Thutiam 7

THUTIAM - 7

Ziaktu: Toni Râlte

Nguri mu tui lai chu a ú nupui Achawii chuan rawn kai thoin, "Ka nuin lo chho rawh se a tia" a ti a. A mit nuai chawt chawt chung chuan a tho chhuak a. A mood a chhe hle. A nu chuan engvanga rawn ko hmanhmawh nge maw a nih le.. A inphihfai sawk sawk hnuah inthlak lehin a ú fapa Bentea kai chungin an in lam an pan dun ta ral ral a. In a han thlen chuan inleng neuh neuh an lo awm a, Pa Zova pawh a lo awm ve. A lo nuih var var mai. 

A nu chu melhin, "Min ko mi? " a ti satliah a. 

"Umm, he tah hian lo thu teh" tiin a bula thutna awl chu a melh a. Inleng dangte chu anmahni buai buaiin an buai ve bawk a, an awmna lai tak chu an rawn chim pha lem lo. 

"Hei I pa Zova te hi vawiinah hawn an tum tawh a. An hawn hmaa tihfel tur thil a awm a nih hi.. " a nu chuan a ti a. A ngaihna a hre mang lo. A hawi â pheu mai. 

"Nia, Ngurbawih, kan hawn hma ngeia chinfel hi nakinah kan inhlat angreng si a, kartawn sek pawh a buaithlak ve a" Pa Zova chuan thingpui dâwt khulh pah chuan a ti a. 

A bo telh telh. A nu melhin, "Eng nge chinfel tur? In sawi awmzia ka hre lo reng reng" a ti ban chhalh a. 

"A mak! Naupangchhia viau thin suh. Aldrina nen in chungchang a nih chu kan sawi" a nu chu a ti vin ţhak a. Vin hi chu a tih ţhan a ni bawk a, Nguri tan a mak lo. Mahse, Aldrin nen an chungchang thu erawh chuan a deng dawt mai. 

"Eng nge chu chu a awmzia? " a ti leh hã a. 

Pa Zova chuan a aw thian kharhin, "In pahnih hian innei ula kan duh a ni. Tlang rawngin ka sawi a nih chu.. Aldrina chuan a remti tawh a, nangmah kan ngaichang che a ni" a ti ta a. Nguri chu a chuai rawih rawih ni maiin a lang. Awmdan tur pawh a thiam lo, a hrilhhaizia leh hamhaihzia chu tupawn an hmu thiam khawp ang. 

"Ka.. Ih, englo, chutiang engmah a awm lo. Kan inkarah" a ti bah nawk nawk a. A nu chuan rawn melh râwm râwm chungin, "I dinhmun ngaihtuah rawh, Pastor nupui ni tlak i nih loh laiin tihian an ni lamin an duh che a nia.. I hmalam hun ka thlir hian i neih hi thil tha ber a ni.. I pa Zova hian a hran hrana palai tirh kual sek ngai lo vin tiin tihian a fapa tan a rawn palai tawp a nih hi" a ti hlak hlak a. Pu Zova erawh a ngawi rih, Nguri chu a melh uluk kher mai. 

"Aldrin nen chuan thian kan ni. Bialpa nghet ka nei ve reng alawm" Nguri chuan inngaihtuah buai eih lovin a ti ta hmiah a. A chiâina te kha zawi zawiin an kiam chho ţan ta bawk a, he thil hi huaisen taka a hmachhawn a ngai tih a hria. 

"Nanga bialpa ve khan eng nge a thawh? Driver kha maw? Pastor nen chuan khaikhin buai duh lo mai rawh. Aldrina aia tha i hmu dawn lo ania" a nu tawngkam zet chu'h! A nu a ngainat loh tawh sa nak a laiin a bialpa eizawnna a hnualsuat avang chuan a nu nen an inkar chu hla ta vâwk niin a hria. 

"Ngurbawih, i duh lo chung tihluih che kan tum lo a nia. Kei pawh i pa ang tho ka nia, i hmakhua ka ngaih vang leh ka fapain a duh em che vanga hetia inpalai ta mai pawh hi ka nia.. I zirna pawh i chhunzawm zel thei dawn tho va. Mahse, thutlukna chu i kutah a awm aw.. Ka va haw phei phawt ange.. Chawhnu lamah daih kan chhuak dawn a, chaw ei kham lamah rawn lan leh ka tum dawn nia" Pa Ziva chuan a ti dap dap a. A ding zui nghal. Pi Sangi a ding ve vat a, kawngkapui bul thleng a va thlah a. Eng emaw an sawi dun mawlh mawlh bawk. Nguri chuan a thlir reng ringawt. A rilruah mi pakhat a awm, Lawmsanga a ni. Hre ve ta se engtin tak ngai ang maw? 

