Thutiam 8

THUTIAM - 8

Ziaktu: Toni Râlte

A rin aiin a nu chuan a chelh rei ta. A thin a rim ţún tawh mai. Lawmsanga lah lungleng tawh bawk si. A zirna lamah a hnufum phah ngei dawn pawhin a lang e. Class kal that a ngaih nak alaia chutia a dinhmun hrethiam eih lo va a nuin a han tikual chu hrehawm a ti takzet a ni. A pa thihcham an hman atanga ni 4-na zanah a ú bulah a ţah awh ta ngawt a. 

"Ka zirna ber zawk hi, kan zirtirtute pawn min rawn be tawh ania. Ka nu hi min biaksak teh" a ti ta tawp a. 

Remsanga chuan, "Ka nu rilru hi mak ka ti khawp mai. Dan chêp che a tum hrim hrim a ang ka ti.. Ka lo sawi ang a, a remtih loh pawn i phei tho dawn nia. Lungngai suh, i zirna senso tur na nâ na chu i ú hian ka thawk chhuak ve e" a ti ta dap dap a. Nguri thla a muang kher mai. Remsanga chuan a nu chu a hmu ta nghal a, a han sawi dêk dêk a. 

"In nu hi min khawngaih lo mang e aw.. Rinfela (Nguri u mipa) nen chauha awm turin min duh tihna em ni? Kaltir ka tum tawh lo. He lamah awm se, private-ah inhlawhna a tam.. " a ti ta hmarh hmarh a. 

"Ka pa duhdan a ni hauh lo vang" Remsanga chuan a ti ta sak a. 

"Ani chu a thi tawh. Tunah chuan ka fate chungah hian kei aia thunei an awm tawh lo" a ti hmak mai. A nu chu a melh kâwk a, rapthlak a tih hmel khawp mai. 

"Engpawhnise, Nguri hi a kal ang. Ka chawm ang, keiman.. " a ti hmawk hmawk a, a nuin a chhan hmain a kal nghal nal nal. Thinrim zetin Pi Sangi chu a per dat a, a mitmenga verhtherna lo lang chuan a hmel tha tak pawh a tihmelhem zo vek mai. A fanuin B. Ed a zo ţêp tawh a nia, engvanga zir zawm phalsak lo tlat nge maw a nih le.. 

Remsanga áng hluk hluk chu an nu chuan dawhthei takin a lo ngaithla a, ani pawn a nu chu mak a ti ve hle. Nguri nen hian an inngaina em em a, Nguri u hmeichhia pasal nei tawh Dini nen erawh an inti thei chai lo a ni ber. Nguri chu a lainat ve hle. A pa fanu duat kha a ni thin a, a unaute pawn an thik ngam loh thin kha tunah chuan a dinhmun a pelhsawlh ta si a. A bul chu Aldrina te pafa an nih te a ring rum rum hial.. Pasal te thuawih thei tak tih takah an pain a nau Nguri zirna senso tumsak a sawi pawh chuan engmah a sawi buai bik lo. Pathian zarah Remsanga'n sawrkar hna nghet a thawk ve a, fa pahnih neiin dinhmun chhe takah an ding ngai bik lo bawk nen, hun reilote Nguri tana sum han senso pawh chu na a ti vak lo vang. Nguri lahin hna te a hmuh hunah a rawn theihnghilh dawn hauh lo bawk a. 

