vel an buaipui a. Inleng neuh neuh an nei bawk nen, Nguri pawn thingpui a lum zing ngang mai. 

Chawhnu dar 2 bawr velah a bungrua, a thuam chhawm te chu ama chhungte leh Lawmsanga ni te ho in an rawn chhawm lut ta a. Lawmsanga room a zau tha tawh bawk a, an han inrem fel meuh chuan Lawmsanga room pawh a changtlung ta hle. Tlai lam an lo hnaih ta der mai. Thenawm leh chhungkhat te pawh an rawn lang ta tuam tuam a. Fatu lam pawhin chaw ei an peih fel ta bawk. Chaw ei hmain hunserh an hmang leh phawt a. An hman zawhah zanriah kil tur chuan an tho ta sang sang a. Lwmsanga te nupa erawh chuan kal khawm te an lo dawngsawng ve a. Lawmsanga te hi an hung bawk a, an rawn thahnem angreng khawp mai. 

"Einch, nuam tawh awm bik. In nu chu ka rin loh deuh hmel a pu" Titu lam chu an hawi rual ţhawt. Lily leh Rampuii an lo ding dun ral mai. Rampuii chuan Nguri a melh ngun kher mai. 

"In lo lang ve ni maw? In va tilawmawm ve aw" Lawmsanga chuan a ti vat a. 

Nguri lam hawiin, "Ngur, hei hi Rampuii, hei hi hman zana lo betu che Lily kha a nih hi," a ti hmiah mai. Nguri chuan, "In va fel ve. Puar deuhin ei ru aw" a lo ti a. A nui sâng bawk. 

Lily chuan, "Keini ber kan rawn lan loh chuan inpa lungawi lo hi kan thlem lungawi zo leh dawn si lo va, kan lo kal râwih a nih hi" a ti hlang hlang a. 

"A lawmawm lutuk.. Va ei ţeuh ru" Nguri'n a lo ti ve khauh. Rampuii erawh chuan Lawmsanga melh chungin, "Nizanah kan rawn lang ve hman ta si lo va, zanin chu lo phei la, mo kan lawm tha ang chu" no zet hian a ti a. 

Nuih huk pahin, "Kan nu thu thu.. A phal leh phal loh" tiin a lo chhang keuh. Lawmsanga chuan chuti taka Rampuii boruak ngam ta chu mak a ti angreng hle. An rui a nih te a ring rum rum. Nguri mitmei ven a ngai bawk si. Mahse, Nguri chu a lungawi lo hran lo tih a hmelah a lang a. A hahdam tho mai. A thian, a driver pui te an rawn lang tan a. An rawn uang nasa hlawm mai.

"Khai! Hetiang lasi te engtin nge i thin chhuah theih zawk? Nguri, in pa hi i hrechiang lo a ni maw? " ti ten an fiam a. Nguri pawn an music a man ve bawk a, a lo nui ve nasa mai. Mi nawlpui ei zawh hnu lamah an nupa leh Mapuia leh Becky te nen dawhkan pakhat kilin an ei ho ve a. An ei lai takin Rampuii leh Lily bawk kha an rawn lut ve. Rampuii leh Teteii hi a hmaa inkawm ve thin, Lawmsanga nen an nih hnu pawha inngaina zui ta zel an ni bawk a, an inkawm bawrh bawrh mai. Nguri te erawh chuan hria angin an lang duh lem lo. 

"I pa khan chhim lam hmeichhia kha chu "Hel hruai lut ang an ni" a ti thin sia, tunah lem chhim nula in mo leh daih bawk sia" Rampuii chuan a ti sak sak a. Teteii pawh a îp deuh. 

Ni zami an bula lo thu ve reng chuan, "Ekhai! Chhim keite pawh nise kan fapa hian a duh hleuh hleuh em a e.. Neihsak loh ngam chi a ni lo alawm.. Bakah i hriat sual deuh, Hnahthial hi chhim kun an ni lo ve. Chhim kun tia an sawi tak hi chu Siaha lam saw an nih hmel.. Tin, mihring azir hi a ni ve a.. Hmar lam nula thatchhe zet, no hlek hluak ai chuan kei ka fapa hian chhim nula viak ţha, kawlh tha tak mai hi nei se ania ka duh ni" a lo ti ta hmawk hmawk mai a. Nguri a thaw hawk. Lawmsanga nen an inmelh ralh bawk. Rampuii chu zak hmel a pu chuang miah lo. 