A nu rawn let leh chuan mitmeng nelawm vak lo va melh chungin, "Lo inngaihtuah ang che. Aldrina hi i tan a tha ber, i bialpa kha chu theihnghilh hmak rawh" a ti ram hmak a. Choka lamah a kalsan ta a. Nguri erawh a thu ngawt ngawt ringawt.. A thinte chu a rim ve lek lek.. A pa boral tawh mah se, an duh duh dana an kaih kual tur a ni bik lo. A rang lama Lawmsanga hrilh a ngai. Ani lah hi a la ngawi tlat bawk si.. Huiham.. 

A ú te inah a chhuk thla leh a. Achawii'n ei rawng a lo bawl a. A lo zai rãt rât a, Nguri a hmuh rualin a tawp chawt. A hmel hmai dik hek lo. Nguri chu a thu hnawk a, chhuat lam a melh ran mai. 

"Thil dik lo a awm em ni? I hmel a va dik lo ve" a ti nghal sawk sawk a. 

Nguri chuan ţah chhuah hmel zetin, "Ka nu hi ka hua" a ti nghat a. Remsanga zing leng pawh a rawn haw ve chiah, an nu leh a nau kulmuk zet avang chuan a rawn pan hnai ve nghal a. 

"Ngati nge Mateii chu a hmel a va dik lo ve" a ti satliah a. 

"Hei, ka lo zawt mek a.. Ka nu nen an inhau deuh mawni " Achawii chuan a lo ti vat. 

"Ngati nge a.. Mate, engkim a tha vek em? " tiin a nau chu a thut hnaih a. 

"Aldrina nena innei turin min nawr alawm.. Ú, Lawmsanga asin ka duh" a ti ţap ta ţiau a. Remsanga mitmeng a danglam nghal kâwk. A ţhawng ve deuh tih a lang. 

"Mai mai a, i duh loh na nâ na te chuan ngah nge a nawr luih ang che. Ka lo titipui dawn nia. Hahdam takin awm rawh. Aldrina pawhin a duh reng reng em ni? " Remsanga chuan a ti a. 

"Aw.. Nizanah min duh thu pawh a sawi" Nguri chuan a lo ti khauh a. 

Achawii chuan, "Bialpa lo nei hman lo la chuan, Aldrina hi ka duhpui khawp mai che. A fel bakah a zahawm bawk sia" a lo ti a. Nguri a rum hak. Fel leh zahawm ringawt lam a ni lo, a thinlung neitu chu mi pakhat chauh a awm. 

"Ani chu ka ţhian bakin ka en thei ngai lo vang.. A theih loh" a ti hmak hmak a. Remsanga'n a mitmei vangin Achawii pawn engmah a sawi zawm lo. Tukthuan pawh tihtham a ei lo. 

"I service dawn lo em ni? " a nuin a rawn tih chuan, "Vawiin chu kan picnic dawn a.. Dawn lo" a lo ti a. A phur fahran lo naa, a rilru rit zet chu va inthinharh ve a ngaiin a hria.. A insiam sawk sawk a, a phone pawh en leh tawh lo vin an innghahkhawmna lam panin a chhuak ta a. Nguri'n a rawn call lai khan a inbual a, miscall a hmuh pawh khan a call back lem lo va, whatsapp lah a check tawh lem lo bawk. An picnicna tur hmun an thleng a, mipa hlang an ni bawk a, an rak phawhraw angreng hle. A nui ve suk suk mai.. Eirawngbawl lam a pui phawt a, tui chen lam pawh a chak lem lo. Zu pawh a tam leh hle. No 2 a in a, a tan eng tham ni lo mah se, chawhnu lama in loh chu lu a na duh sia tiin a insum deuh a. A phone la chhuakin whatsapp chu a check ve ta a. Nguri msg chu a skip zel a, group leh private ho a clear zawh vek hnuah Nguri chu a seen sak ta chauh a. A phone a thlauh nghal bawl! 

"Lawmsang, ka nuin pasal min neihtir a tum asin. Eng emaw tal sawi tur i nei lo maw? " tih thu chu.. 