A ú thusawi vang nge ni a nu chuan a veng uluk ngang mai. A vau reng bawk a. "I tel loa i u nen chauha kan khawsa tur chu han ngaihtuah la, min khawngaih lo em ni? Ka khua a har dawn bakah i u lah mipa a nia, lenglam reng a ni bawk si.. Engtin nge keimah chauhin he in lianpuiah hian ka khawsak theih ang? " han tih seuh seuh changte pawh a nei. Nguri erawh a ngawi reng thin. A lunglen khawhar vanga chelh a nih a ring lo bur, eng emaw tum lian tak a nei a nih a ring. Lawmsanga nena pawh then a tum pawh a ni mahna.. A teuh lo, a pawt then hlek lo vang. Nguri hi a lan dan ang aia luhlul leh rilru lian tak a ni a, a tih tawhna lama kal fawr ve thei tak, tawpsan hni hne tum ngai lo a ni. Joela nen an lo khati tawh a, khatah pawh khan ka mualpho ta sa sa tiin Neih a tum hial a nih kha. Thanpuii kha rawn inrawlh lo se chuan tunah pawh a la tum maithei a ni. Chutiang hmeichhia chu a nih avangin Lawmsanga, a tana mipa diktak awmchhun chu bansan a tum lo bur.. 

Kar khatna a thleng tihah inrinni tlaiah an inah chhungkhat chaw eikhawm an rawt leh a. An ri nuai nuai mai. A papuia te lam erawh an rawn lang ve lo, sawm an ni ve tlat lo va. A nu chhungte lam hlir an ni. Nguri chuan a ngaina hlawm em em lo va, a cousinte nen pawh an inpawh em em lo tlat. A pa chhungte lamah a tlatlum thung. Tomato a chan mawlh mawlh lai chuan Achawii'n a rawn kheuh zeuh a, a hawi phawk hle. Mitmeiin a ko a, a nu te lamin an ngaihven loh lai takin roomah a lut ta zauh a. Achawii chu a lo thu ran mai. 

"Lawmsanga bia la, zaninah i phei dawn. I u nen rem kan ruat vek tawh. Insiam vat vat la aw" a ti sawk sawk a. Nguri a thaw hawk mai. A tawpa tawpah chuan.. Lawmsanga chu a call ta nghal a, a ring ral tep tihin a lo la hram. 

"Zaninah min lo hruai a ngai. Tunah rawn tlan nghal mai rawh. Kan tlai lutuk loh nan".. A ti sar sar a. Lehlam ami eraeh a phur ngang mai. A rukin Achawii nen chuan an insiam a, thawmhnaw a keng tam lem lo bawk a, insiam vak a ngai hran lo. Engkim chu a tlachawpa tih zel tur a nih vangin rem han ruat lawk vakin awmzia a nei lo. Eirawng a va bawl chhunzawm leh ta a. A rilru a hahdam ta deuh nen a ngui hmel pawh hmuh tur a awm lem lo. Hlim takin chawhlui chu an kil ho va, zan tlan tur an ni sia tiin a ei lui ve deuh a, a ei teuh mai. A puar reng bawk a. Eikhamah tihfel ngai a tifel leh sawk sawk a. A bag ber chu a buaithlak ta ber a ni. A in ahchhuah uaih chuan a nuin a hrethiam nghal dawn si. Achawii bawk a tangkai leh. Tukverhah a thlak thla a, amah bawkin an inah a hawn thlakpui ta a. In a thlen hnuah Nguri a rawn call a, "Naktuk sunday a ni sia, facial chu ti tawh ila, facial kit pawh ka la tawh e" a rawn ti. Nguri'n speaker a on bawk a, a nu pawn a hre vek thei. 

