Thutiam 9

THUTIAM - 9

Ziaktu: Toni Râlte

An nghahhlelh em em weekend a lo thleng ta. Am sawi lawk tawh angin Lawmsanga te huan Sihhmui lamah weekend chu an pahnih chauha hman an tum a ni. Nguri pawh a phur kher mai. A rai tih Becky chiah a la hrilh, a lawmpui thiam ngang mai. Becky pawn biak ngawrh deuh a nei ve chho ţan a, a move on ve ţan chu a ni ta reng mai. Ni e, tawrhna hi hmachhawn dan hrang hrang a lo awm a. Inngaihzawnna vanga tawrhna hi chu ni hnih thum vel hi mahniin han tuar tlawk tlawk phawt ila, chumi hnuah kan thinlung hi mi dang tana hawn ţan leh mai hi a pawi tawh lem lo. Khawhar a hnem bakah kan ex te laka kan give up theihna chance sang ber pawl a ni ve tlat. An ni pawh kan tel lo va an nuih hawrh hawr theih chuan, an tel lo va thih tum bik miah loh tur.. 

Remsanga paw'n A pa Rinpuia (A pa cousin) biain Nguri chungchang te chu a hrilh ve a, sawn man te pawh a remchan huna inţhing turin an inti a, Pu Rinpuia chuan Nguri chu a ui angreng hle. Inpawh em em lo mah se, Nguri pawh hian tlawh ve leh zauh a ching a, An ni lamin Nguri an hmuh dan chu, nula fel leh vengva tak, mahni inhai kaw mi; lu zo ve tak niin an hria a. Mipat hmeichhiatna kawnga pelhe turah an ring phal bik lo a ni. Mahse, a nih nih an ni zo tawh si a, Lawmsanga pa te bula sawn man thin chu an hmabak a ni ta mai. 

"I hman tawh em? " Lawmsanga'n a rawn ti a. 

"Hman tep.. Thawmhnaw ken tam a ngai lo tiraw? " a ti a. 

"Ngai lo, i ha hman vak dawn chuang lo 😄" a rawn ti a. Nguri pawh a khi hui mai. Becky lahin kal ve a chakzia a lo sawi sek, mahse, a kal ve a rem si lo. Advance honeymoon an hmang dawn a ni deuh ber e. A insiam zawhah a rawn lam a, muangchangin Sihhmui chu an pan ta. Chawhmeh leh eng ilo an lei lawk vek bawk. A dul chu a rawn zut sek a, "Naute angin a la awm lo, a mak teh sek em mai" a lo ti hlar a. Lawmsanga inthiam chiah lo chu a khi hui ringawt. 

"I nu chungchang kha" a ti hman chiah, "Ka sawi peih lo" a lo ti hlar bawk si. 

"Sâwn man chu min rawn ţhin kher a ngai lo asin le.. Kan innei dawn tho sia" a ti leh a. 

"Ka ú in a ti tlat sia lawm. Ka hre tawh bik lo" a ti mai a. Zai an play a, an zaipui vak vak. An aw a ţhing dun ropui sia, an han nui leh vak vak thin. An hlim a ni. Lawmsanga te huan peng an thleng a, motor a lut thei vek a, kawng erawh a te deuh. An huan hi a zau over lo naa, a pa hian a tir phat atangin a buaipui peih a, thei lam pang a ching uar hle. Kuva leh coconut phei chu an chhawr tawh viau, Nimbu pawh a hmunah hlawhfa ruaiin an sawr chilh mai zel a. An huan atang hian sum thahnem tak chu an lalut tawh a ni. An tuikhuah pakhat zawkah lah sangha man tur an awm reng bawk a. Pakhat zawk erawh chu kal changa han chen ve nan an tia, a thianghlim viau bawk. Huan an thleng chu Nguri chu a phurin a hawi nasa ngang mai. A hmun a dai raih mai a, engkim chu a romantic vel vek a ni ber mai. Thlam lian tha ve tawk tak lam panin an inkhai bawr phei a, a chhung pawh a thianghlim khawp mai. An han indah fel a, pher lian deuh lo awm chu an phah duai a. Thlifim dawngin namthlak lam hawiin an mu a. Phone an incheck sak tawn ve ve. Lawmsanga rawt chhuah leh bawk a nia. He pa thikthu chhe turu buru hi engtia han tih chi nge mawni dawn le.. Mahse, Nguri hi a rinawm ve êm mai a. Thik luih ţalh pawh tum se chutiang awm tur chu an awm hlek lo. Aldrina lah kha a chhang tawp hmak bawk si. Nguri pawh chuan thik tur a hmu hran lo, a nupui hlui Ruthi msg erawh a chhiar ngun khawp mai. Lawmsanga chhan dan teh tawp chu a duhkhawp lo khawp mai. 