A bula thu chuan, "I va tha tawh awm em.. Phone pawh hum nghet zo tawh lo" nui huah huah chungin a lo ti a. Lawmsanga inhum ruh zia erawh a hmu lo. A rilru chu a hmanhmawh thut.. A ding a, a inthlak sawk sawk a, a thiante chuan mak ti zetin an melh hrek hrek ringawt. 

"Thiante u, emergency lutuk.. Ka hawn a ngai. Min hrethiam ru" tih leh tlan chhuah a rual nghal. Tu man engmah an zawt hman lo. A chetzia mak lutuk chuan a tihamhaih ve deuh hlawm ni tur a ni. Chak zeta tlanin in lam a pan ding char char a, a rilruah thil dang engmah a leng lo. Nguri'n mamawh taka a lo thlir reng tur a mitthla chuan a hnuk te a ulh lek lek thei hial.. He hmeichhia hi tauhsan mah se, mipa dang bulah a kaltir lul lo vang. A ta a hloh tawh a, tun ami hi chu a chân tawh dawn lo a ni tawp. In a thleng a, a room lam pan nghalin a ruckshack-ah a thawmhnaw tlem a khung a, a nu a rawn lut ve nghal. 

"Bawiha, eng nge ni leh ta? " a ti a. A fapa chet dan sawk sawk chuan a tihrilhhai hle ni tur a ni. 

"Nupui ka ru dawn.. Nu.. Min ngaidam rawh. "A ti nghut a. 

"Eng a?! Tunah maw? Ruk kher lo va tih dan a awm lo em ni? " a nu chuan a ti hâ a. 

"Kawng dang awm se ka ti khawp mai. Mahse, tunah hian a nuin a nawr mek a ni. Ka thlentir thei lo" a ti hrâwk a. A nu chuan a melh vawng vawng ringawt. A fapa chu a lainat a ni tawp mai. A nupui duhtakin a uiresan tawh a, tunah a ngaihzawng duh ber lah ruk loh theih loh dinhmuna dintir a ni bawk si. Heti taka a hmanhmawha a awmdan danglam vek chhan lah a hrechiang si.. 

"Motor zawk ka keng ang. Ka pa chu lo hrilh mai rawh aw" tih leh chabi lak a rual a. A chhuak zui nghal. Han biak lumlam hman hi a ni lo reng reng. Motor a tih nun lum chhung chuan Nguri a call nghal a. 

"Hello"

"Ka rawn kal dawn chiah, lo insiam la.. Kan inru ang" a ti nghal bawl mai. 

"Lawmsang" a rawn ti nghek ringawt. 

"Ka ta i ni ka tih kha" 

"Tunah kan inru ang maw? Sawi dun phawt a ngai.. Ka pa thihcham êm pawh kan la thlen loh hi" Nguri hian a sawi dik reng. 

"Mahse, i nuin pasal neihtir che a tum kha.. "

"Ka duh miau loh te chuan min tilui thei lo.. Inru rih lo vang. Ka dinhmun hi ngaihtuah ve rawh" a rawn ti a. A aw chu a khawngaihthlak kher mai. 

"Aw le,.. Ngur, ka tihpalh aw. Min mamawh laiin ka lo tauh khum che a" a ti dam thlup a. 

"Ka hrethiam che alawm. Ka thiam loh zawk a nih kha. Vawiinah Aldrina te pawh an haw dawn alawm. " a rawn ti a

A aw pawh a pangngai ve leh ta deuh. 

"A that chu.. La awm reng dawn chu nise, a dîp tur hrim hrim pawn ka rawn kal ang" a ti nghet charh a. A thaw pikna te chu zawi zawiin a kiam duak duak a. A chetdan atthlak tak te chuan a nuihte lam a tiza. Chuti taka Nguri a lo ngaihtuah chu ani pawn mak a ti. In lam panin a kir leh ta hnu hnu a. A nu bula thil awmzia a han sawi chuan a nu pawh a thaw huai mai. 

Tunah chuan boruak a tha leh ta phawt. Mipa thikthu chhe lutuk leh hmeichhe ngaihsam ve tak hringnun hi khuanu hian a herremsak thei ang em le?! 