"Aw ka inbual ang a, ka lo chhuk ang.. " a ti a. A inbual nghal sawk sawk. A nu chuan rinhlelhna a nei lem lo niin a lang naa, a en ngun viau tih erawh a hre thei. A inthlak fel thlap hnuah, "Nu, u Achawii nen chuan kan zuk facial lawk ang aw.. Ka rei lo vang" tih leh chhuah a rual nghal a. A putea te chhungkua an la awm bawk a, a nu pawn a auzui lem lo e. Hmanhmawh zetin a kal a, Lawmsanga'na a lo call ve chiah bawk. Hnahthial khaw hnawr a rawn lut der tawh a lo nia! A tlan chak awm mang e. A u te ina rawn kal tura inchahin an inbiakna an titawp a. A u te in a zuk thlen chuan Remsanga pawh a lo awm ve a. Lawmsanga chin te chu a han sawi a. Chet vat vat a tul tih an hai lo. Remsanga chuan pawisa tam ve deuh tak rawn phawrhin, "Hei hi hmang phawt la, thla thar veleh ka rawn thawn leh mai dawn che nia.. ". A ti a. Mittui tling pam chunga a u melhin, "Ú, ka lawm lutuk, tlem azawng chu ka ac-ah pawh a la awm ve alawm. Min ngaihtuah lutuk suh u. Ren deuhin ka lo hmang dawn nia" a ti tham chhal a. Achawii chuan, "Ei leh in te kha i inhrêk leh lutuk ange aw.. Rilru tihhah a ngai lo.. Inenkawl tha la, ka nu pawh hneh kan lo tum dawn nia" a lo ti ve mawlh mawlh a.. A u nupui mah nise, a ú tak tak Dini ai pawn a ngaina zawk. Hetianga mo tha hi an tam lo ve khawp ang. 

Lawmsanga pawh a rawn thleng ve ta. Remsanga nen an inbe luam a. 

"Ka nu ngaihdan tur chuan inru ang in ni dawn a, mahse, inru in ni lo tihah chiang ula, ka nau hi i kutah ka dah dawn tih hria la, tha takin min lo enkawlsak dawn nia" tiin a chah thlap. Lawmsanga pawn zahawm a tiin, "Ka theihtawp ka chhuah ang" a ti ve nghut a. Rei awmna chi a nih loh vangin, Lawmsanga chu thingpui leh a hmeh intir sawk sawkin an in zawhah Aizawl lam pan tur chuan an chhuak ta a. Nguri leh Achawii an inbye bye lauh lauh mai. 

Hnahthial khaw pawn an thlen chuan Nguri chu a thaw tha ngam chauh. A hlauthawng lutuk tlat. Hahdam hmel zeta hmalam melh rantu chu a va en a, a khi sak mai. 

"Min ngai lo aniang, i thau" a ti a. 

A vei nuih suk, "Thil ka ei tha alawm. Nang chu i pangngai.. Hnemtu i nei tha bawk a" a ti zauh a. Nguri'n a lei a lo chhuah khum. Kawng zau lai kawng sirah a ding a. A va kuah nghal chawt. "Ka nghak thei tawh lo, hetia khawih che hi ka chakna a rei tawh lutuk.. Ka naute.. " tiin a phun sup sup a. Nguri pawn a lo kuah let ve chial, chutah duhthawh leh uluk takin an infawp ta vawng vawng a. Thla khat pawh tling an inhmu lo ringawt a nia, chuti khawpa an inngai hman chu khuanu samsuih a nih lohna chhan tur a vâng hle ta ve ang. 

"Cottage ka book ta mai asin. Hostel gate an khar tawh awm sia, kan inah i riah duh ka ring bawk si lo va" Lawmsanga chuan a ti a. 

Nguri pawn hnialna a nei lo, a rindan sa kha a ni hrim hrim bawk a. Mutthluksan loh hram a tum naa, a chaw ei puar nen a hriat loh karin a lo muthlu a. A harh leh chuan Ngaizel an lo lut der tawh nia! "I va han tlan chak awm em em" a ti hliai a. 

"I muhil tho sia ka tia" a lo ti mai. 

"Ka tihpalh aw.. Mutthluksan loh che ka duh tehreng nen" 

"Muhil hman lêk lovin ka siam dawn che alawm" a lo ti duh lek. A cottage book lam an pan ding nghal a. An thlen meuh chuan an lo reh thap tawh. Mahse, an va kai tho a, chabi an rawn pe a, room lam an pan nghal. 

"Zanin chu rui lo hai loin aw niang"Lawmsanga chuan a ti a. A rawn melh dan sexy lutuk chuan Nguri a lo tiphur thung. 