"Heti lo deuhte hian reply ve la.. Min zahpui a nih kha" a han ti khawmawi ve ngial a. 

"Khatia chhan baka inngaihnepna a awm ami? " a lo ti si. Nguri a dang leh tawh. 

A fapa nungchang leh mizia te, nakin atana a hriat lawk atana tha te a hrilh ve keuh keuh a. Nguri pawn a ngaithla uluk hle. 

"Min ngainat i ring em? " a ti sap a. 

"Ring.. A hmuh hmasak ber tum che pawn, 'Anu' a tih che kha.. E chuan, hmanni Mother's day khan i bulah ka sawi duh lo va, ka nghing dawt thei mawle. A rawn haw kha, a pi bulah, 'Api, khaw nge anu? Ka wish ve duh' a tia.. Kan hrilhhai teh asin" Lawmsanga chuan a ti a. Nguri chuan a kut a va vawnsak a. 

"Ka awm tawh alawm.. " a ti a. Lawmsanga chuan duh em emin a rawn fawp a. 

"Chhunah chuan ka duh lo" Nguri'n a tih pawh chuan.. 

"A nuam lutuk, chhunah hian.. Hawh," Lawmsanga'n a ti tlat si. An ti leh ta nge nge e. Innei tawh tur tho an ni sia, an pawisa vak tawh lo chu a ni ber e. An zawh felah a lo chawhnu lam deuh bawk a, tui cheng turin an inzui chhuak a. Nguri hi tui hlau deuh, a khup chen pawh dai tha ngam mang lo a nia. Lawmsanga a uang duh si, A pawm kang lawp a, a nghawng chenah a dintir ta mai. Nguri rak chhe nasa lutuk chu a lo nuih tlek tlek thung, mawl lutuk. Nguri a tap pur tawh si. A va kai chhuak ta nge nge. Lawmsanga hnungzangah a beng kawrh kawrh a, "Han ching leh vaih teh.. Ka kalsan daih ang che" a ti ţap ţiau a. Lawmsanga a rawn pawm bet nghal thlup.. 

"Khawiah pawh kal rawh. Ka zawng chhuak zel ang che. Min hlata i awm hi ka phal dawn lo bur " a ti sup sup a. 

An inbual dun a. Nguri sam chu suk sak ve teh a tum a, a zei hlawl si lo. An han nui leh rih. An hlimna chuan van a tawng hial ang tihtheih tur a ni e. An lawmpuiawm ngawt mai. 

Pi Sangi, Nguri nu erawh a thu túm vuau reng a. A engtihmah a nuam thei lo. A insehruh leh ţeuh thul; a fapa Rinfela lakah te chuan a thinrim a han hrithla leh rih thin. Rinfela pawh chuan a ning ta deuh nge, "Eng nge maw i hriat le? A duh a tawng a ni ve mai. An inhmangaih chuan a tawk. Eng nge i huat viau? I fanu a ni lo mi? " a ti hial a ni. Chumi tuma Pi Sangi mitmeng chu a tur tha kheih khawih hle. Engmah erawh a sawi lo. 

Tlai dar 4 bawr velah, "Ka chhuak lawk dawn ania" tiin a chhuak a. A nutapa te in lam a pan ding nghal. Pi Sangi te hi an zik a bul deuh a, unau pahnih chauh an ni. A va luh chuan a monu chuan eirawng a lo bawl mek a, a ú erawh hahdam hmel zetin thutthlengah a lo thu thluang diai a. Sangi a hmuh veleh, "Lo kal rawh" a lo ti vat a. Naupangho erawh an leng nge an thawm a reh khawp mai. 