Lily chuan, "Taka Tete, in mo nu hi hmanni kidnap a nih khan a pawngsual hman lo mi? " dengkhawng zetin a ti ta a. Lawmsanga'n a fian a thlauh ri bawl. A ding nghal bawk. Hriam zeta Lily leh Rampuii te melh chung chuan, "Hei chen ka dam tawh a, nangni pahnih aia lehthiam mawl hi ka la hre ve hauh lo mai. Lo lawr fo tawh lo ula a that ka ring mang e.. " a ti vawt raih mai. Tuman an khap lo. An lo ngei ru ve hlawm lutuk a lo nia. 

Rampuii leh Lily chhuak thlir pahin Ni Zami bawk chuan, "A ve tehsek hian, mo atana in han awhawm loh niak nuak nen.. Mi te chu ka ngainep e te in tih ve khanglan ni.. Chhe dun per pur si" a ti leh pek a. An nui hak hak hlawm mai. Ni zami hi a tha ber mai. Nguri te pawh Rampuii te lam hre chang lek lo vin puar takin an ei a. An han insingsa fel nak nak a, Becky chuan a tukah test a neih vangin Mapuia'n a va thlah hma a. Puia erawh Vairengte lama a pu thihna lamah a zin bo lai tak a ni. Awm ve se nuam a tih ve dawn tehlul nen. 

Inleng neuh neuh an ţin hnuah Pu Mawia'n chhung inkhawm neih a rawt ta a. Amah chuan a hmang nghal bawk. 

"Nguri pawh kan fanu i ni tawh a. Teteii nen laizawn ang in ni tawh. Tlin lohna leh that tawk lohna kan nei ang, amaherawhchu, inrel lo va sawifel mai hi kan chhungkaw duhdan a ni a. I nu bulah hian engkim thlen la, inpa nen in thu a inhmu lo a nih pawhin kan bulah thlen tawp la, intifuh zawk ang. Lawmsanga pawh Nguri dinhmun i hria a, i eizawnna te hi fimkhur ngaihna lai tak a ni a. In la naupang dun a, thikthu te hi awlsam taka piang thei a ni. Chuvang chuan, rinawm takin in inpumkhatna kha in vawng nung reng tur a ni. In fapa Bawiha hi in hlamchhiah hauh tur a ni lo bawk. " tiin thudang pawh a sawi nual. Nguri thla pawh a muang khawp e. An tawngtai zawhah Teteii chuan, "Ngur, Rampuii te tawngkam kha chu engahmah ngai suh aw. Mak ka ti tawp, khatiang mizia kha a nei ngai lo ania. Ngati nge khatia a awm theih tak ni.. " a ti sar sar a. 

"A ho lutuk, ka hrereng teuh lo. A rilru a na ve rih anih kha" Nguri'n a lo ti mai a. A chhungrilah erawh Rampuii ngeina chu a lian ve hle thung. 

An mu leh ta phawt a. Lawmsanga hian mut hun hi chu a nghakhlel ber ziah a nih dawn hi. Hihi.. 

Pi Sangi te pawh a fapa Rinfela nen an khawsa chho rak rak a. Thingtlang lam mi awmpui nula an nei ta bawk. Remsanga fate lah an leng chho zut a, an pi Pi Sangi chuan a duat tawh miau a. Khawhar lem lo takin hun an hmang chho ve naw naw mai. Pathian zarah hna nghet nei lo mah se; an dawr leh in luah man atang ringawt pawn an ni nufa ringawt chu inchawm zo tak an ni. Lalnuna a rawn lang ngai tawh lo va, Pi Sangi lahin a hawi tawh hlek lo bawk. A tirah kimki deuh mah se, an thenawmte an fel a, Kohhranah an kaihruai chho a, inkhawm pawh a pelh ta meuh lo. Mihring siamthat nan khawdur a ngai an tih hi chu a lo dik a nih dawn hi. 