"Rui tawh lo hrim hrim la ka duh e" a ti a. 

"Changtunu berin i tihte chuan ka'n dry mai aniang chu" tih pahin a rawn kuah a. Engkim chu a vawikhatna ang chiah zel khan an feel, a nuam em em zel chu a mak zawk. An inhrethiam tawnin intihnat loh an tum dun a, lungawina zân inpek tawn an tum ve vena chuan an khumlaizawl nun chu a phuarkhawmin a tinuam a ni. 

"Enteh, ka hrechhuak chiah, ka la period miah lo" an zawh fel hnuah Nguri chuan a ti hliai a! A pa thih sarhu lai ni bawk nen khalam kha a lo ngaihven lutuk lo bawk a ni. A bek sam a benga zehsak pah chuan, "A pawi loh tawp chu.. Hmeichhia ni ngei se" Lawmsanga'n a lo ti a. Nguri hlauhthawnna pawh a bo nghal. Inngaizawng tam tak te hi chu a hunlaiin duhthawh takin sex hmang thin mah se, an sex hman rah a lo lan chiah hian a chan chhe zawk chu hmeichhia an ni leh tlangpui thin a. Hmangaihtu emaw an tih, an taksa an hlan phalna ngei te khan an tihsual rah chu an pawm ve duh mang hlek lo thin. Hei hi Zorama nuthlawi pathlawi tam chhan pawh a ni pakhat. Ni e, sex hi va hmang suh u intih ngawt theih a ni si lo va, thunun tum viau mah ila kan fate ngei pawh lang lo lamah chuan an lo bungbu kút kút fo si a, Sex education kan inhrilh tam tawk lo te, nu leh pa tam zawk te zahmawh anga ngaia chutiang inzirtirna chu hurna emaw tih tlat vanga fate sawipui ngam lo an lo awm râwl nen.. A tawpah zilhhauna dawng tha lo nafam chuan sex hlutna, virginity hlutzia leh hmeichhe tana a ropuizia, mipa tan pawh thangchhuahna a nihzia hrechiang ta lo chu nawmna sualah an tlu lut leh nge nge thin. Hei hi chu chhungkua atanga inzirtir nasat a ngai hlein a lang ta. Mipa lam lahin virginity ngaisang ber anga lang siin, an ngaihzawngte keuh thluk chu an pawisa der bawk si lo. Kan dik lo ţhúm mai zawng a ni e. Engpawhnise, hetiang buaina hi chu Nguri leh Lawmsanga te inkarah hi chuan a awm lem lo niin a lang. A vannei hle mai. 

A tukah hostelah a invawm lut ve leh ta a. Becky nen an inngai tawh bawk a, an inkuah chuk chuk mai. Nilengin a insingsa a, a insu bawk. Lawmsanga nen pawh an inbe tam lem lo. A inbual zawhah hahdam takin phone a khawih ve a, a nu ten an rawn call miah lo chu mak a ti deuh. A u kha chuan chanchin a rawn zawt a, a nu chungchang a sawi bawk si lo. 

Whatsapp a hawng chu a nu msg a lo tlar thla duat mai. Muangchangin a chhiar ta malh malh a. A ner leh sak thin. 

"mi hurnu, i tlangvalpa chu i um ta a maw? I pa in min kalsanna thla khat em pawh a la ral lo va. Hetiang fanu hi ka duh hleinem. I nu ka ni tawh lo e" tih te, "Ka fanu i ni ta lo, i duhna kawng chu zawh la, kei hi chu min rawn tibuai tawh reng reng suh" tih bakah, "Aldrina pastor hnawlin taxi driver maw i thlan a? Mawli, i la hre dawn chauh. Rethei tlawk tlawk ang che" tih te an ni. Nguri chuan a reply lo. 