"Kan Ngurnunsangi chungchang bawk a ni. Engtia han tih chi nge mawni dawn le.. Zova te nen lah kan inremsiam tawh si a. Ka buai riau tawh a ni" a ti nghal bawrh bawrh a. 

"Tuithlar pawh chu a huam tihna em ni? " a ú chuan a ti a. 

"A huam aniang, engmah a rawn sawi tawh lo. Zova lahin min rawn be reng tawh bawk sia. Nguri chu ka va ching chak tak" a ti leh hlak hlak a. 

"Zova te laka i inremsiamna kha chu dah tha la, Amah Nguri hi hneh dan a awm mai lawng maw? Pasal a neih tawh ber te chuan in leh lo te chu a rawn chuh duh tawh bik nang, a hminga awm pawh nise" A u chuan zaizap deuhin a ti dap dap a. Chu ngei chu a nih chu Pi Sangi'n Nguri a lo ngaihtheih loh em em chhan chu. Mahse, hei ai hian thil hi a la ril ru zêk maithei a ni. Engvang chuan a nupui pawh awm ve renga, a fanu naupangber tan chuan in leh lo chu Pu Zairema khan a dah ang? Chhan tha tak zawng a awm chiang ang. 

"Rinfela hian a hre tawh em? Ani pawh hian hria se lungawi lo tur zawng a ni ve bawk asin" A u bawk chuan a ti leh a. 

"Hre mah se, ani pawh in pakhat pek tho a nia, a lungawi lo hauh lo vang. Zawnga kha ka hua a ni. A thih hmaa kan sign tir hman lo kha a pawi ngawt mai" Meng sen râm chungin Pi Sangi chuan a ti hlawih hlawih a. A u chu a hawi zak zak a, "Insum thin teh. Mi hi an bengvar teh mai a nia" a ti sur sur a. Pi Sangi pawh chu a tawng zawi ta deuh. 

"Zova chu ka bia ang a, kan inremsiamna ka bawhchhiat thu ka sawi mai ang. I sawi ang chuan Nguri zawk chu a rilru hneh kan tum mai aniang chu.. Harsa dawn hle mah se" A ti nghat nghat a. 

A u pawh chuan, "Chu chu a tha ber. Tunah chuan nau hial a pai tawh a, Zova te tan pawh neih tlak a ni tawh chuang lo va, an hrethiam em em ang. Kawng harsa zawk kan zawh rih phawt a ngai a nih hi" a ti ve bawk a. An inhriatthiam dun hmel khawp mai. An hmel pawh a inang, an rilru pawh a verther dun ngawt ta ve ang. 

Remsanga leh Achawii pawn Nguri te chungchang bak an sawi ngai meuh lo. 

"Ka pa thih lai te khan a lo rai reng tawh awm sia.. Ka khawngaih zawk mang e" Remsanga chuan a ti vawng vawng a. 

"Ni ngawt mai. A duh ber a tawng a, a lawmpuiawm tho alawm. Pathian zarah harsatna tawk lovin an innei thei ngei turah ngai ang" Achawii pawh chuan a lo ti a. 

"Ni e, kan buaipui eraeh a ngai dawn tih theihnghilh lo la, Aizawla lawi tur meuh si chu thuam chhawm te pawh tlema changkang ve deuhte pawh kan ngaihtuahsak a ngai dawn a nia. Ka GP hi ka withdraw mai ang. Eng nge ni vei, ka farnu tan te chuan.. Ú ber alawm ka nih le".. A ti nghut nghut a. An nu pawh chuan a lo pawmpui hle. 

"Paa, sawi chi a ni em tih chu ka hre lo.. Thil dang daih, ka nu zawk hi a ni. Nimina bawiha te school kal tur ka va thlah khan ka nu te kawmchhak te mo kha, "Pasalte mitmu em pawh a keh hmain bialpa a nei ania" a tih ka hre ru tlat a ni. A hming a sawi chiang viau bawk sia, mak ka ti viau a nia" Achawii chuan a ti ta a. Remsanga a thaw hawk. 

"Nih pawh a ni mai mai ang. Ka pa damlai atanga an buai rukna fo kha a ni tawh reng a, kei chu ka pa thih dan te kha ka ngaih a la tha thei reng reng hleinem.. Nupa kan nia, i bulah ka sawi a ni mai a. Han chhui chiam chi a ni si lo va, ka thinlung na hi a reh thei reng reng lo asin" Remsanga pawh chuan a lo ti ve a. Ngaihtuah lian tak a nei tih a hmelah chuan a lang chiang ngei mai. 