Lawmsanga thianpa Mapuia pawn bialnu fel leh Nguri milpui em em a nei ta bawk a. Becky te pahnih leh an ni pali han inkawp thin chu nui ring thin tak an ni. An nun chu a nuam rih a, an khawhawi pawh a la zang khawp mai. Nguri pawh a dul puar ve deuh tawh mah se, class a kal ve zel a. An zirtirtuten an hrethiam khawp a, lehkhathiam a lo ni ve bawk nen.. A hma tluk lo mah se, a rual pawl tawk chuan a la ti chho ve zel e. Joela erawh a leplerhna thlah thei hek lo le.. Thanpuii'n a tuar thei ta ngang lo va. Amah Joela zawk chu an in atangin a chhuahtir ta mai. A bialnu nen an han inpawm zui ve mai bawk a. Mahse, a bialnu chuan thla khat pawh an inneih hmain ngaihzawng dang a neihsan ve lehnghal a ni. Hei hi chunglam kut a ni tih loh rual a ni lo ve. 

An inneih atanga thla khat vel chhung kha chu a chhungkaw tharte mizia zir reng rengin Nguri chuan a hun a hmang a. A rilru a hman nasat vangin a tla kuam thei. Mahse, a hrechiang chho zel a, mi rilru tluang chhungkua, kheuhbeuh ve lo, thil a nihna anga tlang taka sawi rawt thin an ni tih a hria a. A miziaa thlak danglam ngai te pawh a thlak ve zel bawk. Lawmsanga fapa Bawiha lahin a ko zing thin khawp mai. Kha chen, "Anu" tih tur nei ta lo chu koh tur a neih takah chuan a zawngchhang nawn awn awn a nih dawn hi. Nguri tak pawn a awm loh chuan reh a tiin a khua a har hial tawh thin. Lawmsanga nitin a la service a, Zu pawh a in ngai ta lo. Puitling takin thil a ngaihtuah chho ve ta niin a lang. 

Teteii erawh phaiah hnathawkin a chhuk leh tawh a. Nguri nen an inbe nasa thin. Nguri te exam a lo thleng a, an pain a va hruai thin a. Rai puar chungin a exam tluan ve parh. A confi em em lehnghal. A zirna chu a zo ta phawt e. Pu Mawia'n, 'Naute hi han nei fel la, leikang chho se hna te chu kan la dil dawn nia. In pa sum thawhchhuah ringawt zawngin i duh leh mamawh a phuhru zo lo palh ang.. " a ti diam tawh a ni. 

Naute pawn thla 6 a rawn kai ve ta. Nguri chuan rai no huat pawh kha a nei vak lo aniang, a han puar hnu phei chuan a itawm zual sauh, a thau deuh kâng mai a. A inzo lah lah bawk a, a la che thei viau. A nu hian che vak tawh lo turin a han ti thin tak naa, awm mai mai ringawt chu a inthlahrung ve bawk si. Tlaiah hian Lawmsanga hi a rawn haw hma tawh thin a, dar 5 bawr velah an veng kawngah an walk thin. Bawiha an hruai tel thin bawk. Lawmsanga hretu te chuan chuti taka nupa inhmeh leh inngeih an han ni ta chu an lawmpuiin hmuh nuam an ti khawp mai. Tlai khan an walk chu an rin loh deuhin ruah a rawn tla phuar phuar mai a. Tlan hawna hman awm hek lo, Lawmsanga hmelhriatte inah an peng ta ringawt a. Vanduai asiamin Rampuii leh a cousin Tuai an lo awm ve hlauh mai. Nguri chuan nuam lo a ti ru hle. 

"Kan va inhmu khat ve. Ls" Rampuii chuan a lo ti var a. 

"Nia mawle. Kan buai ve deuh bawk a. I la chhuk lo a ni maw" a ti ve mai a. 