Aldrina ang sawm ai pawn Lawmsanga taksa chanve pawh a thlang zawk. A mize thatna te, mipa dik tak a nihzia te hi an hre ve thiam lo a ni mahna. A nu vang chuan rilru a tibuai peih lo, Achawii a call ta daih a. 

"Aw mate, i muhil a nih ka ring a. I chau em? " a rawn ti nghal siam siam a. 

"Ka che char char a, ka hahdam ve chiah. Ka tha.. Eng nge ka nu vel te" a va ti nghal a. 

"Min rawn ankhum hrep a, kei te kha min hnawtchhuak titih a. Mahse, i u in engkim a hrilhfiah ta a nih kha. Mahse, a lungawi lawk lo vang. I nu hian i lakah hian eng nge a duh ka hrethiam lo, heti taka a hauh che hi" a rawn ti a. 

"Kei pawn ka hrethiam lo. Aldrina nei tura min duh lutuk vang aniang tih dawnin a bula min awmtir reng a tum tho bawk sia. A ngaihna ka hre bik lo" Nguri pawh chuan a ti ve mai a. 

Thil dang an sawi ta daih. An hlim phian mai. Nguri pawh a harh sawt. 

"Nu, a la period lo va. Test erawh a la intest lo va" Lawmsanga chuan a nu a lo titipui ve mek thung. 

"Test vat se la" a nu chuan a lo ti a. 

"A lang thei tawh dawn mi? " a lo ti hú. 

"Lang thei tawh awm tak. Nau a lo pai tak tak a nih phei chuan, vaccine lak te pawh a ngai dawn alawm" a nu chuan a lo ti a. 

"Ka lo hrilh dawn nia" a ti ve mai a. Hmabak ko tak nei mah nise, a nun chu a hlim a ni. A chhungte pawn heti taka a hlimpui hmeichhia chu tu pawh nise, khati khawpa Ruthiin a tihnat avang khan a dam chho leh chu an lawmpui takzet a ni. Nguri tak pawh an hmu châk ve khawp mai. 

Nguri pawh class a kal ve leh ta chu a nia. An class-in a pa ralna an nei nghal a, an fel khawp mai. 

"I pa boral chu ka tawrhpui hle mai che. Rawn biak che ka ngam tawh si lo va" Joela msg chu.. 

A chhang lo. Ni e, a reh ta hmak kha a nia. Joela lam reng reng a lo hrechang tawh lo bawk a, rawn be lo tawp mah se; pawi tihna a nei lo. Mapuia msg pawh a dawng. Lawmsanga'n engkim a hrilh tawh vang ni maw, thian tha tak angin a rawn bia. Nguri pawn tha takin a chhang ve. Mahse, inhmu ta se, tlem chuan nuam tih lohna a neih a ring tho mai. An class bang hawn lamah Aldrina'n a lo call a. 

"Aizawlah i lo phei tih i nuin a lo sawi a. Hostel fees te a tam sia, kan in atangin class kal mai la.. I nu pawn ka pa a rawn sawipui a. Nula kan mamawh bawk si" a rawn ti nia! Nguri a che lawih thei. Em em a na. 

"A ngai lo e, ka lawm e. Ka inenkawl thei alawm" a ti bung nghat a. 

"Ngur, i pawi sawi ka tum lo ania. I nu rawn sawi vang a nia. I pa a boral nen, sum leh paiah i nu hi a thlaphang deuh niin ka hria a. Puih ve theih che ka duh mai zawk a ni" a rawn ti fel thak a. Nguri pawn Aldrina chu a ngei pawh a ni lo, a nu chetlak dan tenawm zet chuan a thin a tina vawng vawng mai. 