"I va chhem khu thiam ve.. Eheu! Ti nge i ţap law? " Lawmsanga chuan coconut pawm chung chuan Nguri chu a melh reng a. 

Tum bâr chungin, "A alh thei hleinem.. Kha.. Ti rawh" tih leh chhemthei pek a rual nghal. Eirawngbawl tur khan a chhuahsan ve kha a nia. Chaw takngial pawh a la chhum hmin lo. Lawmsanga chuan nui ruh ruh chungin thuk chu a thai a, thingtuah te chu a siam tha a, a chhem ta phút phút a. A alh nghal mai. 

"Umm.. Ei tlai mai ang aw.. Chaw hi hmin se. Maian bai ila, lehlamah sawn sarep hi kan chhum dawn nia" a ti sauh sauh a. Maian va lain, an hîk dun a. 

"Eirawngbawl ka thiam loh vang a ni lo ania" Nguri chuan an ti ngawt a! Lawmsanga a nui thut.. 

"Hmela, min nuihzat suh. Ka thiam lutuk" a ti ve ţâng ţâng. 

"I thiam lo ka tih loh chu, bawihno"

"Min nuihzat alawm" a tau laklawh tlat. 

"Lawk aw.. " tih leh thawh a rual a, thlam bang chhak lama darthlalang lian lem lo tak chu va lain Nguri hmaah chuan a keng a. Nguri biang dinglam mang vek chu a rawn lang ta a. Nguri pawh a nui ring kher mai. Zan dar 7 pelhah an inbawl peih ve hram.. 

"Duati, min hau miah suh aw.. Min hau lo vang tih intiam lawk rawh" Lawmsanga chuan a ti te te a. Nguri lahin a music a lo man rang nasa, "Rawn phawrh mai mai teh. Ka lo bituk sak ang che" a lo ti nghal hmiah. Lawmsanga a khi hui ringawt. A zu ken chu a rawn phawrh ta a. Nguri'n zanina in tur a lo fix thlap sak. Lawmsanga pawn a hnial ngam lo. 

Chaw pawh an ei hnem dun e. Thla lah chu a eng nasa mai si. Thlam namthlakah thla eng thlir pahin an thu dun a. Thil hrang hrang an sawi dun. Lawmsanga mak tih zawk chu a tuina lam zawng engpawh Nguri'n a sawipui ve thei zel chu a ni. Chutak chu a ni a duhna tizualtu chu.. 

"Sangi chuan a thu a rawn sút leh a. A pawi lo mai. Nguri chu ka rin a ang lo hle tih mai loh chu" Pu Zova chuan Aldrina hmaah chuan a ti a. 

"Kan intawng har deuh a ni" Aldrin chuan a ti sup. 

"Lungngai suh. A dang kan hmu leh thei mai ang. Nguri chauh an awm hleinem" a pa chuan a ti a. 

"Mahse, ka nu hi a kal mek chu a nih si hi.. Ka pa" Aldrin aw chu zawi hle mah se, a pa bengah a ri ring viau thung. 

"Huiham.. Eng nge kan tih leh ang aw.. Ngaihtuahna pawh hi ka seng thiam tawh lo a ni e. I pawimawh. I chet chhuah a ngai" hah hmel zet hian Pu Zova chuan a ti a. 

Tumruh hmel zet hian Aldrin chuan, "Ngurnunsangi chu a duh dan ang ngawtin ka awmtir lo thei em em ang. Tihtheih chu ka la nei ang. Pastor ka ni tih erawh theihnghilh a ngai dawn a nih hi.. Mahse, engkim hi ka nu tan a ni. Ka nu tan vek" a ti zawi sup a. A mitmeng alh hlep hlep chu a pa pawn mak ti zetin a lo melh reng a. 

"Mi sawi dan che hi kan hai emaw ti suh. Engtin nge i theih zawk? Ka pa mitmu em pawh a la keh loh hi? " Remsanga chuan aw khur dawt dawtin a nu chu a bia a. Rinfela leh Dini pawh an awm. Sunday a ni bawk a tiin an uanu hova a nu teina chaw eikhawm hi Remsanga'n a rawt a ni. Dini pawn a pasal leh fate a hruai lo. Achawii te nufa pawh an rawn kal lo. An zinga kim lo chu pa ber Pu Zairema leh Nguri te an ni mai e. 