Aldrina te chu Nguri pawn a va thlah liam ve a. A langah chuan hlim takin a bia a, mahse, Aldrina chu huatna chhan tur awm miah si loin a mil tak tak thei tawh lo. A lo duh ve ringawt chu pawi a tihpui. A mihring mihrinna a thata a fel tehlul nen, Nguri thinlungah erawh a tla fel der tawh mai si. Tlai lam chu an inah chhungkaw hoin chaw an ei dawn a. Inriak tlangval ho pawh an sawm tel ve bawk. Achawii leh a cousin te nen eirawng an bawl a, a cousin Faki chuan Aldrina felzia leh an inhmehzia te a sawi khum chiam mai a. A ning ru hle. Achawii chuan hrethiam takin thil dang a lo sawi ta daih a. Nguri pawh a ziaiawm ta sawt. Mahse, zanriah ei hma, an bawl peih vek hnu chuan a putea chuan Nguri chu rawn koin, "Saw tah lo kal teh le.. Sawi ho ngai thil a awm" a rawn ti ta mai a. Nguri chuan a hrethiam vek. 

Nguri nu te roomah chuan a nu, a ú te leh a putea bakah a patea leh papuia te nen an thu ţhâm mai. A putea chuan thupui fun takin Aldrina nena an chungchang chu a sawi ta dap dap a. Khumah thuin hnuailam a bih char char. A thin a rim ut ut, a pa an sún zo chauh a, tunah amah chu dahbo dan an ngaihtuah nghal a, eng ang mihring nge an nih? Tun hi nupui pasal ngaihtuah hun pawh a ni lo. A insangmar nasa lutuk chu a hah hluah hluah. 

A nu chuan, "I pa kan súnna a la rei lo tih chu ka hria, i u te hi chu anmahni an inenkawl thei vek tawh. Nangmah ber hi i hmalam hun ngaihtuah a ngai a ni.. ngaihtuah chiang la" a rawn tih zawm zat a. Nguri a ding phat, mi dang chu thinrim zetin a melh kual a. A mitah mittui a tling khat pam bawk. 

"In va zahpuiawm tak em.. Ka pa thlarau pawh inzah eih na nge? A thih cham êm pawh kan la thlen loh laiin ka pasal turah in lo buai a nia.. Tenawmho, in duh dan hian ka awm awzawng lovang e. Bialpa ka nei a, a hming chu Lawmsanga a ni. Amah chauh chu ka nei dawn a ni. Ka pasal turah in lo buaina tur a awm lo ve, nge ka hnawksaka min dahbo dan inzawng zawk? Min chawmna turah i buai em ni? Nu, min chawm renh reng suh. Pathian zarah ka pa fanu Ngurnunsangi hian ka nghei bik lo vang. Duhtawk rawh u. Pasal ka nei dawn a nih chuan Lawmsanga chauh ka nei ang. A chiang em? " a ti ta phiar phiar mai. A ú hmeichhia chuan, "Nguri, i zak lo lutuk, nang aia upa vek kan nih hi.. I va zak lo ve" a lo ti zauh a. 

"Nang kha pasal i neih tawh vangin kei hi min lo ngaihtuah ve tihna em ni? I pasal leh i fate ngaihtuah la a tawk.. Ka pa kha in ngai ve miah lo em ni? Mawh.. Nu, ti nge ka pasal turah in buai em em? Kei chuan ka ngai asin" tih leh chhuata thutsawp a rual a, a ţap ta zawih zawih a. Remsanga'n a rawn pan vat, a sama chulsakin, "Ka nau, kan tisual a ni. Sawi dik loh engmah i nei lo ve.. Kan lo buai hmanhmawh deuh a ni. Min ngaidam rawh.. Hahdam deuhin awm rawh. I ú hi ka la dam ve ţêk ţêk chhung chuan tuman i duh lo chung an nawr lui lo vang che" a ti nghet charh charh a. Tuman ţîk pawh an ti ngam lo. Dik tak chuan Nguri patea leh papuia phei chu Nguri lamtang sa an ni a, Nguri nu in pasal vel a sawi pawh khan an ngaihdan a lo ni lo sa tawh sa hrim hrim bawk a. Chutia Nguri'n a han ankhum phiar phiar pawh chu an lawm ru em em zawk a ni. Nguri nu erawh a thu túm bâr mai. 

Zanriah pawh tui ti takin a ei ve ta lo. A pa thihcham hmang vat se, Aizawla liam thlak vat a duh ber tawh. Lawmsanga awmnghenga khawvel buaina theihnghilh chu a duhthusam a ni. Zanah Lawmsanga chuan a rawn bia a, engkim a hrilh vek. 