"Ni lo e, ka lawm. Ka tha e" a ti sap a. A dah zui daih. A hnuk a ulh lek lek hial, a nu chu a zahpui a ni ber mai. A mood a inthlak phah vek lehnghal. Zanah Lawmsanga bulah a va sawi a, ani pawn "Ka pi tur chetdan chu a mak hle mai a.. Engpawhnise, ka awm a, inngaihtuah hah suh aw. Lehkha kha tha takin zir phawt rawh. Test kit chu naktukah ka rawn pe ang che. " a ti dap dap a. Nguri awm a nuam ve leh ta. An zirsan rei ve tawh bawk nen zir tur leh ziah tur a ngah tawh hle. Hun awl a nei hman meuh tawh lo a ni. A nu pawh ngaihtuah loh hram hram a tum. 

A tukah zing karah Lawmsanga'n test kit a rawn pe nal nal, a lei ngam miau si lo va. Becky a tir hreh ve deuh bawk si. Lawmsanga pawh rei a ding hman lo, a fapa school kal tur thlah a ngai bawk nen, a let leh nghal a. Nguri chuan a tuk zing zun test turin kit pawh a dah tha thlap mai. A nu nen call in an la inbe lo va, pawi a ti lo. Call hmasak a tum bik lo. A laka hetiang rilru mak deuh a pu hi a ngaihna a hrethiam thei thlawt lo a ni e. Joela class hi a ning thin. A rawn melh fuh apiang hian a lo melh ve chut zel thin si a, amahah feeling nei tawh lo mah se, nuam tih lohna a nei lo thei bik lo a ni. An bang chu an class ami Henry-a te nen an kal ho va, Kawilun an thleng chho chiah tihin Lawmsanga leh a passenger te an rawn inphur thla a, Nguri chuan a hmu ve lo, Lawmsanga erawh chuan mipa pakhat sang tak leh samkir bula Nguri nui sen sen chu chiang takin a hmu. A thin a phu leh ta dup dup mai. A passenger a drop a, an in lam panin a haw nghal nal nal mai. A mood a chhia tih hai rual a ni lo. Nguri msg, "Kan bang tawh a, inbual dawn mek aw" tih pawh chu a reply peih lo. Engvanga heti em ema a thikthu hi chhia nge a nih le? Kha Ruthi vang phiangsen kha a ni. Ani khan uiresan lo nise chuan Zalen deuhin Nguri pawh a awmtir thei tur a nia. Amah tak pawn hrehawm a ti, a ngaibtuah lo thei bawk si lo.

Zanriah ei khamah Nguri'n a lo call a, a melh reng ringawt. A bia ang nge be lo vang tih a ngaihtuah chhungin a ring ral hman. Mahse, Nguri chuan a rawn call leh. A la ta nge nge a. 

"I va reh, i buai mi? " a rawn ti nghal a. 

"Buai lo e" a ti hmuk. 

"I mood a va chhiat hmel ve.. Eng nge thleng a? " a rawn ti zangkhai vah a. 

"Vawiin chu mipa samkir sang deuh leh Nula pakhat nui sen sen lai ka hmu a, chu chuan Ka mood a hruai khaw lo a ni" a ti ta a. Nguri chuan a man thiam nghal vek. 

"Henry-a a nih kha.. Kan batchmate, kan haw rualin a haw ve ringawt a nih kha.. I mak lutuk.. Em em a" a ti hlak hlak a. 

"Ni e, ka mak.. " a ti ringawt. 

"Chuan, i thinrim reng dawn mi? Thudik ka sawi tawh hnu pawn"

"Rim loh hram ka tum ang" a ti tak naa.. Tlem chu a la chambang. 

"Ka ngai che nia" a rawn ti sap a. Chu chuan a chhawk hle. 

"Ka lo kal mai dawn mi? " a ti leh hú a. 

"I â siah.. Ih, weekend chu khawiah emaw kal ang hmiang. " Nguri chuan a ti a. 

"Duhthusam" 

"Mahse, kalna tur vak hi ka hre lo ve tawp"

"Sihhmuia kan huanah kal ila.. " Lawmsanga aw pawh a zangkhai tan ta. 