A nu chu confi zeta dak vauhin, "Tu phiangsen chuan nge min lo sawi a? Ka duh duh danin ka awm thei. Tuma thuhnuaiah ka awm lo ve" a ti sak sak a. Remsanga a thaw hap.. Ten hmel zetin a nu chu a melh a. 

"Ka nu, uire ang i la ni asin.. Ka pa lung phun chu sawi loh, a mitmu em pawh a la keh lo ka tih mawlh mawlh chu. Nang chu i zak lo pawh a ni thei, i fate hi kan zak a ni" a ti ta a. Dini te erawh an ngawi reng. 

"I fate kan zak e a? Nang hi i lo zak ve a maw? Ka fapa dik tak angin tawng lo mai teh.. " a ti vin thak a. Remsanga a tawlhhnung dãwrh. 

"Eng nge i sawi? " a ti tham ţuak a. A hamhaih takzet a ni. 

Zâm map lo vin meizial a ţan te te a, nui hmel pu lek lek hian, "Rinfela leh Dini te chiah hi ka thisen, ka fahrin in ni. Remsanga leh Ngurnunsangi te nen hian eng inzawmna mah kan nei lo. Remsang, nang hi i pa nupui hmasa fa i ni. A hrin che avangin a thi a, I pa in a la ta che a ni. Tichuan, Hnahthialah rawn pemin kan intawng a. Ka fapa anga enkawl chein tun dinhmun hi i thleng ta a nih hi.. Ka laka lawmthu sawi i ba nasa hle a nih chu.. Ngurnunsangi erawh i pa fa pawh a ni lo va, ka fa pawh a ni hek lo. I pa khawngaihna ngah phiangsen vangin kan in chhungah a lo lut ve chauh a ni. Ni e, Zirna avanga hostela in awm chhung khan Manipurah kan zuk zin dun a, chutah chuan Ngurnunsangi hi kan tawng ta a ni. A nuin khawlaiah a paih a, miin lo hmuin hnuchham inah an lo dah a. I pa khan a enliam thei ta ngang lo va, fa a tan a la ta a nih kha.. Nakin thlenga amah a inkiltawih loh nan tiin keimah chu rai puar der turin min la ti zui a. Rei tak Manipurah kan zuk awm phah nghe nghe kha.. Tichuan, naute nen kan rawn haw ta a. Thenawm khawvengte chuan ringhlel ru deuh si, ringhlel ngam si loin an rawn en laih laih a. Kei lah kan zin dawn khan ka rai awm an hre si lo. Mahse, i pa khan a hum tlat a. Kan fa naupang ber nihna chanvo a nei ta a ni.. 

Tikhan engvangin nge Ngurnunsangi lakah hian ka danglam bik tih chu in hre tawh ngei ang. I pa damlai kha chuan a chungah kut ka lek ngam ngai lo va, a chhan chu i pa khan a hmangaih êm a ni. Kei pawh hian ka hmangaih lo ka ti tawp thei lo, a tette atanga pawma awm seiliantu ve tho ka ni miau a. Mahse, i pa hmangaihna a dawn nasat bikna khan rilru dik lo min puttir lo thei ta lo a ni. 

In la hre dawn tho bawk a. Ka'n sawi tlang law law a nge. I pa khan a thih hma khan fel takin thurochhiah a lo siam vek a. Tuna kan chenna in leh lo hi Ngurnunsangi hmingin a lo dah a nih chu! Vengthara Kan in saw Rinfela tan, Electric venga kan ram saw Dini tan. Venglaia hmanni lawka a lei dawr leh a hmun saw ka hmingin a dah ve hram a, Remsanga erawh tuna i awmna saw i hmingin a dah nghal. Han ngaihtuah u la, a nupui ka ni a, engkim hi ka ta tur a ni asin. Ka la dam chhung chuan ka ta vek tur an ni.. Chu chu ka buaina a ni ta a ni. Tikha chuan min dem tawh lo vang chu.. A chiang em? " A ti chang ta fak fak a. Boruak chu a ngawi dúk mai. Dini hi chuan Nguri chungchang hi chu a lo hre thawi deuh tawh a, mak a ti lutuk lo. Remsanga zawk chu mak a ti. Mahse, an han ngaihtuah let leh vang vang hian an unau inkara gap tam thinzia chu an recall uai uai tho mai. 