"I ú kan lama a ţan chuan kan hlawhtling ang, ka naute.. Hahdam deuhin awm rawh aw. Thil kha ei tha la" a rawn ti seuh seuh a. Nguri chuan Lawmsanga bula awm a chak lutuk vangin a tahte a chhuak vekin a hria. Mahse, a ú leh Lawmsanga te hnemna vangin tui takin a muhil ve mial e. 

"Thianpa, ka thil hrilh tur che hi hrilh che ka hreh lutuk. Mahse, ka sawi ngei a ngai sia.. Lo ngaithla rawh aw" a ti te te phawt a. Nguri nen an intawn hmasak ber atanga ţanin an tun hun thlenga an inzawmna te chu zep nei loin a sawi fai ta leng a. Mapuia tana dawnsawn a hrehawmzia a hria.. Mahse, a sawi ngei a ngai a ni. A bum thei tawh lo. A sawi zawh chuan a reh vang vang a, a dah ta daih emaw a ti hman nghe nghe. Mahse, a hnuah chuan, "Ţhianpa, ka ngaisang hle mai che. Kei ni ila bum hlen che ka tum mai thei a ni. I tan sawi a harsa dawn tih ka hrethiam sia.. Ka lawm e. Duhsakna ka hlan a che u.. Ka thinrim lo aw. Tlemin min ţhawng ve deuh tih mai loh chu" Mapuia chuan a rawn ti ta a. Lawmsanga a chhing sawk. 

"Pawi ka ti.. Nguri pawn hrehawm a ti lutuk aw" a ti tham ţuak a. 

"A ho lutuk, ngaihzawn pawh kan la inngaizawng em hleinem. Thiantha te sas pawh an chhuhsak lawp lawp laiin.. Keini te chu kan inchhuhsak pawh a nih loh hi.. Hrehawm ti suh u.. Nguri lo hawn veleh Zanriah ka treat ang che u" a rawn ti ta mai a. Lawmsanga beisei ai daihin a dawngsawng thiam. Lawmthu te an han inhrilh leh chawt chawt a. Tunah chuan an inkara hnawk awmchhun chu Nguri nu chiah a ni ta.. Lawmsanga chuan chu erawh hmachhawn a huphurh lo nasa.. Mipa a ni tlat a! 

A pa thihcham pawh an thleng ve ta. Inneihna boruak lam hawia thu cheh a awm ta rih lo bawk a. A pa leh Lawmsanga tan a thinlung leh rilru a hmang thei tawh a, a nguina hmel pawh a bo tan e. A nu nen erawh an inbe hleithei meuh lo a ni e. A nu hlat dan mawlh a zawng ve bawk lah taka.. Tin, a putea te nupa hi a hne thawkhat viau bawk. Boruak eng maw tak la irh chhuak tur ang hian a hre tlat a, chu chuan mawlh chang a nei ve thin. A ngaihtuah thui duh lo mai pawha.. Aldrina nen pawh an intext zeuh zeuh, thian angin. A hmaa an boruak erawh a pha ta lo. Pawi a ti nek lo ve. A pa thih cham tukah Lawmsanga'n a rawn hruai dawn a ni. Zanah a thawmhnaw te siamfelin a zai rat rat a. 

"Ngurnunsang, ka thu lo va Aizawla phei te i lo tum reng reng a" tih ri avangin a tawp chawt. A nu chuan a rawn melh tur kher mai. A nu hi a nuhrawn a niang, a lakah a tha lo thin em mai. 

"Nangman a nih kha sawi" a ti ve hmak a. 

"Kan la buaizia i hmu ve reng. Inah pawh innghat duh loin i u te inah i han innghat ngat a. I awmdantê hi chu a" a ti hmarh hmarh a. Thinrim a chakzia chu a lang reng mai. 

"Inah chuan ka u te nupa an awm tho va, bakah inleng neuh neuh, awm ho dual kha a fuh lo alawm.. Ka rawn chho reng tho alawm" pangngai deuhin a ti a. 

"Aizawl hi phei tawh lo la.. He lamah private schoolah te hian inhlawh la a tha ang ka lo tia. I pa pension lah buaipui chhung a la rei dawn sia. Kan buai dawn viau ania. Phei ringawt mah la, i zirna senso tur ka nei tawh lo" A nu chuan a ti leh a. 