"Pawi miah lo. A nuam ngawt ang" 

Chutianga thu ho mai maia an han inbiak tak rengah chuan Lawmsanga pawh a nui ve leh thei ta. A thikthu chhe lutuk hi chu control ve deuh a ngai a ni. Nguri bawk hian a deal thiam ve zel turah ngai ang. 

Zing a tho chu test kit ban nghalin, bathroomah a luhpui a. Thinphu dep dep chungin a zun chu a zuk far a. A nghak ta. Rin sen pakhat chiang taka rawn langin, a hnu rei vak loah fiah vak lo hian rin sen dang a rawn awm leh ta. A hui pap. A rinhlelh ruk, mawlh tlattu chhanna chu a hmu ta chu a nia. A hamhaih deuh nge a melh vang vang ringawt. Chutah bathroom atanga chhuakin a phone a ban a, Kit thla chu lain Lawmsanga a thawn a. Khumah a thu ta veng veng mai. 

Lawmsanga'n Nguri msg a hmuh rual chuan a inperh tho at a. A khi vur vur nia! A fapa rawn lut lai melh chung chuan, "Bawiha, nau i nei ve dawn e" a'n ti nghal ngawt a! Bawihtea lah hamhaih, "Maw?! Khawiah" a lo ti hâ a. 

A fapa chu pawmin a chhuahpui a, a nu eirawngbawl mek chu kheuh zeuhin, thlalak chu a hmuhtir a. A nu pawh a nui sak. Chumi tuk ang reng renga Lawmsanga mood fuh an la hre ngai lo. A chhungte dang chu a nuin a lo hrilh ve tawh mai ang chu. Nguri pawh class kal turin a insiam malh malh a, a hmalam hun tur chu a ngaihtuah thiam vak lo. Lawmsanga kutah a innghat deuh tawp. A tih ang apiang chu a pawm tawp mai a ni. A nu erawh a sa hle ang chu. Tin, a ú a zah em vangin B. Ed eraeh zawh hram tho a tum, Pathian zarah hna te a hmuh ve hlauh chuan a u te a tana an insensona pawh rulh let ngei a tum ve a ni. 

Mapuia'n Lawmsanga fa Nguri'n a pai tih a hriat chuan na deuh zawk mah se, a lawmpui thiam kher mai. "Bawiha a mal lutuk a, tunah chuan a khawhar a zia ve tawh ang chu.. Chuan, engtik nge kan tih huk ang? " a ti seuh seuh a. 

"Ka hrethiam rih lo, ka pa te thu thu a niang chu. Amah Nguri pawh hian tum dang a lo nei ve thei tho, a thil zir hian a tibahlah ve in ka ring" Lawmsanga chuan a ti mai a. Ani chuan inneih chuk chuk pawh pawi a ti lo. Mahse, hmanhmawh taka chet ruai kha tha berin a hre bik lo a ni. 

Zanriah ei khamah chhungkaw inkhawm an neih zawhah Apa chuan ro a rel ta a. 

"Palai kan tir phawt ang nge? Sawn man an rawn thin hun kan nghak dawn? " a ti a. 

Lawmsanga chuan tlaia Nguri nen an inbiak dan te a sawi ve a, "Nguri hian a chhungte tumah a la hrilh lo va, zaninah hrilh a tum chauh a. A chhungte thu tihtluk dan te pawh hriat phawt a tha ang, bakah a zirlai hi zawh a duh a. Chu tak chu buaina a ni em ka hre lo" a ti a. 

A pa chuan, "Hm.. Nau in lo pai tawh a, inneih mai loh chu kawng dang a awm lo phawt. A zirna pawh kan in atanga a zir zawm mai a ngai ang. A chhungte chu hrilh phawt se la, an ruahmanna azirin chet kan la dawn nia" a ti ve ta a. Ngaihngam takin an thaw ta sang sang mai. 