Nguri lam rawn thlek pahin, "Inpa hi i thunun mah mah ange aw. Lawmsanga hian thunun a ngaithei lo teh mai a nia. I la hawi lawl lawl mai ang" a ti deuh hmak hmak a. Nguri chuan chhan ngaihna vak a hre lo. 

"Kar lehah chhuk ka tum a, ka chhuk hma chu inthlahna nei ila.. Lo leng rawh aw.. Sunday zanah" Rampuii bawk chuan a ti leh a. 

"Thlahtu i ngah ang chu, keini patling thlah kher a ngai hleinem" Lawmsanga'n a tih hmak avang chuan Nguri tawng tum pawh a insum leh. 

An va luhna chhungkuaah an nu ber leh a fanu kum 10 bawr vel chiah an awm bawk a. Rampuii chu a zâm vak lo a ni mahna le. 

"Lawmsang, heti taka i lo danglam ta hi mak ka ti. A hun laia min duh huam huam nen, he zawngchhenu, chhim kun nu vang maia kei thlenga min thlauhthla hi ka lawm lo" a ti sehchilh nak a. A rui tih chu an hmu thiam vek. 

"Rampui, tiang tak hian i lo nasa ang tih hi kei pawn rinthiam harsa ka ti. Ti nge zu te hi i in i in ve tak a. A zia lo em mai. Tha takin awm la, pasal tha tak nei rawh" Lawmsangan a ti a. 

Nguri a rawn dinchilh, a pum puar âk tawh chu a kut saipira kawk va chungin, "He naute hi Lawmsanga fa a nih pawh ka ring nek lo ve.. Kidnap tu che fa kha a niang" a ti ta a. Nguri chuan engtik laiin nge Rampuii hmaiah a ben a inhre hman lo. A harh chhuah chuan Rampuii chuan a hnar a lo hup a, a cousin chuan a lo kuah bawk. 

Inneitunu in a rawn dinchilh ve bawk. "A zia lo hle mai. U Hmingte, min hrethiam aniang chu" Lawmsanga'n a tih mek laiin, Rampuii chuan thei leh thei lo hian, "Zawngi, thisen min chhuah a maw? I hre dawn khawp e. Zaninah Police hmel i hmu ang. Ka ngawi mai mai dawn lo" a ti tân tân a. Hmingi, inneitu chuan, "Duhtawk ru, naupang an awm hi. Rampui, min chhuahsan ru, hetiang mi nasa hi inlengah pawh ka duh lo. A khawih hrep lo che a i vannei zawk anih kha.. Lawmsang, pawi ti reng reng suh u. In nu kutthlakna kha a awm lutuk, kei ni ila ka hnuk ang" a lo ti riap mai. Ruah a tam vak tawh lo bawk a, Rampuii te chu an inkuah chhuak ta a. Nguri te erawh a han vek tawh hnuah chauh an haw. Bawihtea an hruai loh ni a lo ni kher a, a lawmawm zawk ngawt mai. 

Zanah, "Beiseina i pe em ni? Engvangin nge kan laka huangtau saw a sim theih loh? " Nguri chuan a ti tân tân a. 

"Sawtiang sawn a nasa tih ka hre bik lo. Beiseina maw.. Huh,. A sawi pawh ka sawi peih lo" Lawmsangan a ti bawk si. Tlai lama thil thleng kha an chhungte bulah an sawi lem lo va. Nguri'n sawi a phal lo a ni. 

"Apa, anu, api ten lo kal ru an ti" Bawihtean a lo ko a. Sitting roomah chuan an va phei. Pa pahnih inla puithu hmel zet hi an lo thu ve a. A ngaihna an hre chiah lo. 

"Hei kan lo kal chhan chu, Rampuii nu leh pate lungawi loin min rawn tir a ni ber e. Tlaiah khan kan nau Rampuii chu in mo nu hian thisen chhuak zawih zawih khawpin kut a lo thlak a niawm a. Chupawh thikthu vang maiin.. Kan lungawi vak lo va, Police hnena thlen êm chu kan tia, ngaihdam dilna phutin kan rawn kal a ni" Pakhat zawk chuan a ti ta a. 