Remsanga hi a han fâl deuh a, a naute hi a duat vek. A zah pawh an zah. A pa fabik a ni ang tih reng an ngaihtuah phak lo. Nguri pawh hi Rinfela nen an inthlau ve leh deuh a, an tette atanga hostela awm thin an nih vangin a nu sawi ang khan hostel atanga Christmas hmang tura an chhuah khan a nu chuan naute a lo nei a nih kha. An nau a nih rinhlelh ngaihna an hre lo. Rinfela phei chuan a duatin, a awm deuh chawt reng zel anih kha. Nguri tet lai lah a lo duhawmin a hmeltha bawk nen. An nu leh pate chuan an lo bum rei hle mai. A pain Nguri a duat uchuak em em te kha a naupangber a nih vang tia ngaihtuahin an thik ngai lo. Dini erawh a rilru a na ve deuh thin a, mahse, a pain Nguri a duatna aiin a nuin a duat ve thung a. A lungawi ve leh mai zel kha a nia. Thudik a han hriat takah chuan apa chu a ngei lek lek. A fa pawh ni hlei lo a lo duat leh hmangaih em em te kha.. Tin, in leh lo a hmingin a la dah zui! A nu tan pawh ngeiawm ve tak tur a ni. 

Remsanga'n a aw a thian kharh. 

"Chung zawng zawng chu thudik pawh ni se, i ngaihzawng neih nen a inkungkaihna ka man phak lo" a ti ta a. 

"Hei zawng ka buaina a ni. Ka duh leh ka nei ang.. Ka thu thu" Pi Sangi chuan a ti hmak. 

"Ni e, hei hi buaina chu a ni. Ka pa damlai ata tawh sawi i kai reng a, chuvang aniang ka pa pawn i hminga in leh lo a dah ngam loh ni? " a ti ta piap mai. Pi Sangi a ding zawk, "Remsang, ngawi rawh" a ti tuar. 

A alh tawh bawk aniang, "Ka ngawi lo vang. Ka pa kha i tirethei ve tho asin. Engmah ka hai hleinem. I fa bik te i hauh hlur a, kan tetlai chhung zawnga min en hranna te kha ka theihnghilh reng reng lo. Ni e, ka pa kha nang aiin a upa fe tawh a, i duhkhawp amahah khan i hmu lo pawh a ni mahna.. Chuvang chuan sawi kaiin i awm fo a, ka pa khan a haider zel a, thurochhiah felfai taka a siam chhan pawh nangmah vang bawk a ni ngei ang. Ka pa chu a lo fing hle mai. Ka nuhrawn i nih vang hian ka hmangaih loh phah lo che, min enhrang thin hle mah la, nang lo nu dang ka nei chuang lo. Mahse, Nguri chunga i chetdan em em hi chu ka tuar thei tawh lo. Ka pa thurochhiah pawh Nguri chu ka hrilh ang. Ngaihzawng chu nei la, Nguri in hi chhuahsan bawk ang che u. A chiang em? " a ti ve ta piap piap mai. Remsanga thinrim khur dawt dawt chu tuman an khap ngam lo. A thusawi inkawkalh nuaih te chu Rinfela leh Dini te chuan a awmzia an hai reng reng lo. Remsanga sawi kha a dik chiah a ni. 