"Lawmsang, tenawmpa, kan inthen atanga reiloteah sawn i thlak a maw? Keimah aia i ropui viauna ka hre lo" Ruthi hnen atanga a msg dawn a ni. A tu chuan nge maw lo va hrilh thawt thawt ni. 

"I ho e a" tih chiahin a chhang. A be tuitam peih lo. Ruthi kai phur hian an pain kut a thlak thin thu te, a inchhirzia thu te rawn hrilh zeuh zeuh a ching a. A reply ngai lem lo, a duhthlanna a ni a, a cho a, a rim a. A duh a hmu taah a ngai mai zel. Nguri lo lan hnu phei hi chuan tu hmeichhe dang mahin a rilru an kai peng zo tawh lo a chha chu a ni e. 

Nguri chu a vei sek a, a chhungte bula a rai thu sawi pawp chu harsa a ti ve thlawt. A tawpa tawpah Achawii a text ta ngawt a. 

"Ka u, thil pawimawh tawk a awm a" a ti te te a. 

"Umm a va pawimawh awm ve.. Sawi la" a rawn tih chuan a zâm lutuk chu a khur der der thei. 

"Ih, ka rai a" a ti ta tawp a. A phone chu a khup a. Balconyah a va chhuak daih. A zak lutuk chu a sen vekin a inring hial. A hnu minute 5 velah a lut leh a, Achawii miscall a lo awm. A call back ngam lo. 

Achawii chuan msg in, "Call la rawh, ka nau, i u pawh ka hrilh zo chiah e. Rorel a ngai" a rawn ti a. A chhiar zawh rualin a rawn call nghal bawk. A pick up lo thei ta lo va, "Lawmsanga fa em ni? " a rawn ti nghal a. 

"Aw"

"A nih chuan i ú nen hian inbe lawk ru" tih leh Remsanga phone pek a rual nghal a. 

"Mate, thla engzat nge ni tawh? " a rawn tih chuan, "Ka hre bik lo, thla khat vel aniang" a ti ringawt. 

"Lawmsanga'n eng nge a sawi? "

"Min neih a duh a"

"Hmm.. Mahse, sawn man te pawh thin ve hrim hrim a ngai alawm. Engtin nge niang aw.. Pa Rinpuia te ka lo be mai ang a, an nin min zuk ţhinsak mai se.. Tah chuan in awm zel dan tur a chiang mai ang" a rawn ti ta dap dap a. 

"U, ka tihpalh aw" a ti sap. A u chu a zah takzet a ni. 

"Ka hrethiam alawm ka nau. I tisual palh a nih kha. Hrehawm ti suh. Ka nu te ka han hrilh ange, engtin pawn rawn ankhum che se la, i nunphung hloh suh ang che. Kan inbe leh dawn nia" tiin an inbiakna an titawp ta a. Nguri a thaw huai mai. Hmangaihtu leh hrethiamtu Pathianin a pe a, a lawm a ni. 

Lawmsanga bulah a u nen an inbiak dan te a sawi a. Hmalam hun hlir an sawi dun. An hlim dun tih hian sawifiah dan tawk thiam a har mang e. 

Dar 9 bawr velah Nguri nu chuan a rawn call ta chiah a. A la lo ngam ta bik lo. 

"Zawngi, i fa kha i titla ngei ngei tur a ni. A nih loh chuan ka tuithlar dawn che a ni. A chiang em? Pawisa ka rawn thun ang a, i titla tur a ni. I ti lo anih chuan, kan damchhungin inzawmna kan nei tawh lo vang. I hrethiam em? " a rawn ti bawrh bawrh a. 

Nu leh fa intuithlar rapthlakzia a lo hre tawh a. Chhungkaw hlutzia hre tawhtu a ni bawk. Chunglam melhin a chil a lem khawlh a. 

"Lalpa, ka nu ka phatsan mai dawn aw" a ti ta sap a.