Nguri ding tur Lawmsanga'n a pawt thu vat. 

"E.. Ka pa te ka'n ţawngkhalh mai ange. Ni e, vawiin tlaia thil thleng kha a zia lo khawp mai. Mahse, ka nupui hian ngaihdam a dil lo vang. Rampuii te zawk khan ka nupui hi mawi lo taka a tawng khum vangin ngaihdam an dil zawk tur a ni" tiin thil thlen dan zawng zawng chu a sawi ta mawlh mawlh a. Pu Mawia te nupa pawh an ngawi kar mai. 

Palai pakhat zawk chuan, "A lo nih reng tak chu a.. Hmingi pawh la zawh ve hrim hrim a tha a nih chu.. Ni e, in hun hlui vang hian buaina neuh neuh in la neih ka ring reng a ni. A zahthlak hle mai" a lo ti ve thluam a. Rei pawh an awm lo. 

An haw hnuah Pu Mawia chuan, "Ka famo chuti taka dengkhawnga lo tawngkhumtu chu ka va nuai chak e" a ti riap mai. An nuin a khap vat. 

Nguri chuan, "Lawmsanga zik zek hi alawm. A be tha hâwrh a, biak loh mai tur a nia. Beiseina a neih phah zel a. Hetianga buai reng hi ka peih lo ania. " tih pahin an pa a melh tur khai a. 

"Ni e, Mama, inveng deuh tawh rawh. Sawtiang hmeichhe nasa saw chuan zah an hre si lo va, in la buai phah zêk ang tih ka hlau" Pi Lawmi pawn a ti ve. Lawmsawnga a hawi a hawi ringawt. Chumi zan chuan Nguri chuan kuah pawh a duh lo. Sik hlek pawn a ţeu hlar mai. Lawmsanga erawh a lungawi lo hran lo va, an nu tihlawm dan tur a ngaihtuah rauh rauh mai. 

A tuk zing Nguri tho chu a fapa nen lehkha an zir dun a. 

"Anu, lehkha hi ti nge zir a ngaih le? A ninawm si" a ti a. 

"Bawihte, nakin zelah i tlangval hunah mi dang tibuai lo va, nangmah i inchawm theih nan lehkha i thiam a ngai alawm. Chuvang alawm lehkha i zir" a lo ti dam thlap a. 

"Mahse, apa pawn a zir twh loh hi" a lo ti khauh. 

"I pa chuan lehkha zir aiin motor khalh a thiam zawk a. Tihian nitin pawisa a va thawk chhuak alawm. Nang chu Doctor i nih dawn kha. A pi leh a pute dam loh hunah pawh i enkawl thei dawn a, a tha asin" a lo ti leh a. An titi laklawh em vangin Pi Lawmi rawn tho chuan a va pawh duh lo. An thusawi erawh a bengkhawn ru reng. 

"Anih Anu, naute hi ka nau a ni dawn tiraw? " tih pahin a nu dul puar luah chu a melh a. Nguri chuan a sama va chul pahin, "Aw.. I nau tur a nih hi, i duat loh vaih aw.. "A ti a. Bawiha pawh a khi var var mai. 

"Anih Anu, ti nge ka tetlai te khan nangman min awm ngai loh, a pi te bulah hlir ka mu a" a ti leh nang nang a. Nguri a ngawi det.. Fim taka ngaihtuah chungin, "Bawihte, ih, lehkha ka zir kha a la ngai sia, i pi te hian phaiah min dah daih a, an lo enkawl che alawm.. Tunah chuan i bulah ka awm zel tawh dawn" a ti ta a. Pi Lawmi hnuk a lo ulh hmanhmawh. 

Lawmsanga a tho duh der lo. A fapain a va kaihthawh chuan, a fapa beng bulah, "I nu bulah 'Apa saw a sa vek.. Ih, a meng duh bawk si lo' va ti rawh. I pi te hriat lohin aw" a ti sur sur a. Thuawih thei tih takah a va tlan tar tar a, anu chu pawt hniamin a hrilhru ta sur sur a. 