Remsanga a lo tawng ve ta, "Ka nu, i ti-ang lo em mai. A zo tep tawh a, a uiawm lutuk. Kumin bak a ngai tawh hleinem. M. Ed te chu tih leh kher pawh a ngai lo va, B. Ed a neih te chuan zirtirtu pawh a nghetin a thawk thei dawn a. Theihtawp kan chhuahpui zawk tur a ni" lo ti ve khauh. 

"Kha ti kha in nia, in inţan unau ve ziah lehnghal a. Nangman i chawm dawn phawt te chuan zir se la, a thla khat hostel fees pawh tam deuh asin. Keini kan inhmang da vek tawh a" a nu chuan a ti leh bawrh bawrh a. 

" Aw ka chawm ang. A thuhrimin ka pa râlna tling khawm pawh khawih chet a nih kan la hre hleinem" Remsanga chuan a ti ve nghat a. A nu chuan vin ţhakin, "I pa ralna sum hi Ngurnunsangi chawm nan ka hmang ang maw? A sawi pawh i sawi ngam e a.. I pa lungphun nan bank-ah ka dah vek dawn" a ti ta a. 

"Lungphun te chu chhungkua kan tangrual thei, ka papuia te lam pawh an inhuam viau ang. Mamawh atana kan hman hi ka pa pawn a duh zawk em em ang" Remsanga chuan a chhang ve zel. A nu chu a thinrim hmel tawh kher mai. 

"Remsangpui, i nu ka nih hi. Tha ka tih danin ka hmang ang. Nang in hrang chang tawh hian ro rawn rel ve tum suh" a ti tâwn tãwn a. Achawii a lo îp chawih chawih. An pa chu mitmeiin a khap a, a hrethiam lo nge a thinrim ve tawh lutuk zawk ni.. 

"Tih tak emah te chuan mamawhnaah lo pawh in hmang nasa. Ka putea te chhungkua te khi eng nge kan inah an rawn awm ve ngawt a? " a rilru uptu a sawi chhuak ta. A nu chu a ling teh e. 

"I patea te leh papuia ten min awmpui thei lo va, ka naute chhungkua rawn awm chu i lo hmumawh viau a ni maw? Ka nau te an nia, ka thu thu, inrawlh suh ka tih kha. Khanglang che chuan le.. " a ti hlawih hlawih a. 

"Eee.. Keini pawh kan rawn awm thei reng alawm. I fate zawk sawm lo va an ni i sawm hian chhan a neih ka ring hlel lo ve" a ti ve hmiah. A nu tawng leh hma chuan, Nguri chuan, "Duhtawk ru.. Aizawlah ka phei ang a, a dik vek mai ang. Nu, pawisa chu lungkham suh. Kei pawn ka ac-ah tlem a zawng ka la nei ve e. Tihdan a awm mai ang. Mahse, B. Ed hi chu ka zo duh a ni" a lo ti ta vat a. Aw pangngai takin a sawi. 

"I bialpa hmu châk pheng hi Aizawl phei chu i phur hârh hârh hle mai a.. Hre rawh, ka thu lo chuan he i bialpa hi i nei dawn hlek lo ania" a ti piap piap a. 

"I phal hun kan nghak thei alawm" a lo ti dam diai thung. A nu chuan chhan leh ngaihna a hre tawh lo nge.. "A nih tak chu" a ti ringawt. A tum ang ngawt chuan a kal dawn lo a nih hmel e. 

Lawmsanga bula sawi lehin lo ngaichang turin a ti ta ringawt. A chhan chu Lawmsanga rawn kal ringawt se a nu chuan a zia chhuahin phal leh ta si lo se la an mualpho ang tih a hlauhawm ve bawk a ni. A nu daih hun nghah thiam pawh chu a tha zawkin an hre ta ve ve a. Lawmsanga pawh a thinrim bik lo niin a lang. Nguri nen an inbe zo chu tukverhah dak vang vangin, "Ka pi, i fanu hi ka nei dawn tho tho ania.. " tiin a phun sup a.. 

(Vawiin zet zawng tum luih chawp tih takah a ngaibnawm ka ring lo. Mahse, naktuk ka chawl dawn sia.. Rawn dah hram loh chu ka tia.. Ka zep lo. Ka tum lui.. Plot duansa ka nei lo.. Ka hel nuai tawp sia.. Min hrethiam ru aw.. ❤