Pu Zairema kha hna nei a ni bawk a, Hnahthiala an pem tirh pawh khan iai lo fe fe an tam. Mahse, a fapa Remsanga a vang khan a tu amah a chhang hlawhtling duh ngai lo. Tulpui thak te kha a tum hman hial a, mahse, a nu leh paten, "Heti ngawt zawng a ni lo ve, nakinah a lo thanglian zel ang a, ka nu tia koh tur a nei lo tur hi kan ngaingam lo. Tun atanga nu anga a pawm thlap theih tur nupui nei rawh" tiin an nawr ta sek si a. An thlirna zawn chu a dik ve tho bawk si. Chutah chuan Lawmsangi hi a rawn lang a, hmeithai fa niin u mipa pakhat a nei a. An khawsak a harsa ve hle. Theihtawp chhuahin zah pawh dawn zo lo khawpin Zairema chu a kherh ta a. Amah a lo chhe loin a tituai bawk si, a nu te lahin hmeithai fa a lo nihnaah an lo lainat ve lehzel bawk nen. Rei pawh an inngaihzawn hmain an innei ta kha a nia. Remsanga pawh a duat thiam ve viau. A pi te an la dam avangin a khawih tam lo zawk. Zairema nu leh pate boral hnuah erawh a zia a lang chho ţan a. Nau a lo pai ve tawh si nen, inthen mai theih ni ta lo chu buai ru deuh chungin an innupa chho ta zel a. Zairema te unau hi pali niin farnu pakhat an nei a, ani erawh Lunglei lamah pasal neiin a awm a. Zairema u leh nau mipa te erawh Hnahthialah an inbengbel ve vek a ni. Zairema hi pa rilru nei tak a ni bawk a, in leh lo bakah in hmun leh ram awl te dapin a tlawm laiin a lei khawl vek a. Nakinah a fate tan a ti a ni. A lo tisual lo khawp mai. 

An lo inupat hleih ve bawk nen, Nguri'n kum 10 a rawn tlin meuh kha chuan Sangi mizia chu dang tawh tak a ni. Zairema a neih khan kum 17 lek a la ni miau a, amah a awm awl tawh si a, a thau hmân mai a, a itawm tawk lekin a lo in ei mam bawk nen. An pa a thlim zeuh zeuh tih hi chu khawtlang mite sawi ruk a ni thin. Kut man a awm thin si lo va, han chachhuah ngawt theih lah ni hek lo le. Tin, Zairema huat em em bawk chu a ruka a ú te pawisa a lo pe thin chu a ni. Pawisa kha a ui ni loin, a ruk arala thiltih kha a hua a ni. An nupa inkar khikna chu rei tawh tak a ni. Mahse, upat tawh lama inthen mualpho ai chuan tiin Zairema khan a dawh hram hram a ni. 

"He in hi ka chhuahsan dawn lo. Ka pasal lu nghahna a nih hi" Pi Sangi chuan a ti pang pang a. 

"Kan hria ang chu.. Uirenu hi kan mamawh bik lo ve" ti nghut chungin Remsanga a chhuak nghal vut. Dini leh Rinfela an inmelh hrek hrek ringawt. 

"Ngur, hmanhmawh teh.. Vat.. Hei a lian rap" Lawmsanga a au chul a. Nguri hmanhmawh tawkin a rawn tlan. Nghakuai an chiah a, sangha sen lianpui a awk a lo ni. Nguri a rak chul a, an va hlim dun tak.. 

"Sangha man theipa,.. " tiin a biangah a va chuks zauh a. 

Thlam lam panin an inkuah phei. Nguri phone a ri ve chiah. Remsanga a lo ni. 

"Mate, ngun takin lo ngaithla rawh. A pawimawh a nia.. " a rawn ti nghal hmawk hmawk a. A aw chu a pangngai lo hle. Nguri chu a thu tha sauh sauh a. 

"Aw ka ngaithla e" a ti a. 

Remsanga chuan a nu nena an inbiak dan a kip a kawiin a hrilh ta vek a. Nguri erawh a ngawi ngat ngat. 

An inbe zo chu a chau hnawk thei. A thaw a hah nge a thaw hlawi hlawi a, Lawmsanga'n a rawn kuah vat. 

"Bawihi, eng nge thleng? I tha em? " a ti mawlh mawlh a. 

Mittui tling pam chungin, "Kei hi tu fa mah ka lo ni ve lo maw? Ka pa fanu ka ni ve lo maw? " a ti sep sep a. Lawmsanga'n a awmah a pawm bet.. A ţap khur hlawk hlawk mai. 

"Tu fa pawh ni rawh. Eng mi pawh ni rawh.. Ngurnunsangi i nih chhung chuan ka ta chauh i ni reng ang" a ti nghet charh a.. A mitmenga tumruhna lo lang chu a nep lo kher mai.. 

(Mutthilh hi a va nuam êm.. 😢😘