Nguri chu hmanhmawh takin roomah a phei. Lawmsanga a lo inzial mum tlat.. A pang a va dek a, tlem chuan a lum. 

"Hei, i harh em? I khuasik mi? Lawmsang" tiin a sawi nawk nawk a. Rawn meng thutin, a rawn kuah chut. Nguri rai puar kawh tawh inzo tha thum tawh si lo chu a kuai thlu a, a inrin loh laiin a hmuiah a fawp ngawt ngawt mai. 

"Kal teh.. Mi phakarpa.. Tho vat rawh" Nguri'n a ti hlar a. 

"I tihtauh hian khawvel a thim vek zel mawle.. A mak tawp"a lo ti duh chauh. A tho ve ta ţuih ţuih a. Nguri pawh a titau zui ta lem lo. 

Tukthuan an ei laiin Rampuii te vel chu an sawi leh a. An reh tak daih danah an zak a nih an ring. An reh anih chuan va tihlet leh kher chu tul an ti hran lo. Karleh lamah Rampuii a chhuk ang a, buaina chu a kiang mai ang. 

Hun a kal a, a kal zel a. Nguri pawh a nau neih thla a lo thleng ta reng mai. A dul kawh danah mipa a nih te an ring a. Lawmsanga hi chuan sawi ngam lo mah se, hmeichhia a awt. A chhan chu an thlahte a pa lama an chhungte bakah a unau ten hmeichhia an la nei miah lo. An mipa rual the thaw khawp mai. 

"Lawmsang, ka pum a na lutuk" a nupui aw tham chhel ri a hriat rualin a inperh tho zawk a. A nu te a va kaitho nghal. Hmanhmawh takin Damdawiin hnai berah an tlan ta nghal a. Nguri a vannei, nau a har lo hlauh mai. Rei pawh a vei hmain a hring ta mai. Naute ţap ngâk ngâk ri a hriat chuan a khi sak. 

Nurse rawn chhuakin, "Hmeichhia a ni e" a rawn tih takah chuan, Lawmna leh hlimna nui riin a khat a ni ber e. Pu Mawia lawm lutukin a makpa upa ber biain, "Kel leh ui lei tur lo zawng rawh. Vawksa leh bawngsa erawh in nu te khan bazarah va lei se.. Kan colony ei khawp tur.. Tunu ka nei ta e" a va ti. An hlim a ni e. 

A hming sak an han inchuh nghal pang a. Mahse, patling leh nutling pui pui karah naute Ú chu a thu ber ta tlat. 

"Anu pawn a hming i phuah dawn nia a ti vek tawh. Ka phuah dawn. Hmangaihzuali ni rawh se.. Ka koh dan tur chu Nunuteii " a ti hmiah mai. Tuman an hnial ngam lo! 

Lawmsangpuia leh Ngurnunsangi te hringnun khawvel chu hlimnain a bawm a. Hausa le lu lo mah se, fanu leh fapa an nei a. An tan nun chu a nuam ta. Pi Lawmi te nupa lahin an famo chu sawiselna tur leh han rel chhiatna tur reng an hre lo. Pi Sangi te lam lahin an makpa Lawmsanga felzia leh makpa nih a tlinzia te, an makpa te chhungkaw thatzia bak sawi tur an hre meuh lo bawk. Rinfela pawn Hmangaihzuali thla hnih a nih laiin nupui a nei ve ta bawk. Chhungkaw vanram an tem ve mêk a ni. 

"Hmangaihna dik tak chuan a tawpah hlimna a thlen ţhin" 

(Tikhan Lawmsanga te chu kan mangtha ang a. Season 2 a awm turah ngai ang. Hmangaihzuali hringnun kal zel karah a nu leh pa te inkara buaina neuh neuh te, hringnun a ngai renga a kal theih loh dan leh Bawiha (Vanropuia) nuna thilmak thlengte.. Engkim zawng zawng chu Season 2-ah kan hmu leh turah ngai ang aw..ka'n chawl hahdam ve lawk ang e. Ka duatte u.. Ka rei lo vang 😍😘 ka lawm vek e.